Teubileueng

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36


Chapter 1

1 Nibak tanggai sa buleuen dua nibak thon nyang keudua óh kalheueh bansa Israel jitinggai nanggroe Meusé, TUHAN laju geupeugah ubak Nabi Musa didalam Khimah TUHAN di padang pasi Sinai. Kheun gobnyan,
2 "Gata dan Nabi Harun harôh kheueh gata peuna seunsus ateueh banmandum umat Israel, meunurot kawöm dan keuluwarga awaknyan maséng-maséng. Gata peuget kheueh dafeutar nan banmandum ureuëng agam
3 nyang meu-umu dua ploh thon u ateueh nyang sanggob jeuet keu tantra. Awaknyan harôh kheueh teudafeutar meunurot pasokan jih maséng-maséng.
4 Nibak tieb-tieb sukée, gata lakée kheueh sidroe ureuëng peumimpén kawöm mangat jitulông gata."
5 Nyoe kheueh nan-nan ureuëng nyang geupiléh nibak umat keu jitulông Nabi Musa dan Nabi Harun dan nyang jeuet keu peumimpén maséng-maséng sukée, na kheueh: Sukée & Peumimpén
17 Deungon jitulông lé bandua blaih droe ureuëng nyan, Nabi Musa dan Nabi Harun
18 geuyue banmandum awaknyan meusapat nibak tanggai sa buleuen dua, laju óh lheuehnyan silsilah awaknyan geususon meunurot kawöm-kawöm nyang na didalam tieb-tieb sukée awaknyan. Nan-nan tieb ureuëng agam nyang meu-umu dua plôh thon u ateueh jicetet ngon ji itong,
19 lagée nyang geupeurintah lé TUHAN. Banmandum nyan geupeubuet lé Nabi Musa di padang pasi Sinai.
20 Ureuëng agam nyang meu-umu dua ploh thon u ateueh nyang kaék jeuet keu tantra, teudafeutar nan awaknyan meunurot kawöm dan keuluwarga jih nyan, phon nibak Ruben, aneuëk tuha Nabi Yakub trok ubak Naftali. Jeumeulah awaknyan na kheueh: Jeumeulah Ureuëng
47 Ureuëng-ureuëng Lewi hana rhoh teu itong meusajan deungon sukée-sukée laén,
48 Sabab TUHAN ka geupeugah ubak Nabi Musa,
49 "Bak watée gata tacetet nan-nan ureuëng nyang ék jeuet keu tantra, sukée Lewi nyan hana peu gata cetet.
50 Gatayue mantong awaknyan jijaga Khimah Ulôn deungon banmandum peuleungkapan jih. Tugaih awaknyan na kheueh jigulam Khimah Ulôn deungon banmandum peuleungkapan jih meunan cit jiuruih nyan sigoe guih teuma. Awaknyan harôh kheueh jipeudong khimah droe jih ban seukeulileng Khimah Ulôn nyan.
51 Teuma meunyoe gata taminah, ureuëng-ureuëng Lewinyan harôh kheueh jireuloh Khimah Ulôn, laju atranyan jipeudong lom teuma nibak teumpat teupeudong Khimah nyang barô. Seulaén awaknyan, soe mantong nyang jipeutoe ubak Khimah nyan ureuëngnyan harôh teuhuköm maté.
52 Ureuëng-ureuëng Israel nyang laén nyan harôh kheueh jipeudong khimah jihnyan meukeulompok-keulompok, tieb-tieb ureuëng didalam keulompok jih nyan harôh kheueh jikeulileng lé bupanji jih maséng-maséng.
53 Teuma ureuëng-ureuëng Lewi harôh kheueh jipeudong khimah jih nyan di seukeulileng Khimah Ulôn. Awaknyan harôh kheueh jijaga mangat hana ureuëng nyang jicuba-cuba peuto keunan, sampoe jeuet teupeusabab Ulôn beungéh dan Ulôn huköm umat Israel."
54 Teuma di ureuëng Israel nyan laju jipeubuet peue nyang ka geupeurintah lé TUHAN ubak Nabi Musa.


Chapter 2

1 TUHAN meufeureuman ubak Nabi Musa dan Nabi Harun:
2 "Bak watée ureuëng Israel jipeudong Khimah, tieb-tieb ureuëng bah kheueh jipeudong khimah jih nibak ban silingka bupanji keusatuan droe jih deungon lambang kawöm jih keudroe teuma. Banmandum khimah-khimah nyan bah kheueh jipeudong ban seukeulileng Khimah Ulôn, teuma beujiôh bacut nibak Khimah Ulôn nyan."
3 Di siblaih u timu, tantra nyang dimiyueb keusatuan Yehuda harôh jimeukhimah meunurot pasokan dan peumimpén jih maséng-maséng lam sinuson nyoe: Sukée & Peumimpén & Jeumeulah Ureuëng
10 Disiblaih u seulatan, tantra nyang dimiyueb peumimpén bupanji Ruben, awaknyan harôh kheueh jipeudong khimah meunurot pasokan ngon peumimpén jih maséng-maséng lam sinuson nyoe: Sukée & Peumimpén & Jeumeulah Ureuëng Ruben & Elizur bin Syedeur & Keusatuan Ruben harôh kheueh jibeurangkat sibagoe nyang keudua.
17 Óh ka lheueh nyan, lamkawan banmandum tantra Israel, jijak sukée Lewi sira jigulam Khimah TUHAN. Lagée awaknyan meukhimah, meunan cit teuma awaknyan jijak, maséng-maséng diteumpat jih keudroe meunurot bupanji awaknyan keudroe.
18 Disiblaih u barat, tantra nyang dimiyueb bupanji tantra Efraim harôh kheueh jimeukhimah meunurot pasokan deungon peumimpén maséng-maséng lam sinuson nyang lagée nyoe: Sukée & Peumimpén & Jeumeulah Ureuëng Keusatuan Efraim nyan harôh kheueh jijak dilikot sukée Lewi.
25 Disiblaih utara, tantra nyang dimiyueb bupanji keusatuan Dan harôh meukhimah pasokan deungon peumimpén jih maséng-maséng lam sinuson nyoe: Sukée & Peumimpén & Jeumeulah Ureuëng
32 Jeumeulah ureuëng Israel nyang teudafeutar meunurot pasokan maséng-maséng na kheueh 603.550 droe.
33 Lagée nyang geupeurintah lé TUHAN ubak Nabi Musa, ureuëng Lewi hana teudafeutar meusajan ngon ureuëng-ureuëng Israel nyang laén.
34 Ureuëng Israel jipeubuet banmandum peue-peue nyang geupeurintah lé TUHAN ubak Nabi Musa. Maséng-maséng jipeudong khimah nibak seukeulileng bupanji jih nyan keudroe, dan jibeurangkat meunurot kawöm dan keuluwarga jih nyan teuma.


Chapter 3

1 Nyoe kheueh keuluwarga Nabi Harun dan Nabi Musa nibak watée TUHAN geumeututoe deungon Nabi Musa di ateueh Gunong Sinai.
2 Nabi Harun na geumeu aneuëk peuet droe aneuëk agam. Nyang tuha nan jih Nadab, óh lheuehnyan Abihu, Eleazar dan Itamar.
3 Awaknyan ka geupeubaiát sibagoe imeum deungon cara upacara teupeurô minyéuk di ateueh ulée awaknyan.
4 Teuma Nadab ngon Abihu maté di ateueh padang pasi Sinai, bak watée awaknyan jijak meuhadab TUHAN deungon apui nyang hana haleue. Awaknyan bandua hana jitem meu aneuëk. Jadi simantong Nabi Harun udeb, Eleazar dan Itamar jimeutugaih sibagoe imeum.
5 TUHAN geumeufeureuman lom ubak Nabi Musa,
6 "Gata yue kheueh sukée Lewi nyan jijak meuhadab, dan tunyok kheueh awaknyan jeuet keupeulayan-peulayan Nabi Harun.
7 Awaknyan jimeutugaih di Khimah Ulôn dan harôh jijak peutimang teungku imeum dan banmandum umat deungon meuneubuet awaknyan di Khimah Ulôn.
8 Tugaih awaknyan na kheueh jiurôh banmandum peuleungkapan jih didalam Khimah Ulôn sibagoe geunantoe ureuëng-ureuëng Israel.
9 Nibak bansa Israel, teuma sukée Lewi nyang Ulôn bri tugaih jeuet keupeulayan teutab keu Nabi Harun dan keuturonan jih nyan.
10 Teuma Nabi Harun dan aneuëk-aneuëk jih bah Ulôn angkat mangat Ulôn bri tugaih sibagoe imeum; seulaén awaknyan, soe mantong nyang jicuba peukaru tugaih nyan ureuëng nyan harôh teuhuköm maté."
11 TUHAN geumeufeureuman lom,
12 "Jinoenyoe ureuëng-ureuëng Lewi Ulôn piléh jeuet keu milék Ulôn. Bak watée Ulôn poh maté banmandum aneuëk tuha bansa Meusé, Ulôn peukhusos keu Ulôn banmandum aneuëk agam nyang tuha nibak bansa Israel dan meunan cit banmandum beulatang peulara awaknyan nyang phon-phon lahé. Banmandum nyan na kheueh hak milék Ulôn. Sibagoe keugantoe aneuëk-aneuëk tuha bansa Israel, laju Ulôn cok ureuëng Lewi keu Ulôn; awaknyan teuma jeuet keuhak milék Ulôn. Ulôn kheueh TUHAN."
14 Dipadang pasi Gunong Sinai TUHAN geuyue ubak Nabi Musa
15 geuyue peuget dafeutar ureuëng-ureuëng Lewi meunurot kawöm dan keuluwarga jihnyan maséng-maséng; tieb-tieb aneuëk agam nyang meu-umu sibeuleuen u ateueh harôh kheueh teucetet nan jih.
16 Laju Nabi Musa geupeubuet peue nyang ka geupeurintah lé TUHAN ubak gobnyan nyan.
17 Lewi na lhée droe aneuëk agam: Gerson, Kehat dan Merari. Awaknyan na kheueh indatu kawöm-kawöm nyang teupeugah meunurot nan awaknyan. Gerson na teuma dua droe aneuëk agam: Libni dan Simei. Bak si Kehat na teuma peuet droe aneuëk agam: Amram, Yizhar, Hebron dan Uziel. Merari na teuma dua droe aneuëk agam: Mahli dan Musi. Awaknyan na kheueh indatu nibak keuluwarga-keuluwarga nyang teupeugah meunurot nan awaknyan.
21 Kawöm Gerson na kheueh nibak keuluwarga Libni dan Simei.
22 Jeumeulah ureuëng agam nibak kawöm Gerson nyang meu-umu si buleuen u ateueh nyang teucetet 7.500.
23 Elyasaf aneuëk Lael nyang jeuet keu ulée kawöm nyan. Dalam khimah-khimah bansa Israel, kawömnyan jicok teumpat disiblaih u barat dilikot Khimah TUHAN.
25 Dalam hai teu urôh Khimah TUHAN, awaknyan meutanggong jaweueb ateueh Khimah dan sinutôb jihnyan, ija nibak babah pintoe rot tamong nyan,
26 layeue peulataran nyang jikeulileng Khimah dan miseubah, dan ija tirée pintoe nibak peulataran nyan. Awaknyan meutanggong jaweueb ateueh banmandum meuneubuet nyang na hubongan deungon barang-barang nyan.
27 Kawöm Kehat na kheueh nibak keuluwarga-keuluwarga Amram, Yizhar, Hebron dan Uziel.
28 Ureuëng agam nyang meu-umu sibuleuen u ateueh nibak kawöm nyan banmandum nyan na sijeumeulah 8.600 droe. Awaknyan tugaih jih jiurôh barang-barang nyang na di Khimah TUHAN.
29 Elisafan aneuëk Uziel nyang jeuet keu ulée kawöm nyan. Didalam khimah-khimah, kawöm nyan jicok teumpat di siblaih u seulatan Khimah TUHAN.
31 Awaknyan meutanggong jaweueb u ateueh Peuto Peujanjian nyan, meja, gaki panyöt, miseubah-miseubah, alat-alat nyang geungui lé imeum di Ruweueng Suci dan tirée nyang jiôh bacut nibak Ruweueng Suci. Awaknyan meutanggong jaweueb u ateueh banmandum meuneubuet nyang na hubongan deungon barang-barang nyan.
32 Ulée sukée Lewi na kheueh Eleazar, aneuëk Nabi Harun. Gobnyan geukawai ureuëng-ureuëng nyang meutugaih di dalam Ruweueng Suci.
33 Kawöm Merari na kheueh nibak keuluwarga Mahli dan keuluwarga Musi.
34 Ureuëng nyang meu-umu sibuleuen u ateueh nibak kawöm nyan banmandum na sijeumeulah 6.200 droe.
35 Zuriel aneuëk Abihail nyang jeuet keu ulée nibak kawöm nyan. Didalam khimah-khimah, kawöm nyan jicok teumpat di siblaih utara Khimah TUHAN.
36 Awaknyan meutanggong jaweueb ateueh rungka Khimah nyan, balok-balok jih, taméh-taméh jih, keunaleueng jih, dan banmandum peukakaih meunan cit sigala meuneubuet jihnyan nyang na hubongan deungon barang-barang nyan.
37 Meunan cit u ateueh taméh-taméh, keunaleueng, bajo-bajo dan talo teumalo keu peulataran jihnyan.
38 Di dalam peukhimahan nyan, Nabi Musa ngon Nabi Harun dan meunan cit teuma deungon aneuëk-aneuëk geuhnyan harôh kheueh jicok teumpat dikeue Khimah TUHAN, siblaih u timu nyan. Awaknyan meutanggong jaweueb ateueh upacara iébadat keu bansa Israel didalam Ruweueng Suci. Seulaén awaknyan, soe mantong nyang jicuba-cuba jikeuneuk peubuet hai nyan ureuëng nyan harôh teuhuköm maté.
39 Banmandum ureuëng agam lam sukée Lewi nyang meu-umu sibuleuen u ateueh geudafeutar lé Nabi Musa meunurot kawöm awaknyan maséng-maséng ateueh peurintah TUHAN, jeumeulah jihnyan banmandum na 22.000 droe.
40 TUHAN geumeufeureuman lom ubak Nabi Musa, "Banmandum aneuëk agam nyang tuha nibak ureuëng Israel na kheueh atra Ulôn. Neucetet kheueh nan-nan awaknyan nyang meu-umu sibuleuen u ateueh. Teuma keu gantoe awaknyan, Ulôn peugah bahwa banmandum ureuëng Lewi na kheueh hak milék Ulôn. Ulôn kheueh TUHAN! Dan beulatang peulara ureuëng Lewi pih Ulôn peugah keugeunantoe banmandum nyang phon-phon lahé lamkawan beulatang peulara bansa Israel."
42 Nabi Musa laju geupeubuet peue nyang geupeurintah lé TUHAN ubak gobnyan; laju geucetet banmandum nan-nan aneuëk agam nyang tuha
43 nyang meu umu sibuleuen u ateueh. Awaknyan banmandum na jeumeulah jih 22.273 droe.
44 Laju TUHAN meufeureuman lom ubak Nabi Musa,
45 "Gata peukhusos kheueh ureuëng-ureuëng Lewi nyan keu Ulôn sibagoe keugantoe banmandum aneuëk tuha nibak bansa Israel; meunan cit beulatang peulara ureuëng Lewi sibagoe keugantoe beulatang ureuëng Israel.
46 Sabab aneuëk-aneuëk agam nyang tuha nibak ureuëng Israel 273 droe leubeh le nibak jeumeulah ureuëng Lewi, teuma nyang leubeh nyan harôh kheueh gata teuboih.
47 Keu tieb-tieb aneuëk, gata harôh tabayeue limong péng pirak meunurot yum nyang lazem nibak Khimah Ulôn;
48 gata bri kheueh laju péng nyan ubak Nabi Harun dan aneuëk-aneuëk jihnyan."
49 Nabi Musa geupeubuet laju peue nyang ka geupeurintah lé TUHAN nyan.
50 Gobnyan laju geucok 1.365 péng pirak,
51 dan geujôk laju atranyan ubak Nabi Harun dan aneuëk-aneuëk geuhnyan.


Chapter 4

1 TUHAN meufeureuman ubak Nabi Musa dan Nabi Harun
2 mangat geupeuna seunsus keu ureuëng Lewi nibak kawöm Kehat meunurot keuluwarga awaknyan maséng-maséng,
3 laju geucetet nan banmandum ureuëng agam nyang meu-umu lhée ploh sampoe ubak umu limong ploh thon, nyang hase jimeubuet nibak Khimah TUHAN.
4 Buet awaknyan na kheueh ji urôh barang-barang nyang mahasuci.
5 TUHAN geubri lom ubak Nabi Musa peuratoran nyoe: Meunyoe ka trok watée jih keu teureulôh khimah-khimah, Nabi Harun dan aneuëk-aneuëk geuhnyan harôh jitamong u dalam Khimah TUHAN, geupeutreun tirée dikeue Peuto Peujanjian, dan geutob lajunyan deungon ija.
6 Óh ka lheuehnyan, awaknyan harôh kheueh jitôb lom teuma deungon siôn kulét nyang halôh, laju teuma jileueng siôn ija ijo di ateueh nyan, dan jipasang laju kayée keu ngon gulam Peuto nyan.
7 Awaknyan harôh teuma jileueng siôn ija ijo di ateueh meja teumpat teukeubah ruti sajian keu TUHAN, dan di ateueh meja nyan harôh teuma awaknyan keubah pingan, baki teumpat dupa, baki teumpat peuseumahan, dan ciriek ié keu teumpat peuseumahan ié anggô. Ruti sajian bah kheueh déh jih sabe na di ateueh meja nyan.
8 Banmandum nyan bah kheueh sabe jitôb lé awaknyan deungon siôn ija mirah, laju di ateueh nyan jileueng teuma siôn kulét halôh, dan laju jipasang kayée geunulam nibak meja nyan.
9 Awaknyan bah kheueh jicok siôn ija ijo jitôb ateueh gaki panyöt meunan cit ateueh panyöt nyan, alat keu ngon sampôh dah panyöt nyan meunan cit ngon peunadah jih, dan banmandum teumpat minyéuk zaiton.
10 Gaki panyöt dan banmandum peuleungkapan jihnyan harôh kheueh awaknyan bungkôh deungon sikrak kulét halôh laju atranyan jipeuduek di ateueh teumpat geunulam.
11 Óh ka lheuehnyan lé awaknyan jileueng teuma siôn ija ijo di ateueh miseubah nyang nibak méuh nyan, dan atranyan laju jitôb teuma deungon siôn kulét halôh, laju jipasang kayée geunulam miseubah nyan.
12 Banmandum alat-alat nyang jingui didalam Ruweueng suci nyan harôh kheueh awaknyan cok dan jibungkôh deungon siôn ija ijo. Laju atranyan jitôb teuma deungon siôn kulét halôh, dan atranyan laju jikeubah di ateueh geunulam.
13 Awaknyan harôh teuma jipeugleh miseubah nyan nibak abée, óh lheueh nyan jileueng teuma laju siôn ija ungu di ateueh nyan.
14 Dan di ateueh nyan teuma bah kheueh jikeubah lé awaknyan banmandum peuralatan nyang teungui bak watée iébadat nibak miseubah nyan: teumpat apui, geureupu, sudok, dan baskom. Banmandum nyan harôh kheueh jitôb deungon siôn kulét halôh dan geupasang laju kayée geunulam nyan.
15 TUHAN meufeureuman ubak Nabi Musa dan Nabi Harun, "Bak watée teureulôh khimah-khimah, Nabi Harun dan aneuëk-aneuëk jihnyan bah kheueh jitamong u dalam Khimah Ulôn dan jitôb banmandum barang dan peuleungkapan nyang na disinan. Barô kheueh óh lheueh nyan, ureuëng Kehat jeuet jiteuka keu jijak gulam atranyan. Teuma hana jeuet jikalon lé awaknyan, jipeuto atawa jicukéh barang-barang nyan, sabab barang nyan ka teupeukhusos keu Ulôn. Meunyoe awaknyan jipeubuet cit nyang ka teutam nyan, awaknyan teuma maté. Jadi, mangat ureuëng-ureuëng Kehat nyan hana teusampôh nibak sukée Lewi, Nabi Harun dan aneuëk-aneuëk jihnyan harôh kheueh jibri tugaih maséng-maséng lamkawan awaknyan peue nyang museuti awaknyan ba. Nyan kheueh tugaih ureuëng-ureuëng Kehat nibak watée Khimah Ulôn teupinah. Eleazar, aneuëk Nabi Harun, meutanggong jaweueb u ateueh banmandum Khimah Ulôn, minyéuk panyöt, dupa, keureubeuen gandom keu sajian teutab, minyéuk upacara dan banmandum nyang na didalam Khimah Ulôn."
21 TUHAN geuyue lom ubak Nabi Musa
22 mangat geupeuna seunsus ateueh ureuëng Lewi nibak kawöm Gerson meunurot keuluwarga maséng-maséng.
23 Nabi Musa harôh geucetet nan banmandum ureuëng nyang meu umu phon lhée ploh sampoe ubak umu limong ploh thon nyang sanggob jipeubuet buet wajéb keureuja di Khimah TUHAN.
24 Awaknyan geubri tugaih keu ji angkot barang-barang nyoe:
25 Ija tenda Khimah nyan deungon sinutôb jih siblaih didalam dan siblaih diluwa nyang teupeuget nibak kulét nyang halôh, ija nibak babah pintoe Khimah,
26 layeue-layeue dan meubagoe talo keu peulataran nibak binéh Khimah dan miseubah, ija nibak geureubang peulataran, dan banmandum peuleungkapan nyang geungui keu teupeungui banmandum barang nyan. Awaknyan meutanggong jaweueb ateueh banmandum buet-buet nyang na hubongan deungon barang-barang nyan.
27 Nabi Musa dan Nabi Harun harôh geu jaga sabe mangat buet-buet nyang geuseurah lé Nabi Harun dan aneuëk-aneuëk geuhnyan ubak ureuëng-ureuëng Gerson nyan jikeureuja teuma, dan banmandum barang nyang harôh teuba, beuteuba.
28 Nyan kheueh tugaih ureuëng-ureuëng Gerson di dalam Khimah; tugaih-tugaih nyan harôh kheueh jipeubuet di miyueb pimpénan Itamar, aneuëk Imeum Nabi Harun.
29 TUHAN meufeureuman lom ubak Nabi Musa mangat geujak peuna seunsus ureuëng Lewi nibak kawöm Merari meunurot keuluwarga jihnyan maséng-maséng.
30 Nabi Musa harôh geucetet nan banmandum ureuëng agam nyang meu-umu lhée ploh sampoe limong ploh thon nyang sanggob jipeubuet wajéb meukeureuja di Khimah TUHAN.
31 Awaknyan geubri tugaih keu jijakba rungka-rungka Khimah nyan, balok-balok jih, taméh-taméh jih dan meunan cit deungon keunaleueng jih.
32 Meunan cit deungon taméh-taméh peulataran diban silingka Khimah nyan meunan cit deungon keunaleueng jih, patok-patok jih dan talo teumalo jih deungon banmandum peukakaih nyang teupeureulée keu ngon peudong jih. Tieb-tieb ureuëng geubri tugaih jiba barang-barang nyang ka teupeuteuntée.
33 Nyan kheueh tugaih-tugaih kawöm Merari; banmandum buet awaknyan di Khimah TUHAN harôh jipeubuet dimiyueb pimpénan Itamar, aneuëk Imeum Nabi Harun.
34 Paih lagée peurintah TUHAN, Nabi Musa, Nabi Harun dan banmandum peumimpén umat geupeuna laju seunsus ubak ban lhée boh kawöm nibak sukée Lewi, na kheueh Kehat, Gerson dan Merari. Cara awaknyan jipeubuet seunsus nyan na kheueh nibak keuluwarga ubak keuluwarga. Awaknyan jicetet banmandum phon nan ureuëng agam nyang meu-umu lhée ploh sampoe limong ploh thon nyang sanggob jikeureuja tugaih wajéb keureuja di Khimah TUHAN. Nyoe kheueh hase jih: Kawöm & Jeumeulah Ureuëng
49 Ateueh peurintah TUHAN rot Nabi Musa, tieb-tieb ureuëng geudafeutar dan geubri tanggong jaweueb maséng-maséng ateueh peue nyang harôh geupeutimang atawa peue nyang harôh geu seuôn.


Chapter 5

1 TUHAN meufeureuman ubak Nabi Musa,
2 "Gata jak peurintah kheueh laju ubak ureuëng Israel haba lagée nyoe: Banmandum ureuëng nyang keunong peunyakét kulét nyang bit-bit mubahya, atawa peunyakét keulamin, atawa nyang ka tupéeh deungon manyét, ureuëng nyan harôh kheueh teupeuteubiet nibak khimah ureuëng Israel.
3 Awaknyan harôh kheueh teuyue jak, mangat khimah-khimah hana keunong kuto, nibak teumpat Ulôn tinggai meusajan-sajan deungon umat Ulôn."
4 Ureuëng Israel laju jipeubuet banmandum peurintah nyan dan jipeuteubiet laju bubena ureuëng-ureuëng nyang meupeunyakét lagée nyan nibak khimah nyan.
5 TUHAN geubri ubak Nabi Musa peuratoran-peuratoran nyoe keu bansa Israel: Meunyoe sidroe-droe ureuëng nyang hana seutia ubak TUHAN deungon jipeubuet salah ateueh ureuëng laén,
7 ureuëng nyan harôh kheueh jiaku desya jih dan jibayeue sineuboh jih nyan deungon peunoh, teutamah lom ngon dua ploh peureusen, keu ureuëng nyang jipeurugoe nyan.
8 Teuma meunyoe ureuëng nyang jipeurugoe nyan ka meuninggai donya dan hana teuma jitinggai waréh syedara nyang toe, laju sineuboh nyan harôh kheueh jijok ubak TUHAN, dan nyan jeuet keujeumba imeum. Sineubohnyan hana jitamong keunan lagée leumô agam keu upacara peu amphon desya keu ureuëng nyang ka meusalah nyan.
9 Atra peue mantong nyang jipeuseumah lé ureuëng Israel ubak TUHAN, peuseumahan khusos jihnyan ka jeuet keujeumba imeum nyang teurimong peuseumahan nyan.
10 Peue mantong nyang jipeuseumah lé sidroe-droe ureuëng ubak TUHAN, nyan ka jeuet keujeumba ureuëng nyan keudroe. Teuma peue mantong nyang jipeuseumah ubak sidroe imeum, nyan ka jeuet keujeumba imeum.
11 TUHAN meufeureuman ubak Nabi Musa
12 deungon peuratoran-peuratoran lagée nyoe ubak bansa Israel. Jeuet mantong sidroe ureuëng agam jicuriga keu peurumoh jih. Jihnyan jisangka bahwa ureuëng binoe jih hana seutia ubak jihyan dan ka teuma jipeukuto droe jih sabab ka jimeumukah deungon ureuëng agam nyang laén. Teuma ureuëng lakoenyan hana jiteumé keupastian, sabab hai nyang jipeubuet lé peurumoh atawa binoe jihnyan ngon cara jimeusom-meusom; saksi keuhai nyan hana teuma, dan jihnyan hana teuma teudrob basah. Atawa jeuet cit teuma di ureuëng lakoe jicuriga, padahai peurumoh jihnyan hana teuma ji meumukah ngon ureuëng agam nyang laén.
15 Dalam hai nyang dua masa alah nyan di ureuëng lakoe harôh kheueh jiba peurumoh jih nyan ubak imeum. Meunan cit jihnyan harôh kheueh jiba peuseumahan nyang teupeureulée, na kheueh sikilo gram teupông gandom. Teupông nyan hana jeuet teuro ngon minyéuk zaiton atawa teuboh ngon dupa, sabab atranyan peuseumahan nyang teucuriga dan teumeukeusut sibagoe tanda na jih curiga si ureuëng lakoe keu ureuëng bino jih nyan.
16 Di imeum harôh kheueh geuyue ureuëng inong nyan jidong di keue miseubah meuhadab TUHAN.
17 Laju lé imeum geucok laju saboh cangkie tanoh dan geuroe laju bacut ié suci u dalam cangkie tanoh nyan. Óh lheueh nyan gobnyan geucok laju abée nibak aleue Khimah TUHAN laju atranyan geupeutamong u dalam ié nyan.
18 Óh lheueh nyan jiploih laju ôk ureuëng inong nyan, dan teupông keucurigaan nyan jikeubah laju teuma u dalam paleuet, seudangkan di teungku imeum keudroe geumat ié phet dan nyan kheueh ié nyang teupeuteuka kutok.
19 Óh lheuehnyan lé imeum geupeugah laju sumpah dan sira geulakée ureuëng inong nyan jisituju keuhainyan. Imeum harôh geupeugah, "Meunyoe gata hana tameumukah, gata hana keunong kutok nyang jipeuteuka lé ié nyoe.
20 Teuma meunyoe gata ka neumeumukah,
21 seumoga TUHAN geupeujeuet nan gata jeuet keu sumpah ngon kutok lamkawan bansa gata. Seumoga lé Gobnyan geupeujeuet lhak pha gata jeuet keu kroet dan pruet gata pi jiteuka gumbong.
22 Ié nyang jipeuteuka kutoknyoe teuma jitamong u dalam pruet gata deungon nyan teuma pruet gata jeuet keu gumbong meunan cit teupeukroet teuma lhak pha gata." Ureuëng inong nyan harôh jijaweueb, "Ulôn situju; Seumoga TUHAN geupeujeuet meunan."
23 Laju di imeum geutuléh laju kutoknyan u ateueh keureutah meugulong dan geusampôh teuma deungon ié nyang phet nyan.
24 Di imeum geuyue lom ureuëng inong nyan jijieb ié nyang phet nyang teupeuteuka kutok nyan. Meunyoe jijieb ié nyan jeuet keusabab rasa sakét.
25 Meunan cit di imeum geucok laju peuseumahan teupông nyan, dan atranyan geutunyok laju u keue TUHAN, laju geuba teuma u keu miseubah.
26 Laju lé gobnyan geucoklom saboh reugam teupông sibagoe tanda bahwa banmandum teupông nyan kalheueh geupeuseumah, laju atra nyan geutot teuma di ateueh miseubah. Akhé jih iényan geupeu jieb teuma ubak ureuëng inong nyan.
27 Seukira jih ureuëng inong nyan ka jimeumukah, deungon keunong ié nyan teupeusabab jihnyan sakét lagoena; pruet jih laju gumbong meunan cit deungon lhak pha jih pi laju teuma teuka kroet. Nan jihnyan jeuet keu sumpah ngon kutok lamkawan bansa jih keudroe.
28 Teuma seukira jih ureuëng inong nyan hana meusalah, jihnyan hana teuma keunong kutok dan mantong hase ji meu aneuëk.
29 Meunan kheueh peuratoran jih meunyoe sidroe ureuëng lakoe ceumeuru dan curiga bahwa peurumoh jih nyan ka jipeubuet jeuhet deungon ureuëng agam laén dan jipeukuto droe jihnyan. Ureuëng agam nyan harôh jijak peuhadab binoe jihnyan ubak TUHAN dan di imeum harôh teuma geupeubuet peuratoran nyan u ateueh ureuëng nyan.
31 Ureuëng agam nyan beubaih nibak salah jihnyan, teuma binoe jihnyan, meunyoe teunyata meusalah, harôh kheueh jitanggong bubena akibat jih.


Chapter 6

1 TUHAN meufeureuman ubak Nabi Musa
2 geuyue jak peusampoe peuratoran-peuratoran lagée nyoe keu ureuëng Israel. Tieb-tieb ureuëng agam atawa ureuëng inong nyang meusapat mangat udeb khusos keu TUHAN sibagoe sidroe nazir,
3 hana jeuet teujieb ié anggô dan meunan cit ié kreueh. Jihnyan hana jeuet jijieb ié kreueh peue mantong nyang teupeuget nibak boh anggô atawa nibak boh peue mantong. Meunan cit jihnyan hana jeuet jipajoh boh anggô nyang mantong barô atawa nyang ka thô, atawa peue mantong nyang meuasai nibak bak anggô; aneuëk jih atawa pucok jihpi hana jeuet jipajoh.
5 Meunyoe mantong jihnyan lam meukaôi hana jeuet jigunteng atawa jicuko ôk jihnyan. Nibak watéenyan ôk ngon janggot bah kheueh teupeubiyeu mantong jitimoh sampoe panyang. Jihnyan teuikat ubak kaôi sampoe teuma ubak watée teupeukhusos droe jih ubak TUHAN seuleusoe.
6 Ôk jihnyan na kheueh sibagoe tanda bahwa jihnyan teupeukhusos mantong ubak Po teu Allah. Simantong kaôi jihnyan na ureuëng nyan hana jeuet jipeukuto droe jih keudroe; jihnyan hana teuma jeuet jipeuto nibak manyét ureuëng maté, bahpi kheueh nyan manyét bapak jih keudroe, ma jihnyan, atawa syedara jih nyan saban cit hana jeuet jipeuto ngon jimat.
8 Meunyoe mantong jihnyan sidroe ureuëng nyang meujabat nazir, jihnyan na kheueh ureuëng khusos keu TUHAN.
9 Meunyoe ôk sidroe nazir nyang teupeukhusos jeuet keu kuto atawa najih kareuna jihnyan na toe ngon ureuëng maté deungon hana teusaja, teuma ureuëng nyan bah jipréh tujoh uroe treb jih; óh ka lheueh nyan harôh jicuko ôk nibak ulée jih meunan cit ngon janggot jih, barô kheueh jihnyan teukheun ka gleh.
10 Nibak uroe nyang keulapan jihnyan harôh jiba dua boh cicém mirah pati atawa cicém teukukur ubak imeum di babah pintoe Khimah TUHAN.
11 Cicém nyang saboh harôh jipeuseumah lé imeum sibagoe keureubeuen teupeu amphon desya, dan nyang saboh teuk keu keureubeuen nyang teutot gunaji keu teupeugadôh nyang kuto nibak jihnyan. Bak uroe nyan cit teuma jihnyan bah jipeukhusos lom teuma ôk jih nyan keu TUHAN
12 dan geupeubarô keuhai jipeujok droe jih sibagoe sidroe nazir. Jangka watée nyang ka lewat hana teu itongle sabab ka jeuet keu kuto. Sibagoe keureubeuen gantoe rugoe jihnyan harôh jipeuseumah saboh aneuëk bubiri nyang mantong meu-umu sithon.
13 Meunyoe kaôi sidroe nazir nyan ka seuleusoe, nazir nyan harôh teuma jipeubuet upacaranyoe. Ureuëng nyan harôh teu intat u babah pintoe Khimah TUHAN
14 deungon teuba sajan ubak TUHAN lhée boh beulatang peulara nyang hana meucupa: saboh bubiri agam nyang meu-umu sithon keu keureubeuen nyang teutot, saboh aneuëk bubiri nyang inong nyang mantong meu-umu sithon keu keureubeuen peu amphon desya, dan saboh bubiri agam keu keureubeuen peudamé.
15 Ureuëng nyan harôh jipeuseumah teuma saboh raga ruti nyang teupeuget hana meurago, na kheueh ruti bulat nyang teupeuget nibak teupông teujampu deungon minyéuk zaiton dan kue lipeh nyang teusiliek ngon minyéuk zaiton. Seulaén nibak nyan ureuëng nyan harôh teuma jipeuseumah keureubeuen sajian dan keureubeuen nyang teujieb.
16 Lé imeum harôh geuba banmandum nyan ukeue TUHAN, laju geupeuseumah keureubeuen peu amphon desya dan keureubeuen nyang teutot.
17 Meusigoe deungon ruti nyang saboh raga nyan, lé geuh nyan harôh teuma geupeuseumah bubiri agam nyan ubak TUHAN sibagoe keureubeuen peudamé. Meunan cit keureubeuen teuhidang dan keureubeuen nyang teujieb nyan harôh teupeuseumah ubak TUHAN.
18 Lé nazir nyan harôh kheueh teuma jicuko ôk jihnyan di babah pintoe Khimah TUHAN, dan lheueh nyan rhom laju atranyan u dalam apui diteumpat keureubeuen peudamé nyang teungoh teutot.
19 Óh kalheueh nyan, meunyoe pha keu bubiri agam nyan ka teupeumasak, lé imeum harôh geucok atranyan dan geukeubah atranyan meusajan-sajan deungon saboh ruti nyang bulat dan saboh teuma kue lipéh nibak raga nyan u dalam paleuet jaroe ureuëng nazir nyan.
20 Laju lé imeum harôh kheueh geutunyok peunajoh nyan sibagoe meuneubri khusos ubak TUHAN; nyan na kheueh jeumba suci nyang ka jeuet keu jeumba imeum, seulaén dada dan pha bubiri agam nyang meunurot peuratoran ka jeuet keu jeumba imeum. Barô kheueh óh ka lheueh nyan lé nazir nyan ka jeuet jijieb ié anggô.
21 Nyan kheueh peuratoran keu ureuëng nazir; teuma meunyoe sidroe nazir geupeujanji keureubeuen nyang leubeh nibak syarat-syarat kaôi jihnyan, gobnyan harôh geupeupeunoh deungon paih peue nyang ka geupeujanji nyan.
22 TUHAN meufeureuman lom ubak Nabi Musa
23 mangat geujak peusampoe ubak Nabi Harun dan aneuëk-aneuëk geuhnyan bahwa awaknyan harôh jipeugah nariet nyoe bak watée awaknyan geubri beureukat keu bansa Israel:
24 Seumoga TUHAN geubri beureukat dan geupeulara gata.
25 Seumoga TUHAN geumeuget até dan murah até keu gata.
26 Seumoga TUHAN geubri beureukat keu gata dan geubri teuma keu gata damé.
27 Dan TUHAN meufeureuman, "Meunyoe awaknyan ji teuôh nan Ulôn sibagoe beureukat ateueh bansa Israel, Ulôn teuma Lôn bri beureukat keu awaknyan."


Chapter 7

1 Bak watée ka seuleusoe geupeudong Khimah TUHAN lé Nabi Musa, laju Khimah nyan deungon sigala peuleungkapan jih geubaiát laju meunan cit banmandum peuleungkapan jihnyan geusiliek deungon minyéuk upacara. Meunan cit atranyan geupeusiliek ubak miseubah deungon sigala peuleungkapan jihnyan.
2 Laju lé ureuëng-ureuëng patot Israel, na kheueh ulée sukée nyang meutanggong jaweueb ateueh teupeubuet keuhai seunsus nyan,
3 geupeuseumah u keue TUHAN nam boh geureubak leumô meusigoe deungon leumô jih na dua blaih boh: Tieb-tieb dua droe peumimpén jideureuma saboh geureubak, dan maséng-maséng saboh teuma leumô. Óh ka lheueh seuleusoe atranyan jipeuseumah lé awaknyan,
4 TUHAN geupeugah ubak Nabi Musa,
5 "Teurimong kheueh meuneubri-meuneubri peuseumahan nyan keu teu angkot Khimah Ulôn; gata seurah kheueh banmandum nyan ubak ureuëng Lewi sisuai deungon tugaih awaknyan."
6 Laju geureubak-geureubak leumô meunan cit deungon banmandum leumô nyan geujok laju ubak ureuëng Lewi lé Nabi Musa.
7 Dua boh geureubak ngon peuet boh leumô geujok teuma keu ureuëng-ureuëng Gerson,
8 peuet boh geureubak ngon lapan boh leumô geujok teuma keu ureuëng-ureuëng Merari, sisuai deungon buet nyang awaknyan peubuet dimiyueb pimpénan Itamar, aneuëk Imeum Nabi Harun.
9 Teuma ureuëng-ureuëng Kehat hana jiteurimong geureubak meunan cit deungon Leumô nibak Nabi Musa, sabab barang-barang nyang suci nyang jeuet keu tanggong jaweueb awaknyan, harôh awaknyan gulam di ateueh bahô.
10 Lé peumimpén nyang jiba barang peuseumahan keu teupeuna upacara teubaiát miseubah. Bak watée awaknyan ka keumah keu jiba peuseumahan awaknyan u keue miseubah,
11 TUHAN meufeureuman lom ubak Nabi Musa, "Gatajak peugah kheueh laju ubak awaknyan bahwa tieb-tieb uroe nyang treb jih dua blaih uroe sidroe lamkawan peumimpén nyan harôh kheueh jipeuseumah keureubeuen jihnyan keu upacara teubaiát miseubah."
12 Maséng-maséng jiba peuseumahan meunurot urutan nyoe: Uroe & Sukée & Peumimpén Peuseumahan awaknyan maséng-maséng na kheueh saban: saboh pingan pirak nyang brat jih 1,5 kilogram dan saboh teuma baskom pirak nyang brat jih 800 gram, meunurot ceng nyang jipeuguna nibak Khimah TUHAN. Ban dua boh teumpat nyan peunoh teupaso deungon teupông teujampu ngon minyéuk keu peuseumahan sajian. Seulaén nibak nyan saboh teuma pingan méuh nyang brat jih na 110 gram nyang meu asoe dupa; saboh leumô agam nyang mantong muda, saboh bubiri agam dan saboh teuma aneuëk bubiri nyang meu-umu sithon keu keureubeuen nyang teutot, meunan cit saboh kaméng agam keu keureubeuen teupeu amphon desya; dua boh leumô, limong boh bubiri agam, limong boh kaméng agam, dan limong boh bubiri nyang meu-umu sithon keu keureubeuen peudamé.
84 Peuseumahan nyang jiba lé bandua blah droe peumimpén keu teubaiát miseubah nyan banmandum nyan na kheueh sidubnyoe: -- dua blah boh pingan pirak dan dua blah boh teuma baskom pirak nyang brat jih banmandum nyan na kheueh 27,6 kilogram -- dua blah boh pingan méuh nyang brat banmandum nyan na kheueh 1,32 kilogram, peunoh meuasoe ngon dupa -- dua blah boh teuma leumô agam, dua blah boh bubiri agam, dua blah boh aneuëk bubiri nyang mantong meu-umu sithon, meusajan deungon keureubeuen sajian sibagoe keuleungkapan jih keu keureubeuen nyang teutot -- dua blah boh teuma kaméng keu keureubeuen peu amphon desya -- dua ploh peuet boh leumô agam, nam ploh boh bubiri agam, nam ploh boh kaméng, dan nam ploh boh teuma aneuëk bubiri nyang meu-umu sithon keu keureubeuen peudamé.
89 Tieb-tieb geutamong lé Nabi Musa u dalam Khimah TUHAN keu geujak peugah haba deungon TUHAN, gobnyan geudeungoe su TUHAN nyang geupeugah ubak gobnyan nibak ateueh sinutôb Peuto Peujanjian lamkawan bandua patong kerub.


Chapter 8

1 TUHAN meufeureuman lom ubak Nabi Musa,
2 "Jak peugah kheueh laju ubak Nabi Harun bahwa bak watée jihnyan jipasang ban tujoh boh panyöt nibak gaki panyöt nyan, jihnyan harôh jipasang lagée nyan bagoe sampoe jipeupeungeueh bagian keue gaki panyöt nyan."
3 Nabi Harun geupeubuet laju peue nyang ka geupeurintah lé TUHAN ubak gobnyan nyan. Gobnyan laju geupasang panyöt nyan meuhadab u bagian keue nibak gaki panyöt nyan.
4 Teumpat panyötnyan, trok u ateueh dan bungöng-bungöng piasan jihnyan teupeuget nibak méuh nyang teu seupoh, meunurot cuntoh nyang ka geupeuleumah lé TUHAN ubak Nabi Musa.
5 TUHAN meufeureuman lom ubak Nabi Musa, "Gata peuaséng kheueh ureuëng-ureuëng Lewi nibak ureuëng-ureuëng Israel nyang laén dan gata peubuet kheueh laju upacara teupeusuci keu awaknyan
7 deungon caranyoe: Gata siték kheueh u ateueh awaknyan deungon ié keu upacara teupeusuci dan gata yue kheueh awaknyan jicuko bansaboh badan dan jirhah teuma peukayan jihnyan. Deungon lagée nyan awaknyan ka suci.
8 Meunan cit gata yue kheueh ubak awaknyan jijak cok saboh leumô agam nyang mantong muda meunan cit deungon keureubeuen teuhidang nibak teupông meujampu minyéuk. Meunan cit gata cok lom leumô agam nyang laén keu keureubeuen peu amphon desya.
9 Óh lheuehnyan gata peusapat kheueh banmandum umat Israel dan gatayue kheueh ubak ureuëng Lewi mangat jidong dikeue Khimah Ulôn.
10 Umatnyan harôh jipeuduek jaroe jihnyan di ateueh ulée ureuëng-ureuëng Lewi nyan,
11 meunan cit Nabi Harun laju teuma geupeuseumah ureuëng-ureuëng Lewi nyan sibagoe peuseumahan khusos nibak ureuëng-ureuëng Israel keu Ulôn, mangat awaknyan hase jipeubuet iébadat Ulôn.
12 Meunan cit di ureuëng Lewi nyan harôh teuma jipeuduek jaroe jihnyan u ateueh ban dua boh leumô agam nyan; nyang saboh bah jipeuseumah sibagoe keureubeuen teupeu amphon desya, dan nyang saboh teuk keu keureubeuen nyang teutot. Deungon upacaranyan ureuëng Lewi ka teupeu suci.
13 Gata peukhusos kheueh ureuëng Lewi nyan keu Ulôn dan tayue kheueh awaknyan jipeutimang Nabi Harun meunan cit deungon aneuëk-aneuëk jihnyan.
14 Deungon na upacaranyan gata ka tapeu siblaih ureuëng Lewi nibak ureuëng Israel nyang laén, mangat awaknyan ka jeuet keuhak milék Ulôn.
15 Óh ka lheueh gata peubuet upacara teuseurah ureuëng Lewi nyan, awaknyan meuhak jimeubuet didalam Khimah Ulôn.
16 Ulôn ka Ulôn peujeuet awaknyan keugeunantoe aneuëk tuha nyang agam nibak bansa Israel; teuma awaknyan na kheueh khusos keu Ulôn.
17 Bak watée Ulôn poh maté banmandum aneuëk tuha di nanggroe Meusé, aneuëk agam nyang tuha nibak tieb-tieb keuluwarga ureuëng Israel dan nibak tieb-tieb beulatang nyang lahé aneuëk nyang keuphon nyan pi ka Ulôn peujeuet keu hak milék Ulôn nyang khusos.
18 Jinoe sibagoe keugantoe banmandum aneuëk tuha Israel, Ulôn cok ureuëng-ureuëng Lewi,
19 dan ureuëng-ureuëng Lewi nyan Ulôn peujok laju ubak Nabi Harun meunan cit deungon aneuëk-aneuëk jih nyan, mangat awaknyan hase jimeutugaih keu ureuëng Israel di dalam Khimah Ulôn. Meunan cit mangat awaknyan jilakée mangat Ulôn peu amphon keu bansa Israel beujeuet bansa nyan hana keunong lé beuncana meunyoe awaknyan jijak tô-tô ubak teumpat nyang paleng suci nyan."
20 Lé sabab nyan, Nabi Musa, Nabi Harun dan banmandum umat Israel jipeuseumah ureuëng Lewi nyan ubak TUHAN, lagée nyang geupeurintah lé TUHAN ubak Nabi Musa.
21 Ureuëng-ureuëng Lewi nyan jipeubuet upacara teupeu gleh droe dan meunan cit jirhah sampoe gleh teuma peukayan jihnyan, laju Nabi Harun geupeuseumah awaknyan sibagoe peuseumahan khusos ubak TUHAN. Gobnyan geupeubuet cit teuma upacara teupeu gleh keu awaknyan.
22 Ureuëng Israel banmandum jipeubuet peue mantong nyang geupeurintah lé TUHAN ubak Nabi Musa keuhai ureuëng Lewi nyan. Deungon lagéenyan ureuëng Lewi meuteumé hak ji meukeureuja didalam Khimah TUHAN dimiyueb keumandoe Nabi Harun dan aneuëk-aneuëk geuhnyan.
23 TUHAN meufeureuman lom ubak Nabi Musa,
24 "Tieb-tieb ureuëng Lewi nyang meu-umu dua ploh limong thon u ateueh, ureuëng nyan harôh kheueh jipeubuet tugaih didalam Khimah Ulôn,
25 dan nibak umu limong ploh thon barô kheueh ureuëng nyan teupeu beubaih nibak tugaih jih nyan.
26 Óh ka lheueh nyan jihnyan jeuet jitulông ureuëng Lewi nyang laén nyang meutugaih didalam Khimah Ulôn, teuma jihnyan kon ureuëng meutugaih nyang teutab. Meunan kheueh cara jih teu atoe buet-buet ureuëng Lewi"


Chapter 9

1 Nibak buleuen sa bak thon nyang keudua óh ka lheueh bansa Israel jitinggai nanggroe Meusé, TUHAN meufeureuman ubak Nabi Musa di padang pasi Sinai.
2 Kheun TUHAN, "Nibak tanggai peuet blah buleuen nyoe, phon nibak saát mata uroe jilhob, ureuëng Israel harôh jipeuraya uroe raya Paskah meunurot peuratoran nyang ka teupeuteutab."
4 Teuma Nabi Musa geuyue bansa Israel mangat jipeuraya uroe raya Paskah.
5 Awaknyan jipeuraya nyan di padang pasi Sinai bak watée uroe seupôt tanggai peuet blah buleuen sa. Banmandum nyan awaknyan peubuet paih lagée nyang geupeurintah lé TUHAN ubak Nabi Musa.
6 Teuma lamkawan awaknyan na meupadubdroe nyang kuto sabab ka jimat manyét, deungon nyan awaknyan hana jeuet jipeuraya uroe raya Paskah nibak uroe nyan. Awaknyan laju jijak meuhadab Nabi Musa ngon Nabi Harun
7 dan laju jipeugah, "Kamoe ka kuto sabab ka kamoe mat manyét. Teuma pakon kamoe geupeukeucuali sampoe hana jeuet kamoe peuseumah keureubeuen ubak TUHAN meusigoe deungon syedara-syedara kamoe?"
8 Nabi Musa geujaweueb, "Neupréh dilée sampoe ulôn meuteumé peutunyok nibak Po teu TUHAN."
9 TUHAN geuyuelom ubak Nabi Musa
10 mangat geujak peusampoe ubak bansa Israel lagée nyoe, "Meunyoe lamkawan gata atawa keuturonan gata na nyang kuto atawa meunajih sabab ka jimat manyét atawa teungoh lam meuneujak nyang jiôh, ureuëng nyan harôh kheueh jipeuraya Paskah keu TUHAN.
11 Teuma peurayaan nyan harôh teupeuna sibuleuen óh lheuehnyan, na kheueh nibak malam tanggai peuet blah nibak buleuen nyang keudua. Tapeuraya kheueh uroenyan deungon gata makheun bubiri Paskah meunan cit deungon ruti nyang hana meurago lom teuma deungon gulée phet.
12 Bék gata tinggai sapeue nibak peunajoh nyan sampoe án singoh beungoh, dan bék teuma gata peupatah meu sikrék pi nibak tuleueng beulatang nyang teupeuseumah ubak Ulôn. Gata peuraya kheueh uroe raya Paskah nyan nyang sisuwai deungon sigala peuratoran jih.
13 Seubalék jih ureuëng nyang hana meunajih atawa hana kuto dan hana teuma mantong lam meuneujak, teuma nibak peurayaan uroe Paskah, teuma ureuëng nyang laén jipeubuet keuwajéban Paskah nyan, hana Ulôn anggab le sidroe ureuëng nyan nibak umat Ulôn, sabab jihnyan hana jipeuseumah keureubeuen keu Ulôn bak watée nyang ka teupeuteuntée. Ureuëng nyan harôh kheueh jitanggong banmandum akibat jih.
14 Meunyoe na lamkawan gata na ureuëng aséng nyang jikeuneuk peuraya uroe raya Paskah, jihnyan harôh kheueh jipeuraya nyang sisuai deungon banmandum peuratoran dan keuteutapan. Huköm nyan keunong ateueh banmandum ureuëng, bah kheuehnyan ureuëng Israel meunan cit nyang bukon."
15 Nibak uroe Khimah TUHAN teupeudong, teuka kheueh awan dan reudok nyang teutob Khimah nyan. Óh watée malam sampoe án beungoh awan nyan deuhjih lagée apui.
17 Tieb watée awan nyan jiék, ureuëng Israel laju jireuloh khimah-khimah jih, laju teuma jibeurangkat. Dan dipat awan nyan jitron, diteumpatnyan teuma awaknyan jipeudong khimah.
18 Ateueh peurintah TUHAN bansa Israel nyan jireuloh khimah dan ateueh peurintah TUHAN cit teuma khimahnyan jipeudong lom teuma. Seumantong awan nyan mantong na di ateueh Khimah TUHAN, awaknyan teutab na tinggai di teumpat nyan.
19 Meunyoe awan nyan treb na di ateueh khimah awaknyan, awaknyan keubit that taát ubak peuratoran TUHAN dan hana teuma jibeurangkat nibak teumpat nyan.
20 Teuma kadang-kadang na meupadub uroe mantong awan nyan na di ateueh Khimah awaknyan. Pakriban kheueh mantong, peurintah TUHAN kheueh nyang peuteuntée awaknyan tinggai nibak saboh teumpat atawa jijak lom teuma.
21 Kadang-kadang awan nyan teuma tinggai phon seupôt trok beungoh uroe, dan bak watée awan nyan jiék nibak beungoh uroe, awaknyan pi laju beurangkat. Pajan mantong awan nyan jiék, bah kheueh uroe meunan cit malam, awaknyan teutab cit jibeurangkat.
22 Simantong na awan nyan di ateueh Khimah TUHAN, aléh nyan treb jih dua uroe, sibuleuen, sithon atawa leubeh, sitréb nyan teuma awaknyan tinggai di teumpat nyan. Meunyoe awan nyan jiék, barô kheueh awaknyan jibeurangkat hoe nyan jijak awannyan teuma.
23 Awaknyan tinggai nibak saboh teumpat dan jibeurangkat u teumpat nyang laén sisuai deungon peurintah TUHAN nyang geubri lé TUHAN ubak Nabi Musa.


Chapter 10

1 TUHAN meufeureuman lom ubak Nabi Musa,
2 "Gata peuget kheueh dua boh beureuguih nibak pirak nyang teuseupoh keu teuhôi rakyat mangat jimeusapat atawa keu teuyue awaknyan mangat jijak.
3 Meunyoe ban dua boh beureuguih nyan jiyueb panyang su jih nyan muphom jih mandum umat harôh meusapat di seukeulileng gata dikeue pintoe Khimah Ulôn.
4 Teuma meunyoe saboh mantong nyang jiyueb, nyan saban cit muphom jih teuma keu ureuëng patot-patot mantong nyang harôh jimeusapat bansikeulileng gata.
5 Meunyoe beureuguih nyan teuyueb paneuk-paneuk su jih, nyan tanda jih sukée-sukée nyang jipeudong khimah disiblah rot timu harôh ji beurangkat.
6 Meunyoe beureuguih nyan teuyueb paneuk-paneuk su jih keu nyang keudua goe, teuma lé sukée-sukée nyang na disiblah seulatan harôh jibeurangkat. Jadi su beureuguih nyang paneuk-paneuk nyan tanda jih umat harôh jibeurangkat,
7 seudangkan su beureuguih nyang panyang nyan tanda jih umat harôh jimeusapat.
8 Beureuguih-beureuguih nyan harôh kheueh jiyueb lé teungku-teungku imeum, aneuëk-aneuëk Nabi Harun. Nyang kheueh peuratoran nyang harôh gata taát keu siumu masa.
9 Dan meunyoe gata tamuprang di nanggroe gata keu gata peuteuen droe ateueh musoh nyang jiseurang, gatayueb kheueh laju beureuguih-beureuguih nyan. Teuma Ulôn, TUHAN Allah gata, Lôn tulông dan Lôn peuseulamat gata nibak musoh-musoh gata nyan.
10 Meunan cit nibak uroe-uroe gata tameusuka ria, na kheueh nibak khanuri Buleuen Barô dan peurayaan-peurayaan nyang laén teuma, beureuguih nyan harôh kheueh gatayueb bak watée gata peuseumah keureubeuen nyang teutot dan keureubeuen peudamé keu Ulôn. Teuma Ulôn ku tulông gata. Ulôn kheueh TUHAN Allah gata."
11 Nibak thon nyang keudua óh ka lheueh bansa Israel jitinggai nanggroe Meusé, bak tanggai dua ploh buleuen dua, jiék kheueh awan nibak ateueh Khimah TUHAN.
12 Laju ureuëng Israel meutalo-talo jijak jitinggai padang pasi Sinai, dan awan nyan laju jipiôh bak watée awaknyan trok dipadang pasi Paran.
13 Nyan kheueh phon-phon that awaknyan jibeurangkat ateueh peurintah TUHAN meulalu Nabi Musa.
14 Dikeue that nyang beurangkat nyan na kheueh tantra nyang dimiyueb bupanji Yehuda, pasokan deumi pasokan: Nahason, aneuëk Aminadab peumimpén pasokan sukée Yehuda,
15 Netaneel aneuëk Zuar peumimpén pasokan sukée Isakhar,
16 dan Eliab aneuëk Helon nyang pimpén pasokan sukée Zebulon.
17 Laju Khimah TUHAN nyan ji reuloh, dan jibeurangkat kheueh laju kawöm Gerson dan Merari nyang gulam Khimah TUHAN nyan.
18 Óh lheueh nyan beurangkat kheueh teuma tantra nyang dimiyueb bupanji keusatuan Ruben, pasokan deumi pasokan: Elizur aneuëk Syedeur nyang pimpén pasokan sukée Ruben,
19 Selumiel aneuëk Zurisyadai geupimpén baresan sukée Simeon,
20 dan Elyasaf aneuëk Rehuel geupimpén teuma baresan sukée Gad.
21 Óh lheuehnyan beurangkat kheueh ureuëng-ureuëng Kehat nyang jiseuôn barang-barang suci. Meunyoe awaknyan ka trok ubak teumpat khimah-khimah nyang óh lheuehnyan, Khimah TUHAN ka jipeudong lom teuma.
22 Óh lheuehnyan jijak teuma tantra nyang dimiyueb bupanji sukée Efraim, pasokan deumi pasokan: Elisama aneuëk Amihud geupimpén pasokan sukée Efraim,
23 Gamaliel aneuëk Pedazur jipimpén teuma pasokan sukée Manasye,
24 dan Abidan aneuëk Gideoni jipimpén teuma baresan sukée Benyamin.
25 Akhé jih beurangkat kheueh teuma tantra nyang dimiyueb bupanji keusatuan sukée Dan. Awaknyan na kheueh peungawai dilikot banmandum keusatuan. Awaknyan jijak pasokan deumi pasokan: Ahiezer aneuëk Amisyadai nyang pimpén baresan sukée Dan.
26 Pagiel aneuëk Okhran jipimpén teuma baresan sukée Asyer,
27 dan Ahira aneuëk Enan jipimpén teuma baresan sukée Naftali.
28 Nyan kheueh urutan baresan ureuëng Israel, pasokan deumi pasokan, tieb-tieb watée awaknyan jibeurangkat keu jiminah.
29 Nabi Musa geupeugah ubak parui gobnyan, Hobab aneuëk Rehuel ureuëng Midian, "Kamoe teuma kamoejak u teumpat nyang meunurot geukheun lé TUHAN teuma geubri keu kamoe. TUHAN ka geubri janji nyang get keu ureuëng Israel. Lé sababnyan, gata seutôt kheueh, kamoe teuma kamoe peuget nyang get keu gata."
30 Geujaweueb lé Hobab, "Teurimong gaséh, teuma ulôn meuheuet keuneuk woe u gampông droe ulôn."
31 "Bék kheueh gata tinggai kamoe," geukheun lé Nabi Musa, "Gata hase jeuet keu ureuëng peutunyok rot ueh keu kamoe, sabab gata tateupeue dipat geutanyoe jeuet ta peudong khimah di padang pasi.
32 Meunyoe gata taseutôt, teuma banmandum nyang get nyang TUHAN keureuja keu kamoe, teuma kamoe peubuet cit nyan keu gata."
33 Óh ka lheueh bansa Israel nyan jitinggai Sinai, gunong teumpat tinggai TUHAN, awaknyan laju jijak lhée uroe treb jih. Peuto Peujanjian TUHAN sabe jiba teupeu awai nibak awaknyan keu teujak mita teumpat peudong khimah keu awaknyan.
34 Meunyoe awaknyan jibeurangkat nibak teumpat peukhimahan, awan TUHAN sabe na di ateueh óh watée uroe.
35 Tieb-tieb watée Peuto Peujanjian nyan teuma jiba sajan, Nabi Musa geupeugah, "Neubeudôh kheueh, ya TUHAN, neupeu crebre kheueh musoh droe neueh sampoe ureuëng nyang jibanci droeneueh jiplung banmandum."
36 Dan tieb-tieb watée Peuto Peujanjian nyan trok ubak teumpat peuniyôh, Nabi Musa geupeugah lom, "Neugisa kheueh ya TUHAN, ubak meuribée bansa Israel."


Chapter 11

1 Nibak siuroe bansa nyan jipeuphon aloh alah ubak TUHAN keuhai keususahan awaknyan. Watée geudeungoe awaknyan apoh apah, TUHAN that-that beungéh dan laju geupeuteuka apui u ateueh awaknyan. Apuinyan jimeu-éue laju lamkawan awaknyan dan laju tutong siladum nibak khimah-khimah awaknyan.
2 Ureuëng-ureuëng nyan laju jikliek-kliek jilakée tulông ubak Nabi Musa. Laju Nabi Musa geumeudóa ubak TUHAN, teuma lon kheueh laju apui nyan.
3 Sabab keujadian nyan, teumpatnyan geuboh nan Tabera, sabab nibak teumpatnyan apui TUHAN hu deungon raya that lamkawan awaknyan.
4 Nibak jijak ureuëng-ureuëng Israel nyan na cit teuma lamkawan nyan ureuëng aséng nyang seutôt sajan. Awaknyan meuheuet that keuneuk pajoh uengkot sie, dan meunan cit deungon ureuëng Israel ka teuma apoh apah. Kheun awaknyan, "Ah, cuba meunyoe na uengkot sie keugeutanyoe!
5 Tanyoe teuingat that keu uengkot nyang tanyoe pajoh deungon pre mantong di nanggroe Meusé, na boh timon, na boh timon bruek, prée, bawang mirah ngon bawang putéh!
6 Jinoenyoe geutanyoe ka habéh teunaga sabab hana peunajoh nyang laén seulaén manna mantong nyang deuh tanyoe kalon."
7 Rupa jih manna nyan lagée bijéh nyang ubit-ubit, hi jih putéh meujampu kunéng-kunéng.
8 Meunyoe ka trok bak watée malam manna nyan rhot meusigoe-sigoe deungon ié mbon u ateueh khimah-khimah. Óh ka beungoh uroe dumna ureuëng laju jijak keudéh keunoe keu jijak peusapat boh manna nyang rhot nyan, atranyan jigiléng sampoe jeuet keuteupông, dan jipeuget laju keu peunajoh kuwe nyang bulat teuma timpiek. Rasajih lagée kuwe nyang teupanggang di ateueh apui nyang teujampu deungon minyéuk zaiton.
10 Nabi Musa geudeungoe ureuëng-ureuëng Israel nyan jimeu ôk-ôk, sira jidong meu hudom-udom dikeue khimah droe jih. Teuma teuka kheueh beungéh TUHAN nyang lumpah brat sampoe Nabi Musa meurasa seudeh lagoena.
11 Dan geupeugah kheueh lé gobnyan ubak TUHAN, "Pakon Droeneueh ya TUHAN neupeususah ulôn lagéenyoe? Peu kheueh Droeneueh ya Allah hana neu galak keu ulôn? Pakon teuma Droeneueh neupeujok tanggong jaweueb banmandum ureuëngnyan u ateueh ulôn?
12 Peu kheueh ulôn nyang kandong atawa nyang peulahé awaknyan banmandum? Pakon kheueh Droeneueh neuyue ulôn jeuet lagée sidroe ureuëng dendayang nyang buet jih jiteumingkue aneuëk manyak nyan ban lahé, sampoe ulôn nyoe harôh lôn useuha awaknyan sipanyang rot u nanggroe nyang Droeneueh ka peujanji keu indatu awaknyan?
13 Neungieng kheueh nyan, awaknyan hana jipiôh ji meurengék jilakée uengkot sie. Dan dipat kheueh harôh lôn mita uengkot sie nyan keu awaknyan?
14 Hana ek le ulôn seuôn tanggong jaweueb nyang raya ngon brat nyan; lumpah that brat tanggong jaweuebnyan ateueh ulôn!
15 Meunyoe Droeneueh ya TUHAN hana neupiôh neupeusaneut ulôn lagéenyoe sabe, neugaséh kheueh keu ulôn; leubeh gét Droeneueh poh maté mantong ulôn nyoe jinoe cit teuma mangat ulôn nyoe hana le lôn tanggong ázeb deurita nyang lagéenyoe."
16 Laju meufeureuman kheueh TUHAN ubak Nabi Musa sira geupeugah lagéenyoe, "Gata peusapat kheueh lamkawan bansa Israel tujoh ploh droe ureuëng patot-patot nyang jiaku sibagoe peumimpén bansa. Gataba kheueh laju awaknyan ukeue Ulôn di dalam Khimah Ulôn, laju gata yuedong awaknyan disinan bak binéh gata.
17 Ulôn teuma Lôn treun Lôn jak peugah haba deungon gata nibak teumpatnyan, dan siladum nibak kuasa nyang ka Ulôn bri keu gata, nyan teuma Ulôn bri keu awaknyan. Dan deungon lagée nyan awaknyan ka hase jitulông gata jiseuôn tanggong jaweueb ateueh bansa nyoe, dan bék gata seuôn tanggongnyan sidroe gata.
18 Jinoenyoe gata peugah kheuehnyoe ubak bansa nyan: Peugleh kheueh droe gatanyan keu singoh beungoh; gata teuma tapajoh uengkot sie. TUHAN ka geudeungoe gatamo ngon apoh apah bahwa gata meuheuet that keuneuk pajoh uengkot sie, dan bahwa naseb gata leubeh jroh nibak watée di nanggroe Meusé. Jinoenyoe TUHAN teuma geubri gata uengkot sie, dan gata ka hase gata makheun atranyan.
19 Gata teuma tapajoh uengkot sie nyan kon mantong treb jih si uroe atawa dua uroe, atawa limong uroe atawa lom siploh uroe, dan hana teuma treb jihnyan dua ploh uroe,
20 teuma nyan sibeuleuen peunoh gata pajoh atranyan, sampoe gata rhot bak sakét dan muntah-muntah sabab tapajoh sie nyan. Hainyan jeuet sabab gata ka tatulak TUHAN nyang na lamkawan gata. Dan lom teuma sabab lé gata ka gatamo dikeue Geuhnyan dan meunyeusai bahwa gata ka gata tinggai tanoh Meusé."
21 Laju Nabi Musa geupeugah lom ubak TUHAN, "Bansa nyang ulôn pimpén nyoe meujeumeulah na 600.000 droe. Pakriban Droeneueh peugah bahwa Droeneueh teuma neubri uengkot sie siseb-seb jih nyang treb jih sibuleuen peunoh?
22 Dipat kheueh na leumô ngon bubiri nyang meunanle nyang harôh teusie keu teupeutroe awaknyan? Peu kheueh banmandum uengkot lam laôt seb keu teubri makheun keu awaknyan?"
23 Geujaweueb lé TUHAN, "Peu kheueh keukuasaan Ulôn teubataih? Gata hana treb lé takalon peue nyang Ulôn peugah nyan bit-bit beutôi teujadi atawa hana!"
24 Teuma geuteubit kheueh laju Nabi Musa geujak peusampoe habanyan peue nyang ka geupeugah lé TUHAN ubak gobnyan. Laju Nabi Musa geupeusapat tujoh ploh droe peumimpén laju geuyue dong awaknyan bansilingka Khimah TUHAN.
25 Laju TUHAN geutreun di lam awan dan geupeugah laju ubak Nabi Musa. TUHAN geucok laju siladum nibak kuasa nyang ka geubri ubak Nabi Musa dan laju geubri atranyan ubak bantujoh ploh droe peumimpén nyan. Bak watée Roh TUHAN nyan geutreun u ateueh awaknyan, jipeuphon kheueh awaknyan jimeuhôi lagée nabi meuhôi teuma hana treb.
26 Dua lamkawan tujoh ploh droe peumimpén nyan, Eldad dan Medad, tinggai di dalam khimah dan hana jijak meusajan-sajan deungon nyang laén u dalam Khimah TUHAN. Di khimah-khimah nyan Roh laju jitreun u ateueh awaknyan, dan awaknyan bandua pi jipeuphon teumawok lagée su nabi.
27 Laju lé sidroe ureuëng jiplung u luwa keu jijak peugah ubak Nabi Musa peue nyang ka teujadi ateueh Eldad dan Medad.
28 Yosua bin Nun, nyang ka jibantu Nabi Musa yoh phon masa muda jihnyan, jipeugah ubak Nabi Musa, "Neuyue kheueh awaknyan jipiôh hai Bapak!"
29 Nabi Musa geujaweueb, "Keupeue gata tapike keu lôn? Ulôn keubit meuharab seumoga TUHAN geubri Roh Geuhnyan ubak banmandum bansa Geuhnyan, dan geupeujeuet awaknyan banmandum hase jeuet keunabi!"
30 Laju Nabi Musa geujak woe lom ubak khimah meusigoe deungon ban tujoh ploh peumimpén bansa Israel nyan.
31 Deungon hana teusangka-sangka TUHAN geupeuteuka laju angén rot laôt; di angén nyan laju jiba cicém-cicém puyoh nyang jipoe miyueb lagoena, teuma na simetée mantong di ateueh tanoh. Cicém nyan jipoe keudéh-keunoe di ateueh khimah-khimah nyan sampoe jiôh na meupadub metée di bansikeulileng nyan.
32 Sipanyang uroenyan, sipanyang malam dan sipanyang uroe óh lheueh nyan teuma, ureuëng-ureuëng laloe jidrob cicém puyoh. Tieb-tieb ureuëng jidrob cicém puyoh nyan na siribée kilo gram. Cicém-cicém nyan awaknyan tabu bansikeulileng khimah-khimah mangat jeuet tho.
33 Seumantong jai uengkot sie nyang jipajoh, TUHAN jeuet keu beungéh keu bansa nyan dan geupeutreun laju bala u ateueh awaknyan.
34 Laju teumpat nyan geuboh nan, "Jirat ureuëng leuha", sabab disinan geupeukubu ureuëng-ureuëng nyang maté sabab lé leuha jih.
35 Nibak teumpat nyan bansanyan laju jiminah u daerah Hazerot, laju jipeudong khimah nibak teumpat nyan.


Chapter 12

1 Nabi Musa ka geucok sidroe ureuëng inong Kus geupeu jeuet keu peurumoh gobnyan, dan hainyan jipeujeuet keu alasan lé Miryam dan Nabi Harun keu jipeubrok Nabi Musa.
2 Ji kheun le awaknyan, "Peu kheueh meulalu Nabi Musa mantong TUHAN geupeugah haba? Bukon kheueh meulalu geutanyoe TUHAN geupeugah haba cit?" TUHAN geudeungoe peue nyang awaknyan peugah.
3 Nabi Musa na kheueh ureuëng nyang get that lom miyueb até, leubeh nibak banmandum ureuëng nyang udeb ateueh bumoe nyoe.
4 Hana teusangka-sangka TUHAN meufeureuman ubak Nabi Musa, Nabi Harun dan Miryam, "Gata ban lhée droe tajak kheueh laju ubak Khimah Ulôn." Laju awaknyan geujak keunan
5 dan TUHAN laju geutreun didalam taméh awan. Laju TUHAN geudong dibabah pintoe Khimah Gobnyan dan geutawok Nabi Harun meunan cit deungon Miryam. Ban dua awaknyan laju geuseuk ngon geupeuto,
6 dan TUHAN geupeugah laju, "Tadeungoe kheueh tutoe Ulôn nyoe! Meunyoe na lamkawan gata sidroe nabi, Ulôn peugah droe Lôn ubak jihnyan meulalu keumalon-keumalon, dan Ulôn meututoe deungon jihnyan didalam lumpo.
7 Teuma kon lagéenyan deungon hamba Ulôn Nabi Musa. Jihnyan ureuëng nyang paleng seutia lamkawan umat Ulôn.
8 Dan Ulôn peugah haba deungon jihnyan meuhadab keue, seucara nyata dan hana teuma deungon teumeu hiëm. Bahpi ruman Ulôn pih ka jikalon! Pakon gata tajeuet that talawan Nabi Musa, hamba Ulôn nyan?"
9 TUHAN gét that beungéh keu awaknyan bandua, dan geubeudôh laju geujak.
10 Bak watée awan nyan jitinggai Khimah TUHAN, leumah kheueh Miryam ka keunong peunyakét kulét nyang cukob mubahya; kulét jih putéh lagée gapeueh. Bak watée Nabi Harun geupaléng ateueh Miryam dan jingieng bahwa jihnyan ka keunong peunyakét,
11 jipeugah laju ubak Nabi Musa, "Neutulông kheueh, hai teungku amphon, bék kheueh neupeubiyeu kamoe teuseksa kareuna desya nyang kamoe peubuet nibak bangai kamoenyoe.
12 Bék kheueh neupeubiyeu jihnyan lagée aneuëk manyak lahé nyang ka maté, deungon asoe jih siladum ka brôk."
13 Teuma geumeulakée kheueh lé Nabi Musa ubak TUHAN, "Ya Allah Po, ulôn lakée, neupeupuléh kheueh jihnyan!"
14 TUHAN geujaweueb, "Seukira jih muka jihnyan jiludah lé bapak jih, bukon kheueh tujoh uroe treb jih harôh jitanggong malée? Gata peuaséng kheueh jihnyan nibak khimah-khimah nyang treb jih tujoh uroe, dan óh lheuehnyan jeuet jitamong lom teuma."
15 Lheuehnyan laju geupeuteubiet Miryam nibak khimah-khimah nyang treb jih tujoh uroe, dan bansa nyan hana jiminah nibak teumpat nyan sampoe Miryam jiwoe lom ubak khimah-khimah.
16 Óh lheuehnyan awaknyan laju jitinggai Hazerot dan jipeudong khimah nibak padang guron Paran.


Chapter 13

1 TUHAN meufeureuman lom ubak Nabi Musa,
2 "Nibak tieb-tieb sukée Israel gata yue kheueh utosan sidroe nibak peumimpén-peumimpén jihnyan mangat jijak luem tanoh Kanaan nyang teuma Ulôn bri keu bansa Israel."
3 Banlagée peurintah Po teu Allah nyan, Nabi Musa geukirém awaknyan phon nibak padang pasi Paran. Banmandum ureuëng nyan na kheueh peumimpén-peumimpén lamkawan ureuëng Israel: Sukée & Peumimpén
16 Nyan kheueh ureuëng nyang geukirém lé Nabi Musa keu jijak meuluem u nanggroe nyan. Hosea bin Nun geugantoe nan jih lé Nabi Musa jeuet keu Yosua.
17 Bak watée Nabi Musa geuyue awaknyan mangat jibeurangkat, lé gobnyan geupeuingat awaknyan, "Gatajak kheueh rot blah utara, gata tuju ubagian seulatan tanoh Kanaan, laju trok ubak daerah nyang meugunong.
18 Gata seulidék kheueh pakriban nanggroe nyan, peu kheueh peunduduek jih le atawa bacut, peu kheueh awaknyan teuga atawa leumoh.
19 Meunan cit gata peureksa peu kheueh nanggroe nyan gét atawa hana, dan peu kheueh peunduduek jih tinggai di gampông-gampông nyang teubuka atawa didalam banda nyang meupageue ngon kuta.
20 Beutabah kheueh até gata. Gata kalon laju peu kheueh tanoh nyan suboe dan jai bak-bak kayée nyang udeb. Bék tatuwoe gata peuwoe bacut boh-boh kayée nyang udeb disinan." Bak watée nyan ka jipeuphon muboh bak anggô.
21 Teuma jijak kheueh laju awaknyan u arah utara dan jiseulidék nanggroe nyan phon nibak padang pasi Zin disiblah seulatan u utara sampoe u banda Rehob, rab ngon rot ueh u Hamat.
22 Phon-phon that awaknyan jijak u bagian seulatan nanggroe nyan dan trok laju u banda Hebron, teumpat tinggai ureuëng-ureuëng Ahiman, Sesai dan Talmai, keuturonan Enak. Hebron geupeuget bandanyan tujoh thon sigohlom banda Zoan di nanggroe Meusé.
23 Trok kheueh laju awaknyan di Pantôn Eskol. Disinan awaknyan laju jikoh sikrék ranténg boh anggô nyang get that brat, seuhingga atranyan harôh teugulam deungon sikrék kayée lé dua droe ureuëng. Meusigoe deungon nyan jiba cit teuma na meupadub boh boh geulima dan boh ara.
24 Teumpatnyan jirasinan Pantôn Eskol sabab ranténg boh anggô nyang jikoh lé ureuëng Israel disinan.
25 Óh kalheueh jiseulidék nanggroe nyan peuet ploh uroe treb jih, lé awak nyang jak meuluem jiwoe teuma
26 dan awaknyan laju jibri laporan keuhai buet muluem nyang ka seuleusoe jikeureuja nyan ubak Nabi Musa, Nabi Harun dan banmandum umat Israel nyang teungoh meugumpôi di Kades, diteungoh padang pasi Paran. Awaknyan jicalitra laju peue nyang ka awaknyan kalon dan jijok teuma laju boh-boh kayée nyang ka awaknyan pot ateueh bak jih.
27 Kheun awaknyan ubak Nabi Musa, "Kamoe ka kamoe seulidék nanggroenyan dan kamoe kalon teuma bahwa tanoh jih kaya ngon suboe, dan nyoe na bacut boh kayée nyang kamoe ba di sidéh.
28 Banda awaknyan raya-raya lom teuma teupageue deungon kuta nyang kukoh, meunan cit kamoe kalon ureuëng-ureuëng nyang tinggai disinan badan jih raya-raya awaknyan na kheueh keuturonan gogasi disinan.
29 Ureuëng Amalek tinggai dibagian seulatan nanggroe nyan; ureuëng Het, Yebus dan Amori awaknyan tinggai di daerah nyang meugunong-gunong; seudangkan ureuëng Kanaan awaknyan tinggai di daerah di seupanyang laôt dan di seutôt talo Krueng Yordan."
30 Teuma Kaleb jipeumangat até ureuëng-ureuëng nyang meualoh alah ubak Nabi Musa. Kheun Kaleb, "Nanggroe nyan harôh taprang dan tareubot saát nyoe cit teuma, kareuna geutanyoe seb that teuga keu ta peutaloe awaknyan."
31 Teuma ureuëng-ureuëng nyang jigisa deungon Kaleb nyan jipeugah, "Hana, geutanyoe hana hase taprang awaknyan. Peunduduek nanggroe nyan leubeh teuga nibak geutanyoe."
32 Laju awaknyan jitabu haba seumeungeuet lamkawan ureuëng Israel keuhai nanggroe nyang awaknyan luem nyan. Kheun awaknyan, "Nanggroe nyan keubit mubahya, bahpi keu peunduduek jihnyan keudroe. Ureuëng nyang kamoe kalon disideh keubiet badan jih gét that raya-raya.
33 Bit that kamoe kalon ureuëng-ureuëng nyan lagée gogasi, na kheueh keuturonan Enak. Teubandéng deungon awaknyan kamoe nyoe na kheueh bube daruet, dan pasti lagéenyan kheueh anggapan awaknyan keu kamoe."


Chapter 14

1 Simalam suntok umat Israel jikliek-kliek sira jimo.
2 Awaknyan jimeukrôb-krôb ubak Nabi Musa dan Nabi Harun sira jipeugah, "Leubeh gét geutanyoe maté di nanggroe Meusé atawa di teungoh padang pasi nyoe! Bah kheueh geutanyoe maté mantong!
3 Keupeue TUHAN geuba geutanyoe u nanggroe nyan? Euntrék geutanyoe maté bak tajak muprang dan ureuëng-ureuëng binoe meunan cit deungon aneuëk-aneuëk geutanyoe jidrob ngon jiteuen sibagoe ureuëng nyang teutawan. Bukon kheueh leubeh gét geutanyoe tawoe mantong u nanggroe Meusé!"
4 Laju awaknyan jimariet sabe keudroe-droe, "Bah kheueh tapiléh sidroe peumimpén dan tawoe lom u nanggroe Meusé."
5 Nabi Musa ngon Nabi Harun laju geusujut dikeue ureuëng ramé nyan.
6 Yosua aneuëk Nun dan Kaleb aneuëk Yefune, dua droe lamkawan tukang meuluem nyan, laju jipriek peukayan jihnyan sibagoe meuduka cita.
7 Awaknyan jipeugah ubak banmandum rakyat nyan, "Nanggroe nyang kamoe jak seulidék nyan luwa biasa gét jih.
8 Meunyoe TUHAN geubri ubak geutanyoe, Gobnyan teuma geuba geutanyoe keunan dan geubri teuma ubak geutanyoe tanoh nyang kaya dan suboe nyan keu geutanyoe.
9 Bék kheueh gata lawan TUHAN, dan bék kheueh teuma gata takot ubak ureuëng-ureuëng nyang tinggai di nanggroe nyan, sabab deungon mudah geutanyoe ta peutaloe awaknyan. Nyang lindong awaknyan ka jitinggai awaknyan, dan TUHAN na deungon geutanyoe. Lé nyan, bék kheueh teumakot."
10 Banmandum rakyat ji ancam keuneuk rhom jihnyan deungon aneuk batée sampoe án maté. Teuma siat nyan cit teuma awaknyan jikalon cahya TUHAN nyang meuble-ble teuka di ateueh Khimah Geuhnyan.
11 TUHAN meufeureuman lom ubak Nabi Musa, "Padub na treb teuk ureuëng-ureuëngnyoe jilawan Ulôn? Trok án pajan awaknyan hana jitem meuiman ubak Ulôn, bah kheueh Ulôn kalé that Ulôn peubuet buet nyang ajaéb lamkawan awaknyan?
12 Ulôn teuma kupeubinasa awaknyan deungon Lôn peutreun bala peunyakét nyang hase ji minah-minah. Teuma gata Ulôn peujeuet keu sidroe ayah nibak saboh bansa leubeh rayeuk dan leubeh teuga nibak awaknyan!"
13 Laju Nabi Musa geupeugah lom ubak TUHAN, "Ya, TUHAN, enteuk ureuëng Meusé jideungoe hai nyan! Padahai deungon kuasa Droeneueh TUHAN ka neupeuteubiet kamoe lam nanggroe nyan,
14 dan awaknyan teuma jipeugah ubak ureuëng-ureuëng di nanggroe nyoe, nyang ka jideungoe bahwa Droeneueh ya, TUHAN, nasabe neupeungon kamoe. Meunan cit awaknyan ka jideungoe bahwa Droeneueh neupeuleumah droe ubak kamoe bak watée Droeneueh neujak dikeue kamoe lam taméh awan nibak watée uroe, dan lam taméh apui nibak watée malam.
15 Meunyoe Droeneueh neupoh maté banmandum umat Droeneueh nyoe, teuma bansa-bansa nyang ka lheueh jideungoe keuhai nan Droeneueh nyang meusyeuhu nyoe laju jipeugah bahwa
16 Droeneueh neupoh maté umat Droeneueh dipadang pasi sabab Droeneueh hana meuhase neuba awaknyan jijak u nanggroe nyang ka Droeneueh peujanji nyan.
17 Sabab nyan, TUHAN, ulôn lakée, neutunyok kheueh keukuasaan Droeneueh ubak kamoe dan peubuet kheueh peue nyang ka TUHAN peujanjinyan keu kamoe. Droeneueh ka neupeugah,
18 'Ulôn, TUHAN, hana bagaih beungéh. Ulôn kutunyok geunaséh Ulôn dan seutia Ulôn deungon meulimpah-limpah. Ulôn kupeu amphon ureuëng nyang meudesya dan jilawan Ulôn. Bahpi meunan, keusalahan ureuëng tuha teuma Ulôn balaih ubak aneuëk-aneuëk dan cucoe-cucoe jih, trok ubak keuturonan nyang keulhée dan nyang keu peuet.'
19 Jinoenyoe, ya, TUHAN, sabab raya that geunaséh Droeneueh dan Droeneueh seutia ubak janji Droeneueh, ulôn meulakée deungon meuharab that-that, neupeu amphon kheueh desya ureuëng-ureuëng nyoe lagée Droeneueh ka neupeu amphon awaknyan yoh phon awaknyan jitinggai tanoh Meusé."
20 Geujaweueb lé TUHAN, "Get kheueh, Ulôn teuma kupeu amphon awaknyan lagée nyang gata lakée nyan.
21 Teuma Ulôn meujanji deumi droe Ulôn dan deumi Ulôn nyang udeb dan meukuasa di ateueh bumoe nyoe,
22 bahwa nibak ureuëng-ureuëng nyoe hana meusidroe pi nyang mantong udeb keu jitamong u dalam nanggroe nyang ka Ulôn peujanji ubak indatu awaknyan. Sabab awaknyan hana jitem taát ubak Ulôn, dan hana putôh-putôh jicuba Ulôn. Padahai awaknyan ka jikalon cahya nyang meuble-ble, dan buet-buet nyang ajaéb nyang Ulôn peubuet di tanoh Meusé dan dipadang pasi.
23 Hanjeuet! Awaknyan hana teuma jitamong u dalam nanggroe nyan. Lamkawan awaknyan nyang jilawan Ulôn, hana meusidroe pi nyang teuma jigilo nanggroe nyan.
24 Teuma hana lagéenyan keu hamba Ulôn si Kaleb. Jihnyan teutab seutia ubak Ulôn. Sabab nyan Ulôn teuma Lôn ba jihnyan u nanggroe nyang ka jitamong nyan. Jinoenyoe ureuëng Amalek dan ureuëng Kanaan tinggai di ateueh dataran nyan. Teuma daerahnyan jeuet keu daerah milék keuturonan si Kaleb, hamba Ulôn nyan. Singoh beungoh gata harôh tagisa dan gatajak laju u padang pasi u daerah Lhok Akaba."
26 TUHAN meufeureuman lom ubak Nabi Musa dan Nabi Harun,
27 "Sampoe án pajan ureuëng-ureuëng jeuhet nyan jimeu krôb-krôb ubak Ulôn? Banmandum apoh apah awaknyan ka Ulôn deungoe.
28 Gata harôh tajaweueb awaknyan lagéenyoe: TUHAN geupeugah, 'Ulôn meusumpah bahwa deumi Ulôn nyang udeb bahwa gata teuma Ulôn peusaneut lagée nyang gata peugah dikeue Ulôn. Ulôn TUHAN, ka Ulôn peugah haba.
29 Gata ka meukrôb-krôb ateueh Ulôn. Sabab nyan gata teuma maté, dan manyét-manyét gata teuma meusipreuk bansaboh padang pasi nyoe.
30 Seulaén Kaleb dan Yosua, hana meusidroe pi lamkawan gata nyang meu-umu dua ploh thon u ateueh nyang hase teuma jitamong u nanggroe nyang Lôn peujanji nyan.
31 Gata ka tapeugah bahwa aneuëk-aneuëk miet teuma jiteun. Teuma awaknyan kheueh nyang teuma Ulôn ba u nanggroe nyang gata tulak nyan, dan nanggroe nyan teuma jeuet keu tanoh ié awaknyan.
32 Teuma di gata maté lam padang pasi nyoe.
33 Peuet ploh thon treb jih aneuëk-aneuëk gata jimeuwot-wot lam padang pasi. Sabab lé gata hana seutia, aneuëk-aneuëk gatanyan teuma meudeurita, sampoe ureuëng nyang keuneulheuh lamkawan gata ka meuninggai donya.
34 Gata teuma tatanggong akibat-akibat lé desya gata peuet ploh thon treb jih; sithon teuitong siuroe nibak tieb-tieb peuet ploh uroe nyang gata peuguna keu gata seulidék tanoh nyan. Gata teuma tateupeue pakriban rasa jih meunyoe Ulôn kulawan gata!
35 Ulôn meusumpah bahwa Ulôn teuma kupeubuet hainyan ateueh gata, ureuëng-ureuëng jeuhet nyang sipakat keujilawan Ulôn. Lam padang pasi nyoe gata banmandum teuma maté. Ulôn, TUHAN, ka Lôn peugah haba.' "
36 Ureuëng-ureuëng nyang ka geu-utus lé Nabi Musa keujijak seulidék tanoh nyan, jiwoe lom sira jiba laporan nyang hana beutôi keuhai nanggroe nyan, dan lé sababnyan ureuëng Israel meukrôb-krôb ubak TUHAN. Lé sababnyan TUHAN geuhuköm awaknyan akhé jih awaknyan maté banmandum lé sabab keunong peunyakét.
38 Nibak bandua blaih droe tukang muluem nyan teuma Yosua ngon Kaleb nyang mantong udeb.
39 Óh ka lheueh Nabi Musa geupeusampoe feureuman TUHAN ubak bansa Israel, bansanyan laju meuduka cita deungon peudeh that.
40 Óh singoh nyan watée seuboh buta, meukeumah-keumah kheueh awaknyan keuneuk jijak ék ateueh pucak gunong. Kheun awaknyan, "Keubiet kamoe ka meudesya. Teuma jinoenyoe kamoe ka siab keuneukjak ubak teumpat nyang geutunyok lé TUHAN."
41 Teuma Nabi Musa geupeugah, "Pakon gata jinoenyoe keuneuk taliengkeu peurintah TUHAN? Gata hana meuhase!
42 Bék gatajak, gata teuma jipeutaloe lé musoh-musoh gata sabab TUHAN hana meusajan gata.
43 Bak watée gata meuhadab ngon ureuëng Amalek dan ureuëng Kanaan nyan, gata teuma maté lam prang nyan. TUHAN hana meusajan gata sabab gata hana taát ubak Gobnyan."
44 Teuma lé ureuëng-ureuëng Israel nyan teutab neukat cit jikeuneuk ék ateueh pucak gunong nyan, bahpi Nabi Musa dan Peuto Peujanjian hana jitinggai khimah-khimah nyan.
45 Teuma lé ureuëng Amalek dan ureuëng Kanaan nyang na tinggai disinan laju jiprang dan jipeutaloe banmandum ureuëng-ureuëng Israel dan jipeucrok awaknyan sampoe trok u Horma.


Chapter 15

1 TUHAN geubri lom ubak Nabi Musa peuratoran-peuratoran nyoe
2 nyang harôh jipeubuet lé bansa Israel di nanggroe nyang teuma geubri lé TUHAN keu awaknyan.
3 Keu keureubeuen nyang teutot ngon keureubeuen teupeu lheueh kaôi meunan cit keureubeuen keugalak droe atawa lom keureubeuen nibak peurayaan-peurayaan biasa, gata jeuet tapeuseumah ubak TUHAN: leumô agam, bubiri agam, bubiri atawa kaméng. Bée keureubeuen nyang lumpah mangat nyan keubit gét that galak até TUHAN.
4 Soe mantong nyang jipeuseumah domba atawa kaméng keu keureubeuen nyang teutot keu TUHAN, meunan cit jiba teuma meusigoe ngon tieb-tieb saboh beulatang peulara nyan, sikilo gram teupông teujampu deungon si arée minyéuk zaiton keu keureubeuen sajian, dan meunan cit teuma deungon si arée ié anggô.
6 Meunyoe nyang jibri keu keureubeuen nyan na kheueh saboh bubiri agam, bah kheueh teuma jipeuseumah dua kilo gram teupông teujampu teuma deungon si arée si teungoh minyéuk zaiton keu keureubeuen sajian,
7 dan siarée siteungoh teuma ié anggô. Bée keureubeuen nyang lumpah mangat nyan keubit that-that galak até TUHAN.
8 Meunyoe nyang jikeureubeuen na kheueh saboh leumô agam keu keureubeuen nyang teutot atawa keureubeuen teupeuleueh kaôi atawa keureubeuen peudamé,
9 meunan cit teuma jipeuseumah lhée kilo gram teupông nyang teujampu deungon dua arée minyéuk zaiton keu keureubeuen sajian,
10 dan dua arée teuma ié anggô. Bée keureubeuen nyang lumpah mangat nyan keubit that-that galak até TUHAN.
11 Nyan kheueh nyang harôh jipeuseumah meusigoe deungon tieb-tieb saboh leumô agam, bubiri agam, bubiri atawa kaméng.
12 Meunyoe nyang teukeureubeuen nyan leubeh nibak dua boh beulatang peulara, teuma peuseumahan teupông, minyéuk dan ié anggô nyan pi harôh teutamah meunurot peubandengan jih.
13 Hainyan harôh jipeubuet lé tieb-tieb ureuëng Israel bak watée jihnyan jipeuseumah keureubeuen. Bée keureubeuen nyang mangat nyan lumpah that galak até TUHAN.
14 Meunyoe na ureuëng aséng nyang tinggai lamkawan gata, bah kheuehnyan keu sikeujab mantong meunan cit keuneuk tinggai teutab, jihnyan harôh kheueh jitaát ubak banmandum meunyoe jihnyan jipeuseumah keureubeuen peunajoh nyang teupeu mangat até TUHAN.
15 Banmandum huköm dan peuratoran na kheueh saban keu banmandum gata dan keu ureuëng aséng nyang na tinggai lamkawan gata, sabab gata dan ureuëng nyan na kheueh saban nibak mata TUHAN. Dan hainyan teutab na keu siumu masa.
17 TUHAN geubri lom ubak Nabi Musa peuratoran-peuratoran nyoe nyang harôh jipeubuet lé bansa Israel di nanggroe nyang teuma geubri lé TUHAN keu awaknyan.
19 Meunyoe gata ka gata peuphon pajoh peue nyang jipeuhase lé nanggroe nyan, gata harôh pinah siladum keu teupeuseumah khusos keu TUHAN.
20 Meunyoe droe gata tatot ruti nyang teupeugét nibak teupông gandom nyang phon-phon that teukôh, rutinyan harôh teupeuseumah sibagoe keureubeuen khusos keu TUHAN. Cara teupeuseumah atranyan saban cit lagée cara teupeuseumah gandom nyang phon nyang ka gata giléng.
21 Keu siumu masa tieb-tieb ruti nibak gandom nyang phon teukôh nyan harôh kheueh gata bri sibagoe peuseumahan khusos keu TUHAN.
22 Meunyoe gata deungon hana teusaja ka teupeulalée sapeue-sapeue nibak peuratoran nyang ka geubri lé TUHAN ubak Nabi Musa, phon nibak uroe TUHAN geubri peuratoran nyan dan seulanjut jih treun meutreun, dan buet nyang salah nyan jipeubuet sabab umat hana jiteupeu peuratoran, deungon nyan banmandum umat harôh kheueh jipeuseumah saboh leumô agam keu keureubeuen nyang teutot. Meusigoe deungon nyan harôh teuma teupeuseumah keureubeuen sajian dan ié anggô lagée nyang ka teupeu teuntée. Bée keureubeuen nyang mangat nyan keubit that-that galak até TUHAN. Seulaén nibak nyan harôh teuma teukeureubeuen saboh bubiri agam keu keureubeuen teupeu amphon desya.
25 Laju lé imeum harôh teuma jipeubuet upacara teupeu amphon desya keu umat. Teuma awaknyan geupeu amphon sabab buet jih nyang salah nyang awaknyan peubuet deungon hana jisaja, dan sabab awaknyan ka jiba keureubeuen teupeu amphon desya meunan cit keureubeuen nyang teutot ubak TUHAN.
26 Banmandum umat Israel dan ureuëng aséng nyang na tinggai di teumpat awaknyan teuma geupeu amphon, sabab banmandum nyan karôh nibak buet nyang salah nyang hana teusaja nyan.
27 Meunyoe na sidroe ureuëng mantong meudesya deungon hana jisaja, teuma ureuëng nyan bah kheueh jikeureubeuen saboh kaméng inong nyang meu-umu sithon sibagoe keureubeuen peu amphon desya.
28 Di imeum harôh geupeuna upacara peu amphon desya dikeue TUHAN, mangat ureuëng nyan geupeu amphon teuma desya jihnyan.
29 Peuratoran nyan meulaku keu soe mantong nyang jipeubuet desya deungon hana jisaja, bah kheueh nyan ureuëng Israel meunan cit teuma deungon ureuëng aséng nyang na tinggai teutab di lamkawan awaknyan.
30 Teuma meunyoe sidroe ureuëng Israel atawa ureuëng aséng deungon jisaja jipeubuet desya, jihnyan ka jipeujayéh TUHAN. Ureuëng nyan harôh teuhuköm maté,
31 sabab jihnyan ka jilawan TUHAN dan deungon jisaja ka jilawan peurintah TUHAN. Ureuëng nyan maté sabab lé salah jih keudroe.
32 Bak watée ureuëng Israel ka na dipadang pasi, na sidroe ureuëng agam teungoh ji koh kayée apui nibak uroe Sabat.
33 Ureuëng nyan laju jiba jak meuhadab ubak Nabi Musa, Nabi Harun dan banmandum umat,
34 laju ureuëng nyan jiteuen sabab gohlom jeulaih peue nyang teupeubuet u ateueh ureuëng nyan.
35 Laju TUHAN meufeureuman ubak Nabi Musa, "Ureuëng nyan harôh teuhuköm maté. Ureuëng nyan harôh gataba u luwa khimah-khimah nibak teumpat nyan banmandum umat harôh jirhom ureuëng nyan deungon batée sampoe maté."
36 Teuma banmandum umat laju jiba ureuëng nyan u luwa khimah-khimah dan laju jirhom ureuëng nyan deungon batée sampoe maté, lagée nyang ka geupeurintah lé TUHAN.
37 TUHAN geuyue lom ubak Nabi Musa geuyuejak peusampoe ubak bansa Israel, "Gata peugét kheueh rumbai-rumbai nibak ujong peukayan gata dan gata ikat kheueh talo ijo nibak tieb-tieb rumbai. Nyan harôh gata peubuet treun meutreun.
39 Rumbai-rumbai na kheueh keu teu peuingat: Tieb-tieb watée gata kalon, gata ingat teuma sigala peurintah Ulôn dan gata taát teuma. Dan sabab nyan gata hana teuma gata tuwoe keu Ulôn keu gata seutôt keuheundak dan hasrat droe gata nyan.
40 Rumbai-rumbai nyan teuma teupeu ingat gata mangat gata taát ubak banmandum peurintah Ulôn, sampoe gata beutôi-beutôi jeuet keu hak milék Lôn.
41 Ulôn kheueh TUHAN Allah gata; Ulôn nyang ba gata teupeuteubit nibak nanggroe Meusé mangat Ulôn jeuet keu Allah gata, Ulôn kheueh TUHAN."


Chapter 16

1 Korah aneuëk Yizhar nibak kawöm Kehat, sukée Lewi, jimeubeurontak ubak Nabi Musa. Jihnyan jisukong teuma lé dua droe nibak sukée Ruben, na kheueh Datan dan Abiram aneuëk-aneuëk Eliab, dan Ôn aneuëk Pelet, dan lé 250 droe peumimpén meusyeuhu nyang jipiléh lé rakyat.
3 Awaknyan meusigoe jijak meuhadab ubak Nabi Musa dan Nabi Harun dan jipeugah, "Kaséb nyan, hai Nabi Musa! Banmandum umat Israel ka teupeukhusos keu TUHAN, dan TUHAN na lamkawan geutanyoe banmandum. Teuma pakon kheueh neu anggab Droeneueh leubeh manyang nibak umat TUHAN?"
4 Geudeungoe hai nyan, Nabi Musa laju geusujut ubak tanoh sira geumeudoá ubak TUHAN.
5 Laju lé gobnyan geupeugah ubak Korah dan peungikot-peungikot jihnyan, "Singoh beungoh TUHAN teuma geutunyok ubak geutanyoe soe kheueh nyang po Gobnyan, dan soe teuma nyang teupeukhusos keu Geuhnyan. Ureuëng nyang geupiléh lé Gobnyan teuma geubri jijak peurab ubak Gobnyan.
6 Singoh beungoh gata dan bubena peungikot gata jijakcok laju teumpat-teumpat apui, laju atranyan jipasoe deungon ngeue apui dan dupa, laju atranyan jiba ubak miseubah. Bah kheueh geutanyoe kalon singoh soe kheueh lamkawan geutanyoe nyang ka geupiléh lé TUHAN. Kaséb kheueh nyan, hai ureuëng-ureuëng Lewi!"
8 Seulanjut jih Nabi Musa geupeugah ubak Korah, "Deungoe kheueh, hai ureuëng-ureuëng Lewi!
9 Peu kheueh neupike nyoe soai ubit bahwa Po teu Allah ureuëng Israel geupiléh gata lamkawan ureuëng-ureuëng Israel mangat gata jeuet tapeurab ubak Gobnyan, dan gata meutugaih nibak Khimah Gobnyan, lom gata meukeureuja keu umat Israel dan gata peutimang awaknyan?
10 Gata, Korah, dan banmandum ureuëng Lewi ka meuteumé keuhoreumatan nyan nibak TUHAN -- dan jinoenyoe gata tatuntot keu beuhase teuma jeuet keu imeum!
11 Meunyoe gata deungon peungikot-peungikot gata hana jipiôh meu ôk-ôk ubak Nabi Harun, ngon lagée nyan gata talawan TUHAN!"
12 Laju Nabi Musa geuyue jaktawok Datan dan Abiram, teuma awaknyan jipeugah, "Kamoe han kamoe tem teuka!
13 Gohlom séb droeneueh neuba kamoe meuteubiet nibak tanoh Meusé nyang suboe nyan keu neupoh maté kamoe di padang pasi nyoe? Harôh kheueh droeneueh neupeurintah kamoe?
14 Nyang jikeubiet jih droeneueh hana neuba kamoe u tanoh nyang suboe, atawa neubri keu kamoe blang-blang dan lampôh-lampôh anggô jeuet keuhak milék pusaka kamoe! Jinoenyoe droeneueh neu keuneuk peungeuet kamoe! Hana, kamoe hana kamoe tem teuka"
15 Nabi Musa bit that beungéh dan geupeugah ubak TUHAN, "TUHAN, bék kheueh neuteurimong peuseumahan awaknyan. Hán tom na ulôn peurugoe sidroe ureuëng pih nibak awaknyan; bahpi saboh beulatang keuleudée hántom na ulôn cok nibak awaknyan."
16 Laju geupeugah lé Nabi Musa ubak Korah, "Gata teuka kheueh singoh uroe ubak Khimah TUHAN ngon gataba sajan ban 250 droe peungikot gata. Meunan cit deungon Nabi Harun na disideh. Gata harôh gataba teumpat apui gata maséng-maséng. Gata pasoe kheueh dupa di dalam teumpat apui nyan, laju atranyan gata peuseumah kheueh ubak TUHAN."
18 Teuma tieb-tieb ureuëng nyang jijak cok teumpat apui jihnyan, laju jipasoe didalam nyan deungon ngeue apui meunan cit deungon dupa, laju gata dong dipintoe Khimah TUHAN meusajan ngon Nabi Musa dan Nabi Harun.
19 Óh kalheueh nyan Korah laju jipeusapat banmandum umat, dan awaknyan laju jidong meubaréh muhadab keue ngon Nabi Musa dan Nabi Harun di babah pintoe Khimah TUHAN. Hana teusangka-sangka mantong banmandum umat deuh jikalon cahya hu TUHAN nyang meuble-ble.
20 Laju TUHAN meufeureuman ubak Nabi Musa dan Nabi Harun,
21 "Gata yue surot kheueh laju nibak ureuëng-ureuëng nyan; Ulôn keuneuk peubinasa awaknyan jinoenyoe cit teuma."
22 Teuma Nabi Musa dan Nabi Harun laju geusujut ubak TUHAN sira geupeugah, "Ya Allah Po, Droeneueh nyang bri udeb ubak mahluk nyang udeb. Meunyoe teuma na sidroe mantong nyang meudesya, peu kheueh Droeneueh neubeungéh keu banmandum umat Droeneueh?"
23 TUHAN meufeureuman ubak Nabi Musa, "Gata yue kheueh laju bubena ureuëng nyan ji minah nibak khimah-khimah Korah, Datan dan Abiram."
25 Laju Nabi Musa deungon ji-iréng lé peumimpén bansa Israel, geujak u teumpat Datan dan Abiram.
26 Nabi Musa geupeugah bak ureuëng-ureuëng Israel, "Gata wéeh kheueh laju nibak khimah ureuëng-ureuëng jeuhet nyoe dan bék gatamat sapeue pi nibak hareuta milék awaknyan. Meunyoe gata hana tapatéh, gata teuma geupeubinasa meusigoe deungon awaknyan sabab lé desya-desya nyang awaknyan peubuet."
27 Laju ureuëng-ureuëng Israel nyan jiwéeh nibak khimah-khimah Korah, Datan dan Abiram. Datan dan Abiram ka jiteubiet dan ka jidong di babah pintoe khimah awaknyan maséng-maséng, meusajan deungon aneuëk dan peurumoh jih nyan.
28 Laju Nabi Musa geupeugah, "Deungon nyoe gata teuma neuteupeue bahwa TUHAN ka geu utus ulôn keu lôn peubuet banmandum nyoe dan bahwa nyan bukon keuheundak ulôn keudroe.
29 Meunyoe ureuëng nyan maté deungon cara biasa, deungon hana huköm sapeue pih nibak Po teu Allah, nyan kheueh tanda jih TUHAN hana geu utus ulôn.
30 Teuma meunyoe TUHAN geupeubuet sigala sisuatu nyang hántom gata deungoe nyang ka nyoe, dan meunyoe tanoh beukah keu jiuét awaknyan meusigoe deungon hareuta milék awaknyan, sampoe awaknyan jitamong udeb-udeb u dalam donya ureuëng maté, gata teupeu kheueh lé gata bahwa ureuëng-ureuëng nyan na kheueh nyang lawan TUHAN."
31 Hana treb teuma óh lheueh Nabi Musa nyan geupeugah haba, laju tanoh dimiyueb gaki awaknyan beukah,
32 dan laju jiuét awaknyan deungon banmandum keuluwarga awaknyan meunan cit banmandum peungikot Korah, dan banmandum hareuta beunda awaknyan.
33 Dan rhot kheueh awaknyan udeb-udeb u dalam donya ureuëng maté deungon banmandum hareuta awaknyan. Tanoh nyang beukah nyan laju teuma meucob lom dan awaknyan gadôh sapansapa jiuét lé bumoe.
34 Banmandum ureuëng Israel nyang na disinan laju jipeuplueng droe bak watée jideungoe awaknyan jitawök, "Jak plueng! Enteuk geutanyoe jiuét lé bumoe!"
35 Laju TUHAN geupeutreun teuma apui dan di apuinyan laju teuma jitot sampoe hangôh ban 250 droe nyang jipeuseumah dupa nyan.
36 TUHAN meufeureuman lom ubak Nabi Musa,
37 "Gata yue kheueh Eleazar aneuëk Imeum Harun jeuet jijak beuôt teumpat-teumpat apui nibak rungka-rungka nyang teutot dan meusipreuk abée ngon adang nyan u teumpat nyang laén, sabab teumpat apui nyan na kheueh suci. Barang-barang nyan na kheueh nyan jipeuseumah lé ureuëng nyang ka geuhuköm maté sabab desya nyang jipeubuet. Barang-barang nyan na kheueh suci ngon gleh sabab ka jipeuseumah dikeue TUHAN, sabab nyan bah kheueh jeuet keu leumpeng-leumpeng lipéh keulapék blah luwa miseubah. Hainyan teuma jeuet keu peuingat keu bansa Israel."
39 Teuma di Imeum Eleazar laju geujak cok teumpat-teumpat apui nyan dan geuyue laju ureuëng laén jijak teumpa mangat hase jeuet keu leumpeng-leumpeng nyang lipéh jeuet keu keulapék blah luwa miseubah.
40 Nyan na kheueh sibagoe peuingat keu bansa Israel bahwa seulaén keuturonan Nabi Harun, hana meusidroe pi jeuet jijak ubak miseubah keu jijak tot dupa keu TUHAN. Ureuëng nyang iengkeue peuratoran nyan teuma geupeubinasa lagée Korah dan peungikot-peungikot jihnyan. Banmandum nyan geupeubuet lagée nyang geupeurintah lé TUHAN ubak Eleazar rot Nabi Musa.
41 Óh singoh beungoh nyan banmandum umat Israel jibeungéh ubak Nabi Musa ngon Nabi Harun. Awaknyan jipeugah, "Gata poh maté umat TUHAN."
42 Teungoh awaknyan jimeusapat jilawan Nabi Musa ngon Nabi Harun, awaknyan jipaléng ubak Khimah TUHAN, dan deuh laju jikalon awan ka teutob u ateueh Khimah nyan, dan leumah kheueh cahya keuhai TUHAN teuka.
43 Nabi Musa dan Nabi Harun laju geujak ubak Khimah TUHAN nyan,
44 laju TUHAN meufeureuman ubak Nabi Musa,
45 "Gata surot kheueh nibak awaknyan. Ulôn keuneuk peubinasa awaknyan nibak teumpat nyan cit teuma." Ban dua awaknyan pi laju geusujut geuseumah,
46 laju Nabi Musa geupeugah ubak Nabi Harun, "Neucok kheueh laju teumpat apui droeneueh, neupaso laju deungon ngeue apui nibak miseubah dan neupasoe teuma deungon dupa di ateueh nyan. Neuba kheueh laju deungon beubagaih ubak umat dan neupeugét kheueh laju upacara peu amphon desya keu awaknyan. Bagaih! Meureuka TUHAN nyan ka lumpah that brat dan bala ka jipeuphon."
47 Nabi Harun laju geupeubuet peue nyang geupeugah lé Nabi Musa nyan. Gobnyan laju geuplueng lamkawan umat nyang teungoh meusapat nyang ka jipeuphon keunong peunyakét bala nyan. Teuma Nabi Harun laju geupeuduek dupa nyan di ateueh ngeue apui, dan geupeubuet laju upacara peu amphon desya keu umat nyan.
48 Peunyakét bala nyan laju teudong, dan Nabi Harun na lamkawan ureuëng nyang mantong udeb dan nyang ka maté.
49 Nyan maté bak watée nyan na 14.700 droe, hana jitamong keunan nyang maté nibak beurontak Korah.
50 Óh kalheueh bala nyan jipiôh, Nabi Harun laju geugisa ubak Nabi Musa nibak babah pintoe Khimah TUHAN.


Chapter 17

1 TUHAN meufeureuman ubak Nabi Musa,
2 "Gata yue kheueh ureuëng Israel mangat jijok keu gata dua blah boh tungkat, tieb-tieb sukée saboh tungkat, nyang harôh jijok lé peumimpén sukée. Tuléh kheueh nan nibak tieb-tieb peumimpén nyan nibak tungkat jih,
3 dan nan Nabi Harun nibak tungkat sukée Lewi. Keu tieb-tieb peumimpén sukée harôh na saboh tungkat.
4 Gata ba kheueh laju tungkat-tungkat nyan ukeue Khimah Ulôn dan gata keubah laju dikeue Peuto Peujanjian, nibak teumpat Ulôn lazem meurumpok deungon gata.
5 Tungkat ureuëng nyang Ulôn piléh laju meutarök. Deungon cara nyan Ulôn teuma laju Lôn peupiôh apoh apah keu ureuëng-ureuëng nyang hana piôh-piôh ji meu krôb-krôb ateueh Ulôn."
6 Hainyan geupeusampoe lé Nabi Musa ubak ureuëng-ureuëng Israel. Laju lé peumimpén awaknyan jiseurah ubak gobnyan saboh tungkat keu tieb-tieb peumimpén sukée. Banmandum nyan na dua blah boh, dan tungkat Nabi Harun na lamkawan nyan.
7 Laju Nabi Musa geukeubah tungkat-tungkat nyan di dalam Khimah TUHAN dikeue Peuto Peujanjian.
8 Óh beungoh singoh nyan, bak watée Nabi Musa geutamong udalam Khimah TUHAN, leumah geukalon bahwa tungkat Nabi Harun, na kheueh tungkat sukée Lewi, ka jitimoh tarök. Tungkat nyan meubungöng, dan jipeuhase boh keutapang nyang ka tuha!
9 Nabi Musa laju geucok banmandum tungkat nyan geutunyok laju ubak ureuëng Israel. Awaknyan jikalon peue nyang ka teujadi, laju tieb-tieb peumimpén jijakcok teuma tungkat jih nyan lom.
10 Óh lheueh nyan TUHAN meufeureuman lom ubak Nabi Musa, "Gata keubah kheueh lom tungkat Nabi Harun nyan dikeue Peuto Peujanjian. Tungkat nyan harôh teukeubah sibagoe peuingat keu bansa Israel nyang galak beurontak nyan nyang toh jihnyan teuma maté meunyoe awaknyan hana jipiôh ji meu-ok-ok."
11 Nabi Musa laju geupeubuet peue nyang geupeurintah lé TUHAN ubak gobnyan.
12 Lé ureuëng Israel laju jipeugah ubak Nabi Musa, "Meunyoe meunan, cilaka kheueh kamoe! Kamoe nyoe teuma binasa!
13 Meunyoe ureuëng nyang jipeutoe ubak Khimah TUHAN harôh maté, deungon nyan ka hanale harapan keu kamoe!"


Chapter 18

1 TUHAN meufeureuman ubak Nabi Harun, "Gata, aneuëk-aneuëk gata dan ureuëng-ureuëng Lewi harôh jitanggong akibat buet-buet salah nyang teujadi didalam Khimah Ulôn, teuma gata dan aneuëk-aneuëk gata mantong nyang tanggong buet-buet nyang salah nyang jipeubuet lé imeum.
2 Kawöm syedara gata, sukée Lewi, harôh gata peuroh sajan sibagoe peumbantu nibak peulaksanaan tugaih gata dan tugaih aneuëk-aneuëk gata.
3 Sukée Lewi harôh kheueh jipeubuet keuwajéban droe jih ateueh gata dan jipeubuet tugaih jih nyan di Khimah Ulôn, teuma awaknyan hana jeuet jipeutoe ubak miseubah atawa jimat beunda-beunda suci di Ruweueng Suci. Meunyoe awaknyan ji iengkeue keu peuratoran nyan, bah kheueh awaknyan meunan cit gata, teuma maté.
4 Awaknyan harôh jimeubuet meusapat deungon gata dan jipeubuet tugaih-tugaih nyang na hubongan deungon peulayanan di dalam Khimah Ulôn, teuma nyang hana teubri hak keu nyan, teutam bék jijak buet meusajan deungon gata.
5 Teuma gata, Nabi Harun dan aneuëk gata kheueh nyang jeuet meutugaih di Ruweueng Suci dan miseubah, mangat Ulôn bék lé beungéh keu bansa Israel.
6 Nyang sikeubiet jih, Ulôn ka Lôn piléh kawöm syedara gata ureuëng-ureuëng Lewi di lamkawan bansa Israel sibagoe meuneubri keu gata. Awaknyan ka teupeukhusos keu Ulôn, keu jijak peutimang di Khimah Ulôn.
7 Teuma gata dan aneuëk-aneuëk gata mantong nyang jeuet jimeutugaih sibagoe imeum, nibak sigala meuneubuet nyang na hubongan deungon miseubah dan peue nyang na meuteumé diteungoh-teungoh Ruweueng Mahasuci. Nyang kheueh tanggong jaweueb gata, sabab Ulôn ka Lôn bri keugata jabatan sibagoe imeum. Tieb-tieb ureuëng nyang hana jipoe hak nyan teuhuköm maté meunyoe jipeutoe ubak barang-barang nyang suci nyan."
8 TUHAN meufeureuman lom ubak Nabi Harun, "Ingat kheueh! Banmandum peuseumahan khusos nyang jijok keu Ulôn nyang hana teutot nyan na kheueh jeumba gata. Nyan kheueh jeumba gata nyang ka teupeuteuntée keu siumu masa. Nyan Ulôn jok ubak gata dan keu banmandum keuturonan gata.
9 Nibak peuseumahan-peuseumahan nyang paleng gleh lom suci nyang hana teutot di ateueh miseubah, nyang seulanjut jih nyoe na kheueh keu gata: Keureubeuen sajian, keureubeuen peu amphon desya dan keureubeuen geunantoe rugoe. Banmandum nyan peuseumahan suci nyang ka jeuet jeumba gata dan jeumba aneuëk-aneuëk gata.
10 Nyan na kheueh suci keu gata, lé nyan, atranyan bah kheueh gata pajoh nibak teumpat nyang suci teuma. Teuma ureuëng agam mantong nyang jeuet jipajoh atra nyan.
11 Banmandum peuseumahan khusos nyang laén nyang jipeuseumah lé ureuëng Israel, keu Ulôn, nyan na kheueh keu gata cit teuma. Ulôn kubri keu gata meunan cit keu aneuëk-aneuëk gata nyang agam dan nyang inong. Peuratoran nyan teutab na keu siumu masa. Soe mantong anggota keuluwarga gata nyang hana kuto jeuet ji pajoh atra nyan.
12 Ulôn jok keu gata banmandum nyang paleng gét nibak hase teupot nyang phon nyang jipeuseumah lé ureuëng Israel keu Ulôn tieb-tieb thon, na kheueh minyéuk zaiton, ié anggô dan gandom.
13 Banmandum nyan na kheueh keu gata. Tieb-tieb anggota keuluwarga gata nyang hana kuto jeuet jipajoh atra nyan.
14 Peue-peue mantong nyang na di tanoh Israel nyang ka teupeukhusos keu Ulôn, nyan na kheueh keu gata.
15 Banmandum nyang phon-phon lahé lamkawan manusia meunan cit nibak beulatang peulara nyang jipeuseumah lé ureuëng Israel keu Ulôn, na kheueh keu gata cit teuma. Teuma gata harôh tateuboh aneuëk-aneuëk gata nyang tuha, meunan cit aneuëk beulatang hareuem nyang phon lahé.
16 Aneuëk-aneuëk harôh teuteuboh bak watée jihnyan meu umu sibuleuen. Yuem nyang ka teupeuteuntée keu yuem nyan na kheueh limong péng pirak, meunurot yuem nyang lazem nibak Khimah Ulôn.
17 Teuma meunyoe leumô, bubiri dan kaméng nyang phon-phon lahé, nyan hana jeuet teutuboh. Beulatang nyan meuteulak keu Ulôn dan nyan harôh teukeureubeuen. Gata siram kheueh darah jihnyan nibak miseubah dan gatatot kheueh teuma gapah jihnyan sibagoe keureubeuen. Bée jih nyang mangat nyan keubiet that-that galak até Ulôn.
18 Asoe sie nyan na kheueh keu gata, saban cit lagée dada dan pha jih nyang siblaih uneuen nyang jipeuseumah lom nyang jijok keu Ulôn.
19 Banmandum peuseumahan khusos nyang jiba lé ureuëng Israel ubak Ulôn, nyan Ulôn bri keu gata dan keu aneuëk-aneuëk gata agam ngon inong. Peuratoran nyan teutab na keu siumu masa dan jeuet keu ngon ikat peujanjian nyang hana hase teupeubateue Ulôn deungon gata dan keuturonan gata."
20 TUHAN meufeureuman lom ubak Nabi Harun, "Gata hana meutemé warésan meusapeue pi. Dinanggroe nyang Ulôn peujanjinyan hana meusaboh keubeueng tanoh pi nyang jeuet keu hak milék gata. Ulôn, TUHAN, na kheueh jeumba nibak warésan gata."
21 Geupeugah lé TUHAN ubak Nabi Harun, "Banmandum peuseumahan siper siploh ureuëng Israel Ulôn jok keu ureuëng-ureuëng Lewi. Nyan kheueh hak waréh awaknyan keubuet awaknyan di Khimah Ulôn.
22 Ureuëng-ureuëng Israel nyang laén hana jeuet jipeutoe ubak Khimah nyan mangat awaknyan bék jipeuteuka desya dan huköman maté ateueh droe awaknyan
23 Phon saát nyoe teuma ureuëng Lewi mantong kheueh nyang jeuet ji urôh Khimah Ulôn dan ateueh jih jitanggong banmandum tanggong jaweueb ateueh buet jihnyan. Peuratoran nyan teutab na cit teuma ubak keuturonan gata sampoe siumu masa. Ureuëng Lewi hana jiteumé warésan di Israel,
24 sabab keu hak waréh awaknyan ka Ulôn jok banmandum peuseumahan siper siploh nyang jipeuseumah lé ureuëng Israel keu Ulôn na kheueh sibagoe meuneubri nyang khusos. Nyang kheueh sabab jih keuhai ureuëng Lewi Ulôn peugah bahwa awaknyan hana meuteumé jeumba hak waréh di Israel."
25 TUHAN geuyue lom ubak Nabi Musa mangat jipeusampoe peurintah nyoe ubak ureuëng Lewi: Meunyoe gata tateurimong nibak ureuëng Israel peuseumahan siper siploh nyang geuseurah lé TUHAN ubak gata keu jeumba gata, atra nyan harôh teuma gata jok siper siploh keu TUHAN keu peuseumahan khusos gata.
27 Peuseumahan khusos nyan teuanggab saban deungon peuseumahan gandom barô dan ié anggô nyang barô teuma.
28 Deungon lagéenyan gatapi harôh tapeuseumah keu peuseumahan khusos ubak TUHAN siladum nibak peuseumahan siper siploh ureuëng Israel. Peuseumahan khusos nyan harôh gata jok ubak Imeum Nabi Harun.
29 Gata jok kheueh jeumba nyang paleng gét nibak peue nyang gata teurimong.
30 Óh kalheueh gata jok jeumba nyan, gata jeuet tacok nyang leubeh nyan, lagée sidroe ureuëng peutani meunan cit jicok peue nyang leubeh óh kalheueh jihnyan jiba peuseumahan.
31 Nyang leubeh nyan jeuet gata pajoh dipat mantong meusajan-sajan deungon keuluwarga gata, sibagoe upah nyang peubuet di dalam Khimah TUHAN.
32 Gata hana meusalah meunyoe nyan gata pajoh, asai mantong jeumba nyang paleng gét ka tapeuseumah ubak TUHAN. Bék gata peukuto peuseumahan suci ureuëng Israel deungon cara tapajoh sapeue-sapeue nibak peuseumahan nyan sigohlom jeumba nyang paleng gét teupeu khusos ubak TUHAN. Meunyoe gata taiengkeue peurintah nyan, gata teuma maté.


Chapter 19

1 TUHAN meufeureuman ubak Nabi Musa dan Nabi Harun
2 mangat geujak jok peuratoran-peuratoran nyoe ubak bansa Israel: Gata cok kheueh saboh leumô inong nyang bulée jih jagat lom teuma hana meucupa dan leumô nyan hántom lom teupeuguna keu ngon tarék beuban.
3 Tajok kheueh laju leumô nyan ubak Imeum Eleazar. Beulatang nyan harôh teuba u luwa khimah-khimah laju teusie dikeue imeum.
4 Di Imeum Eleazar harôh teuma geucok bacut darah beulatang nyan dan geureuték laju tujoh goe u teuh Khimah TUHAN nyan.
5 Banmandum beulatang nyan, meunan cit deungon kulét jih, asoe jih, darah dan asoe pruet jih, nyan banmandum harôh teutot dikeue imeum.
6 Óh lheuehnyan lé imeum geucok laju bacut kayée aras, saboh tangke hisop dan saboh untie teuma talo mirah, atra nyan geutiek laju u dalam apui nyang teungoh jipajoh leumô jagat nyan.
7 Óh ka lheueh nyan lé imeum geujak rhah laju peukayan gobnyan lom geumano teuma. Óh ka seuleusoe nyan barô kheueh jeuet geutamong u dalam khimah-khimah, teuma geuh nyan mantong kuto trok án mata uroe jilhob.
8 Meunan cit deungon ureuëng nyang tot leumô nyan jihnyan jijak rhah cit peukayan jih lom ngon jimano; ureuëng nyanpi mantong kuto sampoe án mata uroe jilhob.
9 Meunan cit deungon sidroe ureuëng nyang hana kuto jih nyan harôh jijak peusapat abée leumô nyan dan jijak keubah laju u teumpat nyang gleh di luwa khimah-khimah. Abée nyan jikeubah disinan mangat umat Israel hase jingui nyan keu jijak peugét ié upacara teupeu gleh keu teupeu amphon desya.
10 Ureuëng nyang peusapat abée leumô nyan harôh jijak rhah peukayan jih, teuma ureuëng nyan mantong kuto sampoe án mata uroe jilhob. Peuratoran nyan teutabna sampoe án siumu masa, bah kheueh nyan keu ureuëng Israel meunan cit keu ureuëng aséng nyang na tinggai lamkawan awaknyan.
11 Ureuëng nyang teumat manyét ureuëng nyan ka jeuet keu kuto nyang treb jih tujoh uroe.
12 Bak uroe nyang keu lhée dan nyang keu tujoh jihnyan harôh kheueh jipeugleh droe deungon ié upacara; barô kheueh ureuëng nyan teupeugah ka gleh. Teuma meunyoe uroe nyang keu lhée dan nyang keu tujoh jihnyan gohlom jijak peu gleh droe, jihnyan teutab kheueh lam keuadaan kuto.
13 Ureuëng nyang tupéeh deungon manyét dan hana teuma jijak peu gleh droe nyan na kheueh kuto, sabab jihnyan gohlom teusiram deungon ié upacara. Jihnyan ka jipeukuto Khimah TUHAN dan lé sababnyan jihnyan hanale teuanggab anggota umat Po teu Allah.
14 Meunyoe na sidroe ureuëng maté didalam khimah, soe mantong nyang na didalam khimah nyan atawa jitamong u dalam nyan, ureuëngnyan ka jeuet keu kuto nyang treb jih tujoh uroe.
15 Banmandum kendi dan kanot nyang hana meututob nyan pi ka jeuet keu kuto.
16 Tieb-tieb ureuëng nyang tupéeh deungon manyét nyang maté lé sabab keunong poh, atawa nyang maté keudroe jih di blang, ureuëng nyan ka jeuet keu kuto nyang treb jih tujoh uroe. Meunan cit deungon ureuëng nyang tupéeh deungon jirat ureuëng maté atawa ngon tuleueng ureuëng maté.
17 Keu teupeugleh ureuëng nyang kuto nyan, harôh teucok bacut abée nibak leumô inong nyang jagat nyang ka teutot keu teupeu amphon desya. Abée nyan harôh teupeu tamong u dalam saboh kanot, laju teuboh ié nyang teucok nibak ié nyang ji ilé.
18 Keuhai nyang phon, meunyoe na ureuëng maté didalam khimah, ureuëng nyang hana kuto harôh kheueh jicok saboh tangke hisop, laju jiceulob u dalam ié nyan, laju teuma jiseuték khimah nyan deungon banmandum nyang na didalam nyan, meunan cit deungon ureuëng nyang na disinan. Nibak hai nyang keu dua, na kheueh meunyoe sidroe-droe ureuëng tupéeh ngon manyét, keunong jirat atawa tuleueng ureuëng maté, ureuëng nyang hana kuto harôh kheueh jireuték ubak ureuëng nyang kuto nyan deungon cara nyang saban cit lagéenyan teuma.
19 Jihnyan harôh kheueh teureuték nibak uroe nyang keu lhée dan uroe nyang keutujoh. Bak uroe nyang keu tujoh nyan keumah kheueh upacara teupeu gleh ureuëng nyang kuto nyan. Ureuëng nyan harôh jijak rhah keudroe peukayan jih sigoeguih jimano teuma. Phon nibak mata uroe jilhob ureuëng nyan ka jeuet keu gleh.
20 Ureuëng nyang jeuet keu kuto dan hana jipeuna upacara teu peu gleh droe, ureuëng nyan teutab kuto sabab gohlom teu siram deungon ié upacara. Jihnyan ka jipeukuto Khimah TUHAN, dan hanale teu anggab anggota umat Po teu Allah.
21 Peuratoran nyan teutab na keu siumu masa. Di ureuëng nyang reuték ié upacara nyan harôh kheueh teuma jirhah peukayan jih nyan, dan ureuëng nyang keunong ié nyan ka jeuet keu kuto sampoe án mata uroe jilhob.
22 Barang nyang jimat lé ureuëng kuto nyan ka jeuet keukuto, dan di ureuëng laén nyang mat atranyan pi ka jeuet keukuto teuma trok án mata uroe jilhob.


Chapter 20

1 Nibak buleuen sa banmandum umat Israel ka trok u padang pasi Zin dan laju jitinggai teutab di Kades. Miryam meuninggai dan laju jipeukubu disinan.
2 Bak saboh watée nibak teumpat khimah-khimah awaknyan ka hanale meu ié. Teuma jijak kheueh awaknyan ubak Nabi Musa dan Nabi Harun
3 sira ji meu ôk-ôk, "leubeh gét kamoe nyoe maté dikeue TUHAN meusajan-sajan deungon syedara-syedara kamoe!
4 Keupeue droeneueh neuba kamoe u padang pasi nyoe? Peu kheueh mangat jeuet kamoe nyoe maté disinoe meusigoe-sigoe deungon beulatang peulara kamoe?
5 Keupeue droeneueh ba kamoe meuteubiet nibak tanoh Meusé u teumpat nyang lumpah peudeh ngon seungsara nyoe sampoe kamoe hana hase kamoe pula sapeue nibak tanoh nyoe? Disinoe hana gandom, hana bak ara, anggô dan geulima. Meunan cit ié keu teujieb pi hana disinoe!"
6 Nabi Musa dan Nabi Harun laju geujak geupeu jiôh droe nibak awaknyan dan laju geujak dong di babah pintoe Khimah TUHAN. Awaknyan laju geusujut, dan laju teuma deuh cahya TUHAN nyang teuka u ateueh awaknyan.
7 TUHAN meufeureuman lom ubak Nabi Musa,
8 "Gata cok kheueh tungkat nyang na dikeue Peuto Peujanjian, laju lé gata dan Nabi Harun gatajak peusapat banmandum umat. Dikeue awaknyan banmandum, gata harôh tapeugah ubak gunong batée nyang na disinan mangat nibak gunong batée nyan ji peuteubiet ié. Meunan kheueh gata ka tapeuteubiet ié nibak gunong batée nyan mangat rakyat dan beulatang peulara awaknyan hase jijieb ié."
9 Teuma geujak kheueh laju Nabi Musa geujak cok tungkat nyan lagée nyan geupeurintah lé TUHAN.
10 Nabi Musa dan Nabi Harun laju teuma geupeusapat banmandum umat dikeue gunong batée nyan. Óh lheueh nyan Nabi Musa geupeugah, "Deungoe kheueh nyoe, hai kawöm peumbeurontak! Peu kheueh kamoe harôh kamoe peuteubiet ié lam gunong batée nyoe?"
11 Lé Nabi Musa laju geubeuôt tungkat geuh nyan dan tungkat nyan laju geu seukok u ateueh gunong batée nyan dua goe. Teuma jiteubiet kheueh ié nibak batée nyan nyang lumpah teuga, sampoe banmandum ureuëng dan beulatang peulara hase jijieb.
12 Teuma TUHAN geusapa Nabi Musa dan Nabi Harun, kheun Gobnyan, "Sabab gata kureueng meuiman ubak Ulôn keu teupeugah kuasa Ulôn nyang suci dikeue bansa Israel, gata hana teuma tapimpén awaknyan jitamong u nanggroe nyang Ulôn peujanji keu awaknyan."
13 Nyan kheueh mata ié Meriba. Di Teumpat nyan ureuëng-ureuëng Israel ji meu ôk-ôk lom ubak TUHAN, nibak teumpat nyan cit TUHAN geupeudeuh kuasa Geuh nyang suci ubak bansa nyan.
14 Óh lheueh nyan nibak Kades, Nabi Musa laju geukirém utosan-utosan keujijak meuhadab ubak Raja Edom. Kheun awaknyan, "Kamoe nibak sukée-sukée Israel nyan mantong na hubongan jih deungon syedara Teungku po. Di Teungku po mungken neuteupeue keususahan nyang teuka ateueh kamoe.
15 Lé indatu kamoe geujak u nanggroe Meusé dan geutinggai teutab disinan meuthon-thon treb jih. Indatu kamoe dan kamoe jipeusaneut hana gét lé bansa Meusé,
16 dan kamoe meulakée ubak TUHAN kamoe meulakée tulông. TUHAN geudeungoe teumawok kamoe laju geukirém sidroe malaikat. Malaikat nyan kheueh nyang pimpén kamoe meuteubiet nibak tanoh Meusé. Jinoenyoe kamoe ka na di Kades, saboh bandar nibak bataih wilayah Teungku po.
17 Kamoe lakée ngon meuharab beu Teungku peu idhin ubak kamoe mangat jeuet kamoejak rot nanggroe Teungku nyoe. Kamoe dan beulatang peulara kamoe hana meusimpang ho laén dan hana teuma kamoe tamong u lampôh-lampôh anggô. Dan meunan cit hana teuma kamoe jieb ié nibak mon-mon nyang atra Teungku. Kamoe teuma kamoe jak mantong di ateueh rot ueh rayeuk sampoe án kamoe teubiet nibak daerah Teungku po."
18 Teuma lé ureuëng Edom nyan jijaweueb, "Pakriban mantong gata-gata nyoe hana kamoe peu idhin gatajak rot wilayah kamoe. Meunyoe gata tapeusak droe, kamoe teuma kamoe seurang gata!"
19 Ureuëng Israel nyan jipeugah, "Kamoe teuma kamoe jak rot jalan rayeuk, dan meunyoe kamoe atawa beulatang peulara kamoe nyoe jijieb ié droeneueh, nyan teuma kamoe bayeue. Kamoe meuheuet keukamoe liwat mantong."
20 Ureuëng-ureuëng nyan jipeugah lom, "Han jeuet!" Laju awaknyan jiteubiet deungon tantra nyang jai lumpah na lom teuga keu jijak prang bansa Israel.
21 Teuma ureuëng Israel nyan laju jigisa dan jijak mita rot laén sabab ureuëng Edom nyan hana jibri idhin rot nanggroe jih.
22 Banmandum umat Israel nyan laju jitinggai Kades dan trok laju u Gunong Hor,
23 nibak bataih ngon Edom. Disinan TUHAN geupeugah ubak Nabi Musa dan Nabi Harun,
24 "Nabi Harun hana geutamong u nanggroe nyang ka Ulôn peujanji ubak bansa Israel; jihnyan teuma maté sabab gata ban dua ka talawan peurintah Ulôn tô ngon mata ié Meriba.
25 Gata ba kheueh Nabi Harun dan Eleazar, aneuëk jih nyan jijak teungoh u ateueh Gunong Hor.
26 Gatasut kheueh peukayan Nabi Harun nyan dan tapeusok kheueh laju ubak Eleazar. Nabi Harun teuma maté di teumpat nyan."
27 Nabi Musa laju geupeubuet peue nyang ka geupeurintah lé TUHAN ubak gobnyan. Nabi Musa, Nabi Harun dan Eleazar laju geujak teungoh u ateueh Gunong Hor dan jikalon lé banmandum umat.
28 Laju Nabi Musa geusut peukayan Nabi Harun geupeusok laju peukayan nyan ubak Eleazar. Di ateueh pucak gunong nyan Nabi Harun laju meuninggai donya, óh lheueh nyan Nabi Musa ngon Eleazar geutreun laju diateueh gunong nyan dan geujak gisa lom teuma.
29 Banmandum umat jideungoe bahwa Nabi Harun ka meuninggai donya, dan awaknyan banmandum jimeukabong keu lhée ploh uroe treb jih.


Chapter 21

1 Arad na kheueh saboh banda di siblah seulatan nanggroe Kanaan. Bak watée raja banda nyan jideungoe bahwa ureuëng-ureuëng Israel teuka jijak liwat rot Atarim, jijak kheueh laju awaknyan jijakprang bansa nyan dan laju jiteumeteun napadub droe lamkawan awaknyan.
2 Lé ureuëng Israel nyan jimeukaôi lagée nyoe ubak TUHAN, "Meunyoe Droeneueh ya TUHAN neubri beumeunang nyang muteulak keu kamoe ateueh bansa nyan, awaknyan dan banda-banda awaknyan teuma kamoe gulong sampoe án habéh."
3 TUHAN geuteurimong peue nyang jilakée lé ureuëng Israel nyan dan geutulông awaknyan geupeutaloe ureuëng Kanaan. Teuma ureuëng Israel laju jijak prang ureuëng-ureuëng Kanaan nyan sampoe ureuëng Kanaan nyan taloe habéh binasa meunan cit deungon banda-banda awaknyan jipeu hanco banmandum, laju teumpatnyan jiboh nan Horma.
4 Óh lheueh nyan ureuëng Israel laju jitinggai Gunong Hor nyan, dan jicok rot nyang beusôt u Lhok Akaba, keu jikeulileng daerah Edom. Teuma di teungoh rot ueh, bansa nyan ka habéh saba jih,
5 dan laju ji ôk-ôk lom ubak Po teu Allah dan Nabi Musa. Awaknyan jipeugah, "Keupeue Droeneueh ba kamoe neupeuteubiet nibak nanggroe Meusé? Peu kheueh keu neujak poh maté kamoe di teungoh padang pasi nyoe? Disinoe hana peunajoh, meunan cit ié jieb pi hana. Kamoe luwat deungon peunajoh nyang tabeue nyoe!"
6 Teuma TUHAN laju geupeutreun uleue nyang lumpah meubisa lamkawan bansa nyan. Jai that-that ureuëng Israel nyang jikhab lé uleue-uleue meubisa nyan.
7 Laju bansa nyan jijak meuhadab ubak Nabi Musa dan jipeugah, "Kamoe ka meudesya sabab kamoe meu ôk-ôk ubak TUHAN dan ubak droeneueh. Neu meudoá kheueh ubak TUHAN mangat jeuet uleue-uleue nyoe jiwéeh beujiôh nibak kamoe." Lé Nabi Musa laju geumeudoá keu bansa-bansa nyan.
8 Laju TUHAN meufeureuman ubak Nabi Musa geuyue peugét saboh uleue nibak logam dan atranyan geuyue keubah di ateueh saboh taméh. Soe mantong ureuëng nyang jikab lé uleue, laju puléh meunyoe jikalon uleue nyang teupeugét nibak logam nyan.
9 Lé Nabi Musa laju geupeugét uleue nibak teumaga dan geukeubah laju di ateueh taméh lagée nyang geuyue lé TUHAN ubak gobnyan. Tieb-tieb ureuëng nyang jikab lé uleue, hase puléh meunyoe jikalon u ateueh uleue teumaga nyan.
10 Ureuëng Israel jibeurangkat lom, laju jipeudong khimah di banda Obot.
11 Óh kalheueh jitinggai teumpat nyan, awaknyan laju teuma jipeudong khimah di teumpat beukaih bangunan reuloh Abarim di padang pasi siblaih u timu daerah Moab.
12 Óh lheuehnyan awaknyan laju jipeudong khimah di Pantôn Zered.
13 Beudôh nibak teumpat nyan awaknyan jijak lom dan jipeudong teuma khimah di meurandeh Krueng Arnon, nibak padang pasi nyang meubinteueng u wilayah ureuëng Amori. Krueng Arnon nyan na kheueh bataih daerah ureuëng Moab deungon daerah ureuëng Amori.
14 Nyang kheueh sabab jih dalam 'Kitab Muprang TUHAN' teutuléh: "... Gampông Waheb, didaerah Sufa dan pantôn-pantôn jihnyan; Krueng Arnon
15 dan barieh nyang meulinteung trok u gampông Ar dan beusôt u bataih daerah ureuëng Moab."
16 Beudôh nibak teumpat nyan awaknyan laju jijak u teumpat nyang teupeunan Beer, makna jih mon-mon. Disinan TUHAN na meufeureuman ubak Nabi Musa, "Gata yue kheueh umat jeuet jimeusapat; Ulôn keuneuk bri ié keu awaknyan."
17 Nibak watée nyan ureuëng Israel laju jimeu ca-e lagéenyoe, "He, mon-mon, beumeue bok-bok kheueh ié gata, kamoe teuma meusambot gata deungon lagu.
18 Mon nyang geukueh lé ureuëng-ureuëng patot dan lé ureuëng peumimpén bansa geukueh deungon tungkat keupeumimpénan geuh dan deungon tungkat tanda kuasa awaknyan." Nibak padang pasi awaknyan jiminah u Matana,
19 dan beudôh nibak teumpat nyan u Nahaliel, laju teuma u Bamot,
20 óh lheueh nyan u pantôn didaerah ureuëng Moab, di miyueb pucak Gunong Pisga nyang meuhadab u padang pasi.
21 Laju bansa Israel jikirém utosan-utosan ubak Sihon, raja Amori, keu jijak peusampoe peusan nyoe,
22 "Neu peuidhin kheueh kamoe beujeuet kamojak rot nanggroe Teungku. Kamoe dan beulatang kamoe hana meusimpang ho laén dan hana teuma kamoe tamong u dalam blang atawa lampôh-lampôh anggô atawa kamoe jieb ié nibak mon-mon. Kamoe hana meu simpang nibak rot ueh raya trok án kamoe teubiet nibak nanggroe Teungku."
23 Teuma Raja Sihon nyan hana jipeu idhin ureuëng-ureuëng Israel nyan jijak rot nanggroe jih nyan. Raja nyan jipeusapat laju tantra dan jibeudôh disinan laju jijak u Yahas di padang pasi dan laju jiprang ureuëng-ureuëng Israel nyang na disinan.
24 Teuma lam prang nyan jai that-that tantra Amori nyang jipoh maté lé bansa Israel. Laju ureuëng-ureuëng Israel nyan jiduek di daerah awaknyan phon di Krueng Arnon trok u Krueng Yabok, nyan na kheueh bataih daerah ureuëng Amon, sabab nibak bataih nyan leumpah teuga peutahanan jih.
25 Deungon lagéenyan ureuëng Israel jireubot banmandum banda ureuëng Amori, jitamong cit keunan Hesybon dan banmandum banda ubit di bansilingka nyan, laju awaknyan pi tinggai teutab disinan.
26 Hesybon na kheueh ma banda Raja Sihon. Jihnyan ka lheueh na jimuprang jilawan raja Moab dan jireubot daerah ureuëng nyan sampoe sijiôh Krueng Arnon.
27 Nyang kheueh sabab jih lé pujangga geumeu ca-e lagéenyoe, "Teuka kheueh u Hesybon, u banda Raja Sihon. Kamoe meuheuet keuneuk kamoe kalon banda nyoe ji peugét dan peubarô lom teuma.
28 Na sigoe teujadi dibanda nyoe pasokan Sihon jimaju lagée apui hu. Nyang jipeuhanco banda Ar di Moab, dan jikuasa bukét-bukét disipanyang Arnon.
29 Wahe bansa Moab, gata ceulaka! Peumujoe Kamos, gata binasa! Gata geupeubiyeu lé Allah keu gata meungungse, kawöm ureuëng inong gata jeuet keu tawanan ureuëng Amori.
30 Teuma jinoenyoe binasa kheueh keuturonan awaknyan, nibak ban sipanyang rot ueh phon di Hesybon u Dibon, nibak Nasyim u Nofah rab ngon Medeba."
31 Deungon lagéenyan bansa Israel ka tinggai teutab di daerah ureuëng Amori.
32 Óh lheuehnyan Nabi Musa geuyue teuma ureuëng-ureuëng nyan jijak mita rot nyang paleng gét keu jijak prang banda Yaezer. Di ureuëng Israel pih jireubot laju banda nyan meunan cit deungon banda-banda ubit nyang na dibansilingka nyan dan ji use laju ureuëng Amori nyang na tinggai disinan.
33 Óh lheueh nyan ureuëng Israel laju jiwet dan jicok rot ueh nyang beusôt u Basan. Raja Og di Basan jimaju laju deungon tantra keu jijak prang Ureuëng Israel di banda Edrei.
34 TUHAN meufeureuman ubak Nabi Musa, "Bék gata takot keu jihnyan. Ulôn teuma Lôn peumeunang gata. Gata teuma tapeutaloe jihnyan, banmandum rakyat jih dan nanggroe jih. Gata peusaneut kheueh jihnyan lagée gata peusaneut ateueh Raja Sihon nyang jimat peurintah di Hesybon."
35 Teuma ureuëng Israel jipeutaloe ngon jipoh maté Raja Og, aneuëk-aneuëk jih dan banmandum rakyat jih; hana nyang na teutinggai. Óh lheuehnyan awaknyan laju jitinggai ngon jiduek nibak nanggroe nyan.


Chapter 22

1 Bansa Israel nyan jibeurangkat lom dan laju jipeudong khimah ateueh darat Moab, di daerah meurandeh Krueng Yordan, toe ngon banda Yerikho.
2 Bak watée raja Moab nyang nan jih Balak, aneuëk Zipor, jideungoe pakriban bansa Israel nyan jipeusaneut ateueh ureuëng Amori, dan bahwa bansa Israel nyan gét that jai jeumeulah jih, yoe that-that raja nyan dan meunan ngon banmandum rakyat jih nyan teumakot banmandum.
4 Lé ureuëng Moab nyan laju jipeugah ubak peumimpén Midian, "Hana treb le geureumbolan nyan ji reupah ngon jiuét peue nyang deuh nibak binéh geutanyoe lagée leumô jirot naleueng di blang." Teuma Raja Balak
5 geu kirém laju utosan mangat jijak hôi Bileam, aneuëk Beor, nyang tinggai di banda Petor to ngon Krueng Efrat di daerah Amau. Awaknyan geuyue jak peusampoe ubak Bileam peusannyoe nibak Raja Balak, "Beuneu teupeu kheueh, na saboh bansa nyang teuka nibak nanggroe Meusé; awaknyan ka meutabu bansaboh nyoe dan ka siab jikeuneuk prang daerah kamoe.
6 Awaknyan leubeh teuga nibak kamoe. Lé sababnyan, tateuka kheueh! Neukutok kheueh awaknyan keu ulôn. Mungken kamoe hase kamoe peutaloe awaknyan dan kamoe use awaknyan nibak nanggroe nyoe. Sabab ulôn yakén that sabab ureuëng nyang droeneueh bri beureukat teuma meuteumé beureukat, dan ureuëng nyang droeneueh kutok teuma meuteumé bala."
7 Deungon nyan jijak kheueh laju peumimpén Moab dan Midian deungon jiba upah keu Bileam mangat geuhnyan geutem kutok ureuëng Israel. Óh ka trok awaknyan ubak Bileam, awaknyan laju jipeusampoe ubak gobnyan peue nyang ka geupeusan lé Raja Balak watée jikeuneuk jak meurumpok ngon Bileam nyan.
8 Kheun Bileam ubak awaknyan, "Gata dom kheueh disinoe. Singoh ulôn peugah ubak gata peue nyang ka geupeugah lé TUHAN ubak ulôn." Teuma lé peumimpén Moab nyan laju jitinggai di teumpat Bileam.
9 Lé Po teu Allah laju geujak ubak Bileam dan geutanyong, "Soe kheueh ureuëng-ureuëng nyang tinggai di teumpat gata, Bileam?"
10 Geu jaweueb lé Bileam, "Awaknyan utosan Raja Balak nibak Moab jijak keunoe jipeugah
11 bahwa na saboh bansa nyang teuka nibak nanggroe Meusé ka meutabu bansaboh nyoe. Raja Balak geuyue ubak ulôn mangat lôn kutok bansa nyan keu jihnyan, mangat hase rajanyan jijak prang ngon ji use ureuëng nyan."
12 Geupeugah lom lé Po teu Allah ubak Bileam, "Bék kheueh gatajak ngon ureuëng nyan, dan bék teuma gata kutok bansa nyan, sabab awaknyan ka Ulôn bri beureukat."
13 Óh singoh beungoh Bileam laju geupeugah ubak ureuëng nyang jikirém lé Raja Balak nyan, "Gata woe kheueh laju, TUHAN hana geupeu idhin ulôn jak deungon gata."
14 Teuma jigisa kheueh laju awaknyan ubak Balak dan jipeusampoe ubak geuhnyan bahwa Bileam hana geutem jak deungon droe jihnyan.
15 Lé Raja balak geukirém lom leubeh le utosan nyang leubeh manyang pangkat jih nibak nyang phon.
16 Awaknyan jipeusampoe laju ubak Bileam peusan nyoe nibak Raja Balak, "Ulôn lakée deungon meuharab that: neuteuka kheueh, dan bék kheueh neutulak.
17 Ulôn kubri upah keu droeneueh nyang jai that, dan ulôn peubuet peue mantong nyang droeneueh peugah. Neuteuka kheueh, dan neukutok kheueh bansa nyan keu ulôn."
18 Teuma Bileam geujaweueb, "Bahpi nyan méuh dan pirak nyang na didalam meuligoe Raja Balak jijok banmandum nyan keu ulôn, teuma ulôn hana hase lôn iengkeue peue nyang ka geupeurintah lé TUHAN ubak ulôn, Po teu Allah nyang ulôn seumah. Bahpi nyan hai nyang paleng ubit ulôn hana jeuet lôn lawan hai nyan.
19 Teuma bahpi meunan bah kheueh nibak malam nyoe gata mudom disinoe, lagée nyang ka jipeubuet lé utosan nyang ka awai dilée. Ulôn meuheuet lôn keuneuk teupeu peu kheueh mantong na nyang teuma geupeugah lé TUHAN ubak ulôn."
20 Malam nyan Po teu Allah teuka lom ubak Bileam dan geupeugah, "Ureuëng-ureuëng nyan jiteuka keu jilakée gata mangat gatajak deungon awaknyan. Teuma meusiab-siab kheueh mangat gatajak. Teuma gata peubuet kheueh peue nyang teupeurintah ubak gata."
21 Óh singoh beungoh Bileam laju geupasang peulana ateueh keuleudée geuh, laju geujak meusigoe deungon mandum peumimpén Moab nyan.
22 Teuma bak watée Bileam geujak, Po teu Allah gét that beungéh. Teungoh Bileam geupasang ateueh keuleudée geuhnyan, ji iréng lé dua droe peulayan gobnyan, laju malaikat TUHAN geudong di teungoh-teungoh rot ueh rayeuk keu geu pagab geuhnyan nyang teungoh geujak.
23 Jikalon malaikat TUHAN ka teudong disinan deungon peudeueng bak jaroe nyang ka teusuet didalam sarong, laju keuleudée nyan jijak wet holaén nyang meusimpang nibak rot ueh nyang teungoh jijak nyan, dan jijak laju u dalam blang. Bileam laju geuseunuét keuleudée nyan mangat jigisa lom ubak rot nyang phon.
24 Óh lheuehnyan malaikat TUHAN geudong laju lom di teungoh rot ueh nyang leubeh sampiek, nibak dua boh lampôh anggô deungon bintéh beuton nyang meuapet siblah saho.
25 Bak watée keuleudée nyan deuh lom jikalon malaikat TUHAN nyang ka na teudong disinan, laju keuleudée nyan ji seuek bak binéh sampoe gaki Bileam teuseupet bak bintéh beuton nyan. Bileam geu seunuét lom keuleudée nyan.
26 Lé malaikat TUHAN geuminah teuma, dan laju geudong bak binéh nyang leubeh sampiek, sampoe ka hanale rot ueh keu rot jijak bah kheueh nyan di blaih wie meunan cit di blaih uneuen.
27 Watée jikalon malaikat TUHAN nyan, keuleudée nyan laju jpeureubah droe. Bileam meutamah beungéh laju geuseunuét lom keuleudée geuh nyan deungon tungkat.
28 Lé TUHAN geupeujeuet keuleudée nyan hase jipeugah haba. Jipeugah lé beulatang nyan ubak Bileam, "Peu kheueh nyang ulôn peubuet keu Teungku sampoe Teungku neu seunuét ulôn nyoe trok án lhée goe?"
29 Jaweueb Bileam, "Gata tapeu meuén ulôn! Seukira jih na peudeueng nibak ulôn, ka pasti gata ulôn cang sampoe án maté!"
30 Ji Jaweueb lé keuleudée nyan, "Bukon kheueh ulôn nyoe keuleudée droeneueh hei Teungku nyang yoh awaikon ilée ulôn nyoe ka neupasang? Peu kheueh kana ulôn meubantah ateueh Teungku?" "Hana," jaweueb Bileam.
31 Lé TUHAN geupeuleumah ubak Bileam malaikat TUHAN nyang ka teudong disinan deungon peudeueng ka teusuet sarong ka siab nibak jaroe malaikat nyan. Siat nyan cit Bileam geusujut ubak tanoh sira geujok seumah.
32 Malaikat TUHAN laju geutanyong, "Pakon droeneueh seunuét keuleudée droeneueh trok án lhée goe? Ulôn nyoe teuka keu lôn jak tam gata, sabab meunurot peundapat ulôn hana gét droeneueh neujak keudéh.
33 Bak watée keuleudée droeneueh nyan jikalon ulôn, keuleudée droeneueh nyan jiseuek u binéh sampoe án lhée goe. Meunyoe hán, pasti droeneueh ka ulôn poh maté, teuma keuleudée nyan ulôn peuseulamat."
34 Geujaweueb lé Bileam, "Ulôn ka meudesya. Ulôn hana lôn teupeu bahwa droeneueh neudong di ateueh rot ueh keu neu pagab-pagab ulôn. Teuma jinoenyoe, meunurot peundapat Teungku hana gét ulôn jak laju ubak teumpat nyang lôn tuju, jinoenyoe bah ulôn woe lom teuma."
35 Teuma malaikat TUHAN geupeugah, "Neu seutôt kheueh meusajan deungon ureuëng-ureuëngnyan. Teuma droeneueh jeuet neupeugah peue nyang ulôn peugah." Bileam laju geujak lom teuma deungon ureuëng-ureuëng nyang geu kirém lé Raja Balak nyan.
36 Bak watée Balak jideungoe bahwa Bileam teuma geuteuka, gobnyan geujak tueng Bileam di banda Moab, nyang teuduek jih to ngon binéh Krueng Arnon, to teuma ngon bataih daerah Moab.
37 Geupeugah lé Raja Balak nyan ubak Bileam, "Pakon droeneueh hana neuteuka bak watée ulôn jaktueng phon-phon that? Peu kheueh neupike ulôn nyoe hana hase ulôn bayeue droeneueh?"
38 Geu jaweueb lé Bileam, "Ka jeuet, jinoenyoe ulôn ka trok lôn teuka. Teuma ulôn nyoe hana hak ulôn peugah peue-peue mantong keucuali Po teu Allah nyang yue ubak ulôn."
39 Teuma geujak kheueh laju Bileam deungon Raja Balak nyan u banda Huzot.
40 Nibak teumpat nyan Balak laju geukeureubeuen na meupadubboh leumô ngon bubiri. Siladum nibak sie nyan jijok laju ubak Bileam dan bubena peumimpén nyang na meusajan-sajan ngon gobnyan.
41 Óh singoh beungoh nyan Balak geuba Bileam jak teugoh bukét Bamot Baal. Nibak teumpat nyan Bileam hase geukalon siladum nibak bansa Israel.


Chapter 23

1 Kheun Bileam ubak Raja Balak nyan, "Gata peudong kheueh laju di teumpatnyoe tujoh boh miseubah keu ulôn, dan gata peusiab teuma disinan tujoh boh leumô agam dan tujoh boh teuma bubiri agam."
2 Raja Balak nyan geupeubuet laju lagée nyang geupeugah lé Bileam ubak gobnyan. Di ateueh tieb-tieb miseubah nyan awaknyan keubah laju saboh leumô agam dan saboh bubiri agam.
3 Laju Bileam geupeugah ubak Raja Balak, "Gata dong kheueh to ngon keureubeuen nyang teutot atra droeneueh nyan. Siat nyoe ulôn jak ngieng peu kheueh TUHAN geutem meurumpok deungon ulôn atawa hana. Teuma ulôn peugah banmandum peue-peue nyang geupeugah lé TUHAN ubak ulôn." Teuma Bileam geujak laju sidroe gobnyan ubak pucak saboh bukét,
4 dan disinan Po teu Allah teuka laju ubak gobnyan. Geupeugah lé Bileam ubak Po teu Allah, "Ulôn ka ulôn peudong tujoh boh miseubah dan ulôn peuseumah saboh leumô agam dan saboh teuma bubiri agam di ateueh maséng-maséng miseubah nyan."
5 Laju TUHAN geubri tée ubak Bileam peue nyang harôh geupeugah, dan geuyue laju Bileam nyan geugisa ubak raja Balak mangat geujak peutrok peusan TUHAN keu jih nyan.
6 Bileam laju geugisa dan geukalon Balak mantong teudong to ngon keureubeuen nyang teutot atra geuh nyan, meusajan-sajan deungon banmandum peumimpén Moab.
7 Laju Bileam geumeu lagu deungon nubuat nyoe, "Nibak Aram, gunong-gunong di timu sidéh, Balak, raja Moab jijak hôi ulôn, geupeugah, 'Neuteuka kheueh, dan neumeututoe kheueh keu ulôn. Neukutok kheueh bansa Israel nyan!'
8 Peu kheueh mungken ulôn kutok nyan, geupeugah lé Po teu Allah hana teukutok? Mungken kheueh ulôn keunong huköm, meunyoe TUHAN hana geumeuhuköm?
9 Nibak ateueh pucak gunong-gunong ulôn kalon awaknyan: nibak bukét-bukét ulôn pandang awaknyan. Ngieng kheueh, saboh bansa nyang teu aséng keudroe hana jitamong ubak kawöm bansa-bansa laén.
10 Keuturonan Nabi Yakub lagée ano di panté nyang hana hase teubileueng; bansa Israel nyan ramé jih hana ngon peusa. Seumoga ulôn maté lagée ureuëng nyang jujoe kira jih ajai ulôn lagée ajai ureuëng-ureuëng nyan."
11 Laju Raja Balak geupeugah ubak Bileam, "Peu kheueh nyang teupeubuet ateueh ulôn? Gata ulôn ba keunoe mangat takutok musoh-musoh ulôn. Teuma meubalek gata bri beureukat ateueh awaknyan."
12 Geujaweueb lé Bileam, "Ulôn teuma hase ulôn peubuet peue nyang ka TUHAN yue ubak ulôn."
13 Laju Raja Balak geupeugah lom ubak Bileam, "Jak kheueh geutanyoe tajak meusajan-sajan u teumpat nyang laén; phon sinan droeneueh jeuet neukalon teuma siladum mantong nibak bansa Israel. Neukutok kheueh laju awaknyan enteuk phon disinan."
14 Teuma Raja Balak geuba laju Bileam u padang Zofim, di pucak Gunong Pisga. Meunan cit disinan laju geupeudong tujoh boh miseubah dan geupeuseumah laju saboh leumô agam dan saboh teuma bubiri agam di ateueh maséng-maséng miseubah nyan.
15 Geupeugah lé Bileam ubak Balak, "Tinggai kheueh droeneueh disinoe, to ngon keureubeuen nyang teutot atra Teungku, jinoenyoe ulôn jak meurumpok deungon TUHAN disinan."
16 TUHAN geumeurumpok laju deungon Bileam dan geubri tée laju ubak gobnyan peue nyang harôh geupeugah, laju gobnyan geugisa ubak Balak keu geujak peusampoe peusan TUHAN nyan.
17 Teuma geugisa laju Bileam geujak meurumpok ngon Balak nyang mantong teudong to ngon keureubeuen nyang teutot atra geuhnyan, meunan cit na disinan dumna peumimpén ureuëng Moab. Raja Balak nyan laju geutanyong peue nyang ka geupeugah lé TUHAN ubak Bileam nyan,
18 laju Bileam geumeu lagu lom lagée nyoe, "Hai, Balak, aneuëk Zipor, neujak kheueh keunoe, deungoe kheueh peue nyang ulôn peugah nyoe.
19 Po teu Allah kon lagée manusia nyang mudah meunyeusai dan galak teuma meubuhak bak peugah haba. Meunyoe Po teu Allah meujanji, janji nyan pasti geupeutrok! Meunyoe Gobnyan geupeugah haba, nyan ka teuntée teupeubuet teuma!
20 Ulôn geuyue bri beureukat; dan meunyoe Po teu Allah nyang bri beureukat, nyan hana hase ulôn tarék lom teuma.
21 Bak Nabi Yakub hana leumah buet nyang jeuhet; bak ureuëng Israel hana teuma deuh nyang payah-payah. TUHAN, Po teu Allah awaknyan, sabena deungon awaknyan. Awaknyan jimeusurak: Gobnyan kheueh Raja!
22 Po teu Allah nyang ba awaknyan geupeuteubiet nibak nanggroe Meusé; lagée banteng kleuet nyang jimeulo keu awaknyan.
23 Hana iéleumé sihe nyang hase keunong ateueh Nabi Yakub hana teuma iéleumé tanueng nyang meudaya u ateueh ureuëng Israel. Keuhai bansa nyan gob laén teuma jipeugah, 'Kalon, buet ajaéb nyang geupeuleumah lé Po teu Allah!'
24 Bansa nyan jibeudôh lagée singa inong, dan jidong óh cot na lagée singa agam. Singa nyan hana lom jiéh sigohlom ji teugom umpeuen jih dan jijieb darah musoh nyang jeuet keu umpeuen jihnyan."
25 Laju Balak jipeugah ubak Bileam, "Ka kheueh nyan, meunyoe gata hana cit tatem kutok bansa Israel; teuma bék kheueh cuba-cuba neubri beureukat keu awaknyan!"
26 Jaweueb Bileam, "Bukon kheueh ka lheueh ulôn peugah ubak Teungku bahwa ulôn teuma lôn peubuet peue-peue mantong nyang geupeurintah lé TUHAN?"
27 Geupeugah lom lé Raja Balak ubak Bileam, "Bôh jak kheueh geutanyoe tajak u teumpat nyang laén, pat tateupeue, mungken diteumpat nyan teuma Po teu Allah geupeu biyeu gata kutok ureuëng Israel keu ulôn."
28 Teuma Raja Balak nyan laju jiba Bileam u ateueh pucak Gunong Peor nyang meuhadab u padang pasi.
29 Geupeugah lé Bileam ubak Raja Balak nyan, "Neupeudong kheueh laju tujoh boh miseubah disinoe dan neupeusiab kheueh teuma tujoh boh leumô agam dan tujoh boh teuma bubiri agam."
30 Raja Balak nyan geupeubuet laju lagée nyang geupeurintah lé Bileam. Gobnyan geukeureubeuen laju saboh leumô agam dan saboh teuma bubiri agam di ateueh tieb-tieb miseubah nyan.


Chapter 24

1 Jinoenyoe Bileam ka geuteupeue keuheundak TUHAN bahwa gobnyan geubri beureukat ubak bansa Israel. Sababnyan gobnyan hanale geujak mita tanda-tanda lagée nyang ka geupeubuet nyang ka nyoe. Bileam geupandang u arah padang pasi,
2 dan geungieng bansa Israel teungoh jipeudong khimah seucara meukeulompok-keulompok meunurot sukée bansa awaknyan maséng-maséng. Laju Roh Po teu Allah geutreun geukuasa ateueh Bileam nyan,
3 dan Bileam nyan laju teuma geupeugah nubuat nyoe, "Nyoe kheueh peusan Bileam, aneuëk Beor, nyang tutoe haba sidroe ureuëng keumalon
4 nyang ka geudeungoe tutoe haba Po teu Allah dan geukalon nyang teupeudéh nibak Nyang Mahakuasa, sira teu éh, teuma mata geuh teutab teubleuet.
5 Padubna gét jih khimah-khimah droeneueh hai Nabi Yakub, dan teumpat-teumpat tinggai gata hai ureuëng Israel!
6 Lagée pantôn nyang luwah meureutang, atawa taman bungöng nibak binéh krueng; lagée bak gaharu nyang geupula lé TUHAN, atawa bak aras nyang na nibak lueng.
7 Awaknyan meuteumé ié ujeuen nyang meulimpah, bijéh sinemoh nyang meuteumé ié le. Raja jihnyan teuma jaya, leubeh nibak Agag, dan keurajeuen jih teupeu agong teuma.
8 Po teu Allah nyang ba awaknyan teupeuteubiet nibak nanggroe Meusé, lagée keubeue kleuet nyang meuloe keu awaknyan. Bubena bansa musoh ka habéh banmandum jiúet, tuleueng-tuleueng awaknyan jipeureumok banmandum, dan panah-panah seunjata awaknyan habéh geuwiet banmandum
9 Bansa-bansa nyan na lagée singa agam ngon singa inong, nyang jitiarab ngon sira jiéh. Soe kheueh nyang beuhe ji peubeudôh jihnyan? Seumoga ureuëng nyang bri beureukat ubak gata geubri beureukat teuma ubak ureuëng nyan, dan ureuëng nyang kutok gata jikutok teuma."
10 Deungon beungéh nyang hana teukira Raja Balak sira geu reugam boh sininju geuh geupeugah ubak Bileam, "Gata ulôn hôi keu gata kutok bubena musoh-musoh ulôn, teuma pakon gata bri beureukat ubak awaknyan sampoe án lhée goe.
11 Jinoenyoe gata jeuet tajak keudeh, tajakwoe u rumoh gata! Ulôn meujanji upah ubak gata, teuma TUHAN hana geupeu idhin gata keu tateurimong upah nyan."
12 Geujaweueb lé Bileam, "Bukon kheueh kalheueh ulôn peugah ubak utosan-utosan Teungku bahwa
13 bahpi Teungku neubri keu ulôn méuh dan pirak dan banmandum nyang na di dalam meuligoe Teungku nyan, ulôn hana hase ulôn iengkeue peurintah TUHAN dan lôn peubuet sapeue-sapeue ban galak droe ulôn? Ulôn teuma hase lôn peugah peue nyang ka TUHAN yue ubak ulôn."
14 Geupeugah lé Bileam ubak Raja Balak, "Jinoenyoe ulôn keuneuk woe ubak bansa ulôn. Teuma sigohlom ulôn jak, bah kheueh ulôn bri tée ubak Teungku keuhai peue nyang teuma jipeubuet lé bansa Israel ateueh bansa Teungku óh laén uroe."
15 Laju Bileam geupeugah teuma nubuat nyoe sira geu meulagu, "Nyoe kheueh peusan Bileam aneuëk Beor; tutoe haba sidroe ureuëng nyang deuh keumalon
16 nyang ka ji deungoe feureuman Po teu Allah, dan jeuet jituri Nyang Mahamanyang; nyang peuleumah nyang teukalon nibak Nyang Mahakuasa sira teu éh teuma mata teutab teubleuet.
17 Ulôn kalon gobnyan, teuma bukon watée nyoe; ulôn pandang gobnyan, teuma rot jiôh. Sidroe raja nyang meuasai nibak bansa Israel, teuma teuka lagée bintang nyang hu meu ble-ble. Bubena peumimpén Moab geupeu reumok banmandum bansa Set teuma geupeuhanco.
18 Tanah Edom teuma jiduek lé musoh jih nyan, teuma Israel jipeubuet buet nyang lumpah peukasa.
19 Nibak Nabi Yakub teuma teuka sidroe nyang mat kuasa, nyang jipeuhanco bubena musoh-musoh jih."
20 Óh ka lheueh nibak geupeubuet nyan Bileam geukalon ureuëng-ureuëng Amalek. Teuma lé gobnyan laju geupeugah ngon geu meulagu nubuat nyoe, "Nibak sigala bansa nyang na di donya nyoe, Amalek na kheueh nyang paleng meukuasa. Teuma bansa nyan nibak akhé jih, teuma teusampôh cit teuma keu siumu masa."
21 Nibak meuneubuet nyan Bileam geukalon teuma keuturonan Kain, laju geupeugah ngon geu meulagu lagée nubuat nyoe, "Teumpat tinggai gata keubit lumpah that kukoh, na lagée umpung cicém di ateueh gunong batée.
22 Teuma gata, hai ureuëng Keni, teuma geupeubinasa, hana treb le Asyur ji angkot gata lagée ureuëng nyang teuteun."
23 Óh lheuehnyan Bileam geupeugah teuma nubuat nyang lagée nyoe, "Cilaka! Soe nyang udeb, meunyoe Po teu Allah geupeubuet hai nyan?
24 Teuma nibak siprus jiteuka saboh kawan kapai, awaknyan laju jipeutaklok Asyur dan Heber, óh lheuehnyan kawan kapai nyanpi teuma hanco binasa."
25 Laju Bileam meukeumah-keumah geukeuneuk woe u teumpat tinggai gobnyan, dan meunan cit ngon Raja Balak geujak cit teuma.


Chapter 25

1 Teungoh bansa Israel nyan tinggai di Pantôn Sitim, ureuëng agam awaknyan ka jipeuphon meumukah deungon ureuëng-ureuëng inong Moab nyang na tinggai disinan.
2 Ureuëng-ureuëng inong nyan jipakat awaknyan ubak teumpat-teumpat khanuri keureubeuen keu jijak bri horeumat ubak ilah awaknyan. Meunan cit di ureuëng-ureuëng Israel nyan meusajan cit jimakheun keureubeuen nyan dan ji seumah ilah ureuëng Moab.
3 Lé sabab ureuëng Israel nyan jiseumah Baal di Peor, TUHAN beungéh ubak awaknyan dan geupeugah ubak Nabi Musa,
4 "Gatajak drob kheueh laju banmandum bansa nyan dan gata jakpoh bu maté awaknyan dikeue rakyat ba sibagoe teulaksana peurintah Ulôn, mangat Ulôn hanale Lôn beungéh keu bansa nyan."
5 Óh lheuehnyan Nabi Musa geupeugah laju ubak hakém-hakém bansa Israel, "Gatanyoe maséng-maséng harôh tajak poh maté banmandum ureuëng didalam sukée gata nyang ka jiseumah Baal di Peor."
6 Bak watée Nabi Musa dan banmandum umat teungoh jimo ngon jimeuba-e dikeue Khimah TUHAN, awaknyan jingieng sidroe ureuëng Israel teungoh geuba sidroe ureuëng inong Midian jipeutamong u dalam khimah jihnyan.
7 Bak watée Pinehas, aneuëk Eleazar, cucoe Imeum Harun geukalon hai nyan, laju geubeudôh dan geutinggai laju ureuëng meu hudôm nyan. Laju geucok saboh kapak
8 laju geujak tiyéub ureuëng agam ngon ureuëng inong nyan u dalam khimah. Bandua droe ureuëng nyan laju geutob deungon kapak nyan teuma jipiôh kheueh bala nyang teungoh jiteuka deungon hebat that di Israel nyan.
9 Teuma bak watée nyan nyang maté ka na 24.000 droe.
10 TUHAN meufeureuman lom ubak Nabi Musa,
11 "Pinehas aneuëk Eleazar, cucoe Imeum Harun, deungon bit-bit dan hana jipiôh jibila keuhoreumatan Ulôn lamkawan ureuëng Israel, sampoe beungéh Ulôn nyan reuda dan Ulôn hana jadéh Ulôn peubinasa bansa nyan.
12 Lé nyan, tajak peugah kheueh ubak Pinehas bahwa Ulôn keuneuk peugot sapeue-sapeue ikat janji deungon jihnyan.
13 Jihnyan dan keuturonan jih ka Ulôn peuteutab sibagoe imeum keu siumu masa, sabab jihnyan deungon gigéh that ka jibila Ulôn, Po teu Allah jih, dan ka teuma jipeuna damé keu desya ureuëng Israel."
14 Nan ureuëng Israel nyang geupoh maté meusigoe ngon ureuëng inong nyan Zimri, aneuëk Salu, ulée kawöm saboh keuluwarga nibak sukée Simeon.
15 Ureuëng inong nyan nan jih Kozbi; jihnyan aneuëk Zur, sidroe ulée kawöm Midian.
16 TUHAN laju geubri peurintah nyoe ubak Nabi Musa,
17 "Gata jaklawan kheueh ureuëng Midian, dan gata peubinasa kheueh awaknyan
18 sabab buet nyang jeuhet nyang ka awaknyan reunca keue gata di Peor, dan kareuna Kozbi aneuëk sidroe ulée kawöm di Midian. Kozbi nyan ureuëng inong nyang maté keunong poh bak watée teujadi beuncana sabab peuristiwa di Peor."


Chapter 26

1 Óh ka lheueh beuncana nyan seuleusoe, TUHAN geupeugah ubak Nabi Musa dan Eleazar aneuëk Imeum Harun,
2 "Gata harôh tapeuna seunsus keu banmandum umat Israel meunurot keuluwarga jihnyan maséng-maséng. Banmandum ureuëng agam nyang meu umu dua ploh thon u ateueh nyang ka mampu jeuet keu tantra, ureuëng nyan harôh teucetet."
3 Nabi Musa dan Eleazar laju geupeubuet peue nyang ka geupeurintah nyan. Awaknyan laju geuhôi banmandum ureuëng agam nyang meu umu dua ploh thon u ateueh dan geupeusapat laju awaknyan di ateueh darat Moab, nibak siblaih Krueng Yordan, toe ngon banda Yerikho. Nyoe kheueh ureuëng-ureuëng Israel nyang jiteubiet nibak nanggroe Meusé:
5 Nibak sukée Ruben, aneuëk tuha Nabi Yakub: kawöm Henokh, Palu,
6 Hezron dan Karmi.
7 Ureuëng agam dalam kawöm nyan na jeumeulah jih 43.730 droe.
8 Aneuëk Palu na kheueh Eliab,
9 dan aneuëk-aneuëk Eliab na kheueh Nemuel, Datan dan Abiram. Datan dan Abiram nyan ka jipiléh lé umat, teuma awaknyan jipeusaho droe deungon murit-murit Korah keu jilawan Nabi Musa dan Nabi Harun dan lom jilawan TUHAN.
10 Laju bumoe pi beukah bubena awaknyan meunan cit deungon Korah habéh banmandum jiuét lé bumoe sampoe maté bak watée apui jitot sampoe binasa 250 droe ureuëng agam. Hainyan jeuet keu peuingat keu bansa Israel.
11 Teuma aneuëk-aneuëk Korah hana rhoh teupoh maté.
12 Nibak sukée Simeon: kawöm Nemuel, Yamin, dan Yakhin,
13 Zerah dan Saul.
14 Ureuëng agam lam kawöm nyan na jeumeulah jih 22.200 droe.
15 Nibak sukée Gad: Kawöm Zefon, Hagi, Syuni,
16 Ozni, Eri,
17 Arod dan Areli.
18 Ureuëng agam lam kawöm-kawöm nyan na jeumeulah jih 40.500 droe.
19 Nibak sukée Yehuda: Kawöm Syela, Peres, Zerah, Hezron dan Hamul. Dua droe aneuëk Yehuda, na kheueh Er dan Onan, ka meuninggai donya di tanoh Kanaan.
22 Ureuëng agam dalam kawöm nyan na jeumeulah jih 76.500 droe.
23 Nibak sukée Isakhar: Kawöm Tola, Pua,
24 Yasub dan Simron.
25 Ureuëng agam lam kawöm nyan na jeumeulah jih 64.300 droe.
26 Nibak sukée Zebulon: Kawöm Sered, Elon dan Yahleel.
27 Ureuëng agam lam kawöm nyan na jeumeulah jih 60.500.
28 Nibak keuturonan Nabi Yusuf, nyang na jimeu aneuëk dua droe aneuëk agam: sukée Manasye dan sukée Efraim.
29 Nibak sukée Manasye: Makhir, aneuëk Manasye na kheueh bapak Gilead; dan kawöm-kawöm nyang seulanjut jihnyoe na kheueh nibak kawöm Gilead:
30 Kawöm Lezer, Helek,
31 Asriel, Sekhem,
32 Semidan dan Hefer.
33 Zelafehad aneuëk Hefer hana jimeu aneuëk nyang agam, teuma aneuëk-aneuëk inong. Nan-nan awaknyan na kheueh Mahla, Noa, Hogla, Milka dan Tirza.
34 Ureuëng agam lam kawöm nyan na jeumeulah jih 52.700 droe.
35 Nibak sukée Efraim: Kawöm Sutelah, Bekher, dan Tahan.
36 Kawöm Eran na kheueh keuturonan Sutelah.
37 Ureuëng agam lam kawöm nyan na jeumeulah jih 32.500 droe. Nyan kheueh kawöm-kawöm keuturonan Nabi Yusuf.
38 Nibak sukée Benyamin: Kawöm Bela, Asybel, Ahiram,
39 Sefufam dan Hufam.
40 Kawöm Ared dan Naaman na kheueh keuturonan Bela.
41 Ureuëng agam lam kawöm-kawöm nyan na jeumeulah jih 45.600 droe.
42 Nibak sukée Dan: Kawöm Suham.
43 Ureuëng agam lam kawöm nyan na jeumeulah jih 64.400 droe.
44 Nibak sukée Asyer: Kawöm Yimna, Yiswi dan Beria.
45 Kawöm Heber dan Malkiel na kheueh keuturonan Beria.
46 Asyer na jimeu aneuëk sidroe aneuëk inong nyang meunan Serah.
47 Ureuëng agam lam kawöm-kawöm nyan na jeumeulah jih 53.400 droe.
48 Nibak sukée Naftali: Kawöm Yahzeel, Guni,
49 Yezer dan Syilem.
50 Ureuëng agam lam kawöm nyan na jeumeulah jih 45.400 droe.
51 Banmandum ureuëng agam Israel na jeumeulah 601.730 droe.
52 TUHAN geupeugah ubak Nabi Musa,
53 "Tabagi kheueh tanoh-tanoh nyan keu sukée-sukée bansa Israel meunurot rayeuk jih maséng-maséng sukée.
54 Gata peubuet kheueh nyan deungon cara teutiek undi. Ubak sukée nyang rayeuk harôh neubri jeumba nyang rayeuk, dan meunan cit keu sukée nyang ubit gatabri teuma jeumba nyang ubit teuma."
57 Sukée Lewi na kheueh nibak kawöm-kawöm Gerson, Kehat dan Merari.
58 Lam keuturonan awaknyan jitamong cit keunan kawöm Libni, Hebron, Mahli, Musi dan Korah. Kehat na kheueh bapak si Amram.
59 Amram jimeukawen deungon Yokhebed, aneuëk Lewi. Yokhebed nyan lahé di nanggroe Meusé. Amram dan Yokhebed nyan na teuma jimeu aneuëk dua droe aneuëk agam: Nabi Harun dan Nabi Musa, meunan cit teuma sidroe aneuëk inong nyang nan jih Miryam.
60 Nabi Harun na teuma geumeu aneuëk peuet droe aneuëk agam: Nadab, Abihu, Eleazar dan Itamar.
61 Nadab dan Abihu maté bak watée awaknyan jipeuseumah apui nyang hana geu galak lé Po teu Allah.
62 Ureuëng agam nibak sukée Lewi nyan nyang meu umu sibuleuen u ateueh na jeumeulah jih 23.000 droe. Awaknyan teudafeutar aséng hana meusajan nibak syedara-syedara saboh bansa jihnyan, sabab awaknyan hana meuteumé tanoh pusaka di Israel.
63 Nyan kheueh dafeutar nyang geupeubuet lé Nabi Musa dan Imeum Eleazar keuhai kawöm-kawöm Israel bak watée awaknyan teupeuna seunsus di darat Moab di siblah Krueng Yordan to ngon kota Yerikho.
64 Nibak ureuëng-ureuëng nyang yoh watée ilée ka geudafeutar lé Nabi Musa ngon Nabi Harun dipadang pasi Sinai, hana meusidroe pi nibak awaknyan nyang mantong udeb.
65 Hainyan ka geupeugah lé TUHAN bahwa awaknyan banmandum maté di padang pasi. Dan keubit awaknyan banmandum maté, teukeucuali Kaleb aneuëk Yefuna dan Yosua aneuëk Nun.


Chapter 27

1 Zelafehad na teuma jimeu aneuëk limong droe aneuëk inong, awaknyan na kheueh Mahla, Noa, Hogla, Milka dan Tirza. Bapak Zelafehad nyan nan jih Hefer, dan bapak Hefer nyan na kheueh Gilead. Bapak Gilead nyan na kheueh Makhir, bapak Makhir nan jih Manasye, dan bapak Manasye na kheueh Nabi Yusuf.
2 Banlimong droe aneuëk Zelafehed nyan laju jijak meuhadab ubak Nabi Musa, dan Imeum Eleazar, meunan cit bubena peumimpén ngon banmandum umat nyang teungoh meusapat to ngon babah pintoe Khimah TUHAN. Kheun awaknyan.
3 "Bapak kamoe meuninggai donya di padang pasi dan lom gobnyan hana teuma meu aneuëk agam. Geuhnyan bukon peungikot korah nyang beurontak ubak TUHAN. Bapak kamoe meuninggai sabab lé desya geuh nyan keudroe.
4 Teuma pakon nan gobnyan harôh gadôh nibak bansa Israel sabab gobnyan hana geumeu aneuëk nyang agam? Neubri kheueh ubak kamoe tanoh pusaka meusajan-sajan deungon kawöm syedara bapak kamoe."
5 Laju Nabi Musa geupeusampoe hai awaknyan ubak TUHAN,
6 dan TUHAN geupeugah ubak Nabi Musa,
7 "Peue nyang jipeugah lé aneuëk-aneuëk Zelafehad keubit beutôi. Deungon nyan gata jok kheueh keu awaknyan tanoh pusaka meusajan deungon kawöm syedara bapak awaknyan. Warésan Zelafehad nyan harôh kheueh jipeutreun keu aneuëk-aneuëk jihnyan nyang inong.
8 Gata peugah kheueh ubak bansa Israel meunyoe sidroe aneuëk agam maté dan jihnyan hana jimeu aneuëk nyang agam, teuma tanoh pusaka jihnyan harôh jipeuwaréh ubak aneuëk inong.
9 Meunyoe ureuëng nyan hana teuma aneuëk inong, tanoh pusaka nyan jipeuwaréh ubak syedara jih nyang agam.
10 Meunyoe jihnyan hana teuma syedara nyang agam, tanoh jihnyan rhot ubak syedara nyang agam nibak bapak jihnyan.
11 Meunyoe jihnyan hana teuma syedara nyang agam, dan hana teuma syedara agam siblah bapak jihnyan, tanoh nyan rhot ubak rakan nyang paleng krab atawa paleng to deungon kawöm jihnyan." Peuratoran nyan harôh jitaát ngon jiturot lé ureuëng Israel sibagoe peuratoran huköm nyang geupeurintah lé TUHAN meulalu Nabi Musa.
12 TUHAN meufeureuman lom ubak Nabi Musa, "Gata jak ék kheueh u ateueh Gunong Abarim, dan nibak ateueh gunong nyan gata pandang kheueh nanggroe nyang teuma Ulôn bri keu ureuëng Israel.
13 Óh ka lheueh gata pandang nyan, gata teuma maté lagée aduen gata Nabi Harun,
14 sabab dipadang pasi Zin gata ban dua ka gata iengkeue ubak peurintah Ulôn. Bak watée di Meriba banmandum rakyat ji meukrôb-krôb ubak Ulôn, gata hana tatem peugah keuhai keukuasaan Ulôn dikeue awaknyan nyang na hubongan jih deungon ié nyan." (Peuristiwanyan teujadi nibak mata ié Meriba di Kades, padang pasi Zin).
15 Lé Nabi Musa laju geumeu doa,
16 "Ya, TUHAN Po teu Allah, nyang bri udeb keu mandum nyang udeb, ulôn meulakée, neutunyok kheueh sidroe ureuëng nyang hase jipimpén bansa nyoe;
17 sidroe ureuëng nyang hase jeuet keu panglima bak watée awaknyan jijak muprang. Bék kheueh neupeubiyeu umat Droeneueh nyoe lagée kawan domba nyang hana ureuëng rabe."
18 Kheun TUHAN ubak Nabi Musa, "Gatajak hôi kheueh Yosua aneuëk Nun. Jihnyan sidroe ureuëng nyang carông. Gata peuduek kheueh jaroe gata u ateueh ulée jihnyan.
19 Gata yue kheueh jihnyan jidong dikeue Imeum Eleazar dan banmandum umat. Dikeue awaknyan banmandum gata harôh gata peumaklum bahwa Yosua nyan na kheueh keu geunantoe gata.
20 Gata seurah kheueh ubak jihnyan siladum nibak keukuasaan gata, mangat umat Israel jitaát keu jihnyan.
21 Yosua harôh jijak lakée naseuhat ngon peutunyok ubak Imeum Eleazar, dan Eleazar harôh teuma jitanyong keuheundak Ulôn deungon jingui Urim dan Tumim. Deungon caranyan Eleazar jipimpén Yosua dan banmandum bansa Israel dalam sigala peukara nyang awaknyan peukeue."
22 Nabi Musa laju geupeubuet lagée nyang geupeurintah lé TUHAN nyan ubak geuhnyan. Gobnyan geuyue dong laju Yosua dikeue Imeum Eleazar dan dikeue banmandum umat.
23 Laju Nabi Musa geupeuduek jaroe gobnyan di ateueh ulée Yosua dan geupeumaklum laju bahwa Yosua nyan na kheueh keugeunantoe gobnyan, lagée nyang geupeugah lé TUHAN ubak gobnyan.


Chapter 28

1 TUHAN meufeureuman ubak Nabi Musa
2 mangat gobnyan geujak peugah ubak bansa Israel bahwa awaknyan harôh jisimak beuget-get bahwa bak watée-watée nyang ka teupeuteuntée, teupeuseumah keureubeuen-keureubeuen peunajoh nyang teupeugalak até TUHAN.
3 Nyoe kheueh keureubeuen nyang harôh jipeuseumah ubak TUHAN: Keu keureubeuen tieb-tieb uroe, dua boh aneuëk bubiri agam nyang meu umu sithon, dan hana teuma meucupa mubacut pi nibak atra keureubeuen nyan,
4 nyang saboh keu peuseumahan beungoh, dan nyang saboh teuk teuma keu peuseumahan seupôt.
5 Meusigoe deungon aneuëk bubiri nyan harôh teuma teupeuseumah sikilo gram teupông teujampu deungon si arée minyéuk zaiton nyang paleng get.
6 Nyan kheueh keureubeuen nyang teutot nyan teutab dan nyang phon-phon that teupeuseumah di Gunong Sinai. Bée keureubeuen nyan keubit that teupeugalak até TUHAN.
7 Meusigoe-sigoe deungon aneuëk bubiri nyan beuna teuma si arée ié anggô nyang jisiram u ateueh miseubah.
8 Aneuëk bubiri keu keureubeuen seupôt uroe harôh kheueh jikeureubeuen deungon cara nyang saban lagée nyang jipeuseumah beungoh uroe, meusajan ngon ié anggô. Bée keureubeuen nyang teutot nyan keubit that-that galak até TUHAN.
9 Nibak uroe Sabat harôh kheueh teupeuseumah dua boh aneuëk bubiri agam nyang mantong meu umu sithon nyang hana teuma meucupa mubacut pi nibak beulatang nyan, dua kilo gram teupông nyan ka teujampu deungon minyéuk zaiton keu keureubeuen sajian dan keureubeuen ié anggô.
10 Keureubeuen nyang teutot nyan harôh kheueh teupeuseumah tieb-tieb uroe Sabat sibagoe seunamah ubak keureubeuen uroe-uroe meusigoe-sigoe deungon keureubeuen ié anggô.
11 Nibak phon tieb-tieb buleuen harôh teupeuseumah ubak TUHAN keureubeuen nyang teutot lagée dua boh leumô agam nyang muda, saboh bubiri agam, tujoh boh aneuëk bubiri agam nyang mantong meu umu sithon, maséng-maséng nyang hana keunong cupa meubacut pi.
12 Sibagoe keureubeuen sajian harôh kheueh jipeuseumah teupông nyang meujampu ngon minyéuk zaiton; lhée kilo gram teupông keu tieb-tieb saboh leumô agam; dan dua kilo gram teuma teupông keu bubiri agam,
13 dan sikilo gram teupông keu tieb-tieb saboh aneuëk bubiri agam. Keureubeuen nyang teutot nyan na kheueh lagée keureubeuen peunajoh, dan bée keureubeuen nyang mangat nyan keubit that-that galak até TUHAN.
14 Meusigoe-sigoe deungon keureubeuen nyang teutot nyan harôh teuma jipeuseumah keureubeuen ié anggô, lé jih dua arée keu tieb-tieb leumô agam, si arée siteungoh keu bubiri agam, dan si arée teuma keu tieb-tieb saboh aneuëk bubiri. Nyan kheueh peuratoran keuhai keureubeuen nyang teutot nyan harôh jipeuseumah nibak tieb-tieb tanggai sa tieb-tieb buleuen lom tieb-tieb thon.
15 Sibagoe sinamah nibak keureubeuen nyang teutot uroe-uroe deungon keureubeuen ié anggô, meunan cit harôh teuma neupeuseumah saboh kaméng agam keu keureubeuen peu amphon desya.
16 Nibak tanggai peuet blaih buleuen nyang keu sa, na kheueh uroe raya Paskah keu TUHAN.
17 Nibak uroe óh lheueh nyan teuma, tanggai limong blaih, na kheueh phon-phon Peurayaan Ruti nyang hana Meurago, dan treb jih tujoh uroe gata hana jeuet gata pajoh ruti nyang teupeuget na meurago.
18 Nibak uroe nyang keuphon bak uroe peurayaan nyan gata harôh kheueh gata meusapat mangat meusajan-sajan ta meuiébadat, dan hana jeuet gata peubuet buet-buet nyang brat.
19 Gata peuseumah kheueh ubak TUHAN keureubeuen nyang teutot dua boh leumô agam nyang mantong muda, saboh bubiri agam, dan tujoh boh teuma aneuëk bubiri agam nyang mantong meu-umu sithon, maséng-maséng nyang hana meucupa meubacut pi.
20 Gata peuseumah kheueh teuma keureubeuen sajian nyang teupeu wajéb, lagée teupông nyang meujampu deungon minyéuk zaiton: lhée kilo gram teuma teupông keu tieb-tieb saboh leumô agam, dua kilo gram keu bubiri agam,
21 dan sikilo gram teuma keu tieb-tieb saboh aneuëk bubiri agam.
22 Gata peuseumah cit teuma saboh kaméng agam keu keureubeuen peu amphon desya. Deungon caranyan gata ka gata peubuet upacara teupeu sampôh desya umat.
23 Banmandum keureubeuen nyan na kheueh sibagoe sinamah ubak keureubeuen nyang teutot beungoh nyang ka lazem.
24 Deungon cara nyan cit teuma harôh kheueh gata peuseumah ubak TUHAN keureubeuen nyang teutot si treb jih tujoh uroe. Keureubeuen nyan na kheueh lagée keureubeuen sinamah ubak keureubeuen nyang teutot uroe-uroe deungon keureubeuen ié anggô jihnyan teuma. Bée keureubeuen nyang mangat nyan lumpah that galak até TUHAN.
25 Bak uroe nyang keutujoh gata harôh gata meusapat mangat gata meuiébadat dan hana jeuet gata peubuet buet nyang brat-brat.
26 Nibak uroe nyang keuphon Khanuri Musém Keumeukôh, óh lheueh uroe raya lewat tujoh goe aleuhad, bak watée gata tapeuseumah gandom barô ubak TUHAN, gata harôh tameu iébadat seucara meujeumaáh, dan hana jeuet gatapeubuet buet nyang brat-brat.
27 Gata peuseumah kheueh ubak TUHAN keureubeuen teutot na kheueh dua boh leumô agam, saboh bubiri agam nyang mantong muda dan tujoh boh aneuëk bubiri agam nyang meu-umu sithon, maséng-maséng nyang hana meucupa mubacut pi. Bée keureubeuen nyang teutot nyan keubit that galak até TUHAN.
28 Gata peuseumah kheueh teuma keureubeuen uroe-uroe nyang teupeu wajéb, na kheueh teupông teujampu ngon minyéuk zaiton: lhée kilo gram keu tieb-tieb saboh leumô agam, dua kilo gram teuma keu bubiri agam,
29 dan sikilo gram keu tieb-tieb saboh aneuëk bubiri.
30 Gata peuseumah cit teuma saboh kaméng agam keu keureubeuen peu amphon desya. Deungon caranyan gata ka tapeubuet upacara teupeu sampôh desya umat.
31 Keureubeuen-keureubeuen nyan meunan cit deungon keureubeuen anggô na kheueh sibagoe keureubeuen sinamah ubak keureubeuen nyang teutot uroe-uroe dan keureubeuen sajian.


Chapter 29

1 Nibak tanggai sa buleuen tujoh gata harôh gata iébadat seucaya meujeumaáh ngon meusapat, dan hana jeuet gata peubuet buet nyang brat-brat. Nibak uroe nyan beureuguih-beureuguih harôh gata yueb.
2 Gata peuseumah kheueh ubak TUHAN keureubeuen teutot na kheueh saboh leumô agam nyang mantong muda, saboh bubiri agam dan tujoh boh aneuëk bubiri nyang mantong meu umu sithon, maséng-maséng atranyan nyang hana meubacut pi meucupa. Bée keureubeuen nyang mangat nyan keubit that-that galak até TUHAN.
3 Gata peuseumah kheueh teuma keureubeuen sajian nyang geupeu wajéb, na kheueh teupông nyang teujampu deungon minyéuk zaiton: lhée kilo gram keu leumô agam, dua kilo gram teuma keu bubiri agam,
4 dan sikilo gram teuma keu tieb-tieb saboh aneuëk bubiri.
5 Gata peuseumah kheueh teuma saboh kaméng agam, keu keureubeuen peu amphon desya. Deungon caranyan gata ka gata peubuet upacara teupeu sampôh dumna desya umat.
6 Keureubeuen-keureubeuen nyan na kheueh sibagoe sinamah ubak keureubeuen nyang teutot nyang teupeuseumah meusajan-sajan deungon keureubeuen sajian jihnyan, nibak tanggai sa di tieb-tieb buleuen. Meunan cit sibagoe keureubeuen sinamah keu keureubeuen nyang teutot uroe-uroe nyang teupeuseumah meusigoe-sigoe deungon keureubeuen sajian dan keureubeuen ié anggô jihnyan. Bée keureubeuen nyang mangat nyan keubit that-that galak até TUHAN.
7 Bak tanggai siploh buleuen tujoh gata harôh gata peuna iébadat seucara meujeumaáh. Bak uroenyan gata harôh gata puasa dan hana teuma jeuet gata meukeureuja.
8 Gata peuseumah kheueh ubak TUHAN saboh leumô keu keureubeuen nyang teutot dan leumô nyang mantong muda lom teuma nyang agam, saboh bubiri agam dan tujoh boh aneuëk bubiri agam nyang meu-umu sithon, maséng-maséng nyang hana keunong cupa mubacut pi. Bée keureubeuen nyang mangat nyan keubit that galak até TUHAN.
9 Gata peuseumah cit teuma keureubeuen sajian nyang teupeuwajéb, na kheueh teupông meujampu deungon minyéuk zaiton: lhée kilo gram keu leumô agam, dua kilo gram keu bubiri agam,
10 dan sikilo gram keu tieb-tieb saboh aneuëk bubiri.
11 Meunan cit gata peuseumah teuma saboh kaméng agam keu upacara teupeu amphon desya umat, seulaén keureubeuen teupeu amphon desya dan keureubeuen nyang teutot uroe-uroe meusajan ngon keureubeuen sajian dan keureubeuen ié anggô nyang teupeuseumah nibak uroe nyan.
12 Bak tanggai limong blaih buleuen tujoh gata harôh gata peuna iébadat seucara meujeumaáh, dan hana jeuet gata peubuet buet nyang brat-brat. Nyang treb jih tujoh uroe gata harôh tapeuna peurayaan keu teuhoreumat TUHAN.
13 Bak uroe nyang keuphon gata peuseumah kheueh ubak TUHAN keureubeuen teutot na kheueh lhée blaih boh leumô agam muda, dua boh bubiri agam nyang mantong muda, dan peuet blaih boh teuma aneuëk bubiri agam nyang umu jih sithon, maséng-maséng beulatang nyan hana meucupa mubacut pi. Bée keureubeuen nyang keubit mangat nyan biet-biet that galak até TUHAN.
14 Tapeuseumah kheueh teuma keureubeuen sajian nyang teupeuwajéb lagée teupông meujampu ngon minyéuk zaiton: lhée kilo gram keu tieb-tieb saboh leumô agam, dua kilo gram keu tieb-tieb saboh bubiri agam,
15 dan sikilo gram teuma keu tieb-tieb aneuëk bubiri. Meusigoe-sigoe deungon keureubeuen sajian nyan harôh kheueh teuma teupeuseumah keureubeuen ié anggô nyang teupeureulée.
16 Seulaén nibak nyan tapeuseumah kheueh teuma saboh kaméng agam keu keureubeuen teupeu amphon desya. Keureubeuen nyan na kheueh sibagoe keureubeuen seunamah ubak keureubeuen nyang teutot uroe-uroe meusigoe ngon keureubeuen sajian dan keureubeuen ié anggô.
17 Bak uroe nyang keu dua gata peuseumah kheueh teuma dua blaih boh leumô agam nyang mantong muda, dua boh bubiri agam, dan peuet blaih boh teuma aneuëk bubiri agam nyang meu-umu sithon, maséng-maséng atra nyan nyang hana keunong mucupa mubacut pi.
18 Gata peuseumah kheueh teuma meusigoe-sigoe deungon nyan keureubeuen-keureubeuen nyang laén lagée nyang teupeureulée keu uroe nyang phon.
20 Bak uroe nyang keulhée gata peuseumah kheueh teuma siblaih boh leumô agam nyang mantong muda, dua boh bubiri agam, dan peuet blaih boh aneuëk bubiri agam nyang meu-umu sithon, maséng-maséng atra nyan nyang hana keunong cupa mubacut pi.
21 Gata peuseumah kheueh teuma meusigoe-sigoe deungon nyan banmandum keureubeuen nyang laén lagée nyang teupeureulée nibak uroe-uroe nyang phon.
23 Bak uroe nyang keu peuet gata peuseumah kheueh siploh boh leumô agam nyang mantong muda, dua boh bubiri agam, dan peuet blaih boh teuma aneuëk bubiri agam nyang mantong meu-umu sithon, maséng-maséng nyang hana keunong cupa mubacut pi.
24 Meusigoe deungon nyan gata peuseumah kheueh teuma keureubeuen nyang laén lagée nyang teupeureulée keu uroe-uroe nyang phon.
26 Bak uroe nyang keulimong tapeuseumah kheueh teuma sikureueng boh leumô agam nyang muda-muda, dua boh teuma bubiri agam, dan peuet blaih boh aneuëk bubiri nyang meu-umu sithon, maséng-maséng atranyan nyang hana meucupa mubacut pi.
27 Meusigoe deungon nyan gata peuseumah kheueh teuma keureubeuen nyang laén lagée nyang teupeureulée keu uroe nyang phon.
29 Bak uroe nyang keunam tapeuseumah teuma lapan boh leumô agam nyang muda, dua boh teuma bubiri agam, peuet blaih boh aneuëk bubiri agam nyang meu-umu sithon, maséng-maséng nyang hana keunong cupa mubacut pi.
30 Meusigoe deungon nyan gata peuseumah kheueh teuma banmandum keureubeuen nyang laén lagée nyang teupeureulée keu uroe nyang phon.
32 Bak uroe nyang keu tujoh tapeuseumah kheueh teuma tujoh boh leumô agam nyang mantong muda, dua boh bubiri agam, dan peuet blaih boh aneuëk bubiri agam nyang mantong meu-umu sithon, maséng-maséng atra nyan nyang hana meucupa mubacutpi.
33 Meusigoe deungon nyan gata peuseumah kheueh teuma banmandum keureubeuen-keureubeuen nyang laén lagée nyang teupeureulée keu uroe nyang phon.
35 Bak uroe nyang keulapan harôh kheueh teuma gata meusapat keu gata iébadat dan meunan cit hana teuma jeuet gata keureuja buet-buet nyang brat.
36 Gata peuseumah kheueh teuma ubak TUHAN keureubeuen nyang teutot sibagoe leumô agam nyang mantong muda, saboh bubiri agam dan tujoh boh teuma aneuëk bubiri agam nyang meu-umu sithon, maséng-maséng nyang hana meucupa mubacutpi. Bée keureubeuen nyang mangat nyan keubit that-that galak até TUHAN.
37 Meusigoe deungon nyan tapeuseumah kheueh teuma keureubeuen nyang laén lagée nyang teupeureulée keu uroe nyang phon.
39 Nyan kheueh peuratoran-peuratoran keuhai keureubeuen nyang teutot, keureubeuen sajian, keureubeuen ié anggô, seureutoe keureubeuen peudamé nyang harôh gata peuseumah ubak TUHAN nibak peurayaan-peurayaan gata nyang ka geupeuteuntée nyan. Keureubeuen-keureubeuen nyan na kheueh sibagoe sinamah keu keureubeuen-keureubeuen nyang gata peuseumah keu gata peuleueh kaôi dan keu keureubeuen keu galak droe.
40 Nabi Musa laju geujak peusampoe ubak bansa Israel peue-peue mantong nyang geupeurintah lé TUHAN ubak gobnyan.


Chapter 30

1 Nabi Musa geubri teuma peuratoran nyoe ubak peumimpén bansa Israel.
2 Meunyoe na sidroe ureuëng agam jimeukaôi ngon ji meujanji jimeusumpah ubak TUHAN, sampoe ureuëng nyan ka ji ikat droe jih deungon janji nyan, ureuëng nyan harôh kheueh jipeu peunoh peue nyang ka jipeujanji nyan, dan hana jeuet ji iengkeue ubak peue nyang ji peugah nyan.
3 Meunyoe na sidroe aneuëk dara nyang tinggai di rumoh ureuëng syiek jih jimeukaôi ubak TUHAN, dan nibak kaôi nyan ji ikat droe jih deungon sapeue-sapeue janji, dan si ayah aneuëk dara nyan hana teuma jeuet keu masa alah bak watée jideungoe hai nyan, teuma aneuëk dara nyan harôh kheueh jipeulheueh banmandum kaôi dan janji jihnyan.
5 Teuma, meunyoe watée jideungoe hai nyan ureuëng syiek aneuëk dara nyan hana jiharok, teuma lé aneuëk dara nyan hana teu ikat ubak janji dan kaôi jih nyan. TUHAN teuma geupeu amphon si dara nyan, sabab jihnyan jitam lé ureuëng syiek jih.
6 Meunyoe na sidroe ureuëng inong nyang gohlom jimeukawen jimeukaôi ubak sapeue-sapeue janji, aléh na jipike-pike hai nyan leubeh ilée atawa bit meunan mantong, teuma ureuëng inong nyan ka teu ikat ubak kaôi dan janji jih nyan. Meunyoe óh trok watée ureuëng inong nyan ji meukawen, jihnyan teutab teu ikat ubak kaôi dan janji jihnyan, asai ureuëng lakoe jihnyan hana meurasa brat ateueh janji dan kaôi ureuëng binoe jih nyan.
8 Teuma seubalék jih meunyoe ureuëng lakoe jih nyan jitam hai nyan, di ureuëng inongnyan hana teu ikat ubak janji dan kaôi jih nyan. TUHAN teuma geupeu amphon ureuëng inong nyan.
9 Meunyoe na sidroe ureuëng inong balée nyang ka jitaleuek lé ureuëng lakoe jih jimeukaôi sampoe kaôi jihnyan teu ikat droe jih, ureuëng nyan teu ikat ubak kaôi jih nyan dan nyan harôh jipeutrok dan jipeubuet teuma.
10 Meunyoe na sidroe ureuëng inong nyang ka jimeukawen jimeukaôi dan jimeujanji nyang teu ikat droe jih nyan,
11 ureuëng nyan harôh kheueh jipeupeunoh banmandum nyang ka jipeujanji nyan, asai lakoe ureuëng inong nyan hana jeuet keu masa alah bak watée jideungoe hai nyan.
12 Teuma meunyoe watée jideungoe hai nyan lakoe ureuëng inong nyan jitam peurumoh jih nyan, di ureuëng inong nyan hanale teu ikat ubak kaôi jih nyan. TUHAN teuma geupeu amphon jih nyan, sabab lakoe jih hana jipeu idhin.
13 Ureuëng lakoe na hak keu situju atawa jipeubateue tieb-tieb kaôi nyang geupeugét lé ureuëng binoe jihnyan.
14 Teuma meunyoe watée jideungoe hai nyan ureuëng lakoe jih nyan hana jeuet keu masa alah, ureuëng inongnyan harôh kheueh jijak peulheueh banmandum kaôi nyang ka ji ikat nyan. Ureuëng lakoe jih nyan situju deungon kaôi ureuëng binoe jih nyan sabab hainyan hana jeuet keu masa alah bak watée jideungoe hai nyan.
15 Meunyoe laén watée ureuëng lakoe nyan jipeu bateue kaôi ureuëng binoe jih nyan, teuma lé ureuëng lakoe nyan kheueh nyang harôh jitanggong akibat nyang teuka ateueh peue nyang ka jipeu bateue nyan.
16 Nyan kheueh peuratoran-peuratoran nyang geubri lé TUHAN ubak Nabi Musa keuhai kaôi dan janji nyang jipeugét lé sidroe aneuëk dara nyang tinggai di rumoh ureuëng syiek jih nyan, atawa lé sidroe ureuëng inong nyang ka ji meukawen.


Chapter 31

1 TUHAN meufeureuman lom ubak Nabi Musa, "Gata jak tueng bila kheueh laju ubak ureuëng Midian sabab peue nyang ka awaknyan peubuet ateueh bansa Israel. Óh lheueh nyan gata teuma maté."
3 Teuma Nabi Musa geupeugah ubak bansa Israel, "Meusiab-siab kheueh keu tajak muprang: gata harôh tajak prang ureuëng Midian keu teujak peubuet huköman TUHAN ubak awaknyan.
4 Nibak tieb-tieb sukée bansa Israel, gata harôh tapeusiab siribée droe tantra keu jimaju u mideuen prang."
5 Teuma jipiléh kheueh siribée droe nibak tieb-tieb sukée bansa Israel, banmandum jih nyan na jeumeulah dua blaih ribée droe nyang ka siab keu jijak maju u mideuen prang.
6 Nabi Musa geuyue awaknyan jijak muprang meusajan-sajan deungon Pinehas aneuëk Imeum Eleazar. Pinehas jiba sajan barang-barang suci dan beureuguih-beureuguih guna jih keu teutujok sibagoe tanda-tanda.
7 Paih lagée peurintah TUHAN ubak Nabi Musa, ureuëng Israel laju jijak prang ureuëng Midian dan laju jijakpoh maté banmandum ureuëng agam awaknyan,
8 jitamong cit keunan limong droe raja Midian, awaknyan na kheueh Ewi, Rekem, Zur, Hur, dan Reba. Bileam, aneuëk Beor, meunan cit jipoh maté.
9 Ureuëng Israel laju jidrob ngon jiteuen ureuëng inong dan aneuëk-aneuëk manyak ureuëng Midian, dan jireupah teuma bubena beulatang peulara, meunan cit bubena hareuta keukayaan awaknyan.
10 Banda-banda dan khimah-khimah awaknyan pi jitot banmandum.
11 Óh lheueh nyan ureuëng-ureuëng Israel jijak cok laju bubena hareuta nyang jirampah nyan, jitamong cit keunan ureuëng nyang teuteuen dan beulatang peulara,
12 laju atranyan jijak ba ubak Nabi Musa dan Imeum Eleazar dan keu banmandum umat Israel. Nibak watée nyan awaknyan teungoh jipeudong khimah di ateueh darat Moab, nibak binéh Krueng Yordan, toe ngon banda Yerikho.
13 Teuma Nabi Musa, Imeum Eleazar dan banmandum peumimpén nyang laén nibak umat Israel laju jiteubiet nibak lam khimah keu jijak sambot tantra Israel nyang ka jiwoe nibak mideuen prang nyan.
14 Nabi Musa geubeungéh keu panglima-panglima prang nyan, ubak ulée pasokan dan ubak ulée laseukar nyang ban mantong jiwoe nibak prang.
15 Geupeugah lé gobnyan ubak awaknyan, "Pakon gatanyoe tapeubiyeu banmandum ureuëng inong nyan udeb?
16 Bukon kheueh ureuëng-ureuëng nyan nyang ka jiseutôt naseuhat Bileam, sampoe jibujuk umat Israel di Peor mangat jitinggai TUHAN? Dan nyan kheueh teuma nyang peuteuka beuncana u ateueh umat TUHAN!
17 Nyan, jinoenyoe tajak poh maté kheueh laju bubena aneuëk agam dan aneuëk inong nyang hanale gadih.
18 Teuma banmandum aneuëk inong nyang mantong peurawan jeuet gatacok keu gata.
19 Dan gata banmandum nyang ka gatamat manyét ureuëng maté harôh gata tinggai diluwa khimah-khimah nyang treb jih tujoh uroe. Nibak uroe nyang keu lhée dan nyang keu tujoh gata dan banmandum ureuëng inong nyang ka gata teun nyan harôh gata peuna upacara teupeu gleh droe.
20 Tieb-tieb siôn peukayan dan peue mantong nyang nibak kulét, bulée kaméng atawa kayée, nyan pi harôh kheueh teupeu suci."
21 Óh lheueh nyan di Imeum Eleazar geupeugah laju ubak mandum tantra nyang ban jiwoe nibak mideuen prang nyan, "Nyoe kheueh peuratoran-peuratoran nyang geubri lé TUHAN ubak Nabi Musa.
22 Peue-peue mantong nyang hana tutong meunyoe teutot ngon apui, lagée méuh, pirak, teumaga, beuso, timah putéh dan timah itam, harôh teupeu gleh atra nyan deungon cara teupeutamong u dalam apui. Óh lheueh nyan barang-barang nyan harôh kheueh teuma teu rhah sampoe gleh deungon ié upacara nyang teupeu suci mangat atra nyan hana jeuet keu kuto lé. Dan banmandum beunda nyang laén nyang tutong keunong apui harôh kheueh teupeu suci atra nyan deungon ié upacara nyang teupeu gleh nyan.
24 Nibak uroe nyang keutujoh harôh teuma rhah peukayan gata, barô kheueh gata hanale teupeugah kuto, dan jeuet gata tamong u dalam khimah-khimah."
25 TUHAN meufeureuman ubak Nabi Musa,
26 "Gata dan Imeum Eleazar meunan cit deungon banmandum peumimpén nyang laén nibak umat Israel, harôh kheueh gata itong banmandum hase hareuta nyang teureupah watée di mideuen prang, jitamong cit keunan ureuëng nyang teuteuen dan beulatang nyang laén.
27 Hase nibak hareuta nyang teureupah dimideuen prang nyan harôh gata bagi dua nyang sadub le jih; saboh jeumba keu tantra nyang ka jijak muprang dan saboh jeumba teuk keu umat nyang tinggai.
28 Keu jeumba Ulôn nyang khusos, Ulôn, TUHAN, nibak hak jeumba tantra nyan harôh kheueh gatacok saboh nibak tieb-tieb limong reutoh -- bah kheuehnyan nibak ureuëng-ureuëng nyang teuteuen, meunan cit nibak leumô, keuleudée, bubiri dan kaméng.
29 Gata jok kheueh nyan ubak Imeum Eleazar sibagoe peuseumahan khusos keu Ulôn, TUHAN.
30 Nibak jeumba nyang teubri keu umat Israel nyan, harôh teuma teucok saboh nibak tieb-tieb limong ploh, bah kheueh nyan nibak ureuëng-ureuëng nyang teuteuen, meunan cit nibak leumô, keuleudée, bubiri dan kaméng. Gata jok kheueh banmandum nyan ubak ureuëng Lewi nyang jiurôh Khimah Ulôn."
31 Nabi Musa dan Imeum Eleazar laju geupeubuet lagée nyang ka geupeurintah lé TUHAN ubak gobnyan.
32 Seulaén nyang ka jicok lé tantra keujeumba awaknyan, hase nyang teureupah nyan na jeumeulah jih: 675.000 boh bubiri dan kaméng, 72.000 boh leumô, 61.000 boh keuleudée, dan 32.000 droe aneuëk dara nyang mantong gadih.
36 Siteungoh nibak jeumeulah nyan harôh kheueh teubri keu tantra deungon reuncijih na kheueh lagéenyoe: 337.500 boh bubiri dan kaméng, dan nibak jeumeulah nyang 675 boh na kheueh keu meuneubri khusos ubak TUHAN; 36.000 boh leumô, 72 boh keu meuneubri khusos ubak TUHAN 30.500 boh keuleudée, 61 boh na kheueh keu meuneubri khusos ubak TUHAN; 16.000 droe aneuëk dara mantong gadih, 32 droe na kheueh keu meuneubri khusos ubak TUHAN.
41 Lé Nabi Musa geujok laju meuneubri khusos nyan ubak Imeum Eleazar keu geupeuseumah teuma ubak TUHAN, lagée nyang ka geupeurintah lé TUHAN.
42 Jeumba keu rakyat sadub meuneuweuek jih deungon jeumba tantra: 337.500 boh bubiri dan kaméng, 36.000 boh leumô, 30.500 boh keuleudée, dan 16.000 droe aneuëk dara nyang mantong gadih.
47 Lagée nyang geupeurintah lé TUHAN, Nabi Musa laju geucok saboh nibak tieb-tieb limong ploh droe tawanan dan beulatang, laju atra nyan geujok ubak ureuëng-ureuëng Lewi nyang meutugaih di Khimah TUHAN.
48 Óh ka seuleusoe lé panglima prang nyang ka jipimpén tantra Israel, laju jijak meuhadab ubak Nabi Musa
49 dan laju jilapor, "Teungku, kamoe ka kamoe itong bubena tantra dimiyueb kamoe. Teunyata jeumeulah awaknyan geunab, hana meusidroe pi nyang gadôh.
50 Sabab nyan kamoe na kamoe ba piasan-piasan méuh, gleueng jaroe ngon gleueng gaki, iencien, keurabu dan talo takue nyang ka jicok maséng-maséng. Banmandum nyoe kamoe seurah ubak TUHAN sibagoe peuseumahan kamoe, mangat TUHAN teutab geulindong kamoe."
51 Nabi Musa dan Imeum Eleazar geuteurimong laju méuh nyan, banmandum nyan na kheueh teupeugét lam bantuek piasan.
52 Nyang jipeuseumah lé panglima nyan na brat jih rab dua reutoh kilo gram.
53 Teuma di tantra nyan maséng-maséng ka jicok hase hareuta teureupah nibak mideuen prang nyan dan ka jingui keudroe jih maséng-maséng.
54 Teuma Nabi Musa dan Imeum Eleazar laju geuba méuh nyan ubak Khimah TUHAN keu geupeuseumah ubak TUHAN mangat TUHAN geulindong bansa Israel.


Chapter 32

1 Sukée-sukée Ruben dan Gad awaknyan jai lumpahna jipeulara beulatang peulara. Bak watée awaknyan jikalon padubna gét jih tanoh Yaezer dan tanoh Gilead keu teumpat peulara beulatang,
2 laju awaknyan jijak meuhadab ubak Nabi Musa, Imeum Eleazar, dan peumimpén-peumimpén nyang laén nibak sukée Israel sira jipeugah,
3 "Tanoh banda Atarot, Dibon, Yaezer, Nimra, Hesybon, Eleale, Sebam, Nebo dan Beon nyang ka jiduek lé bansa Israel deungon geutulông lé TUHAN, lumpah gét keu teumpat peulara beulatang. Dan sabab beulatang peulara kamoe ka jai lumpah na,
5 kamoe lakée mangat jeuet tanoh nyoe neubri keukamoe mangat jeuet keu hak milék kamoe. Bék kheueh neuyue kamoe minah u meurandeh Krueng Yordan."
6 Geujaweueb lé Nabi Musa, "Trok that até gata tinggai disinoe, jeh ureuëng-ureuëng saboh bansa ngon gata ka jijak muprang?
7 Pakon gata peutakot bansa Israel jijeumeurang Krueng Yordan dan jitamong u nanggroe nyang ka geubri lé TUHAN ubak awaknyan?
8 Meunan cit deungon ayah-ayah gata pi jipeugot lagée nyan, bak watée ulôn yuejak awaknyan u Kades-Barnea mangat jijak meurawoh lam nanggroe nyan.
9 Awaknyan ka trok u Pantôn Eskol dan ka lheueh teuma jingieng tanoh nyan. Teuma watée awaknyan jigisa, awaknyan jipeujeuet bansa Israel teumakot keu jitamong lam tanoh nyang geubri lé TUHAN ubak awaknyan.
10 Teuma watée nyan TUHAN beungéh lumpah na laju geupeugah lé Gobnyan, 'Ureuëng-ureuëng nyan hana seutia ubak Ulôn. Ngon sabab nyan Ulôn meusumpah bahwa nibak awaknyan nyang ka meu-umu dua ploh thon u ateueh bak watée awaknyan ji tinggai nanggroe Meusé, hana nyang jiteumé tamong u nanggroe nyang ka Ulôn peujanji bak Nabi Ibrahim, Nabi Ishaq dan Nabi Yakub.'
12 Banmandum ureuëng nyan keunong huköman keucuali si Kaleb aneuëk Yefune, ureuëng Kenas dan Yosua aneuëk Nun, sabab awaknyan bandua teutab seutia ubak TUHAN.
13 TUHAN beungéh that-that ubak bansa Israel sampoe Gobnyan geupeu biyeu mantong bansa Israel nyan ji meuwot-wot di padang pasi peuet ploh thon treb jih sampoe án banmandum angkatan nyang ka jibeurontak ubak Gobnyan maté banmandum.
14 Dan jinoenyoe, gata teuma nyang beurontak lagée ayah-ayah gata! Gata keubit saboh kawan ureuëng-ureuëng nyang meudesya nyang jeuet keu beungéh TUHAN leubeh-leubeh lom ubak bansa Israel!
15 Meunyoe gata gisa gata peulikot TUHAN, teuma banmandum bansa nyoe geupeubiyeu leubeh treb lom di padang pasi, dan gata kheueh nyang peusabab awaknyan binasa!"
16 Ureuëng-ureuëng Ruben dan ureuëng-ureuëng Gad nyan laju jijak peurab ubak Nabi Musa sira jipeugah, "Meunyoe meunan bah kheueh teuleubeh ilée kamoe peugot weue nyang meu bintéh batée keu bubiri-bubiri kamoe, dan banda-banda nyang bintéh jih beuton teuma keu aneuëk peurumoh kamoe.
17 Kamoe reujang meusiab-siab keu kamoe jak maju u mideuen prang meusajan-sajan deungon syedara-syedara kamoe nyang laén. Kamoe teuma kamoe pimpén seurangan nyan dan kamoe ba awaknyan ji tamong u dalam nanggroe nyang ka jeuet keu hak milék awaknyan. Siatnyoe aneuëk dan peurumoh kamoe bah kheueh tinggai disinoe, di banda-banda nyang meu pageue ngon beuton nyang kukoh dan aneuëk dan peurumoh kamoe nyan aman nibak ji peukaru lé peunduduek nanggroe nyoe.
18 Kamoe hana teuma kamoe woe u rumoh kamoe sigohlom ureuëng Israel jiteumé tanoh keu hak milék pusaka awaknyan.
19 Kamoe hana kamoe tem teurimong mubacut pi nibak tanoh nyang na di meurandeh Krueng Yordan nyan, sabab kamoe ka kamoe teurimong jeumba hak milék kamoe nyang disinoe, di siblah u timu Krueng Yordan."
20 Geujaweueb lé Nabi Musa, "Meunyoe gata bit-bit deungon sunggoh-sunggoh keu ka siab gata jak muprang keu TUHAN,
21 dan banmandum nyang na lamkawan gata nyang jeuet jimuprang jijak jeumeurang Krueng Yordan, dan dimiyueb pimpénan TUHAN gata prang musoh-musoh sampoe TUHAN geujak parôh awaknyan,
22 akhé jih nanggroe nyan taklok ubak Gobnyan, teuma gata jeuet tawoe, dan beubaih kheueh gata nibak keuwajéban gata teuhadab TUHAN dan teuhadab syedara-syedara gata, dan TUHAN teuma geubri tanoh di siblah u timu nyan jeuet keu hak milék gata.
23 Teuma ingat, meunyoe gata hana tapeuteupat janji gata nyan, gata meudesya ubak TUHAN dan teuma geuhuköm sabab desya gata nyan.
24 Gata jak kheueh peudong banda-banda ngon weue beulatang gata nyan, bék tuwoe gata peuteupat janji deungon janji nyang ka gata peugah nyan!"
25 Laju ureuëng-ureuëng Gad ngon ureuëng-ureuëng Ruben jipeugah, "Teungku, kamoe teuma kamoe peubuet peue nyang Teungku peurintah.
26 Aneuëk peurumoh kamoe meunan cit ngon beulatang peulara lagée leumô dan bubiri kamoe teuma tinggai disinoe, di banda-banda Gilead.
27 Teuma kamoe nyoe ka siab keu kamoejak muprang dimiyueb pimpénan TUHAN. Kamoe teuma kamoe jeumeurang Krueng Yordan dan kamoe muprang lagée nyang ka Teungku peugah."
28 Teuma Nabi Musa geubri peurintah nyoe ubak Imeum Eleazar, Yosua dan peumimpén-peumimpén Israel,
29 "Meunyoe ureuëng-ureuëng Gad dan ureuëng-ureuëng Ruben jiseutôt peurintah TUHAN dan jijeumeurang Krueng Yordan keu jijak muprang, dan meunyoe ateueh bantuan awaknyan gata meuhase gata reubot nanggroe nyan, teuma tanoh Gilead harôh gata bri ubak awaknyan jeuet keu hak milék awaknyan.
30 Teuma meunyoe awaknyan hana jijeumeurang Krueng Yordan keu jijak muprang meusajan-sajan deungon gata, teuma awaknyan harôh jiteurimong jeumba tanoh pusaka di nanggroe Kanaan, saban lagée gata."
31 Jaweueb ureuëng Gad dan ureuëng-ureuëng Ruben, "Teungku, kamoe teuma kamoe peubuet peue nyang geupeurintah lé TUHAN.
32 Dimiyueb pimpénan TUHAN kamoe teuma kamoe jeumeurang u nanggroe Kanaan dan laju lam mideuen prang, teuma nyang kamoe harab bah kheueh tanoh nyang na disiblaih u timu Krueng Yordan nyoe teutab jeuet keu hak milék kamoe."
33 Lé Nabi Musa laju geuseurah ubak sukée-sukée Gad dan Ruben dan ubak siladum sukée Manasye banmandum daerah Sihon, raja Amori, dan daerah Og, raja Basan, jitamong cit keunan banda-banda dan tanoh nyang na di seukeulileng nyan.
34 Sukée Gad jipeudong lom banda Dibon, Atarot, Aroër,
35 Atarot-Sofan, Yaezer, Yogbeha,
36 Bet-Nimra, dan Bet-Haran sibagoe banda-banda nyang meu kuta dan sibagoe teumpat weue-weue bubiri.
37 Sukée Ruben jipeudong lom banda-banda Hesybon, Eleale, Kiryataim,
38 Nebo, Baal-Meon, dan Sebam. Banda-banda nyang awaknyan peudong lom nyan awaknyan gantoe nan jih.
39 Gata Makhir, aneuëk Manasye, jijak prang tanoh Gilead laju jireubot dan jiuse ureuëng-ureuëng Amori nyang na disinan.
40 Sabab nyan Nabi Musa laju geubri tanoh Gilead nyan ubak kawöm Makhir, dan awaknyan tinggai teutab disinan.
41 Yair, nibak sukée Manasye, jijak prang dan laju jireubot na meupadub boh gampông, laju gampông-gampông nyang jireubot nyan jiboh nan, "Gampông-gampông Yair".
42 Nobah jijak prang dan jireubot Kenat meusajan ngon gampông-gampông nyang na seukeulileng nyan, laju jiboh nan Nobah, meunurot nan jih keudroe.


Chapter 33

1 Óh ka lheueh bansa Israel jitinggai tanoh Meusé, dalam baresan meunurot sukée bansa maséng-maséng di miyueb pimpénan Nabi Musa ngon Nabi Harun, awaknyan jipioh disinan na meupadub boh teumpat.
2 TUHAN geupeurintah ubak Nabi Musa mangat teucetet nan-nan nibak tieb-tieb teumpat dipat mantong awaknyan jipiôh.
3 Bansa Israel jitinggai Meusé bak tanggai limong blaih buleuen sa, si uroe óh ka lheueh Paskah nyang phon. Deungon geulindong lé TUHAN awaknyan jitinggai laju banda Rameses, jikalon keudroe lé bansa Meusé,
4 nyang teungoh jiseubeé u dalam jirat aneuëk-aneuëk tuha awaknyan nyang maté geupoh lé TUHAN. Deungon buet nyan, TUHAN ka geubri bukeuti bahwa Gobnyan leubeh teuga nibak ilah-ilah ureuëng Meusé.
5 Óh ka lheueh bansa Israel jitinggai Rameses, awaknyan laju jipeudong khimah di Sukot.
6 Laju awaknyan jibeurangkat lom dan jipeudong teuma khimah di Etam, nibak binéh padang pasi.
7 Nibak teumpat nyan awaknyan jigisa u Pi-Hahirot, disiblah u timu Baal-Zefon, laju jipeudong khimah to ngon Migdol.
8 Óh lheuehnyan awaknyan jitinggai teuma Pi-Hahirot, jijeumeurang laôt dan jitamong laju u dalam padang pasi Etam; óh kalheueh watée lhée uroe jijak, laju jipeudong teuma khimah di Mara.
9 Beudôh inan awaknyan jijak laju dan jipeudong teuma khimah di Elim; disinan na dua blaih boh mata ié dan tujoh ploh bak kuruma.
10 Óh lheuehnyan awaknyan jitinggai teuma Elim dan laju teuma geupeudong khimah to ngon Lhok Suez.
11 Óh lheueh nyan watée jijak lom awaknyan jipeudong teuma khimah di padang pasi Sin, laju óh lheueh nyan tô ngon Dofka, óh lheueh nyan di Alus, dan óh lheuehnyan di Rafidim, teuma disinan hana meuteumé teumpat cok ié jieb.
15 Nibak Rafidim nyan awaknyan jijak laju trok u Gunong Hor dan jipeudong laju khimah di teumpat-teumpat nyoe: padang pasi Sinai, Kibro-Taawa, "Kubu nyang leuha", Hazerot, Ritma, Rimon-Peres, Libna, Risa, Kehelata, Gunong Syafer, Harada, Makhelot, Tahat, Tarah, Mitka, Hasmona, Moserot, Bene-Yaakan, Hor-Gidgad, Yotbata, Abrona, Ezion-Geber, padang pasi Zin, dan Gunong Hor, nibak bataih tanoh Edom.
38 Ateueh peurintah TUHAN, Imeum Harun laju geujak teungoh u ateueh Gunong Hor. Disinan gobnyan meuninggai bak tanggai sa buleuen limong nibak thon nyang keu peuet ploh óh ka lheueh ureuëng Israel ji tinggai tanoh Meusé. Watée meuninggai, Nabi Harun meu umu 123 thon.
40 Óh lheuehnyan teuma, na raja nibak nanggroe Arad, nyang tinggai di Tanoh Neged, siblah u seulatan Kanaan, meuteumé haba bahwa umat Israel teungoh ji tuju u nanggroe gobnyan.
41 Nibak teujak nibak Gunong Hor u darat Moab, laju ureuëng Israel nyan jipeudong khimah di teumpat-teumpat nyang teupeugah di miyueb nyoe: Zalmona, Funon, Obot, di teumpat beukaih reuloh Abarim di daerah Moab, Dibon-Gad, Almon-Diblataim, Gunong Abarim to ngon Gunong Nebo, dan di darat Moab nibak binéh Krueng Yordan, lom to teuma ngon banda Yerikho, lamkawan Bet-Yesimot dan Pantôn Sitim.
50 Di ateueh darat Moab nyan, nibak binéh Krueng Yordan, to ngon banda Yerikho, laju TUHAN geubri ubak Nabi Musa
51 peurintah-peurintah nyoe keu bansa Israel, "Meunyoe gata jeumeurang Krueng Yordan keu tajak tamong u nanggroe Kanaan,
52 gata harôh ta use banmandum peunduduek nanggroe nyan. Gata peubinasa banmandum bubena beurala awaknyan nyang teupeugét nibak batée logam dan meunan cit deungon teumpat-teumpat iébadat awaknyan gatapeu hanco banmandum.
53 Tanoh nyan harôh gata reubot ngon gataduek disinan sabab atra nyan Ulôn nyang bri keu gata.
54 Óh lheuehnyan gata bagi-bagi laju keu kawöm-kawöm gata deungon cara jih gata tiek undi. Ubak kawöm nyang rayeuk harôh kheueh gatabri nyang rayeuk, dan ubak kawöm nyang ubit gatabri teuma jeumba jih nyang ubit.
55 Teuma meunyoe peunduduek nanggroe nyan hana jitem teu use, ureuëng-ureuëng nyan teutab tinggai disinan teuma jipeu susah gata lagée ano di dalam mata atawa duro didalam aso gaki gata. Teuma awaknyan kheueh nyang jijak prang gata.
56 Meunyoe gata hana gata use awaknyan, Ulôn teuma nyang peubinasa gata lagée nyang ka Ulôn reuncana ateueh awaknyan."


Chapter 34

1 TUHAN meufeureuman ubak Nabi Musa
2 keuhai peurintah Gobnyan keu bansa Israel lagée nyoe, "Sikeujab teuk gata ka tatamong u dalam nanggroe ureuëng Kanaan, nanggroe nyang Ulôn bri ubak gata sibagoe tanoh pusaka. Nyoe kheueh bataih-bataih nanggroe gata nyan.
3 Di siblaih u seulatan, bataih nyan phon nibak padang pasi Zin meu iseuk laju u Edom. Di siblaih u timu bataih nyan phon nibak ujong seulatan Laôt Maté,
4 wét laju u seulatan trok ubak Rot ueh Akrabim dan laju u Zin sampoe u Kades-Barnea di seulatan. Nibak teumpat nyan wét lom teuma u barat laôt trok u Hazar-Adar, dan laju trok u Azmon.
5 Disinan wét u pantôn di bataih nanggroe Meusé dan akhé jih di Laôt Teungoh.
6 Laôt Teungoh na kheueh bataih nanggroe gata di siblaih u barat.
7 Di utara, phon nibak Laôt teungoh sampoe trok u Gunong Hor
8 dan nibak teumpat nyan teujak laju u Rot Hamat laju trok Zedad
9 dan u Zifron dan akhé jih di Hazar-Enan.
10 Di siblaih u timu bataih nyan phon nibak Hazar-Enan u Sefam.
11 Nibak teumpat nyan treun laju u Ribla di siblaih u timu Ain, laju trok u bukét-bukét di panté timu Danau Galilea,
12 laju u seulatan bansipanyang Krueng Yordan sampoe ubak Laôt Maté. Nyang kheueh nanggroe gata meunurot bataih-bataih nyang na di seukeulileng jih nyan."
13 Nabi Musa geupeugah laju ubak bansa Israel, "Nyang kheueh tanoh nyang teuma gata teurimong deungon cara tatiek undi, tanoh nyang meunurot peurintah TUHAN nyang harôh teubagi ubak sikureueng siteungoh sukée bansa Israel.
14 Sukée-sukée Ruben dan Gad meunan cit siladum nibak sukée Manasye ka jiteurimong jeumba awaknyan, dan tanoh nyan pi ka teubagi teuma keu keuluwarga-keuluwarga awaknyan.
15 Tanoh pusaka awaknyan teuduek di siblaih u timu Krueng Yordan, to ngon banda Yerikho."
16 TUHAN meufeureuman lom ubak Nabi Musa,
17 "Nyang wajéb ureuëng bagi tanoh keu awaknyoe na kheueh lé Imeum Eleazar, dan Yosua aneuëk Nun.
18 Gata tunyok kheueh teuma sidroe ureuëng peumimpén nibak tieb-tieb sukée mangat jijak tulông Eleazar dan Yosua jibagi tanoh nyan."
19 Nan ureuëng-ureuëng nyan na kheueh: Sukée & Peumimpén
29 Nyang kheueh ureuëng-ureuëng nyang geupeurintah lé TUHAN mangat geujak bagi tanoh pusaka nyan keu bansa Israel di nanggroe Kanaan.


Chapter 35

1 Di ateueh darat Moab, nibak binéh Krueng Yordan, to ngon banda Yerikho, TUHAN meufeureuman ubak Nabi Musa,
2 "Gatajak peusampoe kheueh ubak bansa Israel bahwa nibak tanoh pusaka nyang teuma awaknyan teurimong nyan, na teuma meupadub boh deungon blang naleueng nyang na disilingka nyan, atranyan harôh kheueh jijok keu ureuëng Lewi mangat awaknyan jeuet jitinggai disinan.
3 Banda-banda nyan ka jeuet keu hak milék ureuëng Lewi keu teumpat tinggai awaknyan. Naleueng lam blang nyang na silingka nyan na kheueh keu beulatang peulara dan mubagoe beulatang awaknyan.
4 Blang naleueng nyan luwah jih na 450 metée u sigala jurusan, atra nyan teu uko nibak bintéh beuton banda.
5 Teuma, daerah ureuëng Lewi nyan hijih timang peuet sagoe, nyang meu ukoran 900 metée di tieb-tieb binéh jih, deungon banda jihnyan na di teungoh-teungoh.
6 Keu ureuëng Lewi harôh kheueh gatajok nam boh banda teumpat jimeulindong ureuëng-ureuëng nyang jipeuplueng droe sabab deungon hana jisaja ureuëng nyan ka jipoh maté ureuëng laén. Seulaén nibak nyan keu ureuëng Lewi meunan cit harôh kheueh teujok peuet ploh dua boh banda nyang laén
7 deungon blang naleueng jih teuma. Jadi jeumeulah banmandum na peuet ploh lapan boh banda keu ureuëng Lewi.
8 Jeumeulah banda-banda Lewi dalam wilayah maséng-maséng sukée Israel harôh kheueh teupeu teuntée meunurot lejih banda dan rayeuk jih wilayah nyan."
9 TUHAN geuyue ubak Nabi Musa mangat geupeusampoe keu bansa Israel tutoe haba nyoe, "Óh kalheueh gata tajeumeurang Krueng Yordan dan gata tamong u nanggroe Kanaan,
11 gata harôh gata peuteuntée laju banda-banda teumpat ureuëng plueng jilakée meulindong, mangat ureuëng-ureuëng nyang jiplueng nyan deungon hana ji saja ka jipoh maté ureuëng laén, teuma meuhase jiplueng u banda nyan.
12 Nibak bandanyan ureuëng nyan teuma aman nibak waréh kawöm ureuëng nyang keunong poh nyang keuneuk jijak tungbila. Sabab ureuëng nyan jitudoh kajipoh maté ureuëng laén, hana jeuet jipoh maté meunyoe peukara jihnyan gohlom teupeureksa di kantô mahkamah.
13 Gata peuteuntée kheueh nam boh banda teumpat ureuëng plueng jijak lakée meulindong nyan,
14 lhée boh di siblaih u timu Krueng Yordan dan lhée boh teuk teuma di tanoh Kanaan.
15 Ban nam boh bandanyan jeuet keu banda teumpat ureuëng plueng nibak gata, ureuëng Israel, dan keu ureuëng aséng aneuëk rantoe atawa nyang tinggai teutab lamkawan gata. Soe mantong nyang ka jipoh maté ureuëng laén deungon hana jisaja, jeuet jipeuplueng droe u dalam saboh nibak banda-banda nyang ka teukheun nyan.
16 Teuma meunyoe sidroe ureuëng jipoh maté ureuëng laén deungon beuso atawa batée dan atawa kayée, ureuëng nyang peubuet lagéenyan na kheueh ureuëng tukang poh gob sampoe maté; ureuëng nyan meusalah dan harôh teuhuköm maté.
19 Waréh kawöm nibak ureuëng nyang keunong poh maté nyan jeuet jipeurhot huköman maté nyan. Meunyoe jihnyan meuteumé ngon ureuëng nyang poh maté syedara jih nyan, jeuet lé ureuëng nyan jipoh maté ureuëng nyang poh syedara jih nyan.
20 Meunyoe na sidroe ureuëng jibanci ureuëng laén, laju ureuëng nyang jibanci nyan jipoh maté ngon cara ji seumpom ureuëng nyan dan jigeulawa teuma peue-peue nyang na u ateueh ureuëng nyan,
21 atawa jishoh ureuëng nyan deungon boh sineunju, ureuëng nyan teupeunan tukang poh gob sampoe maté; ureuëng nyan meusalah dan harôh teuhuköm maté. Waréh kawöm nyang rab nibak ureuëng nyang keunong poh nyan jeuet jipeubuet huköm maté u ateueh ureuëng nyang ka jipoh maté syedara jih nyan. Dan meunyoe jihnyan jiteumé ureuëng nyang poh maté syedara jih nyan, jeuet lé ureuëng nyan jipoh maté ureuëng nyang poh syedara jih nyan.
22 Teuma, jeuet mantong sidroe-droe ureuëng deungon hana jisaja jipoh maté ureuëng laén nyang hana jibanci, aléh deungon jisumpom ureuëng nyan atawa deungon jirhom deungon sapeue-sapeue beunda u ateueh ureuëng nyan.
23 Atawa jeuet mantong sidroe-droe ureuëng deungon hana leumah jikalon, jipeurhot si aneuëk batée deungon nyan meuakibat ureuëng laén meuninggai donya, teuma di ureuëng nyang maté nyan bukon teuma musoh jih, dan ureuëng nyan hana teuma meukeusut keuneuk peuceulaka ureuëng nyan.
24 Nibak hai-hai nyang lagéenyan bagoe umat jimeurok pakat keu jipeutimang ngon jipeusidang ureuëng nyang ka jipoh maté gob laén nyan, dan meunan cit ureuëng nyang keuneuk balah keuhai maté syedara geuh nyan.
25 Meurok pakat umat nyan harôh kheueh teuma jilindong ureuëng nyang ka jipoh maté ureuëng laén deungon hana jisaja nyan lé ancaman syedara ureuëng nyang ka keunong poh maté nyan. Ureuëngnyan harôh jipeuriwang u banda teumpat meulindong, di teumpat jih puplueng droe nyan. Ureuëng nyan harôh tinggai disinan sampoe ureuëng nibak watée nyan jeuet keu Imeum Agong ka meuninggai donya; barô kheueh teuma di ureuëng nyan ka jeuet jiwoe u gampông leuen jih. Teuma meunyoe ureuëng nyan jitinggai banda teumpat jimeulindong nyan, laju meuteumé dan ka jipoh maté lé syedara ureuëng nyang jipoh ngon hana ji saja nyan, teuma peue nyang ka jipeubuet ngon tungbila nyan bukon kheueh nyan teukheun saboh kasus teuseumeupoh maté.
29 Peuratoran-peuratoran nyan teutab na keu gata dan keu banmandum keuturonan gata, dipat mantong gatanyoe tinggai.
30 Lamhai teupoh ureuëng sampoe maté, ureuëng nyang teutudoh sibagoe ureuëng nyang poh, teuma jeuet teupeugah meusalah atawa teuhuköm maté meunyoe buet jihnyan hase teubukeuti lé dua droe saksi atawa leubeh. Meunyoe sidroe ureuëng saksi hana seb keubukeuti bahwa peue nyang jitudoh nyan beutôi.
31 Sidroe ureuëng nyang jipoh maté ureuëng laén ureuëng nyan harôh teuhuköm maté. Ureuëng nyan hana jeuet jiteuboh huköm jihnyan deungon péng.
32 Meunyoe na ureuëng jipeuplueng droe u salah saboh banda teumpat meulindong, bék kheueh gata peuidhin ureuëng nyan jijok péng mangat jih nyan hase lom jiwoe ubak khimah jih sigohlom Imeum Agong meuninggai donya.
33 Meunyoe gata tapeubuet meunan, gata ka tapeu kuto tanoh nyang teumpat gata duek nyan. Ureuëng poh maté gob laén nyan jipubrok nanggroe; teuma hanale cara laén keu teupeugleh nanggroe nyan seulaén deungon cara teusuit teuma nyawöng ureuëng nyang seumeupoh maté nyan.
34 Bék kheueh gata peukuto tanoh nyang teumpat gata duek, sabab Ulôn kheueh TUHAN, dan Ulôn tinggai lamkawan bansa Israel."


Chapter 36

1 Bubena ulée keuluwarga dalam kawöm Gilead, aneuëk Makhir, na kheueh cucoe Manasye, aneuëk Nabi Yusuf, jijak meuhadab ubak Nabi Musa dan peumimpén-peumimpén nyang laén.
2 Kheun awaknyan, "TUHAN geuyue ubak droeneueh mangat neubagi tanoh nyan keu ureuëng Israel deungon cara teutiek undi. Meunan cit Gobnyan geuyue droeneueh mangat neubri tanoh pusaka syedara kamoe Zelafehad ubak aneuëk-aneuëk gobnyan nyang inong.
3 Teuma nyoe peureulée neuingat meunyoe awaknyan jimeukawen deungon ureuëng agam nibak sukée laén, tanoh awaknyan ka rhot ubak jaroe sukée nyan. Deungon lagéenyan tanoh nyang ka teupeuteuntée keu wilayah kamoe teuntée meukureueng.
4 Nibak Thon Teupulang, bak watée banmandum hareuta milék nyang ka ji peubloe jijok pulang ubak ureuëng po hak milék nyang phon, tanoh aneuëk-aneuëk inong Zelafehad teuma teutab jeuet keu hak milék ureuëng lakoe awaknyan, deungon nyan sukée kamoe ka teuntée gadôh tanoh nyan."
5 Lé Nabi Musa laju geupeutrok ubak bansa Israel peurintah nyoe nibak TUHAN, "Peue nyang jipeugah lé ureuëng keuturonan Nabi Yusuf nyan beutôi,
6 dan lé sababnyan TUHAN geupeugah ubak aneuëk inong Zelafehad bahwa awaknyan beubaih ji meukawen deungon soe mantong nyang ji galak, asai nyang saban sukée jih deungon awaknyan.
7 Tanoh pusaka tieb-tieb ureuëng Israel teutab teu ikat nibak sukée jihnyan.
8 Tieb-tieb ureuëng inong nyang jiteurimong waréh tanoh pusaka di dalam salah saboh sukée bansa Israel, di ureuëng inong nyang na jiteurimong warésan pusaka nyan harôh kheueh jimeukawen deungon sukée jih nyan cit teuma. Deungon lagéenyan tieb-tieb ureuëng Israel teuma jiteurimong hareuta pusaka tanoh indatu jih nyan,
9 sampoe tanoh pusaka nyan hana meupinah-pinah nibak saboh sukée ubak sukée nyang laén. Tieb-tieb sukée bansa Israel teutab na hak milék tanoh pusaka jihnyan keudroe."
10 Jadi paih lagée peurintah TUHAN ubak Nabi Musa, ban limong droe aneuëk inong Zelafehad nyan, na kheueh Mahla, Tirza, Hogla, Milka dan Noa jimeukawen deungon ureuëng-ureuëng nyang mantong meusyedara rot siblaih bapak jih nyan.
12 Awaknyan jimeukawen ngon ureuëng-ureuëng nibak kawöm-kawöm dalam sukée bansa Manasye, aneuëk Nabi Yusuf. Deungon lagéenyan tanoh pusaka awaknyan teutab jeuet keu hak milék nibak sukée bansa bapak awaknyan.
13 Nyan kheueh peuratoran-peuratoran dan keuteutapan-keuteutapan nyang geubri lé TUHAN ubak bansa Israel meulalu Nabi Musa, bak watée bansa Israel nyan mantong na di ateueh darat Moab nibak binéh Krueng Yordan, to ngon banda Yerikho.