2 Timotius

1 2 3 4


Chapter 1

1 Timotius, aneuëk ulôn nyang teucinta! Ulôn, Paulus, lôn tuléh suratnyoe keugata, dan meuharab seumoga Allah Bapak dan Tuhan geutanyoe Isa Almaseh geubri beureukat, rakhmat dan seujahteura ateueh gata. Ateueh keuheundak Po teu Allah, ulôn geuangkat jeuet keu rasui Isa Almaseh dan geuyue peusampoe keuhai udeb nyang geupeu janji lé Allah. Udeb nyan tateurimong sabab meusaboh ngon Isa Almaseh.
3 Ulôn meulakée syukoe ubak Po teu Allah nyang lôn layani ngon até nurani nyang gleh lagée nyang geupeubuet lé indatu ulôn yoh masa ilée. Ulôn sabe lôn lakée teurimong gaséh ubak Allah pajan mantong ulôn ingat keugata lam doá, bah kheueh uroe meunan cit malam.
4 Ulôn teuingat ubak até gata nyang seudeh. Nyang kheueh sabab jih ulôn meuharab that meurumpok ngon gata mangat ulôn biet-biet meugeumbira.
5 Ulôn teuingat ubak keupeucayaan gata nyang biet-biet sunggoh ubak Almaseh, saban lagée keupeucayaan nék gata Lois dan ma gata Eunike. Dan ulôn yakén gata pih meuiman nyang lagée nyan.
6 Sabab nyan ulôn peuingat gata keutateupeue udeb karonya nyang geubri lé Allah ubak gata bak watée ulôn keubah jaroe lôn ateueh gata.
7 Sabab Roh Allah nyang geubri ubak geutanyoe, kon kheueh Roh nyang teupeujeuet geutanyoe jeuet keuteumakot. Nyang sibeuna jih, Roh Allah nyan teupeujeuet geutanyoe meutamah teuga, peunoh ngon gaséh sayang dan hase tapeuteun droe.
8 Sabab nyan bék kheueh malée tabri keusaksian keuhai Tuhan geutanyoe, dan bék teuma malée keuhai ulôn, nyang jipeutamong lam glab sabab lé Gobnyan. Nyang sikeubiet jih, bah kheueh gata ngon teunaga nibak Po teu Allah, meusajan meudeurita lé sabab Haba Gét nyan.
9 Allah geupeu seulamat geutanyoe dan geutawök geutanyoe mangat jeuet keu umat Gobnyan keudroe. Gobnyan geupeubuet lagée nyan kon dasai jih peue nyang ka tapeubuet, teuma reuncana Gobnyan dan rakhmat Gobnyan. Gobnyan geubri keugeutanyoe rahmat Gobnyan meulalu Isa Almaseh sigohlom donya nyoe geucebta.
10 Dan jinoenyoe, Allah geutunyok rakhmat nyan ubak geutanyoe deungon jiteuka Raja nyang ba seulamat tanyoe Isa Almaseh. Isa geupeutalo kuasa maté dan geuba udeb nyang abadi meulalu Haba Gét nyan.
11 Keuteupeusampoe Haba Gét nyan kheueh Allah geuangkat ulôn jeuet keurasui dan gurée.
12 Nyang kheueh sabab jih ulôn meudeurita lé mandum nyoe, teuma ulôn teutab yakén, sabab ulôn kuteupeue that soe nyang ulôn meuiman. Ulôn yakén bahwa peue nyang ka Gobnyan peucaya ubak ulôn, Gobnyan pih hase geujaga trok bak Uroe Pagée.
13 Seutôt kheueh ngon biet-biet ajaran nyang beutôi nyang ka ulôn bri nibak gata. Dan bah kheueh gata teutab tamumat nibak iman dan gaséh nyang ka jeuet keuhak milék geutanyoe sabab meusaboh ngon Isa Almaseh.
14 Ngon geutulông lé Roh Allah nyang udeb lam tuboh geutanyoe, bah kheueh gata tajaga beugét-gét hai-hai nyang muyuem nyang ka teupeucaya ubak gata.
15 Gata tateupeue bahwa banmandum ureuëng nyang na diwilayah Asia ka jitinggai ulôn, meunan cit ngon Figelus dan Hermogenes ka jitinggai lôn.
16 Teuma keuluwarga Onesiforus kana padub goe jipeumangat até lôn. Seumoga Tuhan geubalaih gaséh sayang Geuh ateueh awaknyan. Bah kheueh ulôn na lam glab, Onesiforus hana malée ngon keuadaan ulôn nyan.
17 Meunan trok u Roma, jihnyan laju jiuseuha jimita ulôn sampoe jihnyan meurumpok ngon ulôn.
18 Dan gata tateupeue di Efesus jihnyan jai that-that ka jitulông lôn. Seumoga Tuhan geutunyok gaséh sayang Geuh keu jihnyan bak uroe Tuhan geupeu sidang banmandum umat manusia.


Chapter 2

1 Timotius, aneuëk ulôn! Bah kheueh gata jeuet keuteuga lé rakhmat nyang geubri ubak geutanyoe, sabab tanyoe meusaboh ngon Isa Almaseh.
2 Ajaran nyang yoh masa ilée ka gata deungoe nibak ulôn dikeue rakyat ba, bah kheueh gata patéh ubak ureuëng-ureuëng nyang jeuet gata patéh dan nyang carông jipeurunoe ureuëng laén.
3 Gata meuseuti meusajan meudeurita sibagoe sidadu Isa Almaseh nyang seutia.
4 Sidroe sidadu nyang teungoh meutugaih, hana teuma jipeugabuek droe jih ngon urosan-urosan droe, sabab jihnyan jikeuneuk peumangat até pang droe jih keudroe.
5 Sidroe ureuëng peumeuén ulah raga hana teuma jeuet keujuara watée jimeutunang, meunyoe jihnyan hana jitaát ubak atoran-atoran.
6 Ureuëng meugo nyang ka jikeureuja brat, ureuëng nyan kheueh nyang phon-phon that nyang hak jiteurimong wase seunaman.
7 Pike kheueh peue nyang ulôn peugah nyan, sabab Tuhan teuma geubri keugata keusanggopan keutamuphom banmandum.
8 Ingat kheueh nyoe: Haba Gét nyang ulôn peusampoe nyan na kheueh haba keuhai Isa Almaseh, keuturonan Nabi Daud; Gobnyan kheueh Almaseh nyang ka udeb lom teuma nibak maté.
9 Sabab teupeusampoe Haba Gét nyan kheueh, ulôn meudeurita; bahkheueh sampoe jiranté lagée sidroe ureuëng jeuhet. Teuma feureuman Allah hana hase jiranté.
10 Nyang kheueh sabab jih ulôn tabah lôn tanggong banmandum nyan deumi keupeuntengan ureuëng-ureuëng nyang ka geupiléh lé Po teu Allah, mangat awaknyan pi meuteumé seulamat nyang geubri meulalu Isa Almaseh, dan nyang meusajan-sajan ngon keuagongan nyang abadi.
11 Keubiet beutôi nyang ulôn peugah nyoe, "Meunyoe geutanyoe ka maté meusajan Gobnyan, geutanyoe teuma udeb cit lom meusajan Gobnyan.
12 Meunyoe tanyoe teutab tabah, geutanyoe teuma tamat peurintah cit meusajan Gobnyan. Meunyoe geutanyoe taiengkeue keu Gobnyan, Gobnyan pi teuma geuiengkeue keugeutanyoe.
13 Meunyoe geutanyoe hana seutia, Gobnyan teutab seutia, sabab hana hase Gobnyan meubeda ngon droe Geuh keudroe."
14 Bah kheueh gata peuingat ureuëng-ureuëng keuhai mandum nyoe. Dikeue Allah, bri kheueh naseuhat bak awaknyan mangat bék jimeudakwa keuhai istilah-istilah. Nyang lagée nyan hana meuguna, nyang na jipeukaru pikeran ureuëng-ureuëng nyang deungoe.
15 Useuha kheueh lé gata deungon biet-biet mangat Allah geuangkée gata sibagoe ureuëng nyang patot tamubuet keu Gobnyan. Useuha kheueh mangat gata bék malée keuhai buet gata nyan, dan gata purunoe ngon jeulaih dan beutôi keuhai ajaran nyang beuna nibak Po teu Allah.
16 Peujiôh kheueh tutoe haba nyang hana manfaát dan nyang teuhina Allah. Tutoe haba nyang lagée nyan teuma teuba manusia bak buet nyang leubeh jeuhet.
17 Ajaran awaknyan bagaih that jimeu éue lagée peunyakét kanker nyang that-that meubahya. Lamkawan awaknyan jitamong cit keunan Himeneus dan Filetus.
18 Awaknyan ka sisat nibak ajaran nyang beutôi, dan jiputa balék nyang ka ji-iman lé siladum ureuëng. Awaknyan jipeugah bahwa teubeudôh nibak maté ka teujadi.
19 Teuma dasai nyang kông nyang ka geupeugét Allah hana hase jiyok-yok. Di ateueh nyan na teutuléh lagée nyoe, "Tuhan geuturi ureuëng-ureuëng nyang atra Gobnyan", dan "Ureuëng nyang jipeugah bahwa jihnyan milék Tuhan, ureuëng nyan meuseuti jipiôh jipeubuet nyang salah".
20 Lam rumoh nyang rayeuk na meuteumé meubagoe rupa peurabot. Na nyang teupeugét nibak pirak atawa méuh, teuma na cit nyang teupeugét nibak kayée atawa tanoh. Na nyang jipeuguna keu nyang istimewa, dan na cit nyang jipeuguna keu keupeureulée biasa.
21 Ureuëng nyang jipeugleh droe jih nibak mandum nyang jeuhet, ureuëng nyan teuma teupeuguna keuteupeureulée nyang istimewa. Gobnyan jeuet keu atra nyang khusos dan naguna keu po droe jih. Jihnyan teukeubah keuteupeuguna keu tieb-tieb buet nyang jroh. 22 Peujiôh kheueh peue-peue nyang jiharok lé ureuëng muda. Useuha kheueh ubak udeb lagée nyang geulakée lé Allah, seutia nibak ajaran Gobnyan dan teugaséh seusabe manusia, dan na até nyang teuntram. Udeb kheueh ngon awaknyan nyang jilakée tulông ubak Tuhan ngon até nyang murni.
23 Bék kheueh peu rhoh droe nibak buet-buet nyang meudobat lé ureuëng-ureuëng bangai nyang hana jiteupeue sapeue. Gata tateupeue bahwa banmandum nyan jipeuteuka dakwa.
24 Ureuëng nyang mubuet keu Tuhan hana patot jimeudakwa; jihnyan meuseuti ramah ateueh mandum ureuëng, dan hase jipeurunoe gob ngon jroh dan saba.
25 Jihnyan meuseuti ngon leumoh leumbot jipeurunoe ureuëng nyang galak meulawan; mudah-mudahan Allah geubri watée keu ureuëng-ureuëng nyan keu jimeutobat nibak mandum desya-desya awaknyan dan jituri keu ajaran nyang beuna.
26 Deungon lagée nyan awaknyan ka jeuet keusadar lom teuma, dan leupah nibak peurangkab Iblih nyang ka jidrob awaknyan dan jipaksa awaknyan jiseutôt keuheundak até jih.


Chapter 3

1 Ingat kheueh nyoe: Nibak uroe-uroe akhé teuma na keusosahan.
2 Manusia jipeupeunteng droe jih keudroe, sifeuet manusia nyan teupéng-péng, sombong dan galak meututoe ngon haba sulet. Awaknyan galak jihina gob, beurontak bak ureuëng tuha, hana jiteupeue lakée teurimong gaséh, dan jibanci keuhai-hai nyang rohani.
3 Awaknyan hana jigaséh seusabe manusia, hana jitem peuamphon gob salah, awaknyan galak jipeubrok-brok nan ureuëng laén, galak jipoh gob ban galak droe, awaknyan keujam, dan hana galak nyang keugôt.
4 Awaknyan galak meukianat, manyang até dan hana seumike panyang. Awaknyan leubeh galak keumangat lam donya nibak jiseutôt Allah.
5 Bah pi seucara lahé awaknyan taát jipeubuet keuwajéban agama, teuma jitulak inti agama nyan keudroe. Peujiôh kheueh nibak ureuëng-ureuëng nyang lagée nyan.
6 Na lamkawan awaknyan nyang ka jitamong lam rumoh-rumoh, laju jirayu ureuëng-ureuëng inong nyang leumoh dan nyang ka jai lagoena desya dan jikuasa lé mubagoe nafeusu.
7 Ureuëng-ureuëng inong nyan hana putôh-putôh jilakée peurunoe, hántom na jiteume beujituri ajaran nyang beutôi nibak Allah.
8 Lagée toh Yanes dan Yambres jilawan Nabi Musa yoh masa ilée, meunan kheueh teuma ureuëng-ureuëng nyan jilawan ajaran nyang teuka nibak Allah. Pikeran awaknyan ka rusak, dan iman awaknyan hana ék jiteun keunong cuba.
9 Teuma awaknyan hana teuma jiteume sapeue, sabab bangai jih nyan teuma jiteupeue lé mandum ureuëng, lagée nyang ka jirasa lé Yanes dan Yambres.
10 Teuma gata ka taseutôt ajaran lôn, pi-e ulôn, dan tujuan udeb lôn. Gata ka tangieng keudroe pakriban ulôn nyoe biet-biet meuiman ubak Isa Almaseh dan lôn gaséh seusabe manusia. Meunan gata tateupeue keuhai saba dan tabah ulôn.
11 Gata ka takalon ulôn ji iénanya dan ulôn meudeurita. Gata tateupeue mandum nyang teujadi ateueh ulôn di Antiokhia, di Ikonium, dan di Listra; dan gata tateupeue banmandum nyang ulôn deurita! Teuma Tuhan geupeu seulamat ulôn nibak mandum nyan.
12 Beutôi mandum ureuëng nyang keuneuk udeb meuiébadat dan udeb meusaboh ngon Isa Almaseh teuma ji iénanya,
13 seudangkan ureuëng-ureuëng jeuhet dan ureuëng-ureuëng buet teumipée meutamah jeuhet. Awaknyan jipeungét ureuëng laén padahai awaknyan keudroe pih keunong peungeut.
14 Teuma keuhai gata, Timotius, bah kheueh gata teutab tamumat nibak ajaran-ajaran nyang beuna nyang ka teupurunoe bak gata dan nyang gata meuiman sipeunoh até; sabab gata tateupeue soe gurée-gurée gata.
15 Gata meuseuti teuingat bahwa yoh ubit gata ka taturi keu Alkitab. Alkitab nyan hase jibri keugata peungeurtian keumeuteumé ubak keuseulamatan meulalu iman ubak Isa Almaseh.
16 Banmandum nyang teutuléh lam Alkitab, geupeu ilham lé Allah dan meuguna keuteupeurunoe nyang beuna, keuteuseugah dan teupeubeutôi nyang salah, dan keuteupeurunoe manusia mangat udeb meunurot keuheundak Allah.
17 Deungon Alkitab nyan ureuëng nyang layani Allah hase teupeuleungkab ngon sampoereuna keumeubagoe macam buet nyang jroh.


Chapter 4

1 Isa Almaseh teuma teuka lom lam donya nyoe dan geupeu sidang ureuëng-ureuëng nyang udeb dan nyang maté; dan Gobnyan teuka keugeuba peurintah sibagoe Raja. Ngon sabab nyan ulôn meulakée ngon meuharab that nibak gata dikeue Allah dan Isa Almaseh:
2 Bah kheueh gata peusampoe haba nyang beutôi nyang teuka nibak Allah nyan, dan sabe gata peusak mangat jitem deungoe lé gob, peu kheueh awaknyan jitem atawa hana. Bah kheueh gata tapeuyakén gob, gata tunyok nyang salah, dan gata bri durongan keu awaknyan. Peurunoe kheueh gob nyan deungon saba nyang rayeuk.
3 Sabab teuma teuka watée jih, manusia hana jitem teurimong lé ajaran nyang beuna. Sikeubiet jih, awaknyan teuma jiturot keuheundak jih keudroe, dan jipeusapat gurée-gurée nyang guna jipeurunoe hai-hai nyang mangat teudeungoe nibak geulinyueng awaknyan.
4 Awaknyan jisumpai geulinyueng ateueh nyang beuna, teuma teuma jipeudeungoe gét-gét ubak calitra-calitra dongeng.
5 Bah kheueh lagée nyan, gata meuseuti takuasa droe gata lam keuadaan peue mantong. Tabah kheueh nibak peundeuritaan, peubuet kheueh tugaih gata sibagoe ureuëng nyang peusampoe Haba Gét nyan dan peujak kheueh nyan ngon sigét-gét jih keuwajéban gata sibagoe peulayan Allah.
6 Keuhai droe ulôn, ka trok watée jih ulôn maté sibagoe keureubeuen keu Po teu Allah. Hana treb lé ulôn teuma lôn tinggai donya nyoe.
7 Ulôn ka lôn seutôt meutunang plueng deungon sigét-gét jih, dan ka trob bak garéh akhé. Ulôn teutab seutia ubak Almaseh sampoe akhé.
8 Dan jinoenyoe hadiah keu nyang meunang ka jipreh ulôn. Bak Uroe Kiamat, Tuhan, Hakém nyang ade nyan kheueh nyang seurah hadiah nyan keu ulôn, sabab ulôn udeb meugét lom ngon Po teu Allah. Dan kon ulôn mantong nyang teurimong hadiyah nyan, teuma banmandum ureuëng nyang ka jipreh-preh deungon rindu Tuhan nyang teuka.
9 Useuha kheueh dan teuka kheueh bak ulôn beureujang-reujang,
10 sabab Demas ka jitinggai ulôn sabab jicinta keu donya nyoe. Jihnyan ka jijak u Tesalonika. Dan Kreskes ka teuma jijak u Galatia, meunan cit deungon Titus u Dalmatia.
11 Teuma Lukas nyang tinggai ngon lôn. Jaktueng kheueh Markus dan bah kheueh jihnyan tinggai meusajan gata, sabab jihnyan jeuet jitulông nibak buet ulôn.
12 Ulôn ka lôn yue Tikhikus jijak u Efesus.
13 Meunyoe gata teuka, ba kheueh mantel nyang lôn tinggai di Troas bak rumoh Karpus. Meunan cit ngon kitab-kitab gata bék tuwoe gata ba, nyang paleng peunteng kitab nyang teupeugét nibak keureutah kulét.
14 Aleksander, teumpeun teumaga nyan ka jipeubuet hai-hai nyang paleng jeuhet ateueh ulôn. Tuhan teuma geubalaih ateueh jih nyan sisuai ngon buet jih nyang jeuhet.
15 Gata keudroe meuseuti até-até keu jih nyan, sabab jihnyan jilawan that beurita nyang tanyoe ba.
16 Bak watée ulôn phon-phon that lôn peusampoe peumbilaan lôn, hana meusidroe pi nyang jitem dong blaih lôn; banmandum jitinggai lôn. Mudah-mudahan Allah hana geupeusalah awaknyan lam hainyoe! Teuma Tuhan na meusajan ulôn.
17 Gobnyan geubri teunaga keu ulôn sampoe ulôn hase lôn peusampoe banmandum Haba Gét nyan, mangat jideungoe lé mandum ureuëng nyang kon Yahudi. Dan ulôn lheuh nibak bahya maté.
18 Keubiet Tuhan teuma geupeulheuh ulôn nibak tieb-tieb useuha nyang jeuhet ateueh ulôn. Gobnyan teuma geuba ulôn deungon seulamat lam keurajeuen Geuh di Syeuruga. Bah kheueh Gobnyan teupeuagong siumu masa! Amin.
19 Saleuem ulôn keu Priskila dan Akwila dan keu keuluwarga Onesiforus.
20 Erastus tinggai di Korintus, dan Trofimus ka ulôn tinggai lam keuadaan sakét di Miletus.
21 Meu-useuha kheueh sijeuet-jeuet jih keuteu-teuka sigohlom musem sijuek. Ebulus, Pudes, Linus, dan Klaudia, awaknyan jikirém saleuem keugata mandum; meunan cit keu syedara saboh iman nyang laén. 22 Seumoga Tuhan na meusajan gata. Seumoga Tuhan geubri beureukat keu Syedara mandum! Horeumat kamoe, Paulus