Peumo Ba-E

1 2 3 4 5


Chapter 1

1 Padub na seungue Yerusalem nibak saát nyoe, banda nyang dilée ramé lumpah na. Yohmasa dilée jitée meugah keu meubagoe bansa, bak saát nyoe ka jeuet lagée inong balée. Yoh masa dilée banda nyang paleng teupujoe, jinoe ka teupeujeuet lagée namiet nyang hana meuguna.
2 Simalam suntok jimo ngon seudeh, ié mata jih rho meuleng-leng tijoh nibak mieng. Hana meusidroe pi nibak geunaséh jih nyang jitem peulalo. Gobnyan jikhianat lé rakan-rakan jih nyang ka teubalék jeuet keu lawan.
3 Peunduduek Yehuda jitinggai nanggroe jih, sabab jipeunamiet dan lumpah seungsara. Jinoe awaknyan tinggai lamkawan bansa-bansa hana meuteumpat nyang na teubri damé seujahteura. Musoh jikeupong awaknyan bak watée awaknyan meudeurita.
4 Bak uroe raya hana meusidroe pih nyang na teuka u Baét Allah. Dara-dara nyang meuca-e disinan ka meudeurita, dan Teungku-teungku Imeum ka apoh apah. Hana leumah ureuëng nibak babah-babah pintoe geureubang, banda di Sion ka peunoh deungon keuseudehan.
5 Musoh-musoh gobnyan ka meujaya sabab ka hase jikuasa gobnyan. TUHAN nyang peujeuet awaknyan meudeurita, sabab lumpah that le desya gobnyan. Peunduduek jihnyan ka habéh teuteun, dan teuangkot ubak teumpat nyang teuböih.
6 Keujayaan banda Yerusalem na kheueh kisah masa nyang ka treb. Bubena peumimpén disinan ka jeuet keuleumoh lagée rusa nyang ka deuk that. Awaknyan hana meudaya watée jitiyeub lé musoh.
7 Óh ka lheueh reuloh dan seungsara, Yerusalem teuingat masa nyang ka treb, watée mantong le hareuta; pakriban peunduduek rhot bak jaroe musoh, dan hana meusidroe pih nyang teuka jijak tulông. Lawan-lawan gobnyan jikém-kém mantong óh jikalon awaknyan ka reuloh.
8 Yerusalem ka jipeukuto droe jih keudroe deungon cara jipeubuet desya nyang le dan kutoe. Bandum nyang ilée jihoreumat gobnyan, jinoe jihina sabab teukalon jihnyan ka teulon. Gobnyan apoh apah, sabab ka gadôh ié muka.
9 Keuhai kutoe jihnyan deuh peungeuh teukalon teuma jihnyan hana jipakoe peue nyang teujadi ateueh droe jih keudroe. Keubit that hebat keuhancoran gobnyan, teuma hana meusidroe pih nyang jitem peumangat até gobnyan. Dan gobnyan geulakée gaséh sayang nibak TUHAN, sabab musoh-musoh gobnyan ka habéh meunang.
10 Bandum hareuta beunda gobnyan ka habéh jireupah lé dumna musoh. Gobnyan deungon seudeh geukalon awaknyan jitamong lam Baét Po teu Allah, buet nyang that geutam lé TUHAN keu ureuëng-ureuëng nyang bukon umat Gobnyan.
11 Deungon meususah payah peunduduek gobnyan jimita hareukat; barang nyang meuhái-meuhái yuem nibak awaknyan jituka deungon ruti, mangat awaknyan teutab udeb dan bék maté. Yerusalem jimeuhôi, "Ya TUHAN, neungieng kheueh ulôn, neukalon kheueh sigala peundeuritaan lôn."
12 "He ureuëng-ureuëng nyang teungoh jak bak rot ueh raya, kalon kheueh dan ngieng kheueh! Peu kheueh na seksa nyang raya jih ube nyang lôn deurita bak saát nyoe, seksa nyang ka geupeurhot lé TUHAN u ateueh ulôn, sabab beungéh Gobnyan nyang paleng raya nyan?
13 Di ateueh langét geupeutron apui nyang lumpah seu uém dan sampoe tutông lam baten lôn. Geupasang taron dikeue ulôn nyang jeuet keusabab ulôn reubah. Laju geupeubiyeu lôn disinan sidroe khong sampoe meudeurita siuroe suntok.
14 Geucok bandum desya ulôn, laju geuikat ka jeuet keusaboh, dan geugantung ubak takue lôn, dan geuhôn atranyan ka leumoh ulôn. TUHAN geujok ulôn ubak musoh; ulôn hana meudaya lôn lawan awaknyan.
15 TUHAN geuanggab hina bandum pahlawan lôn nyang beuhe ngon gagah. Geukrah banmandum sipa-i mangat bandum ureuëng muda lôn habéh binasa. Gobnyan geugilo-gilo bansa lôn sampoe hanco, lagée ureuëng nyang teungoh prah ié boh angggô.
16 Nyang kheueh sabab jih ié mata ulôn rô meutreb-treb, hana ureuëng nyang bri seumangat dan peumangat até. Bansa ulôn ka habéh gadôh peue-peue nyang na, sabab musoh leubeh meukuasa.
17 Ulôn beuôt jaroe lôn lakée tulông, teuma hana ureuëng nyang jitem peumangat até. Rot jeueb-jeueb sagoe TUHAN, geukirém musoh; awaknyan teuka jijak prang ulôn. Ulôn jipeusaban lagée brôh nyang hana meuguna, barang nyang paleng luwat di teungoh-teungoh awaknyan.
18 Teuma TUHAN kheueh nyang paleng beutôi, sabab peurintah Gobnyan ka ulôn iengkeue. Deungoe kheueh ulôn he bansa-bansa, kalon kheueh ulôn lam deurita. Bubena ureuëng muda dan aneuëk dara nanggroe lôn ka habéh jiteun, dan laju jiangkot ubak teumpat nyang teuböih.
19 Ulôn tawök bandum rakan-rakan nyang krab deungon ulôn teuma awaknyan jikhianat lôn. Bubena Teungku Imeum dan peumimpén bansa banmandum ka habéh maté bak rot-rot ueh banda. Bak watée jimita peunajoh keu jipeuteun nyawöng.
20 O, TUHAN! Neungieng kheueh ulôn, até ulôn gundah ngon karu, hanco sabab doraka ulôn yoh masa ilée. Bak rot-rot ueh raya na ureuëng jipoh maté, dalam rumoh na nyang maté.
21 O, TUHAN! Neudeungoe kheueh apoh apah lôn, hana ureuëng nyang jitem peumangat até lôn. Musoh-musoh ulôn galak ngon geumbira, sabab Droeneueh nyang peujeuet ulôn ceulaka. Neupeuteuka kheueh uroe nyang Droeneueh peujanji nyan; neupeujeuet kheueh awaknyan meudeurita saban lagée ulôn.
22 Neungieng kheueh bandum buet jeuhet awaknyan, dan neupeusaneut kheueh ateueh awaknyan lagée Droeneueh peusaneut ateueh ulôn, sabab bandum desya nyang ulôn peubuet ateueh Droeneueh. Ulôn áh éuh meurang-rang lam deurita, até ulôn seudeh dan meurana."


Chapter 2

1 TUHAN geucok tendakan lam beungéh Gobnyan, Sion habéh geutôb deungon seupôt. Keuagongan Israel nyang manyang trok u langét, ka geugeulawa u ateueh bumoe. Bak saát TUHAN meureuka, baét Gobnyan di Sion pih hana geupakoe.
2 Tieb-tieb blang naleueng nyang na di nanggroe Yehuda, bandum geupeuhanco hana rasa wéueh. Lam beungéh Gobnyan laju geupeusak sampoe reuloh kuta-kuta nyang teulindong nanggroe nyan. Keurajeuen nyan meusajan deungon peumimpén ji geupeu rhot laju sampoe ka jeuet keuhina.
3 Lam beungéh Gobnyan nyang hu lagée apui nyan, teunaga Israel geupeupatah. Watée geutanyoe jiseurang lé lawan, Gobnyan hán geutem tulông. Lagée apui nyang hu meubura habéh jipeuranab peue-peue nyang na, meunan kheueh TUHAN beungéh keu bandum geutanyoe.
4 Lagée musoh, Gobnyan geulinteueng beude Geuh dan geupeukeu aneuk panah Gobnyan ateueh geutanyoe. Bandum ureuëng nyang jipeu galak até geutanyoe, habéh geupeumaté lé Gobnyan. Gobnyan geupeu hambo beungéh Geuh lagée apui hu u dalam banda Yerusalem nyoe.
5 TUHAN ka jeuet lagée musoh; Gobnyan geuseunuét Israel sampoe reuloh. Gobnyan geupeuhanco bubena kuta meunan cit deungon meuligoe, dan geupeujai seudeh ngon inseuh keu Yehuda.
6 Gobnyan geupeuhanco rumoh Geuh keudroe teumpat umat Geuh meusapat jak seumah Gobnyan. Gobnyan nyang peujeuet manusia tuwoe bak uroe Sabat dan uroe-uroe raya. Sabab TUHAN lumpah that beungéh, Teungku Imeum dan raja ka geutulak teuma.
7 TUHAN geutulak miseubah Gobnyan nyang paleng suci, dan geutinggai Baét Gobnyan keudroe; geupeubiyeu musoh jipeureuloh bubena bintéh beuton gobnyan. Bak teumpat geutanyoe ilée meuiébadat dan peugot khanuri, musoh seumurak sabab ka meujaya.
8 TUHAN ka geucok peunutôh bahwa bintéh-bintéh beuton Sion harôh teureuloh. Bintéh-bintéh beuton nyan ka geusipat, mangat banmandum hase teupeuhanco. Bintéh-bintéh beuton dan meunara-meunara, bak saát nyoe ka jeuet keu rungka banmandum.
9 Pintoe-pintoe geureubang ka meuseubée ngon tanoh, bandum palang-palang pintoe nyan ka habéh patah; raja dan peujabat peumeurintah bandum na di teumpat nyang teuböih. Huköm TUHAN ka hana jipeurunoe le; dan nabi hana le geuteurimong wahyu nibak TUHAN.
10 Bubena tuha-tuha peut nyang na didalam banda ka seungab keudroe sira geuduek didalam tanoh; awaknyan geutabu abée di ateueh ulée, dan geungui ija kröng tanda meuduka. Meunan cit di aneuëk-aneuëk dara jitukui ulée trok bak tanoh.
11 Mata ulôn keumong sabab ulôn mo nyang hana piôh, jiwa lôn meurana hán ék teukira. Até lôn hanco óh lôn ngieng keuhancoran bansa; lôn ngieng aneuëk miet dan aneuëk manyak habéh pansan bak rot-rot banda.
12 Deungon leumoh dan hék awaknyan jimo sira jilakée peunajoh dan ié jieb nibak ma jih. Lagée ureuëng nyang luka, awaknyan reubah meusumpom bak rot-rot ueh raya laju meuninggai lam pangkée ma teucinta.
13 O, Yerusalem, banda Sion nyang teucinta, rungka-rungka reuloh gata na be laôt raya. Peu kheueh nyang jeuet ulôn peugah keu ulôn bri peulalo até? Sabab, hántom na nyang meudeurita nyang sa lagée gata. Keubit that hana nyang hase peupuléh keuadaan gata.
14 Nyang geupeusampoe lé nabi-nabi keu gata, na kheueh seumeungéut dan sulet nyang hana teukira. Awaknyan hántom jipeugah keuhai desya gata, lé sabab nyan gata hántom meutobat. Sikeubit jih nyang jipeusampoe lé awaknyan ubak gata haba-haba nyang sulet nyang peumangat até.
15 Bandum ureuëng nyang jijak rot nyan jipeubeub gata, sabab gata ka hanco bube nyang na. Awaknyan jiasek-asek ulée sira jipeugah, "Nyan kheueh banda nyang paleng tari, banda keubanggaan donya?"
16 Bandum musoh gata jipandang bak muka gata deungon rasa banci, awaknyan jipeukém gata deungon deungon kém nyang meuhina. Awaknyan jipeugah, "Banda nyan ka kamoe peuhanco! Akhé jih trok cit saát jih nyang ka kamoe preh-preh!"
17 TUHAN ka geupeubuet ancaman Gobnyan nyang yoh masa ilée ka geureuncana dan geupeuingat ubak geutanyoe. Geutanyoe geupeuhanco ngon hana rasa inseuh, dan keu musoh geubri keumeunangan. Gobnyan geupeujeuet awaknyan galak that watée jingieng geutanyoe ka rhot.
18 He bintéh-bintéh beuton Yerusalem, teumawök kheueh ubak TUHAN! Rô kheueh ié mata lagée ié krueng nyang ile uroe ngon malam bék kheueh taiém-iém nibak tamo, sampoe badan gata jiteuka hék!
19 Beudôh kheueh meulang-ulang simalam suntok keu takliek tarô asoe até gata ubak TUHAN. Lakée kheueh mangat Gobnyan na rasa gaséh sayang keu aneuëk-aneuëk gata nyang teungoh deuk dan pansan bak tieb-tieb rot ueh nyang meukilok.
20 TUHAN, neungieng kheueh dan neupeurati kheueh ubak awaknyan nyang Droeneueh seksa nyan! Peu kheueh na nyang ka neupeulaku nyang lagée nyan? Ma jipajoh aneuëk droe jih nyang paleng jisayang, teungku imeum dan nabi ka jipoh lam Baét Droeneueh nyang suci.
21 Tuha muda ka habéh maté teugageueng ateueh rot raya, aneuëk muda ngon aneuëk dara ka habéh maté bak ujong peudeueng. Bak uroe Droeneueh beungéh nyan, laju neuköh takue awaknyan hana meurasa inseuh.
22 Droeneueh neu undang musoh-musoh nyang kamoe takot keu jipeugot khanuri nyang paleng keujam ban silingka kamoe. Awaknyan jipoh mandum nyang kamoe peulara dan nyang kamoe gaséh. Nibak uroe Droeneueh beungéh, hana meusidroe pih nyang hase jipeuplueng droe.


Chapter 3

1 Ulôn kheueh ureuëng nyang ka lôn rasa udeb seungsara, sabab teuginton ngon beungéh Po teu Allah.
2 Maken jiôh ulôn teuhila u dalam seupôt nyang hana deuh sapeue.
3 Ulôn geupoh meuleuböb-leuböb hana geupiôh, hana rasa gaséh bansipanyang uroe.
4 Gobnyan geupeujeuet tuboh lôn ka habéh luka luhok-luhok, dan tuleueng-tuleueng ulôn ka habéh patah.
5 Gobnyan geupeupeunoh ulôn deungon duka dan deurita.
6 Ulôn geupaksa tinggai dalam seupôt lagée ureuëng nyang maté bak jamén ilée.
7 Deungon beuleunggu nyang kong laju geu ikat ulôn, sampoe ka hana le rot lôn teubiet.
8 Laju ulôn kliek lôn lakée tulông, teuma Po teu Allah hán geutem deungoe.
9 Gobnyan laju geulinteueng rot ulôn jak deungon beuton-beuton batée.
10 Lagée cagée meuluem Gobnyan geupreh lôn, lagée singa Gobnyan geulinteueng ulôn.
11 Geutiyeub ulôn sampoe meusimpang bak binéh jalan, laju ulôn geuteugöm ngon geupriek-priek geutinggai sinan.
12 Lom geureuntang busur Gobnyan, dan geupeujeuet ulôn teumpat timbak aneuk panah Gobnyan.
13 Aneuk panah Gobnyan ka beusöt nibak tuboh lôn sampoe trok teutôb nibak jantong lôn.
14 Si uroe seupôt ulôn jipeukém lé bandum ureuëng, dan geupeujeuet keubahan gob pansi haba.
15 Teuma nyang phet nyang geubri keu ulôn keu peunajoh dan nyang ulôn jieb.
16 Muka ulôn geupreu-preu ubak tanoh, dan gigo ulôn geu antôk ubak batée sampoe patah.
17 Ka treb that hántom lôn rasa udeb seujahteura; katuwoe ulôn pakriban udeb bahgia.
18 Nibak ulôn ka hana le meusyeuhu, Gadôh kheueh harapan ulôn ubak TUHAN.
19 Ulôn pike keuhai meurawöh dan keuhai nyang malang lagée lôn jieb ié tuba nyang lumpah that phet.
20 Hana putôh-putôh hai nyan ulôn pike, sampoe baten ulôn ka teuteugon hana meuguna.
21 Bahpi meunan harapan ulôn jibeudôh lom, watée lôn ingat hai nyoe:
22 Geunaséh TUHAN keukai abadi, rakhmat Gobnyan hántom na habéh,
23 sabe barô tieb-tieb beungoh keubit that TUHAN seutia lagoena!
24 TUHAN na kheueh hareuta ulôn hana nyang laén. Sabab nyan kheueh, ulôn meuharab ubak Gobnyan.
25 TUHAN gét that keu ureuëng nyang meuharab ubak Gobnyan, dan ubak ureuëng nyang mita Gobnyan.
26 Lé sababnyan, bah kheueh tanyoe preh deungon teunang sampoe TUHAN trok geujak bri peutulôngan;
27 bah kheueh tanyoe meurunoe jeuet keutabah bak watée geutanyoe mantong muda.
28 Watée TUHAN geubri peundeuritaan, bah kheueh geutanyoe taduek keudroe deungon seungab.
29 Bah kheueh geutanyoe ta peumiyueb droe dan meunyeurah, sabab mungken harapan mantong na.
30 Bahpi jitampa dan jirapa, bah kheueh banmandum nyan tanyoe teurimong.
31 Sabab, TUHAN hana geutulak geutanyoe siumu masa.
32 Óh ka lheueh Gobnyan geubri peundeuritaan, nibak gobnyan pih na gaséh sayang, sabab Gobnyan teutab geugaséh keu geutanyoe deungon geunaséh nyang hana bataih.
33 Gobnyan hana deungon rila até geupeubiyeu geutanyoe meudeurita dan seudeh.
34 Meunyoe jiwa geutanyoe teuteugon didalam glab,
35 Meunyoe geutanyoe gadôh hak nyang geubri lé TUHAN,
36 sabab keuadelan geuputa balék, pasti kheueh TUHAN geuteupeue dan geupeurati.
37 Meunyoe TUHAN hana geugalak keu sapeue-sapeue, pasti manusia hana hase jipeugét sapeue keu nyan.
38 Gét dan brok teutab jipeujak na kheueh ateueh peurintah TUHAN.
39 Pakon manusia harôh apoh apah meunyoe jihnyan teuhuköm sabab desya-desya jih keudroe?
40 Bah kheueh geutanyoe tatilek udeb geutanyoe, dan tawoe bak TUHAN Allah di dalam syeuruga. Jak kheueh geutanyoe ta peuhah até dan meudoá,
42 "Kamoe meudesya dan beurontak ubak Droeneueh, ya TUHAN, dan Droeneueh hán neubri keuamphonan.
43 Kamoe Droeneueh peulet Droeneueh poh maté, gaséh sayang ka teusöm lam beungéh Droeneueh.
44 Meureuka Droeneueh lagée awan nyang teubai that sampoe hana hase jilhob lé doá-doá kamoe.
45 Kamoe ka neupeujeuet lagée brôh nyang hana meuguna nibak mata bansigom donya.
46 Kamoe jihina lé bandum musoh dan jipeukém-peukém kamoe;
47 Kamoe ka keunong lé keuceulakaan dan keuhancoran, dan udeb lam bahya dan teumakot nyang hán teukira.
48 Ié mata lôn ji ile lagée ié krueng sabab bansa ulôn ka habéh hanco.
49 Ulôn teuma lôn mo hana piôh-piôh,
50 sampoe Droeneueh, ya TUHAN di syeuruga, neungieng kamoe.
51 Até ulôn ka jeuet keuseudeh kamoe ngieng naséb ureuëng inong di banda kamoe.
52 Lagée cicém, ulôn jitiyeub lé musoh nyang hana keudaléeh neubanci ulôn.
53 U dalam mon nyang tô kreng, awaknyan jitiek ulôn udeb-udeb laju jiseubée ulôn ngon aneuk batée.
54 Ié ji-ék sampoe trok bak ulée lôn, dan ulôn pike, -- 'Habéh kheueh riwayat lôn!'
55 Ya TUHAN, ulôn meulakée ubak Droeneueh, nibak tuwie mon nyang lhok nyan.
56 Ulôn meuharab nyang that-that bék kheueh neusumpai geulinyueng Droeneueh keu nyang ulôn lakée mangat Droeneueh neutulông ulôn. Dan doá ulôn Droeneueh deungoe, dan Droeneueh teuka neujak peutoe; Droeneueh neupeugah, 'Bék yo.'
58 Droeneueh teuka neupeujuang peukara ulôn, ya TUHAN, nyawöng ulôn ka Droeneueh peuseulamat.
59 Droeneueh neungieng buet nyang jeuhet nyang jipeubuet ateueh ulôn, reuncana jeuhet musoh nyang banci ulôn. Sabab nyan, ya TUHAN, neubila kheueh peukara ulôn.
61 Droeneueh, TUHAN, neudeungoe ulôn jihina; Droeneueh neuteupeue bandum reuncana awaknyan.
62 Awaknyan jipeubiyeu ulôn siuroe seupôt. keu jipeuceulaka ulôn, awaknyan jipeugét reuncana nyang kutoe.
63 Phon beungoh trok án malam, ulôn jipeujeuet keubarang nyang jipeukém.
64 Huköm kheueh awaknyan, nyang sisuai deungon buet jih, ya TUHAN.
65 Kutok kheueh awaknyan, dan neupeubiyeu kheueh awaknyan tinggai dalam keuadaan putôh asa.
66 Peulét kheueh dan peubinasa kheueh awaknyan banmandum sampoe awaknyan teusampôh habéh lam donya."


Chapter 4

1 Méuh nyang hu muble-ble ka jeuet keu mala batée-batée Baét Allah ka meutabu bak rot ueh raya.
2 Yoh masa ilée peumuda remaja banda Sion lagée méuh nyang meuhái yuem, teuma bak saát nyoe ka jipeujeuet lagée beujana tanoh nyang hana hareuga.
3 Seudangkan, nang srigala jipeumom aneuëk-aneuëk jih teuma umat ulôn keujam that lagée cicém unta nyang lheueh di padang.
4 Aneuëk-aneuëk manyak nyang hana teubri mom, sampoe maté sabab ka glaih. Aneuëk-aneuëk manyak jilakée makheun, teuma hana ureuëng nyang jitem bri.
5 Awaknyan nyang ka lazém jimakheun peunajoh nyang mangat-mangat, dan udeb lam keumeuwahán, jinoe jimeuéue jijakmita peunajoh dalam sinamon blôh, dan maté deuk teugageueng bak rot-rot ueh raya.
6 Umat ulôn ka geuhuköm leubeh brat nibak peunduduek Sodom nyang lam sikréb mata hanco lé jaroe Po teu Allah deungon hana tindakan manusia.
7 Yoh masa ilée bubena peumimpén kamoe na kheueh gleh-gleh lagée gapeueh nyang putéh beureuseh. Awaknyan teugab dan teuga, seugar bugar dan seuhat-seuhat.
8 Teuma bak saát nyoe muka awaknyan leubeh itam nibak jeulaga habéh teugageueng bak rot ueh raya hana meusidroe manusia pih nyang na jituri. Kulét awaknyan ka habéh krot nibak tuleueng-tuleueng, lagée kayée nyang tô kreng hana meuguna.
9 Awaknyan seungsara dan maté bacut-bacut, sabab mubacut pih ka hana le peunajoh nyang teukeubah; nyang maté dimideuen prang, leubeh meu-untông nibak nyang maté sabab keunong deuk.
10 Keubit that yo teumakot ngon gli beuncana nyan nyang rhot ateueh umat lôn sampoe ma-ma nyang até geuh leumoh geureuboh aneuëk droe geuh keudroe mangat na meuasoe pruet.
11 TUHAN geupeuteuka beungéh Gobnyan dan geutot banda Sion sampoe rata deungon tanoh.
12 Di lamkawan raja-raja dan peunduduek donya hana meusidroe pih nyang peucaya bahwa pintoe-pintoe geureubang Yerusalem hase jitamong lé musoh dumna.
13 Teuma bandum nyan ka teujadi, sabab desya bubena teungku imeum dan nabi-nabi. Awaknyan ka jisintong darah, nibak ureuëng nyang hana meusalah.
14 Lagée ureuëng buta nyang meuwot-wot bak rot ueh raya meunan kheueh peumimpén-peumimpén banda Yerusalem. Peukayan awaknyan kutoe keunong darah sampoe hana meusidroe pih nyang tem jakmat awaknyan.
15 Ureuëng laén jipeugah, "Wéueh nibak teumpat nyoe! Gata najih, bék tamat kamoe!" Dan jijak kheueh awaknyan dan jimeurawoh bak saboh bansa bak bansa nyang laén, teuma hán jibri tinggai teutab lé soe mantong.
16 TUHAN hana le geupakoe umat Geuh keudroe; Gobnyan keudroe nyang peucrebre awaknyan dan geupeujeuet teungku-teungku imeum hana le jihareuga; dumna peumimpén hana le nyang gaséh.
17 Mata kamoe ka kamoe pandang, kamoe preh bantuan nyang hántom na teuka. Nyang kamoe harab peutulôngan saboh bansa, nyang seubeuna jih hana jeuet geubri sapeue.
18 Kamoe hana hase kamoe teubiet ubak rot raya, sabab sabe ji luem lé lawan. Seuneuleuh udeb kamoe karab sileumpah, sabab uroe-uroe udeb kamoe ka geunab.
19 Ureuëng-ureuëng nyang peucrok kamoe bagaih lumpah na jiôh leubeh bagaih nibak cicém siwah po. Awaknyan jitiyeub kamoe di gunong, dan jilinteueng kamoe di padang pasi.
20 Awaknyan jidrob raja nyang geupiléh lé TUHAN, ureuëng nyang kamoe peubangga sibagoe nyang geubri udeb, dan nyang peupayong teuhadab lawan.
21 He bansa Edom dan Us, takém laju, meugeumbira kheueh, teungoh mantong jeuet tapeugeumbira! Bala teuma teuka cit ateueh gata dan sabab ka mabök gata peulon droe keudroe gata.
22 Sion ka jipeubuet huköman ateueh jih nyan ateueh desya-desya nyang ka jipeubuet; jinoe kamoe hana geupeubiyeu lé TUHAN dan hana geuba le ubak teumpat nyang teuböih. Teuma gata, he Edom, geuhuköm lé TUHAN. Desya-desya gata teusalob bubena nyang na.


Chapter 5

1 Ingat kheueh, ya TUHAN, peue nyang teujadi di ateueh kamoe, Neungieng kheueh kamoe nyang hina.
2 Hareuta waresan kamoe rhot lam jaroe ureuëng laén, rumoh-rumoh kamoe ka jiduek lé ureuëng aséng.
3 Ureuëng syiek kamoe ka jipoh lé musoh; saátnyoe ma kamoe ka jeuet keu inong balée, dan kamoe ka jeuet keu aneuëk piatu nyang hana le du.
4 Ié jieb dan kayée apui harôh kamoe bloe.
5 Lagée beulatang, kamoe jipaksa keureuja brat, kamoe hék, hana jibri watée keu meureuhat.
6 Kamoe jak geumadée u nanggroe Meusé, kamoe lakée peunajoh di Asyur.
7 Indatu kamoe ka meudesya, jinoe awaknyan ka hana le; teuma kamoe harôh meudeurita, sabab desya-desya awaknyan.
8 Kamoe jipeurintah lé ureuëng-ureuëng nyang hana leubeh nibak namiet; hana nyang meukuasa jipeulheuh kamoe nibak awaknyan.
9 Di luwa banda, ureuëng peumaté gob meuwot-wot ban saboh nyan; nyawöng kamoe teuancam watée kamoe teubiet jak mita peunajoh.
10 Kamoe meudeurita sabab ka deuk, seuhingga kulét kamoe seu uém lagée ngeue apui.
11 Ureuëng-ureuëng inong nyang na di Sion ka jipeukosa, aneuëk-aneuëk dara jinoda di gampông-gampông Yehuda.
12 Peumimpén-peumimpén kamoe jidrob dan jigantung, ureuëng-ureuëng tuha kamoe ka hana le jisanjong.
13 Ureuëng-ureuëng muda kamoe jipaksa jakmeubuet bak teumpat geumileng, aneuëk-aneuëk agam kamoe teuginton deungon geunulam kayée sampoe pansan.
14 Ureuëng tuha-tuha hana le meugumpôi bak babah pintoe geureubang banda, su musik hana le teudeungoe lamkawan ureuëng muda.
15 Kamoe ka gadôh keubahgiaan; tari ngon likak ka meu ubah jeuet meukabong nyang duka.
16 Keubanggaan kamoe ka hana le, kamoe ceulaka sabab ka meudesya.
17 Gunong Sion ka seungue dan ka jitinggai le gob; disinan asée uteuen meuraja lela. Sabab nyan até kamoe reumok dan hanco, laju kamoe mo ba-e sampoe mata keumalon kamoe ka jeuet keu sapu.
19 Teuma Droeneueh, ya TUHAN, teutab meukuasa, Droeneueh nyang mat peurintah siumu masa.
20 Ék kheueh patot neutinggai kamoe treb that-that? Peu kheueh mungken neutuwoe bak kamoe siumu masa?
21 Ya TUHAN, neuba kheueh kamoe meugisa ubak Droeneueh; kamoe meungwoe ubak Droeneueh! Neupeupuléh kheueh keuadaan kamoe lagée awaiphon.
22 Atawa ka neuböih kamoe hán neupeuduli le? Hana meubataih beungéh Droeneueh keu kamoe?