Hosea

1 2 3 4 5 6 7 8 9 10 11 12 13 14


Chapter 1

1 Nyoe kheueh peusan nyang geubri lé TUHAN ubak Hosea bin Beeri bak masa keurajeuen Yehuda meuturot-turot geupeurintah lé Raja Uzia, Yotam, Ahas, dan Hizkia, dan keurajeuen Israel geupeurintah lé Yerobeam bin Yoas.
2 Watée TUHAN phon-phon geumeufeureuman ubak bansa Israel deungon peurantaraan ulôn, TUHAN geupeugah, "Hosea, tameukawen kheueh deungon sidroe ureuëng nyang galak bak buet meumukah, dan aneuëk-aneuëk gata jeuet cit lagée jih nyan. Umat Ulôn saban lagée peurumoh gata nyan; awaknyan hana seutia ubak Ulôn, dan jitinggai Ulôn."
3 Dan laju ulôn meukawen deungon sidroe inong nyang nan jih Gomer bin Diblaim. Óh lheueh nyan lahé kheueh aneuëk kamoe nyang phon, sidroe aneuëk agam.
4 TUHAN meufeureuman ubak Ulôn, "Taboh nan aneuëk gata nyan Yizreel sabab hana treb le ulôn kuhuköm raja Israel sabab Yehu indatu jihnyan ka jipoh maté ureuëng laén, di Yizreel Ulôn ku peutamat peumeurintahan keuturonan Yehu.
5 Bak masa nyan di Pantôn Yizreel Ulôn kupeuhanco teunaga tantra Israel."
6 Óh lheuehnyan peurumoh lôn nyan jipeulahé aneuëk kamoe nyang keudua, aneuëk nyang lahé nyan na kheueh inong. TUHAN meufeureuman ubak ulôn, "He Hosea, taboh nan aneuëk gata nyan 'Nyang Hana Geugaséh', sabab Ulôn hana le Lôn gaséh ubak bansa Israel, dan meubacutpi hana Lôn peuamphon awaknyan.
7 Teuma bansa Yehuda Lôn gaséh. Ulôn, TUHAN, Po teu Allah awaknyan, Lôn peuseulamat awaknyan, teuma bukon deungon muprang, meunan cit bukon deungon peudeueng atawa aneuk panah atawa guda meusajan ngon nyang giduek ateueh guda nyan."
8 Óh ka lheueh aneuëk kamoe nyang keudua nyan teupeucre jimom, peurumoh ulôn nyan laju raya pluet lom dan jipeulahé aneuëk agam.
9 TUHAN meufeureuman ubak ulôn, "Taboh nan aneuëk gata nyan, 'Bukon Umat Lôn', sabab ureuëng Israel bukon umat Lôn, dan Ulôn bukon Allah awaknyan."
10 Bansa Israel le jih lagée anoe lam laôt, sampoe hana sanggob teusukat atawa teu itong. Jinoenyoe Allah geupeugah ubak awaknyan, "Gata bukon umat Ulôn," teuma trok saát jih Gobnyan geupeugah ubak awaknyan, "Ulôn kheueh Allah nyang udeb dan gata na kheueh aneuëk-aneuëk Ulôn!"
11 Bansa Yehuda dan bansa Israel geupeusaboh lom. Awaknyan jiangkat sidroe peumimpén, dan awaknyan meukeumang dan makmu lom di nanggroe awaknyan keudroe. Keubit, uroe Yizreel jeuet keu uroe nyang raya!


Chapter 2

1 Sabab nyan meuhôi kheueh seusabe gata deungon nan "Umat Allah" dan "Geunaséh TUHAN."
2 TUHAN meufeureuman, "He aneuëk-aneuëk Ulôn, ma gata bukon peurumoh Lôn le, dan Ulôn bukon lakoe gobnyan. Sabab nyan, jak peukara kheueh jihnyan mangat jihnyan bék le jipeubuet mukah dan bék le jimeujeuhet.
3 Meunyoe jihnyan teutab jimeulunté, Ulôn kusuet peukayan jih mangat jihnyan teulon lagée watée jihnyan lahé lam pluet ma. Teuma Lôn peujeuet jihnyan lagée tanoh nyang tho kreng, dan jihnyan maté sabab grah ngon tho rukueng.
4 Gatanyoe, aneuëk-aneuëk jihnyan, hana Lôn gaséh; gatanyoe lahé nibak inong jeuhet.
5 Ma gata inong jeuhet nyang hana meumalée. Jihnyan jipeugah, 'Ulôn teuma lôn jak ubak geunaséh-geunaséh lôn nyang bri keu ulôn peunajoh dan ié meuneujieb, wol dan ija lineun, minyéuk zaiton dan ié anggô.'
6 Sabab nyan, Ulôn Lôn kuröng jihnyan deungon tamah meuduro, dan Ulôn tôb rot jijak ngon pageue beuton.
7 Jihnyan teuma jitiyeub geunaséh-geunaséh jih, teuma hana trok ubak awaknyan. Jihnyan jimita awaknyan, teuma hana meurumpok deungon awaknyan. Sababnyan laju jipeugah, 'Ulôn ku woe ubak lakoe lôn nyang phon; ilée keuadaan ulôn leubeh gét nibak saát nyoe.'
8 Ma gata hántom na jiaku bahwa Ulôn kheueh nyang bri gandom, anggô, minyéuk zaiton, dan bandum méuh pirak nyang geungui keu jiseumah Baal nyan.
9 Sabab nyan, bak musém keumeukoh Ulôn tarek bandum nyang ka Ulôn bri, nyan kheueh gandom dan anggô, meunan cit deungon wol dan ija lineun nyang Ulôn bri keu peukayan jih.
10 Teuma Lôn peulon jihnyan dikeue banmandum geunaséh jih. Hana meusidroe pih nibak awaknyan nyang hase jipeulheuh jihnyan nibak keukuasaan Lôn.
11 Bandum khanuri nyang jipeuna lé jihnyan Lôn peupiôh, bah kheueh nyan khanuri sithon sigoe meunan cit khanuri sibuleuen sigoe dan uroe-uroe Sabat; Paneuk haba, bandum peurayaan keuagamaan jihnyan.
12 Ulôn Lôn peuhanco bubena bak anggô dan bak-bak ara nyang meunurot jihnyan na kheueh upah peulayanan jihnyan ubak geunaséh jih. Teuma Lôn ubah lampôh-lampôh anggô dan lampôh-lampôh ara jihnyan jeuet keu uteuen; beulatang-beulatang buih jipeurusak.
13 Ulôn Lôn huköm jihnyan sabab uroe-uroe nyang geupeuguna keu jitot keumeunyan keu Baal, dan jimeusolek deungon piasan jih keu jitiyeub geunaséh-geunaséh jihnyan, laju jituwoe ubak Ulôn hana jiingat meubacut pih. Ulôn, TUHAN, ka Lôn peugah haba."
14 TUHAN meufeureuman, "Sabab nibak uroenyan Ulônba jihnyan u padang pasi; disideh jihnyan Lôn bujuk deungon tutoe haba cinta.
15 Lampôh-lampôh anggô jihnyan Lôn pulang ubak jihnyan, dan Pantôn Keususahan Lôn peujeuet keu pintoe peungharapan. Di teumpat nyan jihnyan jisambot Ulôn lagée yoh jihnyan mantong muda, watée jihnyan ban jiteubiet nibak nanggroe Meusé.
16 Laju jihnyan jipeugah Ulôn lakoe droe, dan bukon le Baal jih.
17 Ulôn hana Lôn idhin le keujih jipeugah-peugah nan Baal, sampoe lé ureuëng ramé teuma jituwoe ubak nan nyan.
18 Bak watée nyan Ulôn kupeuna peujanjian deungon meubagoe jeunéh beulatang jeuet lé beulatang-beulatang nyan bék le jipeukaru umat Ulôn. Ulôn kupeupiôh bubena prang dan Ulôn kireueh bube na alat-alat prang di nanggroe umat Ulôn nyan, dan Lôn peujeuet awaknyan udeb deungon aman dan teuntram.
19 He Israel, gata Lôn peujeuet keu peurumoh Lôn, peurumoh nyang sah keu siumu masa. Gata Lôn gaséh dan Lôn cinta sabe; Ulôn kupeubuet jujoe dan seutia.
20 Lagée nyang ka Ulôn peujanji, gata Lôn meukawen, gata ta aku Ulôn sibagoe TUHAN gata keudroe.
21 Bak watée nyan, meunyoe umat Ulôn Israel jimeu doá, doá nyan Lôn deungoe. Di ateueh langét Lôn peutron ujeuen sampoe bumoe jipeuhase gandom, anggô dan minyéuk zaiton.
23 Teuma Lôn peujeuet umat Ulôn udeb seujahteura dan tinggai teutab di nanggroe jih keudroe. Keu awaknyan nyang teuboh nan, 'Nyang Hana Teugaséh' teuma Lôn tunyok bahwa awaknyan Ulôn gaséh, dan keu awaknyan nyang teuboh nan 'Bukon Umat Ulôn' teuma Ulôn peugah 'Gata Umat Ulôn'. Awaknyan teuma jijaweueb lagée nyoe, 'Droeneueh kheueh Allah kamoe.' "


Chapter 3

1 TUHAN meufeureuman ubak ulôn, "Tajak kheueh lom dan tameucinta kheueh ngon sidroe ureuëng inong nyang galak jipeubuet mukah. Cinta kheueh inong nyan lagée Ulôn kucinta ureuëng Israel bahpi awaknyan jitinggai Ulôn dan jiseumah ilah-ilah laén dan galak jipeuseumah kue kismis keu beurala."
2 Dan ulôn bayeue limong blaih péng pirak dan 150 kilo gram gandom beu meuteumé ureuëng inong nyan.
3 Ulôn peugah ubak jih bahwa jihnyan harôh jipreh ulôn keu watée nyang treb. Seudub nyan treb watée jih ureuëng nyan hana jeuet jipeubuet mukah atawa jijak meulunte, dan ulôn pih hana lôn peurab ubak jihnyan.
4 Meunan kheueh hai jihnyan deungon bansa Israel; treb that jihnyan harôh udeb hana meuraja atawa peumimpén, hana keureubeuen atawa tugu-tugu keuramat, hana beurala atawa jimat-jimat nyang jipeugah rahsia masa ukeue.
5 Teuma teuka masa jih bansa Israel jiwoe ubak TUHAN Allah jih keudroe, dan ubak raja jih keudroe nibak keuturonan Nabi Daud. Laju awaknyan teumakot dan horeumat ubak TUHAN, dan jiteurimong beureukat-beureukat nyang geubri.


Chapter 4

1 TUHAN na peukara deungon peunduduek nanggroe nyoe. He Israel, tadeungoe peue nyang geupeugah lé Gobnyan, "Di nanggroe nyoe hana keuseutiaan atawa gaséh sayang, dan peunduduek nanggroe nyoe hana jiaku Ulôn sibagoe Allah.
2 Awaknyan meusumpah teuma hana jipeubuet lagée nyang jimeusumpah nyan; awaknyan meusulet, tukang poh maté gob, ceumucue, dan tukang meumukah. Keujeuhetan meutamah-tamah, dan jipoh maté gob sabena hántom reuda.
3 Sabab nyan nanggroe nyoe jeuet keu nanggroe nyang tho, dan peue-peue mantong nyang udeb disinan maté. Meubagoe jeunéh beulatang nyang na di manyang, darat, dan laôt binasa."
4 TUHAN meufeureuman, "He teungku-teungku imeum, bék kheueh na nyang peusalah atawa beungéh keu umat Lôn, sabab gata kheueh nyang Ulôn peusalah!
5 Uroe malam gata peubuet buet nyang salah, meunan cit teuma deungon dumna nabi. Sabab nyan Ulôn Lôn peubinasa Israel, ma gata.
6 Gata, he teungku-teungku imeum, hana tapakoe keu Ulôn, dan umat Lôn pih hana jipakoe keu Ulôn sampoe awaknyan ceulaka. Gata tatulak ajaran-ajaran Ulôn. Lé sababnyan, Ulôn pih Lôn tulak gata, dan aneuëk-aneuëk gata hana Ulôn angkée sibagoe teungku-teungku imeum Lôn.
7 Seumaken gata meutamah le, seumaken meutamah meudesya gata ubak Ulôn, he teungku-teungku imeum! Sabab nyan keuadaan gata Lôn ubah; gata hana jihoreumat lé gob, teuma jihina.
8 Gata ka jeuet keukaya sabab desya-desya umat Ulôn, sabab nyan kheueh gata meuharab mangat awaknyan teutab meudesya sabe.
9 Dan gata meudeurita saban lagée rakyat! Ulôn Lôn huköm gata nyang sisuai deungon buet gata.
10 Gata tapajoh nibak keureubeuen-keureubeuen nyang jipeuseumah, teuma gata teutab deuk. Gata taseumah dewa-dewa keusuboran, teuma peunduduek gata teutab hana meutamah, sabab gata ka tatinggai Ulôn keu taseumah ilah-ilah nyang laén."
11 TUHAN meufeureuman, "He umat Lôn, bah kheueh anggô nyang treb meunan cit anggô nyang barô ka teupeugadôh keumampuan gata keu gata seumike seucara seuhat.
12 Gata lakée naseuhat ubak sikrak kayée! Sikrak tungkat jipeugah ubak gata peue nyang gata keuneuk teupeue! Gata lagée sidroe binoe nyang jeuet keu lunte; gata tatinggai Ulôn dan tapeujok droe ubak ilah-ilah laén.
13 Bak teumpat-teumpat seumah beurala di pucak-pucak bukét dan gunong, gata tapeuseumah keureubeuen, dan tatot keumeunyan dimiyueb bak-bak kayée raya nyang rampak disideh sabab teumpat nyan reului. Teuma peu kheueh akibat jih? Aneuëk-aneuëk dara gata ka jeuet keu inong lunte dan meulintée-meulintée gata nyang inong ka jimeumukah!
14 Teuma Ulôn hana Lôn huköm buet awaknyan, sabab gata keudroe pi tajak ubak inong-inong lunte nyang meubuet di kuil-kuil, dan meusajan deungon awaknyan gata tapeuseumah keureubeuen keu dewa, keubit beutôi that ungkapan nyoe: 'Bansa nyang hana peungeurtian keuhai Allah bansa nyan reulôh.'
15 He gata ureuëng Israel, gata hana seutia ubak Ulôn! Teuma, Ulôn harab Yehuda hana jipeubuet buet nyang salah nyang sa! Bék meuiébadat di Gilgal atawa di Betel. Bék tameusumpah disinan deumi nan TUHAN nyang udeb.
16 Gata, he ureuëng Israel, lumpah that kreueh ulée! Pakriban Ulôn hase Lôn rabe gata lagée bubiri di blang naleueng?"
17 Umat Israel ka teugoda deungon beurala. Sabab nyan tapeubiyeu kheueh awaknyan.
18 Óh ka lheueh mabök sabab ka le that ji-jieb ié anggô, awaknyan meulunte ban galak droe. Awaknyan leubeh galak teuhina nibak teuhoreumat.
19 Sabab nyan awaknyan gadôh lagée angén ploih. Awaknyan meuteumé malée sabab keureubeuen-keureubeuen nyang awaknyan peuseumah keu dewa-dewa.


Chapter 5

1 TUHAN meufeureuman, "Deungoe kheueh, he bandum teungku imeum! Simak kheueh, he ureuëng Israel! Deungoe kheueh, he ureuëng-ureuëng keuturonan raja! Huköman ka teupeurhot u ateueh gata. Sabab, nyang sibeuna jih gata tameuhakém deungon ade, teuma ka teubalek gata jeuet lagée peurangkab di Mizpa, lagée taron di Gunong Tabor,
2 dan lagée uruek nyang lhok di Sitim. Sabab nyan Ulôn ku huköm gata banmandum!
3 Ulôn Lôn teupeue peue-peue mantong keuhai gata, he Israel! Hana mungken gata söm sapeue-peue nibak Ulôn. Gata taseumah beurala dan hanale seutia ubak Ulôn. Sabab nyan, ureuëng-ureuëng gata hana patot le jiseumah Ulôn."
4 Keujeuhetan nyang jipeubuet lé ureuëng-ureuëng Israel meuakibat jih awaknyan hana hase jiwoe ubak Allah jih keudroe. Awaknyan ka jiteugöm lé jiseumah ubak beurala, sampoe awaknyan ka hanale jipakoe ubak TUHAN.
5 Keusombongan bansa Israel leumah deungon nyata, dan jeuet keubukeuti keusalahan awaknyan. Sabab desya awaknyan meuakibat jih awaknyan meuantok dan reubah, dan bansa Yehuda meusajan rhot deungon awaknyan.
6 Awaknyan jijak mita TUHAN deungon jiba bubiri dan leumô keu keureubeuen, teuma bandum nyan hana meuguna. Sabab TUHAN ka geutinggai awaknyan, dan awaknyan hana hase meurumpok ngon Gobnyan.
7 Awaknyan hana seutia ubak TUHAN; aneuëk-aneuëk awaknyan bukon aneuëk-aneuëk Gobnyan. Sabab nyan, hana treb le awaknyan teupeubinasa meusajan deungon ladang-ladang jih keudroe.
8 Yueb kheueh beureuguih di Gibea! Tapeumeusu tanda teutawök jak muprang di Rama! Peumaklum tanda dumpék prang di Betel! Jak, he ureuëng Benyamin, maju kheueh u mideuen prang!
9 Israel binasa, sabab ka trok uroe jih keu teuhuköm awaknyan. Deungoe kheueh, he rakyat Israel, hainyan pasti teujadi.
10 TUHAN meufeureuman, "Ulôn beungéh sabab peumimpén-peumimpén Yehuda ka jihéuntam Israel dan jireubot tanoh awaknyan. Sabab nyan Ulôn Lôn peurhot huköman u ateueh awaknyan lagée ié raya.
11 Israel jiteugon; awaknyan ka gadôh hak ateueh tanoh droe, sabab gobnyan jimeukreueh jilakée tulông ubak nyang sibeuna jih hana hase jitulông awaknyan.
12 Nyan kheueh jeuet Ulôn keuneuk peuhanco bansa Israel, dan Lôn peubinasa ureuëng Yehuda.
13 Bansa Israel dan bansa Yehuda jisadar ubak keuadaan gobnyan nyang brok, teuma Israel laju jijak u Asyur keu jilakée tulông ubak raja agong. Teuma rajanyan hana hase jitulông atawa jipeugét keuadaan awaknyan.
14 Lagée singa buih meurungköm, meunan kheueh Ulôn Lôn seurang ureuëng Israel dan Yehuda. Ulôn keudroe nyang leumeueh dan priek-priek awaknyan, óh lheuehnyan laju Ulôn tinggai disinan. Meunyoe Ulôn nyang bahue awaknyan mangat jijak, hana meusidroe nyang hase peulheueh awaknyan.
15 Umat Ulôn Lôn tinggai sampoe awaknyan kaseb meudeurita sabab desya-desya jih keudroe, laju jijak mita Ulôn. Mungken lam peundeuritaan jihnyan, awaknyan ji-useuha jak meurumpok ngon Ulôn."


Chapter 6

1 Ureuëng-ureuëng Israel jipeugah, "Jak geutanyoe tawoe ubak TUHAN. Gobnyan kheueh nyang peusakét geutanyoe, teuma Gobnyan cit nyang peupuléh, Gobnyan nyang peuluka, teuma Gobnyan cit nyang balot luka-luka geutanyoe.
2 Lam dua atawa lhée uroe nyoe Gobnyan geupeupuléh tanyoe, dan geutanyoe udeb didalam lindongan Gobnyan.
3 Sabab nyan jak kheueh geutanyoe ta useuha beubeutôi-beutôi taturi ubak TUHAN. Gobnyan pasti teuka ubak geutanyoe lagée teuka mata uroe beungoh, dan lagée ujeuen tron nyang basah bumoe bak akhé musém ujeuen."
4 Teuma TUHAN meufeureuman, "He Israel dan Yehuda! Peue nyang harôh Lôn peugét keu gata? Cinta gata ubak Ulôn bagaih gadôh lagée sagob atawa iémbon di beungoh uroe.
5 Nyang kheueh sabab jih Ulôn kirém nabi-nabi Lôn keu jipeusampoe ubak gata peue nyang ka Ulôn peuputôh bahwa gata harôh teuhuköm dan teupeubinasa. Nyang Ulôn lakée ubak gata nyata dan trang;
6 Ulôn leubeh galak gata taturi Ulôn dan sabe tagaséh keu Ulôn, nibak gata tatot dan tapeuseumah keureubeuen ubak Ulôn.
7 Teuma lagée di Adam, gata taiengkeue janji gata ubak Ulôn.
8 Gilead na kheueh banda nyang peunoh deungon peujahat dan tukang poh maté.
9 Teungku-teungku imeum di banda nyan lagée saboh kawan peurampok nyang jilinteueng ureuëng nyang jak. Nibak jalan nyang teutuju u teumpat suci di Sikhem pi jilinteueng dan jipoh gob sampoe maté! Bandum buet nyang jeuhet nyan awaknyan peubuet deungon jisaja.
10 Di Israel na Ulôn ngieng sapeue-peue nyang lumpah teumakot; umat Ulôn jipeukutoe droe jihnyan deungon jiseumah beurala.
11 Keuhai gata, he ureuëng Yehuda, Ulôn ka Lôn peuteutab watée jih keu Lôn huköm gata sabab buet nyang gata peubuet."


Chapter 7

1 TUHAN meufeureuman, "Tieb-tieb na niet keuneuk Lôn peupuléh umat Ulôn Israel dan Lôn peugét beujroh keuadaan awaknyan. Teuma nyang Ulôn ngieng na kheueh keujeuhetan-keujeuhetan dan desya-desya awaknyan. Awaknyan saléng teumipée, awaknyan jitamong lam rumoh gob jijak ceumucue, dan awaknyan meurampok bak rot-rot ueh raya.
2 Hana teupike meubacut pih lam pikeran awaknyan bahwa Ulôn Lôn ingat bandum buet nyang jeuhet nyan. Teuma desya-desya awaknyan ka peunoh dalam tuboh awaknyan deungon nyata deuh Ulôn kalon."
3 TUHAN meufeureuman, "Deungon tipée daya dan buet-buet nyang jeuhet rakyat ji useuha jipeugalak até raja dan peujabat-peujabat peumeurintah.
4 Awaknyan bandum peukhianat dan ureuëng nyang hana seutia. Banci awaknyan lagée apui lam sinungkée nyang hana jiproh lé ureuëng peugét ruti sigohlom teupông ruti nyang jilawok nyan siab keu teutot.
5 Bak uroe khanuri raja, awaknyan jipeujeuet raja dan peujabat-peujabat gobnyan ji-jieb ié anggô sampoe mabök dan jipeubuet hai-hai nyang bangai. Akhé jih raja meuseunang-seunang deungon bandum ureuëng peukhianat nyan.
6 Lagée apui lam sinungkée meunan kheueh niet jeuhet dan beungéh awaknyan lagée ngeue apui nyang hu simalam suntok, dan óh beungoh uroe hu apui nyan ka jeuet keu apui hu nyang keubit mubahya.
7 Watée nafeusu beungéh nyan, awaknyan laju jipeumaté peumimpén-peumimpén droe jih. Bandum raja awaknyan ka jipoh maté meuturot-turot. Teuma bahpi lagée nyan keuadaan ka lumpah that brok, dan meusidroepi hana meudoá ubak Ulôn keu jilakée tulông."
8 TUHAN meufeureuman, "Bansa Israel meusikutu ngon bansa-bansa nyang na di sikeulileng jihnyan, deungon nyan awaknyan ka jeuet lagée ruti nyang masak siblaih.
9 Awaknyan hana sadar bahwa deungon meusikutu deungon bansa-bansa nyan kheueh, jiteuka gadôh teunaga awaknyan. Akhé jih riwayat awaknyan ka rab that, teuma awaknyan teutab hana jiteupeue.
10 Keuangkohan ureuëng Israel leumah deungon nyata dan jeuet keubukeuti keusalahan bahwa awaknyan meusalah. Bahpi bandum nyan ka teujadi, awaknyan hana cit jimita Ulôn atawa jiwoe ubak Lôn, TUHAN Allah awaknyan.
11 Israel keudeh keunoe lagée cicém mirah pati nyang bangai. Phon-phon ureuëng-ureuëng jih jilakée tulông ubak Meusé, óh lheueh nyan awaknyan jiplueng ubak Asyur!
12 Teuma tieb-tieb watée awaknyan jijak, Ulôn kuteun jareng dan Lôn drob awaknyan lagée sidroe ureuëng jidrob cicém. Ulôn Lôn huköm awaknyan sabab buet-buet nyang jeuhet nyang awaknyan peubuet ka Lôn teupeue.
13 Cilaka awaknyan, sabab awaknyan ka jitinggai Ulôn. Awaknyan hanco sabab ka jilawan Ulôn. Ulôn na niet keuneuk peuseulamat awaknyan, teuma iébadat awaknyan ubak Ulôn pura-pura nyang hana meuguna.
14 Awaknyan hana bit-bit meudoá ubak Ulôn. Meunyoe awaknyan meudoá, awaknyan jiseumpom droe ateueh teumpat éh, dan geumeuba-e lagée nyang jipeubuet lé ureuëng-ureuëng nyang hana peucaya ubak Ulôn. Meunyoe awaknyan jimeudoá keu jilakée gandom dan anggô, awaknyan jipeuluka droe lagée nyang jipeubuet lé ureuëng-ureuëng nyang seumah dewa. Awaknyan bit-bit that jilawan Ulôn!
15 Bahpi Ulôn nyang peurayeuk dan nyang peuteuga awaknyan, teuma awaknyan meukomplot jilawan Ulôn.
16 Awaknyan teutab hana jipiôh jiseutôt dewa-dewa nyang meubacutpi hana meukuasa. Awaknyan hana hase teuandal lagée aneuëk panah nyang kendur. Peumimpén-peumimpén awaknyan jipeugah haba deungon sombong, sabab nyan awaknyan maté diujong peudeueng, dan jipeukém lé ureuëng-ureuëng Meusé."


Chapter 8

1 TUHAN meufeureuman, "Peumeusu laju tanda bahya! Musoh jijak prang nanggroe Ulôn lagée kleueng jiseumama! Umat Ulôn ka iengkeue peujanjian Lôn deungon awaknyan, dan jilawan ajaran-ajaran nyang Lôn peurunoe.
2 Bahpi awaknyan jipeugah Ulôn nyoe Allah awaknyan, dan jipeugah bahwa awaknyan na kheueh umat Lôn nyang jituri keu Ulôn,
3 teuma awaknyan hana jitem teurimong peue nyang gét. Lé sabab nyan awaknyan jipeucrok lé musoh-musoh jih keudroe.
4 Umat Ulôn jipiléh raja hana jitanyong ubak Ulôn leubeh dilée. Awaknyan jibaiát peumimpén hana jilakée situju Ulôn leubeh dilée. Awaknyan jicök méuh dan pirak atra jih keudroe laju jipeugét patong beurala nyang meuakibat jih keuhancoran nibak awaknyan keudroe.
5 Ulôn banci keu leumô méuh nyang jiseumah lé peunduduek Samaria. Ulôn beungéh lumpah na keu awaknyan. Sampoe ánpajan awaknyan jipeukutoe droe keudroe deungon jiseumah beurala?
6 Leumô méuh nyang jiseumah di Samaria nyan na kheueh peuneugét pande-pande méuh Israel! Nyan bukon Allah, dan harôh teupeuhanco!
7 Umat Ulôn jitabu angén teuma jihnyan harôh jipot badée! Ladang gandom awaknyan hán jitem kunéng, teuma hana teupeuhase teupông keu peunajoh. Teuma meunyoe ladang nyan jitem cit kunéng, teuma gandom jihnyan jipeuhabéh lé bansa-bansa laén.
8 Lagée beulangöng nyang beukah, meunan kheueh Israel hana le meuguna, dan ka jeuet keu bansa nyang biasa lagée bansa-bansa laén.
9 Lagée keuleudée kleuet nyang meulawan, meunan kheueh ureuëng-ureuëng Israel jiseutôt kheun até jih keudroe. Awaknyan jilakée bantu ubak Asyur, dan jibloe syedara ubak bansa-bansa laén.
10 Teuma lagée nyan Ulôn Lôn peusapat dan Lôn huköm awaknyan. Hana treb le awaknyan apoh apah sabab sakét hanapat peugah, meunyoe awaknyan jitindéeh lé raja Asyur.
11 Maken jai miseubah nyang jipeudong lé ureuëng Israel keu teusampôh desya, maken le teuma teumpat keu jipeubuet desya.
12 Ulôn teumuléh peulajaran lumpah le keu awaknyan, teuma bandum nyan awaknyan tulak sabab jianggab hana sangkot paot deungon awaknyan.
13 Awaknyan galak jipeuseumah keureubeuen keu Ulôn, dan jipajoh sie keureubeuen nyan, teuma di Ulôn, TUHAN, hana galak deungon keureubeuen-keureubeuen nyan. Saátnyoe Lôn peuingat desya awaknyan dan Lôn huköm awaknyan ngon sabab desya-desya nyan; Ulôn Lôn kirém lom awaknyan u nanggroe Meusé!
14 Ureuëng Israel jipeudong meuligoe-meuligoe, teuma awaknyan tuwoe ubak peuncebta jih keudroe. Ureuëng Yehuda jipeule banda-banda meukuta, teuma Ulôn Lôn peutron apui mangat teutot habéh bubena meuligoe dan banda-banda awaknyan."


Chapter 9

1 He bansa Israel, bék kheueh tapeuraya le uroe-uroe raya gata lagée bansa-bansa laén. Gata ka tatinggai Allah gata dan hana seutia ubak Gobnyan. Di tieb-tieb teumpat ceumeuloe aneuk gandom, gata tapeubloe droe sibagoe inong lunte ubak Dewa Baal, dan galak tateurimong gandom nyang gata anggab sibagoe upah dewa nyan keu gata!
2 Teuma hana treb le gata kureueng gandom dan minyéuk zaiton, dan anggô pi teuma habéh.
3 Gata, he bansa Israel, hana teutab tinggai bak tanoh nyang geubri lé TUHAN keu gata. Gata harôh tagisa u nanggroe Meusé, dan harôh tapajoh peunajoh hareuem di Asyur.
4 Di nanggroe-nanggroe nyan gata hana meuteumé tapeuseumah anggô dan keureubeuen beulatang keuteupeu galak até TUHAN. Tieb-tieb ureuëng nyang pajoh peunajoh gata jeuet keukutoe, lagée peunajoh nyang teupajoh watée upacara teupeutron bak jrat ureuëng maté. Peunajoh nyan meuguna keu teupeutroe pruet gata; meubacutpi hana nyang teuba u Baét TUHAN keu teupeuseumah disinan.
5 Bak uroe-uroe raya agama keu teuhoreumat TUHAN, gata hana hase tapeubuet sapeue keu teupeuraya uroe nyan.
6 Meunyoe bala ka teuka, dan gata teuba u nanggroe laén, teuma nyang na tinggai di teungoh gata jigumpôi lé ureuëng-ureuëng Meusé keu jipoh maté dan jikubu di Memfis! Naleueng dan duroe jitimoh mangat jeuet teutôb teumpat-teumpat eunciek rumoh gata dan barang-barang pirak gata nyang meuhareuga.
7 Ka trok watée jih keu teuhuköm, watée keu jiteurimong balasan ateueh bandum nyang ka jipeubuet. Israel teuma jirasa hai nyan! Gata tapeugah, "Nabi nyang jikuasa lé roh nyoe na kheueh nabi bangai! Pungoe gobnyan!" Gata tapeugah lagée nyan sabab gata banci lumpah na ubak ulôn dan desya gata lumpah raya.
8 Po teu Allah geukirém ulôn sibagoe nabi keu teupeuingat gata umat Gobnyan, teuma ho-ho nyang ulôn jak, gata tauseuha keuneuk carueh ulôn lagée cicém. Bak nanggroe atra Po teu Allah keudroe, kamoe bubena nabi jicok keumusoh lé rakyat ba.
9 Lumpah that jeuhet meuneubuet gata lagée nyang ka lheueh jipeubuet lé gob di Gibea. Po teu Allah geupeuingat keusalahan gata, dan geuhuköm gata sabab desya gata.
10 TUHAN meufeureuman, "Watée Ulôn phon-phon that meurumpok ngon Israel, até Ulôn lumpah harök lagée ureuëng meuteumé boh anggô dipadang pasi. Watée Ulôn phon-phon Ulôn ngieng indatu gata, Ulôn galak lagée ureuëng meuteumé hase phon that nibak boh ara. Teuma, watée awaknyan jijak ubak Gunong Peor, awaknyan jipeuphon seumah Baal, sampoe awaknyan ka jeuet keukutoe lagée dewa nyang awaknyan cinta nyan.
11 Keumeugahan Israel jipupo gadôh lagée cicém; hana nyang raya pruet, dan hana aneuëk-aneuëk manyak nyang jipeulahé.
12 Teuma bahpi na aneuëk-aneuëk manyak nyang jipeulahé dan jipeurayeuk, awaknyan Ulôn cok; hana meusidroepi nyang Lôn peubiyeu udeb. Cilaka kheueh gata, he bansa Israel, meunyoe Ulôn ka Lôn tinggai gata!"
13 TUHAN, deuh ulôn ngieng aneuëk-aneuëk manyak awaknyan jitiyeub-tiyeub dan jipoh maté.
14 Peu kheueh nyang harôh ulôn lakée ubak gata keu ureuëng-ureuëng nyan? Tapeujeuet kheueh ureuëng-ureuëng inong awaknyan keu inong balui! Tapeujeuet kheueh awaknyan bubék jeuet jipeumom aneuëk manyak jih keudroe!
15 TUHAN meufeureuman, "Bandum keujeuhetan awaknyan phon di Gilgal. Disinan kheueh phon that Ulôn banci keu awaknyan. Sabab buet awaknyan nyang jeuhet, Ulôn Lôn use awaknyan nibak nanggroe Lôn nyoe. Ulôn hana Lôn gaséh le keu awaknyan; bandum peumimpén awaknyan ka jilawan Ulôn.
16 Ureuëng Israel Lôn huköm. Awaknyan jeuet lagée seunaman nyang hana muboh, dan nyang ukeue-ukeue jih ka habéh tho. Awaknyan hana meu aneuëk; teuma bahpi awaknyan na aneuëk, Ulôn poh maté aneuëk-aneuëk nyang jipeulahé lé awaknyan."
17 Po teu Allah nyang lôn peutimang nyan teuma geutulak umat Gobnyan, sabab awaknyan hana jitem deungoe Gobnyan. Awaknyan jijak meurawoh lamkawan bansa-bansa.


Chapter 10

1 Israel lagée bak anggô nyang jimuboh le. Seumaken meutamah keukayaan jih, seumaken le teuma miseubah nyang jipeudong. Seumaken makmu, seumaken gét teuma jipeugot tugu-tugu beurala nyang jiseumah.
2 Ureuëng-ureuëng nyang até jih brok, bak saátnyoe harôh jitanggong akibat desya nyang ka jipeuna. Po teu Allah geupeuhanco miseubah awaknyan, dan geureuloh bandum tugu-tugu beurala awaknyan.
3 Hana treb le awaknyan jipeugah, "Geutanyoe hana raja sabab geutanyoe hana tatakot ubak TUHAN. Keupeue guna jih sidroe raja keu geutanyoe?"
4 Awaknyan raya haba dan jipeugét janji peuleusu lom ji-ikat janji nyang hana meuguna. Huköm jiputa balek deungon nyan keuhana adelan meuraja lela lagée jitimoh seunaman meuracon bak ladang nyang na teucatok.
5 Peunduduek banda Samaria teumakot; awaknyan dan teungku-teungku imeum nyang jilayani leumô méuh di Betel nyan seudeh dan jimo ba-e sabab banmandum keumeugahan beurala awaknyan ka habéh hanco.
6 Beurala nyan teuangkot u Asyur sibagoe hadiah ubak raja agong. Israel jiseutôt reuncana nyang teupeujeuet awaknyan meuteumé malée dan teuhina.
7 Samaria hanco dan raja jih jiba lagée sikrak kayée nyang jipeuhanyöt lé ié.
8 Kuil-kuil dibukét Betel teumpat ureuëng Israel jiseumah beurala, geupeuhanco. Duro dan naleueng timoh bak miseubah awaknyan. Laju awaknyan jidumpék ubak gunong-gunong, "Tatôb kheueh kamoe!" dan ubak bukét-bukét, "Timpok kheueh ateueh kamoe!"
9 TUHAN meufeureuman, "Seumeunjak keujadian di Gibea, ureuëng Israel gohlom cit jipiôh jipeubuet desya jilawan Ulôn. Sabab nyan di Gibea awaknyan Lôn peurhot cit deungon prang.
10 Ulôn Lôn prang ureuëng-ureuëng nyang meudesya nyan, dan Lôn huköm awaknyan. Bansa-bansa laén meusikutu jilawan awaknyan, dan awaknyan geuhuköm sabab desya awaknyan nyang le nyan.
11 Yoh masa ilée Israel lagée leumô muda nyang teulatih deungon gét, dan nyang galak jiloe boh gandom. Ulôn hana peureulée Lôn pasang gandar nibak bahoe jih nyang gagah nyan. Teuma bak saát nyoe Ulôn ka Lôn peuputôh keu Lôn paksa awaknyan jikeureuja brat. Yehuda Ulôn yue meu ué, dan Israel Ulôn yue meugarée.
12 Ulôn peugah, 'He Israel! Jak puga kheueh ladang barô keu droe gata, tabu kheueh bijéh keuadelan, dan tapot kheueh beureukat nyang jipeuhase lé keusunggohan cinta gata ubak Ulôn. Sabab, ka watée jih gata mita Ulôn, TUHAN gata. Ulôn teuka dan Lôn peutron beureukat ubak gata lagée ié ujeuen.'
13 Teuma di gata tapeubuet nyang seubalek jih; nyang gata useuha na kheueh keujeuhetan, dan tapot nyang hana ade. Gata ka tapajoh boh-boh nyang jipeuhase lé sulet gata." TUHAN meufeureuman lom, "He bansa Israel, sabab gata tapeubangga ubak geuritan-geuritan prang nyang na nibak gata dan sidadu-sidadu gata nyang le,
14 dan rakyat gata rhot lé muprang, dan bandum kuta gata geupeuhanco. Keuadaan jih teujadi lagée bak uroe Raja Salman geupeubinasa banda Bet-Arbel dimideuen prang, dan geugileng bubena ma dan aneuëk-aneuëk jihnyan.
15 Nyan kheueh nyang teujadi nibak gata, he peunduduek Betel, sabab gata ka tapeubuet keujeuhetan nyang raya. Bak watée mata uroe beungoh teungoh jiteubiet, watée nyan cit óh muprang ka teupeuphon, raja gata maté."


Chapter 11

1 TUHAN meufeureuman, "Ulôn kusayang Israel yoh jih mantong ubit, Lôn tawök aneuëk Ulôn nyan jeut jiteubiet lam nanggroe Meusé.
2 Teuma seumaken Lôn hôi aneuëk Ulôn nyan seumaken jipeujiôh Lôn. Jihnyan jiba keureubeuen dan jitot keumeunyan keu Baal dan dewa-dewa nyang laén.
3 Padahai Ulôn kheueh nyang peurunoe Israel beujeuet jijak, dan nyang wa jihnyan deungon gaséh sayang. Ulôn kheueh nyang rawat jihnyan teuma jihnyan hana jitem aku.
4 Deungon sigala gaséh sayang Lôn, Ulôn peurab jihnyan ubak Ulôn. Banmandum peundeuritaan jihnyan Ulôn peuphui, dan deungon murah até Ulôn bri makheun.
5 Ureuëng-ureuëng Israel nyan hana jitem woe ubak Ulôn, sabab nyan awaknyan harôh jigisa u nanggroe Meusé, dan bansa Asyur nyang peurintah ateueh jihnyan.
6 Muprang nyang gunjak teuka sampoe u dalam banda-banda awaknyan, babah-babah pintoe geureubang jipeurusak, dan umat Ulôn jipeubinasa. Hai nyan teujadi sabab awaknyan ka jiseutôt kheun até jih keudroe,
7 dan jimeukreueh jikeuneuk tinggai Ulôn. Teuma awaknyan keunong teugöm, teuma hana nyang peubeubaih awaknyan bahpi awaknyan jikliek jilakée tulông."
8 TUHAN meufeureuman, "He Israel, hana mungken gata Lôn peubiyeu atawa Ulôn tinggai. Peu kheueh mungken gata Ulôn peuhabéh lagée Adma? Atawa Ulôn peusaneut lagée Zeboim? Hana trok até Lôn peubuet nyang lagée nyan, sabab cinta Ulôn lumpah that raya keu gata!
9 Gata hana Lôn huköm watée Ulôn teungoh beungéh; gata hana Lôn peuhanco le. Sabab Ulôn Allah, kon manusia. Ulôn, Nyang Kudus, na meusajan gata, dan hana Ulôn beungéh le keu gata."
10 TUHAN meufeureuman, "Umat Ulôn jiseutôt Ulôn meunyoe Ulôn teumauém lagée su singa sampoe habéh yo musoh awaknyan. Umat Ulôn bagaih-bagaih teuka nibak siblaih ubarat keu jiseumah Ulôn.
11 Nibak nanggroe Meusé awaknyan bagaih that teuka lagée cicém po, dan di Asyur lagée kawan mirah pati. Laju awaknyan Ulôn ba lom u rumoh jih keudroe. Ulôn, TUHAN, nyang peugah haba."


Chapter 12

1 TUHAN meufeureuman, "Bansa Israel jikeulileng Ulôn deungon meusulet dan tipée daya; bansa Yehuda teutab jilawan Ulôn, Allah Nyang Kudus dan seutia.
2 Peue mantong nyang jipeubuet lé ureuëng Israel phon beungoh trok án malam hana meuguna dan sifeuet jih jipeuhanco lagée angén timu. Keucurangan dan keukeujaman meutamah-tamah lamkawan awaknyan. Awaknyan jipeugét janji deungon Asyur dan jiba minyéuk u nanggroe Meusé sibagoe tanda meusahabat."
3 TUHAN na peukara ngon bansa Yehuda; Gobnyan cit nyang huköm Israel sabab peurangoe awaknyan keudroe. Gobnyan geubalaih buet awaknyan.
4 Phon mantong lam pruet ma, Nabi Yakub indatu awaknyan ka jiseurobot Esau syedara jih nyang meukeumbeue; dan óh ka rayeuk, Nabi Yakub meukulo-kulo ngon Po teu Allah.
5 Gobnyan meukulo meugasui deungon sidroe malaikat, dan gobnyan meunang. Laju gobnyan geumo dan geulakée beureukat. Óh lheuehnyan di Betel, Po teu Allah geujak ubak Nabi Yakub indatu geutanyoe nyan, dan geumariet deungon gobnyan.
6 Po teu Allah nyan na kheueh TUHAN Nyang Mahakuasa. Nan Gobnyan na kheueh TUHAN. Deungon nan nyan kheueh Gobnyan lakée ureuëng iébadat ubak Gobnyan.
7 Sabab nyan, he gata keuturonan Nabi Yakub, peucaya kheueh ubak Allah gata dan tawoe kheueh ubak Gobnyan. Udeb kheueh deungon peunoh gaséh dan keujujoran, dan tapreh kheueh deungon saba sampoe Allah gata meutindak.
8 TUHAN meufeureuman ubak bansa Israel, "Gata ilat lagée ureuëng Kanaan; ureuëng-ureuëng meukat dan gata galak tapeungét langganan teuh keudroe deungon timbangan nyang hana beuna.
9 'Geutanyoe bak saátnyoe ka kaya,' kheun awaknyan. 'Geutanyoe meulaba! Hana meusidroe pih jeuet jitudoh bahwa keukayaan nyang ta gumpôi nyoe seucara hana jujoe.'
10 Teuma Ulôn, TUHAN Allah gata, nyang ba gata teupeuteubiet lam nanggroe Meusé, Lôn peujeuet gata tinggai lom bak khimah-khimah lagée yoh masa ilée watée Ulôn jak meurumpok deungon gata di padang-padang pasi.
11 Ulôn ka Lôn peugah haba ubak nabi-nabi, dan Ulôn bri keumalon nyang le keu awaknyan. Meulalu awaknyan ka Ulôn bri reuncana-reuncana Ulôn keu gata, umat Ulôn,
12 bahpi lagée nyan mantong na cit nyang seumah beurala di Gilead, dan jipeuseumah leumô ateueh miseubah di Gilgal. Teuma awaknyan nyang seumah beurala nyan maté, dan miseubah-miseubah di Gilgal nyan jeuet keuseunamon batée di ladang-ladang."
13 Nabi Yakub indatu geutanyoe geuplueng u Mesopotamia, dan jeuet meuteumé geumeukawen disinan, laju gobnyan geupeuhamba droe ubak ureuëng di nanggroe nyan dan sira geurabe bubiri-bubiri awaknyan.
14 Laju TUHAN geukirém sidroe nabi mangat jiba ureuëng Israel jeuet jiteubiet nibak jiboh keunamiet di nanggroe Meusé, dan geukawai awaknyan.
15 Ureuëng nyan ka jipeujeuet TUHAN beungéh raya; awaknyan patot teuhuköm sabab buet awaknyan nyang jeuhet nyan. TUHAN teuma geuhuköm awaknyan lé sabab awaknyan ureuëng laén pih ka jihina Gobnyan.


Chapter 13

1 Yoh masa ilée sukée Efraim teuhoreumat sampoe meunyoe na peurintah nibak sukée nyan, sukée-sukée laén nyang na di Israel teumakot that. Teuma sukée Efraim raya that desya lé sabab jiseumah dewa Baal, sabab nyan awaknyan teuma teusampôh.
2 Sampoe án saátnyoe ureuëng-ureuëng nyan na di Efraim nyan hana putôh jipeubuet desya; awaknyan jipeugét patong-patong pirak keu teuseumah -- patong nyang jireuncana lé akai manusia dan ji uke lé jaroe manusia. Awaknyan jipeugah, "Peuseumah laju keureubeuen ubak patong-patong nyoe!" Bit gura that, manusia jicöm patong aneuëk leumô!
3 Lé sabab nyan ureuëng-ureuëng nyan teusampôh lagée sagob atawa iémbon di beungoh uroe. Awaknyan lagée abée jumpung nyang jiyueb lé angén di teumpat teloe aneuk gandom, dan lagée asab nyang teubiet nibak sulie.
4 TUHAN meufeureuman, "Ulôn kheueh TUHAN Allah gata, nyang ba gata peuteubiet nibak nanggroe Meusé. Gata hana le Allah teuh nyang laén seulaén Ulôn. Ulôn kheueh sidroe kong nyang hase peuseulamat gata.
5 Bak tanoh nyang tho di padang pasi, Ulôn kheueh nyang jaga gata.
6 Teuma óh ka lheueh gata kana di nanggroe nyang jroh, dan gata troe dan puih até, gata ka jeuet keu ureuëng angkôh dan ka tuwoe ubak Ulôn.
7 Lé sabab nyan Ulôn ku rungköm gata lagée singa teumeugöm. Lagée rimueng tutul Ulôn kulinteueng gata bak rot ueh raya.
8 Ulôn Lôn seurang gata lagée cagée nyang ka gadôh aneuëk. Ulôn Lôn priek-priek gata. Lagée singa Ulôn Lôn teugöm gata bak teumpat gata, dan lagée beulatang kleut Ulôn Lôn priek-priek gata.
9 Ulôn kupeuhanco gata, he bansa Israel! Dan soe kheueh nyang hase tulông gata?
10 Gata talakée raja dan peumimpén, teuma dipat kheueh awaknyan bandum jinoenyoe? Peu kheueh hase awaknyan jipeuseulamat rakyat gata?
11 Deungon beungéh Ulôn jok raja keu gata, dan deungon geungéuen Ulôn tarek awaknyan lom teuma."
12 TUHAN meufeureuman, "Desya dan keusalahan Israel ka teucetet, dan catetan nyan ka Lôn keubah.
13 Israel na watée keu udeb, teuma awaknyan bangai lumpah na sampoe hana jicok keuseumpatan nyan. Jihnyan lagée aneuëk manyak nyang sikeujab teuk lahé teuma hánjitem teubiet lam pluet ma.
14 Bansa nyoe hana Lôn peuseulamat nibak kuasa donya ureuëng maté. He maté, sipreuk kheueh laju bala gata! Tapeubuet kheueh buet gata nyang hanco dan meubahya nyan! Ulôn hanale jimat gaséh keu bansa nyoe.
15 Bahpi Israel makmu lagée naleueng nyang subô, teuma Ulôn kukirém angén timu nyang seu uem di padang pasi. Angén nyan jipeutho bandum mata ié dan mon-mon meumata, sampoe teusampôh kheueh bandum nyang meuhareuga.


Chapter 14

1 Samaria harôh teuhuköm sabab jibeurontak jilawan Ulôn. Rakyat jihnyan maté dimideuen prang; aneuëk-aneuëk manyak awaknyan teugileng, dan ureuëng-ureuëng inong nyang mume teuplah pruet jih."
2 Tawoe kheueh ubak TUHAN Allah gata, he bansa Israel! Lé sabab desya gata ka meusabab gata meugantoh dan reubah.
3 Tawoe kheueh ubak TUHAN dan tapeusampoe kheueh doá nyoe sibagoe peuseumahan gata keu Gobnyan, "TUHAN, peuamphon bubena desya kamoe, dan teurimong kheueh doá kamoe nyoe, dan kamoe teuma kamoe pujoe Droeneueh lagée nyang ka kamoe meujanji.
4 Asyur hana hase jipeuseulamat kamoe, dan guda prang hana sanggob jitulông kamoe. Kamoe hana kamoe peugah le ubak patong-patong nyang kamoe peugét keudroe bahwa patong nyan Allah kamoe. Ya TUHAN, Droeneueh neugaséh ubak ureuëng-ureuëng nyang hana ubak soe nyang jeuet awaknyan meubangga."
5 TUHAN meufeureuman, "Umat Ulôn nyang meunyeuleweng, Ulôn cok lom dan Ulôn gaséh sipeunoh até; awaknyan hana Ulôn beungéh le.
6 Ubak ureuëng Israel Ulôn lagée ujeuen nyang peubasah tanoh nyang ka tho kreng. Awaknyan teuma meukeumang lagée bungöng keupula dan lagée bak ceumara nyang lhok ukeue.
7 Awaknyan udeb dan meutamah lagée seunaman nyang meutarok dumpat nyang na, lagée bak zaiton nyang ceudah rupa mangat bée lagée bak ceumara!
8 Awaknyan jiwoe ubak Ulôn dan tinggai lam lindongan Lôn. Deungon bagaih awaknyan meutamah makmu, lagée gandom nyang timoh bak ladang nyang subô dan lagée bak anggô. Lagée ié anggô Libanon nan awaknyan meutamah meusyeuhu.
9 Ureuëng Israel geuböih bubena patong beurala jih keudroe; awaknyan Ulôn peulara dan Ulôn kabui banmandum doá. Lagée bak kayée nyang sabe jimeuôn rampak, Ulôn Lôn peupayong awaknyan. Ulôn kheueh punca banmandum beureukat awaknyan. Ulôn, TUHAN, ka Lôn peugah haba."
10 Seumoga bandum ureuëng nyang bijaksana jipeuphom peue-peue mantong nyang teutuléh lam nyoe, dan jisimak beujroh-jroh. Peutunyok-peutunyok nibak TUHAN na kheueh beuna, dan ureuëng nyang saleh udeb meunurot peutunyok nyan. Teuma ureuëng meudesya jipeujayéh mantong peue-peue nyang na teutuléh nyan sampoe awaknyan meugantoh dan reubah.