1 Yahya

1 2 3 4 5


Chapter 1

1 Asoe surat nyoe keuhai Feureuman nyang teubri udeb, na kheueh Feureuman nyang ka na yoh phon that. Kamoe meudeungoe, dan ka kamoe ngieng ngon mata kamoe keudroe. Kamoe ka kamoe pandang, dan ka kamoemat ngon jaroe kamoe keudroe.
2 Watée udeb nyan teupeugah, na kamoe ngieng. Nyang kheueh sabab jih kamoe meusaksi keuhai nyan. Kamoe peusampoe ubak gata keuhai udeb seujati dan keukai, nyang na meusajan Bapak, dan nyang ka geupeugah bak kamoe. 3 Peue nyang ka kamoe ngieng dan kamoe deungoe, nyan cit teuma nyang kamoe peutrok ubak gata, mangat gata meusajan ngon kamoe tarasa udeb meusaboh ngon Bapak dan ngon Aneuëk Gobnyan Isa Almaseh.
4 Kamoe tuléh nyoe mangat até geutanyoe biet-biet geumbira.
5 Nyoe kheueh haba nyang kamoe deungoe keuhai Aneuëk Gobnyan dan nyang kamoe peutrok keugata: Allah nyan trang, dan nibak Gobnyan hana seupôt meubacut pih.
6 Meunyoe tanyoe peugah bahwa udeb meusaboh ngon Gobnyan, padahai geutanyoe udeb lam seupôt, ngon lagée nyan tanyoe kameusulet bah kheueh ngon tutoe haba meunan cit ngon buet.
7 Teuma meunyoe tanyoe udeb lam trang, lagée Allah na lam trang, ngon lagée nyan tanyoe udeb krab that, rukon sidroe ngon nyang laén, dan darah Isa, Aneuëk Gobnyan, geupeu gleh tanyoe nibak mandum desya.
8 Meunyoe tanyoe tapeugah bahwa tanyoe hana meudesya, tanyoe ka tapeunget droe teuh keudroe; dan Po teu Allah hana lam até geutanyoe.
9 Teuma meunyoe tanyoe ta-aku desya-desya geutanyoe dikeue Po teu Allah, Gobnyan teuma geupeutrok janji Geuh dan geupeubuet peue nyang ade. Gobnyan teuma geupeu amphon bubena desya-desya geutanyoe dan geupeu gleh geutanyoe nibak mandum buet tanyoe nyang salah.
10 Teuma meunyoe tanyoe tapeugah bahwa tanyoe hana meudesya, tanyoe ka ta-anggab sang-sang Allah nyan sulet dan tanyoe hana takeubah feureuman Allah lam até tanyoe.


Chapter 2

1 Aneuëk-aneuëk lôn! Ulôn teumuléh nyoe keugata mangat gata bék peubuet desya. Teuma meunyoe na nyang peubuet desya, nibak geutanyoe na sidroe nyang bila, Gobnyan na kheueh Isa Almaseh nyang ade nyan; Gobnyan geulakée ubak Bapak keu geutanyoe.
2 Meulalu Isa Almaseh nyan kheueh desya-desya tanyoe teupeuamphon. Dan kon desya-desya tanyoe mantong, meunan cit desya banmandum umat manusia. 3 Meunyoe tanyoe taát ubak peue-peue nyang geupeurintah lé Allah, nyan tanda jih tanyoe taturi Po teu Allah.
4 Ureuëng nyang peugah, "Ulôn kuturi Allah," teuma hana taát peue-peue nyang geupeurintah nyan, ureuëng nyan duseuta, dan Allah hana lam até ureuëng nyan.
5 Teuma ureuëng nyang taát ubak peurintah Allah, ureuëng nyan jigaséh Allah ngon sampoereuna. Nyan kheueh tanda jih bahwa tanyoe udeb meusaboh ngon Allah.
6 Soe-soe mantong nyang peugah jihnyan udeb meusaboh ngon Allah, ureuëng nyan meuseuti udeb jih jiseutôt tapak Almaseh.
7 Syedara-syedara nyang lôn gaséh! Nyang ulôn tuléh nyoe kon kheueh saboh peurintah nyang barô. Nyoe peurintah awai nyang ka teupeutrok ubak gata yoh phon-phon that gata meuiman ubak Almaseh; na kheueh haba nibak Allah nyang ka gata deungoe sigohlom nyan.
8 Bah pih meunan, peurintah nyang ulôn tuléh nyoe barô cit; sabab keubeunaran deuh teukalon lam tuboh Almaseh dan lam droe gata. Sabab seupôt seumaken leunyab dan trang nyang beutôi ka jipeuphon meucahya.
9 Ureuëng nyang peugah bahwa jihnyan na lam trang teuma ureuëng nyan mantong jibanci keusyedara jih, ureuëng nyan mantong na lam seupôt trok ánjinoe.
10 Ureuëng nyang jigaséh keusyedara jih, ureuëng nyan udeb lam peungéh ngon sabab nyan hana meusapeue pih jeuet keusabab ureuëng laén rhot lam desya.
11 Teuma ureuëng nyang banci keu syedara jih, ureuëng nyan na lam seupôt. Ureuëng nyan jijak lam seupôt, dan hana jiteupeue ho jihjak, sabab lé seupôt nyan jeuet keusabab hana deuh jikeumalon.
12 Ulôn teumuléh keugata, Aneuëk-aneuëk, sabab desya gata ka teupeuamphon sabab lé Almaseh.
13 Ulôn teumuléh keugata, Ayah-ayah, sabab gata taturi Gobnyan yoh awaikon phon that Gobnyan na. Ulôn teumuléh keugata hai Ureuëng-ureuëng muda, sabab gata ka tapeutalo Si jeuhet.
14 Ulôn teumuléh keu gata, Aneuëk-aneuëk, sabab gata taturi Allah Bapak. Ulôn teumuléh keu gata, Ayah-ayah, sabab gata taturi Feureuman nyang ka na yoh awaikon. Ulôn teumuléh keu gata, Ureuëng-ureuëng muda, sabab gata teuga. Feureuman Allah na lam até gata, dan gata ka tapeutaloe Si Jeuhet.
15 Bék kheueh tacinta donya nyoe, atawa peue mantong nyang na lam donya nyoe. Meunyoe gata tacinta donya, nyan makna jih hana tacinta ubak Bapak.
16 Peue-peue mantong nyang na lam donya nyoe -- nyang jiharab lé manusia meudesya, nyang jikalon laju meuheuét dan jipeubangga-bangga atra nyan -- banmandum nyan na kheueh hai-hai nyang hana meuasai nibak Bapak, teuma nibak donya.
17 Donya dan peue-peue mantong nyang na lam donya nyang jimeuheuet lé manusia, teungoh leunyab. Teuma keu ureuëng nyang jiturot peukheun Po teu Allah, ureuëng nyan teutab udeb siumu masa.
18 Aneuëk-aneuëk lôn, akhé jamén katho that! Ka lheueh teupeugah bak gata yoh awaikon bahwa Musoh Almaseh teuma teuka; dan jinoe ka teuka jai that musoh Almaseh. Nyan kheueh tanda jih bahwa akhé jamén ka tho that.
19 Musoh-musoh Almaseh nyan na kheueh ureuëng-ureuëng nyang ka jitinggai tanyoe, sabab awaknyan nyang sibeuna jih keubiet kon ureuëng geutanyoe. Meunyoe awaknyan awak geutanyoe, ka teuntée awaknyan teutab na meusajan ngon tanyoe. Teuma awaknyan jitinggai tanyoe, ngon lagée nyan deuh kheueh bahwa hana meusidroe pih lamkawan awaknyan nyang biet-biet jitamong golongan tanyoe.
20 Teuma gata ka tateurimong Roh Allah nyang geusintong lé Isa Almaseh dan nyan kheueh sabab jih gata banmandum taturi ubak ajaran-ajaran nyang beutôi.
21 Ngon lagée nyan, ulôn tuléh surat keu gata kon lé sabab gata hana taturi ajaran nyang beutôi, teuma sabab lé gata ka taturi, dan gata pih ka tateupeue bahwa hana nyang sulet lam ajaran nyang beutôi nyan.
22 Nyang meusulet na kheueh ureuëng nyang peugah bahwa Isa nyan kon Raja Peuseulamat nyang ka geupeu janji lé Allah. Ureuëng nyan Musoh Almaseh; ureuëng nyan hana jiaku Bapak meunan cit Aneuëk. 23 Ureuëng nyang jiaku Aneuëk, nyan saban cit hana jiteurimong Bapak. Dan ureuëng nyang jiaku Aneuëk, nyan saban cit ka jiteurimong Bapak.
24 Sabab nyan, haba nyang ka gata deungoe yoh phon-phon that ka tapatéh harôh kheueh gata jaga beugét-gét dalam até. Meunyoe haba nyan gata simak gét-gét, gata teuma sabe udeb meusaboh ngon Aneuëk dan ngon Bapak cit teuma.
25 Dan nyoe kheueh nyang geupeu janji lé Almaseh keudroe keugeutanyoe; udeb seujati dan keukai.
26 Ulôn tuléh nyoe keugata keuhai ureuëng-ureuëng nyang teungoh jiuseuha jipeungét gata.
27 Teuma meunyoe keuhai gata keudroe, Almaseh ka geusintong Roh Gobnyan ateueh gata. Dan simantong Roh Geuhnyan mantong na ateueh gata, hana peureulée na ureuëng laén jipurunoe gata. Sabab Roh Gobnyan jipurunoe gata peue-peue mantong; dan peue nyang geupurunoe nyan beutôi, kon haba sulet. Sabab nyan, bah kheueh gata taát ubak peue nyang jipurunoe lé Roh nyan, dan bah kheueh gata teutab udeb meusaboh ngon Almaseh. 28 Ngon lagée nyan, aneuëk-aneuëk lôn, teutab kheueh udeb meusaboh ngon Almaseh, mangat singoh bak watée Gobnyan teuka, tanyoe tameuhadab ngon Gobnyan deungon beurani nyang peunoh, dan hana jeuet musöm sabab lé malée.
29 Gata ka tateupeue bahwa Almaseh udeb meunurot nyang geulakée lé Allah, sabab nyan gata harôh tateupeue, tieb-tieb ureuëng nyang udeb meunurot ajaran Allah na kheueh aneuëk Allah.


Chapter 3

1 Ngieng kheueh padub na Allah geugaséh tanyoe, sampoe tanyoe geuaku sibagoe aneuëk-aneuëk Gobnyan. Dan biet, tanyoe na kheueh aneuëk-aneuëk Allah. Nyang kheueh sabab jih donya nyang jeuhet nyoe hana jituri tanyoe, sabab donya hana jituri Allah.
2 Syedara-syedara nyang lôn gaséh! Tanyoe jinoe na kheueh aneuëk-aneuëk Allah, teuma keuadaan tanyoe singoh gohlom teuntée. Teuma tanyoe tateupeue bahwa meunyoe Almaseh teuka, tanyoe jeuet lagée Gobnyan, sabab tanyoe takalon Gobnyan lam keuadaan nyang sibeuna jih. 3 Banmandum ureuëng nyang na harapan nyoe ubak Almaseh, jijaga droe jih mangat biet-biet suci, gleh nibak mandum desya lagée Almaseh nyang suci.
4 Ureuëng nyang peubuet desya, jilanggéh huköm Allah; sabab desya-desya na kheueh teulanggéh ateueh huköm Allah.
5 Gata tateupeue bahwa Almaseh teuka keu geusampôh bubena desya-desya manusia, dan bahwa hana desya lam droe Gobnyan.
6 Banmandum ureuëng nyang udeb meusaboh ngon Almaseh, hana sabe-sabe jipeubuet desya. Ureuëng nyang sabe-sabe jipeubuet desya, hántom na jikalon Almaseh atawa jituri Gobnyan.
7 Aneuëk-aneuëk lôn, bék tapeubiyeue droe gata jipeusisat lé soemantong. Ureuëng nyang peubuet lagée kheun Allah na kheueh aneuëk Allah saban lagée Almaseh na kheueh Aneuëk Allah.
8 Teuma ureuëng nyang hana jipiôh-piôh jipeubuet desya na kheueh aneuëk Iblih, sabab Iblih meudesya yoh awaikon. Keunyoe kheueh Aneuëk Allah teuka, na kheueh keugeupeuhanco banmandum buet Iblih.
9 Ureuëng nyang ka jeuet keu Aneuëk Allah, hana sabe-sabe jipeubuet desya, sabab sifeuet Allah keudroe na nibak gobnyan. Dan sabab lé Allah nyan Bapak jih, ngon lagée nyan jihnyan hana sabe-sabe jipeubuet desya.
10 Nyoe kheueh beda jih aneuëk-aneuëk Allah ngon aneuëk-aneuëk Iblih: soe mantong nyang hana jipeubuet keuheundak Allah, atawa hana jigaséh keu syedara jih, ureuëng nyan kon aneuëk Allah.
11 Yoh awaikon ka teupeutrok haba nyoe ubak gata: Tanyoe harôh tagaséh sidroe ngon nyang laén.
12 Bék kheueh geutanyoe lagée Kain, nyang jeuet keu aneuëk Iblih jipoh maté syedara jih keudroe. Peue sabab Kain jipoh maté syedara jih? Sabab hai-hai nyang jipeubuet na kheueh salah, teuma hai-hai nyang jipeubuet lé syedara jih na kheueh beutôi.
13 Sabab nyan, Syedara-syedara lôn, bék kheueh hireuen meunyoe ureuëng-ureuëng donya nyoe jibanci gata.
14 Tanyoe tateupeue bahwa tanyoe ka tateubiet nibak maté, dan taminah ubak udeb. Tanyoe tateupeue, sabab tanyoe tagaséh sabe syedara tanyoe. Ureuëng-ureuëng nyang hana geunaséh, nyan saban cit mantong jikuasa lé maté. 15 Ureuëng nyang banci keu syedara jih na kheueh tukang poh maté gob, dan gata tateupeue bahwa sidroe tukang poh maté gob nibak jih hana udeb seujati dan keukai.
16 Ngon jalan nyoe kheueh tanyoe tateupeue cara tagaséh sabe keudroe-droe: Almaseh ka geupeujok udeb Geuh keu geutanyoe. Sabab nyan, tanyoe pih bah kheueh tapeujok droe tanyoe keu syedara-syedara tanyoe!
17 Meunyoe sidroe ureuëng seb lam udeb jikalon syedara jih kureueng hana sapeue na, teuma hana jitem tulông syedara jih nyan, pakriban ureuëng nyan jeuet jipeugah bahwa jihnyan jigaséh keu Allah?
18 Aneuëk-aneuëk lôn! Bék kheueh tanyoe tapeugah tagaséh teuma bak babah mantong atawa ngon tutoe haba mantong. Bah kheueh tanyoe tameugaséh ngon gaséh nyang seujati, nyang tabri bukeuti ngon buet geutanyoe.
19 Meunan kheueh cara geutanyoe tateupeue bahwa tanyoe na kheueh aneuëk-aneuëk Allah nyang beutôi, dan até tanyoe meuteumé teunang dikeue Po teu Allah.
20 Tanyoe tateupeue, bahwa meunyoe tanyoe jipeusalah lé até tanyoe, iéleumé Allah leubeh rayeuk nibak iéleumé tanyoe, dan bahwa Gobnyan geuteupeue peue-peue mantong.
21 Ngon lagée nyan, Syedara-syedara lôn nyang teucinta, meunyoe até tanyoe hana jipeusalah tanyoe, tanyoe hase tameuhadab ubak Po teu Allah ngon beurani.
22 Dan peue nyang tanyoe lakée nibak Gobnyan, meuteumé, sabab geutanyoe taát ubak peue-peue nyang geupeurintah lé Gobnyan dan tapeubuet peue nyang teupeugalak até Gobnyan. 23 Nyang Gobnyan peurintah bak geutanyoe na kheueh: Tanyoe meuseuti tameuiman ubak Aneuëk Gobnyan, na kheueh Isa Almaseh, dan tanyoe bah kheueh saléng tameugaséh, lagée nyang ka geupeurintah lé Isa ubak geutanyoe.
24 Banmandum ureuëng nyang taát ubak peue-peue nyang geupeurintah lé Allah, ureuëng nyan udeb meusaboh ngon Allah, dan Allah meusaboh ngon awaknyan. Dan tanyoe tateupeue bahwa Allah meusaboh ngon tanyoe, sabab Gobnyan ka geubri Roh Geuh keu geutanyoe.


Chapter 4

1 Syedara-syedara nyang lôn cinta! Bék kheueh tapatéh bak mandum ureuëng nyang meungaku na Roh Allah, teuma ujoe kheueh awaknyan leubeh ilée keutateupeue peu kheueh roh nyang na nibak awaknyan asai jih nibak Allah atawa bukon. Sabab jai that nabi-nabi peuleusu ka jijak bansaboh nyoe.
2 Meunoe kheueh cara jih mangat gata teupeue peu kheueh Roh Allah atawa kon: Ureuëng nyang jiaku bahwa Isa Almaseh geutreun lam donya sibagoe manusia, ureuëng nyan biet na Roh nyang teuka nibak Allah. 3 Teuma meunyoe na ureuëng nyang hana jiaku hai nyan, ureuëng nyan nibak jih hana Roh Allah. Ureuëng nyan na roh nibak Musoh Almaseh. Syedara ka tadeungoe bahwa roh nyan teuma teuka, dan jinoenyoe kana lam donya nyoe.
4 Teuma Aneuëk-aneuëk lôn, gata na kheueh milék Allah. Gata ka tapeutalo nabi-nabi peuleusu, sabab Roh nyang na nibak gata leubeh meukuasa nibak roh nyang na nibak ureuëng-ureuëng milék donya nyoe.
5 Nabi-nabi peuleusu nyan jimeututoe keuhai donya nyoe, dan donya jideungoe peue nyang jipeugah lé awaknyan, sabab awaknyan milék donya.
6 Teuma geutanyoe na kheueh aneuëk-aneuëk Allah; dan ureuëng nyang jituri Allah, jideungoe peue nyang tanyoe peugah. Ureuëng nyang kon milék Allah, hana jideungoe peue nyang tanyoe peugah. Meunan kheueh cara jih tanyoe tateupeue beda Roh nyang jibri ajaran nyang beutôi ngon roh nyang jipeusisat tanyoe.
7 Syedara-syedara nyang lôn cinta! Jak kheueh geutanyoe saléng tameugaséh sidroe ngon nyang laén, sabab geunaséh nyan asai jih nibak Allah. Ureuëng nyang na gaséh, na kheueh aneuëk Allah dan jihnyan jituri Allah.
8 Ureuëng nyang hana gaséh, ureuëng nyan hana jituri Allah; sabab Allah na kheueh gaséh.
9 Allah geupeugah bahwa Gobnyan geugaséh tanyoe ngon cara geukirém Aneuëk Geuh nyang tunggai u lam donya nyoe mangat tanyoe meuteumé udeb meulalu Aneuëk Geuh nyan.
10 Nyoe kheueh gaséh nyan: Bukon geutanyoe nyang ka tagaséh Allah, teuma Allah nyang gaséh keugeutanyoe dan geukirém Aneuëk Geuh mangat meulalu Aneuëk Geuhnyan tanyoe meuteumé amphon banmandum desya-desya geutanyoe.
11 Syedara-syedara nyang lôn cinta, meunyoe Allah meunan that geugaséh geutanyoe, tanyoe pih harôh tagaséh sidroe ngon nyang laén.
12 Hana meusidroe pih nyang ka lheueh jikalon Allah, teuma meunyoe geutanyoe sabe na lam gaséh sayang, Po teu Allah meusaboh ngon geutanyoe dan geunaséh Gobnyan ka jeuet sampoereuna lam tuboh geutanyoe.
13 Lé sabab Allah ka geubri ubak geutanyoe Roh Gobnyan, ngon lagée nyan tanyoe tateupeue bahwa geutanyoe ka udeb meusaboh ngon Po teu Allah, dan Allah udeb meusaboh ngon geutanyoe.
14 Kamoe keudroe ka lheueh kamoe kalon Aneuëk Allah, dan kamoe peusampoe bahwa Gobnyan geukirém lé Bapak keu jeuet keu Raja Peuseulamat donya nyoe. 15 Barang sigasoe nyang jiaku bahwa Isa nyan Aneuëk Allah, Po teu Allah udeb meusaboh ngon ureuëng nyan, dan ureuëng nyan pih udeb meusaboh ngon Allah.
16 Tanyoe keudroe tateupeu dan tapatéh keuhai geunaséh Allah ateueh geutanyoe. Allah nyan gaséh. Ureuëng nyang udeb jih jikuasa lé gaséh, ureuëng nyan meusaboh ngon Allah, dan Allah meusaboh ngon ureuëng nyan.
17 Gaséh geupeujeuet sampoereuna lam tuboh geutanyoe, mangat tanyoe beutajeuet nibak Uroe Peungadelan. Tanyoe teuma na beurani, sabab udeb geutanyoe lam donya nyoe saban lagée udeb Almaseh.
18 Ureuëng nyang jirasa geunaséh Allah, nibak ureuëng nyan hana jituri keupeurasaan teumakot; sabab geunaséh nyang sampoereuna jipeuleunyab banmandum peurasaan teumakot nyan. Ngon lagée nyan deuh kheueh teukalon bahwa nibak ureuëng nyan gohlom jirasa gaséh Allah nyang sampoereuna meunyoe ureuëng nyan teumakot meuhadab ngon Uroe Peungadelan.
19 Tanyoe geugaséh, sabab Allah ka leubeh ilée geugaséh tanyoe.
20 Meunyoe sidroe-droe ureuëng jipeugah, "Ulôn kugaséh Allah," teuma ureuëng nyan hana jigaséh keusyedara jih keudroe, ureuëng nyan tukang meusulet. Sabab ureuëng nyang hana jigaséh syedara jih nyang jikalon keudroe, hana mungken ureuëng nyan hase jigaséh Allah nyang hana deuh jikalon.
21 Sabab nyan, nyoe peurintah nyang geubri lé Almaseh ubak geutanyoe: Barang sibagoe jigaséh Allah harôh jigaséh teuma syedara-syedara jih.


Chapter 5

1 Ureuëng nyang jipatéh bahwa Isa na kheueh Raja Peuseulamat nyang geupeu janji lé Allah, ureuëng nyan na kheueh aneuëk Allah. Ureuëng nyang jigaséh sidroe ayah, jigaséh cit keu aneuëk jih teuma.
2 Ngon jalan nyoe kheueh tanyoe tateupeue bahwa tanyoe tagaséh keu aneuëk-aneuëk Allah: Tanyoe tagaséh Allah dan taát ubak peue-peue nyang geupeurintah. 3 Sabab, tagaséh Allah nyan makna jih ta-taát ubak peue-peue nyang geupeurintah. Dan peue-peue nyang geupeurintah nyan hana that geuhon nibak geutanyoe,
4 sabab tieb-tieb aneuëk Allah hase jipeutaloe donya nyang jeuhet nyoe. Dan tanyoe tapeutaloe donya nyoe ngon iman geutanyoe.
5 Soe kheueh nyang hase peutaloe donya? Na kheueh ureuëng-ureuëng nyang jipatéh bahwa Isa na kheueh Aneuëk Allah.
6 Isa Almaseh kheueh nyang teuka lam donya nyoe ngon ié pumanö Geuh dan ngon darah maté Gobnyan. Gobnyan teuka kon ngon ié mantong, teuma ngon ié dan darah. Dan Roh Allah keudroe jimeusaksi bahwa nyan beutôi, sabab Roh hántom na meusulet.
7 Na lhée droe saksi:
8 Roh Allah, ié ngon darah -- ban lhée nyan jimeusaksi nyang saban.
9 Tanyoe tapatéh ubak manusia nyang meusaksi, teuma saksi Po teu Allah leubeh teuga lom. Dan nyan kheueh keusaksian nyang geubri lé Allah keuhai Aneuëk Gobnyan.
10 Sabab nyan, ureuëng nyang meuiman ubak Aneuëk Allah, ka jiteurimong keusaksian nyan lam até jih; teuma ureuëng nyang hana jipatéh ubak Allah, ka jianggab siulah-ulah Allah nyan sulet, sabab jihnyan hana jipatéh peue nyang geupeugah lé Allah keuhai Aneuëk Gobnyan.
11 Nyoe keusaksian nyan: Po teu Allah ka geubri keugeutanyoe udeb nyang seujati dan keukai, dan Aneuëk Gobnyan na kheueh punca udeb nyan.
12 Ureuëng nyang na Aneuëk Allah, nibak jih na udeb nyan; dan ureuëng nyang hana Aneuëk Allah nyan, nibak ureuëng nyan hana udeb nyan.
13 Ulôn teumuléh keu gata nyang meuiman ubak Aneuëk Allah, mangat gata tateupeue bahwa gata kana udeb seujati dan keukai.
14 Dan tanyoe tajeuet meuhadab ubak Allah, sabab geutanyoe yakén Gobnyan geuteurimong doá tanyoe, meunyoe tanyoe lakée peue mantong nyang sisuai ngon peue nyang sisuai deungon keuheundak Gobnyan. 15 Sabab tanyoe tateupeue bahwa Gobnyan geuteurimong doá tanyoe peue-peue mantong nyang ta lakée, ngon lagée nyan tanyoe pih tateupeue bahwa Gobnyan geubri keugeutanyoe peue mantong nyang tanyoe lakée.
16 Meunyoe gata takalon sidroe ureuëng Kristen nyang peubuet desya nyang hana jeuet keuakibat ureuëng nyan gadôh udeb seujati dan keukai, bah kheueh gata meudoá ubak Allah; dan Allah teuma geubri udeb keu ureuëng nyan. Nyoe keunong ateueh awaknyan nyang desya jih hana jeuet keuakibat ureuëng nyan gadôh udeb jih. Teuma na desya nyang jeuet keuakibat ureuëng nyan gadôh udeb jih, keuhai nyan ulôn hana lôn peugah gata harôh meudoá ubak Allah.
17 Banmandum buet nyang salah na kheueh desya, teuma na desya nyang hana jeuet keuakibat ureuëng nyan gadôh udeb seujati dan keukai nyan.
18 Tanyoe tateupeue bahwa banmandum ureuëng nyang ka jeuet keu aneuëk-aneuëk Allah, hana sabe-sabe jipeubuet desya, sabab Aneuëk Allah geulindong ureuëng nyan, dan Si Jeuhet hana hase jipeubuet sapeue ateueh ureuëng nyan.
19 Tanyoe tateupeue bahwa tanyoe na kheueh milék Allah, bah pih bansigom donya nyoe dimiyueb peurintah Si Jeuhet.
20 Tanyoe tateupeue bahwa Aneuëk Allah ka teuka dan ka geubri peungeurtian keugeutanyoe, mangat tanyoe taturi ubak Allah nyang beutôi. Tanyoe udeb meusaboh ngon Allah nyang beutôi dan udeb meusaboh ngon Aneuëk Gobnyan Isa Almaseh. Nyoe kheueh Allah nyang beutôi, dan nyoe kheueh udeb seujati nyang keukai.
21 Aneuëk-aneuëk lôn, peujiôh kheueh droe gata nibak beurala-beurala!