Mikha

1 2 3 4 5 6 7


Chapter 1

1 Mikha asai geuh di banda ubit nyang nan jih Moresyet. Bak masa nanggroe Yehuda geupeurintah meuturot-turot lé Raja Yotam, Ahas dan Hizkia, Mikha geuteurimong peusan TUHAN keuhai Samaria dan Yerusalem.
2 Deungoe kheueh he bansa-bansa! Simak kheueh, he peunduduek bansaboh donya! TUHAN Nyang Mahamanyang teuka sibagoe saksi geulawan gata bube nyang na! Deungoe kheueh Gobnyan peugah haba di Baét Gobnyan nyang suci di Syeuruga.
3 Gobnyan geutron nibak teumpat Geuh nyang suci dan geujak-jak di ateueh pucak-pucak gunong di bumoe.
4 Gunong-gunong hanco dimiyueb tapak gaki Geuh lagée lilen lam apui nyang teungoh hu; tanoh nyan teupeurô jitamong lam barieh, lagée ié di ateueh bukét ji ile u miyueb.
5 Bandum nyan teujadi sabab ureuëng Israel meudesya dan beurontak ubak Allah. Soe kheueh nyang jeuet keu sabab Israel meudesya? Bukon kheueh Samaria ma banda gobnyan keudroe? Soe kheueh nyang peusabab Yehuda geuseumah beurala? Peu kheueh bukon Yerusalem keudroe?
6 Nyang kheueh sabab jih TUHAN meufeureuman, "Ulôn Lôn peujeuet Samaria sinamon rungka di padang, dan teumpat manusia pula bak anggô. Rungka-rungka banda nyang reuloh nyan Ulôn tiek lam barieh pantôn, dan sandi-sandi rungka nyan Ulôn kueh teuma.
7 Patong-patong jihnyan nyang meyuém Lôn peuhanco, dan tieb-tieb beunda nyang teujôk ubak ureuëng-ureuëng inong nyang meutugaih bak kuil Ulôn tot, dan bandum beurala nyang na disinan Lôn peubinasa. Barang-barang nyan na kheueh hase iébadat ubak dewa keusuboran. Jinoe bandum nyan jiangkot lé musoh-musoh keu peuseumahan syukoe ubak dewa-dewa jihnyan."
8 Sabab nyan kheueh, ulôn, si Mikha, lumpah peudeuh até dan apoh apah. Ulôn lôn jak hana ngon peukayan badan teulon dan hana teuma meuseulob sibagoe tanda pakriban seudeh jih até ulôn nyoe. Ulôn meuranggong lagée su asée uteuen dan meuông-ông lagée su cicém unta.
9 Sabab luka-luka Samaria hana hase teupeu ubat, dan Yehuda keunong naseb nyang saban. Peutaka ka trok u Yerusalem, pintoe geureubang tanoh ié bansa ulôn.
10 Bék kheueh tapeugah ubak musoh-musoh geutanyoe di Gat keuhai musibah geutanyoe; bék teuma tapeubiyeu awaknyan jikalon gata nyang teungoh mo. He peunduduek Bet-Le-Afra, meugule-gule kheueh lam abée sibagoe tanda putôh asa!
11 Gata bandum peunduduek Safir, tajak kheueh laju u teumpat nyang teuböih ngon hana tangui peukayan dan deungon peurasa malée! Ureuëng-ureuëng Zaanan hana jijeuet teubiet nibak banda. Su kliek peunduduek Bet-Haezel sibagoe tanda keu gata bahwa disinan ka hana le peulindongan.
12 Peutaka nyang teuka nibak TUHAN ka trok bak babah pintoe geureubang Yerusalem! Lé sabab nyan, hana mungken ureuëng Marot jimeuharab gata tulông.
13 Gata peunduduek Lakhis, tapasang kheueh guda bak geuritan prang! Gata tacuntoh desya-desya nyang jipeubuet di Israel sampoe lé sabab nyan Yerusalem pih ka meudesya.
14 Jinoenyoe he ureuëng Yehuda gata gadôh banda Moresyet-Gat. Raja-raja Israel hana meuteumé bantuan le nibak banda Akhzib.
15 He ureuëng Maresya, TUHAN geuseurah gata ubak musoh nyang keuneuk peutundok banda gata. Peumimpén-peumimpén Israel nyang meukuasa jimusöm lam guha-guha di Adulam.
16 He ureuëng Yehuda, takoh kheueh ôk gata sibagoe tanda meukabong keu aneuëk-aneuëk gata nyang gata gaséh. Tacuko kheueh ôk bak ulée gata sampoe nyang tinggai cit bruek ulée saban lagée cicém nyang pajoh bangke, sabab bandum aneuëk-aneuëk gata teuangkot u teumpat nyang teuböih.


Chapter 2

1 Ceulaka kheueh ureuëng-ureuëng nyang reuncana bak buet nyang jeuhet teungoh jiéh-éh bak teumpat éh óh watée malam, laju jilaksana óh watée beungoh sabab awaknyan na teunaga keu jipeubuet nyan.
2 Meunyoe awaknyan jikeuneuk beuna saboh lampôh, laju jireupah atra gob. Meunyoe awaknyan keuneuk na saboh rumoh, atra gob geureupah mantong. Bah kheueh atra meunan cit keuluwarga, hana nyang aman.
3 Sabab nyan TUHAN meufeureuman, "Ulôn nyang reuncana bala ceulaka ateueh gata, sampoe gata hana tinggai. Bak watée nyang naas nyan gata hana carông le tajak-jak deungon sombong.
4 Naseb gata jipeuguna lé gob sibagoe nariet teumimplak, dan awaknyan jipeugöt ca-e meukabong nyang lagée nyoe, 'TUHAN ka geucok lom nanggroe kamoe nyoe dan laju geujok ubak ureuëng nyang teuen kamoe. Kamoe ka hanco hana le meuguna.' "
5 Lé sabab nyan, meunyoe ka trok watée jih nanggroe nyan geujok lom ubak umat TUHAN, hana meusidroe pih nibak gata nyang teurimong bulueng gobnyan.
6 Ureuëng-ureuëng laén jikeutubah ubak Ulôn, kheun gobnyan, "Bék takeutubah ubak kamoe. Bék takeutubah keuhai banmandum nyan. Kamoe hana meuteumé malée.
7 Bék tapike umat Israel ka geukutok lé TUHAN! TUHAN hana geupeubuet hai-hai nyang lagée nyan. Gobnyan hántom na gadôh saba. Bukon kheueh Gobnyan geumariet deungon ramah ubak ureuëng-ureuëng nyang jipeubuet nyang beuna?"
8 Geujaweueb lé TUHAN, "Gata kheueh nyang prang umat Ulôn lagée musoh. Ureuëng nyang gisa di mideuen prang deungon harapan meuteumé aman di rumoh jih keudroe, padahai disinan gata preh keuneuk gata reubot rumoh gobnyan.
9 Inong-inong lamkawan umat Ulôn gata use di rumoh nyang jicinta, dan gata reupah sabe beureukat nyang Ulôn bri keu aneuëk-aneuëk awaknyan.
10 Beudôh kheueh dan tajak laju keudeh; disinoe ka hana aman le. Ngon sabab lé desya-desya nyang rayeuk nyan ka jeuet keusabab geupeutron bala nyang lumpah gli u ateueh teumpat nyoe.
11 Gata meuharab ubak nabi nyang galak meusulet dan teumipée dan ji-amai bahwa nibak gata teuma na ié anggô dan ié kreueh meulimpah ruwah."
12 TUHAN meufeureuman, "He umat Israel nyang na mantong teutinggai! Gata pasti Lôn peusapat dan Ulôn peusaho lagée bubiri nyang teungoh woe lam weue. Lagée blang naleueng nyang peunoh deungon bubiri, meunan cit teuma nanggroe gata peunoh lom ngon ureuëng ramé.
13 Ulôn Lôn peuhah rot ueh dan Ulôn ba gata nibak teumpat nyang teuböih. Gata tadabrak babah-babah pintoe geureubang dan tajak ho galak droe. Ulôn, TUHAN keudroe, na kheueh Raja gata. Dan Ulôn Lôn pimpén gata mangat teupeuteubiet nibak peunjara."


Chapter 3

1 Deungoe kheueh, he gata banmandum peunguasa-peunguasa Israel! Sibeuna jih gata tateupeue peue nyang ade,
2 teuma gata tabanci ubak nyang jroh, dan galak ubak nyang jeuhet. Bansa ulôn gata puliek udeb-udeb, dan gata priek-priek asoe nyang meuleukek nibak tuleueng-tulueueng awaknyan.
3 Gata pajoh bansa ulôn. Kulet jih gata priek-priek dan tuleueng jih gata peuhanco. Gata koh-koh awaknyan lagée gata koh uengkot sie keu tapasoe lam beulangöng.
4 Teuma teuka watée jih gata takliek talakée tulông ubak TUHAN, teuma hana geutem jaweueb. Gobnyan hana geudeungoe peue-peue nyang gata meudoá, sabab gata ka tapeubuet hai nyang jeuhet.
5 Bansa ulôn geupeungéut lé nabi-nabi nyang geuramai nyang get keu ureuëng nyang tem bri péng, teuma geumeumusoh ngon ureuëng nyang hán jitem bri péng. Keu nabi-nabi nyang lagée nyan, TUHAN meufeureuman,
6 "He nabi, watée gata ka rab habéh; mata uroe gata teungoh jilob. Gata hana le tateumé kalon nyang deuh-deuh teungieng nyang teupeugah ubak reuncana-reuncana Ulôn. Gata hana neuteumé le taramai peue-peue mantong."
7 Ureuëng-ureuëng nyang ramai uroe ukeue meuteumé malée sabab peue-peue nyang jiramai nyan hana trok ban jilakée. Awaknyan bandum meuteumé malée sabab Po teu Allah hana geujaweueb awaknyan.
8 Teuma keuhai droe ulôn nyoe, TUHAN ka geupasoe ulôn deungon roh Gobnyan dan kuasa Gobnyan. Ubak ulôn geubri peungeurtian keuhai keuadelan, dan meunan cit keubeuranian keu lôn peugah ubak ureuëng Israel desya-desya nyang ka jipeubuet.
9 Deungoe kheueh tutoe haba lôn nyoe, he gata peunguasa Israel nyang banci ubak keuadelan dan nyang puta balek keubeunaran.
10 Gata tapeudong Yerusalem, banda Po teu Allah, nyang meudasai ubak poh meupoh maté dan keuhana adelan.
11 Peunguasa-peunguasa banda geumat peurintah mangat meuteumé péng teusulueng, imeum-imeum geupeurunoe huköm TUHAN mangat na gaji, dan nabi-nabi geulakée peutunyok ubak Po teu Allah mangat meuteumé péng -- laju awaknyan banmandum geupike TUHAN na blah awaknyan. Awaknyan jipeugah, "TUHAN na lamkawan geutanyoe; geutanyoe hana keunong bala bahya."
12 Sabab keujeuhetan gata nyan, Sion jimeu ué lagée blang, Yerusalem jeuet keusinamon rungka, dan Bukét Baét TUHAN jeuet keu uteuen beulantara.


Chapter 4

1 Bak uroe-uroe nyang teuka bukét, teumpat Baét TUHAN, teuma teudong cot dan manyang meulambong leubeh nibak gunong-gunong dan bukét-bukét. Meubagoe bansa meurön-rön jijak keunan.
2 awaknyan bandum jipeugah, "Jak geutanyoe ta ék u bukét TUHAN ubak Baét Allah Israel! Gobnyan geupeurunoe geutanyoe peue nyang harôh tanyoe peubuet. Geutanyoe ta seutôt rot Gobnyan sabab ajaran TUHAN teuka nibak Yerusalem; di Sion Gobnyan geumariet ubak umat Geuh."
3 TUHAN geupeuputôh peukara lamkawan bansa-bansa, lamkawan nanggroe-nanggroe nyang teuga, nyang jiôh meunan cit nyang rab. Awaknyan geuba bak teumpeuen peudeueng-peudeueng jih keudroe mangat jeuet keu mata langai dan kapak-kapak awaknyan beujeuet keu sikin meugunteng. Bansa-bansa ka hana le jeuet keu bansa peunyeurang, hana cit meusiab-siab keu jijak muprang.
4 Tieb-tieb ureuëng udeb aman dan seujahteura di teungoh lampôh anggô dan lampôh ara; hana ureuëng nyang peutakot-takot gobnyan, nyan kheueh janji TUHAN Nyang Mahakuasa.
5 Tieb-tieb bansa di ateueh bumoe jiseumah dan taát ubak dewa jih keudroe. Teuma geutanyoe taát ubak TUHAN Allah geutanyoe dan taseumah Gobnyan siumu masa.
6 TUHAN meufeureuman, "Teuma teuka watée jih Ulôn Lôn peusapat bubena ureuëng nyang Ulôn huköm, awaknyan nyang meudeurita bak teumpat nyang teuböih.
7 Awaknyan ka lapée dan jiôh di gampông droe. Teuma, nibak ureuëng-ureuëng nyang na mantong teutinggai nyan Ulôn Lôn peuphon saboh keuturonan nyang barô. Awaknyan jeuet keubansa nyang rayeuk dan teuga. Ulôn Lôn peurintah awaknyan di Bukét Sion keu siumu masa."
8 Dan gata Yerusalem, teumpat Po teu Allah geujaga umat Gobnyan lagée ureuëng meurabe jijaga kawan bubiri jih, gata jeuet lom sibagoe ma banda keurajeuen gata lagée yoh awai phon.
9 Pakon gata tamo ba-e teuga-teuga? Pakon gata meudeurita lagée ureuëng inong nyang keuneuk peulahé aneuëk? Peu kheueh sabab gata hana meuraja, dan peunaseuhat-peunaseuhat gata ka habéh maté?
10 He peunduduek Yerusalem, teubôt-bôt kheueh dan apoh apah kheueh lagée ureuëng inong keuneuk peulahé aneuëk! Sabab, bak saát nyoe gata harôh tatinggai banda dan gata tinggai di padang. Gata harôh tajak u Babel, teuma disinan TUHAN geupeulheueh gata nibak musoh-musoh gata.
11 Jai lumpah na bansa ka meugumpôi keuneuk jak seurang gata, he Yerusalem! Awaknyan jipeugah, "Yerusalem harôh teupeuhanco! Kamoe ngieng banda nyan ka jeuet keu bangke!"
12 Teuma bansa-bansa nyan hana jiteupeue peue nyang teungoh geureuncana lé TUHAN. Awaknyan hana jisadar bahwa awaknyan teungoh jipeusapat keu teuhuköm, saban lagée gandom nyang teugumpôi keu teujak lo.
13 TUHAN meufeureuman, "He peunduduek Yerusalem, tajak kheueh dan tagilo-gilo kheueh bubena musoh-musoh gata! Ulôn Lôn peujeuet gata leubeh teuga lagée leumô nyang meulungkée beuso dan meugukée teumaga. Gata tapeuhanco bansa nyang le, dan keukayaan nyang awaknyan teumé nibak hase teureupah teuma gata peuseumah ubak Ulôn, TUHAN seumeusta álam."
14 He peunduduek Yerusalem, talakée kheueh deungon meuharab that mangat TUHAN geutulông gata! Geutanyoe teungoh jikeupông! Musoh teungoh jiprang bubena peumimpén Israel!


Chapter 5

1 TUHAN meufeureuman, "He Betlehem Efrata, gata saboh banda nyang paleng ubit di Yehuda! Teuma nibak gata Lôn peubeudôh sidroe peunguasa keu Israel nyang asai asui jih phon jamén dilée."
2 Dan, TUHAN geupeubiyeu umat Gobnyan jikuasa lé musoh-musoh awaknyan keudroe sampoe ubak ureuëng inong nyang ka geupeunteuntée mangat jeuet keusidroe ma peunguasa nyang ka geupeulahé Gobnyan. Óh ka lheueh nyan ureuëng-ureuëng nyang saboh bansa ngon gobnyan nyang mantong na di teumpat nyang teuböih geupeusaho lom deungon bansa awaknyan.
3 Meunyoe peunguasa nyan ka teuka, Gobnyan jipeurintah umat Gobnyan deungon teunaga dan keukuasaan nibak Po teu Allah jih keudroe. Umat Geuh udeb deungon aman, sabab bandum ureuëng bansigom donya jiaku keubeusaran Gobnyan,
4 dan Gobnyan geubri keudaméan. Meunyoe tantra Asyur jiseureubu nanggroe geutanyoe dan jiheuntam peutahanan geutanyoe, tanyoe ta krah bubena peumimpén-peumimpén geutanyoe nyang paleng khong keu geujak prang awaknyan. Peumimpén-peumimpén geutanyoe nyan geupeutaloe Asyur deungon teunaga sinjata, dan geupeuseulamat geutanyoe nibak jaroe awaknyan.
6 Ureuëng Israel nyang mantong tinggai jeuet lagée iémbon nyang leupie nibak TUHAN keu bansa-bansa, dan lagée ujeuen tron ateueh seunaman. Awaknyan meusadeue ubak Po teu Allah, dan bukon ubak manusia.
7 Ureuëng Israel nyang mantong tinggai lamkawan bansa-bansa teuma jeuet lagée singa lamkawan beulatang-beulatang uteuen atawa lamkawan bubiri di blang naleueng. Singa nyan jitamong u lamkawan bubiri sira jigilo-gilo dan jipriek-priek; hana ureuëng nyang hase jipeulheueh bandum bubiri nyan.
8 Israel jipeutaloe bubena musoh dan bandum awaknyan jipeuhanco.
9 TUHAN meufeureuman, "Bak watée nyan teupeuranab bandum guda gata, dan teupeubinasa bandum geuritan prang gata.
10 Banda-banda nyang meukuta di nanggroe gata Lôn peuhanco, dan bandum kuta gata Lôn peudata ngon tanoh.
11 Jimat-jimat gata Lôn peuranab dan bandum tukang ramai gata Ulôn kireuh uluwa.
12 Ulôn Lôn peuhanco bubena patong gata meunan cit deungon tugu-tugu keuramat gata; gata hana le taseumah beunda-beunda nyang jipeugot lé jaroe gata keudroe.
13 Tugu-tugu Dewi Asyera di nanggroe gata Ulôn peureubah, dan banda-banda gata nyang meukuta Lôn peuhanco.
14 Lam beungéh Ulôn nyang lagée ié ju nyan Ulôn Lôn balaih bandum keujeuhetan bandum bansa nyang hana taát ubak Ulôn."


Chapter 6

1 Deungoe kheueh peue nyang geutudoh lé TUHAN keu Israel. Beudôh kheueh, ya TUHAN, dan neujok kheueh peungaduan Droeneueh! Bah kheueh gunong dan bukét jideungoe peue nyang keuneuk Droeneueh peugah.
2 He gunong-gunong, he dasar bumoe, deungoe kheueh peungaduan TUHAN! Gobnyan na peukara deungon Israel umat Gobnyan dan geutunton awaknyan.
3 TUHAN meufeureuman, "He umat Ulôn, peue nyang ka Ulôn peubuet ateueh gata? Lam hai peu kheueh Ulôn peususah gata? Jaweueb kheueh Ulôn!
4 Gata ka Ulôn ba Lôn peuteubiet nibak nanggroe Meusé, dan Ulôn peubeubaih nibak jipeujeuet keu namiet; Ulôn ka Lôn kirém Nabi Musa, Nabi Harun, dan Maryam keu jipimpén gata.
5 Umat Ulôn, ingat kheueh peue nyang jireuncana lé Balak raja Moab ateueh gata, dan peue nyang jijaweueb lé Bileam bin Beor keu jihnyan. Ingat kheueh peue nyang teujadi watée teujak lamkawan peukhimahan deungon Sitim dan Gilgal. Meunyoe gata neuingat keu bandum nyan, gata tateupeue peue nyang ka Ulôn peubuet keu Lôn peuseulamat gata."
6 Peu kheueh nyang harôh tapeuseumah ubak TUHAN, Po teu Allah nyang na di syeuruga, meunyoe geutanyoe tajak meuiébadat ubak Gobnyan? Peu kheueh harôh taba leumô muda nyang paleng gét keu tapeuseumah sibagoe keureubeuen nyang teutot ubak Gobnyan?
7 Peu kheueh TUHAN galak meunyoe geutanyoe taba meuribée-ribée bubiri atawa minyéuk zaiton nyang meulimpah? Dan peu kheueh harôh tapeuseumah ubak Gobnyan aneuëk geutanyoe nyang tuha sibagoe sineuboh ateueh desya-desya nyang geutanyoe peubuet?
8 Hana! TUHAN ka geupeugah ubak geutanyoe peue nyang paleng gét. Nyang geulakée ubak geutanyoe na kheueh mangat geutanyoe tapeubuet nyang ade, sabe geutanyoe amai cinta dan gaséh sayang, dan deungon miyueb até udeb meusaboh ngon Po teu Allah.
9 Lumpah bijaksana keu tatakot ubak TUHAN. Gobnyan geutawök ubak peunduduek banda, "Deungoe kheueh, he gata nyang meusapat di banda!
10 Di rumoh ureuëng-ureuëng jeuhet na hareuta nyang jiteumé deungon cara teumipée. Awaknyan jipeuguna sinukat nyang peuleusu, buet nyang paleng Ulôn banci. Ureuëng nyang peubuet lagée nyan Lôn huköm.
11 Hana mungken Ulôn peuamphon ureuëng nyang peuguna sinukat peuleusu?
12 Ureuëng-ureuëng kaya nyang na di banda gata jitindéeh ureuëng gasien, dan gata banmandum ureuëng buhak.
13 Bak saát nyoe Ulôn ka Lôn peuphon seukok dan Lôn peuhanco gata sabab desya-desya gata.
14 Gata teuma tamakheun, teuma hana jitem tro -- teuma teutab deuk. Gata ta angkot barang-barang, teuma hana hase tapeu aman. Peue mantong nyang gata peu aman Lôn peuhanco dimideuen prang.
15 Gata tatabu gandom, teuma hana tapot hase jih. Gata tapeugöt minyéuk nibak boh zaiton, teuma hana tateumé ngui minyéuk zaiton nyan. Gata taprah ié boh anggô, teuma hana tajieb.
16 Bandum nyan teujadi sabab gata taseutôt buet-buet nyang jeuhet nibak Raja Omri dan aneuëk jihnyan, nyan kheueh Raja Ahab. Gata taseutôt cara-cara awaknyan. Sabab nyan Ulôn Lôn hanco gata, dan gata jipeubeb dan jihina lé sigala bansa."


Chapter 7

1 Cilaka ulôn! Ulôn lagée ureuëng deuk nyang lôn jak pot boh kayée óh hana le musém jimuboh. Ka hana le jimuboh kayée di ateueh bak. Boh anggô dan boh ara nyan pih ka habéh jipot.
2 Ureuëng jujoe ka hana le lam nanggroe, ureuëng nyang seutia ubak Po teu Allah ka hana meurumpok le. Tieb-tieb ureuëng jipreh keuseumpatan keu geupeu maté ureuëng laén. Maséng-maséng jiteun jeunieb keusabe keudroe-droe.
3 Bandum ureuëng malem that bak buet jeuhet. Peujabat dan hakém geulakée péng sogok, dan ureuëng patot-patot geupaksa keuheundak droe, meunan kheueh awaknyan ka sipakat bulat bak buet nyang hina.
4 Nyang paleng gét dan paleng jujoe lamkawan awaknyan pih lagée tamah meuduroe nyang hana meuguna. Ka watée jih Po teu Allah geuhuköm umat Gobnyan lagée nyang ka geupeuingat ubak awaknyan meulalu nabi-nabi. Bak saátnyoe ka jipeubeudôh karu lamkawan awaknyan keudroe.
5 Bék tapatéh ubak kawöm lingka gata, dan bék teuma meusadeue ubak rakan. Beu até-até kheueh ngon tutoe haba gata bahpi nyang deungoe nyan peurumoh gata keudroe.
6 Sabab, bak masa nyang lagée nyoe anggota keuluwarga saléng meumusoh: aneuëk agam jihina ureuëng syiek jih keudroe, aneuëk inong jilawan ma jih, dan meulintée nyang inong jimeudakwa ngon tuwan jih keudroe.
7 Teuma geutanyoe meuharab ubak TUHAN; deungon peunoh keuyakénan tanyoe preh Po teu Allah geutanyoe. Gobnyan geudeungoe doá geutanyoe dan geupeuseulamat geutanyoe.
8 Hana alasan nibak musoh-musoh geutanyoe keu meuseunang-seunang ateueh keuhancoran geutanyoe. Sabab bahpi geutanyoe rhot, geutanyoe tabeudôh lom teuma. Bak saátnyoe geutanyoe na lam seupôt, teuma TUHAN geupeutrang geutanyoe.
9 Geutanyoe ka meudesya ubak TUHAN, sabab nyan bak saát nyoe geutanyoe harôh tarasa beungéh Gobnyan. Teuma hana treb le Gobnyan geubila geutanyoe dan geubri keuadelan ubak geutanyoe. Gobnyan geuba geupeuteubiet geutanyoe ubak nyang peungéueh; geutanyoe ta rasa keudroe bahwa Gobnyan geupeuseulamat geutanyoe.
10 Yoh masa ilée musoh jihina geutanyoe sira jipeugah, "Dipat kheueh TUHAN, Allah gata nyan?" Teuma bak saát nyoe awaknyan jikalon peue nyang geupeubuet lé TUHAN keu geutanyoe, dan awaknyan meuteumé malée. Geutanyoe takalon musoh-musoh geutanyoe nyan geupeutaloe dan geubloh-bloh lagée leuhôb bak rot ueh raya.
11 He Yerusalem! Ka trok watée jih gata peudong lom bintéh-bintéh beuton banda gata. Bak uroe nyan wilayah gata teupeuluwah.
12 Ureuëng-ureuëng gata jigisa ubak gata dipat -- di Asyur di siblaih utimu, di nanggroe Meusé di siblaih seulatan, di daerah Krueng Efrat, di meurandeh laôt dan nibak gunong-gunong nyang jiôh.
13 Teuma bumoe jeuet keu tho kreng sabab buet nyang jeuhet nyang jipeubuet lé peunduduek bumoe nyan.
14 Ya TUHAN, neurabe kheueh umat Droeneueh, umat nyang Droeneueh piléh. Awaknyan tinggai teu aséng di uteuen raya, bak teungoh tanoh nyang subô gumbo. Bah kheueh awaknyan meuteumé peunajoh bak blang naleueng Basan dan Gilead lagée yoh jamén dilée.
15 Neupeugöt kheueh buet nyang ajaéb keu kamoe, ya TUHAN, lagée nyang ka TUHAN peugöt yoh masa ilée bak watée Droeneueh neupeuteubiet kamoe di nanggroe Meusé.
16 Bansa-bansa jikalon hai nyan dan meuteumé malée sabab jisada bandum teunaga awaknyan hana areuti meubacut pi. Awaknyan gadôh ákai sampoe hana jeuet jimariet atawa jimeudeungoe.
17 Awaknyan geumeu éue nibak tanoh lagée uleue. Deungon teumakot dan yo meugám-gám awaknyan jiteubiet lam kuta teumpat jimeuteun, laju jijak ubak Droeneueh, ya TUHAN Po teu Allah kamoe.
18 Hana Allah nyang lagée Droeneueh, ya TUHAN, nyang peuamphon desya umat piléhan Droeneueh nyang mantong na tinggai. Hana keu siumu masa Droeneueh beungéh; sikeubit jih, Droeneueh galak neubri cinta Droeneueh nyang hana meubataih nyan.
19 Droeneueh neubalaih gaséh lom ubak kamoe dan neu peuamphon kamoe. Desya-desya kamoe Droeneueh gilo-gilo dan Droeneueh geulawa lam laôt raya!
20 Ubak umat Droeneueh, keuturonan Nabi Ibrahim dan Nabi Yakub, Droeneueh neutunyok keuseutiaan Droeneueh dan cinta Droeneueh nyang hana meubataih nyan lagée nyang Droeneueh peujanji ubak indatu kamoe yoh masa ilée.