2 Korintus

1 2 3 4 5 6 7 8 9 10 11 12 13


Chapter 1

1 Syedara-syedara jeumaáh Allah nyang na di Korintus dan banmandum jeumaáh Allah nyang na di Akhaya. Ulôn, Paulus, rasui Isa Almaseh, nyang teuangkat ateueh keuheundak Po teu Allah, meusajan-sajan ngon syedara tanyoe Timotius,
2 meuharab seumoga Po teu Allah Bapak geutanyoe dan Tuhan Isa Almaseh geubri beureukat dan seujahteura keu gata banmandum.
3 Teupujoe kheueh Allah, Bapak nibak Tuhan tanyoe Isa Almaseh. Gobnyan Bapak nyang paleng gét até, dan Gobnyan Allah nyang geubri teunaga batén keu manusia.
4 Gobnyan geupeukong baten kamoe bak tieb-tieb kamoe meuteumé susah, mangat jeuet ngon teunaga nyang kamoe teurimong nibak Po teu Allah nyan, kamoe jeuet kamoe peukong baten banmandum ureuëng nyang lam apoh apah.
5 Deurita-deurita nyang geurasa lé Almaseh ka jai that kamoe rasa. Dan rot Almaseh cit teuma, baten kamoe keubiet that-that geupeukong.
6 Meunyoe kamoe meurasa lam susah, nyan na kheueh sibagoe teupeukong baten gata, deumi gata seulamat. Meunyoe baten kamoe geupeukong, ngon lagée nyan gata pi meusajan ngon kamoe teupeukong sampoe gata jeuet keutabah watée tateurimong hai-hai nyang susah lagée nyang kamoe rasanyoe.
7 Kamoe sabe yakén dan hántom na ragu-ragu ateueh Gata, sabab kamoe meuteupeu bahwa gata meusajan meudeurita ngon kamoe. Ngon sabab nyan gata pi meusajan teupeukong sinoe ngon kamoe.
8 Syedara-syedara! Kamoe meuharab gata beutateupeue keuhai susah kamoe nyang kamoe rasa di wilayah Asia. Deurita nyang kamoe tanggong nyoe keubiet that jiteugon kamoe, sampoe nibak kamoe ka hana meuharab le keu udeb nyoe;
9 rasa jih ka lagée jipeurhot huköman maté mantong. Teuma hainyan jeuet mangat kamoe bék meusadeue bak teunaga droe teuh keudroe, teuma ubak Allah nyang peu-udeb ureuëng maté.
10 Gobnyan kheueh nyang ka geupeuseulamat kamoe nibak bahya maté nyang paleng rayeuk. Dan Gobnyan cit teuma nyang peuseulamat kamoe singoh bak uroe-uroe pagée, sabab, ubak Gobnyan kheueh kamoe meuharab.
11 Kamoe yakén bahwa ngon doá-doá nyang na keu kamoe, Po teu Allah teuma geupeu seulamat kamoe nibak bahaya. Allah geutem geubri beureukat bak kamoe sibagoe geujaweueb ateueh jai that doá keu kamoe, ngon sabab nyan jai that ureuëng jilakée teurimong gaséh ubak Po teu Allah.
12 Kamoe bangga, sabab até nurani kamoe teupeuyakén kamoe bahwa udeb kamoe lam donya nyoe -- nyang paleng peunteng hubongan kamoe ngon gata ka kamoe peujak ngon ikhlaih dan murni. Kamoe peubuet nyan, kon ngon keubijaksanaan manusia, teuma ngon keumampuan nyang geubri lé Po teu Allah.
13 Nyang kamoe tuléh keu gata na kheueh keuhai-hai nyang hase gata baca dan muphom. Jinoenyoe gata hana muphom keu kamoe nyang sibeuna jih, teuma ulôn harab singoh gata biet-biet muphom keu kamoe. Ngon lagée nyan, watée Tuhan Isa teuka singoh, gata teuma bangga ateueh kamoe, lagée kamoe pih that-that bangga ateueh gata.
15 Sabab ngon keuyakénan nyan kheueh yoh awaikon ulôn ka lôn reuncana keuneuk jak saweue gata mangat keu gata meuteumé beureukat dua goe lipat.
16 Ulôn na meukeusut keuneuk saweue gata watée ulôn jak u Makedonia dan lôn piôh lom bak gata watée ulôn woe lom teuma, mangat gata jeuet tatulông ulôn watée lônjak u Yudea.
17 Teuma niet ulôn nyan ka lôn ubah; teuma, peu kheueh ngon lagée nyan sibagoe peutunyok ulôn nyoe hana kong peundirian lôn? Watée lôn peugét reuncana, peu kheueh reuncana nyang lôn peugét ateueh keuheundak droe lôn keudroe, sikeujab jipeugah, "Nyoe" dan "Kon"?
18 Deumi Allah nyang jeuet teupeucaya, janji ulôn ubak Gata kon kheueh "Nyoe" dan "Kon".
19 Sabab Isa Almaseh, Aneuëk Allah, nyang jipeusampoe ubak gata lé Silas, Timotius, dan ulôn keudroe kon kheueh ureuëng "Nyoe" dan "Kon". Nyang beutôi nyan kheueh jeunaweueb nibak Po teu Allah "Nyoe".
20 Sabab rot Gobnyan Allah ka geupeugah "Nyoe" keubanmandum janji Gobnyan. Ngon dasai nyan kheueh tanyoe tapeugah "Amin" ubak Po teu Allah sabab Isa Almaseh. Kamoe peubuet nyang lagée nyan mangat Allah teupeumulia.
21 Allah keudroe nyang peujeuet kamoe dan Syedara mandum yakén ngon kong tameusaboh ngon Almaseh; Gobnyan kheueh teuma nyang piléh tanyoe khusos keu droe Gobnyan. 22 Keu nyang nyan Po teu Allah ka geupeusah tanyoe jeuet keumilék dan geubri Roh Gobnyan lam até geutanyoe sibagoe jaminan bahwa Gobnyan teuma geubri ubak geutanyoe banmandum nyang ka geupeu janji nyan.
23 Allah saksi ulôn -- sabab Gobnyan geuteupeue peue nyang na lam até lôn -- bahwa ulôn hana jadéh lônjak u Korintus, sabab ulôn hana kutem até gata jeuet keuseudeh.
24 Ulôn hana lôn paksa gata keuhai gata peue nyang meuseuti gata meuiman, sabab gata keubiet ka that-that tameuiman ubak Almaseh. Ulôn teuma lôn mubuet meusajan ngon gata mangat gata seumaken bahgia.


Chapter 2

1 Ngon sababnyan ulôn ka lôn cok keuputosan hana lônjak le bak gata ngon kunjongan teupeusabab gata rhot bak seudeh.
2 Sabab meunyoe ulôn kupeuseudeh gata, soe teuma nyang hase jipeumangat até lôn, meunyoe kon ureuëng-ureuëng nyan cit teuma nyang ka lôn peuseudeh até jih nyan?
3 Nyang kheueh sabab jih ulôn tuléh surat nyan keu gata. Ulôn hana kutem jak saweue gata, laju gata peuseudeh até lôn padahai gata kheueh nyang peumangat até lôn. Sabab ulôn biet-biet yakén meunyoe ulôn mangat até, teuma gata banmandum pih mangat cit até.
4 Ulôn teumuléh keu gata ngon até nyang seudeh dan brat, jai that-that lôn ro ié mata. Nyang ulôn meukeusut kon gata pih beuseudeh, teuma gata sadar bahwa ulôn biet-biet lôn gaséh keugata.
5 Meunyoe na ureuëng nyang jeuet keusabab ureuëng laén seudeh, teuma hainyan nyang jipeubuet kon ateueh ulôn, teuma ateueh Syedara banmandum atawa paleng hana ateueh siladum nyang na lamkawan Gata. Ulôn hana kutem lôn meukreueh ateueh awaknyan.
6 Keu ureuëng nyang lagée nyan, huköman nyang teupeu rhot ateueh ureuëng nyan lé ureuëng nyang jai di teungoh-teungoh Gata, kaseb.
7 Jinoenyoe gata meuseuti tapeu amphon jihnyan dan tabri seumangat lom keu jihnyan mangat jihnyan bék treb-treb lam seudeh até sampoe putôh asa.
8 Ngon sabab nyan ulôn lakée, mangat gata tunyok lom ubak jihnyan bahwa gata biet-biet gaséh keu awaknyan.
9 Ulôn tuléh surat nyan keu gata ngon meukeusut keu lôn ujoe gata, peu kheueh gata sabe tatem seutôt banmandum peue-peue nyang ulôn tunyok.
10 Meunyoe gata tapeu amphon ureuëng-ureuëng nyang ka jipeubuet salah ateueh gata teuma ulôn pih lôn peu amphon keu ureuëng nyan. Sabab peue nyang ka lôn peu amphon -- meunyoe keubiet na nyang peureulée teupeu amphon -- nyan ulôn peu amphon dikeue Almaseh deumi keu nyang keugét gata.
11 Ulôn peubuet nyang lagée nyan mangat Iblih bék sampoe jicok keuseumpatan jikuasa ateueh geutanyoe; sabab tanyoe tateupeue reuncana-reuncana jih nyan.
12 Bak watée ulôn ka trok u Troas ngon meukeusut keuneuk peusampoe Haba Gét keuhai Almaseh, Tuhan ka geubuka jalan keu ulôn keu lôn mubuet bak teumpat nyan.
13 Teuma ulôn hana galak sabab hana meurumpok ngon syedara tanyoe Titus nyang na nibak teumpat nyan. Ngon lagée nyan laju lôn lakée droe bak ureuëng-ureuëng nyang na nibak teumpat nyan óh lheueh nyan lôn jak laju u Makedonia.
14 Teuma meusyukoe kheueh ubak Po teu Allah! Gobnyan sabe geupimpén kamoe meusajan lam pawai keumeunangan Almaseh sabab kamoe udeb meusaboh ngon Gobnyan. Allah geupeu guna kamoe mangat haba keuhai Almaseh meutabu lagée mubée nyang harom meusipreuk bansaboh nyan.
15 Sabab kamoe na kheueh lagée bée keumeunyan nyang mangat bée, nyang geutot lé Almaseh keu Po teu Allah. Keu ureuëng-ureuëng nyang teungoh jijak ubak keuhancoran, kamoe nyoe lagée bée ureuëng maté nyang seumeupoh; teuma keu ureuëng-ureuëng nyang teungoh teupeuseulamat, kamoe nyoe lagée bée harôm nyang teuba udeb. Ngon lagée nyan, soe kheueh nyang hase jipeupeunoh keuwajéban nyoe?
17 Kamoe hana lagée ureuëng ramé nyang jingui haba nibak Allah lagée barang nyang teupeubloe. Tujuan-tujuan kamoe na kheueh gleh, sabab kamoe geubri tugaih lé Po teu Allah. Dan Allah keudroe geukalon bahwa kamoe nyang jak peusampoe haba nyan sibagoe hamba-hamba Almaseh.


Chapter 3

1 Peu kheueh nyoe, deuh jih kamoe pujoe-pujoe droe kamoe lom? Atawa kamoe peureulée surat pujoe keu gata, atawa nibak gata, lagée nyang jipeureulée lé ureuëng-ureuëng laén?
2 Gata keudroe kheueh surat pujoe kamoe, nyang jeuet teutuléh lam até kamoe dan nyang jeuet jiteupeu ngon jibaca lé tieb-tieb ureuëng.
3 Awaknyan keudroe deuh jikalon bahwa Gata na kheueh surat nyang geutuléh lé Almaseh, nyang teukirém meulalu kamoe. Surat nyan teutuléh kon ngon daweuet, teuma ngon Roh Allah nyang udeb; kon teuma ateueh batée tuléh, teuma lam até manusia.
4 Kamoe peugah lagée nyan sabab keuyakénan kamoe keu Po teu Allah rot Almaseh.
5 Nibak kamoe hana sapeue alasan pi keuteupeugah bahwa kamoe hase kamoe peubuet buet nyoe, teuma Allah nyang bri keumampuan nyan ubak kamoe.
6 Gobnyan kheueh nyang peujeuet kamoe sanggob jeuet keupeulayan keusaboh peujanjian nyang barô; peujanjian nyang meugantueng ubak Roh Allah, kon bak huköm nyang teutuléh. Sabab nyang teutuléh nyan teuba ubak maté, seudangkan Roh Allah teubri udeb.
7 Watée peujanjian nyang teuba ubak maté nyan teupeugét dan teu uke ateueh batée, cahya Po teu Allah hu muble-ble bak muka Nabi Musa. Cahaya nyan keubiet that trang sampoe ureuëng Israel hana ék jipandang bak muka Nabi Musa, sampoe jeuet cahya nyang nibak muka geuh nyan ka jipeuphon layée bak watée nyan. Nyan, meunyoe teupeugét janji nyang jiba ubak maté nyan teureuseumi ngon ceumeurlang nyang gét that rayeuk,
8 teuntée teupeugét peujanjian nyang geubri lé Roh Allah, teureuseumi ngon leubeh ceumeurlang lom.
9 Meunyoe peujanjian nyang teuhuköm manusia nyan keubit that ceumeurlang, ka teuntée nyang leubeh ceumeurlang nyang teupeu mungken manusia jimeugét lom teuma ngon Po teu Allah.
10 Peue nyang yoh ilée ceumeurlang, ka hana ceumeurlang le sabab ngon ceumeurlang nyang na bak saát nyoe.
11 Meunyoe sapeue-sapeue nyang hase meuteun teuma sikeujab, meunan ceumeurlang, ka teuntée sapeue-sapeue nyang siumu masa leubeh ceumeurlang lom teuma.
12 Lé sabab kamoe na harapan nyang lagée nyan, nyang kheueh jeuet kamoe jeuet meututoe lagée nyan bagoe.
13 Kamoe kon lagée Nabi Musa nyang geutôb ngon silubong muka geuh mangat bék deuh jikalon le bansa Israel cahya Tuhan nyang teungoh lon dan teusampôh bak muka gobnyan.
14 Pikeran awaknyan ka teutôb. Dan trok án uroenyoe pi pikeran awaknyan mantong teutôb ngon sulubong watée awaknyan jibeuet kitab-kitab keuhai peujanjian nyang ka treb nyan. Sulubong nyan hase teubuka meunyoe ureuëng ka meusaboh ngon Almaseh.
15 Jinoenyoe pi, watée awaknyan jibeuet kitab-kitab Nabi Musa, sulubong nyan mantong teutôb pikeran awaknyan.
16 Teuma meunyoe sidroe-droe ureuëng jiteuka jijak meuhadab bak Tuhan, sulubong nyan pi teubeuôt nibak muka awaknyan.
17 Nyan, Tuhan nyang teupeugah disinoe na kheueh Roh. Dan dipat mantong Roh Tuhan na, nibak teumpat nyan pih na keumeurdehkaan.
18 Jinoenyoe muka tanyoe banmandum hana teutôb ngon sulubong, dan tanyoe peuhu cahya ceumerlang Tuhan Isa. Dan ngon sabab nyan tanyoe hana putôh-putôh jiubah jeuet lagée Gobnyan; maken treb tanyoe maken ceumeurlang. Ceumeurlang nyan teuka jih nibak Roh, dan Roh nyan na kheueh Tuhan.


Chapter 4

1 Kamoe peubuet-buet nyang lagée nyoe sabab keumurahan até Po teu Allah. Nyang kheueh sabab jih kamoenyoe hana putôh asa.
2 Kamoe hana kamoe peuguna cara-cara lam seupôt nyang jiba malée. Kamoe hana kamoe tem mubuet ngon ilat atawa kamoe puta balek feureuman Allah. Kamoe layani Allah ngon até nyang gleh lagée nyang geu lakée. Ngon sabab nyan, kamoe meuharab banmandum ureuëng jitilek kamoe ngon gét lam até nurani jih.
3 Meunyoe Haba Gét nyang kamoe peusampoe nyoe gohlom cit jituóh muphom, teuma ureuëng-ureuëng nyang teungoh jituju ubak keuhancoran kheueh nyang hana jituóh muphom.
4 Ilah jeuhet nyang kuasa donya nyoe nyang tôb pikeran ureuëng-ureuëng nyang hana meuiman nyan. Jihnyan kheueh nyang tam-tam awaknyan mangat awaknyan hana jingieng trang nyang na lam Haba Gét nyan na kheueh keuhai keubeusaran Almaseh, sibagoe haba nibak Po teu Allah.
5 Haba nyang kamoe peusampoe nyan kon kheueh haba keuhai kamoe keudroe. Haba nyan na kheueh haba keuhai Isa Almaseh; bahwa Gobnyan na kheueh Tuhan; dan kamoe na kheueh hamba-hamba gata sabab lé Gobnyan.
6 Allah meufeureuman, "Bah kheueh nibak lam seupôt jiteubiet trang," Allah nyan cit teuma nyang peuteubiet trang nyan lam até geutanyoe, mangat pikeran tanyoe jeuet keutrang keu teumuphom keuceumeurlangan Allah nyang meucahya bak muka Almaseh.
7 Teuma atra rohani nyang ceudahnyan kamoe ba bak droe kamoe nyang hana meuyuem nyoe nyang teupeugét nibak tanoh. Ngon lagée nyan deuh kheueh bahwa keubeusaran kuasa nyan teuduek nibak Po teu Allah dan kon bak kamoe.
8 Kamoe jiheuntam wie ngon uneuen, teuma kamoe teutab hana meuseupet. Kamoe bingong, teuma hana sampoe putôh asa.
9 Jai that nyang jimeumusoh ngon kamoe, teuma kamoe hántom na kamoe tinggai sidroe. Dan bah kheueh kamoe kayém that jipoh sampoe reubah, teuma kamoe hana maté.
10 Sabe kamoe rasa Isa nyang ka maté nyan na nibak tuboh kamoe, mangat udeb geuh pi leubeh deuh nibak tuboh kamoe.
11 Simantong kamoe udeb, kamoe sabe jiancam lé maté sabab Isa, ngon lagée nyan udeb Isa pih jeuet teupeugah bak tuboh kamoe nyang fana nyoe.
12 Nyoe saban cit bahwa lam tuboh kamoe maté nyan teungoh biet-biet jipeujak peuranan jih, teuma kamoe galak that bahwa udeb nyang teungoh biet-biet lam tuboh gata.
13 Lam Alkitab na teutuléh lagée nyoe, "Ulôn kupatéh, nyang kheueh sabab jih ulôn peugah haba." Nyan, ngon seumangat meuiman nyang lagée nyan cit teuma, kamoe peugah haba sabab kamoe meuiman.
14 Kamoe yakén bahwa Allah nyang ka geupeu udeb lom teuma Tuhan Isa, teuma geupeu udeb kamoe ngon Isa, dan teuba gata dan kamoe ukeue Gobnyan.
15 Banmandum nyan na kheueh keu keupeuntengan gata. Sabab seumaken jai ureuëng nyang jirasa geunaséh Allah, seumaken jai teuma doá syukoe nyang jipeusampoe ubak Po teu Allah; ngon lagée nyan Allah jipeumulia.
16 Nyang kheueh sabab jih kamoe hana putôh asa. Bah kheueh kamoenyoe seucara lahé seumaken meutamah rusak, teuma seucara batén kamoenyoe geupeujeuet barô tieb-tieb uroe.
17 Dan susah nyang hana padub na nyoe, nyang kamoe rasa keusikeujab, teuma jipeuhase keu kamoe saboh keubahgiaan nyang luwabiasa dan siumu masa. Bahgia nyan jiôh leubeh rayeuk meunyoe teubandeng ngon susah nyan keudroe.
18 Sabab kamoe hana kamoe ngieng hai-hai nyang deuh teukalon, teuma nyang hana deuh teukalon. Nyang deuh teuma meuteun sikeujab, teuma nyang hana deuh nyan keukai siumu masa.


Chapter 5

1 Óh ka lheueh kamoe teupeu bahwa meunyoe rumoh -- na kheueh tuboh -- nyang taduek lam donya nyoe teureuloh, Allah teuma geukeubah keugeutanyoe rumoh lam syeuruga, nyang geupeugét lé Allah keudroe dan nyang meuteun siumu masa.
2 Lam rumoh nyang na jinoenyoe, tanyoe apoh apah sabab tanyoe meuheuét that keuneuk tinggai lam rumoh tanyoe nyang na lam syeuruga nyan.
3 Rumoh nyan kheueh tuboh tanyoe nyang barô.
4 Simantong tanyoe tinggai lam rumoh nyang na lam donya nyoe, tanyoe apoh apah sabab beuban tanyoe geuhon that. Kon lé sabab tanyoe keuneuk lheuh nibak tuboh tanyoe nyang nibak donya nyoe, teuma sabab tanyoe meuheuét takeuneuk ngui tuboh nyang na nibak syeuruga nyan, mangat tuboh tanyoe nyang hase maté nyoe jikuasa lé nyang udeb.
5 Nyang peusiab tanyoe keunyan na kheueh Allah keudroe, dan Gobnyan nyang jok Roh geuh keugeutanyoe sibagoe jaminan.
6 Ngon sabab nyan até kamoe sabe meurasa teuga. Kamoe meuteupeu bahwa simantong kamoe na tinggai lam tuboh kamoe nyoe, kamoe jiôh nibak rumoh nyang teuma tinggai meusapat ngon Tuhan.
7 Sabab kamoe udeb ngon dasai jih meuiman ubak Almaseh, kon bak dasai peue nyang deuh teukalon,
8 nyang kheueh sabab jih até kamoe tabah. Kamoe leubeh kamoe tem lheueh nibak tuboh kamoe nyoe, mangat meuteumé kamoe tinggai meusajan Tuhan.
9 Ngon sabab nyan kamoe meu-useuha ngon biet-biet jeuet teupeu mangat até Gobnyan, bah kheueh watée kamoe mantong na lam rumoh kamoe nibak teumpat nyoe, atawa disideh.
10 Sabab tanyoe pasti teuma jiba ubak peungadelan Almaseh, dan maséng-maséng teuma meuteumé balasan nyang sisuai ngon buet watée lam donya nyoe -- buet nyang gét atawa nyang jeuhet.
11 Kamoe meuteupeu peue makna jih takot keu Tuhan; nyang kheueh sabab jih kamoe meu-useuha kamoe peuyakén gob keuhai droe kamoe. Allah geuturi kamoe silhok-lhok jih, dan ulôn harab gata pi taturi kamoe lam até gata.
12 Ngon lagée nyoe kamoe hana meulakée mangat gata tapujoe droe kamoe. Kamoe keuneuk bri saboh alasan nyang jroh keu gata mangat jeuet keubangga keukamoe, dan mangat gata tateupeue pakriban gata meuseuti tajaweueb ureuëng-ureuëng nyang jipeunteng keuhai manusia dan kon sifeuet jih.
13 Meunyoe kamoe keubit deuh jih ka pungoe, nyan na kheueh deumi keupeuntengan Po teu Allah. Dan meunyoe kamoe deuh jih waraih, nyan deumi keupeuntengan gata.
14 Geunaséh Almaseh kheueh nyang kuasa kamoe; dan kamoe sadar bahwa meunyoe sidroe ureuëng ka maté keumandum ureuëng, ngon lagée nyan meumakna bahwa banmandum ureuëng ka maté.
15 Almaseh maté keu mandum ureuëng, mangat ureuëng-ureuëng nyang udeb, hana le udeb keu droe jih keudroe, teuma keu Almaseh nyang ka maté dan geupeu udeb lom teuma deumi keu keupeuntengan awaknyan.
16 Ngon sabab nyan, kamoe hana le kamoe tilek ureuëng meunurot ukoran manusia. Beutôi kamoe na kamoe tilek Almaseh rot manusia, teuma bak watée nyoe ka hana lé.
17 Ureuëng nyang ka meusaboh ngon Almaseh, ka jeuet keumanusia barô bansaboh tuboh. Nyang awai ka hana lé -- banmandum nyan ka jeuet keu barô.
18 Banmandum nyan geupeubuet lé Po teu Allah. Rot Almaseh Allah geupeujeuet tanyoe tameugét lom ngon Gobnyan, laju geubri tugaih bak geutanyoe mangat ureuëng-ureuëng laén teupeu mungken jimeugét lom teuma ngon Allah.
19 Kamoe peusampoe bahwa ngon peurantaraan Almaseh, Allah geupeujeuet manusia jimeugét lom teuma ngon Gobnyan. Allah geupeubuet lagée nyan ngon hana geutuntot buet-buet nyang salah nyang ka jipeubuet lé manusia ateueh droe Gobnyan. Dan kamoe kageubri tugaih lé Allah keu kamoe peusampoe haba nyan.
20 Teuma kamoe nyoe na kheueh utosan-utosan Almaseh. Rot kamoe Allah keudroe nyang peusampoe peusan Gobnyan. Ateueh nan Almaseh, kamoe lakée ngon meuharab that, teurimong kheueh jaroe Allah nyang ka geusunyueng nyan keu teupeumungken gata gét lom teuma ngon Gobnyan.
21 Almaseh hana meudesya, teuma Allah nyang peujeuet Gobnyan geutanggong desya geutanyoe, mangat tanyoe tameugét lom teuma ngon Allah sabab meusaboh ngon Almaseh.


Chapter 6

1 Sabab kamoe mubuet meusajan-sajan ngon Po teu Allah, teuma kamoe meulakée ngon that meuharab bék kheueh gata sia-sia keugét até Allah nyan.
2 Lam Alkitab, Allah meufeureuman, "Bak watée nyang ka teuntée, Ulôn deungoe gata, dan bak uroe keuseulamatan, Ulôn ka kutulông gata." Ingat kheueh beugét-gét, jinoenyoe kheueh watée jih nyang ka teupeu teuntée nyan. Jinoenyoe kheueh uroe keuteupeuseulamat nyan!
3 Kamoe hana kamoe tem peulayan kamoe teupeusalah. Ngon sabab nyan kamoe meu-useuha hana kamoe bri alasan baksoe mantong keu jipeubuet nyan.
4 Sikeubiet jih, lam hai peue mantong, kamoe meutunyok bahwa kamoe na kheueh hamba-hamba Allah. Sabab, peue mantong nyang susah ngon deurita nyan ka kamoe rasa ngon saba:
5 Kamoe jiseksa, jipeutamong lam glab, dan jiparan ramé-ramé; kamoe meukeureuja brat, kayém that hana kamoe éh dan kayém that teuma hana kamoe teumé peunajoh.
6 Ngon kamoe peubuet nyang jujoe, bijaksana, saba dan gét até, kamoe meutunyok bahwa kamoe na kheueh hamba Allah. Meunan cit kamoe meugantung bak tulôngan Roh Allah, dan ngon geunaséh nyang ikhlaih,
7 meunan cit ngon cara kamoe peusampoe haba nyang teuka nibak Po teu Allah dan ngon kuasa Allah, kamoe tunyok bahwa kamoe nyoe na kheueh hamba-hamba Allah. Kamoe mumat bak keuheundak Allah sibagoe sinjata kamoe bah kheueh keu kamoe seurang meunan cit keu kamoe bila droe.
8 Kamoe jihoreumat, dan jihina cit teuma; jipujoe, dan jifiteunah teuma. Sidub nyan kamoe nyoe jujoe, jitudôh cit kamoe ureuëng sulet.
9 Kamoe jianggab hana meusyeuhu, teuma kamoe jituri lé mandum ureuëng. Kamoe jisangka maté, teuma teunyata kamoe mantong udeb. Bah pi kamoe nyoe ji iénanya, kamoe hana maté.
10 Bah kheueh até kamoe jipeuseudeh, teuma kamoe sabe lam geumbira. Kamoe deuh jih gasien, teuma kamoe ka kamoe peujeuet jai that manusia jeuet keu ureuëng kaya. Deuh jih kamoe hana sapeue na, teuma nyang sibeuna jih nibak kamoe dumpeue na.
11 Syedara-syedara nyang teucinta di Korintus! Kamoe ka troh trang ubak gata, banmandum asoe até kamoe ka kamoe peugah.
12 Kamoe hana kamoe tôb até keu gata, teuma gata kheueh nyang tôb até gata keu kamoe.
13 Jinoenyoe, bah kheueh ulôn meututoe lagée lôn mariet bak aneuëk-aneuëk lon keudroe. Buka kheueh até gata keukamoe.
14 Bék kheueh jeuet keu ureuëng nyang meurakan ngon ureuëng-ureuëng nyang hana meuiman keu Isa; nyang lagée nyan hana paih. Panena mungken nyang gét meulawok ngon nyang jeuhet! Hana mungken trang meujampu ngon supot.
15 Hana mungken Almaseh sapeue kheun ngon Iblih. Peu kheueh nyang saban ureuëng Kristen ngon nyang bukon ureuëng Kristen?
16 Peu kheueh hubongan jih Baét Tuhan ngon rumoh beurala? Geutanyoe nyoe Baét Tuhan, na kheueh Allah nyang udeb. Allah keudroe meufeureuman, "Ulôn teuma tinggai diteungoh-teungoh awaknyan, dan udeb meusajan-sajan ngon awaknyan. Ulôn teuma jeuet keu Allah awaknyan, dan awaknyan teuma jeuet keu umat Lôn.
17 Sabab nyan, tinggai kheueh laju ureuëng-ureuëng nyang hana jituri keu Po teu Allah nyan, dan peujiôh kheueh droe gata nibak awaknyan. Bék tapeugot hubongan sagai-sagai ngon nyang najih, ngon lagée nyan Ulôn teuma kuteurimong gata.
18 Ulôn teuma jeuet keu Bapak gata, dan gata teuma jeuet keu aneuëk-aneuëk Ulôn, meunan kheueh feureuman Tuhan Nyang Mahakuasa."


Chapter 7

1 Syedara-syedara nyang teucinta! Phon-phon that janji nyan teutuju keu geutanyoe. Ngon sababnyan bah kheueh geutanyoe tapeugleh droe nibak peue mantong nyang jipeukuto jiwa raga tanyoe. Bah kheueh geutanyoe tatakot keu Po teu Allah, mangat tanyoe jeuet udeb khusos keu Gobnyan ngon sampoereuna.
2 Sambot kheueh kamoe lam até gata. Kamoe hana meusalah baksoe mantong, dan hántom na ureuëng nyang ka kamoe peurugoe. Kamoe sagai-sagai hana kamoe kuet laba nibak soe mantong.
3 Ulôn peugah lagée nyan, kon lôn keuneuk peusalah gata. Sabab, lagée nyang ka lheueh lôn peugah yoh awai ilée, kamoe biet-biet that kamoe gaséh keugata, dan tanyoe na kheueh rakan-rakan nyang siudeb simaté.
4 Ulôn biet-biet that lôn peucaya peunoh keugata. Teuma ulôn bangga that keu gata. Bah kheueh kamoenyoe jai that-that kamoe rasa keusuletan, até ulôn biet-biet mangat that. Até ulôn biet-biet geumbira.
5 Watée katrok u Makedonia, kamoe mubacut hana hase kamoe peupuléh hék. Nibak jeueb-jeueb sagoe kamoe jipeusulét: nibak pihak laén jimeudakwa dakwi, lam até keudroe meurasa teumakot.
6 Biet kheueh meunan, syukoe kheueh, Allah sabe keupeurayeuk até ureuëng nyang putôh asa; Gobnyan geupeumangat até kamoe ngon teuka Titus.
7 Até kamoe mangat kon mantong sabab ka teuka Titus, teuma nyang leubeh peunteng gobnyan geupeugah pakriban até jih teuhibor ngon sabab lé gata. Gobnyan geupeugah bak kamoe pakriban gata disinoe rindu that keuneuk meurumpok ngon ulôn; bahwa gata ka meunyeusai ateueh buet nyang gata peubuet yoh ilée dan jinoe rila keu gata bila ulôn. Hai nyang lagée nyan teupeujeuet até lôn leubeh mangat lom teuma.
8 Bah kheueh ngon surat lôn nyoe teupeujeuet até gata meutamah seudeh, ulôn hana meunyeusai lôn tuléh surat nyan. Beutôi watée lôn ngieng bahwa sabab surat lôn nyan ka teupeujeuet gata mandum seudeh até -- bah kheueh seudeh gata nyan sikeujab mantong -- ulôn pi meunyeusai cit teuma.
9 Teuma bak watée nyoe ulôn mangat até -- kon lé sabab até gata ka jeuet keuseudeh, teuma ngon na seudeh gata nyan teupeujeuet peurangoe gata ka meu-ubah. Keubiet that, seudeh gata nyan sisuai ngon keuheundak Po teu Allah. Ngon lagée nyan, kamoe hana kamoe peurugoe gata.
10 Sabab seudeh nyang lagée nyan jipeuhase até teu ubah nyang jipeuteuka keuseulamatan. Dan ureuëng hana teuma meunyeusai keuhai nyang lagée nyan. Sikeubiet jih, seudeh nyang teuma sijalan ngon keuheundak manusia jipeuhase maté.
11 Cuba gata ngieng peuhase jih nibak gata nyang seudeh nyan sijalan ngon keuheundak Allah! Hase jih na kheueh gata biet-biet gata useuha guna gata peujeureunéh nyang ceuko! Gata ka jeuet keubanci ubak desya, gata teumakot, gata rindu, gata jeuet meuseumangat, gata rila tahuköm nyang salah! Lam banmandum soai nyoe gata ka tatunyok bahwa gata hana meusalah.
12 Ngon lagée nyan, bah kheueh ulôn ka lôn tuléh surat nyan, ulôn teumuléh kon lé sabab ureuëng nyang meusalah nyan. Kon cit teuma lé sabab ureuëng nyang meudeurita lé sabab nyang salah nyan. Ulôn tuléh surat nyan mangat dikeue Po teu Allah, gata tasada keudroe padubna rayeuk jih peuratian gata keukamoe.
13 Nyang kheueh sabab jih até kamoe mangat that, dan kamoe leubeh-leubeh meutamah geumbira sabab kamoe ngieng até Titus nyang geumbira; até jih mangat lé sabab Gata banmandum.
14 Ulôn keubiet ka lôn peubangga-bangga keugata nibak awaknyan. Syukoe kheueh, gata hana tapeumalée ulôn. Banmandum nyang ka lheueh kamoe peugah bak gata na kheueh beutôi. Meunan cit teuma peue nyang kamoe peubangga-bangga keuhai gata ubak Titus teunyata pi beutôi cit.
15 Jinoenyoe jihnyan seumaken jigaséh keu gata, sabab jihnyan teuingat pakriban gata mandum tatem seutôt pimpén jihnyan dan pakriban gata teurimong gobnyan ngon horeumat dan patuh.
16 Ulôn mangat that até, sabab gata hase teupeucaya lam sigala hai.


Chapter 8

1 Syedara-syedara, ulôn meuharab gatanyoe tateupeue cit keuhai pakriban gét jih Allah keu jeumaáh-jeumaáh di Makedonia.
2 Awaknyan ka teu ujoe ngon nyang payah-payah dan geuhon-geuhon. Teuma lam keuadaan nyang meunan brat jirasa lé awaknyan, awaknyan meugeumbira dan murah that até bak jibri sumbangan-sumbangan keujitulông ureuëng laén, bah kheueh awaknyan gasien lumpah na.
3 Ulôn jeuet lôn pasti awaknyan jibri meunurot nyang hase jibri, mungken leubeh. Hana nyang yue,
4 awaknyan jilakée ngon meuharab that ubak kamoe meunyoe jeuet awaknyan meusajan-sajan jitulông jibri sumbangan keu umat Allah nyang na di Yudea.
5 Awaknyan jibri jiôh leubeh nibak nyang kamoe harab. Awaknyan phon-phon that jiseurah droe ubak Tuhan, óh lheueh nyan ubak kamoe cit teuma, sisuai ngon keuheundak Po teu Allah.
6 Nyang kheueh sabab jih kamoe keubiet that kamoe yue bak Titus -- nyang peuphon useuha nyoe -- mangat jihnyan jipeujak laju useuha nyang gét nyoe lamkawan gata cit teuma.
7 Gata leubeh nibak peue mantong: Gata leubeh lam hai meuiman, lam hai tapeugah peundapat, lam hai iéleumé peungeutahuan, lam mubagoe rupa useuha, dan lam gaséh gata ubak kamoe. Sabab nyan, gét that cit gata leubeh nibak useuha nyang jroh nyoe.
8 Ulôn hana lôn yue nyan sibagoe saboh peurintah. Teuma ngon teutunyok padub na sunggoh jih ureuëng laén jitulông sabe keudroe-droe, ulôn pih keuneuk lôn teupeu trok éutna gaséh gata.
9 Sabab gata tateupeue that bahwa geutanyoe that-that geugaséh lé Isa Almaseh Tuhan tanyoe. Gobnyan kaya, teuma Gobnyan geupeujeuet droe geuh keugasien deumi keupeuntengan gata, mangat ngon gasien Gobnyan nyang lagée nyan, gata ka jeuet keukaya.
10 Meunurot peundapat ulôn, bak teumpat jih kheueh gata peuseuleusoe peue nyang ka gata peuphon thon nyang ka lheueh. Sabab gata kheueh nyang phon-phon that nyang pike dan nyang peuphon useuha nyan.
11 Ngon lagée nyan, bah kheueh gata nyang peubuet laju meunurot nyang gata mampu. Ulôn meuharab bah kheueh gata ngon seumangat nyang hu gata peuseuleusoe buet nyan, lagée seumangat gata yoh phon that gata reuncana buet nyan.
12 Meunyoe gata rila tabri, teuma Po teu Allah geuteurimong meuneubri gata nyan ngon dasai jih peue nyang na nibak gata, kon dasai jih peue nyang hana nibak gata.
13 Mubacut pih hana meukeusut ulôn keu lôn peubeubaih ureuëng laén nibak tanggong jaweueb, dan teupeubrat gata. Teuma sabab gatanyoe bak watée nyoe lam keuadaan na, ka sipatot jih gata peuseb nyang kureueng nibak awaknyan. Teuma, meunyoe gata lam keuadaan kureueng, dan awaknyan lam keuadaan seb, awaknyan teuma jitulông gata. Ngon lagée nyan bandua nyan saban-saban teulayani.
15 Lam Alkitab na teutuléh lagée nyoe, "Ureuëng-ureuëng nyang peunghaselan jih jai, hana meuleubeh, dan ureuëng nyang hase jih bacut, hana meukureueng."
16 Padub na syukoe jih kamoe ubak Allah sabab Gobnyan ka geupeujeuet Titus nyang sunggoh-sunggoh lagée kamoe nyang tulông gata!
17 Sabab Titus kon mantong rila jipeupeunoh lagée nyang kamoe lakée, teuma jihnyan meunan that jumôt jitulông gata sampoe ateueh keuheundak jih keudroe jicok keuputosan jijak ubak gata.
18 Meusajan ngon jihnyan kamoe kirém teuma sidroe syedara nyang that jihoreumat bak mandum jeumaáh sabab buet jihnyan jipeusampoe Haba Gét nyang teuka nibak Po teu Allah.
19 Disampéng nyan, ureuëng nyan pih ka teupiléh dan jipeuteuntée lé jeumaáh-jeumaáh keujipeungon kamoe lam meuneujak kamoe. Sabab kamoe teuma kamoe peuna meuneujak keukamoe jak peutrok sumbangan nyan, mangat Tuhan teupeumulia dan mangat gata takalon keudroe bahwa kamoe rila kamoe meutulông.
20 Kamoe keubiet até-até that mangat bék na ureuëng jipeusalah kamoe lam hai kamoe peusampoe sumbangan nyang rayeuk nyoe.
21 Kamoe keuneuk peubuet nyang jujoe kon mantong dikeue Tuhan, dikeue manusia cit teuma. 22 Meusajan-sajan ngon Titus dan syedara nyan, kamoe kirém cit teuma sidroe syedara nyang laén. Kamoe ka kamoe ujoe jih nyan meu-ulang-ulang dan teunyata jihnyan sabe jitem tumulông. Dan jinoenyoe, jihnyan leubeh-leubeh jitem tulông gata sabab jihnyan jikeubah harapan nyang rayeuk bak gata.
23 Keuhai Titus, jihnyan na kheueh rakan ulôn, nyang mubuet ngon ulôn keu jitulông gata. Dan keuhai mandua syedara nyan, nyang jijak meusajan ngon jihnyan, awaknyan na kheueh ureuëng-ureuëng nyang jiutus lé jeumaáh-jeumaáh dan jeuet keu banggaan nibak Almaseh.
24 Kamoe meuharab gata tatunyok geunaséh gata ubak awaknyan, mangat banmandum jeumaáh jiteupeu bahwa gata tagaséh awaknyan dan bahwa peue nyang kamoe peubangga keuhai gata na kheueh beutôi.


Chapter 9

1 Nyang sibeuna jih hana peureulée lé lôn tuléh surat keu gata keuhai bantuan nyang teungoh teukirém keu umat Allah di Yudea.
2 Ulôn kuteupeu gata tatem tulông gob, dan ulôn ka lôn peubangga gata ubak ureuëng-ureuëng nyang na di Makedonia. Ulôn peugah bak awaknyan, bahwa phon thon nyang ka lheueh syedara-syedara tanyoe nyang na di Akhaya ka siab keu jibri sumbangan. Dan ngon seumangat gata nyang meugeulora nyan ka jeuet keusabab seumangat siladum nibak awaknyan meugeulora cit teuma.
3 Jinoenyoe ulôn utus Titus dan bandua droe syedara nyan keu gata mangat peue nyang kamoe peubangga-bangga nyan keuhai gata bék jeuet keu haba nyang sulet hana meuguna. Ngon lagée nyan, gata nyang sibeuna jih ka siab, sabab ulôn peugah bak awaknyan bahwa ka siab meunyoe keu nyan.
4 Ulôn khawate meunyoe na ureuëng-ureuëng Makedonia nyang jijak meusajan ngon ulôn singoh watée ulôn jak ubak gata. Dan meunyoe jikalon lé awaknyan bahwa gata gohlom siab, keubiet malée that kamoe singoh, sabab ka kamoe peugah bahwa kamoe meupatéh that ubak gata! Dan gata keudroe pi malée cit teuma.
5 Nyang kheueh sabab jih ulôn meurasa lôn kirém awaknyan leubeh ilée ubak gata keu jiurôih sumbangan nyang ka gata peujanji nyan. Ulôn peubuet nyang lagée nyan singoh watée ulôn teuka, sumbangan nyang gata bri nyan ka siab. Ngon lagée nyan, deuh kheueh bahwa nyang gata bri nyan teubri ngon mangat até, dan kon sabab teupaksa.
6 Ingat kheueh! Ureuëng nyang tabu bijéh bacut teuma jipot bacut teuma. Teuma ureuëng nyang tabu bijéh nyang jai teuma jipot hase nyang jai teuma.
7 Tieb-tieb ureuëng harôh jibri meunurot keurelaan até jih. Bék kheueh jibri ngon seugan-seugan atawa sabab teupaksa, sabab Allah geugaséh keu ureuëng nyang mubri ngon galak até.
8 Allah meukuasa geubri keu gata beureukat nyang meulimpah-limpah, mangat gata sabe na peue nyang gata peureulée; dan gata teuma na leubeh keu tapeubuet gét dan tameu amai.
9 Lam Alkitab na teutuléh lagée nyoe keuhai Allah, "Gobnyan geutabu-tabu keu ureuëng-ureuëng gasien; até geuh nyang gét nyan keukai siumu masa."
10 Allah nyang keubah bijéh keu ureuëng teumabu dan peunajoh keugeutanyoe. Gobnyan teuma nyang keubah dan nyang peulé peue nyang gata tabu, mangat hase até gata nyang murah nyan meutamah-tamah lom teuma.
11 Ngon lagée nyan gata meuteumé dumpeue na lam sigala hai ngon lagée nyan gata sabe hase tameubri ngon murah até. Dan meuneubri-meuneubri gata nyang kamoe weuek-weuek keu ureuëng laén nyan, jeuet keusabab jai that ureuëng jilakée teurimong gaséh ubak Allah.
12 Sabab buet nyang jroh nyang gata peubuet nyoe kon teupeuseb nibak ukoran umat Allah mantong, teuma jeuet keusabab jai that ureuëng jilakée teurimong gaséh bak Allah.
13 Dan ngon nyang jroh nyang gata peuleumah nyan, jai that ureuëng Kristen nyang na di Yudea teuma jipujoe Allah sabab awaknyan jikalon keuseutiaan gata keuhai Haba Gét soai Almaseh nyang gata seutôt nyan. Meunan cit, awaknyan jipujoe Allah, sabab gata biet-biet murah até keu gata weuek-weuek ubak awaknyan dan keu mandum ureuëng laén nyang na nibak gata.
14 Ngon lagée nyan awaknyan teuma jimeudoá keu gata ngon peurasaan gaséh sayang kareuna Allah that gét até keu gata.
15 Gét that tanyoe meusyukoe ubak Po teu Allah ateueh meuneubri Gobnyan nyang luwabiasa nyan.


Chapter 10

1 Jinoenyoe ulôn, Paulus, keuneuk peugah sapeue-peue bak gata. Ulôn nyoe, meunurot nyang jipeugah lé gob, leumoh meunyoe meuhadab keu ngon gata, meunyoe jiôh barô kheueh lôn jeuet. Nah, sabab leumoh leumbot dan keu gét até Almaseh,
2 ulôn meulakée ngon that meuharab bék kheueh sampoe teupaksa lôn peubuet nyan kreueh ngon teugaih ateueh gata watée ulôn teuka singoh. Sabab ulôn kana niet keuneuk lôncok tindakan nyang teugaih ateueh ureuëng-ureuëng nyang jipeugah bahwa kamoe mubuet ngon tujuan donya nyang fana nyoe.
3 Beutôi kamoe mantong udeb lam donya, teuma kamoe hana meujuang ngon tujuan donya.
4 Sinjata-sinjata nyang kamoe peuguna lam peujuangan kamoe kon sinjata donya nyoe, teuma sinjata-sinjata Allah nyang meukuasa. Ngon sinjata-sinjata nyan laju kamoe peuhanco bubena kuta-kuta; kamoe tangkeh bubena dobat-dobat
5 dan kamoe peuhanco bubena kuta-kuta keusombongan nyang jipeudong keu jiheuntam peungeutahuan nyang geupeudong lé Po teu Allah. Kamoe teun mandum pikeran manusia dan kamoe peujeuet awaknyan taklôk ubak Almaseh.
6 Dan meunyoe gata ka taát ngon sipeunoh até, kamoe kasiab kamoe jak huköm mandum nyang hana taát.
7 Bah kheueh gata sadar ubak keuadaan nyang sibeuna jih. Meunyoe sidroe-droe ureuëng yakén bahwa jihnyan Almaseh, bah kheueh jihnyan jipeuingat droe jih keudroe dan beusadar bahwa kamoe nyoe pih Almaseh saban lagée jih nyan.
8 Ulôn hana malée meunyoe ulôn leubeh jai lôn peubangga keukuasaan nyang ka geubri lé Tuhan ubak kamoe, sabab keukuasaan nyan geubri keuteupeudong gata, kon keuteureuloh.
9 Ulôn hana kutem tarasa bahwa ulôn nyoe kujak peutakot-takot gata ngon surat-surat ulôn.
10 Ureuëng jipeugah, "Surat-surat Paulus nyan teugaih dan meuwibawa, teuma meunyoe gobnyan keudroe na lamkawan tanyoe, pribadi gobnyan leumoh dan tutoe haba gobnyan hana meumakna sapeue!"
11 Bah kheueh ureuëng nyang lagée nyan beujisadar bahwa meunyoe kamoe na lamkawan gata, buet kamoe teupat lagée peue nyang ka kamoe tuléh lam surat kamoe nyan.
12 Ka teuntée kamoe hana kamoe jeuet peubandeng atawa kamoe peuduek droe kamoe sideureujat ngon ureuëng-ureuëng nyang jianggab droe jih leubeh manyang. Keubiet bangai that awaknyan! Awaknyan jipeugét sineupat jih keudroe dan jiukô keudroe ngon sineupat nyan.
13 Kamoe hana lagée nyan. Meunyoe kamoe meubangga-bangga, kamoe hana meuliengkeu bataih. Kamoe tinggai lam bataih-bataih daerah teumpat kamoe mubuet nyang ka geupeuteuntée lé Allah keu kamoe. Dan gata jitamong lam daerah nyan.
14 Teuma, watée kamoe jak saweue gata dan kamoe ba Haba Gét keuhai Almaseh ubak gata, kamoe biet-biet hana kamoe teubiet nibak bataih-bataih daerah teumpat kamoe mubuet.
15 Kamoe hana kamoe pujoe ateueh buet ureuëng laén nyang na diluwa bataih nyang ka geupeuteuntée lé Allah keu kamoe. Sikeubiet jih kamoe teutab na teutab lam bataih-bataih nyang ka geupeuteuntée lé Po teu Allah keu kamoe dan meuharab bahwa gata seumaken tameuiman ubak Almaseh, mangat kamoe hase kamoe peubuet buet-buet nyang leubeh rayeuk nibak gata.
16 Ngon lagée nyan kamoe pih hase kamoe peusampoe Haba Gét nyan bak nanggroe-nanggroe laén ngon hana kamoe peurayeuk-rayeuk droe ateueh buet nyang jipeubuet lam wilayah peulayanan ureuëng laén.
17 Lam Alkitab na teutuléh lagée nyoe, "Ureuëng nyang jitem peubangga sapeue-sapeue, bah kheueh jipeubangga peue nyang ka geupeugét lé Tuhan."
18 Sabab ureuëng nyang teupujoe na kheueh ureuëng nyang geupujoe lé Tuhan, kon ureuëng nyang jipujoe droe jih keudroe.


Chapter 11

1 Peumeuáh kheueh keu lôn nyang meusifeuet bangai bacut. Jeuet peue hán?
2 Ulôn meucen ubak gata, lagée Po teu Allah keudroe pi meucen ubak gata. Gata na kheueh lagée sidroe aneuëk dara peurawan nyang mantong gadih nyang ka lôn peujanji keu teupeukawen ngon sidroe teungku lakoe, na kheueh Almaseh.
3 Teuma ulôn khawate pikeran gata teuma teugoda keu hana seutia lé ubak Almaseh, saban lagée Hawa nyang yoh watée ilée teugoda ubak buet licek nyang jipeuteuka lé uleue.
4 Sabab rupari gata magat mantong gata teurimong ureuëng nyang teuka ubak gata dan jipeurunoe keuhai Isa nyang laén -- kon Isa nyang kamoe peuturi ubak gata. Dan gata pi tatem teurimong roh dan "haba gét" nyang sagai-sagai hana saban ngon Roh Allah dan Haba Gét nyang ka lheueh gata teurimong nibak kamoe.
5 Ulôn meubacut pi hana meurasa leubeh miyueb nibak "rasui-rasui" nyang luwabiasa nyan!
6 Mungken ulôn nyoe kureueng carông peugah haba, teuma meunyoe keuhai iéleumé peungeutahuan, ulôn nyoe kon ureuëng nyang bangai. Nyan ka lheueh kamoe bri bukeuti ubak gata lam sigala hai peue mantong.
7 Bak watée ulôn britée keuhai Haba Gét nibak Po teu Allah ubak gata, ulôn hana kulakée ubak gata beugata bri biaya nibak gata meubacut pi; dan ngon lagée nyan ulôn ka kupeujeuet droe ulôn leubeh miyueb. Dan ulôn peubuet nyan keulôn peumanyang gata. Peu kheueh ngon lagée nyan saboh buet nyang salah nyang ka lôn peubuet ateueh gata?
8 Nibak watée ulôn peutimang gata, ulôn jijok biaya lé jeumaáh-jeumaáh nyang laén. Jeuet tapeugah ulôn ka lôn peurugoe jeumaáh-jeumaáh nyan mangat hase lôn tulông gata.
9 Meunyoe nibak watée nyan ulôn na kureueng sapeue-sapeue, ulôn hántom na lôn peususah ureuëng laén meusidroe pi nyang na nibak gata. Banmandum nyang ulôn peureulée jipeuna lé syedara-syedara nyang teuka nibak Makedonia. Ulôn kujaga gét-gét mangat ulôn hana lôn peususah gata nibak hai peue mantong, dan ulôn teutab sabe kujaga mangat nyan teutab lagée nyan.
10 Keubanggaan ulôn nyoe hana hase teusampôh dipat mantong bansaboh nanggroe Akhaya, sabab peungajaran Almaseh nyang beutôi na nyoepat bak lôn.
11 Pakon jeuet lôn peubuet lagée nyan? Peu kheueh lé sabab ulôn nyoe hana kugaséh gata? Po teu Allah geuteupeue bahwa ulôn gaséh keu gata!
12 Peue nyang ulôn peubuet jinoenyoe teutab ulôn peubuet laju mangat "rasui-rasui" nyang laén nyang hana alasan keu jipeurayeuk-rayeuk droe dan jikheun jihnyan jimubuet lagée kamoe.
13 Ureuëng-ureuëng nyang lagée nyan na kheueh rasui-rasui peuleusu. Awaknyan ureuëng-ureuëng mubuet nyang jipeunget ureuëng laén sira jimeunyamar sibagoe rasui-rasui Almaseh.
14 Hana hireuen awaknyan jipeubuet lagée nyan bagoe, sabab Iblih keudroe pi jimeunyamar lagée malaikat trang!
15 Deungon nyan hana hireuen cit teuma meunyoe peulayan-peulayan Iblih jimeunyamar sibagoe peulayan-peulayan nyang jipeubuet keuheundak Po teu Allah. Akhé jih awaknyan pi jiteurimong beunalaih nyang sisuai ngon buet-buet awaknyan.
16 Ulôn ulang lom sigoe teuk: Bék sampoe nyang jianggab ulôn ureuëng bangai. Teuma meunyoe ta-anggab cit lagée nyan, idhin kheueh ulôn nyang bangai nyoe lôn meubangga bacut.
17 Seulanjut jihnyoe teuma lôn kheun keubanggaan lôn, teuma kon Tuhan nyang yue bak ulôn keuteupeugah nyan. Lam hainyoe ulôn biet-biet kumeututoe lagée ureuëng bangai.
18 Keubiet na dan jai that ureuëng nyang jipeubangga ubak hai-hai donya, teuma ulôn keuneuk meubangga-bangga cit teuma.
19 Gata ngon mangat até tameusaba ateueh ureuëng-ureuëng nyang bangai, sabab gata meurasa droe ureuëng carông that!
20 Gata tapeubiyeu mantong meunyoe na ureuëng jipeunamiet gata, atawa jiprah ngon jicok laba ateueh gata, atawa meurasa droe leubeh manyang nibak gata dan jijeuet tampa gata.
21 Ulôn malée lôn akunyan bahwa kamoe keubiet that leumoh keukamoe peubuet lagée nyan. Teuma peue nyang nibak ureuëng laén jijeuet peubangga, ulôn pi kujeuet cit teuma! (Ulôn kumeututoe lagée ureuëng bangai). 22 Peu kheueh awaknyan ureuëng Ibrani? Ulôn pi ureuëng Ibrani. Peu kheueh awaknyan ureuëng Israel? Ulôn pi ureuëng Israel. Peu kheueh awaknyan keuturonan Nabi Ibrahim? Ulôn pi lagée nyan cit!
23 Peu kheueh awaknyan peulayan-peulayan Almaseh? Teudeungoe jih lagée ulôn nyoe ureuëng ka gadôh akai, teuma ulôn keubiet peulayan nyang leubeh gét nibak awaknyan banmandum! Ulôn kumubuet leubeh brat, ulôn ka kayém that jipeutamong lam glab, ulôn leubeh jai jiseksa dan kayém that rab-rab maté.
24 Ka limong goe ulôn jiseksa lé ureuëng Yahudi dan jiseunuét ngon peunyuenuet na teuma lhée ploh sikureueng goe.
25 Lhée goe teuma ulôn jisunuet lé ureuëng-ureuëng Roma; na teuma lôn rasa jigeulawa ngon batée. Lhée goe ulôn rasa lham ngon kapai lam laôt, dan na sigoe ulôn meuapöng-apöng lam laôt nyang treb jih na dua ploh peuet jeuem.
26 Ka jai lagoe na ulôn jak nyang peunoh ngon bahaya: lagée bahaya ié raya, bahaya lé peurampok, bahaya nyang teuka nibak ureuëng Yahudi meunan cit nibak pihak nyang kon Yahudi, bahaya lam banda, bahaya diluwa banda, bahaya lam laôt dan bahaya nibak ureuëng-ureuëng nyang jipeugah droe syedara Kristen padahai kon.
27 Ulôn kubanteng tuleueng dan lôn meujuang siteungoh maté: kayém that hana ulôn éh, hana lôn makheun, hana lôn jieb ié, kayém that-that ulôn teulanta lam keuadaan deuk, sijuek sabab kureueng peukayan dan hana teuma teumpat tinggai. 28 Nibak banmandum nyan, tieb-tieb uroe ulôn teutab gundah watée lôn ingat keuadaan jeumaáh.
29 Meunyoe na nyang leumoh ulôn pih meusajan teuma leumoh. Meunyoe na nyang rhot lam desya, até ulôn pi meusajan hanco.
30 Ngon lagéenyan, meunyoe ulôn meuseuti lôn peubangga sapeue-sapeue, teuma ka lôn peubangga ngon hai-hai nyang teutunyok ubak ulôn nyang leumoh.
31 Po teu Allah, Bapak nibak Tuhan Isa geuteupeue bahwa ulôn hana kumeusulet. Teupujoe kheueh nan Gobnyan siumu masa.
32 Watée ulôn mantong na di Damsyik, gubunur nyang mat kuasa nibak teumpat nyan dimiyueb keukuasaan Raja Aretas, jiyue bak tantra mangat jikeumiet babah pintoe banda nyan keujijak drob ulôn.
33 Teuma ngon saboh raga ulôn laju jikirém u miyueb rot saboh guha beuton. Meunan kheueh ulôn lheueh nibak jaroe gubunur nyan.


Chapter 12

1 Beutôi hana laba jih tapeubangga droe. Teuma lôn kutem cit peubangga keuhai-hai nyang lé Allah ka geupeuleumah bak lôn lam wahyu atawa lam keumalon.
2 Ulôn kuturi sidroe ureuëng Kristen nyang peuet blaih thon nyang ka lheueh geu beuôt lé Po u teumpat nyang paleng manyang lam syeuruga. (Ulôn hana kuteupeu peue beutôi-beutôi tuboh ureuëng nyan teubeuôt atawa saboh keumalon -- Allah kheueh nyang teupeu.)
3 Ulôn ulang sigoe teuk: Ulôn kuteupeu bahwa ureuëng nyoe geubeuôt lam taman Firdaus. (Ulôn hana kuteupeu peu kheueh tuboh ureuëng nyan biet-biet teubeuôt atawa nyan saboh keumalon -- Allah mantong kheueh nyang teupeu.) Bak teumpat nyan ureuëng nyan laju jideungoe hai-hai nyang hana hase jipeugah lé manusia dan hana teuma teubri idhin keu manusia keujipeugah hai nyan.
5 Keuhai ureuëng nyan kheueh nyang keuneuk ulôn peubangga, kon keuhai droe lôn keudroe. Keuhai droe ulôn, na kheueh keuhai-hai nyang teutunyok ubak keuleumohan lôn mantong nyang jeuet lôn peugah, dan nyan kheueh nyang keuneuk lôn peubangga.
6 Seukira jih ulôn keuneuk peubangga sapeue-sapeue, ulôn hana kutem jeuet keu ureuëng raya haba nyang mariet jih sulet; ulôn teuma lôn peugah nyang beutôi. Teuma lôn kupeuteun droe, mangat bék na ureuëng nyang jianggab ulôn nyoe leubeh nibak peue nyang ka jikalon lôn peubuet atawa nyang jideungoe peue nyang lôn peugah.
7 Teuma mangat ulôn bék lumpah that sombong sabab keumalon-keumalon nyang luwabiasa nyan, ulôn geubri simacam peunyakét nibak tuboh lôn nyang rupari alat Iblih. Peunyakét nyan geubri keu nyang seupôt ulôn mangat ulôn bék jeuet keu ureuëng sombong.
8 Lhée goe ulôn meudoá ubak Tuhan mangat jeuet peunyakét nyan geucok nibak ulôn.
9 Teuma Tuhan geujaweueb, "Ulôn kugaséh gata dan nyan ka seb keugata; sabab kuasa Ulôn keubiet that teuga meunyoe gata lam keuadaan leumoh." Nyang kheueh sabab jih ulôn leubeh galak lôn peubangga hai-hai lôn nyang leumoh, sabab meunyoe ulôn ka leumoh, dan bak watée nyan kheueh ulôn rasa Almaseh geulindong ulôn ngon teunaga Gobnyan.
10 Ngon lagée nyan ulôn keubiet that galak ateueh keuleumohan lôn nyan. Ulôn biet that mangat até meunyoe lé sabab Almaseh ulôn jifiteunah, ulôn meuteumé susah, jilet-let dan ulôn meuteumé keupayahan. Sabab meunyoe ulôn leumoh, teuma bak watée nyan kheueh ulôn jiteuka teumakot.
11 Keubiet that, ulôn ka lôn peujeuet droe lagée ureuëng bangai -- teuma gata kheueh nyang peujeuet ulôn sampoe lagée nyan. Nyang sibeuna jih gata nyang meusti tapujoe ulôn. Sabab, bah kheueh ulôn nyoe hana areuti sapeue, teuma ulôn sagai-sagai hana taloe ngon "rasui-rasui" nyang luwabiasa nyan!
12 Buet-buet nyang ajaéb dan hai-hai nyang luwabiasa meunan cit ngon buet-buet nyang rayeuk-rayeuk ka teupeukalon ngon saba ubak gata sibagoe bukeuti bahwa ulôn nyoe sidroe rasui.
13 Lam hai peue kheueh gata kureueng jikalon, teubandeng ngon jeumaáh-jeumaáh nyan? Paleng-paleng teuma lam hai nyoe: bahwa ulôn hana lôn peususah gata keugata peubiaya ulôn. Peumeuáh kheueh ulôn ateueh nyang salah nyan!
14 Jinoenyoe ka nyang keu lhée goe jih ulôn jak saweue gata. Dan hana kutem peususah gata, sabab nyang ulôn lakée kon kheueh peue nyang na nibak gata, teuma na kheueh droe gata. Sabab peu kheueh kon aneuëk manyak nyang harôh jimita nafeukah keu ureuëng syiek jih, teuma ureuëng syiek kheueh nyang harôh jimita nafeukah keu aneuëk-aneuëk jih.
15 Ngon sabab nyan, ngon mangat até ulôn rila lôn keureubeuen peue-peue mantong keugata, kon nyan mantong, droe lôn keudroe pi lôn peurila. Meunyoe ulôn ka meunan lôn gaséh keugata, peu kheueh patot kureueng gata gaséh keu lôn?
16 Ngon lagée nyan, peu kheueh gata situju bahwa ulôn hántom lôn peususah gata. Teuma na nyang peugah bahwa ulôn nyoe lisek; bahwa ulôn meuteuma laba nibak gata sabab tipée daya ulôn.
17 Panena mungken! Peu kheueh rot ureuëng-ureuëng nyang lôn yuejak bak gata nyan lônkuet laba nibak gata?
18 Ulôn ka lôn yue Titus jijak bak gata, dan meusajan ngon jih lôn yue teuma syedara tanyoe ureuëng Kristen nyang laén keurakan jih. Peu kheueh Titus jicok laba ateueh gata? Teuma kamoe bandua mubuet ngon tujuan nyang saban dan kamoe cok tindakan pih ngon cara nyang saban teuma.
19 Jeuet mantong gata kira kamoe nyang kanyoe teungoh meu-useuha kamoe bila droe ateueh gata? Gata keubiet that-that keuliru! Allah geuteupeue bahwa banmandum nyang kamoe peugah nyan na kheueh meunurot keuheundak Almaseh. Dan bandum nyang kamoe peubuet na kheueh keu teupeudong udeb rohani.
20 Ulôn khawate bahwa watée ulôn jak bak gata singoh, lôn kalon gata hana lagée peue nyang lôn harab dan gata pih meurumpok ngon lôn hana lagée nyang gata harab. Pat tateupeue singoh na nyang mulo, bingiek até, seu-uem até, teupeupeunteng droe keudroe, fiteunah keudeh keunoe, hasut keudeh keunoe, sombong dan teupeuna karu.
21 Ulôn teumakot pat tateupeue watée ulôn teuka singoh Allah teuma geupumiyueb ulôn dikeue gata dan ulôn teuma lônmo sabab jai that lamkawan gata nyang meudesya yoh masa ilée, hana meu-ubah dan hana jipiôh jipeubuet buet-buet nyang cabui, kutoe dan hana patot.


Chapter 13

1 Nyoe na kheueh nyang keu lhée goe jih ulôn teuka jaksaweue gata. Lam Alkitab na teutuléh lagée nyoe, "Tieb-tieb peukara meuseuti jibantu lé keusaksian dua atawa lhée droe saksi, barô kheueh peukara nyan sah."
2 Ureuëng-ureuëng nyang masa ilée ka jipeubuet desya dan mandum ureuëng laén teuma, ka lôn peuingat leubeh ilée watée ulôn jaksaweue gata nyang keudua goe jih. Jinoenyoe, teungoh ulôn jiôh nibak gata, ulôn peuingat lom teuma bahwa meunyoe ulôn teuka lom teuma, hana meusidroe pih nibak awaknyan nyang lheueh nibak huköman.
3 Teuma gata meuteumé banmandum bukeuti nyang gata lakée bahwa Almaseh biet-biet geumeututoe rot ulôn. Meunyoe Almaseh geucok tindakan ateueh gata, hana ngon cara leumoh-leumoh, seubalek jih Gobnyan geutunyok kuasa geuh lamkawan gata.
4 Beutôi watée Gobnyan teusaleb, Gobnyan leumoh, teuma jinoenyoe Gobnyan udeb sabab kuasa Allah. Meunan cit kamoe leumoh lam udeb kamoe sabab meusaboh ngon Almaseh, teuma meunyoe meuhadab ngon gata, kamoe pih teuga meusajan Almaseh sabab kuasa Po teu Allah.
5 Cuba gata ujoe droe teuh keudroe peu kheueh gata biet-biet meuiman ubak Almaseh! Pasti gata tasadari bahwa Isa Almaseh nyan na lam tuboh gata! -- laén hai jih meunyoe keubiet gata biet-biet hana tameuiman.
6 Ulôn harab gata sadar bahwa kamoenyoe kon ureuëng nyang ék teuteun ujoe.
7 Kamoe meudoá ubak Po teu Allah seumoga Gobnyan geutem tulông gata keu hana tapeubuet salah. Bukon keu teutunyok bahwa kamoe nyoe keubiet carông bak teupeuseuleusoe tugaih, teuma mangat gata tapeubuet peue nyang geukeuheundaki lé Po teu Allah -- bah kheueh deuh jih kamoenyoe hana meuhase, hana peue!
8 Sabab kamoe hana hase kamoe peubuet musapeue pih nyang meubida ngon nyang beutôi; kamoe meuseuti kamoe seutôt nyang beutôi.
9 Kamoe galak that meunyoe kamoe leumoh, dan gata teuga. Kamoe pih meudoá mangat gatanyoe jeuet keusampoereuna.
10 Nyang kheueh sabab jih ulôn tuléh surat nyoe bak watée ulôn gohlom na lamkawan gata. Ngon lagée nyan, meunyoe ulôn teuka teuma, hana peue lôn cok tindakan nyang kreueh ateueh gata ngon lôn peuguna keukuasaan nyang geubri lé Tuhan keu ulôn. Keukuasaan nyan geubri guna jih keu teupeudong gata, kon keu teupeuhanco.
11 Akhé jih, Syedara-syedara, bah kheueh gata bumangat até, dan meu useuha kheueh jeuet keusampoe reuna. Teurimong kheueh peue-peue mantong nyang ulôn naseuhat nyoe. Bah kheueh gata saboh até dan udeb nyang rukon. Allah Nyang Mahapeugaséh dan nyang peudamé nyan teuma sabe na meusajan gata.
12 Mumat-mat jaroe kheueh sidroe ngon nyang laén seucara meusra sibagoe syedara lam Kristen. Banmandum umat Po teu Allah jikirém saleuem ubak gata.
13 Tuhan Isa Almaseh geubri beureukat keu gata, Allah geugaséh gata, dan Roh Allah na meusajan gata banmandum teuma! Horeumat kamoe, Paulus