2 Tesalonika

Chapter: 1 2 3


Chapter 1

1 Syedara-syedara jeumaa?h nyang na di Tesalonika, nyang jeuet keu umat Allah Bapak geutanyoe Tuhan Isa Almaseh! Kamoe, na kheueh Paulus, Silas dan Timotius
2 meuharab seumoga Allah Bapak dan Tuhan Isa Almaseh geubri beureukat dan seujahteura ubak gata mandum.
3 Syedara-syedara, kamoe sabe waje?b kamoe peugah teurimong gase?h ubak Allah sabab gata. Dan beuto^i kapatot kamoe peubuet meunan, sabab gata seumaken meuiman ubak Almaseh, dan gata seumaken tagase?h sidroe ngon nyang lae?n.
4 Nyang kheueh sabab jih pakon kamoe meututoe keuhai gata tieb-tieb wate?e kamoe jak saweue jeumaa?h-jeumaa?h Allah. Deungon bangga kamoe calitra pakriban gata teutab teugoh seutia gata meuiman ubak Almaseh lam keuadaan keunong ie?lanya dan deurita nyang gata rasa.
5 Dan inoe kheueh deuh nyata padubna ade jih huko?man Allah: Gata ka meudeurita sabab Donya Baro^ Allah, dan sabab nyan gata teuma teuanggab patot gata tamong lam nyan.
6 Gobnyan geupeubuet peue nyang ade, dan teuma geubalaih deurita keu ureue?ng nyang peujeuet gata meudeurita.
7 Dan ubak gata nyang ka jeuet bak wate?e nyoe meudeurita -- meunan cit teuma ateueh kamoe -- Allah teuma geubri keuleugaan nibak uroe Tuhan Isa geutron nibak syeuruga dan geupeuleumah droe Gobnyan ngon malaikat-malaikat Geuh nyang peukasa
8 dan ngon apui nyang hu meuha?b-ha?b. Gobnyan geutron keu geujak huko?m ureue?ng-ureue?ng nyang hana jipako keu Po teu Allah dan nyang hana jitem udeb sisuai ngon Haba Ge?t keuhai Isa Tuhan geutanyoe.
9 Ureue?ng-ureue?ng nyan teuma jiteurimong huko?man keubinasaan siumu masa, geutiek uluwa nibak lingkongan Tuhan dan nibak kuasa Gobnyan nyang agong;
10 banmandum nyan teuma teujadi nibak uroe Gobnyan teuka singoh keujiagong le? umat Gobnyan dan keu jihoreumat le? mandum ureue?ng nyang meuiman. Gata pi teuma na lamkawan umat Allah nyan, sabab gata katapate?h ubak haba nyang kamoe peutrok keugata.
11 Nyang kheueh sabab jih kamoe sabe meudoa? keugata. Kamoe meudoa? mangat Allah geupeujeuet gata patot keu udeb lage?e nyang geulake?e; keu nyan kheueh Gobnyan geutawo?k gata. Seumoga Allah, ngon kuasa Gobnyan, teupeupeunoh keuheundak Gobnyan keu teupeubuet nyang jroh, dan teupeusampoereuna banmandum buet nyang gata peubuet sabab meuiman ubak Almaseh.
12 Deungon lage?enyan, Tuhan geutanyoe Isa tapeuagong le? gata, dan gata pih geupeu agong le? Isa sabab keuge?t ate? Po teu Allah geutanyoe dan Tuhan Isa Almaseh.



Chapter 2

1 Keuhai Tuhan tanyoe Isa Almaseh teuka, dan keuhai jipeusapat geutanyoe mangat tinggai meusapat ngon Gobnyan, nyoe nyang ulôn lakée ngon meuharab that nibak gata:
2 Bék kheueh bagaih that bingong atawa apoh apah sabab na haba bahwa katrok uroe jih Tuhan Isa geuteuka lom teuma. Mungken haba nyan asai jih nibak saboh nubuat, atawa nibak saboh ajaran; atawa jeuet mantong na nyang peugah bahwa kamoe kaleuh teumuléh lam saboh surat kamoe.
3 Pakriban mantong kheuh teuma, bék tapeubiyeu ureuëng laén jipeungét gata. Sabab sigohlom trok Uroe nyan, harôh kheueh teujadi hainyoe leubeh ilée: Jai that ureuëng teuma murutat, ji iengkeue keu Almaseh; dan Manusia Jeuhet nyang ka teupeuteukeudi jitamong lam nuraka, jipeuleumah droe.
4 Deungon sombong jihnyan jilawan dan jipeumanyang droe ateueh banmandum nyang jiseumah lé manusia, atawa mandum ilah nyang jianggab Allah lé manusia. Nyang hebat lom jihnyan teuma jiduek lam Baét Allah dan jipeumaklum bahwa jihnyan na kheueh Allah.
5 Ingat kheueh bahwa ulôn ka lheueh lôn peugah banmandum nyan yoh ulôn mantong na meusajan gata.
6 Dan gata tateupeue peue jinoenyoe mantong teutam teujadi mandum nyan. Singoh bak watée nyang ka teupeuteuntée lé Po teu Allah, Manusia Jeuhet nyan teuma teuka.
7 Teunaga nyang jipeubuet atranyan ka jipeuphon mubuet seucara rahsia, teuma mantong jiteun-teun. Singoh meunyoe nyang peuteun nyan ka teukireuh ho laén,
8 barô kheueh deuh teungieng Manusia Jeuhet. Teuma meunyoe Tuhan Isa teuka, Gobnyan geupoh maté Manusia Jeuhet nyan ngon nafáh bak babah Gobnyan, dan teupeubinasa ngon keuhebatan Gobnyan teuka.
9 Manusia Jeuhet nyan teuma teuka ngon saboh kuasa nyang rayeuk nibak Iblih. Jihnyan teuma jipeuna sapeue-sapeue buet ajaéb dan hai-hai nyang luwabiasa nyang peunoh ngon peungét dan teumipée.
10 Jihnyan teuma jipeuguna sigala tipée daya nyang jeuhet keujipeusisat ureuëng-ureuëng nyang teuma binasa. Awaknyan binasa sabab jitulak dan hana jigalak keu haba nyang beuna nyang geubri lé Allah nyang hase peuseulamat awaknyan.
11 Nyang kheueh sabab jih Allah geupeuteuka ateueh awaknyan saboh kuasa nyang keubiet sisat that, sampoe awaknyan jipatéh peue nyang hana beutôi.
12 Akibat jih, mandum ureuëng nyang galak jipeubuet desya dan hana jipatéh ubak nyang beutôi nyan, teuma teuhuköm.
13 Syedara-syedara nyang geugaséh lé Tuhan! Sabe kamoe peugah teurimong gaséh ubak Po teu Allah keuhai gata, sabab yoh awaiphon Allah ka geupiléh gata keu geupeuseulamat. Hai nyan teujadi lé peue nyang jipeubuet lé Roh Allah keugata keu teupeujeuet gata umat Allah nyang gleh dan lé sabab gata tapatéh ubak haba nyang beutôi nyang teuka nibak Allah.
14 Keu nyan kheueh Allah geutawök gata keu Haba Gét nyang kamoe peusampoe ubak gata. Allah geutawök gata, sabab Gobnyan meuharab gata pih tarasa pakriban keuagongan Tuhan geutanyoe Isa Almaseh.
15 Lé sabab nyan, Syedara-syedara, dong kheueh beucot dan mumat kheueh beukong nibak ajaran-ajaran nyang ka kamoe bri ubak gata, bah kheueh nyan seucara teupeugah meunan cit seucara teutuléh.
16 Seumoga Tuhan geutanyoe Isa Almaseh keudroe, dan Allah Bapak geutanyoe geuhibur dan geupeukong até gata, mangat gata hase tapeubuet dan gata bri peue nyang gét. Sabab Allah geugaséh keugeutanyoe, dan sabab lé até Geuh nyang gét nyan Gobnyan geupeujeuet geutanyoe teutab tabah, dan teuharab nyang jroh.


Chapter 3

1 Akhé jih, Syedara-syedara, meudoá kheueh keu kamoe. Meudoá kheueh mangat haba nibak Tuhan jeuet meutabu sabe ngon bagaih that dan jiteurimong ngon gét, saban lagée nyang ka teujadi ateueh gata yoh masa ilée.
2 Meudoá kheueh teuma mangat Allah geupeu seulamat kamoe nibak ureuëng-ureuëng nyang beujat dan jeuhet. Sabab hana mandum ureuëng jipatéh ubak haba nibak Tuhan nyan.
3 Teuma Tuhan seutia. Gobnyan teuma geupeuteuga gata dan geulindong gata nibak Si Jeuhet.
4 Dan kamoe peunoh meuiman ubak Tuhan keuhai gata, bahwa gata teungoh tapeubuet dan teuma sabe tapeubuet peue nyang kamoe yue ubak gata.
5 Seumoga Tuhan nyang bimbeng gata leubeh tamuphom bahwa Allah geugaséh gata dan bahwa Almaseh geubri até gata nyang tabah.
6 Syedara-syedara, ateueh kuasa Tuhan geutanyoe Isa Almaseh, kamoe peurintah ubak gata mangat gata peujiôh mandum syedara, nyang udeb jih laloe ngon beu-o, dan nyang hana jiturot ajaran-ajaran nyang ka kamoe bri ubak awaknyan.
7 Gata keudroe tateupeue bahwa gata harôh taseutôt cuntoh bak kamoe. Kamoe hana laloe dan beu-o watée kamoe mantong na lamkawan gata.
8 Kamoe hana kamoe makheun peunajoh gob ngon hana kamoe bayeue. Uroe malam kamoe meukeureuja kamoe banteng tuleueng mangat kamoe hana kamoe peususah soe-soe mantong meunan cit nyang na lamkawan gata.
9 Kamoe peubuet nyan kon kamoe hana hak kamoe tuntot mangat gata tatulong kamoe, teuma kamoe keuneuk jeuet teuladan keugata mandum.
10 Watée kamoe mantong na lamkawan gata, kamoe bri peuratoran lagée nyoe, "Ureuëng nyang hana jitem keureuja, bék jimakheun."
11 Kamoe peugah nyoe sabab na kamoe deungoe bahwa ureuëng-ureuëng nyang na lamkawan gata na nyang udeb laloe ngon beu-o. Awaknyan hana jipeubuet meusapeue pi, nyang na laloe jipeuroh droe lam urosan ureuëng laén.
12 Ateueh kuasa Tuhan Isa Almaseh kamoe peurintah ureuëng-ureuëng nyan dan kamoe peuingat, mangat awaknyan jimubuet ngon beutôi dan jimita nafeukah droe jih keudroe.
13 Teuma gata bék tunu tapeubuet nyang gét.
14 Mungken singoh na ureuëng nyang hana jitem deungoe peue nyang kamoe peugah lam surat nyoe. Até-até kheueh keu ureuëng nyang lagée nyan dan bék meurakan ngon jihnyan mangat jihnyan malée.
15 Teuma bék kheueh gata anggab jihnyan sibagoe musoh; teuma bri kheueh naseuhat sibagoe sidroe syedara.
16 Tuhan na kheueh ulée keuseujahteuraan geutanyoe. Seumoga Gobnyan sabe geubri keugata seujahteura lam sigala hai. Seumoga Tuhan sabe na meusajan gata banmandum.
17 Saleuem nibak ulôn, Paulus. Ulôn keudroe nyang tuléh bagian nyoe. Nyoe kheueh tanda nyang ulôn boh bak mandum surat ulôn.
18 Seumoga Tuhan geutanyoe Isa Almaseh geubri beureukat keugata mandum. Horeumat kamoe, Paulus