1 Petrus

1 2 3 4 5


Chapter 1

1 Syedara-syedara nyang umat piléhan Allah, nyang na bansaboh daerah Pontus, Galatia, Kapadokia, Asia dan Bitinia! Ulôn, Petrus, rasui Isa Almaseh, meuharab seumoga Po teu Allah geubri beureukat dan seujahteura ateueh gata ngon meulimpah-limpah. Gata teupiléh jeuet keu umat Allah nyang sisuai ngon reuncana Allah Bapak. Dan Roh Allah ka geupeujeuet gata keu umat nyang suci, khusos keu Po teu Allah, mangat gata taát ubak Isa Almaseh dan geupeu suci ngon darah Gobnyan.
3 Jak kheueh geutanyoe talakée syukoe ubak Po teu Allah, Bapak Tuhan tanyoe Isa Almaseh! Gobnyan that-that geugaséh keu geutanyoe, nyang kheueh sabab jih Gobnyan geubri keugeutanyoe udeb nyang barô, deungon geupeu udeb lom teuma Isa Almaseh nibak maté. Nyoe teubri keu geutanyoe harapan nyang kukôh.
4 Tanyoe meuharab that keutateumé beureukat-beureukat nyang geukeubah lé Allah keu umat Gobnyan, na kheueh beureukat-beureukat nyang geukeubah lam syeuruga, deungon lagée nyan hana hase rusak, atawa jeuet keu brok atawa cupa.
5 Banmandum nyan na kheueh keu gata, sabab gata meuiman ubak Po teu Allah. Ngon lagée nyan gata geujaga ngon kuasa Allah mangat gata tateurimong seulamat nyang ka siyab teupeugah bak uroe pagée nyang teuma teuka.
6 Deungon na lagée nyan bah kheueh gata bumangat até, bah pi jinoe lam watée nyang paneuk nyoe gata harôh seudeh le sabab gata tarasa meubagoe-bagoe cubaan.
7 Nyan sibagoe teu ujoe gata peu kheueh gata biet-biet meuiman ubak Tuhan atawa hana. Méuh nyang hase rusak pi, teu ujoe ngon apui. Deungon lagée nyan, iman gata na kheueh leubeh muyuem nibak méuh nyan, nyang kheueh sabab teu-ujoe cit mangat meutamah kông. Deungon lagée nyan gata teuma teupujoe dan jihoreumat meunan cit teupeumanyang bak watée uroe Isa Almaseh geuteuka lom teuma.
8 Gata tagaséh, bahpi yoh masa ilée hana takalon. Dan gata meuiman ubak Gobnyan bahpi jinoe hana gata kalon. Nyang kheueh sabab jih gata meugeumbira, dan gata rasa sukacita nyang paleng agong dan hana jeuet teupeugah ngon babah.
9 Sabab tujuan iman gata trok, na kheueh keuseulamat jiwa gata.
10 Keuhai seulamat nyoe kheueh nyang teutilek dan teuseulidek lé nabi-nabi, dan awaknyan geuramai keuhai beureukat nyang geubri lé Po teu Allah keu gata.
11 Awaknyan jiseulidek pakriban dan pajan hainyan teujadi, nyang teumeukeusut lé Roh Almaseh nyang na lam tuboh awaknyan. Nibak watée nyan, Roh nyan teupeusabab bak awaknyan keuhai mubagoe deurita nyang meuseuti geurasa lé Almaseh dan keuhai keuagongan Gobnyan nyang teuka teuma óh ka lheueh nyan.
12 Ubak nabi-nabi nyan Po teu Allah geubri tée bahwa peue nyang awaknyan peubuet kon keu keupeuntengan awaknyan, teuma na kheueh keu gata; nyan kheueh hai-hai nyang jinoenyoe teungoh gata deungoe deungon nyata nibak ureuëng-ureuëng nyang ba Haba Gét keuhai Isa Almaseh. Awaknyan jipeusampoe hai-hai nyan keugata ngon kuasa Roh Allah nyang geukirém nibak lam syeuruga. Dan malaikat-malaikat pih meuheuét that keuneuk geuteupeue haba nyang awaknyan peusampoe nyan.
13 Deungon sabab nyan, bah kheueh gata siab siaga. Até-até kheueh dan meuharab kheueh sipeunoh jih ubak beureukat nyang teuma teubri ubak gata bak watée Isa Almaseh teuka lom teuma.
14 Taát kheueh ubak Po teu Allah, dan bék kheueh udeb lagée kheun gata yoh masa ilée, bak watée gata gohlom meuturi ngon Po teu Allah.
15 Nyang sikeubiet jih, bah kheueh gata gleh lam hai peue mantong nyang gata peubuet, saban lagée Po teu Allah geutawök gata nyan gleh.
16 Lam Alkitab na teutuléh, "Bah kheueh gata gleh, sabab Ulôn nyoe gleh."
17 Gata tapeugah Allah nyan Bapak bak watée gata meudoá ubak Gobnyan. Ngon lagée nyan, Allah nyan kheueh nyang jeuet keuhakém manusia nyang sisuai ngon buet nyang jipeubuet maséng-maséng hana geupiléh bulée. Sabab nyan, simantong gata na ateueh rhueng donya nyoe, bah kheueh gata tapeuagong Po teu Allah lam udeb gata.
18 Gata tateupeu peue nyang ka geubayeue keuteupeubeubaih gata nibak udeb nyang hana meuguna nyang ka jipeutreun lé indatu gata. Meunayeue nyan kon kheueh sapeue-sapeue barang nyang hase rusak lagée pirak ngon méuh,
19 teuma sisuatu nyang paleng meuyuem; na kheueh tuboh Almaseh keudroe, nyang jeuet sibagoe bubiri nyang teukeureubeuen ubak Allah ngon hana cacat dan cupa.
20 Almaseh geupiléh lé Po teu Allah sigohlom donya nyoe teucebta. Dan nibak uroe-uroe karab akhé jamén nyoe, Gobnyan teuka lam donya mangat gata teupeuseulamat.
21 Rot Gobnyan kheueh gata meuiman ubak Allah nyang ka geupeu udeb lom teuma nibak maté dan teupeuagong Gobnyan. Ngon lagée nyan, Allah kheueh nyang gata iman dan ubak Allah teuma kheueh gata keubah harapan.
22 Sabab gata taát ubak ajaran nyang teuka nibak Allah, deungon lagée nyan gata ka tapeugleh droe dan tagaséh teuma ureuëng-ureuëng nyang saboh iman ngon cara ikhlaih. Ngon sabab nyan, bah kheueh gata saléng tameugaséh sidroe ngon nyang laén deungon sipeunoh até. 23 Sabab meulalu feureuman Allah nyang udeb dan abadi nyan, gata ka teupeujeuet sibagoe manusia barô nyang kon lahé nibak manusia, teuma nibak Bapak nyang abadi.
24 Lam Alkitab na teutuléh lagée nyoe, "Banmandum umat manusia lagée naleueng, dan banmandum keubeusaran jihnyan lagée bungöng naleueng. Naleueng layée, bungöng jih pih lurôh;
25 teuma feureuman Tuhan teutab na siumu masa." Feureuman nyan Haba Gét nyang ka teupeusampoe ubak gata.


Chapter 2

1 Sabab nyan, böih kheueh nyang na bak gata mandum nyang jeuhet; bék lé meututoe ngon haba nyang sulet, dan bék teuma galak meupura-pura. Bék bingiek até, dan bék tahina ureuëng laén.
2 Bah kheueh gata jeuet lagée aneuëk manyak nyang ban lahé, sabe glaih keu ié mom nyang murni. Deungon lagée nyan gata teuma timoh dan teupeuseulamat.
3 Lam Alkitab na teutuléh lagée nyoe, "Gata ka tarasa keudroe padub na jroh jih Tuhan."
4 Sabab nyan, teuka kheueh ubak Tuhan. Gobnyan lagée batée nyang udeb, batée nyang ka jitiek lé manusia sabab jianggab hana meuguna; teuma nyang geupiléh lé Po teu Allah sibagoe batée nyang meuhareuga.
5 Gata lagée batée-batée nyang udeb. Sabab nyan bah kheueh gata tatem teupeuguna keuteupeugét Baét Allah nyang rohani. Deungon lagée nyan gata ka jeuet keu imeum-imeum, nyang udeb khusos keu Po teu Allah. Dan nyang meulalu Isa Almaseh teupeuseumah ubak Allah, keureubeuen rohani nyang geuteurimong bak até Allah.
6 Sabab lam Alkitab na teutuléh lagée nyoe, "Ulôn ka kupiléh saboh batée nyang meuyuem, nyang Lôn keubah di Sion sibagoe batée paleng phon; dan ureuëng nyang meuiman ubak Gobnyan hana geubri keucewa."
7 Batée nyan biet that meuyuem keu gata nyang meuiman. Teuma keu ureuëng nyang hana meuiman, keunong kheueh ayat-ayat Alkitab nyang lagée nyoe. "Batée nyang hana jipeuguna lé utôh-utôh bangunan nyan rupaji ka jeuet keu batée nyang paleng phon,"
8 dan "Nyang kheueh batée nyang teupeusabab manusia hase meugantoh, batée jeuet keusabab awaknyan rhot." Awaknyan meugantoh sabab awaknyan hana jimeuiman ubak feureuman Allah. Meunan kheueh nyang ka geupeuteuntée lé Allah keuhai awaknyan.
9 Teuma gata na kheueh bansa nyang teupiléh, imeum-imeum nyang peutimang raja, bansa nyang suci, khusos keu Allah, umat Po teu Allah keudroe. Allah geupiléh gata dan geutawök gata beutateubiet nibak seupôt keu gata tamong u dalam trang Gobnyan nyang pengéh, deungon meukeusut mangat gata peutabu haba keuhai buet-buet nyang luwabiasa.
10 Yoh masa ilée gata kon umat Allah, teuma jinoenyoe gata na kheueh umat Allah. Yoh masa ilée gata hana geugaséh Po teu Allah, teuma jinoenyoe gata ka tateurimong gaséh sayang Gobnyan.
11 Syedara-syedara nyang teucinta! Gata na kheueh ureuëng aséng dan meuranto lam donya nyoe. Sabab nyan ulôn meulakée ngon meuharab that ubak gata mangat gata bék taturot hawa nafeusu manusia nyang sabe jimuprang jilawan jiwa.
12 Pi-e gata lamkawan ureuëng nyang hana meu Tuhan biet beugét that, deungon lagée nyan meunyoe awaknyan jifiteunah gata sibagoe ureuëng jeuhet, awaknyan teutab jiaku meuneubuet gata nyang jroh, deungon lagée nyan awaknyan jipujoe Allah nibak uroe Gobnyan geuteuka.
13 Deumi Tuhan, bah kheueh gata tundok ubak tieb-tieb ureuëng peunguasa manusia: meunan cit ubak Kaisar nyang jeuet keu peunguasa nyang phon,
14 meunan cit ubak gubunur nyang geutunyok lé Kaisar keuteuhuköm ureuëng nyang peubuet jeuhet dan keu teuhoreumat ureuëng nyang peubuet gét.
15 Sabab, Po teu Allah geutem deungon buet-buet gata nyang gét gata ka tasumpai babah ureuëng nyang meututoe bangai.
16 Bah kheueh gata udeb sibagoe ureuëng nyang meurdehka, teuma bék kheueh gata peuguna keumeurdehkaan gata nyan keu gata tôb nyang jeuhet, teuma udeb kheueh sibagoe hamba Allah.
17 Hareuga kheueh mandum manusia, gata gaséh kheueh mandum syedara gata nyang sabe ureuëng Kristen. Takot kheueh ubak Allah, dan horeumat kheueh Kaisar.
18 Syedara-syedara nyang jeuet keupeulayan, tundok kheueh ubak toke gata deungon peunoh horeumat; kon bak awaknyan nyang gét até ngon ramah mantong, teuma meunan cit ubak ureuëng nyang keujam.
19 Po teu Allah teuma geubri beureukat ubak gata, meunyoe gata sadar ateueh keuheundak Allah, saba ateueh jipeusaneut gata ngon hana ade.
20 Sabab peu kheueh istimewa jih meunyoe gata saba tapeuteun huköman nyang sibeuna jih gata tanggong sabab lé salah? Teuma meunyoe gata deungon saba tatanggong deurita nyang keunong ateueh gata sabab lé buet nyang beutôi, teuma Allah geubri beureukat ateueh gata.
21 Keu nyan kheueh Po teu Allah geutawök gata. Sabab Almaseh keudroe ka meudeurita keu gata, dan deungon nyan Gobnyan ka geubri keugata saboh teuladan, mangat gata taseutôt langkah Gobnyan.
22 Gobnyan hántom na geupeubuet desya, dan hántom na meusidroe pih nyang deungoe Gobnyan meusulet. 23 Bak watée Gobnyan jiteunak sihabéh-habéh jih, Gobnyan hana geubalaih deungon haba teumeunak. Bak watée Gobnyan rhot lam deurita, Gobnyan hana geuancam; Gobnyan teuma geuseurah hai Geuh nyan ubak Po teu Allah, Hakém nyang ade nyan.
24 Almaseh keudroe geuseuôn bubena desya-desya geutanyoe ateueh droe Gobnyan watée Gobnyan bak kayée saleb, mangat tanyoe beubaih nibak kuasa desya, dan udeb meunurot lagée nyang geulakée lé Allah. Deungon luka-luka Almaseh kheueh nyang peupuléh gata.
25 Yoh masa ilée gata lagée bubiri nyang sisat, teuma jinoenyoe gata ka teuba lom teuma keuteuseutôt tukang Rabe dan nyang Peulara jiwa gata.


Chapter 3

1 Meunan cit ngon gata, hei purumoh-purumoh, harôh tundok ubak lakoe sabab meunyoe lamkawan awaknyan na nyang hana meuiman ubak feureuman nibak Allah, pi-e gata nyan jeuet teuba awaknyan keu jimeuiman. Dan hana peureulée gata peugah sapeue bak awaknyan,
2 sabab awaknyan nyang jingieng na kheueh pi-e gata nyang gleh dan saleh.
3 Bék kheueh ceudah gata nyan teuma na diluwa mantong, lagée miseu jih teuhias ôk atawa gata ngui mubagoe hiasan, atawa gata ngui peukayan nyang meuhái-meuhái.
4 Nyang biet jih, bah kheueh keuceudah gata nyan teuka lam batén, budho basa nyang leumoh leumbot dan teunang; nyan kheueh ceudah nyang abadi nyang paleng muyuem nibak mata Allah.
5 Ngon cara nyoe kheueh yoh jamén ilée ureuëng-ureuëng inong nyang meuagama nyang meuharab ubak Po teu Allah jipeulagak droe deungon tundok ubak lakoe awaknyan.
6 Meunan cit deungon Sara, geuhnyan taát ubak lakoe geuh Nabi Ibrahim dan jihôi gobnyan teungku. Gata jinoenyoe na kheueh aneuëk-aneuëk Sara, meunyoe gata peubuet hai-hai nyang jroh dan hana teumakot bak peue mantong.
7 Dan meunan cit gata, hei teungku-teungku lakoe, bah kheueh gata udeb ngon peunoh peungeurtian ateueh purumoh gata, dan ngon sadar bahwa awaknyan na kheueh kawöm nyang leumoh. Peusaneut kheueh awaknyan deungon horeumat, sabab awaknyan meusajan-sajan ngon gata, teuma jiteurimong anugeurah udeb nyang seujati nibak Allah. Peubuet kheueh nyoe, mangat hana nyang ampeung doá gata.
8 Keusimpolan jih na kheueh: bah kheueh Syedara mandum sapeue kheun dan saboh peurasaan. Bah kheueh gata saléng tameugaséh lagée ureuëng-ureuëng nyang meusyedara. Dan bah kheueh gata saléng na weueh meuweueh lom beuna sikeub miyueb até.
9 Bék kheueh tabalaih buet nyang jeuhet ngon nyang jeuhet, atawa meurapa ngon seurapa; nyang sikeubiet jih, balaih kheueh deungon cara teulakée beureukat bak Allah. Sabab Allah geutawök gata na kheueh mangat tateurimong beureukat nibak Gobnyan.
10 Lam Alkitab na teutuléh lagée nyoe, "Ureuëng nyang jitem teurimong nekmat lam udeb dan jitem teurimong uroe-uroe nyang jroh, bah kheueh jijaga babah jih mangat bék meututoe hai-hai nyang jeuhet dan hana jipeugah hai-hai nyang sulet.
11 Ureuëng nyan beujipeujioh nyang jeuhet dan jipeubuet nyang gét; bah kheueh jimeujuang biet-biet beujiteumé damé.
12 Sabab Tuhan sabe geungieng bak ureuëng-ureuëng nyang jiturot keuheundak Gobnyan, dan Tuhan sabe geudeungoe doá-doá awaknyan; teuma Tuhan geulawan keu ureuëng-ureuëng nyang peubuet nyang jeuhet."
13 Soe kheueh nyang keuneuk peubuet jeuhet ateueh gata, meunyoe gata galak tapeubuet nyang gét?
14 Teuma bahpi gata tateurimong deurita sabab gata peubuet hai-hai nyang gét, gata meulaba! Bék kheueh teumakot bak soe mantong dan bék khawate.
15 Teuma lam até gata, bah kheueh gata tabri ubak Almaseh horeumat nyang khusos nyang sisuai ngon keududukan Geuh sibagoe Tuhan. Dan bah kheueh gata beusabe siab tabri jeunaweueb keu tieb-tieb ureuëng nyang jitanyong keuhai harapan nyang na nibak gata.
16 Teuma peubuet kheueh nyan ngon leumoh leumbot dan horeumat. Dan bah kheueh até nurani gata gleh, dan meunyoe gata jifiteunah sabab gata udeb deungon jroh sibagoe murit Almaseh, ureuëng-ureuëng nyang ba fiteunah nyan teuma jiteuka malée keudroe.
17 Leubeh gét meudeurita sabab tapeubuet nyang gét -- meunyoe nyan na kheueh keuheundak Po teu Allah -- nibak meudeurita sabab tapeubuet nyang jeuhet.
18 Sabab Almaseh keudroe maté cit sigoe sagai, keu siumu masa sabab lé desya manusia -- sidroe ureuëng nyang hana meusalah, meuninggai donya keu ureuëng nyang na salah. Almaseh geupeubuet lagée nyan mangat Gobnyan hase geuba gata ubak Po teu Allah. Gobnyan jipoh maté seucara tuboh, teuma teupeu udeb lom seucara rohani.
19 Lam keuadaan roh Gobnyan geujak keugeupeusampoe feureuman nibak Allah ubak roh-roh nyang na lam glab:
20 na kheueh roh-roh ureuëng nyang hana taát ubak Po teu Allah bak watée jamén nabi Noh. Bak watée nyan Allah geupreh ngon saba watée nabi Noh geupeugét kapai gobnyan. Teuma ureuëng-ureuëng nyang na lam kapai nyan mantong -- banmandum na lapan droe -- nyang geupeu seulamat sabab lé ié beuna nyang rayeuk that nyan.
21 Ngon lagée nyan, keujadian nyang lagée nyan na kheueh saboh kiyaih nibak pumanö nyang na jinoenyoe teupeuseulamat gata. Pumanö nyoe na kheueh kon sibagoe upacara teupeugleh tuboh nibak mandum kalang nyang kutoe-kutoe, teuma na kheueh sibagoe janji gata ubak Allah nibak até nurani nyang jroh. Pumanö nyan teupeuseulamat gata sabab Isa Almaseh ka udeb lom teuma nibak Gobnyan nyang ka meuninggai,
22 dan ka geutamong lam syeuruga. Jinoenyoe Gobnyan meukuasa meusajan ngon Po teu Allah dan geupeurintah banmandum malaikat, banmandum nyang mat kuasa dan banmandum teunaga.


Chapter 4

1 Sabab Almaseh ka meudeurita seucara jasmani, gata harôh tapeukong droe deungon até nyang kukoh ubak nyang nyan. Sabab ureuëng nyang meudeurita seucara tuboh, ureuëng nyan hana lé meudesya.
2 Sabab nyan, bah kheueh gata udeb sabe nyang lagée nyan bagoe lam donya nyoe lagée keuheundak Allah, dan kon lagée keuheundak manusia.
3 Yoh masa ilée, gata ka treb that tapeubuet peue nyang ka jipeubuet lé ureuëng-ureuëng nyang hana jituri Tuhan. Udeb gata hana gét. Nyang gata seutôt hawa nafeusu, mabök-mabök dan laloe bak meu-én, jieb ié kreueh dan seumah beurala nyang biet-biet luwat lagoena.
4 Jinoenyoe ureuëng nyang hana jituri Tuhan, hireuen that bahwa gata hana taudeb lagée awaknyan, jipeubuet desya ngon hana bataih. Nyang kheueh sabab jih awaknyan jihina gata.
5 Teuma awaknyan singoh harôh jipeutanggong jaweueb mandum nyan dikeue Po teu Allah nyang ka siab keugeupeusidang ureuëng nyang udeb dan nyang ka maté.
6 Nyang kheueh sabab jih Haba Gét ka teuma teupeutrok ubak ureuëng nyang ka meuninggai donya. Meukeusut jih mangat awaknyan, nyang ka teupeusidang seucara badan -- lagée hai jih banmandum ureuëng teuma teupeusidang -- hase udeb seucara rohani, meunurot keuheundak Allah.
7 Peue-peue mantong karab that ubak akhé, sabab nyan bah kheueh gata takuasa droe dan teutab waspada, mangat gata hase ta meudoá.
8 Leubeh nibak peue-peue nyang na, bah kheueh gata beubiet-biet beutagaséh sidroe ngon nyang laén, sabab deungon na sabe tameugaséh sidroe ngon nyang laén nyan gata pi kasiab cit teuma keu saléng tapeuamphon.
9 Bah kheueh gata saléng tateurimong sidroe ngon nyang laén lam rumoh gata, ngon hana tunu até.
10 Gata maséng-maséng ka tateurimong meuneubri nyang meulaén-laén nibak Allah. Sabab nyan sibagoe ureuëng nyang peusaneut nyang gét nibak peue-peue nyang ka geubri lé Allah, bah kheueh gata peuguna keumampuan nyan deumi keupeuntengan meusajan.
11 Ureuëng nyang peutrok haba, bah kheueh jipeutrok haba nibak Allah; ureuëng nyang peutimang ureuëng laén, bah kheueh jipeutimang ngon teunaga nibak Allah, mangat lam hai peue mantong, Po teu Allah jeuet teupeuguna meulalu Isa Almaseh. Gobnyan kheueh nyang meukuasa dan patot teupeuagong siumu masa. Amin.
12 Syedara-syedara nyang lôn cinta! Gata jinoenyoe that-that meudeurita sabab teungoh teu-ujoe. Teuma bék kheueh meurasa hireuen, siulah-ulah na sipeue-peue nyang luwabiasa keunong ateueh gata.
13 Teuma, bah kheueh gata meurasa mangat sabab meusigoe meudeurita meusajan-sajan ngon Almaseh. Teuma singoh watée keuagongan Almaseh teupeuleumah, gata teuma meusukacita.
14 Gata meu-untông meunyoe gata jihina sabab gata murit Almaseh. Nyan meumakna Roh nyang mulia, na kheueh Roh Allah, na nibak gata.
15 Bék kheueh meusidroe pih nyang na lamkawan gata meudeurita sabab jihnyan jipoh maté gob, atawa tukang ceumeucue, atawa jeuhet, meunan sabab jihnyan jipeuroh droe nibak urosan ureuëng laén.
16 Teuma meunyoe gata meudeurita sabab lé gata ureuëng Kristen, bék kheueh malée sabab lé hai nyan. Lakée kheueh teurimong gaséh ubak Po teu Allah, bahwa gata taba nan Almaseh.
17 Ka trok watée jih Allah geuhakém donya nyoe. Dan umat Allah keudroe nyang phon-phon that geupeu sidang. Ngon lagée nyan, meunyoe Allah geupeu phon ateueh geutanyoe, pakriban teuma jeuet jih singoh ateueh ureuëng-ureuëng nyang hana jipatéh ubak Haba Gét nyang teuka nibak Allah nyan?
18 Lam Alkitab na teutuléh lagée nyoe, "Meunyoe ureuëng nyang jroh-jroh pi ka payah teupeuseulamat, peue teuma nyang keunong ateueh ureuëng-ureuëng nyang meudesya nyang hana jituri Tuhan!"
19 Sabab nyan, meunyoe na ureuëng-ureuëng nyang meudeurita sabab lé Allah geukeuheundak nyang lagée nyan, bah kheueh ureuëng-ureuëng nyan udeb ngon beutôi dan jipeucaya droe ubak peuncebta awaknyan. Gobnyan sabe geupeu teupat janji Gobnyan.


Chapter 5

1 Ulôn lakée beujipeurati that lé peumimpén jeumaáh gata. Ulôn teumuléh nyoe sibagoe rakan peumimpén dan sibagoe ureuëng nyang ka lheueh lôn ngieng keudroe deurita Almaseh, dan nyang meusajan cit teuma jipeuagong, meunyoe keuagongan Almaseh teupeuleumah bak manusia. Ulôn meulakée ngon meuharab that
2 mangat gata rabe kawan bubiri nyang ka geuseurah lé Allah ubak gata. Rabe kheueh awaknyan ngon até nyang mangat lagée nyang geuharôk lé Allah keudroe, dan bék kheueh ngon até nyang brat. Bék teuma gata peubuet meuneubuet gata nyan ngon meuharab laba, teuma sabab lé gata biet-biet keuneuk gata peutimang.
3 Bék teuma tameubuet lagée sidroe ureuëng mat kuasa ateueh awaknyan nyang teupeucaya ubak gata, teuma beujeuet kheueh cuntoh nyang jroh nibak awaknyan.
4 Dan bak watée tukang Meurabe Agong nyan teuka teuma, gata teuma tateurimong mahkota nyang paleng hibat, nyang hántom layée cahya jih.
5 Meunan cit teuma deungon Gata, nyang ureuëng muda. Tundok kheueh ubak ureuëng tuha. Gata banmandum harôh tapeumiyueb droe sabe peutimang deungon até nyang miyueb. Sabab lam Alkitab na teutuléh lagée nyoe, "Po teu Allah geulawan ureuëng nyang sombong, teuma geugaséh keu ureuëng nyang miyueb até."
6 Sabab nyan, peumiyueb kheueh droe gata dimiyueb jaroe Allah nyang teuga, ngon lagée nyan Gobnyan geupeumanyang gata watée katrok watée.
7 Seurah kheueh banmandum nyang gata khawate nyan ubak Allah, sabab Gobnyan geungieng gata.
8 Bah kheueh gata waspada dan lam siab sabe! Sabab Iblih na kheueh musoh gata. Jihnyan lagée singa jijak keudeh keunoe sira jitaúm jimita eumpeuen.
9 Lawan kheueh jihnyan ngon iman nyang kong, sabab gata tateupeue bahwa syedara-syedara sabe ureuëng Kristen nyang laén bansigom donya saban cit meudeurita lagée gata.
10 Teuma óh ka lheueh gata meudeurita sikeujab, Allah keudroe teuma geupeujeuet gata sampoereuna. Gobnyan teuma geupeudong dan geupeukong gata. Sabab Gobnyan na kheueh Allah nyang jroh até, nyang ka geutawök gata keutarasa meusajan keuagongan Gobnyan nyang abadi meulalu Almaseh.
11 Gobnyan kheueh nyang meukuasa siumu masa! Amin.
12 Surat ulôn nyang paneuk nyoe lôn tuléh keugata deungon jitulông lé Silas, nyang lôn anggab sidroe syedara Kristen nyang seutia. Ulôn meuheuét keuneuk bri durongan bak gata dan lôn peuyakén gata bahwa peue nyang lôn tuléh nyoe haba nyang sampoereuna keuhai rakhmat Allah. Bah kheueh gata tamumat nyang kong nibak rakhmat nyan.
13 Rakan-rakan saboh jeumaáh di Babilon, nyang ka geupiléh cit lé Po teu Allah, geukirém saleuem ubak gata; meunan cit teuma ngon aneuëk ulôn Markus nyang lôn cinta.
14 Meu-meuáh meuáh desya kheueh sidroe ngon nyang laén deungon peunoh gaséh sibagoe syedara lam Kristen. Seumoga Tuhan geubri seujahteura ateueh gata mandum nyang ka jeuet keu milék Almaseh. Horeumat kamoe, Petrus