Yakobus

1 2 3 4 5


Chapter 1

1 Syedara-syedara umat Allah banmandum nyang na meusipreuk bansigom donya! Saleuem nibak ulôn, Yakobus, hamba Allah dan hamba Tuhan Isa Almaseh.
2 Syedara-syedara! Meunyoe gata jiteuka meubagoe macam cubaan, keubah kheueh lam até gata bahwa nyan na kheueh laba keu gata.
3 Sabab gata tateupeue, meunyoe gata teutab meuiman ubak Tuhan bak watée teuka cubaan nyan ateueh gata, akibat jih na kheueh: gata jeuet keu ureuëng nyang tabah.
4 Jaga kheueh mangat tabah até gata nyan meukeumang sabe sampoe gata biet-biet sampoereuna dan hana kureueng lam hai peue mantong.
5 Meunyoe na sidroe lamkawan gata nyang hana bijaksana, bah kheueh jihnyan jilakée ubak Allah, ngon lagée nyan Allah teuma geubri keubijaksanaan nyan bak jih; sabab keu tieb-tieb ureuëng, Allah geubri ngon murah até dan ngon peurasaan gaséh sayang.
6 Teuma ureuëng nyang meulakée, harôh meuiman; ureuëng nyan hana jeuet waih-waih. Sabab ureuëng nyang waih-waih na kheueh lagée geulumbang lam laôt nyang jipôt lé angén keudeh keunoe.
7 Ureuëng nyang lagée nyan hana teutab pikeran jih; sapeue hana hase jicok keuputosan lam hai peue mantong nyang jipeubuet lé ureuëng lagée nyan. Sabab nyan, bék jimeuharab sapeue nibak Tuhan.
9 Ureuëng Kristen nyang gasien bah kheueh meurasa mangat até meunyoe Po teu Allah geupeu manyang jih nyan.
10 Dan ureuëng Kristen nyang kaya pih bah kheueh meurasa mangat até teuma, meunyoe Po teu Allah geupeumiyueb jih nyan. Sabab ureuëng kaya teuma gadôh lagée bungöng naleueng.
11 Bak watée mata uroe jiteubiet ngon cahya jih nyang seu-uem, ngon lagée nyan naleueng nyan laju layée dan lurôh kheueh bungöng jih dan gadôh kheueh ceudah nibak bungöng nyan. Meunan kheueh teuma ngon ureuëng kaya; jih nyan teuma hanco bak watée jihnyan teungoh jipeujak useuha jih.
12 Mubahgia kheueh ureuëng nyang tabah watée ateueh jih keunong cubaan. Sabab óh ka lheueh jihnyan meuhase lam cubaan nyan, ureuëng nyan teuma jiteurimong upah jih, nyan kheueh udeb nyang ka geupeu janji lé Po teu Allah keu ureuëng-ureuëng nyang gaséh ubak Allah.
13 Meunyoe sidroe-droe ureuëng teupeudaya ngon cubaan nyang lagée nyan, bék kheueh jipeugah, "Godaan nyoe teuka nibak Allah," sabab Allah hana hase teupeudaya lé nyang jeuhet, dan hana teuma geupeu daya soe-soe mantong.
14 Teuma ureuëng teupeudaya meunyoe jihnyan teutarek dan meunafeusu ngon keuheundak jih keudroe nyang jeuhet.
15 Óh lheueh nyan, meunyoe keuheundak jih keudroe jipeuseutôt, ngon lagée nyan lahé kheueh desya; dan meunyoe desya ka masak ateueh ureuëng nyan, akibat jih na kheueh maté.
16 Bék kheueh gata keunong peungét, Syedara-syedara lôn nyang lôn gaséh!
17 Tieb-tieb meuneubri nyang jroh dan hadiah nyang sampoereuna atra nyan teuka nibak syeuruga, nyang geupeutron lé Po teu Allah, nyang cebta mandum nyang trang di langét. Gobnyan kheueh Allah nyang hana meu-ubah, dan hana teuma jeuet keuseupôt lé peue mantong.
18 Ateueh keuheundak Geuh keudroe Gobnyan geupeujeuet tanyoe keu aneuëk-aneuëk Gobnyan meulalu feureuman Geuh nyang beuna. Gobnyan geupeubuet lagée nyan mangat geutanyoe meuteumé teumpat nyang paleng phon nibak mandum makhlok cebtaan Gobnyan.
19 Ngieng kheueh nyoe beugét-gét, Syedara-syedara lon nyang lôn gaséh! Tieb-tieb ureuëng meuseuti bubagaih lam jideungoe, teuma mulet jimeututoe dan mulet teuma jiteuka beungéh.
20 Ureuëng nyang beungéh hana hase jipeubuet nyang gét, nyang peumangat até Po teu Allah.
21 Sabab nyan, böih kheueh bubena nyang kutoe atawa nyang jeuhet. Teurimong kheueh ngon até nyang miyueb tieb-tieb feureuman nyang geupula lé Allah lam até gata, sabab feureuman Geuh nyan na teunaga nyang ba gata ubak seulamat. 22 Bah kheueh gata peubuet peue nyang geupeugah lé Allah, bék gata deungoe mantong, sampoe deungon lagée nyan ka gata tipée droe teuh keudroe.
23 Ureuëng nyang deungoe feureuman Allah, teuma hana jipeubuet na kheueh lagée ureuëng nyang teungoh jikalon muka jih keudroe nyang sibeuna jih dikeue ceureumen.
24 Óh ka lheueh jikalon gét-gét, laju jijak dan tuwoe pakriban ruman jih nyan.
25 Huköm Allah sampoereuna dan na teunaga keu teupeu meurdehka manusia. Dan ureuëng nyang seulidek dan jikalon gét-gét lom jipeubuet huköm-huköm nyan, dan kon jideungoe mantong óh lheueh nyan laju tuwoe, ureuëng nyan teuma geubri beureukat lé Allah lam hai peue mantong nyang jipeubuet.
26 Meunyoe na sidroe ureuëng nyang meurasa droe jih ureuëng nyang taát meuagama, teuma ureuëng nyan hana jijaga lidah jih, ngon lagée nyan ureuëng nyanka jitipée droe jih keudroe; iébadat ureuëng nyan hana meuguna.
27 Keuhai taát meuagama nyang gleh dan seujati meunurot bak mata Allah Bapak na kheueh: tatem tulông aneuëk yatem ngon aneuëk muntui dan inong-inong balée nyang udeb meudeurita, dan jijaga droe jih keudroe mangat bék jipeurusak lé donya nyoe.


Chapter 2

1 Syedara-syedara! Sibagoe ureuëng nyang meuiman ubak Tuhan Isa Almaseh, Tuhan Nyang Mahamulia, bék kheueh gata peubeda-beda manusia ngon dasai hai-hai nyang lahé.
2 Sabab meunyoe na sidroe ureuëng kaya nyang jingui euncien méuh meunan cit peukayan nyang ceudah watée jijak bak teumpat khanuri gata, nibak teumpat nyan teuka teuma sidroe ureuëng gasien jingui peukayan nyang beukah-beukah,
3 teuma gata leubeh tahoreumat keu ureuëng nyang jingui peukayan ceudah nyan. Laju gata peugah lagée nyoe bak ureuëng nyan, "Inoe neuduek Teungku bak keurusi nyang diet nyoe." Teuma bak ureuëng nyang gasien nyan gata peugah, "Dong mantong disideh," atawa, "Kah duek ateueh aleue nyoe."
4 Deungon gata peubuet lagée nyan, gata ka gata peubeda seusabe gata dan gata ponten ureuëng ngon dasai bak pikeran nyang jeuhet.
5 Ingat kheueh, Syedara-syedara nyang lôn gaséh! Ureuëng nyang gasien lam donya nyoe, geupiléh lé Allah jeuet keu ureuëng nyang kaya lam iman. Ureuëng-ureuëng nyan jeuet keu anggota umat Allah lagée nyang geupeu janji lé Allah ubak ureuëng nyang geugaséh.
6 Teuma gata tahina ureuëng gasien, padahai ureuëng-ureuëng kaya kheueh nyang teugon gata dan nyang tarek gata bak kantô mahkamah!
7 Awaknyan kheueh nyang hina nan teuhoreumat nyang gata teurimong nibak Allah!
8 Gata tapeubuet nyang beutôi, meunyoe gata ta amai huköm Keurajeuen nyang na lam Alkitab nyoe, "Cinta kheueh seusabe gata keudroe-droe lagée gata cinta keudroe gata sidroe."
9 Teuma meunyoe gata tapeubeda-beda manusia nyang dasai jih nibak hai-hai nyang lahé, gata ka tapeubuet desya, dan huköm Allah geupeugah bahwa gata ureuëng nyang langga huköm.
10 Ureuëng nyang langga saboh lam huköm-huköm Allah, nyan saban cit ka jilangga banmandum huköm nyan.
11 Sabab nyang peugah, "Bék meumukah," gobnyan kheueh nyang peugah, "Bék poh maté." Teuma, meunyoe gata hana meumukah, teuma gata peumaté gob, ngon lagée nyan gata na kheueh nyang langga huköm.
12 Meututoe kheueh dan mubuet kheueh lagée ureuëng nyang teuma teupeusidang meunurot huköm Allah nyang peumeurdehka manusia.
13 Sabab Allah hana geubri gaséh sayang ubak ureuëng nyang hana jituri gaséh sayang. Teuma gaséh sayang leubeh teuga nibak huköman!
14 Syedara-syedara! Keupeue guna jih manusia jipeugah, "Ulôn ureuëng nyang meuiman", meunyoe jihnyan hana jipeuleumah ngon buet nyang nyata? Peu kheueh hase iman nyang lagée nyan jipeuseulamat jih?
15 Seukira jih sidroe agam atawa sidroe inong peureulée peukayan dan hana seb peunajoh nyang jimakheun keu jimakheun tieb-tieb uroe.
16 Keupeue guna jih gata peugah bak jihnyan, "Seulamat neungui peukayan nyang seu-uem dan seulamat makheun!" -- meunyoe gata hana tabri keu jih nyan peue nyang peureulée keu udeb?
17 Meunan cit teuma ngon iman, meunyoe hana teupeuleumah ngon buet, iman nyan hana meuguna.
18 Mungken na nyang peugah, "Na ureuëng nyang meusadeue bak iman jih dan na teuma nyang meusadeue bak buet jih." Ulôn teuma kujaweueb, "Tunyok kheueh bak ulôn pakriban ureuëng hase jiteumé iman meunyoe hana ngon buet dan ulôn teuma kutunyok ngon buet bahwa ulôn na iman."
19 Gata tapatéh bahwa Allah na kheueh sidroe, kon? Ngon lagée nyan, roh-roh jeuhet pi jipatéh dan awaknyan yo sabab teumakot!
20 Gata bangai lumpah na! Peu kheueh peureulée teubri bukeuti keu gata bahwa hana guna na iman meunyoe hana ngon buet?
21 Ngieng kheueh Nabi Ibrahim indatu tanyoe. Gobnyan geuteurimong jroh that lé Po teu Allah sabab lé buet gobnyan, watée gobnyan geupeu seumah Nabi Ishaq, aneuëk gobnyan, keu Po teu Allah di ateueh miseubah. 22 Inoe deuh takalon bahwa iman harôh ngon buet mangat meusampoereuna.
23 Nyan paih that lagée nyang teutuléh lam ayat Alkitab nyoe, "Nabi Ibrahim meuiman ubak Allah, dan sabab lé iman geuh nyan Allah geuteurimong gobnyan sibagoe ureuëng nyang peubuet keuheundak Allah." Nyang kheueh sabab jih Nabi Ibrahim teupeugah, "Sahabat Allah".
24 Nyata kheueh jinoenyoe, bahwa manusia geuteurimong ngon gét lé Po teu Allah sabab peue nyang jipeubuet lé manusia nyan, dan kon mantong lé iman jih.
25 Ngieng kheueh teuma ubak Rahab, inong lunte nyan. Jih nyan geuteurimong nyang jroh lé Po teu Allah sabab buet jih, na kheueh watée inong nyan jiteurimong lam rumoh jih tukang-tukang meuluem bansa Israel dan jitulông awaknyan jipeuplueng droe meulalu rot laén.
26 Nyan, lagée toh tuboh nyang hana roh na kheueh tuboh nyang maté, meunan cit teuma iman hana mubuet na kheueh iman nyang maté.


Chapter 3

1 Syedara-syedara! Bék kheueh meuron-ron lamkawan gata keuneuk jeuet keu gurée. Gata tateupeue bahwa geutanyoe nyang jeuet keu gurée teuma geupeu sidang nyang leubeh brat nibak ureuëng laén.
2 Tanyoe kayém that tapeubuet salah. Teuma ureuëng nyang hántom jipeubuet salah ngon tutoe haba jih, nyan kheueh ureuëng nyang sampoereuna, nyang hase jikuasa bansaboh tuboh jih.
3 Meunyoe tanyoe tapeubeukab keukang bak babah guda mangat guda nyan jitem seutôt peue nyang tapeugah, ngon lagée nyan tanyoe hase takuasa bansaboh tuboh guda nyan.
4 Cok teuma kapai sibagoe cuntoh. Bah pih kapai nyan saboh beunda nyang meunan rayeuk dan jiba lé angén nyang tajam, teuma kapai nyan hase jikeundali lé keumudo nyang ubit, meunurot keuheundak nyang mat keumudo.
5 Meunan cit ngon lidah tanyoe; bah pi lidah tanyoe nyan ubit, teuma lidah nyan hase jipeusombong droe ngon hai-hai nyang rayeuk-rayeuk. Cuba gata bayang padub na rayeuk jih gle teuma hase tutong ngon apui nyang ubit!
6 Lidah saban lagée apui. Lam tuboh tanyoe, lidah nyan pangkai nyang jeuhet nyang jimeu-éue bansaboh tuboh tanyoe. Ngon apui nyang asai lam nuraka, jihnyan hase jipeuhangoh bansaboh tuboh tanyoe.
7 Mubagoe rupa beulatang juah, cicém, beulatang nyang meu éue dan eungkot hase teupeu seuiet, dan ka teuma ji peuseuit lé manusia.
8 Teuma lidah manusia hana hase jipeuseu iet lé soe mantong. Lidah nyan jeuhet dan hana hase takuasa; peunoh ngon racon nyang jiba maté.
9 Tanyoe tapeuguna keu tapeugah teurimong gaséh ubak Tuhan Bapak tanyoe, teuma lidah nyan cit nyang seurapa sabe geutanyoe manusia, nyang ka geucebta meunurot ruman Allah.
10 Nibak babah nyang saban jiteubiet tutoe haba teurimong gaséh dan meunan cit tutoe haba teukutok. Nyang sibeuna jih kon lagée nyan!
11 Peu kheueh na mata ié nyang jipeuteubiet ié tabeue ngon ié phet nibak mata ié nyang sa?
12 Bak ara, Syedara-syedara lôn, hana jeuet jipeuhase boh zaiton, dan bak anggô hana jeuet jipeuhase boh ara. Meunan cit mata ié nyang masen hana jeuet jipeuhase ié nyang tabeue.
13 Meunyoe lamkawan gata na nyang bijaksana atawa meubudoe basa, bah kheueh jihnyan jitunyok lam udeb jih nyang jroh dan ngon jipeubuet hai-hai nyang jroh teuma, nyang meusajan ngon até nyang miyueb dan keubijaksanaan.
14 Teuma meunyoe gata ceumuru, sakét até, dan tapeumanyang droe teuh keudroe, bék kheueh tapeubangga keubijaksanaan nyan, sabab deungon nyan gata kataputa balek haba nyang beutôi nyang teuka nibak Po teu Allah.
15 Keubijaksanaan nyang lagée nyan kon asai jih lam syeuruga. Atranyan asai jih lam donya nyoe, nibak nafeusu manusia, dan nibak jén!
16 Dipat na sifeuet ceumuru dan jipeupeunteng droe jih keudroe, nibak teumpat nyan teuma na karu ka-ak ka ok dan meubagoe rupa buet nyang jeuhet.
17 Teuma ureuëng nyang na keubijaksanaan nyang asai jih di ateueh, jihnyan kheueh nyang phon-phon that gleh, óh lheueh nyan jitem meudamé, ramah dan patuh. Nibak jihnyan peunoh gaséh sayang dan jipeuhase buet-buet nyang gét. Jihnyan hana meupihak dan hana meupura-pura.
18 Keubiet buet nyang jroh na kheueh hase nibak bijéh damé nyang jitabu lé ureuëng-ureuëng nyang cinta damé.


Chapter 4

1 Pane jiteuka asai mupake meudakwa lamkawan gata? Kon kheueh nyan teuka nibak nafeusu-nafeusu gata nyang sabe jimuprang lam tuboh gata keu gata teumé mangat lam donya!
2 Gata meuheuét, teuma hana meuteumé, ngon lagée nyan gata naniet keuneuk peumaté gob! Gata meuseumangat, teuma hana meuteumé peue nyang gata mita, deungon lagée nyan gata meudakwa dan gata mulo. Gata hana meuteumé sapeue, sabab gata hana meulakée bak Po teu Allah.
3 Dan bah kheueh gata ka talakée, teuma teutab hana gata teumé, sabab tujuan nyang gata lakée nyan salah; peue nyang gata lakée na kheueh keu tapeumangat droe teuh keudroe.
4 Gata na kheueh ureuëng nyang hana seutia! Peu kheueh gata teupeue bahwa meunyoe gata meurakan ngon donya, gata jeuet keumusoh Allah? Lé sababnyan, barang sigasoe keuneuk jeuet keu sahabat donya nyoe, gobnyan jipeujeuet droe jih musoh Allah.
5 Bék tapike bahwa Alkitab hana alasan teutuléh lagée nyoe, "Lam droe geutanyoe Allah geukeubah roh nyang paleng kreueh that keumauan jih."
6 Teuma bahpi meunan, rakhmat Allah nyang geubri keugeutanyoe leubeh teuga nibak nafeusu roh tanyoe nyan. Nyang kheueh sabab jih lam Alkitab na cit teutuléh lagée nyoe, "Allah geulawan ureuëng nyang sombong, teuma gobnyan geugaséh keu ureuëng nyang miyueb até."
7 Sabab nyan, tundok kheueh ubak Allah dan lawan kheueh Iblih, ngon lagée nyan Iblih teuma jiplueng jitinggai gata.
8 Peurab kheueh ubak Allah, dan Po teu Allah pi geupeurab ubak gata. Peugleh kheueh jaroe gata, he gata nyang meudesya! Dan peujeureunéh kheueh até gata, he gata nyang meucabeueng até!
9 Bah kheueh gata biet-biet beuna meunyeusai dan gata mo sira meuba-e; bah kheueh khem gata jeuet keu mo dan geumbira gata jeuet keuseudeh!
10 Bah kheueh gata peumiyueb droe dikeue Tuhan, deungon lagée nyan Tuhan teuma geupeumanyang gata.
11 Syedara-syedara, bék kheueh saléng meuhina atawa saléng peusalah sidroe ngon nyang laén. Ureuëng nyang meuhina atawa jipeusalah syedara jih nyang seusabe ureuëng Kristen, ureuëng nyan ka jihina dan jipeusalah huköm Po teu Allah. Dan meunyoe gata tapeusalah huköm Allah, nyan saban cit gata hana taturot keu huköm-huköm nyan keudroe, teuma ka jeuet keuhakém jih.
12 Padahai sidroe nyang na hak jibri huköm keu manusia dan nyang peusidang manusia. Na kheueh Allah nyang meukuasa nyang peuseulamat dan nyang peubinasa. Deungon lagée nyan, soe kheueh gata nyan, gata jeuet peusalah sabe manusia?
13 Syedara-syedara nyang peugah haba, "Uroe nyoe atawa singoh kamoe keuneuk jak u banda pulan dan tinggai disinan sithon treb jih keuneuk kamoe meukat dan meumita péng," -- deungoe naseuhat ulôn nyoe.
14 Peue nyang teuma jeuet lam udeb gata óh singoh nyan, gata keudroe hana gata teupeue! Gata na kheueh lagée asab nyang deuh jih sikeujab mantong, óh ka lheueh nyan gadôh.
15 Nyang sibeuna jih gata peugah lagée nyoe, "Meunyoe Tuhan geubri idhin, kamoe teuma udeb dan kamoe peubuet nyoe atawa meupeubuet nyan."
16 Teuma jinoenyoe gata sombong dan raya haba. Banmandum haba gata nyang rayeuk lagée nyan hana beutôi.
17 Sabab nyan, ureuëng nyang teupeue peue nyang gét nyang harôh jipeubuet nyan teuma hana jipeubuet, ureuëng nyan meudesya.


Chapter 5

1 Syedara-syedara, ureuëng-ureuëng kaya! Deungoe kheueh naseuhat ulôn. Bah kheueh gata mo ngon meuba-e sabab gata teuma meudeurita!
2 Keukayaan gata kabrok. Peukayan gata ka jikab lé keuraleueb.
3 Méuh ngon pirak gata ka habéh meugeuratan; sabab teuma jeuet keusaksi jilawan gata dan teuma jipajoh habéh tuboh gata lagée apui pajoh. Gata ka tapeusapat atra bak jamén karab pagée.
4 Gata hana tabayeue upah keu ureuëng-ureuëng nyang mubuet bak blang gata. Jinoenyoe deungoe kheueh awaknyan apoh apah! Ureuëng-ureuëng nyang peusapat wase blang gata, jiklik jilakée tulông dan klik awaknyan ka geudeungoe bak geulinyueng Allah, Tuhan Nyang Mahakuasa.
5 Gata ka udeb meuwáh dan tateumé nekmat lam donya nyoe. Gata siulah-ulah teungoh peuteumbon droe keu uroe seumeusie.
6 Gata tahuköm dan tapoh maté ureuëng-ureuëng nyang hana meusalah, dan awaknyan hana jilawan gatanyoe.
7 Sabab nyan, saba kheueh wahe mandum Syedara lôn, sampoe Tuhan geuteuka teuma. Ngieng kheueh pakriban ureuëng meutani jipreh sampoe tanoh jih jipeuteubiet wase nyang meuhareuga keu jih. Deungon saba jihnyan jipreh ujeuen tron bak watée musém lurôh ôn kayée dan ujeuen watée musém meubungöng.
8 Meunan cit bah kheueh gata beusaba dan beurayeuk até, sabab uroe Tuhan teuka ka rab lumpah na.
9 Bék kheueh tunu até dan saléng peusalah sabe keudroe-droe, mangat gata hana geuhuköm lé Po teu Allah. Ingat kheueh! Hakém karab that, dan kakeumah geukeuneuk teuka.
10 Syedara-syedara, ingat kheueh ubak nabi-nabi nyang meututoe ateueh nan Tuhan. Awaknyan saba dan ék geuteun deurita. Ngon lagée nyan, cok kheueh awaknyan sibagoe cuntoh.
11 Awaknyan teupeugah mubahgia sabab awaknyan tabah. Gata ka tadeungoe keuhai Nabi Ayub nyang saba, dan gata tateupeue pakriban Tuhan keuneulheueh jih geubri beureukat keu Nabi Ayub nyan. Sabab Tuhan keubiet gét that gaséng sayang dan jroh até.
12 Nyang phon-phon that, na kheueh: Bék meusumpah, bah kheueh deumi langét, meunan cit deumi bumoe, atawa deumi peue mantong. Peugah kheueh mantong lagée nyoe, "Nyoe" meunyoe meukeusut gata nyoe, dan "Hán" meunyoe meukeusut gata hán; mangat gata hana geupeurhot huköman lé Po teu Allah.
13 Meunyoe lamkawan gata na nyang teungoh apoh apah, bah kheueh jimeudoá. Meunyoe na nyang geumbira, bah kheueh jimeulagu jipujoe Allah.
14 Meunyoe na nyang sakét, bah kheueh jihôi peumimpén-peumimpén jeumaáh. Dan bah kheueh mandum peumimpén nyan geumeudoá keu ureuëng nyang sakét nyan dan jisiliek ngon minyéuk ateueh nan Tuhan.
15 Meunyoe doá awaknyan jipeutrok ngon yakén, Tuhan teuma geupeu puléh ureuëng nyang sakét nyan, dan teupeu amphon desya-desya nyang ka jipeubuet.
16 Sabab nyan, bah kheueh gata saléng ta angkée nyang salah dan saléng gata meudoá, mangat gata geupeu puléh. Doá ureuëng nyang jiseutôt keuheundak Allah, na kuasa nyang paleng rayeuk.
17 Ilyas saban lagée geutanyoe manusia. Gobnyan meudoá deungon khusyuék mangat ujeuen bék jitôh, dan keubiet that ujeuen pih hana jitôh nyang treb jih na lhée thon siteungoh.
18 Óh lheueh nyan gobnyan meudoá lom, laju langét jipeutron ujeuen akhé jih tanoh jipeuteubiet wase.
19 Wahe syedara lôn banmandum! Meunyoe lamkawan gata na sidroe nyang hana jitem seutôt lé keuheundak Po teu Allah, dan lé ureuëng laén laju ji peujeuet ureuëng nyan jigisa ubak Allah,
20 ingat kheueh ubak ayat nyoe: Ureuëng nyang jipeujeuet ureuëng meudesya jigisa lom nibak jalan jih nyang salah, ureuëng nyan jipeuseulamat jiwa ureuëng meudesya nyan nibak maté dan jeuet keusabab jai that desya geupeu amphon lé Po. Horeumat kamoe, Yakobus