Zakharia

1 2 3 4 5 6 7 8 9 10 11 12 13 14


Chapter 1

1 Bak buleuen keu lapan bak thon keu dua geumat keurajeuen lé Raja Darius ateueh Persia, TUHAN geupeusampoe peusan nyoe ubak ulôn, Nabi Zakharia bin Berekhya dan cucoe Ido.
2 TUHAN geupeurintah ulôn mangat lôn peugah lagée nyoe ubak umat Gobnyan, "Bak jamén dilée Ulôn, TUHAN Nyang Mahakuasa, lumpah beungéh keu indatu gata.
3 Teuma saát nyoe Ulôn peugah ubak gata: Tawoe kheueh ubak Ulôn, dan Ulôn pi Lôn gisa ubak gata.
4 Bék lagée indatu gata. Yoh masa ilée nabi geupeusampoe peusan Ulôn ubak awaknyan jeuet awaknyan bék nale jipeubuet jeuhet dan jipeubuet desya. Teuma awaknyan hana jipeureumen dan hana jitem taát ubak Ulôn.
5 Dipat kheueh indatu gata dan nabi-nabi nyan bak saát nyoe? Awaknyan ka hana le.
6 Meulalu nabi-nabi hamba-hamba Ulôn nyan, Ulôn peusampoe peurintah-peurintah dan peuingat-peuingat nibak Lôn keu indatu gata. Teuma awaknyan teutab hana jipakoe sampoe awaknyan harôh jitanggong akibat jih. Laju awaknyan meunyeusai dan meungaku bahwa Ulôn, TUHAN Nyang Mahakuasa, ka Lôn huköm awaknyan nyang sisuai deungon keusalahan awaknyan keudroe, dan sisuai teuma deungon nyang ka Ulôn peuteuntée."
7 Bak tanggai dua ploh peuet buleuen Syebat, nyan kheueh buleuen siblaih, bak thon nyang keudua masa keurajeuen Raja Darius, TUHAN geupeusampoe peusan Gobnyan ubak ulôn. Bak saboh keumalon bak watée malam,
8 deuh ulôn kalon malaikat TUHAN geugiduek ateueh saboh guda mirah. Gobnyan geupiôh bak saboh pantôn di teungoh-teungoh bak kayée murad. Dilikot gobnyan na teuma teudong padubboh guda nyang laén, na nyang mirah, nyang mirah jambée dan nyang putéh.
9 Laju ulôn tanyong ubak gobnyan, "Teungku Po, peu kheueh makna jih banmandum nyoe?" Gobnyan geujaweueb, "Teuma ulôn tunyok makna jih ubak gata.
10 Awaknyan geukirém lé TUHAN keu jipeureksa bumoe."
11 Bandum guda nyan jilapor ubak malaikat, "Kamoe ka kamoe jeulajah bansaboh muka bumoe, teunyata donya nyoe teunang dan teuntram."
12 Laju malaikat nyan geupeugah, "TUHAN Nyang Mahakuasa, tujoh ploh thon treb jih Droeneueh teumeureuka ubak Yerusalem dan banda-banda nyang na di Yehuda. Trok án pajan Droeneueh teutab beungéh dan hana neupeu amphon awaknyan?"
13 TUHAN geujaweueb ubak malaikat nyan deungon tutoe haba nyang teuhibô,
14 dan malaikat nyan geuyue bak ulôn keu lôn peusampoe peue nyang ka geupeugah lé TUHAN Nyang Mahakuasa, "Ulôn lumpah Lôn gaséh dan lumpah prihatin keu banda Yerusalem, banda Ulôn nyang suci.
15 Teuma Ulôn lumpah beungéh keu bansa-bansa nyang meurasa aman dan teuntram. Sabab watée Ulôn Lôn peuteun beungéh Ulôn nyan ateueh umat Lôn, bansa-bansa nyan jitamah peundeuritaan ateueh umat Ulôn.
16 Bak saát nyoe Ulôn kugisa u Yerusalem keu Lôn jak peu amphon banda nyan. Baét Ulôn jipeudong lom dan banda Yerusalem geupeupuléh lom teuma."
17 Malaikat nyan geuyue lom ubak ulôn keu lôn peusampoe peusan nyoe lagée nyoe, "TUHAN Nyang Mahakuasa meujanji bahwa banda Gobnyan jeuet keumakmu lom dan bahwa sigoe teuk Gobnyan geutulông Yerusalem dan geuaku sibagoe atra milék Gobnyan keudroe."
18 Nibak keumalon nyang laén, deuh ulôn kalon peuet boh lungkée leumô.
19 Laju ulôn tanyong ubak malaikat nyang ka geumariet ubak ulôn, "Peu kheueh makna jih lungkée-lungkée nyan?" Gobnyan geujaweueb, "Lungkée-lungkée nyan na kheueh sibagoe lambang keurajeuen-keurajeuen nyang teuga nyang peucrebre peunduduek Yehuda, Israel dan Yerusalem."
20 Laju TUHAN geupeuleumah ubak ulôn peut droe utoh beuso nyang ba palée.
21 Laju lôn tanyong, "Peue meukeusut awaknyan jiteuka keunoe?" Laju geujaweueb, "Keuneuk teugok-gok dan keu teuguleng bansa-bansa nyang ka jipeuhanco meukeupeng-keupeng Yehuda dan jipeu crebre peunduduek jihnyan."


Chapter 2

1 Nibak keumalon nyang seulanjut jih leumah ulôn ngieng sidroe ureuëng agam bak jaroe jihnyan jimat talo sineupat.
2 "Ho keuneuk jak?" lôn tanyong. "Keuneuk jak uko Yerusalem," jaweueb jih, "Ulôn keuneuk teupeue padub na panyang dan luwah banda nyan."
3 Óh lheueh nyan ulôn ngieng malaikat nyang ka lheueh geu mariet deungon ulôn nyan, geulangkah ukeue, dan sidroe lamkawan malaikat nyang laén laju geumeurumpok ngon gobnyan.
4 Malaikat nyang phon geupeugah ubak malaikat nyang keudua, "Neujak kheueh bubagaih ubak peumuda nyan, dan neukheun laju bak jihnyan bahwa Yerusalem peunoh ngon manusia dan beulatang peulara sampoe hana mungken le teupeugét beuton ban silingka nyan.
5 TUHAN ka geumeujanji bahwa Gobnyan keudroe nyang jeuet keu bintéh beuton apui nyang jikeulileng banda nyan keu teulindong Gobnyan tinggai disinan lam bandum kuasa dan keuagongan Gobnyan."
6 TUHAN meufeureuman ubak umat Gobnyan, "Ulôn ka Lôn peucrebre gata u meubagoe peunjuru. Teuma bak saát nyoe he ureuëng-ureuëng nyang teuböih, taplueng kheueh nibak Babel dan tawoe kheueh u Yerusalem.
8 Soe mantong nyang prang gata, saban cit ka jiprang boh até Lôn." Teuma TUHAN Nyang Mahakuasa geuyue bak ulôn keu lôn peusampoe peusan nyoe ubak bansa-bansa nyang ka jireubot umat Gobnyan,
9 "TUHAN keudroe geulawan gata! Dan gata jireupah lé beukaih namiet-namiet gata keudroe. Meunyoe hai nyan teujadi, gata tateupeue bahwa TUHAN Nyang Mahakuasa ka geuyue bak ulôn."
10 TUHAN meufeureuman, "Meuca-e kheueh deungon geumbira he peunduduek Yerusalem! Ulôn tinggai lamkawan gata!"
11 Bak masanyan jai that-that bansa jimeuhadab ubak TUHAN mangat jeuet keu umat Gobnyan. Gobnyan tinggai lamkawan gata, dan gata tateupeue bahwa TUHAN geukirém ulôn ubak gata.
12 Sigoe teuk bahwa Yehuda jeuet keu milék khusos TUHAN bak tanoh Gobnyan nyang suci, dan Yerusalem jeuet keu banda nyang paleng geusayang.
13 Tinggai kheueh gata banmandum dikeue TUHAN! Sabab Gobnyan ka geubeurangkat nibak teumpat Geuh tinggai di syeuruga.


Chapter 3

1 Nibak keumalon nyang laén, TUHAN geupeuleumah ubak ulôn Teungku Imeum Agong Yosua teungoh geudong dikeue malaikat TUHAN. Di siblaih Yosua, jidong kheueh Jén nyang ka siab keuneuk jitudoh gobnyan.
2 Malaikat TUHAN geupeugah ubak Jén nyan, "Seumoga TUHAN geuhuköm gata he Jén! Bah kheueh TUHAN nyang geusayang keu Yerusalem geuhuköm gata. Ureuëng nyoe lagée tungô kayée nyang teutarek lam apui hu."
3 Yosua geudong disinan sira geungui peukayan nyang lumpah kutoe.
4 Dan geupeugah kheueh lé malaikat nyan ubak peubantu-peubantu gobnyan nyang na di syeuruga, "Neutiek kheueh peukayan kutoe nyang jingui lé ureuëng nyoe." Dan ubak Yosua gobnyan geupeugah, "Desya gata ka ulôn böih, keu gata lôn jôk peukayan nyang barô."
5 Laju gobnyan geupeurintah ubak peubantu-peubantu geuh keu geuyue peungui seureuban nyang gleh bak ulée Yosua. Awaknyan jiturot mantong dan óh ka lheueh nyan awaknyan laju jipeungui peukayan nyang barô nyan ubak gobnyan deungon geukawai lé malaikat TUHAN.
6 Óh lheueh nyan malaikat nyan geupeusampoe haba TUHAN ubak Yosua,
7 "Meunyoe gata tapatuh ubak huköm-huköm Ulôn dan tapeubuet tugaih-tugaih nyang Ulôn bri keu gata, teuma keu seulanjut jih gata jeuet keu peumimpén di dalam Baét Lôn dan ta uroih peulataran disinan. Ulôn Lôn deungoe doá-doá gata, lagée Ulôn deungoe doá bandum malaikat nyang na bak binéh Ulôn.
8 Deungoe kheueh he Imeum Agong Yosua, meunan cit gata teungku-teungku imeum nyang jeuet keu rakan gobnyan, gata bandum na kheueh lambang keu masa ukeue nyang gét. Bak masanyan Ulôn Lôn kirém hamba Ulôn nyang teuboh nan 'Sang Tunas'.
9 Ulôn peuduek bak binéh Yosua si aneuëk batée nyang meusagoe tujoh nyang Lôn uke deungon tulesan-tulesan. Dalam siuroe mantong Ulôn böih desya nibak nanggroe nyoe.
10 Meunyoe uroe nyan ka teuka, tieb-tieb ureuëng jitawök kawöm silingka gobnyan keu jiteuka dan jirasa damé dan seuntosa di teungoh-teungoh lampôh-lampôh anggô dan bak bak ara gata."


Chapter 4

1 Malaikat nyang ka geuteuka ubak ulôn nyan geujak lom laju geupeugoe ulôn lagée geupeugoe ureuëng teungét,
2 "Peue nyang gata kalon?" geutanyong lé gobnyan. "Saboh gaki panyöt nyang teupeugét nibak méuh," jaweueb ulôn. "Bak ujong bagian ateueh na teumpat minyéuk, dan ban sikeulileng nyan na teuma tujoh boh panyöt, nyang maséng-maséng na tujoh boh teumpat dah.
3 Nibak blaih wie dan uneuen gaki panyöt nyan na dua bak zaiton."
4 Óh lheueh nyan laju lôn tanyong ubak malaikat nyan, "Peue nyang teupeulambang lé beunda-beunda nyan, Teungku Po?"
5 "Peu kheueh hana gata teupeue?" geutanyong lé gobnyan ubak ulôn. "Hana Teungku Po," jaweueb ulôn.
6 Malaikat nyan geuyue ulôn jak peusampoe ubak Zerubabel peusan TUHAN nyoe, "Bukon deungon teunaga tantra dan bukon teuma deungon teunaga gata keudroe gata meuhase, teuma na kheueh deungon Roh Ulôn.
7 Bahpi nyang meulinteueng na bube gunong, nyan teukireuh dikeue gata. Gata tapeudong lom Baét Ulôn, dan bak saát gata tapeuduek batée nyang keuphon bak teumpat nyan, di ureuëng ramé jipeugah, 'Ah, lagak lagoena!' "
8 Laju teuka lom peusan nyang laén nibak TUHAN.
9 Lagée nyoe geupeugah lé Gobnyan, "Zerubabel ka jipeuduek sandi Baét Ulôn, dan gobnyan geupeuseuleusoe banmandum bangunan Baét nyan. Meunyoe nyan teujadi, umat Ulôn jiteupeue bahwa Ulôn kheueh nyang ka kirém gata he Zakharia ubak awaknyan.
10 (10a)Na nyang anggab remeh peuristiwa nyoe. Teuma awaknyan jikalon Zerubabel jipeugét peumbangunan Baét Ulôn, dan awaknyan geumbira that."
11 Óh lheueh nyan ulôn tanyong lom ubak gobnyan, "Peue teuma makna jih bandua bak zaiton si blaih u wie dan uneuen gaki panyöt nyan?
12 Peue teuma makna jih bandua cabeueng zaiton bak sampeng bandua boh pipa méuh nyang jeuet keuteumpat ji ile minyéuk zaiton nyan?"
13 Geuseuôt lé gobnyan ubak ulôn, "Peu kheueh hana gata teupeue?" "Hana, Teungku Amphon," jaweueb ulôn.
14 Gobnyan pi geupeugah, "Nyan na kheueh dua droe ureuëng nyang ka geupiléh lé TUHAN Po teu álam seumeusta dan geutunyok mangat teulayani Gobnyan."


Chapter 5

1 Deuh ulôn kalon lom, dan goe nyoe deuh ulôn ngieng saboh kitab meugulong nyang jipo di manyang.
2 Malaikat nyan geutanyong peue nyang ulôn kalon. Jaweueb ulôn, "Na saboh kitab meugulong nyang jipo di manyang. Panyang jih sikureueng metée dan luwah jih na peuet siteungoh metée."
3 Laju gobnyan geupeugah ubak ulôn, "Lam kitab meugulong nyan na teutuléh kutokan keu banmandum nanggroe nyoe. Bak saboh halaman teutuléh tieb-tieb pancuri teupeuteubiet lam nanggroe nyoe. Dan bak halaman nyang laén teutuléh teuma bahwa soe mantong ureuëng nyang meusumpah peuleusu nyan pih teupeuteubiet.
4 TUHAN Nyang Mahakuasa meufeureuman bahwa kutokan nyan rhot u ateueh rumoh tieb-tieb pancuri dan rumoh tieb-tieb ureuëng nyang meusumpah peuleusu. Rumoh-rumoh nyan teutab keunong kutokan nyang na tinggai cit rungka-rungka."
5 Malaikat nyan teuka lom dan geupeugah, "Ngieng! Na lom nyang teuka!"
6 "Peue nyan?" ulôn tanyong. Geujaweueb lé gobnyan, "Saboh raga. Nyan kheueh lambang desya keu banmandum nanggroe nyoe."
7 Raga nyan na tutôb jih nyang teupeugét nibak timah. Teungoh ulôn ngieng-ngieng atra nyan, sinutôb nyan teubeuôt dan teunyata didalam raga nyan na sidroe ureuëng inong nyang teungoh jiduek.
8 Malaikat nyan geupeugah, "Ureuëng inong nyoe sibagoe lambang keujeuhetan." Laju geuteugon lom ureuëng inong nyan udalam raga dan laju geutôb babah raga nyan.
9 Ulôn ngieng teuma u ateueh dan deuh teuma ulôn kalon dua droe ureuëng inong teungoh jipo u ateueh ulôn. Bak awaknyan na sayeueb nyang kukoh lagée sayeueb cicém cang iriek. Raga bunoe awaknyan cok dan laju jibapo.
10 Laju ulôn tanyong ubak malaikat nyan, "Ho jiba lé cicém cang iriek raga nyan?"
11 Geujaweueb lé gobnyan, "U Babel, disinan awaknyan jipeudong kuil keu jihnyan. Meunyoe kuil nyan ka seuleusoe, keurajeuen nyan jipeuduek keu jiseumah."


Chapter 6

1 Ulôn meuteumé lom keumalon nyang laén. Goenyoe deuh ulôn ngieng peuet boh geuritan prang jiteubiet nibak dua boh gunong peurunggu.
2 Geuritan-geuritan nyan jitarek lé guda nyang dua-dua boh saboh geuritan, nyang phon that guda mirah, nyang keudua guda itam,
3 nyang keu lhée guda putéh dan nyang keu peuet guda meubalang.
4 Laju ulôn tanyong ubak malaikat-malaikat nyan, "Teungku Amphon, peue makna jih bandum geuritan prang nyoe?"
5 Gobnyan geujaweueb, "Awaknyan jijak ubak peuet jurosan óh ka lheueh meuhadab TUHAN seumeusta álam.
6 Geuritan prang nyang jitarek lé guda itam jijak u Babel siblaih utara. Guda putéh jituju ubarat dan guda balang u nanggroe seulatan."
7 Watée guda nyang meubalang nyan jiteubiet, awaknyan leumah hana saba keu jijak peureksa bumoe. Malaikat nyan geupeugah, "Tajak kheueh laju tapeureksa bumoe!" Laju jijak kheueh awaknyan.
8 Óh lheueh nyan malaikat nyan geumeuhôi ulôn, "Guda nyang jijak u Babel nyan ka teupeureuda beungéh TUHAN."
9 TUHAN geubri peusan nyoe ubak ulôn.
10 Kheun Gobnyan, "Cok kheueh laju peuseumahan nyang jipeuseumah lé Heldai, Tobia dan Yedaya, na kheueh ureuëng-ureuëng nyang ban jiwoe nibak teumpat nyang teuböih di Babel. Taba kheueh laju beubagaih peuseumahan awaknyan u rumoh Yosia bin Zefanya.
11 Nibak méuh dan pirak nyang jibri lé awaknyan, peugét kheueh saboh mahkota dan keubah kheueh laju ateueh ulée Teungku Imeum Agong Yosua bin Yozadak.
12 Jak peutrok ubak awaknyan bahwa Ulôn, TUHAN Nyang Mahakuasa meufeureuman, 'Ureuëng nyang teupeugah Sang Tunas, meuhase diteumpat jih tinggai dan jihnyan jipeudong lom Baét TUHAN.
13 Jihnyan kheueh nyang teuma peudong Baét Ulôn dan jiteurimong keuhoreumatan lagée sidroe raja, dan jihnyan jimat peurintah ateueh rakyat jih. Sidroe teungku imeum jidampeng jihnyan dan awaknyan meubuet meusajan deungon rukon.'
14 Mahkota nyan jikeubah di Baét Ulôn keu teupeuingat Heldai, Tobia, Yedaya, dan Yosia.
15 Ureuëng-ureuëng ramé teuka nibak teumpat nyang jiôh dan jitulông peudong lom Baét Ulôn. Meunyoe teupeudong Baét Ulôn nyan ka seuleusoe, awaknyan jiteupeue bahwa Ulôn kheueh TUHAN Nyang Mahakuasa ka Ulôn kirém gata ubak awaknyan. Bandum nyan teujadi meunyoe awaknyan bit-bit jiseutôt ubak peue-peue nyang Ulôn peurintah, TUHAN Po teu Allah awaknyan keudroe."


Chapter 7

1 Bak tanggai peuet buleuen Kislew, na kheueh buleuen sikureueng, bak thon nyang keu peuet geumat keurajeuen lé Raja Darius, TUHAN geupeusan lom ubak ulôn.
2 Peunduduek Betel ka jikirém Sarezer dan Regem-Melekh meunan cit aneuk buah awaknyan u Baét TUHAN Nyang Mahakuasa keujijak lakée beureukat Gobnyan.
3 Dan awaknyan jiyue cit tanyong ubak imeum-imeum dan bubena nabi, lagée nyoe, "Peu kheueh mantong peureulée kamoe peuba-e ateueh keuhancoran Baét TUHAN deungon puasa tieb-tieb buleuen keulimong lagée nyang ka kamoe peubuet meuthon-thon treb jih?"
4 Nyoe kheueh peusan TUHAN nyang teuka ubak ulôn.
5 Feureuman Gobnyan, "Tapeusampoe kheueh ubak bandum peunduduek nanggroe nyoe dan ubak teungku-teungku imeum, bahwa puasa dan meuba-e nyang awaknyan peubuet bak buleuen keulimong dan keutujoh nyang treb jih tujoh ploh thon nyoe kon kheueh peunghoreumatan bak Ulôn.
6 Meunan cit watée awaknyan teungoh jimakheun dan jijieb ié, awaknyan jijak peupueh até jih keudroe."
7 Nyan kheueh nyang geupeugah lé TUHAN meulalu nabi-nabi bak jamén dilée bak watée Yerusalem mantong geuduek dan peunduduek disinan makmu. Bak watée nyan ureuëng hana tinggai di gampông-gampông dan bak-bak binéh banda mantong teuma cit bagian seulatan dan bak gaki-gaki bukét di siblaih ubarat.
8 TUHAN Nyang Mahakuasa geubri peusan nyoe ubak ulôn,
9 "Meuthon-thon nyang ka lheueh Ulôn bri peurintah lagée nyoe ubak umat Lôn, 'Gata harôh tapeubuet ade, beuna gaséh sayang dan jroh até ateueh seusabe gata.
10 Bék kheueh tatindeh ureuëng inong balée, aneuëk-aneuëk yatem ngon muntui, ureuëng-ureuëng aséng nyang na tinggai teutab di teungoh-teungoh gata, atawa soe mantong nyang dalam keuadaan susah. Dan bék teuma tareuncana nyang jeuhet ateueh sabe keudroe-droe gata.'
11 Teuma umat Ulôn kreueh that ulée mubacutpi hana jitem deungoe; awaknyan jisumpai geulinyueng jih keudroe mangat bék teudeungoe sapeue.
12 Awaknyan jipeukreueh até jih keudroe sampoe kreueh lagée batée. Ulôn beungéh that sabab hana jiturot peue-peue nyang ka Lôn peurunoe ubak awaknyan deungon peurantaraan nabi-nabi nyang ka u likot.
13 Ulôn hana Lôn jaweueb doá awaknyan, sabab awaknyan pih hana jitem deungoe watée Ulôn peugah haba.
14 Lagée angén badée, ka Ulôn sampôh awaknyan sampoe awaknyan teupaksa tinggai di nanggroe-nanggroe aséng. Tanoh nyang gumbô dan subô nyan ka tinggai seungue dan ka jeuet keu tanoh nyang tandus."


Chapter 8

1 TUHAN Nyang Mahakuasa geubri peusan nyoe ubak ulôn,
2 "Ulôn meuheut that keuneuk Lôn tulông Yerusalem sabab Ulôn lumpah Lôn gaséh keu peunduduek disinan, dan sabab geunaséh Ulôn nyan, até Lôn seueum keu musoh-musoh banda nyan.
3 Ulôn Lôn woe u Yerusalem, banda Ulôn nyang suci nyan. Yerusalem jituri lé gob sibagoe banda nyang seutia, dan Bukét TUHAN Nyang Mahakuasa teuhôi nan Bukét Suci.
4 Lam padang banda Yerusalem, jiduek-duek lom abusyiek-abusyiek dan nék-nék inong nyang ka tuha that-that dan watée jijak-jak teupaksa jimeutungkat.
5 Rot-rot nyang na lam banda peunoh lom deungon aneuëk-aneuëk manyak nyang teungoh ji meuén-meuén.
6 Hainyan mungken mustahe nibak ureuëng-ureuëng nyang mantong udeb nibak bansa nyoe, teuma hana mustahe nibak Ulôn.
7 Ulôn Lôn peuseulamat bansa Ulôn di nanggroe-nanggroe teumpat awaknyan ka teuangkot,
8 dan Ulôn ba awaknyan lom di timu dan barat, akhéji awaknyan tinggai lom di Yerusalem. Awaknyan teuma jeuet keu umat Ulôn dan Ulôn jeuet keu Allah awaknyan. Ulôn Lôn peurintah awaknyan deungon seutia dan ade."
9 TUHAN meufeureuman ubak umat Gobnyan, "Peukong kheueh até gata! Bak saát nyoe tadeungoe tutoe haba nyang ka lheueh geupeugah lé nabi-nabi bak watée keunaleung teupeuduek, keu teupeudong lom Baét Ulôn.
10 Sigohlom masanyan hana nyang hase jisiwa teunaga manusia atawa beulatang, dan hana nyang meurasa aman nibak jipeukaru lé musoh. Ulôn ka Lôn pupok sidroe lamkawan ureuëng deungon nyang laén.
11 Teuma bak saátnyoe ureuëng-ureuëng nyang mantong udeb nibak bansa nyoe Lôn peusaneut meubeda deungon nyang ilée.
12 Awaknyan jitabu bijéh deungon damé. Bak-bak anggô awaknyan jimuboh, tanoh awaknyan jipeuteubit hase, dan ujeuen jitron deungon meulimpah ruwah. Bandum beureukat nyan Ulôn bri keu ureuëng-ureuëng nyang mantong udeb nibak bansa nyoe.
13 He peunduduek Yehuda dan Israel! Yoh masa dilée, meunyoe na ureuëng-ureuëng aséng saléng jikutok, awaknyan jipeugah, 'Seumoga bala nyang rhot ateueh Yehuda dan Israel nyan pih rhot u ateueh gata!' Teuma Ulôn Lôn peuseulamat gata, dan bubena ureuëng-ureuëng aséng nyan jipeugah sabe keudroe-droe, 'Seumoga beureukat nyang geupeutron ateueh Yehuda dan Israel, atrapi beujitron ateueh droe gata!' Sababnyan peukong kheueh até gata dan bék kheueh teumakot!"
14 TUHAN Nyang Mahakuasa meufeureuman, "Watée indatu gata jipeujeuet Ulôn sampoe beungéh, laju Ulôn cok peunutoih bahwa awaknyan harôh Ulôn huköm deungon leubeh brat. Ulôn hana Lôn ubah peue nyang ka Ulôn peuputôh nyan, dan teutab Ulôn laksana.
15 Teuma bak saát nyoe Ulôn keuneuk bri beureukat keu peunduduek Yerusalem meunan cit keu peunduduek Yehuda. Lé sabab nyan, bék kheueh teumakot.
16 Nyoe kheueh peurintah-peurintah nyang harôh gata peubuet: Meunyoe tameututoe, peugah kheueh nyang beutôi ubak sabe keudroe-droe gata. Tabri kheueh keuputosan nyang ade dan nyang teuba ubak damé.
17 Bék kheueh tareuncana nyang jeuhet ubak sabe keudroe-droe gata. Bék kheueh meusumpah peuleusu. Ulôn banci keu nyang sulet dan keuhana adelan meunan cit ubak buet poh mupoh."
18 TUHAN Nyang Mahakuasa geubri peusan nyoe ubak ulôn keu umat Gobnyan,
19 "Puasa nyang jipeubuet bak buleuen nyang keu peuet, keu limong, keu tujoh, dan keu siploh nyan jeuet keu peurayaan-peurayaan nyang peunoh kegeumbiraan dan keuseunangan keu peunduduek Yehuda. Cinta kheueh ubak keubeunaran dan keudaméan!"
20 TUHAN Nyang Mahakuasa meufeureuman, "Masa jih teuma teuka peunduduek nyang na lam banda-banda nyang laén jijak u Yerusalem.
21 Peunduduek di banda nyang saboh jipeugah ubak peunduduek banda nyang laén, 'Jak geutanyoe tajak seumah TUHAN Nyang Mahakuasa dan talakée beureukat Gobnyan. Seutôt kheueh deungon kamoe!'
22 Dan jai that-that bansa nyang teuga-teuga dan kha-kha jiteuka u Yerusalem keu jijak seumah Ulôn TUHAN Nyang Mahakuasa dan jilakée beureukat Ulôn.
23 Bak uroe-uroe nyang lagée nyan na siploh droe ureuëng aséng jijak ubak sidroe ureuëng Yahudi dan jipeugah lagée nyoe, 'Kamoe meuheut that keuneuk na laba lagée gata; sabab na kamoe deungoe bahwa Po teu Allah geubri beureukat keu gata.' " TUHAN Nyang Mahakuasa ka geupeugah haba.


Chapter 9

1 Nyoe kheueh peusan TUHAN. Gobnyan ka geucok keuputosan keuneuk geuhuköm nanggroe Hadrakh dan banda Damsyik. Bukon sukée-sukée Israel mantong, teuma ma kota Siria na kheueh atra TUHAN.
2 Hamat nyang meubataih deungon Hadrakh nyan pih atra Gobnyan, meunan cit deungon banda-banda Tirus dan Sidon deungon banmandum keuahlian peunduduek disinan.
3 Tirus ka jipeudong kuta-kuta keu droe jih dan jitamon méuh keubit that jai meunan cit ngon pirak nyang le jih hana teukira sampoe ka lagée barang biasa nyang meusipreuk bansaboh rot lagée anou dan leuhob bak rot ueh raya.
4 Teuma lé TUHAN geupeujeuet awaknyan gasien. Bandum keukayaan nyang na dalam banda nyan geutiek u dalam laôt dan banda nyan keudroe habéh jipajoh lé apui.
5 Banda Askelon dan Gaza jingieng atra nyan laju jiteuka teumakot. Meunan cit deungon Ekron jikalon keudroe dan ka gadôh bandum nyang jiharab. Gaza gadôh raja jih, dan Askelon jeuet keuseungue hana nyang keumiet.
6 Asdod jiduek lé bansa-bansa nyang meujampu lawok. TUHAN meufeureuman, "Ureuëng Filistin nyang sombong nyan Lôn peuranab.
7 Awaknyan hana jipajoh le uengkot sie nyang mantong meudarah atawa peunajoh laén nyang teutam. Bandum ureuëng nyang mantong na tinggai jeuet keu umat Lôn dan jianggab sibagoe siladum nibak sukée Yehuda. Ekron jeuet keu anggota umat Ulôn, lagée ureuëng Yebus bak jamén ilée.
8 Ulôn kujaga tanoh Lôn dan Ulôn linteueng bandum pasokan aséng nyang keuneuk jak rot nyan. Ulôn hana Lôn peu idhin le ubak ureuëng-ureuëng nyang teugöm ureuëng laén jijak jajah umat Ulôn. Sabab peundeuritaan awaknyan ka lheueh Lôn kalon."
9 He peunduduek Sion, meugeumbira kheueh! He peunduduek Yerusalem, meusurak kheueh! Ngieng kheueh! Raja gata teuka ngon peunoh keumeunangan! Gobnyan raja nyang ade nyang ba seulamat. Deungon até nyang miyueb gobnyan geuteuka geupasang keuleudée, saboh keuleudée nyang muda.
10 TUHAN meufeureuman, "Geuritan-geuritan prang di Efraim Ulôn tiek, bandum guda nyang na di Yerusalem Lôn peuranab dan bubena aneuk panah Lôn peuhanco. Raja gata jipeumaklum damé keu bansa-bansa. Nibak laôt nyang saboh u laôt nyang laén gobnyan geumat kuasa, phon di Krueng Efrat trok ubak ujong donya."
11 TUHAN meufeureuman ubak umat Gobnyan, "Deumi janji nyang ka Lôn peuna deungon gata, meujanji nyang ka teupeusah deungon darah keureubeuen peuseumahan, teuma Lôn peubeubaih rakyat gata nyang meudeurita bak teumpat nyang teuböih lagée ureuëng nyang teukurong dalam mon hana meuié.
12 Tawoe kheueh he ureuëng-ureuëng nyang teuböih, bak saát nyoe gata kana harapan. Tawoe kheueh ubak teumpat gata meureului, Ulôn teutab Lôn bri beureukat keu gata. Deungoe kheueh: Dua goe lipat gata Lôn bri beureukat sabab banmandum deurita nyang ka gata rasa.
13 Yehuda Lôn peuguna sibagoe panah pahlawan, dan Israel sibagoe aneuk panah nyang siab keu teutimbak. Peunduduek Sion Ulôn peuguna sibagoe peudeueng; deungon peudeueng nyan ureuëng-ureuëng Yunani Lôn heungko."
14 TUHAN geupeuleumah droe ubak umat Gobnyan, lagée kilat bubena aneuk panah Gobnyan geutimbak laju. TUHAN Nyang Mahamanyang geuyueb beureuguih tanda geujak prang laju jijak maju lam angén badée di seulatan.
15 Umat Gobnyan pasti geubri peulindongan, sampoe banmandum musoh hase awaknyan peutaloe. Lagée su ureuëng kuk nyang mabök jijieb ié kreueh, meunan dumpék awaknyan di mideuen prang. Lagée darah keureubeuen nyang teurô u ateueh miseubah, meunan kheueh darah musoh awaknyan ka habéh rô.
16 Meunyoe uroe nyan ka teuka, TUHAN geupeuseulamat umat Gobnyan, lagée ureuëng meurabe jijaga bubiri jih nibak bahya. Awaknyan meucahya nibak tanoh TUHAN, lagée peumata mahkota nyang hu muble-ble.
17 Keubit that jroh tanoh TUHAN singoh teuma, keubit that ceudah dan jroh lumpah na! Bak teumpat nyang anggô dan gandom jitimoh luhu, teupeujeuet peumuda ngon dara meutamah teuga.


Chapter 10

1 Meunyoe musém khueng teuka, lakée kheueh ujeuen ubak TUHAN. Dan TUHAN geupeusapat awan nyang peuteuka reudok, dan geupeutron ujeuen raya sampoe bubena ladang ka jibeudôh ijo dan mangat badan keu bandum manusia.
2 Di ureuëng-ureuëng laén jijak mita peutunyok ubak beurala-beurala dan ubak tukang-tukang ramai nasib gob, teuma jaweueb-jaweueb nyang awaknyan teurimong na kheueh haba sulet dan buet seumeunget mandum. Na nyang peutrang keuhai lumpo, teuma nyang jipeutrang lé awaknyan na kheueh keuji peusisat gata, dan piasan nyang geubri lé awaknyan hana meuguna. Sabab nyan rakyat ka meucrebre lagée bubiri hana ureuëng rabe. Awaknyan meurana sabab hana soe nyang pimpén.
3 TUHAN meufeureuman, "Ulôn beungéh lumpah ubak ureuëng mat kuasa nyang pimpén ateueh umat Lôn, dan awaknyan Lôn huköm. Teuma peunduduek Yehuda na kheueh atra Ulôn, dan Ulôn, TUHAN Nyang Mahakuasa Lôn peulara awaknyan. Awaknyan Lôn peujeuet keuguda prang nyang paleng peukasa keu Ulôn.
4 Lamkawan awaknyan Lôn piléh peunguasa, peumimpén, dan panglima nyang peurintah ateueh umat Lôn."
5 Peunduduek Yehuda meunang lagée peujuang-peujuang nyang jigilo-gilo musoh lagée jibloh-bloh lam leuhob ateueh rot raya. Awaknyan meujuang sabab Ulôn, TUHAN geutulông awaknyan, dan pasokan musoh nyang giduek guda geupeutaloe lé awaknyan banmandum.
6 "Peunduduek Yehuda Lôn peuteuga, umat Israel Lôn peuseulamat. Ulôn peuwoe awaknyan lom u nanggroe jih keudroe sabab Ulôn sayang keu awaknyan. Teuma Lôn peusaneut awaknyan lagée bansa nyang hántom na Ulôn iengkeue. Ulôn kheueh TUHAN Allah awaknyan, bandum doá awaknyan Ulôn deungoe lom.
7 Umat Israel jeuet lagée pahlawan nyang teuga, lagée ureuëng nyang jieb ié anggô, awaknyan geumbira. Keuturonan awaknyan phon nibak jamén trok bak jamén hana jituwoe keu peumeunang nyang Ulôn bri nyoe. Awaknyan meusuka cita sabab buet nyang Lôn peubuet keu awaknyan.
8 Umat Ulôn Lôn tawök dan Ulôn peusaho sampoe habéh meusapat. Awaknyan Lôn peubeubaih dan Lôn peujeuet leubeh bak nyang ka.
9 Bahpi Ulôn sipreuk awaknyan lamkawan bansa-bansa, awaknyan teutab ji-ingat keu Ulôn nibak teumpat awaknyan tinggai. Awaknyan seulamat, meunan cit deungon aneuëk-aneuëk jih dan jiwoe meusigo-sigo u nanggroe jihnyan keudroe.
10 Di Meusé dan Asyur, awaknyan Ulôn peuwoe. Bak nanggroe jih keudroe awaknyan Ulôn keubah. Meunan cit Ulôn ba awaknyan u Gilead dan u Libanon, dan ban sibuju nanggroe ka peunoh deungon awaknyan.
11 Meunyoe awaknyan jijeumeurang laôt nyang payah, Ulôn, TUHAN nyang seupôt ateueh ié nyang meugulong meugulumbang; teuma tuwie Krueng Nil nyan tho hana meu ié bahpi meusitijoh. Bansa Asyur nyang sombong geupeuhina, dan nanggroe Meusé nyang peukasa ka gadôh keukuasaan.
12 Ulôn Lôn peukong umat Ulôn, awaknyan taát dan meubakti ubak Ulôn.


Chapter 11

1 He Libanon, tapeuhah kheueh bubena pintoe gata, mangat jeuet apui jitot bubena bak aras gata!
2 He bak kayée daru, meuba-e kheueh, sabab ka reubah bubena bak aron, bak kayée nyang ceudah-ceudah ka habéh reubah. He bak-bak kayée raya nyang na di Basan, tamo kheueh. Sabab bubena uteun-uteun nyang raya ka habéh teuteubang rata ngon tanoh.
3 Deungoe kheueh mo ba-e nyang mat kuasa ka habéh teusampôh keujayaan awaknyan! Deungoe su teumauem singa-singa nyang na lam gle; sabab ka habéh rusak teumpat tinggai awaknyan ban sipanyang Krueng Yordan.
4 TUHAN Po teu Allah meufeureuman ubak ulôn, "Neupeugot kheueh siulah-ulah gata tukang meurabe nyang rabe bubiri nyang keuneuk teusie.
5 Lé ureuëng nyang bloe jipoh maté bubena bubiri nyan deungon hana meuteumé huköman. Awaknyan nyang peubloe sie bubiri nyan jipeugah, 'Teupujoe kheueh TUHAN! Jinoenyoe geutanyoe meutamah kaya!' Tukang-tukang meurabe nyan hana meurasa inséuh keu bubiri-bubiri nyang jipeulara keudroe.
6 Ulôn hana le Lôn weueh keu soe mantong di nanggroe nyoe. Ulôn keudroe Lôn seurah bandum peunduduek nyoe ubak bandum peunguasa. Awaknyan jipeuhanco nanggroe nyoe, dan Ulôn hana Lôn reubot keukuasaan awaknyan."
7 Ulôn, Nabi Zakharia, laju geubri upah lé toke-toke bubiri keu lôn rabe bubiri-bubiri nyang keuneuk teusie. Bak ulôn na dua krek tungkat; nyang saboh ulôn boh nan "Keumurahan" dan nyang saboh teuk lôn boh nan "Ikatan". Óh lheueh nyan barô kheueh lôn peuphon jaga dan lôn peulara bubiri-bubiri nyan.
8 Ban lhée droe ureuëng meurabe nyang banci keu ulôn nyan geuhabéh saba ulôn. Awaknyan ulôn use lam watée si buleuen.
9 Óh lheueh nyan laju lôn peugah ubak bubiri nyang meukawan nyan, "Ulôn hana kutem le lôn rabe gata. Nyang keuneuk maté bah kheueh maté, dan nyang keuneuk binasa bah kheueh binasa. Dan nyang mantong tinggai bah kheueh saléng tameukrok-krok sabe keudroe-droe gata sampoe maté."
10 Laju tungkat nyang lôn boh nan, "Kemurahan" nyan ulôn cok laju ulôn wiet sibagoe tanda ka bateue peujanjian nyang ka geupeugot lé TUHAN deungon bandum bansa.
11 Bak uroe nyan cit teuma peujanjian nyan teupeubateue. Banmandum toke-toke bubiri nyan jikawai ulôn, awaknyan sada bahwa TUHAN teungoh geumeututoe meulalu peue-peue nyang ulôn peubuet.
12 Laju ulôn peugah ubak awaknyan, "Meunyoe Teungku-teungku situju, tabri kheueh upah keu ulôn; meunyoe hana, hana peue." Laju lé awaknyan jijok keu ulôn lhée ploh péng pirak sibagoe upah lôn. TUHAN meufeureuman ubak ulôn, "Peutamong laju péng nyan dalam kaih Baét Ulôn." Dan laju ulôn peutamong ban lhée ploh péng pirak nyan u dalam kaih Baét TUHAN. Teuma dub nyan kheueh peunghargaan awaknyan keu ulôn!
14 Óh ka lheueh nyan laju ulôn wiet tungkat ulôn nyang keudua, tungkat nyang ulôn boh nan "Ikatan", teuma bicah kheueh peusatuan Yehuda ngon Israel.
15 Dan meufeureuman kheueh TUHAN ubak ulôn, "Tapeubuet kheueh sigoe teuk siulah-ulah gata tukang meurabe, teuma goenyoe sibagoe tukang meurabe nyang hana gét.
16 Sabab Ulôn Lôn bri tugaih sidroe tukang meurabe keu jirabe kawan bubiri Lôn, teuma jihnyan hana jipakoe keu bubiri nyang gadôh; jihnyan hana jimita bubiri nyang sisat, dan hana teuma jipeu-ubat bubiri nyang luka, meunan cit hana teuma jibri makheun keu bubiri nyang mantong udeb. Teuma jihnyan keudroe jipajoh sie bubiri nyang paleng teumbon dan jilot gukée beulatang nyan.
17 Teukutok kheueh tukang meurabe nyang hana meuguna nyan! Jihnyan ka jitinggai kawan bubiri jih keudroe. Deungon prang teupeu habéh keukuasaan jihnyan. Jaroe jihnyan jeuet keu leumoh dan mata blaih uneuen jihnyan jeuet keubuta."


Chapter 12

1 Nyoe kheueh peusan TUHAN keuhai Israel. TUHAN nyang leueng langét, nyang cebta bumoe dan nyang bri udeb keu manusia, feureuman TUHAN,
2 "Ulôn Lôn peujeuet Yerusalem lagée piala nyang meuasoe ié anggô; nanggroe-nanggroe teutangga jihnyan teuma jijeb ié anggô nyan dan laju mumang meuhapit-hapit lagée ureuëng mabök. Dan meunyoe Yerusalem jikeupông, banda-banda di nanggroe Yehuda nyang na mantong tinggai, nyan pih jikeupông.
3 Teuma meunyoe uroe nyan ka teuka, Ulôn Lôn peujeuet Yerusalem lagée batée nyang geuhon; bansa toh mantong nyang jicuba-cuba jibeuôt batée nyan meuteumé bala. Bandum bansa di ateueh donya meusaho jijak prang Yerusalem.
4 Bak uroe nyan bandum guda Lôn peujeuet bingong dan ureuëng-ureuëng nyang giduek ateueh guda nyan Ulôn peupungoe, peunduduek Yehuda Lôn kawai, teuma bandum guda musoh Ulôn peubuta.
5 Laju lé keuluwarga-keuluwarga Yehuda jimariet lam até, 'TUHAN Nyang Mahakuasa kheueh nyang bri teunaga keu umat Gobnyan nyang tinggai di Yerusalem.'
6 Bak uroe nyan bubena keuluwarga Yehuda Lôn peujeuet lagée apui lam sinamon kayée atawa suwa nyang hu dimiyueb beurekah-beurekah gandom; awaknyan jipeubinasa bansa-bansa nyang na bansikeulileng jih. Teuma peunduduek Yerusalem teutab tinggai didalam banda deungon aman.
7 Ulôn, TUHAN, nyang phon-phon that Lôn peumeunang keu sipa-i Yehuda, mangat keuhoreumatan nyang jiteurimong lé keuturonan Nabi Daud dan peunduduek Yerusalem hana leubeh nibak keuhoreumatan nyang jiteurimong lé peunduduek Yehuda nyang laén.
8 Bak uroe nyan Ulôn Lôn lindong peunduduek Yerusalem; dan nyang paleng leumoh pih lamkawan awaknyan teuga lagée Nabi Daud. Awaknyan jibina lé keuturonan Nabi Daud lagée lé malaikat Lôn, dan lagée lé Ulôn keudroe.
9 Bak uroe nyan Ulôn Lôn peubinasa tieb-tieb bansa nyang jicuba-cuba jijak prang Yerusalem.
10 Óh lheueh nyan keuturonan Nabi Daud dan peunduduek Yerusalem Ulôn jok até nyang harok ubak jipeubuet gaséh sayang dan galak jimeudoá. Awaknyan jipandang jihnyan nyang ka jitôb dan jipeumo ba-e lagée ureuëng peuba-e aneuëk tunggai jih nyang ka maté. Awaknyan jimeuratok meuweueh-weueh, lagée ureuëng nyang ka gadôh aneuëk tuha.
11 Bak uroenyan na meuratok nyang paleng hebat di Yerusalem, lagée jipeuratok Hadad-Rimon di Pantôn Megido.
12 Dan tieb-tieb keuluwarga nyang na di nanggroe nyan jipeuratok maséng-maséng keudroe; keuluwarga keuturonan Nabi Daud, keuluwarga keuturonan Natan, keuluwarga keuturonan Lewi, keuluwarga keuturonan Simei, dan bandum keuluwarga nyang laén. Tieb-tieb keuluwarga jimo ba-e droe jih keudroe, di ureuëng-ureuëng agam nibak tieb keuluwarga jimeuratok teuaséng nibak ureuëng inong."


Chapter 13

1 TUHAN Nyang Mahakuasa meufeureuman, "Bak uroe nyan jiteubiet saboh mata ié keu teupeusuci keuturonan Nabi Daud dan peunduduek Yerusalem nibak desya dan jiseumah beurala nyang ka awaknyan peubuet.
2 Bak uroe nyan Lôn sampôh bubena nan-nan beurala nibak tanoh nyoe, sampoe hana meusidroe pih nyang na teu ingat. Bandum ureuëng nyang jiaku droe jih nabi Lôn use meusajan ngon awaknyan nyang na jitamong roh jeuhet.
3 Dan meunyoe mantong na ureuëng nyang jipeugah bahwa jihnyan jipeusampoe peusan, ayah ngon ma jih keudroe jipeugah ubak jihnyan bahwa jihnyan harôh teuhuköm maté, sabab nyang jipeugah nyan na kheueh beurakah. Meunyoe ureuëng nyan teutab aku droe teutab sibagoe nabi, jihnyan jitob sampoe maté lé yah ngon ma jih keudroe.
4 Nibak uroe nyan, bubena nabi meurasa malée keu meutindak sibagoe nabi. Awaknyan hana jingui peukayan nabi keu jimeusulet dan jipeubangga nyang deuh-deuh jikalon.
5 Sikeubit jih, awaknyan jipeugah, 'Ulôn bukon nabi. Ulôn sidroe peutani nyang meubuet bak ladang siumu udeb.'
6 Dan meunyoe na ureuëng teumanyong ubak gobnyan, 'Peue luka nyang na bak dada gata nyan?', jihnyan jijaweueb, 'Ulôn keunong luka nyoe di rumoh rakan lôn.' "
7 TUHAN Nyang Mahakuasa meufeureuman, "Beudôh kheueh, he peudeueng, dan jak prang kheueh tukang meurabe nyang meukeureuja keu Ulôn! Peumaté kheueh jihnyan, dan bubena bubiri meucrebre. Ulôn teuma Lôn jakprang umat Ulôn,
8 dan bansaboh nanggroe dua per lhée nibak peunduduek disinan maté.
9 Siper lhée nyang na seulamat. Dan awaknyan Lôn peusuci lagée pirak nyang jipeu gleh lé apui. Awaknyan Lôn ujoe lagée ureuëng ji ujoe méuh. Laju awaknyan meudoá ubak Ulôn, dan Ulôn Lôn jaweueb awaknyan. Ulôn Lôn peugah ubak awaknyan bahwa awaknyan na kheueh umat Lôn, dan awaknyan pi meungaku bahwa Ulôn kheueh TUHAN Allah awaknyan."


Chapter 14

1 Uroe mahkamah TUHAN ka tô that. Teuma Yerusalem jireupah, dan hase rampokan nyan jibagi-bagi dikeue mata gata.
2 TUHAN geupeusapat banmandum bansa mangat jijak prang Yerusalem. Banda nyan jireubot, bubena rumoh disinan jitamong lé pancuri, dan bubena ureuëng inong lam rumoh nyan jipeukosa. Siladum nibak peunduduek disinan jiangkot u teumpat nyang teuböih, teuma nyang leubeh nibak nyan teutab tinggai di teumpat nyan.
3 Laju TUHAN geumaju dan geumuprang ngon bansa-bansa nyan, lagée nyang ka geupeubuet bak jamén dilée.
4 Bak uroe nyan Gobnyan geudong bak Bukét Zaiton, siblaih u timu Yerusalem. Teuma Bukét Zaiton teuprah lé pantôn nyang luwah, phon di timu sampoe ubarat. Siladum nibak bukét nyan jiseuk u utara, dan siladum teuk u seulatan.
5 Gata taplueng meulalu pantôn nyang teubagi bukét nyan dua bagian. Gata taplueng lagée indatu gata watée teuka geumpa bumoe masa keurajeuen Uzia, raja Yehuda. Laju teuka kheueh TUHAN Po teu Allah lôn, geukawai lé bandum malaikat.
6 Meunyoe uroe nyan ka teuka, hana le udara leupie atawa éeh.
7 Nibak uroe nyan ka hana le seupôt seupeut. Uroe trang, meunan cit meunyoe watée malam. Teuma TUHAN kheueh nyang teupeue pajan uroe nyan teuka.
8 Nibak uroe nyan, ié sijuek ji-ile di Yerusalem; siladum nibak ié nyan ji-ile u Laôt Maté dan siladum teuk u Laôt Teungoh. Ié nyan ji-ile sipanyang thon, bah kheueh watée musém ujeuen meunan cit watée musém khueng.
9 Teuma TUHAN geumat peurintah sibagoe raja ateueh banmandum muka bumoe; soe mantong ureuëng jiseumah Gobnyan sibagoe Po teu Allah dan jituri Gobnyan deungon nan nyang saban.
10 Bansaboh nanggroe phon di Geba di utara sampoe u Rimon di seulatan, nyan jeuet keudarat. Teuma Yerusalem manyang meulambong, leubeh manyang nibak tanoh sikeulileng nyan; banda nyan meutamah luwah phon di babah Pintoe Geureubang Benyamin trok ubak Pintoe geureubang Sagoe, nyan kheueh babah pintoe geureubang Phon dan nibak Meunara Hananel sampoe trok ubak teumpat teuprah ié anggô atra raja.
11 Ureuëng ramé tinggai deungon aman di banda nyan, hana ancaman dan keubinasaan.
12 TUHAN geupeutron peunyakét nyang lumpah parah ateueh bandum bansa nyang ka jimuprang jilawan Yerusalem. Mata dan lidah awaknyan, dan bansaboh tuboh awaknyan brok seudangkan awaknyan mantong udeb.
13 Bak uroe nyan TUHAN geupeujeuet bansa-bansa nyan lumpah bingong dan teumakot sampoe soe mantong ureuëng jidrob rakan jihnyan nyang na siblaih jih dan jiprang gobnyan.
14 Ureuëng-ureuëng agam di Yehuda jimuprang keu jibila Yerusalem. Sibagoe hareuta rampasan awaknyan jicok bandum hareuta bansa-bansa bansilingka jihnyan, miseu jih méuh, pirak dan peukayan nyang meutumpok-tumpok.
15 Saboh peunyakét taéuen nyang lumpah parah keunong ateueh guda, bagal, unta dan keuleudée, dan bandum beulatang nyang na bak khimah musoh.
16 Óh lheuehnyan bandum ureuëng nyang na mantong udeb lamkawan bansa-bansa nyang prang Yerusalem, jijak ubak banda nyan keu jijak seumah Raja, TUHAN Nyang Mahakuasa, dan keu geupeuraya Khanuri Jambo Ôn.
17 Meunyoe na bansa nyang hana jitem jak u Yerusalem keu jiseumah Raja, TUHAN Nyang Mahakuasa, teuma di nanggroe ureuëng nyan hana jitron ujeuen.
18 Dan meunyoe ureuëng Meusé hana jitem peuna Khanuri Jambo Ôn, teuma keu awaknyan pi geupeutron peunyakét nyang geupeuteuka lé TUHAN u ateueh tieb-tieb bansa nyang hana jitem jak iébadat.
19 Nyan kheueh huköm nyang geupeutreun ateueh Meusé dan ateueh bandum bansa nyang hana jitem peuna Khanuri Jambo Ôn.
20 Bak uroe nyan bubena lonceng nyang na meugantung sibagoe peukayan guda geu-uke deungon tutoe haba nyang lagée nyoe, "Geupeukhusos keu TUHAN". Panci-panci nyang na bak Baét TUHAN jihareuga lagée cambông-cambông peuseumahan dikeue miseubah.
21 Bandum panci di Yerusalem dan bansaboh Yehuda geupeu khusos keu jeuet keu hak milék TUHAN Nyang Mahakuasa. Peunduduek nyang peuseumah keureubeuen jingui atranyan keu jireuboih sie peuseumahan. Meunyoe masa nyan ka teuka, hana le ureuëng meukat bak Baét TUHAN Nyang Mahakuasa.