Ester

1 2 3 4 5 6 7 8 9 10


Chapter 1

1 Di Susan, ma banda Persia, Ahasyweros nyang mat peurintah sibagoe raja. Keurajeuen gobnyan na 127 boh propinsi, phon nibak India sampoe u Sudan.
3 Bak thon nyang keulhée geumat peurintah lé raja nyan, Raja Ahasyweros geupeuna khanuri nyang keubiet rayeuk nyang geu undang banmandum ureuëng-ureuëng rayeuk peugawée gobnyan. Panglima Persia dan Media jijak keunan, meunan cit deungon banmandum gubunur dan peujabat manyang lam keurajeuen geuh nyan teuka banmandum.
4 Na nam buleuen treb jih raja geupamer keukayaan meuligoe gobnyan dan keumeugahan meunan cit deungon keuagongan keurajeuen gobnyan.
5 Óh lheueh nyan raja geupeuna lom khanuri keu banmandum rakyat gobnyan nyang na Susan, bah kheueh nyan nyang kaya meunan cit deungon nyang gasien. Khanuri nyan treb jih na sigoe aleuhat peunoh nyang geupeuna nibak meuligoe raja nyan.
6 Nibak leuen meuligoe geupeungui deungon ija gurden nyang teupeugét nibak ija lineun wareuna ijo dan putéh, teuikat deungon talo lineun nyang halôh dan teusangkot nibak gleueng-gleueng pirak nyang teupasang nibak taméh-taméh nyang meubalot ngon pualam. Di miyueb nyan geukeubah teuma teumpeuen méuh dan teumpeuen pirak di ateueh aleue nyang meulapéh deungon pualam putéh, hablur mirah, kulét mutiara nyang meukilat dan batée pirus ijo.
7 Lé raja geuseudia teuma anggô nyang meulimpah ruwah nyang geuhidang didalam piala méuh nyang meubagoe rupa.
8 Ureuëng-ureuëng jamé nyang teuka keunan hana geubataih geubri ié anggô dan hana teuma geupaksa jijeueb ié anggô nyan. Raja ka geubri peurintah ubak peulayan meuligoe, mangat tieb-tieb jamé geupeutimang meunurot nyang geukeuheundaki maséng-maséng.
9 Meunan cit lé Wasti, peureumaisuri raja, geupeuna teuma khanuri keu sabe-sabe ureuëng inong didalam meuligoe.
10 Bak uroe nyang keutujoh, raja sira geujieb-jieb ié deungon galak dan mangat that até. Lé sababnyan nyan gobnyan laju geutawök tujoh droe peujabat khusos nyang jeuet keupeulayan pribadi gobnyan; awaknyan na kheueh Mehuman, Bizta, Harbona, Bigta, Abagta, Zetar dan Karkas.
11 Raja geuyue ubak awaknyan mangat jiba Ratu Wasti deungon mahkota keurajeuen di ateueh ulée ukeue gobnyan. Ratu Wasti nyan lumpah that lagak ceudah rupa, dan raja keuneuk geupamer peureumaisuri geuh nyan ubak dumna jamé dan ubak banmandum ureuëng rayeuk keurajeuen gobnyan.
12 Teuma watée peulayan nyan jipeugah hainyan ubak Ratu Wasti, ratu hana geutemjak, lé sababnyan raja beungéh lagoena.
13 Kajeuet keu lazem raja bahwa gobnyan keu geulakée peundapat bubena ureuëng malem keuhai huköm dan adat. Sababnyan laju geuhôi peunaseuhat gobnyan nyang leubeh jiteupeue peue nyang harôh jipeubuet meunyoe ka teujadi nyang lagéenyan.
14 Anggota peunaseuhat nyang paleng kayém geutawök lé raja keu jimeuhadab na kheueh: Karsena, Setar, Admata, Tarsis, Meres, Marsena dan Memukan. Awaknyan na kheueh peujabat-peujabat Persia dan Media nyang duek nibak keududuekan nyang paleng manyang didalam keurajeuen nanggroe.
15 Geupeugah lé raja ubak ban tujoh droe awaknyan, "Ulôn ka ulôn utôh peulayan-peulayan ulôn ubak Ratu Wasti mangat jijak meuhadab ubak ulôn. Teuma lé ureuëng binoe ulôn nyan hana jitem. Meunurot huköm, peue tindakan nyang harôh tacok ateueh ratu nyan?"
16 Dan jipeugah laju lé Memukan ubak raja dan ubak ureuëng rayeuk nyang na disinan, "Deungon na nyang lagéenyan, bukon Teungku Amphon mantong nyang ka geupeumalée lé Ratu Wasti, teuma banmandum peugawée Teungku Amphon, dan keu tieb-tieb ureuëng agam nyang na didalam keurajeuen nyoe!
17 Sabab peue nyang ka geupeubuet lé ratu nyan teuma jiteupeue lé banmandum ureuëng inong, dan awaknyan jianggab remeh keu lakoe jih maséng-maséng. Awaknyan teuma jipeugah bahwa Teungku Amphon ka neupeurintah Ratu Wasti keu geujak meuhadab, teuma lé ratu hana geutem teuka.
18 Deungon nyan, meunyoe na purumoh-purumoh ureuëng rayeuk nyang na didalam keurajeuen Persia dan Media geudeungoe hainyan, pasti awaknyan bagaih-bagaih jijak peugah ubak lakoe geuh maséng-maséng. Akibat jih na kheueh, ureuëng binoe jilawan peue nyang geupeurintah lé ureuëng lakoe dan ureuëng lakoe pi teuma geubeungéh keu ureuëng binoe.
19 Lé sabab nyan, kamoe meulakée mangat Teungku Amphon neucok peunutôh bahwa Ratu Wasti hana jeuet le geumeuhadab ubak Teungku Amphon. Keuputosan nyan harôh jeuet keu undang-undang keurajeuen nanggroe Persia dan Media, deungon nyan hana mungken le teutarek lom teuma. Óh lheuehnyan, neubri kheueh teumpat duek Ratu wasti keu ureuëng inong nyang laén nyang leubeh gét nibak gobnyan.
20 Meunyoe keuputosan Teungku Amphon nyan ka meugah bansaboh nanggroe nyang luwah nyoe, ka teuntée tieb-tieb ureuëng inong nyang ka meulakoe jihoreumat keu teungku lakoe jih, bah kheueh nyan ureuëng kaya meunan cit deungon ureuëng gasien."
21 Usui nyang geupeusampoe lé Memukan nyan geuanggok lé teungku raja dan ureuëng-ureuëng rayeuk nanggroe, dan lé raja laju geupeubuet keuputosan nyan.
22 Gobnyan laju geukirém surat peurintah ubak banmandum propinsi keurajeuen, lam basa dan tulésan nyang na di dalam propinsi nyan maséng-maséng. Peurintah nyan lagée nyoe su jih, bahwa didalam tieb-tieb rumoh tangga, teungku lakoe kheueh nyang jeuet keu panghulée, dan nyang cok keuputosan.


Chapter 2

1 Na padub watée teuma óh lheuehnyan, bahpi raja ka hana beungéh le, gobnyan teutab mantong geupike buet Ratu Wasti dan tindakan nyang ka teucok ateueh jihnyan.
2 Sabab nyan peunaseuhat-peunaseuhat nyang paleng krab deungon raja laju jijok usui nyang lagée nyoe, "Nyang sigét jih tamita mantong aneuëk dara nyang lagak keu peurumoh Teungku Amphon.
3 Bah kheueh Teungku Amphon neu angkat peugawée-peugawée nibak banmandum propinsi lam keurajeuen nyoe mangat teumita aneuëk dara nyang lagak-lagak lom ceudah rupa lheuehnyan jiba laju ubak meuligoe inong di Susan nyoe. Hegai, peujabat khusos nyang jeuet keu ulée rumoh tangga meuligoe ureuëng inong, nyang uroih awaknyan dan gobnyan teuma nyang uroih ureuëng inong nyan mangat jeuet ceudah rupa.
4 Óh lheuehnyan, bah kheueh Teungku Amphon neupiléh toh aneuëk dara nyang lagak meunurot Teungku Amphon keu neucok keu ureuëng binoe, dan neupeujeuet jihnyan keugeunantoe Ratu Wasti." Raja situju that-that naseuhat nyan dan laju geupeubuet hai nyang lagée nyan.
5 Di banda Susan nyan na tinggai sidroe ureuëng Yahudi nyang nan gobnyan Mordekhai bin Yair. Gobnyan keuturonan Kis dan Simei nibak sukée Benyamin.
6 Mordekhai ka teuteuen yoh watée banda Yerusalem geupeutaloe lé Nebukadnezar, raja Babel. Mordekhai teuböih u Babel meusigoe deungon Yoyakin, raja Yehuda, dan le lom tawanan nyang laén.
7 Gobnyan na syedara karông, sidroe aneuëk dara nyang paleng ceudah rupa, deungon tuboh nyang meusigak, nyang teuhôi nan Ester, nan Ibrani geuh na kheueh Hadasa. Ureuëng syiek Ester ka meuninggai donya dan gobnyan geucok keu aneuëk angkat lé Mordekhai dan geupeulara sibagoe aneuëk droe geuh.
8 Óh lheueh peurintah raja teupeumaklum ubak mandum rakyat nanggroe, jai that-that aneuëk dara nyang meusapat di Susan meunan cit deungon Ester na lamkawan aneuëk-aneuëk dara nyan. Ester pih geuba laju ubak meuligoe raja dan geupeucaya ubak Hegai nyang jeuet keu ulée rumoh tangga meuligoe ureuëng inong.
9 Hegai hireuen that geungieng Ester dan gobnyan pih galak lumpah na keu aneuëk dara nyan. Deungon reujang that aneuëk dara nyan geupeungui ngon meubagoe alat-alat peuceudah rupa meunan cit deungon peunajoh nyang khusos teuma. Ester geupinah laju ubak bagian nyang paleng lagak didalam meuligoe nyan dan na teuma tujoh droe aneuëk dara nyang paleng carông ngon malem geubri tugaih mangat jijaga ngon ji useuha aneuëk dara nyan.
10 Ateueh naseuhat Mordekhai, Ester hana geubri tée bahwa gobnyan na kheueh sidroe ureuëng Yahudi.
11 Tieb-tieb uroe Mordekhai geujak-jak dikeue meuligoe ureuëng inong nyan keu geujak tanyong keuadaan Ester dan peue nyang teujadi ateueh aneuëk nyan.
12 Meunurot peuratoran, banmandum ureuëng inong teurawat keu teupeuceudah rupa na sithon treb jih: nam buleuen deungon minyéuk nyang teujampu deungon keumeunyan, dan nam buleuen nyang teuma óh lheuehnyan deungon minyéuk mangat bée nyang meubagoe rupa nyang ka teujampu. Óh lheueh nyan, tieb-tieb aneuëk dara meuteumé gileran jijak meuhadab ubak Raja Ahasyweros.
13 Bak watée sidroe aneuëk dara jijak meuhadab ubak raja, aneuëk dara nyan jeuet jingui peue mantong peukayan meunurot nyang jigalak.
14 Aneuëk dara nyan laju teuba u meuligoe raja óh watée uroe ka malam, dan óh singoh nyan teuba teuma ubak meuligoe nyang laén, dan jiuroih laju lé Saasgas, sidroe lamkawan peujabat nyang khusos jiuroih gundek-gundek raja. Aneuëk dara nyan hana le geumeuhadab ubak raja, laén hai meunyoe raja na meuheuet keu gobnyan deungon cara geuhôi nan gobnyan.
15 Teuma trok kheueh ubak gileran Ester geujak meuhadab ubak raja. -- Ester na kheueh aneuëk Abihail dan syedara karông Mordekhai nyang ka geuangkat Ester nyan sibagoe aneuëk gobnyan keudroe; Ester meumang jikagum lé soe mantong nyang pandang gobnyan. Bak watée gobnyan geujak meuhadab ubak raja, Ester jisok peukayan sisuai deungon nyang ka geutunyok dan naseuhat Hegai, nyang keu ulée meuligoe inong nyan.
16 Meunan kheueh jeuet jih, bak thon nyang keutujoh keurajeuen Ahasyweros bak buleuen nyang keu siploh, nyan kheueh buleuen Tebet, Ester jiba laju jak meuhadab ubak Raja Ahasyweros di meuligoe raja.
17 Aneuëk dara nyan lumpah geugalak dan geuharok lé raja leubeh nibak aneuëk-aneuëk dara nyang laén. Lé sabab nyan gobnyan lumpah that harok dan geucinta lé raja. Lé sababnyan teuma raja laju geupeuduek mahkota keurajeuen ateueh ulée Ester dan geupeujeuet gobnyan ratu keugeunantoe Ratu Wasti.
18 Óh lheuehnyan, raja laju geupeuna khanuri nyang lumpah raya sibagoe horeumat gobnyan keu Ester dan geu-undang banmandum peugawée meunan cit deungon ureuëng rayeuk gobnyan. Gobnyan laju geupeumaklum uroe pre bansaboh nanggroe dan geubagi-bagi laju hadiah nyang meulimpah ruah.
19 Nibak watéenyan Mordekhai ka geuangkat lé raja jeuet keu peugawée nanggroe.
20 Ester gohlom cit geupeugah droe bahwa geuhnyan na kheueh ureuëng Yahudi, sabab Mordekhai geutam gobnyan. Ester teutab geutaát ubak Mordekhai lagée geutaát yoh gobnyan mantong ubit dan jipeulara lé syedara karông gobnyan.
21 Nibak siuroe, watée Mordekhai teungoh meutugaih didalam meuligoe, na dua droe peujabat khusos raja, nyang nan jih Bigtan dan Teres, ka sipakat jikeuneuk poh maté Raja Ahasyweros, sabab awaknyan jibanci that-that keu raja nyan.
22 Reuncana awaknyan bandua geuteupeue lé Mordekhai dan gobnyan laju geujak peugah ubak Ester. Hana geuböih watée, Ester laju geupeugah ubak raja peue nyang ka geuteupeue lé Mordekhai nyan.
23 Peukara nyan laju geuseulidék, dan nyata kheueh peue nyang geupeugah lé Mordekhai nyan beutôi. Bandua awaknyan laju teuhuköm gantung. Sisuai deungon peurintah raja, peuristiwa nyan na teucetet didalam kitab keurajeuen nanggroe.


Chapter 3

1 Na padubna treb teuma óh lheuehnyan Raja Ahasyweros geu baiát teuma Haman jeuet keu peudana meuntroe. Haman na kheueh aneuëk Hamedata nibak keuturonan Agag.
2 Raja geupeutron titah ubak mandum peugawée gobnyan mangat jihoreumat ubak Haman deungon cara jisujut dikeue gobnyan. Banmandum ureuëng taát ubak peurintah raja nyan, keucuali Mordekhai.
3 Peugawée-peugawée nyang laén nyang na didalam meuligoe jitanyong ubak Mordekhai nyan pakon gobnyan geu iengkeue titah raja,
4 dan tieb-tieb uroe awaknyan jipaksa Mordekhai nyan mangat geuturot peue nyang ka jeuet keu titah raja, teuma Mordekhai teutab hanageutem deungoe. Kheun Mordekhai ubak awaknyan, "Ulôn nyoe ureuëng Yahudi; ulôn hana jeuet ulôn sujut ubak manusia." Dan awaknyan pi laju jipeutrok hainyan ubak Haman sabab awaknyan keuneuk jiteupeue tindakan peue nyang harôh geucok keu Mordekhai.
5 Haman beungéh lumpah na watée jiteupeue Mordekhai hana jitem sujut ubak gobnyan.
6 Dan watée jiteupeue bahwa Mordekhai nyan na kheueh sidroe ureuëng Yahudi, laju jicok keuputosan keuneuk jihuköm Mordekhai, dan kon Mordekhai mantong, teuma keuneuk jipeubinasa banmandum ureuëng Yahudi nyang na di dalam nanggroe Persia.
7 Nibak thon nyang keudua blaih jimat keurajeuen lé Raja Ahasyweros, bak buleuen nyang keu sa, na kheueh buleuen Nisan, Haman laju geuyue rhom undi nyang nan jih "Purim" mangat geuteupeue uroe dan buleuen peue nyang paih keu geulaksana niet jih nyang jeuhet nyan. Teuma jicok kheueh tanggai lhée blaih buleuen dua blaih, nyan kheueh buleuen Adar.
8 Dan geupeugah kheueh laju lé Haman ubak raja, "Teungku Amphon nyang ulôn horeumat, na saboh bansa nyang ganje nyang ka meutabu di tieb-tieb propinsi keurajeuen nanggroe nyoe. Adat istiadat jihnyan meulaén that deungon bansa-bansa nyang laén. Awaknyan hana jitem patuh ubak huköm-huköm nyang na didalam keurajeuen nyoe. Jadi, nyang sigetjih Teungku Amphon bék neupeubiyeu ureuëng nyan jipeubuet ban galak droe.
9 Meunyoe Teungku Amphon hana meurasa brat, bah kheueh Teungku Amphon peuteubiet surat peurintah mangat tapeu habéh bansa nyan. Dan meunyoe Teungku Amphon neutem teurimong usui ulôn nyoe, ulôn pasti hase ulôn peutamong 340.000 kilogram pirak u dalam kaih Teungku Amphon."
10 Ban geudeungoe nyang lagéenyan, raja laju geusuit nibak jaroe gobnyan euncien nyang teungoh geungui guna keu geucab surat-surat maklumat nyang jipeuteubiet lé keurajeuen deungon reuseumi, dan atra nyan geujok laju ubak Haman, musoh nyang paleng rayeuk nibak bansa Yahudi.
11 Geupeugah lé raja ubak Haman, "Bansa nyan dan meunan cit deungon péng jih ulôn jok keu gata. Tapeubuet kheueh laju peue nyang gata ngieng gét ateueh awaknyan."
12 Dan nibak tanggai lhée blaih buleuen sa, Haman laju geuhôi seukeutareh raja. Ubak awaknyan laju geuyue tuléh surat nyang sisuai deungon peue nyang geupeurintah, óh lheueh nyan surat nyan jiteujeumah laju u dalam meubagoe basa dan jisalen u dalam mandum tulésan nyang na jipeuguna lam keurajeuen nyan. Surat nyan teutuléh ateueh nan Raja Ahasyweros dan teucab deungon euncien gobnyan, laju surat nyan geukirém deungon bagaih that ubak banmandum nyang mat kuasa, gubunur dan ureuëng-ureuëng rayeuk nyang na di tieb-tieb propinsi. Asoe surat nyan na kheueh peurintah raja bahwa bak tanggai lhée blaih buleuen Adar, banmandum bansa Yahudi, bah kheueh nyan nyang tuha meunan cit nyang muda, bah kheueh nyan ureuëng inong meunan cit deungon aneuëk manyak, awaknyan harôh teupoh maté hana amphon, dan hareuta beunda awaknyan teusita banmandum.
14 Peurintah nyan harôh teu peumaklum di tieb-tieb propinsi mangat banmandum ureuëng ka siab seudia nibak uroe nyang ka teupeu teuntée nyan.
15 Lé ureuëng upah raja laju jijak deungon bagaih-bagaih jijak intat surat-surat nyan ubak banmandum propinsi keurajeuen nanggroe. Ateueh titah raja, peurintah nyan teupeumaklum cit di Susan, ma banda Persia. Óh lheuehnyan raja dan Haman laju geuduek-duek sira geujieb ié anggô, teuma banda Susan ka karu bansalam le sabab haba nyan.


Chapter 4

1 Watée geudeungoe lé Mordekhai peue nyang ka teujadi, laju geupriek-priek peukayan gobnyan óh lheuehnyan geusôk laju ija umpang teupông sibagoe tanda seudeh. Geucok abée geutabu laju u ateueh ulée gobnyan, óh lheuehnyan geujak rawon bansaboh banda sira geumo deungon su nyang nyareng dan seudeh that.
2 Watée ka trok dileuen meuligoe laju geupiôh, sabab ureuëng nyang ngui peukayan ija umpang teupông hana jeuet jitamong u dalam meuligoe.
3 Meunan cit di tieb-tieb propinsi nyang laén didalam keurajeuen nanggroe, bubena ureuëng Yahudi ka jimo ba-e deungon até nyang that-that seudeh óh lheueh jideungoe peurintah raja teupeumaklum ubak rakyat nanggroe. Awaknyan jipuasa, geumo dan apoh apah hana meuteuntée, dan le that-that lamkawan awaknyan jingui ija umpang teupông dan ji éh di ateueh abée.
4 Watée aneuëk-aneuëk dara deundayang dan dumna peujabat nyang khusos nyang peutimang Ratu Ester jilapor ubak gobnyan peue nyang teungoh geupeubuet lé Mordekhai, Ester seudeh lumpah na. Ratu laju geukirém peukayan ubak Mordekhai sibagoe geunantoe ija umpang teupông nyang geungui nyan, teuma Mordekhai hana geutem teurimong.
5 Óh lheuehnyan Ester laju geuhôi Hatah, sidroe lamkawan peujabat khusos nyang geubri tugaih lé raja mangat jipeutimang Ratu Ester. Ubak Hatah nyan geuyue jak seulidek ubak Mordekhai peue sabab gobnyan geupeusaneut droe nyang lagée nyan.
6 Dan geujak kheueh laju Hatah ubak Mordekhai di padang banda nibak babah pintoe geureubang meuligoe.
7 Mordekhai laju geucalitra ubak ureuëng nyan peue nyang ka teujadi dan padub na le péng pirak nyang ka jipeujanji lé Haman keu jipeutamong u dalam kaih raja, óh ka lheueh banmandum ureuëng Yahudi nyan jipeubinasa.
8 Dan lé Mordekhai geubri teuma ubak Hatah seunalen surat raja nyang ka geupeuteubiet di Susan nyang meuasoe peurintah keu teupeubinasa ureuëng Yahudi. Mordekhai laju geuyue Hatah jijak peusampoe ubak Ester dan jipeutrang peukaranyan ubak gobnyan, meunan cit keu jilakée mangat Ester geutem jak meuhadab ubak raja keugeulakée gaséh sayang ubak bansa gobnyan.
9 Dan geujak kheueh Hatah ubak Ester geupeusampoe peusan Mordekhai nyan ubak gobnyan.
10 Teuma lé Ester geuyuejak lom Hatah nyan ubak Mordekhai sira geupeusan lagée nyoe,
11 "Soe mantong ureuëng, bah kheueh nyan agam meunan cit nyang inong, meunyoe hana geutawök lé raja keujijak meuhadab gobnyan di leuen meuligoe, ureuëng nyan bah teuhuköm maté. Nyan na kheueh undang-undang keurajeuen nyang hana jeuet teubantah bahsoe mantong ureuëng jih phon nibak peujabat sampoe ubak rakyat nyang na di propinsi-propinsi, ka jiteupeue hainyan. Teuma na saboh jalan keu teuhinda nibak undang-undang nyan, jalan nyan na kheueh meunyoe raja geu sunyung tungkat méuh gobnyan ubak ureuëng nyan. Meunyoe nyan teujadi, ureuëng nyan teuma seulamat. Teuma kana sibuleuen nyoe ulôn hántom na geutawök lé raja."
12 Dan lé Hatah pi laju geujak peusampoe haba Ester nyan ubak Mordekhai.
13 Dan lé Mordekhai laju geukirém haba peuingat nyang lagée nyoe ubak Ester, "Bék neusangka gata leubeh aman nibak ureuëng Yahudi nyang laén, teuma sabab gata tinggai nibak meuligoe!
14 Ureuëng Yahudi pasti meuteumé tulông deungon cara peue mantong sampoe awaknyan seulamat. Teuma meunyoe gata teutab seungab mantong lam hai nyang lumpah mubahya nyoe, gata keudroe maté dan keuluwarga gata habéh riwayat jih. Pat tateupeue, mungken nyang teujadi bak saát-saát nyang lagée nyoe kheueh gata ka geupiléh jeuet keu ratu!"
15 Dan lé Ester laju geukirém haba nyoe ubak Mordekhai,
16 "Gata peusapat kheueh laju ureuëng Yahudi nyang na di Susan mangat jimeudoá keu ulôn. Bék gata makheun ngon tajieb ié treb jih lhée uroe lhée malam. Ulôn keudroe meunan cit deungon aneuëk-aneuëk dara deundayang ulôn teuma kamoe peubuet cit lagée nyan. Óh lheuehnyan ulôn teuma lônjak meuhadab ubak raja, bahpi nyan meulangga nibak undang-undang nanggroe. Meunyoe lé sabab nyan ulôn harôh maté, bah kheueh ulôn maté!"
17 Dan óh lheuehnyan geujak kheueh laju Mordekhai dan geupeubuet laju peue nyang geupeugah lé Ester nyan.


Chapter 5

1 Bak uroe nyang keulhée puasa gobnyan, Ester laju geungui peukayan ratu, dan geujak laju uleuen meuligoe dan geudong laju dikeue seuramoe. Dan raja teungoh geuduek di ateueh tahta nyang meuhadab ubak pintoe nyan.
2 Óh watée geungieng ratu teungoh geudong diluwa, gobnyan teuka inséueh didalam até laju geusunyung tungkat méuh gobnyan ubak ratu. Dan geulangkah laju ukeue Ratu Ester sira geucukéh ujong tungkat méuh nyan.
3 Óh lheuehnyan geutanyong lé raja ubak sang ratu, "Peue na haba, hai Putroe ulôn? Peue nyang gata lakée? Peugah kheueh laju! Bahpi nyang gata lakée siteungoh nibak keurajeuen ulôn, atranyan ulôn jok keu gata."
4 Geujaweueb lé Ester, "Meunyoe teungku Amphon neutem, bah kheueh nibak malam nyoe Teungku Amphon dan Haman neujak ubak khanuri nyang ulôn peuna keu Teungku Amphon."
5 Raja geuyue ubak Haman beureujang jiteuka, mangat awaknyan meuteumé meusajan-sajan geujak pajoh khanuri Ester. Dan jijak kheueh awaknyan ubak teumpat khanuri nyang teungoh geulaksana lé Ester nyan.
6 Watée teungoh jieb ié anggô, raja geutanyong ubak ratu, "Jinoenyoe neupeugah kheueh laju peue nyang gata lakée. Peue nyang gata meuheuet ulôn bri, bahpi siteungoh nibak keurajeuen ulôn nyoe!"
7 Geujaweueb lé Ester,
8 "Meunyoe Teungku Amphon neujok peue nyang ulôn lakée nyoe, bah kheueh Teungku Amphon dan Haman neuteuka lom nibak khanuri nyang teuma ulôn peuna nibak malam singoh, eunteuk nibak khanuri nyan ulôn peugah peue nyang ulôn meuheuet nibak Teungku Amphon."
9 Haman jiwoe di rumoh Ratu Ester nyang banseuleusoe geupajoh khanuri deungon até nyang galak lagoena. Teuma óh trok nibak babah pintoe meuligoe leumah geungieng Mordekhai nyang hana geubeudôh nibak teumpat duek geuh geubri horeumat ubak gobnyan, lé sababnyan Haman beungéh that-that watée jikalon nyan.
10 Teuma teutab jipeuteuen droe dan jiwoe laju u rumoh. Óh ka trok gobnyan u rumoh geuyue laju rakan-rakan gobnyan dan geulakée Zeres, peurumoh gobnyan, mangat jitem duek-duek deungon awaknyan.
11 Dan nibak duek-duek nyan lé Haman laju jicok keuseumpatan keu jipeusombong droe dikeue awaknyan dan laju jipeuna beurakah ngon haba nyang manyang dikeue awaknyan, bah kheueh nyan keuhai keukayaan droe gobnyan, aneuëk-aneuëk agam jih nyang le, meunan cit deungon keududuekan peunteng nyang ka jiteurimong nibak raja, deungon pangkat jihnyan nyang jiôh leubeh manyang nibak peugawée-peugawée nyang laén.
12 Jipeugah lom lagée nyoe, "Bahpi Ratu Ester nyang geu undang nibak khanuri gobnyan na kheueh ulôn dan raja keu khanuri nyang geupeukhusos keu kamoe, dan malam singoh kamoe geutawök lom.
13 Teuma banmandum nyan hana peureulée keu ulôn, simantong deuh ulôn kalon Mordekhai, ureuëng Yahudi nyan, jiduek di babah pintoe meuligoe."
14 Ban jideungoe nyan peurumoh dan banmandum rakan-rakan gobnyan laju jipeugah lagée nyoe, "Neuyue mantong peugét taméh teumpat meugantung nyang manyang jih dua ploh dua metée. Dan óh singoh beungoh, bansuboh that-that neulakée kheueh idhin ubak raja mangat jeuet tagantung Mordekhai nibak taméh nyan. Deungon na lagée nyan droeneueh ka hase neujak ubak teumpat khanuri nyan deungon até nyang peunoh geumbira." Usui nyan jroh lagoena meunurot pikeran Haman, sabab nyan gobnyan laju geuyue ureuëng laén jijak peugot taméh gantungan nyan.


Chapter 6

1 Bak malam nyan cit teuma raja hana hase geuéh, gobnyan apoh apah geulisah hana meuteuntée. Lé sabab nyan geuyue cok laju kitab catetan seujarah keurajeuen dan kitab nyan geuyue beuet laju ubak ureuëng laén.
2 Di dalam kitab nyang teungoh teubeuet nyan leumah laju saboh catetan nyang bahwa Mordekhai ka geulapor keuhai useuha Bigtan dan Teres dua droe peujabat nyang khusos geujaga kama raja, keu jikeuneuk poh maté raja.
3 Laju geutanyong lé raja ubak ureuëng nyang teungoh beuet kitab nyan, "Horeumat atawa balaih jasa peue nyang ka teujok ubak Mordekhai nyan?" Geujaweueb lé napadub droe deundayang raja, "Meusapeue pih hana geuteurimong lé Mordekhai, ya Teungku Amphon."
4 Laju geutanyong lom lé raja, "Soe lamkawan peugawée ulôn nyang na didalam meuligoe nibak watée nyoe?" Keubeutulan Haman banmantong jitamong uleuen meuligoe; keuhai Haman jijak keunan lé jihnyan keuneuk jaklakée ubak raja mangat teugantung Mordekhai nibak taméh nyang ka lheueh jiglong.
5 Laju jijaweueb lé deundayang raja nyang na disinan, "Haman na didalam meuligoe dan gobnyan leumah jih keuneuk meuhadab ubak Teungku Amphon." "Tayue tamong laju u dalam," kheun raja.
6 Óh ka lheueh Haman jitamong u dalam, laju geupeugah lé raja ubak Haman, "Na ureuëng nyang keuneuk ulôn bri peunghoreumatan nyang paleng raya. Peu kheueh nyang ulôn peubuet ateueh ureuëng nyan?" Geupike lé Haman, "Soe lom nyang geubri peung horeumatan nyang paleng rayeuk? Pasti nyan keu ulôn!"
7 Lé sabab nyan gobnyan geujaweueb, "Nyang paleng gét keu ureuëng nyan teupeungui peukayan keubeusaran nyang lazem jih Teungku Amphon ngui. Óh lheueh nyan guda Teungku Amphon teupeungui teuma deungon lambang-lambang keurajeuen.
9 Sidroe lamkawan ureuëng rayeuk nanggroe nibak keuturonan ulée balang harôh kheueh jijak peungui peukayan nyan ubak ureuëng nyang keuneuk Teungku Amphon bri peunghoreumatan nyan, dan laju jijakba keulileng nanggroe ureuëng nyan sira jiduek di ateueh guda Teungku Amphon rot padang banda. Ureuëng rayeuk nyan teuma jijak dikeue sira jitawök ngon jipeumaklum ubak rakyat, 'Meunoe kheueh meunyoe raja geubri peunghoreumatan keu ureuëng nyang geuhoreumat lé gobnyan!' "
10 Dan geupeugah kheueh lé raja ubak Haman, "Bagaih, tajakcok laju peukayan dan guda nyan dan tajok kheueh laju banmandum peunghoreumatan nyan ubak Mordekhai, ureuëng Yahudi nyan. Tapeubuet kheueh laju lagée nyang gata kheun bunoe, hana jeuet tapeukureueng bahpi meusapeue pi. Mordekhai nyan ka jeuet gata meurumpok jéhpat teungoh jiduek-duek di leuen meuligoe."
11 Dan Haman pih laju jijakcok peukayan dan guda óh lheuehnyan jijak peungui laju ubak Mordekhai, óh ka lheueh Mordekhai geuék u ateueh gudanyan, Haman laju jiba meukeulileng rot padang banda, sira jitawök-tawök ngon jipeumaklum ubak rakyat, "Ngieng kheueh, meunoe kheueh meunyoe raja ka geubri peunghargaan keu ureuëng nyang geuhoreumat lé gobnyan!"
12 Óh lheuehnyan Mordekhai laju geuriwang ubak babah pintoe geureubang meuligoe. Teuma Haman meudab-dab geujakwoe laju, sabab gobnyan lumpah that malée. Haman hana geutem ngieng ateueh ureuëng ramé sabab malée nyan hana hase geusöm, teuma gobnyan laju jisöm muka keu ureuëng nyang kalon u ateueh jihnyan.
13 Ubak peurumoh dan banmandum rakan-rakan Haman laju jicalitra peue nyang ka jipeubuet nyan. Óh lheuehnyan lé peurumoh gobnyan dan rakan-rakan gobnyan nyang carông-carông nyan geupeugah ubak Haman, "Droeneueh ka jipeuphon taloe teunaga deungon Mordekhai. Jihnyan ureuëng Yahudi dan droeneueh hana hase talawan jihnyan. Jihnyan pasti teuma jipeutaloe gata."
14 Teungoh awaknyan mantong meututoe deungon Haman, dumna peujabat meuligoe teuka deungon teugisa-gisa keuneuk jak intat Haman ubak khanuri nyang geupeuna lé Ester.


Chapter 7

1 Dan keu nyang keudua goe jih raja dan Haman geumakheun dan geujieb ié meusajan-sajan deungon Ester.
2 Sira geujieb ié, raja geutanyong lom ubak Ester, "Hai, Peureumaisuri ulôn, peue nyang gata lakée? Gata peugah kheueh laju! Pasti ulônbri bahpi nyang gata lakée siteungoh nibak keurajeuen ulôn."
3 Geujaweueb Ratu Ester, "Meunyoe Teungku Amphon neutem, ulôn lakée mangat jeuet ulôn dan bansa ulôn hase udeb.
4 Sabab ulôn dan bansa ulôn ka jipeubloe keuneuk jipeu maté. Seukira jih kamoe jipeubloe keu jicok keunamiet, hainyan ulôn iemdroe dan hana ulôn peukaru Teungku Amphon. Teuma jinoenyoe kamoe jikeuneuk peubinasa dan jipeu habéh trok bak ukeue-ukeue jih!"
5 Dan geutanyong kheueh laju lé Raja Ahasyweros ubak Ratu Ester, "Soe nyang beuhe that jipeubuet lagée nyan? Dan dipat ureuëng nyan?"
6 Geujaweueb lé Ester, "Haman nyang paleng jeuhet nyoe kheueh musoh dan nyang iénanya kamoe!" Deungon teumakot nyang hana teukira Haman laju jingieng u ateueh raja dan Ratu Ester.
7 Raja beungéh lumpah na, laju geubeudôh geutinggai meuja dan laju geuteubiet uluwa, ubak leuen meuligoe. Haman jiteupeue bahwa raja ka geucok keuputosan keuneuk geuhuköm gobnyan, sabab nyan gobnyan teutab tinggai deungon Ratu Ester keu jilakée amphon mangat gobnyan hase geupeuseulamat.
8 Deungon rasa putôh asa Haman laju geupeureubah droe di ateueh kurusi Ratu Ester mangat jilakée amphon, teuma paih bak watéenyan cit teuma raja ka geugisa nibak lam taman meuligoe. Ban geu kalon Haman lagée nyan, laju geupeugah lé Raja, "Peue? Mantong cit jihnyan jijeut peukosa peureumaisuri ulôn, dikeue ulôn dan didalam meuligoe ulôn keudroe?" Dan haba nyan pih habéh geupeugah lé raja, napadub droe peujabat pi jitamong udalam dan laju jipeukulubong ulée Haman.
9 Dan jikheun laju lé Harbona, sidroe lamkawan peujabat nyan, "Teungku Amphon, nibak binéh rumoh Haman na saboh taméh gantungan nyang manyang jih dua ploh dua metée. Atranyan ka lheueh jipeudong lé Haman keuteumpat jigantung Mordekhai, ureuëng nyang ka jipeuseulamat nyawöng Teungku Amphon." Dan geupeurintah laju lé raja, "Jak gantung laju Haman nibak taméh nyan!"
10 Meunan kheueh riwayat Haman habéh teugantung nibak taméh nyang jikeuneuk gantung Mordekhai. Dan óh lheuehnyan reuda kheueh mureuka raja.


Chapter 8

1 Bak uroenyan cit teuma Raja Ahasyweros geubri ubak Ratu Ester banmandum hareuta beunda Haman, musoh nyang paleng raya nibak ureuëng Yahudi nyan. Ester geujak peugah ubak raja bahwa Mordekhai syedara karông jih, dan yoh watée nyan Mordekhai geubri hak keu jijakmeuhadab ubak raja deungon hana teuhôi leubeh ilée.
2 Raja laju geusuit incien gobnyan nyang ban geucok lom nibak Haman geujok laju atranyan ubak Mordekhai. Dan Ester laju geuangkat teuma Mordekhai jeuet keu ureuëng nyang mat kuasa ateueh hareuta beunda Haman.
3 Óh ka lheueh nyan Ratu Ester geujak meuhadab lom ubak Raja. Gobnyan laju geusujut sira geumo dan geumeulakée mangat raja geupeubateue reuncana jeuhet nyang ka jiatoe lé Haman ateueh ureuëng Yahudi.
4 Raja laju geu sunyung tungkat méuh gobnyan ubak Ratu Ester, laju geubeudôh Ester sira geupeugah,
5 "Meunyoe Teungku Amphon neutembri ngon neugaséh keu ulôn, bah kheueh Teungku Amphon neupeuteubiet surat peurintah mangat neucabot lom surat-surat Haman nyang meuasoe peurintah geuyue peubinasa banmandum ureuëng Yahudi nyang na didalam keurajeuen nanggroe nyoe.
6 Pakriban mungken ulôn ngieng bansa dan kawöm syedara ulôn habéh banmandum jipeumaté?"
7 Dan geupeugah laju lé Raja Ahasyweros ubak Ratu Ester dan Mordekhai, "Beutôi, ulôn ka lheueh ulôn gantung Haman sabab jihnyan jikeuneuk peubinasa ureuëng Yahudi, dan hareuta beunda jih ka ulôn jok ubak Ester.
8 Teuma surat nyang ka lheueh jituléh ateueh nan raja meunan cit deungon cab raja, atranyan hana hase teutarek lom teuma. Teuma, gatanyoe ulôn peuidhin tatuléh surat keuhai bansa Yahudi, peue mantong nyang gata ngieng gét. Neutuléh kheueh surat nyan ateueh nan ulôn deungon gatacab deungon cab keurajeuen."
9 Bak uroenyan cit teuma, na kheueh bak tanggai 23 buleuen lhée, buleuen Siwan, Mordekhai laju jitawök banmandum seukeutareh raja dan jipeurintah ubak awaknyan mangat awaknyan jituléh surat keu banmandum gubunur, banmandum bupati dan banmandum ureuëng rayeuk nyang na tinggai di 127 boh propinsi, phon di India sampoe trok u Sudan. Surat-surat nyan teutuléh dalam basa dan tulesan nyang didalam propinsi nyan maséng-maséng. Meunan cit gobnyan geukirém teuma surat nyan ubak ureuëng Yahudi dalam basa dan tulésan Yahudi.
10 Surat-surat nyan banmandum geuteken lé Mordekhai ateueh nan Raja Ahasyweros dan geucab deungon cab keurajeuen nanggroe. Dan óh lheuehnyan lé Mordekhai laju geuyue ubak upah-upah keujijak peutrok banmandum surat nyan banmandum propinsi sira jipasang guda nyang bagaih plueng milék raja.
11 Surat nyan asoe jih na kheueh bahwa raja ka geupeu idhin ubak ureuëng Yahudi nyang na di tieb-tieb banda mangat meusajan baho meubaho teubila droe. Meunyoe awaknyan jiseurang lé bansa-bansa nyang na didalam propinsi toih mantong, awaknyan jeuet meulawan jipoh maté ureuëng nyang seurang droe jih meunan cit deungon purumoh dan aneuëk-aneuëk jihnyan; dan meunan cit awaknyan jeuet jisie musoh-musoh jihnyan sampoe habéh banmandum dan hareuta milék ureuëng nyan jeuet jireupah.
12 Peurintah nyan harôh teulaksana bansaboh nanggroe Persia bak uroe nyang ka jipeuteutab lé Haman keu jipoh maté bubena ureuëng-ureuëng Yahudi, bak tanggai lhée blaih buleuen dua blaih, buleuen Adar.
13 Surat peurintah nyan harôh teupeuteubiet sibagoe undang-undang dan teupeumaklum ubak mandum ureuëng nyang na di tieb-tieb propinsi mangat bansa Yahudi siab siaga jilawan musoh jihnyan meunyoe uroe nyang ka teupeuteuntée nyan ka trok.
14 Dan jijak kheueh laju bubena ureuëng upah nyan deungon jipasang ateueh rueng guda raja. Meunan cit di Susan ma banda nanggroe surat peurintah nyan teubaca.
15 Óh lheuehnyan Mordekhai geutinggai laju meuligoe sira geungui peukayan uléebalang nyang meuwareuna ijo dan putéh, jubah ungu nyang teupeugét nibak ija lineun nyang halôh dan mahkota méuh nyang lumpah lagak. Banda Susan jisumurak geumbira sabab harok that.
16 Di ureuëng Yahudi ka meurasa seunang ngon geumbira, bahgia dan bangga.
17 Meunan cit ditieb-tieb banda dan propinsi, dipat mantong surat peurintah raja nyan teupeumaklum, ureuëng-ureuëng Yahudi lumpah geumbira ngon harok that-that sira jipeugot khanuri sibagoe ucapan syukoe. Dan le that nibak peunduduek nyang jeuet keuwareuga bansa Yahudi, sabab awaknyan jitakot keu bansa nyan.


Chapter 9

1 Akhé jih trok kheueh ubak tanggai lhée blaih buleuen Adar, nyan uroe nyang ka teupeuteuntée keuteupeubuet peurintah raja ateueh ureuëng-ureuëng Yahudi. Uroe nyan ka jipreh-preh lé musoh-musoh bansa Yahudi jikeuneuk kuasa ateueh bansa nyan. Teuma teunyata ureuëng Yahudi kheueh nyang peutaloe awaknyan.
2 Nibak tieb-tieb banda, ureuëng-ureuëng Yahudi jimeusapat dan geumeusaho keujilawan ureuëng nyang kana niet hana gét ateueh awaknyan. Dan deungon na peulawanan nibak ureuëng Yahudi nyan, teuma bansa-bansa dipat mantong na tinggai ka teuka yoe ngon teumakot nyang hana daya keu ureuëng Yahudi nyan sampoe hana meusidroe pih nyang jijeuet jilawan ureuëng Yahudi nyan.
3 Malah, banmandum ureuëng-ureuëng rayeuk nyang na di tieb-tieb propinsi, dumna gubunur, bupati dan peujabat nanggroe geusukong keu ureuëng Yahudi nyang teungoh jibri peulawanan nyan sabab awaknyan banmandum jitakot keu Mordekhai.
4 Bansaboh keurajeuen nanggroe dirakyatba jiteupeue bahwa Mordekhai nyan lumpah that meupeungaroih di dalam meuligoe dan treb bak treb seumakén meukuasa.
5 Meunan kheueh jeuet jih, bansa Yahudi ka hase jipeusaneut peue mantong ateueh musoh jihnyan, musoh jihnyan jiprang deungon peudeueng dan laju jipoh maté. 6 Di Susan, ma nanggroe keurajeuen, ureuëng Yahudi ka jipoh maté musoh jih na 500 droe.
7 Lamkawan nyan na siploh droe aneuëk agam Haman aneuëk Hamedata, musoh nyang paleng rayeuk nibak ureuëng Yahudi. Awaknyan na kheueh: Parsandata, Dalfon, Aspata, Porata, Adalya, Aridata, Parmasta, Arisai, Aridai dan Waizata. Teuma ureuëng Yahudi hana jireupah hareuta awaknyan.
11 Bak uroenyan cit teuma na ureuëng jijak meulapor ubak raja jipeugah keuhai sijeumeulah ureuëng nyang ka maté keunong poh di Susan.
12 Geupeugah lé Baginda ubak Ratu Ester, "Di Susan mantong jai that ureuëng Yahudi ka jipoh maté na 500 droe musoh, jitamong cit lamkawannyan ban siploh droe aneuëk-aneuëk Haman. Peue teuklom nyang na di propinsi-propinsi nyang laén! Aleh peue nyang jipeubuet lé awaknyan disideh! Lé sababnyan, peue lom nyang gata lakée nibak saát nyoe? Neupeugah laju, nyang gata lakée nyan pasti gata teumé!"
13 Geujaweueb lé Ester lagée nyoe, "Meunyoe Teungku Amphon neutem bri, bah kheueh ureuëng-ureuëng Yahudi nyang na tinggai teutab di Susan nyoe singoh beungoh neubri idhin lom jipeubuet lagée nyang ka jipeubuet nibak uroe nyoe. Lom teuma, manyét aneuëk-aneuëk Haman nyan teugantung ateueh taméh-taméh gantungan."
14 Dan di raja pih laju geupeutreun peurintah lagée nyang ka geulakée lé Ester; surat peurintah keu banda Susan laju geupeuteubiet dan manyét-manyét aneuëk Haman nyang siploh droe nyan laju jigantung.
15 Teuma, bak tanggai peuet blaih buleuen Adar, ureuëng-ureuëng Yahudi nyang na di Susan laju jimeusapat lom dan laju jipoh maté na 300 droe teuk di banda Susan nyan. Meunan cit goenyoe awaknyan hana cit jireupah hareuta beunda musoh.
16 Meunan cit deungon ureuëng-ureuëng Yahudi nyang na tinggai di propinsi-propinsi nyang laén diawaknyan pi ka meusapat sira jibila droe. Awak Yahudi nyan laju jipeutaloe musoh jihnyan dan na jipoh maté 75.000 droe nyang jibanci keu awaknyan. Meunan cit awaknyan hana jireupah hareuta milék ureuëng nyan.
17 Hainyan teujadi nibak tanggai lhée blaih buleuen Adar. Uroe nyang óh lheuehnyan teuma, bak tanggai peuet blaih, awaknyan hana jipoh maté meusidroe ureuëng pi, teuma jipeuraya uroe nyan deungon peunoh geumbira.
18 Teuma lé ureuëng-ureuëng Yahudi nyang na tinggai di banda Susan awaknyan jipeuraya uroe nyan na kheueh nibak tanggai limong blaih sibagoe uroe rayeuk, sabab awaknyan ka jipoh maté musoh tanggai lhée blaih dan peuet blaih, laju jipiôh bak tanggai limong blaih.
19 Nyan kheueh sabab jih ureuëng Yahudi nyang na tinggai di banda-banda nyang ubit jipeuingat tanggai peuet blaih buleuen Adar sibagoe uroe raya nyang peunoh geumbira, uroe jipeuna khanuri nyang lumpah geumbira sira saleng jibri hadiah nyang na hubongan ngon peunajoh.
20 Óh lheueh nyan lé Mordekhai laju geucetet banmandum keujadian nyan, dan geukirém laju surat ubak dumna ureuëng Yahudi nyang na tinggai bansaboh keurajeuen Persia, bah kheueh nyang jiôh, meunan cit nyang rab.
21 Asoe surat nyan na kheueh peurintah mangat teupeuraya tanggai peuet blaih dan limong blaih buleuen Adar tieb-tieb thon.
22 Sabab bak uroe-uroe nyang lagée nyan kheueh awaknyan jipeutaloe bubena musoh-musohjih, deungon nyan teuma keuhai peudeh ngon keupeudehan nyang lumpah that phet nyang rab jirasa meu-ubah jeuet keugeumbiraan dan keubahgiaan. Lé sabab nyan, awaknyan harôh jipeuraya uroe-uroe nyang lagée nyan khanuri dan peujamé ureuëng laén meunan cit saleng jibri peunajoh dan jijok seudeukah keu ureuëng gasien.
23 Ureuëng Yahudi jitaát banmandum peue nyang geupeurintah lé Mordekhai nyan dan meunan kheueh sabe sampoe peurayaan nyan ka jeuet keu adat nyang jipeuingat tieb-tieb thon.
24 Haman aneuëk Hamedata, keuturonan Agag, musoh nyang paleng rayeuk nibak ureuëng Yahudi, ka lheueh jitiek undi nyang teuboh deungon nan "Purim" guna jih na kheueh keu teupeuteutab uroe nyang jroh keu teupeuhabéh nyawöng ureuëng Yahudi; jihnyan ka lheueh jireuncana keu jipeu habéh bubena awaknyan.
25 Teuma Ester laju geujak meuhadab ubak raja, dan raja laju geubri peurintah nyang teutuléh nyang akhé jih banmandum reuncana jeuhet nyang ka jisuson lé Haman meubalaih u ateueh gobnyan keudroe, sampoe jihnyan dan aneuëk-aneuëk jihnyan teugantung nibak taméh geunantung.
26 Sabab nyan kheueh uroe-uroe raya nyan geuboh nan Purim. Surat Mordekhai dan peue mantong nyang ka ji álami lé ureuëng Yahudi,
27 meuakibat jih awaknyan jipeugöt peuratoran keu awaknyan keudroe, keu keuturonan awaknyan dan keu banmandum ureuëng nyang teuma jeuet keuwareuga bansa Yahudi. Meunurot peuratoran nyan awaknyan tieb-tieb thon wajéb jipeuraya ban dua uroe nyang ka geupeuteutab lé Mordekhai.
28 Meunan cit geupeuteutab lom bahwa keu siumu masa uroe-uroe Purim nyan harôh ji-ingat dan jipeuraya lé tieb-tieb keuluwarga ureuëng Yahudi nibak meubagoe angkatan di tieb-tieb propinsi dan tieb-tieb banda.
29 Disampeng nibaknyan, meusigoe deungon surat Mordekhai nyan; Ratu Ester aneuëk Abihail geutuléh teuma surat nyang keudua, nyang asoe jih teupeukong surat Mordekhai keuhai Purim nyan.
30 Surat nyan geukirém keu banmandum ureuëng Yahudi, dan seunalen nibak surat-surat nyan geukirém teuma ubak ban 127 boh propinsi nyang na didalam keurajeuen Persia nyang luwah nyan. Surat nyan geuiréng teuma deungon doá mangat jeuet bansa Yahudi sabe lam seujahtra dan mubahgia.
31 Meunan cit dalam surat nyan na teuma teuyue ubak ureuëng Yahudi mangat awaknyan dan keuturonan awaknyan sabe jipeuingat uroe-uroe Purim bak watée nyang teupat, lagée awaknyan nyang ka jipeuna uroe puasa dan uroe meukabong. Nyan kheueh asoe surat Mordekhai dan Ratu Ester.
32 Peurintah Ratu Ester nyang asoe jih keuhai peuratoran-peuratoran Purim, nyan na teucetet didalam kitab.


Chapter 10

1 Raja Ahasyweros laju geupeuna keureuja paksa, bukon keu rakyat nyang na tinggai di daerah-daerah nyang nibak panté binéh laôt keurajeuen gobnyan mantong, teuma keunong cit ubak daerah-daerah nyang na tinggai di gampông-gampông ngon nyang na tinggai di tunong.
2 Banmandum buet-buet nyang rayeuk ngon hibat-hibat, dan meunan cit kisah nyang leungkab pakriban gobnyan geuangkat Mordekhai jeuet keupeujabat manyang lam keurajeuen nanggroe, nyan na teucetet didalam kitab seujarah raja-raja Persia dan Media.
3 Mordekhai, ureuëng Yahudi nyan teutab geuduek nibak jabatan nyang paleng manyang dimiyueb Raja Ahasyweros keudroe. Mordekhai jihoreumat dan jigalak lé ureuëng-ureuëng seubansa gobnyan. Gobnyan geumeujuang keu keuseulamatan dan geuseujahteraan bansa gobnyan dan banmandum keuturonan awaknyan.