Chapter 1

1 Kitab nyoe meuasoe peusan-peusan keuhai Yehuda dan Yerusalem nyang geupeugah lé Po teu Allah ubak Nabi Yesaya, aneuëk Amos, bak watée Uzia, Yotam, Ahas dan Hizkia geumat peurintah di Yehuda.
2 Deungoe kheueh hai langét, peurati kheueh hai bumoe! TUHAN meufeureuman, "Aneuëk-aneuëk nyang ka Ulôn peulara jibeurontak teuhadab Ulôn.
3 Leumô jituri nibak ureuëng po jih, keuleudée jituri ubak teumpat peunajoh nyang ka geuseudia keujih lé amphon droe jih. Teuma umat Ulôn Israel hana jituri; awaknyan hana jimuphom."
4 Cilaka kheueh gata bansa nyang meudesya, ureuëng-ureuëng nyang beujat dan jeuhet! Gata ka meusireuk lé desya-desya gata. Gata ka tatulak TUHAN dan tapeulikot Po teu Allah Nyang Mahasuci nyang harôh gata seumah.
5 Pakon gata hana tapiôh bak neumeutuleh lageh? Peu kheueh gatatem teuhuköm leubeh brat lom? Ulée gata ka peunoh deungon cabok-cabok, até dan pikeran gata sakét.
6 Phon bak ulée sampoe trok ubak tapak gaki hana nyang seuhat nibak tuboh gata. Gata ka peunoh deungon keumong-keumong, luhok nyang meujeuen-jeuen dan cabok-cabok nyang luka. Luka-luka gatanyan gohlom teupeugléh atawa teubalot, meunan cit hana teuma teupeu ubat deungon minyéuk.
7 Nanggroe gata ka teupeubinasa; banda-banda nyang na di nanggroe gata ka habéh tutông kareuna teutot. Dikeue mata gata ureuëng aséng jicok tanoh gata dan jipeuhanco peue-peue nyang na.
8 Yerusalem mantong nyang tinggai, teuma seubagoe banda nyang ka teukeubok dan hana meudaya, lagée jambo di lampôh anggô atawa gubuk di lampôh timon.
9 Seuandai jih TUHAN Nyang Mahakuasa hana geupeukeunong meupadub droe nibak geutanyoe, geutanyoe banmandum ka habéh binasa, lagée Sodom dan Gomora.
10 Yerusalem bubena peumimpén dan bansa gata ka jeuet lagée ureuëng Sodom dan Gomora. Deungoe kheueh peue nyang geufeureuman lé TUHAN ubak gata; peurati kheueh peue nyang geupeuruno lé Po teu Allah geutanyoe.
11 TUHAN meufeureuman, "Neusangka Ulôn nyoe galak that ubak banmandum keureubeuen nyang hana putôh-putôh tapeuseumah keu Ulôn? Ulôn bosan deungon bubiri-bubiri keureubeuen teutot gata dan gapah aneuëk leumô gata. Darah leumô agam, bubiri dan kaméng hana Lôn galak.
12 Soe nyang yue gata taba banmandum peuseumahan nyan bak watée gata tateuka meuiébadat ubak Ulôn? Soe teuma nyang yue gata meuwot-wot di Baét Suci Lôn?
13 Peucuma mantong taba peuseumahan gata nyan. Ulôn muak deungon bhée jih. Ulôn banci dan hán ék Lônteun Lôn kalon gata peuna uroe raya Buleuen Barô, uroe-uroe Sabat dan uroe-uroe raya meunan cit nibak rapat-rapat keuagamaan. Banmandum nyan gata noda deungon desya-desya gata dan ka jeuet keubeuban nibak Ulôn; Ulôn ka hék that Ulôn tanggong nyan.
15 Meunyoe gata tabeuôt jaroe gata keu gata meudoá, doá gata nyan hana Lôntem deungoe, sabab deungon jaroe gatanyan gata ka le that tapoh maté gob.
16 Tajak rhah kheueh droe gata nyan sampoe gleh. Tapeupiôh banmandum buet nyang jeuhet nyang gata peubuet nyan. Dan békle tapeubuet jeuhet,
17 meurunoe kheueh tapeubuet nyang jroh. Peudong kheueh keuadelan dan peugleh kheueh peunindasan; tabri kheueh ubak aneuëk yatém ngon meuntui hak droe jih dan tabila kheueh peukara inong balée."
18 TUHAN meufeureuman, "Jak tapeubéeréeh peukara nyoe. Bahpi gata mirah leumbayong sabab desya-desya gata, gata teuma Ulôn rhah putéh gleh lagée gapeueh. Bahpi desya-desya gata le dan brat, gata teuma Lôn peu amphon deungon peunoh.
19 Meunyoe gata tatem taát ubak Ulôn, gata teuma tarasa banmandum nyang jroh-jroh nyang na jipeuhase lé nanggroe gata.
20 Teuma meunyoe gata talawan Ulôn, gata maté dimideuen prang. Ulôn, TUHAN, ka Lôn peugah haba."
21 Banda nyang yoh masa ilée seutia, bak saát nyoe ka lagée inong jeuhet! Ilée banmandum peunduduek jih ade dan jujoe, teuma bak saát nyoe ka jiduek lé tukang-tukang peumaté gob.
22 Yerusalem, masa ilée gata lagée pirak, teuma bak saát nyoe ka hana meuyuem le. Masa ilée gata lagée anggô nyang lazat, teuma saát nyoe na kheueh ié nyang le.
23 Bubena peumimpén gata peubeurontak dan gaki jaroe pancuri; awaknyan galak jiteurimong hadiah dan péng sogok. Awaknyan hanajitem bila yatém ngon meuntui di kantô peungadelan; hánjitem deungoe inong-inong balée nyang jak meungadu.
24 Sabab nyan TUHAN Nyang Mahakuasa, Po teu Allah Israel meufeureuman: "Hai, musoh-musoh Lôn, Ulôn teuma Lôn balah dam ubak gata, sampoe hana tapeususah le Ulôn.
25 Ulôn cok tindakan ateueh gata. Lagée ureuëng nyang asah logam, gata Ulôn asah; peue mantong nyang kuto teuma Ulôn tiek nyang na meuleukek nibak gata.
26 Keu gata Ulôn joklom hakém-hakém dan peunaseuhat lagée yoh masa ilée. Dan Yerusalem geuboh nan banda nyang ade dan seutia."
27 TUHAN ade, dan Gobnyan geupeuseulamat Yerusalem dan ureuëng-ureuëng nyang meunyeusai.
28 Teuma ureuëng-ureuëng nyang meudesya nyang jibeurontak teuhadab Gobnyan geupeubinasa, dan banmandum nyang tinggai Gobnyan geupeumuseunah.
29 Awaknyan meuteumé malée sabab jiseumah bak-bak kayée dan jipeukhusos lampôh-lampôh keu dewa-dewa.
30 Awaknyan teuma jeuet lagée bak kayée raya nyang layée ôn, dan lagée lampôh nyang hana ile ié.
31 Lagée jeurami tutông nyang keunong meuek bungöng apui, meunan cit deungon ureuëng-ureuëng meukuasa teuma geupeubinasa lé buet-buet jeuhet awaknyan keudroe, dan hana nyang hase jipeupiôh keuhancoran nyan.


Chapter 2

1 Nyoe kheueh peusan Po teu Allah keuhai Yehuda dan Yerusalem nyang geuteurimong lé Nabi Yesaya bin Amos:
2 Bak uroe-uroe nyang teuma teuka bukét teumpat Baét TUHAN manyang meulambong dan teudong cot di ateueh gunong-gunong dan bukét-bukét. Banmandum bansa meuron-ron jijak keunan,
3 awaknyan banmandum jipeugah, "Jak geutanyoe taék u Bukét TUHAN, u baét Allah Israel. Gobnyan teuma geupeurunoe keu geutanyoe peue nyang harôh geutanyoe peubuet. Geutanyoe ta seutôt jalan Gobnyan, sabab ajaran TUHAN teuka nibak Yerusalem, Gobnyan geumeututoe nibak Sion."
4 Gobnyan geupeuhakém lamkawan bansa-bansa, dan geupeuputôh peukara lamkawan sukée-sukée bansa. langai, dan kapak geupeujeuet keu sikin meugunteng. Bansa-bansa hana le saleng jipeu phon seurang, dan hana teuma meusiab-siab keuneuk jak muprang.
5 Hai, keuturonan Nabi Yakub, jak geutanyoe tajak didalam trang TUHAN!
6 Ya Allah, Droeneueh ka neutinggai umat Droeneueh, keuturonan Nabi Yakub! Sabab dipat mantong di nanggroe nyoe ureuëng laén jingui iéleumé gaéb nyang meuasai di timu dan di Filistin. Bubena ureuëng-ureuëng ka jicuntoh adat istiadat ureuëng aséng.
7 Nanggroe jihnyan peunoh deungon pirak dan méuh, dan hareuta beunda gobnyan hana teukira. Guda gobnyan lumpah that jai, dan geuritan gobnyan hana teu itong jeumeulah jih.
8 Jeueb-jeueb sago na patong beurala, dan awaknyan jiseumah patong-patong nyang jipeugét keudroe.
9 Soe mantong ureuëng teuma geuhina dan geupeumiyueb yuem droe ureuëng nyan. Bék neupeu amphon awaknyan, ya TUHAN!
10 Awaknyan teuma jitamong u dalam guha-guha di bukét kareueng, atawa jikueh uruek didalam tanoh mangat teuhinda nibak meureuka TUHAN dan nibak kuasa Gobnyan nyang mulia.
11 Ureuëng sombong geupeuhina dan ureuëng angkoh geupeutundok. Teuma TUHAN keudroe nyang geupeu agong.
12 Nibak uroenyan TUHAN Nyang Mahakuasa teuma geupeuhina banmandum ureuëng nyang peumanyang droe dan geuhuköm ureuëng nyang sombong meunan cit deungon nyang angkuh.
13 Bak-bak kayée ceumara nyang manyang di Libanon dan banmandum bak kayée raya di Basan geupeubinasa.
14 Gunong-gunong dan bukét-bukét nyang meusyeuhu geupeurata ngon tanoh.
15 Meunara-meunara nyang manyang dan bintéh-bintéh beuton kuta geureuloh rata.
16 Kapai-kapai nyang paleng raya dan paleng lagak geupeukaram.
17 Ureuëng sombong teuma geupeuhina, dan ureuëng angkoh geupeutundok teuma. Teuma TUHAN sidroe nyang teupeu mulia.
18 Beurala-beurala teuma gadôh sapan sapa.
19 Bak watée TUHAN geubeudôh dan geuyok-yok bumoe, ureuëng ramé teuma jitamong u dalam guha-guha di bukét-bukét kareueng atawa jijak kueh uruek di dalam tanoh mangat teuhinda nibak meureuka TUHAN dan nibak kuasa Gobnyan nyang mulia. Meunyoe uroe nyan ka trok jiteuka, beurala-beurala pirak dan méuh nyang awaknyan peugöt dan seumah nyan laju jitinggai meunan mantong keu tikoih dan cicém simantong.
22 Nyang kheueh, bék kheueh meuharab ubak manusia nyang fana, sabab jihnyan hana hareuga.


Chapter 3

1 Sikeubit jih, TUHAN Nyang Mahakuasa geucok di Yerusalem dan Yehuda peue mantong peuseudiaan peunajoh dan ié meuneujieb. Meunan cit banmandum ureuëng nyang awaknyan peubangga:
2 dumna pahlawan dan peureute tantra, hakém, nabi, tukang ngieng kutika dan tukang bri naseuhat,
3 peuwira, ureuëng patot-patot dan ahli peutimang nanggroe, tukang sihe dan tukang ngieng kutika.
4 TUHAN teuma geu angkat aneuëk-aneuëk muda jeuet keu peumimpén rakyat, dan awaknyan jimat peurintah ban galak droe.
5 Ureuëng-ureuëng sabe keudroe-droe saleng jitindéeh. Ureuëng muda jianggab remeh ubak ureuëng tuha, dan aneuëk miet ji anggab remeh ubak ureuëng rayeuk.
6 Bak masanyan di ureuëng teuma jitunyok sidroe nibak kawöm syedara jih dan jipeugah ubak ureuëng nyan, "Cuma gata nyang na peukayan nyang pantaih; sabab nyan jeuet kheueh keu peumimpén kamoe bak jamén nyang peunoh keususahan nyoe."
7 Teuma gobnyan teuma jijaweueb, "Ulôn kon tabib! Meunan cit nibak ulôn hana peunajoh dan peukayan. Bék neuyue ulôn jeuet keu peumimpén bansa!"
8 Beutôi, Yerusalem ka rhot! Yehuda ka reuloh! Sabab banmandum tutoe haba dan buet awaknyan jilawan TUHAN dan jilawan keukuasaan Gobnyan.
9 Sikeueb awaknyan nyang sombong deuh teukalon keujeuhetan droe jih. Trang-trang awaknyan meudesya lagée Sodom yoh masa ilée. Cilaka kheueh awaknyan! Awaknyan jipeuteuka cilaka ateueh droe jih keudroe.
10 TUHAN meufeureuman, "Tajak peusampoe kheueh ubak ureuëng nyang taát ubak Ulôn bahwa awaknyan bahgia dan seulamat. Awaknyan jiteumé rasa hase jeureh payah droe jih keudroe.
11 Teuma cilaka kheueh ureuëng jeuhet! Ateueh awaknyan teuma geupeusaneut lagée awaknyan ka jipeulaku ateueh ureuëng laén.
12 Umat Ulôn teuma jitindéeh lé tukang pajoh riba dan ji prah lé lintah darat. umat Ulôn jipeusisat lé peumimpén-peumimpén droe jih sampoe hana jiteupeue le rot nyang harôh awaknyan jak."
13 TUHAN ka siab keu geugugat dan adili umat Gobnyan.
14 TUHAN meutindak sibagoe hakém ateueh peumimpén umat Gobnyan. Nyoe kheueh tudohan TUHAN keu awaknyan: "Gata nyoe kheueh nyang reupah hase lampôh-lampôh anggô; rumoh gata ka peunoh deungon barang nyang gata reupah nibak ureuëng-ureuëng gasien.
15 Pakon gata tindéeh umat Ulôn dan talakée deungon paksa hareuta ureuëng gasien? Ulôn TUHAN Nyang Mahamanyang dan Mahakuasa ka Ulôn peugah haba."
16 TUHAN meufeureuman, "Sombong that inong-inong Yerusalem! Awaknyan geunit, galak meuén mata dan watée jijak deungon angkoh. Langkah jih jipeugöt-peugöt, dan meuklieng-klieng su gleueng-gleueng gaki jih.
17 Teuma Ulôn huköm awaknyan; ulée awaknyan Lôn peupeunoh deungon kude dan harôh teucuko."
18 Teuma teuka watée jih TUHAN geucok nibak inong-inong Yerusalem peue mantong piasan nyang awaknyan peubangga: ikat ulée, gleueng gaki, dan talo takue,
19 gleueng jaroe, jilbab,
20 tudong ulée, jimat-jimat nyang na bak jaroe dan bak keuieng,
21 euncien dan keurabu idong,
22 peukayan khanuri nyang lagak-lagak, gaon mantel, dompet,
23 bajée lipéh, peukayan lineun, ikat tajue dan keurudong panyang.
24 Jinoenyoe awaknyan jingui wangi wangian, eunteuk awaknyan meubhée khéueb ngon khiéng. Talo keuieng awaknyan nyang halôh teuma teugantoe deungon talo tambang nyang gasa. Ulée awaknyan nyang meuôk gagah teuma teucuko habéh. Peukayan awaknyan nyang gagah-gagah teuma teugantoe deungon nyang brök dan tuha-tuha. Jinoenyoe awaknyan lagak ngon ceudah; eunteuk hi awaknyan ka brök sabab ka teuboh cab.
25 Ureuëng agam, meunan cit nyang beuhe ngon teuga-teuga, teuma maté dimideuen prang.
26 Di babah-babah pintoe geureubang banda ureuëng ramé teuma meukabong sira meuratok ngon jimo ba-e, dan banda nyan keudroe jeuet lagée ureuëng inong nyang ka teupeulon nyang teuduek nibak tanoh.


Chapter 4

1 Bak watée nyan na tujoh droe ureuëng inong teuma jimat sidroe ureuëng agam sira jipeugah, "Neupeu idhin kheueh keukamoe meungaku bahwa droeneueh nyoe sibagoe lakoe kamoe, mangat kamoe hana meutanggong ayeb ngon malée kareuna hana kamoe meukawen. Peunajoh dan peukayan jeuet kamoe tanggong keudroe."
2 Teuma trok watée jih TUHAN geupeujeuet tieb-tieb seunaman dan bak kayée jitimoh sampoe rayeuk dan indah di nanggroe nyoe. Nibak uroenyan ureuëng Israel nyang seulamat meurasa geumbira dan bangga sabab le hase panen jihnyan.
3 Tieb-tieb ureuëng nyang na teutinggai di Yerusalem, ureuëng-ureuëng nyang geupiléh lé Po teu Allah keu teupeuseulamat, ureuëng nyan teuma teupeugah suci.
4 Deungon kuasa Gobnyan, TUHAN geupeusidang dan geupeumurni umat Gobnyan. Gobnyan geupeugléh Yerusalem nibak darah ureuëng-ureuëng nyang teupoh di banda nyan.
5 Laju di ateueh Bukét Sion dan banmandum ureuëng nyang meusapat disinan TUHAN laju geupeujeuet awan yoh watée uroe, meunan cit deungon asab dan hu trang óh watée malam. Po teu Allah keudroe deungon kuasa Gobnyan teuma geupeupayong bansaboh banda nyan.
6 Gobnyan teuma geupeupayong nibak mata uroe criet óh watée uroe, dan geupeujeuet nyan teumpat meuceu watée ujeuen raya dan angén badée.


Chapter 5

1 Deungoe kheueh ca-e ulôn nyoe keuhai lampôh anggô rakan ulôn. Sahabat ulôn na lampôh anggô nibak sineuron bukét nyang subo.
2 Gobnyan keudroe nyang cangkoi tanoh jih dan nyang böh mandum batée-batée. Laju geupula anggô piléhan geupeudong teuma meunara ronda. Geukueh laju saboh uruek teumpat prah ié anggô gobnyan, laju gobnyan geupreh boh anggô nyan masak, teuma hase jih boh anggô nyang masam.
3 Teuma jinoenyoe rakan Ulôn nyan geupeugah, "Gata banmandum, peududuek Yerusalem dan Yehuda, peusidang kheueh lampôh anggô Lôn ngon Ulôn.
4 Peue lom nyang harôh Ulôn peubuet teuma gohlom Ulôn peubuet keu lampôh anggô Lôn nyan? Pakon boh masam nyang ji muboh, dan bukon boh nyang gét lagée nyang Ulôn harabkan?
5 Meunoe Lôn peubuet ateueh lampôh anggô Lôn nyan: Pageue nyang na sikeulileng lampôh nyan Ulôn lot, bintéh beuton nyang peupayong nyan Ulôn reuloh, laju Ulôn peubiyeu beulatang bueh jijak peuhanco dan jigilo-gilo.
6 Ulôn teuma Lôn peubiyeu jitimoh bak kayée kleut. Bak anggô nyang na disinan hana Ulôn gunteng, dan hana teuma Ulôn böh naleueng. Dan Ulôn kalon banmantong jiseubée lé seumak meuduro dan naleueng, meunan cit awan-awan Ulôn tam jipeutron ujeuen u ateueh nyan."
7 Sabab lampôh anggô TUHAN Nyang Mahakuasa na kheueh umat Israel, dan ureuëng-ureuëng Yehuda na kheueh bak anggô nyang geupula. Nibak awaknyan Gobnyan geumeuharab keuadelan, teuma nyang na na kheueh keulaleman. Gobnyan meuharab awaknyan jipeudong keubeunaran, teuma nyang na na kheueh jikliek jilakée keuadelan.
8 Cilaka kheueh gata nyang bloe rumoh-rumoh dan nyang seurobot ladang-ladang keu tatamoh atra milék gata! Hana treb le habéh kheueh teumpat keu ureuëng laén dan gata kheueh nyang na tinggai di nanggroe nyan.
9 Ulôn deungoe TUHAN Nyang Mahakuasa meusumpah, "Rumoh-rumoh nyang raya dan lagak-lagak nyoe banmandum Lôn peusöh nibak nyang keumiet rumoh nyan.
10 Hase bumoe gata Lôn peugagal, lampôh anggô nyang luwah na siploh heta teuma jipeuhase siploh arée ié anggô. Sireutoh arée bijéh teuma jipeuhase siploh arée gandom."
11 Cilaka kheueh gata! Phon beungoh sampoe án malam buet gata hana tapiôh tajieb ié kreueh dan sampoe mabök-mabök hana meuteuntée.
12 Nibak khanuri-khanuri nyang gata peuna na teudeungoe su keucapi, su gambus, rapa-i dan su suleng dan minuman anggô. Teuma gata hana tapakoe ubak karya TUHAN dan peue nyang geupeubuet lé Gobnyan.
13 Sabab nyan umat Ulôn nyang hana jiteupeue sapeue teuma teupeuron jijak lagée tawanan. Bubena peumimpén dan rakyat teuma maté sabab deuk dan grah.
14 Guha mawöt ka teuhah luwah-luwah keuneuk jiuét ureuëng-ureuëng meugah di Yerusalem meusajan deungon rakyat nyang ramé-ramé geupeuna khanuri.
15 Soe mantong ureuëng nyan geubri malée, dan nyang sombong geupeuhina.
16 Teuma TUHAN Nyang Mahakuasa geutunyok keubeusaran Gobnyan deungon cara geupeubuet peue nyang beuna. Gobnyan teuma geupeuleumah keusucian Geuhnyan deungon cara geupeusidang bansa Gobnyan.
17 Nibak banda nyang ka reuloh aneuëk-aneuëk kaméng dan domba jimeurot deungon naleueng sibagoe peunajoh jih nyang hana putôh.
18 Cilaka kheueh gata nyang meudesya hana putôh-putôh!
19 Kheun gata, "Bah kheueh TUHAN Allah kudus Israel bagaih meutindak! Bah kheueh Gobnyan geulaksana reuncana Geuhnyan, mangat geutanyoe deuh takalon dan ta teupeue."
20 Cilaka kheueh gata nyang taputa balek nyang jroh dan nyang jeuhet, nyang seupôt dan nyang trang, nyang phet dan nyang maméh!
21 Cilaka kheueh nyang neuanggab droe bijaksana dan carông!
22 Cilaka kheueh gata nyang hebat jieb ié anggô! Gata ceubeueh dan hebat meunyoe harôh neujampu ié kreueh!
23 Teuma mangat meuteumé péng sugok, gata tapeubeubaih ureuëng meusalah, dan gatatam ureuëng nyang hana meusalah mangat meuteumé keuadelan.
24 Gata ka tulak ajaran TUHAN Nyang Mahakuasa, dan tahina peumeurintah Po teu Allah kudus Israel. Sabab nyan, lagée jumpueng dan naleueng tho nyang habéh tutông jipajoh lé apui, meunan cit deungon ukeu-ukeu gata habéh brök, bungöng-bungöng gata habéh tho dan habéh jitampo lé angén.
25 TUHAN beungéh keu bansa Gobnyan. Gobnyan ka siab keuneuk geuhuköm awaknyan. Gunong-gunong teuma meuguncang; manyét-manyét meutabu beba lagée bröh nibak rot raya. Teuma TUHAN mantong geubeungéh dan teutab geuhuköm.
26 TUHAN geuhôi bansa nyang jiôh dan awaknyan teuma teuka deungon bagaih!
27 Awaknyan sabe siab jak lam prang dan hana jiteupeue keu hék. Awaknyan hántom na ji-éh atawa teungéut mata.
28 Aneuk panah gobnyan tajam dan busur gobnyan ka siab keu geutimbak. Gukée guda gobnyan kreueh lagée kreueh batée meu apui, dan ruda geuritan gobnyan meuputa lagée angén badée puteng beuliong.
29 Bubena peureute tantra gobnyan jitaúm lagée su singa nyang banmantong si ruengköm mangsa, laju jipeuplueng, dan hana soe nyang hase jipeuleuh nyan.
30 Bak uroe nyan bansaboh nanggroe Israel teudeungoe su dumpék meuhadu ngaza di mideuen prang lagée su deru di laôt raya. Ngieng kheueh, bansaboh nanggroe nyan seupôt dan peunoh keuseusakan. Trang ka jeuet keu seupôt buta.


Chapter 6

1 Bak thon Raja Uzia meuninggai donya, ulôn deuh lôn ngieng TUHAN. Gobnyan geuduek di ateueh takhta Geuh nyang manyang dan mulia. Jubah Gobnyan teutôb banmandum Baét TUHAN.
2 Ban sikeulileng Gobnyan na teudong makhluk-makhluk nyang hu lagée apui, maséng-maséng na nam boh sayeub. Dua böh sayeub teutôb nibak muka, dan dua teutôb teuma nibak badan jih, dan dua boh sayeub teuk geupeuguna keungon po.
3 Awaknyan jiteumawök sabe keudroe-droe: "Kudus, kudus, kudus. Kudus kheueh TUHAN Nyang Mahakuasa. Bumoe peunoh keuhaderan Gobnyan nyang mulia."
4 Deungon su awaknyan nyang meugeunta sampoe sandi Baét TUHAN meusu meu kruk-kruk, dan Baét TUHAN nyan keudroe ka peunoh deungon asab.
5 Laju ulôn peugah, "Mupalo, hana harapan keu ulôn, sabab babah ulôn ka kuto ngon desya, dan ulôn tinggai di lamkawan bansa nyang lagée nyan cit teuma. Bahpi meunan, deungon mata ulée lôn keudroe ulôn ka lôn ngieng Raja, TUHAN Nyang Mahakuasa!"
6 Óh lheuehnyan saboh lamkawan makhluk nyan laju jipo ubak ulôn sira jiba ngéue apui nyang geucok deungon sineupet nibak miseubah.
7 Laju geupeutupéh bibi ulôn deungon ngéue apui nyan sira geupeugah, "Ngéue apui nyoe ka tupéeh nibak bibi gata. Jinoenyoe salah gata ka geusampôh dan desya ka geupeu amphon lé TUHAN."
8 Óh lheueh nyan laju lôn deungoe su TUHAN nyang geupeugah, "Soe nyang Ulôn utus? Soe nyang jeuet keu ureuëng ba haba geutanyoe?" Laju ulôn jaweueb, "Nyoe kheueh ulôn. Utus kheueh ulôn!"
9 Laju Gobnyan geuyue ubak ulôn beulôn jakba peusan nyoe ubak umat: "Gata teuma sabe tadeungoe, teuma hana muphom. Gata sabe tasimak, teuma hana tateupeue peue nyang teuma teujadi."
10 Laju geupeugah kheueh lé Gobnyan ubak ulôn, "Peutumpôi kheueh pikeran ureuëng-ureuëng nyan, peutulo laju geulinyueng awaknyan dan peubuta laju mata jih nyan, mangat awaknyan bék deuh jikeumalon dan bék teuma jeuet jimeudeungoe atawa jimuphom, laju gisa ubak ulôn dan puléh teuma lagée ban nyang ka."
11 Laju ulôn tanyong, "Padub na treb keuadaan nyoe teuma teujadi, TUHAN?" Jaweueb Gobnyan, "Sampoe banda-banda jeuet keu rungka deungon hana ureuëng keumiet, rumoh-rumoh hana jiduek le, dan tanoh tinggai jeuet keukosong dan maté,
12 peunduduek banda-banda nyan teuma Ulôn use u teumpat nyang jiôh, sampoe banmandum tanoh nyan ka jeuet keuseungue.
13 Anmeunyoe na mantong sidroe nyang tinggai lamkawan siploh droe di nanggroe nyan, ureuëng nyan pih teupeubinasa. Teuma lagée bak beuringén meunyoe teuteubang mantong na tinggai peureudée jih, meunan cit teuma mantong na tinggai sidroe-dua nibak bansa nyan nyang jeuet keu peumulaan umat nyang suci."


Chapter 7

1 Raja Ahas na kheueh aneuëk agam Yotam dan cucoe Uzia. Bak watée gobnyan geumat peurintah ateueh Yehuda, beureutoh kheueh prang. Rezin raja Siria, dan Pekah aneuëk agam Remalya raja Israel, teuka geujak seurang Yerusalem. Teuma awaknyan hana hase geureubot banda nyan.
2 Watée raja Yehuda geudeungoe bahwa pasokan Siria ka jitamong u dalam wilayah Israel sibagoe sikutu, gobnyan dan bansa geuh lumpah teumakot, sampoe awaknyan yo bansalam le lagée bak kayée jipupöt lé angén.
3 TUHAN meufeureuman ubak Nabi Yesaya, "Gata ba kheueh laju aneuëk gata Syear Yasyub dan tajak kheueh laju meurumpok deungon Raja Ahas. Gata teuma meurumpok deungon gobnyan nibak ujong aneuëk lhueng kulam di bagian ateueh, di teumpat ureuëng peugét binatu meukeureuja.
4 Tapeugah laju ubak raja bahwa gobnyan harôh siab siaga dan sabe dalam teunang. Gobnyan bék teumakot atawa bingong. Keuhai beungéh Raja Pekah dan Raja Rezin deungon tantra gobnyan ureuëng-ureuëng Siria hana leubeh meubahya nibak dua bôh puntong tungô apui nyang meuasab.
5 Siria ka jimeukumplot deungon Israel dan raja jih nyan.
6 Awaknyan jikeuneuk jak prang Yehuda dan jipeutakot-takot peunduduek disinan mangat jidong ubak gobnyan, laju geuangkat aneuëk agam Tabel jeuet keuraja.
7 Teuma Ulôn, TUHAN, nyang peugah bahwa hainyan hana teuma teujadi,
8 sabab Siria nyan hana leubeh teuga nibak Damsyik ma banda jih, dan Damsyik hana leubeh teuga nibak Raja Rezin. Seudangkan dalam watée nam ploh limong thon, Israel teuma beukah meukeupeng sampoe hana ék meuteun sibagoe bansa.
9 Israel hana leubeh teuga nibak Samaria, ma banda jih, dan Samaria hana leubeh teuga nibak Raja Pekah. Meunyoe gata hana bit-bit peucaya ubak ulôn, pasti gata hana hase tameuteun."
10 TUHAN geupeusampoe lom peusan nyang laén ubak Ahas:
11 "Lakée kheueh mangat TUHAN Allah gata geubri saboh tanda keu gata, aléh nibak donya ureuëng maté nyang na di miyueb atawa nibak langét nyang na di ateueh."
12 Ahas geujaweueb, "Ulôn hana kutem lôn lakée tanda. Ulôn hana kutem lôn ujo TUHAN."
13 Laju geupeugah lé Nabi Yesaya, "Meunyoe meunan, deungoe kheueh nyoe hai keuturonan Nabi Raja Daud! Peu kheueh hana seb ta ujoe saba manusia, sampoe gata ta ujoe saba Po teu Allah ulôn nyan?
14 Jinoenyoe, TUHAN keudroe teuma geubri tanda keu gata: Sidroe aneuëk dara nyang mume teuma jipeulahé sidroe aneuëk agam nyang geuboh nan Imanuel.
15 Bak watée gobnyan ka seb rayeuk ka hase geucok keuputosan keudroe, nanggroe nyan teuma makmu.
16 Sabab sigohlom saát nyan sampoe, bandua boh nanggroe nyang geumat peurintah lé raja-raja nyang gata takot nyan teuma jitinggai dan söh.
17 TUHAN teuma geupeuteuka raja Asyur, laju gata dan bandum keuluwarga gata meunan cit deungon rakyat gata teuma geurasa uroe-uroe nyang peunoh deungon susah leubeh dahsyat deungon peue nyang ka lheueh gata rasa phon yoh beukah keurajeuen Israel dan Yehuda.
18 Bak masanyan TUHAN geutawök ureuëng Meusé dan ureuëng Asyur, laju bandua boh bansa nyan teuka lagée lalat dan uno nyang meukeureumon nibak leumbah-leumbah nyang lhok dan luengkiek-luengkiek batée kareueng. Awaknyan teuma jitôb banmandum tamah meuduro dan tieb-tieb teumpat nyang meunaleueng.
20 TUHAN geusiwa raja Asyur keu geupeubuet ateueh Israel lagée tukang mupo nyang jimupo habéh banmandum naleueng dan bulée nyang na nibak badan.
21 Bak masa nyan, meunyoe na sidroe ureuëng jipeulara saboh leumô muda dan dua boh kaméng mantong,
22 ié mom nyang jipeuhase lé beulatang peulara nyan leubeh nibak séb keu ureuëng-ureuëng nyang na mantong teusisa di nanggroe nyan. Keubit, awaknyan teuma jijieb ié susu dan madu.
23 Bak watée nyan, lampôh-lampôh anggô nyang maséng-maséng teupula siribée bak anggô dan nyang meuyuem siribée péng pirak, jitimoh lé tamah meuduro.
24 Ureuëng nyang jak keunan harôh jiba busur dan panah, sabab bansaboh nanggroe nyan ka peunoh deungon tamah meuduro.
25 Dan daerah gunong-gunong nyang kanyoe jiuseuha dan jipula seunaman, nyan pi ka peunoh deungon tamah meuduro, sampoe soe mantong hana jijeuet jak u gunong nyan. Tanoh nyan teuma meuguna teumpat jimeurot leumô dan bubiri."


Chapter 8

1 TUHAN meufeureuman ubak ulôn, "Tacok kheueh laju saboh batée tuléh nyang raya, tuléh laju deungon hurof-hurof nyang jeulaih: 'Meureupah nyang Tangkaih, Peurampokan nyang Bagaih'.
2 Tawök kheueh sibagoe saksi dua droe nyang jeuet teupeucaya, awaknyan na kheueh Teungku Imeum Uria dan Zakharia, aneuëk Yeberekhya."
3 Na padub watée óh lheueh nyan peurumoh lôn mume. Bak watée aneuëk kamoe lahé, TUHAN geupeugah ubak ulôn, "Taboh laju nan aneuëk nyan, 'Peureupah nyang Tangkaih, Peurampokan nyang Bagaih.'
4 Sabab, sigohlom aneuëk nyan seb rayeuk keu jipeugah 'Bapak' dan 'Ma', banmandum keukayaan Damsyik dan banmandum barang reupasan Samaria teuma ji angkot ubak raja Asyur."
5 TUHAN meufeureuman lom ubak ulôn,
6 Kheun Gobnyan, "Bansa nyoe jitulak ié nyang lintong nibak aneuk Krueng Syiloah, dan galak deungon Raja Rezin dan Raja Pekah.
7 Sabab nyan Ulôn, TUHAN, teuma Lôn peuteuka raja Asyur dan banmandum tantra gobnyan keu jijak prang Yehuda. Awaknyan teuma maju lagée Krueng Efrat nyang meuluab-luab dan habéh jipeubanjie banmandum tabéng-tabéng jih nyan.
8 Awaknyan jilanda Yehuda lagée ié raya nyang ngöb trok ét takue dan jipeungöb peue-peue nyang na." Po teu Allah na meusajan ngon geutanyoe! Sayeub Gobnyan nyang meureutang geupeupayong nanggroe geutanyoe.
9 Meuhimpon kheueh deungon yo, hai banmandum bansa! Deungoe kheueh hai ujong-ujong bumoe! Meusiab-siab kheueh mangat tajak muprang, teuma deungon até nyang yo! Nyoe, meusiab-siab kheueh, teuma deungon rasa nyang yo!
10 Peugöt kheueh reuncana, teuma banmandum hana meuhase. Cok kheueh keuputosan, teuma hana meuguna, sabab Po teu Allah na meusajan deungon kamoe.
11 Ulôn geukuasa lé TUHAN dan geubri peuingat mangat bék ulôn seutôt jalan nyang jilalu lé bansa nyan. Kheun Gobnyan,
12 "Bék neu anggab kumplotan peue nyang ji anggab lé awaknyan kumplotan, dan bék teumakot ubak hai-hai nyang teuma jitakot lé awaknyan.
13 Ingat kheueh bahwa Ulôn TUHAN Nyang Mahakuasa na kheueh suci. Teuma keu Ulôn kheueh nyang harôh gata takot.
14 Lé sabab Ulôn nyoe keubit that suci, ulôn jeuet keu batée nyang meugantoh nibak rakyat Yehuda dan Israel, dan nyang jeuet keupeurangkab peunduduek Yerusalem.
15 Jai lumpah na ureuëng nyang reubah meugantoh dan teukeunong luka. Awaknyan meusireuk u dalam peurangkab."
16 Gata nyoe, murit-murit ulôn harôh teukeubah dan tapeulara peusan-peusan nyang ka geubri lé Po teu Allah ubak ulôn.
17 TUHAN ka geusöm droe nibak keuturonan Nabi Yakub, umat Gobnyan, teuma ulôn peucaya dan meuharab ubak Gobnyan.
18 Nyoe kheueh ulôn dan aneuëk-aneuëk nyang geubri lé TUHAN ubak ulôn. TUHAN Nyang Mahakuasa nyang mat peurintah di Bukét Sion, geu kirém kamoe jeuet keutanda keu umat Israel.
19 Teuma ureuëng-ureuëng laén geuyue lakée nibak gata peutunyok keu tabib nyang meusáh-sáh ngon babah jih nyang meumet-met. Ureuëng-ureuëng nyan teuma jipeugah, "Bukon kheueh geutanyoe patot talakée peutunyok ubak areuwah-areuwah deumi keupeuntengan ureuëng udeb?"
20 Jaweueb kheueh lagée nyoe, "Deungoe kheueh ajaran TUHAN! Ureuëng nyang hana meututoe deungon ajaran nyan, nibak ureuëng nyan hana teukeubah harapan."
21 Ureuëng-ureuëng nyang malang dan deuk teuma meuwot-wot di nanggroe nyan. Sabab jih nyan deuk, awaknyan beungéh-beungéh sampoe jiseurapa raja dan Po teu Allah droe jih. Ho mantong awaknyan jipandang, u ateueh,
22 atawa u miyueb, awaknyan hana leumah sapeue keucuali keuseusakan dan seupôt buta dan keusuraman nyang luwa biasa. Awaknyan teuma jiböih ubak teumpat seupôt nyan.
23 Teuma kon siumu masa nanggroe gata jirasa keuseusakan. Daerah nyang jirasa lé sukée-sukée Zebulon dan Naftali ka lheueh geuanggab miyueb lé TUHAN. Teuma keu masa nyang teuma ukeue, Gobnyan geubri horeumat nibak banmandum wilayah phon di Laôt Teungoh u timu trok u meurandeh Krueng Yordan, dan trok u Galilea nyang jiduek lé ureuëng aséng.


Chapter 9

1 Bansa nyang udeb lam seupôt jikalon cahya nyang trang. Nyang tinggai lam bubayang maté jipeupungéh lé cahya trang.
2 TUHAN, neujok keu awaknyan sukacita nyang rayeuk, Droeneueh peujeuet awaknyan jikém ngon seumurak nyang meuhubo. Awaknyan galak that até sabab Droeneueh jroh, lagée ureuëng nyang meusukaria watée jipeusapat hase panen, atawa jibagi-bagi hase teucue.
3 Droeneueh ka tacok beuban jih nyang geuhon dan kayée geunulam bak bahô gobnyan. Droeneueh ka neupeutaloe bansa nyang jeuhet nyan nyang tindéeh umat droeneueh. Saban lagée jamén nyang kalheueh watée Droeneueh peutaloe tantra Midian.
4 Sipatu tantra nyang su jih grab grub dan bajée jih nyang meulabo ngon darah, teuma habéh jipajoh lé apui.
5 Sidroe aneuëk ka lahé keugeutanyoe; keugeutanyoe ka geujok sidroe aneuëk agam. Gobnyan teuma jeuet keupeumimpén geutanyoe. Gobnyan teuboh nan: "Peunaseuhat Bijaksana", "Allah Peukasa", "Bapak Keukai", "Raja Damé".
6 Gobnyan geumat peurintah sibagoe raja keuturonan Nabi Daud, keurajeuen gobnyan rayeuk lumpah na. Nanggroe gobnyan sabe damé seujahteura; peumeurintah gobnyan dasai jih nibak huköm dan keuadelan jinoe sampoe siumu masa. TUHAN Nyang Mahakuasa pasti geulaksana.
7 TUHAN ka geupeurhot huköman ateueh Israel.
8 Banmandum bansa Israel dan peunduduek Samaria teuma jiteupeue bahwa TUHAN kheueh nyang peubuet banmandum nyan. Jinoenyoe awaknyan sombong dan manyang até. Kheun awaknyan,
9 "Geudong-geudong nyang teupeuget nibak batée bata ka reuloh, teuma kamoe keuneuk peugét geudong-geudong barô nyang teupeuget nibak batée. Bak-bak ara ka teukoih, teuma kamoe gantoe ngon kayée ceumara Libanon nyang paleng gét."
10 TUHAN ka geupeugrak musoh awaknyan keu jilawan awaknyan.
11 Bansa Siria siblaih u timu dan bansa Filistin di barat jireubot Israel. Teuma TUHAN mantong beungéh dan teutab geuhuköm.
12 Bansa Israel gohlom cit meunyeusai bahpih ka geuhuköm lé TUHAN Nyang Mahakuasa; awaknyan gohlom cit meutobat ubak Gobnyan.
13 Lé sababnyan lam siuroe mantong TUHAN geuhuköm bubena peumimpén Israel dan rakyat jih. Gobnyan geuköih dan geuböih ulée ngon ikue jih.
14 Ulée jih na kheueh ureuëng patot-patot dan ureuëng nyang teuhoreumat, ikue jih na kheueh nabi-nabi nyang geupeurunoe gob deungon ajaran nyang sisat.
15 Bubena peumimpén rakyat nyan ka jipeusisat dan jipeucawoe rakyat.
16 Bansa nyan ka murtad dan beujat that dan mandum tutoe haba awaknyan jeuhet. Lé sababnyan lamkawan peumuda hana nyang geutuwoe lé TUHAN. Gobnyan hana geugaséh keu inong balée dan yatém ngon meuntui. Teuma TUHAN mantong beungéh dan teutab geuhuköm.
17 Jeuhet bansa nyan tutông lagée apui dan jihangöh bubena tamah nyang meuduro. Hu jih lagée gle uteun nyang tutông nyang meuhúb-húb dan meukeubok asab.
18 TUHAN Nyang Mahakuasa beungéh that-that, dan huköman gobnyan lagée apui nyang hu meuháb-háb dan bana nyan na kheueh kayée jih nyang geutot sampoe habéh. Hana meusidroe pih nyang jigaséh syedara jih.
19 Bansaboh nanggroe nyan manusia krôt ié muka dan jipajoh peue-peue mantong nyang jeuet jipajoh, teuma teutab hana meurasa troe. Dan jipajoh rakan-rakan jih keudroe!
20 Ureuëng Manasye dan ureuëng Efraim saleng jimuprang, dan laju meusajan-sajan jilawan Yehuda. Teuma TUHAN mantong beungéh dan teutab geuhuköm.


Chapter 10

1 Ceulaka kheueh gata nyang tapeugét huköm-huköm nyang hana ade keu tatindéeh bansa Ulôn.
2 Deungon cara nyang lagée nyan gata ka tateun ureuëng gasien mangat meuteumé hak dan keuadelan, dan tareupah milék inong balée dan aneuëk yatém ngon meuntui.
3 Peue nyang gata peubuet bak uroe Po teu Allah geuhuköm gata? Peue daya gata bak uroe Gobnyan geupeuteuka beuncana nibak nanggroe nyang jiôh? Bak soe gata talakée tulông? Dipat gata söm keukayaan gata nyan?
4 Naseb gata teuma jipoh maté lam prang atawa ji iréng sibagoe tawanan. Teuma TUHAN mantong beungéh dan teutab geuhuköm.
5 TUHAN meufeureuman, "Ceulaka kheueh Asyur! Asyur Ulôn peuguna sibagoe peunyunuét dan puntong kayée sibagoe alat ngon poh keu ureuëng-ureuëng nyang keunong nibak beungéh Lôn.
6 Ulôn kirém Asyur keujiseurang bansa Ulôn nyang murtad dan nyang jipeujeuet Ulôn nyoe beungéh. Ulôn kukirém Asyur keujijak reubot dan jiceumeucue dan jigilo-gilo bansa Ulôn lagée abée di ateueh jalan."
7 Teuma raja Asyur ka na reuncana geuh keudroe. Gobnyan ka teukat keuneuk geupeuguna cara kreueh dan teupeubinasa bansa nyang le.
8 Jih nyan jipeusombong droe, sira jipeugah lagée nyoe, "Pang-pang ulôn banmandum raja-raja!
9 Ulôn reupah banda-banda Kalno dan Karkemis, Hamat dan Arpad. Meunan cit ulôn reupah banda-banda Samaria dan Damsyik.
10 Ulôn peutaloe banmandum banda-banda nyang jiseumah beurala nyang leubeh meukuasa nibak nyang na di Yerusalem dan Samaria.
11 Samaria dan bubena beurala nyang na disinan ka ulôn peubinasa. Nyang saban lagée nyan ulôn peubuet di Yerusalem deungon banmandum beurala nyang jiseumah disinan."
12 Teuma TUHAN meufeureuman, "Meunyoe nyang keuneuk Ulôn peubuet di Bukét Sion dan di Yerusalem nyan ka seuleusoe, Ulôn huköm raja Asyur sabab keusombongan dan keu angkuhan jih nyan."
13 Raja leupah haba, jipeugah lagée nyoe, "Banmandum nyan ulôn peubuet deungon kuasa lôn keudroe. Ulôn bijaksana dan carông. Ulôn sampôh bataih-bataih lamkawan bansa-bansa, dan ulôn reupah peuseudiaan awaknyan. Lagée banteng ulôn bloh-bloh ngon lôn gilo-gilo ureuëng-ureuëng nyang mat peurintah.
14 Bansa-bansa nyang na di ateueh donya lagée uempueng cicém; deungon mudah hareuta awaknyan ulôn cok, lagée ureuëng jikuet boh cicém nyang tinggai didalam uempueng. Hana sayeub nyang meukeupak-keupak, hana nyang peuhah babah jih atawa meuciéb-ciéb."
15 Teuma TUHAN meufeureuman, "Peu kheueh jeuet kapak jipeubangga droe keu ureuëng nyang peuguna nyan? Peu kheueh gogajo leubeh peunteng nibak ureuëng nyang peuguna atra nyan? Bukon kayée puntong nyang beuôt ureuëng, teuma ureuëng kheueh nyang beuôt puntong kayée."
16 Sabab ureuëng Asyur ka jipeusombong droe, TUHAN Nyang Mahakuasa teuma geupeuteuka bala peunyakét keu geuhuköm peuwira-peuwira nyang gagah-gagah. Awaknyan keunong deumam nyang lumpah seu-uem lagée apui nyang tutông hana jipiôh-piôh.
17 Po teu Allah Nyang Mahasuci, Cahya Israel, jeuet lagée apui hu nyang lam siuroe habéh teutot peue-peue nyang na, meunan cit seumak-seumak meuduro.
18 Gle ijo nyang raya dan ladang-ladang nyang subo di nanggroe Asyur teupeubinasa bube nyang na, lagée ureuëng sakét nyang meurana sampoe maté.
19 Bak-bak kayée tinggai bacut teuk, lé sababnyan di aneuëk miet pih ka hase ji itong bak kayée nyang tinggai nyan.
20 Watée jih teuma trok bansa Israel hana le jigantung naseb droe ubak bansa peunguasa nyang rab jipeubinasa awaknyan, teuma ubak TUHAN, Allah kudus Israel.
21 Nyang mantong na tinggai cit bacut sagai nibak bansa Israel nyan teuma jimeutobat ubak Allah nyang peukasa.
22 Bahpi ureuëng Israel jinoenyoe sadub le jih deungon ano di binéh pasi, teuma napadub droe mantong nyang na jigisa. Huköman TUHAN ka tô that-that, dan meumang pantaih dan ade bansa nyan teupeubinasa.
23 Nyoe, bansaboh nanggroe teuma geupeuhanco lé TUHAN Nyang Mahakuasa; nyan kheueh keuputosan TUHAN, nyang hana jeuet teu ubah le.
24 TUHAN Nyang Mahakuasa meufeureuman ubak umat Gobnyan di Sion, "Bék teumakot ubak ureuëng Asyur, bahpi awaknyan jitindéeh dan ji éulanya gata lagée nyang jipeubuet lé ureuëng Meusé yoh masa ilée.
25 Lam watée nyang paneuk keuhai beungéh Ulôn ubak gata teupiôh, laju awaknyan Ulôn peubinasa.
26 Ulôn TUHAN Nyang Mahakuasa, Lôn seunuét awaknyan deungon peunyunuét, lagée Lôn seunuét ureuëng Midian di gunong batée Oreb. Asyur Lôn huköm, saban lagée Ulôn huköm Meusé.
27 Bak watée nyan Ulôn kupeubeubaih gata nibak jitindéeh lé ureuëng Asyur, dan awaknyan hana meukuasa ateueh gata."
28 Sipa-i Asyur ka jireubot banda Ayat. Awaknyan ka jiliwati Migron! Peubeukalan awaknyan jitinggai di Mikhmas!
29 Awaknyan ka leupah jijeumeurang dan jimeudom di Geba! Peunduduek banda Rama yo that-that, dan peunduduek Gibea, banda Raja Saul, ka jipeuplueng droe.
30 Meudumpék kheueh, hai peunduduek Galim! Deungoe kheueh peunduduek Laisya! Jaweueb kheueh, peunduduek Anatot!
31 Peunduduek Madmena dan Gebim habéh jiplueng jijak meungungsi.
32 Uroenyoe musoh na di banda Nob, dan disinan awaknyan jireugam boh sininju u arah Bukét Sion, u banda Yerusalem.
33 TUHAN Nyang Mahakuasa geupeuhanco awaknyan lagée cabeueng kayée nyang teuköh nibak bakjih. Nyang paleng meugah dan nyang paleng manyang lamkawan nyan geukoh dan teupeureubah.
34 TUHAN geupeureubah awaknyan lagée bak kayée di teungoh gle nyang teuteubang deungon pato. Bahpi awaknyan teuga lagée bak kayée nyang paleng hebat di Libanon, awaknyan reubah cit sapan sapa!


Chapter 11

1 Keuturonan Raja Nabi Daud lagée bak kayée nyang ka teu teubang. Teuma siladum nibak utom jih jitimoh tarok nyang barô, meunan cit teuma deungon keuturonan Nabi Daud teuka sidroe raja.
2 Kuasa TUHAN geubimbéng gobnyan, geupeujeuet gobnyan meubudho dan bijaksana, áref bak geucok keuputosan dan geulaksana; geuteupeue ubak keuheundak Po teu Allah dan taqwa ubak Gobnyan.
3 Keusukaan gobnyan na kheueh taát ubak TUHAN. Gobnyan hana geupeusidang gob lagée teungieng sikeujab atawa dasai nibak nariet gob peusampoe.
4 Ureuëng gasien geupeuhakém deungon ade, ureuëng nyang hana meudaya geubila deungon jujoe; ureuëng meusalah geuhuköm meunurot peurintah Gobnyan, ureuëng jeuhet geusampôh habéh.
5 Gobnyan meutindak deungon ade dan seutia nibak peue mantong.
6 Srigala teuma tinggai meusajan deungon bubiri, rimueng tutul jiéh meusajan bak binéh kaméng. Aneuëk leumô jimeurot naleueng meusajan deungon aneuëk singa, dan aneuëk miet nyang jeuet keu tukang rabe awaknyan.
7 Leumô jimeurot naleueng deungon cagée, aneuëk-aneuëk jih bandua jiéh meusapat meusaho teuma. Singa jimakheun jumpueng saban lagée leumô.
8 Bahkan sidroe aneuëk manyak hana teuma jikab meunyoe jimeuén tô bak binéh uleue meubisa.
9 Di Sion, Bukét Suci Po teu Allah, hana nyang jeuhet atawa nyang peurusak. Nanggroe peunoh deungon iéleumé peungetahuan keuhai Po teu Allah, Lagée ié nyang peunoh bansaboh laôt.
10 Watée jih trok sidroe raja nibak keuturonan Nabi Daud jeuet keupusat peuratian bansa-bansa. Awaknyan teuka ubak gobnyan, dan teumpat tinggai gobnyan jipujo-pujo.
11 Bak uroe nyan TUHAN sigoeteuk geupeuguna kuasa Gobnyan dan geupuwoe lom umat nyang na mantong teusisa di Asyur dan nanggroe Meusé, di nanggroe-nanggroe Patros, Sudan dan Elam, di Babel, Hamat dan pulo-pulo nyang jiôh.
12 TUHAN geupeuék saboh bupanji keu bansa-bansa. Nyan kheueh tanda jih Gobnyan geupeusapat bansa Israel dan Yehuda nyang meutabu bansaboh peunjuru bumoe dan geuba awaknyan puwoe lom teuma.
13 Keurajeuen Israel hana le picek até keu Yehuda, dan Yehuda hana teuma jimeumusoh deungon Israel.
14 Awaknyan meusajan-sajan teuma jijak seurang ureuëng Filistin di barat dan geureupah banmandum bansa-bansa di timu. Awaknyan teuma jipeutaklok bansa Edom dan Moab, dan bansa Amon teuma tundok ubak awaknyan.
15 TUHAN teuma geupeutho Lhok Suez. Gobnyan geupeuteuka angén su-eum sampoe Krueng Efrat jeuet keu tujoh boh bak ié nyang deue, dan soe mantong ureuëng hase jijeumeurang deungon seulob bak gaki.
16 Keu umat nyang na mantong tinggai teusisa teuma na rot ueh raya keurot teubiet nibak Asyur, lagée yoh masa Israel jiteubiet lam nanggroe Meusé.


Chapter 12

1 Teuma teuka saát jih gata meuca-e: "TUHAN, ulôn meusyuko ubak Droeneueh, kareuna Droeneueh neuhibur ulôn. Yoh masa ilée Droeneueh neubeungéh keu ulôn, teuma jinoe ka reuda beungéh Droeneueh.
2 Keubit, Po teu Allah nyan geupeuseulamat ulôn, ulôn peucaya ubak Gobnyan. Ulôn hana teumakot, sabab Gobnyan nyang peuteuga ulôn. Nyang peuseulamat ulôn na kheueh Po teu Allah, keu Gobnyan ulôn meuca-e.
3 Lagée ié leupie nyang teupeugeumbira ureuëng nyang teungoh glah, meunan kheueh gata meusuka ria, sabab geupeuseulamat lé Po teu Allah."
4 Teuma teuka watée jih gata tapeugah, "Meusyuko kheueh ubak TUHAN, dan seumah kheueh Gobnyan. Neubritée kheueh keu bansa-bansa keuagongan dan peue mantong buet Geuhnyan.
5 Meuca-e kheueh keu TUHAN, sabab Gobnyan nyang ka geupeubuet buet ajaéb nyang lumpah le. Bah kheueh bansaboh donya jideungoe keuhai buet Gobnyan.
6 Meusurak geumbira kheueh hai peunduduek Sion, meuca-e kheueh deungon geumbira. Allah kudus Israel keubit mulia, Gobnyan na di teungoh-teungoh gata."


Chapter 13

1 Nyoe kheueh feureuman Allah, nyang geuteurimong lé Yesaya bin Amos keuhai Babel:
2 Peuék kheueh bupanji prang di ateueh cot bukét nyang ueh! Tawök kheueh ubak mandum tantra, dan apit laju jaroe gata u ateueh mangat awaknyan jiseureubu pintoe-pintoe geureubang nyang angkuh nyan.
3 TUHAN ka geutawök bubena peujuang nyang geupiléh. Awaknyan peukasa, peucaya droe dan jeuet teupeubangga. TUHAN geubri tugaih ubak awaknyan keu geuhuköm ureuëng nyang keunong nibak beungéh Gobnyan.
4 Deungoe kheueh su nyang riôh ngon karu nibak gunong-gunong, lagée su ureuëng meugumpôi nyang ramé that. Deungoe kheueh karu keurajeuen-keurajeuen dan bansa-bansa nyang teungoh meugumpôi. TUHAN Nyang Mahakuasa geujak peureksa pasokan prang.
5 Awaknyan teuka nibak nanggroe-nanggroe jiôh nibak ujong u ujong bumoe. Lam beungéh Geuhnyan TUHAN geungui awaknyan keu jipeubinasa bansiluroh bumoe.
6 Meuba-e kheueh, sabab uroe TUHAN ka tô lumpah na, nyan kheueh uroe keubinasaan nyang geupeuteuka lé TUHAN Nyang Mahakuasa.
7 Tieb-tieb ureuëng meurasa lapée jaroe dan gadôh keubeuranian jih.
8 Awaknyan banmandum jiteuka lé rasa teumakot nyang hebat, dan meuleungiék sabab rasa sakét lagée ureuëng inong teungoh toh aneuëk. Awaknyan saleng meumandang sabe keudroe-droe deungon rasa teumakot, ruman awaknyan mirah sabab malée.
9 Uroe TUHAN teuma teuka, dan nibak uroe nyan TUHAN geupeupueh rasa beungéh Gobnyan dan meureuka Gobnyan nyang cukob hebat. Bumoe jeuet keu padang nyang ueh, dan tieb-tieb ureuëng meudesya binasa.
10 Tieb-tieb bintang dan gugusan bintang teuma jipiôh meucahya; mata uroe seupôt watée jiteubiet, dan buleuen hana meucahya le.
11 TUHAN meufeureuman, "Ulôn kuhuköm donya sabab keujeuhetan jih nyan, dan ureuëng-ureuëng jeuhet sabab desya-desya jihnyan. Tieb-tieb ureuëng sombong Lôn peuhina, ureuëng angkoh dan keujam Lôn huköm.
12 Ureuëng nyang geupeuseulamat na bacut that, awaknyan leubeh jareueng nibak méuh murni.
13 Ulôn peujeuet langét yo meugám-gám dan bumoe geugok-gok nibak teumpat jih watée uroe Ulôn, TUHAN Nyang Mahakuasa, Lôn tunyok keubeungéh Ulôn.
14 Ureuëng aséng nyang na tinggai di Babel meucrebre jiplueng u nanggroe jih maséng-maséng. Awaknyan lagée rusa plueng nyang jitiyeub lé peumburu, atawa lagée kawan bubiri nyang hana ureuëng rabe.
15 Soe mantong nyang keunong drob teutôb sampoe maté.
16 Awaknyan teuma jikalon aneuëk-aneuëk manyak droe jih dan teupeureumok, rumoh-rumoh awaknyan jireupah dan peurumoh-peurumoh awaknyan jipeukosa."
17 TUHAN meufeureuman, "Ulôn teuma Lôn krah bansa Madai keu jijak seurang Babel. Awaknyan hana hase ji sugok deungon pirak dan méuh.
18 Deungon busur dan panah jih awaknyan jipoh maté dumna ureuëng-ureuëng muda. Awaknyan hana jigaséh keu aneuëk manyak dan hana jiwéueh keu aneuëk droe.
19 Nibak banmandum keurajeuen nanggroe, Babel nyan nyang paleng lagak dan jeuet keubanggaan peunduduek disinan. Teuma Ulôn, TUHAN, Lôn peuhanco atranyan, lagée nyang ka Ulôn peubuet ateueh Sodom dan Gomora.
20 Hana meusidroe pih nyang na tinggai disinan. Hana ureuëng Arab peugeumbara nyang jipasang khimah di teumpat nyan, dan hana teuma ureuëng meurabe nyang jiba kaméng ngon bubiri jih mangat jimeurot disinan.
21 Teumpat nyan jitinggai lé beulatang-beulatang kleut. Cicém hantu jipeugot uempueng nibak rumoh-rumoh awaknyan, dan cicém unta tinggai disinan. Kaméng-kaméng uteuen teuma jimeulikak-likak di teungoh-teungoh bangunan nyang reuloh.
22 Su jimeudroh asée uteuen ngon su srigala meugeunta nibak puri-puri dan meuligoe-meuligoe Babel. Watée keuhancoran jih karab sampoe dan watée jih hana teutunda le."


Chapter 14

1 TUHAN teuma geugaséh keu Israel umat Gobnyan, dan geupiléh awaknyan lom jeuet keu milék Gobnyan. Gobnyan teuma geupeuduek lom awaknyan di nanggroe-nanggroe droe jih. Ureuëng aséng teuma teuka laju jijak meugabong deungon awaknyan.
2 Jai that bansa jitulông bansa Israel mangat jiwoe lom u nanggroe nyang ka geubri lé TUHAN keu awaknyan, dan disinan teuma bansa-bansa nyan jipeuhamba droe ubak bansa Israel. Israel teuma jiteun ureuëng-ureuëng nyang ka lheueh jiteuen awaknyan yoh masa ilée dan jipeurintah ateueh ureuëng-ureuëng nyang ka lheueh jipeurintah geuh nyan.
3 TUHAN teuma geupeubeubaih bansa Israel nibak sakét dan deurita, dan nibak buet nyang brat nyang jipaksa ateueh awaknyan.
4 Meunyoe TUHAN geupeubuet nyang lagée nyan, awaknyan jipeuhina raja Babel lagée nyoe, "Raja nyang keujam ka rhot! Jih nyan hana hase le jiteugom gob.
5 TUHAN ka geupeu habéh masa peumeurintahan raja-raja nyang jeuhet
6 nyang deungon beungéh jiteugom bansa-bansa dan hana putôh-putôh ji iélanya awaknyan.
7 Akhé jih bansaboh donya aman dan teuntram, dan tieb-tieb ureuëng geumeuca-e geumbira.
8 Bak aron dan bak ceumara Libanon meugeumbira sabab raja nyang keujam nyan rhot, dan óh ka lheueh jihnyan jijak, hana le nyang yue teubang awaknyan!
9 Donya ureuëng maté meuron-ron jijak sambot raja Babel nyan. Dan jaga kheueh areuwah-areuwah ureuëng nyang yoh watée ilée jimat kuasa di ateueh bumoe, dan areuwah bubena raja geubeudôh nibak takhta awaknyan.
10 Awaknyan banmandum jimeuhôi ubak ureuëng nyan, 'Hei! Jinoenyoe gata ka lagée kamoe, leumoh dan hana meudaya!
11 Yoh masa ilée gata jihoreumat lagée musik keucapi, teuma jinoenyoe ka na di teumpat seungue lam donya ureuëng maté. Ulat-ulat jeuet keu peuratah gata dan glang-glang jeuet keu seulimbot gata.'
12 Hei raja Babel, yoh masa ilée gata bintang beungoh nyang ceumeurlang, teuma jinoenyoe ka rhot nibak langét! Yoh masa ilée gata peutaloe bubena bansa, teuma bak saát nyoe ka geurhom lam tanoh.
13 Gata tapeusak droe ta-ék u langét dan takeubah takhta gata di ateueh bintang nyang paleng manyang! Gata pike gata hase taduek sibagoe raja di ateueh gunong siblaih utara, di teumpat dewa-dewa meusapat.
14 Gata tapeugah, bahwa gata ta-ék ateueh nyang paleng manyang di dalam awan dan jeuet lagée Nyang Mahamanyang.
15 Padahai gata taseumpom u dalam nyang paleng lhok nibak donya ureuëng maté.
16 Awaknyan na disinan teuma jingieng dan jipandang gata. Awaknyan jitanyong, 'Peue beutôi nyoe ureuëng jih nyang peuyok-yok bumoe dan jipeuyo mandum keurajeuen?
17 Peu kheueh jihnyan nyang peuhanco bubena banda-banda dan nyang ubah donya jeuet keu padang pasi? Gobnyan nyoe kheueh nyang hántom jipeuleuh tawanan atawa jipeubiyeu awaknyan jiwoe?'
18 Banmandum beukaih raja-raja jitanom lam jrat deungon seumarak di teumpat makam jihnyan maséng-maséng,
19 teuma gata hana meukubu; manyét gata geutiek lagée tarök nyang jitulak, jiseubée deungon manyét-manyét peujuang nyang maté di mideuen prang, dan jigeulawa meusahoe ngon awaknyan u dalam guha batée, lagée bangke nyang teugilo-gilo.
20 Gata ka tapeubinasa nanggroe gata dan tapôh maté bansa gata keudroe. Lé sababnyan gata hana teukubu lagée raja-raja nyang laén. Hana meusidroe pih lam keuluwarga gata nyang hase jipeuseulamat.
21 Pôh mupôh maté sigra jipeuphon! Aneuëk-aneuëk agam gata teuma maté sabab desya indatu awaknyan. Hana meusidroe pih lamkawan awaknyan jimat peurintah di ateueh bumoe atawa jipeugöt banda-banda."
22 TUHAN Nyang Mahakuasa meufeureuman, "Ulôn teuma Lôn seurang Babel dan Lôn peuhanco banmandum. Hana meusidroe pih nyang Lôn peuseulamat, bahkan aneuëk-aneuëk manyak pih hana Lôn peu udeb. Ulôn, TUHAN, ka Lôn peugah haba.
23 Babel Ulôn peujeuet keu paya uyok teumpat tinggai meubagoe cicém hantu. Babel Ulôn sampôh sampoe gleh. Ulôn, TUHAN Nyang Mahakuasa, ka Lôn peugah haba."
24 TUHAN Nyang Mahakuasa meusumpah: "Nyang ka Ulôn reuncana nyan pasti teulaksana.
25 Ureuëng Asyur di Israel nanggroe Ulôn, teuma Ulôn peubinasa, dan nyang na nibak gunong-gunong Lôn teuma Lôn gilo-gilo. Ulôn peubeubaih bansa Ulôn nibak jitindéeh dan beuban nyang jipaksa ateueh awaknyan lé ureuëng Asyur.
26 Nyoe kheueh reuncana Ulôn keu donya; jaroe Ulôn meureuntang keu Lôn huköm bansa-bansa."
27 TUHAN Nyang Mahakuasa ka geupeuputôh mangat jipeubuet lagée nyan. Gobnyan geureuntang jaroe Geuh keu geuhuköm, dan hana meusidroe pih hana nyang hase jipeuteun Gobnyan.
28 Nyoe kheueh peusan nyang geu-umum nibak thon Raja Ahas meuninggai donya.
29 Hei bansa Filistin, kayée puntong nyang teupeuguna keu teuseukok gata ka patah. Teuma bék kheueh gata geumbira, sabab meunyoe saboh uleue nyang maté, uleue nyang leubeh jeuhet lom teuka keugeunantoe, dan boh uleue watée ceh lahé aneuëk naga meusayeub.
30 Gata keunong musém deuk nyang parah that, dan banmandum ureuëng nyang mantong tinggai geupôh maté. Dan teuma, ureuëng nyang paleng gasien lamkawan umat TUHAN meuteumé peunajoh, dan ureuëng-ureuëng nyang hana meudaya udeb deungon aman seuntosa.
31 Meuba-e kheueh, dan meudumpék kheueh talakée tulông, hai banda-banda Filistin! Bah kheueh gata banmandum yo sabab teumakot! Awan abée meukeubok di utara sibagoe tanda musoh teuma teuka; hana nyang gasuen lamkawan awaknyan.
32 Peue jaweueb jih nyang tanyoe peusampoe ubak utosan-utosan nyang teuka nibak bansa Filistin? Geutanyoe teuma ta peugah ubak awaknyan bahwa TUHAN ka geupeudong Sion, dan umat Gobnyan nyang meudeurita teuma meuteumé peulindongan disinan.


Chapter 15

1 Nyoe kheueh peusan TUHAN keuhai Moab. Banda Ar dan Kir geupeuhanco dalam watée simalam, dan nanggroe Moab jeuet keu langang.
2 Peunduduek Dibon jiteungoh gunong jijakmo di teumpat seumeumah dewa-dewa. Peunduduek Moab deungon rasa seudeh geupeuba-e banda Nebo dan Medeba. Awaknyan jicuko ôk dan janggot sibagoe tanda meuduka.
3 Ureuëng-ureuëng nibak jalan jingui ija krong tanda meukabong; ureuëng meuba-e ngon jimo di tanoh lapang dan di ateueh bubông rumoh.
4 Ureuëng Hesybon dan Eleale jimo meu ong-ong, dan su awaknyan teudeungoe sampoe u Yahas. Dan bubena sipa-i yo meugám-gám; awaknyan ka gadôh ceubeueh.
5 Ulôn sayang that keu Moab! Peunduduek disinan jimeungungsi u banda Zoar dan u Eglat-Selisia. Na nyang teungoh jalan u Luhit sira jimo; na nyang plueng u Horanaim sira jikliek-kliek sabab kakeunong bala.
6 Ié Krueng Nimrim dan naleueng nyang timoh bak binéh nyan ka tho kreng, hana le sinaman timoh nyang ijo.
7 Ureuëng-ureuëng jijeumeurang aneuk krueng Haarabim dan jiuseuha jipeuseulamat peue mantong hareuta beunda jih nyang na.
8 Dipat mantong nibak bataih Moab teudeungoe su ureuëng kliek ngon teumawök. Moba-e nyan teudeungoe di Eglaim dan Beer-Elim.
9 Di Dibon ié krueng ka jeuet keumirah sabab meulawok deungon darah. Dan Po teu Allah teuma geupeuteuka lom hai-hai nyang leubeh dahsyat ateueh ureuëng-ureuëng nyang na disinan. Algojo tukang kôh takue nyang jikirém teuma jipoh maté banmandum ureuëng Moab nyang mantong udeb.


Chapter 16

1 Di banda Sela di padang pasi, bansa Moab jikirém aneuëk bubiri sibagoe hadiah keu peunguasa di Yerusalem.
2 Ureuëng-ureuëng Moab jipreh bakbinéh Krueng Arnon sira jijak-jak hana meuteuntée sabab bingong lagée cicém-cicém nyang teu paroh lam uempueng.
3 Awaknyan jipeugah ubak bansa Yehuda, "Tapeugah kheueh laju peue nyang harôh kamoe peubuet. Tapeujeuet kheueh keu kamoe teumpat meuceu nyang teudoh watée teuka mata uroe nibak uroe kha, dan bah kheueh kamoe tinggai dimiyueb naungan gata. Kamoe nyoe peungungsi; tasöm kheueh kamoe dan bék kheueh neukhianat kamoe.
4 Idhin kheueh keukamoe mangat kamoe meunumpang di nanggroe gata. Neulindong kheueh kamoe ateueh ureuëng-ureuëng nyang keuneuk peubinasa kamoe." (Peunindasan dan peumbinasaan teuma na akhé, dan ureuëng-ureuëng nyang peuhanco dan nyang teugöm nanggroe Israel teuma leunyab.
5 Óh lheuehnyan sidroe lamkawan keuturonan Nabi Daud teuma jeuet keu raja, dan gobnyan geupeurintah bansa geuh nyan deungon gaséh dan seutia. Gobnyan geupeudong keuadelan dan bagaih meutindak keu geupeubuet nyang beutôi.)
6 Bansa Yehuda jipeugah, "Kamoe ka kamoe deungoe keuhai keusombongan bansa Moab. Kamoe meuteupeue bahwa awaknyan angkoh dan cungkak. Haba awaknyan na kheueh haba beurakah nyang hana meumakna."
7 Sabab nyan bah kheueh bansa Moab saleng meuba-e. Bah kheueh awaknyan jimo meunyoe teuingat peunajoh mangat nyang kayém awaknyan makheun di banda Kir-Hareset. Bah kheueh awaknyan putôh asa dan apoh apah.
8 Ladang-ladang nyang tho di Hesybon dan lampôh-lampôh anggô Sibma ka geupeubinasa, lampôh-lampôh nyang lazem jih jipeuhase anggô nyang paleng gét keu nyang mat kuasa bansa dan teupeujeuet awaknyan mabök. Yoh ilée lampôh-lampôh anggô nyan luwah sampoe u banda Yaezer; dan u timu sampoe u padang pasi, dan disiblaih u barat trok u meurandeh Laôt Maté.
9 Jinoenyoe ulôn peuba-e keubak anggô Sibma lagée ulôn peuba-e Yaezer. Ulôn peutijoh ié mata keu Hesybon dan Eleale, sabab hase bumoe jih ranab jipeuhabéh lé musoh.
10 Hana meusidroe pih nyang geumbira nibak ladang-ladang nyang subo nyan. Hana nyang meudumpék seumurak atawa nyang meuca-e di lampôh anggô. Hana nyang prah ié anggô keu jipeugöt ié anggô. Ulôn ka lôn peupiôh surak geumbira awaknyan.
11 Até ulôn teukliek dan hanco meukeupeng-keupeng watée ulôn ngieng keuadaan Moab dan Kir-Heres.
12 Ureuëng Moab meususah payah jijak teungoh u ateueh bukét keureubeuen nibak teumpat iébadat awaknyan keuji meudoá, teuma meusapeue hana meuhase.
13 Nyan kheueh peusan yoh masa ilée geubri lé TUHAN ubak Moab.
14 Dan jinoenyoe TUHAN meufeureuman: "Paih lhée thon teuk, peue mantong keukayaan nyang jipeubangga lé Moab teuma leunyab. Rakyat jih nyang le nyan tinggai bacut dan leumoh hana meudaya."


Chapter 17

1 TUHAN meufeureuman, "Damsyik hana le lagée banda, teuma na kheueh rungka-rungka nyang meutumpok-tumpok.
2 Banda-banda di Siria jitinggai keu siumu masa dan jeuet keu teumpat kawan beulatang peulara; hana meusidroe pih nyang jiteujeuet paröh.
3 Israel gadôh teumpat meulindong dan Damsyik gadôh keumeurdehkaan jih. Ureuëng Siria nyang na mantong tinggai sidroe sapat udeb lam keuhinaan saban that lagée ureuëng Israel. Ulôn, TUHAN Nyang Mahakuasa, ka Lôn peugah haba."
4 TUHAN meufeureuman lom, "Teuma trok watée jih keujayaan Israel habéh, dan keumakmuran jih leunyab.
5 Israel jeuet lagée ladang di Refaim nyang ka habéh teupot boh gandom jih, dan teuma nyang na tinggai cit bacut.
6 Lagée bak zaiton nyang ka habéh teupot boh jih, dan nyang na tinggai napadub boh sagai nibak ujong deuen, meunan cit di Israel bacut sagai ureuëng nyang na seulamat. Ulôn, TUHAN, Allah Israel, ka Lôn peugah haba."
7 Nibak uroenyan ureuëng ramé jiulang lom jak lakée tulông ubak Peuncebta jihnyan, Po teu Allah kudus Israel.
8 Awaknyan hana meuharab le ubak hase buet jaroe jih keudroe, na kheueh miseubah-miseubah teumpat tot keumeunyan, dan patong-patong Dewi Asyera.
9 Nibak uroenyan, banda-banda Israel nyang kong peutahanan jih jeuet keu rungka nyang seungue ngon seungab, saban that lagée banda-banda nyang jitinggai lé ureuëng Hewi dan Amori bak watée awaknyan jiplueng nibak ureuëng Israel.
10 Israel, gata ka tatuwoe ubak Po teu Allah nyang peuseulamat dan peulindong gata lagée gunong batée nyang kukoh. Seubalek jih, gata ka tapula lampôh-lampôh keu dewa-dewa.
11 Teuma bahpi sinaman nyan laju jitimoh tarok dan meubungöng bak uroe gata pula nyan, teuma teutab hana meuhase sapeue. Nyang na na kheueh keususahan dan rasa sakét nyang hana jitem gadôh.
12 Bansa-bansa nyang teuga teungoh kiröh; su jih meugrum-grum lagée su umbak ié laôt nyang meutaga-taga.
13 Awaknyan maju lagée ié raya nyang tajam that. Teuma Po teu Allah geu ancam awaknyan, laju awaknyan jipeuplueng droe sampoe án jiôh. Awaknyan geupeucrok lagée sikéum jiyueb lé angén di lereng bukét, atawa lagée abée jiyueb lé angén badée.
14 Watée uroe ka meugleb laju teuka ubak awaknyan teumakot nyang paleng hebat, teuma óh karab trok watée beungoh awaknyan ka gadôh. Nyan kheueh naseb tieb-tieb ureuëng nyang reupah geutanyoe.


Chapter 18

1 Nibak saboh nanggroe di meurandeh krueng Sudan na teudeungoe su sidom mirah nyang meu ié-ié.
2 Nibak nanggroe nyan teuka kheueh duta-duta jijak meulayeue u dalam Krueng Nil deungon peuraho-peuraho sikée. Hei, utosan-utosan nyang áref, tajak woe kheueh bubagaih u nanggroe gata nyang na bansipanyang krueng-krueng nyan. Taba kheueh saboh peusan keu bansa gata nyang teuga ngon peukasa, ureuëng-ureuëng gata nyang panyang-panyang dan meukulet halôh dan jitakot lé gob bansaboh donya.
3 Hei, gata banmandum nyang tinggai di ateueh bumoe! Ngieng kheueh meunyoe bupanji-bupanji ka teupeu-ék di pucak gunong-gunong! Deungoe kheueh meunyoe beureuguih ka teupeumeusu!
4 TUHAN meufeureuman ubak ulôn, "Di teumpat tinggai Ulôn nyang na di ateueh, Ulôn kukalon u miyueb deungon teunang dan ceurah, lagée teunang iémbon nyang hi lagée malam nyang seu-uem dan musém mupot, dan lagée peungéuh mata uroe óh watée uroe.
5 Sigohlom musém kayée jimuboh, watée bungöng jih ka lurôh dan boh anggô gohlom masak di ateueh bak, Sudan jipeuhanco lé musoh, mudah jih lagée sikin nyang teureulek ranteng-ranteng ateueh bak anggô.
6 Manyét-manyét tantra jih jitinggai mantong disinan dan jeuet keu peunajoh cicém-cicém watée musém khueng, dan beulatang juwah watée musém leupie."
7 Teuma trok saát jih bubena peuseumahan teupeusampoe ubak TUHAN Nyang Mahakuasa nibak nanggroe nyan nyang na bansipanyang krueng-krueng ile nyan, nibak bansa jih nyang teuga ngon peukasa, nibak ureuëng-ureuëng jihnyan nyang panyang-panyang dan meukulet halôh dan jitakot lé gob bansaboh donya. Awaknyan teuma teuka u Bukét Sion, ubak teumpat TUHAN Nyang Mahakuasa teuseumah.


Chapter 19

1 Nyoe kheueh peusan keuhai nanggroe Meusé. TUHAN geujak u Meusé deungon keundeuraan awan nyang bagaih. Dumna beurala-beurala di nanggroe Meusé nyan ka habéh yo dikeue Gobnyan dan di ureuëng-ureuëng Meusé pih ka cut até.
2 TUHAN meufeureuman, "Ulôn kupeubeudôh prang syedara di nanggroe Meusé: syedara jilawan syedara, teutangga lawan teutangga, banda lawan banda dan keurajeuen lawan keurajeuen.
3 Ulôn kupeubateue peue mantong nyang jireuncana lé Meusé dan Lôn peupatah seumangat awaknyan. Awaknyan jilakée tulông ubak beurala-beurala, jilakée naseuhat dan peutunyok ubak tabib-tabib dan ubak roh-roh.
4 Nanggroe Meusé nyan Ulôn jok lam jaroe sidroe raja nyang zalem nyang peurintah awaknyan deungon keujam. Ulôn, TUHAN Nyang Mahakuasa, ka Lôn peugah haba."
5 Ié Krueng Nil jisurot dan treb bak treb laju tho.
6 Lhueng-lhueng meubée khiéng watée ié jih seumaken habéh. Geulagah dan naleueng jeuet keu layée.
7 Banmandum seunaman nyang na di seutôt binéh Krueng Nil teuma jeuet keu tho dan habéh jipeupo lé angén.
8 Dumna neulayan nyang lazemjih jikeumawe ngon jimeujeue disinan apoh apah sira jimeuratok ngon jimo ba-e sabab kawe dan jeue awaknyan hana meuguna le. Bubena ureuëng ban teumpeuen putôh asa;
9 awaknyan dan kuli nyang tung upah meuseudeh até dan patah meuseumangat.
11 Bit-bit bangai that banmandum peumimpén-peumimpén banda Zoan! Ureuëng Meusé paleng bijaksana bak jijok naseuhat nyang bangai! Jijeuet that lé awaknyan jipeugah ubak raja bahwa droe jihnyan keuturonan ureuëng-ureuëng malem dan keuturonan raja-raja bak jamén purbakala!
12 Wahai, raja Meusé, dipat kheueh peunaseuhat-peunaseuhat teungku amphon nyang carông-carông nyan? Mungken awaknyan jiteupeue peue nyang geureuncana lé TUHAN Nyang Mahakuasa keu nanggroe Meusé.
13 Bubena peumimpén Zoan dan Memfis na kheueh ureuëng-ureuëng bangai. Awaknyan kon meupimpén, teuma jipeusisat bansa droe jih keudroe.
14 TUHAN kheueh nyang peujeuet awaknyan mangat jitembri naseuhat nyang bingong nyan. Akibat jih, nanggroe Meusé salah hánkeunong, dan meuapit-apit lagée ureuëng mabök nyang meusireuk dan reubah ateueh muntah droe jih keudroe.
15 Di nanggroe Meusé hana le ureuëng nyang mantong meudaya, bah kheueh nyan nyang mat kuasa meunan cit deungon rakyat biasa, bah kheueh nyan ureuëng peunteng meunan cit ureuëng awam.
16 Teuma teuka watéejih bansa Meusé nyan lagée ureuëng inong nyang gusuen dan teumakot. Awaknyan yo meugám-gám meunyoe jikalon TUHAN Nyang Mahakuasa geureuntak jaroe Gobnyan keu geuhuköm awaknyan.
17 Tanoh Yehuda ka jeuet keugeumpa nibak ureuëng Meusé pajan mantong watée awaknyan teupeuingat ubak keuputosan TUHAN Nyang Mahakuasa keuhai awaknyan keudroe.
18 Bak watée nyan basa Ibrani jipeuguna di limong boh banda di nanggroe Meusé. Ureuëng-ureuëng disinan jibeuôt sumpah deumi nan TUHAN Nyang Mahakuasa. Saboh lamkawan banda nyan geuboh nan "Banda Mata uroe".
19 Bak watée nyan di pusat nanggroe Meusé na saboh miseubah keu TUHAN, dan nibak bataih nyan na teuma saboh taméh batée nyang teupeukhusos keu TUHAN.
20 Miseubah dan taméh nyan na kheueh sibagoe lambang keuhai teuka TUHAN Nyang Mahakuasa di nanggroe Meusé. Meunyoe bansa nyan jiteugom ngon jitindéeh, dan awaknyan jimeuhôi jilakée tulông ubak TUHAN, Gobnyan geukirém sidroe-droe ureuëng keu teupeuseulamat awaknyan.
21 TUHAN geupeugah droe ubak bansa Meusé, dan awaknyan teuma jituri dan jiseumah Gobnyan, sira jiba keureubeuen ngon peuseumahan ubak Gobnyan. Awaknyan jimeujanji ubak Gobnyan deungon meusumpah dan jipeubuet teuma.
22 TUHAN geuheuntam bansa Meusé, teuma óh lheuehnyan geupeupuléh teuma. Awaknyan jiwoe ubak TUHAN, dan Gobnyan geudeungoe doá awaknyan dan geupeupuléh teuma.
23 Bak watée nyan na rot raya bataih nanggroe Meusé deungon Asyur. Peunduduek nibak bandua boh nanggroe nyan jiwoe lom rot ueh nyan dan awaknyan meuiébadat meusajan-sajan teuma.
24 Bak watée nyan Israel saban keududukan jihnyan deungon Meusé dan Asyur, dan ban lhée boh bansa nyan jeuet keubeureukat keu bansaboh donya.
25 TUHAN Nyang Mahakuasa teuma geubri beureukat keu awaknyan deungon feureuman, "Ulôn bri beureukat keu gata, hai Meusé umat Ulôn, Asyur cebtaan Ulôn, dan Israel umat nyang Ulôn piléh."


Chapter 20

1 Ateueh peurintah Sargon, raja Asyur, panglima sipa-i Asyur laju jijak prang Asdod, saboh banda atra ureuëng Filistin.
2 Lhée thon sigohlom nyan, TUHAN geuyue Yesaya bin Amos geuyue ploih sipatu dan ija krong nyang teungoh jingui. Gobnyan geuturot peue nyang teuyue nyan dan gobnyan geujak deungon teulon dan hana sok seulob.
3 Watée banda Asdod jikeupong, TUHAN meufeureuman, "Hamba Ulôn Yesaya ka lhée thon teulon dan hana meuseulob. Nyoe kheueh tanda peue nyang teujadi deungon nanggroe Meusé dan Sudan.
4 Raja Asyur teuma geuteun ureuëng-ureuëng nyang na nibak bandua boh nanggroe nyan dan awaknyan jigiréng deungon teulon. Tuha ngon muda, bandum jijak hana meubajée dan lapek gaki deungon punggong awaknyan deuh teulon, sibagoe peuhinaan keu nanggroe Meusé.
5 Ureuëng-ureuëng nyang peubangga Sudan dan meunan cit jimeubangga deungon Meusé ureuëng nyan meuteumé keucewa dan harapan jih hanco.
6 Bak watée nyan, ureuëng-ureuëng nyang na tinggai di sipanyang pante jipeugah, 'Ngieng kheueh peue nyang teungoh teujadi ateueh bansa nyang teungoh gata peubangga keu jilindong geutanyoe nibak raja Asyur. Panena mungken geutanyoe seulamat?' "


Chapter 21

1 Nyoe kheueh peusan keuhai Babel: Lagée su angén badée nyang meusié-sié jipupöt di padang pasi, meunan kheueh watée teuka beuncana di nanggroe nyang dahsyat.
2 Ulôn meuteumé keumalon keuhai keujadian-keujadian nyang lumpah teumakot; keuhai peukhianatan dan peumbinasaan. Maju kheueh, hei sipa-i Elam, sureubu kheueh! Hei sipa-i Madai, keupông kheueh! Po teu Allah geupeuseuleusoe bandum peundeuritaan nyang jipeusabab lé Babel.
3 Deungon na keumalon nyan sampoe jeuet ulôn bingong ka hana deuh lôn meungieng atawa teudeungoe sapeue. Ulôn teumakot that dan sakét lumpah na, lagée sidroe ureuëng inong nyang teungoh meulahé aneuëk.
4 Até ulôn geulisah ngon apoh apah; deungon rasa hayut sampoe ulôn yo meugám-gám. Malam nyang ulôn meucén teuma teuba ubak teumakot.
5 Meunan cit ulôn kalon khanuri peujamé nyang ka jipeusiab; teumpat duek keumandum undangan pih ka teukeubah. Awaknyan laju jimakheun deungon jijieb ié. Hana teusangka-sangka teudeungoe peurintah: "Hei bubena peuwira! Peusiab laju peurisée gata!"
6 Laju TUHAN meufeureuman ubak ulôn, "Tajak peuduek laju sidroe ureuëng jaga dan tayue jihnyan meulapor peue nyang ka jikalon.
7 Meunyoe jihnyan na jikalon pasokan meuguda teuka meudua-dua, pasokan nyang duek ateueh keuleudée dan unta, nyan harôh tangieng beugét-gét."
8 Óh lheuehnyan ureuëng jaga nyan jitawök, "Teungku, ulôn ka lôn meujaga tieb-tieb uroe, uroe ngon malam."
9 Kalon, jehpat, nyan kheueh awaknyan! Pasokan meuguda nyang teuka meudua-dua. Óh lheueh nyan di ureuëng jaga nyan laju jipeugah, "Babel ka rhot! Patong-patong nyang jipuja lé awaknyan ka habéh hanco meutabu beba ateueh tanoh."
10 Bansa ulôn Israel! Gata ka jigilo-gilo dan jibloh-bloh lagée aneuk-aneuk gandom. Jinoenyoe ulôn peusampoe ubak gata haba jroh nyang ulôn deungoe nibak TUHAN Nyang Mahakuasa, Allah Israel.
11 Nyoe kheueh peusan keuhai Edom. Na ureuëng teumawök ubak ulôn di Edom, "Hei, ureuëng meujaga, peu kheueh mantong treb malam nyoe? Padub jeuem teuk sigohlom beungoh?"
12 Jaweueb ulôn, "Beungoh jiteuka, teuma meunan cit deungon malam. Meunyoe keuneuk teumanyong, teuka kheueh tatanyong lom."
13 Nyoe kheueh peusan keuhai Arab: Hei, ureuëng Dedan, kafilah-kafilah gata jipeudong khimah lam tamah meupaya tanoh Arab.
14 Hei peunduduek tanoh Tema, tabri kheueh ié jieb keu ureuëng-ureuëng nyang graih nyang jijak ubak gata, dan tabri kheueh peunajoh keu ureuëng meungungsi.
15 Sabab awaknyan ka jipeuplueng droe nibak mata peudeueng nyang ka teusut lam sarong, nibak busur nyang ka teulentur, dan nibak prang nyang teungoh meuhubô.
16 Laju TUHAN meufeureuman ubak ulôn, "Paih sithon teuk keujayaan sukée-sukée Kedar teuma habéh.
17 Ureuëng-ureuëng Kedar nyang mat aneuk panah na kheueh ureuëng nyang paleng peukasa. Teuma cibacut sagai nibak awaknyan nyang na seulamat. Ulôn, TUHAN Allah Israel ka Lôn peugah haba."


Chapter 22

1 Nyoe kheueh peusan keuhai Pantôn Keumalon: Hei, peunduduek Yerusalem, pakon gata banmandum ta-ék u ateueh bubông rumoh?
2 Hana patot banmandum banda meupesta dan meusurak geumbira. Sabab peujuang-peujuang gata nyang maté lam prang nyoe kon maté sabab jimuprang.
3 Bandum panglima gata jipeuplueng droe dan jiteun sigohlom awaknyan hase jitimbak aneuk panah. Meunan cit bandum ureuëng gata nyang beuhe dan tungang meuteumé cit jiteun bahpi ka jiplueng jiôh.
4 Bék tapako keu ulôn; bah kheueh ulôn nyang peuba-e ureuëng-ureuëng nibak bansa lôn nyang ka maté. Bék cuba-cuba tapeuiem ngon tapeumangat até lôn.
5 Beutôi, TUHAN Nyang Mahamanyang dan Mahakuasa ka geupeuteutab uroe nyoe sibagoe uroe karu, teukeujot dan huru hara di Pantôn Keumalon. Bintéh-bintéh beuton banda ka habéh jipeuhanco. Dumpék su ureuëng lakée tulông meudeungong di ateueh-ateueh bukét.
6 Ureuëng Siria jiteuka deungon guda dan geuritan prang, ureuëng Elam meusinjata busur dan aneuk panah, seudangkan ureuëng Kir jipeusiab laju peurisée jihnyan.
7 Pantôn-pantôn nyang gumbô dan subo di Yehuda ka peunoh deungon geuritan prang. Pasokan meuguda ka siab di pintoe-pintoe geureubang Yerusalem.
8 Mandum peutahanan Yehuda reuloh. Bak masanyan, gata tapeureksa alat-lat prang di gudang sinjata.
9 Gata le that tateumé ngieng reutak-reutak di timbok banda Yerusalem nyang peureulée teupeugöt. Gata tapeureksa mandum rumoh-rumoh nyang na di Yerusalem, tareulöh napadub boh lamkawan nyan dan tacok batée jihnyan keu tapeugöt keu bintéh-bintéh beuton banda. Keu gata peusapat ié,
11 gata laju tapeugot kulam lam banda dan tatampong ié nibak kulam awai. Teuma gata hana tapeurati Po teu Allah nyang ka treb that geureuncana banmandum nyan, dan nyang teupeusabab nyan teujadi.
12 Bak watée nyan TUHAN Nyang Mahamanyang dan Mahakuasa geuyue ubak gata tamo ngon tameuba-e, tacuko ôk ateueh ulée dan gata sok ija krông.
13 Teuma sikeubit jih, gata meuseunang-seunang dan meupesta. Gata neusie leumô dan bubiri, gata makheun uengkot sie dan tajieb ié anggô sira gata tawök, "Jak geutanyoe ta makheun dan ta jieb ié, sabab singoh geutanyoe ka maté!"
14 TUHAN Nyang Mahamanyang dan Mahakuasa geupeugah droe ubak ulôn sira geukheun, "Keubit, keujeuhetan awaknyan hana teuma Ulôn peuamphon sampoe awaknyan maté. Ulôn, TUHAN, ka Lôn peugah haba."
15 TUHAN Nyang Mahamanyang dan Mahakuasa geuyue ubak ulôn mangat lôn jak meurumpok ngon Sebna, nyang jeuet keu ulée rumoh tangga meuligoe, mangat lôn peugah ubak gobnyan peusan TUHAN nyoe,
16 "Gata pike gatanyoe soe? Peue hak gata sampoe gata jakpheuet keudroe jrat gata di bukét batée?
17 Awaih, Ulôn kutiek gata sampoe jiôh. Gata Lôn teugöm dan Lôn gulong-gulong laju Lôn guleng lagée boh ban u nanggroe nyang raya. Disideh gata maté bak binéh geuritan-geuritan keubanggaan gata. Gata ka tapeukuto nan keuluwarga teungku amphon gata.
19 Sabab nyan gata Lôn peucat nibak jabatan gata dan Lôn peutron pangkat gata nyang manyang.
20 Bak watée nyan Ulôn tawök hamba Ulôn Elyakim bin Hilkia.
21 Peukayan meupangkat dan talo keuieng gata Lôn peungui keu gobnyan. Peue mantong keukuasaan gata teuma ulôn jok ubak gobnyan. Gobnyan jeuet keu bapak keu peunduduek Yerusalem dan Yehuda.
22 Gobnyan meukuasa peunoh dimiyueb raja keuturonan Nabi Daud. Gobnyan geumat gunci keurajeuen. Meunyoe gobnyan nyang peuhah, hana ureuëng nyang hase jitôb, dan meunyoe gobnyan nyang tôb, hana teuma ureuëng nyang hase jipeuhah.
23 Gobnyan Ulôn bri keududuekan nyang kong lagée pasak nyang meukeumat kong that nibak bintéh beuton. Mandum keuluwarga gobnyan jihoreumat sabab lé gobnyan.
24 Teuma kawöm keurabat dan tanggongan jih nyan jeuet keubeuban bagi gobnyan. Syedara jihnyan jipeusadeue droe ubak gobnyan, lagée kanot dan beulangong meugantung-gantung nibak pasak.
25 Meunyoe nyan teujadi, laju pasak nyang teuglong deungon kong that teuma lheueh dan rhot. Dan nyan kheueh keuneulheuh kawöm keuluwarga dan mandum ureuëng nyang jipeusadeue droe ubak gobnyan. Ulôn, TUHAN, ka Lôn peugah haba."


Chapter 23

1 Nyoe kheueh peusan keuhai Tirus. Hai neulayan-neulayan Tarsis nyang harong laôt raya, meuba-e kheueh! Watée meulayeue woe di Siprus, ubak gata teubri tée bahwa banda Tirus ka hanco. Peulabohan dan rumoh-rumoh gata ka jeuet keu rungka-rungka.
2 Aloh alah kheueh, hai peunduduek nyang tinggai di seutôt binéh pasi, saudaga-saudaga Sidon! Sabab lazem jih gata neukirém ureuëng u meurandeh laôt keu jak bloe peubloe gandom Meusé dan keu teujak meukat deungon meubagoe bansa.
4 Hei banda Sion, keuhoreumat gata ka gadôh! Laôt raya nyang lhok hana jiaku gata le, jipeugah, "Ulôn hántom lom lôn meu aneuëk, hántom lom lôn peurayeuk aneuëk agam atawa aneuëk inong."
5 Dan ureuëng nanggroe Meusé pih teukeujot dan geumpa meunyoe jideungoe bahwa Tirus ka teupeubinasa.
6 Moba-e kheueh, dan meungungsi kheueh u Tarsis, hai peunduduek binéh pasi!
7 Kalon kheueh banda gata Tirus nyang ka na phon yoh ilée. Nyoe kheueh banda nyang lazem jih meuseunang-seunang? Nyoe kheueh banda nyang lazem jih geukirém ureuëng u meurandeh laôt keujijak meuranto disinan?
8 Bukon kheueh saudaga-saudaga jih kawöm bansawan nyang paleng jihoreumat di ateueh bumoe? Soe nyang cok peunutôh keu teupeurhot Tirus, banda nyang paleng meukuasa nyoe?
9 TUHAN Nyang Mahakuasa, Gobnyan kheueh nyang cok keuputosan nyan. Gobnyan nyang peuputôh mangat geupeuhabéh keusombongan peunduduek geuh ateueh peue mantong hase nyang ka awaknyan teumé, dan teupeumiyueb ureuëng-ureuëng nyang teuhoreumat di ateueh bumoe.
10 Tajak meubuet laju u ladang gata, hai peunduduek Tarsis, sabab bengkée kapai ka hana le.
11 TUHAN ka geuleueng jaroe Gobnyan di ateueh laôt dan geuguleng bubena keurajeuen nanggroe. Gobnyan nyang bri peurintah mangat jeuet kuta-kuta Funisia teupeumuseunah banmandum.
12 Feureuman TUHAN, "Hei banda Sidon! Gata hana meuseunang-seunang le. Peunduduek gata teutegon ngon teutindéeh. Bahpi awaknyan meungungsi u Siprus, awaknyan teutab hana aman." (
13 Bukon bansa Asyur, na kheueh bansa Babel nyang peubiyeu banda Tirus jikuasa lé beulatang buih. Awaknyan kheueh teuma nyang peudong meunara-meunara teukeupong, nyang peureulöh kuta-kuta jih dan jipeujeuet banda nyan meurungka-rungka.)
14 Meuba-e kheueh, hai peulaôt-peulaôt! Banda nyang gata peubangga ka habéh hanco.
15 Teuma teuka watée jih Tirus jipeutuwo nyang treb jih tujoh ploh thon, sadub deungon umu sidroe raja. Meunyoe ka liwat watée nyan, Tirus teuma jeuet lagée inong jeuhet lagée lam ca-e nyoe:
16 Jakcok kheueh keucapi, keulileng kheueh banda, hai inong jeuhet malang nyang teupeutuwo! Peutek kheueh keucapi, meuca-e kheueh lom, mangat gata ji ingat lom teuma.
17 Óh ka habéh watée nyang tujoh ploh thon nyan, TUHAN teuma geupeu ingat ubak Tirus dan geupeu mungken jihnyan jipeubuet buet nyang ka awai ilée. Gobnyan meuniaga deungon mandum keurajeuen di ateueh muka bumoe.
18 Laba dan upah nyang jiteurimong hana jikeubah, teuma jipeuseumah ubak TUHAN. Ureuëng-ureuëng nyang seumah TUHAN jipeuguna péng nyan keu jibloe bahan peunajoh nyang jipeureulée.


Chapter 24

1 TUHAN geupeubinasa bumoe, sampoe bumoe nyan ka jeuet keu tandus dan seungue. Gobnyan geubalek muka bumoe nyan dan peunduduek disinan geupeu crebre.
2 Banmandum ureuëng teuma jirasa naseb nyang saban: teungku-teungku imeum dan rakyat, namiet nyang teubloe dan amphon-amphon, nyang meubloe dan nyang peubloe, nyang pinjam dan nyang jôk pinjam, nyang kaya dan nyang gasien.
3 Bumoe teung bayeung dan geupeuhanco. TUHAN ka meufeureuman, dan hainyan pasti teujadi.
4 Bumoe nyoe jeuet keu to dan layée, bansaboh donya meurana. Meunan cit langét dan bumoe pih meurana meusajan teuma.
5 Bumoe ka jeuet keu kuto sabab peunduduek disinan ka habéh ji iengkeue ubak mandum peurintah Allah, ji ubah peue-peue nyang ka geupeuteutab dan ji iengkeue ubak janji nyang ka geupeugét deungon awaknyan keu siumu masa.
6 Sabab nyan kheueh TUHAN ka geukutok bumoe dan geuhuköm peunduduek disinan sabab buet jih keudroe. Awaknyan geutot sampoe hangöh dan bacut sagai nyang na seulamat.
7 Bak anggô udeb meurana dan ié anggô payah that meuteumé. Ureuëng nyang yoh masa ilée galak até bak saát nyoe ka seudeh.
8 Su peutek keucapi nyang riang hana teudeungoe le, su péh rapa-i nyang geumbira pih ka hana le. Dan su ureuëng nyang subra meusukaria nyan pi ka seungab.
9 Hana le ureuëng jieb anggô sira meuca-e, dan hana le nyang peuturot lazat deungon ié kreueh.
10 Bansaboh banda ka karu; mandum pintoe rumoh teugunci sabab nyang duek dirumoh nyan teumakot raya.
11 Ureuëng-ureuëng ramé ka jimeu kuk-kuk bak rot ueh raya sabab ié anggô ka hana le. Hana le keugeumbiraan di nanggroe nyan keu siumu masa.
12 Banda ka hanco meukeupeng-keupeng, dan pintoe-pintoe geureubang pih ka teung bayeung hana le meuguna.
13 Nyan kheueh nyang teujadi bansaboh bumoe di tieb-tieb bansa. Saban haijih lagée musém pot boh kayée, watée boh zaiton teupot sampoe habéh dan boh anggô nyang keu neulheuh teupot di ateueh bak.
14 Ureuëng-ureuëng nyang seulamat meuca-e geumbira. Ureuëng di barat jipeusampoe keuhai keu agongan TUHAN
15 dan ureuëng di timu jipujoe Gobnyan. Peunduduek di binéh pasi jipeu agong TUHAN, Po teu Allah Israel.
16 Phon ujong bumoe teudeungoe su ca-e seumeujo keu Israel, bansa nyang taát. Teuma ceulaka kheueh ulôn! Ulôn meurana! Peungkhianat teutab mantong jikhianat, dan awaknyan seumaken meukianat.
17 Deungoe kheueh, hai banmandum peunduduek bumoe! Keugeumparan, peurangkab dan taron jipreh-preh gata.
18 Ureuëng nyang jipeuplueng droe nibak keugeumparan rhot lam peurangkab, dan ureuëng nyang hana keunong lam peurangkab teuma keunong taron. Ujeuen raya jitöh di langét, dan bumoe pih meuhayak.
19 Bumoe crah, reumok dan guyah.
20 Ban bumoe meuapit-apit lagée ureuëng mabök, dan meuhayak lagée jambo lam angén badée raya. Bumoe teupeuro sabab desya nyang brat. Jih nyan hanco dan hana meubeudôh le.
21 Bak watée nyan TUHAN geuhuköm ureuëng nyang mat kuasa angkasa raya dan raja-raja di ateueh bumoe.
22 Awaknyan jigumpôi meusajan-sajan lagée tahanan di dalam uruek, dan geurhom u dalam glab sampoe watée teuhuköm.
23 Buleuen jeuet keuseupôt dan mata uroe pih hana le meucahya, sabab TUHAN Nyang Mahakuasa geumat peurintah sibagoe raja. Gobnyan geumat peurintah di Yerusalem, di ateueh Bukét Sion, dan geutunyok keu angongan Gobnyan ubak banmandum peupimpén umat Gobnyan.


Chapter 25

1 TUHAN, Droeneueh kheueh Allah ulôn, lôn peuagong Droeneueh dan lôn pujoe nan Droeneueh. Sabab karya-karya Droeneueh keubit that takjub; Droeneueh nyang reuncana phon yoh ilée, dan neupeubuet deungon seutia.
2 Banda nyan ka neupeuhanco; banda meukuta nyan ka jeuet keu rungka-rungka. Meuligoe nyang jipeudong lé ureuëng aséng ka habéh hanco, dan hana jipeudong le keu siumu masa.
3 Droeneueh jipujoe lé bansa-bansa nyang teuga, dan jitakot di banda-banda bansa-bansa nyang keujam.
4 Sabab Droeneueh jeuet keuteumpat meu-ungsé keu ureuëng nyang leumoh, teumpat nyang aman nibak ureuëng gasien watée meukarat. Droeneueh kheueh peulindong nibak angén badée, teumpat meupayong lé uroe criet nyang meutala. beuliong watée ujeuen teuka,
5 lagée angén seu-uem bak tanoh nyang tho kreng. Teuma Droeneueh neupeujeuet musoh kamoe hana jeuet jipeuhah babah, neupeupiôh su ureuëng-ureuëng keujam nyang meudumpék, lagée meupayong bak awan nyang teupeugadôh tutông uroe tarek.
6 Di Bukét Sion, TUHAN Nyang Mahakuasa geupeusiab peujamuan keu banmandum bansa di ateueh donya. Gobnyan geuhidang peunajoh nyang paleng lazat dan ié anggô nyang teupiléh.
7 Di ateueh bukét nyan, Gobnyan teusalôb awan keuseudehan nyang teupeukeulubong bubena bansa.
8 TUHAN Nyang Mahakuasa geupeubinasa mawöt keu siumu masa! Gobnyan geusampôh ié mata di tieb-tieb muka, dan geupeujiôh keuhinaan nyang jitanggong lé umat Gobnyan bansaboh bumoe. TUHAN ka geumeufeureuman, dan hainyan pasti teujadi.
9 Bak watée nyan ureuëng laén jipeugah, "Sikeubit jih, Gobnyan kheueh Po teu Allah geutanyoe; Gobnyan kheueh nyang ta preh-preh, mangat geutanyoe geupeuseulamat. Beutôi that, nyoe kheueh TUHAN; Gobnyan kheueh nyang ta preh-preh. Jinoenyoe tanyoe seumurak meuhubô, sabab Gobnyan ka geupeuseulamat geutanyoe."
10 TUHAN geulindong Bukét Sion, teuma Moab geu gilo-gilo lagée jumpueng lam teumpat bröh.
11 Peunduduek disinan jisunyueng jaroe Lagée ureuëng keuneuk meulangue. Teuma TUHAN geupeuhina keu angkohan awaknyan sampoe awaknyan hana meudaya.
12 Kuta-kuta Moab meunan cit deungon beuton-beuton jih nyang manyang-manyang geureulöh dan laju geutiek u ateueh tanoh sampoe hanco meuabée.


Chapter 26

1 Bak uroenyan ureuëng laén jimeuca-e deungon ca-e nyoe di tanoh Yehuda: "Alangkah kong jih banda geutanyoe; Po teu Allah keudroe nyang peudong beuton jih, disinoe geutanyoe seulamat.
2 Peuhah kheueh laju bubena babah pintoe geureubang, mangat jitamong bansa nyang seutia, bansa nyang jitem peubuet keuheundak Allah jih.
3 TUHAN, Droeneueh nyang bri damé dan seujahteura keu ureuëng nyang kong até, sabab ureuëng nyan peucaya ubak Droeneueh.
4 Peucaya kheueh ubak TUHAN mantong, sabab TUHAN Allah sabe geulindong geutanyoe.
5 TUHAN geuhina ureuëng nyang cungkak; Gobnyan nyang peuhanco banda awaknyan nyang meukuta, dan geupeurata deungon tanoh.
6 Ureuëng-ureuëng gasien dan ureuëng seungsara teuma jigilo-gilo ureuëng nyan."
7 Ureuëng jujoe jijak ateueh jalan nyang teupat, sabab Droeneueh, TUHAN, geurinteh jalan keu jihnyan.
8 Kamoe seutôt keuputosan Droeneueh, ya TUHAN, dan kamoe meupreh-preh Droeneueh; Droeneueh kheueh nyang kamoe pujoe dan teumpat kamoe peulaboh até kamoe nyang rindu.
9 Jiwa ulôn teutab rindu ubak Droeneueh meunyoe malam ka teuka, até ulôn meuharab Droeneueh óh watée beungoh. Meunyoe Droeneueh neupeu hakém bumoe nyoe bak saboh saát, peunduduek donya teuma jiteupeue peue nyang beuna.
10 Bahpi ureuëng jeuhet jipeusaneut deungon jroh that, jihnyan teutab hana jimeurunoe peue nyang beuna. Di nanggroe huköm pih jihnyan jipeubuet jeuhet, dan hana jitem angkée kuasa TUHAN.
11 TUHAN, Droeneueh ka siab neuhuköm musoh Droeneueh, teuma awaknyan hana jiteupeue. Bah kheueh awaknyan malée teusipu-spu jingieng geunaséh Droeneueh keu umat Droeneueh. Bah kheueh awaknyan habéh hana tinggai meusidroe lé huköman nyang Droeneueh keubah keu awaknyan.
12 TUHAN, Droeneueh nyang peugot kamoe seujahteura; peue mantong nyang kamoe peubuet, Droeneueh kheueh nyang peubuet nyan keu kamoe.
13 Kamoe ka lheueh jikuasa lé amphon-amphon nyang laén, teuma teutab Droeneueh kheueh nyang kamoe aku, ya TUHAN, Allah kamoe!
14 Awaknyan ka meuninggai dan hana udeb le, areuwah jih hana jibeudôh le. Sabab awaknyan ka habéh neupeubinasa dan neusampôh nibak ingatan.
15 Droeneueh ka neulipat ganda kamoe nyoe, umat Droeneueh, ya TUHAN, dan neupeuluwah wilayah kamoe, lé nyan kheueh Droeneueh teupeu agong.
16 Droeneueh ka neuhuköm kamoe; watée meuseupet kamoe meupaleng ubak Droeneueh, dan meudoá ubak Droeneueh, ya TUHAN
17 Lagée ureuëng inong keuneuk peulahé aneuëk áh éuh teubot-bot ngon teuleuntek-leuntek bak geupeuteun sakét, meunan kheueh kamoe nyoe, dikeue Droeneueh, ya TUHAN.
18 Kamoe raya pruet dan teubot-bot sabab sakét, teuma sapeue hana kamoe peulahé; hana kamoe bri keuseulamatan keu donya, dan hana teuma teutamah peunduduek jih.
19 Umat Droeneueh nyang maté teuma udeb lom, manyét-manyét awaknyan teuma jibeudôh lom. Ureuëng nyang ka teukubu lam tanoh jibeudôh sira jiseumurak ngon meuhubo. Lagée iémbon nyang peuseugar bumoe, Droeneueh neupeu udeb umat Droeneueh nyang ka treb maté.
20 Tamong kheueh u dalam rumoh gata, hai bansa ulôn, dan gata tôb kheueh pintoe gata. Neumusöm kheueh meu sikeujab sampoe meureuka TUHAN ka reuda.
21 TUHAN teuma geutron nibak teumpat Gobnyan meutahta di dalam syeuruga keu geuhuköm peunduduek bumoe kareuna desya awaknyan keudroe. Poh gobnyan maté nyang awaknyan peubuet deungon musöm-musöm teuma geupeuleumah. Tanoh hana le geuseubée ubak ureuëng-ureuëng nyang maté keunong poh.


Chapter 27

1 Bak masa nyan TUHAN geupeuguna peudeueng Gobnyan nyang khong dan tajam keu geuhuköm Lewiatan, uleue nyang meuglong-glong dan meupalet-palet nyan, dan keu teupoh maté naga laôt.
2 Bak watée nyan TUHAN teuma meufeureuman, "Meuca-e kheueh keuhai lampôh anggô Lôn nyang ceudah.
3 Ulôn, TUHAN, nyang jaga nyan; tieb-tieb watée Ulôn jak siram, uroe malam Ulôn jaga, mangat bék na ureuëng peukaru.
4 Ulôn hana meurasa beungéh le. Seukira jih na naleueng atawa tamah nyang meuduro, Ulôn teuma basmi, dan Lôn tot sampoe habéh bube nyang na.
5 Teuma meunyoe musoh-musoh umat Lôn jimita peulindongan nibak Ulôn, bah kheueh awaknyan meudamé deungon Ulôn, bit, meudamé kheueh deungon Ulôn."
6 Nibak watée nyang teuma teuka, bansa Israel teuma jeuet lagée bak kayée nyang meu ukeue dan meukeumang, dan peunoh di ateueh muka bumoe deungon boh-boh nyang na nibak jih nyan.
7 TUHAN geuhuköm umat Gobnyan hana saban brat jih lagée Gobnyan geuhuköm bansa-bansa nyang jimeumusoh awaknyan. Gobnyan hana geupoh maté umat Geuh lagée Gobnyan geupoh maté musoh Geuh.
8 TUHAN geuhuköm umat Gobnyan deungon cara geuböih awaknyan u nanggroe laén. Gobnyan geu use awaknyan deungon angén jeuhet nyang teuka di timu.
9 Teuma desya-desya bansa Israel nyan barô kheueh hase geusampôh meunyoe miseubah dewa-dewa geugileng sampoe halôh lagée teugileng gapu. Bubena dupa dan lambang dewi Asyera geupeuhanco sampoe rata.
10 Banda nyang meukuta nyan ka jeuet keu seungue dan jitinggai lagée blang beulantara nyang kosong. Kawan beulatang peulara jimeurot naleueng nyang na disinan sira jipiôh dan bubena ôn-ôn nibak deun-deun kayée.
11 Meunyoe ranteng-ranteng jih singoh ka tho kreng dan patah, laju jijak bubena ureuëng inong jicok ranteng kayée nyan jeuet keu kayée apui. Bansa nyan hana muphom sapeue, Po teu Allah geucebta nyan hana teuma geugaséh awaknyan.
12 Bak watée nyan TUHAN laju geupeusapat bansa Gobnyan phon sidroe ubak sidroe di Krueng Efrat sampoe trok u bataih nanggroe Meusé. Gobnyan geupeu aséng awaknyan lagée ureuëng nyang ji peuaséng aneuk gandom lam sikéum jih.
13 Watée nyan geuyueb beureuguih raya keu teutawök mandum ureuëng Israel nyang geuböih di Asyur dan di Meusé. Awaknyan jiteuka u Yerusalem keujijak seumah TUHAN nibak bukét Gobnyan nyang suci.


Chapter 28

1 Ceulaka kheueh banda nyang ka jeuet keubanggaan bubena ureuëng mabök Israel! Keu indahan jih ka jeuet keu layée lagée keunarang bungöng nyang na lagée ateueh ulée awaknyan. Cilaka kheueh banda nyang teudong cot óh manyang bak teungoh pantôn nyang subo, keubanggaan ureuëng-ureuëng nyang mabök siteungoh maté.
2 TUHAN geu kirém sidroe ureuëng nyang teuga dan peukasa. Teuka lagée angén badée meusajan deungon ujeuen es, lagée ujeuen raya dan ié raya nyang jipeuhanyot peue-peue nyang na. Deungon that beungéh Gobnyan geusumpom awaknyan ateueh tanoh.
3 Keubanggaan peumimpén-peumimpén nyang mabök nyan teuma geugilo-gilo.
4 Banda awaknyan nyang meugah ngon meusyeuhu nyang ka phon layée nyan teuma leunyab. Naseb jih lagée naseb boh ara nyang masak sigohlom trok bak musém; meunan jikalon, laju jipot dan jipajoh.
5 TUHAN Nyang Mahakuasa geupeujeuet keunarang bungöng nyang ceudah keu umat Gobnyan nyang na mantong tinggai sidroe-droe teuk.
6 TUHAN geubri rasa seudeh keu mandum hakém, dan keubeuranian keu ureuëng-ureuëng nyang meutugaih jijaga banda nibak jiprang lé musoh.
7 Meunan cit bubena nabi-nabi dan teungku-teungku imeum ka habéh mabök sabab lumpah that le jijieb ié anggô dan ié arak. Awaknyan watée jijak badan jih ka meu ayon-ayon dan gaki jih meugantoh-gantoh sabab pikeran awaknyan ka hana meuteuntée. Nabi-nabi ka hana le hase geukeumalon peue nyang geubri hai-hai nyang jeuet geungieng lé Po teu Allah ateueh awaknyan. Meunan cit di teungku-teungku imeum ka hana le hase geupeuputôh peukara-peukara nyang jipeuhadab ubak awaknyan.
8 Ateueh meuja awaknyan ka peunoh deungon muntah, sa ka hana le teumpat nyang gleh.
9 Awaknyan meupeukeran ubak ulôn, laju jipeugah, "Geupike gobnyan soe nyang geupeuruno? Soe teuma nyang peureulée nyang peutrang hai nyan? Geupike lé gobnyan geutanyoe nyoe aneuëk manyak nyang barô teusapih?
10 Ci neupike ék kheueh beutôi Gobnyan geupeurunoe geutanyoe sira geu peuija hurof deumi hurof, haba deumi haba, kalimat deumi kalimat."
11 Meunyoe gata hana tatem deungoe ulôn, TUHAN teuma geukirém ureuëng aséng mangat jijak peurunoe gata keuhai logat ganje dan basa aséng.
12 TUHAN geupeutaba teumpat peuniyôh keu gata banmandum, teuma gata hántatem deungoe Gobnyan.
13 Lé sababnyan kheueh TUHAN geupeurunoe gata hurof deumi hurof, haba deumi haba dan kalimat deumi kalimat. Dan watée gatajak gata reubah meulinteung sampoe luhok, teucarueh dan keunong teun.
14 Deungoe kheueh peue nyang geufeureuman lé TUHAN, hai ureuëng-ureuëng peuhina nyang mat peurintah rakyat di Yerusalem!
15 Gata tapeugah bahwa gata ka lheueh tapeugét peujanjian deungon mawöt dan tapeugét peusitujuan deungon donya ureuëng maté. Gata ka meurasa pasti bahwa beuncana nyang teuka nyan hana keunong ateueh gata, sabab gata tapeuguna tipée muslihat mangat teulindong droe keudroe gata.
16 Lé sabab nyan, TUHAN Nyang Mahamanyang laju geumeu feureuman lagée nyoe, "Ulôn teuma kupeuduek dasai nyang khong dan kukôh di Sion; sineuk batée keunaleueng nyang meuyuem deungon tulesan: 'Soe nyang peucaya teuguh, hana jimeunyeurah taloe.'
17 Keuadelan Ulôn peujeuet talo peu-uko, dan keujujoran Ulôn peujeuet keu talo sineupat." Ujeuen batée jisampôh gleh banmandum sulet nyang gata peubangga. Ié raya jipeuhanyot teumpat musöm gata.
18 Peujanjian gata deungon mawöt dan peuseutujuan gata deungon donya ureuëng maté nyan geupeubateue, dan meunyoe beuncana nyan teuka, gata hanco teugilo-gilo.
19 Gata jiteuka malang hana piôh-piôh nyang harôh tatanggong tieb-tieb uroe, beungoh, uroe dan malam. Gata yo ngon teumakot meunyoe gata muphom peusan Po teu Allah.
20 Gata lagée ureuëng nyang keuneuk teungéut ateueh peuratah nyang kureueng panyang keu teumpat peunyue droe. Dan ija seulimbot gata pih kureueng luwah keu keusilimbot gata.
21 TUHAN geubeudôh lagée Gunong Perazim. Gobnyan meujuang lagée di Pantôn Gibeon mangat peubuet meukeusut Gobnyan, meukeusut nyang ganje nibak manusia! Gobnyan geulaksana buet Gobnyan nyang luwabiasa.
22 Ulôn ka lheueh lôn deungoe keuputosan Po teu Allah Nyang Mahamanyang dan Mahakuasa keu peuhanco bansaboh nanggroe. Bék tapeujayeh tutoe haba peuingat nyang ulôn peusampoe nyoe. Eunteuk jeuet keu leubeh sulet nibak gata keutapeusie droe!
23 Deungoe kheueh tutoe haba lôn, simak kheueh peue nyang ulôn peusan.
24 Sidroe ureuëng tani hana sabe-sabe jimeu ué, ceumangkôi dan jimeumpoe tanoh droe jih mangat jipula.
25 Meunyoe tanoh jihnyan ka siab, ureuëngnyan laju jitabu bijéh, miséue jih jintan itam dan jintan putéh. Gobnyan jipula dua macam gandom meubareh meuatoe, dan nibak binéh nyan seunaman laén.
26 Ureuëng nyan jiteupeue cara teupeubuet atranyan, sabab ka geupeurunoe lé Po teu Allah jih.
27 Ureuëng nyan hana jingui eretan ceumeulo keu teulô jintan itam dan ruda geurubak keu teuguleng jintan putéh. Keu nyan jipeuguna reunong nyang ámpong.
28 Watée teulô boh gandom, boh gandom nyang teulô nyan hana kayém that jiseupôt sampoe án hanco. Bukon lagée nyan! Ureuëng nyan jiteupeue cara ceumeulo nyang paih deungon cara jipeu ék geurubak u ateueh nyan deungon hana jipeuhanco aneuk-aneuk gandom nyan.
29 Keubijaksanaan nyan teuka jih nibak TUHAN Nyang Mahakuasa. Bandum reuncana TUHAN bijaksana dan sabe meuhase.


Chapter 29

1 Ceulaka kheueh banda Yerusalem nyang jipeunan miseubah Allah! Ceulaka kheueh banda teumpat Nabi Daud peudong khimah! Bah kheueh thon-thon gantoe meugantoe deungon peurayaan-peurayaan.
2 Teuma Po teu Allah geupeuteuka beuncana ateueh banda nyan, sampoe ureuëng ramé meurang-rang dan apoh-apah. Bansaboh banda ka lagée miseubah nyang bulut meulabo deungon darah.
3 Po teu Allah geuseurang banda nyan dan geukeupong rot meubagoe peunjuru.
4 Yerusalem ka lagée banda hantu nyang jiuseuha keu jipeudeungoe su gobnyan rot lam tanoh, su nyang reudok teuka lam abée.
5 Teuma banda ureuëng aséng nyang keujam gadôh lagée abée atawa lagée sikéum nyang jipöt lé angén. Deungon sikreb-sikreb dan hana teusangka-sangka.
6 TUHAN Nyang Mahakuasa geupeubeubaih banda nyan deungon angén badée dan geumpa bumoe nyang lumpah dahsyat. Gobnyan geupeutron angén puteng beuliong dan apui hu meuháb-háb sira jimeulieh keudeh keunoe.
7 Laju banmandum pasokan aséng nyang seurang banda Yerusalem, teuma banda miseubah Po teu Allah nyan, banmandum nyang keupong dan nyang heuntam banda nyan, teuma gadôh lagée lumpo watée malam.
8 Bansa-bansa nyang meusapat keuneuk jiseurang Yerusalem lagée ureuëng deuk nyang meulumpo teungoh jimakheun, laju jibeudôh deungon pruet söh, atawa lagée ureuëng nyang lumpah that glah nyang meulumpo teungoh jijieb ié, laju jibeudôh deungon rukueng jih nyang tho.
9 Hana putôh teuhireuen-hireuen dan jipet mata lagée ureuëng buta! Jeuet kheueh gobnyan keu ureuëng mabök, teuma bukon lé sabab jijieb ié anggô. Jijak laju ngon badan meu apit-apit, teuma bukon lé sabab jijieb ié arak.
10 TUHAN geupeujeuet gata teungéut mata dan gata-éh deungon sineunya. Gobnyan nyang tôb mata bubena nabi dan geupeupayong mata ureuëng nyang keumalon.
11 Makna tieb-tieb nyang teukalon teusöm keu gata, lagée kitab nyang teuséegée. Meunyoe kitab nyan teuba ubak sidroe-droe ureuëng nyang jeuet geubeuet mangat gobnyan geubeuet keu gata, gobnyan teuma jipeugah bahwa geuhnyan hana carông, sabab kitab nyan ka teuséegée.
12 Meunyoe jiba ubak ureuëng nyang buta hurof, ureuëng nyan teuma jijaweueb bahwa jihnyan hana jeuet meubaca.
13 TUHAN meufeureuman, "Ureuëng-ureuëng nyan jiseumah Ulôn deungon tutoe haba, teuma até awaknyan jiôh nibak Ulôn. Agama awaknyan teuma peuratoran manusia nyang jiapai mantong.
14 Lé sababnyan awaknyan Ulôn peukeujot deungon Lôn heuntam meu-ulang-ulang. Ureuëng nyang bijaksana teuma jeuet keubangai, dan banmandum iéleumé nyang na nibak awaknyan hana meuguna."
15 Ceulaka kheueh ureuëng nyang jiuseuha jipeusöm-söm reuncana jih nyan ubak TUHAN! Awaknyan jimeubuet deungon seungab-seungab, dan jipeugah hana meusidroe na kalon atawa nyang teupeu peue nyang awaknyan peubuet.
16 Peue mantong jiputa balek lé awaknyan. Toh kheueh nyang leubeh peunteng, tukang beulangong atawa tanoh kliet? Peu kheueh mungken nyang teupeugét jipeugah keu nyang peugét jihnyan, "Bukon droeneueh nyang peugét ulôn"? Atawa peu kheueh carông jipeugah lé beunda nyan ubak jihnyan, "Gata hana jeuet sapeue"?
17 Na peupatah nyang su jih lagée nyoe, "Hana treb le gle ka jeuet keu tanoh teumpat meulampôh, dan tanoh lampôh nyan jigisa lom jeuet keu tanoh gle."
18 Bak watée nyan di ureuëng tulo hase jideungoe tutoe haba nibak saboh kitab nyang teubaca, dan ureuëng buta nyang yoh awaikon bunoe ka udeb di dalam seupôt teuma hase jikeumalon.
19 Ureuëng-ureuëng gasien dan hina geurasi lom keubahgiaan nyang ka geubri lé Po teu Allah kudus Israel.
20 Nyan kheueh keuneulheuh ureuëng-ureuëng nyang tindéeh ureuëng laén dan jihina Po teu Allah. Po teu Allah teuma geupeubinasa mandum ureuëng meudesya,
21 ureuëng nyang galak buet fiteunah, ureuëng nyang tam mangat ureuëng jeuhet bék teuhuköm, dan ureuëng nyang peutabu haba-haba sulet mangat ureuëng jujoe bék meuteumé keuadelan.
22 Sabab nyan, TUHAN, Po teu Allah Israel nyang peubeubaih Nabi Ibrahim, jinoe geupeugah, "Bansa Ulôn, gata hana jihina le dan wajah gata hana pucat le sabab malée.
23 Sabab watée gata ngieng aneuëk-aneuëk gata nyang Ulôn bri keu gata, teuma gata meungaku bahwa Ulôn kheueh Po teu Allah nyang kudus Israel. Gata tahoreumat Ulôn dan tatakot keu Ulôn.
24 Ureuëng bangai jimeurunoe muphom dan ureuëng nyang sabe tunu teuma galak teupeurunoe."


Chapter 30

1 TUHAN meufeureuman, "Ceulaka kheueh bubena peumimpén Yehuda, sabab awaknyan jibeurontak keu Ulôn. Awaknyan jiseutôt reuncana nyang kon teuka nibak Ulôn. Awaknyan jiteken peujanjian nyang hana sisuai deungon keuheundak Ulôn. Dan meutumpok-tumpok kheueh desya awaknyan.
2 Awaknyan jijak u nanggroe Meusé deungon hana jilakée keuputosan Lôn. Awaknyan meulindong di nanggroe Meusé dan meuharab geutulông lé raja Meusé.
3 Teuma raja nyan jibri keucewa keu awaknyan, dan peulindongan nyang jiharab di Meusé nyan gagal.
4 Bahpi utosan-utosan Yehuda ka trok u banda-banda Zoan dan Hanes di nanggroe Meusé,
5 mandum ureuëng teuma jiteuka malée sabab ka jimeuharab ubak bansa nyang hana meuguna nibak awaknyan. Nyang awaknyan teumé bukon kheueh laba atawa sinulông, teuma na kheueh peunghinaan."
6 Meunoe kheueh feureuman TUHAN keuhai beulatang-beulatang nyang na tinggai nibak tanoh seulatan, "Bubena utosan jipeudieng u ateueh keuleudée dan unta awaknyan deungon hadiah-hadiah, laju jijak rot daerah nyang peunoh deungon mara bahya nyang jikeumiet lé singa, uleue meubisa dan naga meusayeub. Hadiah-hadiah nyan awaknyan peuseumah ubak saboh bansa nyang toh bansa nyan hana ék jitulông awaknyan.
7 Bantuan nanggroe Meusé peucuma mantong. Sabab nyan nanggroe Meusé nyan Ulôn gala nan, 'Naga nyang hana meubahya'."
8 Po teu Allah geupeurintah ubak ulôn mangat ulôn cetet buet-buet nyang jeuhet nyang jipeubuet lé umat Gobnyan lam saboh kitab sibagoe peuingat keu siumu masa.
9 Sabab, awaknyan bansa nyang paleng galak beurontak ubak Po teu Allah, galak meusulet dan hana jitem deungoe ajaran TUHAN.
10 Awaknyan jipeugah ubak dumna nabi, "Neutôb babah droeneueh! Bék neupeugah ubak kamoe peue nyang beuna, teuma nyang jeuet neupeugah ubak kamoe na kheueh peue nyang kamoe tem deungoe. Bah kheueh kamoe teutab udeb lam meukhayal.
11 Jak wéh kheueh laju, dan neucok kheueh rot laén. Bék neupeukaru kamoe deungon Allah kudus Israel."
12 Sababnyan Po teu Allah kudus Israel laju geumeufeureuman lagée nyoe, "Gata tatulak haba Ulôn dan tapeubangga deungon buet teumindéeh dan teumipée.
13 Sabab nyan gata meusalah. Gata lagée bintéh beuton nyang manyang nyang ka reutak phon di ateueh sampoe u miyueb; deungon hana neusangka-sangka gata teuma teupuroe.
14 Gata reumok lagée beulangong tanoh nyang hanco meukeupeng-keupeng, sampoe lamkawan pempeng-pempeng nyan ka hana jeuet le keu ngon cok ngéue apui lam sinungkée atawa keu teutimok ié lam kulah."
15 TUHAN Nyang Mahamanyang, Po teu Allah kudus Israel, meufeureuman keu umat Gobnyan lagée nyoe, "Tobat kheueh dan teutab kheueh lam keuadaan teunang, teuma gata Lôn peuseulamat. Peucaya kheueh ubak Ulôn deungon até nyang teuntram, teuma gata Lôn bri teunaga." Teuma gata teutab hana tatem!
16 Malah gata tapeugét reuncana mangat tapeuplueng droe nibak musoh deungon keundeuraan guda nyang bagaih plueng. Gét that! Keubit gata singoh harôh taplueng! Gata pike guda gatanyan ka bagaih that jiplueng, padahai ureuëng-ureuëng tiyeub gata jiôh leubeh bagaih jiplueng.
17 Siribée droe teuma jiplueng watée jikalon ancaman sidroe kong musoh, dan ancaman na limong droe gata banmandum ka habéh taplueng. Lam pasokan gata nyang na tinggai saboh taméh bandera di ateueh pucak bukét.
18 Bahpih lagée nyan, TUHAN geupreh-preh watéejih keu geutunyok gaséh sayang Gobnyan keu gata. Gobnyan siab seudia keu geugaséh gata. Sabab TUHAN na kheueh Po teu Allah nyang peubuet peue nyang paih. Mubahgia kheueh ureuëng nyang meuharab ubak Gobnyan.
19 Hai gata nyang tinggai di Yerusalem, gata hana tamo sabe. TUHAN na gaséh sayang, dan deungon bagaih geujaweueb gata meunyoe gata lakée tulông ubak Gobnyan.
20 TUHAN geubri keu gata masa teu-ujoe nyang lumpah brat keugeupeurunoe gata. Teuma jinoenyoe Gobnyan keudroe nyang dampeng gata sampoe gata tarasa keuhaderan Gobnyan.
21 Meunyoe gata meusimpang nibak rot, dilikot gata teuma teudeungoe su nyang jipeugah, "Nyoe kheueh jalan gobnyan; seutôt kheueh jalan nyoe."
22 Patong-patong beurala gata nyang meulapéh deungon pirak dan méuh teuma gata tiek lagée tatiek kotoran, sira tapeugah, "Wéuh keudeh bék tô binéh ulôn!"
23 Meunyoe gata tasipreuk bijéh, TUHAN teuma geupeutron ujeuen mangat bijéh nyan timoh dan jipeuhase panen nyang meulimpah. Dan keu beulatang peulara gata teuma geupeuna blang naleueng nyang luwah that.
24 Leumô agam dan keuleudée nyang meu-ué blang gata teuma jipajoh peunajoh beulatang nyang paleng jroh nyang teupeuna seucara khusos.
25 Bak uroe kuta-kuta musoh gata nyan teukeupong dan ureuëng-ureuëng awaknyan teupoh maté, tieb-tieb gunong dan bukét teuma ji ile ié nyang jiteubiet lam gunong dan bukét nyan lagée aneuëk-aneuëk krueng.
26 Buleuen meucahya peungéh lagée mata uroe, dan mata uroe jeuet tujoh goe leubeh peungéh nibak buleuen nyan, lagée peungéh tujoh uroe teupeusapat jeuet keu siuroe. Bandum nyan jeuet jih bak uroe TUHAN geubalot dan geupeu ubat luka-luka umat Gobnyan nyang ka geupeu jra.
27 Keukuasaan dan keuagongan TUHAN leumah jih rot jiôh. Apui dan sab nyan tanda jih Gobnyan ka meureuka. Gobnyan geupeugah haba deungon awaknyan, dan tutoe haba Gobnyan seu-uem ngon tutông lagée apui hu.
28 Geukirém angén leubeh awai nibak Gobnyan lagée ié raya ngöb éuet takue nyang jipeuhanyot peue-peue nyang na. Gobnyan geupeubinasa bansa-bansa, dan geupeugagal reuncana-reuncana awaknyan nyang jeuhet.
29 Teuma gata, hai umat Po teu Allah, meugeumbira dan meuca-e lagée watée malam peurayaan agama. Gata teuma meuduka cita lagée iréng-iréngan suleng nyang jituju ubak Baét TUHAN, nyang bila Israel.
30 TUHAN geupeudeungoe su Gobnyan nyang agong, dan tieb-tieb ureuëng teuma jirasa kuasa Gobnyan nyang luwabiasa. Meunyoe Gobnyan beungéh jiteuka apui nyang jipeuhangöh peue-peue nyang na, ujeuen raya, ujeuen batée dan angén badée.
31 Ureuëng Asyur teukeujot ngon yo meugám-gám watée jideungoe su TUHAN dan jirasa huköman Gobnyan keubit brat that.
32 Teungoh awaknyan jirasa sakét badan sabab jisunuet ban galak droe, umat TUHAN meuseunang-seunang sira jideungoe su musik geundrang dan keucapi. Allah keudroe teuma geumuprang geulawan Asyur.
33 Phon yoh awaikon ka geuseudia apui teumpat tot raja Asyur. Teumpat nyang lhok dan luwah, asoe jih na kheueh kayée apui nyang meutamon-tamon. TUHAN teuma geupeukab apui nyan deungon cara geuyueb nafáh Gobnyan lagée krueng-krueng belerang.


Chapter 31

1 Ceulaka kheueh ureuëng nyang jak u nanggroe Meusé keu jilakée tulông! Awaknyan nyang jipeubangga na kheueh angkatan tantra Meusé deungon pasokan meuguda dan guda jihnyan nyang teuga-teuga dan geuritan jih pih le that. Teuma awaknyan hana peucaya ubak TUHAN, Po teu Allah kudus Israel dan hana jilakée tulông ubak Gobnyan.
2 TUHAN bijaksana dan geuteupeue peue geupeubuet. Laju lé Gobnyan geupeutron beuncana dan geulaksana ancaman Gobnyan keu geuhuköm ureuëng jeuhet dan ureuëng nyang tulông awaknyan.
3 Ureuëng Meusé na kheueh manusia, bukon Po teu Allah. Guda awaknyan makhluk biasa, hana meusifeuet ilahi. Meunyoe TUHAN nyang meutindak, bansa nyang tulông nyan meugantoh dan bansa nyang jitulông teuma reubah. Dan bandua bansa nyan teuma binasa.
4 TUHAN meufeureuman ubak ulôn, "Lagée singa meungöm-ngöm keu jipeuteun mangsa jih dan hana hase jipeutakot deungon su meudumpék lé kawanan ureuëng meurabe nyang jikrah jak lawan jihnyan, meunan cit teuma Lôn muprang Ulôn peuteun Bukét Sion.
5 Lagée saboh cicém nyang meukeupak-keupak sayeub jih di dalam uempueng keu jilindong mandum aneuëk-aneuëk jih, meunan cit Ulôn, TUHAN Nyang Mahakuasa Lôn lindong, Lôn bila dan Lôn peuseulamat Yerusalem."
6 TUHAN meufeureuman lom, "Hai bansa Israel, gata ka talawan Ulôn dan ka meudesya ubak Ulôn. Teuma jinoenyoe, tagisa kheueh laju ubak Ulôn!
7 Teuma trok watée jih gata böih banmandum patong-patong beurala nyang teupeugét nibak pirak dan méuh nyang gata peugét keudroe deungon peunoh desya.
8 Asyur teupeubinasa bak watée prang teuka, teuma kon deungon teunaga manusia. Ureuëng Asyur jiplueng nibak mideuen prang, dan aneuëk-aneuëk muda awaknyan jipeujeuet keunamiet.
9 Raja awaknyan geuplueng sabab teumakot, dan bubena peuwira teukeujot raya, sampoe awaknyan jitinggai bupanji-bupanji prang." TUHAN ka geupeugah haba, TUHAN nyang teuseumah dan teuhoreumat deungon keureubeuen nyang teutot di Yerusalem.


Chapter 32

1 Kalon kheueh, teuma trok watée jih sidroe raja geumat peurintah deungon ade dan peumimpén bansa jipeujak keuadelan.
2 Awaknyan maséng-maséng lagée teumpat meupayong nibak angén dan badée. Awaknyan lagée ié krueng nyang ji ile di teungoh-teungoh padang pasi, lagée payong batée nyang raya di teungoh padang nyang geursang.
3 Ureuëng nyang hase jimeungieng hana jipet mata, dan nyang hase meudeungoe teuma geusimak.
4 Ureuëng nyang yoh masa ilée teuburu nafeusu teuma meutindak deungon saba dan peunoh meungeureuti. Ureuëng nyang watée jimeututoe gagab teuma glaih nariet jih watée jipeugah haba.
5 Ureuëng bangai hana le teuanggab horeumat, dan ureuëng teumipée hana teupeugah jujoe.
6 Ureuëng bangai jipeugah haba nyang bangai dan jipeuna reuncana nyang jeuhet. Peue mantong nyang jipeubuet atawa geupeugah na kheueh meuhina keu Po teu Allah. Hántom na jibri makheun keu ureuëng deuk atawa jibri ié keu ureuëng glah.
7 Dan sidroe ureuëng teumipée nyang jipike buet-buet nyang jeuhet. Pakriban cara jimita akai keu ji-iélanya ateueh ureuëng gasien deungon tutoe haba nyang sulet dan jitam awaknyan keu jicok hak jih keudroe.
8 Teuma ureuëng nyang jroh ákai budoe jih nyang jireuncana na kheueh hai-hai nyang jroh dan jimeubuet nyang jroh teuma.
9 Deungoe kheueh, hai ureuëng-ureuëng inong nyang udeb gata mangat, beubaih nibak hai-hai nyang susah!
10 Jinoenyoe gata jeuet meurasa aman, teuma kira-kira sithon teuk gata putôh asa, sabab hase panen boh anggô gagal, dan meunan cit deungon hase bumoe nyang laén hana sapeue na.
11 Trok bak saát nyoe gata mangat udeb, beubaih nibak meubagoe nyang susah. Teuma bak watée nyoe, teuka kheueh yo sabab teumakot! Suet kheueh laju peukayan gata dan ikat laju ija krong nibak keuieng gata.
12 Peuba-e kheueh ladang-ladang gata nyang gumbô ngon subo dan lampôh-lampôh anggô gata nyang jimuboh le,
13 sabab tanoh bansa ulôn jitimoh lé tamah meupaya dan tamah meuduro. Nyoe, peumo ba-e kheueh rumoh-rumoh gata teumpat gob meuseunang-seunang ngon peulalée até dan banda nyang peunoh deungon ureuëng ramé!
14 Meunan cit meuligoe teuma jitinggai ma banda nyang ramé ka jeuet keuseungue ngon seungab. Bukét dan meunara-meunara teumpat ureuëng meujaga ka teupeurata deungon tanoh keu siumu masa. Keuleudée-keuleudée nyang kleut meunan cit deungon bubiri-bubiri beubaih jijak keudeh keunoe dan jimeurot naleueng nyang na jitimoh disinan.
15 Teuma sigoe teuk Po teu Allah teuka deungon kuasa Gobnyan. Dan padang pasie jeuet keu ladang-ladang nyang subo, dan ladang-ladang jeuet lagée uteuen.
16 Bansaboh nanggroe na keujujoran dan keuadelan.
17 Tieb-tieb ureuëng jipeubuet peue nyang beuna, sampoe na keuseujahteuraan dan keuteuntraman siumu masa.
18 Umat Po teu Allah beubaih nibak keususahan udeb di teumpat nyang aman dan teuntram.
19 Lumpah that bahgia gata banmandum sabab na ié nyang seb keu seunaman gata, dan beulatang peulara gata jeuet jimeurot dipat mantong deungon aman. Teuma musoh gata jeuet lagée uteuen nyang jisiram lé ujeuen batée dan banda awaknyan teupeuhanco.


Chapter 33

1 Ceulaka kheueh musoh-musoh geutanyoe! Awaknyan meurampok bahpi hana keunong reupah, dan meukhianat bahpi hana soe khianat, awaknyan keudroe jeuet keu ureuëng keunong rampak dan peukhianatan.
2 Ya TUHAN, geugaséh kheueh keu kamoe. Droeneueh kheueh harapan kamoe. Neulindong kheueh kamoe tieb-tieb uroe dan peuseulamat kheueh kamoe watée kamoe lam keuadaan meukarat.
3 Meunyoe Droeneueh neubeudôh dan neupeudeungoe su Droeneueh nyang meugrum-grum, bansa-bansa teuma jiplueng teung bateyeung meucrebre hana meuho saho.
4 Lagée daruet nyang po meukawan jiseureubu dan jireupah hareuta awaknyan.
5 TUHAN lumpah that jujoe; Gobnyan geukuasa peue-peue nyang na. Gobnyan geupeudong huköm dan keuadelan di Yerusalem
6 dan geubri aman ubak umat Gobnyan. Hareuta nyang peuseulamat awaknyan na kheueh keubijaksanaan dan iéleumé dan horeumat ubak TUHAN.
7 Ureuëng-ureuëng nyang beuhe ngon tungang jikliek-kliek geulakée tulông; bubena utosan nyang jiuseuha keuneuk peudamé laju jimo deungon wéueh até.
8 Rot-rot ueh raya lumpah meubahya sampoe ka habéh seungue; hana ureuëng nyang na jijak nibak rot-rot nyan. Janji nyang ka teupeugöt ji iengkeue dan mupakat nyang situju jitulak teuma. Hana le nyang na jipakoe.
9 Nanggroe jitinggai ka seungue seungab. Gle-gle Libanon ka layée, dan Pantôn Saron nyang gumbô ngon subo ka jeuet keupadang pasi. Di Basan dan di Gunong Karmel ôn-ôn kayée ka habéh luroh.
10 TUHAN meufeureuman ubak bansa nyan, "Jinoenyoe Ulôn beudôh dan Lôn peubuet mangat Lôn tunyok keukuasaan Lôn.
11 Reuncana gata sia-sia, dan peue mantong nyang gata peubuet hana meuguna. Beungéh gatanyan lagée apui nyang tatot droe gata keudroe.
12 Gata lagée batée kareueng nyang teutot keu teupeujeuet keu gapu; dan lagée tamah meuduro nyang teuköh dan teutot u lam apui.
13 Bah kheueh banmandum ureuëng nyang tô meunan cit nyang jiôh jideungoe keuhai buet Ulôn dan jiaku keuhai keukuasaan Lôn."
14 Ureuëng-ureuëng meudesya di Sion jiteuka yo sabab teumakot. Kheun awaknyan, "Keuputosan Po teu Allah lagée apui nyang hu meuhuéb-huéb siumu masa. Peu kheueh mungken na nyang ék peuteun droe lam apui nyang jipeuhangöh peue-peue nyang na nyan?"
15 Gata ék tapeuteun droe meunyoe gata meututoe dan tapeubuet nyang beuna. Bék tamita laba deungon cara tapaksa talakée atra ureuëng gasien, bék tateurimong péng sugok. Bék taseutôt deungon ureuëng nyang na lam até jih jikeuneuk jakpoh maté ureuëng laén atawa buet-buet nyang jeuhet nyang laén.
16 Dan gata teuma teulindong dan aman, siulah-ulah gata kana lam kuta nyang teuga. Peunajoh dan ié jieb kana teukeubah keu gata.
17 Teuma teuka watée jih gata takalon sidroe raja nyang mat peurintah deungon seumarak ateueh nanggroe nyang meulienteung u meubagoe arah.
18 Teumakot gata bube nyang ka lheueh keu ureuëng nyang kuteb cukée, nyang jeuhet dan mando ureuëng aséng nyang ka tinggai keunangan mantong.
19 Gata hana le tangieng ureuëng aséng nyang biadab nyang meututoe u dalam basa nyang hana gata teupeue.
20 Ngieng kheueh bansa Sion, teumpat geutanyoe ta peuraya khanuri-khanuri agama. Ngieng kheueh Yerusalem! Keubit aman that banda nyan keu teumpat tinggai, lagée khimah nyang hántom teupinah, patok jih nyang hántom teubot dan taloe jih hántom na putôh.
21 TUHAN teuma geupeukalon keuagongan Gobnyan keu geutanyoe. Geutanyoe udeb nibak binéh krueng nyang leubeh luwah, nyang hana hase jimeulayeue lé kapai musoh.
22 Peue mantong nyang na peuleungkapan nyang na nibak kapai awaknyan hana meuguna; layeue-layeue jihnyan hana hase teupeukeumang! Banmandum keukayaan pasokan musoh tanyoe reupah, dan jeumeulah jih lumpah that le, sampoe ureuëng laén pih meuteumé jeumba. TUHAN keudroe nyang jeuet keuraja geutanyoe; Gobnyan teuma geumat peurintah, geupeudong huköm dan geupeuseulamat geutanyoe nibak musoh.
24 Hana meusidroe pih di nanggroe geutanyoe apoh apah lé sabab sakét, dan banmandum desya geupeu amphon.


Chapter 34

1 Jak kheueh meusapat, hai bansa-bansa, dan deungoe kheueh. Bah kheueh bansaboh bumoe dan mandum nyang udeb teuka dan jideungoe.
2 TUHAN beungéh ubak mandum bansa dan banmandum pasokan awaknyan. Gobnyan geuhuköm dan geupeubinasa awaknyan.
3 Manyét-manyét awaknyan nyang meutabu beuba hana ji kubu, teuma jipeubiyeu mantong disinan sampoe án brok dan mubée khiéng. Gunong-gunong mirah sabab keunong darah awaknyan.
4 Mata uroe, buleuen dan bintang-bintang teuma hanco. Langét geugulong lagée geugulong keureutah. Bintang-bintang rhot u bumoe lagée ôn kayée nyang lurôh di cong bak.
5 TUHAN ka geupeusiab peudeueng Gobnyan lam syeuruga, dan jinoenyoe peudeueng nyan keunong teuma ateueh bansa Edom nyang ka geupeurhot huköman dan geupeubinasa.
6 Peudeueng TUHAN meulabo deungon darah dan habéh peusiliek deungon gapah awaknyan, saban lagée darah dan gapah beulatang keureubeuen. Sabab TUHAN geupeuna keureubeuen di Bozra, dan geupeuna seumeusie seucara rayeuk-rayeuk di tanoh Edom.
7 Manusia-manusia teuma maté lagée leumô kleut dan leumô muda. Nanggroe awaknyan mirah keunong darah dan meulabo deungon gapah.
8 Nyan kheueh saát jih TUHAN geubila Sion dan geubalaih musoh-musoh Gobnyan.
9 Krueng-krueng Edom meu-ubah jeuet keu ter, dan tanoh disinan jeuet keu beulerang. Akhé jih bansaboh nanggroe ka hu lagée ter.
10 Uroe malam hu nyan hana lon, dan asab meukeupong nyang jiteubiet disinan siumu masa. Tanoh nyan teuma jitinggai mantong meunan deungon söh dan tho kreng sampoe tron meutron, dan hana meusidroe manusia pih nyang jak nibak tanoh nyan.
11 Cicém undan dan landak tinggai disinan, meunan cit deungon cicém hantu tok dan cicém gagak tinggai disinan. TUHAN geupeujeuet tanoh nyan hana meuteuntée dan söh lagée yoh gohlom geucebta.
12 Hana raja nyang peurintah nanggroe nyan, dan mandum peumimpén ka sapan sapa.
13 Puri-puri dan banda-banda nyang meukuta jitimoh lé tamah meuduro naleueng nyang panyang, dan jikeumiet lé asée uteuen dan cicém unta.
14 Beulatang juah meuwot-wot ban galak droe di dalam nyan; hantu-hantu jimeusu seôt seumeuôt, dan hantu malam jimita teumpat keu jipiôh.
15 Di teumpat nyan uleue meubisa jimeu uempueng, jitöh boh, laju jikaröm dan jipeulara bubena aneuëk-aneuëk jih nyang ka ceh. Meunan cit deungon cicém ujeuen jipeugöt uempueng jih disinan deungon judoe jih maséng-maséng.
16 Mita kheueh dan beuet kheueh lam Kitab TUHAN: Hana meusidroe pih nibak banmandum makhluk nyan gadôh atawa meucre deungon judo jih. Sabab meunan kheueh peurintah TUHAN, dan Gobnyan keudroe nyang peusapat awaknyan.
17 TUHAN kheueh nyang weuek nanggroe nyan lamkawan awaknyan dan maséng-maséng jiteurimong jeumba jih. Awaknyan tinggai disinan keu siumu masa, dan tanoh nyan jeuet keuhak milék awaknyan tron meutron.


Chapter 35

1 Padang pasi dan tanoh tho teuma meugeumbira, bungöng-bungöng teuma keumang dipadang beulantara.
2 Padang pasi meukeumang deungon bagaih that, dan meudeundang deungon ca-e ria. Keugagahan jih lagée gunong Libanon, seri jih lagée Pantôn Karmel dan Saron. Dan tieb-tieb ureuëng jikalon kuasa TUHAN, dan keuagongan Allah geutanyoe.
3 Peuteuga kheueh jaroe nyang leumoh, peukong kheueh teuôt nyang guyah.
4 Peugah kheueh ubak nyang cut até, "Peukhong kheueh até gata, bék teumakot, Po teu Allah gata teuka geuhuköm musoh, Gobnyan teuka geujak peuseulamat gata."
5 Watée nyan ureuëng buta teuma jeuet jikeumalon, dan ureuëng tulo hase jimeudeungoe.
6 Ureuëng lapée jeuet jigrob-grob lagée rusa, ureuëng kalu meusurak geumbira. Sabab mata ié jiteubiet meubok-bok di padang pasi, krueng ji ile dipadang gle raya.
7 Pasi nyang seu-uem jeuet keu kulam, tanoh nyang tho kreng jeuet keu teumpat mata ié. Teumpat nyang yoh awaiphon ji keumiet lé asée uteuen, teuma jitimoh lé geulagah dan bak sikée.
8 Di sideh na rot ueh raya, "Rot teujak ubak keuseulamatan" nan jih. Ureuëng meudesya hana jijak rot nyan, ureuëng bangai hana jipeuseusat keu ureuëng nyang jak rot nyan.
9 Nibak teumpatnyan hana singa, atawa beulatang juah nyang laén. Ureuëng ramé nyang geupeuseulamat lé TUHAN teuma jijak disinan.
10 Ureuëng ramé nyang ka geupeuleuh lé TUHAN teuma jijakwoe; awaknyan jitamong u dalam banda Yerusalem sira meusurak geumbira, ruman awaknyan meucahya sabab galak that ngon harôk nyang abadi. Awaknyan meugeumbira dan meusuka ria; seudeh dan apoh apah habéh ka hana le.


Chapter 36

1 Nibak thon nyang keu peuet blaih watée geumat peurintah lé Hizkia raja Yehuda, banda-banda Yehuda nyang meukuta laju jiprang dan jipeutaloe lé Sanherib, raja Asyur.
2 Óh lheuehnyan gobnyan geu kirém peuwira manyang di Lakhis u Yerusalem deungon tantra nyang raya keu jituntut mangat Raja Hizkia geutaklok. Awaknyan laju trok ubak banda nyan dan geucok teumpat nibak ladang nyang geuboh nan Ladang Peunatu, rab bak binéh lhueng nyang ié jih ji ile nibak kulam bagian ateueh.
3 Óh lheueh nyan teuma jiteuka laju lhée droe peugawée Raja Hizkia jijak meurumpok deungon peuwira Asyur nyan. Ban lhée droe peugawée nyan na kheueh Elyakim bin Hilkia ulée rumoh tangga meuligoe, Sebna seukeutaréh nanggroe, dan Yoah bin Asaf, seukeutaréh meuligoe.
4 Peuwira Asyur geupeugah ubak awaknyan, "Gata peusampoe laju ubak Raja Hizkia haba raja Asyur nyoe, 'Pakon gata meurasa droe gata teuga?
5 Gata pike deungon tutoe haba mantong meuhase teugantoe siasat dan teunaga tantra? Soe kheueh ureuëng nyang gata harab sampoe gata hana teumakot talawan Asyur?
6 Gata keubit meuharab that beuji bantu lé Meusé, teuma nyan saban deungon tacok bak naleueng lakoe sibagoe tungkat; -- teuma tungkat nyan patah dan jaroe gata teutôb. Meunan kheueh raja nanggroe Meusé keu banmandum ureuëng nyang meuharab ubak jihnyan.' "
7 Lheuehnyan geupeugah lom lé peuwira Asyur nyan, "Atawa barang kali gata tapeugah bahwa gata meuharab ubak TUHAN Allah gata? Bak watée Hizkia geupeurintah ureuëng Yehuda dan Yerusalem ji-iébadat dikeue miseubah di Yerusalem, bukon kheueh nyang jipeuhanco nyan miseubah dan teumpat-teumpat teuseumah TUHAN keudroe?
8 Jinoenyoe ulôn ateueh nan raja Asyur lôn tem meutaroh bahwa meunyoe gata geubri dua ribée boh guda, ka pasti nibak gata hana ureuëng nyang sidubnyan le keu jigiduek ateueh guda nyang dua ribée boh nyan.
9 Keu teulawan peuwira Asyur nyang paleng cut pih gata bukon kheueh lawan jih. Teuma gata teutab cit tameuharab ubak bansa Meusé mangat jikirém geuritan prang dan pasokan meuguda!
10 Gata pike kamoe jakprang dan kamoe peutaloe nanggroe gata meunyoe hana geutulông lé TUHAN? TUHAN keudroe kheueh nyang yue ubak kamoe mangat teuprang dan teupeuhanco banmandum nyan."
11 Laju geupeugah lé Elyakim, Sebna dan Yoah keu peuwira Asyur nyan, "Hai teungku, neumeututoe mantong lam basa Aram deungon kamoe, kamoe muphom. Bék neungui basa Ibrani, eunteuk jiteupeue lé rakyat di ateueh beuton banda nyan."
12 Geuseuôt lé peuwira Asyur nyan, "Peu kheueh keu gata dan raja mantong ulôn nyoe geukirém lé raja Asyur mangat teupeusampoe banmandum nyoe? Ulôn kumariet cit ubak rakyat nyang duek di ateueh bintéh beuton nyoe, nyang meusigoe deungon gata teuma jipajoh ék jih keudroe dan ji-jieb iék jih keudroe."
13 Óh lheueh nyan peuwira manyang nyan jidong laju jimeututoe lam basa Ibrani ngon su nyang meutaga, "Deungoe nyoe peue nyang geupeugah lé raja Asyur,
14 'Bék gata tem jipeungét lé Raja Hizkia! Jihnyan hana hase jipeuseulamat gata!
15 Bék gata deungoe peue-peue mantong nyang jirayu mangat jimeuharab ubak TUHAN. Bék gata pike TUHAN geupeuseulamat gata atawa gata tam sidadu Asyur jireupah banda gata.
16 Bék gata deungoe Hizkia nyan! Ulôn, raja Asyur lôn lakée ubak gata mandum mangat gata tundok. Meunyoe gata ka tatundok, gata jeuet tapajoh boh anggô nyang na lam lampôh gata keudroe, dan gata pajoh boh ara nyang na lam bak gata keudroe, meunan cit gata jieb ié nyang na lam mon gata keudroe,
17 sampoe trok ubak watée gata ulôn pinah bak saboh nanggroe nyang saban ngon nanggroe gata keudroe. Nibak teumpat nyan na lampôh anggô nyang jipeuhase anggô keu gata, dan ladang gandom nyang jipeuhase teupông keu peunajoh gata.
18 Bék gata deungoe Hizkia! Jihnyan jipeungét gata deungon jipeugah TUHAN geupeuseulamat gata. Peu kheueh ka lheueh dewa bansa laén nyang peuseulamat nanggroe jih nibak keukuasaan lôn?
19 Dipat kheueh dewa-dewa nanggroe Hamat dan Arpad? Dipat kheueh dewa-dewa Sefarwaim?
20 Peu kheueh na nyang teuka jipeuseulamat Samaria? Dewa toh nyang ka lheueh jipeulheueh nanggroe jih nibak keukuasaan lôn? Panena hase TUHAN geupeuseulamat Yerusalem!' "
21 Peue nyang jideungoe nyan peunduduek Yerusalem hana nyang jaweueb, sabab Raja Hizkia ka geupeurintah mangat awaknyan seungab mantong.
22 Teuma Elyakim, Sebna dan Yoah laju geupriek peukayan awaknyan tanda seudeh, óh lheueh nyan geujak peugah laju ubak raja peue nyang ka jipeugah lé peuwira Asyur nyan.


Chapter 37

1 Watée Raja Hizkia geudeungoe laporan nibak ban lhée droe awaknyan, gobnyan laju geupriek peukayan geuh dan geungui laju ija krông tanda seudeh, lheueh nyan laju geujak u Baét TUHAN.
2 Lheueh nyan gobnyan geukirém Elyakim ulée meuligoe, Sebna seukeutaréh neugahra dan teungku-teungku imeum nyang na pangkat mangat geujak meurumpok ngon Nabi Yesaya, bin Amos. Awaknyan pih jingui ija krông.
3 Nyoe kheueh peusan Hizkia nyang awaknyan peusampoe ubak Nabi Yesaya, "Uroenyoe uroe dukacita; tanyoe jihuköm dan jihina. Tanyoe lagée inong nyang keuneuk peulahé aneuëk, teuma ka habéh teunaga.
4 Raja Asyur ka jikirém peuwira manyang jih keujijak hina Po teu Allah nyang udeb. Pat tateupeue TUHAN Po teu Allah ka geuteupeue nyang jihina nyan dan keuneuk geuhuköm awaknyan nyang hina Geuhnyan! Lé sababnyan meudoá kheueh ubak Po teu Allah keu ureuëng-ureuëng geutanyoe nyang mantong udeb."
5 Óh ka lheueh jiteurimong peusan nibak Raja Hizkia nyan,
6 Yesaya laju geuyue ubak ureuëng nyang geukirém lé Hizkia nyan mangat jipeusampoe jaweueb nyan, "TUHAN meufeureuman, teungku po bék teumakot peue nyang jipeugah lé namiet-namiet Asyur nyan bahwa TUHAN hana hase geupeulheuh geutanyoe.
7 TUHAN keuneuk geupeujeuet raja Asyur mangat jikalon saboh haba angén sampoe jihnyan jiwoe u nanggroe jih keudroe, dan jihnyan disideh jipoh maté."
8 Peuwira manyang Asyur nyan meuteumé haba bahwa raja jih ka jitinggai Lakhis dan teungoh jimuprang jilawan Libna, hana padubna jiôh nibak teumpat nyan. Dan jijak kheueh keudeh keu jijak meurumpok ngon raja jih nyan.
9 Raja Asyur ka jiteurimong haba bahwa pasokan Meusé dimiyueb pimpénan Tirhaka nibak Sudan teungoh jijak keu jijak prang awaknyan. Lé sababnyan raja Asyur laju jikirém surat ubak Hizkia,
10 raja Yehuda. Lagéenyoe asoe surat nyan, "Bék keunong peunget ubak janji Allah nyang gata peubangga nyan bahwa gata hana rhot lam jaroe lôn.
11 Gata ka tadeungoe bahwa tieb-tieb nanggroe nyang jiprang lé raja Asyur habéh jipeuhanco banmandum. Bék gata sangka gata hase teupeulheueh droe.
12 Watée indatu lôn geupeuhanco banda Gozan, Haran dan Rezef, dan geupoh maté bubena ureuëng-ureuëng Eden nyang na tinggai di Telasar, hana meusaboh pih nibak dewa-dewa awaknyan nyang hase jipeuseulamat awaknyan.
13 Dipat kheueh raja-raja banda Hamat, Arpad, Sefarwaim, Hena dan Iwa?"
14 Hizkia geuteurimong suratnyan nibak ureuëng-ureuëng utosan dan geubaca teuma. Lheuehnyan gobnyan geujak u Baét TUHAN dan geuleueng laju surat nyan dikeue TUHAN,
15 laju geumeudoá, kheun jihnyan,
16 "TUHAN Nyang Mahakuasa, Allah Israel, nyang na geuduek di ateueh kerub, Droeneueh kheueh sidroe sagai Po teu Allah nyang meukuasa ateueh banmandum keurajeuen nyang na ateueh bumoe nyoe. Droeneueh kheueh nyang cebta langét ngon bumoe.
17 TUHAN, neungieng kheueh kira jih peue nyang teungoh teujadi ateueh kamoe. Deungoe kheueh banmandum nyang jihina lé Sanherib keu Droeneueh, Allah nyang udeb.
18 Kamoe banmandum teupeue, TUHAN, bahwa raja-raja Asyur le that jipeubina bansa-bansa dan jipeuhanco nanggroe awaknyan.
19 Meunan cit dewa-dewa awaknyan jitot dan jipeuhanco, sabab dewa-dewanyan meubacut pih hana meukuasa. Jihnyan na kheueh patong nyang teupeuget nibak kayée dan batée nyang jipeuget lé manusia.
20 Nyoe, TUHAN Allah kamoe, peulheuh kheueh kamoe nibak ureuëng-ureuëng Asyur nyan, mangat lé mandum bansa ateueh rhueng donya nyoe jiteupeue bahwa Droeneueh kheueh sagai-sagai TUHAN."
21 Lheueh nyan Yesaya geukirém peusan ubak Raja Hizkia bahwa nyan na kheueh sibagoe geujaweueb ateueh doá raja,
22 TUHAN meufeureuman, "Banda Yerusalem jipeukém dan jihina gata, Sanherib!
23 Peu kheueh gata teupeue soe nyang gata teunak-teunak dan gata hina nyan? Ulôn, Po teu Allah Israel, Allah nyang suci.
24 Gata takirém utosan sira tapeugah haba nyang sulet bahwa deungon le geuritan prang gata, gata ka tapeutaklok gunong-gunong manyang di Libanon. Gata tapeusombong droe bahwa gata ka tateubang bak-bak kayée ceumara jihnyan nyang paleng manyang dan paleng ceudah, dan gata bloh-bloh lam uteuen-uteuen nyang paleng jai.
25 Meunan cit gata peubangga droe bahwa gata kueh mon dan gata jieb ié nyang na di nanggroe-nanggroe aséng, dan bubena tantra gata jigilo-gilo ié Krueng Nil sampoe tho.
26 Peu kheueh gohlom na gata deungoe bahwa banmandum nyan ka lheueh Lôn reuncana yoh awaikon ilée? Dan jinoenyoe Ulôn peubuet hainyan. Ulôn kheueh nyang jok keugata kuasa mangat hase gata peutaklhok banda-banda meukuta mangat jeuet keu rungka-rungka.
27 Ureuëng-ureuëng nyang tinggai disinan hana meudaya; awaknyan teukeujot dan teumakot that. Awaknyan lagée naleueng lam padang atawa naleueng nyang timoh ateueh bubông rumoh, nyang tho meunyoe jiyueb lé angén timu nyang seu-eum.
28 Teuma Ulôn kuteupeue banmandum keuhai droe gata. Ulôn kuteupeue peue nyang gata peubuet dan ho nyang gata jak. Ulôn kuteupeue bahwa beungéh that-that keu Ulôn,
29 dan Ulôn ka Lôn deungoe keuhai beungéh dan sombong gata nyan. Jinoe Ulôn pasang cinawíet nibak idong gata dan keukang bak babah gata, mangat gata Ulôn tarek dan Lôn puwoe rot jalan nyang gata jak dan gata teuka."
30 Meunan cit Yesaya geukirém peusan nyang lagéenyoe bagoe ubak Hizkia, "Nyoe kheueh nyang teuma jeuet keu tanda nibak gata. Thon nyoe dan thon ukeue gob jipajoh gandom nyang timoh keudroe. Teuma óh lheuehnyan awaknyan hase jipula gandom dan anggô dan jirasa hase jih.
31 Ureuëng Yehuda nyang mantong udeb jihnyan makmu lagée seunaman nyang lhok that ukeue jih dan jipeuhase boh.
32 Di Yerusalem dan di ateueh Gunong Sion teuma na ureuëng-ureuëng nyang seulamat, sabab TUHAN nyang Mahakuasa ka geupeuteuntée bahwa hainyan teuma teujadi.
33 Nyoe kheueh feureuman TUHAN keuhai raja Asyur; 'Jihnyan hana jiteumé tamong lam banda Yerusalem atawa jitimbak aneuk panah lam banda nyan. Tantra-tantra nyang peurisée hana nyang jipeurab ubak banda nyan, dan bansikeulileng hana teuma jipeuget ateung-ateung teumpat teukeupong.
34 Raja Asyur teuma jiwoe rot euh watée jiteuka, deungon hana jitamong lam banda nyan. Ulôn, TUHAN, ka Lôn peugah haba.
35 Banda Yerusalem teuma Lôn bila dan Ulôn lindong deumi keuhoreumatan Lôn keudroe dan deumi janji Ulôn deungon hamba Lôn Nabi Daud.' "
36 Malam nyan cit teuma malaikat TUHAN teuka ubak khimah-khimah ureuëng Asyur dan laju geupoh maté na 185.000 droe tantra. Óh singoh nyan banbungoh that-that manyét-manyét awaknyan ka meutabu beba.
37 Lé sababnyan jisurot kheueh Sanherib, raja Asyur, dan jiwoe u Niniwe.
38 Nibak siuroe, watée jihnyan teungoh iébadat lam kuil Dewa Nisrokh, jihnyan laju jipoh maté ngon peudeueng lé Adramelekh dan Sarezer, aneuëk-aneuëk jih nyang agam. Lheueh nyan awaknyan jiplueng u Ararat. Lé sababnyan Esarhadon, aneuëk agam jihnyan nyang laén, jeuet keuraja keugeunantoe jihnyan.


Chapter 38

1 Watée nyan Hizkia teungoh keunong deumam laju rhot bak sakét dan rab meuninggai donya. Nabi Yesaya bin Amos, geujak meurumpok ngon gobnyan sira geupeugah, "TUHAN meufeureuman Teungku Amphon geuyue peubéeréeh banmandum urosan, sabab Teungku Amphon hana harapan puléh. Hana treb le Teungku Amphon meuninggai donya."
2 Hizkia laju geupaleng ubak bintéh beuton, laju geumeudoá,
3 "TUHAN, ingat kheueh bahwa ulôn nyoe ka lôn meungabdi ubak Droeneueh deungon seutia dan até nyang jujoe. Ulôn sabe lôn useuha lôn seutôt keuheundak Droeneueh." Laju Hizkia geumo meuweueh-weueh.
4 Óh ka leupah Yesaya geujak, TUHAN geuyue gobnyan
5 mangat geugisa ubak Hizkia dan peugah laju peusan nyoe, "Ulôn, TUHAN, Po teu Allah nyang jiseumah lé Nabi Daud indatu gata. Ka Ulôn deungoe doá gata dan ka Lôn ngieng ié mata gata. Ulôn keuneuk tamah umu gata limong blaih thon teuk.
6 Gata dan banda Yerusalem Ulôn peuleuh nibak raja Asyur. Banda nyoe teutab Ulôn lindong."
7 Geujaweueb lé Yesaya, "Nyoe kheueh tanda nyang geubri lé TUHAN ubak Teungku Amphon nyang bahwa Gobnyan geupeuteupat janji Geuh.
8 Nibak sinunyök jaröm jeuem mata uroe meuneugét Raja Ahas, TUHAN geupeugöt bubayang jih nyan teusuröt siploh boh gareh." Dan jisurot kheueh bubayang nyan siploh boh gareh.
9 Óh lheueh Hizkia puléh, laju gobnyan geutuléh ca-e pujian nyang lagée nyoe:
10 "Ulôn peugah, bansiteungoh umu ulôn harôh lôn jak, jak peuhabéh udeb lôn nyang mantong tinggai ubak donya ureuëng maté.
11 Ulôn peugah, ulôn hana le lôn ngieng TUHAN di ateueh bumoe, atawa lôn kalon manusia ateueh donya nyoe.
12 Nyawöng lôn putôh, dan trok kheueh ajai ulôn, lagée khimah ureuëng meurabe nyang teureuloh; lagée ija nyang teuköh nibak alat teutenun; lôn pike Po teu Allah geupeuhabéh masa udeb lôn.
13 Simalam beungoh ulôn kliek-kliek sabab sakét, lagée jih tuleueng ulôn nyoe jipeureumok lé saboh singa; lôn pike Po teu Allah geupeuhabéh masa udeb lôn.
14 Su ulôn seumaken paro dan leumoh, lagée cicém leuek ulôn nyoe apoh apah. Mata ulôn hék sabab hana lôn piôh lôn tangah u langét, TUHAN, neupeulheueh kheueh ulôn nibak keususahan nyoe.
15 Peue nyang jeuet ulôn peugah? Nyoe na kheueh buet TUHAN; ulôn hana jeuet lôn éh sabab lôn seudeh.
16 Ya TUHAN, neubri kheueh keu-ulôn udeb deungon haba dan buet Droeneueh, bah kheueh lôn nyoe udeb keu Droeneueh mantong.
17 Peudeh ulôn nyoe beumeu ubah jeuet keu teuntraman, Droeneueh peuseulamat ulôn nibak bahya; desya-desya ulôn ka Droeneueh peu amphon bube nyang na.
18 Di álam mawöt hana nyang pujoe Droeneueh, ureuëng maté hana meuteumé jiharab keuseutiaan Droeneueh.
19 Teuma ureuëng udeb nyang pujoe Droeneueh, lagée nyang ulôn peubuet nibak uroe nyoe. Ureuëng syiek-syiek geucalitra ubak aneuëk geuh padub na seutia jih Droeneueh, ya TUHAN.
20 TUHAN, Droeneueh ka neupeupuléh ulôn, teuma kamoe meuca-e kamoe pujoe Baét Droeneueh deungon cara kamoe peutek keucapi, sipanyang udeb kamoe."
21 Lé Yesaya laju geuyue ubak gob mangat jiramah boh ara laju geuyue siliek ubak cumuet Hizkia mangat puléh.
22 Raja Hizkia geutanyong, "Peu kheueh tanda jih bahwa TUHAN geupeupuléh ulôn dan bahwa ulôn jeuet lôn jak u Baét TUHAN lom?"


Chapter 39

1 Kira-kira bak watée nyan, raja nibak nanggroe Babel, nyang nan geuh Merodakh Baladan bin Baladan, jideungoe bahwa Raja Hizkia ban puléh sakét. Teuma lé gobnyan laju geuyuejak ureuëng droe geuh ubak Raja Hizkia keu jipeusampoe surat dan hadiah keu Raja Hizkia nyan.
2 Hizkia geusambot utosan nyan deungon seunang até dan geutunyok laju ubak awaknyan peue-peue nyang na hareuta keukayaan gobnyan, na kheueh méuh dan pirak, reumpah-reumpah dan minyéuk mangat bée, dan banmandum peuleungkapan tantra gobnyan. Hana meusapeue pi di dalam meuligoe dan bansaboh keurajeuen gobnyan nyang hana geupeuleumah ubak awaknyan.
3 Óh lheuehnyan Nabi Yesaya laju geumeuhadab ubak Raja Hizkia dan geutanyong, "Pané teuka awaknyan banmandum? Dan peue jipeugah lé awaknyan?" Geujaweueb lé Hizkia, "Awaknyan teuka nibak Babel, nanggroe nyang paleng jiôh."
4 "Peue nyang jikalon lé awaknyan didalam meuligoe?" geutanyong lé Yesaya lom. "Peue-peue nyang na," geujaweueb lé Hizkia. "Hana barang nyang na didalam beundahara meuligoe nyang hana ulôn peuleumah ubak awaknyan."
5 Laju geupeugah lé Yesaya ubak raja, "TUHAN Nyang Mahakuasa meufeureuman,
6 'Teuma trok saát jih banmandum keukayaan nyang na dalam meuligoe droeneueh, dan nyang ka geugumpôi lé indatu droeneueh trok nibak uroe nyoe, jiangkot u Babel. Hana nyang tinggai.
7 Nibak aneuëk cucoe droeneueh na nyang jicok dan jipeujeuet keu peugawée didalam meuligoe keu jipeutimang raja Babel.' "
8 Geujaweueb lé Raja Hizkia, "Jroh that peusan TUHAN nyang droeneueh peusampoe ubak ulôn." Gobnyan geujaweueb lagée nyan sabab geupike: "Asai keurajeuen ulôn aman dan damé simantong ulôn udeb."


Chapter 40

1 Meunoe kheueh feureuman Allah, "Hibur kheueh, hibur kheueh bansa Ulôn!
2 Teunang kheueh até hai ureuëng Yerusalem, tapeugah kheueh laju bahwa masa jipeujeuet keu namiet manusia ka trok bak akhé. Keusalahan awaknyan ka Ulôn peu amphon, banmandum desya awaknyan ka Ulôn huköm sampoe dua goe lipat."
3 Na su nyang jimeuhôi, "Peusiab kheueh rot di padang pasi keu TUHAN. Peuteupat kheueh jalan raya di padang beulantara keu Po teu Allah geutanyoe!
4 Tieb-tieb pantôn harôh kheueh teutôb, gunong dan bukét teupeusabe rata. Tanoh meubukét jeuet keurata, dan nyang meuwet-wet teupeu licen.
5 Dan keuagongan TUHAN teuma teupeugah; banmandum umat manusia jikalon. Keubit, TUHAN keudroe ka geumeujanji!"
6 Na su nyang teupeugah, "Jak peugah kheueh!" Laju ulôn tanyong, "Peue nyang harôh ulôn peugah?" "Tapeugah kheueh bahwa manusia nyan lagée naleueng, lagée bungöng nyang cit siat sagai keu indahan jih.
7 Naleueng ka jeuet keu tho dan bungöng pih ka jeuet keu mala, meunyoe TUHAN geupeuyueb angén nyang seu eum. Keubit, bansa nyan lagée naleueng.
8 Neuleueng ka jeuet keu tho dan bungöng ka jeuet keu mala, teuma sabda Po teu Allah geutanyoe keukai siumu masa."
9 Jak ék kheueh u ateueh gunong nyang paleng manyang, dan peusampoe kheueh haba nyang gét ubak Yerusalem! Meudumpék kheueh deungon su nyang nyareng, dan peusampoe kheueh haba gét ubak Sion! Peugah kheueh ubak banda-banda Yehuda bahwa Po teu Allah awaknyan teuma teuka!
10 Ngieng, TUHAN Allah teuka deungon kuasa keu meutindak deungon peukasa. Ji-iréng lé ureuëng-ureuëng nyang ka geupeubeubaih lé Gobnyan.
11 Lagée ureuëng meurabe nyang peulara kawan beulatang Geuh; Gobnyan keudroe nyang peusapat awaknyan. Aneuëk-aneuëk bubiri geutiengkue teuma, deungon leumoh leumbot Gobnyan geu peutatéeh nang-nang beulatang Geuh.
12 Soe nyang ék ukoe laôt raya deungon sineupa jaroe jih, dan nyang ukoe angkasa deungon jeungkai jih? Soe nyang sukat tanoh bumoe deungon sunukat atawa nyang timang gunong dan bukét deungon ceng?
13 Soe nyang pimpén TUHAN, atawa nyang peurunoe Gobnyan sibagoe peunaseuhat?
14 Ubak soe TUHAN geuteumanyong mangat meuteumé peungeutahuan dan peungeurtian? Soe nyang bri peutunyok ubak Gobnyan keu meutindak deungon teupat?
15 Meunyoe bak TUHAN, bansa-bansa nyoe na kheueh lagée si titiek ié didalam tima, lagée sianeuk abée nibak neuraca; pulo-pulo saban phui jih deungon abée nyang ubit.
16 Banmandum beulatang nyang na didalam uteuen Libanon hana séb mangat teupeu jeuet keu keureubeuen nyang teutot; bak-bak jih citbacut that keu teupeu jeuet keu kayée apui.
17 Banmandum bansa hana meumakna nibak Gobnyan, sang-sang hana atra nyan dikeue Gobnyan.
18 Lé sababnyan deungon soe gata takeuneuk peusaban Po teu Allah? Soe nyang ta-anggab saban deungon Gobnyan?
19 Gobnyan bukon lagée patong nyang jipeugöt lé manusia, patong nyang meulapeh deungon méuh dan meulapek pirak.
20 Ureuëng nyang hana ék jibloe méuh atawa pirak, laju geupiléh kayée nyang hana mudah rusak. Gobnyan geumita utoh nyang ahli mangat jipeugöt patong nyang hana bagaih goyang.
21 Ék kheueh gata hana tateupeue dan hana tadeungoe, dan hana teubri tée ubak gata yoh awaikon ilée? Ék kheueh gata hana tapeuphom phon yoh awai pakriban awai jih jeuet donya?
22 Nyang cebta nyan na geuduek meutahta di ateueh bumoe nyang bulat, peunduduek jih leumah ubit that lagée daruet. Gobnyan geuleueng langét lagée geuleueng ija, dan geupasang nyan lagée ureuëng peudong khimah keu teumpat tinggai.
23 Gobnyan geupeujeuet ureuëng mat kuasa hana meudaya, dan ureuëng-ureuëng rayeuk ka gadôh keukuasaan jih.
24 Awaknyan lagée seunaman muda nyang ban jipeuphon timoh nibak ukeue jih. Meunyoe TUHAN geupeuteuka angén, awaknyan habéh tho dan jipupo lagée jumpueng.
25 Soe nyang gata anggab saban deungon Po teu Allah Nyang Mahakudus? Deungon soe gata keuneuk peusaban Gobnyan?
26 Pandang kheueh u langét, dan peurati kheueh! Soe nyang cebta bintang-bintang nyan? Gobnyan nyang atoe awaknyan lagée pasokan, Gobnyan geuteupeue padubna jeumeulah awaknyan banmandum, dan geutawök maséng-maséng deungon nan geuh nyan. Hana meusaboh pi nyang gadôh, sabab raya that kuasa TUHAN!
27 Lé sababnyan, hai Israel, pakon gata apoh apah, sang-sang TUHAN Po teu Allah gata hana geuteupeue gata lam susah? Sang-sang Gobnyan hana geupakoe ubak naseb gata, dan hana geungieng peue hak gata?
28 Ék kheueh mungken gata hana tateupeue dan hana tadeungoe? TUHAN kheueh Po teu Allah nyang keukai, nyang cebta bansaboh bumoe. Gobnyan hántom na geurasa hék atawa leumoh; pikeran Gobnyan hana ék soe uko.
29 Gobnyan nyang peuteuga ureuëng nyang hék, geubri seumangat keu ureuëng nyang hana meudaya.
30 Ureuëng-ureuëng muda ka jeuet keu hék dan leusu aneuëk-aneuëk remaja reubah meugantoh.
31 Teuma ureuëng nyang meuharab ubak TUHAN mantong, ureuëng nyan teuma meuteumé teunaga barô. Awaknyan lagée cicém siwah nyang jipo manyang deungon teunaga sayeub jih. Awaknyan jiplueng dan hana meunyuem hék, awaknyan jijak dan hana jeuet keu leusu.


Chapter 41

1 Feureuman Allah, "Seungab kheueh dan deungoe kheueh Ulôn, hai peunduduek nanggroe-nanggroe nyang jiôh. Meusiab-siab kheueh mangat teuka ubak kantô peungadelan, maju kheueh dan sunyueng kheueh peukara gata. Jak geutanyoe ta meusidang meusajan, keu teupeuputôh soe nyang beuna dan soe teuma nyang salah.
2 Soe kheueh nyang peugrak peunguasa di timu, dan nyang bri bak jihnyan meunang hana putôh-putôh? Soe nyang peujeuet gobnyan geupeutaloe bubena bansa, dan geupeutaklok bubena raja keu gobnyan? Deungon peudeueng gobnyan sampoe awaknyan meutabu lagée abée, deungon panah gobnyan awaknyan ka habéh meuhambô lagée jeumpueng jiyueb lé angén.
3 Gobnyan laju geutiyeub dan maju hana nyang lienteung; langkah gobnyan bagaih, watée geujak lagée rab-rab hana keunong bumoe.
4 Soe kheueh nyang peubuet banmandum nyan? Soe kheueh nyang peuteuntée jalan jih seujarah? Ulôn, TUHAN, Ulôn kheueh nyang phon that, dan teutab na sampoe án uroe pagée.
5 Peunduduek nanggroe-nanggroe nyang jiôh deuh geukalon peue nyang ka Ulôn peubuet. Awaknyan teukeujot dan yo meugám-gám ngon teumakot, laju meusapat meusajan dan jiteuka.
6 Banmandum ureuëng jiteumanyong sabe keudroe-droe, dan saleng teupeukong até.
7 Tukang kayée jipeukong até si tukang méuh, ureuëng nyang peulipeh logam deungon palée jipujoe ureuëng nyang teungoh meunempa di ateueh landasan. Geupeugah, 'Gét lagoena buet jaroe gata'; laju geupeukong deungon labang mangat bék guyang.
8 Teuma gata, Israel, hamba Ulôn, umat nyang Ulôn piléh, gata keuturonan Ibrahim, sahabat Ulôn.
9 Gata ka Ulôn cok nibak ujong-ujong bumoe, Ulôn tawök nibak teumpat-teumpat nyang jiôh. Kheun Ulôn, 'Gata kheueh, hamba Ulôn; Ulôn hana Lôn tulak nyang Ulôn piléh.'
10 Bék teumakot, sabab Ulôn na meusajan gata, bék gundah, sabab Ulôn na kheueh Po teu Allah gata. Gata Ulôn peukong dan Ulôn tulông, Ulôn peutakteh deungon jaroe Ulôn nyang jaya.
11 Ngieng kheueh, banmandum ureuëng nyang beungéh ubak gata, teuma teupeutaloe dan teuseungéh-seungéh. Ureuëng-ureuëng nyang lawan gata, teuma binasa dan habéh teusampôh.
12 Gata tamita ureuëng-ureuëng nyang teuntang droeneueh, teuma awaknyan hana meurumpok ngon droeneueh. Ureuëng-ureuëng nyang muprang deungon gata jinoenyoe ka binasa dan ka habéh gadôh han meuho saho.
13 Sabab Ulôn, TUHAN, Allah gata, nyang mat jaroe uneuen gata; Ulôn peugah, 'Bék takot, Ulôn teuma Lôn tulông gata.' "
14 Feureuman TUHAN, "Bék takot, Israel, bahpih gata ubit dan leumoh. Ulôn kheueh TUHAN nyang tulông gata, Nyang Mahakudus, Po teu Allah Israel na kheueh nyang peuseulamat gata.
15 Ngieng kheueh, gata Ulôn peujeuet lagée papeuen peungirek, nyang barô, tajam dan meugigo dua banja. Gata tangirek gunong-gunong dan tapeuhanco; bukét-bukét gata peujeuet lagée sikéum.
16 Gata teuma tatampo awaknyan, laju awaknyan jipupo lé angén dan geureutök lé angén badée. Gata teuma meugeumbira kareuna Ulôn, TUHAN, dan meubangga kareuna Ulôn, Allah Israel.
17 Meunyoe bansa Ulôn nyang malang nyan jijak mita ié, dan takue awaknyan tho sabab glaih, teuma Ulôn, TUHAN, Lôn jaweueb doá awaknyan; Po teu Allah Israel hana geutinggai umat Gobnyan.
18 Ulôn peujeuet krueng-krueng nyang ié jih jeuet ji ile bak bukét-bukét nyang ueh; mata ié jiteubiet di ateueh darat. Padang pasi Lôn peujeuet keu mon nyang meu ié; mata ié jiteubiet nibak tanoh nyang tho kreng.
19 Padang pasi Lôn pula ngon bak ceumara, bak zaiton, bak murad dan bak akasia. Padang beulantara Lôn peujeuet keu uteuen, uteuen eru, beurangan dan uteuen ceumara.
20 Dan mandum ureuëng jikalon dan jiteupeue bahwa Ulôn, TUHAN, nyang peubuet mandum nyan. Awaknyan teuma jisimak dan muphom, Po teu Allah kudus Israel nyang peujeuet nyan sampoe teujadi."
21 TUHAN, raja Israel, geupeugah ubak dewa-dewa, "Jak gadu laju peukara gata, dan peugah laju alasan-alasan jih!
22 Teuka kheueh, dan ramai kheueh peue nyang teuma teujadi, mangat singoh kamoe teupeue peue akhé jih. Tapeugah kheueh keujadian-keujadian yoh masa ilée, tapeutrang laju makna jih mangat kamoe simak.
23 Tapeugah kheueh peue nyang teuma teujadi, mangat kamoe teupeue bahwa gata beutôi ilahi. Peubuet kheueh laju nyang meuguna atawa nyang rugo, mangat kamoe tahe mante watée teungieng nyan.
24 Nyang sikeubit jih, gata dan buet-buet gata nyan hana, dan ureuëng-ureuëng nyang pujoe gata luwat lumpah na.
25 Ulôn ka Lôn grak sidroe ureuëng di timu: Ulôn tawök jihnyan mangat jijak prang rot utara. Bubena nyang mat kuasa geugilo-gilo lagée geubloh lam leuhôb, lagée ureuëng peugét beulangong tanoh jibloh-bloh lam tanoh kliet.
26 Soe lamkawan gata nyang ka tapeubuet lagée nyan sampoe kamoe jeuet kamoe peubeuna? Teuma lamkawan gata hana nyang tabri tée, hana ureuëng nyang na deungoe gata tapeugah haba.
27 Ulôn, TUHAN, nyang paleng awai Ulôn peugah ubak Sion; Ulôn nyang kirém ureuëng ba haba gét u Yerusalem.
28 Watée Lôn mita lamkawan dewa-dewa, hana meusidroe pih nyang hase jibri peutunyok, dan hana nyang jeuet jijaweueb.
29 Beutôi, dewa-dewa nyan hana meuguna, awaknyan na kheueh patong tuangan nyang hana meudaya, dan hana hase jipeubuet sapeue."


Chapter 42

1 Feureuman TUHAN, "Nyoe kheueh hamba Ulôn nyang Ulôn tulông ureuëng nyang Ulôn piléh nyang peugalak até Ulôn. Ulôn ka Lôn bri kuasa ubak jihnyan, mangat jiba keuadelan ubak meubagoe bansa.
2 Jihnyan hana jikliek atawa jidumpék deungon su nyang meudeungkeng, su jihnyan hana teudeungoe nibak rot ueh raya.
3 Trieng nyang ka leunuet hana jigeuwiet, panyöt nyang hu meukléb-kléb hana teuma jipeulon. Deungon seutia jihnyan jipeugah nyang beuna,
4 deungon hana bimbang atawa putôh asa, sampoe keuadelan jipeudong di ateueh bumoe. Nanggroe-nanggroe nyang jiôh jirindu keu ajaran jihnyan."
5 TUHAN Po teu Allah geucebta dan geuleueng langét; Gobnyan nyang peugöt bumoe deungon banmandum asoe nyang na didalam nyan. Gobnyan nyang bri keu manusia nafáh dan nyawöng mangat manusia nyan jeuet jiudeb. Dan Gobnyan geupeusan haba nyoe ubak hamba Geuh,
6 "Ulôn, TUHAN, nyang hôi dan nyang bri tugaih keu gata mangat gata peujak keuadelan. Gata Ulôn bimbeng dan Lôn peulara mangat jeuet keu peujanjian deungon umat manusia, dan trang keu banmandum bansa.
7 Mangat teupeubleuet mata ureuëng buta, dan peubeubaih manusia nibak glab nyang seupôt.
8 Ulôn kheueh TUHAN, dan nyan kheueh nan Ulôn; keu agungan Ulôn hana Lôn bri ubak barang gasoe ureuëng; dan meusyeuhu Ulôn hana teuma Ulôn bri keu patong.
9 Jinoenyoe nyang Ulôn ramai ka jeuet keu nyataan; Ulôn keuneuk Lôn bri tée hai-hai nyang barô; sigohlom nyan teujadi, ka Ulôn peugah ubak gata."
10 Meuca-e kheueh lagu nyan barô keu TUHAN, pujoe kheueh Gobnyan, hai banmandum bumoe! Meugeumuroh kheueh, hei laôt dan banmandum asoe jih, meunan cit nanggroe nyang jiôh dan banmandum asoe jih nyang na disinan.
11 Bah kheueh padang pasi dan banda-banda jipujoe TUHAN, bah kheueh peunduduek Kedar jipujoe Gobnyan! Bah kheueh peunduduek banda meusurak meuhubô, dan jimeuhôi-meuhôi di pucak gunong!
12 Bah kheueh awaknyan jipeuagong TUHAN, dan jipeumeusyeuhu Gobnyan di nanggroe-nanggroe nyang jiôh.
13 TUHAN geumaju ngaza lagée sidroe pahlawan, lagée sidroe tantra peunoh seumangat meunyoe jimuprang. Gobnyan nyang beuôt dumpék dalam prang, dan geupeuleumah keu-unggolan Gobnyan ubak lawan.
14 Po teu Allah meufeureuman, "Ka treb that Ulôn iem droe; Ulôn seungab dan Ulôn teundroe. Bak saát nyoe ka trok watée jih keu Lôn meubuet, Ulôn keuneuk kliek lagée inong nyang keuneuk peulahé aneuëk.
15 Gunong dan bukét Lôn peujeuet ueh dan tandus, banmandum seunaman Lôn peulayée. Pantôn-pantôn krueng Lôn ubah jeuet keu padang pasi, banmandum danau Lôn peuto kreng.
16 Bansa Ulôn nyang buta Lôn bimbeng meulalu rot nyang hana awaknyan teupeue; awaknyan teuma Lôn tunton bak jalan-jalan nyang hana awaknyan turi. Seupôt buta Lôn peujeuet trang keu awaknyan, dan jalan nyang keuwieng keuwot Lôn peurata. Nyan kheueh nyang Lôn peubuet keu awaknyan, dan nyan pasti Lôn laksana.
17 Ureuëng nyang peucaya keu patong beurala dan jiaku nyan sibagoe ilah awaknyan, nyan teuma teuhina dan teupeumalée."
18 TUHAN meufeureuman, "Deungoe kheueh, he ureuëng-ureuëng klo! Ngieng kheueh, he ureuëng-ureuëng buta!
19 Soe kheueh nyang leubeh buta nibak Israel namiet Ulôn? Soe kheueh nyang leubeh klo nibak utosan Lôn?
20 Israel, le nyang gata ngieng, teuma hana gata pako, geulinyueng gata teubuka, teuma hana gata deungoe."
21 TUHAN geutem peuseulamat nyan; Gobnyan geutem mangat huköm Geuh jihoreumat dan jipeu agong.
22 Teuma bansa nyan ka habéh jireupah; awaknyan jiteun di dalam-dalam kama di miyueb tanoh, dan jibeukab lam glab. Awaknyan jeuet keu ureuëng nyang keunong reupah, dan hana nyang teuka jijak tulông.
23 Soe lamkawan gata nyang tatem deungoe hai nyoe, dan tasimak keu silanjut jih?
24 Soe kheueh nyang jok Israel mangat jireupah? Bukon kheueh TUHAN keudroe? Ubak Gobnyan kheueh tanyoe meudesya, geutanyoe hana udeb meunurot peurintah Gobnyan dan hana ta turot peue nyang geupeurunoe.
25 Dan Gobnyan geupeujeuet geutanyoe meureuka nyang lumpah hebat, dan meudeurita sabab muprang nyang luwabiasa. Beungéh Gobnyan sampoe seu-uem di Israel lagée apui, teuma geutanyoe hana tasadar, dan hana meurunoe nibak nyang geutanyoe rasa.


Chapter 43

1 Israel, meunoe kheueh feureuman TUHAN, "Ulôn kheueh nyang peujeuet dan nyang peugét gata, bék teumakot, gata pasti Lôn peuseulamat! Ulôn ka Lôn hôi gata deungon nan gata, gata na kheueh milék Ulôn.
2 Meunyoe gata neujeumeurang ié, Ulôn teuma na meusajan gata, gata hana teuma karam dipat mantong gata meuteumé susah. Meunyoe meulalu apui, gata hana teuma angöh, cubaan-cubaan nyang brat hana teuma ceulaka gata.
3 Sabab Ulôn kheueh TUHAN, Po teu Allah gata, Allah kudus Israel, Nyang Peuseulamat gata. Meusé Ulôn bri sibagoe seuneuboh gata, Sudan dan Syeba sibagoe geunantoe gata.
4 Gata na meuyuem bak mata Lôn, Ulôn hareuga dan Lôn gaséh ubak gata; teuma Ulôn bri manusia sibagoe geunantoe gata, bansa-bansa sibagoe geunantoe nyawöng gata.
5 Bék teumakot, sabab Ulôn Lôn lindong gata.
6 Ulôn peurintah ubak utara dan seulatan, mangat awaknyan bubagaih jipeu lheueh laju. Bah aneuëk-aneuëk gata nyang agam jiwoe nibak jiôh, dan aneuëk-aneuëk gata nyang inong jiwoe nibak tieb-tieb ujong bumoe.
7 Sabab awaknyan banmandum ka teuhôi ateueh nan Ulôn, awaknyan Ulôn cebta keu ji peuagong Ulôn."
8 Po teu Allah meufeureuman, "Yue kheueh peuleumah droe ukeue bansa Ulôn nyang buta, bahpi na meumata; nyang klo, bahpi na ôn punyueng.
9 Yue kheueh banmandum bansa jimeugumpôi dan banmandum sukée jimeuhimpon. Soe kheueh lamkawan dewa-dewa awaknyan ka jibri tée peue nyang teujadi nibak saát nyoe? Soe teuma lamkawan nyan hase geuramai masa ukeue? Bah kheueh saksi-saksi awaknyan jijak ukeue, dan jibri bukeuti bahwa awaknyan beuna, mangat mandum jideungoe awaknyan geupeugah haba, bahwa meumang lagée nyan!
10 He umat Ulôn, gata kheueh saksi-saksi Ulôn, gata Ulôn piléh jeuet keu hamba-hamba Lôn, mangat neuturi Ulôn dan peucaya ubak Ulôn, dan neupeu phom bahwa Ulôn kheueh Po teu Allah. Ulôn Po teu Allah Nyang Mahaesa, hana nyang laén sigohlom dan óh ka lheueh Ulôn.
11 Ulôn keudroe TUHAN, seulaén nibak Lôn hana nyang peuseulamat gata.
12 Ulôn ka lheueh Lôn peugah ubak gata, Ulôn kheueh nyang peuseulamat gata, dan bukon ilah aséng nyang na di teungoh-teungoh gata; gata nyang jeuet keu saksi-saksi Lôn. Dan Ulôn, Ulôn nyoe Po teu Allah,
13 keu siumu masa Ulôn nyoe teutab Po teu Allah. Hana nyang hase geupeuleueh droe nibak kuasa Ulôn, atawa jihalangai reuncana Ulôn."
14 TUHAN peuseulamat gata, Nyang Kudus Israel geupeugah, "Deumi gata, Ulôn kirém sipa-i u Babel, dan Ulôn dobrak palang-palang pintoe peunjara; surak meuhubo di ureuëng Kasdim ulôn ubah jeuet jimo bae.
15 Ulôn kheueh TUHAN, Po teu Allah gata nyang kudus, Raja gata, nyang cebta gata, he Israel!"
16 TUHAN ka geupeugöt saboh jalan meulalu laôt, meulalu ié nyang meubok-bok meubura.
17 Gobnyan nyang yue peuwira dan sipa-i-sipa-i gobnyan u mideuen prang, dan awaknyan maju deungon geuritan meuguda. Teuma awaknyan reubah, han hase geubeudôh le, awaknyan matée lagée dah panyöt nyang lon.
18 TUHAN meufeureuman, "Hana guna neuingat masa nyang ka lheueh, peucuma neukeunang nyang ka-ka lewat.
19 Ngieng kheueh, Ulôn peubuet sisuatu nyang barô; jinoenyoe ka teupeuphon, peu kheueh han neukalon? Ulôn teuma Lôn peugét jalan dipadang pasi, dan krueng-krueng dalam gle beulantara.
20 Beulatang kleut teuma ji peuagong Ulôn; dan asée srigala dan cicém unta jipujoe Ulôn sabab Ulôn nyang peu ile ié di padang pasi, dan krueng-krueng di padang beulantara keu Lôn bri ié jieb ubak umat nyang ka Lôn piléh.
21 Awaknyan kheueh bansa nyang Ulôn beutuek keu droe Lôn keudroe, mangat jeuet geujak peusampoe puja ngon pujo keu Ulôn."
22 TUHAN meufeureuman, "Teuma gata Israel, hana neuseumah Ulôn, dan hana le meubakti ubak Ulôn.
23 Gata hana le neuba domba sibagoe keureubeuen nyang teutot, hana neuhoreumat Ulôn deungon peuseumahan gata. Padahai Ulôn hana Lôn peubeuban gata deungon keureubeuen, atawa Lôn peususah gata deungon Lôn tuntut keumeunyan.
24 Gata han neubloe dupa mangat bhée keu Ulôn, hana neupeupueh Ulôn deungon gapah keureubeuen nyang gata sie. Seubalek jih gata neupeubeuban Ulôn deungon desya-desya nyang gata peubuet, dan neupeususah Ulôn deungon buet-buet gata nyang salah.
25 Teuma ulôn Allah nyang sampôh desya gata, Ulôn peu amphon gata kareuna meunan kheueh sifeuet Ulôn; Ulôn hana Lôn ingat-ingat ubak desya gata.
26 Ingat kheueh ubak Ulôn, jak geutanyoe tajak ubak kantô peungadelan, peugah laju peukara gata mangat jeuet deuh bahwa gata na kheueh beuna.
27 Indatu gata nyang phon-phon that ka meudesya, dumna peumimpén ka meubeurontak teuhadab Ulôn,
28 imeum-imeum gata ka jipeukuto Rumoh Ulôn. Teuma Israel Ulôn seurah keu jipeuhina, keuturonan Nabi Yakub Ulôn peubiyeu jipeubinasa."


Chapter 44

1 TUHAN meufeureuman, "Deungoe kheueh, he Nabi Yakub hamba Ulôn, he Israel, umat nyang Ulôn piléh!
2 Ulôn kheueh TUHAN nyang peujeuet gata, nyang peujeuet gata phon lam rahim ma, dan nyang tulông gata. Bék teumakot, gata kheueh hamba Ulôn, umat nyang Ulôn piléh lom nyang Ulôn gaséh.
3 Sabab Ulôn teuma Lôn peu tijöh ié bak tanoh nyang tho, dan nyang peu ile ié krueng-krueng bak tanoh nyang geursang. Ulôn kubri kuasa keu keuturonan gata, dan nyang bri beureukat keu aneuëk cucoe gata.
4 Awaknyan teuma udeb subo lagée naleueng nibak binéh ié, lagée bak gandarusa nyang timoh nibak binéh krueng.
5 Sidroe deumi sidroe teuma meungaku droe jih sibagoe milék Ulôn, dan teuka meugabong deungon keuturonan Nabi Yakub. Maséng-maséng jituléh bak paleuet jaroe jih: Milék TUHAN, dan jipeugah droe jihnyan anggota umat Allah."
6 Nyoe kheueh feureuman TUHAN Nyang Mahakuasa, Raja dan peulindong Israel, "Ulôn Po teu Allah Nyang Mahaesa, nyang awai dan nyang akhé.
7 Soe kheueh nyang na lagée Lôn? Yue kheueh jih nyan jimeungaku! Bah kheueh jihnyan jibri tée dan jibri bukeuti ubak Ulôn! Soe nyang ka ramai masa ukeue phon awai sampoe akhé jamén?
8 Bansa Ulôn, bék teumakot atawa teukeujot; kon kheueh phon yoh ilée sampoe án jinoe Ulôn ka lheueh Lôn ramai peue nyang teuma teujadi? Gata nyoe kheueh saksi-saksi Lôn. Peulindong nyang laén hana dan hana Lôn turi."
9 Ureuëng-ureuëng nyang peugot patong beurala nyan hana meuguna, dan dewa-dewa nyang awaknyan pujoe nyan hana meufaedah. Ureuëng-ureuëng nyang seumah patong nyan buta dan hana jiteupeue sapeue, sabab nyan awaknyan meuteumé malée.
10 Sia-sia kheueh teupeugét patong tuangan dan jiseumah nyan sibagoe dewa!
11 Beutôi, banmandum ureuëng nyang seumah patong teuma meuteumé malée. Ureuëng nyang peugét patong nyan manusia biasa. Yue kheueh awaknyan teuka meusajan-sajan; pasti awaknyan teumakot dan malée.
12 Teumpeuen beuso laju jicok sikrek logam dan jipeugot laju atra nyan didalam apui dan jiseukok deungon palée. Buet nyan jipeubuet deungon habéh teunaga nyang na nibak ureuëng nyan. Teungoh geumeubuet, gobnyan jiteuka deuk, glaih, dan hék.
13 Tukang kayée jiukoe kayée. Tukang nyan jigamba pola deungon gapu, jiuke nyan deungon alat-alat dan jipeujeuet nyan keu patong manusia nyang gagah, laju atranyan jikeubah didalam rumoh.
14 Barang kali kayée nyang jipeuguna nyan asai jih nibak bak ceumara, bak aron atawa bak kayée sala nyang jiteubang lam uteuen. Mungken cit jihnyan jipula bak salam laju jipreh ujeuen jitöh sampoe bak salam timoh.
15 Siladum nibak kayée nyan ji peujeuet keu kayée apui keu alat meu adeueng meunan cit teumpat tot ruti dan teu panggang uengkot sie, dan puih kheueh até jihnyan. Ureuëng nyan meu adeueng dan jipeugah, "Bit mangat that dan seu-uem! Bit galak that deungon apui nyoe!" Leubeh kayée nyan jipeuguna keu teupeugét patong. Laju jiteukui jiseumah nyan dan meudoá, "Droeneueh kheueh ilah ulôn, peuseulamat kheueh ulôn!"
18 Bit bangai that ureuëng-ureuëng nyang lagée nyan! Awaknyan ka jipet mata dan até awaknyan sampoe hana muphom sapeue.
19 Utöh patong nyan hana sampoe jipike, "Kayée nyan siladum ulôn tot, dan adang jih ulôn ngui keu lôn tot ruti dan lôn panggang uengkot sie keupeunajoh lôn. Laju kayée nyang leubeh nyan ulôn peugét patong. Jadi jinoenyoe ulôn seumah sikrak kayée!"
20 Buet nyang lagée nyan saban cit deungon jipajoh abée. Ureuëng nyan ka jipeusisat lé pikeran jih nyang bangai, sampoe jihnyan ka han hase le teutulông. Jihnyan hana hase jiaku bahwa patong nyang mantong na nibak jaroe jih nyan na kheueh alat teumipée nyang hana meuguna., Peucebta dan Peuseulamat
21 TUHAN meufeureuman, "Ingat kheueh banmandum nyoe, he Israel, sabab gata kheueh hamba Ulôn. Ulôn nyang peujeuet gata, dan gata hamba Ulôn, Israel, Ulôn hana tuwoe keugata!
22 Salah gata nyan Ulôn use lagée awan, desya gata Ulôn sampôh lagée sagôb. Woe kheueh ubak Ulôn, sabab Ulôn ka Lôn peubeubaih gata!"
23 Meusurak kheueh ngon geumbira, he langét, meusurak geumbira kheueh, he bagian nyang na dalam bumoe! Meusurak kheueh deungon geumbira, he gunong-gunong! meunan cit deungon uteuen dan tieb-tieb bak kayée nyang na lam nyan! Sabab TUHAN ka geutunyok keuagongan Gobnyan deungon cara geuteuboih Israel umat Gobnyan.
24 Meunoe kheueh feureuman TUHAN nyang peuseulamat gata nyang peujeuet gata yohphon lam rahim ma, "Ulôn kheueh TUHAN nyang peujeuet peue-peue nyang na, nyang sidroe mantong Lôn leueng langét, dan hana nyang tulông Lôn peujeuet bumoe.
25 Ulôn kheueh nyang peubateue peue-peue nyang ji ramai lé tukang ramai, dan nyang peubeuáh bubena tukang-tukang tanueng. Tutoe haba ureuëng carông Ulôn sangga, keubijaksanaan awaknyan Ulôn peujeuet keubuet nyang bangai.
26 Ulôn kheueh nyang peukong tutoe haba hamba Ulôn, dan nyang peubuet reuncana nyang jipeugah lé utosan Lôn, Ulôn peugah bahwa Yerusalem teukeumiet lom, dan banda-banda Yehuda Lôn peudong lom; rungka-rungka jih teupeupuléh teuma.
27 Ulôn kheueh nyang peugah ubak tuwie ié laôt: Surot kheueh! Ulôn keuneuk peutö banmandum krueng gata.
28 Ulôn kheueh nyang peugah ubak Kores, 'Gata kheueh nyang peurintah keu Ulôn, dan peubuet peue mantong nyang Ulôn meuhéut. Peurintah kheueh mangat Yerusalem geupeudong lom, dan Baét TUHAN geupeuduek keunaleueng jih.' "


Chapter 45

1 TUHAN ka geupiléh Kores jeuet keu raja; gobnyan geutunyok mangat hase jipeutaloe bansa-bansa dan keujiwiet keukuasaan raja-raja. TUHAN geupeuhah pintoe-pintoe geureubang keu gobnyan, hana meusaboh pih nyang tinggai teutôb. Ubak gobnyan TUHAN meufeureuman,
2 "Ulôn kupeusiab rot keu gata; gunong dan bukét Lôn peurata, pintoe-pintoe teumaga Ulôn peuhanco, dan palang-palang beuso Ulôn wiet.
3 Dan keu gata Ulôn bri hareuta keukayaan nyang mantong teusöm, mangat gata tateupeue bahwa Ulôn kheueh, TUHAN, Allah Israel, nyang ka tawök gata deungon nan gata.
4 Gata Ulôn tawök dan Ulôn boh nan gala, bahpi gata hana taturi Ulôn. Lôn bri tugaih keugata tatulông bansa Israel hamba Ulôn, sabab awaknyan bansa nyang Ulôn piléh.
5 Ulôn kheueh TUHAN, hana nyang laén, Ulôn nyoe Po teu Allah Nyang Mahaesa. Keu gata ka Lôn bri sinjata, bahpi gata hana taturi Ulôn.
6 Banmandum nyang Ulôn peubuet nyan mangat phon di timu sampoe u barat mandum ureuëng jiteupeue bahwa Ulôn kheueh TUHAN, hana ilah nyang laén seu laén Ulôn.
7 Ulôn kheueh nyang peujeuet trang dan seupôt, Ulôn nyang peuteuka beureukat dan bala. Ulôn kheueh TUHAN nyang peubuet banmandum nyan.
8 Di ateueh langét Ulôn peutron nyang meunang lagée ujeuen, bumoe jipeuhah droe keu jiteurimong ié ujeuen nyan, laju jipeutimoh keuseulamatan dan keubeubaihan; dan Ulôn TUHAN nyang peujeuet nyan sampoe teujadi."
9 Ceulaka kheueh ureuëng nyang jimeubantah deungon peucebta jihnyan; jihnyan lagée beulangong nyang lawan ureuëng nyang peugöt jihnyan. Peu kheueh tanoh kliet nyan jitanyong ubak ureuëng nyang peugét beulangong nyan, "Peue nyang teungoh neupeubuet nyan?" Peu kheueh beulangong nyan apoh apah bahwa nyang peugét jihnyan hana jeuet sapeue?
10 Ceulaka kheueh ureuëng nyang jipeugah ubak ureuëng syiek jih, "Pakon ulôn nyoe geupeulahé lagée nyoe bagoe?"
11 TUHAN, Po teu Allah Kudus Israel meufeureuman, "Tanyong kheueh ubak Ulôn keuhai masa ukeue gata. Teuma bék tatanyong keuhai aneuëk-aneuëk Ulôn, atawa tayue ubak Ulôn teupeugét sapeue-sapeue.
12 Ulôn kheueh TUHAN nyang peujeuet bumoe, dan nyang cebta manusia mangat jiduek di ateueh bumoe nyan. Deungon kuasa Ulôn laju Lôn leueng langét, dan Lôn peurintah bak mata uroe, bak buleuen dan bak mandum bintang-bintang.
13 Ulôn kheueh nyang peugrak Kores mangat jipeubuet meukeusut Ulôn dan jipeudong keuadelan. Ulôn kupeurata banmandum jalan nyang jijak. Gobnyan geupeudong lom banda Ulôn Yerusalem dan geupeuleueh umat Ulôn nyang teutawan, hana teusuab dab hana teuma teubayeue." TUHAN Nyang Mahakuasa ka geupeugah haba.
14 TUHAN meufeureuman ubak Israel, "Gatacok kheueh keudroe hase seunaman tanoh Meusé dan laba nibak nanggroe Sudan. Ureuëng-ureuëng Syeba nyang beuhe ngon gagah jeuet keu hakmilék gata; Awaknyan jijak dilikot gata deungon jaroe teubeuleunggu. Awaknyan jisujut dan meungaku; 'Po teu Allah beutôi-beutôi na lamkawan gata; hana ilah laén seulaén Gobnyan!
15 Po teu Allah nyang peuseulamat Israel na kheueh Allah nyang geusöm droe.
16 Banmandum ureuëng nyang jipeugét patong beurala; teuma geupeumalée dan geuhina.
17 Teuma Israel geupeuseulamat lé TUHAN; keuseulamatan awaknyan teutab meuteun. Gata hana geupeumalée dan jihina sampoe siumu masa.' "
18 TUHAN kheueh nyang cebta langét, Gobnyan kheueh Po teu Allah! Gobnyan kheueh nyang peujeuet dan nyang bentuek bumoe, nyang peujeuet bumoe nyan khong ngon kukoih dan teutab teudong. Gobnyan hana geupeujeuet teumpat nyang seungue seunyab, teuma teumpat keuteumpat tinggai. Gobnyan kheueh nyang peugah haba, "Ulôn kheueh TUHAN, dan hana TUHAN nyang laén seulaén Ulôn.
19 Ulôn hana Lôn peugah haba deungon seungab-seungab, atawa seucara rahsia. Ulôn hana Lôn yue umat Ulôn Israel jijak mita Ulôn deungon peucuma. Ulôn, TUHAN, Lôn peugah haba nyang beuna, dan nyang bri tée peue-peue nyang beutôi."
20 TUHAN meufeureuman, "Meugumpôi kheueh dan teuka kheueh meusajan-sajan, gata banmandum nyang hana keunong lamkawan bansa-bansa! Bangai that ureuëng nyang jiseuôn-seuôn patong kayée, dan meudoá ubak dewa-dewa nyang hana hase jipeuseulamat jihnyan.
21 Ba laju peukara gata, peugah laju bukeuti-bukeuti jih, dan, bah kheueh awaknyan jimeupakat meusajan-sajan. Soe kheueh nyang peugah hai nyan dan nyang bri tée phon yoh masa ilée? Peu kheueh kon Ulôn, TUHAN? Hana ilah nyang laén, seulaén Ulôn. Ulôn kheueh Po teu Allah nyang ade nyang bri seulamat, hana nyang laén seulaén Ulôn!
22 He, banmandum ureuëng nyang tinggai di ateueh bumoe, meupaleng kheueh ubak Ulôn mangat gata Lôn peuseulamat, sabab Ulôn nyoe Po teu Allah, hana nyang laén!
23 Ulôn ka Lôn meujanji, dan janji Ulôn nyan hana bateue; deumi Ulôn keudroe Ulôn meusumpah: Tieb-tieb ureuëng nyang jimeuteuôt dikeue Ulôn, dan lam basa jih nyan keudroe meujanji seutia ubak Ulôn.
24 Ureuëng ramé teuma jipeugah, 'Keuadelan dan teunaga na nibak TUHAN!' Banmandum ureuëng banci keu Ulôn ureuëng nyan jijak ubak Ulôn dan laju meuteumé malée.
25 Teuma keuturonan Nabi Yakub teupeuseulamat, dan awaknyan jipujoe Ulôn, TUHAN.


Chapter 46

1 Nyoe akhé riwayat dewa-dewa Babel; yoh watée ilée patong Bel dan Nebo jiseumah, teuma bak saát nyoe ka jiseumah di ateueh beulatang, jeuet keu beuban keu beulatang nyang hék.
2 Patong-patong nyan hana hase jitulông nyang seuôn droe jih, awaknyan keudroe teuangkot sibagoe ureuëng keunong teuen. Nyan kheueh akhé riwayat awaknyan.
3 Deungoe kheueh Ulôn, he keuturonan Nabi Yakub, gata banmandum nyang na teutinggai nibak umat Lôn. Ulôn ka Lôn peulara gata yoh phon gata lahé u donya.
4 Ulôn nyoe teutab Po teu Allah gata sampoe án tuha gata; dan teutab Lôn jaga gata sampoe gata putéh ôk nibak ulée. Ulôn nyang peujeuet gata dan teutab Lôn jaga gata, Ulôn kutulông dan Lôn peuseulamat gata.
5 Deungon soe gata keuneuk peusaban Ulôn? Peu kheueh na nyang jeuet teupeusaban deungon Lôn?
6 Ureuëng jipeuhah dompet dan laju jiruwah méuh, dan jitimang pirak jihnyan deungon ceng. Gobnyan jijok upah keu tukang méuh mangat jitem peugét patong beurala, laju jiseumah patong nyang jipeugét keudroe.
7 Patong nyan laju jilabang dan jikeubah bak teumpat jih, ureuëng nyan jidong disinan dan hana jeuet jiminah. Meunyoe ureuëng meudoá ubak jihnyan, lé jihnyan hana jijaweueb, dan hana jipeuseulamat jihnyan nibak keususahan.
8 Ingat kheueh dan peutimang kheueh, he ureuëng-ureuëng doraka!
9 Ingat kheueh keujadian-keujadian yoh masa ilée; meungaku kheueh bahwa Ulôn nyoe Po teu Allah, dan hana nyang laén, Ulôn Allah, dan hana nyang na lagée Ulôn.
10 Phon yoh awai Ulôn peugah hai-hai nyang dudoe, phon yoh ilée ka Ulôn ramai peue-peue nyang teujadi. Kheun Ulôn: Keuputosan Ulôn teuma teulaksana, keuheundak Ulôn pasti Ulôn peubuet!
11 Ulôn tawök laju sidroe peunguasa di timu laju jiteuka lagée saboh cicém juwah keujijak peubuet keuputosan Ulôn. Peue nyang Ulôn peugah pasti Ulôn peubuet, peue nyang Ulôn reuncana pasti Ulôn keureuja.
12 Deungoe kheueh Ulôn, he ureuëng-ureuëng cungkak, gata nyang sangka bahwa meunang nyan mantong jiôh.
13 Ulôn kupeuto uroe peubeubaihan, keuseulamatan nyang Ulôn jok hana teutunda le. Ulôn teuma Lôn peuseulamat Yerusalem dan Ulôn bri horeumat keu Israel."


Chapter 47

1 TUHAN meufeureuman, "Hei Babel, tron kheueh nibak keurajeuen gata, dan gata duek kheueh ateueh abée. Muso ngon maméh lagée yoh ilée ka hana le nibak gata.
2 Gileng kheueh teupông deungon batée; peuhah kheueh tôb ulée gata, salob kheueh ija rok sampoe leumah beuteh gata, dan jeumeurang kheueh bubena krueng.
3 Ureuëng laén jingieng gata nyang teulon, jihina ngon jipeumalée. Ulôn kubalaih dam ateueh gata, dan hana meusidroe pi nyang na Lôn tinggai."
4 Po teu Allah nyang suci bansa Israel geupeubeubaih geutanyoe, nan Gobnyan TUHAN Nyang Mahakuasa.
5 TUHAN meufeureuman ubak Babel, "Seungab kheueh, dan tamong kheueh laju lam seupôt buta. Gata hana le teupeugah 'Ratu keurajeuen-keurajeuen.'
6 Yoh masa ilée Ulôn beungéh ubak umat Lôn, awaknyan hana le Lôn anggab atra milék Ulôn. Laju awaknyan Ulôn seurah ubak gata, dan gata pi hana tagaséh keu awaknyan, sampoe nyang ka tuha-tuha gata teugon deungon keujam hán peue takira.
7 Gata tapike jeuet keu ratu siumu masa, dan hana gata insaf atawa gata pike peukeuneu lheueh nyang teujadi.
8 Sabab nyan deungoe kheueh Ulôn, hei gata nyang galak tatiyeub keuseunangan! Gata pike udeb gata aman, dan hana nyang lagée gata. Gata pike gata hana jeuet keu inong balée, dan keuturonan gata hana binasa.
9 Teuma sikeujab mantong, lam siuroe, mandua hai nyan sigoe guih teujadi. Bah kheueh tapeuguna sihe ngon nurajah mubisa, lakoe gata ngon aneuëk gata teutab teucok cit teuma.
10 Gata tapike aman bak buet nyang jeuhet gata, gata pike buet nyang jeuhet gata hana geungieng nyata. Gata ka jipeusisat lé keubijaksanaan dan iéleumé peungetahuan gata, gata pike hana nyang lagée gata.
11 Teuma gata keunong bala, iéleumé sihe gata hana kuasa jipeusie droe. Ubak gata jiteuka lé bala ngon haro hara, dan hana hase gata sangga. Binasa nyan teuka ngon ban sikreb mata, dan hana gata sangka sigohlom nyan teuka.
12 Gata pike mantong bak nurajah dan iéleumé sihe gata, nyang peususah gata yoh masa ubit sampoe ka rayeuk gata. Pat tateupeue nyan meuguna nibak gata, keu teupeutakot banmandum musoh gata.
13 Gata payah that sabab jai lumpah na nariet peuingat. Gata yue laju bubena tukang meuramai nyan teuka jijak peuseulamat gata; awaknyan nyang ka lheueh jiseulidek jeueb-jeueb sagoe langét, dan jimurunoe keuhai bintang-bintang, dan ubak tieb-tieb buleuen barô jiramaikan peue nyang ka jeuet keu naséb gata.
14 Kalon, awaknyan lagée jumpueng nyang teungoh jipajoh lé apui; hana hase jipeuseulamat droe jih keudroe! Apui hu nyan lumpah that seu-uem nibak awaknyan, kon apui seu-uem teumpat meuadeueng.
15 Nyan kheueh guna jih bandum tukang ramai nibak gata nyang peususah gata phon yoh masa ubit gata; maséng-maséng awaknyan jijak jitinggai gata; hana nyang teuka jijak tulông gata."


Chapter 48

1 Deungoe kheueh nyoe, he keuturonan Nabi Yakub, keuturonan Yehuda nyang teungui nan Israel, gata peugah gata meungaku Po teu Allah Israel, dan tameusumpah ateueh nan TUHAN. Teuma peue nyang gata peugah nyan hana nyang jujoe.
2 Bahpi meunan, gata taaku deungon bangga bahwa gata peunduduek banda nyang suci; dan bahwa gata meusadeue ubak Allah Israel nyang teupeugah TUHAN Nyang Mahakuasa.
3 TUHAN meufeureuman, "Deungoe kheueh, he Israel! Peue nyang ka teujadi yoh masa ilée, hai nyan ka treb that Ulôn bri tée; peue nyang Ulôn peugah, bagaih that Lôn peubuet dan Ulôn peujeuet bak keunyataan.
4 Ulôn ku teupeue bahwa gata kreueh that até, kreueh ulée dan meu-ulée batée.
5 Dan yoh ilée ka lheueh Ulôn ramai; sigohlom teujadi, ka lheueh Ulôn bri tée, mangat gata bék tapeugah, bahwa nyan na kheueh buet-buet nyang jipeubuet lé patong beurala gata.
6 Banmandum nubuat Ulôn nyang gata deungoe ka teujadi; gata harôh taaku bahwa buet Ulôn nyan beuna. Bak saát nyoe Ulôn bri tée hai-hai nyang barô, rahsia-rahsia nyang gohlom gata teupeue.
7 Barô jinoenyoe Ulôn peugah, dan bukon yoh masa ilée; gohlom na peureunah gata deungoe keuhai nyang nyan, mangat gata hana jeuet tapeugah, bahwa gata tateupeue banmandum nyan.
8 Ulôn ku teupeue bahwa gata hana jeuet teupeucaya, yoh phon masa ilée gata ka meusyeuhu sibagoe ureuëng doraka. Sabab nyan kheueh hana gata teupeue, hana meusikrak haba pih nyang na trok ubak punyueng gata.
9 Ulôn kupeuteun-peuteun ubak beungéh Lôn mangat nan Ulôn jipeumeusyeuhu. Ulôn peuteun nyan keudroe gata, mangat gata hana jipeubinasa.
10 Ulôn kupujoe gata lam apui peundeuritaan, lagée pirak nyang teutot murni lam sinungkée apui.
11 Nyan Ulôn peubuet deumi keudroe-droe Lôn, sabab Ulôn hana Lôn peubiyeu nan Ulôn jipeukuto; keumuliaan Ulôn hana Lôn bagi deungon soemantong."
12 TUHAN meufeureuman, "Deungoe kheueh he Israel, umat nyang Ulôn tawök, Ulôn nyoe teutab Po teu Allah gata. Ulôn kheueh nyang awai phon, dan Ulôn teuma nyang paleng akhé.
13 Jaroe Ulôn nyang peuduek phon dasai bumoe dan nyang lheueng dumna cakrawala. Meunyoe Ulôn tawök nan jihnyan, awaknyan bagaih that jiteuka.
14 Meugumpôi kheueh gata banmandum dan deungoe kheueh nyoe! Lamkawan dewa-dewa hana nyang ramai bahwa ureuëng nyang Ulôn piléh jigeuseurang Babel; jihnyan jipeubuet peue nyang Ulôn lakée.
15 Ulôn kheueh nyang peugah dan nyang tawök jihnyan, nyang bimbeng jihnyan, sampoe jih nyan meuhase.
16 Peurab kheueh beutoe bak Ulôn dan deungoe kheueh nyoe, phon yoh ilée Ulôn peugah haba troh trang; dan tutoe haba Lôn sabe Ulôn peujeuet bak keunyataan." Jinoenyoe TUHAN Po teu Allah geu kirém ulôn dan geubri bak ulôn kuasa keudroe.
17 Kheun Allah kudus Israel, Peuseulamat gata, "Ulôn kheueh TUHAN Po teu Allah gata, nyang peurunoe gata peue nyang meuguna keudroe gata, dan nyang bimbeng gata nibak jalan nyang harôh gata jak.
18 Seukira jih gata tapeurati bubena peurintah-peurintah Ulôn, dan keuseujahteuraan gata lagée krueng nyang hántom tho, dan keumujuran gata nyan lagée umbak di laôt nyang hántom jipiôh.
19 Keuturonan gata le jih lagée ano dipante; Ulôn kujamin awaknyan hana jipeubinasa."
20 Jak kheueh dan taplueng kheueh di Babel, jak peumaklum kheueh haba nyoe hoho mantong. Peusampoe kheueh deungon seumurak nyang geumbira; "TUHAN ka geupeuseulamat Israel, hamba Gobnyan!
21 Watée Gobnyan geubimbéng awaknyan meulalu padang nyang tho kreng, awaknyan hana teurasa grah. TUHAN geuprah gunong batée dan dalam batée nyan laju jiteubiet ié, nibak batée nyan Gobnyan geupeu ile laju ié keu awaknyan.
22 Hana keuseulamatan keu ureuëng jeuhet," meunan kheueh geupeugah lé TUHAN.


Chapter 49

1 Deungoe kheueh ulôn, he nanggroe-nanggroe nyang jiôh tasimak kheueh tutoe haba lôn nyoe. TUHAN geuhôi ulôn sigohlom ulôn geupeulahé lé ma, Gobnyan ka geupiléh ulôn yoh ulôn mantong lam pruet ma.
2 Gobnyan geupeujeuet tutoe haba lôn tajam lagée mata peudeueng, deungon jaroe Gobnyan keudroe geulindong ulôn. Gobnyan nyang peujeuet ulôn lagée aneuk panah nyang teuasah, dan geukeubah didalam sarông mangat jeuet teupeuguna.
3 Feureuman Gobnyan ubak ulôn, "Gata kheueh hamba Ulôn; Ulôn teuma jipeumulia sabab lé gata."
4 Teuma di ulôn ku peugah, "Hék ngon payah ulôn peucuma mantong; lôn peuhabéh teunaga ulôn deungon sia-sia!" Teuma dilôn yakén TUHAN teutab geubila hak ulôn, Po teu Allah geubalaih keulôn meunurot nyang ulôn peubuet.
5 Sigohlom lahé, ulôn ka geutawök lé TUHAN jeuet keuhamba Gobnyan, mangat teupeusapat banmandum umat Israel, mangat awaknyan jiwoe ubak Gobnyan. TUHAN geupeujeuet ulôn teuhoreumat, Po teu Allah na kheueh teunaga ulôn.
6 TUHAN meufeureuman ubak ulôn, "Tugaih nyang leubeh raya ka teupreh gata, he hamba Lôn; gata kon mantong tapulang keuturonan Nabi Yakub nyang mantong na tinggai sidroe-dua, dan nyang peupuléh keubeusaran sukée-sukée Israel, teuma Ulôn peujeuet trang keu bansa-bansa, mangat jeuet bansaboh donya teupeuseulamat."
7 Po teu Allah Nyang Mahakudus nyang peuseulamat Israel geupeugah ubak ureuëng nyang lumpah teuhina, dan nyang jibanci lé bansa-bansa dan nyang jeuet keunamiet lé nyang mat kuasa, "Raja-raja teuma jikalon buet-buet ulôn; awaknyan jibeudôh jihoreumat ulôn. Meunan cit lé bubena peunguasa teuma jikalon, laju jisujut sira jiseumah." geupeujanji.
8 TUHAN meufeureuman ubak umat Gobnyan, "Watée Ulôn meukeuheundak, Ulôn jaweueb; bak uroe Ulôn peuseulamat, Ulôn ku tulông gata. Gata Ulôn lindong dan Ulôn jaga, dan Ulôn peujeuet peujanjian keu bansa-bansa. Ulôn puléh nanggroe nyang seungue seungab jeuet keutanoh pusaka keu teumpat tinggai.
9 Ureuëng nyang jipeunjara Ulôn yue teubiet; nyang na lam seupôt Ulôn ba u teumpat trang. Bahpi dibukét nyang lapeueng awaknyan hana kureueng sapeue, bansipanyang rot na teukeubah peunajoh.
10 Awaknyan hana grah atawa deuk, dan hana teuma keunong mata uroe criet dipadang pasi. Sabab Ulôn, nyang sayang keu awaknyan, teuma bimbeng awaknyan dan nyang ba awaknyan ubak asai mata ié.
11 Ulôn nyang peugöt rot ueh meulalu gunong-gunong, banmandum rot ueh raya teuma Lôn peusabe rata.
12 Nibak teumpat nyang jiôh umat Ulôn ka habéh jiteuka, di utara, barat dan Sinim di seulatan."
13 Meuca-e kheueh he langét di manyang, meusurak kheueh he bumoe di miyueb, he banmandum gunong, meusurak kheueh geumbira! Sabab TUHAN geuteuka geujak hibur umat Gobnyan, Gobnyan geugaséh ubak umat Geuh nyang keunong iénanya.
14 Teuma peunduduek Yerusalem jipeugah, "TUHAN ka geutinggai geutanyoe, TUHAN geutanyoe ka geutuwoe keu geutanyoe."
15 TUHAN geujaweueb sira geupeugah, "Peu kheueh mungken sidroe ma jituwoe keu aneuëk jih, dan hana jigaséh keu aneuëk droe jihnyan? Bahpi aneuëk nyan jituwoe keu ma jih, Ulôn teuma Lôn tuwoe keu gata!
16 Yerusalem, Ulôn sabe lam ingat ubak gata; nan gata Lôn uke lam paleuet jaroe Lôn.
17 Ureuëng-ureuëng nyang peudong gata deungon reujang jiteuka, dan nyang ka jipeuhanco gata deungon bagaih jiwéh laju.
18 Ngieng kheueh dan pandang kheueh ban sikeulileng gata, rakyat gata ka meugumpôi dan jijak ubak gata. Deumi Ulôn, Allah nyang udeb, Ulôn peugah, sunggoh, gata bangga deungon peunduduek gata, lagée dara barô inong nyang bangga deungon piasan nyang meuleukek nibak tuboh.
19 Nanggroe gata nyang tho kreng lom ngon seungue seungab, bak saátnyoe ka jeuet keusampiek nibak ureuëng-ureuëng nyang keuneuk tinggai disinan. Dan ureuëng-ureuëng nyang keuneuk peubinasa gata, ka jijak jiôh nibak gata.
20 Aneuëk-aneuëk nyang lahé di nanggroe aséng teuma jipeugah ubak gata, 'Nanggroe nyoe lumpah that sampiek nibak ulôn, neubri kheueh teumpat mangat jeuet lôn tinggai disinoe.'
21 Dan gata teuma tapeugah lam até, 'Soe kheueh nyang peulahé aneuëk-aneuëk nyan keu ulôn? Bukon kheueh ulôn ka gadôh aneuëk-aneuëk lôn, dan hana hase le jipeulahé aneuëk? Ulôn ka jiböih dan ka jikireueh dan laju jitinggai sidroe kong. Jadi rot pane aneuëk-aneuëk nyan, dan soe nyang peurayeuk awaknyan?' "
22 TUHAN Nyang Mahamanyang geupeugah ubak umat Gobnyan, "Ulôn kubri tanda keu bansa-bansa dan awaknyan jipulang aneuëk-aneuëk gata; aneuëk-aneuëk gata nyang agam jitingkue, dan aneuëk-aneuëk gata nyang inong jigulam ateueh bahô.
23 Raja-raja jeuet lagée bapak nibak gata, dan ratu-ratu sibagoe ma. Awaknyan jisujut jihoreumat gata dan jipeumiyueb droe dikeue gata. Dan gata tateupeue bahwa Ulôn nyoe na kheueh TUHAN; ureuëng nyang meuharab ubak Ulôn hana Lôn peukeucewa."
24 Gata tatanyong, "Peu kheueh mungken jarahan jireupah bak jaroe pahlawan, atawa tawanan jireupah lam reugam ureuëng keujam?"
25 TUHAN geujaweueb, "Nyan kheueh nyang teuma teujadi. Tawanan bubena pahlawan jireupah lom. Jarahan ureuëng keujam teureupah lom. Sabab Ulôn keudroe nyang lawan musoh gata; Ulôn kupeuseulamat aneuëk-aneuëk gata.
26 Ulôn kupeujeuet musoh gata mabök darah, sampoe awaknyan jimupoh sabe keudroe-droe. Dan banmandum umat manusia jiteupeue, bahwa Ulôn, TUHAN, Peuseulamat gata; Nyang Mahateuga, Po teu Allah Nabi Yakub, nyang teuboh gata."


Chapter 50

1 TUHAN meufeureuman ubak bani Israel, "He umat Ulôn, gata pike ulôn ku use gata lagée sidroe ureuëng lako jiuse peurumoh jih? Meunyoe meunan, dipat surat taleuek jih? Gata pike Ulôn nyoe kupeubloe gata, lagée sidroe ayah jipeubloe aneuëk jih ubak ureuëng nyang tunggée utang? Kon! Gata jiteun dan jitiek, sabab desya dan buet nyang jeuhet gata keudroe!
2 Pakon nibak umat Lôn hana meusidroe pih nyang na jijaweueb, watée Ulôn teuka Lôn jakhôi awaknyan? Peu kheueh awaknyan seungab mantong sabab jisangka Ulôn hana hase Lôn peulheueh dan Lôn peuseulamat awaknyan? Nyang sikeubit jih, ateueh peurintah Lôn laôt nyan hase tho kreng, krueng-krueng Ulôn peujeuet keupadang pasi, dan bubena uengkot habéh maté dan mubée banga.
3 Langét Lôn peujeuet itam seupôt ngon glab, teuma Ulôn tôb lagée ija kabông."
4 TUHAN Nyang Mahamanyang geupeurunoe ulôn peugah haba, mangat tutoe ulôn jeuet teupeukhong ureuëng nyang laéueh. Tieb-tieb beungoh Gobnyan geupeubeudôh hasrat ulôn mangat lôn deungoe ajaran Gobnyan keu ulôn.
5 TUHAN geubri keu ulôn peungeurtian; ulôn hana beurontak atawa meupaleng nibak Gobnyan.
6 Ulôn jok rueng lôn keu ureuëng nyang seunuét ulôn; dan mieng ulôn keu ureuëng nyang bot janggot lôn. Ulôn hana lôn peupaleng muka watée ulôn jihina dan jiludah teuma.
7 Sabab TUHAN Po teu Allah geutulông ulôn, sabab nyan ulôn hana geubri malée. Ulôn peukhong até lôn mangat tabah; ulôn teupeue ulôn hana geupeumalée.
8 Sabab Po teu Allah rab, Gobnyan nyang peugah bahwa ulôn hana meusalah. Soe nyang keuneuk meubantah deungon lôn? Jak geutanyoe ta teubiet meusajan-sajan. Soe nyang keuneuk lawan ulôn? Yue kheueh ureuëng nyan jipeurab ubak ulôn.
9 Keubit, TUHAN Nyang Mahamanyang geubila lôn, soe ureuëng nyang jijeuet peugah ulôn nyoe meusalah? Banmandum nyang tudoh ulôn nyan teuma leunyab lagée ija brok nyang jipajoh lé keuraleub.
10 He gata nyang horeumat TUHAN, dan nyang deungoe tutoe haba hamba Gobnyan, rot ueh nyang gata jak mungken seupôt, dan hana cahya nyang jipeutrang keu gata; teuma peucaya kheueh ubak TUHAN; meusadeue kheueh ubak Allah gata.
11 He gata nyang keuneuk peuceulaka ureuëng laén, gata teuma geupeuceulaka lé reuncana gata keudroe. TUHAN kheueh nyang peubuet nyan sampoe teujadi, gata geuseksa nyang paleng hebat.


Chapter 51

1 TUHAN meufeureuman, "Deungoe kheueh Ulôn, hei gata nyang keuneuk teupeuseulamat dan gata jak ubak Ulôn jak lakée tulông. Ingat kheueh gunong batée bak teumpat gata teupeuet, dan bak ruhuéng batée di teumpat gata teukueh.
2 Ingat kheueh ubak indatu gata Nabi Ibrahim dan Sara nyang peulahé gata; watée Ulôn hôi Nabi Ibrahim, jihnyan hana meu-aneuëk; laju Lôn bri beureukat dan Lôn keuturonan nyang le ubak jihnyan.
3 Hei Yerusalem, Ulôn teuma kujôk hiburan keu gata, dan mandum nyang tinggai nibak rungka-rungka gata. Padang-padang gata nyang tho kreng Lôn peujeuet keu lampôh bungöng, saban lagée Eden keubon Ulôn nyang subo. Bak teumpat nyan ureuëng meusurak meuhubo ngon meusukaria dan meunyanyoe syuko ngon su nyang meutaga.
4 Simak kheueh su Ulôn nyoe hei bansa Ulôn, deungoe kheueh tutoe haba Lôn hei umat Lôn. Ulôn jok peungajaran Lôn keu bansa-bansa, huköm-huköm Lôn jeuet keutrang lam udeb awaknyan.
5 Seulamat nyang Ulôn bri ka rab that-that; watée meunang Ulôn karab teuka. Ulôn keudroe Lôn peurintah bansa-bansa. Nanggroe-nanggroe nyang jiôh teuma jipreh-preh Ulôn sira jiharab buet Ulôn nyang luwabiasa.
6 Tangah kheueh u langét dan ngieng kheueh u bumoe; langét teuma gadôh lagée asab dan bumoe teuma useueng lagée bajée tuha, mandum peunduduek jih maté lagée jamôk nyang hán meuguna. Teuma seulamat nyang Ulôn bri teutab siumu masa, dan keuhai meunang Ulôn hana keuneulheuh.
7 Deungoe kheueh Ulôn, hei bansa Lôn, gata tateupeue peue nyang beuna; ajaran Lôn teukeubah lam até gata. Bék teumakot meunyoe gata jihina lé manusia, bék yo meunyoe gata jiseurapa lé awaknyan.
8 Awaknyan teuma binasa dan habéh, lagée peukayan jipajoh lé keuraleub dan ija bulée bubiri meunan cit keuraleub seuba. Teuma keuseulamatan nyang Ulôn bri teutab na siumu masa, keuhai Ulôn meunang teutab na tron meutron sipanyang masa."
9 Neujak kheueh keunoe ya TUHAN, neutulông kamoe, peuseulamat kheueh kamoe ngon kuasa Droeneueh. Beudôh kheueh lagée yoh masa ilée watée Droeneueh neupeuhanco Rahab dan neutôb naga laôt sampoe maté.
10 Droeneueh kheueh nyang peutho laôt, ié laôt barollah nyang lhok lumpah na. Droeneueh nyang peugét rot lam ié laôt nyan, mangat ureuëng-ureuëng Droeneueh peuseulamat jeuet jijeumeurang.
11 Teuma, ureuëng-ureuëng nyang geupeubeubaih lé TUHAN jiwoe awaknyan jitamong u Yerusalem deungon surak meubura ruman awaknyan meucahya sabab galak ngon geumbira. Awaknyan jiseumurak galak meuhubo, seudeh ngon apoh apah habéh teusampôh.
12 TUHAN meufeureuman, "Ulôn kheueh nyang bri hiburan ubak gata. Pakon gata takot keu manusia nyang fana, ubak manusia nyang jitiek lagée naleueng?
13 Ék kheueh tuwoe gata keu TUHAN nyang cebta gata nyang leueng langét dan nyang peuduek keunaleueng bumoe? Pakon siuroe seupôt gata yo keu ureuëng beungéh tukang teumeugom nyang ka siab-siab jipeuhabéh gata? Nyang sikeubit jih meungamok awaknyan hana lut ateueh gata
14 Bubena ureuëng nyang teuteun reujang teupeu lheueh; awaknyan hana kureueng peunajoh, dan hana teuma maté jipeutamong lam jrat.
15 Sabab Ulôn kheueh TUHAN Po teu Allah gata, nyang peuteuka geulumbang raya lam laôt sampoe umbak jih meutaga-taga. Nyang Mahakuasa na kheueh nan Ulôn.
16 Ulôn kheueh nyang leueng langét dan nyang peuduek keunaleueng bumoe. Ulôn peugah ubak Sion: Gata kheueh umat Ulôn; Ulôn nyang bri peungajaran Lôn ubak gata dan Lôn lindong gata ngon kuasa Lôn."
17 Beudôh kheueh hei Yerusalem, beudôh kheueh! Huköman nyang geupeu rhot lé TUHAN ateueh gata sabab beungéh Gobnyan keu gata, teuma nyan ka gata peujak sampoe seuleusoe.
18 Nibak peunduduek gata hana nyang bimbeng gata, nibak nyang tinggai gata hana nyang tunton gata.
19 Ateueh gata rhot dua boh beuncana; akibat prang nanggroe gata hanco binasa dan rakyat gata maté sabab lé deuk. Hana nyang gaséh atawa nyang bri hiburan.
20 Bak tieb-tieb ujong rot ureuëng-ureuëng gata reubah ka habéh teunaga lagée rusa nyang keunong taron. Ateueh awaknyan rhot beungéh TUHAN, dan keunong dhot bak Allah gata.
21 Deungoe kheueh hei ureuëng-ureuëng nyang teuteugon, nyang meuputa-puta lagée ureuëng mabök!
22 Meunoe kheueh feureuman TUHAN, TUHAN Allah gata nyang bila gata, "Ázeb seungsara Ulôn bri teungoh teuka beungéh Lôn, teuma Lôn cok lom nibak gata. Beungéh Ulôn teuma seungab, dan gata hana peureulée gata tanggong seungsara.
23 Ázeb seungsara nyan Ulôn bri keu ureuëng nyang iénanya gata, nyang ka lheueh jiyue éh gata ateueh tanoh, dan jigilo-gilo gata, siulah-ulah gata rot raya gobnyan jak."


Chapter 52

1 Beudôh kheueh, he Yerusalem, Beudôh kheueh! Peukhong kheueh até gata! Dan tasök kheueh laju peukayan keubeusaran gata! He Yerusalem, banda nyang suci, ureuëng kuto hana jitamong le rot babah pintoe geureubang gata.
2 Beudôh kheueh nibak lam abée, he Yerusalem, geureutok kheueh abée nyang na meuleukek nibak gata. Peulheueh kheueh ranté nyang na teuikat bak takue gata, hé peunduduek Sion nyang keunong teun!
3 TUHAN meufeureuman ubak umat Gobnyan, "Gata jipeubloe deungon cuma-cuma, trok bak saát gatapi geupeuleueh deungon cuma-cuma.
4 Yoh masa ilée gata tajak u nanggroe Meusé dan tinggai disinan sibagoe ureuëng aséng. Óh lheuehnyan Asyur laju ji prah gata hana alasan.
5 Jinoenyoe peue urosan Ulôn disinoe? Ureuëng Babel jiteun gata meunan mantong. Awaknyan nyang tindéeh gata deungon sombong dan hana putôh-putôh jihina Ulôn.
6 Sabab nyan gata teuma ta aku keudroe bahwa Ulôn nyoe na kheueh Po teu Allah, dan bak watée nyan gata tateupeue bahwa Ulôn kheueh nyang peugah haba ubak gata."
7 Keubit galak that óh lôn ngieng ka teuka utosan; awaknyan jijak jilintaih gunong-gunong sira jiba haba gét, haba seujahteura, bri tée keuseulamatan keu Sion; kheun gobnyan, "Allah gata na kheueh Raja!"
8 Deungoe dumpék geumbira peungawai banda, awaknyan seumurak meuhubo meusabe rata! Sabab deungon mata ulée keudroe awaknyan geukalon TUHAN geuriwang u Sion.
9 Meusurak meuhubô kheueh, he rungka-rungka Yerusalem, sabab TUHAN geuhibur umat Gobnyan dan geupeubeubaih Yerusalem.
10 TUHAN geupeuleumah keukuasaan Gobnyan dikeue meubagoe bansa. Dan bansaboh bumoe teuma jikalon keudroe keuseulamatan nibak Po teu Allah geutanyoe.
11 Jak wéeh laju keudeh! Tinggai kheueh disinan banda Babel, he gata nyang taba peukakaih Baét Allah! Bék kheueh tacukéh barang nyang kuto; tapeugleh kheueh droe gata sigohlom tajak.
12 Gata hana teugisa-gisa watée tabôt langkah, dan hana lagée ureuëng nyang jipeuplueng droe. Sabab TUHAN teuma geubimbéng gata; Po teu Allah Israel geubimbéng gata nibak sigala peunjuru.
13 TUHAN meufeureuman, "Sikeubit jih, hamba Ulôn teuma meuhase; jihnyan jisanjong dan teupeumanyang.
14 Yoh watée ilée jai that ureuëng teukeujot óh watée jingieng jihnyan, ruman jihnyan jipeurusak sampoe hana deuh le lagée hi manusia.
15 Teuma bak watéenyoe le that bansa nyang teuhireuen-hireuen, dan bubena raja-raja nanggroe ka kalu lidah sabab ka tahe. Awaknyan jikalon dan jimuphom, nyang sigohlom nyan hana awaknyan teupeue."


Chapter 53

1 Bansa nyan jijaweueb, "Soe patéh ubak peue nyang ka kamoe deungoe? Ubak soe nyang ka geupeugah kuasa TUHAN?
2 TUHAN meuharab hamba Gobnyan nyan lagée tarôk kayée nyang timoh bak tanoh nyang tho kreng. Hana nyang lagak nibak jih nyan óh ta eu rupa; dan hana nyang teutarek até keutameuheuet atranyan.
3 Tanyoe tahina dan tapeujiôh gobnyan, ureuëng nyang kaseb seungsara dan kajra jitanggong deurita nyang phet. Hana meusidroe pih nyang jitem kalon gobnyan, dan geutanyoe keudroe pih hana tatem pakoe ubak gobnyan.
4 Nyang sibeuna jih peunyakét geutanyoe kheueh nyang geutanggong lé gobnyan, seungsara geutanyoe kheueh nyang geudeurita, padahai geutanyoe ta sangka peundeuritaan gobnyan kheueh huköman Po teu Allah keu geuhnyan.
5 Teuma geuhnyan geupeuluka sabab desya-desya geutanyoe, geupeujra sabab buet jeuhet geutanyoe, Gobnyan teuhuköm mangat geutanyoe teupeuseulamat sabab lé darah Gobnyan geutanyoe geupeupuléh.
6 Geutanyoe banmandum ka sisat lagée bubiri nyang sisat, maséng-maséng teumita rot geuh keudroe. TUHAN ka geupeurhot ateueh jihnyan buet jeuhet geutanyoe banmandum.
7 Gobnyan teuseksa deungon keujam, teuma geutanggong nyan deungon saba. Babah Gobnyan hana geupeugah sapeue lagée aneuëk bubiri nyang teuba ubak teumpat si atawa lagée nang bubiri nyang teungoh teucuko bulée.
8 Gobnyan jiteun dan jiba u kantô peungadelan, laju ji iréng dan jihuköm maté. Hana ureuëng nyang tem pako keu naseb geuhnyan; gobnyan maté sabab desya bansa geutanyoe.
9 Gobnyan jikubu meusajan deungon ureuëng jeuhet; jrat gobnyan di teungoh-teungoh ureuëng kaya, bahpi gobnyan hántom na geupeubuet buet nyang jeuhet, dan hántom na geuteumipée."
10 TUHAN meuhéut bahwa gobnyan harôh meudeurita, dan geupeujok droe sibagoe keureubeuen peuamphon desya. Lé sababnyan gobnyan panyang umu dan geuteumé ngieng keuturonan geuh meulalu gobnyan keuheundak TUHAN teulaksana.
11 Lé sababnyan TUHAN meufeureuman, "Óh ka seuleusoe meudeurita seungsara, jihnyan teuma mubahgia dan pueh. Hamba Ulôn nyan, nyang jipeumangat that até Ulôn, ka jitanggong huköman nyang lumpah that le; deumi jihnyan Ulôn kupeuamphon awaknyan.
12 Deungon rila jihnyan jiseurah udeb jih dan jitamong bak itongan ureuëng jeuhet. Jihnyan jiseuôn desya ureuëng ramé dan jimeudoá mangat awaknyan teupeuamphon. Dan Ulôn bri keujihnyan ureuëng ramé sibagoe hadiah, dan jihnyan meuteumé jeumba meusajan deungon ureuëng-ureuëng nyang beuna."


Chapter 54

1 Yerusalem, yoh watée ilée gata lagée inong malée, nyang hana hase teupeulahé aneuëk. Teuma bak saát nyoe meusurak kheueh, dan meuca-e kheueh deungon geumbira! Sabab aneuëk-aneuëk gata jai lumpah na, leubeh le nibak aneuëk ureuëng inong nyang hántom jitinggai lé lakoe.
2 Peuluwah kheueh laju khimah-khimah teumpat tinggai gata; tasambat kheueh laju bubena talo teumalo dan peukong kheueh laju bubena bajo!
3 Gata teuma meutamah luwah wie ngon uneuen, peunduduek gata teuma jitinggai nibak tanoh bansa-bansa dan jiduek laju bak banda-banda nyang bak watéenyoe ka tinggai seungue.
4 Bék teumakot, gata hana teupeu malée; hana teuma teuhina dan teuseungéh-seungéh. Gata teuma tatuwoe ubak hana seutia gata yoh watée muda; hana teuingat le ubak keuseupian gata sibagoe ureuëng balée.
5 Nyang cebta gata lagée teungku lakoe nibak gata, Po teu Allah kudus Israel na kheueh nyang bri seulamat keu gata. TUHAN Nyang Mahakuasa, nyan kheueh nan Gobnyan, Gobnyan Po teu Allah nyang mat kuasa bansaboh donya.
6 Israel, gata lagée sidroe peurumoh muda nyang seudeh sabab jitinggai lé teungku lakoe. teuma Po teu Allah keutawök gata lom dan geupeugah,
7 "Teuma sikeujab mantong Ulôn tinggai gata; deungon peunoh gaséh sayang gata Ulôn cok lom teuma.
8 Sikeujab sagai Ulôn meupaleng nibak gata sabab beungéh Ulôn nyan hana ngon peusa. teuma deungon geunaséh nyang abadi Ulôn gaséh keu gata." Meunan kheueh geupeugah lé Po teu Allah Peuseulamat gata.
9 "Lagée masa Nabi Nuh Ulôn meujanji bahwa ié raya hana le meuganong di ateueh bumoe, meunan cit bak saát nyoe Ulôn meujanji bahwa Ulôn hana beungéh atawa Lôn ancam gata lom.
10 Bahpi gunong-gunong dan bubena bukét meuguncang, Ulôn hana Lôn piôh Lôn gaséh gata. Peujanjian damé Lôn teutab Ulôn mat sabe." kheun TUHAN nyang geugaséh gata.
11 TUHAN meufeureuman, "He Yerusalem banda nyang malang, gata hana meudaya dan hana nyang hibur. Dasai-dasai gata teumalon keubah lom, deungon batée-batée nyang meuhareuga.
12 Kuta-kuta Lôn peudong deungon bintéh deulima, babah-babah pintoe geureubang deungon batée peumata, beuton-beuton gata nibak ratna mutu manikam.
13 Bandum peunduduek gata jeuet keu murit Lôn, dan awaknyan teuma makmu seujahteura.
14 Gata teupeudong ateueh dasai keuadelan, teupeujiôh nibak meubagoe nyang teumakot dan peunindasan.
15 Meunyoe gata jiseureubu, kon kheueh Ulôn nyang yue, dan soe mantong nyang seurang gata jihnyan rhot.
16 Ulôn kheueh nyang cebta utôh beuso nyang kipah apui teumpeuen seunjata. Ulôn kheueh nyang peujeuet tantra nyang ngui sinjata nyan keu teupeumaté gob.
17 Teuma tieb-tieb seunjata nyang teu teumpeuen keujilawan gata, atranyan hana meuhase. Dan tieb-tieb tudohan nibak kantô peungadelan teuma gata bukeuti bahwa nyan na kheueh salah. Ulôn jok hadiah nyan kheueh meunang keu hamba-hamba Lôn," meunan kheueh feureuman TUHAN.


Chapter 55

1 TUHAN meufeureuman, "Jak kheueh keunoe gata bandum nyang glaih ngon tho rukueng, tajieb kheueh, ié ka teukeubah. Teuka kheueh gata nyang hana meupéng, teurimong kheueh gandom nyang hana peubayeue, dan pajoh kheueh! Meunan cit ngon ié anggô dan ié susu ka teukeubah, teurimong kheueh deungon cuma-cuma.
2 Keupeue tabloe peue-peue mantong nyang hana puih, dan tajak buet keu peue nyang hana hase jipeutroe? Seutôt kheueh peurintah Ulôn, teuma gata tamakheun nyang jroh, dan tarasa kheueh hidangan nyang lazat.
3 Deungoe kheueh, he bansa Lôn, tajak kheueh ubak Ulôn, gata teuma Lôn bri udeb seujati. Deumi geunaséh dan seutia nyang Ulôn jok keu Nabi Daud, Ulôn kuikat janji nyang keukai deungon gata.
4 Sikeubit jih, jihnyan Ulôn peujeuet keu peumimpén dan panglima, saksi nibak kuasa Lôn keu bansa-bansa.
5 Gata teuma ta tawök bansa-bansa aséng, dan awaknyan jijak laju ubak gata, deumi Ulôn, TUHAN Po teu Allah gata, Allah kudus Israel, sabab Ulôn ka Lôn peu agong gata."
6 Tawoe kheueh ubak TUHAN simantong na meuteumé; tahôi kheueh Gobnyan simantong Gobnyan rab.
7 Bah kheueh ureuëng jeuhet jipeujroh nibak udeb jih, dan jiubah jalan pikeran nyang na, bah kheueh jihwoe ubak TUHAN, mangat meuteumé gaséh sayang Gobnyan. Bah kheueh jihnyan jipaleng ubak geutanyoe, sabab TUHAN geupeuamphon deungon sigala murah até.
8 TUHAN meufeureuman, "Pikeran Lôn kon pikeran gata, dan rot Ulôn kon rot gata.
9 Sidubna manyang langét di ateueh bumoe, éuet nyan kheueh manyang jih pikeran Ulôn ateueh pikeran gata, dan rot ulôn di ateueh rot gata.
10 Lagée ujeuen jitron di langét, dan hana jigisa, teuma habéh basah bumoe, tanoh gumbô dan seunaman pih timoh, jibri hase keu teutabu dan teupajoh,
11 meunan cit deungon tutoe haba nyang Ulôn peugah hana jiriwang ubak Ulôn deungon sia-sia, teuma meuhase teupeubuet peue nyang Ulôn lakée, dan meuteumé peue mantong nyang Ulôn lakée.
12 Gata tatinggai Babel deungon sukacita, dan ji intat uluwa deungon seulamat. Gunong dan bukét meugeumbira dan meusurak ria, bak-bak kayée nyang na di blang jipok-pok jaroe.
13 Bak kayée ceumara jeuet keugantoe tamah meuduro, dan seunaman bungöng jeuet geunantoe tamah meupaya. Banmandum nyan na mangat Ulôn jipeumeusyeuhu; sibagoe tanda abadi nyang hana gadôh."


Chapter 56

1 TUHAN meufeureuman ubak umat Gobnyan, "Peubuet kheueh peue nyang ade dan nyang paih deungon huköm Lôn. Sabab hana treb le Ulôn teuka Lôn jak peuseulamat gata dan keuadelan Lôn kupeudeh teuma.
2 Ulôn jok beureukat keu ureuëng nyang peupeunoh keu uroe Sabat dan hana jipeukutoe uroe Sabat nyan. Ureuëng nyang hana peubuet buet nyang jeuhet ureuëng nyan Ulôn peusaneut deungon jroh that."
3 Ureuëng aséng nyang meusapat deungon umat TUHAN hana jeuet jipeugah, "TUHAN hana geu idhin ulôn kuseumah Gobnyan meusajan deungon umat Geuh." Ureuëng nyang teugasi hana jeuet jiseumike "Ulôn hana hase jeuet keu wareuga umat TUHAN, sabab ulôn hana hase lôn peutron keuturonan."
4 TUHAN meufeureuman ubak awaknyan, "Meunyoe gata tapatéh keu uroe Sabat, dan meunyoe gata seutia ubak peujanjian Lôn dan tapeubuet peue nyang galak até Ulôn,
5 teuma nan gata teuingat lam Baét Lôn dan lamkawan bansa Ulôn. Nyang lagée nyan leubeh gét nibak na aneuëk-aneuëk miet inong dan agam. Keu gata Ulôn bri nan nyang abadi nyang hana jituwoe lé gob."
6 TUHAN meufeureuman ubak ureuëng-ureuëng aséng nyang ka jitamong lam itongan umat TUHAN, nyang jicinta TUHAN dan meubakti ubak Gobnyan, nyang jihoreumat keu uroe Sabat dan seutia ubak peujanjian Gobnyan,
7 "Gata Lôn ba u Sion, nibak bukét Lôn nyang suci, dan Ulôn bri keugeumbiraan di rumoh iébadat Lôn. Keureubeuen-keureubeuen nyang gata peuseumah di miseubah Lôn teuma Lôn teurimong. Baét Lôn teuma jipeugah rumoh doá keumeubagoe bansa."
8 Meunoe kheueh feureuman TUHAN Nyang Mahamanyang nyang intat Israel jiwoe nibak teumpat nyang teuböih, "Ulôn kuba ureuëng-ureuëng nyang laén keujimeusapat deungon awaknyan nyang ka meusaho."
9 TUHAN geuyue ubak bansa-bansa jiteuka lagée beulatang buah keujijak teugöm umat Gobnyan.
10 Feureuman TUHAN, "Peumimpén-peumimpén bansa Lôn na kheueh ureuëng-ureuëng buta! Awaknyan hana jiteupeue sapeue. Awaknyan lagée asée kalu nyang hana jeuet jimeudroh, teuma jiéh mantong dan meulumpo. Mangat that-that awaknyan jiéh!
11 Awaknyan lagée asée leuha nyang hana troe-troe. Peumimpén-peumimpén nyan hántom na muphom. Maséng-maséng jipeubuet ban galak droe dan jimita laba jih keudroe.
12 Ureuëng-ureuëng mabök nyan jipeugah, 'Jak geutanyoe ta jieb anggô dan tajieb sipuih-puih até! Singoh leubeh gét nibak uroe nyoe!' "


Chapter 57

1 Ureuëng nyang gét dan nyang saleh meuninggai donya, hana nyang muphom atawa jitem kalon jih nyan. Óh ka maté, ureuëng nyan geupeujiôh nibak bala dan jimeureuhat deungon damé.
3 Teuma gata, he kawöm nyang meudesya, teuka kheueh mangat teuadili! Gata hana leubeh get nibak tukang sihe, ureuëng nyang galak nibak buet mukah dan lunte!
4 Soe kheueh nyang gata peukém? Soe kheueh teuma nyang gata hina? Kon kheueh gatanyan keuturonan ureuëng sulet dan peumbeurontak?
5 Gata taseumah dewa-dewa keusubôran deungon tapeubiyeu droe keudroe gata anyöt lam nafeusu di miyueb bak-bak kayée keuramat gata. Gata takubu aneuëk-aneuëk gata nibak pantôn krueng, lam luengkiek-luengkiek batée.
6 Lé sababnyan ka pantaih gata peusapat batée-batée nyang licen nibak teumpat nyan. Nyan kheueh jeumba gata! Ubak batée-batée nyan teuma gata leng ié anggô dan tapeuseumah gandom. Gata pike Ulôn nyoe galak keubanmandum nyan?
7 Gata tajak u pucak-pucak gunong keutajak peuseumah keureubeuen dan tapeupuih nafeusu beureuhi gata.
8 Gata keubah patong-patong gata nyang dajeue bak babah-babah pintoe rumoh gata. Gata ka tatinggai Ulôn. Gata ka tasuet peukayan gata dan laju ta-ék ubak teumpat éh nyang luwah deungon geunaséh gata nyang gata jok upah mangat jitem éh deungon gata, laju gata peupuih nafeusu gata.
9 Gata tabôh minyéuk dan bée-bée haröm nyang meuhalak, laju tajak seumah dewa Molokh. Gata kirém utosan u nanggroe-nanggroe nyang paleng jiôh, trok ubak donya ureuëng maté.
10 Hana tapike keu hék dan putôh asa gata hana tapiôh tajak mita dewa-dewa. Gata pike awaknyan hase jijok seumangat barô, sampoe gata hántom leumoh.
11 TUHAN meufeureuman, "Soe kheueh dewa-dewa nyan nyang jipeujeuet gata teumakot, sampoe gata meusulet dan hana taingat keu Ulôn? Peu kheueh gata hana taseumah le Ulôn kareuna Ulôn ka treb that Lôn iem droe?
12 Teuma Ulôn bri tée ubak gata; keusalehan gata nyan na kheueh peuleusu, dan banmandum buet gatanyan hana meuguna keu droe gata.
13 Meunyoe gata takliek ngon teumawök, bah kheueh patong-patong nyan nyang peuseulamat gata! Awaknyan teuma gadôh jipupo lé angén dan leunyab deungon saboh nafáh nyang teuprôh! Teuma ureuëng nyang meulindong nibak Ulôn teuma jeuet keuwaréh nanggroe nyan dan jiseumah Ulôn di Baét Lôn."
14 Po teu Allah meufeureuman, "Peugét kheueh dan peusiab kheueh rot keu umat Lôn, kireueh kheueh keudeh peue-peue nyang na rintangan."
15 Sabab meunoe kheueh feureuman Allah Nyang Mahamanyang dan kudus, nyang meukuasa keusiumu masa, "Ulôn tinggai di teumpat nyang manyang dan suci, teuma meunan cit lamkawan ureuëng-ureuëng nyang miyueb até dan nyang meunyeusai ubak desya-desya jihnyan, keu teupeupuléh seumangat dan harapan awaknyan.
16 Kon keusiumu masa Lôn peusalah umat Ulôn; dan hana sabe-sabe Ulôn beungéh, mangat awaknyan bék patah seumangat, padahai Ulôn kheueh nyang peu udeb awaknyan.
17 Desya serakah awaknyan nyang peujeuet Ulôn nyoe beungéh, sababnyan awaknyan Lôn huköm dan ulôn tinggai. Teuma awaknyan kreueh that ulée dan teutab jipiléh rot jih keudroe.
18 Ulôn ka lheueh Lôn ngieng pi-e awaknyan, teuma awaknyan teutab Lôn peupuléh cit teuma. Ulôn Lôn bimbeng dan Lôn tulông awaknyan dan peumangat até ureuëng nyang meuduka.
19 Ulôn Lôn bri keuteuntraman keu banmandum ureuëng, bah kheueh nyang tho meunan cit nyang jiôh-jiôh. Ulôn kupeupuléh umat Lôn.
20 Teuma ureuëng jeuhet na kheueh lagée laôt nyang meugeulumbang hántom na reuda. Ié laôt nyang ile nyan laju jipeuron brôh dan leuhôb.
21 Hántom na teuntram nibak ureuëng meudesya."


Chapter 58

1 TUHAN meufeureuman, "Neudumpék kheueh seuhabéh teunaga! Jakbri tée kheueh ubak umat Lôn desya-desya awaknyan.
2 Awaknyan jiseumah Ulôn tieb-tieb uroe, dan meuhéut jikeuneuk teupeue keuheundak Ulôn, siulah-ulah awaknyan ka jipeubuet buet nyang gét, dan seutia ubak huköm Lôn. Awaknyan jipeugah bahwa awaknyan galak jiseumah Ulôn dan jimeuharab ubak huköm Lôn nyang ade."
3 Bansa nyan jitanyong, "Keupeue guna jipuasa meunyoe TUHAN hana geukalon? Keupeue guna geutanyoe ta peumiyueb droe meunyoe Gobnyan hana geungieng keu geutanyoe?" TUHAN meufeureuman, "Sikeubit jih, teungoh gata tapuasa, gata tamita laba keudroe dan tapeuras ureuëng-ureuëng nyang gata upah.
4 Teungoh puasa, gata meupake dan tameulo dan meutindak deungon keukeurasan. Tapike deungon cara lagée gata puasanyan sampoe teugrak até Lôn mangat Lôn deungoe doá-doá gata?
5 Meunyoe gata puasa, gata seksa droe gata keudroe; gata peutukui ulée gata lagée ôn naleueng. Gata lheueng ija krong dan tasipreuk abée, dan ta-éh di ateueh nyan. Peu kheueh nyan nyang gata peugah puasa? Tapike Ulôn galak deungon buet gata nyang lagée nyan?
6 Nyoe kheueh puasa nyang Ulôn lakée: Gata peulheueh kheueh laju beuleunggu peunindasan dan beuban keuadelan, dan tapeubeubaih kheueh ureuëng-ureuëng nyang teutindéeh.
7 Gata weuek kheueh meunajoh gata deungon ureuëng-ureuëng nyang teungoh deuk, teurimong kheueh ureuëng-ureuëng geulandangan di rumoh gata. Tajok kheueh peukayan ubak ureuëng teulon, dan bék tatulak syedara gata nyang peureulée teutulông.
8 Dan trang meucahya keugata lagée mata uroe beungoh, dan luka-luka gata teuma bagaih puléh. Ulôn na meusajan gata keu Lôn peuseulamat gata. Deungon na Ulôn teuka gata teulindong nibak rot toh mantong teuka bahya.
9 Watée tameudoá, Ulôn teuma Lôn kabui doá nyang gata lakée nyan. Meunyoe gata tameuhôi Ulôn, Ulôn teuma Lôn jaweueb. Békle tatindéeh sabe keudroe-droe gata, piôh kheueh buet meumusoh dan meufeuteunah.
10 Tajok kheueh makheun keu ureuëng-ureuëng nyang deuk dan tatulông kheueh ureuëng-ureuëng nyang teutindéeh. Meunyoe gata tapeubuet nyang lagée nyan, dan seupôt glab nyang na ban sikeulileng gata jeuet keu peungéuh lagée uroe.
11 Ulôn sabe Lôn bimbeng gata dan Lôn peutroe gata bak tanoh nyang tho kreng; Ulôn teutab Lôn peulara gata mangat teutab seuhat dan teuga. Gata teuma jeuet lagée seunaman nyang seb ié jih, lagée mata ié nyang hántom na tho-tho.
12 Banda nyang ka treb that reuloh nyang ka tinggai ruengka-ruengka teuma gata peudong lom di ateueh tapak nyang awai, gata teubôh nan 'Bansa nyang peudong lom bintéh-bintéh meubeuton dan tapeusaneut rumoh-rumoh nyang ka hanco.' "
13 TUHAN meufeureuman, "Horeumat kheueh keu uroe Sabat sibagoe ureuëng TUHAN. Bék tapakoe ubak keupeuntengan droe gata keudroe watée uroenyan. Peuraya kheueh uroe nyan sibagoe uroe nyang bahgia; horeumat kheueh uroe TUHAN deungon cara hana tajak keudeh keunoe; dan meunan cit bék sagai tajak buet atawa meututoe haba nyang hana meuguna.
14 Dan gata geumbira sabab meungabdi ubak Ulôn. Ulôn teuma Lôn peujeuet gata teuhoreumat bansaboh donya. Gata teuma udeb seunang deungon tanoh pusaka nibak Nabi Yakub, indatu gata. Ulôn, TUHAN ka Lôn peugah haba."


Chapter 59

1 Bék tapike TUHAN leumoh that keu geupeuseulamat gata, atawa kroe that hana geudeungoe meulakée gata.
2 Sabab buet gata nyang jeuhet nyan kheueh lé Gobnyan hana geudeungoe watée gata meudoá ubak Gobnyan. Desya-desya gata kheueh nyang peujiôh gata nibak Po teu Allah.
3 Gata salah sabab meusulet dan tapeubuet jeuhet, dan tapeubuet keukeurasan dan tapoh ureuëng sampoe maté.
4 Gata tagadu peukara hana alasan dan tameuhakém deungon hana ade. Gata meusulet dan tapeuandal nyang sia-sia; gata tapeugét reuncana keu tapeuceulaka ureuëng laén dan tapeubuet buet nyang jeuhet.
5 Reuncana-reuncana gata nyang jeuhet teuba mawöt lagée boh uleue meubisa. Meunyoe boh uleue nyan teupeubeukah, jiteubiet kheueh uleue lam boh nyan. Reuncana nyan meubacut pih hana meuguna nibak gata, lagée peukayan nyang teuteunun lam uempueng laba-laba!
7 Gata hana piôh-piôh tareuncana nyang jeuhet, dan meuhéut deungon bagaih teulaksana. Hana ragu-ragu laju gata poh maté ureuëng-ureuëng nyang hana meusalah. Ho mantong nyang gata jak, gata ka tatinggai nyang reuloh-reuloh dan keubinasaan.
8 Gata hana tauseuha udeb nyang rukon, dan bandum buet gata hana nyang ade. Rot gata meupalet-palet, dan ureuëng nyang seutôt rot gata nyan hana mubahgia.
9 Bansa nyan jipeugah ubak Po teu Allah, "Jinoenyoe ka kamoe teupeue pakon Droeneueh hana neupeuseulamat kamoe nibak ureuëng-ureuëng nyang tindéeh kamoe. Kamoe mupreh-preh peungéuh, teuma nyang na seupôt tulo.
10 Kamoe meuraba-raba lagée ureuëng buta; cot uroe timang kamoe meugantoh lagée teungoh malam; lamkawan ureuëng udeb kamoe lagée ureuëng maté.
11 Kamoe teumakot that dan seudeh hana teukira; kamoe jak mita keuadelan; teuma teutab hana; kamoe meuharabkan keuseulamatan, teuma teutab sia-sia.
12 Lumpah that le keujeuhetan kamoe ubak Droeneueh; desya-desya kamoe teupeusalah kamoe. Kamoe bit-bit that kamoe sadar keujeuhetan nyang kamoe peubuet, dan kamoe teupeue desya-desya kamoe.
13 Kamoe kamungkie dan beurontak ubak TUHAN, dan hana kamoetem seutôt Po teu Allah kamoe. Kamoe ka kamoe tindéeh ureuëng laén dan ka meunyeuleweng; pikeran kamoe sisat, dan tutoe haba kamoe sulet.
14 Huköm nyang ade ka teukireueh, dan keuadelan ka teupeujiôh. Keujujoran ka jipeubeuáh lamkawan ramé, dan keutulosan ka jitiek bak binéh.
15 Hana le ureuëng nyang jujoe, dan soe nyang peujiôh bak buet nyang jeuhet, jihnyan keudroe ka jeuet keu keureubeuen keujeuhetan." TUHAN ka geukalon, dan Gobnyan hana galak ubak keuadelan nyang ka hana le.
16 Gobnyan hireuen bahwa hana nyang teuka dan hana teuma nyang bila. Dan Gobnyan laju geupeuguna kuasa Geuh keudroe keu geupeuseulamat dan geubri keu awaknyan keumeunangan.
17 Gobnyan geupeuguna keuadelan dan keuseulamatan sibagoe bajée beuso dan tupi waja. Gobnyan kana teukat keu geupeupuléh keuadaan dan geubalaih keuhana adelan.
18 Gobnyan geubalaih musoh-musoh Geuh nyang sisuai deungon buet awaknyan keudroe. Meunan cit bansa-bansa nyang na di pulo-pulo nyang jiôh hana geutinggai nibak keunong huköm Gobnyan.
19 Kuasa dan keuagongan Gobnyan teuma jitakot lé soemantong ureuëng phon ditimu meunan cit di barat. Gobnyan teuma teuka lagée ié krueng nyang tajam ji ile nyang jipeuteuka lé angén badée raya.
20 TUHAN meufeureuman ubak umat Gobnyan, "Ulôn teuma teuka u Yerusalem Ulôn jak peuseulamat gata bandum nyang meutobat nibak desya-desya gata.
21 Ulôn peugét peujanjian deungon gata: Gata Ulôn bri kuasa Lôn dan ajaran Ulôn keu siumu masa. Peurunoe kheueh ubak aneuëk-aneuëk gata mangat awaknyan pih jeuet jipeurunoe tron meutron phon saát nyoe trok siumu masa."


Chapter 60

1 Beudôh kheueh dan beujeuet kheueh keu trang, he Yerusalem, sabab trang keuseulamatan gata ka teuka; Allah geupeu peungeuh gata deungon keumuliaan Gobnyan.
2 Bumoe habéh teutôb deungon seupôt, bansa-bansa pi ka habéh keunong seupôt buta; teuma trang TUHAN geudong ateueh gata, cahya keuteuka Gobnyan ka jeuet keunyata di ateueh gata.
3 Bansa-bansa nyang laén laju jijak meuron-ron ubak trang gata, raja-raja teutarek lé cahya nyang teubiet keu gata.
4 Ngieng kheueh peue nyang ka teujadi ban seukeulileng gata; rakyat meuhimpon keujijakwoe ubak gata. Aneuëk-aneuëk gata nyang agam teuka di jiôh, aneuëk-aneuëk gata nyang inong teutiengkue.
5 Ban tangieng nyan gata hireuen dan ruman gata meucahya; gata teuharu dan rayeuk that até. Hareuta bansa-bansa laju jiba ubak gata, keukayaan di meurandeh laôt teuka meulimpah ubak gata.
6 Nanggroe gata habéh jihudôm lé unta nyan le, awaknyan teuka di Midian dan Efa. Di Syeba le jiba lé ureuëng méuh ngon keumeunyan, sira jipujoe buet TUHAN.
7 Kaméng bubiri Kedar jiba keu gata bubiri agam nibak Nebayot kateukeubah keu iébadat gata. Keureubeuen nyan keubit that galak até TUHAN Gobnyan jipeuramé Baét Gobnyan nyang peunoh keuagongan.
8 Peu kheueh nyan nyang meulayang lagée awan lagée cicém mirah pati nyang teungoh po jiwoe bak cintra?
9 Nyan kheueh kapai-kapai nyang teuka meusaôh meuasoe umat Po teu Allah teupeuwoe di nanggroe jiôh. Pirak dan méuh na jiba sajan keu teupujoe TUHAN Allah gata; keu Po teu Allah Israel Nyang Mahasuci, nyang peujeuet umat Gobnyan teuhoreumati.
10 TUHAN meufeureuman ubak Yerusalem, "Ureuëng aséng jipeudong lom bintéh beuton gata, dan bubena raja jipeutimang gata. Yoh masa ilée Ulôn huköm gata bak watée Ulôn teungoh teuka beungéh, teuma watée nyoe Ulôn ka teuka gaséh sayang.
11 Uroe malam babah pintoe geureubang gata teutab teuhah, mangat hareuta keukayaan bansa-bansa laén jijak intat ubak gata, meunan cit deungon raja-raja awaknyan sibagoe tawanan.
12 Bansa dan keurajeuen nanggroe nyang hanajitem tundok ubak gata, bansa dan keurajeuen nanggroe nyan binasa dan gadôh sapan sapa.
13 Keubanggaan uteuen Libanon jiangkot ubak gata kayée bak beurangan, bak ceumara dan bak aron keuteupeudong Baét Lôn meutamah seumarak, dan teupeulagak teumpat meugiloe Lôn.
14 Aneuëk-aneuëk miet nyang tindéeh gata jijak sujut, nyang ka lheueh jihina gata jitundok, gata teuboh nan 'Banda TUHAN', 'Sion, Banda Allah Kudus Israel'.
15 Gata hana jitinggai dan jibanci, dan hana jipeubiyeu seungue ngon seungab. Gata Ulôn peujeuet keubanggaan nyang abadi, teumpat meugeumbira siumu masa.
16 Gata jipeulara lé bansa-bansa dan lé raja-raja, lagée sidroe ma geupeulara aneuëk gobnyan. Dan barô kheueh gata teupeue bahwa Ulôn nyoe na kheueh TUHAN, Peuseulamat gata, dan bahwa Po teu Allah Israel nyang teuga nyang peuleueh gata.
17 Ulôn ba méuh sibagoe geunantoe peurunggu, dan pirak sibagoe geunantoe beuso. Ulôn jok peurunggu sibagoe geunantoe kayée, dan beuso sibagoe geunantoe batée. Nanggroe gata Lôn peujeuet aman dan teuntram, dan jipeurintah deungon cara ade.
18 Hana le haba keuhai keukeurasan di nanggroe gata, keuhai nyang hanco dan nyang reuloh di wilayah gata. Lagée bintéh beuton nyang kukôh Ulôn lindong gata, dan gata tapujoe Ulôn sibagoe nyang peuseulamat gata.
19 Gata hana peureulée jipeutrang lé mata uroe óh watée uroe, dan hana peureulée jipeutrang lé buleuen óh watée malam. Sabab Ulôn TUHAN nyang peu peungeuh abadi keu gata, Ulôn peutrang gata deungon keuagongan Lôn.
20 Keu gata na mata uroe nyang hántom ji lôb, dan buleuen nyang hántom ubit. Sabab Ulôn TUHAN nyang peutrang gata siumu masa masa meuseudeh gata teuma habéh.
21 Peunduduek gata jijak buet deungon beutôi, awaknyan meuteumé nanggroe keu siumu masa. Awaknyan lagée kayée teugasi nyang Lôn pula keudroe, keu Ulôn jiteupeue keuagongan Lôn.
22 Meunan cit lé keuluwarga nyang ubit ngon hina teuma jeuet keu bansa nyang raya dan teuga. Ulôn TUHAN bagaih meutindak, bak saát nyang teupat."


Chapter 61

1 Kuasa TUHAN Nyang Mahamanyang na nibak ulôn; Gobnyan nyang piléh dan nyang kirém ulôn keu lôn jakba haba gét ubak ureuëng gasien dan peupuléh ureuëng nyang ka hanco até; keu lôn jakpeugah ubak ureuëng nyang teuteuen bahwa awaknyan deungon sigra teupeubeubaih, dan ubak ureuëng-ureuëng nyang na lam glab bahwa awaknyan laju teupeulheueh.
2 Gobnyan geuyue bak ulôn mangat lôn jak peusampoe haba bahwa ka trok watéejih TUHAN geupeuseulamat; keu geuhibur banmandum nyang meuduka cita, dan teubalah bandum musoh-musoh awaknyan;
3 keu teubri keugeumbiraan dan suka cita keu ureuëng nyang teungoh seudeh dan keunong musibah; keuteu ubah seudeh awaknyan jeuet keu ca-e puja ngon pujoe. Awaknyan teuma jeuet lagée bak kayée nyang geupula lé TUHAN keudroe. Awaknyan jipeubuet nyang jroh dan nyang beuna, dan TUHAN jipeuagong teuma.
4 Awaknyan jipeudong banda-banda nyang ka treb that reuloh dan jipeudong teumpat-teumpat nyang ka treb that seungue.
5 He, bansa lôn, ureuëng aséng teuma jipeutimang gata; awaknyan jirabe beulatang nyang gata peulara dan jijak buet nibak blang ngon lampôh anggô gata.
6 Gata jibôh nan hamba Po teu Allah dan jibôh nan imeum TUHAN geutanyoe. Gata tarasa keukayaan bansa-bansa laén dan gata bangga sabab hareuta awaknyan.
7 Sabab gata ka meuteumé malée dua goe lipat, meunan cit ngon noda dan hinaan ka jeuet keu bagian lam udeb gata, dan gata meuteumé hareuta waresan dua goe lipat di nanggroe gata dan meuteumé suka cita nyang abadi.
8 TUHAN meufeureuman, "Ulôn cinta that ubak keuadelan dan Lôn banci that ubak buet nyang jeuhet ngon peunindasan. Ulôn kujok upah gata deungon seutia, dan teuikat janji nyang abadi deungon gata.
9 Keuturonan gata meusyeuhu bansigom donya, jituri lé meubagoe bansa. Dan banmandum ureuëng jingieng nyan jiangkée teuma, bahwa bansa nyoe Ulôn bri beureukat."
10 Jaweueb Yerusalem, "Ulôn galak that até sabab TUHAN, até lôn meusukacita sabab Po teu Allah. Lagée teungku linto agam dan dara barô inong nyang jingui piasan meubagoe rupa, meunan kheueh TUHAN geupeungui keu ulôn bajée seulamat dan meunang.
11 Lagée bijéh nyang ka teusipreuk, teuma timoh jeuet keusinaman, meunan kheueh TUHAN Po teu Allah geupeutimoh seulamat dan banmandum bansa jipujoe Gobnyan."


Chapter 62

1 Deumi Yerusalem ulôn kupeugah haba, meunan cit deumi Sion ulôn hana lôn iemdroe, sampoe jihnyan geupeuseulamat dan meunang meucahya lagée suwa óh malam teuka.
2 He Yerusalem, bansa-bansa jingieng gata meunang, raja-raja geukalon keubeusaran gata. Gata geubôh nan deungon nan nyang barô, TUHAN keudroe nyang bôh nan gata nyan.
3 Gata jeuet lagée mahkota nyang gagah bak jaroe TUHAN, mahkota keurajeuen bak jaroe Allah gata.
4 Nan gata kon le 'Nyang jitinggai', nanggroe gata kon le 'Nyang keuseupian'. Gata teupeugah, 'Nyang Geusayang lé Po teu Allah', dan nanggroe gata geuboh nan, 'Nyang ka Meugatib', sabab TUHAN galak that keu gata, Gobnyan lagée teungku lakoe keu nanggroe gata.
5 Lagée sidroe aneuëk muda nyang meukawen ngon sidroe aneuëk dara, meunan kheueh Peuncebta gata meukawen deungon gata. Lagée sidroe teungku linto galak that até óh geukalon peurumoh droe, meunan kheueh Po teu Allah teuma geugalak keu gata.
6 Bak bintéh beuton Yerusalem ulôn keubah ureuëng tantra nyang jaga; uroe ngon malam awaknyan hana jeuet tinggai seungab, teuma harôh ji-ingat ubak Po teu Allah ubak janji nyang ka geupeubuet lé Gobnyan.
7 Awaknyan hana jeuet jipeubiyeu jihnyan seungab mantong sigohlom Gobnyan geupeudong lom Yerusalem, dan geupeujeuet nyan meusyeuhu bansaboh bumoe.
8 TUHAN ka geumeujanji ngon geumeusumpah dan teuma geupeubuet deungon kuasa Gobnyan; "Ulôn hana Lônjôk le gandom gata keu musoh ureuëng aséng hana le jijieb ié anggô nyang ka gata useuha deungon susah payah.
9 Teuma gata nyang ka gata peusapat hase panen, teuma tamakheun hase nyan sira tapujoe TUHAN; dan gata tapot boh anggô, tajieb ié jihnyan nibak seuramo Baét Ulôn."
10 He peunduduek Yerusalem, teubiet kheueh rot pintoe geureubang, peusiab laju rot ueh keu ureuëng-ureuëng nyang woe. Neupeugöt laju rot ueh raya, takireueh laju bubena batée, tapeudong laju bupanji-bupanji keu bansa-bansa.
11 TUHAN geubri peusan nyang lagée nyoe ubak banmandum peunjuru bumoe, "Tapeugah laju ubak peunduduek Sion, 'Ngieng, TUHAN nyang bri seulamat ka trok geuteuka! Gobnyan ji iréng lé ureuëng-ureuëng nyang ka geupeubeubaih lé Gobnyan.' "
12 Awaknyan teuma geuboh nan: 'Umat suci'; 'Umat Nyang geupeuseulamat lé TUHAN'. yerusalem teuma geupeugah 'Banda nyang geurayu lé TUHAN', 'Banda nyang hanale geutinggai lé TUHAN'.


Chapter 63

1 "Soe kheueh geuhnyan nyang teuka nibak Bozra di Edom? bajée gobnyan mirah, peukayan gobnyan seumarak; watée geujak gagah ngon peukasa." TUHAN "Ulôn kheueh TUHAN nyang hase Lôn peuseulamat dan teuka deungon haba keumeunangan." Tukang jaga
2 "Pakon peukayan droeneueh mirah that lagée nyan, lagée bajée ureuëng prah ié boh anggô?" TUHAN
3 "Sidroe Lôn mantong kutamong u teumpat teu prah ié anggô lamkawan umat Lôn hana nyang tulông Lôn. Bansa-bansa Lôn gilo-gilo watée Ulôn teungoh teuka beungéh, lagée Lôn gilo-gilo ateueh boh anggô. Darah awaknyan meusipreuk sampoe bulut keunong bajée Lôn, dan meulabo bansaboh peukayan Lôn.
4 Ulôn ka lheueh Lôn reuncana uroe peue awaknyan Lôn balaih, dan watée Lôn peubeubaih umat Lôn.
5 Ulôn jakmita, teuma hana nyang tulông, Ulôn hireuen pakon hana nyang tulông. Laju teunaga Lôn keudroe nyang tulông Ulôn, deungon beungéh Lôn nyan nyang tulông Lôn.
6 Nibak beungéh Ulôn nyang meutaga nyan, laju Lôn gilo-gilo bubena bansa-bansa; Lôn peubinasa bubena awaknyan, dan darah awaknyan Ulôn rô meujeue-jeue ateueh tanoh."
7 Ulôn keuneuk jak peugah geunaséh TUHAN dan lôn pujoe Gobnyan sabab nyang geupeubuet. Deungon meulimpah gaséh Gobnyan geubri beureukat keu umat, sabab Gobnyan na gaséh sayang dan geunaséh Gobnyan hana keuneulheueh.
8 TUHAN meufeureuman, "Keubit, awaknyan na kheueh umat Lôn, aneuëk-aneuëk miet nyang hana keucewa." Teuma Geuhnyan jeuet keu nyang Peuseulamat awaknyan,
9 Geuhnyan keudroe keunong keususahan awaknyan. TUHAN hana geukirém utosan atawa duta; Gobnyan keudroe kheueh nyang peubeubaih awaknyan sabab geunaséh dan balaih gaséh Gobnyan. Gobnyan sabe geupeulara awaknyan phon yoh ilée.
10 Teuma awaknyan beurontak keubit that peudeh até TUHAN. Dan Gobnyan laju geubalek jeuet keu musoh awaknyan Gobnyan keudroe nyang jak lam prang geulawan awaknyan.
11 Dan awaknyan teuingat ubak jamén ilée, jamén Nabi Musa, hamba TUHAN. Awaknyan jitanyong, "Dipat kheueh TUHAN nyang ka geupeujak bubena peumimpén umat Gobnyan rot laôt? Dipat kheueh TUHAN Nyang ka geubri kuasa Gobnyan keu awaknyan?
12 Dipat kheueh TUHAN nyang geudampeng Nabi Musa deungon jaroe Gobnyan nyang teuga dan peukasa, nyang geuprah ié dikeue awaknyan mangat nan Geuhnyan meusyeuhu siumu masa?
13 Dipat kheueh TUHAN nyang ka geupeujak awaknyan geuba rot lam laôt nyang lhok? Lagée guda rot padang pasi, awaknyan hántom meugantoh."
14 TUHAN geuba awaknyan bak teumpat seumiyôh, lagée beulatang peulara nyang ji-iréng jijak peumeurot ubak naleueng diblang. Meunan kheueh cara jih Gobnyan geubimbéng umat Gobnyan, mangat nan Gobnyan jipeumulia.
15 Ya TUHAN, neungieng kheueh rot lam syeuruga, nibak teumpat tinggai Droeneueh nyang suci dan mulia. Dipat kheueh gaséh dan peukasa Droeneueh? Dipat kheueh keurahiman dan gaséh sayang Droeneueh? Bék kheueh neupeuteun nyan nibak kamoe.
16 Kon kheueh Droeneueh Bapak kamoe? Nabi Ibrahim dan Nabi Yakub hana geuturi kamoe. Teuma Droeneueh, ya TUHAN, na kheueh Bapak kamoe, Peuseulamat kamoe phon yoh watée ilée.
17 Ya TUHAN, pakon neupeubiyeu kamoe nyoe sisat? pakon Droeneueh neupeukreueh até kamoe sampoe kamoe hana teumakot ubak Droeneueh? Neugisa kheueh deumi hamba-hamba Droeneueh, deumi umat Droeneueh, milék pusaka Droeneueh.
18 Pakon neupeubiyeu musoh jigilo-gilo lam Baét Droeneueh, dan ureuëng laén jijak peukuto bukét Droeneueh nyang suci?
19 Droeneueh neupeubuet ateueh kamoe, siulah-ulah Droeneueh hántom na meukuasa ateueh kamoe; dan siulah-ulah kamoe nyoe hántom na jeuet keu umat Droeneueh.


Chapter 64

1 Teukuwak kheueh langét dan neutron kheueh laju, ya TUHAN, neupeujeuet kheueh bubena gunong-gunong meuhayak ngon meuguncang dikeue Droeneueh,
2 lagée apui hu bak kayée sampoe ié ateueh sinungkée pih hase ju. Neupeuleumah kheueh kuasa Droeneueh ubak musoh-musoh Droen, sampoe bubena bansa yo meugám-gám dikeue Droeneueh.
3 Ka lheueh neupeubuet buet-buet nyang luwa biasa, nyang hana kamoe sangka-sangka. Droeneueh neutron, dikeue Droeneueh bube na gunong ka meuguncang.
4 Hántom na lom nyang deungoe, dan gohlom na nyang kalon bahwa seulaén Droeneueh, na ilah nyang meutindak, nibak ureuëng nyang meuhak ubak jihnyan.
5 Droeneueh nyang sambot ureuëng nyang jujoe dan nyang udeb meunurot keuheundak Droeneueh. Droeneueh beungéh keukamoe, teuma kamoe teutab meudesya beutôi yoh phon ilée kamoe meusalah.
6 Kamoe banmandum na kheueh ureuëng nyang ka kuto, meunan cit buet kamoe nyang jroh pih ka ceumar ngon kuto. Kamoe gadôh sabab buet kamoe nyang jeuhet lagée ôn nyang layée jipupôt lé angén.
7 Hana nyang meudoá keu kamoe, atawa nyang lakée tulông ubak Droeneueh, sabab Droeneueh neusöm ruman Droeneueh nibak kamoe, dan neupeubiyeu kamoe jipeubinasa lé desya-desya kamoe.
8 Teuma Droeneueh, ya TUHAN, na kheueh Bapa kamoe, kamoe nyoe tanoh kliet, dan Droeneueh nyang peugét kamoe; kamoe banmandum na kheueh peuneugét jaroe Droeneueh.
9 Lé sababnyan bék kheueh kamoe nyoe neubeungéh that, ya TUHAN, bék le neuingat-ingat keudesya kamoe; ngieng kheueh, kamoe nyoe umat Droeneueh.
10 Banda-banda Droeneueh nyang suci ka lagée padang pasi, Yerusalem ka jeuet lagée padang pasi nyang seungue.
11 Baét Po teu Allah nyang suci dan agong teumpat indatu kamoe geupujoe-pujoe Droeneueh, nyan pih ka habéh tutông deungon apui; bandum teumpat nyang kamoe galak ka habéh reuloh jeuet keu rungka-rungka.
12 Droeneueh deuh neungieng banmandum nyan, ya TUHAN, pakon kheueh Droeneueh neuseungab mantong? Peu kheueh Droeneueh neupeubiyeu kamoe meudeurita nyang leubeh peudeh?


Chapter 65

1 TUHAN meufeureuman, "Ulôn siab Lôn jaweueb umat Lôn, teuma awaknyan hana meudoá ubak Ulôn. Ulôn ka siab meunyoe awaknyan jijak meurumpok deungon Ulôn, teuma awaknyan hana jitem jak mita Ulôn. Bansa nyan hana jitem tawök Lôn, bahpi Ulôn ka siab Lôn jaweueb: Nyoe kheueh Ulôn!
2 Ulôn sabe lam siab Lôn sambot umat Ulôn, teuma awaknyan galak that bak buet nyang beurontak. Bansa nyan jipeubuet buet nyang jeuhet dan jiseutôt reuncana jih keudroe.
3 Awaknyan hana putôh-putôh jipeuteuka beungéh Ulôn sabab jipeuseumah keureubeuen bak lampôh-lampôh keu dewa-dewa dan jitot keumeunyan nibak miseubah-miseubah jihnyan.
4 Óh watée malam awaknyan jijak ubak guha-guha dan bak kubu-kubu ureuëng maté keujijak lakée naseuhat ubak areuwah-areuwah. Awaknyan jipajoh sie bui dan ji-jieb kuwah uengkot sie nyang hareuem.
5 Awaknyan jipeugah, 'Jak kheueh beujiôh keudeh, bék tupéeh ngon kamoe, sabab kamoe nyoe suci dan teumeungkréeh nibak gata!' Ulôn hana ék Lôn teun óh Lôn ngieng pi-e awaknyan! Beungéh Ulôn nyoe keu awaknyan lagée apui nyang hana jitem lon.
6 Huköman keu awaknyan ka teutuléh dikeue Ulôn. Keubit, Ulôn hana Lôn kalon ban. Ulôn kubalaih buet nyang jeuhet awaknyan
7 sabab desya awaknyan dan desya indatu awaknyan. Awaknyan jihina Ulôn deungon cara jitot keumeunyan keu dewa-dewa di teumpat seumujoe di ateueh bukét. Ulôn kubalaih awaknyan nyang sisuai deungon buet awaknyan yoh watée ilée."
8 TUHAN meufeureuman, "Boh anggô nyang mantong na ié jih hana teutiek, teuma teupeujeut keu ié anggô. Meunan cit deungon bansa Lôn hana Lôn peubinasa banmandum, sabab lamkawan awaknyan mantong na meungabdi keu Ulôn.
9 Na siladum ureuëng Israel nibak sukée Yehuda Lôn bri beureukat, dan keuturonan awaknyan meuteumé tanoh gunong Ulôn. Ureuëng-ureuëng nyang ka Lôn piléh nyang meungabdi ubak Ulôn nyan kheueh nyang tinggai disinan.
10 Umat Lôn jiseumah Ulôn; bubiri dan leumô awaknyan jirot naleueng di tanoh data Saron dan di Pantôn Akhor.
11 Teuma bukon meunan naseb ureuëng-ureuëng nyang jitinggai Ulôn, nyang hana jipako ubak Sion, bukét Lôn nyang suci, nyang peuseumah sajian ubak Gad dan Meni, dewa-dewa keubeuruntongan dan naseb.
12 Gata bandum maté sibagoe keureubeuen keukeurasan. Sabab, watée Ulôn hôi, gata hana tajaweueb, dan watée Ulôn marit, gata hana tadeungoe. Gata leubeh talawan Ulôn dan tameubuet keubuet nyang jeuhet.
13 Nyang sikeubit jih, ureuëng nyang seumah Ulôn jimakheun, teuma di gata deuk hana tateumé pajoh sapeue. Awaknyan ji-jieb ié, teuma di gata grah tho rukueng. Awaknyan meugeumbira, teuma di gata meuteumé malée.
14 Nyang sikeubit jih, awaknyan seumurak geumbira, di gata tamo deungon peudeh.
15 Ureuëng-ureuëng nyang Ulôn piléh jicok nan gata sibagoe teukutôk: "Seumoga TUHAN Nyang Mahamanyang geupoh maté gata lagée awaknyan!" Teuma ureuëng nyang taát ubak Ulôn teuma Ulôn bri nan nyang barô.
16 Soe mantong ureuëng nyang na di nanggroe nyan nyang jilakée beureukat, teuma jilakée beureukat nibak Po teu Allah nyang seutia. Soe mantong ureuëng nyang keuneuk meubudok, jimeubudok deumi nan Po teu Allah nyang seutia. Sabab peundeuritaan nyang watée ilée ka gadôh dan ka jipeutuwoe."
17 TUHAN meufeureuman, "Ulôn kupeugét langét nyang barô dan bumoe nyang barô. Keujadian-keujadian nyang ka lheueh teujadi yoh masa ilée teupeutuwoe dan hana teuingat le.
18 Meugeumbira kheueh dan meusukaria kheueh keu siumu masa sabab peue nyang Ulôn cebta. Ulôn cebta Yerusalem nyang barô nyang peunoh keugeumbiraan, dan peunduduek disinan meusuka ria.
19 Ulôn keudroe meugeumbira sabab Yerusalem, dan gurangsang sabab ureuëng disinan. Nibak banda nyan ka hana le ureuëng mo ba-e, dan hana ureuëng teumawök jilakée tulông.
20 Aneuëk-aneuëk manyak hana nyang maté yoh watée ubit, dan ureuëng tuha trok ubak umu nyang leubeh syiek. Ureuëng nyang meu umu trok sireutoh thon teuanggab muda, dan nyang maté sigohlom trok dub umunyan teuanggab nyan na kheueh huköman Lôn.
21 Ureuëng teuma jipeudong rumoh dan jiduek keudroe lam rumoh nyan; di ureuëng laén hana jiduek di rumoh nyan. Awaknyan jipula bak anggô lam lampôh dan jirasa keudroe ié anggô jih nyan; di ureuëng laén hana ji-jieb ié anggô nyan. Umat Ulôn panyang umu lagée bak kayée, dan jirasa keudroe hase reuôh jihnyan.
23 Bandum nyang awaknyan peubuet teuma na hase, dan aneuëk-aneuëk awaknyan hana maté meudab-dab. Awaknyan dan keuturonan awaknyan Lôn bri beureukat keu siumu masa.
24 Sigohlom awaknyan jilakée, ka Ulôn jaweueb; sigohlom lheueh awaknyan meudoá, doá awaknyan ka Ulôn peukabui.
25 Asée srigala dan aneuëk bubiri meusajan-sajan jimeurot naleueng; singa jipajoh jeumpueng saban lagée leumô, dan uleue ka hana meubahya le. Bansaboh bukét Lôn nyang suci, hana le nyang rugoe atawa jipeubuet jeuhet."


Chapter 66

1 TUHAN meufeureuman, "Langét na kheueh takhta Lôn, dan bumoe teumpat Lôn meugilo. Dan rumoh nyang lagée peu kheueh nyang keuneuk gata peudong keu Ulôn, dan teumpat peu kheueh nyang keuneuk gata peujeuet keu teumpat tinggai Lôn?
2 Alam raya nyoe na kheueh buet jaroe Lôn, dan banmandum nyan teupeujeuet. Teuma nyang Ulôn galak na kheueh ubak ureuëng nyang miyueb até, nyang meunyeusai keumandum desya-desya jih, nyang teumakot dan taát ubak Ulôn.
3 Teuma bansanyan jipeubuet ban galak droe jih; awaknyan galak meu iébadat meunurot cara nyang luwat hana teukira. Nibak awaknyan hana beuda jih; teukeureubeuen leumô agam dan teukeureubeuen manusia, teukeureubeuen aneuëk bubiri dan teuwiet takue asée; teupeu seumah gandom dan teukeureubeuen darah bui, teutot keumeunyan dan teuseumah patông.
4 Sababnyan Ulôn pih Lôn peubuet ban galak droe dan Lôn peurhot ateueh awaknyan beuncana-beuncana nyang awaknyan takot. Sabab bak watée Ulôn tawök, hana nyang seuôt; watée Ulôn peugah haba, hana nyang deungoe. Awaknyan leubeh galak jilawan Ulôn dan jipeubuet nyang jeuhet."
5 Deungoe kheueh peue nyang geufeureuman lé TUHAN, he gata nyang takot dan taát ubak Gobnyan, "Sabab gata seutia ubak Ulôn, na lamkawan bansa gata nyang jibanci keu gata, dan hana jitem meurakan deungon gata. Awaknyan jihina ngon jipeuwayang gata sira jipeugah, 'Bah kheueh TUHAN geutunyok keu agongan Gobnyan, mangat jeuet kamoe ngieng gata geumbira.' Teuma awaknyan keudroe kheueh nyang meuteumé malée.
6 Deungoe! Na su karu ngon subra di dalam banda; na su nibak Baét Lôn; nyan kheueh su Ulôn nyang teungoh Lôn balaih musoh!
7 Banda suci Lôn lagée sidroe ma nyang jipeulahé aneuëk sigohlom teuleunteuk teubot sabab sakét; nyang jipeulahé aneuëk agam sigohlom jirasa sakét meu aneuëk.
8 Soe nyang ka na deungoe hai nyang lagée nyan? Dan soe nyang ka lheueh kalon keujadian nyang lagée nyan? Teuma bansa Israel ka lahé bak watée Sion ka teurasa sakét meu aneuëk.
9 Bék tasangka Ulôn ba umat Lôn sampoe bak saát keulahéran dan hana teupeubiyeu awaknyan teupeu lahé." Meunan kheueh geupeugah lé TUHAN.
10 Meusuka cita kheueh meusajan Yerusalem, he banmandum ureuëng nyang cinta jihnyan. Gata nyang meuduka sabab gobnyan, jinoenyoe ka jeuet meugeumbira ria.
11 Gata teuma tarasa keumakmuran jihnyan, lagée sidroe aneuëk manyak jijieb mom nibak ma jih.
12 Sabab TUHAN meufeureuman, "Gata Ulôn bri keuseujahteuraan lagée ié krueng nyang teungoh ile; keukayaan bansa-bansa laén teuma jiba ubak gata lagée ié krueng nyang teungoh boh bah. Gata lagée aneuëk manyak nyang teungoh geupeumom dan geutiengkue lé ma jih, dan geugusuek-gusuek lam pangkée gobnyan.
13 Ulôn kuhibur gata di Yerusalem, lagée sidroe ma geu hibur aneuëk gobnyan.
14 Watée tangieng nyan, gata meugeumbira, dan meutamah seuhat ngon teuga lagée naleueng nyang mantong muda. Dan hamba-hamba Lôn jirasa keukuasaan Lôn dan musoh-musoh Lôn jirasa ubak beungéh Lôn."
15 Keubit, TUHAN teuka meusigoe ngon apui; Gobnyan nyang supée keudroe geuritan Geuhnyan tajam jiplueng lagée angén badée, keu geupeusak beungéh Geuhnyan, dan geudumpék deungon su nyang meutaga.
16 Sabab bandum ureuëng nyang meuteumé salah teuma geuhuköm deungon apui dan peudeueng, dan jai that-that nyang geuhuköm maté.
17 TUHAN meufeureuman, "Soe mantong ureuëng nyang jijak peugleh droe óh lheueh nyan jijak meukawan-kawan u lampôh-lampôh keu dewa-dewa dan jimeu iébadat keu dewa-dewa nyan, ureuëng nyan leunyab meusajan deungon ureuëng nyang pajoh sie bui dan tikoih dan peunajoh nyang laén nyang kuto ngon luwat lumpah na.
18 Ulôn kuteupeue pikeran dan buet-buet awaknyan. Ulôn teuka keu Lôn jak peusapat bubena ureuëng nibak meubagoe bansa. Bak watée awaknyan meugumôi, awaknyan jikalon kuasa Lôn.
19 Ulôn teuma Lôn keubah saboh tanda lamkawan awaknyan. Teuma citbacut sagai nibak awaknyan nyang Ulôn peuseulamat. Awaknyan Lôn kirém ubak bansa-bansa di nanggroe-nanggroe jiôh nyang gohlom na jideungoe keuhai Ulôn atawa jikalon keuagongan dan kuasa Lôn: u Tarsis, Libia dan Lidia deungon ureuëng-ureuëng nyang ka carông dan lisek that bak jitimbak aneuk panah, u Tubal dan Yunani. Awaknyan jidakwahkan keubeusaran Lôn di teungoh bansa-bansa nyan.
20 Nibak nanggroe-nanggroe nyan awaknyan teuma jiba lom syedara-syedara gata seubansa sibagoe hadiah keu Ulôn. Awaknyan jiba bandum ureuëng nyan ubak bukét Lôn nyang suci di Yerusalem deungon keundeuraan guda, keuleudée dan unta, dan deungon geuritan meunan cit geurubak peudati, lagée nyang ka lazem jipeubuet lé ureuëng Israel jiba u Baét TUHAN peuseumahan gandom lam wadah nyang gleh.
21 Siladum lamkawan awaknyan Ulôn peujeuet keu teungku imeum dan ureuëng Lewi.
22 Lagée langét barô dan bumoe barô teuma meuteun sabab kuasa Lôn, meunan cit deungon keuturonan gata dan nan gata teutab tinggai.
23 Tieb-tieb Buleuen Barô dan tieb-tieb uroe Sabat bansaboh umat manusia teuma teuka keu jiseumah Ulôn di Yerusalem.
24 Watée beurangkat, awaknyan jikalon manyét ureuëng-ureuëng nyang ka beurontak keu Ulôn. Ulat nyang pajoh bangke awaknyan hana maté-maté, dan apui nyang tot awaknyan hana teuma lon-lon; saboh pandangan nyang lum teumakot ngon yo keu banmandum manusia."