2 Petrus

1 2 3


Chapter 1

1 Syedara-syedara nyang biet-biet meuiman lagée kamoe meuiman! Isa Almaseh, na kheueh Allah dan Raja Peuseulamat geutanyoe, biet mungken tanyoe meuiman bak Gobnyan, sabab Gobnyan geupeubuet nyang beutôi. Surat nyoe nibak Simon Petrus, sidroe namiet dan rasui Isa Almaseh.
2 Seumoga Allah geubri beureukat dan seujahtra ateueh gata deungon meulimpah-limpah, sabab gata taturi Allah dan Isa, Tuhan tanyoe.
3 Po teu Allah ka geupeu guna kuasa ilahi Gobnyan keu geubri keugeutanyoe peue-peue mantong nyang peureulée keu tameuiébadat. Gobnyan geupeubuet nyoe meulalu peue nyang tanyoe teupeu keuhai Isa Almaseh, nyang ka geutawök tanyoe keu tarasa keurayeuk Gobnyan dan keu gét Gobnyan.
4 Deungon cara nyan kheueh Allah geuanugeurah keugeutanyoe beureukat-beureukat nyang lumpah jai dan meuhareuga nyang ka geupeu janji. Deungon na beureukat-beureukat nyan gata hase leupah nibak nafeusu-nafeusu jeuhet nyang jipeurusak donya nyoe, dan gata tateurimong sifeuet ilahi.
5 Lé nyan, useuha kheueh beu biet-biet mangat gata teutab peucaya ubak Almaseh dan peucaya gata nyan jitumpang teuma lé udeb nyang jroh. Disampéng udeb nyang jroh, gata peureulée that beujeuet keu ureuëng nyang meuiéleumé,
6 dan disampéng iéleumé, gata pih meuseuti hase takuasa droe. Meunan cit seulaén hase takuasa droe beuhase teuma tabina droe jeuet keu tabah gata meuhadab ngon peue mantong. Disampéng tabah meuhadab peue mantong, gata pih harôh udeb meunurot lagée nyang geulakée lé Po teu Allah.
7 Dan udeb lagée nyang geulakée lé Allah beuna teuma gaséh ngon sayang ubak syedara-syedara gata nyang seuiman. Meunan cit bah kheueh teuma gaséh sayang gata ubak syedara-syedara nyang saboh iman teutamah teuma gaséh sayang ubak mandum manusia.
8 Banmandum nyan na kheueh sifeuet-sifeuet nyang gata peureulée. Meunyoe mandum sifeuet nyan na nibak gata ngon meulimpah-limpah, gata teuma jeuet keu ureuëng nyang jumôt dan meuhase lam buet, dan taturi Isa Almaseh Tuhan geutanyoe deungon leubeh gét lom teuma.
9 Teuma ureuëng nyang hana sifeuet-sifeuet nyang lagée nyan, pandangan ureuëng nyan picék; ureuëng nyan hana hase jikalon dan desya-desya jih nyang awai ka teupeugleh.
10 Sabab nyan, Syedara-syedara, meu-useuha kheueh leubeh brat lom mangat panggelan Allah dan geupiléh lé Gobnyan ateueh droe gata nyan meutamah-tamah teuga. Meunyoe gata tapeubuet nyan, gata hana murtad.
11 Deungon na lagée nyan keugata teuma geubri hak nyang peunoh keu gata tamong lam Keurajeuen nyang keukai nibak Tuhan dan Raja Peuseulamat geutanyoe Isa Almaseh.
12 Sabab nyan, ulôn sabe lôn peuingat gata keuhai nyan, bah pi gata ka tateupeue dan gata meuiman ubak ajaran nyang teuka nibak Allah nyang ka gata teurimong nyan.
13 Simantong ulôn nyoe lam udeb, ulôn meurasa wajéb lôn peuingat ubak gata lam hai-hai nyan.
14 Sabab ulôn kuteupeu bahwa hana treb lé ulôn teuma kutinggai donya nyoe, sabab Tuhan geutanyoe Isa Almaseh ka geubri tée ngon nyata that ubak ulôn.
15 Deungon lagée nyan ulôn teuma ku-useuha bahwa watée ka meuninggai pih, gata sabe taingat lom teuma hai-hai nyoe.
16 Watée kamoe peugah ubak gata padub na agong jih óh teuka Tuhan geutanyoe Isa Almaseh, kamoe hana meugantung nibak haba-haba dongeng nyang hana beutôi nyang jipeugah lé manusia. Keuagongan Almaseh nyan ka lheueh kamoe ngieng ngon mata ulée kamoe keudroe.
17 Kamoe na nibak teumpat nyan watée Gobnyan geupeu agong dan geuhoreumat lé Allah Bapak. Bak watée nyan teudeungoe su nibak Nyang Mahamulia, nyang peugah ubak Gobnyan, "Nyoe kheueh Aneuëk Ulôn nyang Ulôn gaséh. Gobnyan that jipeumangat até Lôn!"
18 Kamoe keudroe na meudeungoe su nyan nyang teuka nibak syeuruga watée kamoe na meusajan ngon Gobnyan ateueh gunong nyang suci nyan.
19 Nyang kheueh sabab jih kamoe leubeh yakén lom peue nyang geupeusan lé Allah nyang ka geupeutrok lé dumna nabi-nabi. Nyang sigét jih gata ngieng peusan nyan, sabab peusan nyan lagée panyöt nyang hu bak teumpat nyang seupôt trok án mata uroe jiteubiet, dan cahya bintang timu hu meucahya lam até gata.
20 Nyang phon that bah kheueh gata ingat nyoe: Peusan Allah nyang geupeusampoe lé dumna nabi-nabi hana jeuet tatafeuse meunurot peundapat droe teuh keudroe.
21 Sabab, hántom na peusan Allah nyan ateueh keuheundak manusia. Teuma Roh Allah geukuasa manusia keuteupeusampoe peusan nibak Allah nyan keudroe.


Chapter 2

1 Bak jamén ilée lamkawan umat Allah ka teuka nabi-nabi peuleusu. Meunan cit teuma lamkawan gata teuma teuka gurée-gurée peuleusu. Awaknyan kana jipeutamong ajaran-ajaran nyang hana beutôi, nyang rhot ubak binasa manusia. Dan awaknyan ji-iengkeue ubak Peunguasa nyang ka peubeubaih awaknyan. Ngon lagée nyan awaknyan jipeuteuka keubinasaan ateueh droe keudroe, dan nyang teuma rhot ateueh awaknyan deungon sigra.
2 Bah pi meunan, jai that ureuëng jiseutôt peue nyang jipurunoe lé gurée-gurée peuleusu nyan nyang ka jikuasa lé hawa nafeusu awaknyan keudroe. Dan lé buet gurée-gurée peuleusu nyan teuma jipeuteuka leubeh jai lom ureuëng nyang hina Jalan nyang Beutôi nyang teutuju ubak Po teu Allah.
3 Sabab awaknyan leuha that, lé gurée-gurée peuleusu nyan laju jicalitra haba-haba nyang jisuson keudroe keujiteumé laba nibak gata. Teuma mahkamah nyang peurhot huköman ateueh awaknyan ka treb that teupeusiab, dan binasa nyang ka teupeuteuntée keu awaknyan teungoh jipreh-preh awaknyan.
4 Malaikat-malaikat nyang meudesya pih hana geupeubiyeu lé Allah leupah nibak huköman, teuma teutab geuböih lam nuraka. Awaknyan teupeutamong lam guha nyang seupôt keuteuteun nibak teumpat nyan trok bak Uroe Peungadelan.
5 Meunan cit ngon donya bak jamén ilée, Allah hana geupeubiyeu lheueh nibak huköman. Allah laju geukirém ié beuna nyang rayeuk that lam donya ureuëng jeuhet bak watée nyan. Teuma Nabi Noh meusajan ngon tujoh droe nyang laén nyang seulamat, sabab nabi Noh geupeu maklum haba keuhai udeb nyang paih bak até Allah.
6 Saban cit hai jih ngon banda Sodom ngon Gomora: Po teu Allah geupeuhanco banmandum banda-banda nyan ngon apui mangat jeuet keucuntoh keuhai peue nyang teuma teujadi ngon ureuëng-ureuëng nyang jeuhet.
7 Teuma Nabi Lot teupeuseulamat, sabab geuhnyan geuturot peue kheun Allah; gobnyan that-that meudeurita sabab peurangoe nyang jeuhet nibak ureuëng-ureuëng nyang beujat.
8 Lamkawan ureuëng-ureuëng nyang lagée nyan, nabi Lot nyang gét udeb ngon baten nyang teuseksa, sabab tieb-tieb uroe gobnyan geukalon dan geudeungoe buet-buet awaknyan nyang jeuhet.
9 Teuma, Tuhan geuteupeue pakriban cara teupeuseulamat ureuëng-ureuëng nyang turot peurintah Gobnyan watée awaknyan meuteumé cubaan. Dan Tuhan pih geuteupeue pakriban teukeubah ureuëng-ureuëng jeuhet keu geuseksa bak Uroe Peungadelan,
10 khusos jih keu ureuëng-ureuëng nyang jiturot hawa nafeusu awaknyan nyang kutoe dan nyang hina keukuasaan Allah. Meunan jijeuet dan sombong jih gurée-gurée peuleusu nyan sampoe awaknyan hana teumakot mubacut pi jihina dumna mahklok mulia lam syeuruga!
11 Seudangkan malaikat-malaikat nyang jiôh leubeh teuga dan meukuasa nibak gurée-gurée peuleusu nyan, hana jitudôh dumna makhlok nyang mulia nyan ngon tutoe nyang hina dikeue Tuhan.
12 Teuma lé gurée-gurée nyan, luwabiasa! Awaknyan lagée beulatang nyang lahé keu teudrob dan teupoh maté. Awaknyan hana jipike, teuma jimubuet meunurot kheun até jih mantong, sampoe jiheuntam hai-hai nyang hana jiteupeue ngon tutoe haba meuhina. Sabab nyan lé buet-buet awaknyan keudroe, awaknyan teuma maté lagée beulatang-beulatang nyang juwah.
13 Sibagoe huköman ateueh deurita nyang ka jipeusabab lé awaknyan, awaknyan teuma meudeurita ngon seungsara nyang peudeh. Nibak awaknyan, hai nyang mangat até na kheueh jipeubuet peue mantong óh watée uroe guna jipeupuih hasrat tuboh jih keudroe. Meunyoe awaknyan jiduek meusajan-sajan ngon gata bak teumpat khanuri, sikeub awaknyan biet luwat that sabab awaknyan laloe mabök ngon hawa nafeusu.
14 Awaknyan puih hán puih jipeubuet desya, dan nyang jigalak na kheueh jikalon inong jeuhet. Dan ureuëng nyang ban meuiman lom kureueng yakén, laju jipakat blaih jih. Até awaknyan ka lazem ngon leuha. Awaknyan na kheueh ureuëng-ureuëng nyang teukutok!
15 Sabab awaknyan hana jitem turot jalan nyang beutôi, akhé jih awaknyan sisat. Awaknyan jicok rot nyang jijak lé Bileam aneuëk Beor yoh masa ilée. Bileam nyoe meuheuét that keuneuk meuteumé péng nibak buet jih nyang jeuhet.
16 Teuma jihnyan keunong peuingat nyang brat ateueh buet jih nyang jeuhet nyan, watée keuleudée jihnyan jimarit ngon su manusia. Teuma nabi nyan jipaksa beujipiôh buet nyang pungoe nyan.
17 Gurée-gurée peuleusu nyan na kheueh lagée ié nyang tho dan lagée sagob nyang jipôt lé angén badée. Allah ka geukeubah keu awaknyan saboh teumpat nyang seupôt buta.
18 Awaknyan jipeugah haba keudeuh keunoe nyang hana-hana sôh tanna meuasoe; nafeusu cabui jipeuguna lé awaknyan keujipeusisat ureuëng-ureuëng nyang banmantong lheueh nibak lingkongan ureuëng nyang udeb sisat.
19 Gurée-gurée peuleusu nyan jipeujanji meurdehka ubak ureuëng-ureuëng nyan, seudangkan awaknyan keudroe jipeubudak lé keubiasaan-keubiasaan nyang jipeurusak manusia. Sabab meunyoe ureuëng jipeutaloe lé sapeue-sapeue, deungon nyan ureuëng nyan ka jeuet keu namiet keu ureuëng nyang peutaloe nyan.
20 Ureuëng nyang turi Tuhan dan Peuseulamat tanyoe Isa Almaseh ka beubaih nibak kuasa-kuasa donya nyang peubrôk manusia. Teuma meunyoe óh lheueh nyan jihnyan teutaron lom akhé jih jipeutaloe lé kuasa-kuasa nyan, keuadaan ureuëng nyan akhé jih leubeh brok nibak nyangka-ka.
21 Leubeh gét ureuëng-ureuëng nyang lagée nyan hántom na jituri rot nyang beutôi nibak Allah, nibak jituri lé awaknyan, teuma óh lheueh nyan hana jitem seutôt peurintah-peurintah nyang geubri lé Allah ubak awaknyan.
22 Peue nyang awaknyan peubuet jeuet keubukeuti pribasa nyang teupeugah lagée nyoe, "Asée jipajoh lom peue nyang ka jiulée nyan" dan "Bui nyang ka teupeumanö, teuma jiriwang lom meubalek-balek lam luhob."


Chapter 3

1 Syedara-syedara nyang lôn cinta! Nyoe kheueh surat lôn nyang keudua lôn tuléh keu gata. Lam bandua surat nyoe, ulôn meu-useuha lôn peubeudôh pikeran-pikeran nyang gleh keu gata.
2 Ulôn peuingat mangat gata taingat peue-peue nyang ka geupeugah lé nabi-nabi Allah yoh masa ilée, dan keuhai peurintah nibak Tuhan, Raja Peuseulamat, nyang teupeutrok ubak gata meulalu rasui-rasui.
3 Phon-phon that, gata harôh tateupeue bahwa nibak uroe-uroe akhé, teuma teuka ureuëng-ureuëng nyang udeb jih jikuasa lé hawa nafeusu awaknyan keudroe. Awaknyan jihina gata
4 deungon haba lagée nyoe, "Jipeugah Tuhan meujanji keuneuk teuka! Jinoe pat Geuhnyan? Bapak-bapak indatu tanyoe ka meuninggai donya, teuma peue-peue mantong teutab saban lagée yoh phon álam nyoe teucebta!"
5 Awaknyan ngon jisaja hana jitem patéh bahwa yoh masa ilée Allah geucebta langét ngon bumoe ngon feureuman Gobnyan. Bumoe geupeujeuet nibak ié, dan ngon ié;
6 dan ngon ié teuma -- na kheueh ié nibak ié beuna -- donya phon that nyan geupeuhanco.
7 Teuma langét ngon bumoe nyang na jinoenyoe, geupeulara lé feureuman Allah nyan cit teuma guna keugeupeuhanco ngon apui óh trok bak watée teuma. Jinoenyoe langét ngon bumoe mantong geupeulara trok ubak uroe ureuëng-ureuëng nyang jeuhet teuhuköm dan teupeubinasa.
8 Teuma syedara-syedara lôn, sapeue hainyoe nyang bék gata tuwoe; bahwa nibak pandangan Tuhan, siuroe hana beda jih ngon siribée thon -- bandua nyan saban mantong nibak Gobnyan.
9 Tuhan hana mulet geubri peue nyang ka geupeu janji bah pih na nyang sangka lagée nyan. Nyang sikeubiet jih, Gobnyan saba nibak gata, sabab Gobnyan hana geutem meusidroe pih binasa. Gobnyan meuharab mangat banmandum ureuëng meutobat nibak desya-desya jih.
10 Teuma Uroe teuka Tuhan nyan na jih lagée pancuri. Nibak Uroe nyan, langét teuma leunyab ngon su meugum-gum, dan bubena beunda dilangét teuma habéh tutong, dan bumoe ngon peue nyang na ateueh nyan teuma gadôh.
11 Sabab banmandum nyan geupeu hanco ngon cara nyang lagée nyan bagoe, pakriban kheueh nyang sibeuna jih gata udeb? Gata meuseuti udeb suci dan khusos keu Allah,
12 simantong gata preh dan tameucen keu Uroe Allah. Nibak Uroe nyan langét teuma habéh tutong, dan sabab lé seu-eum jih nyan, banmandum beunda-beunda nyang na di langét teuma meuliléh.
13 Teuma geutanyoe tapreh peue nyang ka geupeu janji lé Allah, na kheueh langét nyang barô dan bumoe nyang barô teuma, nibak teumpat nyan meuteumé keuadelan.
14 Sabab nyan, Syedara-syedara nyang lôn gaséh, teungoh jinoenyoe gata preh Uroe nyan, meu-useuha kheueh beubiet-biet keu udeb suci dan hana meucupa dikeue Po teu Allah. Dan peulara kheueh hubongan nyang jroh ngon Allah.
15 Anggab kheueh Tuhan nyang saba nyan sibagoe watée nyang geubri keugata mangat gata hase seulamat. Paulus, syedara tanyoe nyang tagaséh, ka geutuléh nyang lagée nyan keu gata. Gobnyan geutuléh nyan ngon peunoh keubijaksanaan nyang geubri lé Allah keu geuh nyan.
16 Lam banmandum asoe surat gobnyan, Paulus sabe geutuléh keuhai nyan. Beutôi na meupadub boh hai nyang payah that tamuphom lam surat geuh nyan. Dan bagian nyan jiputa balek lé ureuëng-ureuëng nyang hana jiteupeue sapeue dan lé ureuëng-ureuëng nyang hana kong iman jih. Hai nyang lagée nyan hana jeuet tahireuen, sabab ladum-ladum nyang na nibak Alkitab jipeubuet cit lagée nyan lé awaknyan. Peue nyang awaknyan peubuet na kheueh meuakibat awaknyan keudroe hanco.
17 Teuma gata, Syedara-syedara nyang lôn gaséh, ka gata teupeue keuhai hainyan. Sabab nyan, waspada kheueh, bék sampoe gata teuba-ba u lam buet nyang sisat nyang jipeubuet lé ureuëng-ureuëng jeuhet akhé jih gata rhot nibak teumpat geumilo gata nyang kukoh.
18 Bah kheueh gata seumaken tarasa rakhmat Isa Almaseh, Tuhan dan Raja Peuseulamat tanyoe, dan bah kheueh gata seumaken taturi Gobnyan. Teupujoe kheueh Gobnyan, jinoe dan trok siumu masa! Amin. Horeumat kamoe, Petrus