Chapter 1

1 Mubahgia kheueh ureuëng nyang hana jiseutôt naseuhat ureuëng jeuhet, hana jicuntoh ureuëng meudesya dan hana jimeungon ngon ureuëng nyang jihina Allah,
2 teuma nyang galak jipeubuet peurintah TUHAN dan jizike atranyan uroe ngon malam.
3 Ureuëng nyang lagée nyan meuhase peue mantong nyang jipeubuet; ureuëng nyan lagée bak kayée nyang timoh nibak binéh krueng nyang jimuboh óh trok bak musém dan hántom na layée bubena ôn jih.
4 Tema, laén hai ngon ureuëng jeuhet: ureuëng nyan lagée sikéum nyang jipupot lé angén.
5 Ureuëng jeuhet geuhuköm lé Po teu Allah, hakém jihnyan dan geupeu aséng nibak umat gobnyan.
6 Sabab ureuëng nyang taát sabe geubimbéng dan geulindong lé TUHAN, teuma ureuëng nyang jeuhet jijak ubak keubinasaan.


Chapter 2

1 Pakon bansa-bansa didonya nyoe jipeubuet huru-hara dan sukée-sukée bansa jireuncana nyang hana meuguna?
2 Raja-raja donya beudôh sireuntak dan dumna ureuëng mat kuasa jimufakat jilawan TUHAN dan raja piléhan Gobnyan.
3 Peunguasa-peunguasa nyan jipeugah, "Jak tajak peupatah keukuasaan awaknyan dan ta reubot keumeurdehkaan geutanyoe!"
4 Nibak takhta TUHAN di syeuruga TUHAN geukém dan geu hina reuncana awaknyan.
5 Laju awaknyan geudhot deungon that beungéh, dan geupeukeujot teuma deungon meureuka Gobnyan.
6 Kheun Gobnyan, "Di Sion bukét Ulôn nyang suci ka Ulôn lantek raja nyang Ulôn piléh."
7 Kheun raja, "Ulôn keuneuk peumaklum peue nyang ka geupeuteutab lé TUHAN. Geupeugah lé Gobnyan ubak ulôn, 'Gata aneuëk agam Lôn, nibak uroenyoe Ulôn jeuet keu Bapak gata.
8 Lakée kheueh, teuma banmandum bansa Ulôn bri keu gata, dan bansaboh bumoe Ulôn peujeuet milék gata.
9 Awaknyan teuma gata wiet deungon tungkat beuso dan gata peubeukah lagée beulangong tanoh.' "
10 Lé sababnyan gata ngieng kheueh hai raja-raja, tapike kheueh nyan, hai peunguasa-peunguasa donya!
11 Meubakti kheueh ubak TUHAN deungon takeuwa,
12 sujut kheueh dikeue Gobnyan deungon yo nyang hana teukira, bék sampoe TUHAN jeuet keu beungéh dan gata geupeubinasa lam sikreb mata, sabab beungéh Gobnyan hu lagée apui deungon hana teusangka-sangka. Mubahgia kheueh ureuëng nyang jimeulindong ubak TUHAN!


Chapter 3

1 Zabur Nabi Daud, bak watée gobnyan geuplueng nibak Absalom, aneuëk gobnyan.
2 Ya TUHAN, keubit that le musoh ulôn, lumpah that le nyang prang ulôn!
3 Le that ureuëng nyang peugah bahwa Allah hana geutem tulông ulôn.
4 Teuma Droeneueh, ya TUHAN, na kheueh peurisai nyang lindong ulôn. Droeneueh bri keu lôn meunang, dan Droeneueh peurayeuk até ulôn.
5 Ulôn meulakée ubak TUHAN; nibak bukét Gobnyan nyang suci Gobnyan geujaweueb ulôn.
6 Ulôn teu-éh dan teungéut deungon teuntram, dan lôn beudôh lom, sabab TUHAN geutumpang ulôn.
7 Ulôn hana teumakot ubak meuribée droe lawan nyang jikeupong ulôn nibak meubagoe jurusan.
8 Neupeuseulamat kheueh ulôn, ya TUHAN Allah ulôn, neuhuköm kheueh dan neupeulapée kheueh banmandum lawan ulôn.
9 Nibak Droeneueh teuka sinulông, ya TUHAN, neutem kheueh bri beureukat u ateueh umat Droeneueh.


Chapter 4

1 Keu teupimpén kor. Deungon alat meu-én keucapi, Zabur Nabi Daud.
2 Ya Allah, Droeneueh kheueh nyang bila ulôn; neujaweueb kheueh meunyoe ulôn meuhôi. Bak watée ulôn susah, Droeneueh neutulông ulôn; jinoenyoe neugaséh kheueh ulôn dan deungoe kheueh doá ulôn.
3 Hai bubena manusia, padubna treb teuk gata tahina Allah ulôn? Trok án pajan gata tacinta nyang sia-sia dan tatiyeub nyang hana beuna?
4 Beutateupeue kheueh, TUHAN ka geupiléh keudroe Gobnyan sidroe ureuëng nyang geugaséh. TUHAN geudeungoe meunyoe ulôn meulakée ubak Gobnyan.
5 Yo meutôt-tôt sabab teumakot dan bék kheueh meudesya le. Gata pike-pike kheueh watée gata duek teumanung, dan watée ta-éh ateueh teumpat éh gata.
6 Gata peuseumah kheueh keureubeuen nyang beutôi dan tapeucaya kheueh ubak TUHAN.
7 Jai that-that ureuëng jiteumanyong, "Soe kheueh nyang bri beureukat keu geutanyoe?" Seumoga Droeneueh meukeunong nibak kamoe, ya TUHAN.
8 Droeneueh neupeujeuet até ulôn leubeh geumbira nibak ureuëng nyang meulimpah hase meugo jih.
9 Dan ulôn pi teu-éh dan teungéut deungon teuntram, sabab Droeneueh, ya TUHAN, neupeujeuet udeb ulôn nyoe aman!


Chapter 5

1 Keu teupimpén kor. Deungon alat peumeuén suleng. Zabur Nabi Daud.
2 Ya TUHAN, neudeungoe kheueh tutoe haba ulôn, neupeurati kheueh apoh apah ulôn.
3 Neudeungoe kheueh meulakée ulôn dan tulông kheueh ulôn, ya Raja ulôn dan Allah ulôn.
4 Sabab ubak Droeneueh kheueh ulôn meudoá, ya TUHAN, neudeungoe meulakée ulôn watée beungoh uroe. Ban beungoh ka ulôn ba peuseumahan ulôn dan ulôn preh TUHAN neujaweueb ulôn, ya TUHAN lôn.
5 Droeneueh kheueh ya Allah nyang hana galak ubak keujeuhetan; ureuëng jeuhet hana jeuet jimeurumpok ngon Droeneueh.
6 Droeneueh hana galak neungieng ureuëng nyang cungkak, Droeneueh banci keu ureuëng nyang peubuet jeuhet.
7 TUHAN peuhabéh dumna ureuëng nyang galak jipeugah haba nyang sulet, ureuëng nyang seumeungeut dan ureuëng nyang buet jih tukang poh maté ureuëng laén TUHAN pandang miyueb.
8 Teuma sabab lé gaséh TUHAN nyang rayeuk, ulôn hase lôn tamong u dalam Baét Droeneueh. Ulôn sujut u arah Baét Droeneueh nyang suci, dan ulôn seumah Droeneueh deungon khidmat.
9 Ya TUHAN, lumpah that le musoh ulôn! Neubimbéng kheueh ulôn mangat jeuet lôn peubuet keuheundak Droeneueh, dan neutunyok kheueh rot Droeneueh nyang harôh ulôn jak.
10 Sabab tutoe haba musoh ulôn hana jeuet teupeucaya; lam até awaknyan ka peunoh deungon reuncana jeuhet. Tutoe haba awaknyan maméh bantumpo lom lumpah maméh, teuma lam baten awaknyan ka peunoh deungon nyang brôk.
11 Huköm kheueh awaknyan, ya Allah, bah kheueh awaknyan binasa sabab reuncana droejih keudroe. Neu use kheueh awaknyan sabab desya jih nyang ka lumpah le, sabab awaknyan ka jibeurontak ubak Droeneueh.
12 Seumoga banmandum ureuëng nyang jimeulindong ubak Droeneueh meugeumbira dan meusuka ria siumu masa. Neulindong kheueh ya TUHAN ureuëng-ureuëng nyang jicinta Droeneueh, mangat awaknyan meusuka cita sabab Droeneueh.
13 Sabab TUHAN neubri beureukat keu ureuëng nyang seutia ubak Droeneueh, Droeneueh neulindong awaknyan deungon gaséh Droeneueh.


Chapter 6

1 Keu peumimpén kor. Deungon meuneuén keucapi. Meunurot lagu nyang keulapan. Zabur Nabi Daud.
2 TUHAN, bék kheueh neuheuntam ulôn lam beungéh Droeneueh. Bék neuhuköm ulôn lam apoh apah Droeneueh.
3 Neugaséh kheueh ulôn ya TUHAN, sabab ulôn ka habéh teunaga, peukong kheueh ulôn sabab ulôn apoh apah.
4 Até ulôn bingöng lumpah na; trok án pajan Droeneueh tinggai ulôn, ya TUHAN?
5 Neuriwang kheueh, TUHAN, dan peutuwoe kheueh ulôn, peuseulamat kheueh ulôn lé sabab geunaséh Droeneueh.
6 Sabab lam mawöt Droeneueh hana jiingat lé; hana nyang pujoe Droeneueh lam donya ureuëng maté.
7 Ulôn hék ngon leumoh sabab aloh alah; tieb-tieb malam ié mata lôn ji-ile sampoe basah teumpat éh lôn.
8 Mata ulôn rabon lé sabab seudeh, dan suram lé sabab musoh-musoh lôn.
9 Weéh kheueh, he ureuëng-ureuëng jeuhet, sabab TUHAN ka geudeungoe mo ba-e lôn.
10 TUHAN geudeungoe meulakée ulôn dan geuteurimong doá ulôn.
11 Mandum musoh teuma teukeujot dan malée dan laju jisurot ngon teuseungéh-seungéh.


Chapter 7

1 Nabi Daud geumoe ba-e, nyang geupeunyanyoe keu TUHAN sabab lé Kus, ureuëng Benyamin nyan.
2 Ya TUHAN Allah ulôn, ulôn meulindong ubak Droeneueh; neupeuseulamat dan neupeulheueh kheueh ulôn nibak banmandum ureuëng nyang jitiyeub ulôn.
3 Bék neupeubiyeu awaknyan lagée singa juah jiteugom ngon jitarek ulôn dan hana nyang tulông ulôn.
4 TUHAN, Allah ulôn, meunyoe na lôn peubuet ilat, lôn peubuet nyang jeuhet ateueh rakan, atawa lôn peurugoe lawan deungon hana alasan, meunyoe na ulôn peubuet nyang lagée nyan,
6 bah kheueh lôn jipeulet dan jidrob lé musoh, laju jipoh maté dan manyét ulôn jitinggai teutiek meunan mantong di ateueh tanoh.
7 Beudôh kheueh TUHAN teungoh neubeungéh, ya TUHAN, neulawan kheueh musoh ulôn nyang teungoh jilab nyan. Neubeudôh kheueh neujak tulông ulôn, sabab Droeneueh neulakée keuadelan.
8 Neupeusapat kheueh bansa-bansa nyang na sikeulileng Droeneueh, dan meukuasa kheueh ateueh awaknyan nibak takhta Droeneueh di syeuruga.
9 Droeneueh neuhakém umat manusia; neubri kheueh keu ulôn keuadelan, ya TUHAN, sabab ulôn nyoe hana salah.
10 Neupeupiôh kheueh buet nyang jeuhet nyang jipeubuet lé ureuëng doraka dan peuseulamat kheueh iman ureuëng nyang jroh, sabab Droeneueh Allah nyang ade, nyang hase neuseunom u dalam até dan pikeran manusia.
11 Nyang lindong ulôn na kheueh Allah nyang peuseulamat ureuëng nyang jujoe até.
12 Allah na kheueh hakém nyang paleng ade, nyang tieb-tieb saát geuhuköm ureuëng jeuhet.
13 Meunyoe pi-e awaknyan hana meu-ubah, geuhnyan ka siab deungon sinjata nyang hase jipeumaté. Laju Gobnyan geuasah peudeueng dan geureuntang laju deungon busur, laju geutimbak panah-panah nyang meu apui.
15 Ngieng kheueh, ureuëng jeuhet jireuncana keuneuk peubuet nyang jeuhet; jihnyan jiatoe reuncana nyang jeuhet dan buet teumipée.
16 Ureuëng nyang kueh uruek keu ureuëng laén, teuma akhé jih ureuëng nyan keudroe nyang rhot u dalam uruek nyan.
17 Lé sababnyan, ureuëng nyan geuhuköm deungon buet nyang jeuhet nyang jipeubuet keudroe jih, dan jiseksa lé buet jeuhet droe jih keudroe.
18 Ulôn meusyukoe ubak TUHAN sabab Gobnyan ade, ulôn meuca-e ngon meunyanyoe teupujo ubak TUHAN, Nyang Mahamanyang.


Chapter 8

1 Keu teupimpén kor. Meunurot lagu Gitit. Zabur Nabi Daud.
2 Ya TUHAN, Allah kamoe, kuasa Droeneueh meusyeuhu bansaboh bumoe! Keuagongan Droeneueh trok u langét
3 jipeuca-e lé aneuëk-aneuëk miet dan aneuëk manyak. Peumeurintahan Droeneueh teugoh hana ék so nyang yok-yok keu teupeuseungab musoh atawa lawan.
4 Watée lôn pandang langét nyan Droeneueh cebta, buleuen ngon bintang nyang Droeneueh pasang,
5 peu kheueh manusia nyan, sampoe Droeneueh peuingat, soe jihnyan, sampoe Droeneueh peulara?
6 Teuma, TUHAN beuôt jihnyan rab santeut deungon Allah, Droeneueh bri mahkota nibak jihnyan peunoh deungon keuagongan dan keuhoreumatan.
7 Droeneueh bri kuasa nibak jih nyan ateueh alam raya nyoe, banmandum nyang Droeneueh cebta neupeutundok keu jih nyan:
8 bubiri, leumô dan banmandum beulatang peulara nyang teupeulara, meunan cit deungon beulatang kleuet nyang lheueh di padang beulantara;
9 cicém-cicém dan uengkot-uengkot, banmandum makhluk nyang na udeb di dalam laôt.
10 Ya TUHAN, TUHAN kamoe, keuagongan Droeneueh meugah meusyeuhu bansaboh bumoe!


Chapter 9

1 Keu teupimpén kor. Meunurot lagu Mut-Laben. Zabur Nabi Daud.
2 Deungon sipeunoh até ulôn keuneuk peugah ucapan syukoe ubak Droeneueh, ya TUHAN, dan ulôn peusampoe karya Droeneueh nyang lumpah meugah nyoe.
3 Ulôn keuneuk meuseunang-seunang dan meusukaria kareuna Droeneueh, dan teupujo nan Droeneueh, TUHAN Nyang Mahamanyang.
4 Dikeue Droeneueh musoh ulôn laju jiriwang dan jipeuplueng droe; dan laju awaknyan reubah meugantoh dan maté laju diteumpat nyan.
5 Sabab Droeneueh neupeurintah sibagoe hakém nyang ade; TUHAN ka neubila peukara ulôn.
6 Droeneueh ka neuhuköm bansa-bansa dan neupeubinasa bubena ureuëng jeuhet; awaknyan laju teupeutuwoe keu siumu masa.
7 Musoh kamoe ka habéh jipoh ngon jipeubinasa, banda-banda awaknyan TUHAN peuhanco; hanale ureuëng nyang ji ingat keu banda nyan.
8 TUHAN geupeurintah keu siumu masa; Gobnyan geupeudong takhta Geuh keu geuhakém donya.
9 Gobnyan geupeurintah ubak bansa-bansa deungon peunoh keuadelan, dan geupeuhakém awaknyan deungon cara jujoe.
10 TUHAN nyan teumpat meupayong keu ureuëng nyang keunong tindéeh, dan teumpat meulindong óh trok watée keusosahan.
11 Ureuëng nyang jituri Droeneueh, jimeuharab ubak Droeneueh ya, TUHAN, ureuëng nyang jiseumah Droeneueh hana neupeubiyeu meunan mantong.
12 Pujoe kheueh TUHAN nyang mat peurintah di Sion! Neucalitra kheueh buet-buet Gobnyan ubak bansa-bansa!
13 Sabab Gobnyan geu ingat keu ureuëng nyang meudeurita dan hana geutuwo keuhai jiklik awaknyan; ureuëng nyang jipeubuet jeuhet laju geuhuköm.
14 Ngieng kheueh, musoh jipeuseungsara ulôn; neugaséh kheueh ulôn, ya TUHAN, neupeusie kheueh ulôn nibak beuncana mawöt,
15 mangat ulôn kupujo Droeneueh dikeue peunduduek Yerusalem. Ulôn teuma meusurak geumbira sabab Droeneueh neupeuseulamat ulôn.
16 Bansa-bansa nyang hana jituri Droeneueh ureuëng nyan rhot u dalam uruek nyang jikueh keudroe; awaknyan meucarueh nibak taron droejih keudroe.
17 TUHAN ka geupeugah droe Gobnyan sabab keuputosan Gobnyan ade. Ureuëng jeuhet sisat lé sabab buet nyang jipeubuet keudroe.
18 Mawöt na kheueh keuneuleuh nibak udeb ureuëng-ureuëng jeuhet, bansa-bansa nyang hana jipakoe ubak Po teu Allah.
19 Hana siumu masa ureuëng gasien geupeutuwo; kon teuma siumu masa ureuëng seungsara hana harapan.
20 Beudôh kheueh, TUHAN, neupeuhakém kheueh bansa-bansa, bék neupeubiyeu manusia jipeusombong droe jih keudroe.
21 Bah kheueh awaknyan jiteuka teumakot, ya TUHAN, dan jisadar bahwa droe jih nyan na kheueh manusia.


Chapter 10

1 Pakon Droeneueh jiôh, ya TUHAN dan neumusöm watée kamoe ka teuseupét?
2 Deungon sombong ureuëng jeuhet jitindéeh ureuëng gasien; bah kheueh awaknyan meucarueh lé taron jih keudroe.
3 Ureuëng jeuhet jipeugöt keuhai keuheundak jih nyang jeuhet, ureuëng seurakah jikutok dan jitolak TUHAN.
4 Ureuëng meudesya hana jipakoe ubak TUHAN, kareuna sombong jih laju jipike bahwa Allah nyan hana.
5 Ureuëng jeuhet meuhase peue-peue mantong nyang jiuseuha; jihnyan hana jituri ubak huköm TUHAN dan jipeureumeh banmandum lawan-lawan jih.
6 Jipeugah lam até jih, "Ulôn hana gagal, dan tron meutron lagée ureuëng nyang hana udeb lam jeuhet."
7 Jihnyan hana jipiôh jimeurapa, jiancam dan jiteumipée, tutoe haba jih peunoh deungon banci dan keujahatan.
8 Jihnyan jimusöm di gampông-gampông jikeuneuk jakpoh ureuëng nyang hana meusalah. Lagée singa jihnyan jimeuluem dilikot tamah jiluem jimata-mata ureuëng nyang hana meudaya. Jipagab ureuëng gasien diteumpat nyang seungue, laju jiruengköm dan jibahue sira jiba.
10 Laju jiteukui, ka siab keuneuk jiruengköm; laju jiseumpom ureuëng deungon cara keukeurasan.
11 Jipike, "Po teu Allah ka tuwoe dan hana geupakoe le; keu seulanjut jih Gobnyan hana geungieng ulôn!"
12 Beudôh kheueh, hai TUHAN, neuhuköm kheueh ureuëng jeuhet! Neu ingat kheueh ubak ureuëng nyang teutindéeh!
13 Pakon ureuëng jeuhet hana jipiôh jihina Allah dan jipike bahwa Allah hana teuma geuhuköm gobnyan?
14 Teuma Droeneueh nyata deuh neukalon; neungieng keuseungsaraan dan keusosahan, dan sabe lam keuadaan siab keu neutulông. Ureuëng nyang hana meudaya jiseurah droe jih ubak Droeneueh, Droeneueh sabe neutulông keu ureuëng gasien.
15 Neu wiet bupatah kheueh keukuasaan ureuëng jeuhet dan doraka; neuhuköm kheueh awaknyan sabab buet nyang jipeubuet sampoe jihnyan jeura.
16 TUHAN geumat peurintah siumu masa; bansa-bansa nyang hana jituri ubak Gobnyan teuma geusampôh di ateueh tanoh Geuh.
17 TUHAN, Droeneueh neudeungoe doá ureuëng hina dan neupeukong até ureuëng nyan.
18 Aneuëk yatem dan ureuëng nyang teutindéeh Droeneueh bila peukara jih, mangat hana ureuëng nyang jijeuet peutakot awaknyan.


Chapter 11

1 Keu teupimpén kor. Zabur Nabi Daud.
2 Sabab ureuëng jeuhet jireuntang busur laju jipasoe aneuk panah jih mangat jitimbak rot lam seupôt ateueh ureuëng nyang jujoe.
3 Meunyoe tata teureuteb masyarakat nyang hana teu atoe, ureuëng nyang jroh-jroh pih hana meudaya."
4 TUHAN na di Baét Gobnyan nyang suci, takhta Gobnyan na di dalam syeuruga. Gobnyan geungieng umat manusia dan geuteupeue mandum peue nyang jipeubuet lé awaknyan.
5 TUHAN geu ujoe ureuëng nyang gét dan ureuëng jeuhet, dan Gobnyan geubanci keu ureuëng nyang galak keu buet nyang jeuhet.
6 Ureuëng jeuhet geuhuköm deungon mala peutaka, deungon apui, beulerang dan angén nyang hase jipeuhangôh peue nyang na.
7 Sabab TUHAN nyan na kheueh jroh dan ade, Gobnyan geugaséh keu ureuëng nyang jipeubuet nyang gét; ureuëng jujoe teuma jikalon dan jituri TUHAN.


Chapter 12

1 Keu teupimpén kor. Meunurot lagée nyang keu lapan. Zabur Nabi Daud.
2 Tulông kheueh kamoe, ya TUHAN, sabab ka hanale ureuëng nyang jroh, ureuëng nyang seutia ubak Droneueh ka leunyab.
3 Awaknyan banmandum saléng jeuet keu ureuëng beuhak, saléng jiteumipée deungon tutoe haba nyang maméh.
4 Neupeupiôh kheueh tutoe haba nyang meurayu nyan, ya TUHAN, neudô kheueh babah ureuëng-ureuëng nyang raya haba,
5 nyang jipeugah, "Kamoe meukuasa deungon lidah kamoe! Peue mantong jeuet kamoe kheun, dan hana soe ureuëng nyang bisa jitham kamoe!"
6 Geupeugah lé TUHAN,"Ureuëng gasien geutindéeh dan ureuëng seungsara apoh apah. Maka bak saátnyoe cit teuma Ulôn teuka jakbri keuteuntraman nyang awaknyan rindu."
7 Janji TUHAN nyan khong ngon kukôn dan bisa teupeu tanggong jaweueb, lagée pirak nyang murni nyang bisa teu ujoe didalam apui.
8 Ureuëng jeuhet na lheueh meuwôt-wôt keudeuh keunoe han meuho saho, keujahatan jipujoe lé tieb-tieb ureuëng. Teutapi Droeneueh neulindong kamoe, ya TUHAN, neujaga kheueh kamoe nibak ureuëng-ureuëng jeuhet nyan.


Chapter 13

1 Keu teupimpém kor. Zabur Nabi Daud.
2 Sampoe án pajan Droeneueh tuwoe keu ulôn, ya TUHAN? Dan sampoe án pajan teuma Droneueh neusöm droe nibak ulôn?
3 Sampoe án pajan ulôn ku tanggong susah, dan até jih peudeh sipanyang uroe? Sampoe án pajan teuma ulôn nyoe jikuasa lé musoh?
4 Neungieng kheueh u ateueh ulôn, ya TUHAN Allah ulôn, neujaweueb kheueh doá ulôn. Neupeupuléh kheueh teunaga ulôn, dan bék kheueh neupeubiyeu ulôn nyoe maté.
5 Bék kheueh neupeubiyeu musoh ulôn jipeugah bahwa awaknyan ka jipeutaloe ulôn. Bék neupeubiyeu awaknyan jisurak ulôn.
6 Sabab ulôn nyang lôn peubangga na kheueh geunaséh Droeneueh, lé sabab nyan kheueh ulôn meusukaria sabab Droeneueh neupeuseulamat ulôn. Ulôn keuneuk meuca-e keu TUHAN, sabab Gobnyan ka geupeubuet nyang jroh keu ulôn!


Chapter 14

1 Keu teupimpén kor. Zabur Nabi Daud.
2 Lam syeuruga TUHAN geupandang umat manusia keu geumita ureuëng malém nyang seumah Gobnyan.
3 Teuma banmandum ureuëng ka meunyeuleweng dan beujat, hana meusidroe pih nyang jipeubuet nyang gét.
4 Feureuman TUHAN, "Peu kheueh hana sada di ureuëng-ureuëng jeuhet nyan? Awaknyan udeb ngon cara jireubot umat Ulôn dan hántom na jimeudoá keu Ulôn."
5 Ureuëng jeuhet teuma jiteuka yo ngon teumakot lagée that, sabab Allah geulindong ureuëng nyang taát ubak Gobnyan.
6 Ureuëng jeuhet jikeuneuk tam keu ureuëng gasien, teuma TUHAN jeuet keu peulindong awaknyan.
7 Seumoga di Sion teuka keuseulamatan keu Israel! Dan keuturonan Nabi Yakub meusuka cita meunyoe TUHAN ka geupeupuléh keuadaan umat Gobnyan.


Chapter 15

1 Zabur Nabi Daud.
2 Ureuëng nyang udeb nyang hana meucacat dan jipeubuet nyang jroh-jroh, dan deungon jujoe jipeugah nyang beuna;
3 nyang hana jitem fiteunah sabe keudroe-droe, hana jipeubuet jeuhet keurakan droe, dan hana jipeubrôk-brôk waréh lingka;
4 nyang jianggab hina ureuëng nyang geutulak lé Po teu Allah, teuma geuhoreumat ubak ureuëng nyang taqwa; nyang jipeuteupat janji, bahpi rugoe
5 dan jipeu utang péng deungon hana meubungöng; nyang han jitem teurimong péng sogok keu teupeurugoe ureuëng nyang hana salah.


Chapter 16

1 Zabur Nabi Daud.
2 Ulôn peugah, "Droeneueh kheueh TUHAN ulôn, keubahgiaan ulôn, hana nyang laén nyang leubeh nibak Droeneueh!"
3 Ulôn horeumat ureuëng-ureuëng suci di nanggroe nyoe; nyang ulôn harôk na kheueh tinggai meusajan awaknyan.
4 Bah kheueh ureuëng nyang jiseumah dewa-dewa meutamah-tamah seudeh jih. Ulôn hana lôntem meukeureubeuen keu dewa-dewa, bahpi nan dewa nyan hana lôntem kheun.
5 TUHAN, Droeneueh mantong nyang atra ulôn; Droeneueh neubri mandum nyang ulôn lakée, naseb ulôn na lam jaroe Droeneueh.
6 Lumpah that indah meuneubri Droeneueh keu ulôn, sampoe até ulôn harôk lumpah na!
7 Ulôn pujoe TUHAN nyang bri naseuhat keu ulôn; óh watée malam pi até ulôn jimeututoe ji peurunoe ulôn.
8 Ulôn sabe lam ingat ubak TUHAN; Gobnyan na sabe disampeng ulôn, lé sababnyan ulôn hana gundah.
9 Sababnyan, até ulôn harôk dan jiwa lôn meusurak, dan tuboh ulôn jimeureuhat deungon teuntram.
10 Sabab Droeneueh hana neupeubiyeu ulôn maté; ureuëng nyang neugaséh hana neupeubiyeu binasa.
11 Neutunyok keu ulôn rot nyang teujak ubak udeb; nibak Droeneueh ulôn meuteumé keugeumbiraan nyang meulimpah dan keubahgiaan keu siumu masa.


Chapter 17

1 Doá Nabi Daud.
2 Neu bila kheueh peukara ulôn sabab Droeneueh neuteupeue peue nyang beuna.
3 Meunyoe Droeneueh neu ujoe até ulôn dan neuteuka neujak seulidék ulôn óh watée malam, disinan Droeneueh meurumpok bahwa ulôn na kheueh nyang jujoe tulöih ikhlas; haba ulôn sisuai deungon pikeran ulôn.
4 Ulôn peubuet peue nyang Droeneueh peurintah ubak ulôn dan hana lôn jak rot kreueh nyang rugoe hana meulaba.
5 Ulôn sabe udeb meunurot nyang Droeneueh tunyok dan hana meusimpang nibak Droeneueh.
6 Ulôn meulakée ubak Droeneueh, ya Allah, sabab Droeneueh neujaweueb ulôn; ngieng kheueh ulôn dan neudeungoe kheueh tutoe haba ulôn.
7 Neutunyok kheueh geunaséh Droeneueh nyang luwa biasa nyan sabab Droeneueh peuseulamat ureuëng nyang meulindong nibak Droeneueh, bak binéh Droeneueh awaknyan aman nibak jiseurang lé musoh.
8 Neupeulara kheueh ulôn lagée aneuk mata Droeneueh, neusöm kheueh ulôn di miyueb sayeub Droeneueh
9 nibak jiseurang lé ureuëng jeuhet. Ulôn jikeupong lé musoh nyang jikeuneuk peumaté ulôn.
10 Nibak awaknyan hana jituri peue nyan gaséh sayang dan meunyoe jipeugah haba deungon sombong dan cungkak.
11 Awaknyan jimaju jilawan ulôn dan jijak paran ulôn, jimita keuseumpatan keuneuk jiseumpom ulôn.
12 Awaknyan lagée singa bueh nyang keuneuk ruengkôm mangsa jih, lagée singa muda nyang jilinteung nibak teumpat nyang teusöm.
13 Beudôh kheueh, ya TUHAN, neulawan kheueh musoh ulôn dan neupeutaloe kheueh awaknyan. Neupeuseulamat kheueh ulôn deungon peudeueng Droeneueh nibak jiseurang lé ureuëng jeuhet.
14 Neupeubeubaih kheueh ulôn nibak ureuëng nyang leuha nyang buet jitamon-tamon hareuta donya nyoe. Neuhuköm kheueh awaknyan deungon ázeub seungsara Droeneueh nyang ka Droeneueh keubah keu awaknyan. Meunan cit aneuëk cucoe awaknyan neuhuköm cit teuma.
15 Teuma ulôn-lôn pandang Droeneueh, sabab ulôn hana salah. Bak watée jaga nibak teungéut ulôn, teuka Droeneueh teupeujeuet até ulôn geumbira ria.


Chapter 18

1 Keu teupimpén kor. Zabur Nabi Daud, hamba TUHAN. Geupeuca-e ubak TUHAN watée Nabi Daud teupeuleuh nibak Saul dan nibak musoh-musoh gobnyan.
2 Ulôn cinta ubak Droneueh, ya TUHAN, Droeneueh kheueh teunaga ulôn.
3 TUHAN lagée kuta nyang kukoh teumpat ulôn meulindong. Allah ulôn lagée gunong batée teumpat ulôn meupayong. Lagée peurisai gobnyan geutôb ulôn, dan geujaga ulôn mangat aman hana gob peukaru pajan mantong.
4 Ulôn meulakée ubak TUHAN nyang patot teupujoe, Gobnyan geupeubeubaih ulôn nibak mandum musoh ulôn.
5 Ulôn ka jikeulileng lé bahya mawöt dan jipeunom lam ié raya keubinasaan.
6 Ulôn jikeulileng lé bahya mawöt, jeunieb mawöt kana dikeue ulôn.
7 Lam keuadaan ulôn nyang apoh apah ulôn meulakée ubak TUHAN, ulôn meudumpék ngon su meutaga ubak Allah lôn lakée tulông. Nibak Baét Geuh Gobnyan geudeungoe su ulôn dan geudeungoe peue nyang ulôn lakée.
8 Laju bumoe meuguncang meusu meu krab-krab, gaki-gaki gunong pih meuguncang ngon su nyang meukrab-krab teuma sabab Allah ka beungéh.
9 Jiteubiet asab lam ruhuéng idong Gobnyan, ngéue apui dan apui jiteubiet teuma lam babah Gobnyan.
10 Langét geuplah, laju geutron Gobnyan nibak teumpat nyan deungon awan nyang seupôt dimiyueb gaki Gobnyan.
11 Gobnyan geupoe di ateueh kerub; Gobnyan meulayang di ateueh sayeub angén.
12 Gobnyan geupeusöm droe lam seupôt that-that; awan ngon reudôk nyang teubai jijak keulileng Gobnyan.
13 Kilat dikeue Gobnyan, jiteubiet kheueh awan, ujeuen éeh dan apui.
14 Laju TUHAN lagée geulanteue di angkasa; Nyang Mahamanyang geupeudeungoe su droe Gobnyan.
15 Gobnyan laju geutimbak dumna aneuk-aneuk panah Geuh dan geupeu crebre musoh; geusama kilat meu ulang-ulang, lé sabab nyan sampoe awaknyan jipeuplueng droe.
16 Tanoh lam laôt jibeudôh meubura dan gaki bumoe pih teubuka watée TUHAN geudot musoh Gobnyan deungon meureuka.
17 Di ateueh TUHAN geu sunyueng jaroe Geuh; laju geumat ulôn dan geutarek lam tuwie ié nyang lhok.
18 Gobnyan geupeuseulamat ulôn nibak musoh nyang peukasa dan nibak ureuëng-ureuëng nyang jibanci ulôn, sabab awaknyan lumpah that teuga nibak ulôn.
19 Awaknyan jiseurang ulôn watée ulôn jitimpa lé beuncana, teuma TUHAN jeuet keu nyang tulông ulôn.
20 Gobnyan geupeubeubaih ulôn nibak bala bahya dan geupeuseulamat ulôn sabab Gobnyan geugaséh keu ulôn.
21 TUHAN geubalaih buet ulôn nyang beutôi; Gobnyan geubri beureukat keu ulôn sabab ulôn hana salah.
22 Ulôn taát ubak peurintah TUHAN dan hana lôn paleng nibak Allah ulôn.
23 Banmandum huköm Gobnyan ulôn deungoe, peurintah-peurintah Gobnyan hana ulôn peulaloe.
24 Gobnyan geuteupeue bahwa ulôn nyoe hana cacat ngon teucela dan geupeujiôh droe nibak keusalahan.
25 Teuma TUHAN geubalaih buet ulôn nyang beuna sabab Gobnyan geuteupeue ulôn nyoe hana meusalah.
26 TUHAN, Droeneueh seutia keu ureuëng nyang seutia dan jroh keu ureuëng nyang jroh.
27 Keu ureuëng nyang suci Droeneueh peugah Droeneueh suci, teuma ureuëng nyang jeuhet Droeneueh peujeuet keumusoh.
28 Ureuëng nyang miyueb até TUHAN peuseulamat, teuma ureuëng nyang sombong ngon cungkak Droeneueh peutundok.
29 Droeneueh puhu panyôt ulôn; TUHAN Allah ulôn nyang peu peungeuh ulôn nibak seupôt.
30 Droeneueh neupeuteuga ulôn mangat ulôn heuntam musoh; deungon tulông Allah ulôn peuhanco peutahanan awaknyan.
31 Buet Po teu Allah sampoereuna janji TUHAN jeuet teupeucaya. Gobnyan lagée peurisai keu mandum ureuëng nyang meulindong nibak Gobnyan.
32 Sabab TUHAN kheueh Po teu Allah; Allah mantong nyang jeuet keu nyang bila geutanyoe.
33 Gobnyan kheueh Allah nyang ka geupeuteuga ulôn dan nyang peusaneut rot ulôn aman.
34 Gobnyan nyang peuteuga gaki ulôn lagée gaki rusa, dan nyang jaga keuseulamatan ulôn di ateueh gunong-gunong.
35 Gobnyan nyang latih ulôn pakriban cara muprang, sampoe hase ulôn reuntang busur nyang paleng teuga.
36 TUHAN, Droeneueh kheueh nyang lindong dan peuseulamat ulôn, dan nyang tumpang ulôn deungon kuasa Droeneueh; ulôn hase meunang sabab tindakan Droeneueh.
37 Droeneueh jaga ulôn mangat ulôn bék keunong teun, dan ulôn hántom na reubah.
38 Laju ulôn tiyeub musoh lôn dan lôn peutaloe awaknyan, dan pantang lôn surot sampoe awaknyan banmandum binasa.
39 Ulôn seumpom awaknyan sampoe hana hasele jibeudôh, awaknyan reubah hana meudaya dimiyueb gaki ulôn.
40 Neubri ubak lôn teunaga mangat hase lôn muprang, dan beumeunang ateueh musoh-musoh lôn.
41 Sampoe musoh lôn neuyue plueng nibak ulôn; dan soemantong ureuëng nyang jibanci ubak ulôn TUHAN neupeubinasa.
42 Awaknyan jikliek ngon jiteumawök, teuma hana nyang hase tulông, awaknyan jimeulakée ubak TUHAN, teuma Gobnyan hana geutem jaweueb.
43 Awaknyan ulôn peureumok lagée abée nyang jipot lé angén, dan ulôn sampôh lagée leuhôb nibak binéh rot ueh raya.
44 Droeneueh neupeubeubaih ulôn nibak kawöm nyang doraka, dan neupeujeuet ulôn keupeunguasa ateueh bansa-bansa; bansa-bansa nyang hana lôn turi jeuet namiet lôn.
45 Ureuëng-ureuëng aséng tundok ubak ulôn dan jitaát watée jideungoe peue nyang lôn peurintah.
46 Beuhe awaknyan ka gadôh; awaknyan yo dan jiteubiet lam kuta jih.
47 TUHAN udeb! Teupujoe kheueh nyang bila lôn! Peu agong kheueh keubeusaran Allah nyang peuseulamat lôn!
48 Gobnyan geubri keulôn meunang ateueh musoh lôn; bansa-bansa geupeutaklok dikeue ulôn,
49 geupeuseulamat ulôn nibak lawan-lawan lôn. keujam.
50 Lé sababnyan ulôn peuagong Droeneueh lamkawan bansa-bansa, dan ulôn meunyanyoe lagu puja ngon pujoe keu Droeneueh.
51 Po teu Allah geupeumeunang nyang paleng rayeuk ateueh raja Gobnyan, Gobnyan teutab geugaséh keu ureuëng nyang ka geupiléh, na kheueh Nabi Daud deungon keuturonan gobnyan keu siumu masa.


Chapter 19

1 Keu teupimpén kor. Zabur Nabi Daud.
2 Langét dimanyang jipeugah keuagongan Allah, dan cakrawala jijak peusampoe karya Gobnyan.
3 Uroe nyang keu sa jijak peusampoe ubak uroe nyang seulanjut jih; malam nyang sa jijak peukisah ubak malam nyang singoh nyan teuma.
4 Hana nyang mariet atawa jimupoh cakra, hana su nyang na teudeungoe.
5 Teuma seruan Gobnyan meuguncang bansaboh donya, sampoe peusan nyan ubak tieb-tieb ujong bumoe. TUHAN geupeugöt rumoh di langét keu sang surya,
6 bak watée beungoh sang surya nyan jiteubiet lagée teungku linto agam nyang geuteubiet lam kama gobnyan, lagée pahlawan nyang geumbira geupeuphon jak geubot langkah gobnyan.
7 Gobnyan geulisi langét phon nibak ujong u ujong; hana nyang hana keunong nibak seu-uem gobnyan.
8 Huköm TUHAN nyan sampoereuna, teupeuseugar jiwa. Peurintah TUHAN jeuet teupeucaya, teubri hikeumat keu ureuëng nyang seudeurhana.
9 Peuratoran TUHAN nyan teupat, keubit that teupeugalak até. Peue nyang geupeuteutab lé TUHAN nyan murni, sampoe ureuëng laén hase jipuphom.
10 Meubakti ubak TUHAN nyan gét, hana piôh keu siumu masa. Huköm TUHAN nyan beutôi dan ade banmandum.
11 Huköm TUHAN leubeh meuyuém nibak méuh murni, dan leubeh maméh nibak meulisan nyang aseuli.
12 Hamba Droeneueh geupeu ingat lé banmandum nyan; upah nyang paleng raya teupeuna keu ureuëng nyang taát.
13 Hana nyang hase peusada keuhai sisat jihnyan; TUHAN, neupeubeubaih kheueh ulôn nibak buet salah nyang teusöm.
14 Neupeujiôh kheueh ulôn nibak desya nyang teusaja, bék neupeubiyeu ulôn jikuasa lé awaknyan. Teuma ulôn jeuet keu ureuëng hana meucupa, dan beubaih nibak peulanggaran nyang brat.
15 Seumoga tutoe haba dan pikeran ulôn meukeunong nibak Droeneueh, ya TUHAN, nyang lindong dan nyang teubôh ulôn!


Chapter 20

1 Keu teupimpén kor. Zabur Nabi Daud.
2 Seumoga TUHAN geujaweueb droeneueh bak watée meukarat, dan seumoga kuasa Allah Nabi Yakub geulindong gata!
3 Seumoga Gobnyan geukirém bantuan nibak Baét Gobnyan, dan geujak tulông gata nibak Bukét Sion.
4 Seumoga Gobnyan ingat keu banmandum nyang gata peuseumah, dan galak deungon banmandum keureubeuen nyang gata tot.
5 Seumoga Gobnyan geubri peue mantong nyang gata meuheuët, dan geupeu jeuet banmandum reuncana gata meuhase.
6 Dan kamoe meusurak geumbira sabab gata meunang, dan teuangkat bupanji keu teupujoe Po teu Allah geutanyoe. Seumoga TUHAN geupeukabui banmandum nyang gata lakée.
7 Jinoenyoe barô kheueh ulôn teupeue bahwa TUHAN geubri keumeunangan ateueh raja nyang geupiléh. TUHAN geujaweueb gobnyan di syeuruga nyang suci; lé kuasa TUHAN gobnyan meuteumé meunang nyang paleng raya.
8 Na ureuëng nyang jipeu deng-deng geuritan prang jih, dan na teuma nyang jipeu deng-deng guda jih. Teuma geutanyoe nyang tapeu deng-deng ngon ta andalkan na kheueh TUHAN, Allah geutanyoe.
9 Awaknyan teuma meugantoh dan reubah, teuma geutanyoe ta beudôh teudong nyang kukoh.
10 Ya TUHAN, neubri kheueh keumeunangan ateueh raja, jaweueb kheueh kamoe watée kamoe meuhôi Droeneueh.


Chapter 21

1 Keu teupimpén kor. Zabur Nabi Daud.
2 Ya TUHAN, raja harok that sabab Droeneueh ka neupeukong gobnyan; gobnyan meusuka cita sabab meunang nyang Droeneueh bri!
3 Droeneueh ka neupeupeunoh keuheundak até gobnyan, dan ka neubri peue nyang geulakée lé gobnyan.
4 Droeneueh teuka ubak gobnyan deungon beureukat nyang meulimpah, dan neupeungui mahkota méuh ateueh ulée gobnyan.
5 Gobnyan geulakée udeb, laju neubri keu gobnyan, dan panyang umu keu siumu masa.
6 Sabab sinulông Droeneueh gobnyan ka jeuet keu ureuëng nyang lumpah teuhoreumat, neupeu jeuet gobnyan meusyeuhu dan meugah that.
7 Neubri beureukat keu gobnyan lam tieb-tieb watée; keuhai teuka Droeneueh sampoe jeuet gobnyan peunoh deungon suka cita.
8 Raja geumeuharab ubak TUHAN Nyang Mahamanyang, gobnyan sabe lam aman sabab gobnyan na kheueh geunaséh TUHAN.
9 Gobnyan teuma geudrob banmandum musoh geuh, dan geuteun banmandum ureuëng nyang banci Gobnyan.
10 Gobnyan teuka lagée apui nyang hu meu ble-ble keu teupeuhanco awaknyan.
11 Nibak keuturonan awaknyan hana nyang tinggai bahpi meusaboh, raja teuma geupeutaloe awaknyan bube nyang na.
12 Meunyoe awaknyan jipeuget reuncana jijak lawan raja, tipée muslihat awaknyan hana meuhase.
13 Gobnyan geutimbak aneuk panah geuh, sampoe awaknyan jigisa dan jiplueng laju.
14 Kamoe pujoe Droeneueh ya TUHAN, sabab rayeuk lumpah na kuasa Droeneueh, kamoe meuca-e ngon meunyanyoe sira kamoe pujoe keupeukasaan Droeneueh.


Chapter 22

1 Keu teupimpén kor. Meunurot lagu: Rusa óh watée beungoh. Zabur Nabi Daud.
2 Allah ulôn, ya Allah lôn, pakon Droeneueh neutinggai ulôn? Ulôn meuhôi, teuma Droeneueh teutab jiôh dan hana neutulông ulôn.
3 Ya Allah ulôn, ulôn meuhôi óh watée uroe, teuma Droeneueh seungab mantong. Óh watée malam ulôn meudoá, até ulôn teutab meutampo-tampo.
4 Teuma Droeneueh na kheueh Raja Nyang Mahasuci, nyang jipujoe-pujoe lé Israel.
5 Indatu kamoe meuharab that ubak Droeneueh, awaknyan meuharab, dan Droeneueh neupeuseulamat awaknyan.
6 Awaknyan jimeulakée ubak Droeneueh dan peuseuliseh nibak meubagoe bala; awaknyan meuharab dan hana neupeukeucewa.
7 Teuma ulôn nyoe na kheueh glang, bukon manusia, jiteuoh-teuoh ngon jihina lé rakyatba.
8 Banmandum ureuëng nyang kalon ulôn jihina lôn, jipeuhirôt bibi dan jipeu asek ulée.
9 Kheun awaknyan, "Bah kheueh jihnyan jipeubangga TUHAN, mangat TUHAN geupeuseulamat jihnyan, meunyoe TUHAN galak keu jihnyan!"
10 Droeneueh kheueh nyang peuteubiet ulôn lam pruet ma, dan nyang peujeuet ulôn aman lam pangkée po ma.
11 Yoh phon lahé u donya nyoe, naséb ulôn na dalam jaroe Droeneueh, dan yoh mantong ulôn na lam pruet ma, Droeneueh kheueh Allah ulôn.
12 Bék kheueh jiôh, sabab bahya ka tô that-that, dan hana nyang tulông lôn.
13 Lagée kawan banteng, musoh jijak udom ulôn, lagée banteng klét di Basan awaknyan jikeupong ulôn.
14 Awaknyan jipeukeue ulôn deungon babah jih teuhah, lagée singa nyang teumauém dan jiteumeugöm.
15 Teunaga ulôn habéh lagée ié nyang rho, banmandum tuleueng ulôn leukang nibak sandi jih, até ulôn meuliléh saban lagée lilen.
16 Rukuéng ulôn tho kreng lagée pempeng kaca, lidah ulôn meuleukek nibak langét-langét babah lôn. TUHAN, neutinggai ulôn di ateueh abée lagée ureuëng nyang ka maté.
17 Ulôn jikeupong lé geurombolan ureuëng jeuhet; lagée kawan asée awaknyan jiudom ulôn, sira teutob jaroe ngon gaki.
18 Banmandum tuleueng ulôn hase lôn itong, musoh jingieng ateueh ulôn sibagoe tuntonan.
19 Awaknyan jibagi-bagi peukayan ulôn, dan ji rhom undi ateueh jubah lôn.
20 Teutapi Droeneueh, bék kheueh jiôh, ya TUHAN, neuteuka bubagah neutulông ulôn, sabab Droeneueh kheueh teunaga ulôn.
21 Neupeusie kheueh nyawöng ulôn nibak mata peudeueng, dan neupeuseulamat kheueh ulôn nibak jiteugom lé asée.
22 Ulôn hana meudaya, neupeulheueh kheueh ulôn nibak luengkée banteng dan nibak babah singa.
23 Buet Droeneueh nyan ulôn calitra ubak bubena syedara ulôn; nibak rapat umat Droeneueh ulôn puja-pujoe Droeneueh.
24 Pujoe kheueh Gobnyan, hai ureuëng-ureuëng taqwa! Peu agong kheueh Gobnyan, hai banmandum keuturonan Nabi Yakub! Sujut kheueh ubak Gobnyan, hai banmandum keuturonan Israel!
25 Sabab Gobnyan hana geupandang hina keu ureuëng nyang teuseupet, dan hana geuanggab remeh keuseungsaraan jihnyan. Gobnyan hana geupaleng nibak ureuëng nyan, teuma geudeungoe meunyoe jilakée tulông ubak Gobnyan.
26 Di teungoh ureuëng ramé nyang meusapat teutab ulôn pujoe Droeneueh, sabab banmandum nyang ka Droeneueh peubuet. Dikeue umat nyang taqwa ulôn peuseumah keureubeuen nyang ka ulôn peujanji.
27 Ureuëng gasien teuma jimakheun sampoe troe; ureuëng nyang teuka ubak TUHAN teuma jipujoe Geuhnyan. Seumoga gata seujahteura siumu masa!
28 Banmandum bansa teuma ji-ingat ubak TUHAN dan teuma jiriwang ubak Gobnyan, banmandum sukée bansa teuma jisujut jiseumah Gobnyan.
29 Sabab TUHAN kheueh nyang mat kuasa, Gobnyan nyang mat peurintah ateueh bansa-bansa.
30 Banmandum ureuëng rayeuk teuma jisujut dikeue Gobnyan, dan banmandum manusia fana teuma jisujut jiseumah Gobnyan.
31 Angkatan-angkatan nyang teuka dudoe meubakti ubak TUHAN, ureuëng nyan teuma jipeusampoe tron-meutron.
32 Ubak bansa nyang lahé dudoe teuma jipeusampoe bahwa TUHAN ka geupeuseulamat umat Gobnyan.


Chapter 23

1-2 Zabur Nabi Daud. Gobnyan geupeu éh ulôn di ateueh blang naleueng nyang ijo. Dan geubimbéng ulôn ubak ié nyang teunang.
3 Geubri keulôn teunaga nyang barô, dan geupapah ulôn ubak rot nyang beuna, nyang sisuai deungon janji Gobnyan.
4 Bahpi ulôn rhot lam barieh nyang seupôt, teuma diulôn hana lôn takot keubahya, sabab Droeneueh nyang jeuet keungon ulôn. Droeneueh neulindong ulôn lagée ureuëng meurabe jijaga bubiri jih deungon tungkat dan gada.
5 Droeneueh nyang keubah khanuri keu ulôn dikeue mata lawan ulôn. Droeneueh neusambot ulôn lagée jamé nyang mulia. Droeneueh nyang peuhidang keu ulôn ié jieb nyang lazat meulimpah ruah.
6 Ulôn teupeue Droeneueh jroh keu ulôn, dan sabe neugaséh keu ulôn. Teuma ulôn jeuet tinggai di Baét Droeneueh, simantong ulôn udeb.


Chapter 24

1 Zabur Nabi Daud.
2 Gobnyan nyang peuduek dasai jih di ateueh laôt, dan nyang peudong di ateueh ié nyang lhók.
3 Soe kheueh nyang jeuet ék u ateueh Bukét TUHAN, dan tamong u dalam Baét Gobnyan?
4 Ureuëng nyang hana meucupa pikeran dan buet jih, nyang hana jimeusumpah peuleusu dan hana jiseumah beurala.
5 Ureuëng nyan kheueh nyang teuma geubri beureukat dan geupeuseulamat lé TUHAN, dan Allah keudroe nyang peugah hana meusalah.
6 Meunan kheueh ureuëng nyang teuka meuhadab Allah, nyang teuka jijak seumah Allah Nabi Yakub.
7 Neubuka kheueh rayeuk-rayeuk geureubang tuha, mangat geutamong Raja nyang mulia.
8 Soe kheueh Raja nyang mulia nyan? Gobnyan kheueh TUHAN nyang peukasa; TUHAN nyang peunoh kuasa, nyang meujaya dimideuen prang ngaza.
9 Peuhah kheueh beurayeuk geureubang tuha, mangat geutamong Raja nyang mulia.
10 Soe kheueh Raja nyang mulia nyan? TUHAN Nyang Mahakuasa, Gobnyan kheueh Raja nyang mulia!


Chapter 25

1 Zabur Nabi Daud. doá,
2 ya Allah lôn, ulôn peucaya ubak Droeneueh! Bék neupeubiyeu ulôn nyoe jipeumalée, dan jisurak lé musoh-musoh lôn.
3 Ureuëng nyang meukhianat ubak Droeneueh teuma geupeumalée, teuma nyang peucaya ubak Droeneueh hana teuma geupeukeucewa.
4 Neutunyok kheueh keuheundak Droeneueh keu ulôn, ya TUHAN, neupeugah kheueh peue nyang harôh ulôn peubuet.
5 Neupeurunoe kheueh dan neubimbéng kheueh ulôn mangat udeb lôn nyoe sisuai deungon keuheundak Droeneueh, sabab Droeneueh kheueh Allah nyang peuseulamat ulôn, nyang jeueb-jeueb watée ulôn meuharab ubak Droeneueh.
6 Ingat kheueh keubaiékan dan geunaséh Droeneueh, ya TUHAN, nyang TUHAN tunyok yoh lôn watée awaiphon.
7 Neupeu amphon kheueh desya dan keusalahan masa muda lôn, ingat kheueh ulôn nyang sisuai deungon gaséh dan keubaiékan Droeneueh.
8 Sabab TUHAN na kheueh gét dan ade, Gobnyan geutunyok rot keu ureuëng nyang sisat.
9 TUHAN geubimbéng ureuëng nyang miyueb até, dan geupeurunoe awaknyan keuheundak Gobnyan.
10 Ureuëng nyang taát ubak peujanjian dan huköm Gobnyan, geupeutimang deungon gaséh dan seutia.
11 TUHAN, neupeu amphon kheueh ulôn nyang sisuai deungon janji Droeneueh, sabab raya that keusalahan ulôn.
12 TUHAN geupeurunoe keu ureuëng nyang taqwa rot nyang harôh awaknyan jak.
13 Awaknyan teuma teutab udeb makmu, aneuëk cucoe awaknyan teuma jiteurimong tanoh pusaka.
14 TUHAN na kheueh sahabat ureuëng nyang taqwa Gobnyan geupeugah meukeusut Geuh keu awaknyan.
15 Mata ulôn teutab teuarah ubak TUHAN, sabab Gobnyan nyang peuseulamat ulôn nibak mara bahya.
16 Neupandang kheueh ulôn, dan gaséh kheueh keu ulôn, sabab Gobnyan geupeuseulamat ulôn nibak bahya.
17 Keusosahan até ulôn seumaken meutamah neupeubeubaih kheueh ulôn nibak teuseupet nyoe.
18 Neungieng kheueh seungsara dan keusosahan lôn, dan neupeu amphon kheueh banmandum desya-desya ulôn.
19 Neungieng kheueh padubnale musoh-musoh lôn; awaknyan that-that jibanci keu ulôn.
20 Neujaga dan neupeuseulamat kheueh ulôn, mangat ulôn hana meuteumé malée. Sabab ulôn meulindong ubak Droeneueh.
21 Seumoga keubaiékan dan keujujoran nyang kawai ulôn, sabab ulôn meuharab ubak Droeneueh.
22 Ya Allah, neupeubeubaih kheueh umat Droeneueh nibak banmandum keugundahan.


Chapter 26

1 Zabur Nabi Daud.
2 Neuseulidek kheueh ulôn, ya TUHAN, dan neu ujoe kheueh ulôn, neupeureksa kheueh nyang lôn meuheuet dan pikeran lôn.
3 Ulôn sabe ingat keu geunaséh Droeneueh, dan teutab seutia ubak Droeneueh.
4 Ulôn hana lôntem meusapat ngon ureuëng tukang teumipée, atawa lôn meungon deungon ureuëng munafék.
5 Ulôn banci keu kawan ureuëng nyang jipeubuet jeuhet, kawöm nyang jeuhet ulôn peusie.
6 Ulôn rhah jaroe lôn tanda hana meusalah, dan ulônjak keulileng miseubah Droeneueh, ya TUHAN,
7 sira lôn meuca-e ngon nyanyoe syuko, dan lôn peusampoe buet-buet Droeneueh nyang lumpah kagom.
8 Ulôn cinta ubak Baét Droeneueh, ya TUHAN, teumpat Droeneueh tinggai deungon peunoh keuagongan.
9 Bék neupoh ulôn meusajan ureuëng nyang meudesya, atawa neutarek nyawöng lôn meusigoe ngon ureuëng nyang galak jiroe darah gob.
10 Awaknyan hana jipiôh jipeubuet jeuhet, dan sabe siab jiteurimong sugok.
11 Teuma ulôn udeb deungon até nyang jujoe, neugaséh kheueh dan neupeubeubaih kheueh ulôn.
12 Teuma aman kheueh ulôn nibak mara bahya, ulôn teuma lôn pujoe TUHAN nibak teumpat umat Gobnyan meusapat.


Chapter 27

1 Zabur Nabi Daud.
2 Meunyoe lôn jiheuntam lé ureuëng jeuhet nyang keuneuk peumaté lôn, awaknyan kheueh nyang meugantoh dan reubah.
3 Bahpi ulôn jikeupong lé pasokan nyang raya, teuma ulôn hana teumakot. Bahpi beureutoh prang jilawan lôn, ulôn teutab meuharab.
4 Teuma sapeue nyang ulôn lakée ubak TUHAN, dan nyoe kheueh nyang ulôn harab: Tinggai teutab di Baét TUHAN simantong ulôn udeb, mangat lôn rasa pakriban gét TUHAN keu ulôn dan lôn lakée bimbéngan Gobnyan.
5 TUHAN geulindong ulôn watée ulôn ka meukarat; Gobnyan geusöm ulôn didalam Baét Geuh, dan geu beuôt ulôn u ateueh gunong batée.
6 Jinoenyoe ulôn ka meunang ateueh musoh nyang na bansilingka lôn; teuma deungon surak nyang meuhubo ulôn peuseumah keureubeuen syuko di Baét Droeneueh; ulôn keuneuk meuca-e dan lôn pujoe TUHAN.
7 Ya TUHAN, deungoe kheueh meunyoe ulôn meulakée ubak Droeneueh, neugaséh kheueh keu ulôn dan neujaweueb kheueh lôn!
8 Droeneueh meufeureuman, "Teuka kheueh jak seumah ulôn." Ulôn jaweueb, "Ulôn deungon reujang lôn teuka, ya TUHAN;
9 bék kheueh neumusöm nibak ulôn."
10 Bahpi ayah ngon ma geutinggai ulôn, teuma Allah teutab neupeulara ulôn.
11 Neutunyok kheueh bak ulôn keuheundak Droeneueh, ya TUHAN, neubimbéng kheueh ulôn bak jalan nyang beuna, sabab musoh ulôn le lumpah na.
12 Bék neujok ulôn ubak nafeusu lawan ulôn, nyang seurang ulôn deungon duseuta dan jiancam teuma.
13 Ulôn yakén teuma lôn rasa keubaíekan TUHAN lam udeb lôn lam donya nyoe.
14 Meuharab kheueh ubak TUHAN, peukong kheueh dan peuteutab kheueh até droeneueh; nyoe, meuharab kheueh ubak TUHAN.


Chapter 28

1 Zabur Nabi Daud.
2 Neudeungoe kheueh peue nyang ulôn lakée meunyoe ulôn ka lôn kliek lôn lakée tulông, dan lôn beuôt jaroe lôn meuhadab u Baét Droeneueh nyang suci.
3 Bék neupeubinasa ulôn meusajan deungon ureuëng doraka, meusajan ureuëng nyang jipeubuet jeuhet. Meunyoe jipeugah haba awaknyan deungon ramah lom sopan, teuma até awaknyan peunoh deungon nyang kuto dan nyang jeuhet.
4 Huköm kheueh awaknyan sabab buet droe jih nyang lagée nyan, sabab buet nyang jeuhet nyang jipeubuet lé awaknyan. Neuhuköm kheueh awaknyan nyang sisuai deungon buet nyang jipeubuet lé droe jih nyan; bri kheueh awaknyan huköman nyang sisuai.
5 Awaknyan hana jipeureumen peue nyang geupeubuet lé TUHAN, atawa peue nyang geupeubuet lé Gobnyan. Teuma Gobnyan geuhuköm awaknyan, dan geupeubinasa awaknyan keu siumu masa.
6 Teupujoe kheueh TUHAN, sabab Gobnyan ka geudeungoe peue nyang ulôn lakée.
7 TUHAN peulindong dan nyang bila ulôn, ulôn peucaya ubak Gobnyan. Gobnyan geutulông dan nyang peu mangat até ulôn, ulôn pujoe Gobnyan deungon ca-e dan nyanyoe syuko.
8 TUHAN geubri teunaga keu umat Gobnyan, Gobnyan geubila dan geupeuseulamat raja nyang geupiléh lé Gobnyan keudroe.
9 Peuseulamat kheueh umat Droeneueh, ya TUHAN, neubri beureukat kheueh keu ureuëng-ureuëng milék Droeneueh. Beujeuet kheueh lagée sidroe ureuëng meurabe keu awaknyan, dan neujaga kheueh awaknyan keu siumu masa.


Chapter 29

1 Zabur Nabi Daud.
2 Pujoe kheueh nan TUHAN nyang mulia neuseumah kheueh Gobnyan deungon teungui peukayan iébadat.
3 Allah nyang agong meusu lagée geulanteue di ateueh laôt, su Gobnyan meugeunta di ateueh laôt raya.
4 Su TUHAN teudeungoe, peunoh kuasa dan keumeugahan.
5 Su TUHAN sampoe reubah bubena bak kayée, dan patah bak kayée ceumara Libanon.
6 Gunong Libanon geupeujeuet sampoe meulumpat lagée aneuëk leumô, dan Gunong Siryon jimeugluéng lagée aneuëk banteng.
7 Su TUHAN sampoe jiteubiet kilat muble ji seumama.
8 Su TUHAN sampoe meuhayak padang pasie, dan TUHAN geuguncang padang pasie Kades.
9 Su TUHAN sampoe meuyok-yok bak-bak kayée beurangan, dan luröh bubena ôn-ôn kayée di gle; dan di Baét TUHAN umat Gobnyan jimeuhôi, "Pujoe kheueh TUHAN!"
10 TUHAN meukuasa ateueh ié raya, Gobnyan meukuasa sibagoe Raja keu siumu masa.
11 Seumoga TUHAN geubri teunaga keu umat Gobnyan, dan geupeujeuet awaknyan seujahteura.


Chapter 30

1 Zabur Nabi Daud. Ca-e keu teureuseumi Baét Allah.
2 Ulôn pujoe Droeneueh, ya TUHAN, sabab Droneueh ka neupeuseulamat ulôn dan hana neupeubiyeu musoh ulôn jisurak lôn.
3 TUHAN Allah ulôn, ulôn meuhôi Droeneueh lôn lakée tulông, dan Droeneueh neupeupuléh ulôn.
4 Droeneueh nyang peuseuliseh ulôn nibak álam mawöt, dan peu udeb ulôn nibak lamkawan ureuëng-ureuëng maté.
5 Meuca-e kheueh lagu puja ngon pujoe keu TUHAN, hai umat Gobnyan nyang seutia, dan meusyuko kheueh ubak Nyang Mahasuci.
6 Sabab TUHAN geubeungéh na kheueh sikeujab, meunyoe nyang jroh-jroh sabe na siumu masa. Bak watée malam sabe ulôn mo, teuma beungoh uroe ulôn meugeumbira.
7 Watée meurasa aman ulôn peugah, "Ulôn hana soe peutaloe!"
8 Sabab Droeneueh gét that até keu ulôn, ya TUHAN, Droeneueh peujeuet ulôn lagée gunong nyang kukoh. Teuma óh lheueh nyan Droeneueh neumusöm nibak ulôn, dan ulôn jiteuka teumakot.
9 Ubak Droeneueh, ya TUHAN, ulôn meulakée, ubak TUHAN ulôn meuharab,
10 "Keupeue guna jih nibak Droeneueh meunyoe ulôn maté dan jipeutron u dalam kubu? Peu kheueh mungken ureuëng maté jipujoe Droeneueh dan jijak peusampoe keuhai seutia Droeneueh?
11 Deungoe kheueh, ya TUHAN, dan neugaséh kheueh keu ulôn. TUHAN tulông kheueh ulôn!"
12 Mo ulôn nyang meuba-e ka neu-ubah jeuet keu meunari nyang geumbira, neucok keuseudehan ulôn dan neupeupeunoh lôn deungon suka cita.
13 Dan ulôn hana kutem iem droe; ulôn meuca-e lagu seumujoe keu Droeneueh, ya TUHAN Allah lôn, dan meusyuko ubak Droeneueh keu siumu masa!


Chapter 31

1 Keu teupimpén kor. Zabur Nabi Daud.
2 Ubak Droeneueh ulôn meulindong, ya TUHAN, bék neupeubiyeu ulôn nyoe jipeukeucewa. Peuseulamat kheueh ulôn deumi keuadelan Droeneueh
3 deungoe kheueh ulôn dan peubeubaih kheueh ulôn deungon sigra. Neupeujeuet kheueh keu ulôn lagée gunong batée teumpat ulôn meulindong, lagée kuta nyang khong, diteumpat nyan ulôn seulamat.
4 Nyoe, Droeneueh lagée gunong batée dan kuta nyang khong keu ulôn! Neubimbéng kheueh ulôn nyang sisuai deungon janji Droeneueh.
5 Neupeulheueh kheueh ulôn nibak taron nyang jipasang keu ulôn, sabab Droeneueh kheueh teumpat ulôn meulindong.
6 U dalam jaroe Droeneueh ulôn seurah droe; Droeneueh peubeubaih ulôn, ya TUHAN, Allah nyang seutia.
7 Ureuëng nyang seumah beurala Droeneueh banci; teuma ulôn teutab peucaya ubak TUHAN.
8 Ulôn geumbira dan meusukaria sabab Droeneueh teutab neugaséh keu ulôn. Droeneueh neungieng deurita ulôn dan neupakoe that keu apoh apah lôn.
9 Droeneueh hana neupeubiyeu ulôn jiteun lé musoh, teuma neupeubiyeu ulôn, lôn jak deungon beubaih.
10 Neugaséh kheueh ulôn, ya TUHAN, sabab ulôn lam keusosahan; mata ulôn peudeh sabab laloe lôn mo, jiwa raga lôn meurana.
11 Udeb lôn habéh lam peundeuritaan, dan thon-thon lôn rasa lam apoh apah. Teunaga lôn meukureueng sabab buet lôn nyang jeuhet, dan tuleueng-tuleueng lôn sampoe rapoh.
12 Ulôn habéh jipeukém lé banmandum musoh lôn, meunan cit lé dumna kawöm silingka. Banmandum rakan lôn teukeujot watée jingieng keuadaan lôn, dan awaknyan jiplueng meunyoe meurumpok deungon lôn nibak rot ueh raya.
13 Ulôn jipeutuwoe lagée jituwoe keu ureuëng maté, dan jipeujeuet lagée barang nyang jitiek hana meuguna.
14 Dipat mantong na keusosahan; ulôn deungoe jimeusáh-sáh lé musoh lôn. Awaknyan ka sipakat jilawan ulôn, dan jipeugöt reuncana keu jijak poh ulôn.
15 Teuma ulôn meuharab ubak Droeneueh, ya TUHAN, sabab Droeneueh kheueh Allah ulôn.
16 Droeneueh sabe neupeulara ulôn; neupeuseulamat kheueh ulôn nibak musoh-musoh lôn, dan nibak ureuëng-ureuëng nyang jilet-let lôn.
17 Seumoga Droeneueh jeuet nibak hamba Neuh; neupeuseulamat kheueh ulôn sabab gaséh Droeneueh.
18 Bék neupeubiyeu ulôn meuteumé malée, ya TUHAN, sabab ulôn meulakée ubak Droeneueh. Bah kheueh ureuëng jeuhet neupeumalée, dan deungon seungab-seungab jitron u dalam donya ureuëng maté.
19 Neusumpai kheueh babah bubena ureuëng nyang sulet nyang deungon sombong jipeuhina ureuëng jujoe.
20 Padubna le meulimpah-limpah keubaiékan Droeneueh nyang Droeneueh keubah keu ureuëng taqwa! Soe mantong ureuëng jingieng keubaiékan nyang Droeneueh peubuet, keu ureuëng nyang meulindong ubak Droeneueh.
21 Droeneueh söm awaknyan lam lindongan Droeneueh lé siasat ureuëng jeuhet; neujaga awaknyan lam lindongan Droeneueh ateueh peue nyang jitudoh lé lawan.
22 Teupujoe kheueh TUHAN! Nyang lumpah that hebat geunaséh Gobnyan keu ulôn, watée ulôn jikeupong dan jiseurang.
23 Teungoh lôn bingong lôn sangka TUHAN geuböih ulôn nibak hadirat Gobnyan. Teuma Gobnyan ka geudeungoe peue nyang ulôn lakée watée ulôn meulakée ubak Gobnyan.
24 Cinta kheueh TUHAN, hai banmandum umat Gobnyan, TUHAN geulindong ureuëng nyang seutia. Teuma ureuëng nyang cungkak ngon sombong geuhuköm lé Gobnyan deungon ázeub nyang hana teukira.
25 Peuteuga dan peukong kheueh até gata, gata banmandum nyang meuharab ubak TUHAN!


Chapter 32

1 Zabur Nabi Daud. Ca-e peulajaran.
2 Mubahgia kheueh ureuëng nyang buet jih jeuhet hana geu itong lé TUHAN, dan nyang hana galak teumipée.
3 Simantong ulôn hana lôn aku desya lôn, ulôn meurana sabab apoh apah tieb-tieb watée.
4 Uroe malam Droeneueh neuteugon ulôn, ya TUHAN, teunaga lôn habéh lagée meuadée lam uroe kha.
5 Laju lôn aku desya ulôn ubak Droeneueh, keusalahan lôn hana nyang ulôn söm. Ulôn peuputôh ulôn aku hainyan nibak Droeneueh, dan Droeneueh neupeu amphon banmandum desya ulôn.
6 Sababnyan tieb-tieb ureuëng nyang salah nyang sigetjih bék putôh-putôh jimeudoá óh watée jihnyan jirasa ka meukarat, dan meunyoe teuka ié beuna laju teuka keusosahan, ureuëng nyan hana keunong ié raya.
7 Droeneueh kheueh teumpat ulôn musöm, neupeubeubaih ulôn nibak apoh apah. Teuma lôn meusurak kareuna geumbira, sabab Droeneueh ka neupeuseulamat ulôn.
8 TUHAN meufeureuman, "Ulôn teuma Lôn tunyok rot nyang harôh gata jak, gata Lôn bimbeng dan Lôn bri naseuhat.
9 Bék lagée guda nyang hana meuakai, nyang harôh teukeundali deungon keukang dan talo mangat jitem jak."
10 Ureuëng meudesya meutumpôk-tumpôk jitimpok deungon seungsara; teuma ureuëng nyang meuharab ubak TUHAN teutab geupeulindong lé geunaséh Gobnyan.
11 Hai ureuëng-ureuëng saléeh, meugeumbira kheueh dan meusuka cita kheueh sabab peue nyang ka geupeubuet lé TUHAN. Meusurak geumbira, hai banmandum ureuëng nyang jujoe até!


Chapter 33

1 Hai ureuëng-ureuëng saléeh, meusurak geumbira kheueh sabab peue nyang ka geupeubuet lé TUHAN; patot that lé ureuëng jujoe jipujoe-pujoe.
2 Meusyukoe kheueh ubak TUHAN deungon keucapi, meuca-e kheueh keu Gobnyan deungon ji-iréng lé irama musik.
3 Neu ca-e kheueh lagu nyang barô keu TUHAN, peumeu én kheueh keucapi deungon beujroh-jroh dan meusurak kheueh deungon geumbira!
4 Banmandum peue nyang geukheun lé TUHAN jeuet teupeucaya; Gobnyan seutia ubak peue mantong nyang geupeubuet.
5 Gobnyan geucinta ubak keujujoran dan keuadelan; bansaboh bumoe peunoh deungon gaséh Gobnyan.
6 TUHAN geubri peurintah, teuma langét pi teucebta; mata uroe, buleuen dan bintang geupeujeuet deungon sabda Gobnyan.
7 Banmandum ié laôt geugumpôi bak saboh teumpat, samudra nyang raya laju geuteun bak saboh beudongan.
8 Bah kheueh bansaboh bumoe jitakot keu TUHAN dan peunduduek donya jihoreumat Gobnyan.
9 Sabab Gobnyan meusabda, laju banmandum geupeujeuet; Gobnyan geubri peurintah, teuma banmandum nyan hase na.
10 TUHAN geupeu bateue peue nyang jireuncana lé bansa-bansa, niet awaknyan laju geusampôh rata.
11 Teuma reuncana TUHAN teutab meuteun, reuncana Gobnyan teutab na sipanyang jamén.
12 Mubahgia kheueh bansa nyang jiaku TUHAN sibagoe Allah jih, mubahgia kheueh umat nyang geupiléh lé Gobnyan jeuet keuhak milék Gobnyan!
13 Didalam syeuruga TUHAN geukalon u miyueb, dan Gobnyan geukalon banmandum umat manusia.
14 Nibak takhta Gobnyan TUHAN geupeurati banmandum makhluk nyang tinggai di ateueh bumoe.
15 Gobnyan kheueh nyang peusaneut até awaknyan, dan geuteupeue peue mantong nyang jipeubuet lé awaknyan.
16 Raja hana hase meunang deungon le tantra, sipa-i hana seulamat sabab le teunaga jih.
17 Guda hana hase teucok keubangga mangat jeuet keumeunang, teunaga jih nyang rayeuk hana hase teupeuseulamat droe jih.
18 TUHAN geujaga ureuëng-ureuëng nyang taqwa nyang meuharabkan geunaséh Gobnyan.
19 Gobnyan geupeuseulamat awaknyan nibak mawöt, dan geupeu udeb awaknyan bak watée musém deuk.
20 Teuma geutanyoe meuharab ubak TUHAN, Gobnyan kheueh nyang tulông dan nyang bila geutanyoe.
21 Geutanyoe meusukaria sabab Gobnyan dan peucaya ubak nan Gobnyan nyang suci.
22 Seumoga kamoe teutab Droeneueh gaséh, ya TUHAN, sabab kamoe meuharab ubak Droeneueh mantong.


Chapter 34

1 Zabur Nabi Daud, bak watée gobnyan pura-pura hana waraih pikeran dikeue Abimelekh, sampoe gobnyan jiuse dan laju geujak.
2 Ulôn keuneuk meusyukoe ubak TUHAN tieb-tieb watée, dan hana piôh-piôh lôn pujoe Gobnyan.
3 Ulôn keuneuk meubangga droe sabab buet TUHAN; seumoga ureuëng nyang teutindéeh ngon teuseupet jideungoe dan meugeumbira.
4 Agong kheueh TUHAN meusajan deungon ulôn, jak meusajan-sajan ta peumulia nan Gobnyan.
5 Ulôn meudoá ubak TUHAN, dan Gobnyan geujaweueb, dan geupeuleuh ulôn nibak banmandum teumakot.
6 Ureuëng teuseupet ngon teutindéeh meuharab ubak Gobnyan dan meugeumbira, awaknyan hana alasan keujeuet keumalée.
7 Ureuëng manglang jimeuhôi dan TUHAN geujaweueb, geupeubeubaih awaknyan nibak banmandum nyang teuseupet.
8 Malaikat TUHAN geukawai ureuëng nyang taqwa, dan geupeubeubaih awaknyan nibak banmandum bahya.
9 Rasa kheueh keudroe pakriban get jih TUHAN, mubahgia kheueh ureuëng nyang meulindong ubak Gobnyan.
10 Horeumat kheueh TUHAN, hai kawöm umat Gobnyan, sabab ureuëng taqwa hana kureueng meusapeue pi.
11 Singa-singa pih deuk sabab kureueng peunajoh; teuma ureuëng nyang seumah TUHAN hana kureueng sapeue pih.
12 Deungoe kheueh, hai aneuëk-aneuëk banmandum, ulôn peurunoe gata pakriban cara teuhoreumat TUHAN.
13 Peu kheueh na meuheuët mangat panyang umu dan tanékmat nyang gét-gét?
14 Bék tapeuteubiet tutoe haba nyang jeuhet, dan bék tagalak keu tipée muslihat.
15 Peujiôh kheueh nyang jeuhet, dan peubuet kheueh nyang jroh, useuha kheueh peudaméan deungon habéh sineuga.
16 TUHAN teutab jingieng ateueh ureuëng saléeh, Gobnyan geudeungoe meunyoe awaknyan jikliek jilakée tulông.
17 Teuma ureuëng nyang jipeubuet jeuhet geulawan lé Gobnyan, meunyoe awaknyan maté, bagaih that awaknyan geupeutuwoe.
18 Meunyoe ureuëng saléeh nyang meuhôi, TUHAN geudeungoe, dan geupeuseulamat awaknyan nibak banmandum nyang salah.
19 TUHAN tô that ubak ureuëng nyang peu-ubit até; Gobnyan geupeuseulamat ureuëng nyang ka patah seumangat.
20 Lé that peundeuritaan ureuëng nyang jroh-jroh, teuma TUHAN geupeubeubaih awaknyan nibak banmandum nyan.
21 Tuboh jih teutab geujaga lé TUHAN, nibak tuleueng jihnyan hana meusikrak pih nyang na geupeupatah.
22 Ureuëng jeuhet teuma maté sabab buet jih nyang jeuhet, ureuëng nyang jibanci keu ureuëng saléeh teuma geuhuköm.
23 TUHAN geupeuseulamat hamba-hamba Gobnyan; nyang meulindong nibak Gobnyan hana teuma geuhuköm.


Chapter 35

1 Zabur Nabi Daud. TUHAN, neulawan kheueh ureuëng nyang lawan ulôn, neuprang kheueh ureuëng nyang jiprang ulôn.
2 Neucok kheueh utar-utar dan peurisai Droeneueh, dan neubeudôh kheueh jak tulông ulôn.
3 Beuôt kheueh leumbeng dan kapak Droeneueh keu neulawan ureuëng nyang tiyeub ulôn. Neupeugah kheueh ubak ulôn bahwa Droeneueh nyang peuseulamat lôn.
4 Bah kheueh ureuëng nyang keuneuk poh maté lôn neupeutaloe dan neupeumalée. Bah kheueh ureuëng nyang meusapat dan mupakat jijak lawan lôn surot kheueh lam keuadaan bingong.
5 Bah kheueh awaknyan geupeulet lé malaikat TUHAN, lagée sikéum angén tampo.
6 Bah kheueh awaknyan jipeulet lé malaikat TUHAN nibak jalan nyang seupôt dan glue.
7 Teusia payah mantong awaknyan jiteun taron keu ulôn, atawa jikueh uruek keuneuk jijak droeb ulôn.
8 Bah kheueh awaknyan keunong binasa deungon hana jisangka-sangka. Bah kheueh awaknyan meucarueh lam taron jih keudroe laju reubah dan binasa.
9 Teuma ulôn meusurak-surak sabab lé TUHAN, até ulôn galak ngon geumbira kareuna Gobnyan geupeuseulamat ulôn.
10 Deungon sikeubit jih ulôn peugah, "TUHAN, Droeneueh hana bandeng deungon peue mantong Droeneueh teupeu sa! Droeneueh neupeu lheueh nyang leumoh nibak nyang teuga, nyang gasien dan seungsara nibak keunong tindéeh."
11 Saksi-saksi nyang jeuhet jibeudôh jijak lawan ulôn, dan jitudoh ulôn lôn peubuet hai-hai nyang hana lôn teupeue.
12 Jroh nibak ulôn awaknyan balaih ngon nyang jeuhet; ulôn ngob lam putôh asa.
13 Watée awaknyan deumam, ulôn lumpah seudeh dan hana hase ulôn makheun; laju lôn meudoá sira lôn teukui ulée,
14 lagée lôn meudoá keu sidroe syedara atawa keu rakan lôn nyang paleng krab. Ulôn teukui ulôn mo keu awaknyan, siulah-ulah ulôn meukabong keu ma lôn keudroe.
15 Teuma bak watée ulôn sosah, awaknyan galak, dan meukawan-kawan jiparan ulôn. Awaknyan jijak lagée ureuëng capiek keu jihina lôn.
16 hana putôh-putôh awaknyan jihina sidroe ureuëng lapée, dan jingieng ateueh lôn deungon pandangan banci.
17 Trok án pajan, ya TUHAN, trok án pajan Droeneueh teuma neukalon mantong? Neupeuseulamat kheueh ulôn nibak jiseurang lé awaknyan, neupeusie kheueh nyawöng ulôn nibak singa-singa nyan.
18 Teuma ulôn meusyukoe ubak Droeneueh diteungoh umat Droeneueh, dan lôn pujoe nan Droeneueh di teumpat awaknyan meugumpôi.
19 Bék neupeubiyeu ulôn jipeumeu én lé ureuëng nyang musoh ngon lôn deungon hana sabab. Bék neupeubiyeu ulôn jisurak lé ureuëng nyang banci keu ulôn deungon hana sabab.
20 Haba awaknyan hana ramah; awaknyan jipeugot reuncana keuneuk teumipée ateueh ureuëng nyang udeb rukon bahgia.
21 Awaknyan jikliek-kliek u ateueh ulôn sira jipeugah bahwa awaknyan ka lheueh jikalon peue nyang ulôn peubuet.
22 Teuma Droeneueh, ya TUHAN, ka lheueh neukalon; bék kheueh neuiem droe, ya TUHAN, bék kheueh jiôh nibak ulôn.
23 Beudôh kheueh neubila peukara ulôn, ya Allah ulôn dan TUHAN lôn, tulông kheueh ulôn!
24 Neubila kheueh ulôn, sabab Droeneueh ade, ya TUHAN Allah lôn, bék neupeubiyeu musoh jisurak ulôn.
25 Bék neupeubiyeu awaknyan jimariet lam até, "Syuko, geutanyoe ka tapeu habéh nyawöng jih. Meukeusut até geutanyoe ka geupeupeunoh!"
26 Bah kheueh ureuëng nyang harôk jikalon seungsara lôn jeuet keu bingong dan meuteumé malée. Bah kheueh ureuëng nyang jipeusombong droe keulôn geuhina dan geupeumalée.
27 Seumoga ureuëng nyang keuneuk ngieng ateueh ulôn geupeubeuna meusurak dan meugeumbira. Seumoga awaknyan meu ulang-ulang jipeugah, "Keubit lumpah that agong TUHAN! Gobnyan meuharab beuseulamat hamba Geuh!"
28 Dan ulôn teuma lôn jak peugah keuadelan Droeneueh, dan lôn pujoe Droeneueh sipanyang uroe.


Chapter 36

1 Keu teupimpén kor. Nibak Nabi Daud, hamba TUHAN.
2 Desya jimariet lam reulong até ureuëng jeuhet, jihnyan meubacut pi hana jitakot ubak Po teu Allah.
3 Jihnyan jianggab droe jih nyan lumpah hebat, sampoe hana jitée droe bahwa droe jihnyan salah raya, dan hana teubanci.
4 Tutoe haba jih jeuhet dan peunoh tipée daya, jihnyan hanale jipeubuet nyang jroh-jroh dan bijaksana.
5 Sira ji-éh di ateueh teumpat éh pi jipeugöt reuncana keuhai buet nyang jeuhet nyang harôh jipeubuet; peue mantong buet jih hana nyang jroh, nyang jeuhet hana jitulak.
6 TUHAN, geunaséh Droeneueh meulambong manyang sampoe u langét, dan keuseutiaan Droeneueh sampoe trok bak awan.
7 Keubaiékan Droeneueh meujulang manyang santeut éuet gunong, dan keuadelan Droeneueh lhok éuet tuwi laôt nyang raya; manusia dan beulatang Droeneueh peulara, ya TUHAN.
8 Hana ék teukira gaséh Droeneueh, ya Allah Po manusia jimusöm dimiyueb sayeub Droeneueh.
9 Awaknyan puih deungon peunajoh nyang na meulimpah di Baét Droeneueh, dan deungon ié jieb nibak krueng Droeneueh sampoe puléh grah.
10 Droeneueh kheueh panghulée udeb mandum makhluk, lam trang Droeneueh kamoe kalon trang.
11 Seumoga Droeneueh teutab neugaséh keu ureuëng nyang jituri Droeneueh, dan neupeubuet nyang jroh ubak ureuëng nyang jujoe até.
12 Bék neupeubiyeu ulôn jiseurang lé ureuëng cungkak, ya TUHAN, atawa jiuse lé ureuëng jeuhet.
13 Ngieng kheueh, ureuëng nyang jipeubuet buet nyang jeuhet ka reubah, awaknyan reubah teugageueng sampoe hana hasele jibeudôh.


Chapter 37

1 Nibak Nabi Daud. salah.
2 Sabab awaknyan lagée naleueng nyang gadôh, dan layée lagée seunaman nyang ijo.
3 Peucaya kheueh ubak TUHAN, dan peubuet kheueh nyang jroh, tinggai kheueh di nanggroe nyan dan meupi-e kheueh nyang seutia.
4 Mita kheueh keubahgiaan ubak TUHAN, Gobnyan geupeupuih até gata.
5 Peujok kheueh udeb gata ubak TUHAN, meuharab kheueh ubak Gobnyan, Gobnyan pasti keutulông gata.
6 Gobnyan geupeugah keuseutiaan gata lagée trang, dan keujujoran gata lagée uroe peungéuh.
7 Preh kheueh TUHAN deungon até nyang teunang, tapreh kheueh deungon saba sampoe Gobnyan geucok tendakan. Bék geulisah sabab ureuëng laén nyang meuhase lam udeb, atawa nyang jipeubuet tipée muslihat.
8 Bék bagaih beungéh dan seu-uem até, nyang lagée nyan bagaih that meuteumé bala.
9 Sabab ureuëng nyang jipeubuet jeuhet geupeuhanco, teuma ureuëng nyang meuharab ubak TUHAN, nyan kheueh nyang jeuet keuwaréh tanoh nyan.
10 Ureuëng jeuhet reujang gadôh, meunyoe teumita, ureuëng nyan ka hanale.
11 Ureuëng nyang miyueb até nyan kheueh nyang jeuet keuwaréh tanoh nyan, dan jirasa udeb makmu nyang meulimpah.
12 Ureuëng jeuhet jireuncana nyang jeuhet ateueh ureuëng gét, dan jingieng ateueh ureuëng nyan deungon rasa banci.
13 Teuma lé TUHAN geupeukém ureuëng jeuhet nyang lagée nyan, sabab Gobnyan geuteupeue bahwa ureuëng nyang lagée nyan ajai jih ka tô that-that.
14 Ureuëng jeuhet jisuet peudeueng lam sarông dan aneuk panah pi laju jitimbak keu jipoh maté ureuëng gasien dan ureuëng seungsara, keu teusie ureuëng nyang udeb jih jroh.
15 Teuma ureuëng jeuhet nyan teutôb deungon peudeueng jih keudroe, dan aneuk panah awaknyan laju geuwiet meukan.
16 Barang nyang na bacut atra ureuëng nyang jroh leubeh meuyuém nibak barang atra ureuëng jeuhet nyang meulimpah ruah.
17 Sabab kuasa ureuëng jeuhet teuma geuwiet sampoe patah lé TUHAN, teuma ureuëng nyang gét teutab geulindong.
18 TUHAN geujaga udeb ureuëng saléeh, atra pusaka awaknyan teutab keu siumu masa.
19 Bak watée meukarat awaknyan hana teuma meudeurita, bak watée musém deuk awaknyan geupeuseb deungon peunajoh.
20 Teuma, meunyoe ureuëng jeuhet teutab geupeubinasa, musoh TUHAN teuma gadôh lagée bungöng nyang na timoh di dalam blang, awaknyan teuma gadôh lam asab.
21 Ureuëng jeuhet watée jingui atra gob hana jipulang, teuma ureuëng gét-gét jijok deungon sigala mangat até.
22 Ureuëng nyang geubri beureukat lé TUHAN teuma jeuet keuwaréh tanoh nyan, teuma ureuëng nyang geukutok lé Gobnyan teuma geu use.
23 TUHAN geubimbéng ureuëng nibak rot nyang harôh geulalu, Gobnyan geupeukong ureuëng nyang udeb jih teutab meukeunong bak até Gobnyan.
24 Meunyoe rhot, ureuëng nyan hana that meubahya, sabab TUHAN geumat jaroe ureuëng nyan.
25 Watée ulôn muda sampoe ka tuha lagée nyoe, gohlom na ulôn kalon ureuëng nyang jroh geutinggai lé TUHAN, atawa aneuëk cucoe ureuëng nyan jeuet keu ureuëng geumadée.
26 Gobnyan sabe geubri pinjam dan geujok mantong, dan aneuëk-aneuëk gobnyan jeuet keubeureukat keu geuhnyan.
27 Tinggai laju buet jeuhet, dan peubuet laju buet nyang jroh, dan keu siumu masa keuturonan gata jeuet keu ureuëng nyang tinggai teutab nibak tanoh nyan.
28 Sabab TUHAN geucinta ubak buet nyang ade dan gét, ureuëng nyang seutia ubak Gobnyan hana geupeubiyeu jihnyan teulanta. Gobnyan geulindong ureuëng nyan sampoe siumu masa, dan keuturonan ureuëng jeuhet teuma geupeuhanco.
29 Ureuëng saléeh jeuet keu waréh nibak tanoh nyan, dan tinggai teutab disinan keu siumu masa.
30 Ureuëng gét meunyoe jipeugah haba gét that bijaksana, gobnyan sabe jujoe nibak tutoe haba.
31 Huköm Po teu Allah na teukeubah lam até gobnyan, gobnyan hana meusimpang nibak huköm nyan.
32 Ureuëng jroh-jroh sabe jiluem lé ureuëng jeuhet nyang jimita keuseumpatan mangat jipoh maté.
33 teuma TUHAN hana geupeubiyeu ureuëng nyan rhot lam jaroe musoh, atawa jihuköm watée jipeusidang.
34 Meuharab kheueh ubak TUHAN dan taát kheueh ubak peurintah Gobnyan, teuma Gobnyan geuangkat gata jeuet keu waréh nibak tanoh nyan; gata teuma tangieng ureuëng jeuhet geupeubinasa.
35 Ulôn ka lheueh lôn ngieng ureuëng jeuhet nyang galak meusulet ngon raya haba; jihnyan lagée bak kayée nyang luhu ngon ukeue nyang lhok.
36 Watée ulôn jak, jihnyan ka hanale, lôn mita jihnyan, teuma hánmeuho saho dan hana meurumpok.
37 Neungieng kheueh ateueh ureuëng nyang jroh dan jujoe até; ureuëng nyang galak keu damé, nibak ureuëng nyan na masa ukeue nyang jroh.
38 Teuma ureuëng nyang meudesya geupeubinasa; keuturonan awaknyan geupeuhanco.
39 TUHAN geupeuseulamat ureuëng saléeh, dan geulindong awaknyan óh watée teuseupet.
40 Gobnyan geutulông dan geupeuseulamat awaknyan, dan geupeusie awaknyan nibak ureuëng-ureuëng jeuhet, sabab awaknyan jimeulindong ubak Gobnyan.


Chapter 38

1 Zabur Nabi Daud watée geupeuseumah keureubeuen peuingat.
2 TUHAN, bék kheueh neuhuköm ulôn watée Droeneueh beungéh, dan bék neuseksa ulôn watée Droeneueh mureuka.
3 Aneuk panah Droeneueh nyang neu timbak ateueh ulôn sampoe beusot dan luka tuboh lôn, dan jaroe Droeneueh keubit that brat meuteugon bak tuboh ulôn.
4 Ulôn sakét brat sabab Droeneueh beungéh; hana nyang seuhat nibak tuboh lôn sabab desya lôn.
5 Ulôn ngob lam ié raya keusalahan lôn, beuban desya lôn lumpah that geuhon meuginton u ateueh ulôn.
6 Luka meucabok nyang na nibak ulôn ka meunanoh dan meubée khéub, sabab ulôn ka lôn peubuet nyang bangai.
7 Ulôn meuteukui dan meubungkok, sipanyang uroe ulôn ruman lôn krot dan seudeh.
8 Deumam ngon seu-uem lagée apui keunong bak tuboh lôn, hana nyang seuhat nibak tuboh lôn.
9 Ulôn ka reumok hanco meukeupeng dan teunaga lôn pi habéh, ulôn apoh apah sabab até lôn gundah.
10 TUHAN, Droeneueh neuteupeue peue mantong nyang ulôn meuhéut, apoh apah ulôn hana nyang teusöm nibak Droeneueh.
11 Jantong lôn yo meugám-gám, teunaga lôn gadôh, dan mata ulôn ka jeuet keu rabon.
12 Kawöm dan rakan ulôn jiwéeh sabab peunyakét nyang na nibak ulôn, meunan cit kawöm keurabat ulôn jipeujiôh lôn.
13 Ureuëng nyang keuneuk poh maté lôn ka jijak teun taron; dan nyang keuneuk peuceulaka lôn laju jiancam keuneuk poh ulôn.
14 Teuma ulôn lagée ureuëng tulo nyang hana teudeungoe sapeue, dan lagée ureuëng kalu nyang hana hase peugah haba.
15 Keubit, ulôn saban that lagée ureuëng nyang hana hase teudeungoe sapeue, dan lé sababnyan hana ulôn bantah sapeue.
16 Teuma ulôn meuharab ubak Droeneueh, ya TUHAN, dan Droeneueh, TUHAN Allah lôn, neujaweueb ulôn.
17 Bék neupeubiyeu musoh ulôn galak jingieng ulôn nyang susah lagée nyoe bagoe, dan bék neupeubiyeu awaknyan rayeuk haba meunyoe ulôn ka guyah.
18 Ulôn rab reubah, hana piôh ulôn sakét sabe.
19 Ulôn meungaku mandum desya lôn; até ulôn gundah watée lôn pike keusalah lôn.
20 Ureuëng-ureuëng nyang jimeumusoh ngon ulôn ramé dan teuga-teuga, awaknyan jibanci that ubak cara udeb lôn.
21 Ureuëng nyang jibalah buet nyang jroh deungon nyang jeuhet jimeumusoh ngon lôn sabab ulôn lôn peubuet nyang jroh.
22 Ya TUHAN, bék neutinggai ulôn, bék neujiôh nibak ulôn, ya Allah lôn.
23 Neuteuka kheueh bubagaih neutulông ulôn, ya TUHAN nyang peuseulamat ulôn.


Chapter 39

1 Keu teupimpén kor. Zabur Nabi Daud. Keu Yedutun.
2 Ulôn pike, "Ulôn lôntem jaga droe mangat bék meudesya deungon lidah lôn. Ulôn hán lôntem peugah haba simantong ureuëng jeuhet mantong tô."
3 Ulôn seungab siribée basa, sampoe teupeurugo droe lôn keudroe. Dan deurita nyang ulôn rasa teurasa meutamah brat;
4 ulôn teuginton deungon gundah nyang paleng hebat. Maken lôn pike, até ulôn seumaken susah; dan akhé jih ulôn peugah kheueh lagée nyoe,
5 "TUHAN, neupeugah kheueh, pajan ajai ulôn nyoe mangat jeuet lôn teupeue padub na paneuk jih umu ulôn."
6 Padub na paneuk nyang ka teuntée umu lôn! Keu Droeneueh jangka udeb lôn nyang hana meumakna. Keubit, manusia nyoe lagée jiprôh lé nafáh,
7 udeb jih meunan mantong lagée bubayang. Banmandum buet gabuek jihnyan sia-sia hana meuguna; jihnyan jitamon hareuta, teuma hana jiteupeue soe nyang peuguna atranyan.
8 Jinoenyoe, peue nyang harôh ulôn preh, ya TUHAN? Ubak Droeneueh kheueh peue nyang ulôn harab.
9 Neupeulheueh kheueh ulôn nibak banmandum desya-desya lôn, bék neupeubiyeu ulôn jeuet barang hinaan lé ureuëng bangai.
10 Ulôn seungab lôn iemdroe babah lôn gampet hana lôntem peugah haba, sabab Droeneueh kheueh nyang heungko ulôn.
11 Neucok kheueh huköman Droeneueh nibak ulôn nyoe, sabab ulôn rab maté neuheuntam lé Droeneueh.
12 Manusia sabab lé buet jih nyang salah; neuhuköm dan neuheuntam lagée kamoe Droeneueh peuhanco peue nyang meuyuém nibak jihnyan. Keubit, manusia lagée jiprôh lé nafáh mantong.
13 Deungoe kheueh doá ulôn, ya TUHAN, neungieng kheueh meulakée ulôn; bék neuseungab mantong meunyoe ulôn mo. Lagée banmandum indatu ulôn, teuma sikeujab mantong ulôn meunumpang ubak Droeneueh.
14 Bék neupeukaru ulôn, mangat ulôn jeuet keumangat bahpi bacut kong, sigohlom ulônjak dan hana lôn gisa le.


Chapter 40

1 Keu teupimpén kor. Zabur Nabi Daud.
2 Deungon saba ulôn preh-preh TUHAN tulông; laju Gobnyan geupakoe ulôn dan geudeungoe peue nyang ulôn lakée.
3 Gobnyan geutarek ulôn nibak uruek nyang paleng meubahya, dan nibak luhôb paya. Gobnyan geukeubah ulôn di ateueh bukét batée, deungon nyan langkah ulôn mantab.
4 Gobnyan geupeuruno ulôn meuca-e ngon lagu barô, lagu seumujoe keu Allah geutanyoe. Jai that ureuëng nyang ngieng Gobnyan dan laju jiteuka teumakot, dan laju jipeucaya ubak TUHAN.
5 Mubahgia kheueh ureuëng nyang peucaya ubak TUHAN, nyang hana jiseutôt jiseumah dewa-dewa, atawa jilakée tulông ubak ureuëng nyang sombong.
6 TUHAN, padubna le cebtaan Droeneueh keu kamoe, ya TUHAN Allah ulôn, Droeneueh hana sa ngon peue mantong teupeu sa! Jai lumpah na reuncana Droeneueh nyang keubit takjob keu kamoe, hana mungken teucalitra banmandum nyan.
7 Peuseumahan dan keureubeuen nyang teuhidang hana Droeneueh galak, meunan cit keureubeuen nyang teutot dan keureubeuen peusampôh desya nyan pih hana Droeneueh tunggée. Teuma Droeneueh ka neubri keu ulôn geulinyueng nyang hase ulôn deungoe su Droeneueh.
8 Laju ulôn peugah, "Nyoe kheueh ulôn, didalam kitab meugulong na teutuléh keu ulôn:
9 Ulôn harok ulôn peubuet keuheundak Droeneueh, ya Allah, huköm Droeneueh ulôn keubah didalam até."
10 Lam rapat dipat mantong na meugumpôi umat Droeneueh ulôn peugah haba geumbira bahwa Droeneueh ka neupeuseulamat kamoe. Deungon hana lôn piôh-piôh hainyan ulôn peusampoe, Droeneueh neuteupeue banmandum nyan, ya TUHAN.
11 Haba keuhai seulamat nyan hana ulôn keubah lam até, nyang neutulông dan keuseutiaan Droeneueh sabe ulôn peugah. Didalam kawan umat Droeneueh nyang meusapat hana ulôn iemdroe, teuma ulôn peusampoe geunaséh dan keuseutiaan Droeneueh.
12 TUHAN, bék kheueh neupiôh neugaséh keu ulôn; neulindong kheueh ulôn sabe deungon gaséh dan seutia Droeneueh.
13 Ulôn jikeupong lé malapeutaka nyang le, jeumeulah jih hana ék teuitong. Ulôn jitiyeub lé desya-desya lôn sampoe ulôn hana hase lôn keumalon. Jeumeulah jih leubeh le nibak ôk nyang na di ateueh ulée lôn, sabab nyan ulôn jeuet keu putôh asa.
14 Ya TUHAN, neupeuseulamat kheueh ulôn, beubagaih kheueh ya TUHAN, neujak tulông ulôn!
15 Bah kheueh ureuëng nyang keuneuk peumaté ulôn teupeu taloe dan jiplueng lagée ureuëng bingong. Bah kheueh ureuëng nyang jisurak keuhai ulôn nyang malang teupoh lom sampoe jisurot dan teuhina.
16 Bah kheueh ureuëng nyang peukém ulôn teukeujot dan malée.
17 Seumoga banmandum ureuëng nyang jiseumah Droeneueh meusukacita dan meugeumbira, dan banmandum yang jicinta ubak seulamat nyang teuka nibak Droeneueh hana piôh jipeugah, "Keubit agong that kheueh TUHAN!"
18 Ulôn nyoe gasien dan leumoh, teuma TUHAN geupeurati ulôn. Droeneueh kheueh nyang tulông dan peuseulamat ulôn, bék meulet, ya TUHAN lôn!


Chapter 41

1 Keu teupimpén kor. Zabur Nabi Daud.
2 Mubahgia kheueh ureuëng nyang na jipakoe keu ureuëng nyang leumoh hana meudaya; TUHAN teuma geutulông ureuëng nyan watée jih lam keuadaan teuseupet.
3 TUHAN teuma geulindong dan geupeulara ureuëng nyan, Gobnyan geubri bahgia di ateueh bumoe, dan hana geuseurah ureuëng nyan lam jaroe musoh jih.
4 TUHAN teuma geutulông ureuëng nyan watée jihnyan sakét, dan geupeupuléh lom ureuëng nyang sakét nyan.
5 Kheun ulôn, "Ulôn ka meudesya ubak Droeneueh, ya TUHAN, neugaséh kheueh ulôn dan neupeupuléh kheueh ulôn."
6 Musoh ulôn jipeugah nyang jeuhet keuhai ulôn, meukeusut awaknyan mangat ulôn nyoe maté dan jituwo lé gob.
7 Ureuëng nyang jak saweue ulôn hana jujoe dan ikhlas até jih. Awaknyan jijak peusapat haba brôk keuhai ulôn, laju jijak peugah ho mantong ban siseun lingka.
8 Banmandum nyang jibanci keu lôn jimeusáh-sáh; awaknyan jipeugah hai nyang paleng brôk keuhai ulôn.
9 Kheun awaknyan, "peunyakét ureuëng nyan parah that, jihnyan hana mungken jibeudôh le."
10 Meunan cit rakan nyang paleng krab nyang ulôn peucaya, ureuëng nyang pajohbu meusajan ngon ulôn, nyan pih ka jihina lôn.
11 neugaséh kheueh keulôn, ya TUHAN, neupeupuléh kheueh ulôn, mangat ulôn hase lôn balaih buet nyang jeuhet nibak siteuru ulôn.
12 Meunyoe ulôn hana jipeutaloe lé musoh lôn, barô kheueh lôn teupeue bahwa Droeneueh neubila ulôn.
13 Droeneueh neutulông ulôn sabab ulôn jujoe, dan neupeujeuet ulôn udeb meusajan ngon Droeneueh keu siumu masa.
14 Pujoe kheueh TUHAN, Allah Israel! Pujoe kheueh Gobnyan phon saát nyoe dan siumu masa!


Chapter 42

1 Keu teupimpén kor. Ca-e peulajaran kawöm Korah.
2 Lagée rusa jihawa keu ié krueng, meunan kheueh jiwa lôn rindu ubak Droeneueh, ya Allah.
3 Ulôn rindu ubak Allah nyang udeb, pajan ulôn jeuet lônjak meuiébadat di Baét Gobnyan?
4 Uroe malam lalée ulôn mo, na kheueh ié mata peunajoh ulôn. Sipanyang uroe musoh lôn jitanyong, "Dipat Allah gata?"
5 Até ulôn peudeh meunyoe teuingat yohmasa ilée, watée ulôn jak ubak Baét TUHAN meusajan ngon ureuëng nyang jipeuna peurayaan. Ulôn lônjak dikeue arak-arakan deungon seumurak nyang meuhubo dan ca-e ngon lagu puja dan pujoe.
6 Pakon até ulôn seudeh ngon geulisah? Ulôn meuharab ubak Po teu Allah. Teuma ulôn meusyuko lom ubak Gobnyan, ubak Allah lôn dan nyang peuseulamat ulôn.
7 Nibak tanoh teumpat teuböih nyoe até ulôn ka hanco ngon reumok, sababnyan ulôn ingat ubak TUHAN. Jiwa lôn hanyot u dalam arus keuseudehan, ulôn ka jiba lé ié raya keukacauan; lagée su umbak ié grob nibak Krueng Yordan nibak Gunong Hermon dan Gunong Mizar.
9 Seumoga TUHAN geutunyok geunaséh Gobnyan óh watée uroe, mangat watée malam ulôn hase meuca-e, dan meudoá ubak Allah mata ié udeb lôn.
10 Ulôn peugah ubak Allah, nyang bila ulôn, "Pakon Droeneueh neutuwoe keu ulôn? Pakon ulôn nyoe harôh meudeurita, sabab jiteugom lé musoh-musoh lôn?"
11 Até lôn hanco meukeupeng-keupeng sabab jipeuhina lé musoh. Awaknyan hana piôh jiteumanyong, "Dipat Allah gata?"
12 Pakon até lôn seudeh dan geulisah? Ulôn meuharab ubak Po teu Allah. Teuma ulôn meusyuko lom ubak Gobnyan, ubak Allah lôn nyang ka geupeuseulamat ulôn.


Chapter 43

1 Neubri kheueh keuadelan keu ulôn, ya Allah, neuprah kheueh hak ulôn ateueh bansa nyang doraka. Peubeubaih kheueh ulôn nibak ureuëng jeuhet dan nyang teumipée.
2 Droeneueh kheueh, Allah peulindong ulôn; pakon Droeneueh neutinggai ulôn? Pakon ulôn harôh meudeurita sabab jiteugom lé musoh-musoh lôn?
3 Neupeugah kheueh keuseutiaan Droeneueh mangat teupeu peungeuh dan teubimbéng ulôn, mangat jeuet ulôn jakwoe u Sion, bukét Droeneueh nyang suci dan u Baét teumpat tinggai Droeneueh.
4 Teuma ulôn peukeue ubak miseubah Allah, meuhadab Allah pucak keubahgiaan lôn. Ulôn teuma meuca-e dan lôn peumeuén keucapi, keulôn pujoe Droeneueh, ya Allah, Allah ulôn.
5 Pakon até ulôn seudeh dan geulisah? Ulôn meuharab ubak Allah, dan ulôn meusyukoe lom ubak Gobnyan, ubak Allah lôn dan nyang ka peuseulamat ulôn.


Chapter 44

1 Zabur kawöm Korah. Ca-e peulajaran. Keu teupimpén kor.
2 Ya Allah, kamoe ka lheueh kamoe deungoe keudroe kisah nyang geucalitra lé indatu kamoe keuhai karya nyang hebat nyang Droeneueh peubuet bak jamén ilée.
3 Droeneueh keudroe nyang use bansa-bansa mangat jeuet umat Droeneueh tinggai teutab di nanggroe awaknyan. Bansa-bansa nyang laén Droeneueh peuceulaka, teuma umat Droeneueh neupeubiyeu meukeumang meu aneuëk cucoe.
4 Tanoh nyan kon jireubot lé awaknyan deungon peudeueng; dan bukon deungon teunaga jih keudroe awaknyan meunang, teuma deungon kuasa dan cahya teuka Droeneueh, sabab Droeneueh neugaséh keu umat Droeneueh.
5 Droeneueh kheueh Raja ulôn dan Allah lôn, nyang bri meunang keu umat Droeneueh.
6 Deungon kuasa Droeneueh kamoe peutaloe bubena musoh kamoe, dan kamoe peutaklok ureuëng-ureuëng nyang jiseurang kamoe.
7 Sabab ulôn hana ulôn peuguna aneuk panah lôn, meunan cit ngon peudeueng hana hase jipeuseulamat ulôn.
8 Teuma Droeneueh kheueh nyang ka peuseulamat kamoe nibak mandum musoh kamoe, dan neupeutaloe mandum ureuëng nyang jibanci kamoe.
9 Teuma kamoe sabe kamoe peumeugah Droeneueh, dan hana putôh-putôh kamoe meusyuko ubak Droeneueh.
10 Teuma jinoenyoe Droeneueh ka neutinggai kamoe dan neupeubiyeu kamoe jipeutaloe. Droeneueh hanale neumaju lam baresan kamoe.
11 Neupeubiyeu kamoe meunan mantong kamoe peuplueng droe nibak musoh kamoe, dan awaknyan ban galak droe habéh jireupah hareuta kamoe.
12 Neupeubiyeu kamoe jisie lagée jisie kaméng, dan neupeu crebre kamoe lamkawan bansa-bansa.
13 Neupeubloe umat Droeneueh deungon yuem nyang hana hareuga, dan hana meuteumé laba bahpi sikada.
14 Neupeujeuet kamoe barang hinaan lé ureuëng lingka kamoe jipeukém jipeuayang sira jihina.
15 Neupeujeuet kamoe barang jipansi lé bansa-bansa; sira jiasek ulée awaknyan jihina kamoe.
16 Siuroe seupôt ulôn jirapa, lôn tanggong malée dan peuteubai muka,
17 sabab lôn deungon jiejek sira jihina nibak babah musoh nyang jitroh dam.
18 Banmandum nyan ka jipeurhot u ateueh kamoe bahpi kamoe hana meutuwoe ubak Droeneueh atawa kamoe khianat janji kamoe deungon Droeneueh.
19 Até kamoe hana kamoe iengkeue ubak Droeneueh; dan peurintah Droeneueh hana teuma kamoe peujayéh.
20 Teuma trok até Droeneueh neutinggai kamoe didalam seupôt; kamoe hana meudaya lamkawan beulatang juah.
21 Meunyoe seukirajih kamoe hanale kamoe seumah Po teu Allah, teuma kamoe meudoá ubak ilah nyang laén,
22 nyang kamoe peubuet nyan pasti geuteupeue lé Po teu Allah, sabab Gobnyan geuteupeue banmandum rahsia até kamoe.
23 Deumi Droeneueh kamoe hana putôh-putôh teuancam lé mawöt, dan jipeusaneut kamoe lagée bubiri nyang teusie.
24 Beudôh kheueh, ya TUHAN! Pakon Droeneueh neuteungéut? Beudôh kheueh! Bék neutulak kamoe lagéenyoe siumu masa.
25 Pakon Droeneueh neumusöm, dan neutuwoe ubak seungsara dan keusosahan kamoe?
26 Kamoe reubah hanco meukeupeng di ateueh tanoh, teuéh teunyue di dalam abée sabab kamoe taloe.
27 Beudôh kheueh dan neuteuka kheueh neutulông kamoe, peuseulamat kheueh kamoe sabab gaséh Droeneueh.


Chapter 45

1 Zabur kawöm Korah. Ca-e gaséh. Keu peumimpén kor. Meunurot paduan nada: Bungöng bakong.
2 Tutoe haba nyang maméh jiteubiet lam babah ulôn, ulôn peuseumah ca-elôn keu raja. Lagée gensée sidroe pujangga nyang malem, lidah lôn kasiab ulôn meuca-e.
3 Droeneueh nyang paleng lagak lamkawan mandum manusia, tutoe haba droeneueh peunoh deungon nyang jroh lom mubahgia, sababnyan droeneueh geubri beureukat lé Po teu Allah keu siumu masa.
4 Neulat peudeueng droeneueh nibak keuieng, hai raja peukasa, droeneueh lumpah that agong dan seumarak!
5 Maju kheueh deungon gagah neutuju ubak keujayaan jak peujuang keubeunaran dan keuadelan nyang leumoh leumbot; deungon teunaga nyang na nibak gata reubot kheueh keumeunangan nyang raya!
6 Panah gata nyang tajam sampoe peureulong jantong até musoh gata, bansa-bansa reubah meusumpom dikeue gaki gata.
7 Allah geubri kuasa keu gata mangat hase tamat peurintah, kuasa gata meuteun siumu masa; deungon ade rakyat gata tapeurintah.
8 Meunan cit gata tacinta ubak nyang beuna nyang tabanci keu nyang jeuhet; sabab nyan, Allah, Allah gata ka geupiléh gata, dan geupeubahgia gata leubeh nibak raja-raja nyang laén.
9 Peukayan gata meubée meuhalak deungon bée mur, gaharu dan ceundana; ureuëng nyang meu-én musik nyang na di meuligoe gadeng peubuet até gata lumpah bahgia.
10 Lamkawan deundayang meuligoe disinan na putroe-putroe raja. Blah uneuen takhta geudong pereumaisuri deungon piasan méuh murni.
11 Hai Putroe, deungoe kheueh ulôn peugah nyoe, tapeutuwoe kheueh ubak bansa dan waréh kawöm gata.
12 Deungon lagak dan ceudah nyang na nibak gatanyan até raja sampoe teupikat, gobnyan teungku gata, tundok kheueh ubak geuhnyan.
13 Peunduduek Tirus jiba peuseumahan keu gata; ureuëng kaya jiuseuha jicok até gata.
14 Putroe raja geutamong deungon peunoh seumarak, gawon nyang geungui meusulam deungon méuh.
15 Deungon peukayan nyang meubagoe wareuna gobnyan jijakba meuhadab raja, ji-iréng lé bubena aneuëk dara, dan rakan-rakan jih, meunan cit awaknyan keu raja.
16 Sira jiseumurak ngon subra dan geumbira bak watée teuintat dan peutamong u dalam meuligoe raja!
17 Droeneueh, raja ulôn, teuma meuteumé aneuëk agam nyang le mangat jiduek nibak takhta indatu gata. Awaknyan teuma tapeujeuet keu ureuëng nyang mat kuasa ateueh bansigom bumoe.
18 Deungon ca-e nyoe ulôn peumaklum gata tron meutron dan bansa-bansa teuma jipujoe gata siumu masa


Chapter 46

1 Zabur kawöm Korah. Keu peumimpén kor. Deungon ca-e Alamot.
2 Allah na kheueh nyang lindong dan teunaga geutanyoe; Gobnyan sabe lam siab dan mampu geutulông pajan mantong geutanyoe meukarat.
3 Teuma geutanyoe hana teumakot, bahpi bumoe nyoe meuhayak, dan gunong-gunong karam lam laôt raya;
4 bahpi laôt jipôt lé geulumbang raya, dan bukét ngon gunong geuhayon keunong heungko gobnyan.
5 Na alue ié krueng ji-ile nyang that galak banda Allah, teumpat tinggai Allah Nyang Mahamanyang.
6 Allah tinggai teutab disinan, teuma bandanyan hana hanco; gobnyan teuma geutulông watée beungoh uroe nyang ceudah.
7 Su Allah lagée geulanteue, dan bumoe teuma hanco meutabu; bansa-bansa yo ngon teukeujot, keurajeuen-keurajeuen nanggroe teuma reuloh.
8 TUHAN Nyang Mahakuasa na sajan geutanyoe, Allah Nabi Yakub geulindong geutanyoe.
9 Jak keunoe, ngieng kheueh peue nyang teungoh geupeubuet lé TUHAN; padubna hireuen meuneubuet Gobnyan di ateueh bumoe!
10 Gobnyan nyang peureuda prang bansigom donya, gando dan leumbeng habéh geupeuhanco, meunan cit mandum peurisai bulat ka habéh geutot.
11 Feureuman Gobnyan, "Peupiôh prang nyan; beutateupeue kheueh, Ulôn nyoe Allah, Ulônnyoe agong lamkawan bansa-bansa, dan agong bansaboh bumoe."
12 TUHAN Nyang Mahakuasa na meusajan geutanyoe, Allah Nabi Yakub nyang lindong geutanyoe.


Chapter 47

1 Zabur kawöm Korah. Keu peumimpén kor.
2 Seumurak dan gata péeh paleuet kheueh deungon geumbira, hai banmandum bansa! Pujoe kheueh Allah deungon seumurak nyang meuhubo!
3 Sabab TUHAN Nyang Mahamanyang na kheueh nyang paleng dahsyat, Raja Agong nyang mat kuasa bansigom bumoe.
4 Gobnyan nyang jok keugeutanyoe ateueh bubena bansa, dan nyang peujeuet geutanyoe hase takuasa ateueh mandum sukée-sukée bansa.
5 Gobnyan nyang piléh keugeutanyoe tanoh pusaka nyang tanyoe peureulée, keubanggaan bansa nyang geusayang.
6 Allah ka geu-ék ateueh takhta Gobnyan, teu-iréng ngon su seumurak nyang meuhubo lom su sangka kala.
7 Meuseulaweuet seumujoe kheueh keu Po teu Allah, ca-e kheueh dan seulaweuet kheueh puja ngon pujoe keu raja geutanyoe!
8 Allah na kheueh Raja ateueh banmandum bumoe, pujoe kheueh Gobnyan deungon ca-e seulaweuet nyang peunoh deungon seuni!
9 Allah geuduek di ateueh takhta Gobnyan nyang suci; Gobnyan geupeurintah ateueh bansa-bansa.
10 Bubena peumimpén bansa habéh meusaho sibagoe umat Po teu Allah nyang geupujoe lé Nabi Ibrahim. Sabab Allah na kheueh Raja sigala raja, Gobnyan lumpah that agong dan mulia.


Chapter 48

1 Zabur kawöm Korah.
2 Keubit that agong TUHAN dan lumpah teupujoe di Banda Allah geutanyoe, di bukét nyang suci.
3 Sion, Bukét Allah meujulang peureumai banda Raja Agong nyang lumpah gurangsang bansaboh bumoe.
4 Allah tinggai didalam puri nyang indah, dan teunyata Gobnyan sidroe kheueh peulindong gobnyan.
5 Ngieng kheueh, raja-raja geumeusapat; awaknyan teuka keuneuk jijak seureubu.
6 Teuma, banteukalon bukétnyan, awaknyan teuceungang ka tahé manté; awaknyan teukeujot dan laju jiplueng deungon teubingong-bingong.
7 Disinan awaknyan yo meutot-tot teumakot dan sakét, lagée ureuëng inong nyang keuneuk peulahé aneuëk,
8 lagée kapai nyang hanco jipupo lé angén badée raya.
9 Lagée nyang tanyoe deungoe, jinoe ka deuh takalon, di Banda TUHAN Nyang Mahakuasa. Banda nyan na kheueh Banda Allah geutanyoe, Gobnyan geubila bandanyan keu siumu masa.
10 Di dalam Baét Droeneueh kamoe manueng sira meurateb keu gaséh Droeneueh, ya Allah.
11 Nan Droeneueh meusyeuhu dan teupujoe bansaboh bumoe, Droeneueh neumat peurintah deungon ade.
12 Bah kheueh rakyat Sion dan Yehuda jimeusurak sabab geumbira, sabab Droeneueh neuhuköm lawan awaknyan.
13 Keulileng kheueh Sion, wet-wet kheueh nibak banda nyan, dan neuitong kheueh padubna meunara nyang na disinan.
14 Peurati kheueh nibak bintéh beuton jih, dan peureksa kheueh kuta jih, mangat gata hase tacalitra nibak keuturonan gata:
15 "Gobnyan kheueh Allah, Allah geutanyoe keu siumu masa, Gobnyan teuma geupimpén geutanyoe sampoe keukai abadi."


Chapter 49

1 Zabur kawöm Korah. Keu peumimpén kor.
2 Deungoe kheueh, hai sigala bansa, pasang kheueh geulinyueng hai peunduduek donya,
3 bah kheueh nyan ureuëng seudeurhana, meunan cit ngon ureuëng nyang meugah raya, bah kheueh nyan ureuëng gasien, meunan cit keu ureuëng kaya.
4 Ulôn teuma lôn meututoe ngon haba nyang bijaksana, pikeran ulôn lhok lumpah na.
5 Ulôn teuma lôn simak pribasa, dan lôn peutrang makna jih sira lôn peumeuén keucapi.
6 Ulôn hana teumakot watée ulôn ka jiseupet, watée ulôn jikeupong lé musoh nyang jeuhet.
7 Awaknyan bandum jimeubangga ngon atra keukayaan, dan jipeusombong droe ngon atra jih nyang kaya.
8 Nyang sikeubiet jih hana meusidroepi nyang hase jipeuseulamat syedara jih, atawa jibayeue yuem teutuboh syedara jih nyan ubak Po teu Allah.
9 Peue mantong nyang jibri meuneujok jih nyan hana teuma séb; keubit that meuhái yuem teutuboh nyawöng syedara jih nyan,
10 mangat jihnyan teupeusie nibak maté dan jeuet udeb siumu masa.
11 Hana, jihnyan teuma jingieng keudroe bahwa ureuëng bijaksana pih teuma binasa. Ureuëng bangai mandum binasa, dan jitinggai atra jih le keu ureuëng laén.
12 Awaknyan teuma jitinggai lam jrat siumu masa; nyan kheueh teumpat tinggai awaknyan sampoe akhé masa, bah kheueh yoh watée ilée jihnyan luwah that tanoh.
13 Manusia hana hase udeb sabe lam makmu; saban lagée beulatang, ureuëng nyan teuma binasa.
14 Meunan kheueh naseb ureuëng nyang peubangga droe jih, dan watée ukeue ureuëng nyang puih ngon tutoe haba.
15 Lagée bubiri, awaknyan ka teupeuteuntée keu maté; mawöt teuma jeuet keu ureuëng nyang rabe awaknyan. Ban seuboh buta awaknyan ka jipeutaloe lé ureuëng jujoe; tuboh awaknyan nyang gagah ka jeuet keubrok lam donya ureuëng maté, jiôh that nibak teumpat tinggai nyang mewáh.
16 Teuma Po teu Allah geupeu lheueh ulôn, Gobnyan teuma geupeuleukang ulôn nibak keukuasaan mawöt.
17 Bék teumakot meunyoe na sidroe ureuëng ka jeuet keukaya, dan hareuta jih meutamah le.
18 Sabab watée ureuëng nyan maté hana sapeue pih nyang jiba, atra jih nyan hana jiba lam kubu meusajan droe.
19 Meunan cit meunyoe na sidroe ureuëng nyang meu untông lam udeb jih, dan ji pujoe-pujoe sabab ureuëng nyan meuhase lam udeb nyoe,
20 ureuëng nyan pih jiseutôt indatu jih nyang ka awai di alam baka ubak teumpat nyang seupôt glab siumu masa.
21 Manusia hana hase udeb sabe lam keuméwahan, saban lagée beulatang, jihnyan pih teuma maté.


Chapter 50

1 Zabur Asaf.
2 Phon di Sion, banda nyang paleng tari, Allah teuka meucahya muble-ble.
3 Allah geutanyoe teuka dan hana geutinggai seungab, awai teuka apui nibak Gobnyan nyang hu jimeuéue lagée jilieh-lieh, dan jikeulileng lé angén badée nyang lumpah teuga.
4 Gobnyan geutawök laju langét ngon bumoe mangat jipeusaksi lé awaknyan bahwa Gobnyan teungoh geupeuna sidang nibak teumpat teusidang umat Gobnyan.
5 Feureuman Gobnyan, "Gata peusapat laju banmandum umat Ulôn nyang ka ji-ikat janji deungon Ulôn, dan teupeukong janjinyan deungon keureubeuen nyang teusie."
6 Langét laju jipeugah bahwa Allah geupeusidang umat Gobnyan, dan bahwa Gobnyan keudroe nyang jeuet keuhakém jih.
7 "Deungoe kheueh, hai umat Ulôn, Ulôn keuneuk peugah haba, Israel, Ulôn keuneuk meusaksi keugata; Ulôn nyoe Allah, Po teu Allah gata.
8 Bukon sabab lé keureubeuen gata Ulôn tudoh gata; keureubeuen nyang gata teutot sabena dikeue Ulôn.
9 Ulôn hana peureulée leumô nyang na didalam weue gata, atawa kaméng nyang na didalam kawan beulatang peulara gata;
10 sabab banmandum beulatang nyang na di dalam uteuen na kheueh atra Ulôn, dan beulatang peulara nyang na di ateueh gunong meureubée le jih.
11 Banmandum cicém nyang na di ateueh gunong nyan pih atra Ulôn, dan banmandum makhluk nyang na udeb didalam blang beulantara.
12 Meunyoe Ulôn deuk, hana peureulée Ulôn peugah ubak gata, sabab bumoe banmandum asoe jihnyan na kheueh milék Ulôn.
13 Ulôn hana Lôn makheun uengkot sie leumô agam, meunan cit hana teuma Ulôn jieb darah kaméng agam.
14 Peuseumah kheueh keureubeuen ucapan syuko keu Po teu Allah, tapeutrok kheueh janji gata ubak Nyang Mahamanyang.
15 Meulakée kheueh ubak Ulôn bak watée gata meukarat, teuma Ulôn kupeuleuh gata, dan gata teuma tapujoe Ulôn."
16 Teuma ubak ureuëng jeuhet TUHAN geupeugah meunoe, "Gata hana hak tapeugah keuhai huköm Ulôn, dan kheun-kheun keuhai peujanjian Ulôn.
17 Sabab gata hana tatem teurimong nyang Ulôn peugah, dan tatulak peue mantong nyang Ulôn peurintah.
18 Meunyoe deuh gata ngieng sidroe ureuëng ceumucue, laju gata seutôt deungon ureuëng nyan, dan gata meurakan deungon ureuëng-ureuëng nyang galak jipeubuet zina.
19 Babah gata sabe tapeugah nyang jeuhet-jeuhet, dan sabe siab deungon tipée muslihat gata.
20 Hana piôh gata fiteunah syedara gata, dan taupat ngon tapeubrok-peubrok syedara kandong gata.
21 Nyan kheueh nyang gata peubuet, teuma Ulôn seungab mantong, teuma gata pike Ulôn nyoe lagée gata. Dan bak saátnyoe Ulôn kurapa gata, dan banmandum nyan Ulôn peujeuet keunyata keugata.
22 Simak kheuehnyoe, hai gata nyang tuwoe ubak Po teu Allah; jaga kheueh bék sampoe Ulôn peubinasa gata, dan hana ureuëng nyang hase jipeuseulamat gata.
23 Ureuëng nyang peuseumah syukoe sibagoe keureubeuen, ureuëng nyan kheueh nyang jihoreumat Ulôn; dan keu ureuëng nyan teupeusiab rot ueh keu ureuëng nyan Ulôn tunyok keuhai seulamat nibak ulôn."


Chapter 51

1 Keu teupimpén kor. Zabur nyang geutuléh lé Nabi Daud
2 watée gobnyan ka lheueh geudot lé Nabi Natan sabab geumeumukah deungon Batsyeba.
3 Neugaséh kheueh keu ulôn ya Allah, sabab Droeneueh teutab neugaséh, neusampôh kheueh desya ulôn sabab gaséh sayang Droeneueh nyang raya.
4 Neu rhah kheueh peue mantong buet ulôn nyang jeuhet; neupeugleh kheueh ulôn nibak banmandum desya-desya lôn.
5 Sabab ulôn meungaku ubak buet-buet ulôn nyang salah, desya lôn sabe lôn ingat.
6 Ubak Droeneueh, ubak Droeneueh mantong ulôn meudesya, dan ulôn peubuet peue nyang Droeneueh anggab jeuhet. Dan kapatot Droeneueh neuhuköm ulôn, ade that keuputosan Droeneueh.
7 Nyang sikeubit jih, ulôn nyoe jeuhet yoh phon ulôn u na ateueh donya nyoe, dan na desya yoh phon na lam pruet ma.
8 Droeneueh neulakée até nyang jujoe; peupeunoh kheueh baten ulôn deungon hikeumat Droeneueh.
9 Peugleh kheueh ulôn, teuma ulôn jiteuka suci; pumanö kheueh ulôn, teuma ulôn leubeh putéh nibak gapeueh.
10 Bah kheueh ulôn deungoe haba suka cita, mangat até nyang ka Droeneueh peurumok nyoe geumbira lom teuma.
11 Paleng kheueh wajah Droeneueh nibak desya ulôn, dan neusampôh kheueh bubena salah lôn.
12 Cebta kheueh até nyang gleh lom murni keu ulôn, ya Allah, neupeubarô kheueh até ulôn deungon seumangat nyang tabah.
13 Bék kheueh ulôn nyoe neutiek dikeue Droeneueh, dan bék kheueh neucok roh Droeneueh nyang suci nyang na nibak ulôn nyoe.
14 Neupeujeuet kheueh ulôn nyoe mangat geumbira lom sabab keuhai seulamat nyang na nibak Droeneueh, neubri kheueh keu ulôn até nyang reula mangat lôn taát ubak Droeneueh.
15 Dan ulôn teuma lôn peurunoe peurintah Droeneueh ubak ureuëng nyang meudesya, mangat awaknyan jiwoe lom ubak Droeneueh.
16 Peuseuliseh kheueh ulôn nibak mawöt, ya Allah nyang peuseulamat ulôn, dan deungon até nyang geumbira teuma ulôn jak peugah ho-ho mantong keuhai keuadelan Droeneueh.
17 Ya TUHAN, neutulông kheueh ulôn mangat jeuet lôn peugah haba, dan ulôn teuma lôn pujo-pujo Droeneueh.
18 Droeneueh hana neuharôk keu keureubeuen nyang teusie; meunyoe ulôn peuseumah keureubeuen nyang teutot, Droeneueh hana neugalak.
19 Keureubeuen keu Po teu Allah na kheueh até nyang reumok reundam, até nyang tundok dan meutobat hana Droeneueh tulak.
20 Ya Allah, neutunyok kheueh keubaiékan Droeneueh ubak Sion, neupeudong kheueh lom bintéh-bintéh beuton Yerusalem.
21 Teuma Droeneueh neutem teurimong keureubeuen nyang layak, keureubeuen nyang teutot dan keureubeuen nyang mantong gét leumô agam teuma teukeureubeuen di ateueh meuja miseubah Droeneueh.


Chapter 52

1 Keu teupimpén kor. Ca-e-ca-e nyang geupeuruno lé Nabi Daud,
2 bak watée Doëg, ureuëng Edom, teuka jijak peugah ubak Saul bahwa Nabi Daud ka trok u rumoh Abimelekh.
3 Hai ureuëng teuga, pakon gata tapeusombong ateueh keujeuhetan gata ateueh ureuëng nyang geugaséh lé Po teu Allah?
4 Sipanyang uroe buet teumipée dan tareuncana keuhai buet jeuhet; lidah gata lagée sikin cuko nyang tajam.
5 Gata leubeh tacinta keu nyang jeuhet nibak nyang jroh, dan leubeh galak tameusulet nibak tapeugah haba nyang beuna.
6 Deungon tutoe haba gata, gata tapeungeut gob dan tapeusakét até ureuëng laén!
7 Teuma ingat kheueh gata geupeubinasa lé Po teu Allah keu siumu masa; gata geudrob dan geubahua nibak rumoh gata, dan laju geupeumaté lam donya ureuëng udeb.
8 Ban jingieng nyan, ureuëng saléeh laju teuka teumakot, dan laju jipeukém gata sira jipeugah,
9 "Nyan kheueh ureuëng jih nyang hán jitem meulindong ubak Po teu Allah, teuma jimeuharab keukayaan nyang meulimpah dan jimita keuamanan ubak barang rampasan."
10 Teuma ulôn nyoe lagée bak zaiton nyang ijo didalam Baét Allah. Ulôn peucaya bahwa Allah teutab geugaséh keu siumu masa.
11 Ulôn sabe keuneuk meusyuko ubak Droeneueh dikeue umat Droeneueh ulôn peusampoe keubaíekan Droeneueh.


Chapter 53

1 Keu teupimpén kor. Meunurot ca-e: Mahalat. Ca-e-ca-e peungajaran Nabi Daud.
2 Ureuëng bangai jikheun lam até jih. "Allah nyan hana." Buet awaknyan jeuhet dan kuto; hana nyang jipeubuet nyang jroh.
3 Lam syeuruga TUHAN geupandang umat manusia, ureuëng jimita ureuëng carông nyang seumah Gobnyan.
4 Teuma banmandum ureuëng ka meunyeuleweng dan beujat hana meusidroe pih nyang jipeubuet nyang jroh.
5 Geupeugah lé TUHAN, "Peu kheueh hana sadar ureuëng-ureuëng jeuhet nyan? Awaknyan udeb sira jireupah umat ulôn, dan hántom na jimeudoá ubak ulôn."
6 Ureuëng jeuhet teumakot that-that, padahai hana ureuëng nyang peutakot jihnyan, sabab Allah geupeuhambo tuleueng ureuëng nyang keupong gata; awaknyan ka geutulak lé Po teu Allah, teuma gata tapeutaloe awaknyan.
7 Nibak Bukét Sion teuka kheueh kira jih keuseulamatan keu Israel. Dan keuturonan Nabi Yakub meusukacita meunyoe TUHAN geupeupuléh keuadaan umat Gobnyan.


Chapter 54

1 Keu teupimpén kor. Deungon iréngan keucapi. Ca-e peungajaran Nabi Daud,
2 bak watée ureuëng Zifi teuka jijak peugah ubak Saul, "Nabi Daud geumusöm di teumpat kamoe."
3 Ya Allah, peuseulamat kheueh ulôn sabab kuasa Droeneueh, neubri kheueh keuadelan keu ulôn sabab teunaga Droeneueh.
4 Deungoe kheueh nyang ulôn lakée, ya Allah, sudi kheueh neudeungoe tutoe haba lôn.
5 Sabab ureuëng aséng jibeudôh jijak prang ulôn, ureuëng sombong jikeuneuk poh maté lôn, awaknyan hana jipakoe ubak Po teu Allah.
6 Teuma Allah na kheueh nyang tulông lôn; TUHAN na kheueh nyang bila lôn.
7 Gobnyan geuhuköm musoh lôn deungon keujeuhetan awaknyan keudroe, dan geupeubinasa awaknyan sabab Gobnyan seutia bak ulôn.
8 Deungon rila até ulôn peuseumah keureubeuen keu Droeneueh, dan meusyukoe ubak Droeneueh sabab Droeneueh gét, ya TUHAN.
9 Droneueh ka neupeulheueh ulôn nibak mandum nyang susah, dan lôn ngieng musoh lôn ka teupeutaloe.


Chapter 55

1 Keu teupimpén kor. Deungon peumeuén keucapi. Ca-e peungajaran Nabi Daud.
2 Ya Allah, neudeungoe kheueh doá ulôn, bék neupaleng nibak peue nyang ulôn lakée.
3 Neungieng kheueh ulôn dan neujaweueb kheueh ulôn, ulôn hanco sabab keusosahan lôn.
4 Até ulôn susah hana meuteuntée sabab jiancam lé musoh dan jitindéeh lé ureuëng jeuhet. Sabab awaknyan nyang peususah udeb ulôn, dan deungon jibeungéh jimeumusoh deungon ulôn.
5 Até ulôn lumpah geulisah, mawöt nyang lumpah teumakot nyan jeuet keuhantu lam tuboh lôn.
6 Badan lôn peunoh deungon yo dan teumakot nyang hana reuda, jiteugon teuma deungon peurasaan nyang gamang.
7 Ah, meunyoe bak lôn na sayeub lagée cicém mirah pati, ulôn po jakmita teumpat nyang teunang.
8 Nyoe, ulôn teuma lôn po sampoe óh jiôh, laju lôn tinggai diteungoh padang pasie.
9 Ulôn bagah-bagah lônjak mita teumpat meuceu teuhadab angén badée ngon puteng beuliong.
10 Ya TUHAN, neupeubingong kheueh dumna musoh lôn, neupeukirôh kheueh watée awaknyan jipeugah haba, sabab dibanda ulôn ngieng gob meupake dan ureuëng meulo.
11 Uroe malam awaknyan jikeulileng, jipeubuet nyang jeuhet dan jijak peukaru keudeh keunoe.
12 Dipat mantong na peunghancoran; seumeungeut teumeugom hana hase teupeugra di jeueb-jeueb keudée.
13 Meunyoe musoh nyang teunak ulôn, hainyan mantong ék ulôn teun. Meunyoe lawan nyang hina ulôn, mantong ék ulôn musöm nibak lawan nyan.
14 Teuma, na kheueh droeneueh, rakan ulôn, sahabat lôn, rakan lôn nyang paleng krab nyang khianat lôn.
15 Yoh masa ilée tanyoe meurakan paleng that krab, dan tajak iébadat meusajan-sajan u Baét TUHAN.
16 Bah kheueh musoh lôn maté meudab-dab dan udeb-udeb jitron u lam donya ureuëng maté, sabab keujeuhetan na di rumoh awaknyan, lamkawan awaknyan.
17 Teuma ulôn meulakée ubak Po teu Allah, TUHAN geupeuseulamat ulôn.
18 Uroe malam ulôn apoh apah dan ulôn mo, dan Gobnyan geudeungoe su ulôn.
19 Gobnyan nyang peuseulamat ulôn nibak jiprang lé musoh, nyang teuka meukawan-kawan jiparan ulôn.
20 Allah nyang mat peurintah nibak keukai teuma geudeungoe ulôn dan geupeutaloe awaknyan. Sabab awaknyan hana jitem tobat, dan hana jitakot ubak Po teu Allah.
21 Beukaih rakan lôn jijak prang rakan-rakan awaknyan, awaknyan ji iengkeue ubak janji jih.
22 Tutoe haba jih aloh meubujuk rayu, teuma lam até jih na jikeubah banci. Tutoe haba jih leumoh leumbot, teuma lagée teutôb deungon peudeueng nyang tajam.
23 Jok kheueh khawate gatanyan ubak TUHAN, dan Gobnyan geutulông gata; sabab ureuëng jujoe hana geupeubiyeu taloe.
24 Teuma Droeneueh, ya Allah, neukurong awaknyan u dalam uruek nyang paleng lhok. Ureuëng seumeunget dan tukang ro darah ureuëng nyan hana trok siteungoh pih nibak umu jihnyan. Teuma ulôn peucaya ubak Droeneueh.


Chapter 56

1 Keu teupimpén kor. Meunurot lagu: Mirah pati nyang seungab kalu, di daerah nyang jiôh. Zabur Nabi Daud bak watée ureuëng Filistin jidrob gobnyan di Gat.
2 Neugaséh kheueh bak ulôn, ya Allah, sabab ulôn nyoe ka jiprang, hana putôh-putôh ulôn nyoe jiteugom sabe lé musoh-musoh lôn.
3 Sipanyang uroe nyoe jigilo-gilo sabe lé lawan-lawan lôn; jai that-that nyang meumusoh keu ulôn, ya Allah Nyang Mahamanyang.
4 Bak watée ulôn teumakot, ulôn meuharab ubak Droeneueh.
5 Ulôn pujoe Allah sabab peue nyang ka geupeujanji; ulôn peucaya ubak Gobnyan, teuma ulôn hana teumakot, manusia hana meudaya keu ulôn.
6 Siuroe suntok musoh jipeukaru peukara ulôn, hana putôh-putôh jiuseuha keuneuk peuceulaka ulôn.
7 Awaknyan meusapat diteumpat nyang teusöm, jikalon peue mantong nyang ulôn peubuet, dan jimita keuseumpatan keu jipeumaté ulôn.
8 Peu kheueh na keuseulamatan keu buet jeuhet awaknyan? Neupeubinasa kheueh awaknyan watée Droeneueh teungoh beungéh, ya Allah!
9 Droeneueh neu itong uroe-uroe peungeumbaraan lôn, dan neuteupeue padubna jeumeulah ié mata lôn; peu kheueh nyan hana neu itong?
10 Bak uroe ulôn meulakée ubak Droeneueh, musoh teuma teupoh sampoe jisurot, sabab ulôn teupeue Allah geudong blah ulôn.
11 Ulôn pujoe TUHAN Allah, sabab peue nyang Gobnyan peujanji.
12 Ulôn peucaya ubak Gobnyan, teuma ulôn hana teumakot, manusia hana meudaya teuhadab ulôn.
13 Ulôn kupeutrok janji ubak Droeneueh, ya Allah, dan lôn peuseumah keureubeuen syukoe ubak Droeneueh.
14 Sabab Droeneueh neupeuseuliseh ulôn nibak mawöt, neujaga ulôn jeuet bék reubah. Nyang kheueh ulôn hase udeb lam lindongan Allah, dalam cahya nyang teupeutrang keu banmandum nyang udeb.


Chapter 57

1 Keu teupimpén kor. Meunurot lagu: Bék peumuseunah. Zabur Nabi Daud, bak watée gobnyan geuplueng u dalam guha keu geupeusie nibak Saul.
2 Neugaséh kheueh keu ulôn, ya Allah, neugaséh kheueh bak ulôn, sabab bak Droeneueh kheueh ulôn meulindong. Dimiyueb sayeub Droeneueh ulôn musöm, sampoe angén badée nyang teungoh jipot meubura jipiôh reuda.
3 Ulôn meulakée ubak Allah Nyang Mahamanyang, ubak Allah nyang meubuet keu ulôn.
4 Nibak lam syeuruga Gobnyan geujaweueb dan geupeuseulamat lôn; Gobnyan geupeutaloe bubena ureuëng nyang teugom lôn. Allah geutunyok bahwa Gobnyan seutia ubak ulôn, dan hana geupiôh geugaséh keu ulôn.
5 Ulôn jiparan ngon jikeupong lé musoh, awaknyan lagée singa bueh nyang jiseuba manusia. Gigo awaknyan lagée kapak dan aneuk panah, lidah awaknyan lagée peudeueng nyang tajam.
6 Ya Allah, neutunyok kheueh keu agongan Droeneueh di langét manyang, dan keumuliaan Droeneueh di ateueh bumoe.
7 Musoh lôn ka jipasang taron keu ulôn, dan jipeupatah seumangat ulôn. Awaknyan jikueh uruek bak rot ueh lôn, teuma awaknyan keudroe nyang rhot lam uruek nyan.
8 Ulôn peucaya peunoh, ya Allah, ulôn peucaya peunoh, ulôn kutem meuca-e dan lôn pujoe Droeneueh.
9 Hai beudôh kheueh, jiwa ulôn! Hai beudôh kheueh rapa-i dan keucapi! Ulôn keuneuk peubeudôh fajar.
10 TUHAN, ulôn keuneuk meusyuko ubak Droeneueh lamkawan bansa-bansa ulôn keuneuk meuca-e lagu seumujoe keu Droeneueh lamkawan umat manusia.
11 Sabab gaséh Droeneueh raya sampoe u langét manyang, dan gaséh seutia Droeneueh sampoe ubak awan.
12 Ya Allah, neutunyok kheueh keuagongan Droeneueh di langét, dan keumuliaan Droeneueh di ateueh bumoe.


Chapter 58

1 Keu teupimpén kor. Meunurot ca-e: Bék peumuseunah. Zabur Nabi Daud.
2 Hai bubena peunguasa, peu kheueh ade keuputosan gata nyan? Peu kheueh gata jujoe bak watée gata peuhakém manusia?
3 Hánjeuet, gata reuncana nyang jeuhet, dan tapeubuet keukeurasan di nanggroe nyoe.
4 Ureuëng jeuhet ka sisat yoh mantong lam pruet ma awaknyan ka jiteumipée watée jihnyan ka lahé.
5 Awaknyan meuracön lagée uleue meubisa, dan jisumpai punyueng jih lagée uleue kobra nyang tulo
6 nyang hana teudeungoe su pawang nyang carông, atawa su ureuëng meurajah nyang malem.
7 Ya Allah, neuwiet kheueh gigo-gigo awaknyan, neulot kheueh tarieng singa-singa muda nyan, ya TUHAN.
8 Bah kheueh awaknyan gadôh lagée ié paseung nyang teungoh jiék, lagée aneuk panah nyang ka tumpoi mata.
9 Bah kheueh awaknyan lagée sipot nyang meuliléh meujantang jeuet keu geuneuhéut, lagée aneuëk manyak maté sigohlom jingieng peungéuh.
10 Sigohlom teupeusadar, awaknyan ka binasa, lagée tamah meupaya nyang mantong ijo dan gohlom raya habéh jipupo lé angén, siulah-ulah nyan na kheueh sinaman tho.
11 Jikalon ureuëng jeuhet teuhuköm, ureuëng jujoe lumpah galak, dan teu rhah gaki jih lam darah nyang doraka.
12 Ureuëng ramé jipeugah, "Biet ureuëng nyang jroh meuteumé pahala, keubit, na Po teu Allah nyang jeuet keuhakém di ateueh bumoe."


Chapter 59

1 Keu teupimpén kor. Meunurot lagu: Bék peumuseunah. Zabur Nabi Daud, bak watée Saul geuyue ureuëng laén jak kawai rumoh gobnyan sabab jikeuneuk poh maté gobnyan.
2 Ya Allah ulôn, peuseulamat kheueh ulôn nibak bandum musoh lôn, neulindong kheueh ulôn nibak ureuëng nyang keuneuk jak seurang ulôn.
3 Neupeulheuh kheueh ulôn nibak ureuëng nyang keuneuk peubuet jeuhet, neupeusie kheueh ulôn nibak ureuëng-ureuëng nyang keuneuk poh maté lôn.
4 Ngieng kheueh, awaknyan ka jihampeueng keuneuk jipoh maté lôn, ureuëng-ureuëng keujam meusaho keuneuk lawan lôn; padahai kon sabab ulôn ka lôn peubuet desya atawa ulôn peubuet peulanggaran, ya TUHAN.
5 Meunan cit kon teuma sabab salah lôn, awaknyan meudab-dab dan meusiab-siab.
6 Beudôh kheueh, Allah Nyang Mahamanyang, tulông kheueh ulôn. Ya Allah Israel, neukalon keudroe. Beudôh kheueh dan neuhuköm kheueh bansa-bansa, bék neugaséh keu ureuëng jeuhet nyang meukhianat.
7 Bak watée uroe ka sinja awaknyan jiwo lom teuma, meuôe-ôe lagée asée sira jikeulileng banda.
8 Hana jipiôh awaknyan nariet meupansi sira meuhina; tutoe haba awaknyan tajam lagée mata peudeueng, jipike lé awaknyan hana nyang deungoe peue nyang jipeugah nyan.
9 Teuma Droeneueh neupeukém awaknyan, ya TUHAN, banmandum bansa nyan Droeneueh peuhina.
10 Droeneueh kheueh teunaga ulôn, ulôn meuharab that ubak Droeneueh, Droeneueh teumpat ulôn meungungsé, ya Allah.
11 Sabab keubaíekan Allah kheueh, Gobnyan teuka ubak ulôn, Gobnyan geupeubiyeu mantong lôn kalon bubena musoh lôn teupeutaloe.
12 Bék kheueh neupoh maté awaknyan, ya TUHAN, mangat bansa ulôn hana jituwoe. Peu crebre kheueh dan neupeutaloe kheueh awaknyan deungon kuasa Droeneueh, ya TUHAN peulindong ulôn.
13 Sabab awaknyan meudesya deungon tutoe haba jih keudroe; bah kheueh awaknyan meucarueh deungon meubagoe keusombongan jih, sabab awaknyan galak that jiseurapa dan meusulet ngon haba nyang hana beuna.
14 Peubinasa kheueh awaknyan lam beungéh Droeneueh, ya Allah, peubinasa kheueh awaknyan sampoe án habéh. Dan tieb-tieb ureuëng jiteupeue bahwa Allah geupeurintah Israel, dan peumeurintah Gobnyan luwah jimeu éue bansaboh bumoe.
15 Óh watée sinja awaknyan jigisa, meuôe-ôe lagée su asée sira jikeulileng banda.
16 Awaknyan jimeurawoh keudeh keunoe sira jimita uempeuen, dan laju jimeurawöng meunyoe pruet jih hana troe.
17 Teuma di ulôn meuca-e keuhai teunaga Droeneueh; tieb-tieb beungoh ulôn meuca-e deungon su nyang nyareng keuhai gaséh dan seutia Droeneueh. Sabab Droeneueh kheueh teumpat ulôn peusiblah droe, teumpat ulôn meulindong bak watée susah.
18 Ya Allah, teunaga lôn, ulôn meuca-e lagu puja ngon pujoe ubak Droeneueh, sabab Droeneueh kheueh teumpat ulôn meulindong. Ya Allah, geunaséh ulôn.


Chapter 60

1 Keu teupimpén kor. Meunurot lagu: Bungöng bakong keusaksian. Zabur peungajaran nibak Nabi Daud,
2 bak watée gobnyan geujak prang ureuëng Aram-Mesopotamia dan ureuëng Aram-Zoba, dan bak watée Yoab geuwoe dan geupeutaloe 12.000 droe ureuëng Edom di Pantôn Asin.
3 Droeneueh neutulak kamoe, ya Allah, dan neupeubiyeu kamoe jipeutaloe lé awaknyan. Droeneueh beungéh keu kamoe; jinoenyoe neupeupuléh kheueh kamoe.
4 Droeneueh neuguncang bumoe sampoe crah; neupeugét kheueh nyang ka beukah-beukah, sabab bumoe guyah.
5 Neupeubiyeu umat Droeneueh jirasa deurita nyang keubit that brat; kamoe mumang meuayon-ayon lagée ureuëng mabök.
6 Neupeuingat ubak ureuëng nyang taqwa, jeuet awaknyan meusiliseh nibak mara bahya.
7 Peuseulamat kheueh kamoe deungon kuasa Droeneueh, neujaweueb kheueh doá kamoe, mangat ureuëng-ureuëng nyang Droeneueh gaséh teupeuseulamat.
8 Nibak teumpat tinggai Gobnyan nyang suci Po teu Allah geupeugah, "Ulôn keuneuk seumurak dan Ulôn weuek-weuek tanoh Sikhem; Pantôn Sukot Ulôn undi.
9 Gilead dan Manasye na kheueh atra Ulôn, Efraim tupi waja Lôn, dan Yehuda tungkat keurajeuen Lôn.
10 Teuma Moab na kheueh teumpat Ulôn rhah gaki, Ulôn meusurak keumeunangan ateueh Filistea. Ubak Edom Ulôn rhom seulôb Lôn sibagoe tanda bahwa jihnyan na kheueh atra Ulôn."
11 Soe nyang ba ulôn u Edom? Soe nyang peu taktéh ulôn u banda nyang meukuta nyan?
12 Ya Allah, peu kheueh Droeneueh hana neuseutôt meusajan kamoe? Peu kheueh Droeneueh hana neumaju meusajan tantra kamoe?
13 Tulông kheueh kamoe ateueh musoh kamoe, sabab bantuan manusia hana meuguna.
14 Meusajan Allah, geutanyoe gagah peukasa, Gobnyan kheueh nyang peutaloe bubena musoh geutanyoe.


Chapter 61

1 Keu teupimpén kor. Deungon peumeuén keucapi. Nibak Nabi Daud.
2 Deungoe kheueh doá ulôn, ya Allah, deungoe kheueh nyang ulôn lakée.
3 Jiôh nibak rumoh ulôn meulakée ubak Droeneueh, sabab ulôn putôh asa. aman, teumpat nyang lumpah that manyang nibak ulôn;
4 sabab Droeneueh kheueh teumpat ulôn meulindong, peutahanan nyang paleng kong ateueh musoh lôn.
5 Bah kheueh ulôn siumu udeb lôn meunumpang nibak Khimah Droeneueh, mangat lôn aman dimiyueb sayeub Droeneueh.
6 Sabab Droeneueh ka neudeungoe janji ulôn, ya Allah, dan neubri bak lôn milék pusaka ureuëng nyang taqwa.
7 Seumoga raja panyang umu, jeuet gobnyan hase udeb tron meutron.
8 Seumoga gobnyan geumat peurintah keu siumu masa sibagoe raja nyang neupiléh, ya Allah, lindong kheueh geuhnyan deungon gaséh dan seutia Droeneueh.
9 Dan ulôn hana putôh lôn meuca-e lagu puja dan pujoe keu Droeneueh, sira lôn peutrok janji lôn nibak uroe ubak uroe.


Chapter 62

1 Keu teupimpén kor. Meunurot: Yedutun. Zabur Nabi Daud.
2 Deungon teunang jiwa lôn preh Po teu Allah, nibak Gobnyan mantong nyang na keuseulamatan lôn.
3 Dan Gobnyan nyang lindong dan peuseulamat lôn, Gobnyan nyang bila ulôn, sabab nyan ulôn hana guyah.
4 Trok án pajan gata banmandum taprang gob nyang ka lagée bintéh singét dan bintéh beuton nyang karab reuloh?
5 Gata na niet keuneuk tapeureubah gobnyan nibak keududuekan gobnyan nyang manyang. Gata galak that tapeugah haba beurakah; deungon babah gata, gata bri beureukat, teuma lam até gata takutok.
6 Deungon teunang jiwa ulôn preh Po teu Allah, nibak Gobnyan mantong kheueh ulôn na seulamat.
7 Dan Gobnyan nyang lindong dan peuseulamat lôn; Gobnyan nyang bila lôn, sabab nyan ulôn hana guyah.
8 Gobnyan kheueh Allah nyang bri keu ulôn seulamat dan keuhoreumatan, Gobnyan kheueh peulindong lôn nyang bila lôn nyang teuga.
9 He bansa lôn, meuharab kheueh ubak Allah tieb-tieb watée; sintong kheueh asoe até gata ubak Gobnyan, sabab Gobnyan teumpat geutanyoe meulindong.
10 Manusia nyoe na kheueh lagée nafáh nyang teuprôh, cut rayeuk saban mantong hana meuhareuga. Meunyoe teutimang, awaknyan teunyata phui leubeh phui nibak nafáh nyang teubiet rot idong atawa babah.
11 Bék taharab bak hase atra gob nyang teucok deungon cara teupeutakot, dan bék teuma tapeumeugah droe deungon hase atra teureupah. Bahkan meunyoe keukayaan gata meutamah-tamah, bék teuma até gata meuleukek nibak hareutanyan.
12 Na padubgoe ulôn deungoe Po teu Allah geupeugah haba bahwa keukuasaan na kheueh meuasai nibak Gobnyan,
13 dan bahwa Gobnyan teutab na geunaséh.


Chapter 63

1 Zabur Nabi Daud, bak watée gobnyan mantong di padang pasi guron Yehuda.
2 Ya Allah, Droeneueh kheueh Allah lôn, ulôn mita dan ulôn rindu that ubak Droeneueh. Lagée tanoh nyang tho kreng nyang glah keuneuk jieb ié, meunan kheueh ulôn nyang glah ubak Droeneueh.
3 Bah kheueh ulôn pandang Droeneueh rot Baét Droeneueh, dan lôn ngieng teunaga ngon keuagongan Droeneueh.
4 Geunaséh Droeneueh leubeh meuyuém nibak udeb, sababnyan kheueh ulôn pujoe Droeneueh.
5 Siumu udeb ulôn meusyukoe ubak Droeneueh; ulôn beuôt jaroe ubak Droeneueh sira lôn meudoá.
6 Ulôn pujoe Droeneueh sira lôn seumurak ngon geumbira, sabab Droeneueh neupeupueh jiwa ulôn saban rasa jih lagée lôn pajoh peunajoh nyang lazat.
7 Watée ulôn éh nibak teumpat éh; ulôn ingat ubak Droeneueh, si malam beungoh ulôn meu dhike ubak Droeneueh,
8 sabab Droeneueh ka neutulông ulôn; dimiyueb sayeub Droeneueh ulôn meuca-e deungon geumbira.
9 Ulôn mat Droeneueh nyang lumpah that kong, jaroe Droeneueh neutumpang ulôn.
10 Teuma ureuëng-ureuëng nyang keuneuk peumaté lôn ureuëng nyan jitron u lam donya ureuëng maté.
11 Awaknyan maté dimideuen prang, dan bangke jih jeuet keupeunajoh beulatang bueh.
12 Raja geumbira sabab peutulôngan lé Po teu Allah; ureuëng nyang meubudok deumi Po teu Allah jimeusukaria, teuma babah ureuëng meusulet geusumpai.


Chapter 64

1 Keu teupimpén kor. Zabur Nabi Daud.
2 Ya Allah, neudeungoe kheueh doá ulôn bak watée ulôn jiteuka susah, peuseulamat kheueh nyawöng lôn nibak musoh nyang keujam.
3 Lindong kheueh ulôn nibak kawan ureuëng nyang doraka, dan nibak reuncana licek ureuëng-ureuëng jeuhet.
4 Awaknyan jipeujeuet lidah jih tajam lagée mata peudeueng, dan jipeulheueh haba nyang keujam saban sa ngon aneuk panah.
5 Nibak teumpat jimusöm awaknyan laju jitabu calitra nyang hana beuna, hana jitakot-takot laju jipiteunah ureuëng nyang hana meusalah.
6 Awaknyan jimumat kong that ubak niet nyang jeuhet, dan jimeurok pakat keuneuk jipasang peurangkab; jisangka lé awaknyan hana ureuëng nyang kalon.
7 Awaknyan jireuncana buet nyang jeuhet, dan jipeugah, "Kamoe ka kamoe peugot reuncana nyang keubit ceureudek." Até dan budho manusia keubit that lhok, hana hase ureuëng seunom lam até nyan.
8 Teuma Allah geutimbak aneuk panah Gobnyan ateueh awaknyan, dan bak saát nyan cit awaknyan keunong dan luka.
9 Awaknyan binasa sabab tutoe jih keudroe; soemantong nyang kalon jihnyan meu asek ulée.
10 Dan banmandum ureuëng jiteuka teumakot; awaknyan laju jipike buet Po teu Allah dan jijak peusampoe peue nyang ka jipeubuet.
11 Dan banmandum ureuëng jroh-jroh geumbira sabab peue nyang geupeubuet lé TUHAN. Awaknyan meulindong ubak Gobnyan; banmandum ureuëng jujoe jipeumegah droe.


Chapter 65

1 Keu teupimpén kor. Zabur Nabi Daud. Lagu.
2 Patot kheueh kamoe pujoe Droeneueh di Sion, ya Allah, dan kamoe peupeunoh janji kamoe ubak Droeneueh.
3 Sabab Droeneueh nyang peukabui doá; banmandum ureuëng jijak ubak Droeneueh sabab ka meudesya.
4 Desya-desya lôn lumpah that geuhon nibak ulôn, teuma Droeneueh kheueh nyang peu amphon.
5 Mubahgia kheueh ureuëng nyang Droeneueh piléh, dan neutawök mangat jitinggai di Baét Droeneueh. Kamoe neupeupueh deungon peue mantong nyang gét di Baét Droeneueh, teumpat tinggai Droeneueh nyang suci.
6 Droeneueh neujaweueb kamoe deungon cara neubri bak kamoe keumeunangan, neupeubuet hai-hai nyang ajaéb guna keu neupeuseulamat kamoe! Droeneueh kheueh harapan banmandum bansa sampoe u laôt nyang jiôh.
7 Deungon teunaga Droeneueh neupeujeuet gunong-gunong, keu neutunyok kuasa Droeneueh nyang peukasa.
8 Droeneueh peureuda laôt nyang meubura-bura dan umbak geulumbang nyang meualon-alon, dan Droeneueh peuseungab bansa-bansa nyang teungoh karu.
9 Banmandum peunduduek bumoe teumakot dan horeumat óh jikalon buet-buet Droeneueh nyang hebat. Banmandum bumoe phon di timu trok u barat meusurak geumbira sabab Droeneueh nyang yue meunan.
10 Tanoh nyan Droeneueh peulara dan neu peutron ujeuen, dan tanoh nyan neupeujeuet gumbô ngon subô jeuet na hase jih meulimpah ganda. Meunan cit deungon bubena krueng-krueng neupasoe deungon ié nyang peunoh meuruwah, dan neupeuna teuma gandom keu peunajoh awaknyan, nyoe, meunan kheueh cara jih Droeneueh keubah atra keu peunajoh awaknyan.
11 Meunan cit Droeneueh peujeuet lueng-lueng ié nyang le dan neusiram tanoh-tanoh nyang meugicai-gicai sampoe án basah. Tanohnyan Droeneueh nyang peugumbô deungon ié ujeuen, dan neujamin tarôk-tarôk jih sampoe jitimoh subô.
12 Lé sabab jroh Droeneueh teuma, tieb-tieb thon neupeuna musém keumeukoh; bak watée Droeneueh teuka, watéenyan kana keulimpahan.
13 Di dalam padang pasie ka peunoh deungon kaméng bubiri, banmandum bukét meusuka ria.
14 Dalam blang-blang naleueng nyang luwah ka peunoh meuasoe deungon bubiri nyang teungoh jimeurot, meunan cit deungon bubena pantôn ka peunoh deungon lampôh gandom. Banmandum meusurak dan meuca-e deungon peunoh geumbira.


Chapter 66

1 Keu teupimpén kor. Saboh lagu. bumoe!
2 Meuca-e kheueh dan peu agong kheueh nan Gobnyan, peumulia kheueh Gobnyan deungon lagu zike puja ngon pujoe.
3 Tapeugah kheueh ubak Po teu Allah, "Keubit lumpah that kagom buet Droeneueh! Musoh jitundok ubak Droeneueh peunoh deungon teumakot, sabab kuasa Droeneueh nyang lumpah raya.
4 Bansaboh bumoe jisujut jiseumah Droeneueh, awaknyan jimeuca-e ngon jimeunyanyoe jipujoe nan Droeneueh."
5 Teuka kheueh dan ngieng kheueh buet Allah, keubit that hireuen karya-karya Gobnyan di teungoh-teungoh manusia!
6 Laôt hase geubah jeuet keu tanoh tho, indatu kamoe geujeumeurang laôt nyan deungon tapak gaki. Dan kamoe geumbira that sabab buet Droeneueh nyan.
7 Gobnyan geumat peurintah deungon peukasa keu siumu masa. Bansa-bansa geukawai, mangat peumbeurontak hana hase jipeusombong droe ateueh Gobnyan.
8 Pujoe kheueh Allah kamoe, hai bansa-bansa, talakée kheueh pujoe gatanyan ubak Gobnyan!
9 Gobnyan ka geujaga kamoe mangat teutab udeb, dan hana geupeubiyeu kamoe nyoe reubah.
10 Ya Allah, Droeneueh ka neu ujoe kamoe lagée ureuëng jiseupoh pirak didalam apui.
11 Neupeubiyeu kamoe reubah u dalam jeunieb, dan neupeudieng beuban nyang lumpah geuhon.
12 Neupeubiyeu kamoe jigilo-gilo lé musoh; kamoe laju ngob lam ié raya dan apui nyang hu meubara. Teuma jinoenyoe kamoe ka lheueh neuba u teumpat nyang makmu.
13 Ulôn lônba keureubeuen nyang teutot u Baét Droeneueh dan lôn peuteupat janji lôn ubak Droeneueh,
14 janji nyang ulôn peugah bak watée ulôn dalam keusosahan.
15 Ulôn peuseumah ubak Droeneueh keureubeuen nyang teutot nibak beulatang nyang teupiléh, kaméng bubiri dan leumô agam, asab jipo manyang u langét.
16 Teuka kheueh dan deungoe kheueh, hai ureuëng nyang taqwa, ulôn peugah peue nyang ka geupeubuet lé Allah keu ulôn.
17 Ulôn ka lôn meuhôi lôn lakée tulông ubak Gobnyan; jinoenyoe ulôn meuca-e lagu pujoe keu Gobnyan.
18 Meunyoe ulôn galak lôn pike keu buet nyang jeuhet, pasti TUHAN hana geutem deungoe peue nyang ulôn peugah.
19 Teuma Po teu Allah ka geudeungoe ulôn, Gobnyan that geupakoe peue nyang ulôn lakée.
20 Ulôn pujoe Allah sabab Gobnyan hana geutulak doá ulôn, hana teuma geupiôh geusayang keu ulôn.


Chapter 67

1 Keu teupimpén kor. Deungon peumeuén keucapi. Zabur.
2 Seumoga Po teu Allah geugaséh dan geubri beureukat keu geutanyoe, seumoga Gobnyan geupandang tanyoe deungon murah até.
3 Ya Allah, seumoga keuheundak Droeneueh jituri lé gob bansaboh bumoe, dan keuseulamatan Droeneueh jipeusampoe ubak banmandum bansa.
4 Seumoga bansa-bansa jipujoe Droeneueh, ya Allah Po, seumoga banmandum bansa meusyukoe ubak Droeneueh.
5 Seumoga banmandum bansa meusurak geumbira, dan jimeuca-e deungon peunoh geumbira. Sabab Droeneueh neumat peurintah deungon ade dan neubimbéng tieb-tieb bansa nyang na di ateueh bumoe.
6 Seumoga bansa-bansa jipujoe Droeneueh, ya Allah Po, seumoga banmandum bansa jimeusyukoe ubak Droeneueh.
7 Tanoh ka jibri hase, Po teu Allah, Allah geutanyoe ka geubri beureukat keu geutanyoe.
8 Po teu Allah ka geubri beureukat keu geutanyoe; seumoga Gobnyan jihoreumat bansigom donya!


Chapter 68

1 Keu teupimpén kor. Zabur Nabi Daud.
2 Allah geubeudôh geujak peu crebre bubena musoh Gobnyan, ureuëng nyang banci Gobnyan laju jiplueng dikeue Gobnyan.
3 Allah geu use mangat awaknyan jijak, lagée asab nyang teuplôh laju gadôh. Lagée lilen nyang meuliléh lam apui, meunan kheueh ureuëng jeuhet teusampôh dikeue Po teu Allah.
4 Teuma ureuëng saléeh meusukacita dan meugeumbira, awaknyan jiseumurak geumbira dikeue Po teu Allah.
5 Meuca-e kheueh keu Allah, dan pujoe kheueh nan Gobnyan, peusiab laju jalan raya keu Gobnyan nyang geuduek lam keundeuraan awan. Nan Gobnyan TUHAN -- meuseunang-seunang kheueh dikeue Gobnyan!
6 Po teu Allah nyang tinggai di Baét Gobnyan nyang suci na kheueh ureuëng syiek aneuëk yatem dan nyang bila inong balée.
7 Meunan cit Allah geubri teumpat tinggai keu ureuëng-ureuëng nyang udeb jih seudeh; Gobnyan geupeubeubaih ureuëng nyang teuteuen lam peunjara sampoe awaknyan bahgia. Teuma keu ureuëng nyang jilawan TUHAN harôh jiduek nibak tanoh nyang hana hase udeb sapeue.
8 Ya Allah, watée Droeneueh neubimbéng umat Droeneueh geujak geuliwat rot jalan nyang tho kreng,
9 bumoe meuayon, ujeuen jitoh dikeue Droeneueh, sabab teuka Po teu Allah Sinai, Allah Israel.
10 Deungon meulimpah Droeneueh peutron ujeuen, dan neupeupuléh tanoh Droeneueh nyang tho kreng.
11 Dan umat Droeneueh pih laju tinggai teutab disinan; lam keubaiékan Droeneueh, ya Allah, Droeneueh neupeulara ureuëng gasien.
12 TUHAN geubri peurintah, dan laju di ureuëng inong jijakba haba:
13 "Raja-raja dan pasokan jihnyan ka habéh jiplueng!" Awaknyan jiplueng lagée cicém mirah pati nyang jipo meutaga. Di ureuëng inong dirumoh laju geubagi-bagi, pirak deungon méuh nyang ka jitinggai. Bahpi le that nyang hana jitamong lam prang, umat Po teu Allah ka meuteumé meunang.
15 Watée Nyang Mahakuasa geunyerak raja-raja disinan, jitron kheueh salju di ateueh Gunong Salmon.
16 Gunong Basan na kheueh gunong nyang hebat, gunong nyan pucak jih le that.
17 Pakon nibak pucak droeneueh nyang le nyan droeneueh neupandang deungon ceumburu ubak Bukét Sion nyang ka geupiléh lé Allah keu teumpat tinggai Gobnyan? TUHAN tinggai disinan keu siumu masa.
18 Deungon geuritan nyang teuga-teuga nyang le jih meuploh-ploh ribée boh Allah teuka di teungoh-teungoh awaknyan nyang peunoh deungon keuagongan.
19 TUHAN geuék u teumpat nyang paleng manyang; jai that tawanan nyang geuba sajan. Gobnyan geuteurimong peuseumahan lamkawan manusia dan lamkawan kawöm nyang beurontak pih; mangat awaknyan tinggai meusajan deungon TUHAN Allah.
20 Pujoe kheueh TUHAN, sabab Gobnyan kheueh Allah nyang peuseulamat geutanyoe; nibak uroe u uroe Gobnyan geu seuôn beuban geutanyoe.
21 Allah geutanyoe na kheueh TUHAN nyang peuseulamat geutanyoe, Gobnyan nyang peubeubaih geutanyoe nibak mawöt.
22 Allah pasti geupeureumok ulée musoh Geuh, dan ureuëng-ureuëng nyang hana putôh udeb didalam desya.
23 Feureuman TUHAN, "Hai umat Lôn, Ulônba musoh gata nibak Basan Ulôn ba awaknyan lom lam laôt raya,
24 mangat gata tarhah gaki gata deungon darah awaknyan, dan asée-asée gata jijak lieh sipueh-pueh jih."
25 Banmandum ureuëng jikalon pawai keumeunangan Droeneueh, ya Allah, Allah ulôn, Raja lôn, jiarak u teumpat tinggai Gobnyan.
26 Dikeue that jijak ureuëng-ureuëng meulagu, dilikotnyan teuma jijak ureuëng peumeuén keucapi; diteungoh-teungoh jijak aneuëk-aneuëk dara nyang peh rapa-i; meunoe kheueh ca-e dan lagu awaknyan:
27 "Pujoe kheueh Allah lamkawan himponan umat Gobnyan, Pujoe kheueh TUHAN, hai banmandum keuturonan Nabi Yakub!"
28 Benyamin, sukée nyang paleng ubit, jijak dikeue that, óh lheuehnyan laju deuh meurön-rön bubena peumuka Yehuda dilikot gobnyan deuh teuma bubena peumuka Zebulon dan Naftali.
29 Allah gata geutuntot teunaga gata; ya Allah, neupeukong kheueh peue nyang ka Droeneueh peubuet keu kamoe.
30 Raja-raja jiba peuseumahan ubak Droeneueh di Baét Droeneueh di Yerusalem.
31 Neudumpék kheueh nanggroe Meusé, beulatang bueh nyan di teungoh geulagah. Neuteugah kheueh bansa-bansa, kawan banteng nyan deungon aneuëk-aneuëk jih, nyang saléng jimeu bloh-bloh mangat meuteumé pirak. Allah geupeu crebre bansa-bansa nyang galak keu prang.
32 Ureuëng-ureuëng rayeuk nanggroe Meusé jiteuka jijak ba teumaga; ureuëng Sudan meugageh-gageh jiba bungöng jaroe ubak Po teu Allah.
33 Meuca-e kheueh ubak Allah, hai banmandum keurajeuen nanggroe, meuca-e kheueh nyanyian puja-pujoe keu TUHAN,
34 keu Gobnyan nyang geulintéh angkasa purbakala. Deungoe! TUHAN meufeureuman, su Gobnyan meugeunta deungon dahsyat.
35 Aku kheueh kuasa Allah nyang meudelat ateueh Israel, kuasa Gobnyan trok u langét.
36 Keubit that takjob Allah geutanyoe watée Gobnyan geuteubiet di teumpat tinggai Geuh. Allah Israel geubri kuasa dan teunaga ubak umat Gobnyan.


Chapter 69

1 Keu teupimpén kor. Meunurot lagu: Bungöng Bakong. Nibak Nabi Daud.
2 Peuseulamat kheueh ulôn, ya Allah, sabab ié ka jiék trok bak takue lôn.
3 Ulôn meusuruek lam paya nyang lhok, hana teumpat ulôn meugilo. Ulôn ngob lam ié nyang lhok, jipeuhanyöt lé geulumbang paseueng nyang raya.
4 Ulôn meuhôi-meuhôi sampoe án hék dan rukuéng ulôn sampoe tho kreng. Mata lôn peudeh lôn preh bantuan Allah.
5 Ureuëng nyang banci ulôn hana alasan, leubeh le nibak ôk nyang na ateueh ulée lôn. Di ureuëng-ureuëng teuga keuneuk peubinasa lôn; awaknyan jiseurang ulôn deungon fiteunah nyang keuji. Bak ulôn jipaksa ulôn jokpulang hareuta nyang kon hareuta lôn reupah.
6 Ya Allah, Droeneueh neuteupeue buet-buet ulôn nyang salah desya ulôn hana nyang teusöm nibak Droeneueh.
7 Bék neupeubiyeu ulôn teupeuteuka malée ya Allah lôn ateueh ureuëng-ureuëng nyang meuharab ubak Droeneueh, ya TUHAN, Allah Nyang Mahakuasa. Bék neupeubiyeu ulôn teupeuteuka nista ateueh ureuëng-ureuëng nyang jiseumah Droeneueh, ya Allah Israel!
8 Sabab lé Droeneueh kheueh ulôn jipeujayéh ngon jihina, dan sabab Droeneueh kheueh ulôn jiseurapa.
9 Ulôn jeuet lagée ureuëng aséng nibak kawöm syedara lôn, lagée ureuëng luwa nibak cutda adoe lôn.
10 Seumangat lôn hu meuháb-háb sabab cinta lôn keu Baét Droeneueh, hinaan dan seurapa ureuëng nyang jihina Droeneueh ka keunong ateueh ulôn.
11 Ulôn meuba-e ngon puasa, teuma awaknyan jihina lôn.
12 Ulôn ngui ija krong sibagoe tanda ulôn meuduka cita, teuma awaknyan jipansi ulôn.
13 Ulôn jeuet keu boh bibi gob dipat mantong na ureuëng meugumpôi ngon meuhudom, dan nyanyoe ureuëng-ureuëng mabök na kheueh keuhai ulôn.
14 Teuma ulôn meudoá ubak Droeneueh, ya TUHAN, ya Allah, neujaweueb kheueh ulôn bak watée nyang get. Tulông kheueh ulôn sabab geunaséh Droeneueh nyang raya dan sabab keuseutiaan Droeneueh.
15 Bék kheueh neupeubiyeu ulôn ngob buhuek di dalam paya, peuseulamat kheueh ulôn nibak ureuëng-ureuëng nyang banci ulôn dan nibak ié nyang lhok.
16 Bék neupeubiyeu ulôn jipeuhanyöt lé geulumbang paseueng, dan lam bak teungoh laôt atawa jiseubée dalam uruek.
17 Jaweueb kheueh ulôn, ya TUHAN, sabab Droeneueh get dan teutab neugaséh keu ulôn. Neutem kheueh meupaleng ubak ulôn sabab raya that geunaséh Droeneueh ubak ulôn.
18 Bék kheueh neumusöm nibak hamba Droeneueh nyoe, sabab ulôn sosah, bubagaih kheueh neutulông lôn.
19 Teuka kheueh neupeuseulamat ulôn, neupeubeubaih kheueh ulôn nibak banmandum musoh-musoh lôn.
20 Droeneueh neuteupeue pakriban awaknyan jirapa ngon jihina ulôn nyoe Droeneueh neungieng banmandum musoh ulôn.
21 Peunghinaan nyang jikheun lé awaknyan jeuet keusabab ulôn jeuet keu ureuëng patah até, dan lé sabab nyan ulôn putôh asa. Ulôn mita gaséh sayang, teuma sia-sia, ulôn mita peunghibur, nyan pi hana lôn teumé.
22 Dan keu ulôn jijok tuba jeuet teupajoh; watée ulôn grah, keu ulôn jibri ié cuka.
23 Bah kheueh peujamé awaknyan jeuet keu bala, dan jeuet keupeurangkab keu jamé-jamé awaknyan.
24 Bah kheueh mata awaknyan jeuet keubuta dan ruéng likot awaknyan jeuet keuleumoh.
25 Neurö kheueh beuhabéh beungéh Droeneueh nyan ateueh awaknyan, bah kheueh awaknyan keunong lé meureuka Droeneueh nyang hu meutaga.
26 Bah kheueh peukhimahan awaknyan seungue ngon seungab, dan khimah-khimah awaknyan hana ureuëng nyang keumiet.
27 Sabab awaknyan ji iénanya ureuëng nyang Droeneueh huköm, dan jipeugah-peugah keu ureuëng-ureuëng nyang Droeneueh seksa.
28 Bah kheueh salah awaknyan meutamah le; bék neupeubeutôi awaknyan.
29 Bah kheueh nan awaknyan teusampôh lam kitab ureuëng udeb; dan hana teucatet lam dafeutar ureuëng jujoe.
30 Teuma ulôn teutindéeh dan sakét that, beuôt kheueh ulôn, ya Allah, dan peuseulamat kheueh ulôn.
31 Dan ulôn kupujoe Allah deungon lagu dan nyanyoe, lôn peuagong Gobnyan deungon zike dan syukoe.
32 Nyan leubeh geugalak lé TUHAN nibak keureubeuen leumô, keureubeuen leumô agam nyang raya.
33 Ban jingieng nyang lagée nyan, ureuëng nyang teutindéeh lumpah geumbira, ureuëng nyang seumah Allah rayeuk that até.
34 Sabab TUHAN geudeungoe su ureuëng gasien; Gobnyan hana geupeubiyeu umat Gobnyan nyang na didalam peunjara.
35 Pujoe kheueh Allah, hai langét dan bumoe, laôt dan banmandum makhluk nyang na didalam nyan.
36 Gobnyan geupeuseulamat Yerusalem dan geupeudong lom banda-banda Yehuda. Umat TUHAN tinggai teutab disinan; tanoh nyan jeuet keuhak milék awaknyan.
37 Aneuëk cucoe awaknyan jeuet keuwaréh; ureuëng-ureuëng nyang cinta ubak TUHAN nyang tinggai disinan.


Chapter 70

1 Keu teupimpén kor. Nibak Nabi Daud, bak watée teupeuseumah keureubeuen peuingat.
2 Ya Allah, peuseulamat kheueh ulôn, TUHAN, bubagaih kheueh neujak tulông lôn!
3 Bah kheueh ureuëng nyang keuneuk poh maté lôn nyan neupeutaloe dan jiplueng sabab ka bingong. Bah kheueh ureuëng nyang jisurak keuhai malang ulôn nyan teupoh jisurot dan teuhina.
4 Bah kheueh ureuëng nyang jipeukém ulôn nyan jeuet keuteukeujot dan malée.
5 Seumoga banmandum ureuëng nyang jiseumah Droeneueh meusuka cita dan meugeumbira; dan banmandum ureuëng nyang jicinta keuseulamatan nibak Droeneueh hana putôh jipeugah, "Keubit agong that TUHAN!"
6 Ulôn nyoe gasien dan leumoh; teuka kheueh bubagaih, ya Allah. Droeneueh kheueh nyang peuseulamat dan nyang tulông lôn, bék meulet, ya TUHAN.


Chapter 71

1 Bak Droeneueh ulôn meulindong, ya TUHAN, bék neupeubiyeu ya TUHAN, ulôn nyoe jipeumalée.
2 Peulheueh kheueh ulôn, sabab Droeneueh ade, deungoe kheueh dan peuseulamat kheueh ulôn.
3 Neupeujeuet kheueh keu ulôn lagée gunong batée teumpat ulôn tinggai, nyang mudah ulôn jak keunan tieb-tieb watée. Sabab Droeneueh ka neupeuputôh keu neupeuseulamat ulôn, Droeneueh kheueh teumpat ulôn meulindong dan teumpat lôn meuceue.
4 Ya Allah lôn, neupeuseuliseh kheueh ulôn nibak mara bahya, nibak kuasa ureuëng-ureuëng jeuhet nyang lalem dan keujam.
5 Sabab Droeneueh kheueh harapan ulôn, ya TUHAN, TUHAN, ulôn peucaya ubak Droeneueh yoh phon umu lôn mantong muda.
6 Simantong lôn udeb ulôn meusadeu ubak Droeneueh; Droeneueh kheueh nyang lindong ulôn yoh phon ulôn geupeulahé lé ma lé sababnyan ulôn sabe lôn pujoe Droeneueh.
7 Udeb ulôn jeuet keuteuladan keu ureuëng le, sabab Droeneueh kheueh peulindong ulôn nyang paleng teuga.
8 Ulôn sabe lôn pujoe Droeneueh, sipanyang uroe ulôn jak peugah keuagongan Droeneueh.
9 Bék kheueh neutiek ulôn watée ulôn ka tuha lagée nyoe bék teuma neutinggai ulôn meunyoe teunaga ulôn ka habéh,
10 sabab musoh-musoh lôn jipeugah sabe, ureuëng-ureuëng yang keuneukpoh maté lôn jimeukumplot.
11 Kheun Awaknyan, "Jihnyan ka geutinggai lé Po teu Allah; jak tatiyeub dan tadrob jihnyan, sabab hana soele nyang peuseulamat jih nyan."
12 Bék kheueh Droeneueh jiôh nibak ulôn, ya Allah, Allah lôn, neutulông kheueh ulôn deungon sigra.
13 Bah kheueh ureuëng nyang prang ulôn neupeumalée dan neusampôh nibak muka bumoe. Meunan cit bah kheueh ureuëng nyang keuneuk peuceulaka ulôn jiteuka bingong dan bansaboh tuboh jih keunong hina.
14 Teuma ulôn sabe meuharab ubak Droeneueh, dan seumaken le lôn pujoe Droeneueh.
15 Tieb uroe sabe ulôn calitra buet-buet Droeneueh nyang ade, dan keuseulamatan nibak Droeneueh nyang hana teukira.
16 Ulôn pujoe buet-buet Droeneueh nyang peukasa, ya TUHAN Allah, ulôn peumeusyeuhu keuadelan Droeneueh, keuadelan Droeneueh mantong.
17 Ya Allah, Droeneueh kheueh nyang peurunoe ulôn yoh phon ulôn nyoe mantong muda, sampoe án jinoe ulôn kisah buet Droeneueh nyang takjob luwa biasa nyan.
18 Ya Allah, bék kheueh neutinggai ulôn, sampoe ulôn tuha dan putéh ôk nibak ulée, mangat hase ulôn peusampoe kuasa dan keupeukasaan Droeneueh nyang luwa biasa ubak keuturonan kamoe nyang teuka.
19 Ya Allah, keuadelan Droeneueh manyang santeut éut langét; rayeuk that kheueh buet-buet Droeneueh; hana nyang hase jipeusabe droe jih saban lagée ngon Droeneueh?
20 Droeneueh neubri keu ulôn peundeuritaan nyang lumpah brat, teuma Droeneueh neupeupuléh teunaga ulôn dan neupeubeudôh ulôn dalam jrat.
21 Droeneueh neupeujeuet ulôn leubeh teuhoreumat, dan neuhibô ulôn lom.
22 Ulôn keuneuk pujoe Droeneueh deungon rapa-i gambus, sabab Droeneueh seutia, ya Allah. Ulôn keuneuk meuca-e lagu seumujoe keu Droeneueh, ya Allah, deungon alat meuneuén keucapi, ya Allah suci Israel.
23 Ulôn seumurak deungon peunoh suka cita, sira ulôn meuca-e lagu seumujoe keu Droeneueh. Jiwa raga lôn jimeuca-e deungon geumbira, sabab Droeneueh ka neupeuseulamat ulôn.
24 Siuroe suntok ulôn peusampoe keuadelan Droeneueh, sabab ureuëng-ureuëng nyang keuneuk peuceulaka ateueh droe ulôn awaknyan ka geupeutaloe lom geupeumalée.


Chapter 72

1 Nibak Nabi Sulaiman.
2 Seumoga gobnyan geupeuhakém umat Droeneueh meunurot huköm, dan geupeulaku ureuëng nyang teuseupet deungon ade.
3 Kira jih nanggroe kamoe makmu dan seujahteura, dan na keuadelan keu banmandum bansa.
4 Seumoga raja geubila hak kawöm jeulata, geutulông ureuëng gasien dan geupeuhabéh soe mantong nyang teugom awaknyan.
5 Seumoga gobnyan teutab meuteun tron meutron simantong na mata uroe dan buleuen.
6 Seumoga gobnyan lagée ujeuen nyang jitron di teungoh padang, dan lagée ujeuen teuga tron nyang ji-ile u dalam blang.
7 Seumoga keuadelan meukeumang keu siumu masa, dan keumakmuran meulimpah simantong na buleuen.
8 Keurajeuen gobnyan meutamah luwah nibak laôt saboh u laôt nyang laén, meulinteueng nibak timu sampoe u barat.
9 Peunduduek nyang na tinggai di padang pasi tundok ubak gobnyan dan musoh jisujut dikeue gaki gobnyan.
10 Raja-raja Tarsis dan pulo-pulo teuma jiba peuseumahan keu gobnyan. Raja-raja Arab dan Etiopia meunan cit teuka jiba upeti.
11 Banmandum raja nyang laén sujut dikeue gobnyan, meubagoe bansa jeuet keu namiet gobnyan.
12 Sabab gobnyan geupeuleupah ureuëng nyang leumoh teutindéeh hana meudaya, dan ureuëng gasien nyang jimeuhôi ngon meulakée ubak gobnyan.
13 Gobnyan lumpah geugaséh keu ureuëng gasien dan rakyat jeulata, dan geupeuseulamat udeb ureuëng nyang meularat.
14 Gobnyan geupeubeubaih awaknyan nibak ureuëng nyang seupet dan nyang peubuet gasa ateueh ureuëng nyan, sabab udeb awaknyan keubit meuhareuga nibak gobnyan.
15 Udeb kheueh baginda raja! Seumoga ubak gobnyan geupeuseumah méuh nibak nanggroe Arab. Seumoga gobnyan meudoá tieb-tieb watée dan sabe geureustu doá geuh nyan.
16 Seumoga gandom meulimpah ruwah bansaboh nanggroe dan bukét ngon gunong gobnyan peunoh deungon hase bumoe. Seumoga tanoh gobnyan gumbô lagée Gunong-gunong Libanon, dan peunduduek banda gobnyan meutamah-tamah lagée naleueng nyang timoh lam padang.
17 Seumoga nan raja ji ingat sabe siumu masa, dan meusyeuhu meutamah-tamah simantong na mata uroe. Seumoga bansa-bansa nyang laén jilakée beureukat lagée gobnyan, dan banmandum ureuëng jipeugah gobnyan mubahgia.
18 Teupujoe kheueh TUHAN, Allah Israel! Teuma Gobnyan nyang peubuet hai-hai nyang meupeusona.
19 Teupujoe kheueh nan Gobnyan nyang agong keu siumu masa; seumoga bansaboh bumoe peunoh deungon keumuliaan Gobnyan!
20 Seukian kheueh doá-doá Nabi Daud, bin Isai.


Chapter 73

1 Zabur Asaf.
2 Teuma ulôn ka bimbang, keupeucayaan lôn rab gadôh meulayang,
3 sabab ulôn ceumburu keu ureuëng cungkak, watée ulôn ngieng untông nyang jroh bak ureuëng jeuhet.
4 Sabab awaknyan hana keunong peunyakét nyang meudeurita, badan awaknyan teuga-teuga.
5 Bak awaknyan hana jitanggong rasa susah, hana teuma keunong malang lagée ureuëng laén.
6 Nyang kheueh sabab nyan awaknyan meusikeub sombong, dan sabe jimeubuet deungon keujam.
7 Nibak até awaknyan teupeupeunoh keujeuhetan, awaknyan gabuek deungon buet-buet nyang jireuncana jeuhet.
8 Buet awaknyan jipeuhina gob sira jiupat, dan deungon sombong jiancam keu ji tindéeh.
9 Awaknyan ji-iengkeue sira jiseurapa Allah nyang na didalam syeuruga, dan jimeusulet keu ureuëng nyang na di ateueh bumoe,
10 sampoe le that umat Allah nyang jimeupaleng ubak awaknyan, dan jipeucaya ubak tutoe haba awaknyan.
11 Jipeugah lé awaknyan, "Allah hana geuteupeue, Nyang Mahamanyang hana muphom sapeue."
12 Meunan kheueh keuadaan ureuëng jeuhet; udeb jih teunang, dan hareuta jih meutamah-tamah.
13 Sia-sia mantong ulôn jaga até gleh; hana meuguna ulôn peujiôh ngon desya.
14 Sabab siuroe suntok ulôn keunong lé malang; tieb-tieb beungoh ulôn nyoe keunong seksa.
15 Meunyoe ulôn peugah meunan, ulôn meukhianat bak angkatan aneuëk-aneuëk Droeneueh.
16 Teuma watée ulôn useuha mangat hase lôn puphom, hainyan keubit that payah nibak ulôn.
17 Akhé jih ulôn tamong u dalam Baét Allah, disinan kheueh barô lôn teupeue ngon muphom pakriban susah jih udeb ureuëng-ureuëng jeuhet nyan.
18 Droeneueh peuduek awaknyan ateueh rot nyang glue, dan neupeubiyeu awaknyan reubah binasa.
19 Lam sikleb mata awaknyan ka hanco, lumpah that ázeub keusosahan awaknyan.
20 Lagée lumpo nyang gadôh óh beungoh uroe; bak watée Droeneueh beudôh, ya TUHAN, awaknyan pi gadôh.
21 Watée ulôn meurasa tunu dan até ulôn lagée keunong tôb,
22 ulôn bangai dan hana meuphom, ulôn lagée beulatang dikeue Droeneueh.
23 Teuma ulôn teutab rab deungon Droeneueh, Droeneueh nyang mat jaroe uneuen lôn.
24 Neubimbéng ulôn deungon naseuhat, dan neuteurimong ulôn deungon keuhoreumatan bak laén watée.
25 Peue nyang atra ulôn lam syeuruga seulaén Droeneueh? Seulaén Droeneueh hana nyang ulôn harab di ateueh bumoe nyoe.
26 Bahpi jiwa raga lôn meutamah leumoh, Droeneueh kheueh teunaga ulôn, ya Allah; Droeneueh kheueh banmandum atra ulôn keu siumu masa.
27 Ureuëng nyang jitinggai Droeneueh jihnyan teuma meupalo, Droeneueh peubinasa ureuëng nyang hana seutia ubak Droeneueh.
28 Teuma nibak ulôn keubit that jroh jeueb-jeueb watée na bak bineh Allah, TUHAN Allah ulôn peujeuet keu teumpat meulindong lôn, mangat hase ulôn peusampoe banmandum buet-buet Gobnyan.


Chapter 74

1 Ca-e peulajaran Asaf. keudroe?
2 Ingat kheueh umat Droeneueh nyang ka neupiléh phon yoh ilée, bansa nyang Droeneueh peumeurdehka mangat jeuet keu milék Droeneueh. Ingat kheueh keu Bukét Sion, nyang ka Droeneueh peujeuet teumpat tinggai Droeneueh.
3 Neugiloe kheueh teumpat nyang ka meujeuet keu rungka-rungka, banmandum nyang na di Baét Droeneueh ka habéh jipeuhanco lé musoh durjana.
4 Musoh-musoh Droeneueh jiklik-klik ngon jiseumurak di Baét Droeneueh, dan jipeudong bupanji keumeunangan di Baét Droeneueh.
5 Awaknyan lagée ureuëng teubang kayée nyang teungoh ayon pato jih, keu jijak koh bak-bak kayée nyang na didalam gle.
6 Banmandum kayée nyang meu uke ka habéh jipeuhanco nyang jiseukok deungon pato dan palée.
7 Awaknyan jitot Baét Droeneueh sampoe habéh jab dan rata ngon tanoh; dan jipeukuto teumpat Droeneueh teuseumah.
8 Awaknyan jikeuneuk peutaklok kamoe sampoe habéh, dan jitot habéh teumpat iébadat nyang na di nanggroe nyoe.
9 Nabi-nabi dan tanda-tanda nyang ajaéb hana deuh le, dan hana meusidroe pi jiteupeue trok án pajan hainyoe sabe lagée nyoe.
10 Trok án pajan, ya Allah, musoh jihina Droeneueh? Peu kheueh siumu masa awaknyan jihina nan Droeneueh?
11 Pakon teuma Droeneueh hana neutulông le kamoe? Pakon neupeulheueh jaroe nibak kamoe?
12 Yoh awaiphon Droeneueh kheueh raja lôn, ya Allah, Droeneueh kheueh nyang peuseulamat kamoe?
13 Deungon teunaga nyang dahsyat laôt hase neuplah, dan bubena ulée-ulée naga laôt pi ka habéh neupeubeukah.
14 Meunan cit neupeureumok bubena ulée Lewiatan dan neupeujeuet jihnyan peunajoh beulatang di padang pasi.
15 Droeneueh kheueh nyang peuteubiet mata ié dan peu ile ié krueng; dan krueng nyang raya Droeneueh nyang peutho.
16 Droeneueh kheueh nyang peujeuet uroe ngon malam, dan nyang peuteuntée teumpat mata uroe dan buleuen.
17 Droeneueh kheueh nyang peuteutab bataih-bataih bumoe, nyang peujeuet musém khung dan musém ujeuen.
18 Ingat kheueh pakriban musoh jihina Droeneueh, ya TUHAN, bansa nyang hana jituri Droeneueh jihujat nan Droeneueh.
19 Bék neuseurah umat Droeneueh nyang hana meudaya ubak jaroe musoh nyang keujam. Dan Bék kheueh keu siumu masa neupeutuwoe naseb umat Droeneueh nyang malang.
20 Ingat kheueh janji nyang ka neupeuget deungon kamoe, sabab ureuëng jipeubuet buet keukeurasan di tieb-tieb teumpat nyang seupôt di nanggroe nyoe.
21 Bék neupeubiyeu ureuëng nyang keunong teugom jipeumalée lé awaknyan, seumoga ureuëng nyang seungsara dan gasien jipujoe Droeneueh.
22 Beudôh kheueh ya Allah, neuplah kheueh peukara Droeneueh! Sabab siuroe suntok Droeneueh jihina lé ureuëng-ureuëng nyang hana peucaya ubak Droeneueh.
23 Bék tuwoe ubak dumpék musoh-musoh Droeneueh, kiroh ngon karu lawan-lawan Droeneueh nyang seumaken teuga!


Chapter 75

1 Keu teupimpén kor. Meunurot lagu: Bék peumuseunah. Makmur Asaf. Lagu.
2 Kamoe seumah Droneueh, ya Allah, kamoe meusyukoe ubak Droeneueh dan kamoe peusampoe karya Droeneueh nyang luwa biasa nyoe.
3 Allah geupeugah, "Bak watée nyang ka Ulôn peuteuntée, Ulôn Lôn meuhakém deungon seuade-ade jih.
4 Meunyoe bumoe meuguncang lagée geumpa deungon banmandum peunduduek nyang na di ateueh bumoe nyan Ulôn kheueh nyang peukong taméh-taméh jih."
5 Keu ureuëng nyang raya haba, Ulôn peugah, jeuet bék le jipeugah nyang lagée nyan.
6 Dan ubak ureuëng jeuhet, mangat békle meusikeub cungkak. Bék péh-péh dada peubangga droe atawa peugah haba deungon sombong nyang hana meuguna.
7 Sabab peunghakéman hana teuka di timu atawa barat meunan cit bukon teuma di utara atawa seulatan.
8 Teuma Po teu Allah keudroe kheueh nyang jeuet keuhakém, Gobnyan nyang peumiyueb nyang sidroe dan Gobnyan teuma nyang peumanyang nyang laén.
9 Beungéh TUHAN saban lagée piala nibak jaroe gobnyan, piala nyan meuasoe ié anggô nyang kreueh. Allah nyang tunggeng asoe jih, banmandum ureuëng jeuhet nyang na di ateueh bumoe harôh jijieb ié nyan sampoe habéh.
10 Teuma ulôn teutab lôn peusampoe Allah Nabi Yakub, lôn meuca-e lagu puja ngon pujoe keu Gobnyan.
11 Gobnyan nyang wiet sampoe patah teunaga ureuëng jeuhet, di ureuëng nyang jroh meutamah teuga.


Chapter 76

1 Keu teupimpén kor. Deungon iréngan keucapi. Zabur Asaf. Lagu.
2 Po teu Allah meusyeuhu di Yehuda; Nan Gobnyan meusyeuhu ngon meugah di Israel.
3 Yerusalem na kheueh teumpat tinggai Gobnyan; Bukét Sion teumpat tinggai Gobnyan.
4 Disinan Gobnyan geupeuhanco banmandum alat prang, banmandum panah meukilat, peurisai dan peudeueng.
5 Keubit that agong Droeneueh, dan ceumeurlang, leubeh nibak gunong-gunong purba kala.
6 Ureuëng-ureuëng nyang beuhe ngon ceubeuh ka habéh geureupah; awaknyan teuéh dan hana jibeudôh le. Sipa-i-sipa-i nyang gagah peukasa ka gadôh teunaga jih.
7 Banmandum guda dan ureuëng pasang ateueh guda nyan habéh rhot dan maté, deungon dumpék Droeneueh, ya Allah Nabi Yakub!
8 Keubit luwa biasa Droeneueh! Meunyoe Droeneueh beungéh, soe nyang hase meuteun?
9 Di langét neupeugah keuputosan Droeneueh; bumoe teumakot dan seungab.
10 Watée Droneueh beudôh keuneuk neuhakém keu neupeuseulamat ureuëng nyang meudeurita di ateueh bumoe.
11 Ureuëng-ureuëng nyang paleng juah ngon jeuhet pih jipujoe Droeneueh, dan nyang mantong beungéh laju jijak cok ija krong tanda meukabong.
12 Peutrok kheueh janji gata ubak TUHAN Allah gata, bah kheueh banmandum bansa nyang na tinggai rab jiba peuseumahan keu Po teu Allah nyang jitakot.
13 Gobnyan nyang peupatah seumangat ureuëng mat kuasa; bubena raja jiteuka yo keu Gobnyan.


Chapter 77

1 Keu teupimpén kor. Meunurot: Yedutun. Zabur Asaf.
2 Deungon su meuleungkeng ulôn meuhôi ubak Po teu Allah; deungon meuleungkeng ulôn meulakée, dan Gobnyan geudeungoe ulôn.
3 Watée ulôn meukarat ulôn meudoá ubak TUHAN; simalam suntok ulôn leueng paleuet ngon meudoá hana reuda, teuma até ulôn hánjitem teuhibo.
4 Meunyoe ulôn ingat Po teu Allah, ulôn aloh alah, meunyoe ulôn teumanung, até lôn seumaken leusu.
5 TUHAN geupeujeuet ulôn hana hase teungéut meunyoe ka malam, ulôn geulisah sampoe hana hase lôn peugah haba.
6 Ulôn pike uroe-uroe nyang ka lheueh, ulôn ingat-ingat dan lôn manueng thon-thon nyang u likot.
7 Watée malam sabe lôn pike, dan jitanyong lam até,
8 "Peu kheueh siumu masa TUHAN geutulak dan hana geutem deungoe le?
9 Peu kheueh Gobnyan ka geupiôh geugaséh kamoe? Dan peu kheueh Gobnyan hana geutem le geupeupeunoh janji?
10 Peu kheueh ka tuwoe Allah keu gaséh sayang? Dan peu kheueh Gobnyan ka beungéh sampoe ka hanale rasa weueh?"
11 Laju ulôn peugah, "Nyoe kheueh nyang jeuet keupeunyakét até ulôn, bahwa Nyang Mahamanyang hana meukuasa le."
12 Ulôn keuneuk peuingat buet-buet Droeneueh, ya TUHAN, lôn ingat keuajaéban-keuajaéban Droeneueh yoh masa ilée.
13 Ulôn keuneuk manueng peue mantong nyang ka Droeneueh peubuet, dan ulôn pike karya-karya Droeneueh nyang hebat.
14 Ya Allah, peue mantong buet Droeneueh na kheueh suci, soe kheueh nyang na rayeuk jih saban ngon Allah kamoe?
15 Droeneueh kheueh nyang ka neupeubuet banmandum buet nyang ajaéb, kuasa Droeneueh ka neupeuleumah ubak bansa-bansa.
16 Deungon meubagoe teunaga Droeneueh neupeubeubaih umat Droeneueh, keuturonan Nabi Yakub dan Nabi Yusuf.
17 Meunyoe jingieng Droeneueh, ya Allah, ié pi jiteuka yo, meunan cit, deungon tuwie ié laôt jiteuka yo nyang hana teukira.
18 Awan jipeutron ujeuen, geulanteue ngon gogo hana reuda; kilat muble-ble jiseumama keudeh keunoe.
19 Geulanteue jimeusu ban salamle, dan kilat muble-ble jiseumama, bumoe meuguncang ngon meusu meukrab-krab.
20 Droeneueh neujak rot lam umbak, neujeumeurang laôt, teuma bakat Droeneueh hana teutinggai.
21 Lagée ureuëng meurabe Droeneueh tunton umat Droeneueh, deungon peurantaraan Nabi Musa dan Nabi Harun.


Chapter 78

1 Lagu-lagu peulajaran Asaf.
2 Ulôn keuneuk peugah peupatah dan misé umpama, dan ulôn peusaheh hiém yoh masa ilée,
3 hai-hai nyang kamoe deungoe dan kamoe teurimong, nyang jikisah lé indatu kamoe.
4 Kamoe hana kamoe söm sibagoe rahsia keuhai nyan ubak aneuëk-aneuëk kamoe; kamoe keuneuk peugah hainyan ubak angkatan óh lheueh kamoe keuhai kuasa TUHAN dan karya-karya Gobnyan nyang raya, dan buet-buet Gobnyan nyang ajaéb.
5 Ubak bansa Israel Gobnyan geubri huköm Geuh, dan ubak keuturonan Nabi Yakub peurintah Gobnyan. Gobnyan geuyue indatu geutanyoe mangat geupeurunoe hainyan keu aneuëk-aneuëk awaknyan,
6 mangat angkatan nyang lheueh nyan jituri Gobnyan, dan geupeusampoe teuma ubak aneuëk-aneuëk awaknyan.
7 Deungon na lagée nyan awaknyan pih jitroh harapan ubak Allah, dan hana jituwoe ubak buet Gobnyan, dan sabe lam taát ubak peurintah Gobnyan,
8 mangat awaknyan hana lagée indatu awaknyan, nyang galak ubak beurontak dan bak buet doraka; angkatan nyang guyah iman jih, dan hana seutia ubak Po teu Allah.
9 Sukée Efraim nyang meuseunjata panah dan busur, laju jiplueng bak watée teungoh muprang.
10 Awaknyan jiliengkeue peujanjian Allah ngon awaknyan, dan hana jitem taát deungon huköm Gobnyan.
11 Awaknyan tuwoe deungon buet-buet Gobnyan, dan hai-hai nyang ajaéb nyang geupeuleumah ubak awaknyan.
12 Dikeue indatu awaknyan, Allah geupeugôt buet ajaéb di nanggroe Meusé, di ateueh darat Zoan.
13 Gobnyan geuplah laôt, laju geupeujeumeurang awaknyan; ié laôt nyan geupeudong lagée ié lam kulam.
14 Gobnyan geupeuintat awaknyan deungon awan jeuet keupayong bak watée uroe dan deungon apui hu bak watée malam.
15 Gobnyan geuprah gunong batée di padang pasi, dan geubri ié jieb bak awaknyan nyang meulimpah ruwah.
16 Bukét batée geupeurintah beu jiteubiet ié, dan laju ié ji ile lagée ié krueng.
17 Teuma awaknyan sabe meudesya ubak Allah, di padang guron nyan awaknyan beurontak ubak Nyang Mahamanyang.
18 Awaknyan jisaja ji ujoe Allah, deungon cara jilakée peunajoh nyang jihawa.
19 Awaknyan jilawan Po teu Allah sira jipeugah, "Peu kheueh hase Allah geubri keu geutanyoe peunajoh di padang pasi?
20 Keubit beutôi Gobnyan geuseukok gunong batée nyang kreueh, sampoe jiteubiet ié lam batée nyan deungon kancang that. Teuma peu kheueh Gobnyan hase geukeubah ruti keu awaknyan dan geubri uengkot sie keu umat Gobnyan?"
21 Ban geudeungoe nyang lagée nyan, Allah beungéh lumpah na dan laju geuseurang awaknyan deungon apui hu; beungéh Gobnyan ateueh awaknyan meutamah-tamah,
22 sabab awaknyan hana jipeucaya ubak Allah, ubak kuasa Gobnyan nyang hase geupeuseulamat awaknyan.
23 Bahpi meunan Gobnyan geupeurintah ubak langét jeuet jibuka bubena babah pintoe langét nyan.
24 Laju Gobnyan geupeutron gandom lam syeuruga, manna keu peunajoh awaknyan.
25 Gobnyan geubri keu awaknyan peunajoh nyang meulimpah; awaknyan jimakheun ruti malaikat.
26 Meunan cit Gobnyan geuyue pôt angén timu; meunan cit lé kuasa Gobnyan angén seulatan pi laju jipôt.
27 Gobnyan geupeutron laju cicém-cicém keu umat Geuh, jeumeulah jih na lagée anou di pasi nyang hana teukira.
28 Geupeurhot laju cicém-cicém nyan nibak khimah-khimah di seukeulileng teumpat awaknyan tinggai.
29 Dan jimakheun kheueh laju awaknyan sampoe án troe, sabab Po teu Allah ka geubri peue nyang jilakée lé awaknyan.
30 Teuma bahpi ka na nyang lagée jilakée nyan, teuma nafeusu awaknyan gohlom cit meurasa pueh; jadi, teungoh awaknyan mantong jimakheun,
31 Po teu Allah beungéh that-that dan geulawan awaknyan; laju geupoh maté bubena ureuëng-ureuëng Israel nyang mantong muda-muda dan peukasa.
32 Bahpi meunan umat Gobnyan teutab meudesya, buet-buet nyang ajaéb nyang ka geupeuleumah teutab hana jitem peucaya.
33 Dan Allah laju geupeuhabéh udeb awaknyan lagée nafáh, thon-thon awaknyan jipeuhabéh dalam keuadaan teumakot.
34 Pajan mantong Allah geupoh maté napadub droe lamkawan awaknyan, nyang laén meunyeusai dan laju jiwoe ubak Gobnyan.
35 Awaknyan laju ji ingat bahwa Allah na kheueh nyang lindong gobnyan, dan bahwa Nyang Mahamanyang nyang peuseulamat awaknyan.
36 Teuma awaknyan jimeusulet bak Gobnyan, peue-peue mantong nyang jipeugah lé awaknyan na kheueh sulet bandum.
37 Awaknyan hana seutia ubak Gobnyan dan hana jimumat ubak peujanjian Gobnyan.
38 Teuma Allah geugaséh dan geupeu amphon umat Gobnyan, dan hana geupeubinasa awaknyan. Ka kayém that Gobnyan geupeuteun beungéh Geuh, dan hana geupeutrok mureuka Gobnyan.
39 Gobnyan geuingat bahwa awaknyan na kheueh makhluk nyang fana, lagée angén lalu dan hana jiriwang le.
40 Ka kayém that awaknyan jibeurontak keu Gobnyan, dan jipeusakét até Gobnyan watée di padang pasi.
41 Meu ulang-ulang awaknyan jiujoe Po teu Allah, jipeususah Nyang Kudus, Allah Israel.
42 Awaknyan hana ji ingat ubak keukuasaan Gobnyan, nibak uroe awaknyan geupeubeubaih nibak musoh,
43 bak watée Gobnyan geupeugöt buet-buet nyang ajaéb di nanggroe Meusé, dan mujizat-mujizat dipadang Zoan.
44 Krueng-krueng awaknyan geu ubah jeuet keudarah, sampoe awaknyan hana hase jijieb ié krueng nyan.
45 Gobnyan geuseksa awaknyan deungon lalat nyang jai, dan geupeubiyeu tanoh awaknyan jipeumuseunah lé cangguek.
46 Gobnyan geupeutron ulat deungon daruet, nyang jipeuhabéh hase panen dan hase ladang.
47 Gobnyan geupeurusak bak anggô awaknyan deungon ujeuen batée, dan bak-bak ara awaknyan deungon iémbon beuku.
48 Gobnyan geupeubiyeu ujeuen es rhot jitimpok ateueh beulatang peulara awaknyan, dan geulanteue jisama bubena beulatang peulara awaknyan.
49 Gobnyan geupeulheuh banmandum beungéh Geuhnyan nyang hu meuháb-háb deungon cara geuyuejak saboh pasokan malaikat mawöt nyang peujeuet awaknyan putôh asa.
50 Gobnyan hana geupeuteun beungéh Geuh nyan atawa geuweueh inseh ateueh udeb awaknyan, teuma geupeubinasa udeb awaknyan deungon peunyakét sampar.
51 Gobnyan laju geupoh maté aneuëk agam nyang tuha lam tieb-tieb keuluwarga ureuëng Meusé.
52 Gobnyan geupimpén umat Geuh lagée kawan bubiri, dan geupeutakteh awaknyan meulalu padang pasi.
53 Dalam bimbéngan Gobnyan awaknyan aman dan hana teumakot, dan musoh awaknyan ka habéh ngob lam laôt.
54 Laju umat Gobnyan geuba ubak tanoh nyang suci, ubak gunong-gunong nyang geureubot keudroe.
55 Dikeue umat Gobnyan laju geu use bubena peunduduek nyang na disinan laju geubagi-bagi nanggroe nyan keu mandum sukée bansa Israel, umat Gobnyan, sampoe awaknyan hase jitinggai nibak khimah-khimah musoh.
56 Teuma awaknyan beurontak dan jiujoe Po teu Allah Nyang Mahamanyang, peurintah-peurintah Gobnyan hana jitaát.
57 Awaknyan meukhianat lagée indatu droe jih, dan hana hase teupeucaya lagée aneuk panah nyang keuwieng.
58 Awaknyan jilawan Allah deungon teumpat seumah beurala, dan jipeujeuet Gobnyan ceumeuru deungon patong-patong awaknyan.
59 Ban geungieng nyan, Po teu Allah lumpah beungéh, dan geutulak awaknyan meuntah-meuntah.
60 Gobnyan geutinggai khimah Geuh di Silo, teumpat tinggai Gobnyan lamkawan manusia.
61 Gobnyan geupeubiyeu Peuto Peujanjian Geuh jiteun; lambang keumuliaan Gobnyan jireubot lé lawan.
62 Gobnyan beungéh ubak umat Geuh, milék pusaka Gobnyan, dan geupeubiyeu awaknyan jipoh ngon jicang maté deungon peudeueng.
63 Peumuda-peumuda awaknyan jipajoh lé apui; hana nyang tem meukawen deungon aneuëk-aneuëk dara awaknyan.
64 Teungku-teungku imeum awaknyan jipoh maté deungon peudeueng, inong-inong balée awaknyan hana hase jimo ba-e.
65 Teuma TUHAN geubeudôh lagée ureuëng ban beudôh éh, lagée ureuëng teuga nyang ban lheueh jieb ié anggô.
66 Gobnyan laju geuseupôt sampoe jisurot bubena lawan Gobnyan, dan geupeutaloe awaknyan keu siumu masa.
67 Teuma Gobnyan geutulak keuturonan Nabi Yusuf dan hana geupiléh sukée Efraim.
68 Nyang geupiléh na kheueh sukée Yehuda, dan Bukét Sion nyang geucinta.
69 Gobnyan geupeudong Baét Geuh lagée Baét Geuh nyang na di dalam syeuruga, dan lagée bumoe, khong ngon kukoh keu siumu masa.
70 Gobnyan geupiléh Nabi Daud hamba Geuh nyan, dan geucok gobnyan nibak kawan beulatang peulara,
71 nibak teumpat gobnyan peulara nang bubiri, keu geurabe Israel umat Gobnyan.
72 Nabi Daud geupeulara awaknyan deungon jujoe dan ikhlas, dan geubimbéng awaknyan deungon áref dan bijak sana.


Chapter 79

1 Zabur Asaf.
2 Manyét namiet-namiet Droeneueh ka jitinggai lé awaknyan jeuet keupeunajoh cicém-cicém nyang po di manyang. Manyét-manyét geunaséh Droeneueh jipeubiyeu mantong disinan jeuet keupeunajoh beulatang kleut.
3 Nibak mandum banda Yerusalem darah awaknyan rô lagée ié ile; hana ureuëng nyang jitem tanom awaknyan u dalam jrat.
4 Kamoe jeuet keubahan hinaan lé bansa-bansa silingka, awaknyan jipeukém dan jicemoh kamoe.
5 Ya TUHAN, peu kheueh siumu masa Droeneueh beungéh keu kamoe, dan ceumburu Droeneueh hu seu-uem lagée apui raya?
6 Neupeurhot kheueh beungéh Droeneueh nyan u ateueh bansa-bansa nyang hana jituri keu Droeneueh, dan u ateueh keurajeuen-keurajeuen nyang hana meubakti ubak Droeneueh.
7 Sabab awaknyan ka jipeubinasa umat Droeneueh, dan jipeuhanco teumpat tinggai awaknyan.
8 Bék neuhuköm kamoe sabab desya nyang geupeubuet lé indatu kamoe. Neugaséh kheueh keu kamoe jinoenyoe cit teuma, sabab kamoe ka putôh asa.
9 Tulông kheueh kamoe ya Allah, nyang peuseulamat kamoe, neupeu amphon kheueh desya-desya kamoe dan neupeubeubaih kheueh kamoe deumi keuhoreumatan Droeneueh keudroe.
10 Bék neupeubiyeu bansa laén jiteumanyong keuhai kamoe, "Dipat Allah awaknyan?" Bah kheueh kamoe ngieng peumbalasan ateueh bansa-bansa nyang jeuet keu ureuëng poh hamba-hamba Droeneueh.
11 Neudeungoe kheueh apoh apah ureuëng nyang na didalam tahanan; seumoga ureuëng-ureuëng nyang teupeuteuntée keu maté teupeubiyeu udeb sabab kuasa Droeneueh.
12 Ya TUHAN, neubalaih kheueh bansa-bansa nyan tujoh go lipat sabab banmandum peuhinaan awaknyan ateueh Droeneueh.
13 Teuma kamoe sibagoe umat Droeneueh, bubiri nyang Droeneueh rabe, teuma meusyukoe ubak Droeneueh siumu masa, dan kamoe pujoe Droeneueh tron meutron nibak keuturonan kamoe.


Chapter 80

1 keu teupimpén kor. Meunurot lagu: Bungöng Bakong. Zabur keusaksian Asaf.
2 Ya Geumbala nyang rabe Israel, deungoe kheueh nyoe, Droeneueh nyang pimpén keuturonan Nabi Yusuf sibagoe kawan. Droeneueh nyang duek meutakhta di ateueh kerub, teuka kheueh deungon geumilang
3 dikeue Efraim, Benyamin dan Manasye. Tunyok kheueh keukuasaan Droeneueh keu kamoe, dan teuka kheueh neujak peuseulamat kamoe.
4 Ya Allah, neupeupuléh kheueh kamoe; pandang kheueh kamoe deungon até nyang murah, mangat kamoe seulamat.
5 Ya TUHAN, Allah Nyang Mahakuasa, Trok án pajan Droeneueh neubeungéh kamoe, bahpi umat Droeneueh meudesya?
6 Neubri keu kamoe mo nyang hana reuda sibagoe peunajoh, ié mata nyang rô meulimpah sibagoe ié jieb kamoe.
7 Neupeubiyeu bansa-bansa teutangga jimeudakwa keuhai tanoh kamoe dan bubena musoh-musoh kamoe ka habéh jikém sabab galak.
8 Ya Allah Nyang Mahakuasa, neupeupuléh kheueh kamoe; neungieng kheueh kamoe deungon murah até, mangat kamoe seulamat.
9 Umat Droeneueh lagée bak anggô nyang Droeneueh pinah di nanggroe Meusé. Bansa-bansa nyang laén Droeneueh use, laju neupula bak kayée nyan di nanggroe awaknyan.
10 Droeneueh nyang keubah tanoh keu awaknyan; teuma jihnyan meu-ukeue lhok u dalam bumoe dan meulinteueng bansaboh nanggroe.
11 Gobnyan nyang peupayong bubena bukét-bukét, dan deungon cabeueng-cabeueng jih nyan hase teutôb bak kayée aras nyang raya-raya.
12 Ranteng jih meunyue ngon meujulue trok u Laôt Teungoh, dan pucok-pucok jih trok ubak Krueng Efrat.
13 Ya Allah, pakon neureuloh pageue jih, sampoe soe mantong ureuëng nyang jijak disinan ka hase jipot boh jih?
14 Bui uteuen jijak seuba sampoe rusak, dan beulatang nyang didalam padang pih jijak pajoh atra nyan.
15 Ya Allah Nyang Mahakuasa, neuteuka kheueh lom, neungieng kheueh rot syeuruga dan neukalon kheueh umat Droeneueh.
16 Neupeuseulamat kheueh umat nyang lagée bak anggô nyang ka Droeneueh pula keudroe, dan tarok bak anggô nyang ka Droeneueh peujeuet kukoh.
17 Musoh ka jiteubang dan laju jitot ngon apui; bah kheueh awaknyan neupeubinasa lé beungéh Droeneueh.
18 Neulindong kheueh ureuëng nyang ka Droeneueh piléh, aneuëk manusia nyang neupeukong keu Droeneueh.
19 Teuma kamoe hanale kamoe paleng nibak Droeneueh; neujaga kheueh udeb kamoe, teuma kamoe meupujoe Droeneueh.
20 Ya TUHAN Allah Nyang Mahakuasa, neupeupuléh kheueh kamoe, neupandang kheueh kamoe deungon murah até, mangat kamoe seulamat.


Chapter 81

1 Keu teupimpén kor. Meunurot lagu: Gitit. Nibak Asaf.
2 Meuca-e kheueh nyanyoe puja ngon pujoe ubak Po teu Allah, teunaga geutanyoe, meusurak kheueh deungon geumbira keu Allah Nabi Yakub.
3 Tapéh kheueh rapa-i, dan peuphon kheueh musik, peutek kheueh gambôh dan keucapi deungon su meualon-alon.
4 Yeub kheueh beureuguih watée uroe raya geutanyoe, bak watée khanuri buleuen barô dan buleuen peunoh.
5 Sabab hai nyang lagéenyan na kheueh saboh lamkawan peuratoran di Israel, dan saboh nibak meubagoe peurintah Allah Nabi Yakub.
6 Gobnyan geupeujeuet saboh peuratoran keu bansa Israel, bak watée gobnyan geumaju jak lawan bansa Meusé.
7 "Ulôn ka Lôn beuôt beuban di ateueh ulée gata, dan Lôn peulheuh raga seumeuôn nyang na bak jaroe gata.
8 Lam aloh alah gata meulakée, dan Ulôn peuseulamat gata. Ulôn jaweueb gata nibak geulanteue teumpat Ulôn musöm, Ulôn ujoe gata nibak mata ié Meriba.
9 Deungoe kheueh Ulôn peuingat nyoe, hai umat Ulôn, Israel, meunyoe gata tatem deungoe Ulôn!
10 Bék na lamkawan gata jimeu ilah ubak ilah nyang laén, bék kheueh taseumah ubak ilah aséng.
11 Ulôn kheueh TUHAN Allah gata, nyang tunton gata peuteubiet lam nanggroe Meusé. Watée gata deuk Ulôn bri peunajoh.
12 Teuma umat Ulôn hana jitem deungoe peue nyang Ulôn peugah, Israel hana jitem taát ubak ulôn.
13 Sabab nyan Ulôn peubiyeu jihnyan jeuet keu ureuëng kreueh ulée; bah kheueh awaknyan jiseutôt keuheundak jih keudroe.
14 Ah, meunyoe umat Ulôn jitem deungoe peue nyang Ulôn peugah, meunyoe awaknyan jitem taát ubak Ulôn,
15 teuma Ulôn deungon sigra Lôn peutaklok musoh awaknyan, dan Ulôn peutaloe banmandum lawan awaknyan.
16 Ureuëng nyang banci teuma Lôn peutaklok, awaknyan teuhuköm keu siumu masa.
17 Teuma umat Ulôn kujok peunajoh gandom nyang teupiléh, dan Ulôn peutroe deungon meulisan rimba."


Chapter 82

1 Zabur Asaf.
2 "Bék le peusidang gob ngon cara ilat, dan bék dong blaih ureuëng jeuhet.
3 Bila kheueh aneuëk yatem ngon ureuëng hana meudaya, jok kheueh keuadelan keu ureuëng gasien dan seungsara.
4 Peubeubaih kheueh ureuëng nyang leumoh dan hana meudaya, peuhinda kheueh awaknyan nibak jaroe ureuëng jeuhet.
5 Gata hana keunong sapeue, bangai dan sisat, lé sabab gata, tata tereuteb masyarakat hana meuteuntée le.
6 Ulôn peugah bahwa gata ilahi dan gata banmandum aneuëk-aneuëk Allah Nyang Mahamanyang.
7 Teuma gata teutab maté lagée manusia, lagée tieb-tieb ureuëng rayeuk, gata pih teutab maté."
8 Teuka kheueh ya Po teu Allah, peusidang kheueh donya, sabab banmandum bansa na kheueh atra Droeneueh.


Chapter 83

1 Zabur Asaf: saboh lagu.
2 Ya Allah, bék kheueh neuiem droe, bék neupangkée jaroe dan seungab mantong.
3 Kalon kheueh, musoh Droeneueh ka jibeudôh, ureuëng-ureuëng nyang jibanci bak Droeneueh ka beurontak.
4 Awaknyan ka jimupakat ngon jipeuget reuncana nyang licek keuneuk jilawan umat Droeneueh; dan jimeurok pakat jijak lawan ureuëng-ureuëng nyang Droeneueh lindong.
5 Kheun awaknyan, "Jak geutanyoe tajak peuhanco bansa Israel, mangat nan awaknyan hana ji ingat le."
6 Bansa-bansa ka meusaho saboh pakat, dan meusikutu jilawan Droeneueh:
7 bansa Edom dan Ismail, ureuëng-ureuëng Moab dan Hagar;
8 bansa Gebal, Amon dan Amalek, bansa Filistea meunan cit deungon peunduduek Tirus.
9 Meunan cit Asyur ka jimeugabong deungon awaknyan, jeuet keu gaki jaroe keuturonan Lot.
10 Neupeusaneut kheueh awaknyan lagée ureuëng Midian, lagée Sisera dan Yabin di Krueng Kisyon,
11 nyang ka jipeubinasa di Endor, dan jeuet keu baja ateueh tanoh.
12 Neupeusaneut kheueh peumimpén awaknyan lagée Oreb dan Zeeb, peutundok kheueh peunguasa awaknyan lagée Zebah dan Salmuna,
13 sabab awaknyan ka jipeugah, "Jak geutanyoe tajakduek bak tanoh teumpat tinggai Allah."
14 Ya Allah, neusipeuek kheueh awaknyan lagée abée meutabu ngon meuhambô, lagée jeumpung nyang jiyueb lé angén.
15 Lagée apui hu nyang teungoh tutông uteuen, apui nyang hu habéh hangöh gunong-gunong.
16 Neutiyeub kheueh awaknyan ngon angén badée Droeneueh, dan neupeukeujot kheueh awaknyan deungon angén badée Droeneueh.
17 Ya TUHAN, bah kheueh awaknyan teuhina, mangat awaknyan jiaku keukuasaan Droeneueh.
18 Bah kheueh awaknyan siumu masa sabe lam malée dan teumakot nyang hana teukira, dan bah kheueh awaknyan maté lam keuhinaan.
19 Seumoga awaknyan jiteupeue bahwa Droeneueh kheueh Nyang Mahamanyang, TUHAN, nyang mat kuasa ateueh bansigom bumoe.


Chapter 84

1 Keu teupimpén kor. Meunurot lagu: Gitit. Zabur kawöm Korah.
2 Keubit that mangat teumpat tinggai Droeneueh, Ya Allah Nyang Mahakuasa!
3 Até ulôn lumpah that rindu ubak Baét Droeneueh, jiwa raga lôn meusurak geumbira keu Allah nyang udeb.
4 Bahpih cicém tulô meuteumé rumoh dan cicém geulayang saboh uempueng, teumpat cicém nyan jikeubah aneuëk jih bak bineh miseubah Droeneueh, ya TUHAN Nyang Mahakuasa, Raja lôn dan Allah lôn.
5 Keubit that bahgia ureuëng nyang tinggai di Baét Droeneueh, dan jimeuca-e nyanyoe pujo keu Droeneueh tieb-tieb watée.
6 Mubahgia kheueh ureuëng nyang meuteumé teunaga nibak Droeneueh, dan nyang na niet jijak ziarah u Gunong Sion.
7 Teungoh awaknyan jijak rot Pantôn Baka, teumpatnyan awaknyan ubah sampoe jeuet keu mata ié, ujeuen nyang phon ié jih meulimpah deungon beureukat.
8 Teunaga awaknyan seumaken meutamah, watée teungoh jijak u Sion, ubak teumpat Allah banmandum dewata jipeuleumah droe.
9 Deungoe kheueh doá ulôn, ya TUHAN Allah Nyang Mahakuasa, neudeungoe kheueh, ya Allah Nabi Yakub.
10 Jok kheueh beureukat ubak raja kamoe, ya Allah, neulindong kheueh ureuëng nyang ka Droeneueh piléh.
11 Leubeh get siuroe di Baét Droeneueh nibak siribée uroe di teumpat laén. Ulôn kupiléh jeuet keu ureuëng jaga babah pintoe di Baét Allah ulôn nibak tinggai di rumoh ureuëng jeuhet.
12 Sabab TUHAN Allah peulindong geutanyoe dan raja nyang agong, nyang geuanugeurah keu geutanyoe geunaséh dan keuhoreumatan. Gobnyan hántom geutulak peue mantong meunyoe nyang jroh ateueh ureuëng nyang udeb jih hana meunoda.
13 Ya TUHAN Nyang Mahakuasa, mubahgia kheueh ureuëng nyang peucaya ubak Droeneueh.


Chapter 85

1 Keu teupimpén kor. Zabur kawöm Korah.
2 Droeneueh meukeunong ubak tanoh Droeneueh, ya TUHAN, keuadaan Israel ka neupeupuléh.
3 Droeneueh ka neupeu amphon bubena desya umat Droeneueh; neupeumeuáh banmandum keusalahan jih.
4 Awaknyan hanale neubeungéh; meureuka Droeneueh nyang luwa biasa nyan neutarek lom teuma.
5 Peupuléh kheueh kamoe, ya Allah nyang peuseulamat kamoe, bék neuseksa le lam udeb kamoe.
6 Peu kheueh keu siumu masa Droeneueh neubeungéh kamoe, dan teutab neubeungéh tron meutron?
7 Neupeu kong kheueh kamoe lom jeuet kamoe umat Droeneueh nyoe meugeumbira sabab lam tulôngan Droeneueh.
8 Neutunyok kheueh bahwa Droeneueh teutab neugaséh kamoe, ya TUHAN, neubri kheueh keu kamoe keuseulamatan nibak Droeneueh.
9 Ulôn deungoe peue nyang geupeugah lé TUHAN Allah; Gobnyan ka geupeujanji keuseulamatan keu tanyoe, umat Gobnyan, asai geutanyoe hana taulang bak tapeubuet desya.
10 Keubit, Gobnyan siab seudia geupeuseulamat ureuëng nyang taqwa, Allah nyang agong tinggai di nanggroe geutanyoe.
11 Gaséh dan keuseutiaan meurumpok, keuadelan dan damé saléng meuwa-wa.
12 Keuseutiaan manusia jitimoh ateueh bumoe, dan keuadelan Allah teuka di langét.
13 TUHAN geukaronya nyang jroh-jroh, dan tanoh geutanyoe jiteubiet hase.
14 Keuadelan awai teuka nibak TUHAN, dan jipeusiab jalan keu Gobnyan.


Chapter 86

1 Doá Nabi Daud. ulôn, sabab ulôn gasien dan leumoh.
2 Jaga kheueh udeb lôn, sabab Droeneueh neugaséh ulôn, neupeuseulamat kheueh hamba Droeneueh nyang peucaya ubak Droeneueh.
3 Droeneueh kheueh Allah lôn, neugaséh kheueh ulôn, ya TUHAN, sabab siuroe seupôt ulôn meudoá bak Droeneueh.
4 TUHAN, neupeumangat kheueh até hamba Droeneueh nyoe, sabab ubak Droeneueh kheueh ulôn sintong asoe até lôn.
5 Droeneueh jroh, ya TUHAN, dan galak neupeu amphon ureuëng nyang lakée amphon ubak Droeneueh, ureuëng nyang meudesya ubak Droeneueh teutab neugaséh ngon neusayang deungon gaséh nyang meulimpah.
6 Deungoe kheueh doá ulôn, ya TUHAN, deungoe kheueh meulakée lôn nyang ulôn lakée tulông.
7 Bak watée ulôn meukarat teutab lôn meudoá ubak Droeneueh, sabab Droeneueh neujaweueb ulôn.
8 Ya TUHAN, hana TUHAN nyang laén nyang sa deungon Droeneueh, hana nyang hase jipeubuet lagée Droeneueh peubuet.
9 Banmandum bansa nyang Droeneueh peujeuet teuma teuka, ya TUHAN, keu jiseumah Droeneueh dan jipujoe keuagongan Droeneueh.
10 Sabab Droeneueh peukasa dan neupeubuet buet-buet nyang ajaéb, teuma Droeneueh kheueh Allah.
11 Peurunoe kheueh keuheundak Droeneueh ubak ulôn, ya TUHAN, mangat jeuet ulôn seutôt deungon seutia; neupeujeuet kheueh ulôn keu ureuëng taqwa deungon sipeunoh até.
12 Ulôn meusyukoe ubak Droeneueh deungon seupeunoh até, ya TUHAN, Allah ulôn; ulôn keuneuk pujoe keubeusaran Droeneueh sampoe siumu masa.
13 Sabab Droeneueh teutab neugaséh ubak ulôn deungon geunaséh nyang raya; Droeneueh ka neupeulheueh nyawöng ulôn nibak maté.
14 Ya Allah, ureuëng sombong jibeudôh jijak prang ulôn, saboh kawan ureuëng keujam keuneuk peumaté ulôn; awaknyan hana jipakoe keu Droeneueh.
15 Teuma Droeneueh, ya TUHAN, Allah nyang peungaséh dan peunyayang, saba, peunoh geunaséh dan seutia.
16 Neungieng kheueh dan neugaséh kheueh ulôn, neupeuteuga kheueh dan peuseulamat kheueh ulôn, sabab lagée ma ulôn, ulôn meubakti ubak Droeneueh.
17 Neubri kheueh ubak ulôn tanda jroh Droeneueh, ya TUHAN, mangat ureuëng nyang banci keu ulôn neupeumalée, meunyoe awaknyan ngieng Droeneueh neutulông dan neuhibô ulôn.


Chapter 87

1 Zabur kawöm korah, saboh lagu.
2 Nibak banmandum banda Israel, Yerusalem nyang paleng geusayang.
3 Deungoe kheueh, hai banda Allah, hai-hai nyang paleng takjob nyang teupeugah keuhai gata:
4 "Meusé dan Babel Ulôn peutamong lam dafeutar bansa-bansa nyang taát ubak Ulôn. Meunan cit Filistea, Tirus dan Sudan jitamong lam kiraan peunduduek Yerusalem."
5 Ubak Sion ureuëng laén jipeugah, bahwa banmandum bansa jitamong cit keunan warga jih, dan bahwa Nyang Mahamanyang geupeukong jihnyan.
6 TUHAN geupeutamong bansa-bansa dalam dafeutar peunduduek Yerusalem.
7 Awaknyan jilikak ngon jimeuca-e, "Sion na kheueh teumpat asai lôn!"


Chapter 88

1 Lagu. Zabur kawöm Korah. Keu teupimpén kor. Meunurot lagu: Mahalat Leanot. Ca-e peungajaran Heman, ureuëng Ezrahi.
2 Ya TUHAN, Allah nyang peuseulamat ulôn, óh watée uroe ulôn meulakée ubak Droeneueh, dan óh watée malam ulôn meuhadab ubak Droeneueh.
3 Seumoga doá ulôn trok ubak Droeneueh, neudeungoe kheueh nyang ulôn lakée nyoe.
4 Ulôn keunong lé apoh apah nyang paleng le; mawöt ka teupreh di babah pintoe.
5 Ulôn lagée ureuëng nyang jipeutron u babah pintoe jrat, ureuëng nyang ka habéh teunaga.
6 Ulôn jitinggai lamkawan ureuëng maté, lagée ureuëng keunong poh, teuéh didalam jrat, lagée ureuëng nyang ka neutuwoe hana neuingat mubacut pi, ureuëng nyang hana Droeneueh tulông le.
7 Droeneueh neugeulawa ulôn u dalam uruek nyang paleng lhok, u dalam jrat nyang lhok dan seupôt buta.
8 Beungéh Droeneueh nyan teuteugon ulôn deungon geuhon that, ulôn hanco teuginton deungon meureuka Droeneueh.
9 Neupeujiôh rakan-rakan lôn nibak ulôn, dan neupeujeuet ulôn ureuëng nyang luwat nibak awaknyan. Ulôn meukuröng dan hana hase lôn teubiet,
10 mata ulôn jeuet keureudok sabab seungsara. Tieb-tieb uroe ulôn meulakée ubak Droeneueh, ya TUHAN, dan lôn meudoá deungon jaroe teunyue ngon paleuet meulinteueng.
11 Peu kheueh Droneueh neupeuget keuajaéban keu ureuëng maté? Peu kheueh awaknyan jibeudôh dan jipujoe Droeneueh?
12 Peu kheueh geunaséh Droeneueh nyan jipeugah cit lam jrat, dan keuseutiaan Droeneueh di teumpat keubinasaan?
13 Peu kheueh na nyang teupeue keuajaéban Droeneueh didalam seupôt, atawa keujroh Droeneueh di nanggroe teumpat ureuëng nyang geupeutuwo?
14 Teuma ulôn lakée tulông Droeneueh, ya TUHAN, tieb-tieb beungoh ulôn lakée doá ubak Droeneueh.
15 Ya TUHAN, pakon Droeneueh neutulak ulôn? Pakon neupaleng wajah Droeneueh nibak ulôn?
16 Yoh ubit kon ulôn seungsara dan sabe jiluem lé mawöt, ulôn lumpah that payah lôn tanggong huköman Droeneueh.
17 Beungéh Droeneueh nyan nyang luwa biasa teupeuhanco ulôn; dan seurangan Droeneueh nyang hebat teupeubinasa ulôn.
18 Siuroe seupôt beungéh Dreoneueh nyan lagée ié raya nyang jikeulileng di geuniréng ulôn, jikeupong ulôn rot meubagoe arah.
19 Rakan-rakan lôn nyang paleng rab nyan pih ka Droeneueh peujiôh nibak ulôn, tinggai seupôt buta nyang jeuet keu rakan ulôn.


Chapter 89

1 Ca-e peulajaran Etan, ureuëng Ezrahi.
2 Gaséh sayang Droeneueh, ya TUHAN, lôn keuneuk zike siumu masa, keuseutiaan Droeneueh lôn peusampoe tron meutron.
3 Sabab ulôn kuteupeue gaséh Droeneueh nyan na kheueh keukai abadi, keuseutiaan Droeneueh kukoh lagée langét.
4 Droeneueh ka neupeugah, "Ulôn ka lheueh Lôn peugét janji deungon ureuëng nyang Ulôn piléh; Ulôn ka lheueh Lôn meusumpah yoh Nabi Daud, hamba Ulôn:
5 'Takhta gata Ulôn peuteuen keu siumu masa, tron meutron aneuëk cucoe gata teuma jiduek disinan.' "
6 Sidang nyang na lam syeuruga geupujoe buet-buet Droeneueh nyang ajaéb, dan geupeutrok keuseutiaan Droeneueh, TUHAN.
7 Di langét hana nyang saban deungon Droeneueh, ya TUHAN, dan hana teuma makhluk lam syeuruga nyang sa deungon Droeneueh.
8 Droeneueh jihoreumat lé mandum nyang suci, dan that-that jitakot leubeh nibak banmandum nyang na disikeulileng Droeneueh.
9 TUHAN, Allah Nyang Mahakuasa, soe kheueh nyang na lagée teuga dan teunaga Droeneueh nyan? Droeneueh seutia lam hai peue mantong ya TUHAN.
10 Droeneueh nyang kuasa laôt nyang meugeulora raya, dan nyang peureuda umbak dan geulora samudra.
11 Rahab, naga laôt, Droeneueh peureumôk dan Droeneueh poh maté, deungon jaroe nyang teuga Droeneueh peutaloe bubena musoh Droeneueh.
12 Langét dan bumoe na kheueh atra Droeneueh, donya dan peue mantong asoe jih na kheueh cebtaan Droeneueh.
13 Droeneueh kheueh nyang peujeuet utara dan seulatan, Gunong Tabor dan Hermon meusurak geumbira keu Droeneueh.
14 Padubna raya kuasa Droeneueh, ya TUHAN, dan padub na hebat teunaga Droeneueh!
15 Keuadelan dan huköm na kheueh dasai keurajeuen Droeneueh, gaséh dan keuseutiaan na kheueh nyata lam peue mantong nyang Droeneueh peubuet.
16 Mubahgia kheueh bansa nyang meuiébadat deungon geumbira, nyang udeb lam cahya teuka Droeneueh, ya TUHAN.
17 Siuroe sabe awaknyan meusuka cita dan teutab teuga, lé sabab keubaiékan Droeneueh.
18 Droeneueh ka neubri keu kamoe meunang nyang gilang geumilang, sabab jroh Droeneueh kamoe nyoe meunang.
19 Sabab nyang lindong kamoe na kheueh ureuëng nyang Droeneueh piléh, ya TUHAN; raja kamoe na kheueh milék Allah Kudus Israel.
20 Yoh watée ilée lam saboh keumalon, Droeneueh neupeugah ubak hamba Droeneueh nyang seutia, "Ulôn kalheueh Lôn tulông sidroe pahlawan, sidroe ureuëng nyang ka Ulôn piléh nibak rakyat nyang ka Ulôn beôt deureujat jih.
21 Ulôn ka lheueh meurumpok ngon Nabi Daud, hamba Ulôn nyan, dan Ulôn baiát jih nyan ngon minyéuk upacara.
22 Teunaga Ulôn sabe teulindong jih, kuasa Ulôn teupeuteuga jih.
23 Jihnyan hana hase jipeutaloe lé musoh, dan hana teuma jitindéeh lé ureuëng jeuhet.
24 Banmandum musoh jih Ulôn peubinasa, Ulôn poh maté soemantong nyang banci keujih.
25 Ulôn teutab Ulôn gaséh keujih dan teutab seutia keujihnyan, dan Lôn peujeuet jihnyan seumaken meukuasa.
26 Keurajeuen jih Ulôn peuluwah, phon di Laôt Teungoh sampoe ubak Krueng Efrat.
27 Jihnyan teuma jipeugah ubak Ulôn, 'Droeneueh kheueh Ureuëng syiek ulôn, Po teu Allah ulôn, peulindong dan nyang peuseulamat ulôn.'
28 Ulôn teuma Lôn peujeuet jihnyan putra Ulôn nyang tuha, nyang paleng agong lamkawan banmandum raja.
29 Jihnyan teutab Ulôn gaséh keukai ngon abadi, janji Ulôn deungon jihnyan teutab kong.
30 Takhta jihnyan teutab Ulôn peuteuen simantong langét na di ateueh bumoe, tron meutron aneuëk cucoe jihnyan teutab jiduek disinan.
31 Teuma meunyoe keuturonan jih nyang iengkeue huköm, dan hana udeb meunurot peurintah Ulôn,
32 meunyoe awaknyan hana jipakoe peue nyang ka Ulôn peuteutab dan jipeujayéh peuratoran Ulôn,
33 awaknyan Ulôn huköm deungon peunyeunuét sabab nyang ji iengkeue nyan, dan Ulôn peurhot deungon beuncana sabab desya-desya jihnyan.
34 Teuma keu Nabi Daud teutab ulôn gaséh, dan jihnyan hana ji iengkeue ubak keuseutiaan Lôn.
35 Peujanjian Ulôn deungon jihnyan hana Ulôn peubateue, nibak janji Lôn hana meusaboh pi nyang Ulôn tarek lom.
36 Teuma sigoe keu siumu masa Ulôn meusumpah deumi nan Ulôn nyang suci; ulôn hana Lôn meusulet ubak Nabi Daud.
37 Takhta jihnyan teutab meuteun simantong mata uroe na di ateueh langét, tron meutron sampoe ubak aneuk cucoe nyang duek dan nyang mat keureujeuen.
38 Keurajeuen jihnyan teutab na lagée buleuen, saksi seutia di awan-awan."
39 Teuma jinoenyoe Droeneueh neubeungéh keu raja, Droeneueh tiek dan neutulak ureuëng nyang ka Droeneueh piléh.
40 Neupeubateue peujanjian Droeneueh deungon hamba Droeneueh, mahkota gobnyan ka neugeulawa u dalam luhôb.
41 Droeneueh peuhanco dumna bintéh beuton banda gobnyan, kuta-kuta gobnyan neupeujeuet keu puyeng-puyeng nyang meutabu keudeh keunoe.
42 Somantong ureuëng nyang jijak rotnyan laju jireupah hareuta milék gobnyan, gobnyan jeuet keu ureuëng teuhina nibak kawöm silingka gobnyan.
43 Droeneueh neupeumeunang musoh-musoh gobnyan, dan neupeujeuet banmandum lawan gobnyan jimeusuka ria.
44 Meunan cit deungon sinjata gobnyan neupeujeuet hana meuguna, Droeneueh hana neutulông gobnyan watée lam prang.
45 Neupeu akhé kuasa gobnyan nyang seumarak, dan takhta gobnyan neureupah neutiek ateueh tanoh.
46 Droeneueh neupeupaneuk masa muda gobnyan, dan teutôb gobnyan deungon malée nyang hana teukira.
47 Trok án pajan Droeneueh neumusöm, ya TUHAN? Trok án pajan beungéh Droeneueh nyan hu meuháb-háb lagée apui raya?
48 Neu ingat kheueh keu ulôn padubna paneuk jih udeb nyoe, neucebta manusia sibagoe makhluk udeb nyang fana.
49 Soe kheueh nyang hase udeb sabe dan hana maté? Soe kheueh nyang hase teupeusie nibak ázeub kubu?
50 Ya TUHAN, dipat kheueh tanda gaséh Droeneueh nyan nyang seumula, nyang ka Droeneueh peujanji ubak Nabi Daud deumi keuseutiaan Droeneueh?
51 Ingat kheueh ya TUHAN, pakriban hamba Droeneueh nyoe jihina ngon jiseurapa, ulôn jai that-that lôn tanggong hinaan nibak bansa-bansa.
52 Musoh-musoh Droeneueh jihina raja nyang Droeneueh piléh, ya TUHAN, jihina gobnyan homantong gobnyan jak.
53 Pujoe kheueh TUHAN keu siumu masa. Beujeuet kheueh lagéenyan! Amin!


Chapter 90

1 Doá Nabi Musa, hamba Po teu Allah.
2 Sigohlom gunong-gunong Droeneueh cebta, dan sigohlom bumoe ngon donya nyoe Droeneueh peugöt, Droeneueh kheueh Allah nyang keukai, nyang hana awai dan hana akhé.
3 Droeneueh kheueh nyang yue manusia mangat geuriwang ubak sai geuh, jeuet keu abée lagée awai nyang ka.
4 Nibak Droeneueh siribée thon nyan lagée siuroe, uroe baroe nyang ka liwat; lagée saboh gileran jaga bak watée malam.
5 Droeneueh peuhanyöt kamoe; kamoe nyoe lagée meulumpo, lagée naleueng nyang teungoh timoh;
6 óh watée beungoh jihnyan timoh dan meukeumang, teuma laju layée óh watée seupôt uroe.
7 Kamoe teukeujot deungon beungéh Droeneueh nyan, dan habéh binasa lé meureuka Droeneueh.
8 Droeneueh keubah salah kamoe dikeue Droeneueh, desya kamoe nyang musöm ka leumah lé Droeneueh.
9 Udeb kamoe paneuk sabab Droneueh beungéh, thon-thon kamoe meulalu lagée nafáh nyang teupröh.
10 Masa udeb kamoe na kheueh tujoh ploh thon, dan meunyoe kamoe teuga, na lapan ploh thon. Teuma na kheueh apoh apah dan deurita yang kamoe teumé; óh ka lheueh udeb nyang paneuk, kamoe pih leunyab.
11 Soe kheueh nyang hase jiteupeue keuhai meureuka Droeneueh nyan nyang meunan dahsyat, atawa sadar that keu akibat beungéh Droeneueh nyan?
12 Peusadar kheueh kamoe keuhai paneuk jih dalam udeb nyoe mangat kamoe jeuet keu ureuëng nyang meubudo basa.
13 Ya TUHAN, sampoe án pajan Droeneueh neubeungéh keu kamoe? Neugisa kheueh dan neugaséh kheueh ubak hamba-hamba Droeneueh nyoe.
14 Neupeulimpah kheueh geunaséh Droeneueh ateueh kamoe tieb-tieb beungoh, ya TUHAN, jeuet kamoe geumbira dan sabe kamoe meuca-e ngon meulagu simantong kamoe udeb.
15 Neubri kheueh keu kamoe keubahgiaan nyang seuimbang deungon peundeuritaan nyang kamoe tanggong nibak thon-thon nyang seungsara.
16 Neutunyok kheueh karya Droeneueh keu kamoe namiet-namiet Droeneueh, dan kuasa Droeneueh nyang seumarak ubak keuturonan kamoe.
17 Ya TUHAN Allah kamoe, neubri kheueh beureukat keu kamoe, jeuet peue mantong buet nyang kamoe peubuet meuhase.


Chapter 91

1 Ureuëng nyang meulindong nibak Nyang Mahamanyang, dan tinggai dalam naungan Nyang Mahakuasa,
2 jeuet jipeugah ubak TUHAN, "Droeneueh kheueh nyang bila dan lindong ulôn, Allah lôn, ubak Droeneueh kheueh ulôn peucaya."
3 Gobnyan geupeuleupah gata nibak bala nyang teusöm, dan nibak peunyakét nyang jiba mawöt.
4 Gobnyan geupeupayong gata deungon sayeub Geuh, sampoe gata aman dalam naungan Gobnyan; keuseutiaan Gobnyan lagée peurisai nyang teulindong gata.
5 Gata hanapeu tatakot keuhai bahya bak watée malam, atawa jiseurang ngon hana teusangka-sangka bak watée uroe;
6 meunan cit keuhai beuncana nyang teuka bak watée seupôt, atawa keuhancoran nyang teuka watée teungoh uroe.
7 Bahpi na siribée droe nyang maté bak binéh gata, dan siploh ribée droe blaih uneuen gata, teuma gata keudroe hana cidra.
8 Meunyoe gata tapandang ban sikeulileng gata, disinan deuh takalon ureuëng jeuhet keunong peumbalasan.
9 Sabab gata tapeujeuet TUHAN nyang bila gata, Nyang Mahamanyang tapeujeuet nyang lindong gata.
10 Dan gata hana keunong beuncana, rumoh gata hana jiteuka bala.
11 Po teu Allah geuyue jaga ubak malaikat Gobnyan keuhai gata, geulindong gata homantong nyang gata jak.
12 Awaknyan geubeuôt gata ateueh paleuet jaroe geuh, jeuet gaki gata hana meugantoh deungon batée.
13 Gata taliengkeue uleue dan singa, tagilo singa muda dan uleue meubisa.
14 Feureuman TUHAN, "Ureuëng nyang jicinta ubak Ulôn Lôn peuseulamat, nyang jiaku Ulôn Lôn peulindong.
15 Meunyoe ureuëng nyang jimeulakée ubak Ulôn, peue nyang jilakée nyan Ulôn bri. Óh watée jihnyan meukarat ka meusak, Ulôn tulông jihnyan; jihnyan Lôn sangga nibak bahya dan Ulôn bri keuhoreumatan.
16 Jihnyan Lôn peupueh deungon umu nyang panyang, dan Ulôn peuseulamat."


Chapter 92

1 Ca-e ngon nyanyoe keu uroe Sabat.
2 Keubit jroh that teupeugah syuko ubak Droeneueh, ya TUHAN, dan teupujoe Droeneueh, Allah Nyang Mahamanyang;
3 teujak peugah gaséh Droeneueh bak watée beungoh, dan keuseutiaan Droeneueh bak watée malam,
4 sira teutarek gitar nyang siploh krek taloe, teuiréng teuma deungon gambus dan keucapi.
5 Sabab buet Droeneueh keubit galak até ulôn, ulôn meuca-e geumbira sabab karya Droeneueh.
6 Padub na raya buet-buet Droeneueh, ya TUHAN, Padub na lhok pikeran-pikeran Droeneueh!
7 Ureuëng bangai hana hase jipuphom, dan ureuëng bingong hana hase muphom.
8 Jeuet mantong ureuëng doraka timoh lagée naleueng nyang subô, dan ureuëng jeuhet meutamah kaya dan makmu; teuma awaknyan teupeubinasa banmandum hana nyang tinggai bahpi meusidroe,
9 sabab Droeneueh, TUHAN, meukuasa siumu masa.
10 Kamoe meuteupeue bahwa musoh Droeneueh teupeuhabéh banmandum, ya TUHAN, banmandum ureuëng jeuhet teupeu crebre.
11 Droeneueh nyang peujeuet teunaga lôn lagée teunaga banteng kleuet, dan neubri beureukat ubak ulôn deungon keubahgiaan.
12 Deuh ulôn ngieng musoh-musoh ulôn nyang taloe, ureuëng-ureuëng nyang ka jibeudôh jilawan ulôn, reuncana-reuncana jeuhet awaknyan ka lheueh ulôn deungoe.
13 Ureuëng jujoe meutarok lagée bak kuruma, dan jitimoh rampak lagée bak ceumara di Libanon.
14 Awaknyan lagée bak kayée nyang teupula di Baét TUHAN, dan meukeumang di Baét Allah geutanyoe,
15 bak kayée nyang mantong jimuboh óh watée tuha, teutab ijo dan seugar.
16 Nyan kheueh bukeuti jih bahwa TUHAN ade; Gobnyan nyang bila ulôn, hana nyang curang nibak Gobnyan.


Chapter 93

1 TUHAN na kheueh raja; Gobnyan geungui peukayan keuagongan dan teunaga. Bumoe jidong nyang kong hana hase guyang.
2 Takhta Droeneueh kukoh yoh awai mula, nibak nyang keukai, Droeneueh na.
3 Dasai laôt raya jipeuteuga su jih, ya TUHAN, samudra jipeuteuga su umbak jih.
4 Teuma TUHAN nyang meukuasa di dalam syeuruga, leubeh hebat nibak geulora samudra, dan leubeh teuga nibak umbak nyang meuguncang.
5 TUHAN, huköm Droeneueh keukai dan abadi, Baét Droeneueh suci sipanyang masa.


Chapter 94

1 Ya Allah, Droeneueh kheueh Allah nyang hase tueng bila, neutunyok kheueh balasan Droeneueh, ya TUHAN.
2 Beudôh kheueh, ya Hakém bansaboh bumoe, neuhuköm kheueh ureuëng cungkak nyang sisuai deungon peue nyang ka jipeubuet.
3 Ya TUHAN, sampoe án pajan ureuëng jeuhet jimeugeumbira? Trok án pajan, ya TUHAN?
4 Awaknyan jipeugah haba nyang gasa, dan jipeusombong droe deungon buet nyang jeuhet nyang jikeureuja.
5 Awaknyan jiteugon umat Droeneueh, ya TUHAN, dan jipeureumok ureuëng-ureuëng yang neupiléh.
6 Awaknyan jipoh maté inong balée ngon aneuëk yatem ngon muntui dan ureuëng aséng nyang na tinggai di nanggroe nyoe.
7 Kheun awaknyan, "TUHAN hana geukalon, Allah Nabi Yakub hana geungieng."
8 Hai bansa ulôn, bék kheueh gata bangai that, meurunoe kheueh tangui akai gata!
9 Po teu Allah nyang peugöt geulinyueng, peu kheueh Gobnyan hana geudeungoe? Gobnyan nyang peugöt mata, peu kheueh Gobnyan hana geukalon?
10 Gobnyan nyang peurunoe bubena bansa-bansa, peu kheueh Gobnyan hana geuhuköm? Gobnyan nyang peujeuet keugurée banmandum ureuëng, peu kheueh hana iéleumé peungeutahuan?
11 TUHAN geuluek banmandum pikeran manusia, Gobnyan geuteupeue banmandum sia-sia beulaka.
12 Mubahgia kheueh ureuëng nyang Droeneueh didek, ya TUHAN, ureuëng nyang Droeneueh peurunoe banmandum huköm-huköm Droeneueh.
13 Droeneueh peuteunang jihnyan watée uroe-uroe jiteuka bala, sampoe jikueh uruek keu jijak drob ureuëng-ureuëng jeuhet.
14 Sabab TUHAN hana geutinggai umat Gobnyan; Gobnyan hana teupeubiyeu ban atra milék pusaka Gobnyan.
15 Dan huköm geupeudong lom dipeungadelan, banmandum ureuëng jujoe jidukong.
16 Soe nyang bila ulôn ateueh ureuëng doraka? Soe nyang nyang dong blaih ulôn keuteujak lawan ureuëng nyang peubuet jeuhet?
17 Meunyoe TUHAN hana geutulông ulôn, ulôn minah ubak donya ureuëng maté.
18 Watée ulôn pike bahwa ulôn reubah, geunaséh Droeneueh, TUHAN, sampoe ulôn hase teudong kukoh.
19 Meunyoe até ulôn gundah ngon apoh apah, Droeneueh nyang hibô dan peugeumbira.
20 Droeneueh hana meurakan ngon hakém-hakém nyang jeuhet, nyang jirancang keujeuhetan meunurot huköm jih.
21 Awaknyan sipakat jijak lawan ureuëng jujoe, dan jihuköm maté ureuëng nyang hana salah.
22 Teuma TUHAN na kheueh nyang bila lôn, Allah ulôn nyang jeuet keupeulindong lôn.
23 Gobnyan geuhuköm ureuëng jeuhet nyang sisuai deungon buet nyang jeuhet nyan, dan geupeuseungab awaknyan sabab desya jih. TUHAN Po teu Allah geutanyoe geupeuseungab awaknyan.


Chapter 95

1 Jak kheueh geutanyoe ta meuca-e ngon meunyanyoe keu TUHAN, meusurak geumbira kheueh keu nyang peuseulamat geutanyoe!
2 Jak geutanyoe tameuhadab ubak Gobnyan deungon ca-e lagu syukoe, meusurak geumbira keu Gobnyan deungon ca-e puja dan pujoe.
3 Sabab TUHAN na kheueh Allah nyang agong, Raja peukasa nyang hase geuatasi banmandum dewa.
4 Gobnyan hase geukuasa bagian nyang paleng lhok nyang na didalam bumoe, dan pucak-pucak gunong pi atra Gobnyan.
5 Gobnyan nyang kuasa laôt, sabab Gobnyan nyang peujeuet laôt nyan, dan darat pi buet jaroe Gobnyan.
6 Jak geutanyoe ta sujut ta seumah Gobnyan, ta meuteuôt dikeue TUHAN, nyang cebta geutanyoe.
7 Sabab Gobnyan Allah geutanyoe, geutanyoe umat nyang geupeulara, lagée bubiri nyang geurabe.
8 "Bék kreueh ulée lagée indatu gata di Meriba, lagée yoh masa awaknyan di Masa, nibak padang pasi.
9 Di teumpat nyan awaknyan ji ujoe Ulôn, bahpi ka lheueh jingieng buet nyang Ulôn keureuja.
10 Peuet ploh thon treb jih Ulôn luwat keu awaknyan; Kheun Ulôn: Keubit, bansa nyan hana seutia! Awaknyan hana jipakoe peue-peue mantong nyang Ulôn peurintah.
11 Dan Ulôn meusumpah teungoh Ulôn beungéh, awaknyan hana jiteumeu tamong u dalam nanggroe nyan keu jiteumé meureuhat meusajan Ulôn."


Chapter 96

1 Meuca-e kheueh ngon lagu barô keu TUHAN! Meuca-e kheueh keu TUHAN, hai banmandum bumoe!
2 Meuca-e kheueh keu TUHAN dan pujoe kheueh Gobnyan; tieb-tieb uroe tajak peusampoe kheueh haba geumbira bahwa Gobnyan ka geupeuseulamat geutanyoe.
3 Calitra kheueh keu agongan Gobnyan ubak bansa-bansa, dan buet-buet Gobnyan nyang peukasa keu umat manusia.
4 Sabab rayeuk kheueh TUHAN, dan lumpah teupujoe Gobnyan, harôh teutakot leubeh nibak meubagoe dewa.
5 Dewa-dewa bansa laén na kheueh patong beurala, teuma TUHAN na kheueh nyang cebta angkasa raya.
6 Ateueh Gobnyan teutôb bandum deungon keuagongan dan keumuliaan, Baét Gobnyan peunoh deungon kuasa dan keu indahan.
7 Pujoe kheueh TUHAN, hai umat manusia, pujoe kheueh keuagongan dan teunaga Gobnyan!
8 Pujoe kheueh nan Gobnyan nyang mulia, dan ba kheueh keureubeuen u dalam Baét Gobnyan.
9 Seumah kheueh TUHAN sira tangui peukayan iébadat! Beuyo kheueh dikeue Gobnyan, hai bansaboh donya!
10 Tabri tée kheueh keu bansa-bansa, "TUHAN nyan Raja! Bumoe kukoh hana hase gob gokgok; Gobnyan peusidang bansa-bansa deungon ade."
11 Meugeumbira kheueh, hai langét deungon bumoe! Meugeumuroh kheueh, hai laôt deungon banmandum asoe jih!
12 Meusuka cita kheueh, hai blang meunan cit banmandum sinaman! Bak-bak kayée nyang na didalam uteun meusurak geumbira.
13 Sabab TUHAN geutron geujak peurintah di ateueh bumoe, Gobnyan geupeusidang bansa-bansa deungon ade dan jujoe.


Chapter 97

1 TUHAN na kheueh Raja! Patot that bumoe meugeumbira, dan bubena pulo meusuka cita.
2 Gobnyan jikeulileng lé awan dan seupôt luwa biasa; keuadelan dan huköm na kheueh azas peumeurintah Gobnyan.
3 Apui hu jimeu éue dikeue Gobnyan, habéh hangöh bubena musoh nyang na bansilingka Gobnyan.
4 Kilat Gobnyan trang bansaboh donya, bumoe yoe meugám-gám óh jikalon Gobnyan.
5 Meunan gunong-gunong meuliléh lagée lilen nyang tijoh dikeue TUHAN, dikeue TUHAN, nyang mat kuasa bansaboh bumoe.
6 Langét jijak peugah keuhai keuadelan, dan bandum bansa jikalon keuadelan Gobnyan.
7 Soemantong ureuëng nyang seumah beurala geupeumalée, nyang peubangga ubak barang-barang nyang hana meuguna; banmandum dewa teuma jisujut dikeue TUHAN.
8 Peunduduek Sion dan banda-banda nyang na di Yehuda galak lumpah na watée jideungoe keuputosan TUHAN.
9 Sabab Droeneueh, ya TUHAN, nyang mat kuasa bansaboh bumoe; Droeneueh agong leubeh nibak dewa toh mantong.
10 Hai gata nyang cinta ubak TUHAN, banci kheueh keu nyang jeuhet! Sabab TUHAN geulindong banmandum umat Gobnyan, Gobnyan nyang peubeubaih ureuëng laén nibak kuasa ureuëng nyang doraka.
11 Trang ka jiteubiet ubak ureuëng nyang jujoe até, dan suka cita ubak ureuëng nyang jujoe.
12 Meugeumbira kheueh, hai ureuëng-ureuëng nyang jujoe até sabab peue nyang ka geupeubuet lé TUHAN, dan meusyukoe kheueh ubak Po teu Allah nyang suci.


Chapter 98

1 Zabur. Meuca-e kheueh ngon lagu barô keu TUHAN, sabab buet-buet Gobnyan nyang keubit hireuen! Deungon kuasa dan teunaga Gobnyan keudroe Gobnyan ka meunang.
2 TUHAN geupeumaklum keuhai Gobnyan meunang; Gobnyan geujak peugah keuadelan ubak bansa-bansa.
3 Gobnyan geuingat geunaséh dan keuseutiaan Geuh ubak Israel, umat Gobnyan. Banmandum bansa nyang na di ateueh bumoe ka deuh jikalon Allah geutanyoe meunang.
4 Meusurak geumbira kheueh keu TUHAN, hai bansaboh bumoe! Pujoe kheueh TUHAN deungon nyanyoe dan ca-e sira meusurak geumbira.
5 Meuca-e kheueh lagu seumujoe keu TUHAN, sira peutek keucapi.
6 Yeub kheueh beureuguih ngon sangka kala, meusurak kheueh keu TUHAN, Raja geutanyoe.
7 Meugeumuroh kheueh hai laôt meunan cit deungon banmandum asoe jih bumoe dan banmandum nyang na didalam nyan.
8 Bah kheueh krueng-krueng jipéh paleuet, dan bukét-bukét meusurak geumbira dikeue TUHAN.
9 Sabab Gobnyan geuteuka keu geujak peuhakém bumoe; meunan cit bansa-bansa geupeusidang deungon ade dan beuna.


Chapter 99

1 TUHAN na kheueh Raja; bansa-bansa nyang nyang jideungoe nyan yo meutot-tot. Gobnyan geuduek meutakhta di ateueh kerub, bumoe meuguncang lagée geumpa.
2 TUHAN meukuasa that-that di Sion; Gobnyan agong ék geupeutaloe banmandum bansa.
3 Bah awaknyan jipujoe nan Gobnyan nyang agong ngon mulia. Kudus kheueh Gobnyan!
4 Keukuasaan keu Droeneueh, Raja nyang cinta ubak huköm; Droeneueh ka neupeudong keubeunaran; Droeneueh neupeujak huköm dan keuadelan di Israel.
5 Peumanyang kheueh TUHAN Po teu Allah geutanyoe, sujut kheueh dikeue takhta Gobnyan. Kudus kheueh Gobnyan!
6 Nabi Musa dan Nabi Harun jitamong cit keunan sibagoe teungku-teungku imeum, Samuel salah sidroe nyang meudoá keu Gobnyan. Awaknyan jimeulakée ubak TUHAN, dan Gobnyan laju geujaweueb.
7 Nibak taméh awan Gobnyan geumeututoe ubak awaknyan, awaknyan taát bak mandum huköm dan peurintah Gobnyan.
8 Ya TUHAN Allah kamoe, Droeneueh neujaweueb peue nyang jilakée lé umat Droeneueh; ubak awaknyan Droeneueh na kheueh Allah nyang neutem peu amphon desya, bahpi awaknyan Droeneueh huköm sabab buet nyang salah nyang jipeubuet.
9 Peuteupat kheueh TUHAN Po teu Allah geutanyoe, dan seumah kheueh Gobnyan di bukét Gobnyan nyang suci, sabab kudus kheueh TUHAN Allah geutanyoe.


Chapter 100

1 Zabur keu keureubeuen syukoe. bumoe!
2 Meu iébadat kheueh ubak TUHAN deungon até nyang peunoh geumbira, meuhadab kheueh ukeue Gobnyan deungon ca-e dan lagu nyang ceuria!
3 Ingat kheueh bahwa TUHAN nyan na kheueh Allah. Gobnyan nyang cebta geutanyoe dan geutanyoe nyoe na kheueh atra Gobnyan; geutanyoe umat Gobnyan, bansa nyang geupeulara.
4 Tamong kheueh rot pintoe geureubang deungon ca-e lagu syuko, udalam peulataran Gobnyan deungon ca-e lagu puja ngon pujoe. Meusyuko kheueh ubak Gobnyan dan pujoe kheueh Gobnyan!
5 Sabab TUHAN jroh; geunaséh Gobnyan keu siumu masa, dan keuseutiaan Gobnyan tron meutron.


Chapter 101

1 Zabur Nabi Daud.
2 Ulôn keuneuk kalon cara udeb nyang hana meucupa. Pajan kheueh Droeneueh neuteuka ubak ulôn?
3 keujeuhetan hana ulôn peubiyeu. Ulôn banci nibak buet ureuëng murtad, dan hana lôntem meu urosan deungon awaknyan.
4 Ulôn hán lôntem peubuet curang dan hán lôntem rhoh jampu bak buet nyang jeuhet.
5 Ureuëng nyang galak ba peusuna deungon cara seungab-seungab ureuëng nyan ulôn peubinasa. Ureuëng nyang sombong dan manyang até ureuëng nyang lagée nyan hana ulôn peubiyeu.
6 Ulôn galak ubak ureuëng nyang seutia ubak Po teu Allah; ureuëng nyang lagée nyan jeuet jitinggai di baét ulôn. Ureuëng nyang udeb lam keuadaan gleh hana meucupa ureuëng nyang lagéenyan jeuet jipeutimang ulôn.
7 Ureuëng teumipée hana jeuet jitinggai di baét ulôn; ureuëng nyang galak sulet jihnyan hana meuteun dikeue ulôn.
8 Phon nibak uroe ubak uroe ulôn peuhanco ureuëng-ureuëng jeuhet nyang na di nanggroe nyoe. Banmandum ureuëng nyang jipeubuet buet nyang jeuhet ureuëng nyan ulôn sampôh gleh nibak Banda TUHAN.


Chapter 102

1 Doá ureuëng seungsara nyang dalam keuadaan hék ngon leusu apoh apah ubak TUHAN.
2 Ya TUHAN, deungoe kheueh doá ulôn, bah kheueh meuhôi ulôn nyoe trok ubak Droeneueh.
3 Bék neupaleng nibak ulôn meunyoe ulôn jiteuka susah. Neudeungoe kheueh meunyoe ka ulôn meuhôi, dan neujaweueb kheueh doá ulôn.
4 Udeb ulôn nyoe ya TUHAN, deungon sikeujab gadôh lagée asab; dan tuleueng-tuleueng ulôn seu-uem tutông lagée apui.
5 Ulôn hék ngon leusu lagée naleueng tho, dan hana nafeusu keu lôn pajoh bu.
6 Ulôn meurang-rang deungon su nyang nyareng; badan lôn pijuet ka tinggai kulét ngon balot tuleueng.
7 Ulôn lagée cicém undan nyang na dipadang pasi, dan lagée kleung keutôk-tôk nyang tinggai bak teumpat rungka bangunan nyang seungue.
8 Ulôn hana hase lôn éh, ya TUHAN, lagée cicém keuseupian di ateueh bubông rumoh.
9 Siuroe seupôt musoh jihina ulôn; nan ulôn jipeujeuet keu kutok lé ureuëng nyang beungéh keu ulôn.
10 Abée nyang ulôn pajoh lagée lôn makheun ruti, ié nyang ulôn jieb meulawok deungon ié mata,
11 sabab Droeneueh ka neubeuôt dan neutiek ulôn nibak beungéh Droeneueh nyang luwa biasa.
12 Udeb ulôn jijak lagée bubayang óh uroe seupôt; dan ulôn jeuet keulayée lagée ôn naleueng nyang keunong uroe.
13 Teuma Droeneueh, ya TUHAN, Raja keu siumu masa, teutab ji ingat tron meutron.
14 Droeneueh neubeudôh dan neugaséh ubak Sion, watée jih ka trok keu teubalaih gaséh ubak jihnyan.
15 Sabab hamba-hamba Droeneueh jisayang keu jihnyan, bahpi jihnyan ka jeuet keubarang rungka-rungka. Awaknyan meurasa gaséh keu jihnyan, bahpi jihnyan ka jeuet keu abée.
16 Kuasa TUHAN teutab jitakot lé bansa-bansa; dan keuagongan Gobnyan teutab jigalak lé bubena raja-raja,
17 meunyoe TUHAN ka geupeudong lom Sion, dan geubeudôh dalam keuagongan Gobnyan.
18 Gobnyan geudeungoe doá umat Geuh nyang meularat, dan hana geutulak peue nyang jilakée lé awaknyan.
19 Tuléh kheueh banmandum peue nyang geupeubuet lé TUHAN keu angkatan nyang teuma teuka, jeuet bansa nyang gohlom lahé hase jipujoe Gobnyan.
20 TUHAN geupandang rot teumpat Geuh nyang manyang, rot lam syeuruga Gobnyan geukalon u bumoe
21 mangat geudeungoe apoh apah ureuëng lam peunjara dan geupeubeubaih ureuëng nyang teuhuköm maté.
22 Dan nan Gobnyan jipeugah di Sion, dan Gobnyan jipujoe-pujoe di Yerusalem,
23 watée bansa-bansa dan keurajeuen nanggroe jimeuhimpon keu meungabdi ubak TUHAN.
24 TUHAN geupeupatah teunaga ulôn watée ulôn mantong muda, dan geupeupaneuk umu ulôn.
25 Laju ulôn peugah, "Ya Allah, bék kheueh neucok nyawöng ulôn nibak siteungoh udeb ulôn."
26 yoh masa ilée Droeneueh neupeujeuet bumoe; meunan cit deungon langét na kheueh karya nyata Droeneueh.
27 Banmandum nyan teuma habéh, teuma Droeneueh teutab na; banmandum nyan jeuet keu useueng lagée peukayan. Droeneueh neutiek atranyan lagée bajée tuha, dan banmandum óh lheuehnyan sapan sapa.
28 Teuma Droeneueh teutab saban, udeb Droeneueh hana keuneulheueh.
29 Aneuëk cucoe kamoe udeb deungon teuntram, dan sabe aman lam lindongan Droeneueh.


Chapter 103

1 Nibak Nabi Daud
2 Pujoe kheueh TUHAN, hai jiwa lôn, bék tuwoe ubak bandum nyang jroh nibak Gobnyan!
3 Gobnyan nyang peuamphon banmandum desya gata, nyang peupuléh banmandum peunyakét gata,
4 Gobnyan nyang peubeubaih nyawöng gata lam jrat, nyang bri keu gata geunaséh nyang meulimpah-limpah.
5 Gobnyan nyang peupueh udeb gata deungon banmandum nyang jroh, sampoe gata awet muda lagée cicém rajawali.
6 TUHAN nyang peujak huköm dan keuadelan keu mandum ureuëng nyang keunong iénanya.
7 Gobnyan nyang peuna reuncana keu Nabi Musa dan buet-buet keu bansa Israel.
8 Sabab TUHAN na kheueh peungaséh dan peunyayang, Gobnyan panyang saba dan geunaséh Gobnyan meulimpah.
9 Gobnyan hana geudot hana putôh-putôh, dab hana geubeungéh siumu masa.
10 Gobnyan hana geuhuköm geutanyoe nyang sisuai deungon desya geutanyoe, atawa geubalaih geutanyoe nyang sipadan deungon salah tanyoe.
11 Teuma simanyang langét di ateueh bumoe, bubenyan kheueh geunaséh Gobnyan keu ureuëng nyang taqwa.
12 Sijiôh timu nibak barat, sidubnyan kheueh geuböih dumna desya-desya geutanyoe.
13 Lagée sidroe ayah nyang geugaséh keu aneuëk-aneuëk gobnyan, meunan kheueh TUHAN geugaséh keu ureuëng nyang taqwa.
14 Sabab TUHAN geuteupeue geutanyoe teupeugét nibak peue, dan Gobnyan geuingat bahwa geutanyoe na kheueh nibak abée.
15 Manusia udeb jih paneuk na miseu naleueng; jihnyan meukeumang lagée bungöng nyang timoh di ladang;
16 meunyoe jiyueb lé angén, leunyab kheueh sibungöng nyan, dan teumpat jihpi hana teutuho le.
17 Teuma TUHAN teutab geugaséh ubak ureuëng nyang taqwa, keuhai jroh Gobnyan teutab hana putôh tron meutron
18 keu ureuëng nyang jimumat ubak janji Gobnyan, dan deungon seutia jitem peubuet peurintah Gobnyan.
19 TUHAN geumat peurintah di syeuruga, Gobnyan raja nyang mat peurintah ateueh meubagoe rupa.
20 Pujoe kheueh TUHAN, hai malaikat-malaikat nyang peukasa, nyang jideungoe jipeubuet peurintah Gobnyan.
21 Pujoe kheueh TUHAN, hai banmandum makhluk nyang na di syeuruga, banmandum hamba Gobnyan nyang jipeubuet keuheundak Gobnyan.
22 Pujoe kheueh TUHAN, hai banmandum cebtaan nibak mandum wilayah keukuasaan Gobnyan. Pujoe kheueh TUHAN, hai jiwa lôn!


Chapter 104

1 Pujoe kheueh TUHAN, hai jiwa lôn! Padubna agong Droeneueh, ya TUHAN Allah ulôn! Droeneueh nyang sôk peukayan keumeugahan dan keumuliaan,
2 dan meuseulimbot cahya. Droeneueh nyang leueng langét ban lagée khimah,
3 dan neupeudong Baét Droeneueh di ateueh ié langét. Awan-awan neupeujeuet keu geuritan Droeneueh, Droeneueh neuduek ateueh sayeub angén.
4 Angén neupeujeuet keu utosan Droeneueh, dan kilat jeuet keupeulayan Droeneueh.
5 Deungon kong that bumoe nyoe neupasang nibak tapak jih, sampoe hana guyah siumu masa.
6 Droeneueh nyang peulimbot nyan deungon laôt samudra nyang raya, dan ié jih sampoe meugeunang trok ubak pucak-pucak gunong.
7 Watée neudumpék, ié nyan laju ji ile, ji ile deungon tajam sabab su Droeneueh nyang geumuroh.
8 Ié ji ile meulalu gunong-gunong sampoe u pantôn, u teumpat nyang Droeneueh keubah keu ié nyan.
9 Droeneueh nyang peuteuntée bataih-bataih nyang hánjeuet jilalu lé ié nyan, mangat ié nyan bék jigisa meugeunang di ateueh bumoe.
10 Droeneueh teuma nyang peuhah mata ié di pantôn-pantôn, aneuk-aneuk krueng laju ji ile lam luengkiek bukét-bukét,
11 keu hase jijieb ié mandum beulatang nyang na di dalam blang, dan peu puléh glah bubena keuleudée didalam glé.
12 Bak binéh krueng nyan bubena cicém jijak peugöt uempueng; dan cicém-cicém nyan laju jimeusu lamkawan ôn-ôn kayée nyan.
13 Nibak langét neupeutron ujeuen di ateueh gunong, dan bumoe peunoh deungon hase karya Droeneueh.
14 Droeneueh nyang peutimoh naleueng keu peunajoh beulatang, dan keu manusia meubagoe rupa sinaman. Dan awaknyan jeuet jiseumula,
15 dan teupeuhase ié anggô nyang lazat rasa. Meunan cit deungon minyéuk zaiton nyang teupeujeuet muka jih meucahya, dan peunajoh nyang hase teubri nibak jih teunaga.
16 Bak-bak kayée TUHAN jitoh lé ujeuen nyang meulimpah bak kayée ceumara Libanon nyang jipula keudroe.
17 Di ateueh kayée nyan jimeu uempueng kheueh meubagoe cicém, cicém ranggung jimeu uempueng di ateueh pucok jih.
18 Gunong-gunong nyang manyang jeuet keu teumpat tinggai kaméng uteuen; dan peulandok jimusöm di miyueb batée kareueng.
19 Droeneueh nyang peujeuet buleuen sibagoe tanda watée, dan mata uroe jiteupeue pajan saát jihnyan jilôb.
20 Meunyoe Droeneueh neupeutron seupôt, maka uroe laju jeuet keu malam, dan banmandum beulatang uteuen laju jijak meulata.
21 Singa-singa muda laju jitauém jijak mita uempeuen, jilakée peunajoh nyang geuseudia lé Po teu Allah.
22 Meunyoe mata uroe ka jiteubiet, beulatang-beulatang nyan laju jimusöm dan teu-éh nibak teumpat gobnyan musöm.
23 Dan watée nyan kheueh jiteubiet manusia jijak meukeureuja, dan laju jimeubuet sampoe mata uroe seunja.
24 Padub na le karya Droeneueh, ya TUHAN, banmandum neupeujeuet deungon bijak sana; bumoe nyoe peunoh deungon cebtaan Droeneueh.
25 Kalon kheueh laôt nyang luwah meureuntang, deungon makhluk cut rayeuk hán ék teukira.
26 Di sinan kapai-kapai jimeulayeu, dan Lewiatan, naga laôt nyang Droeneueh cebta jimeuén-meuén.
27 Awaknyan banmandum jimeuharab bak Droeneueh, mangat meuteumé peunajoh trok watée.
28 Droeneueh nyang bri, dan awaknyan nyang peusapat, Droeneueh nyang keubah banmandum nyan, dan awaknyan nyang makheun sampoe án troe.
29 Meunyoe Droeneueh neupaleng, awaknyan teumakot that-that; meunyoe Droeneueh cok nafáh awaknyan, awaknyan banmandum binasa, dan jiwoe lom jeuet keu abée lagée asai mula.
30 Teuma meunyoe awaknyan Droeneueh bri nafáh, awaknyan neupeujeuet; Droeneueh neubri udeb barô keu bumoe.
31 Seumoga keu agongan TUHAN teutab siumu masa! Dan seumoga Gobnyan geumbira deungon peue nyang ka geucebta!
32 Gobnyan geupandang bumoe dan dibumoe nyan laju jiteuka yo, dan gunong-gunong laju geumat, di gunong nyan pi jiteubiet asab.
33 Ulôn keuneuk meuca-e keu TUHAN simantong nyawöng didalam badan, dan meunyanyoe ngon meuca-e keu TUHAN simantong ulôn geubri udeb.
34 Seumoga nyanyoe lôn nyoe meukeunong nibak até Gobnyan, sabab Gobnyan kheueh até ulôn nyoe hase geumbira.
35 Bah kheueh ureuëng meudesya gadôh di ateueh bumoe, dan bah kheueh ureuëng jeuhet habéh binasa.


Chapter 105

1 Meusyukoe kheueh ubak TUHAN, jak peusampoe kheueh keubeusaran Gobnyan, calitra kheueh buet Gobnyan ubak bansa-bansa.
2 Meuca-e kheueh lagu pujoe keu TUHAN, jak peusampoe kheueh bandum karya Gobnyan nyang luwa bisa nyan.
3 Gobnyan kheueh TUHAN Nyang Mahasuci; meusuka cita kheueh sabab geutanyoe atra Gobnyan, banmandum nyang keuneuk seumah bah kheueh meugeumbira.
4 Lakée kheueh teunaga ubak Gobnyan, dan seumah kheueh Gobnyan mantong.
5 Hai keuturonan Nabi Ibrahim, hamba Gobnyan, dan keuturonan Nabi Yakub, ureuëng nyang geupiléh, ingat kheueh banmandum buet ajaéb nyang ka geupeubuet, dan bék neutuwoe ubak peue nyang ka geupeuputôh lé Gobnyan.
7 TUHAN na kheueh Allah geutanyoe, keuputosan Gobnyan wajéb teutaát bansaboh donya.
8 Gobnyan sabe geuingat ubak janji nyang ka geupeugah, janji Gobnyan teutab na keu siumu masa.
9 Peujanjian nyan geupeugét deungon Nabi Ibrahim, dan óh lheuehnyan deungon Nabi Ishaq;
10 laju geupeukong deungon Nabi Yakub, sampoe jeuet keujanji nyang keukai keu umat Israel.
11 Kheun Gobnyan, "Tanoh Kanaan Ulôn bri keu gata, jeuet keuhak milék pusaka gata."
12 Yoh masa dilée umat Po teu Allah udeb sibagoe ureuëng aséng disinan dan jeumeulah awaknyan pih na bacut.
13 Awaknyan meurawôh nibak saboh bansa ubak bansa nyang laén, dan geuminah nibak nanggroe nyang saboh ubak nanggroe nyang laén.
14 Teuma TUHAN hana geupeubiyeu soemantong nyang teugom awaknyan; dan deumi awaknyan, raja-raja nanggroe geupeuingat lé Gobnyan,
15 "Bék cuba-cuba peukaru ureuëng-ureuëng piléhan ulôn nyan, dan bék peubuet nyang jeuhet ateueh nabi-nabi ulôn!"
16 TUHAN geupeutron bala deungon musém deuk di nanggroe nyan, dan bubena peuseudiaan peunajoh ka habéh geucok mandum.
17 Teuma Gobnyan geuyue sidroe ureuëng beuawai jijak nibak awaknyan, Yusuf, nyang ka jipeubloe sibagoe hamba sahaya.
18 Gaki ureuëng nyang ji ikat deungon beuleunggu, dan takue ureuëng nyan jililet deungon ranté beuso.
19 Akhé jih teujadi kheueh peue nyang ka lheueh geuramai, jihnyan geupeubeutôi lé feureuman TUHAN.
20 Dan raja nibak nanggroe Meusé, nyang mat kuasa ateueh bansa-bansa, geupeubeubaih ureuëng nyan lam glab.
21 Keu gobnyan geubri tugaih yue uruih meuligoe, dan geubri kuasa ateueh banmandum hareuta beunda gobnyan;
22 meunan cit wewenang keu geu ato dumna peugawée raja, dan geupimpén kawöm nyang tuha-tuha.
23 Óh lheueh nibaknyan Nabi Yakub laju geujak u nanggroe Meusé dan geutinggai teutab disinan sibagoe ureuëng aséng.
24 TUHAN laju geutamah umat Gobnyan meutamah le, sampoe awaknyan leubeh teuga nibak lawan jih.
25 Gobnyan laju geu ubah até ureuëng Meusé mangat awaknyan jibanci keu umat TUHAN, dan jipeusaneut hamba-hamba Gobnyan deungon cara nyang curang hana teukira.
26 Óh lheuehnyan laju geu peutron Nabi Musa hamba Geuh dan Nabi Harun ureuëng nyang ka geupiléh.
27 Di Nanggroe Meusé awaknyan laju geupeubuet buet-buet nyang ajaéb, buet-buet nyang raya nibak TUHAN,
28 dan awaknyan taát ubak peurintah Gobnyan. Óh lheueh nyan TUHAN geupeujeuet laju nanggroe nyan seupôt buta.
29 Krueng awaknyan ka geu ubah jeuet keu darah, sampoe banmandum uengkot nyang na disinan ka habéh maté.
30 Cangguek-cangguek meuraja lela di nanggroe awaknyan, dan le that-that nyang jitamong u dalam meuligoe raja.
31 Ateueh peurintah Allah jiteuka teuma lalat, dan jamok-jamok ka meurön-rön bansaboh nanggroe.
32 Gobnyan laju geupeutron ujeuen es keugeunantoe ujeuen ié, dan geupeutron kilat sambong meusambong nyang jiseumama keudeuh keunoe.
33 Meunan cit Gobnyan laju geupeureubah bubena bak anggô deungon bak ara, dan banmandum bak kayée awaknyan habéh geupeureubah teung bayeueng sapan sapa.
34 Ateueh peurintah Gobnyan, teuka kheueh daruet, jeumeulah daruet nyan lumpah that jai hana teukira jeumeulah jih.
35 Daruet nyan habéh jiseuba mandum seunaman nyang na di ladang, dan jipajoh habéh banmandum hase bumoe.
36 Óh lheueh nyan Gobnyan laju jipoh maté tieb-tieb aneuëk agam nyang tuha nyang na dalam keuluwarga ureuëng Meusé.
37 Óh lheuehnyan bansa Israel laju geu intat keudeh uluwa, nyang jiba sajan awaknyan na kheueh méuh deungon pirak; banmandum awaknyan lam keuadaan seuhat dan teuga-teuga.
38 Ureuëng Meusé ka jiteuka rasa teumakot ngon yo hana ngon peusa, awaknyan galak that watée ureuëng Israel jijak jitinggai nanggroe nyan.
39 Lé Allah laju geuleueng awan di ateueh ulée umat Gobnyan sibagoe payong, dan apui hu sibagoe suwa óh watée malam teuka.
40 Awaknyan jimeulakée, laju Gobnyan geupeutron cicém puyoh, keu awaknyan geubri ruti nyang geupeutron lam syeuruga sampoe án troe.
41 TUHAN geuplah laju gunong batée, laju jiteubiet ié nyang ji ile lagée aneuk krueng di teungoh-teungoh padang pasi.
42 Sabab TUHAN geuingat that ubak janji Gobnyan keu Nabi Ibrahim, hamba Geuhnyan.
43 Dan laju geu intat umat Gobnyan deungon geumbira, ureuëng-ureuëng nyang geupiléh deungon seumurak ria.
44 Tanoh atra bansa-bansa laén laju geubri keu awaknyan, dan lampôh ngon ladang awaknyan laju geujok keu umat nyang ka geupeuleupah nyan,
45 deungon harapan jeuet umat Geuh jitaát ubak huköm-huköm Gobnyan dan jiseutôt peue nyang geupeurintah lé Gobnyan.


Chapter 106

1 Pujoe kheueh TUHAN!
2 Soe nyang hase jipeugah keuhai keuhebatan TUHAN, dan jipujoe nyang layak patot keu Gobnyan?
3 Mubahgia kheueh ureuëng nyang taát ubak peurintah-peurintah Gobnyan, dan hántom na salah lam tindakan Geuhnyan.
4 Ingat kheueh keu ulôn, ya TUHAN, deumi keujroh Droeneueh nibak umat Droeneueh keudroe, dan neutulông kheueh ulôn meunyoe Droeneueh neupeuseulamat awaknyan.
5 Seumoga deuh ulôn ngieng keumakmuran ureuëng-ureuëng nyang neupiléh dan meusuka cita meusajan umat Droeneueh. Seumoga ulôn meubangga dan meugeumbira meusajan ureuëng nyang ka jeuet keuhak milék Droeneueh.
6 Kamoe ka meudesya lagée indatu kamoe; kamoe ka kamoe peubuet jeuhet dan doraka ubak Droeneueh.
7 Watée mantong di nanggroe Meusé indatu kamoe hana geumuphom; karya Droeneueh nyang lumpah hebat nyan hana geumeuphom. Awaknyan ka tuwoe ubak geunaséh Droeneueh nyang meulimpah ruwah, dan bak binéh Laôt Geulagah awaknyan geumeubeurontak ubak Nyang Mahamanyang.
8 Teuma TUHAN teutab geupeuseulamat awaknyan deumi keu droe Geuh keudroe, mangat keupeukasaan Gobnyan jeuet keunyata.
9 Ateueh peurintah Gobnyan Laôt Geulagah tho kreng, laju Gobnyan geuba umat Geuh jijak rot laôt nyang ka tho hana le meu ié, lagée geujak didalam padang pasi.
10 Deungon na lagée nyan awaknyan ka geupeuseulamat nibak musoh dan lawan, dan geupeubeubaih awaknyan nibak kuasa musoh.
11 Teuma ié laôt nyang raya nyan laju meukab lom teuma, bubena lawan-lawan awaknyan ka habéh ngob lam laôt nyan; hana meusidroe pih nibak lawan-lawan awaknyan nyang na tinggai.
12 Óh lheuehnyan barô kheueh umat Gobnyan jipeucaya ubak janji nyang ka geupeugah laju jimeu zike sira meuca-e lagu pujoe keu TUHAN.
13 Teuma óh lheuehnyan awaknyan laju tuwoe ubak buet TUHAN, jimeubuet lom ban galak droe deungon hana jilakée naseuhat ubak Gobnyan.
14 Di teungoh padang pasi awaknyan jiteuka nafeusu, laju jiujoe Po teu Allah.
15 Gobnyan laju geubri peue nyang jilakée lé awaknyan, teuma meunan cit geupeutron bala peunyakét nyang jiseurang awaknyan.
16 Di padang pasi nyan awaknyan laju teuka iri até ubak Nabi Musa meunan cit ubak Nabi Harun hamba Gobnyan nyang suci.
17 Óh lheueh nyan bumoe pih laju beukah dan laju teu uét Datan, laju teutôb Abiram meusajan ngon keuluwarga gobnyan habéh mandum.
18 Óh lheuehnyan apui nyang raya laju jitron jijak sama keulompok awaknyan, habéh tutông hangöh banmandum nyang doraka ubak Gobnyan.
19 Di ateueh Gunong Sinai awaknyan laju jipeugôt aneuëk bubiri nibak méuh, dan laju jiseumah patong tuangan nyang jipeuget keudroe.
20 Awaknyan laju jituka Allah nyang agong deungon patong leumô nyang jirot naleueng.
21 Awaknyan ka tuwoe ubak Allah nyang ka peuseulamat droe jih Allah nyang ka geupeubuet hai-hai nyang raya di nanggroe Meusé.
22 Keubit lumpah that dahsyat buet-buet nyang ka geupeubuet di nanggroe nyan, dan luwa biasa tindakan Gobnyan di Laôt Geulagah.
23 Dan Allah jiteuka niet keuneuk geupeubinasa awaknyan, teuma bagaih-bagaih geutam lé Nabi Musa, ureuëng nyang ka geupiléh lé Gobnyan. Nabi Musa jeuet keu ureuëng nyang dong teungoh keu awaknyan, sampoe Allah nyang ka that beungéh nyan hase reuda.
24 Óh lheuehnyan awaknyan laju jitulak nanggroe nyang ceudah nyan, sabab hana jipatéh ubak janji Po teu Allah.
25 Awaknyan jimeudaleh dalam khimah droe jih dan hana jitem deungoe le su TUHAN.
26 Teuma deungon geumeusumpah Gobnyan geumeujanji geupeu habéh awaknyan di padang pasi nyang raya.
27 Keuturonan awaknyan geuböih lamkawan bansa-bansa dan geupeu crebre di nanggroe-nanggroe aséng.
28 Óh lheuehnyan di Peor awaknyan jiseumah teuma Baal, dan jipajoh keureubeuen nyang jipeuseumah keu dewa-dewa.
29 Buet nyang lagée nyan sampoe jiteuka beungéh TUHAN nyang luwa biasa, sampoe awaknyan habéh jiseurang lé bala peunyakét nyang hana teukira.
30 Teuma Pinehas laju geubeudôh geujak huköm bubena nyang meusalah, deungon na nyang lagée nyan jipiôh kheueh peunyakét nyang lumpah meupalo nyan.
31 Buet jih nyang lagée nyan geuanggab sibagoe jasa nyang raya keu gobnyan, dan ji ingat siumu masa.
32 Meunan cit nibak mon-mon Meriba TUHAN geubeungéh keu awaknyan, dan Nabi Musa keudroe lumpah sosah sabab ulah buet awaknyan.
33 Sabab buet awaknyan até gobnyan meutamah tunu, sampoe gobnyan geumeututoe deungon hana seumike.
34 Bansa-bansa nyang laén hana geupeuhanco, lagée nyang geupeurintah lé TUHAN.
35 Awaknyan meujampu deungon bansa-bansa nyan, dan jiseutôt peue nyang jipeubuet lé ureuëng nyang hana jituri Allah.
36 Dan awaknyan laju jiseumah beurala-beurala, dan nyan kheueh jeuet keusabab keuhancoran awaknyan.
37 Awaknyan jikeureubeuen aneuëk-aneuëk droe jih keu beurala-beurala Kanaan.
38 Meunan cit awaknyan jipeurô darah ureuëng-ureuëng nyang meusalah, darah aneuëk-aneuëk gobnyan keudroe, keu jikeureubeuen ubak beurala; sampoe nanggroenyan ka jipeurusak.
39 Sabab buet-buet awaknyan nyang lagéenyan awaknyan ka jeuet keu kuto, dan hana seutia ubak Po teu Allah.
40 Dan beungéh TUHAN pi laju hu lagée apui keu awaknyan, Gobnyan ka glak deungon atra Geuh keudroe.
41 Dan geujok kheueh awaknyan keu bansa-bansa, geupeubiyeu mantong awaknyan jikuasa lé musoh.
42 Laju awaknyan jitindéeh lé musoh-musoh jih keudroe, dan jipeutaklok dimiyueb kuasa awaknyan.
43 Meu ulang-ulang TUHAN geupeubeubaih awaknyan, teuma awaknyan teutab galak bak buet beurontak, sampoe awaknyan habéh binasa nibak desya-desya jih keudroe.
44 Teuma TUHAN geudeungoe cit apoh apah awaknyan, dan Gobnyan teutab geukalon sosah awaknyan.
45 Deumi awaknyan Gobnyan teuingat keu janji nyang ka geupeugah dan geugaséh keu awaknyan sabab geunaséh Geuh nyang raya.
46 Gobnyan laju geupeujeuet awaknyan beujigaséh lé mandum ureuëng nyang jiteun awaknyan.
47 Peuseulamat kheueh kamoe, ya TUHAN kamoe, neupeusapat kheueh kamoe lamkawan bansa-bansa, mangat kamoe jeuet meusyukoe dan kamoe pujoe nan Droeneueh nyang suci.
48 Pujoe kheueh TUHAN, Allah Israel, phon saátnyoe dan siumu masa. Bah kheueh banmandum ureuëng jipeugah, "Amin!"


Chapter 107

1 "Meusyukoe kheueh ubak TUHAN sabab Gobnyan get, geunaséh Gobnyan keukai dan abadi."
2 Tapeugah kheueh nyan meu ulang-ulang, hai gata nyang ka geupeuseulamat nibak keusosahan.
3 Gata ka geupeusapat di nanggroe aséng, di timu dan barat, utara dan seulatan.
4 Na nyang meurawôh di padang beulantara, dan hana jitupat rot u teumpat tinggai di banda.
5 Awaknyan laju jiteuka deuk ngon glaih dan ka gadôh banmandum harapan.
6 Dalam keusosahan nyan awaknyan jimeulakée ubak TUHAN, dan TUHAN pi laju geupeubeubaih awaknyan lam keuadaan meurana.
7 Gobnyan geubimbéng awaknyan rot nyang teupat ubak teumpat tinggai nyang na di banda.
8 Ka pantaih kheueh awaknyan meusyukoe ubak TUHAN sabab geunaséh Gobnyan, dan sabab karya-karya Gobnyan nyang lumpah kagom keu manusia.
9 Sabab Gobnyan geupeupuih glaih ureuëng tho rukuéng, dan geupeulimpah ureuëng nyang deuk deungon peue mantong atra nyang get.
10 Na nyang teukurong didalam seupôt, ureuëng peunjara nyang meudeurita dalam beuleunggu beuso,
11 sabab awaknyan ka jibeurontak ubak Po teu Allah dan hana jipakoe peurintah Nyang Mahamanyang.
12 Gobnyan geupeureumok até awaknyan deungon cara jimeubuet nyang brat; awaknyan reubah dan hana nyang tulông.
13 Lam keuadaan sosah awaknyan jitawök ubak TUHAN, dan Gobnyan geupeubeubaih awaknyan nibak meukarat.
14 Gobnyan geuba awaknyan geupeuteubit nibak lam seupôt, dan geupeupatah beuleunggu awaknyan.
15 Ka pantaih awaknyan jilakée syukoe ubak TUHAN sabab gaséh Gobnyan, sabab buet-buet Gobnyan keubit that hireuen nibak manusia.
16 Sabab Gobnyan geupeureubah bubena pintoe teumaga, dan geupeureumok bubena palang beuso.
17 Na nyang bangai dan meudeurita sabab desya-desya awaknyan, dan jiseksa sabab salah awaknyan keudroe.
18 Awaknyan luwat ubak meubagoe peunajoh, ajai awaknyan ka tô that.
19 Lam keuadaan sosah awaknyan jimeuhôi ubak TUHAN, dan Gobnyan geupeubeubaih awaknyan nibak teuseupet nyan.
20 Gobnyan geupeupuléh awaknyan deungon peurintah Gobnyan, dan geupeusie awaknyan nibak uruek jrat.
21 Patot that awaknyan jilakée syukoe ubak TUHAN sabab geunaséh Gobnyan, sabab buet-buet Gobnyan nyang jipeuteuka hireuen nibak manusia.
22 Bah kheueh awaknyan jilakée syukoe deungon jiba peuseumahan, dan jipeusampoe buet Gobnyan deungon lagu-lagu geumbira.
23 Na lom nyang jiharöng laôt ngon kapai, keu jijak mita nafeukah lam laôt nyang luwah.
24 Awaknyan jikalon buet-buet TUHAN, karya nyang ajaéb lam laôt raya.
25 Ateueh peurintah Gobnyan teuka kheueh angén badée dan jipeuteuka geulumbang-geulumbang raya.
26 Kapai-kapai teubeuôt sampoe manyang, laju jiseumpom ateu laôt raya. Ureuëng-ureuëng ka gadôh beuhe jihadab bahya nyang bubenyan raya.
27 Awaknyan mumang dan meuhapit-hapit lagée ureuëng mabök nyang gadôh akai.
28 Meunyoe teungoh susah awaknyan jimeulakée ubak TUHAN, dan Gobnyan laju geupeulheueh awaknyan nibak keuseudehan.
29 Angén puteng beuliong nyang teungoh jipot meunan hebat geuyue seungab, dan umbak ié laôt nyang raya pi ka seungab ngon reuda.
30 Awaknyan galak that sabab angén raya ka hana le; dan geuba laju awaknyan ubak peulabohan nyang geutuju.
31 Patot that awaknyan meusyukoe ubak TUHAN sabab geunaséh Gobnyan, dan sabab buet-buet Gobnyan nyang hireuen bak manusia.
32 Awaknyan laju jijak peugah keudeh keunoe keuhai keu agongan TUHAN lamkawan umat Gobnyan, dan jipujoe Gobnyan lam majeulis kawöm tuha.
33 Krueng-krueng nyang meu ié laju geu ubah jeuet keu padang pasi dan mata ié ka jeuet keutanoh nyang tho.
34 Tanoh nyang subô ngon gumbô geupeujeuet keu tanoh nyang masen, sabab buet nyang jeuhet nyang jipeubuet lé ureuëng-ureuëng nyang tinggai disinan.
35 Padang pasi nyang tho kreng laju geu ubah jeuet keu kulam ié, dan tanoh tho jiteubiet mata ié.
36 Ureuëng-ureuëng deuk laju geupeuduek disinan; dan awaknyan laju jipeudong banda keu teumpat tinggai awaknyan.
37 Blang ngon ladang awaknyan laju geutabu bijéh dan meunan cit jipula deungon bak anggô, dan laju jipeusapat hase nyang meulimpah ruwah.
38 TUHAN geujok keu awaknyan aneuëk nyang le, meunan cit deungon beulatang peulara awaknyan pi meukeumang biak lumpah bagaih le.
39 Teuma awaknyan jipeutaloe dan tinggai bacut sabab seungsara dan keunong iénanya nyang keujam.
40 TUHAN laju geupeuhina ngon cara geupeumiyueb bubena ureuëng mat kuasa awaknyan, dan geuyue awaknyan jimeurawoh dipadang luwah nyang hana rot.
41 Teuma ureuëng gasien laju geupeulheueh nibak keusosahan awaknyan, dan keuluwarga awaknyan meutamah laju lagée bubiri.
42 Ureuëng jujoe jingieng nyan dan galak that, teuma ureuëng jeuhet laju geuyue iemdroe hana jeuet jipeugah haba.
43 Seumoga ureuëng nyang bijaksana jipike hainyan banmandum dan jiaku bahwa TUHAN teutab geugaséh.


Chapter 108

1 Ca-e. Zabur Nabi Daud.
2 Ulôn peucaya that, ya Allah, ulôn keuneuk meuca-e dan lôn pujoe Droeneueh. Hai beudôh kheueh, jiwa ulôn!
3 Hai beudôh kheueh gambus dan keucapi! Ulôn keuneuk peuteubit fajar.
4 TUHAN, ulôn keuneuk peugah syukoe ubak Droeneueh lamkawan bansa-bansa. Ulôn keuneuk meuca-e lagu pujoe keu Droeneueh lamkawan umat manusia.
5 Sabab gaséh Droeneueh rayeuk sampoe trok u langét manyang dan seutia Droeneueh sampoe nibak awan di angkasa.
6 Ya Allah, neutunyok kheueh keuagongan Droeneueh di langét, dan keumuliaan Droeneueh bansaboh bumoe.
7 Peuseulamat kheueh kamoe deungon kuasa Droeneueh, dan neujaweueb kheueh doá kamoe, mangat ureuëng-ureuëng nyang neugaséh hase seulamat.
8 Nibak teumpat tinggai Gobnyan nyang suci Po teu Allah geupeugah, "Ulôn keuneuk seumurak dan Ulôn bagi-bagi tanoh Sikhem, Pantôn Sukot teuma Ulôn undi.
9 Gilead dan Manasye na kheueh atra Ulôn, Efraim tupi beuso Lôn, dan Yehuda tungkat keurajeuen Lôn.
10 Teuma Moab na kheueh teumpat Ulôn rhah gaki; Ulôn meusurak keumeunangan ateueh Filistea. Keu Edom Ulôn geulawa seulob Lôn, sibagoe tanda bahwa jihnyan na kheueh atra Ulôn."
11 Soe nyang ba ulôn u Edom? Soe teuma nyang peutakteh ulôn ubak banda nyang meukuta nyan?
12 Ya Allah, peu kheueh Droeneueh hana neujak meusajan deungon kamoe? Dan peu kheueh Droeneueh hana neumaju meusigoe deungon tantra kamoe?
13 Neutulông kheueh kamoe ateueh musoh, sabab bantuan manusia hana meuguna.
14 Meusapat deungon Allah, geutanyoe gagah peukasa; Gobnyan kheueh nyang peutaloe musoh geutanyoe.


Chapter 109

1 Keu teupimpén kor. Zabur Nabi Daud.
2 Sabab ulôn jiseurang lé ureuëng jeuhet dan tukang teumipée nyang jitabu haba-haba nyang hana beuna keuhai ulôn.
3 Awaknyan jiseurang ulôn deungon tutoe haba nyang peunoh deungon banci, dan jiseurang ulôn deungon hana alasan.
4 Awaknyan jitudoh ulôn, bahpi di ulôn lôn gaséh keu awaknyan, dan ka lheueh ulôn meudoá keu awaknyan.
5 Awaknyan jibalaih keubaiékan ulôn deungon buet nyang jeuhet, dan geunaséh ulôn deungon banci.
6 Baiát kheueh sidroe ureuëng jeuhet mangat jisidang jihnyan, bah kheueh jihnyan jipeudakwa lé lawan-lawan jih.
7 Bah kheueh jihnyan ji adili dan jipeugah meusalah, dan bah kheueh doá jihnyan jianggab desya.
8 Bah kheueh udeb jih bagaih akhé, dan jabatan jihnyan jicok lé ureuëng laén.
9 Bah kheueh aneuëk-aneuëk jihnyan jeuet keu aneuëk yatem, dan perumoh jihnyan jeuet keu inong balée.
10 Bah kheueh aneuëk-aneuëk jihnyan jeuet keu aneuëk jak geumadée keudeh keunoe, dan jiuse nibak inciek-inciek rumoh jih nyang reuloh.
11 Bah kheueh banmandum atra jih jisita lé ureuëng jak tunggée utang, dan hase jeureh payah jihnyan jireupah lé ureuëng laén.
12 Bék na ureuëng nyang get até deungon jihnyan, atawa jiweueh keu aneuëk-aneuëk nyang na jitinggai.
13 Bah kheueh banmandum keuturonan jihnyan habéh jipeubinasa, dan nan jih jipeutuwoe lé ureuëng teuka dudoe teuma.
14 Bah kheueh buet nyang jeuhet nyang ka jipeuget lé indatu jihnyan teutab geuingat lé TUHAN, dan desya ma jihnyan hana geutem sampôh.
15 Bah kheueh desya jihnyan teutab geuingat lé TUHAN, dan hana ureuëng nyang na ingat keu jihnyan ateueh bumoe nyoe.
16 Sabab ureuëng nyan hántom na ji ingat keu jitunyok gaséh sayang. Jihnyan ji iénanya ureuëng gasien dan seungsara, dan jipoh ureuëng yang hana meudaya.
17 Geuhnyan galak that jikutok; bah kheueh jihnyan keudroe nyang keunong kutok! Jihnyan hana galak teubri beureukat, bah kheueh hana beureukat keu jih nyan!
18 Nibak jih meunyoe kutok nyan na kheueh buet nyang ka lazem, saban lagée ureuëng ngui peukayan. Bah kheueh kutok nyan meuliléh lagée ié nyang rô nibak badan jih, dan lagée minyéuk u dalam tuleueng-tuleueng jihnyan.
19 Bah kheueh deungon kutok nyan teupeukeulubong jihnyan lagée peukayan, dan sabe na meulilet bak gobnyan lagée talo keuieng.
20 TUHAN, neupeurhot kheueh huköm nyan ateueh ureuëng nyang tudoh ulôn, dan ateueh ureuëng nyang jimariet jeuhet keuhai ulôn.
21 Teuma neutulông kheueh ulôn nyang sisuai deungon janji Droeneueh, ya TUHAN Allah ulôn, peuseulamat kheueh ulôn sabab keubaiékan dan geunaséh Droeneueh.
22 Sabab ulôn gasien lom seungsara, dan até ulôn luka nyang cukob lhok.
23 Ulôn rab gadôh lagée bubayang óh watée seupôt, dan ulôn jipôt lagée jipeucrok daruet dalam blang raya.
24 Teuôt ulôn yo meugok-gok sabab puasa, dan badan ulôn pijuet ngon tho nyang na tinggai tuleueng ngon kulét.
25 Ureuëng nyang kalon jihina lôn sira ji asek-asek ulée.
26 Tulông kheueh ulôn, ya TUHAN Allah lôn, peuseulamat kheueh ulôn, nyang sisuai deungon geunaséh Droeneueh.
27 Teuma musoh lôn jiteupeue bahwa nyan na kheueh buet Droeneueh, bahwa Droeneueh kheueh, TUHAN nyang peubuet nyan.
28 Bahpi awaknyan jikutok ulôn, seumoga Droeneueh neubri beureukat keu ulôn. Bahpi awaknyan jibeudôh, teuma awaknyan teutab meuteumé malée; teuma seumoga ulôn, hamba Droeneueh, Droeneueh jok keugeumbiraan.
29 Bah kheueh ureuëng-ureuëng nyang tudoh ulôn peunoh ngon seulimbot keuhinaan, dan rasa malée teutôb awaknyan lagée teutôb ngon bajée jubah.
30 Ulôn keuneuk pujoe TUHAN deungon su nyang nyareng, ulôn peumeusyeuhu Gobnyan lamkawan umat manusia.
31 Sabab Gobnyan geubila dan geupeuseulamat ureuëng gasien nibak awaknyan nyang peurhot huköman maté u ateueh jihnyan.


Chapter 110

1 Zabur Nabi Daud.
2 Nibak Sion TUHAN geupeuluwah keurajeuen gata; dan meukuasa kheueh ateueh musoh-musoh gata!
3 Bak watée uroe gata teuka deungon kuasa, nibak bukét nyang suci, rakyat gata jimaju deungon suka rela. Lagée iémbon dibeungoh uroe, di ureuëng-ureuëng muda jijak ubak gata.
4 Deungon meusumpah TUHAN ka geumeujanji, Gobnyan hana geutarek le, "Droeneueh kheueh imeum keu siumu masa, lagée Melkisedek."
5 TUHAN na disiblaih uneuen gata, meunyoe Gobnyan ka teuka beungéh, bubena raja habéh geupeutaloe.
6 Gobnyan geuhuköm bansa-bansa, sampoe manyét-manyét manusia meulampa-lampa. Gobnyan geupeubinasa banmandum ureuëng nyang mat kuasa bansaboh muka bumoe.
7 Raja geujieb ié lam krueng nyang na bak binéh jalan, óh lheueh nyan geupeuteuga lom, gobnyan meunang.


Chapter 111

1 Pujoe kheueh TUHAN!
2 Keubit that ajaéb nubuatan-nubuatan TUHAN, patot jiseulidek lé ureuëng-ureuëng nyang galak ubak hainyan.
3 Buet TUHAN agong dan teupujoe, dan keuadelan Gobnyan keukai dan abadi.
4 TUHAN nyan peungaséh dan peunyayang, Gobnyan geupeubuet buet-buet nyang takjob dan kagom luwa biasa, mangat geutanyoe teutab ta ingat ubak peue nyang ka geupeubuet nyan.
5 Gobnyan geubri rezeki keu ureuëng nyang taqwa, dan sabe ji ingat ubak peujanjian Gobnyan.
6 Gobnyan ka geutunyok kuasa Geuh ubak umat Gobnyan, deungon geubri keu awaknyan tanoh pusaka bansa-bansa.
7 TUHAN ade dan seutia lam banmandum tindakan Gobnyan, peue mantong peurintah Gobnyan jeuet teupeucaya.
8 Huköm Gobnyan meuteun siumu masa, geubri lam keubeunaran dan keuadelan.
9 Gobnyan geupeubeubaih umat droe Geuh, dan geupeuna peujanjian keukai deungon awaknyan. Gobnyan kheueh TUHAN nyang suci dan peukasa!
10 Soe mantong nyang keuneuk jeuet keu ureuëng bijaksana ureuëng nyan harôh jihoreumat TUHAN, Gobnyan geubri peungeurtian keu banmandum ureuëng nyang taát. Teupujoe kheueh TUHAN siumu masa!


Chapter 112

1 Pujoe kheueh TUHAN!
2 Aneuëk-aneuëk jihnyan jeuet keu ureuëng nyang mat kuasa di nanggroe nyoe, keuturonan ureuëng nyang gét geubri beureukat.
3 Keuluwarga ureuëng nyan teuma kaya dan makmu, dan ureuëng nyan seujahteura siumu masa.
4 Trang teutab meucahya didalam seupôt keu ureuëng nyang jujoe, dan keu ureuëng nyang ade, peungaséh dan peunyayang.
5 Mubahgia kheueh ureuëng nyang murah até dan jitem peu utang keu ureuëng laén dan jujoe lam peue mantong urosan.
6 Ureuëng nyang gét hana gagal; jihnyan ji ingat lé gob siumu masa.
7 Gobnyan hana teumakot meunyoe na ureuëng laén jijak peusampoe haba nyang brôk, até ureuëng nyan teugoh dan teutab sabab ji meuiman ubak TUHAN.
8 Ureuëng nyan hana gundah atawa teumakot, sabab jihnyan yakén musoh jihnyan geupeutaloe.
9 Ureuëng nyan jibagi ngon geu weuek-weuek hareuta jih, dan jibri seudeukah keu ureuëng gasien; jihnyan sabe jipeubuet nyang jroh, sabab nyan jihnyan meukuasa dan jihoreumat lé gob.
10 Ureuëng jeuhet nyang ngieng ureuëng nyan jiteuka beungéh; awaknyan jikab-kab gigo sabab banci. Dan awaknyan pi laju binasa; harapan awaknyan gadôh keu siumu masa.


Chapter 113

1 Pujoe kheueh TUHAN!
2 Nan Gobnyan jipeumeusyeuhu, bak saát nyoe dan siumu masa.
3 Phon di timu sampoe u barat nan TUHAN harôh teupujoe.
4 TUHAN meukuasa ateueh beubagoe bansa, keuagongan Gobnyan hase teukawai langét,
5 Soe nyang sa lagée TUHAN Allah geutanyoe? Gobnyan meutakhta di teumpat nyang manyang.
6 Teuma Gobnyan geupeuteukui droe keu geupandang langét dan bumoe.
7 Ureuëng gasien geuangkat lam abée, dan ureuëng meularat nibak lam abée.
8 Awaknyan geupeuduek sapat meusaho deungon peunguasa, meusajan deungon bansawan nibak umat Gobnyan.
9 Gobnyan geubri aneuëk-aneuëk keu peurumoh nyang éue, geupeujeuet jihnyan ma nyang mubahgia dan teuhoreumat di rumoh droe jih keudroe.


Chapter 114

1 Bak watée bansa Israel jiteubiet lam nanggroe Meusé, watée keuturonan Nabi Yakub geutinggai nanggroe aséng,
2 TUHAN geupeujeuet Yehuda teumpat suci Gobnyan, Israel geupeujeuet keuteumpat wilayah keukuasaan Gobnyan.
3 Laôt Geulagah ban jikalon Gobnyan laju jiplueng, Krueng Yordan jipiôh ji ile.
4 Gunong-gunong meulumpat lagée kaméng, dan bukét-bukét jigrob-grob lagée aneuëk bubiri.
5 Pakon hai laôt, sampoe gata plueng, dan pakon teuma Krueng Yordan jipiôh ji ile?
6 Peue sabab jih gata lumpat-lumpat hai gunong-gunong, dan gata grob-grob hai bukét-bukét?
7 Hai bumoe, beuyo kheueh gata dikeue TUHAN, dikeue Allah Nabi Yakub,
8 nyang ubah batée kareueng jeuet keu kulam ié, dan gunong batée jeuet keu mata ié.


Chapter 115

1 Bukon kamoe, ya TUHAN, bukon kamoe, teuma Droeneueh mantong nyang harôh teupujoe, sabab Droeneueh seutia dan teutab na gaséh sayang.
2 Pakon bansa-bansa harôh jipeugah, "Dipat Allah awaknyan?"
3 Allah geutanyoe na di syeuruga, Gobnyan geupeubuet peue nyang geugalak.
4 Beurala awaknyan teupeugét nibak méuh dan pirak, nyang jipeugot deungon jaroe manusia.
5 Bak awaknyan na babah, teuma hana hase jimarit, dan na mata, teuma hana hase jimeungieng.
6 Bak awaknyan na geulinyueng, teuma hana hase meudeungoe, dan meunan cit na idong, teuma hana hase jimeucöm.
7 Bak awaknyan na jaroe, teuma hana hase meuraba, dan na gaki, teuma hana hase jijak, dan hana su nyang hase jiteubiet lam ruekueng jih.
8 Seumoga meunan kheueh naseb ureuëng-ureuëng nyang jipeubuet nyan, dan banmandum ureuëng nyang peucaya ubak gobnyan.
9 Hai Israel, meuharab kheueh ubak TUHAN, Gobnyan kheueh nyang tulông dan nyang lindong gata.
10 Hai teungku-teungku imeum, meuharab kheueh ubak TUHAN, Gobnyan kheueh nyang tulông dan nyang lindong gata.
11 Hai banmandum ureuëng nyang taqwa, meuharab kheueh ubak TUHAN, Gobnyan kheueh tulông dan nyang lindong gata.
12 TUHAN geu ingat ubak geutanyoe dan geubri beureukat ubak geutanyoe, Gobnyan geubri beureukat umat Israel dan banmandum teungku imeum keuturonan Nabi Harun.
13 Gobnyan geubri beureukat keu ureuëng-ureuëng nyang taqwa, bah kheueh nyan ubit meunan cit nyang raya.
14 Seumoga TUHAN geubri anugeurah aneuëk nyang le, keu gata dan keuturonan gata.
15 Seumoga gata geubri beureukat lé TUHAN, nyang cebta langét dan bumoe!
16 Langét na kheueh atra TUHAN mantong, teuma bumoe geubri keu manusia.
17 TUHAN hana jipujoe lé ureuëng maté, dan lé ureuëng nyang ka jitron u teumpat nyang seungue.
18 Teuma geutanyoe nyang mantong udeb meusyukoe kheueh ubak Gobnyan, phon saát nyoe sampoe siumu masa.


Chapter 116

1 Ulôn ku cinta TUHAN, sabab Gobnyan geudeungoe ulôn dan geupakoe peue nyang ulôn lakée.
2 Gobnyan geudeungoe ulôn, pajan mantong ulôn meulakée ubak Gobnyan.
3 Ulôn teuancam bahya mawöt; mawöt nyang lumpah bahya nyan jiseureugab ulôn, sampoe ulôn that-that apoh apah dan teumakot nyang hana teukira.
4 Dan ulôn laju meulakée ubak TUHAN, "Ya TUHAN, ulôn meulakée, peuseulamat kheueh ulôn!"
5 TUHAN nyan peungaséh dan ade; Po teu Allah geutanyoe peunoh deungon gaséh sayang.
6 TUHAN geupeulara ureuëng-ureuëng udeb seudeurhana; watée ulôn hana meudaya Gobnyan geupeuseulamat ulôn.
7 Ulôn peuteunang até lôn, sabab TUHAN gét deungon ulôn.
8 TUHAN ka geupeusie ulôn nibak maté; geupeumangat até lôn dan hana geupeubiyeu ulôn reubah.
9 Dan ulôn jeuet lôn rasa udeb dalam donya nyoe, dalam lindong TUHAN.
10 Ulôn teutab peucaya, bahpi ulôn peugah, "Ulôn lumpah that teuteugon ngon meudeurita."
11 Dalam keuadaan bingong ulôn peugah, "Hana meusidroe pi nyang jeuet teupeucaya."
12 Peue nyang ulôn jok ubak TUHAN keu lôn balaih keujroh Gobnyan ubak ulôn?
13 Ulôn lônba peuseumahan ié anggô ubak TUHAN sibagoe rasa syukoe ateueh peutulôngan Gobnyan.
14 Ulôn lôn peupeunoh janji lôn ubak Gobnyan dikeue banmandum umat Gobnyan.
15 TUHAN lumpah that geugaséh ngon geusayang keu maté sidroe-droe ureuëng nyang geugaséh.
16 Ulôn nyoe hamba Droeneueh, ya TUHAN, saban lagée ma ulôn, dilôn pi meubakti ubak Droeneueh Droeneueh ka neupeulheueh ulôn nibak lam glab.
17 Ulôn kuba keureubeuen syukoe ukeue Droeneueh, sira lôn ba doá ubak Droeneueh.
18 Ulôn kupeupeunoh janji ulôn ubak TUHAN, dikeue banmandum umat Gobnyan
19 nyang na meuhimpon dikeue seuramoe Baét TUHAN, di teungoh banda Yerusalem.


Chapter 117

1 Pujoe kheueh ubak TUHAN, hai banmandum bansa, agong kheueh Gobnyan, hai banmandum sukée bansa!
2 Sabab raya that geunaséh TUHAN keu geutanyoe dan seutia Gobnyan teutab siumu masa.


Chapter 118

1 Meusyukoe kheueh ubak TUHAN sabab Gobnyan jroh, Geunaséh Gobnyan keukai dan abadi.
2 Bah kheueh ureuëng Israel jipeugah, "Geunaséh Gobnyan keukai abadi."
3 Bah kheueh di teungku-teungku imeum geupeugah, "Geunaséh Gobnyan keukai abadi."
4 Bah kheueh banmandum ureuëng nyang taqwa geupeugah, "Geunaséh Gobnyan keukai abadi."
5 Dalam keuadaan meukarat ulôn meulakée ubak TUHAN; laju Gobnyan geujaweueb dan geubalaih ulôn.
6 Ulôn hana yo sabab TUHAN na meusajan ngon ulôn, manusia hana meudaya dikeue ulôn.
7 TUHAN na meusajan ulôn keu geutulông lôn, ulôn ku ngieng musoh ulôn nyang geupeutaloe.
8 Leubeh gét meulindong ubak TUHAN, nibak teupeu bangga keu manusia.
9 Leubeh gét meulindong nibak TUHAN, nibak meuharab ubak bansawan.
10 Jai that musoh di keulileng ulôn; deungon kuasa TUHAN, awaknyan habéh mandum ulôn peutaloe.
11 Awaknyan jikeupong ulôn rot jeueb-jeueb peunjuru; deungon kuasa TUHAN, awaknyan habéh ulôn peutaloe.
12 Lagée unou awaknyan jiparan sikeulileng ulôn; deungon kuasa TUHAN, awaknyan habéh ulôn peutaloe. Lam sikleb siklab awaknyan habéh teupeulon lagée apui hu nyang teungoh teutot tamah meuduro.
13 Ulôn jiseurang luwa biasa dan sampoe rab reubah, teuma TUHAN na nyang tulông ulôn.
14 TUHAN na kheueh teunaga ulôn dan pujaan ulôn, Gobnyan ka geupeuseulamat ulôn.
15 Deungoe kheueh surak keumeunangan di teungoh khimah-khimah umat Gobnyan, "TUHAN ka geupeubuet buet nyang peukasa!
16 Kuasa TUHAN geupeumeunang geutanyoe! TUHAN geupeubuet buet nyang peukasa."
17 Ulôn hana maté, teuma ulôn teutab udeb, keu lôn jak peusampoe karya TUHAN.
18 TUHAN ka geuseksa ulôn deungon brat dan kreueh, teuma Gobnyan hana geuseurah ulôn ubak mawöt.
19 Buka kheueh ulôn nyoe babah pintoe geureubang Baét TUHAN, jeuet hase lôn tamong dan lôn peugah syukoe ubak Gobnyan.
20 Nyoe kheueh babah pintoe geureubang TUHAN, teuma ureuëng jujoe nyang jeuet jak rot nyan.
21 Ulôn kupujoe Droeneueh, sabab Droeneueh neukabui doá ulôn; Droeneueh ka neubri keu ulôn keumeunangan.
22 Batée nyang jitiek lé utoh-utoh bangunan, batée nyan ka jeuet keu batée peunjuru.
23 Nyan kheueh buet TUHAN, keubit kagom luwa biasa nibak geutanyoe.
24 Nyoe kheueh uroe nyang geupeuteuntée lé TUHAN; jak geutanyoe ta peuraya deungon geumbira.
25 Kamoe lakée, ya TUHAN, peuseulamat kheueh kamoe, ya TUHAN, neubri kheueh keu kamoe keumeunangan!
26 Teubeureukati kheueh gobnyan nyang teuka ateueh nan TUHAN, kamoe bri beureukat gata di Baét TUHAN.
27 TUHAN na kheueh Allah, Gobnyan peumurah até keu geutanyoe. Maju kheueh meurarak deungon ranteueng nibak jaroe, dan keulileng kheueh nibak miseubah TUHAN.
28 Droeneueh Allah ulôn, ulôn meusyukoe ubak Droeneueh, Allah ulôn, ulôn keubit that kagom ubak Droeneueh.
29 Meusyukoe kheueh ubak TUHAN sabab Gobnyan gét, geunaséh Gobnyan keukai dan abadi.


Chapter 119

1 Mubahgia kheueh ureuëng nyang udeb jih hana meucupa dan taát ubak huköm-huköm TUHAN.
2 Mubahgia kheueh ureuëng nyang jiseutôt peurintah Gobnyan, dan deungon sigeunab até ji useuha jituri TUHAN.
3 Mubahgia kheueh ureuëng nyang udeb meunurot keuheundak TUHAN, dan hana jipeubuet buet nyang jeuhet.
4 Droeneueh neubri keu kamoe huköm Droeneueh, ya TUHAN, mangat kamoe peubuet deungon seutia.
5 Seumoga ulôn deungon até nyang tegoh ulôn seutôt peuratoran-peuratoran Droeneueh.
6 Meunyoe ulôn peurati banmandum peurintah Droeneueh, ulôn hana neupeumalée.
7 Meunyoe ulôn meurunoe keuputosan Droeneueh nyang ade, teuma ulôn lôn pujoe Droeneueh deungon situloh até.
8 Ulôn lôntem taát ubak huköm Droeneueh, bék kheueh sagai-sagai neutinggai ulôn.
9 Ureuëng muda hase jipeuteun udeb jih hana meucupa meunyoe jihnyan udeb nyang sisuai deungon peurintah Droeneueh.
10 Deungon sipeunoh até ulôn meu useuha lôn turi Droeneueh, dan bék neupeubiyeu ulôn nyoe meusimpang nibak peurintah Droeneueh.
11 Ajaran Droeneueh ulôn keubah didalam até, mangat ulôn bék meudesya keu Droeneueh.
12 Ulôn pujoe Droeneueh, ya TUHAN, neupeurunoe kheueh ulôn peue nyang Droeneueh teutabkan.
13 Deungon su nyang nyareng ulôn peumaklum banmandum huköm nyang Droeneueh bri.
14 Ulôn geumbira lôn seutôt banmandum peue nyang Droeneueh peurintah, saban lagée ulôn keubah meubagoe rupa hareuta.
15 Ulôn kutem meurunoe banmandum keuputosan Droeneueh, dan ulôn simak banmandum peue nyang Droeneueh tunyok.
16 Peue nyang ka Droeneueh peuteutab jeuet até ulôn lumpah galak; ajaran Droeneueh keubit hana hase ulôn peutuwoe.
17 Bah kheueh Droeneueh meumurah até keu hamba Droeneueh nyoe, mangat ulôn teutab udeb dan jeuet keu ureuëng nyang taát ubak ajaran Droeneueh.
18 Neupeubleut kheueh mata kamoe jeuet hase kamoe keumalon ajaran nyang lumpah hebat dalam huköm Droeneueh.
19 Dan keu sikeujab ulôn tinggai di ateueh donya nyoe, bék kheueh neusöm huköm Droeneueh nibak ulôn.
20 Até lôn sakét tanggong rindu, ya TUHAN, ulôn keuneuk teupeue huköm Droeneueh jeueb-jeueb watée.
21 Droeneueh nyang sapa ureuëng nyang sombong, dan nyang kutok ureuëng nyang meusimpang nibak ajaran Droeneueh.
22 Neupeulheueh kheueh ulôn nibak peunghinaan dan seurapa awaknyan, sabab ulôn kupeubuet peuratoran Droeneueh.
23 Bahpi lé peunguasa ka jimeukumplot jilawan ulôn, hamba Droeneueh nyoe teutab meurateb dan teutanung nyang ka Droeneueh teutabkan.
24 Peuratoran-peuratoran Droeneueh jeuet keu naseuhat ulôn nyang lumpah mangat dan galak até ulôn.
25 Ulôn ka teuéh didalam abée; neupeupuléh kheueh udeb lôn nyang sisuai deungon janji Droeneueh.
26 Ulôn meungaku nibak buet ulôn, sababnyan Droeneueh neujaweueb ulôn; neupeurunoe kheueh ulôn peue nyang ka Droeneueh teutabkan.
27 Neutulông kheueh ulôn mangat jeuet lôn puphom banmandum huköm-huköm Droeneueh, ajaran Droeneueh nyang lumpah kagom nyan teutab ulôn tanueng.
28 Jiwa ulôn ka hanco meukeupeng-keupeng keunong keusosahan, neupeukong kheueh ulôn nyang sisuai deungon janji Droeneueh.
29 Neupeujiôh kheueh ulôn nibak rot nyang sisat, ya TUHAN lôn, sabab keujroh Droeneueh, neupeurunoe kheueh ulôn deungon huköm Droeneueh.
30 Ulôn kalheueh lôn piléh mangat jeuet keu ureuëng taát, peurintah Droeneueh sabe ulôn ingat-ingat.
31 Ulôn ka lôn seutôt peue mantong peuratoran-peuratoran Droeneueh, ya TUHAN, bék neupeubiyeu ulôn meuteumé malée.
32 Deungon sigala seunang até ulôn lôn turot ubak peurintah Droeneueh, sabab Droeneueh kheueh ulôn nyoe meutamah meuphom.
33 TUHAN, neupeurunoe kheueh ulôn peue makna keuteutapan-keuteutapan Droeneueh, mangat ulôn jeuet lôn seutôt sampoe án akhé.
34 Neupeujeuet kheueh ulôn mangat muphom ubak huköm Droeneueh jeuet lôn taát, dan ulôn peubuet deungon sipeunoh até.
35 Seumoga ulôn lôn mumat teugoh ubak peurintah Droeneueh, sabab nyan kheueh nyang ulôn harok.
36 Neubri kheueh keu ulôn hasrat keu lôn taát ubak peurintah Droeneueh, leubeh nibak meuheuet beujeuet keu ureuëng kaya.
37 Neujaga kheueh ulôn mangat bék lôn tiyeub nyang hana meuguna, neubri kheueh keu ulôn udeb nyang sisuai deungon keuheundak Droeneueh.
38 Neupeukong kheueh hamba Droeneueh nyoe janji Droeneueh, nyang Droeneueh bri keu ureuëng nyang taát ubak Droeneueh.
39 Neupeujiôh kheueh peunghinaan nyang ulôn takot, ya TUHAN, sabab keubit that gét banmandum huköm Droeneueh.
40 Neubri kheueh keu ulôn udeb barô, sabab Droeneueh ade, ulôn meuheuet that ulôn taát ubak keuputosan-keuputosan Droeneueh.
41 Ya TUHAN, neutunyok kheueh padub na Droeneueh neugaséh keu ulôn, neupeuseulamat kheueh ulôn nyang sisuai deungon janji Droeneueh.
42 Dan ka hase ulôn jaweueb ureuëng nyang hina ulôn, sabab ulôn nyang ulôn peubangga na kheueh tutoe haba Droeneueh.
43 Neutulông kheueh ulôn mangat hase ulôn peugah nyang beuna, sabab ulôn meuharab ubak keuputosan Droeneueh.
44 Ulôn keuneuk mumat ubak huköm Droeneueh, keu siumu masa.
45 Teuma ulôn udeb deungon beubaih, sabab lôn useuha lôn patuh ubak tutoe Droeneueh.
46 Peuratoran Droeneueh ulôn peusampoe ubak raja-raja, deungon lagée nyan ulôn hana meuteumé malée.
47 Keuseunangan ulôn na kheueh ulôn peubuet peurintah Droeneueh, sabab ulôn cinta ubak peuratoran nyan.
48 Ulôn horeumat dan lôn cinta ubak peurintah Droeneueh, nyang ka Droeneueh teutabkan teuma ulôn reunuengkan.
49 Ingat kheueh janji Droeneueh ubak hamba Droeneueh nyoe, janji nyang neubri harapan keu ulôn.
50 Nyoe kheueh nyang peulalo ulôn lam peundeuritaan, bahwa janji Droeneueh nyan teuba ulôn ubak udeb.
51 Ureuëng sombong luwa biasa jihina ulôn, teuma ulôn teutab hana meusimpang nibak huköm Droeneueh.
52 Ulôn teuingat ubak huköm Droeneueh yoh masa dilée, dan teuhibo kheueh até ulôn, ya TUHAN.
53 Ulôn beungéh that keu ureuëng jeuhet, sabab awaknyan jitinggai huköm Droeneueh.
54 Simantong udeb lôn nyang paneuk di ateueh bumoe, nyang Droeneueh teutabkan ulôn peujeuet keu ca-e ngon lagu-lagu pujoe.
55 Óh watée malam ulôn ingat ubak Droeneueh, ya TUHAN, huköm Droeneueh teutab ulôn mat.
56 Ulôn meuteumé bahgia sabab ulôn taát ubak peurintah-peurintah Droeneueh.
57 Droeneueh mantong nyang ulôn harab, ya TUHAN lôn, ulôn meujanji lôn peubuet ajaran Droeneueh.
58 Deungon sigeunab até ulôn meulakée gaséh sayang Droeneueh, neugaséh kheueh lôn nyang sisuai deungon janji Droeneueh.
59 Ulôn ka habéh pike keuhai pi-e lôn, dan lôn meujanji lôn taát ubak peuratoran Droeneueh.
60 Ulôn meudab-dab dan hana ulôn preh, keu ulôn peujak peurintah Droeneueh.
61 Ureuëng jeuhet jipasang taron keu ulôn, teuma ulôn teutab hana lôn tuwoe ubak huköm Droeneueh.
62 Di teungoh malam ulôn beudôh di teumpat éh keu lôn jak pujoe Droeneueh, sabab keuputosan-keuputosan Droeneueh nyang ade.
63 Ulôn meurakan deungon banmandum ureuëng nyang taqwa, dan banmandum ureuëng nyang jipeubuet peurintah Droeneueh.
64 Bumoe peunoh deungon gaséh Droeneueh, ya TUHAN, neupeurunoe kheueh ulôn keuhai nyang TUHAN peuteutabkan.
65 Droeneueh ka neupeupeunoh janji Droeneueh, ya TUHAN, dan neupeubuet nyang jroh keu hamba Droeneueh.
66 Neubri kheueh keu ulôn hikeumat dan iéleumé peungeutahuan, sabab ulôn peucaya ubak peue mantong peurintah Droeneueh.
67 Sigohlom teuhuköm, ulôn meunyimpang, jinoenyoe ulôn mumat ubak peurintah Droeneueh.
68 Sabab Droeneueh jroh dan neupeubuet nyang get, neupeurunoe kheueh ulôn keuhai keuputosan-keuputosan Droeneueh.
69 Ureuëng sombong jipeusuna ulôn, teuma ulôn deungon sipeunoh até lôn taát ubak keuputosan Droeneueh.
70 Ureuëng-ureuëng nyan hana jimuphom, teuma nibak ulôn huköm Droeneueh na kheueh nyang peumangat até.
71 Bit get that Droeneueh neuhuköm ulôn, jeuet ulôn turi ubak keuteutapan-keuteutapan Droeneueh.
72 Nibak ulôn huköm Droeneueh leubeh meuyuém nibak banmandum méuh dan pirak nyang na di ateueh donya.
73 Droeneueh kheueh nyang peujeuet dan nyang beuntuk ulôn, neubri kheueh keu ulôn peungeurtian jeuet hase ulôn meurunoe peurintah-peurintah Droeneueh.
74 Ureuëng taqwa galak meunyoe jikalon ulôn, sabab ulôn meuharab ubak janji Droeneueh.
75 Ulôn kuteupeue bahwa keuputosan Droeneueh na kheueh ade, ya TUHAN, Droeneueh ka neuhuköm ulôn sabab keuseutiaan Droeneueh.
76 Seumoga geunaséh Droeneueh jeuet teuhibo ulôn, paih lagée janji Droeneueh ubak hamba Droeneueh.
77 Neugaséh kheueh ulôn, teuma ulôn teutab udeb, sabab huköm Droeneueh teupeugalak até ulôn.
78 Bah kheueh ureuëng sombong meuteumé malée, sabab ka jipeusuna ulôn, teuma ulôn teutab lôn ba dalam teunung keuhai peurintah-peurintah Droeneueh.
79 Seumoga ureuëng taqwa geujak ubak ulôn, banmandum nyang jituri keu peuratoran-peuratoran Droeneueh.
80 Seumoga até ulôn hana meusimpang nibak keuteutapan Droeneueh, jeuet ulôn bék meuteumé malée.
81 Até ulôn lumpah that rindu ubak keuseulamatan nibak Droeneueh; lé sababnyan ulôn meuharab ubak janji Droeneueh.
82 Mata ulôn peudeuh sabab teubleut sabe bak lôn preh-preh neupeupeunoh janji Droeneueh, ulôn peugah, "Pajan kheueh Droeneueh neuhibô ulôn?"
83 Kulét ulôn ka krot-krot lagée uempang anggô nyang useung, teuma keuteutapan Droeneueh teutab hana ulôn peutuwoe.
84 Sampoe án pajan hamba Droeneueh nyoe jimeusaba? Pajan Droeneueh neuhuköm ureuëng-ureuëng nyang jiteuyeub ulôn?
85 Ureuëng nyang hana jitaát ubak huköm Droeneueh, ka jikueh uruek keuneuk jijeubak ulôn.
86 Banmandum huköm Droeneueh hase teupeutanggong jaweueb, neutulông kheueh ulôn, sabab ulôn jitiyeub hana alasan.
87 Awaknyan rab jiteumé jipoh ulôn, teuma ulôn teutab hana lôn peutuwoe ubak peurintah Droeneueh.
88 Peuseulamat kheueh ulôn sabab Droeneueh teutab neugaséh, mangat ulôn hase lôn taát ubak huköm Droeneueh.
89 TUHAN, sabda Droeneueh teutab kong siumu masa, dan keukai ngon abadi di syeuruga.
90 Keuseutiaan Droeneueh teutab meuteun nibak zamén u zamén, Droeneueh nyang peudong bumoe sampoe teutab na.
91 Banmandum nyang na jinoe, na kheueh sabab peurintah Droeneueh, sabab awaknyan banmandum na kheueh hamba-hamba Droeneueh.
92 Meunyoe huköm Droeneueh bukon pangkai keugeumbiraan ulôn, ka pasti ulôn ka maté lam seungsara lôn.
93 Sipanyang masa ulôn hana lôn kalon ban nibak peurintah Droeneueh, sabab deungon nyan Droeneueh peu udeb ulôn.
94 Peuseulamat kheueh ulôn, sabab ulôn nyoe na kheueh atra Droeneueh, ulôn ka meu useuha ulôn taát ubak peurintah Droeneueh.
95 Ureuëng jeuhet ka jipreh-preh jikeuneuk poh maté lôn, teuma ulôn teutab lôntem kalon ubak huköm Droeneueh.
96 Ka leumah lôn kalon bahwa nyang sampoereuna pi teubataih, teuma peurintah Droeneueh kheueh nyang sampoereuna.
97 Padub na ulôn cinta ubak huköm Droeneueh; hainyan teutab ulôn pike ngon lôn zike sipanyang uroe.
98 Ulôn sabe teuingat ubak peurintah Droeneueh, nyang teupeujeuet ulôn leubeh bijaksana nibak musoh-musoh lôn.
99 Peungeurtian ulôn leubeh nibak peungeurtian gurée-gurée lôn, sabab ulôn teutab lôn reunueng ngon lôn pike ubak peurintah-peurintah Droeneueh.
100 Ulôn leubeh muphom nibak ureuëng-ureuëng nyang ka syiek, sabab ulôn teutab lôn mumat ubak keuputosan-keuputosan Droeneueh.
101 Ulôn peusie peue mantong buet atawa pi-e nyang jeuhet, mangat ulôn teutab taát ubak ajaran Droeneueh.
102 Ulôn teutab hana lôn peujayéh nibak huköm Droeneueh, sabab Droeneueh kheueh nyang peurunoe ulôn.
103 Keubit that maméh jih tutoe haba Droeneueh, rasa jih leubeh maméh nibak meulisan.
104 Huköm-huköm Droeneueh teubri ulôn ubak peungeurtian, lé sababnyan ulôn teutab lôn banci ubak buet-buet nyang curang.
105 Sabda Droeneueh na kheueh panyöt tanglong keu tieb-tieb langkah lôn, cahya nyang trang nibak jalan lôn.
106 Nyang ulôn peujanji deungon sumpah lôn teupati, keu lôn mumat nibak keuputosan Droeneueh nyang ade.
107 Ulôn lumpah seungsara, ya TUHAN, neujaga kheueh udeb lôn nyang sisuai deungon janji Droeneueh.
108 Teurimong kheueh doá syukoe ulôn, ya TUHAN, dan neupeurunoe kheueh ulôn deungon huköm-huköm Droeneueh.
109 Ulôn sabe lôn peusabông nyawöng, teuma ulôn teutab hana lôn tuwoe nibak huköm Droeneueh.
110 Ureuëng jeuhet jiteun taron keu ulôn, teuma ulôn teutab hana meusimpang nibak keuputosan Droeneueh.
111 Peurintah Droeneueh na kheueh pusaka ulôn siumu masa, sababnyan até ulôn teutab geumbira.
112 Ulôn meuheuet keu lôn taát nibak keuteutapan Droeneueh, sampoe akhé hayat lôn.
113 Ulôn teutab lôn cinta nibak huköm-huköm Droeneueh, ulôn banci ubak ureuëng nyang hana seutia deungon sipeunoh até ubak Droeneueh.
114 Droeneueh kheueh nyang bila dan peulindong lôn, ulôn meuharab ubak janji Droeneueh,
115 Hai ureuëng jeuhet, beujiôh kheueh nibak ulôn! Ulôn keuneuk taát ubak peurintah Po teu Allah.
116 Neupeukong kheueh ulôn nyang sisuai deungon janji Droeneueh mangat ulôn teutab udeb, bék neupeubiyeu udeb ulôn keucewa lam harapan.
117 Tumpang kheueh ulôn mangat ulôn seulamat, dan sabe ulôn peurati nibak peurintah Droeneueh.
118 Droeneueh neutulak ureuëng nyang meunyimpang nibak peue nyang ka Droeneueh teutabkan, dan sia-sia mantong tipée muslihat awaknyan.
119 Banmandum ureuëng jeuhet neuanggab lagée blôh, lé sababnyan ulôn cinta ubak peuratoran-peuratoran Droeneueh.
120 Ulôn yo that-that sabab teumakot ubak Droeneueh, até ulôn yo ubak keuputosan Droeneueh.
121 Ulôn ka lôn peubuet nyang ade dan beuna, bék kheueh neuseurah ulôn ubak jaroe musoh.
122 Meujanji kheueh bahwa Droneueh teutab neutulông ulôn, bék neupeubiyeu ulôn jiteugom lé ureuëng-ureuëng nyang angkoh dan sombong.
123 Mata ulôn peudeh bak ulôn preh bantuan Droeneueh nyang peuseulamat lôn, ulôn preh peumbeubaihan nyang Droneueh peujanji.
124 Peusaneut kheueh ulôn nyang sisuai deungon gaséh Droeneueh, dan neupeurunoe kheueh ulôn nibak keuteutapan Droeneueh.
125 Ulôn hamba Droeneueh, peujeuet kheueh ulôn mangat meuphom, mangat ulôn leubeh muphom peurintah Droeneueh.
126 TUHAN, ka trok saát jih Droeneueh meutindak, sabab le that ureuëng nyang jiliengkeue keuhai huköm Droeneueh.
127 Peurintah-peurintah Droeneueh ulôn cinta leubeh nibak méuh, dan leubeh nibak méuh nyang murni.
128 Sabab nyan ulôn udeb sisuai deungon banmandum peutunyok Droeneueh; buet nyang sirong teutab ulôn banci.
129 Banmandum peuratoran nyang Droeneueh peuna keubit lumpah that kagom, dan banmandum peuratoran nyan ulôn taát sipeunoh até.
130 Meunyoe teupeutrang, ajaran Droeneueh teubri trang nyang luwa biasa, dan teubri peungeurtian keu ureuëng seudeurhana.
131 Nafáh ulôn meuhák-meuhák, sabab rindu ubak peurintah Droeneueh.
132 Neupaleng kheueh ubak ulôn dan neugaséh kheueh keu ulôn, saban lagée neugaséh ubak ureuëng nyang cinta ubak Droeneueh.
133 Peuteugab kheueh langkah ulôn nyang sisuai deungon janji Droeneueh, bék neupeubiyeu ulôn jikuasa lé keujeuhetan.
134 Peubeubaih kheueh ulôn nibak ureuëng-ureuëng nyang tindéeh ulôn, mangat ulôn hase lôn taát ubak peurintah Droeneueh.
135 Neubri kheueh beureukat ubak ulôn deungon teuka Droeneueh, dan neupeurunoe kheueh ulôn keuhai keuputosan Droeneueh.
136 Ié mata ulôn ile lagée ié krueng, sabab huköm Droeneueh hana jitaáti.
137 Droeneueh ade, ya TUHAN, banmandum huköm Droeneueh teupat.
138 Peurintah-peurintah nyang Droeneueh bri, ade dan jeuet teupeubangga.
139 Beungéh ulôn hu lagée apui lam tuboh lôn sabab musoh ulôn ka jituwoe ubak ajaran Droeneueh.
140 Janji Droeneueh kong dan jeuet teupeucaya, ulôn lumpah cinta ubak janji nyan.
141 Ulôn nyoe ureuëng ubit dan hina teuma, teuma ajaran Droeneueh teutab hana lôn kalon ban.
142 Keuadelan Droeneueh meuteun keu siumu masa, dan huköm Droeneueh sabe beuna.
143 Ulôn rhot bak meularat dan keusosahan, teuma keuputosan Droeneueh keubit mangat that até lôn.
144 Peuratoran Droeneueh sabe ade; neubri kheueh keu ulôn peungeurtian mangat ulôn jeuet udeb.
145 Deungon sigeunab até ulôn meulakée ubak Droeneueh; neujaweueb kheueh ulôn, ya TUHAN, ulôn keuneuk taát ubak peurintah Droeneueh.
146 Ulôn meulakée ubak Droeneueh; peuseulamat kheueh ulôn, ulôn keuneuk mumat ubak peuratoran Droeneueh.
147 Banseuboh buta ka ulôn beudôh dan laju lôn lakée tulông; ulôn meuharab ubak janji Droeneueh.
148 Simalam beungoh ulôn meujaga, keu lôn pike sira lôn tanung ajaran Droeneueh.
149 Deungoe kheueh ulôn sabab geunaséh Droeneueh, ya TUHAN, neujaga kheueh udeb lôn sabab keuadelan Droeneueh.
150 Ureuëng nyang tiyeub ulôn ka tô that, awaknyan deungon meukeusut jeuhet dan hana jipakoe ubak huköm Droeneueh.
151 Teuma Droeneueh tô, ya TUHAN, peue mantong peurintah Droeneueh na kheueh beuna.
152 Phon yoh ilée ka ulôn teupeue keuhai ajaran-ajaran Droeneueh, bahwa atranyan ka Droeneueh peuteutab keu siumu masa.
153 Neungieng kheueh peundeuritaan ulôn dan neupeuseulamat kheueh ulôn, sabab ulôn hana lôn kalon ban keuhai huköm Droeneueh.
154 Neubila kheueh peukara ulôn dan neupeubeubaih kheueh ulôn; peuseulamat kheueh ulôn nyang sisuai deungon janji Droeneueh.
155 Ureuëng jeuhet hana teupeuseulamat, sabab hana jitaát ubak keuteutapan Droeneueh.
156 Keubit raya that gaséh sayang Droeneueh, ya TUHAN, peuseulamat kheueh ulôn nyang sisuai deungon keuadelan Droeneueh.
157 Jai that ureuëng jimeumusoh dan jitiyeub ulôn, ya TUHAN, teuma ulôn teutab hana lôn kalon ban ubak peuratoran Droeneueh.
158 Ulôn banci ubak peungkhianat-peungkhianat nyan, sabab awaknyan hana jiseutôt ubak ajaran Droeneueh.
159 Neukalon kheueh pakriban ulôn cinta ubak peurintah Droeneueh, ya TUHAN, neupeuseulamat kheueh ulôn sabab gaséh sayang Droeneueh.
160 Banmandum feureuman Droeneueh na kheueh beutôi, ya TUHAN, peue mantong huköm Droeneueh nyang ade teutab keu siumu masa.
161 Ureuëng-ureuëng nyang meukuasa jipeu crok ulôn hana alasan, teuma nyang ulôn takot na kheueh ubak huköm Droeneueh.
162 Sabab janji Droeneueh ulôn teutab dalam geumbira, lagée sidroe-droe ureuëng nyang meuteumé hareuta.
163 Banmandum nyang sulet ulôn banci, teuma meunyoe huköm Droeneueh teutab ulôn cinta.
164 Hana putôh-putôh lôn peugah syukoe ubak Droeneueh, ya TUHAN, sabab huköm Droeneueh nyang ade dan beuna.
165 Ureuëng nyang jicinta ubak huköm Droneueh, ureuëng nyan teutab aman dan teuntram, hana nyang hase linteung ureuëng nyang cinta ubak huköm Droeneueh nyan.
166 Ulôn kupreh keuseulamatan nibak Droeneueh, ya TUHAN, Peue mantong peurintah Droeneueh teutab ulôn keureuja.
167 Ulôn teutab taát ubak peue mantong peuratoran Droeneueh, dan lôn cintanyan deungon sigeunab até.
168 Ulôn teutab patuh ubak peurintah dan nyang Droeneueh tunyok, ya TUHAN, sabab Droeneueh nyang kalon peue mantong nyang ulôn peubuet.
169 Seumoga nyang ulôn lakée nyoe sampoe ubak Droeneueh, ya TUHAN lôn, neubri kheueh ubak ulôn peungeurtian, nyang sisuai deungon keuheundak Droeneueh.
170 Bah kheueh peue nyang ulôn lakée nyoe trok ubak Droeneueh, peuseulamat kheueh ulôn nyang sisuai deungon janji Droeneueh.
171 Ulôn keuneuk pujoe Droeneueh mantong, ya TUHAN, sabab Droeneueh nyang peurunoe ulôn keuhai keuteutapan Droeneueh.
172 Ulôn keuneuk meuca-e keuhai janji Droeneueh, ya TUHAN, sabab peue mantong nyang Droeneueh peurintah na kheueh ade.
173 Seumoga Droeneueh sabe rila neutulông ulôn, sabab ulôn ka lôn piléh teutab lôn seutôt ubak peuratoran Droeneueh.
174 Até ulôn meuharabkan keuseulamatan nibak Droeneueh, ya TUHAN, huköm Droeneueh keubit that mangat até ulôn.
175 Bah kheueh ulôn udeb, mangat ulôn hase lôn pujoe Droeneueh, ya TUHAN lôn, seumoga deungon keuputosan-keuputosan Droeneueh nyan hase teutulông ulôn.
176 Ulôn ka sisat lagée bubiri nyang gadôh, ya TUHAN, dan neuteuka kheueh, neumita kheueh hamba Droeneueh nyoe, sabab ulôn hana lôn kalon ban peue mantong peurintah-peurintah Droeneueh.


Chapter 120

1 Lagu ziarah. TUHAN, dan Gobnyan laju geujaweueb ulôn.
2 Ya TUHAN, neupeuseulamat kheueh ulôn, nibak ureuëng sulet dan teumipée.
3 Hai ureuëng teumipée, peue nyang geupeubuet lé Po teu Allah ateueh gata? Deungon peue Gobnyan geuhuköm gata?
4 Deungon aneuk panah nyang tajam atra sidroe ureuëng peujuang, deungon ngeu apui nyang hu meubura!
5 Cilaka kheueh ulôn sabab harôh ulôn udeb meusajan gata; hana beda jih lagée tinggai di Mesekh, atawa lamkawan ureuëng Kedar.
6 Ka treb that ulôn tinggai lamkawan ureuëng nyang hana galak keudamé.
7 Meunyoe ulôn peugah haba keuhai damé, awaknyan jimeuheut keu muprang.


Chapter 121

1 Lagu ziarah.
2 Nyang tulông ulôn teuka nibak TUHAN nyang peujeuet langét ngon bumoe.
3 Gobnyan hana geupeubiyeu gata reubah, nyang lindong gata sabe geujaga.
4 Sikeubit jih, nyang lindong Israel nyan hántom na teungéut mata.
5 TUHAN geujaga gata, Gobnyan sabe na dibinéh gata geukeumiet gata.
6 Gata hana sakét sabab mata uroe óh watée uroe peungeuh, atawa sabab lé buleuen óh watée malam.
7 TUHAN geulindong gata nibak mara bahya, Gobnyan geukeumiet gata mangat udeb gata seulamat.
8 Gobnyan geulindong gata watée gata teuka dan tajak, phon saát nyoe dan siumu masa.


Chapter 122

1 Lagu ziarah Nabi Daud. ulôn, "Jak geutanyoe tajak u Baét TUHAN!"
2 Jinoenyoe kamoe katrok bak babah pintoe geureubang banda Yerusalem.
3 Yerusalem nyang teupeudong sibagoe banda teususon rapi dan ceudah.
4 Nibak banda nyoe kheueh sukée-sukée bansa jiteuka, sukée-sukée bansa piléhan TUHAN, keu meusyukoe ubak Gobnyan nyang sisuai deungon peurintah Gobnyan.
5 Disinoe kheueh raja-raja keuturonan Nabi Daud geupeusidang rakyat gobnyan.
6 Meudoá kheueh keu keuseujahtraan Yerusalem: "Seumoga banmandum ureuëng nyang cinta keu gata seujahteura.
7 Seumoga na damé didalam wilayah gata, dan teuntram didalam kuta-kuta gata."
8 Deumi kawöm keurabat dan sahabat ulôn ulôn peugah, "Seumoga gata seujahteura!"
9 Deumi Baét TUHAN, Po teu Allah geutanyoe, ulôn meudoá mangat gata mubahgia.


Chapter 123

1 Lagu ziarah.
2 Lagée sidroe namiet jimeugantung ubak amphon jih, dan sidroe namiet ureuëng inong ubak po cut jih, meunan kheueh kamoe preh Droeneueh, ya TUHAN Allah kamoe, sampoe Droeneueh neugaséh keu kamoe.
3 Neugaséh kheueh kamoe, ya TUHAN, neugaséh kheueh keu kamoe, sabab kamoe ka lumpah that le keunong hina.
4 Kaseb kamoe nyoe ji peuhina ngon jipeujayéh lé ureuëng-ureuëng kaya, dan ji cemoh lé ureuëng-ureuëng sombong.


Chapter 124

1 Lagu ziarah Nabi Daud. TUHAN hana geudong blaih geutanyoe? Hai Israel, neujaweueb kheueh lagée nyoe:
2 "Meunyoe TUHAN hana geudong blaih geutanyoe bak watée geutanyoe jiprang lé lawan,
3 dan geutanyoe ka jiuét udeb-udeb, lé beungéh awaknyan nyang hana teukira.
4 Dan geutanyoe ka jipeuhanyöt lé ié raya, dan teugeunang didalam ié;
5 dan geutanyoe ka habéh maté sabab ngob dalam geulumbang ié nyang raya meuputa-puta."
6 Jak geutanyoe ta peugah syukoe ubak TUHAN, sabab Gobnyan hana geupeubiyeu geutanyoe jipeuhabéh lé lawan.
7 Geutanyoe lagée cicém nyang lheueh lam taron peumburu, tarön nyan ka putôh, dan geutanyoe pi lheueh!
8 Nyang tulông geutanyoe teuka jih nibak TUHAN nyang cebta langét ngon bumoe.


Chapter 125

1 Lagu ziarah.
2 Lagée gunong-gunong nyang jilindong Yerusalem, meunan kheueh TUHAN geulindong umat Gobnyan phon saátnyoe sampoe siumu masa.
3 Ureuëng jeuhet hana siumu masa jimat kuasa ditanoh pusaka ureuëng jujoe, mangat ureuëng nyang jroh hana jiseutôt jipeubuet jeuhet.
4 Ya TUHAN, neupeuget kheueh nyang jroh keu ureuëng nyang jroh, keu ureuëng nyang jujoe até.
5 Teuma ureuëng nyang jipeubuet jeuhet bah kheueh teutab geuhuköm lé TUHAN meusajan ngon jeuhet jih.


Chapter 126

1 Lagu ziarah. Yerusalem, geutanyoe lagée ureuëng meulumpo!
2 Geutanyoe hana putôh-putôh takém sira meuca-e geumbira sampoe di bansa-bansa nyang laén jipeugah, "TUHAN ka geupeubuet hai-hai nyang lumpah hebat keu awaknyan!"
3 Bit TUHAN ka geupeubuet hai-hai nyang paleng hebat keu geutanyoe! Sababnyan kheueh geutanyoe meusuka cita ngon meugeumbira!
4 Ya TUHAN, neupeubeubaih kheueh keuadaan kamoe, lagée krueng nyang tho meu ié lom óh watée ujeuen teuka.
5 Seumoga ureuëng teumabu sira jimo, jimupot deungon surak geumbira.
6 Ureuëng jijak tabu bijéh lam blang jih, sira jimo meutreb-treb roe ié mata. Bak watée jiwoe jimeuca-e deungon nyanyoe geumbira sira jipuwoe hase blang nyang jipot teuma.


Chapter 127

1 Lagu Nabi Sulaiman. geutanyoe, sia-sia kheueh mandum peungawai jimeujaga.
2 Sia-sia mantong meubuet brat teujak mita nafeukah, beudôh éh banseuboh buta dan watée jak éh ka malam jula; sabab TUHAN geuseudia keu ureuëng nyang geugaséh, seudang awaknyan mantong jiéh.
3 Aneuëk-aneuëk manyak na kheueh hareuta nyang geubri lé Po teu Allah, nyang sikeubit jih, awaknyan na kheueh anugeurah Gobnyan.
4 Aneuëk-aneuëk agam nyang meuteumé yoh mantong muda saban lagée aneuk panah nyang na nibak jaroe keusatria.
5 Mubahgia kheueh ureuëng nyang jikeubah peuseudiaan panah-panah nyang lagée nyan! Jihnyan hana teupeutaloe, watée jihadab musoh di kantô peungadelan.


Chapter 128

1 Lagu ziarah.
2 Gata tamakheun nibak hase nyang gata keureuja, udeb makmu dan seujahteura.
3 Peurumoh gata lagée bak anggô nyang subô didalam rumoh gata. Aneuëk-aneuëk gata lagée tarôk bak zaiton di seukeulileng meuja gata.
4 Meunan kheueh TUHAN geubri beureukat keu ureuëng nyang taqwa.
5 Seumoga di Sion TUHAN geubri beureukat u ateueh gata. Seumoga gata takalon Yerusalem nyang makmu sipanyang udeb gata!
6 Seumoga gata panyang umu, dan neukalon aneuëk cucoe gata!


Chapter 129

1 Lagu ziarah. musoh gata phon yoh masa muda gata.
2 "Ulôn ji iénanya lé musoh yoh phon muda lôn, teuma awaknyan hana hase jipeutaloe ulôn;
3 awaknyan jipeuluka nyang lumpah lhok nibak rueng ulôn, lagée ureuëng meu ué jipeuget alue-alue nyang panyang didalam blang.
4 Teuma TUHAN nyang ade ka geubalaih ulôn nibak cok keunamiet."
5 Bah kheueh soemantong ureuëng nyang banci ubak Sion geupeutaloe dan geuheuntam sampoe jisurot.
6 Bah kheueh awaknyan lagée naleueng di ateueh bubông nyang bagaih that tho sigohlom timoh;
7 hana ureuëng nyang jitem jak koh naleueng nyan, atawa ji ikat dalam beureukah.
8 Ureuëng nyang liwat disinan hana jipeugah, "Seumoga gata geubri beureukat lé TUHAN, kamoe peubeureukat gata dalam nan TUHAN."


Chapter 130

1 Lagu ziarah.
2 TUHAN, neudeungoe kheueh seruan ulôn, neupeurati kheueh nyang ulôn lakée ubak Droeneueh.
3 Meunyoe Droeneueh hana neupiôh teutab neu ingat desya kamoe, ya TUHAN, soe kheueh nyang hase meuteun?
4 Teuma Droeneueh neutem peuamphon, jeuet manusia jitem taqwa.
5 Di ulôn kupreh TUHAN tulông, janji Gobnyan nyang ulôn harabkan.
6 Ulôn rindu ubak TUHAN, leubeh nibak sidroe ureuëng meurondo nyang rindu ubak mata uroe beungoh.
7 Meuharab kheueh ubak TUHAN, hai umat Gobnyan, sabab Gobnyan teutab geugaséh ubak gata, dan sabe lam siab geupeuseulamat gata.
8 Gobnyan geupeubeubaih geutanyoe nibak peue mantong keusalahan geutanyoe.


Chapter 131

1 Lagu ziarah Nabi Daud.
2 Nyang sikeubit jih, até ulôn teunang dan teuntram; lagée aneuëk manyak nyang ban habéh jiphiék mom, teungéut teunang dalam pangkée ma jih, lagée nyan kheueh teunang jih até ulôn.
3 Meuharab kheueh ubak TUHAN, hai umat Gobnyan, phon saát nyoe dan siumu masa.


Chapter 132

1 Lagu ziarah.
2 Bék tuwoe seumayang ubak Droeneueh, ya TUHAN, keu kaôy gobnyan ubak Droeneueh Nyang Mahateuga, Allah Nabi Yakub.
3 Kheun Gobnyan, "Ulôn hana lôn meureuhat di rumoh ulôn atawa lôn teungéut ateueh teumpat éh ulôn,
5 sigohlom lôn peuna baét keu Po teu Allah Nabi Yakub, teumpat tinggai keu TUHAN Nyang Mahateuga."
6 Di Betlehem na ta deungoe keuhai Peuto Peujanjian, óh lheuehnyan laju meurumpok di padang Yaar.
7 Jak kheueh geutanyoe tajak u teumpat tinggai TUHAN, dan ta seumah Gobnyan dikeue takhta Geuh.
8 Teuka kheueh dan tinggai kheueh di Baét Droeneueh, ya TUHAN, meusajan deungon Peuto Peujanjian, lambang kuasa Droeneueh.
9 Seumoga umat Droeneueh meusurak geumbira, dan banmandum teungku imeum Droeneueh sabe udeb meunurot nyang Droeneueh lakée.
10 Deumi Nabi Daud, hamba Droeneueh, bék kheueh neutulak raja nyang Droeneueh piléh.
11 TUHAN ka geumeusumpah ubak Nabi Daud; Gobnyan hana geu iengkeue ubak janji Gobnyan. Feureuman Gobnyan, "Sidroe lamkawan aneuëk gata Ulôn baiát jeuet keuraja mangat jimat peurintah geunantoe gata.
12 Meunyoe aneuëk-aneuëk gata seutia ubak peujanjian Ulôn, dan jitaát ubak peurintah-peurintah Ulôn, dan keu siumu masa keuturonan awaknyan jigantoe gata sibagoe raja."
13 Sabab TUHAN ka geupiléh Sion; Gobnyan geulakée nyan keu teumpat tinggai Gobnyan.
14 Geupeugah lé Gobnyan, "Disinoe kheueh teumpat tinggai Ulôn keu siumu masa, Ulôn keuneuk mat peurintah nibak teumpat nyoe.
15 Peue mantong nyang jipeureulée Ulôn bri deungon meulimpah, ureuëng-ureuëng jihnyan nyang gasien Ulôn bri makheun sampoe án troe.
16 Teungku-teungku imeum jih jipeuleumah keuseulamatan nibak ulôn; umat jihnyan meuca-e dan meusurak geumbira.
17 Disinoe sidroe lam keuturonan Nabi Daud Lôn baiát jeuet keuraja; peumeurintah jihnyan Ulôn peukong.
18 Keurajeuen jih sabe dalam seujahteura, teuma banmandum musoh-musoh jihnyan meuteumé malée."


Chapter 133

1 Lagu ziarah Nabi Daud.
2 Nyan na kheueh lagée minyéuk mangat bée nyang meuhái yuem nyang teurô u ateueh ulée Nabi Harun, laju jitron ubak takue bajée gobnyan.
3 Atawa lagée iémbon di Gunong Hermon, nyang jitron u bukét-bukét Sion. Disinan kheueh TUHAN geupeutron beureukat Gobnyan, keu udeb siumu masa.


Chapter 134

1 Lagu ziarah. TUHAN, banmandum nyang meubakti di Baét Gobnyan watée malam.
2 Beuôt jaroe gata u ateueh teumpat suci, dan pujoe kheueh TUHAN!
3 Seumoga nibak Sion gata geubri beureukat lé TUHAN, Allah nyang cebta langét dan bumoe!


Chapter 135

1 Pujoe kheueh TUHAN!
2 nyang meubakti di Baét TUHAN di teumpat tinggai Allah geutanyoe.
3 Pujoe kheueh TUHAN, sabab Gobnyan gét, dan pujoe kheueh nan Gobnyan, sabab Gobnyan murah até.
4 Gobnyan geupiléh Nabi Yakub keu droe Gobnyan, dan umat Israel geupeujeuet keu hak milék Gobnyan.
5 Sabab ulôn teupeue bahwa TUHAN nyan na kheueh keubit that raya, Gobnyan agong leubeh nibak dewa peue nyang na.
6 Gobnyan hase geupeubuet peue mantong nyang geugalak, di langét dan di ateueh bumoe, di laôt dan di samudra nyang lhok.
7 Nibak ujong bumoe Gobnyan geupeutron awan, dan geupeujeuet laju kilat keu geupeutron ujeuen. Óh lheuehnyan laju geupeurintah ubak angén mangat jiteubiet nibak teumpat jih teugumpôi.
8 Di Nanggroe Meusé Gobnyan geupoh maté banmandum aneuëk nyang tuha bah kheueh nyan aneuëk manusia meunan cit deungon aneuëk beulatang.
9 Disinan le that geupeubuet buet nyang ajaéb dan tanda keu geuhuköm raja meunan cit banmandum peugawée raja.
10 Gobnyan geupeubinasa bansa nyang le, dan geupoh maté raja-raja peukasa:
11 Sihon raja Amori dan Og raja Basan, dan banmandum raja di nanggroe Kanaan.
12 Laju nanggroe awaknyan geujok jeuet keuhak milék Israel, umat Gobnyan.
13 Ya TUHAN, Droeneueh teutab jijak peugah, dan nan Droeneueh ji ingat lé banmandum keuturonan,
14 sabab Droeneueh neubri keuadelan ubak umat Droeneueh, dan neugaséh banmandum hamba Droeneueh.
15 Beurala awaknyan teupeuget nibak méuh dan pirak, nyang jipeuget lé jaroe manusia.
16 Bak awaknyan na babah, teuma babah jihnyan hana hase jipeugah haba, na mata, teuma matanyan hana hase jikeumalon.
17 Bak awaknyan na ôn punyueng, teuma geulinyueng jihnyan hana hase meudeungoe, dan nibak lam babah jihnyan hana hase jiteubiet nafáh.
18 Seumoga meunan kheueh naseb ureuëng-ureuëng nyang jipeubuet nyan, dan nyang peucaya ubak jihnyan.
19 Pujoe kheueh TUHAN, hai umat Israel, pujoe kheueh Gobnyan, hai teungku-teungku imeum Allah!
20 Pujoe kheueh TUHAN, hai ureuëng-ureuëng Lewi, dan pujoe kheueh Gobnyan, hai gata banmandum nyang taqwa.
21 Pujoe kheueh TUHAN di Sion, di Yerusalem teumpat tinggai Gobnyan.


Chapter 136

1 Meusyukoe kheueh ubak TUHAN, sabab Gobnyan gét; geunaséh Gobnyan keukai dan abadi.
2 Meusyukoe kheueh ubak Allah Nyang Mahamanyang; geunaséh Gobnyan keukai dan abadi.
3 Meusyukoe kheueh ubak TUHAN Nyang Maharayeuk; geunaséh Gobnyan keukai dan abadi.
4 Teuma Gobnyan nyang peugét buet-buet nyang ajaéb nyang raya luwa biasa; geunaséh Gobnyan keukai dan abadi.
5 Deungon keubijaksanaan Gobnyan geupeujeuet langét; geunaséh Gobnyan keukai dan abadi.
6 Gobnyan nyang leueng bumoe di ateueh ié; geunaséh Gobnyan keukai dan abadi.
7 Gobnyan nyang peujeuet beunda-beunda nyang peutrang langét; geunaséh Gobnyan keukai dan abadi;
8 mata uroe keu jikuasa uroe; geunaséh Gobnyan keukai dan abadi;
9 geupeujeuet buleuen ngon bintang keu jikuasa malam, geunaséh Gobnyan keukai dan abadi.
10 Geupoh maté aneuëk-aneuëk tuha bansa Meusé; geunaséh Gobnyan keukai dan abadi.
11 Israel geupeuteubiet uluwa nibak nanggroe Meusé; geunaséh Gobnyan keukai dan abadi.
12 deungon jaroe nyang teuga dan peukasa; geunaséh Gobnyan keukai dan abadi.
13 Laôt Geulagah geuprah dua; geunaséh Gobnyan keukai dan abadi;
14 Israel umat Gobnyan geuba u meurandeh laôt; geunaséh Gobnyan keukai dan abadi.
15 Teuma raja nanggroe Meusé dan sipa-i jih nyan habéh geupeukaram u dalam geunaséh Gobnyan keukai dan abadi.
16 Geupimpén umat Gobnyan geujak rot padang pasi; geunaséh Gobnyan keukai dan abadi.
17 Geupeutaloe banmandum raja-raja nyang peukasa; geunaséh Gobnyan keukai dan abadi;
18 geupoh maté banmandum raja-raja nyang meusyeuhu; geunaséh Gobnyan keukai dan abadi;
19 Sihon, raja Amori; geunaséh Gobnyan keukai dan abadi;
20 dan Og, raja Basan; geunaséh Gobnyan keukai dan abadi.
21 Nanggroe awaknyan laju geucok geubri laju ubak umat Gobnyan; geunaséh Gobnyan keukai dan abadi;
22 jeuet keuhak milék Israel hamba Gobnyan; geunaséh Gobnyan keukai dan abadi.
23 Gobnyan hana geutuwoe ubak geutanyoe watée geutanyoe geupeutaloe; geunaséh Gobnyan keukai dan abadi.
24 Geupeubeubaih geutanyoe nibak jaroe musoh; geunaséh Gobnyan keukai dan abadi.
25 Tieb-tieb makhluk udeb geubri makheun; geunaséh Gobnyan keukai dan abadi.
26 Meusyukoe kheueh ubak Allah nyang mat kuasa ateueh langét; geunaséh Gobnyan keukai dan abadi.


Chapter 137

1 Nibak binéh-binéh krueng Babel kamoe duek-duek dan kamoe mo meuba-e watée teuingat keu Sion.
2 Nibak bak-bak kayée gandarusa di nanggroe nyan kamoe gantung keucapi kamoe.
3 Ureuëng-ureuëng nyang teun kamoe jiyue kamoe meuca-e keu awaknyan. Dan ureuëng-ureuëng nyang teugom dan seupet kamoe jiyue bak kamoe meuca-e lagu nyang geumbira, "Meuca-e kheueh keu kamoe lagu-lagu nibak Sion!"
4 Mungken di nanggroe aséng kamoe meuca-e keu TUHAN?
5 Bah kheueh ulôn hana hase le meuca-e meunyoe ulôn tuwoe keu droeneueh, Yerusalem!
6 Bah kheueh ulôn hana hase le meuca-e meunyoe ulôn tuwoe bak droeneueh dan hana lôn peujeuet droeneueh keuharok ulôn!
7 Ya TUHAN, neuingat kheueh ubak peundeuritaan ureuëng Edom watée Yerusalem teupeuhanco. Awaknyan jipeugah, "Peuhanco laju, peuhanco laju sampoe habéh rata!"
8 Hai Babel, gata teupeubinasa! Mubahgia kheueh ureuëng nyang jibalaih keu gata keujeuhetan nyang gata peubuet ateueh kamoe.
9 Mubahgia kheueh ureuëng nyang jicok aneuëk-aneuëk manyak gata dan laju jitiek u bukét batée!


Chapter 138

1 Nibak Nabi Daud. Droeneueh, deungon sipeunoh até lôn. Dikeue banmandum dewata ulôn meunyanyoe puja ngon pujoe ubak Droeneueh.
2 Ulôn teukui ngon lôn peukeu ubak Baét Droeneueh nyang suci sira lôn pujoe nan Droneueh, sabab Droeneueh seutia dan sabe neugaséh kamoe. Droeneueh leubeh peunténg ubak janji nyang ka Droneueh peugét nibak peundapat gob keuhai Droeneueh.
3 Watée ulôn teumawök Droeneueh, laju neujaweueb, peukong kheueh até lôn mangat lôn jeuet keu ureuëng nyang beurani.
4 Banmandum raja nyang na ateueh bumoe nyoe jipujoe Droeneueh, ya TUHAN, sabab awaknyan ka jideungoe janji Droeneueh.
5 Awaknyan meunyanyoe keuhai buet Droeneueh dan keuhai keuagongan Droeneueh nyang raya.
6 Droeneueh lumpah mulia, ya TUHAN lôn, teuma nyang hina teutab Droeneueh peulara, ureuëng sombong hana hase jipeusöm droe nibak Droeneueh.
7 Watée ulôn rhot bak apoh apah, Droeneueh nyang peuteun udeb ulôn. Droeneueh nyang lawan musoh lôn nyang teungoh beungéh dan Droeneueh peuseulamat ulôn ngon kuasa Droeneueh.
8 Droeneueh neupeupeunoh janji ubak ulôn; bék kheueh neupiôh neukalon ateueh umat Droeneueh.


Chapter 139

1 Keu teupimpén kor. Zabur Nabi Daud. neuturi keu ulôn.
2 Droeneueh neuteupeue peue mantong nyang ulôn peubuet; rot jiôh Droeneueh ka neutuóh pikeran ulôn.
3 Droeneueh deuh neungieng ulôn, bah kheueh watée ulôn meukeureuja meunan cit watée ulôn meureuhat, Droeneueh neuteupeue peue mantong nyang ulôn peubuet.
4 Dan sigohlom ulôn peugah haba, Droeneueh neuteupeue peue nyang keuneuk ulôn peugah.
5 Droeneueh neukeulileng ulôn rot meubagoe peunjuru, dan Droeneueh lindong ulôn deungon kuasa Droeneueh.
6 Lumpah that lhok nibak ulôn iéleumé Droeneueh nyan, hana hase jimat lé pikeran ulôn.
7 Hoe kheueh nyang hase ulôn jak mangat hase teupeusi nibak kuasa Droeneueh? Dan hoe teuma hase ulôn plueng mangat jiôh nibak Droeneueh?
8 Meunyoe ulangét nyang ulôn ék, Droeneueh pih ka na disinan, meunyoe ulôn éh didalam mawöt, disinan pih na Droeneueh.
9 Meunyoe ulôn po rot ufúk timu atawa lôn tinggai seungab di ujong barat nyang paleng jiôh,
10 disinan pih Droeneueh na neutulông ulôn; disinan cit teuma jaroe Droeneueh neubimbéng ulôn.
11 Meunyoe ulôn lakée mangat seupôt jitôb jikeuleubong ulôn, dan trang nyang na di seukeulileng ulôn jeuet keu malam,
12 teuma nyang seupôt nyan hana seupôt nibak Droeneueh; malam nyan trang lagée uroe, dan seupôt nyang lagée trang.
13 Droeneueh neucebta tieb-tieb bagian nibak tuboh ulôn, dan neubantuek ulôn didalam pruet ma lôn.
14 Ulôn lôn pujoe Droeneueh sabab ulôn luwa biasa! Peue mantong nyang Droeneueh peubuet keubit ajaéb dan meungagomkan, ulôn biet-biet insaf.
15 Watée tuleueng-tuleueng ulôn teupeujeuet, deungon teuato teukarang óh get dalam pluet ma ulôn, seudangkan ulôn timoh disinan seucara rahsia, ulôn hana teusöm nibak Droeneueh.
16 Droeneueh deuh neungieng ulôn watée lôn mantong na dalam pluet ma; banmandum nyan ka teucatet didalam kitab Droeneueh; uroe-uroe jihpi ka teupeuteuntée sigohlom sapeue pi teupeuphon.
17 Padub na sulet jih pikeran Droeneueh nibak ulôn, ya Allah, dan padub na le jeumeulah jih!
18 Meunyoe lôn itong, leubeh le nibak ano nyang na di panté; meunyoe ulôn beudôh nibak teumpat éh, mantong na watée ulôn pike keu Droeneueh.
19 Bah kheueh ureuëng jeuhet Droeneueh peuhanco, ya Po teu Allah, neupeujiôh kheueh ureuëng peurô darah nyan nibak ulôn!
20 Awaknyan jipeugah nyang jeuhet keuhai Droeneueh, dan jimeusumpah peuleusu keuhai banda-banda Droeneueh.
21 Ya TUHAN, ulôn banci keu ureuëng nyang banci Droeneueh, até ulôn tunu keu ureuëng nyang lawan Droeneueh!
22 Awaknyan lôn banci luwa biasa, dan ulôn anggab sibagoe musoh nyang paleng raya.
23 Neuseulidek kheueh ulôn, ya Allah, neuseunom kheueh lam até lôn, neu ujoe kheueh ulôn dan neuteupeue kheueh pikeran ulôn.
24 Neungieng kheueh aleh na nyang jeuhet nibak tuboh lôn, dan neubimbéng kheueh ulôn bak jalan nyang keukai.


Chapter 140

1 Keu teupimpén kor. Zabur Nabi Daud.
2 Neupeulheueh kheueh ulôn nibak ureuëng jeuhet, ya TUHAN, neujaga kheueh ulôn nibak ureuëng nyang jipeubuet buet jeuhet ateueh ulôn.
3 Awaknyan ka jireuncana buet nyang jeuhet didalam até, dan tieb-tieb uroe sabe jipeuna dakwa ngon dakwe.
4 Lidah awaknyan lagée lidah uleue nyang meubisa, tutoe haba awaknyan lagée bisa uleue maté iku.
5 Ya TUHAN, neulindong kheueh ulôn nibak kuasa ureuëng jeuhet, neujaga kheueh ulôn nibak ureuëng nyang jikeuneuk peubuet buet nyang jeuhet dan keuneuk jipeu rhot ulôn.
6 Ureuëng nyang cungkak deungon cara seungab-seungab ka jipasang taron jikeuneuk carueh ulôn, dan jireuntang jareng keuneuk drob ulôn. Ban sipanyang jalan awaknyan ka jiteun jeunieb guna keuneuk jijeubak ulôn.
7 Ya TUHAN, ulôn peugah: Droeneueh kheueh Allah ulôn, neudeungoe kheueh doá dan nyang ulôn lakée.
8 TUHAN, Allah ulôn, nyang peuseulamat ulôn nyang paleng teuga, Droeneueh ka neulindong ulôn watée dimideuen prang.
9 Bék kheueh neupeukabui peue nyang jilakée lé ureuëng jeuhet, ya TUHAN, dan bék kheueh neupeubiyeu reuncana awaknyan meuhase.
10 Bék neupeubiyeu musoh ulôn hase meunang; bah kheueh tutoe haba nyang jeuhet nyang awaknyan peugah keunong ateueh awaknyan nyang ba fiteunah u ateueh ulôn.
11 Bah kheueh awaknyan teugeulawa deungon ngéue apui, dan teugeulawa u dalam uruek mawöt, sampoe ka hana hase jiteubiet le.
12 Bah kheueh nyang jipeubuet keukeurasan rhot lé mala peutaka, dan bék kheueh neupeubiyeu ureuëng ba fiteunah jeuhet keu ureuëng tinggai di ateueh bumoe.
13 Ulôn lôn teupeue Droeneueh neubri keuadelan ubak ureuëng nyang teuteugon, dan neubila peukara keu ureuëng gasien.
14 Ureuëng nyang jujoe jipujoe Droeneueh, ya TUHAN, awaknyan tinggai teutab meusapat deungon Droeneueh.


Chapter 141

1 Zabur Nabi Daud. Droeneueh.
2 Neuteurimong kheueh doá ulôn sibagoe peuseumahan dupa, dan jaroe ulôn nyang meureuntang sibagoe keureubeuen malam.
3 Ya TUHAN, neujaga kheueh babah ulôn dan neuawasi kheueh bibi ulôn.
4 Neupeujiôh kheueh ulôn nibak niet dalam até keu teupeubuet jeuhet, Bék neupeubiyeu ulôn meugabong deungon ureuëng nyang doraka dan meusajan-sajan pajoh bu dalam khanuri awaknyan.
5 Meunyoe na sidroe ureuëng jroh jisapa ulôn, dan deungon jujoe ji heuntam ulôn, nyan na kheueh lagée minyéuk nyang paleng gét nibak ulôn. Seumoga hainyan hana ulôn tulak, sabab hana lôn piôh ulôn meudoá keu lôn lawan awaknyan.
6 Meunyoe nyang mat kuasa nibak awaknyan teugeulawa u dalam reuleueng-reuleueng batée, awaknyan jiaku bahwa tutoe haba ulôn na kheueh beuna.
7 Tuleueng-tuleueng geutanyoe geuhambo bak binéh jrat lagée sineuk batée nyang geupeuhanco ateueh tanoh.
8 Teuma ulôn teutab meuharab ubak Droeneueh, ya TUHAN Allah ulôn, bék neupeubiyeu ulôn nyoe maté, sabab ulôn meulindong ubak Droeneueh.
9 Lindong kheueh ulôn nibak taron nyang ka meucarueh bak takue lôn, dan nibak peurangkab banmandum ureuëng jeuhet nyan.
10 Bah kheueh awaknyan reubah u dalam taron jih keudroe, dan seumoga ulôn teutab seulamat.


Chapter 142

1 Lagu peungajaran Nabi Daud, bak watée gobnyan didalam guha.
2 Deungon su nyang nyareng ulôn meuhôi ubak TUHAN; deungon su nyang meulantak ulôn meulakée bantuan Gobnyan.
3 Dikeue Gobnyan ulôn apoh apah; ulôn peugah laju peue mantong keusosahan lôn ubak Gobnyan.
4 Watée ulôn karab putôh asa, Droeneueh ya TUHAN neuteupeue peue nyang harôh ulôn peubuet. Bak rot nyang harôh ulôn jak, musoh deungon seungab-seungab ka jiteun taron keu ulôn.
5 Watée ulôn paleng u sampeng, deuh lôn kalon hana bantuan keu ulôn. Hana nyang lindong ulôn, atawa nyang jitem pako ubak droe ulôn.
6 Ulôn meulakée ubak Droeneueh, ya TUHAN, Droeneueh kheueh teumpat ulôn meulindong, Droeneueh mantong nyang ulôn peureulée lam udeb nyoe.
7 Neudeungoe kheueh nyang ulôn lakée nyoe, ya TUHAN, sabab ulôn lumpah that seungsara. Neupeuseulamat kheueh ulôn nibak musoh-musoh lôn, sabab awaknyan lumpah that teuga nibak ulôn.
8 Neupeulheueh kheueh ulôn lam glab, ya TUHAN, dan lamkawan umat Droeneueh meusapat ulôn lôn pujoe nan Droeneueh, sabab Droeneueh ka peubuet nyang jroh keu ulôn.


Chapter 143

1 Zabur Nabi Daud.
2 Ulôn nyoe hamba Droeneueh, bék kheueh neupeusidang ulôn, sabab hana ureuëng nyang hana meusalah ubak Droeneueh.
3 Musoh ulôn ka jipeulet dan jipeutaloe ulôn, dan jipeutamong ulôn u dalam glab nyang seupôt buta; sampoe ulôn nyoe ka jeuet lagée ureuëng nyang ka treb that maté.
4 Ulôn ka patah seumangat, ya TUHAN, até ulôn ka bingong that.
5 Watée lôn ingat uroe-uroe nyang ka leupah; watée lôn pike banmandum buet Droeneueh, ulôn tanueng banmandum karya Droeneueh.
6 Ulôn meudoá ubak Droeneueh deungon jaroe nyang teuleueng meureuntang; lagée tanoh nyang ka tho kreng, jiwa ulôn rindu that ubak Droeneueh.
7 Neujaweueb kheueh ulôn deungon sigra, ya TUHAN, sabab ulôn ka putôh asa. Bék kheueh neumusöm nibak ulôn, mangat ulôn hana lagée ureuëng laén nyang ka jitron u álam mawöt.
8 Tieb-tieb beungoh neupeu ingat kheueh ulôn keu geunaséh Droeneueh, sabab ubak Droeneueh kheueh ulôn meuharab. Neutunyok kheueh bak ulôn rot nyang ulôn jak, sabab ubak Droeneueh kheueh ulôn meudoá.
9 Ulôn teuka keuneuk jak meulindong ubak Droeneueh, ya TUHAN, neupeulheueh kheueh ulôn nibak musoh-musoh lôn.
10 Neupeurunoe kheueh ulôn jeuet lôn peubuet meulakée Droeneueh, sabab Droeneueh kheueh Allah ulôn. Droeneueh gét that até, ya TUHAN, dan neubimbéng ulôn bak rot nyang rata.
11 Peuseulamat kheueh ulôn nyang sisuai deungon janji Droeneueh, ya TUHAN, deumi keuget Droeneueh, neupeulheueh kheueh ulôn nibak meularat.
12 Deumi geunaséh Droeneueh neupeuhanco kheueh banmandum musoh ulôn, dan neupeubinasa kheueh banmandum nyang teugon ulôn, sabab ulôn nyoe na kheueh hamba Droeneueh.


Chapter 144

1-2 Nibak Nabi Daud.- Gobnyan kheueh nyang tulông dan nyang bila ulôn, nyang peuseulamat ulôn di teumpat ulôn meupayong. Gobnyan peulindong ulôn, dan teumpat ulôn peuaséng droe, bansa-bansa nyang laén geupeutaklok ubak ulôn.
3 TUHAN, peu kheueh manusia, sampoe Droeneueh kalon jihnyan? Soe kheueh jihnyan sampoe Droeneueh neupakoe jihnyan?
4 Manusia nyan lagée angén prôh, dan lagée bubayang nyang liwat, meunan kheueh udeb jih.
5 Ya TUHAN, neupeuhah kheueh langét Droeneueh dan neutron kheueh, neucukéeh kheueh gunong-gunong jeuet meuasab.
6 Neupeulheueh kheueh kilat Droeneueh jeuet musoh habéh crebre. dan neutimbak kheueh aneuk panah Droeneueh mangat awaknyan yo meukot-kot.
7 Neu sunyueng kheueh jaroe Droeneueh lam syeuruga, dan neupeulheueh kheueh ulôn nibak ié raya. Neupeuseulamat kheueh ulôn nibak kuasa ureuëng aséng
8 nyang harok bak haba sulet dan galak bak meusulet, dan ji meusumpah peuleusu.
9 Ulôn lôn meuca-e lagu nyang barô keu Droeneueh, ya Allah, dan lôn peutek keucapi sira meuca-e.
10 Droeneueh nyang bri meunang keu raja-raja, dan neupeubeubaih Nabi Daud hamba Droeneueh.
11 Neupeusie kheueh ulôn nibak mata peudeueng ureuëng zalem; dan neupeuseulamat kheueh ulôn nibak kuasa ureuëng aséng nyang galak meusulet dan teumipée, dan jimeusumpah peuleusu.
12 Seumoga aneuëk-aneuëk agam geutanyoe yoh masa muda jih lagée sinaman nyang teungoh rayeuk. Seumoga aneuëk-aneuëk inong geutanyoe lagée taméh jeulita, nyang teuhias di jeueb-jeueb taméh meuligoe.
13 Seumoga gupok-gupok geutanyoe peunoh meuasoe deungon sigala bago hase bumoe. Seumoga bubiri-bubiri nyang na di padang geutanyoe jitôh aneuëk meuploh-ploh ribée.
14 Seumoga leumô-leumô geutanyoe meukeumang le dan hana nyang gadôh atawa maté. Seumoga hana teudeungoe le su ureuëng kliek nyang pilu ngon seungsara nibak jalan-jalan banda geutanyoe.
15 Mubahgia kheueh bansa nyang lagée nyan, dan mubahgia kheueh umat nyang Allah jih TUHAN!


Chapter 145

1 Pujoe nibak Nabi Daud. lôn, dan lôn pujoe Droeneueh siumu masa.
2 Tieb-tieb uroe ulôn keuneuk meusyukoe ubak Droeneueh, dan lôn peumulia Droeneueh siumu masa.
3 Sabab TUHAN agong dan lumpah teupujoe, keubeusaran Droeneueh hana soe ék seunom.
4 Tron meutron ureuëng laén teutab jipujoe peue nyang Droeneueh peubuet dan jijak peusampoe keubeusaran Droeneueh.
5 Awaknyan jijak peugah keuagongan dan keumuliaan Droeneueh, karya Droeneueh nyang luwa biasa ulôn tanung.
6 Awaknyan jijak peusampoe buet-buet Droeneueh nyang dahsyat, keubeusaran Droeneueh ulôn peumaklum.
7 Ureuëng laén jimeututoe keuhai keuget Droeneueh dan jimeuca-e keuhai Droeneueh nyang ade.
8 TUHAN nyan peungaséh dan peunyayang, treb jiteuka beungéh dan sabe na geunaséh.
9 Gobnyan murah até ubak soe mantong, dan geugaséh banmandum ubak peue mantong nyang ka geucebta.
10 Banmandum nyang Droeneueh cebta jipujoe Droeneueh, ya TUHAN, banmandum umat Droeneueh meusyukoe ubak Droeneueh.
11 Awaknyan jiagong keukuasaan Droeneueh sibagoe Raja, dan jicalitra kupeukasaan Droeneueh,
12 mangat banmandum ureuëng jiteupeue buet Droeneueh nyang raya, dan keurajeuen Droeneueh nyang mulia dan seumarak.
13 Peumeurintahan Droeneueh teutab siumu masa, keukuasaan Droeneueh teutab meuteun tron meutron.
14 TUHAN geutulông ureuëng nyang dalam keusosahan, Gobnyan geupeudong ureuëng nyang teutukui.
15 Banmandum makhluk udeb jimeuharab ubak Droeneueh; Droeneueh jok keu awaknyan peunajoh óh trok bak watée.
16 Droeneueh nyang peupeunoh banmandum peue nyang jipeureulée lé awaknyan, sampoe awaknyan hana kureueng bahpi meusapeue pi.
17 TUHAN ade dalam peue mantong nyang geupeubuet dan peunoh gaséh dalam peue mantong nyang geukeureuja.
18 Gobnyan tô that ubak ureuëng nyang jimeuhôi Gobnyan, dan jimeulakée ubak Gobnyan deungon até nyang jujoe.
19 Gobnyan geupeu mangat até keu ureuëng-ureuëng nyang taqwa; Gobnyan geudeungoe awaknyan meuhôi dan geupeuseulamat awaknyan.
20 Gobnyan geulindong soemantong ureuëng nyang cinta keu Gobnyan, teuma ureuëng jeuhet banmandum geupeubinasa.
21 Ulôn keuneuk pujoe TUHAN sipanyang watée, seumoga banmandum makhluk Gobnyan jipujoe nan TUHAN keu siumu masa.


Chapter 146

1 Pujoe kheueh TUHAN! Hai jiwa ulôn, pujoe kheueh TUHAN!
2 Ulôn keuneuk pujoe TUHAN simantong ulôn udeb dan meuca-e keu Po teu Allah simantong ulôn na.
3 Bék kheueh meuharab ubak peunguasa, ubak ureuëng nyang hana hase jipeuseulamat manusia.
4 Meunyoe awaknyan maté, awaknyan jigisa jeuet keutanoh; bak uroenyan cit teuma peue mantong reuncana awaknyan habéh teusampôh sapan sapa.
5 Mubahgia kheueh ureuëng nyang jipeubangga TUHAN Allah jih mantong, dan na TUHAN Nabi Yakub nibak droe jih sibagoe peunulông jihnyan.
6 Gobnyan nyang peujeuet langét dan bumoe, laôt dan banmandum asoe jih; Gobnyan teutab seutia siumu masa.
7 Gobnyan geubila hak ureuëng nyang keunong teugon, dan geubri makheun keu ureuëng deuk.
8 dan geupeu jeuet ureuëng buta hase jikeumalon. Gobnyan geupeudong ureuëng nyang reubah, dan geugaséh keu ureuëng nyang jujoe.
9 Gobnyan geulindong ureuëng-ureuëng aséng; Gobnyan geutulông inong balée dan aneuëk yatem ngon muntui, teuma reuncana ureuëng jeuhet teutab geupeugagal.
10 TUHAN nyan na kheueh Raja keu siumu masa. Hai Sion, Po teu Allah gata meukuasa siumu masa dan sigala abad.


Chapter 147

1 Pujoe kheueh TUHAN! sabab jroh that teupujoe Gobnyan, dan keubit galak keu teumeuca-e lagu seumujoe keu Gobnyan!
2 TUHAN geupeupuléh Yerusalem; ureuëng-ureuëng nyang ka teuböih geupeuwoe lom teuma.
3 Gobnyan geupeupuléh ureuëng nyang ka patah até, dan geubalot bubena luka-luka awaknyan.
4 Gobnyan nyang peuteuntée padubna jeumeulah bintang di langét ijo, dan maséng-maséng bintang nyan Gobnyan boh nan.
5 Keubit raya dan hebat TUHAN geutanyoe, keubijaksanaan Gobnyan hana teuhingga.
6 Gobnyan nyang peudong ureuëng nyang keunong teugon, teuma ureuëng jeuhet Gobnyan nyang tiek ateueh tanoh.
7 Meuca-e kheueh deungon lagu puja ngon pujoe ubak TUHAN, peumeuén kheueh keucapi keu Allah geutanyoe.
8 Gobnyan kheueh nyang lheueng awan di langét manyang; Gobnyan nyang peutron ujeuen ateueh bumoe, dan nyang peutimoh naleueng jitimoh di ateueh bukét.
9 Gobnyan nyang bri uempeuen keu beulatang, dan keu aneuëk cicém gagak nyang meuciéb-ciéb jimeuhôi ma.
10 Keusukaan TUHAN bukon kheueh bak guda nyang teuga; dan bukon cit teuma ubak peujuang nyang gagah beurani.
11 TUHAN harok ubak ureuëng nyang taqwa, dan ubak ureuëng nyang teutab meuharab geunaséh ubak Gobnyan.
12 Pujoe kheueh TUHAN, hai Yerusalem! Pujoe kheueh Allah gata, hai Sion!
13 Sabab Gobnyan nyang peukong pintoe-pintoe geureubang gata, dan nyang bri beureukat keu peunduduek gata.
14 Gobnyan nyang jaga daerah gata jeuet teutab aman, dan nyang peutroe gata deungon boh gandom nyang paleng gét.
15 Gobnyan nyang bri peurintah ubak bumoe, dan haba Gobnyan bagaih that jipeubuet laju.
16 Gobnyan nyang peutron salju nyang putéh lagée gapeueh, dan nyang peuhambo iémbon kreueh lagée abée.
17 Gobnyan nyang peutron ujeuen éeh lagée batée keurikée; hana ureuëng nyang ék jiteun nibak leupie ngon sijuek nyan.
18 Dan ateueh peurintah Gobnyan éeh nyan pi caye; laju geuyueb angén, dan ié pih laju ji ile.
19 Gobnyan nyang peusampoe peusan Geuh ubak umat Gobnyan, keuputosan dan huköm Gobnyan keu umat nyang ka geupiléh.
20 Hai lagéenyan hana geupeubuet ubak bansa-bansa laén, awaknyan hana jituri ubak huköm-huköm Gobnyan.


Chapter 148

1 Pujoe kheueh TUHAN! pujoe kheueh Gobnyan!
2 Pujoe kheueh TUHAN hai banmandum malaikat Gobnyan, dan pujoe kheueh Gobnyan, hai banmandum tantra syeuruga!
3 Pujoe kheueh TUHAN, hai mata uroe ngon buleuen, dan pujoe kheueh Gobnyan, hai bintang-bintang nyang hu ble-ble cahya!
4 Pujoe kheueh Gobnyan, hai langét nyang paleng manyang, dan pujoe kheueh Gobnyan, hai ié nyang na di ateueh langét!
5 Bah kheueh awaknyan banmandum jipujoe nan TUHAN, sabab banmandum geupeujeuet ateueh peurintah Gobnyan.
6 Gobnyan nyang peuteuntée teumpat awaknyan maséng-maséng, keuteutapan Gobnyan meulaku keu siumu masa.
7 Pujoe kheueh TUHAN, hai banmandum asoe bumoe, hai naga-naga laôt dan banmandum samudra raya;
8 hai kilat dan ujeuen éeh, salju dan awan, angén kancang nyang jiturot peurintah TUHAN!
9 Pujoe kheueh Gobnyan, hai bukét-bukét dan gunong-gunong, bak kayée nyang muboh meubagoe rupa dan banmandum gle;
10 banmandum beulatang peulara dan beulatang kleut, banmandum beulatang meulata dan cicém-cicém!
11 Pujoe kheueh TUHAN, hai raja-raja dan meubagoe bansa, ureuëng bansawan dan banmandum ureuëng mat kuasa;
12 banmandum aneuëk muda ngon aneuëk dara, ureuëng tuha dan ureuëng muda.
13 Bah kheueh awaknyan banmandum jipujoe nan TUHAN, sabab nan Gobnyan leubeh agong nibak banmandum nan; keuagongan Gobnyan ék teuatasi langét ngon bumoe.
14 Gobnyan ka geupeukong bansa Geuh, sampoe Gobnyan jipujoe-pujoe lé umat Geuh, Israel umat nyang paleng geusayang.


Chapter 149

1 Pujoe kheueh TUHAN!
2 Meusuka cita kheueh hai Israel, sabab Peucebta gata; meugeumbira kheueh, hai meududuek Sion sabab Raja gata!
3 Pujoe kheueh nan Gobnyan deungon meubagoe likak dan tari, dan pujoe kheueh Gobnyan deungon keucapi dan rapa-i!
4 TUHAN geutung keu umat Gobnyan; Gobnyan geubri meunang keu ureuëng nyang miyueb até.
5 Bah kheueh umat Allah meusuka ria sabab keujayaan Gobnyan, dan meuca-e geumbira simalam suntok.
6 Bah kheueh awaknyan jipujoe Po teu Allah deungon su nyang meutaga, sira jimat peudeueng nyang ka teu asah
7 keu geubalaih bansa-bansa, dan geuhuköm sukée-sukée bansa;
8 keu geubeuleunggu raja-raja, dan geubôh ranté ubak bubena peunguasa awaknyan;
9 keu teuhuköm bansa-bansa ateueh peurintah Allah. Nyan kheueh keumeunangan umat nyang geugaséh.


Chapter 150

1 Pujoe kheueh TUHAN!
2 Pujoe kheueh Gobnyan sabab buet-buet Gobnyan nyang peukasa. Pujoe kheueh Gobnyan sabab keuagongan Gobnyan nyang raya.
3 Pujoe kheueh Gobnyan deungon su beureuguih, pujoe kheueh Gobnyan deungon gambus dan keucapi!
4 Pujoe kheueh Gobnyan deungon rapa-i dan likak ngon tari, dan pujoe kheueh Gobnyan deungon keucapi dan suleng.
5 Pujoe kheueh Gobnyan deungon ceracap nyang su meudeunteng, dan pujoe kheueh Gobnyan deungon su canang nyang meudeuntang.
6 Bah kheueh banmandum makhluk udeb jipujoe TUHAN.