1 Korintus

1 2 3 4 5 6 7 8 9 10 11 12 13 14 15 16


Chapter 1

1 Syedara-syedara jeumaáh Allah nyang na di Korintus! Gata ka geutawök lé Allah keu jeuet keu umat Gobnyan sabab Gata atra Isa Almaseh, meusajan-sajan ngon mandum ureuëng dipat mantong nyang jiseumah Tuhan geutanyoe Isa Almaseh, na kheueh Tuhan awaknyan dan Tuhan geutanyoe cit teuma. Ulôn, Paulus, dan syedara tanyoe Sostenes,
2 geumeuharab seumoga Allah Bapak geutanyoe dan Tuhan Isa Almaseh geubri beureukat dan keuseujahteuraan ubak gata.
3 Ulôn tuléh suratnyoe sibagoe rasui Isa Almaseh, nyang geuangkat lé Allah keudroe dan ateueh keuheundak Gobnyan cit teuma.
4 Ulôn sabe lôn lakée teurimong gaséh ubak Allah keuhai gata, sabab gata katateurimong rakhmat nibak Allah meulalu Isa Almaseh.
5 Sabab gata ka jeuet keumilék Almaseh, ngon lagéenyan udeb gata kaya lam sigala hai. Peungeutahuan gata lam hai peue mantong lhok lumpahna, dan gata carông tapeurunoe peungeutahuan nyan.
6 Ngon lagéenyan ka teutunyok bak gata bahwa haba keuhai Almaseh ka jitamong that lam até gata,
7 sampoe gata hana kureueng meusapeue beureukat pi, teungoh gata tapreh Tuhan tanyoe Isa Almaseh geuteuka dan jikalon lé mandum ureuëng.
8 Almaseh keudroe teuma geujamin gata sampoe án pagée; watée gobnyan geuteuka lom, gobnyan meurumpok ngon gata ngon hana meucupa.
9 Po teu Allah jeuet teupeucaya sipeunoh até. Gobnyan kheueh Allah nyang ka geuhôi gata keu jeuet meusaboh ngon Aneuëk Gobnyan, na kheueh Isa Almaseh, Tuhan tanyoe.
10 Syedara-syedara! Ateueh nan Tuhan geutanyoe Isa Almaseh, ulôn lakée mangat gata banmandum sapeue kheun; mangat békna nyang crebre lamkawan gata. Bah kheueh gata meusaboh, siaté dan sapeue pike.
11 Sabab, ureuëng-ureuëng nibak keuluwarga Kloë jijak lapor ubak ulôn bahwa gata sabe keudroe-droe na meudakwa.
12 Nyang ulôn meukeusut na kheueh bahwa lamkawan awaknyan na nyang peugah lagée nyoe, "Ulôn seutôt Paulus," nyang laén na teuma nyang peugah, "Ulôn kuseutôt Apolos," nyang laén jipeugah teuma, "Ulôn seutôt Petrus," teuma nyang laén lom jipeugah, "Ulôn kuseutôt Almaseh."
13 Hana mungken Almaseh teubagi-bagi! Paulus hana maté bak kayée saleb keugata! Gata pi hana teupumanö keu jeuet keumurit-murit Paulus, nyoe peukon?
14 Syukoe kheueh ulôn hana kupumanö meusidroe pih nyang na lamkawan gata, seulaén Krispus dan Gayus.
15 Bék sampoe meusidroe pih jipeugah bahwa ulôn ka lôn pumanö jih nyan mangat jeuet keumurit ulôn. (
16 Oh nyoe, Stefanus dan keuluwarga jih, keubiet ulôn nyang pumanö awaknyan. Teuma seulaén nibak nyan, meunurot nyang lôn ingat, hana le nyang ulôn pumanö.)
17 Almaseh geu-utus ulôn bukon keu lôn pumanö manusia, teuma keu ulôn peusampoe Haba Gét nyang teuka nibak Po teu Allah; dan nyan pih harôh ulôn peubuet ngon hana lôn peuguna keuhai carông ulôn meututoe seucara manusia, mangat kuasa nibak maté Almaseh bak kayée saleb nyan hana jeuet keusia-sia.
18 Sabab nibak ureuëng nyang jituju ubak keubinasaan, haba keuhai maté Almaseh bak kayée saleb nyan na kheueh haba sulet. Teuma, keugeutanyoe nyang geupeu seulamat lé Po teu Allah, haba nyan na kheueh cara jih Allah geutunyok kuasa Gobnyan.
19 Sabab lam Alkitab Allah meufeureuman, "Keubijaksanaan ureuëng árif Ulôn peukaru, dan peungeurtian ureuëng-ureuëng meuiéleumé Lôn peubinasa."
20 Ngon lagée nyan, keupeuguna jih ureuëng-ureuëng nyang árif lagée nyan? Keupeuguna jih awaknyan nyang na iéleumé? Keupeuguna jih ahli-ahli seumike lam donya? Allah ka geutunyok bahwa keubijaksanaan donya nyoe na kheueh hana meuguna!
21 Sabab, pakriban mantong carông jih manusia, ureuëng nyan hana hase jituri Allah rot carông jihnyan keudroe. Teuma sabab Allah nyang bijaksana, ngon lagée nyan Gobnyan geutem peuseulamat ureuëng-ureuëng nyang meuiman ubak Gobnyan rot haba nyang kamoe peusampoe jianggab haba buhak lé donya. 22 Ureuëng Yahudi jilakée buet ajaéb sibagoe bukeuti, dan di ureuëng Yunani jipeunteng keuhai keubijaksanaan donya nyoe.
23 Teuma tanyoenyoe nyang tapeusampoe Almaseh nyang maté bak kayée saleb. Haba nyan teusinggong peurasaan ureuëng-ureuëng Yahudi, dan jianggab haba buhak lé ureuëng-ureuëng nyang bukon Yahudi. Dan ureuëng nyang bukon Yahudi jianggab nyan na kheueh bangai lagoena.
24 Teuma pakriban keu ureuëng-ureuëng nyang ka geuhôi lé Po teu Allah -- bah kheueh ureuëng Yahudi meunan cit nyang kon Yahudi -- habanyan, cara jih Po teu Allah geutunyok kuasa dan keubijaksanaan Gobnyan.
25 Sabab nyang leumoh bangai nibak Allah, na kheueh leubeh bijaksana nibak keubijaksanaan manusia; dan nyang deuh jih leumoh nibak Allah, na kheueh leubeh teuga nibak teunaga manusia.
26 Syedara-syedara! Cuba gata ingat pakriban keuadaan gata watée Allah geutawök gata. Bacut sagai nyang na lamkawan gata nyang bijaksana, atawa nyang meukuasa, atawa keududukan manyang meunurot bakmata manusia.
27 Sabab keubiet Allah geusaja geupiléh nyang jianggab bangai lé donya, mangat bubena ureuëng carông jeuet keumalée. Dan Allah geupiléh teuma nyang jianggab hana meudaya lé donya, mangat ureuëng-ureuëng nyang gagah peukasa jeuet keumalée. 28 Po teu Allah geupiléh nyang jianggab miyueb, hina, dan nyang jianggab hana meuguna lé donya nyoe, mangat Allah geupeu hanco nyang jianggab peunteng lé donya.
29 Ngon lagée nyan hana meusidroe pih nyang jeuet jipeusombong droe dikeue Po teu Allah.
30 Allah keudroe kheueh nyang peujeuet sampoe Gata meusaboh ngon Isa Almaseh. Meulalu Almaseh, tanyoe geupeujeuet bijaksana. Dan meulalu Gobnyan cit teuma Po teu Allah geupeujeuet tanyoe tameuget lom deungon droe Gobnyan, geupeujeuet tanyoe umat Gobnyan nyang khusos dan geupeubeubaih geutanyoe.
31 Teuma, lagée nyang na teutuléh lam Alkitab, "Ureuëng nyang jitem peubangga-bangga droe, harôh jipeubangga droe ateueh peue nyang geupeubuet lé Tuhan."


Chapter 2

1 Syedara-syedara! Bak watée ulôn jak ubak gata dan ulôn britée bak gata keuhai reuncana Allah nyang gohlom jiteupeue lé donya, ulôn hana lônpeuguna keubijaksanaan donya nyoe atawa lôn meututoe ngon haba nyang buhak.
2 Sabab ulôn ka lôncok teukat bahwa simantong ulôn na meusajan gata, ulôn hana lôn peugah sapeue, seulaén keuhai Isa Almaseh; khusos jih keuhai Gobnyan ka maté bak kayée saleb.
3 Watée ulôn mantong na meusajan ngon gata, ulôn hana leumoh dan yo ngon teumakot.
4 Haba nyang ulôn peutrok bak gata hana ulôn peutrok ngon tutoe nyang meunarek meunurot keubijaksanaan manusia. Ulôn peutrok nyan ngon cara teubri bukeuti bahwa Roh Allah meukuasa.
5 Ulôn peubuet lagée nyan, mangat keupeucayaan gata ubak Almaseh hana meudasai bak keubijaksanaan manusia, teuma meudasai bak kuasa Po teu Allah.
6 Bah kheueh meunan, lamkawan ureuëng-ureuëng nyang udeb rohani jih ka biet-biet kong, keubiet ulôn meututoe keuhai keubijaksanaan. Teuma keubijaksanaan nyoe bukon keubijaksanaan donya, atawa keubijaksanaan ureuëng-ureuëng nyang mat kuasa jamén nyoe, nyang keukuasaan jih teuma habéh.
7 Keubijaksanaan nyang ulôn peugah nyan na kheueh keubijaksanaan nibak Po teu Allah. Keubijaksanaan nyan hana jiteupeu lé donya, teuma Allah ka geukeubah keu keubahgiaan tanyoe sigohlom donya nyoe geupeujeuet.
8 Hana meusidroe pih nibak ureuëng-ureuëng mat kuasa jamén nyoe nyang jiteupeu keuhai keubijaksanaan nyan. Sabab, seukira jih awaknyan ka jiteupeue, ka teuntée awaknyan hana jisaleb Tuhan nyang mulia nyan.
9 Sibeuna jih hainyan na kheueh lagée nyang teutuléh lam Alkitab, "Peue nyang hántom jingieng atawa jideungoe lé manusia, dan hántom teuma jiteubiet lam pikeran manusia, nyan kheueh nyang geukeubah lé Allah keu ureuëng-ureuëng nyang gaséh keu Gobnyan."
10 Teuma Allah ka geupeugah nyan bak geutanyoe ngon peurantaraan Roh Gobnyan. Roh Allah nyan jiseulidek peue-peue mantong, sampoe ubak reuncana-reuncana Allah nyang paleng teusöm.
11 Sabab nyang leubeh teupeu asoe até sidroe-droe ureuëng na kheueh roh ureuëng nyan keudroe, nyoe peukon? Meunan cit keuhai Allah. Nyang teupeu asoe até Allah na kheueh Roh Allah keudroe!
12 Dan keugeutanyoe hana geubri roh donya nyoe, teuma na kheueh Roh nyang teuka nibak Allah, mangat tanyoe tateupeue mandum nyang ka geuanugeurah lé Po teu Allah keugeutanyoe.
13 Sabab nyan, meunyoe kamoe peugah keuhai-hai Allah ubak ureuëng-ureuëng nyang ka na Roh Allah, kamoe hana kamoe peugah meunurot keubijaksanaan manusia, teuma na kheueh meunurot nyang geupurunoe lé Roh Allah nyan keudroe.
14 Ureuëng nyang hana nibak jih Roh Allah, hana hase jiteurimong peue nyang geupeugah lé Roh nyan. Sabab nibak ureuëng nyan hai-hai nyang lagée nyan na kheueh buet nyang bangai. Ureuëng nyan hana hase jimuphom, sabab hainyan hase teunilai ngon cara rohani.
15 Ureuëng nyang na nibak jih Roh Allah hase jinilai peue-peue mantong, teuma hana meusidroe pih nyang na hak jinilai Gobnyan.
16 Lam Alkitab na teutuléh lagée nyoe, "Soe nyang teupeu pikeran Tuhan? Dan soe nyang hase jibri naseuhat ubak Gobnyan?" Tanyoe nyang na pikeran nyang saban ngon Almaseh!


Chapter 3

1 Syedara-syedara, sibeuna jih ulôn hana jeuet lôn meututoe ngon gata lagée ureuëng nyang na Roh Allah. Ulôn jeuet lôn meututoe ngon Gata lagée ureuëng nyang mantong udeb meunurot nyang jikeuheundak lé donya; lagée ureuëng nyang mantong manyak lam hai keupeucayaan jih ubak Almaseh.
2 Yoh masa ilée ulôn hase lôn bri keugata peunajoh aneuëk manyak, kon peunajoh ureuëng rayeuk; sabab gata gohlom seb teuga keuhai nyan. Teuma bak watéenyoe pih gata gohlom seb teuga keuhai nyan,
3 sabab gata mantong udeb meunurot tabiát seucara manusia. Sabab meunyoe gata mantong na bingiek até dan tameulo sabe keudroe-droe, peu kheueh lagée nyan bukon sibagoe dali gata mantong udeb meunurot tabiát manusia, lagée ureuëng nyang hana jituri keu Po teu Allah?
4 Meunyoe na nyang peugah, "Kamoe seutôt Paulus," dan nyang laén jipeugah, "Kamoe seutôt Apolos," peu kheueh nyang lagée nyan gata mantong taturot tabiát ureuëng-ureuëng donya?
5 Nyang sibeuna jih soe kheueh Apolos nyan? Dan soe teuma Paulus nyan? Kamoe na kheueh peulayan-peulayan Allah, nyang ka kamoe bimbeng gatanyoe keu tameuiman ubak Almaseh. Kamoe cuma kamoe keureuja buet nyang ka geubri lé Tuhan ubak kamoe maséng-maséng.
6 Ulôn nyang pula dan Apolos nyang siram, teuma Allah keudroe kheueh nyang peujeuet seunaman nyan timoh.
7 Ngon lagée nyan, nyang peunteng na kheueh Po teu Allah, sabab Gobnyan kheueh nyang peutimoh. Nyang pula dan nyang siram hana peunteng;
8 banduanyan na kheueh santeuet. Maséng-maséng teuma jiteurimong upah meunurot buet nyang jipeubuet nyan.
9 Kamoe na kheueh ureuëng-ureuëng nyang saban kamoe mubuet keu Allah; dan gata na kheueh lagée ladang Allah. Gata-gata banmandum na kheueh lagée geudong Allah cit teuma.
10 Ngon carông nyang geubri lé Allah, ulôn sibagoe ahli bangunan ka ulôn puduek keunaleueng nibak bangunan nyan, dan ureuëng laén jipeudong geudong nibak keunaleueng nyan. Tieb-tieb ureuëng harôh jipeurati beugét-gét pakriban jipeudong ateueh keunaleueng nyan.
11 Sabab Allah keudroe ka geukeubah Isa Almaseh sibagoe sidroe ureuëng nyang hana tandengan jih keu keunaleueng geudong nyan; hana keunaleueng nyang laén.
12 Na nyang peudong ateueh keunaleueng nyang jiboh ngon méuh, nyang boh pirak, na nyang peuguna batée peumata, na nyang peuguna kayée, naleueng tho dan jeurami.
13 Buet sidroe-droe ureuëng teuma deuh teukalon singoh watée Almaseh geuteuka lom teuma. Sabab bak watée nyan apui teuma jipeudeuh buet maséng-maséng ureuëng. Apui teuma jiujoe dan jipeuteuntée gét ngon hana buet nyan.
14 Meunyoe geudong nyang jipeudong lé gob ateueh keunaleueng nyan hana tutong watée teutot ngon apui, ureuëng nyan teuma jiteurimong hadiah jih.
15 Teuma meunyoe buet gob nyan tutong, jihnyan teuma rugoe; jih keudroe teuma seulamat, teuma lagée ureuëng nyang teuhinda nibak jilui apui.
16 Peu kheueh Gata teupeu bahwa gatanyoe Baét Allah? Dan bahwa Roh Allah tinggai lam gata?
17 Meunyoe na ureuëng nyang jipeurusak Baét Allah, Allah pih teuma geupeu rusak ureuëng nyan. Sabab Baét Allah na kheueh khusos keu Allah mantong, dan gata kheueh baét nyan.
18 Bék na meusidroe ureuëng pih jitipée droe jih keudroe. Meunyoe ureuëng lamkawan gata meurasa droe jih bijaksana meunurot ukoran donya nyoe, ureuëng nyan harôh jeuet keu ureuëng bangai, mangat jihnyan biet-biet jeuet keu ureuëng bijaksana.
19 Sabab, nyang jianggab bijaksana lé donya na kheueh bangai nibak Allah. Lam Alkitab na teutuléh lagée nyoe, "Allah geujeubak ureuëng-ureuëng bijaksana lam ceureudek awaknyan keudroe."
20 Na lom teutuléh lagée nyoe, "Tuhan geuteupeue bahwa pikeran ureuëng-ureuëng nyang bijaksana na kheueh pikeran nyang hana meuguna."
21 Sabab nyan, bék kheueh na meusidroe ureuëng pih jisanjong-sanjong manusia, sabab peue-peue mantong ka geubri jeuet keumilék gata: 22 Paulus, Apolos, Petrus, donya nyoe, udeb ngon maté, jamén nyoe meunan cit jamén nyang teuma teuka, banmandum nyan na kheueh milék gata.
23 Gata na kheueh milék Almaseh, dan Almaseh milék Po teu Allah.


Chapter 4

1 Anggab kheueh kamoenyoe peulayan-peulayan Almaseh, nyang meutanggong jaweueb kamoe peusampoe reuncana-reuncana Allah nyang gohlom jiteupeu lé donya.
2 Nyang phon-phon that jituntot lé peulayan nyang lagée nyan na kheueh bahwa jihnyan seutia ubak teungku droe jih.
3 Nibak ulôn, hana jeuet keumasaalah peue nyang gata -- atawa soe mantong -- pi jipike keuhai droe ulôn. Teuma peue nyang sibeuna jih ulôn pike keuhai droe ulôn keudroe nyan pih hana jeuet keusoai.
4 Ulôn hana meurasa meusalah lam hai peue mantong, teuma nyan bukon sibagoe bukeuti bahwa ulôn hana salah. Tuhan keudroe kheueh nyang peuteuntée peu kheueh ulôn salah atawa hana.
5 Ngon sabab nyan, sabab gohlom trok watée jih, bék kheueh gata bagaih-bagaih gata peuteuntée bahwa sidroe-droe ureuëng nyan salah atawa hana. Preh kheueh sampoe Tuhan geupreh. Gobnyan kheueh nyang peuhah peue-peue mantong nyang teusöm lam seupôt. Gobnyan kheueh nyang teuma peuteubiet banmandum nyang na niet teusöm lam até manusia. Bak watéenyan kheueh tieb-tieb ureuëng jiteurimong nibak Po teu Allah puja ngon pujoe nyang patot jiteurimong.
6 Syedara-syedara! Keu keupeuntengan gata, atranyan ka ulôn peungui ateueh Apolos dan ateueh droe lôn keudroe. Meukeusut jih ngon na cuntoh nibak kamoe nyan gata jeuet tameurunoe peumakna jih nyang teupeugah nyoe, "Mumat kheueh bak peuratoran nyang na." Ngon lagéenyan hana meusidroe pih nibak gata nyang jeuet tapeubangga-bangga sidroe-droe ureuëng, laju gata hina nyang laén.
7 Soe kheueh nyang peujeuet Gata leubeh nibak ureuëng laén? Bukon mandumnyan Gata teurimong nibak Allah? Ngon lagée nyan, pakon Gata keuneuk peusombong droe, siulah-ulah peue nyang na nibak Gata nyan kon mandum nyang geubri?
8 Beutôi gata hana tapeureulée sapeue! Gata ka kaya! Gata ka jeuet keuraja! Dan kamoe hana. Paleng gét meunyoe gata biet-biet ka jeuet keu raja, mangat kamoe jeuet kamoe matpeurintah meusajan gata.
9 Sabab meunurot nyang lôn pike, kamoe nyang rasui-rasui nyoe, ka geupeujeuet lé Allah sibagoe nyang jinonton dikeue manusia dan malaikat. Kamoe lagée ureuëng-ureuëng hina nyang jipeurhot huköman maté dikeue rakyatba dan jisurak-surak lé donya nyoe.
10 Sabab Almaseh, kamoe na kheueh ureuëng nyang bangai, dan gata ureuëng Kristen nyang carông! Kamoe leumoh, gata teuga! Kamoe jikheun lé gob, dan gata jisanjong-sanjong!
11 Trok bak watée nyoe kamoe teundeuk dan grah; peukayan kamoe tinggai bak tuboh; ureuëng jiseksa kamoe; kamoe hana teumpat keu kamoe meureuhat;
12 Kamoe banteng tuleueng jakmita beulanja. Meunyoe kamoe jicarot, kamoe balaih ngon beureukat; meunyoe kamoe ji iélanya, kamoe saba;
13 meunyoe ureuëng jipeubrok-brok kamoe, kamoe balaih ngon tutoe haba nyang maméh. Kamoe hana leubeh nibak brôh donya nyoe; trok bak watéenyoe kamoe mantong jianggab lagée brôh ateueh bumoe.
14 Ulôn tuléh nyoe keugata kon meukeusut kamoe pumalée gata, teuma sibagoe naseuhat keugata lagée aneuëk-aneuëk lôn keudroe.
15 Sabab ulôn kheueh nyang jeuet keu bapak gata, bah kheueh mungken sibagoe ureuëng Kristen, gata kana siploh ribée droe gurée. Lam udeb gata sibagoe ureuëng-ureuëng meusaboh ngon Almaseh, ulôn nyang jeuet keu bapak gata, sabab ulôn nyang ba Haba Gét keuhai Almaseh keu gata.
16 Ngon sabab nyan ulôn lakée ngon meuharab that mangat gata seutôt cuntoh nyang na bak ulôn.
17 Keunyan ulôn ka lôn kirém Timotius ukeue gata. Sibagoe murit Almaseh, jihnyan saban lagée aneuëk lôn keudroe nyang ulôn gaséh. Jihnyan aneuëk nyang jeuet teupeucaya. Singoh jihnyan teuma jipeuingat gata keuhai cara udeb nyang ulôn peujak óh ka lheueh lôn meuiman ubak Almaseh, na kheueh cara udeb nyang ulôn purunoe nibak tieb-tieb jeumaáh dipat mantong.
18 Na padubdroe lamkawan gata nyang ka jeuet keu ureuëng sombong, sabab awaknyan jipike ulôn hana lônjak bak gata.
19 Teuma meunyoe Tuhan geubri idhin ulôn teuma teuka cit ubak gata hana treb le. Singoh watée ulôn lôn ngieng cit teuma peue nyang hase jipeubuet lé ureuëng-ureuëng sombong nyan; kon haba jih mantong.
20 Sabab meunyoe Allah geupeurintah udeb sidroe-droe ureuëng, hainyan teubukeuti lé teunaga udeb ureuëng nyan, kon ngon tutoe haba jih.
21 Ngon lagée nyan, piléh mantong peue nyang gata galak! Peu kheueh gatatem ulôn teuka keu lôn purunoe gata ngon kreueh atawa ulôn teuka jak purunoe gata ngon leumoh leumbot dan gaséh sayang?


Chapter 5

1 Ulôn ka kuteurimong laporan bahwa lamkawan gata na nyang kajipeubuet buet-buet nyang cabui biet-biet luwabiasa: Na ureuëng lamkawan Gata nyang jimeumukah ngon ma ui jih. Ureuëng-ureuëng nyang hana jituri Tuhan mantong hánjipeubuet nyang lagée nyan!
2 Bah kheueh ka lagée nyan, Gata mantong cit manyang até. Nyang sibeuna jih Gata seudeh, dan Gata peuteubiet lamkawan Gata ureuëng nyang peubuet lagée nyan.
3 Seucara lahé ulôn jiôh nibak gata, teuma seucara baten ulôn na lamkawan gata. Ngon lagée nyan, ulôn keuneuk meutindak siulah-ulah ulôn na lamkawan gata, "Ateueh nan Tuhan Isa Almaseh, ulôn peugah bahwa ureuëng nyangka jipeubuet buet lagée nyan kutoe, ureuëng nyan meuseuti teuhuköm!" Meunyoe gata meusapat anggab mantong ulôn nyoe na lamkawan gata, dan ngon kuasa Tuhan tanyoe Isa,
5 gata meuseuti tajôk ureuëng nyang lagée nyan ubak Iblih mangat tuboh ureuëng nyan binasa dan ngon lagée nyan roh jih teupeuseulamat watée Tuhan teuka lom teuma.
6 Hana patot gata meurasa sombong. Mungken gata ka tadeungoe pribasa lagée nyoe, "Rago nyang bacut jipeujeuet mandum nyang teulawok jeuet meukeumang!"
7 Böih kheueh leubeh ilée rago nyang ka treb nyan, na kheueh rago desya, mangat gata jeuet lagée tupông nyang teulawok nyang barô, gleh nibak rago desya nyang treb, dan ulôn kuteupeu gata keubiet lagée nyan. Sabab, peurayaan Paskah tanyoe ka siab, sabab Almaseh nyang jeuet keububiri Paskah geutanyoe, ka lheueh teukeureubeuen.
8 Ngon lagée nyan, jak kheueh geutanyoe tapeuraya Paskah nyan ngon ruti nyang hana meuragoe, na kheueh ruti nyang teupeulambang ubak keumurnian dan banmandum nyang meukeunong nibak até Allah. Bék geutanyoe tapeuna peurayaan Paskah nyan ngon ruti nyang mantong na rago nyang awai, na kheueh rago desya dan keujeuhetan.
9 Lam surat ulôn nyang ka lheueh, ulôn peugah ubak gata mangat bék meurakan ngon ureuëng nyang peubuet cabui.
10 Nyang ulôn meukeusut kon kheueh ureuëng nyang cabui atawa leuha, atawa tukang teumipée atawa nyang seumah beurala nyang sagai-sagai hana jituri keu Po teu Allah. Kon nyan! Ulôn hana meukeusut keu awaknyan; sabab meunyoe gata harôh tapeujiôh awaknyan, ka teuntée gata tateubiet beuhabéh lam donya nyoe.
11 Nyang lôn meukeusut na kheueh, gata bék meurakan ngon ureuëng nyang meungaku droe jih ureuëng Kristen, teuma ureuëng nyan jipeubuet cabui, atawa leuha, atawa jiseumah beurala, atawa galak jipeubrok-brok ureuëng laén, atawa tukang mabök, atawa tukang ceumeucue. Gata duek sira tamakheun ngon ureuëng lagée nyan pih bék!
12 Beutôi nyang peusidang ureuëng-ureuëng Kristen kon buet ulôn. Allah keudroe kheueh nyang teuma peusidang awaknyan. Teuma keuhai anggota-anggota jeumaáh gata, kon kheueh gata keudroe nyang meuseuti peusidang awaknyan? Lam Alkitab na teutuléh lagée nyoe, "Use kheueh ureuëng jeuhet nyang na lamkawan gata."


Chapter 6

1 Pakon na lamkawan gata jijeuet ba ubak hakém nyang hana jituri keu Allah, gata jakgadu syedara gata nyang seuiman, meunyoe jihnyan jimeudakwa ngon syedara jih nyan? Pakon jihnyan hana jilakée umat Allah nyang peuseuleusoe peukara jih nyan?
2 Peu kheueh gata hana tateupeue bahwa umat Allah teuma jipeusidang donya nyoe? Ngon lagée nyan, meunyoe keubiet gata keuneuk peusidang donya nyoe, peu kheueh gata hana hase gata peuseuleusoe peukara-peukara peungadelan nyang hana meumakna?
3 Peu kheueh gata hana tateupeue bahwa tanyoe teuma tapeusidang malaikat-malaikat? Leubeh-leubeh lom peukara-peukara udeb tieb-tieb uroe!
4 Teuma meunyoe teuka peukara-peukara nyang lagée nyan, peu kheueh gata gadu bak ureuëng-ureuëng nyang sagai-sagai hana jabatan lam jeumaáh?
5 Biet-biet malée that! Teuntée lamkawan gata na ureuëng nyang leubeh bijaksana keu jipeuseuleusoe hai-hai nyang na hubongan ngon seuliseh paham ngon syedara-syedara sabe ureuëng Kristen!
6 Nyang na teuka meubalek sidroe ureuëng Kristen jijak bak ureuëng nyang bukon Kristen keu jijak gadu peukara jih keuhai syedara jih nyang Kristen!
7 Bék jak meupeukara bak ureuëng nyang kon Kristen; ngon na seuliseh paham sabe keudroe-droe gata nyan pih ka jeuet keutalo nibak gata. Leubeh gét gata jipeubuet hana ade, atawa jipeurugoe!
8 Teuma rupari gata keudroe nyang peusaneut ateueh ureuëng laén ngon hana ade. Gata keudroe teuma nyang peurugoe ureuëng laén. Dan nyan gata peubuet ateueh syedara-syedara gata seuiman!
9 Peu kheueh gata teupeu bahwa ureuëng-ureuëng nyang hana jipatéh kheun Allah, hana teuma jeuet keu anggota umat Allah? Bék keunong peungeuet! Ureuëng-ureuëng nyang peubuet cabui, ureuëng-ureuëng seumah beurala, nyang meumukah, nyang peubuet-buet nyang that-that malée ateueh ureuëng sabe jeunéh,
10 nyang ceumeucue, nyang leuha, tukang mabök, nyang galak peubrok ureuëng laén, dan ureuëng nyang meulakée ngon paksa atra ureuëng laén -- banmandum ureuëng nyang lagée nyan hana teuma jeuet keuanggota umat Allah.
11 Na meupadub droe lamkawan gata yoh ilée na nyang peubuet lagée nyan. Teuma jinoenyoe gata teupeugah ka gleh nibak desya. Gata ka jeuet keu milék Allah nyang khusos. Gata ka gét lom teuma ngon Allah, sabab gata meuiman ubak Tuhan Isa Almaseh dan kareuna kuasa Roh nibak Allah geutanyoe.
12 Na nyang peugah bahwa soemantong ureuëng jeuet jipeubuet ban galak droe. Teuma nibak ulôn hana banmandum nyan meuguna. Ngon lagée nyan bah kheueh ulôn nyoe jeuet lôn peubuet peue mantong, teuma ulôn teutab hana lôn peubiyeu droe ulôn jikuasa lé peue mantong.
13 Na cit nyang peugah bahwa peunajoh keu asoe pruet, dan pruet teukeubah keu peunajoh. Teuma bandua nyan geusampôh lé Po teu Allah. Tuboh manusia hana jeuet teupeuguna keu teupeuna hubongan nyang cabui, teuma na kheueh keuteupeutimang Tuhan. Dan Tuhan teuma geupeulara tuboh nyan.
14 Allah ka geupeu udeb Tuhan Isa Almaseh nibak maté, meunan cit ngon Allah geupeu udeb tanyoe ngon kuasa Gobnyan.
15 Syedara-syedara tateupeue bahwa tuboh gata nyan na kheueh anggota tuboh Almaseh. Ngon lagée nyan, peu kheueh jeuet lôncok saboh anggota tuboh Almaseh laju lôn peujeuet keuanggota tuboh sidroe inong jeuhet? Sagai-sagai hán jeuet!
16 Atawa mungken gata gohlom tateupeue bahwa ureuëng nyang meumukah ngon sidroe inong jeuhet, ureuëng nyan ka jeuet meusaboh ngon inong jeuhet nyan! Sabab lam Alkitab na teutuléh lagée nyan, "Manduanyan ka jeuet keusaboh."
17 Teuma ureuëng nyang peusaboh droe ngon Tuhan, Roh Tuhan ngon roh ureuëng nyan ka jeuet meusaboh.
18 Peujiôh kheueh buet-buet nyang cabui. Sabab mandum desya laén nyang jipeubuet lé gob, jeuetjih diluwa tuboh ureuëng nyan. Teuma keu ureuëng nyang peubuet cabui, nyan saban cit ka jipeubuet desya ateueh tuboh jih keudroe.
19 Gata harôh tateupeue bahwa tuboh gata na kheueh teumpat tinggai Roh Allah. Rohnyan tinggai lam tuboh gata. Dan Allah keudroe kheueh nyang bri Roh nyan keu gata. Droe Gata nyan kon atra gata. Nyan atra Po teu Allah.
20 Allah ka geubloe gata dan ka geubayeue ngon lunaih. Sabab nyan, peuguna kheueh tuboh gata lagée nyan bagoe sampoe Allah teupeumulia.


Chapter 7

1 Jinoenyoe ulôn keuneuk peugah haba keuhai nyang gata peugah lam surat gata. Meunyoe sidroe ureuëng agam hana meukawen, nyan gét.
2 Teuma mangat bék teupeudaya ngon hai-hai nyang hana patot, leubeh gét sidroe ureuëng agam na purumoh jih keudroe dan tieb-tieb inong na lakoe jih keudroe.
3 Ureuëng lakoe harôh jipeupeunoh keuwajéban jih sibagoe lakoe keue purumoh jih, dan di purumoh harôh teuma jipeupeunoh keuwajéban jih sibagoe purumoh keue lakoe; maséng-maséng jipeupeunoh keuwajéban jih ateueh ureuëng laén.
4 Purumoh hana meukuasa ateueh tuboh jih keudroe; nyang meukuasa ateueh tuboh jih na kheueh lakoe. Meunan cit lakoe hana meukuasa ateueh tuboh jih keudroe; nyang meukuasa ateueh tuboh jih na kheueh purumoh.
5 Bék kheueh peujiôh sidroe ngon nyang laén seusabe lakoe binoe. Jeuet mantong meunyoe sikeujab, asai ateueh situju ban dua blaih pihak. Ngon lagée nyan maséng-maséng meuteumé meudoá ngon cara hana teuganggu. Teuma óh lheueh nyan bah kheueh gata saléng tameurab lom sibagoe ureuëng meulakoe binoe. Meunyoe hana lagée nyan, singoh gata teuma jisáh lé roh jeuhet, sabab gata hana teuga tapeuteun hawa nafeusu.
6 Nyang ulôn peugah nyoe kon kheueh sibagoe peurintah, teuma sibagoe naseuhat.
7 Nyang sibeuna jih ulôn leubeh galak meunyoe mandum ureuëng lagée ulôn. Teuma maséng-maséng ka teuterimong karonya nyang khusos nibak Po teu Allah. Sidroe ureuëng na karonya lagée nyoe, nyang laén na teuma karonya nyan.
8 Keu ureuëng-ureuëng nyang gohlom meukawen dan keu ureuëng-ureuëng inong nyang ka balée, nyoe kheueh naseuhat ulôn: Leubeh gét Gata teutab udeb lagée ulôn.
9 Teuma meunyoe Gata hana hase tapeuteun nafeusu, bah kheueh Gata meukawen. Sabab leubeh gét Gata meukawen nibak nafeusu gata meuhuéb-huéb lagée apui hu.
10 Keu ureuëng nyang ka meukawen, nyoe kheueh peurintah ulôn: (Nyang sibeuna jih kon ulôn nyang bri peurintah nyoe, teuma na kheueh Tuhan.) Sidroe ureuëng inong nyang ka meukawen bék kheueh jitinggai lakoe jih.
11 Teuma meunyoe inong nyan ka jitinggai lakoe jih, inong nyan bah kheueh teutab hana meulakoe, atawa jigisa ubak lakoe jih. Dan sidroe ureuëng lakoe hana jeuet jitaleuek purumoh jih.
12 Keu ureuëng nyang laén-laén, naseuhat ulôn na kheueh lagée nyoe: -- nyoe naseuhat ulôn keudroe, kon naseuhat Tuhan -- meunyoe sidroe ureuëng Kristen jimeukawen ngon sidroe ureuëng nyang hana meuiman ubak Almaseh, dan purumoh jih nyan situju keu udeb meusajan ngon lakoe jih nyan, ureuëng nyan hana jeuet jitaleuek purumoh jih nyan.
13 Dan meunyoe sidroe inong Kristen jimeulakoe ngon sidroe agam nyang hana meuiman ubak Almaseh, dan lakoe jih nyan situju keu udeb meusajan ngon purumoh jih nyan, teuma inong nyan hana jeuet jitaleuek lakoe jih nyan.
14 Sabab lakoe nyang hana meuiman teupeulayak jeuet keu anggota umat Allah sabab purumoh jih nyan ka jeuet keu milék Allah. Meunan cit keu purumoh nyang hana meuiman teupeulayak jeuet keu anggota umat Allah, sabab jimeukawen ngon lakoe nyang ka jeuet keu milék Allah. Meunyoe hana lagée nyan, aneuëk-aneuëk awaknyan jeuet keu aneuëk-aneuëk kaphe, padahai aneuëk-aneuëk nyan teuanggab sibagoe anggota umat Allah.
15 Teuma meunyoe ureuëng nyang hana meuiman nyan jitinggai lakoe jih atawa purumoh jih nyang Kristen, bék gata tam jih nyan. Lam hai nyoe Gata nyang inong atawa nyang agam beubaih, sabab Allah meuharab mangat Gata udeb ngon rukon.
16 Sabab Gata sibagoe purumoh -- nyang ka meuiman ubak Tuhan -- pakriban kheueh Gata hase tateupeue ngon paih bahwa Gata hana hase tapeuseulamat lakoe gata? Meunan cit Gata sibagoe lakoe nyang Kristen, pakriban Gata hase tateupeue ngon pasti bahwa Gata hana hase tapeuseulamat purumoh gata?
17 Bah kheueh maséng-maséng jiatoe udeb jih meunurot bimbéngan Tuhan lagée nyang ka geupeuteuntée lé Po teu Allah keu jihnyan bak watée Allah geutawök jihnyan keujipeucaya ubak Gobnyan. Nyan kheueh peuratoran nyang ulôn purunoe bak tieb-tieb jeumaáh.
18 Miseujih, meunyoe sidroe ureuëng nyang ka meukatan bak watée jih nyan jiteurimong panggelan Allah, bék kheueh ureuëng nyan jiuseuha jisampôh tanda-tanda meukatan nyang ka na bak jih nyan. Meunan cit keu ureuëng nyang gohlom meukatan bak watée jihnyan jiteurimong panggelan Allah, bék kheueh ureuëng nyan jilakée meukatan.
19 Sabab teuseutôt peuratoran meusunat atawa hana, bandua nyan saban mantong hana meumakna meubacut pih. Nyang peunteng na kheueh teuseutôt peue-peue nyang geupeurintah lé Po teu Allah.
20 Bah kheueh tieb-tieb ureuëng udeb lam keuadaan lagée watée jihnyan jiteurimong panggelan Allah.
21 Meunyoe bak watée Gata teutawök, Gata na kheueh sidroe namiet, bék kheueh Gata sampoe sosah payah tapike keuhai nyan. Teuma meunyoe singoh Gata meuteumé keuseumpatan jeuet keubeubaih, peuguna kheueh keuseumpatan nyan. 22 Sabab sidroe namiet nyang ka meuiman ubak Tuhan, na kheueh ureuëng Tuhan nyang ka beubaih. Dan sidroe ureuëng beubaih nyang ka meuiman ubak Tuhan, na kheueh namiet Almaseh.
23 Allah ka geubloe Gata dan ka lunaih geubayeue nyan. Lé sabab nyan, bék kheueh Gata seurah droe keu jeuet namiet manusia.
24 Ngon lagée nyan, Syedara-syedara, pakriban mantong keuadaan gata bak watée gata teutawök, bah kheueh Gata teutab udeb lagée nyan meusajan ngon Allah.
25 Jinoe keu ureuëng-ureuëng nyang gohlom meukawen. Keu hai nyan, ulôn hana kuteurimong peurintah meusapeue pih nibak Tuhan. Teuma sibagoe ureuëng nyang sabab rakhmat Tuhan patot teupeucaya, ulôn kutem kubri mubagoe naseuhat.
26 Teuingat ubak mandum keusosahan nyang teuancam nibak watée nyoe, ulôn pike leubeh gét meunyoe ureuëng teutab jiudeb lagée keuadaan nyang na bak saát nyoe.
27 Meunyoe Gata kana purumoh bék kheueh ta useuha mangat gata lheuh nibak purumoh gata nyan. Dan meunyoe Gata gohlom na purumoh bék kheueh gata useuha gata mita purumoh. 28 Teuma meunyoe Gata meukawen, nyan kon desya. Meunan cit teuma meunyoe sidroe aneuëk dara jimeukawen, hana rhot jih nyan ubak desya. Teuma, awaknyan nyang meukawen nyan teuma meuteumé ngon mubagoe keusosahan. Dan ulôn meuharab mangat Gata teupeujiôh nibak hai-hai nyang sosah nyan.
29 Nyang ulôn meukeusut lagée nyoe, Syedara-syedara: Nibak geutanyoe watée hana le lé. Phon nibak saát nyoe, soe mantong ureuëng nyang ka meupurumoh bah kheueh jih nyan udeb lagée ureuëng nyang gohlom meupurumoh;
30 ureuëng nyang mo, udeb jih siulah-ulah hana lam seudeh até; ureuëng nyang kém, siulah-ulah jih nyan hana geumbira; ureuëng nyang ka lheueh jimeubloe, siulah-ulah jihnyan hana sapeue na;
31 dan ureuëng nyang laloe nibak hai-hai donya, bah kheueh jiudeb siulah-ulah ureuëng nyan hana sibok ngon peue nyang jipeubuet nyan. Sabab, donya nyoe hana treb le, lam keuadaan nyang na jinoenyoe, teuma sapan sapa!
32 Ulôn meuharab that mangat Gata leupah nibak keusosahan. Ureuëng nyang hana meupurumoh teuma jipusat pikeran jih ubak hai-hai keu Tuhan, sabab jih jikeuneuk peumangat até Tuhan.
33 Teuma ureuëng nyang ka na purumoh jai that-that jipike keuhai donya nyoe, sabab jihnyan keuneuk jipeumangat até purumoh jih;
34 ngon lagée nyan, peuratian ureuëng nyan ka teuweuek-weuek. Sidroe ureuëng inong nyang hana meulakoe, atawa sidroe aneuëk dara, teuma jai that jipike keu hai Tuhan, sabab jihnyan meuharab that mangat jeuet jiwaraga jih keu milék Allah. Teuma sidroe ureuëng inong nyang ka meulakoe, jipeusaho pikeran jih ubak hai-hai donya, sabab jih nyan jikeuneuk peumangat até lakoe jih.
35 Banmandum nyang ulôn tuléh nyan na kheueh jeuet keujroh gata keudroe, hana meukeusut lôn tam nyoe dan lôn tam jéh. Nyang ulôn lakée na kheueh mangat Gata peubuet nyang beutôi dan patot, dan mangat Gata hase tapeusaho pikeran gata ubak Tuhan.
36 Meunyoe sidroe ureuëng meurasa droe jih hana jipeubuet nyang sipatot jih ateueh tunangan jih, meunyoe jihnyan hana hase jipeuteun hawa nafeusu jih, dan jihnyan meurasa peureulée jimeukawen ngon aneuëk dara nyan, bah kheueh jipeubuet peue nyang jirasa nyan jroh. Jihnyan hana meudesya meunyoe awaknyan meukawen.
37 Teuma meunyoe sidroe-droe ureuëng ka jicok keuputosan lam até jih keu hana jimeukawen ngon tunangan jih dan keuputosan nyan hana teupaksa, teuma nyang jipeubuet nyan jroh that, asai jihnyan teuga jipeubuet hainyan.
38 Jeulaih jih, ureuëng nyang meukawen gét buet jih, dan ureuëng nyang hana meukawen leubeh gét lom buet jih.
39 Sidroe ureuëng inong nyang ka meukawen jihnyan teuikat ubak lakoe jih simantong lakoe jih nyan udeb. Meunyoe lakoe jih ka meuninggai donya, inong nyan beubaih jimeukawen lom ngon ureuëng nyang jigalak; asai jimeukawen nyan seucara Kristen.
40 Teuma jihnyan leubeh meu-untông meunyoe hana jimeukawen le. Nyan peundapat ulôn keudroe, teuma ulôn rasa bahwa nyang ulôn peugah nyan na kheueh ngon kuasa Roh Allah.


Chapter 8

1 Jinoenyoe ulôn peugah keuhai peunajoh nyang jibri sibagoe peuseumahan keu beurala. Keubiet beutôi lagée jipeugah lé gob, "Tanyoe banmandum ka carông." Teuma ngon carông nyan teupeujeuet manusia rhot bak sombong, seudang geunaséh teupeudong pribadi manusia.
2 Ureuëng nyang jipike jihnyan jiteupeu peue-peue mantong, nyang sibeuna jih gohlom jiteupeu nyang silhok-lhok jih.
3 Teuma ureuëng nyang biet-biet jigaséh keu Allah, ureuëng nyan geuturi lé Allah.
4 Soai peunajoh nyang ka teupeuseumah keu beurala, tanyoe tateupeue bahwa beurala nyan sibagoe gamba nyang sikeubiet jih hana. Dan tanyoe pih tateupeue bahwa Po teu Allah nyan sidroe; hana nyang laén.
5 Keubiet jai that cit peue nyang jipeugah ilah dan tuhan; bah kheueh nyang na dilangét meunan cit nyang na ateueh rhueng bumoe.
6 Teuma nibak geutanyoe, Allah na kheueh tunggai. Gobnyan kheueh Bapak nyang cebta peue-peue mantong. Keu Gobnyan kheueh tanyoe udeb. Dan Tuhan na kheueh tunggai, Gobnyan kheueh Isa Almaseh. Meulalu Gobnyan peue-peue mantong teucebta, dan sabab Gobnyan kheueh geutanyoe nyoe udeb.
7 Teuma bah kheueh meunan, hana mandum ureuëng jiteupeu hainyan. Na ureuëng nyang awai ilée jiseumah beurala. Ngon lagée nyan, sabab jihnyan trok bak watéenyoe pih awaknyan mantong jirasa bahwa peunajoh, nyang ka jipeuseumah ubak beurala, na kheueh peunajoh beurala. Teuma, meunyoe awaknyan jipajoh peunajoh nyan, awaknyan meurasa meudesya; sabab keuyakénan awaknyan gohlom khong.
8 Nyang sikeubit jih peunajoh keudroe hana teupeujeuet hubongan tanyoe ngon Allah meutamah krab. Meunyoe tanyoe tapajoh peunajoh nyan, tanyoe hana meuteumé untông sapeue. Sikeubit jih, meunyoe tanyoe hana tapajoh peunajoh nyan, tanyoe pih hana rugoe sapeue.
9 Teuma, até-até kheueh! Bék sampoe rôh ureuëng laén jeuet meudesya -- sabab keuyakénan jih gohlom khong -- ngon sabab Gata beubaih tapeubuet peue mantong.
10 Nyang ulôn meukeusut lagée nyoe: Seukira jih Gata, nyang na keuyakénan nyang khong, teungoh gata duek dan gata makheun lam kuil beurala. Óh lheueh nyan na sidroe ureuëng jingieng Gata na taduek dan tamakheun lam kuil nyan. Meunyoe keuyakénan ureuëng nyan hana khong, peu kheueh nyan teuma teupeujeuet ureuëng nyan jijeuet makheun peunajoh nyang ka jibri keu beurala?
11 Ngon sabab nyan, keuyakénan Gata teupeujeuet ureuëng laén nyang keuyakénan jih gohlom khong nyan jeuet keusisat. Padahai Almaseh maté keu ureuëng nyan cit teuma.
12 Dan meunyoe Gata tapeubuet nyang salah lagée nyan ateueh syedara-syedara nyang Kristen -- na kheueh Gata katapeurusak keuyakénan awaknyan nyang leumoh -- ngon lagée nyan Gata ka meudesya ubak Almaseh.
13 Nyang kheueh sabab jih, meunyoe peunajoh jeuet keusabab syedara lôn meudesya, ulôn sagai-sagai hana lôn pajoh le. Pat tateupeue syedara ulôn meudesya ngon sabab lé ulôn.


Chapter 9

1 Peu kheueh ulôn nyoe kon ureuëng beubaih? Peu kheueh ulôn nyoe kon rasui? Peu kheueh ulôn nyoe gohlom na lôn ngieng Isa, Tuhan tanyoe? Peu kheueh gata kon hase buet ulôn keu Tuhan?
2 Bah kheueh di ureuëng-ureuëng laén hana jitem aku ulôn nyoe sibagoe rasui, sihana-hana jih mubacut gata na ta aku ulôn nyoe rasui! Sabab udeb gata sibagoe ureuëng Kristen na kheueh sibagoe bukeuti bahwa ulôn nyoe na kheueh sidroe rasui.
3 Meunyoe ureuëng jikritek ulôn, ulôn teuma kujaweueb lagée nyoe:
4 Peu kheueh ulôn hana hak lôn teurimong peunajoh dan ié jieb sabab buet ulôn?
5 Peu kheueh ulôn hana hak ulôn ba sidroe purumoh ureuëng Kristen meusajan-sajan ngon ulôn watée ulôn jak, lagée nyang geupeubuet lé syedara-syedara Tuhan Isa dan lé rasui-rasui nyang laén, meunan cit ngon Petrus?
6 Atawa Barnabas dan ulôn mantong nyang teupeuwajéb jak mita hareukat keudroe?
7 Peu kheueh hana anggota tantra nyang harôh jipeubiaya droe jih keudroe lam angkatan prang! Hana peutani nyang jipula anggô lam lampôh jih óh lheueh nyan hana jipajoh wase jih nyang jipeuhase lé lampôh jih nyan! Hana ureuëng meurabe nyang peulara bubiri, laju hana jijieb ié mom nyang jipeuhase lé bubiri-bubiri jih nyan!
8 Ulôn peugah hai nyan kon kheueh nyang ka lazem nibak peungalaman tieb-tieb uroe, teuma sabab Alkitab pih na geupeugah nyang lagée nyan.
9 Lam Kitab Nabi Musa na teutuléh lagée nyoe, "Leumô nyang teungoh jigiloe-giloe boh gandom keu jipeuleukang boh gandom nibak mu jih, bék kheueh teubeukab babah jih." Peu kheueh leumô nyang geukalon lé Po teu Allah?
10 Atawa nyan nyang geumeukeusut keu geutanyoe? Beutôi nyan teutuléh keu geutanyoe. Sabab ureuëng nyang mubuet bak ladang dan ureuëng nyang jipeugleh gandom jih ka sipatot jih jimubuet ngon harapan keu jiteurimong siparo nibak hase nyang jipeubuet nyan.
11 Kamoe ka kamoe tabu bijéh rohani lam udeb gata. Ngon lagée nyan meunyoe kamoe pot beureukat-beureukat hareuta nyang na nibak gata, peu kheueh ngon lagée nyan kamoe lakée leubeh jai nibak gata?
12 Meunyoe ureuëng-ureuëng laén na hak jiharab nyoe nibak gata, peu kheueh kamoe leubeh na hak nibak awaknyan? Teuma ulôn gohlom lôn peuguna hak nyan. Nyang keubiet jih ulôn leubeh galak lôn tanggong peue-peue mantong nibak jipeuteuka sapeue-sapeue hai nyang jihalang teupeutabu Haba Gét keuhai Almaseh.
13 Gata teuntée tateupeu bahwa ureuëng nyang mubuet lam Baét Allah jiteurimong peunajoh awaknyan nibak Baét Allah. Dan ureuëng-ureuëng nyang peusaneut teumpat peuseumah keureubeuen, meuteumé siparo nibak keureubeuen nyang na teupeuseumah nibak teumpat nyan.
14 Meunan cit Tuhan ka geupeuteuntée bahwa ureuëng nyang peusampoe Haba Gét nyan harôh meuteumé hareukat nibak buet jih nyan.
15 Teuma gohlom na lôn peuguna mubacut pih nibak hak-hak ulôn nyan. Dan ulôn tuléh suratnyoe kon teuma ngon meukeusut mangat jeuet hai-hai nyan teupeubuet laju jinoenyoe cit keu ulôn. Leubeh gét ulôn maté nibak gadôh hai nyang ulôn peubangga nyan.
16 Sabab, meunyoe nyan soai teupeusampoe Haba Gét nyang teuka nibak Po teu Allah, ngon lagée nyan ulôn hana hak lôn peubangga droe, sabab Po teu Allah ka geupeurintah bak ulôn keu lôn peubuet nyan. Cilaka kheueh ulôn, meunyoe ulôn hana lôn peusampoe Haba Gét nyan!
17 Seukira jih ulôn peubuet buet nyan ateueh keuheundak lôn keudroe, ngon lagée nyan lôn jeuet meuharab keu meuteumé upah. Teuma ulôn peusampoe Haba Gét nyan na kheueh sabab wajéb. Ulôn geubri tugaih lé Po teu Allah keu lôn peubuet lagée nyan.
18 Meunyoe meunan, peue upah lôn? Nyoe kheueh upah jih: bahwa ulôn hase lôn peusampoe Haba Gét nyan ngon hana lôn peubrat meusidroe ureuëng pih jipeubiaya lôn, sabab ulôn hana lôn lakée hak-hak ulôn sibagoe lôn peusampoe Haba Gét nyan.
19 Ulôn nyoe bukon namiet manusia soe mantong; ulôn ureuëng beubaih. Teuma bah kheueh meunan, ulôn ka lôn peujeuet droe ulôn nyoe namiet keu mandum ureuëng. Ulôn peubuet lagée nyan mangat ulôn hase lôn peuseulamat sijai-jai jih manusia keu Almaseh.
20 Keu ureuëng Yahudi, ulôn lagée ureuëng Yahudi mangat ulôn hase lôn peumeunang ureuëng Yahudi keu Almaseh. Keu ureuëng-ureuëng nyang udeb jih meunurot huköm Nabi Musa, ulôn peudeh droe siulah-ulah ulôn teuikat ngon huköm nyan, bah kheueh nyang sibeuna jih ulôn hana teuikat ngon huköm nyan. Ulôn peubuet lagée nyan mangat ulôn hase lôn tarek awaknyan mangat jeuet keu murit Almaseh.
21 Meunan cit keu ureuëng-ureuëng nyang kon Yahudi, ulôn ba droe lagée kon ureuëng Yahudi, nyang udeb diluwa huköm Nabi Musa. Ulôn peubuet lagée nyan mangat ulôn hase lôn tarek awaknyan jeuet keu murit Almaseh. Ngon lagée nyan kon meumakna ulôn nyoe hana taát ubak Po teu Allah, dan ulôn nyoe keubiet ka jikuasa lé kuasa peurintah-peurintah Almaseh. 22 Lamkawan ureuëng-ureuëng nyang keuyakénan jih hana teuga, ulôn pih lôn peubuet lagée ureuëng nyang keuyakénan jih hana teuga mangat ulôn hase lôn tarek awaknyan jeuet keu murit Almaseh. Paneuk haba, ulôn jeuet keu peue mantong keu mandum ureuëng mangat ngon rot nyang lagée peue mantong ulôn hase lôn peuseulamat siparo nibak lamkawan awaknyan.
23 Banmandum nyan ulôn peubuet keu Haba Gét nyang teuka nibak Po teu Allah nyan, mangat ulôn pi meusajan geubri beureukat.
24 Syedara teuntée mandum tateupeue bahwa lam tieb-tieb na meutunang plueng mandum peuseurta meusajan jiplueng, teuma sidroe ureuëng nyang meuteumé hadiah. Ngon lagée nyan plueng kheueh beutajam that mangat Gata meuteumé hadiah nyan.
25 Tieb-tieb ureuëng nyang teungoh meulatih, jipeuteun droe lam hai peue mantong. Jihnyan jisaja peubuetnyan sabab jihnyan mangat teuboh ngon taloe takue bungöng keujuaraan, na kheueh bungöng nyang bagaih layée. Teuma tanyoenyoe tapeuteun droe lam hai peue mantong sabab tanyoe meuheuét that beumeuteumé teuboh ngon taloe takue bungöng nyang hana layée-layée.
26 Nyang kheueh sabab jih ulôn plueng ngon tujuan nyang ka teuntée. Lagée watée meutunang tinju, ulôn hana lôn söh ban galak droe.
27 Ulôn peubiyeu tuboh lôn nyoe jilatih ngon biet-biet kreueh sampoe ulôn hase lôn kuasa nyan. Ulôn peubuet lagée nyan, sabab ulôn hana lôntem sampoe teujadi bahwa óh ka lheueh lôn pakat ureuëng laén meusajan-sajan jiseutôt lam meutunang plueng nyan, ulôn keudroe jitulak.


Chapter 10

1 Syedara-syedara! Gata nyang sibeuna jih beuta ingat peue nyang ka teujadi ateueh indatu tanyoe watée awaknyan geuseutôt Nabi Musa. Awaknyan banmandum jipeupayong lé awan, dan ngon seulamat jijeumeurang Laôt Mirah.
2 Keuneuk jeuet keu murit-murit Nabi Musa, awaknyan banmandum teupeumanö lam awan dan laôt nyan.
3 Awaknyan banmandum jipajoh peunajoh rohani nyang saban,
4 dan jijieb ié rohani nyang saban teuma. Awaknyan bandum jijieb ié nibak gunong batée rohani nyang na meusajan ngon awaknyan; gunong batée nyan na kheueh Almaseh keudroe.
5 Bah kheueh meunan, Allah hana galak ateueh ladum nibak awaknyan, dan nyang kheueh sabab jih manyét-manyét awaknyan teutiek-tiek lam padang pasi.
6 Banmandum nyan jeuet keucuntoh nibak geutanyoe, sibagoe peuingat nibak geutanyoe mangat tanyoe bék ta galak keuhai-hai nyang jeuhet lagée awaknyan.
7 Meunan cit mangat tanyoe bék taseumah beurala lagée nyang jipeubuet lé ladum nibak awaknyan. Lam Alkitab na teutuléh lagée nyoe, "Teuma bansa nyan jipeuphon makheun ngon jijieb ié, dan jimeunari keu jiseumah beurala."
8 Tanyoe hana jeuet tapeubuet hai-hai nyang cabui lagée nyang jipeubuet lé ladum ureuëng lamkawan awaknyan. Sabab, dua ploh lhée ribée droe lamkawan awaknyan maté lam siuroe sabab jipeubuet nyan.
9 Tanyoe hana jeuet ta ujoe-ujoe Tuhan lagée nyang jipeubuet lé ladum lamkawan awaknyan yoh watée ilée, akhé jih awaknyan maté jikab lé uleue meubisa.
10 Meunan cit tanyoe hana jeuet aloh alah; lagée nyang jipeubuet lé ladum ureuëng lamkawan awaknyan yoh watée ilée, akhé jih awaknyan jipoh maté lé Malaikat Mawöt
11 Banmandum hainyan teujadi ateueh awaknyan mangat jeuet keucuntoh keu ureuëng laén. Dan bandum nyan pi na teutuléh sibagoe peuingat keu geutanyoe. Sabab tanyoe bak watée nyoe udeb lam masa akhé jamén.
12 Ureuëng nyang jisangka droe jih teudong ngon teugab, gét kheueh beu até-até; bék sampoe jihnyan reubah.
13 Tieb-tieb cubaan nyang Gata rasa na kheueh cubaan nyang ka lazem jirasa lé manusia. Teuma Po teu Allah seutia ubak janji Gobnyan. Gobnyan hana teuma geupeubiyeu Gata jiujoe leubeh nibak keusanggopan gata. Bak watée Gata jiteuka ngon cubaan, Gobnyan laju geubri jalan keugata beujeuet keuteuga mangat Gata hase tameuteun.
14 Ngon sabab nyan, Syedara mandum nyang ulôn gaséh, gata banci kheueh keu ureuëng nyang seumah beurala.
15 Ulôn meututoe ngon gata lagée ngon ureuëng-ureuëng bijaksana. Bah kheueh gata timang keudroe tutoe haba lôn nyoe.
16 Bak watée tanyoe jieb ié anggô talakée teurimong gaséh ubak Po teu Allah, peu kheueh nyan kon ka teutunyok bahwa tanyoe meusaboh ngon Almaseh lam maté Gobnyan? Dan bak watée tanyoe tabagi-tabagi ruti keutapajoh meusajan-sajan, peu kheueh nyan kon ka teutunyok bahwa tanyoe ka meusaboh lam tuboh Almaseh?
17 Ngon sabab nyan teuma na saboh ruti, dan tanyoe mandum tapajoh ruti nyang saboh nyan cit teuma, dan tanyoe nyang jai nyoe jeuet keusaboh tuboh.
18 Cuba kalon ureuëng-ureuëng Yahudi. Awaknyan nyang jimakheun peunajoh nyang teupeuseumah ateueh teumpat peuseumah keureubeuen, na kheueh ureuëng-ureuëng nyang ka meusaboh ngon teumpat nyan.
19 Peue meukeusut lôn ngon lagée nyan? Beurala atawa peunajoh nyang jipeuseumah keubeurala nyan sagai-sagai hana areuti.
20 Peue nyang jipeuseumah bak teumpat keureubeuen keu beurala hana teupeuseumah keu Po teu Allah, teuma na kheueh keu roh-roh jeuhet. Dan ulôn hana kutem gata meusaboh ngon roh jeuhet.
21 Gata hana jeuet gata jieb ié nibak piala anggô Tuhan, dan sigoguih nibak piala anggô roh jeuet cit teuma. Gata hana tamakheun bak meuja Tuhan, dan meunan cit bak meuja roh jeuhet. 22 Atawa peu kheueh tanyoe takeuneuk peujeuet Tuhan hana picék até? Peu kheueh tanyoe leubeh teuga nibak Tuhan?
23 Jipeugah lé gob, "Tanyoe jeuet tapeubuet peue mantong asai tatem." Beutôi! Teuma hana mandum nyang tatem nyan na guna. "Tanyoe jeuet teupeubuet peue mantong nyang asai tatem" -- teuma hana banmandum nyang tatem nyan jipeugot udeb tanyoe.
24 Bék kheueh na peusidroe ureuëng jimeujuang deumi keu keupeuntengan jih keudroe. Tieb-tieb ureuëng harôh meujuang keu keupeuntengan ureuëng laén teuma.
25 Gata jeuet tapajoh peue mantong nyang na jipeubloe lam peukan eungkot sie. Hana peue gata tilek leubeh ilée, bah kheueh na rasa brat lam até nurani gata.
26 Sabab lam Alkitab na teutuléh lagée nyoe, "Bumoe nyoe ngon banmandum asoe jih na kheueh atra Tuhan."
27 Meunyoe gata jiundang jak makheun lé sidroe nyang bukon ureuëng Kristen, dan gata tateurimong undangan gobnyan, pajoh kheueh peue nyang ka ji idang ukeue gata. Hana peue gata tilek pane asaijih peunajoh nyan, mangat bék na rasa brat lam até nurani gata. 28 Teuma meunyoe na nyang peugah bak gata, "Peunajoh nyoe ka teupeuseumah keubeurala," bék kheueh gata pajoh peunajoh nyan, sabab teukalon keupeuntengan ureuëng nyan dan sabab su até nurani.
29 Nyang ulôn meukeusut kon su at`e nurani gata, teuma su at`e nurani ureuëng nyan. Mungken na nyang tanyong, "Ka gura, pakon keubeubaihan lôn ka jipeubataih lé su até nurani ureuëng laén?
30 Meunyoe ulôn pajoh peunajoh ngon lôn lakée teurimong gaséh ubak Allah, pakon gob harôh jihina ulôn keu peunajohnyan, seudangkan ulôn ka lôn lakée teurimong gaséh ubak Allah ateueh nyan?"
31 Peue mantong nyang Gata peubuet -- Gata makheun atawa Gata jieb ié -- peubuet kheueh mandum nyan keu gata peumulia Allah.
32 Udeb kheueh beulagée nyan bagoe sampoe lé Gata ureuëng laén hana jipeubuet desya; peu kheueh awaknyan ureuëng Yahudi atawa kon ureuëng Yahudi, atawa pih jeumaáh Allah.
33 Udeb kheueh lagée ulôn nyoe. Ulôn lôn useuha lôn peumangat até mandum ureuëng lam sigala sisuatu, kon meukeusut-meukeusut keupeuntengan droe teuh keudroe. Tujuan lôn na kheueh mangat awaknyan banmandum hase teupeuseulamat.


Chapter 11

1 Seutôt kheueh teuladan ulôn, lagée ulôn pih lôn seutôt teuladan Almaseh.
2 Ulôn kupujoe gata sabab gata sabe tapeuingat ulôn dan taturot peungajaran nyang ulôn bri bak gata.
3 Teuma ulôn meuheuét beutateupeue saboh hai teuk, bahwa nyang jeuet keu ulée ateueh tieb-tieb ureuëng agam na kheueh Almaseh; nyang jeuet keue ulée ateueh purumoh na kheueh lakoe, dan nyang jeuet keue ulée ateueh Almaseh na kheueh Allah.
4 Meunyoe sidroe ureuëng agam watée jimeudoá atawa watée jipeusampoe haba nyang teuka nibak Po teu Allah dikeue ureuëng ramé, jingui sinutôb ulée, ngon lagée nyan ureuëng nyan ka jihina Almaseh.
5 Dan meunyoe sidroe ureuëng inong watée jimeudoá atawa watée jipeusampoe haba nyang teuka nibak Po teu Allah dikeue ureuëng ramé, hana jingui sinutôb ulée, ngon lagée nyan ureuëng inong nyan ka jihina lakoe jih nyang jeuet ulée ateueh droe jih. Nyang lagée nyan saban cit ulée inong nyan ka jicuko.
6 Sabab meunyoe sidroe ureuëng inong hana jitem ngui sinutôb ulée leubeh gét ôk jih teugunteng. Teuma meunyoe sidroe ureuëng inong teucuko ôk jih atawa teugunteng ôk jih, nyang lagée nyan na kheueh hinaan ateueh droe jih. Ngon lagée nyan leubeh gét inong nyan jingui tutôb ulée.
7 Ureuëng agam hana peue jitôb ulée, sabab jihnyan sibagoe ceureumen pribadi dan keubeusaran Po teu Allah. Teuma ureuëng inong sibagoe ceureumen keu ureuëng lakoe,
8 sabab ureuëng agam hana teupeujeuet nibak ureuëng inong, ureuëng inong kheueh nyang teupeujeuet nibak ureuëng agam.
9 Ureuëng agam pih hana teupeujeuet keu keupeuntengan ureuëng inong, teuma ureuëng inong nyang teupeujeuet keu keupeuntengan ureuëng agam.
10 Sabab nyan, keuteupeumangat até dumna malaikat, sidroe ureuëng inong harôh jingui sinutôb ulée sibagoe tanda bahwa jihnyan na dimiyueb kuasa lakoe jih.
11 Teuma bah kheueh meunan lam udeb geutanyoe ureuëng Kristen, ureuëng inong nyan hana jidong keudroe, lheueh nibak ureuëng agam, dan ureuëng agam pih hana jidong keudroe, lheuh nibak ureuëng inong.
12 Sabab bah kheueh ureuëng inong phon that teupeujeuet nibak ureuëng agam, teuma óh ka lheueh ureuëng agam lahé lam pruet ureuëng inong; dan banmandum nyan asai jih nibak Po teu Allah.
13 Cuba gatanyoe keudroe tapeutimang hainyoe: Peu kheueh gét sidroe ureuëng inong jimeudoá ubak Allah dikeue ureuëng ramé, hana jingui sinutôb ulée?
14 Nibak peungalaman umum, gata ka teupeurunoe bahwa meunyoe ureuëng agam meuôk panyang, nyan saboh hai nyang kureueng patôt.
15 Teuma keu ureuëng inong, ôk teubri keu jih nyan sibagoe sinutôb ulée jih dan ôk panyang na kheueh keubanggaan jih.
16 Ngon lagée nyan, meunyoe nyang keuneuk meudakwa keuhai nyoe, saboh sagai nyang jeuet lôn peugah na kheueh bah kheueh tanyoe meunan cit ngon jeumaáh-jeumaáh Allah nyang laén, umum jih na saboh keubiasaan lam jeumaáh; laén nibak nyan hana.
17 Keuhai nyang seulanjutjih nyoe, ulôn hana lôn pujoe gata. Gata meugumpôi tameuiébadat hana jipeuhase nyang gét, teuma nyang hana gét.
18 Phon-phon that na ulôn deungoe, bahwa bak teumpat-teumpat gata meugumpôi keu meuiébadat na golongan-golongan nyang saléng meulaén. Dan ulôn pike hana le meubacut na nyang beutôi haba nyan.
19 Keubiet ka siwajar jih jiteuka peupeucahan lamkawan gata, mangat deuh singoh soe-soe nyang ureuëng Kristen seujati.
20 Teuma bak watée gata meusapat, nyang gata peuna nyan kon Peujamé Tuhan.
21 Sabab watée pajoh bu, gata maséng-maséng gata meureupah tacok peunajoh teuh keudroe, sampoe na nyang hana meuteumé sapeue, seudangkan nyang laén sampoe án mabök. 22 Pakon meunan? Kon kheueh Gata na rumoh? Gata jeuet makheun dan tajieb ié nibak teumpat nyan! Atawa peu kheueh gata keuneuk tahina jeumaáh Allah dan gata peumalée ureuëng-ureuëng gasien? Peu kheueh nyang harôh ulôn peugah keu gata? Peu kheueh harôh lôn pujoe gata? Hana! Sagai-sagai ulôn hana lôn pujoe gata.
23 Sabab nyang lôn purunoe keu gata nyan, na kheueh nyang lôn teurimong nibak Tuhan keudroe: bahwa bak malam nyan watée Isa, Tuhan tanyoe jikhianat, Gobnyan laju geucok ruti,
24 dan óh ka lheueh geupeugah teurimong gaséh ubak Po teu Allah ateueh ruti nyan, laju geupriek-priek rutinyan ngon jaroe Gobnyan, óh lheueh nyan laju geupeugah, "Nyoe kheueh tuboh Lôn nyang teupeujôk keu gata. Peubuet kheueh lagée nyoe sibagoe gata ingat keu Lôn."
25 Meunan cit teuma óh ka lheueh habéh makheun, Gobnyan geucok piala ié anggô dan laju geupeugah, "Anggô nyoe na kheueh meujanji Allah nyang barô, teupeusah ngon darah Lôn. Tieb-tieb gata jieb nyoe, peubuet kheueh nyoe sibagoe taingat keu lôn."
26 Beutôi tieb-tieb gata pajoh ruti dan gata jieb ié anggô nyoe, gata peusampoe Tuhan ka maté, sampoe Gobnyan teuka lom teuma.
27 Ngon sabab nyan, ureuëng-ureuëng nyang jipajoh ruti Tuhan atawa jijieb ié anggô Tuhan ngon cara nyang hana beutôi, ureuëng nyan meudesya ubak Tuhan nyang ka geukeureubeuen tuboh dan darah Gobnyan. 28 Ngon lagée nyan, tieb-tieb ureuëng meuseuti jijak peureksa droe jih leubeh ilée, barô kheueh jeuet jipajoh ruti atawa jijieb ié anggô nyan.
29 Sabab meunyoe ureuëng jipajoh ruti dan jijieb ié anggô hana jipako bahwa peujamé nyan na hubongan ngon tuboh Tuhan, ureuëng nyan jimakheun dan jijieb ié keue jiteurimong huköm Po teu Allah ateueh droe jih keudroe.
30 Nyang kheueh sabab jih jai that lamkawan gata nyang sakét dan leumoh, dan na teuma nyang maté.
31 Teuma meunyoe tanyoe tapareksa droe tanyoe leubeh ilée, tanyoe hana teuma geuhuköm lé Po teu Allah.
32 Teuma meunyoe tanyoe geuhôi lé Allah, Gobnyan teuma geuseunuet tanyoe, mangat tanyoe bék keunong huköm meusajan-sajan ngon donya nyoe.
33 Ngon sabab nyan, Syedara-syedara lôn, meunyoe gata meusapat keu tamakheun nibak teumpat peujamé Tuhan, gata meuseuti saléng tamupreh-preh.
34 Meunyoe na nyang deuk, ureuëng nyan bah kheueh jipajoh bu ilée dirumoh jih. Meunyoe gata tapeubeuah hai nyoe, tieb-tieb gata peuna meusapat keu taiébadat hana teuma meuteumé huköman nibak Po teu Allah ateueh droe gata keudroe. Keuhai masa-alah-masa-alah nyang laén, ulôn peutrang ubak gata, meunyoe ulôn teuka singoh.


Chapter 12

1 Jinoenyoe keuhai karonya-karonya nyang geubri lé Roh Allah. Keuhai nyan, ulôn meuharab mangat Gata tateupeue nyang sibeuna jih.
2 Ingat kheueh bahwa bak watée gata gohlom taturi Tuhan, gata teupeungaroh gata seutôt beurala nyang hánjeuet mariet.
3 Gata meuseuti tateupeue bahwa ureuëng-ureuëng nyang geupimpén lé Roh Allah hana hase jipeugah, "Teukutok kheueh Isa!" Meunan cit teuma hana meusidroe pih nyang hase jipeugah, "Isa kheueh Tuhan!" meunyoe ureuëng nyan hana jipimpén lé Roh Allah.
4 Na mubagoe rupa karonya nibak Roh Allah, teuma mandum nyan jibri lé Roh nyang sa.
5 Na mubagoe rupa buet keu teuseumah Tuhan, teuma Tuhan nyang jiseumah nyan, Tuhan nyang sa cit!
6 Na mubagoe cara teupeubuet buet Tuhan, teuma nyang bri teunaga keunyan bak tieb-tieb ureuëng na kheueh Po teu Allah nyang sa cit teuma.
7 Keu keugét tanyoe mandum, Roh Allah geumubuet bak tieb-tieb ureuëng seucara keudroe-droe.
8 Keu nyang sidroe, Roh nyan jibri keumampuan ureuëng nyan jipeugah haba ngon peunoh wibawa. Keu nyang laén Roh nyang nyan cit jibri keumampuan keu jipeugah keuhai Allah.
9 Roh nyang sa nyan cit teuma jibri ubak ureuëng nyang sidroe, keumampuan nyang luwabiasa keue jimeuiman ubak Almaseh; keue nyang laén Roh Allah nyan geubri kuasa keu jipeupuléh ureuëng sakét.
10 Keu sidroe ureuëng jibri kuasa keu jipeuna buet-buet nyang ajaéb dan keu nyang laén jibri karonya keu jibritée reuncana-reuncana Allah. Keu nyang laén teuma Roh Allah nyan jibri teuma keumampuan keujeuet jipeubeda nyang toh karonya nyang geubri lé Roh Allah dan nyang toh teuma nyang kon. Na nyang geubri keumampuan keu jimeututoe ngon mubagoe basa nyang ajaéb, dan na teuma nyang jibri keumampuan keu jibohmakna basa-basa nyan.
11 Banmandum nyan jipeubuet lé Roh Allah nyang sa nyan cit teuma; keu maséng-maséng ureuëng jibri karonya keudroe meunurot nyang jikeuheundak lé Roh nyan keudroe.
12 Almaseh na kheueh lagée tuboh manusia; tuboh nyan saboh, teuma na anggota nyang le. Banmandum anggota nyan, bah kheueh nyan jai that, na kheueh saboh tuboh.
13 Meunan cit ngon tanyoe mandum, bah kheueh nyan ureuëng Yahudi meunan cit nyang kon ureuëng Yahudi, namiet-namiet meunan cit ngon ureuëng nyang meurdehka; tanyoe mandum kateupumanö ngon Roh nyang sa nyan, mangat tanyoe teupeujeuet saboh ngon tuboh Almaseh nyan. Tanyoe mandum tarasa Roh nyang sa nyan ngon sipeunoh jih.
14 Sabab tuboh nyan keudroe hana teudong bak saboh anggota teuma jai that anggota jih.
15 Meunyoe gaki tanyoe jipeugah, "Ulôn kon jaroe, ngon sabab nyan ulôn kon bagian nibak tuboh," nyan kon meumakna bahwa gaki nyan kon bagian nibak tuboh.
16 Dan meunyoe punyueng jipeugah, "Sabab ulôn kon mata, ngon lagée nyan ulôn kon bagian nibak tuboh nyan," nyang lagée nyan kon cit meumakna bahwa punyueng nyan kon bagian nibak tuboh.
17 Meunyoe bansaboh tuboh nyan jeuet keu saboh mata mantong, pakriban tuboh nyan hase jimeudeungoe? Atawa peu kheueh bansaboh tuboh nyan jeuet keu punyueng mantong, pakriban teuma tuboh nyan jimeucöm?
18 Deuh takalon bahwa Allah nyang keubah banmandum anggota tuboh nyan nibak tuboh. Maséng-maséng geukeubah bak teumpat jih lé Po teu Allah meunurot lagée nyang geugalak lé Gobnyan keudroe.
19 Meunyoe mandum nyan teuma saboh anggota mantong, nyang toh kheueh nyang teupeugah tuboh?
20 Teuma keubiet na anggota nyang jai, teuma tuboh na kheueh saboh.
21 Ngon sabab nyan, mata hana jeuet jipeugah bak jaroe, "Ulôn hana peureulée keugata!" atawa ulée jipeugah bak gaki, "Ulôn hana peureulée keugata!" 22 Nyang sibeuna jih anggota-anggota tuboh nyang teupeugah leumoh nyan, that-that tapeureulée;
23 dan anggota-anggota nyang tanyoe anggab hana meunan meuyum, na kheueh anggota-anggota nyang tanyoe bri leubeh jai peunghargaan.
24 Anggota-anggota tuboh nyang ka deuh jih g`et, hana peureul`ee l`e beutapeurati. Po teu Allah ka geususon tuboh geutanyoe meunan g`et jih ngon lag`ee nyan anggota-anggota nyang kureueng muyuem geubri leub`eh jai peunghargaan. Anggota-anggota tuboh nyang hana deuh lagak, nyan nyang leubeh teupeurati.
25 Ngon lagée nyan tuboh nyan hana teubagi-bagi; maséng-maséng anggota teupeurati saboh ngon nyang laén.
26 Meunyoe na saboh anggota nyang sakét, banmandum anggota nyang laén pih meurasa sakét; meunyoe saboh anggota teupujoe, banmandum anggota nyang laén pih meusajan meusukaria.
27 Gata banmandum meusajan-sajan na kheueh tuboh Almaseh dan gata maséng-maséng teuma na kheueh anggota nibak tuboh nyan. 28 Meunan cit teuma lam jeumaáh, Allah ka geupeuteuntée teumpat keumubagoe-bagoe ragam manusia: Nyang phon that rasui-rasui; keudua, nabi-nabi, nyang keu lhée, gurée-gurée, laju keu awaknyan nyang jipeubuet buet-buet nyang ajaéb, óh lheueh nyan keu awaknyan nyang geubri karonya keu jipeupuléh ureuëng sakét, atawa keu jitulông ureuëng laén, atawa keu jeuet keupeumimpén, atawa keu jeuet jimeututoe ngon meubagoe basa nyang ajaéb.
29 Awaknyan kon banmandum rasui, atawa nabi, atawa gurée. Hana banmandum nyan na kuasa jipeubuet buet nyang ajaéb,
30 atawa keu teupeupuléh ureuëng sakét, atawa keumututoe ngon mubagoe basa nyang ajaéb, atawa keu teutejeumah basa-basa nyan.
31 Ngon sabab nyan, meu-useuha kheueh lé gata ngon biet-biet mangat meuteumé karonya-karonya nyang lumboi sa. Teuma seulanjut jih nyoe ulôn tunyok bak gata rot nyang paleng gét.


Chapter 13

1 Bah kheueh ulôn nyoe hase lôn meututoe ngon meubagoe basa manusia, ngon basa malaikat pih jeuet lôn meututoe, teuma meunyoe ulôn hana lôn gaséh keu ureuëng laén, peue-peue nyang lôn peugah nyan na kheueh lagée su nyang meuleungkeng teuma hana meumakna.
2 Bah kheueh ulôn nyoe carông lôn peusampoe haba nyang teuka nibak Po teu Allah, dan lôn muphom mandum hai nyang silhok-lhok jih, dan lôn teupeu peue-peue mantong dan that-that lôn meuiman ubak Po teu Allah sampoe hase lôn peujeuet gunong jiminah bak teumpat laén, teuma ulôn hana lôn gaséh keu ureuëng-ureuëng laén, ulôn nyoe teutab hana areuti sapeue!
3 Bah kheueh banmandum nyang na nibak ulôn, ulôn jok seudeukah keu ureuëng gasien, dan ulôn jok droe lôn keu teutot lam apui, teuma ulôn hana lôn gas`eh keu ureuëng la`en, teuma banmandum nyan hana meuguna mubacut pi.
4 Ureuëng nyang jigaséh keu ureuëng laén, saba dan gét até. Ureuëng nyan hana seu-eum ngon ceumuru, hana meututoe rayeuk haba ngon sulet, hana sombong.
5 Ureuëng nyan hana manyang até dan hana gasa, jihnyan hana jipaksa ureuëng laén beuji seutôt lagée jih peugah, hana bagaih teusinggong, dan hana jitroh dam lam até jih.
6 Ureuëng nyang jigaséh keu ureuëng-ureuëng laén, hana galak bak buet nyang jeuhet, teuma ureuëng nyan galak bak buet nyang jroh.
7 Ureuëng nyan hase jiteundroe watée meuhadab ngon peue-peue mantong dan jitem peucaya keu nyang paleng gét nibak tieb-tieb ureuëng; lam keuadaan pakriban mantong ureuëng nyang na geunaséh nyan hántom na gadôh harapan jih dan saba jipreh peue-peue mantong.
8 Hántom na watée jih ureuëng teuma saléng jigeumaséh. Jinoenyoe na ureuëng nyang carông jipeusampoe haba nyang teuka nibak Po teu Allah, teuma singoh jipiôh jipeusampoe haba nyan. Jinoenyoe na nyang carông jimeututoe lam meubagoe basa nyang ajaéb, teuma singoh jihnyan teuma jipiôh peugah haba ngon basa-basa nyan. Jinoenyoe na ureuëng nyang jiteupeu lam mubagoe hai, teuma singoh peue nyang awaknyan teupeue nyan teuma tuwoe.
9 Sabab, iéleumé tanyoe dan keumampuan tanyoe keu tapeusampoe haba nyang teuka nibak Po teu Allah nyan, mantong kureueng sampoereuna.
10 Teuma teuma trok watée jih Allah geupeujeuet banmandum nyan sampoereuna, dan nyang hana sampoereuna nyan teuma gadôh.
11 Watée ulôn mantong aneuëk miet, ulôn mariet lagée aneuëk miet, peurasaan lagée aneuëk miet dan ulôn seumike pih lagée aneuëk miet. Jinoenyoe ulôn ka rayeuk, pi-e ulôn nyang lagée aneuëk miet ka ulôn tinggai.
12 Peue nyang tanyoe ngieng nibak watée nyoe na kheueh lagée bubayang nyang buram lam ceureumen. Teuma singoh tanyoe tangieng langsong ngon nyata. Jinoenyoe ulôn hana lôn teupeu sapeue, teuma singoh lôn teupeu peue-peue mantong saban lagée Allah peue-peue mantong keuhai droe ulôn.
13 Ngon lagée nyan, bak watée nyoe na lhée boh hai nyang teutab harôh tapeubuet: meuiman, meuharab dan saléng tameugaséh sabe keudroe-droe. Nyang paleng peunteng lam lhée boh nyan na kheueh beutagaséh kheueh keu ureuëng-ureuëng laén.


Chapter 14

1 Gata useuha kheueh beugata gaséh keu ureuëng laén. Dan useuha kheueh teuma keu gata teurimong karonya-karonya nyang geubri lé Roh Allah, nyang paleng peunteng na kheueh hase keu gata peusampoe reuncana-reuncana Allah ubak manusia.
2 Ureuëng nyang meututoe lam basa nyang ajaéb, ureuëng nyan kon jimeututoe bak manusia; teuma jimarit ngon Po teu Allah. Hana ureuëng nyang muphom peue nyang jipeugah, sabab Roh Allah kheueh nyang jeuet keusabab jipeugah hai-hai nyang teuma geuteupeue lé Po teu Allah.
3 Teuma keu ureuëng nyang peutrok haba nyang teuka nibak Allah, laju jipeutrok ubak manusia; keu teupeuteuga awaknyan, keu teubri seumangat bak awaknyan dan keu teupeumangat awaknyan.
4 Ureuëng nyang meututoe haba lam basa nyang ajaéb na kheueh jipeukong droe jih keudroe, seudangkan ureuëng nyang peusampoe haba nyang teuka nibak Allah jitulông jeumaáh mangat meutamah maju.
5 Keubiet gét lumpah na meunyoe Gata banmandum hase tameututoe ngon mubagoe basa nyang ajaéb. Teuma nyang paleng gét na kheueh meunyoe Gata hase tapeusampoe reuncana-reuncana Allah. Sabab ureuëng nyang peusampoe haba nibak Allah, leubeh rayeuk nibak ureuëng nyang meututoe ngon mubagoe basa nyang ajaéb; laén hai jih meunyoe ureuëng nyang hase jimeututoe ngon mubagoe basa nyang ajaéb nyan hase jipeugah peue nyang jimeututoe nyan, mangat banmandum jeumaáh meuteumé ceufaát jih.
6 Meunyoe ulôn miseue jih lôn jak bak gata dan ulôn meututoe ngon basa-basa nyang ajaéb, keupeue guna jih atra nyan keu gata? Mubacut pih hana meuguna nibak gata! Laén hai jih, meunyoe teupeugah saboh ungkapan nyang teuka nibak Allah, atawa ulôn peugah sapeue-sapeue keuhai Allah, atawa ulôn peusampoe haba nyang teuka nibak Allah, atawa ulôn seumeubeuet.
7 Alat-alat musik nyang hana meunyawöng mubacut pi, lagée suleng ngon keucapi, meunyoe nada-nada jih hana jipeumeuén ngon nyata, pakriban gob jiteupeu lagu peue nyang jipeumeuén nyan?
8 Saboh cuntoh nyang laén lom: meunyoe beureuguih jiyueb ban galak droe, soe ureuëng nyang ka siab keujijak muprang?
9 Meunan cit teuma ngon keumampuan Gata keu gata mariet ngon mubagoe basa nyang ajaéb. Meunyoe gata ngon keusanggopan nyan gata mariet ngon haba nyang hana meuteuntée, hana meusidroe ureuëng pih nyang hase jipeuphom peue nyang Gata peugah nyan. Tutoe haba nyan teuma gadôh hana meuteuntée.
10 Lam donya nyoe na basa nyang lumpah that jai, teuma hana meusaboh pih nibak basa-basa nyan nyang hana meumakna.
11 Teuma meunyoe ulôn hana muphom ngon basa nyang jipeugah lé sidroe-droe ureuëng, ngon lagée nyan, ureuëng nyang peuguna basa nyan na kheueh ureuëng aséng teuhadab ulôn; meunan cit ulôn nibak ureuëng nyan.
12 Meunyoe keu gata keudroe, ulôn kuteupeu gata meuharab that bumeuteumé karonya nibak Roh Allah. Teuma nyang paleng phon, gata useuha kheueh keugata mita keusanggopan nyang jeuet teutulông jeumaáh nyang hase maju.
13 Nyang kheueh sabab jih ureuëng nyang meututoe ngon basa nyang ajaéb, meuseuti jimeulakée ubak Po teu Allah mangat keujih nyan geubri keusanggopan keu jipeutrang peue nyang jipeugah nyan.
14 Sabab meunyoe ulôn meudoá ngon basa nyang ajaéb, roh ulôn beutôi meudoá, teuma pikeran ulôn hana jimubuet.
15 Ngon lagée nyan, peue nyang meuseuti ulôn peubuet? Nyoe nyang teuma ulôn peubuet: Ulôn teuma meudoá ngon roh ulôn, ulôn meudoá cit ngon pikeran lôn. Ulôn teuma meulagu ngon roh ulôn, teuma ulôn pih keuneuek meulagu ngon pikeran lôn.
16 Sabab meunyoe Gata tapeugah teurimong gaséh ubak Allah ngon roh gata mantong, dan na ureuëng laén nyang hana muphom basa ajaéb nyang teuka nibak Roh Po teu Allah nyan, ngon lagée nyan ureuëng laén nyan jipeugah, "Ulôn situju" ateueh doá syukoe gata nyan; sabab jih nyan hana jiteupeu peue nyang Gata peugah.
17 Bah kheueh doá teulakée teurimong gaséh nibak Tuhan nyan keubiet that gét, teuma doá nyan hana meuguna mubacut pi keu ureuëng laén.
18 Ulôn meuteurimong gaséh ubak Po teu Allah sabab ulôn keudroe hase lôn peugah haba lam mubagoe basa nyang ajaéb leubeh nibak Syedara banmandum.
19 Teuma, bak teumpat-teumpat meusapat keuteuseumah Tuhan, ulôn leubeh galak lôn peuguna limong boh tutoe haba nyang hase jimuphom lé gob nibak lôn peuguna meuribée-ribée tutoe haba lam basa nyang ajaéb. Ulôn leubeh galak lagée nyan mangat jeuet lôn peubeuet gob.
20 Syedara-syedara! Bék kheueh gata seumike lagée aneuëk manyak. Lam hai buet nyang jeuhet, bah kheueh gata lagée aneuëk miet. Teuma seumike, bah kheueh gata jeuet keu ureuëng rayeuk.
21 Lam Alkitab na teutuléh lagée nyoe, "Tuhan meufeureuman, 'Ngon peurantaraan ureuëng-ureuëng nyang meututoe ngon basa nyang hana muphom, Ulôn teuma kumariet ngon umat nyoe. Meunan cit ngon peurantaraan ureuëng aséng, Ulôn teuma meututoe haba ngon umat Lôn; bah kheueh meunan, awaknyan teutab hana jitem deungoe nyang ulôn peugah.' " 22 Teumanyoe teupeugah haba ngon meubagoe basa nyang ajaéb na kheueh sibagoe tanda ureuëng nyang hana meuiman, kon keue ureuëng nyang meuiman. Dan karonya nyang teupeusampoe reuncana Allah ubak manusia na kheueh tanda keu ureuëng nyang meuiman, kon keu ureuëng nyang hana meuiman.
23 Ngon sabab nyan, meunyoe seukira jih watée meusapat ngon jeumaáh jimeututoe ngon mubagoe basa nyang ajaéb, laju jiteuka keunan na meupadub droe ureuëng luwa, atawa nyang bukon ureuëng Kristen, teuntée ureuëng nyan teuma jisangka gata kapungoe banmandum!
24 Teuma meunyoe Gata banmandum tapeusampoe haba nibak Po teu Allah, laju jiteuka keunan ureuëng nyang kon Kristen atawa ureuëng luwa, teuma hai-hai nyang Gata peugah lé gata mandum teuma teutunyok ubak desya-desya ureuëng nyan dan teupeujeuet jihnyan sadar nibak desya-desya jih.
25 Hai-hai nyang teusöm lam até jih teuma jipeugah, sampoe ureuëng nyan teuma jipeumiyueb droe laju jiseumah Allah. Ureuëng nyan teuma meungaku bahwa Po teu Allah keubiet-keubiet na lamkawan awaknyan.
26 Ngon lagée nyan syedara-syedara, peue areuti jih keumandum nyan? Meunyoe gata meusapat keu taseumah Tuhan, na nyang meulagu, na nyang seumeubeuet, na nyang peugah sapeue-sapeue nyang teuka nibak Po teu Allah, na nyang meututoe lam basa nyang ajaéb, dan nyang jipeuglah peue nyang jipeugah nyan. Teuma banmandum nyan harôh jipeubuet keu seumeubeuet dan keu nyang keugét banmandum.
27 Meunyoe na keuneuk meututoe lam basa nyang ajaéb, meuseuti dua atawa paleng ramé lhée droe mantong seucara meugantoe-gantoe. Dan meuseuti na nyang peuglah peue nyang jipeugah lé ureuëng nyang meututoe nyan. 28 Meunyoe hana ureuëng nyang hase jipeugah makna tutoe haba awaknyan, teuma ureuëng-ureuëng nyang meututoe lam basa nyang ajaéb nyan harôh seungab lam iébadat jih. Bah kheueh awaknyan jimeututoe lam até mantong ubak Po teu Allah.
29 Dua atawa na lhée droe nyang na haba nibak Allah bah kheueh jipeutrok haba nyan dan nyang laén jipeutimang peue nyang jipeugah nyan.
30 Teuma meunyoe seukira jih haba nyang teuka nibak Po teu Allah teuka nibak ureuëng laén nyang na jiduek lam meusapat nyan, teuma ureuëng nyang teungoh peugah haba, bah kheueh jipiôh.
31 Ngon cara nyang lagée nyan, Syedara-syedara banmandum, sidroe deumi sidroe, jeuet jipeusampoe haba nyang teuka nibak Po teu Allah nyan; mangat banmandum hase jiteurimong peungajaran dan seumaken jeuet keu ureuëng meuiman.
32 Karonya nibak Roh Allah keuteupeusampoe haba nibak Allah hase teukeundali lé ureuëng nyang peusampoe haba nyan.
33 Po teu Allah na kheueh Allah nyang galak keuteureuteb; Gobnyan kon Allah nyang harôk keu buet nyang karu. Lagée nyang ka teupeugét lam banmandum jeumaáh Allah,
34 ureuëng inong bah kheueh jiseungab watée bak teumpat meusapat jeumaáh. Awaknyan hana jeuet jipeugah haba. Awaknyan hana jeuet jimat pimpénan; nyan sisuai ngon huköm agama.
35 Meunyoe awaknyan jikeuneuk teupeue sapeue-sapeue, inong nyan bah kheueh jitanyong hainyan bak lakoe jih di rumoh. Keubiet that malée meunyoe sidroe ureuëng inong jiteumanyong watée bak jeumaáh meusapat.
36 Peu kheueh feureuman Allah teuka nibak gata? Atawa keugata mantong feureuman nyan geupeusampoe?
37 Meunyoe na ureuëng nyang meurasa na karonya keu jipeusampoe haba nyang teuka nibak Po teu Allah, atawa jihnyan na karonya nyang laén nyang teuka nibak Po teu Allah, ureuëng nyan harôh sadar bahwa peue nyang ulôn tuléh nyoe na kheueh peurintah nibak Tuhan.
38 Teuma meunyoe na nyang hana jitem teurimong nyoe, bék kheueh gata pakoe ateueh ureuëng nyan.
39 Ngon sabab nyan, Syedara-syedara, gata useuha kheueh keu gata peusampoe haba nyang teuka nibak Po teu Allah, teuma bék kheueh gatatam ureuëng nyang keuneuk meututoe ngon mubagoe basa nyang ajaéb.
40 Teuma banmandum nyan harôh jipeubuet ngon jroh dan teuatoe.


Chapter 15

1 Dan jinoenyoe, Syedara-syedara, ulôn meuharab gatanyoe mandum taingat lom keuhai Haba Gét nyang teuka nibak Po teu Allah nyang ulôn bri tée keugata. Gata teurimong, dan meuiman ubak Almaseh sabab Haba Gét nyan.
2 Meunyoe gata tamumat nyang kong ubak peue nyang ulôn peugah nyan, ngon lagée nyan Haba Gét nyan jipeuseulamat gata; laén hai meunyoe Gata tapatéh ubak nyan hana peungeurtian.
3 Peue nyang ulôn peusampoe bak Syedara-syedara na kheueh nyang ka lôn teurimong cit teuma. Nyang paleng peunteng, lagée nyang na teutuléh lam Alkitab, lôn peusampoe bak gata bahwa Almaseh maté sabab lé desya-desya tanyoe;
4 bahwa Gobnyan teupasoe lam jrat, teuma bak uroe nyang keu lhée Gobnyan teupeu udeb lom teuma. Nyan pi na teutuléh lam Alkitab.
5 Ulôn peugah lom ubak gata bahwa Almaseh nyang teupeu-udeb lom teuma nyan geupeuleumah lom droe Gobnyan ubak Petrus, dan óh lheueh nyan ubak bandua blaih droe rasui.
6 Óh lheueh nyan geupeuleumah teuma droe Gobnyan ubak leubeh nibak limong reutôh droe murit Gobnyan sigoe guih. Mantong ramé lamkawan awaknyan nyang mantong udeb trok bak saát nyoe, teuma na padub droe nyang ka meuninggai donya.
7 Óh ka lheueh Almaseh geupeuleumah droe ubak Yakobus dan óh lheueh nyan ubak mandum rasui.
8 Nyang paleng akhé geupeuleumah droe ubak ulôn -- ulôn nyang lagée aneuëk manyak nyang lahé kon bak watée jih!
9 Ulôn na kheueh rasui Tuhan nyang paleng miyueb. Ulôn hana patot teupeugah rasui, sabab ulôn ka lôn iénanya jeumaáh Allah.
10 Teuma sabab rakhmat Allah ulôn jeuet lagée keuadaan ulôn bak watée nyoe. Dan hana kheueh sia-sia Allah geupeue amphon ulôn. Teuma ulôn kheueh nyang mubuet nyang leubeh brat nibak mandum rasui-rasui nyang laén. Teuma nyan kon useuha ulôn; nyan na kheueh useuha Po teu Allah nyang geugaséh ulôn dan nyang mubuet meusajan-sajan ngon ulôn.
11 Ngon lagée nyan, nibak soemantong gata teurimong Haba Gét nyan -- peu kheueh nibak ulôn atawa nibak rasui-rasui nyang laén -- nyan hana jeuet keusoai. Nyang peunteng kamoe bri tée Haba Gét nyan dan Gata meuiman.
12 Meunyoe nyang kamoe bri tée nyan bahwa Almaseh ka teupeu udeb lom teuma nibak maté, pakon na lamkawan gata nyang peugah bahwa ureuëng maté hana teupeue udeb le?
13 Meunyoe keubiet ureuëng maté hana teupeu udeb lom teuma, nyan saban cit Almaseh hana teupeu udeb lom teuma nibak maté.
14 Dan meunyoe sikeubiet jih Almaseh hana teupeu udeb lom nibak maté, ngon lagée nyan hana guna jih kamoe peugah peue-peue mantong dan hana teuma guna jih gata meuiman, sabab keupeucayaan gata nyan hana dasai sapeue.
15 Leubeh nibak nyan, nyata kheueh bahwa kamoe meusulet keuhai Po teu Allah, sabab kamoe bri tée bahwa Allah ka geupeu udeb lom teuma Almaseh nibak maté, padahai Allah hana geupeu udeb Gobnyan lom teuma -- meunyoe keubiet ureuëng maté hana geupeu udeb lom teuma!
16 Sabab meunyoe ureuëng maté hana teupeu udeb lom teuma, ngon lagée nyan Almaseh pih hana teupeu udeb lom teuma nibak maté.
17 Dan meunyoe Almaseh hana teupeu udeb lom teuma nibak maté ngon lagée nyang gata peucaya nyan na kheueh lumpo nyang hana meuguna; nyan saban cit gata mantong lam keuadaan meudesya dan hana harapan mubacut pi.
18 Nyan meumakna teuma bahwa ureuëng-ureuëng Kristen nyang ka meuninggai donya, meunan cit hana harapan sapeue.
19 Meunyoe harapan tanyoe ubak Almaseh teubataih bak udeb geutanyoe lam donya nyoe mantong, teuma nibak banmandum umat manusia nyang na lam donya nyoe, tanyoe kheueh nyang paleng malang!
20 Teuma ngon lagée nyan deuh kheueh Almaseh ka teupeu udeb lom teuma nibak maté. Nyoe kheueh jaminan jih bahwa ureuëng-ureuëng nyang ka maté teuma teupeu udeb lom teuma.
21 Sabab maté nyang jitamong lam donya nyoe ngon peurantaraan sidroe ureuëng, meunan cit ngon udeb lom teuma nibak maté nyang geubri keu manusia ngon peurantaraan sidroe ureuëng teuma. 22 Lagée tateupeue banmandum manusia maté sabab jitamong saboh ngon Nabi Adam, meunan cit ngon mandum nyang geupeu udeb, sabab jitamong saboh ngon Almaseh.
23 Teuma maséng-maséng geupeu udeb meunurot gileran jih: nyang phon-phon that Almaseh; óh lheueh nyan singoh watée Gobnyan teuka lom teuma, teuka gileran lé ureuëng-ureuëng nyang jitamong lam atra Almaseh.
24 Óh lheueh nyan barô kheueh teuka uroe kiamat. Bak watée nyan Almaseh teuma geupeu taklôk banmandum peumeurintahan, banmandum keukuasaan dan banmandum nyang teuga-teuga; laju Gobnyan geupeujok keukuasaan geuhnyan sibagoe Raja, ubak Allah, Bapak geutanyoe.
25 Almaseh meuseuti geumat sabe peumeurintah sampoe Allah geupeujeuet banmandum musoh Almaseh taklôk ubak Almaseh.
26 Musoh nyang paleng akhé nyang teuma geupeu taklôk na kheueh maté.
27 Lam Alkitab na teutuléh lagée nyoe, "Allah ka geupeujeuet peue-peue mantong taklôk ubak Gobnyan." Deuh kheueh disinoe bahwa nyang teupeugah ngon "peue-peue mantong" nyan hana jitamong Allah keudroe, nyang peujeuet peue-peue mantong nyan taklôk ubak Almaseh. 28 Teuma óh ka lheueh banmandum nyan teupeutaklok u miyueb peumeurintahan Almaseh, ngon lagée nyan Gobnyan keudroe, na kheueh Aneuëk Allah, geupeu taklôk droe Gobnyan ubak Allah nyang ka geupeujeuet peue-peue mantong taklôk ubak Gobnyan. Ngon lagée nyan Allah keudroe pi nyang peurintah banmandum nyan.
29 Meunyoe ureuëng maté hana geupeu udeb lom teuma, pakon na ureuëng nyang teupumanö keu ureuëng maté? Keupeue guna jih awaknyan jipeubuet hai nyan? Meunyoe keubiet ureuëng maté sagai-sagai hana teupeu udeb le, keupeue guna jih awaknyan jipeubuet hai nyan?
30 Dan keupeue teuma guna jih kamoe meuhadab ngon bahya tieb-tieb watée?
31 Syedara-syedara! Tieb-tieb uroe ulôn ék lôn teun deurita sabab ulôn bangga ateueh udeb gata ngon sabab ka tameuiman ubak Isa Almaseh, Tuhan tanyoe.
32 Meunyoe nyan teuma keuhai manusia mantong, peue laba jih keu ulôn lôn meujuang siulah-ulah lôn lawan beulatang-beulatang juah nyang na lam banda nyoe, di Efesus? Meunyoe keubiet ureuëng maté hana teupeu udeb lom teuma, ngon lagée nyan, leubeh gét taseutôt peue nyang jipeugah lé pribasa nyoe: "Jak tanyoe tamakheun ngon tajieb ié tapeulalo até ban galak droe, sabab singoh tanyoe teuma maté."
33 Bék kheueh gata keunong tipée! Meurakan ngon brok teuma jipeureulôh nyang jroh.
34 Sadar kheueh bak saát nyoe, dan bék le gata peubuet desya. Nyang sibeuna jih gata harôh malée, bahwa lamkawan gata na nyang gohlom jituri keu Po teu Allah.
35 Mungken na nyang teumanyong, "Pakriban kheueh ureuëng maté teupeu udeb lom teuma? Tuboh nyang pakriban kheueh nyang teubri keu awaknyan, óh ka lheueh awaknyan teupeu udeb lom teuma?"
36 Bangai lumpah na! Meunyoe Gata tapula bijéh lam tanoh, bijéh nyan hana teuma timoh, meunyoe bijéh nyan gohlom maté leubeh ilée.
37 Dan bijéh nyang Gata pula lam tanoh nyan -- mungken bijéh gandom atawa bijéh laén -- na kheueh aneuëk bijéh nyan mantong, kon mandum seunaman nyang timoh singoh.
38 Allah keudroe nyang bri keu bijéh nyan beuntuek nyang meunurot pandangan Gobnyan gét keu seunaman nyan. Keu tieb-tieb rupa bijéh, Allah geubri beuntuek seunaman nyan keudroe jih maséng-maséng.
39 Tubôh makhlok-makhlok nyang meunyawöng hana mandum nyan sa. Manusia na saboh jeunéh tuboh, meunan cit keu beulatang-beulatang na saboh jeunéh tuboh nyang laén; meunan cit cicém-cicém laén teuma jeunéh tuboh jih, dan eungkot-eungkot laén teuma jeunéh tuboh jih.
40 Meunan cit teuma ngon mubagoe beunda nyang na dilangét dan meunan cit nyang na dibumoe. Mubagoe beunda nyang na dilangét maséng-maséng na keulagak jih keudroe, dan beunda-beunda nyang na dibumoe pih lagée nyan cit teuma.
41 Gét mata uroe meulaén ngon gét buleuen. Meunan cit ngon bintang-bintang pi na keugét jih keudroe. Dan bintang-bintang nyan maséng-maséng laén teuma gét jih.
42 Meunan cit hai jih singoh keu ureuëng-ureuëng nyang ka maté teupeu udeb lom teuma. Tuboh nyang ka teukubu nyan na kheueh tuboh hase jeuet keu brok, teuma tuboh nyang teupeu udeb lom teuma, na kheueh tuboh nyang hana jitem rusak.
43 Bak watée tuboh nyan teupeutamong lam jrat, tuboh nyan brok dan leumoh; teuma bak watée jihnyan teupeu udeb lom teuma, na kheueh tuboh nyang gét dan teuga.
44 Watée teupeutamong lam jrat, tuboh nyan na kheueh tuboh donya; teuma óh ka lheueh teupeu udeb lom teuma, tuboh nyan na kheueh tuboh nyang geubri lé Roh Allah. Na tuboh nyang nibak donya, na teuma tuboh nyang nibak Po teu Allah.
45 Lam Alkitab na teutuléh lagée nyoe, "Manusia nyang phon, na kheueh Nabi Adam, ka jeuet keu makhlok nyang udeb," teuma Nabi Adam nyang paleng akhé na kheueh Roh nyang jibri udeb.
46 Nyang teuka leubeh ilée na kheueh jasmani, kon nyang rohani. Nyang rohani teuka jih teuma óh dudoe.
47 Nabi Adam nyang phon teupeujeuet nibak tanoh, teuma Nabi Adam nyang keudua asai jih lam syeuruga.
48 Ureuëng-ureuëng nyang na lam donya nyoe na kheueh lagée Nabi Adam nyang phon, nyang geupeujeuet nibak tanoh, teuma ureuëng-ureuëng syeuruga na kheueh lagée Gobnyan nyang teuka nibak syeuruga.
49 Lagée geutanyoe bak watée nyoe na kheueh lagée Nabi Adam nyang geupeujeuet nibak tanoh, singoh tanyoe teuma jeuet lagée Gobnyan nyang nibak syeuruga nyan.
50 Meukeusut ulôn, Syedara-syedara, na kheueh: tuboh nyang geupeujeuet nibak darah ngon asoe, hana hase jitamong lam Donya Barô Allah; dan tuboh nyang hase maté hana jeuet keu siumu masa.
51 Ngieng kheueh rahsia nyoe: Hana banmandum tanyoe maté, teuma tanyoe banmandum meu-ubah.
52 Hainyan teujadi lam sikeujab ngon sikrék mata, bak watée sangka kala teuyueb keu nyang paleng akhé. Sabab bak watée teudeungoe su sangka kala nyan, ureuëng-ureuëng maté teupeu udeb lom teuma ngon tuboh nyang abadi, dan tanyoe banmandum teuma geu-ubah.
53 Tuboh tanyoe nyang hase maté nyoe meuseuti teugantoe ngon tuboh nyang hana hase maté, dan tuboh nyang nibak donya meuseuti teugantoe ngon tuboh nyang nibak syeuruga.
54 Meunyoe tuboh nyang hase maté ka meuteumé teugantoe ngon tuboh nyang hana hase maté, dan tuboh nyang nibak donya ka teugantoe ngon tuboh nyang nibak syeuruga, bak watée nyan barô kheueh teujadi peue nyang ka teutuléh lam Alkitab, "Maté ka geupeu hanco; meunang ka meuteumé!"
55 "Hei mawöt, hoka meunang gata nyan? Hei mawöt, dipat kheueh bisa gata?"
56 Bisa mawöt na kheueh desya, dan desya jipeujak peuranan jih rot huköm agama.
57 Teuma syukoe that ubak Po teu Allah; Gobnyan ka geubri keugeutanyoe keumeunangan rot Isa Almaseh Tuhan geutanyoe!
58 Ngon sabab nyan, Syedara-syedara nyang lon gaséh, bah kheueh gata teuga dan teugoh. Mubuet kheueh bék tinggai keu Tuhan ngon biet-biet sunggoh, sabab gata tateupeue bahwa banmandum nyang gata peubuet nyan na kheueh keu Tuhan, nyan hana teuma peucuma.


Chapter 16

1 Jinoenyoe keuhai péng nyang keuneuk gata sumbang keuseusamoe ureuëng Kristen, jinoenyoe ulôn peugah bak gata mangat gata peubuet saban lagée peutunyok nyang ka ulôn jok bak jeumaáh-jeumaáh nyang na di Galatia.
2 Bak uroe phon tieb-tieb uroe aleuhat, bah kheueh Gata banmandum takeubah péng, maséng-maséng sisuai ngon padubna hase hareukat jih. Keubah kheueh péng nyan sampoe ulôn teuka, ngon lagée nyan watée trok bak watée jih singoh hana peureulée le gata peusapat.
3 Teuma meunyoe ulôn ka trok, ulôn teuma lôn yue jak ureuëng-ureuëng nyang ka gata situju. Ulôn kujok bak ureuëng nyan surat peu intat, mangat awaknyan jiba péng sumbangan nyan u Yerusalem.
4 Dan meunyoe deuh jih gét ulôn pih kujak ngon awaknyan, teuma ulôn kujak meusajan-sajan ngon awaknyan.
5 Ulôn lôn jaksaweue gata óh ka lheueh lôn jak rot Mekadonia, sabab ulôn kana niet keuneuk jak rot nyan.
6 Jeuet mantong ulôn tinggai sikeujab ngon gata, mungken watée musém sijuek. Óh ka lheueh nyan gata meuteumé tatulông ulôn watée ulôn jak u teumpat laén.
7 Ulôn hana kutem kusaweue gata meunyoe keuneuk piôh mantong. Tuhan geubri idhin keulôn, ulôn keuneuk tinggai beutreb bacut ngon gata.
8 Teungoh lôn tinggai lam banda nyoe, di Efesus, trok ubak uroe Pentakosta.
9 Jai that nyang watée jih nibak teumpat nyoe nyang jeuet teupeubuet keu buet-buet nyang na manfaát, bah pi jai that teuma ureuëng nyang hana galak.
10 Meunyoe Timotius teuka, sambot kheueh jihnyan ngon gét mangat jihnyan meurasa harok lamkawan gata, sabab jihnyan saban lagée ulôn nyang mubuet keu Tuhan.
11 Bék sampoe na ureuëng nyang jianggab enteng keu jihnyan. Tulông kheueh jihnyan mangat jihnyan hase jiwoe lom teuma ubak ulôn ngon seulamat, sabab ulôn kupreh jihnyan jiwoe meusajan ngon syedara-syedara nyang laén.
12 Keuhai syedara tanyoe nyang nan jih Apolos, kana padub goe ulôn yue bak jih mangat jihnyan meusajan ngon syedara nyang laén jijak saweue gata. Teuma jihnyan gohlom meurasa yakén bahwa jihnyan meuseuti jijak jinoenyoe. Teuma meunyoe na watée singoh, ka teuntée jihnyan teuma jijak.
13 Beuaté-até dan waspada kheueh gata dan beukong lam udeb gata sibagoe ureuëng Kristen. Meutindak kheueh ngon beuhe dan beuteuga kheueh.
14 Banmandum nyang gata peubuet, peubuet kheueh ngon gaséh.
15 Gata teuntée taturi keu Stefanus dan keuluwarga jih; awaknyan nyang phon-phon that jeuet keu ureuëng Kristen di Akhaya. Awaknyan ngon sipeunoh até jimubuet khusos jilayani umat Allah.
16 Ulôn yue bak gata ngon biet-biet mangat gata seutôt pimpénan ureuëng-ureuëng nyang lagée nyan, dan ureuëng-ureuëng laén nyang jimubuet sajan dan jilayani meusajan ngon awaknyan.
17 Ulôn galak that ngon teuka Stefanus nyan, Fortunatus dan Akhaikus. Awaknyan na kheueh geunantoe gata nibak ulôn.
18 Awaknyan ka jipeujeuet até ulôn mangat lumpah na, lagée awaknyan ka jipeumangat até gata. Ureuëng-ureuëng nyang lagée nyan meuseuti teuhareuga.
19 Jeumaáh-jeumaáh nyang na di Asia jipeutrok saleuem keu gata. Akwila dan Priskila dan jeumaáh nyang meugumpôi dirumoh awaknyan jikirém saleuem Kristen nyang that-that geumbira.
20 Banmandum syedara nyang na disinoe jipeutrok saleuem keu gata. Meubôt-bôt saleuem kheueh ngon meusra sibagoe syedara lam Kristen.
21 Ulôn tamah disinoe saleuem nyang lôn tuléh keudroe: saleuem nibak ulôn, Paulus. 22 Ureuëng nyang hana jigaséh keu Tuhan, bah kheueh jihnyan keunong kutok! Maranatha -- Tuhan kamoe, teuka kheueh!
23 Seumoga Tuhan Isa geubri beureukat keu Gata.
24 Teurimong gaséh keu gata mandum nyang meusaboh ngon Isa Almaseh.