1 Timotius

1 2 3 4 5 6


Chapter 1

1 Timotius aneuëk ulôn nyang seujati lam Tuhan! Suratnyoe nibak ulôn, Paulus, rasui Isa Almaseh ateueh peurintah Allah, nyang peuseulamat geutanyoe dan ateueh peurintah Isa Almaseh, harapan geutanyoe. Seumoga Allah Bapak dan Isa Almaseh Tuhan tanyoe geubri beureukat, rahmat dan seujahteura ubak gata.
3 Ulôn meuharab mangat gata teutab tinggai di Efesus lagée nyang ka lheueh ulôn peugah bak gata bak watée ulôn jak u Makedonia. Sabab, di Efesus na meupadub droe ureuëng nyang jipeurunoe ajaran sisat nyang hana beutôi, dan gata harôh tatam awaknyan.
4 Peugah kheueh bak awaknyan mangat bék lé jisimak haba dongeng dan calitra-calitra asai usui nyang hana jipiôh-piôh nyan. Banmandum nyan jipeuteuka riôh ngon meudakwa, dan hana jipeumaju reuncana Allah nyang hase teuturi rot meuiman ubak Gobnyan.
5 Tujuan naseuhat lôn na kheueh mangat jeuet manusia meuteumé até nyang gleh dan até nurani nyang suci, dan biet-biet meuiman ubak Tuhan, dan deungon lagée nyan awaknyan hase jigaséh seusabe keudroe-droe.
6 Na siladum ureuëng nyang hana udeb lé lagée nyan, dan sisat nibak meudebat-meudebat nyang hana meuguna.
7 Awaknyan keuneuk jeuet keugurée-gurée agama, padahai awaknyan keudroe hana jiteupeu tutoe haba nyang jipeuguna atawa hai-hai nyang awaknyan peugah lagée nyan yakén.
8 Tanyoe tateupeue bahwa huköm agama na kheueh gét, meunyoe teupeuguna bak jalan nyang beutôi.
9 Teuntée jih meuseuti beuingat bahwa huköm nyan teupeugét kon keu ureuëng gét, teuma keu ureuëng nyang langga huköm, bubena ureuëng jeuhet, keu ureuëng beujat, keu ureuëng meudesya, keu ureuëng nyang hana agama, ureuëng donyawi, keu ureuëng nyang poh maté ayah ngon ma jih, dan keubuna ureuëng nyang poh maté gob,
10 keu ureuëng-ureuëng nyang peubuet cabui, keu ureuëng meuagam ngon ureuëng agam, keu ureuëng tukang culek gob, keu ureuëng nyang meututoe beurakah; keu ureuëng nyang meusaksi sulet, dan keusoe mantong nyang jipeubuet hai-hai nyang meulawan ngon ajaran nyang beuna.
11 Ajaran nyan na meuteumé lam Haba Gét nyang jaktabu atra nyan geupeucaya ubak ulôn, nyan kheueh Haba Gét nyang teuka nibak Allah nyang agong dan patot teupujoe.
12 Ulôn peugah teurimong gaséh ubak Isa Almaseh Tuhan geutanyoe. Gobnyan ka geubri teunaga ubak ulôn keulôn layani Gobnyan, dan Gobnyan geuanggab ulôn patot lôn teurimong tugaih nyan,
13 bah pi yoh ilée ulôn fiteunah lôn iénanya meunan cit lôn hina Gobnyan. Teuma Allah geugaséh keulôn, sabab yoh masanyan ulôn gohlom meuiman, kareuna hana lôn teupeue peue nyang ulôn peubuet.
14 Biet pi meunan ulôn ka geupeu peunoh ngon rakhmat Tuhan tanyoe. Gobnyan geubri keu ulôn keumampuan keu lôn meuiman bak Gobnyan dan geuyue gaséh seusamoe manusia. Keumampuan nyan geubri bak geutanyoe mandum nyang ka meusaboh ngon Isa Almaseh.
15 Keubiet beutôi that haba nyoe -- sabab nyan patot kheueh teuteurimong dan teupeucaya sipeunoh até -- : "Isa Almaseh geuteuka ateueh rhueng donya nyoe keu geupeu seulamat ureuëng meudesya." Dan ulôn kheueh ureuëng meudesya nyang paleng jeuhet.
16 Teuma lé sabab nyan kheueh Allah geugaséh ulôn, mangat Isa Almaseh hase geubri banmandum saba Gobnyan keu ulôn, ureuëng nyang meudesya nyoe. Dan nyoe jeuet keusaboh cuntoh keumandum ureuëng nyang teuma-teuma jimeuiman ubak Gobnyan dan meuteumé udeb seujati dan keukai.
17 Allah, Raja sipanyang jamén, patot teuhoreumat dan teupujoe sabe, sabab Gobnyan kheueh nyang keukai, nyang hana deuh dan nyang esa! Amin.
18 Timotius, aneuëk ulôn! Tugaihnyoe ulôn peucaya ubak gata, teuingat ubak peusan Allah nyang ka geupeutrok lé nabi-nabi lam jeumaáh keuhai droe gata. Bah kheueh peusan nyan jeuet keubeukai nibak gata lam meujuang nyang jroh.
19 Meujuang kheueh ngon cara tamumat beukong nibak keupeucayaan nyang beutôi dan ngon até nurani nyang gleh. Na ureuëng nyang hana jipako keuhai su até nurani jih, ngon lagée nyan hanco kheueh keupeucayaan ureuëng nyan.
20 Lamkawan ureuëng nyan na kheueh Himeneus dan Aleksander. Mandua droe ureuëng nyan ka lôn huköm deungon cara ulôn jok ubak Iblih, mangat awaknyan jimeurunoe keujipiôh jihujat Allah.



Chapter 2

1 Phon-phon that, ulôn meulakée ngon meuharab that mangat peumohonan, seumayang, dan doá syafaát meunan cit meulakée teurimong gaséh ubak Po teu Allah keumandum ureuëng;
2 keuraja-raja dan banmandum ureuëng nyang mat keukuasaan. Lakée kheueh mangat geutanyoe jeuet udeb teunang dan teuntram keu Po teu Allah ngon pi-e nyang patot.
3 Nyan kheueh nyang gét dan teupeumangat até Allah, nyang bri seulamat ateueh geutanyoe.
4 Gobnyan meuharab mangat jeuet banmandum ureuëng teupeuseulamat dan jiteupeu nyang beuna.
5 Sabab, teuma na sidroe Allah, dan sidroe nyang jeuet peudamé Allah ngon manusia, na kheueh Isa Almaseh.
6 Gobnyan sidroe manusia nyang ka geupeujok droe Geuh guna teupeubeubaih mandum manusia nibak desya-desya jih. Deungon nyan Allah ka geutunyok bak watée nyang paih, bahwa Gobnyan meuharab mangat mandum manusia teupeuseulamat.
7 Dan nyang kheueh sabab jih ulôn geuyuejak bak ureuëng-ureuëng nyang kon Yahudi keu lôn jak peusampoe bak awaknyan haba keuhai keupeucayaan nyang beutôi. Nyang ulôn peugah nyoe na kheueh beutôi dan ulôn hana buhak.
8 Ulôn meuharab mangat dipat mantong ureuëng agam meudoá ngon até nyang gleh, ngon hana rasa beungéh atawa meusiliseh waham.
9 Bah kheueh ureuëng inong jipeungui droe jih ngon cara seudeurhana dan jisôk peukayan nyang sopan. Bék koh ôk mubagoe-bagoe atawa teungui piasan méuh atawa mutiara, atawa peukayan nyang meuhái-meuhái.
10 Nyang sikeubiet jih, bah kheueh ureuëng inong nyan jingui droe jih ngon buet-buet nyang jroh lagée toh nyang patot keu ureuëng inong nyang meuiébadat ubak Po teu Allah.
11 Ureuëng inong meuseuti jimurunoe ngon cara ji-iem droe dan patuh.
12 Ulôn hana kupeubeuna ureuëng inong nyan jipeurunoe atawa jipeurintah ateueh ureuëng agam; awaknyan harôh seungab.
13 Sabab nyang phon that teucebta na kheueh Nabi Adam óh lheueh nyan barô kheueh Siti Hawa.
14 Dan kon Nabi Adam, teuma inong kheueh nyang keunong tipée, ngon lagée nyan ka ji iengkeue peurintah Allah.
15 Teuma biet pi meunan, ureuëng inong teuma seulamat deungon jipeulahé aneuëk, asai jihnyan ngon até nyang miyueb teutab meuiman ubak Almaseh dan teutab jigaséh keu ureuëng laén dan udeb khusos keu Po teu Allah.


Chapter 3

1 Keubiet beutôi haba nyoe, "Ureuëng nyang keuneuk jeuet keupeunilék jeumaáh, jimeuharab saboh buet nyang keubiet meuhareuga."
2 Sidroe ureuëng nyang jeuet keupeunilék jeumaáh ureuëng nyan hana meucupa, peurumoh jih sidroe mantong, ék jiteun droe, bijaksana, dan teureuteb; ureuëng nyan jitem teurimong gob dirumoh jih, dan hase jipeurunoe ureuëng laén;
3 bék ureuëng peumabök, atawa nyang galak jimulo. Dilikot nibak nyan, ureuëng nyan nyang leumoh leumbot dan galak keudamé. Dan ureuëng nyan bék nyang teupéng-péng.
4 Ureuëng nyan jiteupeu atoe rumoh tangga deungon jroh, dan carông jididek aneuëk-aneuëk jih beujitaát dan horeumat keu jih.
5 Sabab meunyoe ureuëng nyan hana carông jiatoe rumoh tangga jih keudroe, pakriban ureuëng nyan hase jiatoe jeumaáh Allah?
6 Sidroe peunilék jeumaáh hana jeuet ureuëng nyan ban jitamong Kristen, sabab singoh ureuëng nyan jeuet keu manyang até laju keunong kutok lagée Iblih yoh masa ilée.
7 Ureuëng nyan meuseuti nyang na nan gét lam masyarakat; sabab meunyoe hán lagée nyan, ureuëng nyan teuma jihina lé gob, deungon lagée nyan jihnyan rhot lam peurangkab Iblih.
8 Meunan cit deungon peumbantu jeumaáh meuseuti ureuëng nyang jroh dan jujoe; kon ureuëng nyang teupéng-péng dan galak jijieb ié anggô nyang jai.
9 Ureuëng nyan meuseuti nyang kong jimumat nibak ajaran Kristen nyang beuna ngon até nurani nyang gleh nyang ka geupeugah lé Po teu Allah.
10 Bah kheueh ureuëng nyan teu ujoe leubeh ilée, dan meunyoe deuh teukalon ureuëng nyan hana meucupa, barô kheueh ureuëng nyan jeuet keupeubantu lam jeumaáh.
11 Meunan cit deungon peurumoh awaknyan museuti ureuëng nyang jroh, kon ureuëng nyang galak jiba peusuna. Ureuëng nyan meuseuti carông-carông bak jiba droe dan jujoe lam hai peue mantong.
12 Peumbantu jeumaáh museuti sidroe mantong peurumoh geuh. Ureuëng nyan museuti carông jiatoe aneuëk-aneuëk jih dan rumoh tangga jih ngon jroh.
13 Ureuëng-ureuëng nyang jibantu deungon gét lam jeumaáh, teuma jihoreumat lé gob dan seumaken jijeuet meututoe keuhai iman jih ubak Almaseh.
14 Ulôn meuharab hana treb lé ulôn jak saweue gata. Bah pih meunan, ulôn tuléh cit surat nyoe keugata,
15 mangat meunyoe ulôn teulat, gata jeuet tateupeue pakriban geutanyoe meuseuti udeb sibagoe keuluwarga Allah, na kheueh jeumaáh Allah nyang udeb. Jeumaáh nyoe kheueh nyang jeuet keu taméh teupeudong dan nyang dukong ajaran nyang beutôi nibak Allah.
16 Hana meusidroe pi nyang hase jibantah, padubna rayeuk jih rahsia agama geutanyoe: Gobnyan geupeuleumah droe lam ruman manusia, dan geupeugah beutôi lé Roh Pe teu Allah, dan geukalon lé dumna malaikat. Haba nibak Gobnyan jipeusampoe lamkawan bansa-bansa, dan Gobnyan jimeuiman bansigom donya dan teubeuot lam syeuruga.


Chapter 4

1 Roh Allah deungon teugaih geupeugah bahwa bak watée-watée nyang teuma teuka, siladum ureuëng jimurtat, ji-iengkeue keu Almaseh. Awaknyan jiturot peue nyang jipeugah lé roh-roh nyang sisat dan jiseutôt ajaran-ajaran nibak roh jeuhet,
2 nyang jipeusampoe lé ureuëng-ureuëng munafék nyang buhak. Até nurani ureuëng-ureuëng nyan ka seupôt.
3 Ureuëng nyan jipeurunoe bék meukawen dan jitam bék jipajoh lé peunajoh nyang ka jipeuteuntée. Padahai peunajoh nyan geucebta lé Po teu Allah keuteupajoh ngon teupeugah teurimong gaséh ubak Gobnyan lé ureuëng-ureuëng nyang ka meuiman ubak Almaseh dan ka jiteupeue ajaran nyang beutôi nibak Allah.
4 Peue-peue mantong nyang geucebta lé Allah nyan gét, dan hana meusapeue pi nyang harôh teuanggab hareuem meunyoe ka teuteurimong deungon teupeugah teurimong gaséh ubak Allah.
5 Sabab beureukat nibak Po teu Allah dan doá nyang teulakée teupeusabab peunajoh nyan haleue.
6 Meunyoe gata tapeurunoe banmandum nyan ubak syedara-syedara nyang seuiman, gata teuma jeuet keupeulayan Isa Almaseh nyang mubuet deungon gét. Dan gata teuma sabe tapasoe lam baten gata ngon feureuman Allah nyang tapeucaya, dan deungon ajaran-ajaran nyang beutôi nyang ka gata seutôt seulawet nyoe.
7 Peujiôh kheueh calitra-calitra tahyul nyang hana meuguna. Lateh kheueh droe gata keu udeb lam iébadat.
8 Latehan jasmani bacut sagai hase jih, teuma latehan rohani keubiet meuguna lam hai peue mantong, sabab na teukandong janji keu udeb nibak jamén nyoe dan watée nyang teuma teuka.
9 Hainyan beutôi dan patot teuteurimong dan teupeucaya sipeunoh até.
10 Nyang kheueh sabab jih tanyoe meujuang dan meukeureuja brat, sabab geutanyoe meuharab sipeunoh jih ubak Po teu Allah nyang udeb; Gobnyan kheueh Peuseulamat keu mandum ureuëng, nyang paleng phon na kheueh ureuëng-ureuëng meuiman.
11 Peurunoe kheueh mandum nyan dan yue kheueh ureuëng-ureuëng beujiseutôt.
12 Bék kheueh na meusidroe ureuëng pih jianggab gata hina sabab gata mantong muda. Nyang sikeubiet jih, bah kheueh gata jeuet keuteuladan keu ureuëng-ureuëng nyang meuiman bah kheueh watée gata meututoe dan pi-e gata, lam cara gata tagaséh seusamoe keudroe-droe dan iman ubak Isa Almaseh, meunan cit ngon udeb gata nyang gleh.
13 Watée nyoe, trok án ulôn teuka singoh, gata beubiet-biet tabeuet Alkitab keu dumna ureuëng, tadurong dan gata purunoe awaknyan.
14 Bék sampoe gata laloe tapeuguna karonya nibak Roh Allah nyang teubri ubak gata bak watée peumimpén-peumimpén jeumaáh geupeuduek jaroe gobnyan ateueh ulée gata, meunan cit nabi-nabi geupeusampoe feureuman Allah keuhai droe gata.
15 Peubuet kheueh mandum nyan deungon biet-biet mangat keumajuan gata jikalon lé mandum ureuëng.
16 Jaga kheueh droe gata dan beu até-até kheueh ngon peue nyang gata peurunoe. Bah kheueh gata ngon seutia gata peubuet banmandum nyan, sabab deungon lagée nyan gata ka tapeuseulamat bah kheueh droe gata keudroe meunan cit ngon ureuëng-ureuëng nyang deungoe gata.


Chapter 5

1 Bék kheueh gata beungéh ngon haba nyang kreueh ateueh ureuëng nyang leubeh tuha nibak gata teuma pakat kheueh gobnyan beugeudeungoe haba gata siulah-ulah gobnyan ureuëng syiek gata. Meunan cit peusaneut kheueh bubena ureuëng-ureuëng sibagoe syedara,
2 dan inong-inong tuha sibagoe ma. Inong-inong muda gata peujeuet sibagoe adoe, ngon sikeueb gata nyang murni.
3 Horeumat kheueh keu inong-inong balée nyang biet-biet udeb jih keudroe.
4 Teuma meunyoe sidroe inong balée na aneuëk atawa cucoe, awaknyan kheueh nyang phon-phon gata bri peungeurtian bahwa awaknyan wajéb jikalon kawöm keuluwarga jih keudroe, dan jibalaih budoe ureuëng tuha dan nék awaknyan. Sabab hai nyang lagée nyan kheueh nyang teupeumangat até Allah.
5 Inong balée nyang biet-biet tinggai sidroe, dan hana meusidroe ureuëng pi nyang jitem peulara gobnyan, teuma jimeuharab ubak Allah. Uroe malam jihnyan sabe meudoá ubak Allah keu jilakée tulông.
6 Teuma inong balée nyang galak udeb meumangat-mangat, ka maté bah kheueh jihnyan mantong udeb.
7 Peutrok kheueh peutunyok-peutunyok nyoe ubak awaknyan, mangat awaknyan udeb ngon hana meucupa.
8 Teuma meunyoe ureuëng-ureuëng nyang hana jitem peulara waréh kawöm jih, leubeh-leubeh keuluwarga jih keudroe, ureuëng nyan ka ji iengkeue ubak peue nyang ji-iman; ureuëng nyang lagée nyan leubeh brok nibak ureuëng nyang hana meuiman.
9 Teuma inong balée nyang jipeupeunoh syarat-syarat lagée nyoe jeuet teupeutamong lam dafeutar inong-inong balée; umu jih hana kureueng nibak nam ploh thon, yoh masa ilée teuma na sigoe jimeukawen,
10 meugah sibagoe ureuëng inong nyang jipeubuet hai-hai nyang jroh, lagée miseue nyoe: ka jipeurayeuk aneuëk-aneuëk jih deungon gét, galak jiteurimong jamé-jamé nyang mudom dirumoh jih, jipeutimang ureuëng-ureuëng meuiman, jitulông ureuëng-ureuëng nyang susah udeb, dan jipeubuet deungon biet-biet peue mantong buet nyang jroh.
11 Bék peutamong nibak inong-inong balée nyang mantong muda. Sabab meunyoe rasa beureuhi jih mantong teuga that, inong nyan jitem meukawen lom, dan jitinggai Almaseh.
12 Deungon lagée nyan awaknyan kasalah sabab ji-iengkeue janji nyang teubri ubak jihnyan.
13 Lom teuma awaknyan jiböih-böih watée deungon cara jiteubiet tamong lam rumoh gob. Dan nyang leubeh brok lom, na kheueh awaknyan jimeurunoe jipeusuna ureuëng laén jipeurhoh droe nibak urosan ureuëng laén meunan cit jipeugah hai-hai nyang hana patot jipeugah.
14 Nyang kheueh sabab jih ulôn meulakée mangat ureuëng inong balée nyang mantong-mantong muda jimeukawen lom, jimeu aneuëk dan jiurôih rumoh tangga, mangat jeuet musoh-musoh geutanyoe hana watée jipeubrok-brok nan geutanyoe.
15 Sabab na inong-inong balée nyang ka sisat jiseutôt peue nyang jikheun lé roh jeuhet.
16 Teuma, meunyoe sidroe ureuëng inong Kristen na anggota keuluwarga nyang ka jeuet keu inong balée, jihnyan meuseuti jitulông inong balée nyan; bék jipeubiyeu jeumaáh nyang tanggong jih nyan. Deungon lagée nyan jeumaáh jeuet jitulông inong-inong balée nyang biet-biet hana waréh kawöm jih.
17 Peumimpén jeumaáh nyang jipeubuet tugaih jih deungon gét, patot teubri peunghargaan dua goe lipat, nyang peunteng awaknyan nyang kayém meukutubah dan jipeurunoe gob.
18 Sabab lam Alkitab na teutuléh lagée nyoe, "Leumô nyang teungoh jigiloe-giloe gandom jipeuleukang aneuëk gandom nyan nibak mu jih, bék kheueh teubeukab babah jih", dan meunan cit, "Ureuëng nyang mubuet, na hak jilakée upah jih".
19 Bék kheueh teurimong tudohan ateueh sidroe-droe peumimpén jeumaáh, keucuali meunyoe na jipeukong lé dua droe saksi atawa leubeh.
20 Ureuëng peubuet desya, bah kheueh teuseugah dikeue banmandum jeumaáh, mangat nyang laén jeuet teumakot.
21 Dikeue Po teu Allah, Isa Almaseh, dan bubena malaikat nyang ka teupiléh, ulôn lakée ngon meuharab that jeuet gata seutôt banmandum peutunyok-peutunyok nyoe ngon hana wasangka ateueh soe mantong, dan hana meudong-dong siblaih. 22 Bék kheueh teugisa-gisa takeubah jaroe ateueh sidroe-droe ureuëng guna teubaiát jihnyan sibagoe peulayan Tuhan. Meunyoe ureuëng laén meudesya, bék kheueh rhoh meulawok lam desya nyan. Jaga kheueh droe gata mangat teutab gleh.
23 Bék lé laloe jieb ié mantong; jieb kheueh bacut ié anggô guna keutulông keumunyoh gata, sabab gata kayém that sakét-sakét.
24 Desya siladum ureuëng, sigohlom teuba bak kantô peungadelan, ka deuh teukalon ngon nyata that. Teuma desya ureuëng laén barô kheueh teu teupeue óh ka lheueh nyan teuma.
25 Meunan cit deungon buet-buet nyang jroh bagaih that deuh teukalon. Dan nyang hana deuh pih, hana hase sabe teusöm.


Chapter 6

1 Ureuëng-ureuëng Kristen nyang jeuet keu namiet, harôh jianggab bahwa teungku po jih meuseuti jihoreumat, mangat ureuëng laén hana hase jipeubrok nan Allah atawa peulajaran geutanyoe.
2 Namiet-namiet nyang po jih ureuëng Kristen, hana jeuet jianggab po jih nyan hina sabab awaknyan saban-saban ureuëng Kristen. Teuma lé namiet nyan jilayani po jih nyan leubeh gét lom, sabab po nyang jilayani ngon jroh nyan na kheueh saban-saban ureuëng meuiman nyang teugaséh. Banmandum nyoe meuseuti gata peurunoe dan gata naseuhat.
3 Soe-soe mantong nyang peurunoe ajaran laén seulaén nibak nyan dan hana situju ngon ajaran nyang beutôi nibak Tuhan geutanyoe Isa Almaseh, dan ngon ajaran agama tanyoe,
4 na kheueh ureuëng nyang sombong hana jiteupeue sapeue! Peunyakét jih na kheueh galak meudobat dan meudakwa keuhai istilah-istilah akhé jih rhot nibak picék até, meucrebre, fiteunah, curiga nyang hana gét,
5 meunan cit meusiliseh waham nyang hana putôh-putôh. Rot seumike ureuëng nyang lagée nyan ka paneuk dan hana lé nyang beuna. Awaknyan jipike hase jeuet keukaya rot agama.
6 Beutôi agama teubri untông nyang rayeuk, meunyoe manusia nyan puih ngon peue nyang ka na.
7 Sabab hana meusapeue pi nyang jeuet taba u dalam donya nyoe, dan hana meusapeue pi nyang jeuet taba uluwa!
8 Teuma, meunyoe na peunajoh dan peukayan, nyan kaseb.
9 Teuma ureuëng nyang keuneuk jeuet keukaya, teugoda dan meupalet ngon mubagoe hawa nafeusu nyang bangai dan nyang rusak. Nafeusu-nafeusu nyang lagée nyan teuba manusia ubak hanco dan ceulaka.
10 Sabab nibak cinta ubak péng, jiteuka mubagoe rupa nyang jeuhet. Na siladum ureuëng nyang jitiyeub péng akhé jih ka hana jiturot lé ajaran Kristen, laju awaknyan jiteurimong mubagoe peundeuritaan nyang jipeuhanco até awaknyan.
11 Teuma gata na kheueh ureuëng atra Po teu Allah, ngon lagée nyan gata harôh tapeujiôh banmandum atra nyan. Useuha kheueh beujeuet keu ureuëng nyang beutôi bak mata Allah, nyang peuhamba droe ubak Allah, meuiman ubak Almaseh, tagaséh keusabe manusia, tabah lam deurita, dan meusikeub leumoh leumbot.
12 Meujuang kheueh beubiet-biet keu udeb lagée ureuëng Kristen mangat gata tareubot hadiyah seujati dan keukai. Sabab keunyan kheueh Allah geutawök gata bak watée gata ta-aku Gobnyan dikeue ureuëng ramé bahwa gata meuiman ubak Almaseh.
13 Dan jinoenyoe, dikeue Po teu Allah nyang bri nyawöng keu makhlok peue mantong, dan dikeue Isa Almaseh nyang ka geubri saksi nyang beutôi dikeue Pontius Pilatus, ulôn lakée nyoe nibak gata:
14 Taát kheueh ubak peurintah nyan deungon até nyang gleh dan hana meucupa trok ubak watée jih Tuhan geutanyoe Isa Almaseh geuteuka lom teuma.
15 Keuhai teuka Gobnyan teuma geupeuteuntée bak watée nyang paih lé Allah keudroe. Gobnyan kheueh nyang matkuasa sidroe kong sagai; Gobnyan agong, Raja di ateueh raja, dan Tuhan banmandum tuan.
16 Gobnyan kheueh mantong nyang hana hase jikuasa lé maté; Gobnyan udeb lam cahya nyang hana hase jipeurab lé soemantong. Hana meusidroe manusia pi nyang ka lheueh jikalon Gobnyan. Keu Gobnyan kheueh horeumat dan kuasa siumu masa! Amin.
17 Keu ureuëng-ureuëng nyang kaya ateueh rhueng donya, gata peugah kheueh mangat awaknyan bék sombong dan bék meuharab ateueh barang-barang nyang hana teutab -- lagée hai jih atra keukayaan. Awaknyan meuseuti meuharab ubak Po teu Allah nyang geubri peue-peue mantong ubak geutanyoe deungon meulimpah mangat geutanyoe tateumé rasa.
18 Lakée kheueh nibak awaknyan mangat awaknyan jitunyok keubuet nyang jroh, keu jipeubuet buet-buet nyang gét, murah até dan galak jimeubri.
19 Deungon lagée nyan awaknyan ka jigumpôi atra nyang jeuet keumodal nyang gét keuwatée nyang teuma teuka. Dan deungon lagée nyan awaknyan teuma meuteumé udeb nyang keukai, na kheueh udeb nyang seujati.
20 Peue nyang ka teupeucaya keugata, jaga kheueh nyan beugôt-gôt, Timotius! Peujiôh kheueh tutoe haba nyang hana meuguna dan meudobat keuhai-hai nyang seucara keuliru teupeugah "Peungeutahuan".
21 Sabab na ureuëng nyang jipeugah bahwa awaknyan na peungeutahuan nyan, sampoe ngon lagée nyan kajiseuleweng ajaran-ajaran Kristen nyang awaknyan meuiman yoh masa ilée. Seumoga Tuhan geubri beureukat ubak Syedara mandum. Horeumat kamoe, Paulus