Ibrani

1 2 3 4 5 6 7 8 9 10 11 12 13


Chapter 1

1 Bak jamén ilée jai lagoena Allah meufeureuman ubak indatu geutanyoe meulalu nabi-nabi deungon geupeu guna meubagoe cara.
2 Teuma nibak jamén akhé nyoe Gobnyan geumeututoe ubak geutanyoe deungon peurantaraan Aneuëk Gobnyan. Meulalu Aneuëk Geuh nyoe kheueh Allah geucebta alam seumeusta. Dan Po teu Allah ka geupeuteuntée bahwa Aneuëk Gobnyan nyoe kheueh nyang na hak geupeuteuntée peue-peue mantong.
3 Gobnyan kheueh nyang peuteubiet keu agongan Allah nyang paleng meusyeuhu; Gobnyan kheueh gamba nyang paleng nyata nibak droe Allah keudroe. Gobnyan kheueh teuma nyang peulara alam nyoe sampoereuna deungon feureuman Geuh nyang paleng meukuasa. Óh ka lheueh Gobnyan teupeumungken manusia keuteupeubeubaih nibak desya-desya awaknyan keudroe, Gobnyan geuduek bak tahta peumeurintah nyang na lam syeuruga meusajan-sajan ngon Allah, Peunguasa nyang paleng manyang.
4 Aneuëk nyan meuteumé jabatan nyang jiôh leubeh manyang nibak malaikat, dan nan nyang geubri lé Po teu Allah ubak Gobnyan pih jiôh leubeh teuhoreumat nibak nan nyang geubri ubak malaikat.
5 Hántom na Allah geupeugah meunoe ubak meusidroe malaikat pi, "Gata kheueh Aneuëk Ulôn; nibak uroenyoe ulôn jeuet keu Bapak gata." Hántom na Allah meufeureuman meunoe ubak malaikat pakriban kheueh mantong, "Ulôn teuma jeuet keu Bapak jih, dan jihnyan teuma jeuet keu Aneuëk Ulôn."
6 Teuma bak watée Allah geu kirém Aneuëk Gobnyan nyang tuha lam donya nyoe, Allah meufeureuman lagée nyoe, "Banmandum malaikat Allah wajéb jiseumah Aneuëk nyan."
7 Keuhai malaikat-malaikat Allah meufeureuman lagée nyoe, "Allah geupeujeuet malaikat-malaikat Gobnyan jeuet keu angén, dan peulayan-peulayan Gobnyan jeuet keu apui hu."
8 Teuma ubak Aneuëk nyan Allah meufeureuman, "Takhta Droeneueh, ya Allah, teuma keukai siumu masa! Peumeurintah Droeneueh na kheueh peumeurintah nyang ade.
9 Droeneueh galak ubak keuadelan, dan banci ubak buet nyang hana ade; nyang kheueh sabab jih Allah, Allah Gata, geupiléh Gata dan geubri keu Gata keuhoreumatan nyang teupeuteuka suka cita, leubeh nibak rakan-rakan Gata."
10 Allah meufeureuman lom, "Droeneueh, Tuhan, bak awaiphon neucebta bumoe, dan Droeneueh keudroe nyang peujeuet langét.
11 Banmandum nyan teuma gadôh, dan jeuet keu tuha lagée peukayan; teuma Droeneueh hana meu ubah.
12 Bansigom alam raya nyoe Droeneueh lipat lagée bajée, dan Droeneueh gantoe ngon nyang laén. Teuma Droeneueh hántom na meu-ubah, dan udeb Droeneueh hántom na akhé."
13 Po teu Allah hántom na meufeureuman lagée nyoe ubak meusidroe pi malaikat Gobnyan, "Duek kheueh blaih uneuen Lôn, sampoe banmandum musoh-musoh gata Ulôn peutaklok keu gata."
14 Meunyoe meunan, malaikat-malaikat nyan peue nyang sibeuna jih? Awaknyan na roh-roh nyang layani Allah, dan nyang geuyue lé Allah keuteutulông ureuëng-ureuëng nyang teurimong seulamat.


Chapter 2

1 Nyang kheueh sabab jih geutanyoe harôh tamumat beukong that nibak ajaran-ajaran nyang ka tanyoe deungoe, mangat geutanyoe bék tatinggai ajaran nyan.
2 Peusan-peusan nyang geupeutrok lé dum na malaikat ubak indatu tanyoe teunyata beutôi, dan ureuëng nyang hana jiturot atawa hana jitaát teuma jiteurimong huköman nyang sisuai ngon buet jih nyan.
3 Peue teuk lom ngon keuseulamatan nyang leubeh hebat nibak peusan-peusan nyan! Meunyoe geutanyoe hana tapako nibak keuseulamatan nyan, geutanyoe ka teuntée hana teuma lheuh nibak huköman. Sabab Tuhan keudroe kheueh nyang phon-phon nyang peumaklum keuseulamatan nyan, dan ureuëng nyang phon-phon that deungoe ka jibri bukeuti keubeunaran nyan ubak geutanyoe.
4 Disampéng nyan, Allah ka geupeukong keubeunaran keusaksian ureuëng-ureuëng nyan deungon cara jipeuna mubagoe rupa buet-buet nyang ajaéb dan hai-hai nyang luwabiasa dan jibagi-bagi meuneubri-meuneubri nibak Roh Allah meunurot keuheundak jih keudroe.
5 Malaikat-malaikat hana meuteumé kuasa nibak Allah keu jipeurintah donya barô nyang teuma teuka, nyan kheueh donya nyang teungoh tapeugah nyoe.
6 Seubalek jih, bak saboh bagian nyang na lam Alkitab na teutuléh lagée nyoe, "Manusia nyan peue, ya Allah, sampoe Droeneueh neutem peuingat awaknyan? Manusia na kheueh manusia mantong, teuma Droeneueh neukalon awaknyan!
7 Lam watée nyang paneuk Droeneueh peujeuet awaknyan bacut leubeh miyueb nibak malaikat. Droeneueh bri ubak jihnyan pangkat nyang mulia dan teuhoreumat,
8 lagée teupeujeuet keu nyang mat kuasa ateueh peue mantong." Deungon lagée nyan, meunyoe teupeugah Allah geupeujeuet manusia "nyang mat kuasa ateueh peue mantong", nyan makna jih bahwa hana meusapeue pi nyang hana dimiyueb kuasa manusia. Bah pih meunan, geutanyoe hana takalon bak watée nyoe manusia jimat kuasa ateueh peue mantong.
9 Teuma geutanyoe ka takalon Isa meukuasa! Gobnyan geupeujeuet bacut leubeh miyueb nibak malaikat bak watée nyang paneuk, mangat ateueh keu gét até Po teu Allah Gobnyan hase maté keumandum umat manusia. Tanyoe takalon jinoe Gobnyan geubri keududukan nyang mulia dan teuhoreumat sabab Gobnyan ka meudeurita sampoe maté.
10 Keubiet ka sipatot jih Allah -- nyang cebta peue-peue mantong keu meukeusut Gobnyan keudroe -- teupeujeuet Isa nyang ba seulamat nyang sampoereuna meulalu deurita. Deungon lagée nyan Allah hase geupakat jai that ureuëng keu meusajan teupeuagong meusajan ngon Isa. Sabab Gobnyan kheueh nyang buka jalan keu awaknyan mangat jeuet teupeuseulamat.
11 Isa geupeu gleh manusia nibak desya-desya awaknyan; dan Gobnyan nyang peugleh, dan awaknyan nyang teupeugleh nyan, saban-saban na sidroe Bapak. Nyang kheueh sabab Isa hana malée geuaku awaknyan sibagoe syedara-syedara Gobnyan.
12 Isa geupeugah ubak Po teu Allah, "Ulôn teuma kubri ubak syedara-syedara Lôn keuhai Droeneueh. Ulôn teuma lôn pujoe Droeneueh nibak teumpat awaknyan meugumpôi."
13 Dan Isa geupeugah lom lagée nyoe, "Ulôn teuma Lôn keubah harapan Lôn ubak Allah." Dan Gobnyan geupeugah lom, "Nyoe kheueh Ulôn, meusajan ngon aneuëk-aneuëk nyang ka geubri lé Allah ubak Ulôn."
14 Lé sabab ureuëng-ureuëng nyang geupeugah aneuëk nyan, na kheueh makhlok manusia nyang hase maté, teuma Isa keudroe jeuet keu saban lagée awaknyan dan udeb lam keuadaan manusia. Gobnyan geupeubuet meunan, mangat deungon maté Geuhnyan hase geupeu hanco Iblih nyang kuasa ateueh maté.
15 Deungon cara nyan Gobnyan ka geupeubeubaih bubena ureuëng nyang sipanyang udeb jih ka jipeunamiet sabab jitakot ubak maté.
16 Deungon lagée nyan deuh kheueh takalon bahwa kon malaikat nyang geutulông, teuma keuturonan Nabi Ibrahim.
17 Nyoe meumakna bahwa Gobnyan harôh saban deungon syedara-syedara Gobnyan lam hai peue mantong. Dan deungon lagée nyan Gobnyan jeuet keu Imeum Agong nyang seutia dan na gaséh sayang. Deungon peulayan Geuh nyang lagée nyan desya manusia jeuet geupeu amphon.
18 Dan sabab Gobnyan keudroe ka lheueh geurasa meudeurita dan keunong cuba, Gobnyan hase geutulông ureuëng-ureuëng nyang keunong cubaan, sabab Gobnyan keudroe ka lheueh jicuba dan meudeurita.


Chapter 3

1 Syedara-syedara seusabe ureuëng Kristen nyang geutawök cit lé Po teu Allah! Cuba gata pike beu lhok-lhok keuhai Isa nyoe! Allah geukirém Gobnyan khusos beujeuet keu Imeum Agong lam agama nyang tanyoe anut.
2 Gobnyan seutia ubak Allah nyang ka geupiléh Gobnyan keubuet nyan, saban lagée Nabi Musa yoh masa ilée seutia geupeubuet tugaih geuh lam Baét Allah.
3 Teuma Isa patot meuteumé horeumat nyang leubeh rayeuk nibak Nabi Musa. Sabab ureuëng nyang peudong rumoh harôh meuteumé horeumat nyang leubeh rayeuk nibak rumoh nyan keudroe.
4 Beutôi tieb-tieb rumoh na nyang peudong, teuma nyang paeudong peue-peue mantong na kheueh Allah keudroe.
5 Nabi Musa seutia sibagoe peulayan lam Baét Allah dan geupeusampoe hai-hai nyang teuma geupeugah lé Allah bak watée nyang teuma teuka.
6 Teuma Almaseh seutia sibagoe Aneuëk nyang meutanggong jaweueb ateueh Baét Allah. Dan geutanyoe kheueh Baét Allah, meunyoe tanyoe teutab meuseumangat dan teutab yakén peue nyang tanyoe harab nyan.
7 Sabab nyan, lagée nyang geupeugah lé Roh Allah, "Meunyoe uroenyoe gata tadeungoe su Allah,
8 bék kheueh gata tapeukreuh ulée, lagée indatu gata, watée awaknyan jibeurontak ubak Po teu Allah, dan ji ujoe Allah lam padang pasi.
9 'Nibak teumpat nyan indatu gata ji cuba Ulôn, dan ji ujoe Ulôn,' kheun Allah, 'Padahai awaknyan ka jikalon buet Ulôn nyang peuet ploh thon treb jih.'
10 Nyang kheueh sabab jih Ulôn meureuka bak awaknyan dan Lôn peugah lagée nyoe, 'Awaknyan sabe hana seutia, dan beu-oe that jitaát peue-peue nyang Lôn peurintah.'
11 Ulôn beungéh dan meusumpah, 'Awaknyan hana teuma jitamong lam nanggroe nyan keujiteumé meureuhat meusajan ngon ulôn.' "
12 Syedara-syedara, até-até kheueh dan bék sampoe na lamkawan gata ureuëng nyang até jih jeuhet that dan hana meuiman, akhé jih jihnyan jigisa dan jipeujiôh Allah nyang udeb!
13 Ngon lagée nyan, mangat bék na meusidroe pi lamkawan gata nyang keunong tipée lé desya akhé jih jilawan Allah, bah kheueh gata saléng na tabri naseuhat tieb-tieb uroe simantong tanyoe na udeb lam jamén nyang teupeugah "Uroe Nyoe" lam Alkitab.
14 Tanyoe mandum na kheueh rakan saboh meujuang ngon Almaseh, asai geutanyoe trok bak akhé tamumat nyang kong ubak keuyakénan nyang tanyoe milék yoh awai kon.
15 Nyoe kheueh nyang teutuléh lam Alkitab, "Meunyoe nibak uroe nyoe gata teudeungoe su Allah, bék kheueh gata tapeukreuh ulée, lagée indatu gata, watée awaknyan jibeurontak ubak Po teu Allah."
16 Ngon lagée nyan, soe kheueh nyang jideungoe su Allah laju beurontak ubak Gobnyan? Nyan kheueh banmandum ureuëng nyang ka geupimpén lé Nabi Musa jiteubiet lam nanggroe Meusé, bukon?
17 Dan ateueh soe kheueh Allah beungéh peuet ploh thon treb jih? Ateueh awaknyan nyang meudesya, nyang reubah maté lam padang pasi, nyoe peue kon?
18 Watée Allah meusumpah lagée nyoe, "Awaknyan hana teuma jitamong lam nanggroe nyan keujiteumé meureuhat meusajan Ulôn" -- soe kheueh teuma nyang geumeukeusut lé Po teu Allah? Nyang geumeukeusut nyan na kheueh ureuëng-ureuëng nyang beurontak ubak Allah, nyoe peue kon?
19 Jinoenyoe tanyoe ka muphom bahwa awaknyan hana hase jitamong, sabab awaknyan hana meuiman ubak Po teu Allah.


Chapter 4

1 Deungon lagée nyan, janji Allah mantong na, dan keugeutanyoe teuma geubri meureuhat lagée nyang ka geupeu janji. Deungon nyan, gét that tanyoe tajaga mangat bék na meusidroe pih lamkawan gata nyang teunyata hana nyang jirasa meureuhat nyang ka geupeu janji lé Allah nyan.
2 Sabab Haba Gét nyan ka geubri keugeutanyoe saban cit lagée keu awaknyan. Teuma keu awaknyan, haba nyan hana meuguna. Sabab, watée awaknyan jideungoe, hana jipatéh.
3 Teuma, geutanyoe nyang meuiman nyoe tateurimong meureuhat nyang ka geupeu janji lé Po teu Allah nyan. Nyan sisuai ngon peue nyang ka geufeureuman lé Allah, lagée nyoe, "Ulôn beungéh dan meusumpah, 'Awaknyan hana jiteumeutamong keujimeureuhat meusajan Ulôn.' " Allah meufeureuman lagée nyan bah pi buet Gobnyan ka seuleusoe watée phon that geucebta donya nyoe.
4 Sabab keuhai uroe nyang keutujoh, na teutuléh lam Alkitab lagée nyoe, "Nibak uroe nyang keutujoh Po teu Allah geumeureuhat nibak mandum buet Gobnyan."
5 Keuhai nyan na lom teutuléh lagée nyoe, "Awaknyan hana teuma jitamong lam nanggroe nyan keu meuteumé meureuhat meusajan Ulôn."
6 Teuma awaknyan nyang phon-phon that jiteurimong Haba Gét nyan, hana jiteurimong meureuhat nyan sabab awaknyan hana meuiman. Meunyoe lagée nyan ka nyata bahwa na ureuëng-ureuëng nyang jeuet jiteurimong meureuhat nyan.
7 Sabab Allah ka geupeuteuntée saboh uroe nyang laén lom, nyang teupeugah "Uroe Nyoe". Meuthon-thon óh lheueh nyan Allah geumeututoe keuhai nyan meulalu Nabi Daud, lam ayat nyang ka lheueh teupeugah bunoe, "Meunyoe nibak uroenyoe gata tateurimong feureuman Allah, bék kheueh gata tapeukreuh ulée."
8 Meunyoe seukira jih Yosua ka geubri ureuëng-ureuëng nyang meureuhat nyang geupeu janji lé Allah, teuma Allah hana teuma meufeureuman le keuhai saboh uroe nyang laén.
9 Teuma, keu umat Allah mantong na janji keujimeureuhat lagée Allah meureuhat bak uroe nyan keutujoh nyan.
10 Sabab ureuëng nyang teurimong meureuhat nyang geupeu janji lé Allah ubak jihnyan, teuma jimeureuhat cit nibak banmandum buet jih nyan, saban lagée Po teu Allah.
11 Sabab nyan, jak kheueh tanyoe ta useuha beubiet-biet keutateurimong meureuhat lagée nyang geupeu janji lé Allah nyan. Bék sampoe meusidroe pi lamkawan tanyoe hana meuhase lagée awaknyan yoh masa ilée, sabab hana meuiman ubak Allah.
12 Feureuman Allah na kheueh feureuman nyang udeb dan teuga; leubeh tajam nibak peudeueng nyang meumata dua. Feureuman Geuhnyan jitamong tajam trob ubak bataih jiwa ngon roh; trok ubak atot-atot dan tuleueng sum-sum, sampoe geuteupeue si lhok-lhok jih pikeran dan niet até manusia.
13 Hana meusaboh makhlok nyang na teusöm nibak pandangan Allah. Peue-peue mantong teulon dan teuhah dikeue Gobnyan. Dan tanyoe harôh tabri tanggong jaweueb ubak Gobnyan.
14 Nyang kheueh sabab jih tanyoe beutamumat nyang kong ubak nyang ta aku nibak peue nyang ka ta iman. Sabab tanyoe na Imeum Agong nyang rayeuk, nyang ka geutamong trok ukeue Po teu Allah -- Gobnyan kheueh Isa Aneuëk Allah.
15 Imeum Agong tanyoe nyan kon kheueh imeum nyang hana geurasa meusajan ngon na nyang leumoh-leumoh nibak geutanyoe. Nyang sikeubiet jih, Gobnyan ka teu ujoe lam hai-hai peue mantong, saban lagée geutanyoe keudroe; teuma Gobnyan hana geupeubuet desya!
16 Sabab nyan, jak kheueh geutanyoe ngon biet-biet tajeuet tameuhadab ubak Po teu Allah nyang mat peurintah deungon jroh até. Allah teuma geugaséh geutanyoe dan geubri beureukat ubak geutanyoe mangat geutanyoe meuteumé sinulong paih óh trok bak watée jih.


Chapter 5

1 Tieb-tieb imeum agong teupiléh lamkawan umat, dan teuangkat keujilayani Allah sibagoe waki awaknyan. Tugaih jih na kheueh teupeuseumah ubak Po teu Allah meuneubri-meuneubri dan keureubeuen-keureubeuen keuteupeu amphon desya.
2 Imeum agong nyan keudroe leumoh lam sigala hai, dan ngon sabab nyan gobnyan jeuet geupeubuet leumoh leumbot keu ureuëng-ureuëng nyang hana jiteupeu dan keu ureuëng nyang sisat jalan jih.
3 Dan sabab gobnyan keudroe leumoh, nyang kheueh sabab jih gobnyan keudroe geupeu seumah keureubeuen, kon mantong lé sabab desya-desya umat, teuma meunan cit lé sabab desya-desya jih keudroe.
4 Hana meusidroe pi nyang jiangkat droe jih keudroe jeuet keu imeum agong. Ureuëng nyang jeuet keu imeum agong, meunyoe Po teu Allah nyang tawök jih nyan beujeuet keu imeum agong nyan -- saban lagée Nabi Harun.
5 Meunan cit deungon Almaseh. Gobnyan hana geuangkat droe Geuh keudroe jeuet keu Imeum Agong. Allah keudroe kheueh nyang angkat Gobnyan. Allah meufeureuman ubak Gobnyan, "Gata kheueh Aneuëk Ulôn; nibak uroenyoe Ulôn jeuet keu Bapak Gata."
6 Bak teumpat nyang laén Allah meufeureuman, "Gata na kheueh imeum siumu masa, lagée Imeum Melkisedek."
7 Bak watée Isa udeb lam donya nyoe, Gobnyan meudoá dan geumeulakée ngon su geudumpék sira geumo ubak Po teu Allah, nyang hase peuseulamat Gobnyan nibak maté. Dan sabab lé Gobnyan takzem ubak Allah ngon peunoh horeumat, ngon lagée nyan Gobnyan geudeungoe lé Po.
8 Isa na kheueh Aneuëk Allah, teuma bah pi meunan, Gobnyan geumeurunoe jeuet keu ureuëng nyang taát meulalu deurita Gobnyan.
9 Dan óh ka lheueh Gobnyan teupeujeuet keu nyang peuseulamat nyang sampoereuna, Gobnyan jeuet keu panghulée seulamat nyang keukai keu mandum manusia nyang taát ubak Gobnyan,
10 dan Allah pi geupeugah bahwa Gobnyan na kheueh Imeum Agong, saban lagée Imeum Melkisedek!
11 Keuhai keududukan Isa sibagoe Imeum Agong, jai that-that nyang peureulée kamoe britée ubak gata, teuma payah that keu kamoe peutrang sabab gata mulet that bak tamuphom.
12 Nyang sibeuna jih ka watée jih nibak gata jeuet keu gurée, rupari gata peureulée that beujai tameurunoe nibak ureuëng laén keuhai azas-azas nyang phon nibak ajaran Allah. Gata goh hase tateurimong peunajoh nyang kreueh; gata mantong tajieb susu kong.
13 Ureuëng mantong jieb susu, nyan makna jih mantong aneuëk manyak; jihnyan gohlom na peungalaman keuhai peue nyang beutôi dan peue nyang salah.
14 Peunajoh nyang kreueh na kheueh keu ureuëng rayeuk nyang lé sabab peungalaman, ka hase jipeubeda nyang toh nyang jroh dan toh nyang jeuhet.


Chapter 6

1 Sabab nyan, jak kheueh tabeuet laju ubak peungajaran-peungajaran nyang leubeh keuhai tuha lam udeb Kristen, dan bék mantong teukalon azas-azas nyang phon nibak ajaran agama tanyoe. Bék ta ulang lé ajaran dasai bahwa manusia meuseuti jipiôh nibak buet-buet nyang hana meuguna dan harôh meuiman ubak Allah,
2 atawa peulajaran dasai keuhai pumanö atawa keuhai teupeuduek jaroe ateueh gob, atawa keuhai udeb lom teuma óh ka lheueh maté atawa huköman nyang keukai.
3 Jak kheueh geutanyoe, meunyoe Allah geupeu idhin, tabeuet ubak peulajaran-peungajaran nyang leubeh mayang!
4 Sabab, ureuëng-ureuëng nyang ka meurutat, hana mungken teubimbéng lom teuma. Awaknyan yoh masa ilée kana lam trang nibak Po teu Allah, dan jirasa meuneubri Gobnyan. Meunan cit awaknyan ka jikuasa lé Roh Allah.
5 Awaknyan jiteupeu nibak peungalaman jih keudroe bahwa feureuman Allah nyan jroh that, dan awaknyan jirasa karonya-karonya nyang peunoh kuasa nibak jamén nyang teuma teuka.
6 Teuma óh lheueh nyan awaknyan meurutat! Panena mungken teubimbéng lom keujitobat lom teuma nibak desya-desya jih. Sabab awaknyan teungoh jisaleb lom Aneuëk Allah dan jipeujeuet Gobnyan jihina dikeue rakyat ba.
7 Tanoh nyang kayém jiphiéb ié ujeuen u ateueh jih, laju jipeuhase seunaman nyang meuguna keu ureuëng-ureuëng nyang keureuja, tanoh nyang lagée nyan geubri beureukat lé Po teu Allah.
8 Teuma meunyoe tanoh nyan jipeuhase naleueng lakoe dan timoh jih meuduro, tanoh nyang lagée nyan hana meuguna singoh teuma geukutôk lé Po teu Allah dan akhé jih teutot sampoe habéh.
9 Teuma Syedara-syedara lôn nyang teucinta, bah pih kamoe meupeugah meunan, kamoe yakén meunyoe keu gata. Kamoe yakén bahwa gata ka tateurimong hai-hai nyang leubeh jroh, na kheueh beureukat-beureukat nyang jeuet keubagian nibak keuseulamatan gata.
10 Po teu Allah kon kheueh Allah nyang hana ade. Gobnyan hana tuwoe ubak peue nyang gata peubuet keu Gobnyan, dan geunaséh nyang gata peuleumah ubak Gobnyan bak watée gata tulông syedara-syedara saboh iman, watée yoh ilée dan jinoenyoe.
11 Kamoe meuharab that mangat gata maséng-maséng sabe lam seumangat trok bak akhé, sampoe gata tateurimong peue nyang gata harab-harab that nyan.
12 Kamoe hana kamoe tem gata jeuet keu beu-o. Teuma kamoe meuharab gata taudeb lagée ureuëng nyang teurimong peue nyang geupeu janji lé Po teu Allah, sabab meuiman ubak Gobnyan dan sabab tapreh deungon saba.
13 Bak watée Allah meujanji ubak Nabi Ibrahim, Gobnyan meusumpah bahwa Gobnyan teuma geupeubuet peue nyang ka geupeu janji nyan. Dan sabab hana nyang leubeh manyang nibak Allah, teuma Gobnyan meusumpah ateueh nan Geuh keudroe.
14 Gobnyan geupeugah, "Ulôn meujanji teuma Lôn bri beureukat keugata dan lôn peujeuet keuturonan gata nyang le."
15 Nabi Ibrahim geupreh janji nyan ngon saba, teuma gobnyan laju geuteurimong peue nyang ka geupeu janji lé Allah ubak gobnyan nyan.
16 Meunyoe ureuëng meusumpah, jihnyan meusumpah ateueh nan ureuëng laén nyang leubeh manyang nibak jihnyan, ngon lagée nyan sumpah nyan jeuet keuseuneulheueh banmandum nyang teubantah.
17 Allah keuneuk geupeuteugaih bak ureuëng-ureuëng nyang teurimong janji Gobnyan, bahwa Gobnyan hana teuma geu ubah reuncana Geuh. Nyang kheueh sabab jih Gobnyan geutamah sumpah nibak janji Geuh nyan.
18 Dua boh hai nyan hana hase meu ubah: Allah hana mungken meusulet keuhai janji dan sumpah Gobnyan. Sabab nyan, geutanyoe nyang ka tameupayong nibak Allah, geubri durongan nyang teuga keutamumat nyang kong ubak harapan nyang teuleung luwah dikeue geutanyoe.
19 Harapan tanyoe nyan lagée saoh nyang teubeunom sampoe that lhok dan na kheueh teumpat tamumat nyang lumpah that kong dan aman lam udeb geutanyoe. Harapan nyang peureulong ubak gorden sinutôb Ruweueng Mahasuci nibak Baét Tuhan lam syeuruga.
20 Isa ka geurinteh jalan rot jak ubak teumpat nyan keu geutanyoe, dan ka geutamong keunan jeuet keu Imeum Agong geutanyoe siumu masa, lagée Imeum Melkisedek.


Chapter 7

1 Melkisedek na kheueh raja nibak Saleuem dan imeum Allah Nyang Mahamanyang. Watée Nabi Ibrahim geuwoe nibak mideuen prang geupeutaloe dum na raja-raja, Melkisedek laju geuteuka geujak sambot gobnyan sira geubri beureukat keu gobnyan.
2 Teuma Nabi Ibrahim laju geubri ubak Melkisedek siper siploh nibak peue-peue mantong nyang hase geureupah. (Nan Melkisedek makna jih, nyang phon-phon that, "Raja nyang ade"; dan sabab gobnyan raja nibak Saleuem, ngon lagée nyan nan gobnyan teupeugah teuma, "Raja Seujahteura".)
3 Keuhai Melkisedek nyoe gobnyan hana keuteurangan dipat mantong bahwa gobnyan na ayah atawa ma atawa indatu; meunan cit hana keuteurangan keuhai uroe lahé gobnyan, meunan cit keuhai gobnyan maté. Gobnyan saban lagée Aneuëk Allah; gobnyan na kheueh imeum nyang abadi.
4 Deungon lagée nyan, deuh takalon disinoe padub na rayeuk jih Melkisedek nyoe; gobnyan meunan rayeuk sampoe Nabi Ibrahim keudroe, bapak indatu bansa geutanyoe, geubri keu gobnyan siper siploh nibak peue-peue mantong nyang geuteumé nibak muprang nyan.
5 Lam huköm agama Yahudi ka teupeuteuntée bahwa imeum-imeum keuturonan Lewi meuseuti geukuteb siper siploh nibak hase hareukat umat Israel, na kheueh syedara-syedara awaknyan keudroe, bah kheueh awaknyan saban-saban keuturonan Nabi Ibrahim.
6 Melkisedek kon keuturonan Lewi, teuma gobnyan meuteumé cit siper siploh nibak peue nyang geureubot lé Nabi Ibrahim, dan geubri beureukat teuma ubak Nabi Ibrahim nyang sibeuna jih ka geuteurimong janji-janji nibak Po teu Allah.
7 Keubiet hana jeuet teubantah bahwa ureuëng nyang teubri beureukat leubeh miyueb nibak ureuëng nyang bri beureukat nyan.
8 Imeum-imeum nyang teurimong hase nyang teutageh siper siploh jeumba geuhnyan na kheueh ureuëng nyang hase maté. Teuma meunurot nyang na teutuléh lam Alkitab, Melkisedek nyang geuteurimong meuneubri siper siploh nyan na kheueh ureuëng nyang teutab udeb.
9 Jeuet teupeugah bahwa Lewi -- nyang keuturonan gobnyan geucok siper siploh jeumba nibak umat Israel -- geubayeue cit teuma jeumba nyan meulalu Nabi Ibrahim, bak watée Nabi Ibrahim geubayeue atra nyan ubak Melkisedek.
10 Bah pi Lewi gohlom lahé, teuma jeuet teupeugah gobnyan kana lam tuboh Nabi Ibrahim indatu gobnyan, bak watée Melkisedek meurumpok ngon Nabi Ibrahim.
11 Di miyueb pimpénan imeum-imeum Lewi, huköm agama Yahudi teubri keu umat Israel. Sabab imeum-imeum Lewi yoh masa ilée nyan hana hase geupeubuet ngon sampoereuna peue nyang meuseuti geupeubuet, ngon lagée nyan meuseuti beuna imeum nyang laén, na kheueh nyang saban lagée Imeum Melkisedek, dan kon nibak kawöm Imeum Nabi Harun lom teuma!
12 Deungon lagée nyan, meunyoe keududukan imeum-imeum nyan meu ubah, huköm agama Yahudi pi meu ubah teuma.
13 Nyang teumeukeusut disinoe na kheueh Tuhan geutanyoe: Gobnyan nibak sukée laén, dan hantom na meusidroe pih lamkawan sukée Gobnyan nyang jeuet sibagoe imeum.
14 Banmandum ureuëng jiteupeu bahwa Tuhan geutanyoe asai geuh nibak sukée Yehuda; dan Nabi Musa hantom na geurebot sukée nyan bak watée gobnyan geumeututoe keuhai imeum-imeum.
15 Hai nyang teupeugah nyoe jeuet keuleubeh jeulaih lom, deungon teuka jih sidroe imeum laén nyang saban lagée Melkisedek.
16 Gobnyan teuangkat jeuet keu imeum, kon ngon dasai jih lé peuratoran-peuratoran manusia, teuma ngon dasai jih nibak udeb gobnyan nyang meukuasa dan nyang hana keuneulheueh jih.
17 Sabab lam Alkitab na teutuléh lagée nyoe, "Droeneueh na kheueh imeum siumu masa, saban lagée imeum Melkisedek."
18 Teuma, jinoenyoe peuratoran nyang awai ka teukeubah bak binéh, sabab hana kong dan hana meufaedah.
19 Huköm agama Yahudi hana hase jipeuna sapeue-sapeue pih nyang sampoereuna. Nyang kheueh sabab jih geutanyoe jinoenyoe geubri saboh harapan nyang paleng gét; deungon atra nyan tanyoe hase tapeurab ubak Po teu Allah.
20 Lom teuma, banmandum nyan na meusajan ngon sumpah nibak Po teu Allah. Gohlom na sumpah nyang lagée nyan bak watée imeum-imeum nyang laén teu baiát.
21 Teuma Isa teubaiát jeuet keu imeum teupeu sumpah, bak watée Allah meufeureuman ubak Gobnyan lagée nyoe, "Tuhan ka meusumpah, dan Gobnyan hana geu ubah keuputosan Geuh, 'Droeneueh na kheueh imeum siumu masa.' " 22 Deungon nyoe teuma Isa jeuet keujaminan keusaboh meujanji nyang leubeh gét.
23 Na lom saboh teuk hai: imeum-imeum nyang laén nyan jai that, sabab awaknyan maséng-maséng maté akhé jih hana hase jipeusampoe jabatan jih.
24 Teuma Isa udeb siumu masa, deungon lagée nyan jabatan Gobnyan sibagoe imeum hana teupinah bak ureuëng laén.
25 Deungon sabab keu siumu masa Isa hase geupeu seulamat ureuëng-ureuëng nyang jijak ubak Po teu Allah meulalu Gobnyan, sabab Gobnyan udeb siumu masa keu teupeutrok meulakée Gobnyan ubak Po teu Allah keu ureuëng-ureuëng nyan.
26 Deungon nyan, Isa nyan kheueh Imeum Agong nyang tanyoe peureulée. Gobnyan suci; nibak Gobnyan hana meuteuma nyang salah atawa desya peue mantong. Gobnyan teupeujiôh nibak ureuëng-ureuëng nyang meudesya, dan teupeu ék trok ubak teumpat nyang leubeh manyang nibak banmandum langét.
27 Gobnyan hana saban lagée imeum-imeum agong nyang laén, nyang tieb-tieb uroe meuseuti jipeuseumah keureubeuen sabab desya-desya jih keudroe yoh masa ilée, barô kheueh lé sabab desya-desya umat. Isa geupeu seumah keureubeuen teuma cit sigoe sagai keu siumu masa, watée Gobnyan geupeu seumah droe Geuh keudroe sibagoe keureubeuen. 28 Huköm agama Yahudi teu angkat ureuëng nyang hana sampoereuna jeuet keu imeum agong. Teuma dudoe nibak huköm nyan, Allah geupeugét janji deungon sumpah bahwa Gobnyan geu baiát sibagoe Imeum Agong, Aneuëk nyang ka geupeupeujeuet Peuseulamat nyang sampoereuna keu siumu masa.


Chapter 8

1 Ulée haba nibak mandum tutoe nyoe na kheueh: Tanyoe na Imeum Agong nyang lagée nyan, nyang geuduek geumat peurintah meusajan ngon Po teu Allah nyang Maharayeuk lam syeuruga.
2 Gobnyan geupeubuet tugaih sibagoe Imeum Agong lam Ruweueng Mahasuci, na kheueh lam Khimah Tuhan nyang seujati, nyang geupeudong lé Tuhan keudroe, kon lé manusia.
3 Tieb-tieb imeum agong teubaiát keu teupeuseumah keureubeuen atawa keureubeuen keu Po teu Allah. Meunan kheueh teuma ngon Imeum Agong geutanyoe; Gobnyan meuseuti na sapeue-sapeue keuteupeu seumah.
4 Seukira jih Gobnyan na ateueh rhueng donya nyoe, Gobnyan hana teuma jeuet keu imeum, sabab kana imeum nyang peuseumah keureubeuen nyang teupeuteuntée lam huköm agama Yahudi.
5 Buet nyang awaknyan peubuet sibagoe imeum nyan nyang sibeuna jih na kheueh sibagoe gamba atawa bubayang lagée toh nyang na lam syeuruga. Hai nyan ka lheueh geupeugah lé Nabi Musa bak watée geukeuneuk peudong Khimah Tuhan. Allah meufeureuman lagée nyoe ubak Nabi Musa, "Ingat! Banmandum nyan meuseuti gata peubuet meunurot cara nyang ka teutunyok ubak gata di ateueh gunong."
6 Teuma jinoenyoe Isa meuteumé tugaih imeum nyang jiôh leubeh mulia nibak nyang geupeubuet lé imeum-imeum nyan. Sabab janji nyang geupeuna lé Allah ngon manusia, na kheueh janji nyang leubeh jroh sabab meudasai nibak janji keu hai-hai nyang leubeh gét.
7 Seukira jih hana nyang kureueng nibak peujanji nyang phon, deungon lagée nyan hana peureulée teupeuna janji nyang keudua.
8 Teuma Allah ka geuteumé nyang salah ateueh umat Geuh, sampoe Allah meufeureuman, "Ingat, teuma teuka watée jih, Ulôn teuma Lôn peugét peujanjian nyang barô ngon bansa Israel, dan ngon bansa Yehuda.
9 Kon lagée peujanjian nyang ka Lôn peugét ngon indatu awaknyan bak watée Ulôn kawai awaknyan Lôn peuteubiet nibak nanggroe Meusé. Awaknyan hana seutia ubak peujanjian nyang Ulôn peugét ngon awaknyan; nyang kheueh sabab jih hana Lôn pakoe keu awaknyan.
10 Teuma jinoenyoe, nyoe peujanjian nyang Ulôn peugét ngon umat Israel nibak uroe-uroe nyang teuma teuka, feureuman Tuhan: Ulôn teuma kukeubah huköm Lôn lam pikeran awaknyan, dan Lôn tuléh bak até awaknyan. Ulôn teuma jeuet keu Allah awaknyan, dan awaknyan teuma jeuet keu umat Lôn.
11 Awaknyan hana peureulée jipurunoe seusabe kawöm droe, atawa jipeugah ubak syedara jih, 'Turi kheueh ubak Tuhan.' Sabab awaknyan mandum, cut rayeuk, teuma jituri Ulôn.
12 Ulôn teuma kupeu amphon bubena nyang salah nibak awaknyan, dan hana Lôn ingat lé desya-desya awaknyan."
13 Deungon geupeugah saboh peujanjian nyang barô, Allah geupeugét peujanjian nyang phon nyan jeuet keu tuha dan useueng; dan peue nyang ka tuha, teuma reujang gadôh.


Chapter 9

1 Peujanjian nyang phon na peuratoran-peuratoran iébadat, dan na teuma teumpat iébadat nyang jipeugét lé manusia.
2 Saboh khimah teupeudong nyang nibak bagian keu jih teuboh nan Ruweueng Suci. Nibak teumpat nyan na standar teumpat panyöt, dan na cit meuja ngon ruti nyang teupeuseumah ubak Po teu Allah.
3 Nibak bagian dalam, dilikot gorden nyang keudua, na ruweueng nyang teuboh nan Ruweueng Mahasuci.
4 Lam ruweueng nyan na miseubah nyang teupeugét nibak méuh keu teumpat tot dupa, dan na cit Peutoe Peujanjian nyang bansaboh nyan teuseupoh ngon méuh. Lam Peutoe nyan na beulangöng méuh nyang meuasoe manna, tungkat Nabi Harun nyang ka jitimoh tunéh, dan dua boh leumpeung batée tuléh nyang nibak bagian ateueh jih teutuléh siploh boh peurintah Allah.
5 Di ateueh Peutoe nyan na teuma teukeubah dua Kerub, na kheueh makhlok meusayeub sibagoe lambang Allah geuteuka. Sayeueb nibak bandua makhlok nyan meureuntang ateueh sinutôb Peutoe, na kheueh teumpat peu amphon desya. Teuma banmandum nyan hana hase teupeutrang jinoenyoe seucara saboh-saboh.
6 Meunan kheueh banmandum teuatoe. Tieb-tieb uroe imeum-imeum geutamong nibak bagian keu khimah nyan keugeujak peubuet tugaih awaknyan.
7 Nyang tamong ubak bagian nyang paleng lhok khimah nyan na kheueh imeum agong mantong. Gobnyan geupeubuet lagée nyan sigoe lam sithon. Hai nyan geupeubuet sira geuba darah keugeupeuseumah ubak Po teu Allah sabab droe geuh keudroe dan sabab lé desya-desya nyang jipeubuet ngon hana sadar lé umat Gobnyan.
8 Deungon atoran nyan, Roh Allah geutunyok deungon nyata, bahwa simantong khimah bagian keu nyan mantong na teudong, rot tamong u dalam Ruweueng Mahasuci nyan gohlom teubuka.
9 Nyoe sibagoe lambang jamén jinoenyoe; nyan meumakna bahwa peue-peue nyang ka teupeuseumah dan keureubeuen-keureubeuen beulatang nyang teupeuseumah ubak Allah, hana hase teupeusampoereuna até nurani ureuëng nyang ba peuseumahan.
10 Sabab banmandum upacara nyan na hubongan ngon peunajoh, ié meuneujiéb, dan meubagoe rupa upacara peusuci. Banmandum nyan na kheueh peuratoran-peuratoran lahé nyang meulaku meuguna sampoe ubak watée Allah geupeu barô lom teuma.
11 Teuma Almaseh ka teuka sibagoe Imeum Agong nibak hai-hai nyang gét nyang ka lheueh na. Khimah Tuhan bak teumpat Gobnyan geumubuet sibagoe Imeum Agong na kheueh Khimah nyang leubeh agong dan leubeh sampoereuna. Atra nyan hana jipeugét lé manusia; meukeusut jih, kon asai lam donya nyang geucebta nyoe.
12 Almaseh geutamong lam Ruweueng Mahasuci nyang na lam Khimah nyan teuma cit sigoe sagai keu siumu masa. Bak watée nyan Gobnyan hana geuba darah kaméng agam atawa darah aneuëk leumô keugeupeuseumah; nyang geuba na kheueh darah Geuh keudroe, dan deungon nyan Gobnyan ka geupeubeubaih geutanyoe siumu masa.
13 Darah nibak kaméng dan leumô agam meunan cit abée nibak keureubeuen aneuëk leumô, geupeu guna keuteureutek ateueh ureuëng-ureuëng nyang kutoe meunurot atoran agama mangat awaknyan jeuet keu gleh. Ngon lagée nyan, meunyoe darah dan abée nyan jeuet jipeugleh najih nibak ureuëng-ureuëng nyan,
14 peuteuk lom darah Almaseh! Meulalu Roh nyang keukai, Almaseh geupeu seumah droe Geuh keudroe ubak Po teu Allah sibagoe keureubeuen nyang sampoereuna. Darah Gobnyan teupeugleh até nurani geutanyoe nibak upacara agama nyang hana meuguna, mangat geutanyoe hase tapeutimang Allah nyang udeb.
15 Nyang kheueh sabab jih Almaseh jeuet keu nyang ba ubak peujanjian nyang barô, mangat ureuëng nyang ka geutawök lé Allah jeuet jiteurimong beureukat-beureukat abadi nyang ka geupeujanji lé Allah. Banmandum nyan hase teujadi sabab kana nyang maté, nyan kheueh Almaseh; dan deungon maté Geuh nyan hase teupeubeubaih manusia nibak buet-buet nyang salah nyang ka awaknyan peubuet bak watée peujanjian nyang phon mantong meulaku.
16 Meunyoe na surat warésan, meuseuti teuma beuna bukeuti jih bahwa ureuëng nyang peugét surat nyan ka meuninggai donya.
17 Sabab surat warésan hana meuguna simantong ureuëng nyang peugét surat nyan mantong udeb. Surat nyan jeuet teupeuguna meunyoe nyang peugét surat nyan ka maté.
18 Sabab nyan peujanjian nyang phon pih meuseuti teupeu aséng ngon darah.
19 Phon-phon that Nabi Musa geupeusampoe banmandum peurintah huköm Allah ubak bansa Israel. Óh lheueh nyan Nabi Musa laju geucok darah aneuëk leumô dan darah kaméng agam, laju geujampu ngon ié, óh lheueh geureutek laju ateueh Kitab Huköm-huköm nibak Allah dan ateueh banmandum bansa Israel deungon geupeu guna naleueng hisop dan bulée bubiri nyang wareuna mirah tuha.
20 Sira geupeugah nyan Nabi Musa geupeugah lagée nyoe, "Nyoe kheueh darah nyang teupeusah peujanjian nibak Allah nyang meuseuti gata taát."
21 Óh lheueh nyan ngon cara nyang saban, Nabi Musa geuseutek teuma darah nyan ateueh Khimah Tuhan dan ateueh mandum alat-alat nyang teupeuguna watée iébadat. 22 Keubiet meunurot huköm agama Yahudi, rab banmandum peue-peue mantong teupeusuci ngon darah; dan desya barô kheueh hase teupeu amphon meunyoe na darah nyang ro.
23 Deungon cara lagée nyan kheueh barang-barang nyang meulambang hai-hai nyang di syeuruga, peureulée teupeusuci. Teuma keu hai-hai nyang di syeuruga nyan keudroe teupeureulée keureubeuen nyang jiôh leubeh gét.
24 Sabab Almaseh hana geutamong lam Ruweueng Suci nyang jipeugét lé manusia, nyang na kheueh meulambang Ruweueng Suci nyang sibeuna jih. Almaseh geutamong lam syeuruga keudroe; lam syeuruga nyan Gobnyan meuhadab Allah deumi keugeutanyoe dumna.
25 Imeum agong Yahudi tieb-tieb thon jitamong lam Ruweueng Mahasuci nyang na lam Baét Tuhan deungon teuba darah saboh beulatang. Teuma Almaseh hana geutamong keugeujak peuseumah droe Geuh meu ulang-ulang.
26 Sabab meunyoe lagée nyan, nyan saban cit Gobnyan ka kayém that meudeurita yoh phon donya nyoe teucebta. Teuma nyata jih, jinoenyoe nibak jamén akhé nyoe, Gobnyan teuka sigoe sagai keugeujak sampôh desya deungon cara geukeureubeuen droe Geuh keudroe.
27 Po teu Allah ka geupeu teutab bahwa manusia maté sigoe sagai óh lheueh nyan barô kheueh geupeu sidang lé Allah. 28 Meunan cit deungon Almaseh sigoe sagai teupeuseumah sibagoe keureubeuen keuteusampôh desya ureuëng ramé. Gobnyan teuma teuka lom bak watée nyang keudua goe, kon geujak peuseuleusoe soai desya, teuma keugeujak peuseulamat ureuëng-ureuëng nyang teungoh jipreh-preh Gobnyan teuka.


Chapter 10

1 Huköm agama Yahudi teukalon ngon hana nyata keu hai-hai nyang jroh nyang teuma teuka, dan kon gamba nyang sibeuna jih nibak hai-hai nyan. Hana mungken huköm nyan hase teupeusampoereuna ureuëng nyang teuka jak seumah Allah deungon jiba peuseumahan, bah pih tieb-tieb thon hana putôh jiba keureubeuen-keureubeuen nyang saban.
2 Seukira jih beutôi ureuëng-ureuëng nyang seumah Allah nyan biet-biet ka teupeu gleh nibak desya, awaknyan hana lé nibak jih peurasaan meudesya, dan keureubeuen hana jipeuseumah lé.
3 Teuma teunyata keureubeuen-keureubeuen nyang jipeuseumah tieb-tieb thon nyan sibagoe peuingat keu manusia keuhai desya-desya jih,
4 sabab keubiet darah leumô dan darah kaméng agam hana hase teusampôh desya.
5 Nyang kheueh sabab jih watée Almaseh geutamong lam donya, Gobnyan geupeugah ubak Po teu Allah, "Droeneueh hana peureulée keureubeuen dan nyang teupeuseumah; nyang sikeubiet jih Droeneueh ka neukeubah tuboh keu Ulôn.
6 Droeneueh hana peureulée keu keureubeuen nyang teutot atawa keureubeuen keu teupeu amphon desya.
7 Laju Ulôn peugah, 'Nyoe kheueh Ulôn, ya Allah! Ulôn teuka keuneuk jak peubuet keuheundak Droeneueh, lagée nyang na teutuléh keuhai droe Ulôn lam Alkitab.' "
8 Phon-phon that Almaseh geupeugah, "Droeneueh hana peureulée keureubeuen dan nyang teupeuseumah; Droeneueh hana peureulée keu keureubeuen beulatang nyang teutot sibagoe peuseumahan dan teuma keureubeuen peu amphon desya." Almaseh geupeugah lagée nyan, bah pih banmandum keureubeuen nyan teupeuseumah meunurot huköm agama Yahudi.
9 Óh lheueh nyan Almaseh geupeugah, "Nyoe kheueh Ulôn, ya Allah! Ulôn teuka keuneuk jak peubuet keuheundak Droeneueh." Ngon lagée nyan Allah geusampôh mandum keureubeuen nyang ka treb nyan, dan geugantoe ngon keureubeuen Almaseh.
10 Isa Almaseh ka geupeubuet peue nyang geukeuheundak lé Po teu Allah dan geupeu seumah droe Geuh sibagoe keureubeuen. Deungon peuseumahan nyan, nyang geupeubuet sigoe sagai keu siumu masa, geutanyoe mandum geupeu gleh nibak banmandum desya.
11 Tieb-tieb imeum Yahudi jipeubuet buet jih sibagoe imeum tieb-tieb uroe, dan meu ulang-ulang gobnyan peuseumah keureubeuen-keureubeuen nyang saban. Teuma keureubeuen-keureubeuen nyan sagai-sagai hana hase teusampôh desya.
12 Nyang sikeubiet jih, Almaseh geupeu seumah saboh keureubeuen keu teupeu amphon desya, dan keureubeuen nyan teutab jeuet keu siumu masa. Óh ka lheueh geupeu seumah keureubeuen nyan, Almaseh geuduek blaih uneuen Allah dan geumat peurintah meusajan-sajan ngon Gobnyan.
13 Dan jinoenyoe Almaseh geupreh sampoe Allah geupeu taklok banmandum musoh-musoh Geuh nyan ubak Gobnyan.
14 Teuma, deungon saboh keureubeuen, Almaseh geupeu sampoereuna ureuëng-ureuëng nyang ka teupeu gleh nibak desya.
15 Keuhai nyan Roh Allah pi na geumeusaksi keugeutanyoe. Roh Allah geupeugah,
16 " 'Nyoe kheueh peujanjian nyang teuma Ulôn peugét ngon awaknyan bak uroe-uroe nyang teuma teuka,' feureuman Tuhan, 'Ulôn teuma kukeubah huköm-huköm Lôn lam até awaknyan dan Lôn tuléh lam pikeran awaknyan.' "
17 Allah meufeureuman lom, "Ulôn teuma Lôn peutuwoe keuhai desya-desya dan buet-buet nyang jeuhet awaknyan."
18 Deungon lagée nyan, desya-desya dan buet-buet nyang jeuhet nyan ka geupeu amphon, ngon lagée nyan hana peureulée lé teupeuseumah keureubeuen peu amphon desya.
19 Hei Syedara-syedara, deungon maté Isa nyan geutanyoe jinoenyoe ka tajeuet ta tamong lam Ruweueng Mahasuci.
20 Isa ka geupeuhah saboh rot nyang barô keugeutanyoe, na kheueh rot nyang teubri udeb. Rot nyan meulalu gorden, nyan kheueh tuboh Isa keudroe.
21 Dan jinoenyoe keugeutanyoe na sidroe Imeum Agong, nyang meutanggong jaweueb ateueh Baét Allah. 22 Lé sabab nyan, jak kheueh geutanyoe tapeurab ubak Allah ngon até nyang jujoe dan iman nyang kong; ngon até nyang ka teupeu gleh nibak peurasaan meusalah, dan deungon tuboh nyang ka teupeu gleh ngon ié nyang jeureunéh.
23 Bah kheueh tanyoe tamumat nyang kong ubak harapan nyang tanyoe angkée, sabab Allah jeuet teupatéh dan Gobnyan geupeutupat janji.
24 Dan bah kheueh geutanyoe saléng tameungieng, mangat tanyoe hase saléng tabri durongan mangat tateumé peubuet gaséh sabe keudroe-droe dan tapeubuet hai-hai nyang gét.
25 Bah kheueh geutanyoe teutab tameusapat meusajan-sajan, dan bék kheueh lalée lagée ureuëng laén. Geutanyoe beuleubeh seutia dan saléng tapeukong, sabab tanyoe tateupeue bahwa hana treb lé Tuhan teuma teuka.
26 Sabab meunyoe haba nyang beutôi nibak Allah ka trok ubak geutanyoe, teuma geutanyoe teutab tapeubuet desya ngon tasaja, ngon lagée nyan ka hana lé keureubeuen keuteusampôh desya geutanyoe.
27 Cit saboh nyang na bak tanyoe dan atra nyan na kheueh tameuhadab ubak peungadelan Allah dan apui beungéh Gobnyan nyang teuma teutot habéh ureuëng-ureuëng nyang lawan Gobnyan! 28 Ureuëng nyang hana taát ubak huköm nyang geubri lé Nabi Musa, teuhuköm maté hana amphon, meunyoe ateueh meusaksi dua atawa lhée droe ureuëng, jihnyan na bukeuti salah.
29 Padub na geuhon huköm jih ateueh ureuëng nyang gilo-gilo Aneuëk Allah. Ureuëng nyan jianggab hina darah peujanjian Allah, na kheueh keuhai maté Almaseh nyang teupeu gleh jih nyan nibak desya. Jihnyan ka jihina Roh nyang bri rakhmat.
30 Tanyoe tateupeue soe nyang sibeuna jih nyang meututoe, "Ulôn teuma kubalah! Ulôn teuma kuhuköm!" dan nyang peugah, "Tuhan teuma geupeu hakém umat Gobnyan."
31 Lumpah that phet meunyoe rhot lam jaroe Allah Nyang Udeb!
32 Ingat kheueh pakriban keuadaan Syedara-syedara bak watée yoh masa ilée. Bak watée nyan, óh ka lheueh cahya Allah geupeue trang ateueh gata, gata jai that meudeurita; teuma gata teutab meujuang ngon biet-biet hana putôh asa.
33 Na teuma gata jihina dan jipeusaneuet ateueh gata ngon cara hana gét dikeue ureuëng ramé. Dan na teuma watée jih gata meudeurita meusajan ngon awaknyan nyang jipeusaneuet lagée nyan,
34 dan gata meusajan tarasa ngon ureuëng nyang seudeh lam peunjara. Dan bak watée nyang na nibak gata jireupah, gata teurimong nyan ngon mangat até, sabab gata tateupeue bahwa gata mantong na sapeue-sapeue nyang leubeh gét, nyang teuma meuteun siumu masa.
35 Lé sabab nyan, bék kheueh putôh asa, sabab meunyoe gata teutab meuiman, na upah nyang paleng rayeuk keuhai nyan!
36 Gata peureulée that beusaba, mangat gata hase tapeubuet keuheundak Allah dan deungon lagée nyan tateurimong peue nyang ka geupeu janji.
37 Sabab lam Alkitab na teutuléh lagée nyoe, "Teuma sikeujab teuk, Gobnyan teuma teuka atra nyan, dan teuma reujang teuka; Gobnyan hana meutanggoh-tanggoh keuhai teuka Geuh.
38 Dan umat Lôn nyang beuna teuma jipatéh dan udeb; teuma meunyoe lamkawan awaknyan na nyang surot, Ulôn hana galak keu jih nyan."
39 Geutanyoe nyoe kon umat nyang surot dan sisat. Nyang keubiet jih, geutanyoe na kheueh umat nyang meuiman ubak Allah dan nyang geupeu seulamat.


Chapter 11

1 Meuiman nyan makna jih keubiet yakén ngon biet-biet keu hai-hai nyang teuharab nyan, na keupastian keu hai-hai nyang hana deuh teukalon.
2 Sabab meuiman, teuma lé ureuëng-ureuëng jamén ilée geuharôk lé Po teu Allah.
3 Sabab meuiman, geutanyoe teuma muphom bahwa álam nyoe geucebta lé feureuman Allah; teuma, peue nyang hase teukalon, nyan na nibak peue nyang hana hase teukalon.
4 Sabab meuiman, lé Habel jipeuseumah ubak Po teu Allah keureubeuen nyang leubeh gét nibak keureubeuen Kain. Sabab lé iman jih nyan, Habel geuteurimong lé Allah sibagoe ureuëng nyang gét, sabab deuh that bahwa Allah geuteurimong peuseumahan jih. Habel ka meuninggai donya, teuma sabab lé iman jih nyan, teuma jih nyan mantong meututoe trok bak watée nyoe.
5 Sabab meuiman, Henokh hana maté, lom teuma teubeuôt dan teuba ubak Allah. Hana meusidroe pi nyang hase meurumpok ngon jih nyan, sabab Henokh nyan ka geubeuôt lé Po teu Allah. Lam Alkitab na teutuléh bahwa sigohlom Henokh teubeuôt, gobnyan jipeugalak até Allah.
6 Meunyoe tan iman, hana meusidroe pih nyang hase jipeugalak até Allah. Sabab ureuëng nyang teuka ubak Po teu Allah meuseuti jimeuiman ubak Allah bahwa Gobnyan na, dan bahwa Allah geubri balasan ubak ureuëng nyang mita Gobnyan.
7 Sabab meuiman, nyang kheueh sabab Nabi Nuh geubri tée lé Po teu Allah keu hai-hai nyang teujadi singoh dudoe, nyang hana hase jikalon lé droe jih keudroe. Nabi Nuh taát ubak Allah akhé jih gobnyan geupeugét saboh kapai nyang óh dudoe jeuet keunyata bahwa lé kapai nyan jipeuseulamat droe geuh dan keuluwarga gobnyan. Deungon lagée nyan donya teuhuköm, seudang Nabi Nuh keudroe sabab lé iman gobnyan geupeugah lé Allah sibagoe ureuëng nyang gét.
8 Sabab meuiman, nyang kheueh sabab Nabi Ibrahim geutaát ubak Allah bak watée Allah geutawök gobnyan dan geuyue jak gobnyan u nanggroe nyang ka Allah peujanji nyan. Laju Nabi Ibrahim geujak deungon hana geutuho ho gobnyan teuma geujak.
9 Deungon meuiman, Nabi Ibrahim tinggai lagée ureuëng aséng nibak nanggroe nyang ka geupeu janji lé Allah keu geuh nyan. Nabi Ibrahim tinggai nibak teumpat nyan lam khimah. Meunan cit teuma Nabi Ishaq ngon Nabi Yakub, nyang teurimong janji nyang saban nibak Po teu Allah.
10 Sabab Nabi Ibrahim teungoh geupreh-preh banda nyang ka geureuncana dan geupeudong deungon keunaleueng nyang kong.
11 Sabab meuiman, Nabi Ibrahim hase meuteumé keuturonan nibak Sara, bah pih Nabi Ibrahim ka tuha lumpah na, dan Sara keudroe mandul. Nabi Ibrahim yakén that bahwa Allah teutab geupeutupat janji Geuh.
12 Bah pi Nabi Ibrahim bak watée nyan lagée ureuëng nyang ka maté tuboh geuh, teuma gobnyan meuteumé keuturonan nyang jai, nyang lé jih hana teuhingga -- lagée nyan jai jih bintang di langét dan anoe di panté.
13 Banmandum ureuëng nyan teutab meuiman trok án maté. Awaknyan hana jiteurimong hai-hai nyang geupeu janji lé Po teu Allah, teuma jikalon dan jisambot nibak jiôh. Dan deungon nyan awaknyan jipeugah bahwa awaknyan na kheueh ureuëng aséng dan ureuëng meuranto nibak bumoe nyoe.
14 Ureuëng nyang peugah lagée nyan deuh teukalon ngon nyata bahwa awaknyan teungoh jimita nanggroe nyang singoh jeuet keu tanoh ié awaknyan.
15 Kon nanggroe nyang ka awaknyan tinggai nyan nyang awaknyan pike. Sabab meunyoe lagée nyan, teuma ka jai that keuseumpatan nibak awaknyan keujigisa u nanggroe nyan.
16 Teuma nyan deuh jih, awaknyan jimeucen that keu saboh nanggroe nyang leubeh gét, na kheueh nanggroe nyang na lam syeuruga. Nyang kheueh sabab jih Allah hana malée meunyoe awaknyan jipeugah Gobnyan Allah awaknyan, sabab Allah ka geukeubah saboh banda keu awaknyan.
17 Sabab meuiman cit teuma, Nabi Ibrahim geupeu seumah Nabi Ishaq sibagoe keureubeuen watée gobnyan geucuba lé Po teu Allah. Ubak nabi Ibrahim kheueh Allah geubri janji Geuh, teuma lé Nabi Ibrahim rila geujok aneuëk gobnyan nyang tunggai nyan.
18 Po teu Allah ka lheueh meufeureuman ubak Nabi Ibrahim, "Meulalu Nabi Ishaq nyoe kheueh gata teuma meuteumé keuturonan nyang ka Lôn meujanji ubak gata."
19 Nabi Ibrahim yakén that bahwa Gobnyan hase geupeu udeb lom Nabi Ishaq nibak maté -- teuma, jeuet teupeugah, Nabi Ibrahim ka geuteurimong lom Nabi Ishaq nibak maté.
20 Sabab meuiman, teuma Nabi Ishaq geumeujanji beureukat-beureukat ubak Nabi Yakub dan Esau keu masa ukeue.
21 Sabab meuiman kheueh, teuma sigohlom Nabi Yakub meuninggai, gobnyan laju geupeutron beureukat jih ubak aneuëk-aneuëk Nabi Yusuf -- deungon meusadeue ubak ulée tungkat jihnyan dan taseumah Allah. 22 Sabab meuiman, Nabi Yusuf -- watée karab meuninggai donya -- geumeututoe keuhai jiteubiet umat Israel di nanggroe Meusé, dan geutinggai amanat keuhai peue nyang meuseuti jipeubuet ateueh manyét geuh nyan.
23 Sabab meuiman, ureuëng tuha Nabi Musa geusöm gobnyan na lhée buleuen treb jih óh ka lheueh gobnyan lahé. Awaknyan jikalon bahwa gobnyan sidroe aneuëk nyang ceudah, dan awaknyan hana teumakot geulawan peurintah raja.
24 Sabab meuiman, Nabi Musa óh ka rayeuk, hana geutem jipeugah aneuëk nibak putroe Meusé.
25 Gobnyan leubeh galak udeb meudeurita meusajan-sajan ngon umat Po teu Allah nibak udeb mangat nyang sikeujab teuma peunoh lam desya.
26 Nabi Musa meurasa bahwa jiôh leubeh muyuem keunong hina deumi Raja Peuseulamat nyang geupeu janji lé Allah nyan nibak meuteumé mubagoe atra lam nanggroe Meusé, sabab Nabi Musa meuharab upah watée uroe dudoe.
27 Sabab meuiman, Nabi Musa geutinggai nanggroe Meusé ngon hana geurasa takot geubeungéh lé raja. Nabi Musa geumaju ubak tujuan gobnyan siulah-ulah gobnyan ka geungieng Po teu Allah nyang hana deuh teukalon nyan. 28 Sabab meuiman, Nabi Musa geupeugét Paskah dan geupeutron peurintah mangat jisipreuk darah nibak tieb-tieb pintoe rumoh ureuëng Israel mangat jeuet Malaikat Mawöt bék geupoh maté aneuëk tuha awaknyan.
29 Sabab meuiman, teuma ureuëng-ureuëng Israel hase jijeumeurang laôt Mirah, siulah-ulah awaknyan hase jijak ateueh tanoh nyang tho, dan di ureuëng-ureuëng Meusé habéh jiuét lé laôt nyan, watée awaknyan jicuba jijeumeurang cit teuma.
30 Sabab meuiman, ureuëng-ureuëng Israel hase jipeujeuet bintéh-bintéh beuton di Yerikho reuloh óh lheueh jikeulileng lé awaknyan tujoh uroe.
31 Sabab meuiman cit teuma, Rahab, inong lunte nyan, hana rhoh meusajan teupoh maté lamkawan ureuëng-ureuëng nyang lawan Allah, sabab inong nyan jiteurimong ngon mangat até ureuëng-ureuëng Israel nyang teungoh muluem.
32 Syedara, ulôn jeuet mantong hana putôh-putôh lôn peugah haba, teuma watée nyang hana seb nibak ulôn. Sabab ulôn gohlom lôn peugah Gideon, Barak, Simson, Yefta, Nabi Daud, Samuel, dan nabi-nabi.
33 Sabab meuiman, teuma awaknyan ka jipeutalo bubena keurajeuen. Awaknyan jipeubuet peue nyang beutôi, akhé jih jiteurimong peue nyang ka geupeu janji lé Allah. Awaknyan jisumpai bubena babah singa,
34 jipeulon apui nyang teungoh hu meuhúb-húb, teupeusi nibak mata peudeueng nyang tajam. Awaknyan leumoh, akhé jih jeuet keu teuga; awaknyan campen lam mideuen prang akhé jih hase jipeutalo bubena pasokan bansa aséng.
35 Sabab meuiman, teuma lé ureuëng-ureuëng inong meuteumé lom ngon ureuëng-ureuëng jih nyang ka maté. Na teuma nyang rila teuseksa sampoe maté, dan jitem watée teupeubeubaih, sabab jitem udeb lom teuma nibak saboh udeb nyang leubeh gét.
36 Na nyang keunong hina, keunong seunuét, ji-ikat ngon ranté dan jipeutamong lam glab.
37 Awaknyan jirhom ngon batée sampoe maté, na nyang jikoh ngon gogajo, dan nyang jireupang ngon peudeueng. Awaknyan jimeurawöh ngon peukayan nibak kulét bubiri atawa kulét kaméng; awaknyan gasien, ji-iénanya dan keunong ázeb.
38 Donya nyoe kon teumpat nyang jroh nibak awaknyan. Awaknyan jimeurawöh lam padang pasi dan lam bukét-bukét, lom tinggai lam guha-guha dan lam ruhueng tanoh.
39 Keubiet rayeuk that meunang nyang jiteurimong lé mandum ureuëng nyan. Sabab iman awaknyan keudroe! Teuma awaknyan hana jiteurimong peue nyang geupeu janji lé Allah,
40 sabab Allah na reuncana nyang leubeh gét keu geutanyoe. Reuncana Gobnyan na kheueh bahwa meusajan ngon geutanyoe, awaknyan jeuet keu ureuëng nyang sampoereuna.


Chapter 12

1 Syedara, keuhai geutanyoe keudroe, ban sikeulileng tanyoe na dan jai lumpah na saksi! Sabab nyan, jak kheueh geutanyoe tatiek banmandum nyang jipeubrat tanyoe dan desya nyang sabe meuleukek nibak geutanyoe. Dan jak kheueh geutanyoe deungon biet-biet tatiyeub deungon biet-biet that meutunang plueng nyang na dikeue geutanyoe.
2 Bah kheueh mata tanyoe tatuju ubak Isa, sabab Gobnyan kheueh nyang peubeudôh iman geutanyoe dan nyang peulara phon awai trok án akhé. Isa ék geupeuteun deurita bak kayée saleb! Gobnyan hana geupakoe bahwa maté bak kayée saleb nyan na kheueh buet nyang paleng malée. Nyang geuingat na kheueh keugeumbiraan nyang geuteurimong watée nyang teuma teuka. Jinoenyoe Gobnyan geuduek blaih uneuen takhta Allah dan geumat peurintah meusajan-sajan ngon Gobnyan.
3 Cuba kheueh pike pakriban ázeb jih Isa watée geuhadab ureuëng-ureuëng nyang meudesya nyang lawan Gobnyan hana ngon peusa! Sabab nyan bék kheueh cut até dan putôh asa.
4 Sabab lam meujuang droeneueh talawan desya, gata gohlom na meujuang sampoe roe darah.
5 Dan bék kheueh tatuwoe naseuhat Allah nyoe, nyang geubri ubak gata sibagoe aneuëk-aneuëk Gobnyan: "Aneuëk Lôn, simak kheueh beugét-gét ajaran Tuhan, dan bék kheueh cut até meunyoe Gobnyan beungéh keu gata.
6 Sabab Tuhan geuseupôt tieb-tieb ureuëng nyang geugaséh, dan Gobnyan geusunuét tieb-tieb ureuëng nyang geu angkée sibagoe aneuëk Geuh."
7 Gata teun kheueh meunyoe geusunuét lé Allah sibagoe seupôt lé sidroe bapak. Sabab, peu kheueh na sidroe aneuëk nyang hántom keunong huköm lé ayah jih?
8 Meunyoe gata hana meusajan teuhuköm lagée banmandum aneuëk geuh nyang laén nyoe saban cit gata kon aneuëk sah, teuma aneuëk nyang hana sah.
9 Geutanyoe na bapak lam donya. Gobnyan geupurunoe tanyoe, dan tanyoe horeumat bak gobnyan. Ngon lagée nyan, peu kheueh u ateueh Bapak rohani tanyoe nyang na lam syeuruga, ka teuntée geutanyoe leubeh tatukui lom ubak Gobnyan mangat tanyoe udeb.
10 Ureuëng syiek geutanyoe nyang na lam donya geupurunoe bak geutanyoe deungon watée nyang teubataih, meunurot peue nyang geurasa gét. Teuma Allah geupurunoe tanyoe na kheueh guna keu gét tanyoe keudroe, mangat tanyoe hase jeuet keusuci meusajan-sajan ngon Gobnyan.
11 Beutôi bak watée tanyoe geupurunoe, huköman nyan biet hana mangat até tanyoe, nyang na peudeh jih. Teuma óh lheueh nibak nyan, keugeutanyoe nyang ka geupurunoe, huköman nyan jeuet keusabab geutanyoe udeb meunurot keuheundak Po teu Allah, dan teupeuhase peurasaan seujahteura ateueh geutanyoe.
12 Sabab nyan, peukong kheueh jaroe gata nyang leumoh dan teuôt gata nyang meugok-gok nyan!
13 Gata jak kheueh sabe ateueh rot nyang sare, mangat gaki gata nyang capiek nyan hana meusalah, teuma jeuet keu puléh.
14 Useuha kheueh keu udeb rukon ngon mandum ureuëng. Meunan cit useuha kheueh teuma keu udeb suci, khusos keu Tuhan. Sabab hana meusidroe pi nyang hase jikalon Tuhan meunyoe jihnyan hana udeb lagée nyan.
15 Jaga kheueh bék na sampoe meusidroe pi nyang teubiet nibak lingkongan ngon nibak jroh até Allah, mangat bék sampoe na lagée seunaman nyang meuracon lamkawan gata akhé jih jipeuteuka bala dan jipeurusak ureuëng ramé ngon racon nyan.
16 Jaga kheueh mangat bék na nyang udeb cabui atawa hana jihareuga nyang hai-hai rohani, lagée jipeubuet lé Esau. Jipeubloe hak jih sibagoe aneuëk tuha, teuma keu saboh pingan bu.
17 Gata tateupeue bahwa óh dudoe Esau meuheuét jikeuneuk meuteumé beureukat nyan nibak bapak jih, teuma jihnyan geutulak. Sabab bah kheueh ngon jimoe ba-e jihnyan jimita rot keu jipeugét buet jih nyang salah nyan, ruweueng keuhai nyan ka hana lé.
18 Syedara-syedara hana tajak tahadab sapeue-sapeue lagée nyang jipeukeue lé bansa Israel yoh masa ilée. Awaknyan jipeukeue sapeue-sapeue nyang jeuet jigeue, na kheueh Gunong Sinai deungon apui nyang teungoh hu; awaknyan jipeukeue nyang seupôt, glab dan angén badée;
19 awaknyan jipeukeue ubak su beureuguih, dan meubagoe su nyang meutaga. Bak watée ureuëng-ureuëng Israel jideungoe su nyan, awaknyan jilakée ngon meuharab that mangat su nyan hana jimarit lé keu awaknyan.
20 Sabab awaknyan hana ék jiteun watée jideungoe peurintah nyang jipeugah lé su nyan. Sabab su nyan jipeugah, "Banmandum nyang keunong nibak gunong nyoe, hana keucuali peu kheueh jih nyan beulatang atawa soe mantong, harôh teu rhom ngon batée sampoe maté."
21 Peue nyang jikalon lé ureuëng-ureuëng Israel nyan meunan hebat sampoe Nabi Musa geupeugah, "Ulôn teumakot ngon yo!" 22 Nyang biet jih, gata ka tateuka ubak Bukét Sion dan banda Allah nyang udeb, na kheueh Yerusalem nyang na lam syeuruga deungon meuribée-ribée malaikat jih.
23 Gata tapeuna saboh meurokpakat nyang meuriah -- meurok pakat keu aneuëk-aneuëk tuha Po teu Allah, nyang nan-nan jih na teudafeutar lam syeuruga. Gata tateuka meuhadab Allah, Hakém banmandum umat manusia. Gata meuhadab ngon roh-roh ureuëng jroh-jroh, nyang ka geupeujeuet sampoereuna.
24 Gata tateuka meuhadab Isa, peurantara keu peujanjian nyang barô nyan; gata tameuhadab ubak darah nyang teureutek nyang teujamin keu hai-hai nyang jiôh leubeh gét nibak nyang jijamin lé darah Habel.
25 Sabab nyan, beu até-até kheueh, bék sampoe gata hana tatem deungoe Gobnyan nyang meututoe nyan. Ureuëng nyang hana jitem deungoe Gobnyan nyang teuka u bumoe dan geupeusampoe feureuman nibak Allah, ureuëng nyan hana hase jipeuplueng droe. Peuteuk lom tanyoe nyang tadeungoe Gobnyan meututoe lam syeuruga! Meunyoe tanyoe hana tatem deungoe nyan, panena mungken geutanyoe hase teuhinda!
26 Bak watée nyan su Geuhnyan meuhayak bumoe. Teuma jinoenyoe Gobnyan meujanji, "Sigoe teuk, Ulôn teuma Lôn peugeumpa kon mantong bumoe meunan cit langét."
27 Kheun "sigoe teuk" sibagoe teutunyok bahwa bansigom donya nyang ka geucebta teuma geuyok-yok dan geuböih ho laén, mangat jeuet nyang tinggai na kheueh nyang hana hase meuhayak. 28 Sabab nyan, bah kheueh geutanyoe talakée teurimong gaséh ubak Po teu Allah, sabab tanyoe tateurimong nibak Gobnyan saboh keurajeuen nyang hana hase meuhayak. Bah kheueh tanyoe talakée teurimong gaséh dan tameu iébadat ubak Allah deungon horeumat dan teumakot, meunurot cara nyang geulakée lé Gobnyan keudroe.
29 Sabab Allah geutanyoe lagée apui nyang jipeuhangôh peue nyang na.


Chapter 13

1 Bah kheueh gata saléng tameugaséh sidroe ngon nyang laén sibagoe ureuëng-ureuëng Kristen nyang meusyedara.
2 Bék seugan-seugan gata teurimong lam rumoh gata ureuëng-ureuëng nyang gohlom gata meuturi. Sabab, deungon na gata peubuet nyang lagée nyan, ka lheueh na ureuëng, ngon hana sadar, ka jiteurimong malaikat lam rumoh jih.
3 Ingat kheueh ureuëng-ureuëng nyang na lam glab, siulah-ulah gata pi na meusajan awaknyan. Dan ureuëng-ureuëng nyang keunong iélanya lé gob, bah kheueh gata ingat keu awaknyan siulah-ulah gata pih jipeusaneut lagée nyan cit teuma.
4 Banmandum ureuëng harôh jitunyok sikeub horeumat ubak leumbaga meukawen, nyang kheueh sabab jih lakoe binoe beuseutia sidroe ngon nyang laén. Ureuëng nyang cabui dan ureuëng nyang meumukah teuma geupeue sidang lé Po teu Allah.
5 Bék kheueh udeb gata jikuasa lé cinta keu péng, teuma bah kheueh gata pueh ngon peue nyang na nibak gata. Sabab Allah ka geumeufeureuman, "Ulôn hana Lôn peubiyeu atawa Lôn tinggai gata."
6 Lé sabab nyan tanyoe tajeuet peugah, "Tuhan na kheueh nyang tulông lôn, ulôn hana teumakot. Peue nyang hase jipeubuet manusia ateueh ulôn?"
7 Bék kheueh tuwoe ubak peumimpén-peumimpén gata nyang peusampoe peusan Allah keu gata. Ngieng kheueh pakriban awaknyan udeb dan pakriban teuma awaknyan maté, dan cuntoh kheueh iman awaknyan.
8 Isa Almaseh teutab saban, bah kheueh yoh masa ilée, jinoe, dan trok siumu masa.
9 Bék kheueh peubiyeu mubagoe rupa ajaran nyang kon-kon jipeusisat gata. Até geutanyoe bah kheueh Allah nyang jroh nyang peukong, nyan kheueh nyang gét; bék lé mubagoe atoran keuhai peunajoh. Ureuëng yoh masa ilée jitaát ubak atoran-atoran nyan hana meuteumé sapeue.
10 Tanyoe na saboh miseubah keu teumpat tapeuseumah keureubeuen keu Po teu Allah. Dan imeum-imeum nyang meulayani bak Khimah Tuhan, hana hak jimakheun keureubeuen nyang na ateueh miseubah.
11 Darah beulatang nyang teupeuseumah sibagoe keureubeuen keu teupeu amphon desya, geuba lé imeum agong ubak Ruweueng Mahasuci, teuma bangke beulatang nyan keudroe jitot diluwa khimah-khimah.
12 Nyang kheueh sabab jih Isa maté diluwa pintoe geureubang banda keu teupeu gleh umat Gobnyan nibak desya ngon darah Geuh keudroe.
13 Sabab nyan, jak kheueh tajak ubak Gobnyan diluwa khimah-khimah dan meusajan jihina ngon Gobnyan.
14 Sabab dibumoe hana teumpat tinggai nyang keukai keugeutanyoe; tanyoe tamita teumpat tinggai keu nyang teuma teuka.
15 Sabab nyan, ngon peurantaraan Isa, bah kheueh geutanyoe sabe tapujoe-pujoe Allah; nyang lagée nyan na kheueh sibagoe keureubeuen syukoe geutanyoe keu Gobnyan, nyang tanyoe peuseumah rot bibi tanyoe keu tapeumulia nan Gobnyan.
16 Bék tuwoe tapeubuet nyang jroh dan saléng tateumulông, sabab nyoe kheueh keureubeuen-keureubeuen nyang teupeu mangat até Allah.
17 Seutôt kheueh peurintah peumimpén-peumimpén gata, dan tundok kheueh ubak awaknyan. Sabab awaknyan sabe geukalon jiwa gata, dan awaknyan harôh meutanggong jaweueb ubak Allah. Meunyoe gata taát ubak awaknyan, awaknyan hase jimubuet ngon mangat até; meunyoe hán, teuma awaknyan jimubuet ngon seudeh até, dan nyang lagée nyan biet hana laba nibak gata.
18 Bék putôh-putôh meudoá keukamoe. Kamoe yakén até nurani kamoe murni, sabab lam hai peue mantong kamoe meutem mubuet peue mantong nyang beutôi.
19 Khusos jih ulôn meulakée ngon meuharab that, mangat gata meudoá keu ulôn mangat Allah ngon bagaih-bagaih geuba ulôn nyoe ubak gata.
20 Allah ka geupeu udeb Tuhan geutanyoe Isa nibak maté. Sabab maté Geuh nyan Gobnyan jinoenyoe Geumbala Agong keu geutanyoe, nyan kheueh bubiri-bubiri Gobnyan. Lé maté Geuh nyan cit teuma teupeusah peujanjian keukai nyang ka geupeugét lé Allah ngon geutanyoe.
21 Seumoga Allah pangkai seujahteura nyan geupeue leungkab gata ngon peue-peue mantong nyang jroh nyang gata peureulée keu gata peubuet keuheundak Gobnyan. Seumoga, deungon peurantaraan Isa Almaseh, Allah geumubuet lam droe geutanyoe, peue nyang geukeuheundaki. Bah kheueh Almaseh jipujoe keu siumu masa! Amin. 22 Ulôn meuharab mangat gata tasimak naseuhat-naseuhat lôn nyoe ngon saba, sabab surat ulôn nyoe hana padub na panyang.
23 Bah kheueh gata tateupeue bahwa rakan geutanyoe Timotius ka teupeubeubaih nibak peunjara. Meunyoe jih nyan ka jijak ubak teumpat lôn nyoe, ulôn teuma kuba bak watée ulôn jak saweue gata singoh.
24 Peutrok kheueh saleuem kamoe ubak mandum peumimpén droeneueh dan ateueh umat Allah. Dan teurimong cit teuma saleuem nibak syedara-syedara nyang na di Italia.
25 Seumoga Tuhan geubri beureukat ateueh Syedara banmandum.