Titus

1 2 3


Chapter 1

1 Aneuëk ulôn Titus! Ulôn, Paulus, kutuléh surat nyoe sibagoe hamba Allah dan rasui Isa Almaseh. Ulôn geupiléh dan geu-utus keu teutulông ureuëng-ureuëng piléhan Allah mangat beujeuet teuga iman awaknyan. Meunan cit ulôn museuti kubimbéng awaknyan mangat jituri ajaran nyang beuna nyang jipeurunoe lé agama tanyoe.
2 Ajaran na kheueh sibagoe harapan bahwa geutanyoe tateurimong udeb seujati dan keukai. Allah ka geupeu janji udeb nyan sigohlom awai jamén -- dan Allah hana mungken meusulet.
3 Bak watée nyang paih, Allah geupeugah janji Gobnyan nyan lam peusan Geuh. Peusan nyan ka geupeucaya bak ulôn, dan ulôn britée nyan ateueh peurintah Allah Peuseulamat tanyoe.
4 Titus, gata na kheueh biet-biet aneuëk ulôn, sabab gata dan ulôn saban-saban kata meuiman ubak Almaseh. Ulôn meuharab seumoga Allah Bapak dan Isa Almaseh Raja Peuseulamat tanyoe, geubri beureukat dan seujahteura ateueh gata.
5 Ulôn tinggai gata di Kreta mangat gata hase tauroih hai-hai nyang peureulée teuatoe. Meunan cit, mangat gata ta angkat peumimpén-peumimpén jeumaáh ditieb-tieb banda. Dan ingat kheueh ubak peutunyok-peutunyok nyang ulôn peugah nyoe:
6 Sidroe peupeumimpén jeumaáh na kheueh sidroe ureuëng nyang hana meucupa; ureuëng nyan peurumoh jih sidroe mantong; aneuëk-aneuëk jih nyang ka meuiman ubak Almaseh dan kon aneuëk nyang jeuhet hana jeuet teupurunoe.
7 Peunilék jeumaáh na kheueh ureuëng nyang jiurôih buet Allah, ureuëng nyan hana meucupa. Ureuëng nyan hana sombong atawa bagaih beungéh, atawa galak keumabök, atawa galak keumulo, atawa teupéng-péng.
8 Ureuëng nyan meuseuti nyang galak jiteurimong jamé dirumoh jih, galak bak hai-hai nyang jroh, hase jiteun droe, jujoe, gleh dan teureuteb.
9 Ureuëng nyan meuseuti nyang jimumat kong that nibak ajaran nyang ji-iman, lagée nyang ka teupurunoe bak jih nyan. Ngon lagée nyan jihnyan hase jibri naseuhat keu ureuëng laén nyang dasai jih nibak ajaran nyang beutôi, dan jitunyok buet-buet ureuëng nyang salah nyang lawan jih.
10 Sabab jai that ureuëng nyang galak keubeurontak, nyang paleng phon ureuëng-ureuëng nyang yoh awai meuagama Yahudi; awaknyan jipeunget ureuëng laén ngon haba jih nyang sulet.
11 Ureuëng-ureuëng nyang lagée nyan meuseuti teusumpai babah jih, sabab awaknyan jipeukaru keuluwarga-keuluwarga deungon ajaran-ajaran nyang hana beutôi. Awaknyan jipeubuet lagée nyan jikeuneuk mita laba nyang hana patot!
12 Ka lheueh geupeugah lé nabi nyang asai jih di Kreta ureuëng awaknyan keudroe, "Ureuëng-ureuëng Kreta sabe jimeusulet, dan lagée beulatang juwah nyang leuha dan beu-o."
13 Peue nyang geupeugah lé nabi nyan keubiet beutôi. Nyang kheueh sabab jih gata meuseuti tatam awaknyan deungon teugaih; mangat awaknyan teutab jimumat nibak ajaran-ajaran nyang beutôi
14 hana lé jimumat bak dongeng-dongeng Yahudi atawa peuratoran-peuratoran nyang jipeuget lé ureuëng-ureuëng nyang tulak ajaran nyang beutôi nyan.
15 Peue-peue mantong na kheueh gleh nibak ureuëng nyang gleh. Teuma nibak ureuëng nyang pikeran jih kutoe lom hana meuiman, hana meusapeue pi nyang gleh, sabab pikeran dan até nurani awaknyan ka kutoe!
16 Awaknyan jipeugah bahwa awaknyan jituri Allah, padahai buet awaknyan ji iengkeue hai nyan. Awaknyan keubiet that luwat, dan awaknyan hana jitem taát; awaknyan na kheueh ureuëng-ureuëng nyang hana hase jipeubuet nyang jroh.


Chapter 2

1 Teuma gata, Titus, bah kheueh gata tapeurunoe ajaran nyang beutôi.
2 Bri kheueh naseuhat bak ureuëng agam nyang tuha, mangat awaknyan jiteun droe, bijaksana dan udeb sibagoe ureuëng nyang patot teuhoreumat. Meunan cit awaknyan seutia jimumat bak ajaran nyang beutôi nyang teuka nibak Allah, jigaséh ngon sampoereuna dan meudeurita ngon até nyang tabah.
3 Meunan cit teuma gata bri kheueh naseuhat keu ureuëng-ureuëng inong nyang tuha mangat peurangoe awaknyan saban lagée peue nyang patot keu ureuëng nyang udeb khusos keu Po teu Allah. Ureuëng nyan hana jeuet jifiteunah ureuëng laén, dan hana jeuet banggi keu ié kreueh. Awaknyan meuseuti jipeurunoe hai-hai nyang gét,
4 deungon lagée nyan awaknyan jeuet jididek inong-inong nyang mantong muda beujigaséh keu lakoe dan aneuëk-aneuëk jih,
5 jeuet keu ureuëng bijaksana, udeb jih gleh dan jeuet keu ma rumoh tangga nyang jroh nyang taát ubak lakoe jih. Deungon na lagée nyan hana ureuëng nyang hase jihina haba nyang teuka nibak Po teu Allah.
6 Meunan cit teuma, bri kheueh naseuhat keu ureuëng-ureuëng muda mangat awaknyan jeuet keu ureuëng bijaksana.
7 Lam hai peue mantong, bah kheueh gata jeuet keuteuladan pi-e nyang jroh. Meunyoe gata peurunoe, gata beu biet-biet jujoe dan beutôi-beutôi.
8 Peuguna kheueh tutoe haba nyang bijaksana, nyang hana hase jipeubeuáh lé gob, mangat lawan-lawan gata jeuet keumalée sabab hana hai-hai nyang brok nyang hase jipeugah keugeutanyoe.
9 Namiet-namiet bah kheueh jitaklok ubak amphon jih, dan jipeumangat até jih lam hai peue mantong. Awaknyan hana jeuet jibantah,
10 atawa jiceumeucue. Bah kheueh awaknyan jipeuleumah droe bahwa jihnyan gét dan seutia, mangat ngon sikeueb awaknyan nyang lagée nyan ureuëng laén jipujoe keuhai ajaran Po teu Allah, nyang peuseulamat geutanyoe.
11 Sabab Allah ka geutunyok rahmat Gobnyan guna teupeuseulamat banmandum umat manusia.
12 Rahmat Allah nyan teudidek geutanyoe mangat hana lé meuantok ngon meulakée Gobnyan dan hana taseutôt kheun donya nyoe. Geutanyoe geudidek keu udeb lam donya nyoe deungon tateupeue tapeuteun droe, jujoe dan seutia ubak Po teu Allah.
13 Jinoenyoe geutanyoe teungoh tapreh-preh Uroe nyang taharab-harab nyan; nibak Uroe nyan donya teuma jikalon keuagongan Isa Almaseh, na kheueh Allah Maharayeuk dan Raja Peuseulamat tanyoe.
14 Gobnyan ka geukeureubeuen droe Geuh keudroe keugeutanyoe guna keugeupeu beubaih geutanyoe nibak mandum nyang jeuhet, dan geupeujeuet geutanyoe saboh umat nyang beubaih nibak desya-desya dan nyang jeuet keu milék Gobnyan mantong, dan meunan cit nyang biet-biet jipeubuet nyang gét.
15 Purunoe kheueh banmandum nyan, dan naseuhat kheueh dan marit kheueh ngon ureuëng nyang deungoe ngon peunoh wibawa. Dan bék kheueh meusidroe ureuëng pi nyang jingieng gata deungon hina.


Chapter 3

1 Peuingat kheueh ubak anggota jeumaáh gata mangat awaknyan jideungoe ubak peue nyang geukheun lé peumimpén-peumimpén dan nyang mat kuasa neugahra, lom taát dan jitem peubuet tieb-tieb hai nyang jroh.
2 Peugah kheueh bak awaknyan mangat bék karu atawa meudakwa ngon soe mantong, dan meusikeub rumeh. Dan bah kheueh awaknyan meusikeub leumoh leumbot ubak soe mantong.
3 Sabab yoh masa ilée geutanyoe keudroe pi bangai, sisat dan hana taát. Tanyoe jipeubudak lé mubagoe-bagoe nafeusu dan hasrat; tanyoe udeb peunoh ngon niet-niet nyang jeuhet dan bingiek até, dan sabe lam banci.
4 Teuma Po teu Allah, Nyang Peuseulamat geuteunyoe geubri gaséh dan até geuh nyang jroh ubak geutanyoe.
5 Gobnyan geupeu seulamat tanyoe, kon lé sabab tanyoe ka tapeubuet sapeue-peue buet nyang gét, teuma na kheueh Gobnyan keudroe keugeunaséh keu geutanyoe. Gobnyan geupeu seulamat tanyoe meulalu Roh Allah, nyang geubri bak geutanyoe lahé barô deungon cara geurhah geutanyoe.
6 Allah geuprée Roh Gobnyan ateueh geutanyoe deungon peurantara Isa Almaseh, Raja Peuseulamat geutanyoe,
7 mangat lé rahmat Isa, geutanyoe tameugét lom teuma ngon Allah dan geutanyoe meuteumé udeb seujati dan keukai nyang geutanyoe harab that.
8 Tutoe haba nyoe keubiet beutôi that. Ulôn meuharab beu gata waham that hai nyoe, mangat ureuëng-ureuëng nyang meuiman ubak Po teu Allah biet-biet jiuseuha keu jipeubuet buet-buet nyang jroh dan na manfaát keu mandum ureuëng.
9 Peujiôh kheueh meudobat nyang hana meuguna, haba-haba asai usui, meudakwa dan meulo sabab keuhai huköm agama. Banmandum nyan hana meuguna dan hana meulaba.
10 Ureuëng nyang jeuet keusabab jeumaáh meucrebre, gata seugah kheueh sigoe dan dua goe; óh lheueh nyan bék kheueh gata meurakan lé ngon jih nyan.
11 Gata tateupeue bahwa ureuëng nyang lagée nyan jeuhet dan desya-desya jih sibagoe bukeuti bahwa jihnyan salah.
12 Beubagaih kheueh meunan lheueh lôn kirém Artemas dan Tikhikus ubak gata, useuha bubagaih that keu gata jak ubak ulôn di Nikopolis, sabab ulôn na niet keuneuk tinggai bak teumpat nyan watée musém sijuek.
13 Useuha kheueh beubiet-biet keu tatulông Zenas, nyang malem huköm nyan, dan Apolos, mangat awaknyan hase jijak hana kureueng peue-peue mantong.
14 Ureuëng-ureuëng geutanyoe bah kheueh jimeurunoe keu jipeubuet hai-hai nyang jroh mangat jeuet jipeupeunoh peue-peue mantong nyang keubiet that jipeureulée; bék sampoe awaknyan udeb hana meuguna.
15 Banmandum syedara nyang na meusajan ulôn, geukirém saleuem keu gata. Peutrok kheueh saleuem kamoe ubak rakan-rakan geutanyoe nyang saboh iman. Seumoga Tuhan geubri beureukat ubak Gata mandum. Horeumat kamoe, Paulus