Rut

1 2 3 4


Chapter 1

1 Bak watée jamén ilée sigohlom ureuëng Israel na raja nanggroe, nanggroe Kanaan keunong beuncana musém deuk nyang lumpah parah. Bak watée nyan na sidroe ureuëng agam nyang nan jih Elimelekh. Ureuëng nyan asai nibak kawöm Efrata, dan tinggai di Betlehem di dalam wilayah Yehuda. Sabab bala musém deuk nyan, gobnyan jijak u nanggroe Moab meusajan deungon peurumoh jih, Naomi, dan bandua aneuëk gobnyan nyang agam: Mahlon dan Kilyon. Laju awaknyan tinggai disinan. Watée awaknyan mantong disideh,
3 Elimelekh meuninggai donya. Deungon nyan tinggai kheueh Naomi meusajan ngon ban dua droe aneuëk geuh.
4 Ban dua aneuëk jihnyan jimeukawen ngon aneuëk dara Moab, nyang nan Orpa dan Rut. Siploh thon óh lheuehnyan,
5 ban dua aneuëk agam Naomi nyan, meuninggai teuma, akhé jih Naomi ka gadôh bah kheueh nyan lakoe droe meunan cit ban dua droe aneuëk jihnyan.
6 Na meupadubna treb teuma óh lheuehnyan Naomi jideungoe bahwa TUHAN ka geubri beureukat ateueh umat Israel deungon hase panén nyang gét. Lé sabab nyan Naomi deungon ban dua droe meulintée gobnyan jimeukeumah laju keu jitinggai Moab.
7 Awaknyan jibeurangkat meusigoe-sigoe jiwoe u Yehuda. Bak teungoh rot ueh,
8 Naomi jipeugah ubak ban dua droe meulintée jihnyan, "Gata nyoe tawoe mantong u rumoh mak gata. Seumoga TUHAN gét deungon gata saban cit lagée gata pih gét deungon ulôn dan keu awaknyan nyang ka meuninggai donya.
9 Seumoga TUHAN ngon murah até geubri lakoe lom keu gata mangat gata tameurumoh tangga lom teuma." Óh ka lheueh jipeugah nyang lagée nyan bagoe, Naomi laju geulakée idhin ubak awaknyan sira geucöm awaknyan. Teuma Orpa dan Rut laju geumo sira geukliek sihabéh teuneuga,
10 sira jikheun ubak Naomi, "Hánjeuet, Mak! Kamoenyoe meuseutôt ho nyang Makjak ubak bansa Mak."
11 "Bék, hai aneuëk!" geujaweueb lé Naomi, "gata leubeh gét tajakwoe. Keupeue guna jih gata seutôt deungon ulôn? Bukon kheueh ulôn nyoe hana hase le ulôn peulahé aneuëk keu jeuet keu lakoe gata?
12 Gatajak woe kheueh, hai aneuëk meutuah, sabab ulôn nyoe ka tuha that keu ulôn meukawen lom. Dan seukira jih mantong na harapan nibak ulôn keu lôn meukawen bak malam nyoe cit teuma dan meuteumé aneuëk agam,
13 peu kheueh gatanyoe tatem preh sampoe aneuëk nyan rayeuk? Ék kheueh mungken lé sababnyoe gata hana tatem meukawen deungon ureuëng laén? Han jeuet, aneuëk ulôn, bék gata peubuet nyang lagée nyan! Ulôn meurasa peudeh keuhai peue nyang harôh gata rasa kareuna huköm TUHAN ateueh ulôn."
14 Rut dan Orpa geumo lom ngon su nyang teuga óh lheuehnyan Orpa laju jilakée droe sira jicöm mak tuwan droe jih dan gobnyan pih geuwoe. Teuma Rut hana geutem reungggang deungon mak tuwan geuh nyan.
15 Jipeugah kheueh lé Naomi ubak Rut nyan, "Rut, gata kalon kheueh! Parui gata ka jiwoe ubak bansa droe jih dan ubak dewa-dewa droe jih. Gata jak kheueh teuma hai aneuëk meutuah, seutôt kheueh laju jihnyan nyang ka jiwoe!"
16 Teuma geujaweueb lé Rut, "Mak, bék kheueh neuyue woe ulôn dan lôn tinggai Mak sidroe disinoe! Ulôn tuan keuneuk seutôt ho nyang Mak jak. Ho mantong Mak jak, keunan cit ulôn jak. Dipat mantong Mak tinggai, disinan cit teuma ulôn tinggai. Bansa Mak, nyan pih bansa ulôn. Po teu Allah nyang Mak seumah, nyang cit nyang ulôn seumah.
17 Dipat mantong Mak meuninggai, disinan cit teuma ulôn meuninggai dan teupeukubu. Bah kheueh TUHAN geuhuköm ulôn sibrat-brat jih, meunyoe ulôn nyoe lôn meupisah deungon Mak, keucuali maté kheueh nyang hase peujiôh tanyoe!"
18 Naomi geukalon bahwa Rut nyan that-that jimeukreueh keuneuk jiseutôt, lé sababnyan, gobnyan ka hana hase geukheun sapeue.
19 Deungon nyan teuma awaknyan laju geujak lom sampoe ka trok u Betlehem. Meunan awaknyan trok keunan, bansaboh banda nyan ka karu ngon subra. Dumna ureuëng inong disinan jipeugah, "Peu kheueh beutôi gobnyan Naomi?"
20 "Bék tahôi ulôn Naomi," geupeugah lé Naomi, "gatahôi mantong ulôn Mara, sabab Po teu Allah Nyang Mahakuasa ka geupeubiyeu ulôn nyoe udeb peunoh deungon nyang phet-phet.
21 Bak watée ulôn tuan jak nibak teumpat nyoe peunoh deungon peue nyang tapeureulée, teuma jinoenyoe TUHAN ka geupeuriwang lom ulôn keunoe deungon jaroe nyang soh. Lé sabab nyan bék kheueh gatanyoe tahôi ulôn deungon nan Naomi, sabab TUHAN Nyang Mahakuasa ka geuhuköm ulôn deungon meubagoe deurita nyang le!"
22 Meunan kheueh kisah jih pakriban Naomi geuwoe nibak Moab meusajan deungon Rut meulintée gobnyan nyang ureuëng Moab nyan. Awaknyan trok u Betlehem paih bak musém keumeukoh boh gandom.


Chapter 2

1 Naomi na sidroe anggota keuluwarga nibak pihak lakoe jih, Elimelekh, ureuëng nyan kaya lom teupandang. Nan ureuëng nyan Boas.
2 Bak si uroe geupeugah lé Rut ubak Naomi, "Mak, Ulôn lakée idhin keuneuk jak u lampôh keuneuk piléh boh gandom nyang mungken na nyang rhot nibak jaroe ureuëng mupot. Ulôn rasa teuntée na mantong ureuëng nyang jipeubiyeu keu ulôn mangat lôn peubuet nyang lagéenyan." "Get, neuëk!" jaweueb Naomi, "tajak kheueh!"
3 Deungon nyan geujak kheueh laju Rut u blang geujak piléh gandom nyang rhot nibak jaroe ureuëng mupot. Keubeutulan gobnyan geujak ublang atra Boas.
4 Hana treb óh lheuehnyan Boas teuka nibak Betlehem dan geubri saleuem ubak ureuëng nyang teungoh meupot, "Seumoga TUHAN na meusajan gata," kheun gobnyan. Geujaweueb teuma lé ureuëng nyang teungoh mupot nyan, "Seumoga TUHAN geubri beureukat keu Bapak."
5 Laju Boas geuteumanyong ubak mando gobnyan, "Soe ureuëng inong nyan?"
6 Jijaweueb lé mando nyan, "Jih nyan ureuëng inong nibak Moab nyang ban teuka meusigoe ngon Naomi nibak nanggroe Moab.
7 Gobnyan geulakée idhin ubak ulôn mangat jiseutôt rot likot ureuëng nyang teungoh mupot keu jipiléh boh gandom nyang rhot-rhot. Phon beungoh geuhnyan hana geupiôh meukeureuja, dan jinoenyoe ban sagai jipiôh jimeureuhat sikeujab lam jambo."
8 Lé Boas geupeugah ubak Rut, "Ci neudeungoe ilée. Gata bék tajak piléh boh gandom nibak blang ureuëng laén. Tapiléh mantong disinoe meusajan deungon ureuëng nyang meukeureuja nibak ulôn ureuëng nyang inong. Gata kalon kheueh ho nyang awaknyan jijak mupot. Taseutôt kheueh mantong awaknyan sabe dan bék jiôh gata nibak awaknyan. Meunyoe gata ka glaih keuneuk jieb ié, tajakcok mantong ié di dalam guci nyang ka jipaso lé ureuëng agam. Ulôn ka ulôn peurintah ubak awaknyan mangat awaknyan bék jipeukaru gata."
10 Geudeungoe nyang lagée nyan Rut laju geusujut dikeue Boas sira geupeugah, "Pak, ulôn hana patot ulôn teurimong neupeusaneut ulôn nyang meunan gét nibak Bapak. Ulôn nyoe ureuëng aséng dan hana sipatot jih ulôn teurimong neupeurati ulôn nyang meunan gét nibak Bapak!"
11 Boas geujaweueb, "Ulôn ka ulôn deungoe keuhai peue mantong nyang gata peubuet ateueh mak tuwan gata phon yoh lakoe gata meuninggai donya. Ulôn lôn teupeu bahwa gata ka tatinggai ureuëng syiek gata dan tanoh ié gata keu gata teuka tinggai disinoe meusapat ngon ureuëng-ureuëng nyang gohlom gata turi.
12 Seumoga TUHAN geubalaih buet gata nyang jroh. Seumoga gata tateurimong peue-peue mantong nyang geubri lé TUHAN, Po teu Allah Israel, sabab gata ka tateuka keu tajak meulindong ubak gobnyan!"
13 Geujaweueb lé Rut, "Bapak lumpah that gét keu ulôn, bahpi ulôn nyoe hana saban ngon ureuëng nyang meukeureuja nibak Bapak. Ramah Bapak nyan bit-bit gét that teupeu mangat até ulôn."
14 Watée katrok keu teujak pajoh bu, Boas geupeugah ubak Rut, "Jak geutanyoe tajak makheun. Nyoepat saus jih." Teuma Rut pi laju geumakheun meusigoe ngon ureuëng mupot nyan. Meunan cit Boas laju geubri gandom nyang teutot keu Rut nyan, dan Rut geumakheun sampoe troe. Óh lheueh geumakheun, mantong na nyang leubeh.
15 Óh lheuehnyan Rut geujak lom geujak piléh boh gandom. Óh ka leupah gobnyan geujak, Boas laju geupeugah ubak ureuëng nyang keureuja pot boh gandom nyan, "Meunyoe jihnyan jipiléh boh gandom nyang ka teu ikat-ikat, gata peubiyeu mantong. Bék gata peujeuet jihnyan malée atawa gata beungéh keu jih. Bah kheueh gata tasaja beuôt bacut-bacut nibak nyang ka gatapot ngon gata ikat-ikat nyan, dan gata peurhot keu jihnyan mangat jihnyan hase jipiléh atra nyan."
17 Rut hana geupiôh laju geupiléh gandom di blang sampoe án uroe seupôt. Óh ka lheueh gobnyan geuseunuet-seunuet bak gandom nyan keu geupeu leukang aneuk gandom nyang meukeumat nibak mu jih, teunyata gobnyan ka geupeusapat aneuk gandom nyan na siploh kilo gram.
18 Óh lheuehnyan gobnyan geuwoe laju u banda deungon geupeuwoe sajan hase nyang ka geupiléh nyan ubak mak tuwan sira geutunyok na meupadub na le hase nyang geupiléh nyan. Dan gobnyan geubri ubak mak tuwan geuh peunajoh nyang hana ek geupeu habéh bak watée makheun.
19 Teuma geupeugah kheueh lé Naomi ubak Rut nyan, "Dipat gata teumé banmandum nyoe? Diblang soe kheueh gata meubuet nibak uroe nyoe? Seumoga Po teu Allah geubri beureukat nyang gét keu ureuëng nyang ka jipeubuet nyang jroh keu gata!" Teuma lé Rut laju geucalitra hai nyang ka teujadi ateueh droe geuhnyan ubak Naomi nyang mak tuwan geuh, bahwa blang teumpat gobnyan piléh gandom nyan na kheueh atra sidroe ureuëng agam nyang nan jih Boas.
20 "Aneuëk meutuah, ureuëng nyan na kheueh keuluwarga nyang paleng rab deungon geutanyoe," kheun Naomi. "Gobnyan kheueh nyang harôh meutanggong jaweueb u ateueh geutanyoe. Seumoga TUHAN geubri beureukat ateueh gobnyan. TUHAN hántom na geu iengkeue janji dan tieb geumeujanji sabe geupeutrok, bah kheuehnyan janji keu ureuëng nyang mantong udeb meunan cit keu ureuëng nyang ka meuninggai donya."
21 Óh lheueh nyan Rut geupeugah lom, "Mak, ureuëng nyan geukheun lom bahwa ulôn nyoe jeuet ulôn piléh sabe gandom nyang rhot-rhot nyan meusajan deungon ureuëng nyang meukeureuja bak gobnyan sampoe án hase bansaboh blang ka seuleusoe teupot."
22 "Nyoe, neuëk," geujaweueb lé Naomi ubak Rut, "keubiet leubeh gét gata meukeureuja meusajan ngon ureuëng keureuja nyang inong diblang Boas. Sabab, meunyoe gata tajak ublang ureuëng laén, gata hase jipeukaru lé ureuëng nyang na disinan!"
23 Lé sabab nyan, Rut teutab geuseutôt ureuëng nyang meukeureuja nyang inong di blang Boas. Gobnyan geupiléh gandom disinan sampoe banmandum nyang ka jeuet pot nyan teukoh beuhabéh -- bah kheuehnyan nyang phon that teukoh meunan cit ngon teupot nyang paleng keuneuleuh. Dan sidubnyan treb Rut teutab tinggai deungon mak tuwan geuh.


Chapter 3

1 Na meupadub na treb teuma óh lheuehnyan, Naomi geupeugah ubak Rut, "Ulôn harôh lôn useuha mangat gata meuteumé tameurumoh tangga lom dan mubahgia.
2 Gata takeureuja meusajan deungon ureuëng inong diblang Boas, bukon? Ingat, Boas nyan na kheueh syedara geutanyoe. Sabab nyan, gata deungoe kheuehnyoe! Bak malamnyoe gobnyan teuma geujak ceumeulo ubak jambo pui teumpat gandom gobnyan teutamon di blang geuh.
3 Tajak manoe kheueh laju, taboh kheueh laju minyéuk mangat bée dan tasok kheueh peukayan gata nyang paleng lagak. Laju gatajak ubak teumpat Boas di teumpat geuh meukeureuja nyang teungoh geuceumeulo gandom nibak mu jih. Gata preh kheueh gobnyan disinan sampoe gobnyan seuleusoe geumakheun, teuma bék sampoe geuteupeue bahwa gata na disinan.
4 Gata ngieng kheueh dipat teumpat gobnyan éh. Meunyoe gobnyan ka geuteungéuet, tapeurab kheueh laju ubak gobnyan dan gata buka laju ija silimbot gobnyan, laju gata-éh nibak gaki gobnyan. Eunteuk gobnyan teuma geubri tée bak gata peue nyang harôh gata peubuet."
5 "Gét, Mak," geujaweueb lé Rut, "ulôn teuma lôn peubuet banmandum nyang ka Mak peugah."
6 Dan geujak kheueh laju Rut u teumpat ureuëng meukeureuja nyang teungoh jilo gandom mangat leukang nibak mu jih. Disinan gobnyan geupeubuet banmandum nyang geupeugah lé mak tuwan geuh.
7 Óh ka seuleusoe Boas geupajoh bu, gobnyan ka meurasa puih dan até geuh pi ka mangat. Laju gobnyan geujak éh to ngon aneuk gandom nyang meutamon. Deungon seungab-seungab Rut teuka ngon geupeurab ubak gobnyan laju geubuka ija seulimbot Boas dan geupeureubah laju droe geuh nibak gaki gobnyan.
8 Watée teungoh malam hana teusangka-sangka Boas teujaga nibak teungeut dan geukeuneuk balék badan geuh. Gobnyan keubit that teukeujot bak watée geungieng na sidroe ureuëng inong ka teu-éh nibak gaki geuh.
9 "Soe ureuëng nyoe?" geutanyong lé Boas. "Ulôn Rut, Pak!" seuôt Rut. "Bapak na kheueh keuluarga kamoe nyang paleng to nyang harôh meutanggong jaweueb ateueh udeb ulôn. Rila kheueh Bapak neucok ulôn jeuet keu peurumoh Bapak."
10 "Seumoga TUHAN geubri beureukat ateueh gata, hai aneuëk ulôn," geupeugah lé Boas. "Teubandeng deungon peue nyang gata peubuet ateueh mak tuwan gata, teuma buet gata nyang jinoenyoe ka teutunyok cinta nyang paleng raya. Gata jeuet mantong tamita lakoe lamkawan ureuëng kaya atawa ureuëng gasin, teuma hainyan hana gata peubuet.
11 Lé sabab nyan, bék kheueh gata khawate, Rut, banmandum nyang lakéenyan teuma ulôn peubuet; sabab mandum ureuëng nyang na di banda nyoe ka jiteupeue bahwa gata na kheueh sidroe ureuëng inong nyang gét budo.
12 Keubiet beutôi that, ulôn harôh meutanggong jaweueb ateueh udeb gata, sabab ulôn na kheueh keuluwarga gata nyang paleng tô. Teuma mantong na sidroe teuk ureuëng nyang paleng meutanggong jaweueb u ateueh udeb gata. Dan gobnyan na kheueh keuluarga nyang leubeh to nibak ulôn.
13 Malam nyoe gata tinggai mantong disinoe. Singoh beungoh ulôn tanyong peu kheueh jihnyan jitem meutanggong jaweueb ateueh gata atawa hana. Meunyoe jihnyan jitem, bah kheueh; teuma meunyoe jihnyan hana jitem, teuma ulôn meujanji deumi Po teu Allah nyang udeb, ulôn teuma lôn peubuet tanggong jaweueb nyan. Jinoenyoe ta-éh kheueh mantong disinoe sampoe beungoh uroe."
14 Dan geuéh kheueh Rut disinan to ngon gaki Boas. Óh singoh beungoh suboh mantong reuneue-reuneue, Rut ka geubeudôh mangat bék jingieng lé gob. Sabab Boas hana geutem meusidroe ureuëng pi bahwa Rut na teuka u teumpat nyan.
15 Geupeugah kheueh lé Boas ubak Rut, "Gata sut laju ija sawak gata dan gataleueng laju." Teuma Rut laju geuploh ija seulendang geuh dan laju geuleueng Boas laju geuro u dalam ija sawak nyan na kira-kira dua ploh kilo gram gandom. Laju gandom nyan geubeuôt u ateueh baho Rut. Óh ka lheueh nyan Boas laju geujak u banda.
16 Óh watée katrok geuwoe Rut u rumoh, laju geutanyong lé mak tuwan geuh, "Peue nyang ka teujadi, hai aneuëk?" Dan Rut laju teuma geucalitra banmandum nyang geupeubuet lé Boas keu gobnyan.
17 "Dan," geupeugah lé Rut lom, "bahpi gobnyan nyang ka geubri gandomnyoe keu ulôn, sabab geupeugah lé gobnyan bahwa ulôn hana jeuet ulôn woe ubak Mak ngon jaroe nyang soh."
18 Laju geupeugah lé Naomi, "Tapreh mantong, hai aneuëk, sampoe gata tangieng pakriban keuneuleuh jih teuma. Boas hana seungab sigohlom peukaranyoe seuleusoe geupeubuet nibak uroenyoe cit teuma."


Chapter 4

1 Lé Boas laju geujak ubak teumpat meurumpok nibak babah pintoe geureubang banda. Óh ka lheueh geuduek na sikeujab disinan deuh kheueh laju geungieng sidroe ureuëng agam jijak rab ngon gobnyan, meunurot Boas ureuëng agam nyang teungoh jak nyan na kheueh keuluwarga Elimelekh nyang paleng toe. Lé Boas laju geuhôi ureuëng nyan, "Syedara ulôn, gata duek disinoe rab ngon ulôn!" Ureuëng nyan laju jiteuka dan jiduek laju to deungon Boas nyan.
2 Óh lheueh nyan Boas laju teuma geuhôi siploh droe teuk ureuëng-ureuëng patot dalam banda mangat jiduek meusajan ngon gobnyan disinan. Óh lheueh awaknyan geuduek,
3 geupeugah kheueh laju lé Boas ubak syedara geuh nyan, "Meunoe hai syedara meutuah, Naomi ka jiwoe nibak nanggroe Moab. Jinoenyoe jihnyan keuneuk jipeubloe tanoh aruwah Elimelekh, keuluwarga geutanyoe.
4 Dan ulôn kira gata harôh tateupeue keuhai nyan. Meunyoe gata tatem bloe tanoh nyan, tapeugah kheueh laju dikeue ureuëng tuha nyang patot-patot nyang na teungoh duek disinoe. Meunan cit meunyoe hana, takheun cit teuma deungon trok-trang, sabab geutanyoe meudua mantong nyang na hak ateueh hainyan, gata nyang phon, óh lheuehnyan barô kheueh ulôn." Jijaweueb lé ureuëng nyan, "Jeuet, ulôn nyang bloe tanoh nyan."
5 Laju geupeugah lom lé Boas, "Get kheueh meunyoe ka meunan gata peugah. Teuma, meunyoe gata tabloe tanohnyan nibak Naomi, gata harôh teuma tacok Rut, ureuëng inong Moab, inong balée areuwah aneuëk Naomi. Sabab, tanoh nyan harôh kheueh teutab jeuet keuhak milék keuturonan ureuëng nyang ka meuninggai nyan."
6 Jijaweueb lé ureuëng nyan, "Meunyoe lagéenyan, ulôn hana sanggob. Jinoenyoe bah kheueh ulôn peulheueh hak ulôn sibagoe ureuëng nyang phon nyang wajéb teubloe tanoh nyan. Hana meuguna tanoh nyan ulôn bloe sabab tanoh nyan ka barang teuntée hana hase jeuet keuhak milék keuturonan ulôn. Leubeh gét droeneueh mantong nyang bloe tanoh nyan."
7 Bak masanyan meunyoe na ureuëng jipeubloe tanoh atawa jituka hak milék jih, lazem jih sibagoe tanda atranyan ka sah lé ureuëng nyan jibuka seulob nyang na meuleukek nibak gaki jih, laju seulobnyan jijok ubak ureuëng nyang ka bloe atra nyan. Meunan kheueh cara jih ureuëng-ureuëng di Israel jipeusah sapeue-sapeue peukara keuhai bloe peubloe tanoh.
8 Lé sabab nyan, bak watée mandum ureuëng jipeugah ubak Boas, "Droeneueh mantong nyang bloe tanoh nyan," lé gobnyan laju geupeu lheueh seulob geuh dan laju geubri atra nyan ubak Boas.
9 Dan geupeugah lé Boas ubak ureuëng-ureuëng tuha nyang patot-patot meunan cit ubak mandum ureuëng laén nyang na disinan, "Uroenyoe gata banmandum jeuet keusaksi bahwa ulôn ka ulôn bloe nibak Naomi banmandum nyang na atra hak milék lé Elimelekh dan aneuëk-aneuëk gobnyan, nyan kheueh Kilyon dan Mahlon.
10 Meunan cit disampéng nyan ulôn kucok Rut, ureuëng inong Moab nyan inong balée aruwah Mahlon nyan jeuet keu peurumoh ulôn. Deungon lagéenyan tanohnyan teutab jeuet keu hak milék keuluwarga nyang ka meuninggai nyan. Dan keuturonan geuhnyan pi teutab na lamkawan kawöm syedara gobnyan dan di banda banda gobnyan. Ingat kheueh syedara-syedara, uroenyoe gata banmandum jeuet keusaksi jih."
11 Ureuëng-ureuëng tuha nyang patot-patot dan ureuëng nyang laén nyang na disinan jipeugah, "Beutôi, kamoe nyoe jeuet keusaksi. Seumoga TUHAN geupeujeuet peurumoh droeneueh nyan lagée Rakhel dan Lea nyang ka geupeulahé aneuëk-aneuëk nyang le keu Nabi Yakub. Seumoga droeneueh makmu lamkawan ureuëng-ureuëng dalam kawöm Efrata dan seumoga droeneueh meusyeuhu di Betlehem.
12 Seumoga aneuëk-aneuëk nyang lahé nyang geubri lé TUHAN ubak droeneueh meulalu ureuëng inong muda nyoe teuma jeuet keu keuluwarga droeneueh lagée si Peres, aneuëk nibak Yehuda dan Tamar."
13 Teuma Boas pih laju geucok Rut jeuet keu peurumoh gobnyan. TUHAN geubri beureukat keu Rut sampoe gobnyan mume laju geupeulahé sidroe aneuëk agam.
14 Dumna ureuëng inong jipeugah ubak Naomi, "Teupujoe kheueh TUHAN! Gobnyan ka geubri sidroe cucoe keu droeneueh nyang agam nibak uroe nyoe mangat jeuet jipeulara droeneueh. Seumoga aneuëk nyan jeuet keu aneuëk nyang meusyeuhu di Israel!
15 Meulintée droeneueh nyan gét that jigaséh keu droeneueh. Gobnyan ka geubri keu droeneueh leubeh nibak peue nyang hase geubri ubak tujoh droe aneuëk agam. Jinoenyoe gobnyan ka teuma geubri sidroe cucoe nyang agam ubak droeneueh, nyang teuma jok seumangat barô keu gata, dan geupeulara droeneueh bak watée droeneueh ka tuha."
16 Naomi laju geucok aneuëknyan geupeulara laju ngon peunoh gaséh dan sayang.
17 Lé ureuëng inong teutangga gobnyan jiboh nan aneuëk nyan Obed. Ubak soe mantong awaknyan jipeugah, "Naomi ka na sidroe aneuëk agam!" Obed nyoe kheueh teuma óh singoh uroe jeuet keu bapak nibak Isai, dan Isai nyan na kheueh bapak Nabi Daud.
18 Dan nyoe kheueh garéh silsilah keuturonan Nabi Daud, phon nibak Peres, na kheueh: Peres, Hezron, Ram, Aminadab, Nahason, Salmon, Boas, Obed, Isai, Nabi Daud.