1 Samuela

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31


Chapter 1

1 Samuela 1 1 Sa dua na tamata mai na vanua o Ramacaimi – Sofimi ena veiulunivanua e Ifereimi, na tamata oqo o Ilikena na luvei Jeroimi, na luvei Ilaiu, na luvei Tou, na luvei Supi, na kai Ifereimi.
2 Sa rua na watina, o Venina kei Ana. O Venina sa vakaluveni, sa sega ga o Ana.
3 Na tamata oqo sa lako cake mai na nona koro ena veiyabaki me lotu ka vaka caboi soro vei Jiova ni lewevuqa e Sailo. Oi rau talega na luvei Ilai, o Ovini kei Vanaisi na bete ni Kalou o Jiova, e rau sa tiko mai kea.
4 Ni sa dauyaco mai na gauna me dau laki vakacaboi soro kina o Ilikena, sa dau solia na i votavota vei Venina kei iratou na luvena tagane kei na luvena yalewa talega.
5 Vei Ana ga, sa dau vakaruataka nai votavotani sa lomani Ana vakalevu cake, e dina ga ni sogota tiko na Kalou na nona kato ni gone.
6 Sa dau vakararawataki Ana vakalevu o Venina, sa qai dau ca ga vakalevu ni sogota tiko o Jiova na nona kato ni gone.
7 Sa dau veiyabaki ni sa lako tiko o koya ki na vale ni Kalou ka sa dau vakararawataki vakalevu, sa qai dautagi tikotikoga ka sega ni kana.
8 Sa tukuna o Ilikena vei Ana na watina, "Na cava o sa tagi tiko kina? Na cava o sa sega ni kana tiko kina? Na cava o sa rui rarawa tiko kina? Au sa sega beka ni vinaka cake mai vei iratou na lewe tini na luvemu tagane?"
9 Sa tucake o Ana ni ratou sa kana ka gunu oti mai Sailo. O Ilai na bete, sa dabe tiko ena i dabedabe voleka ki katuba ni valeniveitavaki i Jiova.
10 Sa bibi vakalevu na yaloi Ana ka sa masu vakalevu vei Jiova ka tagi vakararawa sara.
11 Sa cakava e dua na yalayala ka tukuna, "I Jiova na Kalou ni lewevuqa, kevaka o ni sa raica dina na rarawa ni Nomuni vada ka nanumi au, ka sega ni guilecavi au, ia, ka solia vua na Nomuni vada e dua na gone tagane, au na soli koya lesu vei Jiova ena veisiga kece ni nona bula ka ena sega ni tara na yame ni toro na nona qavokavoka."
12 Sa qai yaco, ni sa masu tiko ena mata i Jiova – o Ilai na bete sa vakaraica tiko na gusuna.
13 Sa vosa tikoga e yalona o Ana, ka sa yavala tikoga na gusuna, na domona sa sega ni rorogo. Oqo sa nanuma kina o Ilai ni sa mateni tiko.
14 Sa tarogi koya o Ilai, "Me cava soti na dede ni nomu mateni tiko? Kauta tani na waini mai vei iko!"
15 Sa sauma vua o Ana ka vaka: "Sa sega na noqu turaga, oi au na yalewa sa dau rarawa vakalevu na yaloqu, au sa sega ni mateni ena waini se yaqona, ia au sa sova tiko na yaloqu vei Jiova.
16 "Kakua ni raica na vada oqo me vaka e dua na yalewa ca, mai na levu ni noqu vakatakekere kei na vutugu, au sa qai vosa sara ga oqo."
17 Sa vosa mai o Ilai ka vaka: "Mo lako ena vakacegu, na nodra Kalou na Isireli ena solia na veika sa gadreva na yalomu, me vaka o sa kerea Vua."
18 Sa sauma mai o Ana, "Me kune loloma na vada oqo ena Matamuni." Sa qai lako yani o koya ka kana ka sa sega tale ni kune na rarawa e matana.
19 E ratou sa yadra vakamataka lailai ka lotu ena mata i Jiova ka lesu tale ki nodratou e Rama. Sa moceri Ana o Ilikena – sa qai nanumi koya o Jiova.
20 Ni sa qai oti e dua na gauna lekaleka, sa qai kunekune o Ana ka vakasucuma e dua na luvena tagane ka vakayacani koya o Samuela – "Baleta ni'u sa kerei koya mai vei Jiova."
21 O Ilikena kei na nona vuvale kece, e ratou sa lako cake me vakacabora vei Jiova nai soro vakayabaki kei na nona yalayala.
22 Sa sega ni lako cake o Ana, ni sa tukuna vei watina, "Au na sega ni lako cake me yacova ni sa kali oti na gone; au na qai kauti koya me basika ena mata i Jiova ka me tiko kina ka sega ni mudu."
23 Sa tukuna vua o Ilikena, "Cakava na ka e Vinaka vei iko – waraka me kali mada. Laiva vua na Kalou me vakayacora na Nona vosa." Sa wawa tiko na yalewa ka susuga tiko na gone me yacova ni sa kali oti.
24 Ni sa kali oti na gone, sa kauti koya cake kei na tolu na bulumakau, dua nai vakarau falawa, dua na i vakarau waini, ka kauti koya mai ki na vale ni Kalou e Sailo. Sa tubu cake na gone.
25 Era sa vakamatea e dua na bulumakau ka kauta mai na gone vei Ilai.
26 Ka sa tukuna, "Noqu Turaga! Me vaka sa bula na yalomu, oi au na yalewa e a tucake tu eke vei kemuni, ka masu tiko vei Jiova.
27 "Na gone oqo au a masulaka, ka sa solia vei au o Jiova me vaka au a kerea Vua.
28 "O koya oqo, au sa soli koya kina vei Jiova; ena nona bula taucoko sa na soli tiko vei Jiova o koya." E ratou sa qaravi Jiova mai kea.


Chapter 2

1 Samuela 2 1 Sa masu o Ana ka tukuna: "Na yaloqu sa reki tiko vei Jiova, na noqu kaukauwa sa laveti cake vei Jiova, au sa dredrevaki ira na kequ meca, ni'u sa rekitaka tiko na Nomuni veivakabulai.
2 "Sa sega tale e vakatatabutaki me vakataki Jiova, ni sa sega tale, oi kemuni duadua ga. Sa sega tale na vatudei me vaka na noda Kalou.
3 "Me kua tale na vosa vakadokadoka; me kua na viavialevu me lako mai na gusumuni, ni o Jiova, sa Kalou ni kila na ka; sa vakarautaka o Koya nai valavala kecega.
4 "Na veqa ni dakai nodra na tamata qaqa sa musuki tani, o ira sa tacaqe era sa vauci ena kaukauwa.
5 O ira sa mamau, era volitaki ira ena vuku ni madrai kei ira sa viakana era sa mudu tale ni viakana. O koya mada ga sa yava sa vakasucuma e vitu na gone, kei koya sa levu na luvena sa yaco me malumalumu ka ninini mai.
6 "Sa veivakamatei ka veivakabulai o Jiova; Sa kauta sobu ki nai bulubulu ka sa veivakaturi cake mai nai bulubulu.
7 Sa veivakadravudravuataki, sa veivakavutuniyautaki talega, sa veivakalolovirataki, sa veilaveti cake talega.
8 Sa vakaturi ira cake na dravudravua mai na soso, ka laveti ira cake na daukerekere mai nai binibini dravusa. Me ra tu vata kei ira na ravouvou, me ra taukena vata nai ukuuku vakaTuraga. "Na veiduru e vuravura sa nei Jiova, ka vakatuvana kina na vuravura.
9 Ena yadrava ka maroroya na yavadra na Nona tamata. O ira ga na tamata ca era na vagalui ena butobuto. "Ena vuku ni kaukauwa ena sega ni dua e qaqa.
10 O ira na meca i Jiova era na vakavurumemeataki, na lomalagi ena kurukuru mai vei ira. "Ena solia na kaukauwa vei ira na Nona veitui, ka vakacerecerea na Nona tu na Nona lumuti."
11 Sa qai lako o Ilikena ki na nona vale ki Rama, ia na gone sa veiqaravi tikoga vei Jiova ena matai Ilai na bete.
12 E rau sa gone ca sara na luvei Ilai, ni rau sa sega ni kilai Jiova.
13 Sa dau i tovo vakabete vei ira na tamata, o ya ni sa dua e mai vakacabora e dua nai soro, na nona dauveiqaravi na bete sa dau kauta mai nai cula matai tolu e ligana ni sa saga tiko na lewe ni manumanu.
14 Ena cula yani na lewe ni manumanu ke sa tiko ena tavuteke, se e na kuro ni wai, se ena beseni, se ena kuro levu; ena taura me kena na bete ns veika kece sa cabo mai ena i cula. Era sa dau cakava oqo mai Sailo vei ira kece na Isireli sa dau lako mai kina.
15 Ni se bera talega ni dau tavu na uro, sa dau lako mai na nona dauveiqaravi na bete ka tukuna vua sa vakacabora, na lewena mei soro, "Mo solia mai e so na lewena me la'ki tavu me kena na bete – ni na sega ni taura o koya na kena sa buta oti, ena taura na kena e se droka."
16 Kevaka sa tukana mai na tamata, "Me tavu mada e liu na uro; oti oqo, mo qai taura ga na kena levu o vinakata." Sa qai dau saumi mai vakaoqo, "E sega, mo solia ga mai oqori, ke sega, au na taura vakaukauwa."
17 O koya oqo, na nodrau i valavala ca na gone, sa rui levu sara ena mate i Jiova – Ni sa vakaveitaliataka na tamata nai soro vei Jiova.
18 Sa veiqaravi tiko o Samuela ena mata i Jiova ni se gone lailai ga, ka sa dau dara tiko na Efoti lineni.
19 Sa vakarautaka talega vua o tinana nai oro, sa dau kau mai vua ena veiyabaki, ni rau sa daulako mai kei watina me vakacabora nai soro vakayabaki.
20 O Ilai sa dau vakalouvinakataki Ilikena kei watina ka tukuna, "O Jiova me solia vei iko na veikawa mai vua na yalewa oqo ena vuku ni votavota sa dau soli vei Jiova." Ni sa oti oqo e rau sa dau qai gole lesu ki vale.
21 Sa qai sikovi Ana o Jiova me kunekune kina ka vakasucuma e tolu na luvena tagane kei na rua na luvena yalewa. A sa tubu cake na gone o Samuela ena mata i Jiova.
22 Sa qase sara o Ilai, ka sa dau rogoca na veika e rau sa dau cakava na luvena vei ira na Isireli kei na nodrau dau moceri ira na yalewa era sa dau mai tiko ena mata ni katuba ni vale ni veitavaki.
23 Sa tukuna vei rau na luvena, "Ena cava drau sa dau cakava kina na veika ca oqo? Au sa rogoca na nomudrau cakacaka ca mai vei ira kece na tamata oqo.
24 "E sega, kemudrau na luvequ, sa sega ni tukutuku vinaka au sa rogoca. Drau sa vakavuna na nodra lako sese na tamata i Jiova.
25 "Kevaka sai valavala ca e dua vua tale e dua – me qai lewai koya na Kalou. Ia, kevaka sai valavala ca, e dua vua na Kalou, O cei me na qai sorovaki Koya?" E dina ni ra sega ni rogoca na nodra vosa na qase ni sa nakita o Jiova me vakamatei ira.
26 Sa tubu me levu na gone o Samuela ka sa taleitaki koya vakalevu o Jiova kei ira talega na tamata.
27 Sa lako mai e dua na tamata ni Kalou ki vei Ilai ka tukuna vua, "Sa tukuna na Kalou o Jiova, 'Au sa sega beka ni vakaraitaki Au vakavinaka kina vuvale nei tamamu ni ra a tiko mai Ijipita ena vale nei Fero?
28 'Au sa sega beka ni digitaki koya mai vei ira na Isireli me Noqu bete, me vakacabora nai soro ena i cabocabo ni soro, me vakama na ka boi vinaka, me dara tiko na Efoti e Mataqu? Au sa sega beka ni solia ki na vuvale nei tamamu nai soro kece nodra na Isireli sa vakamai ena bukawaqa?
29 'Na cava dou sa dau vakacaqeta kina na i soro kei na Noqu madrali, o koya Au sa vakarota ena Noqu i tikotiko, ka o sa dokai rau vakalevu cake na luvemu mai vei Au, mo tara kina na veika vivinaka mai nai soro me nomu nai madrali kece era sa kauta mai na Isireli na Noqu tamata.'
30 "Oqo, sa tukuna kina o Jiova na nodra Kalou na Isireli, 'Au sa tukuna vakaidina, ni nomu vuvale kei na vuvale nei tamamu me dau lako voli e mataqu me sega ni mudu.' Ia, oqo sa tukuna kina o Jiova: 'Me yawa sara vei Au, o ira sa dokai Au, Au na dokai ira – o ira sa vakawaletaki Au, era na vakawaletaki talega.
31 'Mo kila, sa lako tiko mai na siga Au na musuka kina na ligamu kei na liga ni vale nei tamamu, me kua kina ni dua na tagane e matua ena nomu vale.
32 'O na raica na meca ena Noqu i tikotiko, veitalia na veika vivinaka sa cakava o Jiova vei ira na Isireli. Ena sega na tagane matua ena nomu vale me sega ni mudu.
33 'Kevaka e dua na nomu tamata Au sa sega ni musuka tani mai na Noqu cabocabo ni soro – ena vakaleqa na matamu ka vakararawataka na yalomu. O ira kece na nomu kawa era na mate ga ni se qai seraka mai na nodra bula.
34 'Oqo mei vakatakilakila vei iko, oi rau na luvemu tagane, o Ovini kei Vanaisi – ni na dua ga na siga e rau na mate ruarua kina.
35 'Au na vakatubura cake ga vei Au e dua na bete yalodina me muria na veika sa tiko e yaloqu, kei na veika sa tiko e Noqu mona. Au na tara cake e dua na vale vua, ka me lako voli e mata i Noqu lumuti me sega ni mudu.
36 'Ena yaco mai na gauna, ni o ira kece sa vo e vale, era na lako mai ka cuva vei Koya me dua kina na tiki ni siliva kei na tiki ni madrai, ka tukuna, "Au kerea me'u biu yani kina dua nai tutu vaka bete – me'u kania kina e dua na tiki ni madrai."'"


Chapter 3

1 Samuela 3 1 Sa qaravi Jiova tiko o Samuela ena matai Ilai, Sa kune vakadredre na vosa i Jiova ena gauna koya, ka sa sega talega ni basika tiko vakalevu nai vakatakila.
2 Sa yaco ena gauna o ya ni sa davo toka o Ilai ena nona i davodavo, ka sa malumalumu sara na nona rai,
3 Ni se bera talega ni bokoca na cina ni vale ni veitavaki – ena vanua sa tiko kina na kato ni Kalou ka sa davo sobu talega o Samuela me vakarau moce,
4 Sa kacivi Samuel o Jiova,ka sa sauma yani, "Sai Au Oqo!"
5 Sa cici sara vei Ilai ka vaka: "Sai Au oqo, ni o sa kacivi au mai." "Sa tukuna mai lako ka davo tale." Sa lako ka davo tale.
6 Sa kaci tale o Jiova, "Samuela!" Sa tucake o Samuela ka lako vei Ilai ka vaka: "Sai au oqo, ni o sa kacivi au." Sa sauma o Ilai, ''Au sa sega ni kacivi iko na luvequ, lako ka davo tale."
7 (E se sega mada ni veikilai, kei na Kalou o Samuela se me sa bau vakaraitaki vua na vosa ni Kalou.)
8 Sa kacivi Samuela tale ena i katolu ni gauna o Jiova. Sa tucake ka lako vei Ilai ka tukuna yani, "Sai au oqo ni o a kacivi au mai." Sa kila o Ilai ni sa kaciva na gone o Jiova.
9 Sa tukuna o Ilai vei Samuela, "Lako ka davo tale, kevaka me yaco ni sa kaci tale mo qai tukuna, 'Mo ni vosa Jiova ni sa vakarorogo na Nomuni tamata.'" Sa lako tale o Samuela ka davo sobu.
10 Sa lako mai o Jiova ka tucake tu ka kaci me vaka sa dau cakava e liu, "Samuela! Samuela!" Sa sauma mai o Samuela, "Mo ni vosa ni sa vakarorogo na Nomuni tamata."
11 Sa tukuna o Jiova vei Samuela: "Raica au na cakava e dua na ka e Isireli, na daliga ruarua ni tamata kece, era na rogoca.
12 "Ena siga o ya Au na cakava kina vale nei Ilai na veika kece Au sa tukuna oti me baleta na nona vale mai na i matai me yacova nai otioti.
13 "Ni'u sa tukuna oti vua, ni'u sa na lewa na nona vuvale me sega ni mudu ena vuku ni caka cala sa kila oti tu – baleta ni rau sa cakacaka vakaveitalia na luvena,ia, sa sega ni tarovi rau.
14 "Oqo, au sa bubului me baleta na vuvale nei Ilai, baleta na caka cala ni vuvale oqo sa sega ni rawa ni bokoci ena dua nai soro cava ga sa caka me sega ni mudu."
15 Sa davo tikoga o Samuela me yacova na mataka, ka sa dolava na katuba ni vale nei Jiova. Sa rere o Samuela ni tukuna vei Ilai na veika sa vakatakilai vua.
16 Sa kacivi Samuela mai o Ilai ka tukuna, "Samuela na luvequ!" Sa sauma mai o Samuela, "Sai au oqo."
17 Sa tukuna o koya, "Na cava sa tukuna vei iko o Jiova? Mo kua ni vunitaka mai vei au. Me na cakava vei iko na Kalou – kevaka o sa vunitaka vei au na vei ka kece sa vosa kina vei iko o Koya."
18 Sa tukuna vua o Samuela na veika kecega – ka sa sega ni vunitaka vua e dua na ka. Ka sa tukuna, "O Jiova ga, me cakava na veika sa vinaka ga vua."
19 Sa tubu cake o Samuela ka sa tiko vata kei koya na Kalou, ka sa sega ni vakatara me vakalutuma na vosa ni Kalou ki na qele.
20 O ira kece na Isireli mai Tani ki Perisepa, era sa kila ni sa vakatikori me Parofita i Jiova o Samuela.
21 Sa rairai tale mai Sailo o Jiova. Ni sa vakatakilai Koya o Jiova vei Samuela mai Sailo ena vosa i Jiova.


Chapter 4

1 Samuela 4 1 Sa yaco mai na vosa i Samuela vei ira na Isireli. Era sa lako yani na Isireli me vala kei ira na Filisitia ka mai vaka i tikotiko volekati Apenisa; o ira na Filisitia era sa mai tiko e Epeki.
2 Era sa vakarautaki ira na Filisitia me vala kei ira na Isireli; ni sa ia na veivaluvaluti era sa vakadrukai na Isireli mai vei ira na Filisitia ka era sa vakamatei kina e va na udolu na sotia.
3 Ni ra sa lesu mai na nodra i tikotiko, era sa tukuna na nodra qase na Isireli, "Ena cava sa vakadrukai keimami kina na Kalou ena matadra na Filisitia? Me da kauta mai na Kato ni Kalou mai Sailo kivei keda eke, ni sa tiko vata kei keda – ena rawa ni vakabulai keda mai na ligadra na meca."
4 Era sa lako ki Sailo, me ra la'ki kauta mai na kato ni veiyalayalati i Jiova ni lewevuqa o Koya sa tiko ena kedra maliwa na Jerupi. Oi rau na luvei Ilai o Ovini kei Vanaisi e rau sa tiko mai kea vata kei na kato ni Veiyalayalati ni Kalou.
5 Ni sa kau mai ki na nodra i tikotiko na kato ni Veiyalayalati i Jiova, era sa kaila vakadomoi levu na Isireli ka sa yavavala na vanua.
6 Ni ra sa rogoca na domo ni kaila oqo o ira na Filisitia, era sa tukuna, "Na rorogo levu cava oqo sa lako tiko mai ena nodra i tikotiko na Iperiu?" Era sa qai kila, ni sa tiko vata kei ira na kato ni Kalou.
7 Era sa rere na kai Filisitia ka tukuna "Sa lako mai na Kalou ena nodra i tikotiko!" E ra sa tukuna tale, "Eda na leqa! Ni sa sega ni yaco na veika vaka oqo e liu.
8 "Eda na leqa! O cei ena vakabulai keda mai na liga kaukauwa ni Kalou oqo? Oqo na Kalou e a vakaleqai ira na kai Ijipita ena mate ca kecega mai na vanua liwa.
9 "Mo ni kaukauwa ka tu vakatagane, oi kemuni na kai Filisitia, mo ni kua ni nodra tamata cakacaka kina na Iperiu oqo, me vakataki ira veikemuni. Mo ni tu mai vakatagane ka vala!"
10 Era sa mai vala na Filisitia ka sa vakadrukai o ira na Isireli ka dro ki na nodra i tikotiko. Sa dua na veivakamatei levu ni ra sa bale e tolusagavulu na udolu na sotia vei ira na Isireli.
11 Sa vesuki talega na Kato ni Kalou kei rau na luvei Ilai o Ovini kei Vanaisi e rau sa mate talega.
12 E dua na tagane ni Penijamini sa cici mai nai valu ena siga o ya ka lako mai ki Sailo, sa kakabasubasu na nona i sulu ka soso vakalevu na uluna.
13 Ni sa yaco yani, sa dabe tiko o Ilai ena nona i dabedabe ka vakararai tiko, ni sa yavavala vakalevu tiko na yalona ena vuku ni kato ni Kalou.
14 Ni sa rogoca o Ilai na tagi levu oqo, sa taroga sara, "Na cava sa rorogo levu mai oqo?" Sa lako vakatotolo mai na tagane ka tukuna vei Ilai.
15 Sa yabaki ciwasagavulu ka walu o Ilai ka sa buwawa talega na matana.
16 Sa tukuna vei Ilai na tagane ka vaka: "Au sa lako mai ena i valu, ka dro mai ena i matai ni yatu i valu ena mataka oqo." Sa taro o Ilai, "Sa vakacava oi rau na luvequ?"
17 Sa saumi vua ka vaka: "Era sa dro na Isireli mai vei ira na Filisitia ka sa dua na mate levu vei ia na tamata. E rau sa mate talega o Ovini kei Vanaisi kei na Kato ni Kalou sa kau talega vakavesu."
18 Ni sa tukuni vei Ilai me baleta na Kato ni Kalou, sa lutu vakanadaku mai na nona i dabedabe o Ilai mai na matamata, ka sa ramusu sara na domona ka mate, ni sa qase ka rui bibi sara o koya. Sa lewai Isireli o koya me vasagavulu na yabaki.
19 Na wati Vanaisi, na vugoi Ilai, sa bukete tiko ka sa vakarau vakasucu tiko; ni sa rogoca o koya nai tukutuku ni sa tauri vakavesu na Kato ni Kalou, ka rau sa mate talega o Ilai na nona momo kei Vanaisi na watina, sa cuva ka vakasucu, baleta ni sa tarai koya mai na mosi ni taratara.
20 Sa mate na yalewa ena nona vakasucu, ia, ni sa vakarau mate sa tukuna mai vua na nona dauveiqaravi, "Kua ni rere o sa vakasucuma e dua na gone tagane." Sa sega ni sauma lesu mai o koya.
21 Sa vakayacana na gone o koya na dauveiqaravi me Ikapote kenai balebale. " Sa lako tani e Isireli nai ukuuku ni Kalou!" baleta na Kato ni Kalou sa tauri vakavesu kei na nodrau mate o Ilai kei Vanaisi.
22 Sa tukuna na dauveiqaravi, "Nai ukuuku ni Kalou sa lako tani e Isireli, ni sa tauri vakavesu na kato ni Kalou.


Chapter 5

1 Samuela 5 1 Era sa kauta na Kato ni Kalou mai Apenisa ki Asitoti o ira na Filisitia.
2 Era sa kauta mai na Kato ni Kalou, ki na vale nei Takoni a sa mai tu vata kei Takoni.
3 Ni ra sa yadra mai ena mataka na kai Asitoti, era sa raica ni sa cuva vakatobuicu tu o Takoni ena mata ni Kato ni Kalou. Era sa vakaduri Takoni cake tale ena kena i tutu makawa na tamata.
4 Ni ra sa yadra tale mai ena mataka ka tarava, sa cuva vakatobuicu tale tu o Takoni ena mata ni Kato ni Kalou. Oqo ga sa kamusu sara na uluna mai na yagona kei na ligana ruarua. Sa tu duadua ga na yagona.
5 O koya oqo, o ira na bete levu vei Takoni kei ira na daulako mai ki na vale nei Takoni, era sa sega ni butuka tale na vanua o ya me yacova na siga oqo.
6 Sa tarai ira tiko vakabibi na kai Asitoti na liga i Jiova. Sa ravuti ira ka vakatauva vei ira na soso ca. Vei ira e Asitoti kei na veivanua vakavolivolita.
7 Ni ra sa raica na kai Asitoti oqo. Era sa tukuna: "Na kato ni Kalou me kua ni tiko vata kei keda. Na liga ni Kalou sa rui tarai keda kina na ka e ca sara, sa vaka talega kina vei Takoni na noda kalou."
8 Era sa vakasoqoni vata na turaga kece e Filisitia ka tukuna, "Na cava me da cakava ki na Kato ni nodra Kalou na Isireli?" Era sa tukuna, "Me kau na Kato ni Kalou ki Kaca." Era sa qai kauta tani na "Kato ni Kalou" ni Isireli.
9 Sa yaco ni ra sa kauta tani na Kato ni Kalou, na liga i Jiova sa tara yani na koro ka sa yaco kina e dua na veivakarusai levu; era sa samuti na tagane ena koro, ruarua na qase kei na gone, sa tarai ira talega na bo ca ka boi ca.
10 Era sa vakauta sara na Kato ni Kalou ki Ekironi, sa qai yaco me kau ki Ekironi na Kato ni Kalou. Era sa tagi vakalevu na kai Ekironi ka tukuna, "Era sa kauta mai na Kato ni Kalou ni Isireli" me mai vakamatei keimami kei ira kece na tamata!"
11 Era sa lako ka vakasoqoni ira kece na turaga ni Filisitia ka tukuna, "Me vakau lesu na Kato ni Kalou ni Isireli ki na kena vanua, me kakua kina ni vakamatei keimami kei ira kece oqo," sa dua na veivakarusai levu sa yaco ena veikorokoro; sa kaukauwa sara na liga ni Kalou vei ira.
12 O ira sa sega ni mate, sa tarai ira na vidikoso lelevu, ka sa lako cake tikoga ki lomalagi na nodra tagi na tamata.


Chapter 6

1 Samuela 6 1 Sa tiko na Kato ni Kalou e Filisitia me vitu na vula.
2 Era sa kacivi mai na bete kei ira na daunikila na ka vakalou mai vei ira na kai Filisitia, ka tarogi vei ira, "Na cava me da cakava ki na Kato ni Kalou ni Isireli oqo?" Tukuna mai me da vakauta lesu vakacava ki na kena vanua?"
3 Era sa tukuna mai, "kevaka o ni sa kauta lesu, me kua ni vakau lesu wale. Me vakalesui tale vua na Kalou vata kei na i soro ni "caka cala." O ni na qai vakabulai kina, ka ena kilai talega ena kemuni maliwa na vuna e sega ni lako tani kina na Ligana mai vei kemuni."
4 Era sa tukuna na Filisitia, "Na cava na i soro ni caka cala me keimami vakalesua Vua?" Sa saumi mai ka vaka, "Me lima nai bulibuli koula vakailavo me vaka na kedra i wiliwili na turaga ni Filisitia. Ni sa tarai kemuni kece na mate ca oqori kei ira talega na nomuni turaga.
5 Mo ni cakava gona kina nai vakatakarakara ni bo kei na kalavo ena koula ea ravuti kina na vanua, ka mo ni solia vua na Kalou ni Isireli na vakarokoroko: de na qai vakagalalataka na Ligana mai vei kemuni vei ira na nomuni kalou kei na nomuni vanua.
6 "Ena cava o ni sa yalokaukauwa tiko kina me vakataki ira na Ijipita kei Fero? Ni sa cakava vei ira na ka lelevu – era se bese ga ni vakagalalataki ira na tamata me ra lako – me ra vakagalalataki yani?
7 "Mo ni cakava e dua na qiqi vodoki vou, me rua na bulumakau yalewa e se bera ni vaka i vuataki – me rau vesuki kina qiqi vodoki me kau tani mai vei rau na luvedrau.
8 "Na kato ni Kalou me biu yani ki na qiqi vodoki kei nai soro ni caka cala sa buli oti ena koula, me biu toka e yasa ni kato me vakatalai yani me rau lako.
9 "Mo ni vakaraica, me rau lako yani ki na nodra yasana ki Beci–Semesi, sa qai Koya dina sa cakava vei keda na ka ca levu oqo. Kevaka e sega, ena sa kila ni sa sega ni Koya oqo sa tarai keda tiko ena Ligana—sa yaco tikoga mai vei keda na veika oqo."
10 Sa vakayacori sara na veika oqo; sa kau sara mai na bulumakau yalewa e rua oqo ka vesu vata kei na qiqi vodoki, ka rau sa kautani yani na luvedrau.
11 Sa biu sara na kato ni Kalou ena qiqi vodoki kei na kato sa tiko kina nai soro ni caka cala buli ena koula.
12 Sa lako vakadodonu yani na bulumakau ki na sala vaka ki Beci– Semesi, ka lako sara yani ki na salatu, e rau sa sega tale ni gole ki na i mawi se ki nai matau, era sa muri tiko yani na turaga ni Filisitia me yaco sara ki nai yalayala kei Beci- Semesi.
13 O ira mai Beci-Semesi era sa tatamusuki tiko mai na veiwiti ena buca, era sa rai yani ka raica na "Kato ni Kalou", era sa mamarau vakalevu ni ra sa raica.
14 Sa lako mai na qiqi vodoki ki na veiwere nei Josua e Beci-Semesi ka mai tu vakadua; sa tu e kea e dua na vatu levu, era sa basuka na qiqi vodoki ka vakacabora na bulumakau e rua oqori mei soro kama vei Jiova.
15 Era sa kauta mai ki ra na "Kato ni Kalou" o ira na Livai kei na veika sa tiko vata ena qiqi vodoki. Era sa vakacabora na i sorokama kei na i soro ni veivinakati ena siga vata ga o ya vei Jiova.
16 Ni ra sa raica na lima na turaga ni Filisitia na veika oqo era sa lesu tale ki Ekoroni ena siga tiko ga o ya.
17 Na buli koula era sa kauta mai na Filisita me baleta nai soro ni caka cala vei Jiova, sa dua me nei Asitoti, dua vei Qasa, dua vei Esekiloni, dua vei Kaca ka dua vei Ekironi,
18 Nai bulibuli kalavo koula me vaka nai wiliwili ni veikorokoro nodra na Filisitia sa lewai mai vei ira na veituraga, na veikoro tauri kei na veikoro mai vanua, me yaco sara ki na vatu levu o Epeli na vanua era sa biuta kina na "Kato ni Kalou" na vatu sa tiko, me yacova na siga oqo ena buca nei Josua mai Beci-Semesi.
19 Sa vakamatei ira mai Beci-Semesi, baleta ni ra sa rai ena loma ni "Kato ni Kalou". Sa vakamatei ira e limasagavulu na udolu ka mani vitusagavulu na tagane. Era sa tagi na tamata baleta ni sa veivakamatei o Jiova ena dua na veivakamatei levu.
20 Era sa tukuna na kai Bevi-Semesi, "O cei sa na tu rawa ena mata i Jiova na Kalou Tabu oqo? O cei ena lako cake mai vei keda?"
21 Era sa talatala ki Kirijaci Jaerimi ka vaka: "O ira na Filisitia era sa kauta lesu mai na Kato i Jiova; mo ni lako sobu mai ka mai kauta cake yani vei kemuni."


Chapter 7

1 Samuela 7 1 Era sa lako mai na kai Kirijaci Jaerimi ka taura na Kato ni Kalou ka kauta mai ki na vale nei Apinatave; sa vakatabui na luvena o Iliesa me maroroya na Kato ni Kalou.
2 Sa tiko vakadede e Kirijaci Jaerimi na Kato ni Kalou, sa tiko e kea me ruasagavulu na yabaki ka era sa tagici Jiova vakalevu na Isireli.
3 Sa vosa vei ira kece na Isireli o Samuela ka vaka: "Kevaka o ni sa lesu vei Jiova ena yalomuni taucoko ka biuta laivi na veikalou ni veivanua oqo kei Esitaroci mai vei kemuni, ka vakarautaka na yalomuni vei Jiova, ka qaravi koya ga; ena qai vakabulai kemuni mai na ligadra na Filisitia."
4 Sa yaco me ra biuti Peali kei Esiteroci laivi na Isireli ka qaravi Jiova duadua ga.
5 Sa tukuna yani o Samuela, "Mo ni vakasoqoni vata kece mai na Isireli e Misipa, au na masulaki kemuni vei Jiova."
6 Era sa vakasoqoni vata mai e Misipa, era sa takiva mai na wai ka sova yani ena mata i Jiova. Era sa lolo ena siga o ya ka tukuna, "Keimami sai valavala ca vei Jiova." Sa lewa vei ira na Isireli o Samuela mai Misipa ena siga o ya.
7 Ni ra sa rogoca na Filisitia na nodra sa soqoni vata na Isireli mai Misipa, o ira na turaga e Filisitia era sa lako cake me vala kei Isireli. Ni ra sa rogoca oqo na Isireli, era sa rerevaki ira na Filisitia.
8 Era sa tukuna mai vei Samuela, "Me kua ni cegu na nomu kacivi Jiova na nomuni Kalou ena vukuda,
9 Sa taura e dua na lami o Samuela ka vakacabora me i soro kama taucoko vei Jiova. Sa tagi talega vei Jiova me baleti ira na Isireli, ka sa sauma mai vua o Jiova.
10 Ni sa vakacabora tiko nai soro kama o Samuela – era sa toso voleka mai na Filisitia me vala kei Isireli. Sa kurukuru mai o Jiova ena dua na kurukuru levu vei ira na Filisitia ena siga o ya. Era sa yatayata ka veilecayaki na Filisitia ka era sa vakamalumalumutaki mai vei ira na Isireli.
11 O ira na Isireli era sa lako mai Misipa ka cicivi ira na Filisitia ka cemuri ira me yaco sara ki Beci- Kara.
12 Sa taura o Samuela e dua na vatu levu ka vakatikora ena kedrau maliwa o Misipa kei Seni ka vakatoka me yacana o Apenisa, kena i balebale, "Sa veivuke o Jiova me yacova mai na siga oqo."
13 Era sa vakamalumalumutaki na Filisitia, ka era sa sega tale ni torova mai nai yalayala kei Isireli. Na liga i Jiova sa veivala tiko kei ira na Filisitia ena gauna kece i Samuela.
14 Na veikoro kece era sa taura na Filisitia mai vei ira na Isireli, era sa vakasuka tale vei ira na Isireli, mai Ekironi ki Kaca; o Isireli sa taura tale na nona veivanua mai vei ira na Filisitia. Sa yaco talega na veisaututaki vei ira na Isireli kei ira na Amoraiti.
15 O Samuela sa lewa e Isireli ena nona bula taucoko.
16 Ena veiyabaki sa dau veilakoyaki ki Peceli, ki Kilikali kei Misipa, ka sa lewa e Isireli mai na veivanua kece o ya.
17 Ia, sa dau lesu ga ki Rama ni sa tiko kina na nona vale. Mai kea sa lewa tiko kina e Isireli ka sa tara talega e kea e dua nai cabocabo ni soro vei Jiova.


Chapter 8

1 Samuela 8 1 Sa yaco ni sa qase mai o Samuela, sa cakava me ra lewa e Isireli na luvena.
2 Na yaca i koya na ulumatua o Joeli, na i karua o Apaitia; e rau sa lewa tiko mai Pieri-sepa.
3 E rau sa sega ni muria na we ni yavana na luvena. E rau sa dau vuki tani ki na veika e rawa vakailawaki, e rau sa taura na veika ni veivakabutobutotaki ka rau sa vakatanitaka na lewa e dodonu.
4 Era sa vakasoqoni kece mai na qase e Isireli ka lako mai vei Samuela ki Rama.
5 Ka tukuna vua, "Raica o sa qase mai, oi rau na luvemu, e rau sega ni muri iko. Oqo mo cakava mada vei keimami e dua na tui me lewa vei keimami me vakataki ira na veimatanitu."
6 Na ka oqo sa vakararawataki Samuela, ni ra sa tukuna mai, "Solia vei keimami e dua na tui me lewa vei keimami." Sa masu vei Jiova o Samuela.
7 Sa sauma mai vei Samuela o Jiova, "Rogoca na domodra na tamata ena veika kece era na tukuna vei iko; ni ra sa sega ni cati iko, ia, era sa cati Au ga, ni ra sa sega ni vinakata me'u lewa vei ira.
8 "Me vaka na cakacaka era sa cakava mai na siga Au sa kauti ira mai kina mai Ijipita, me yacova na siga oqo — era sa biuti Au kina ka qarava na veikalou tani, era sa cakava talega oqo vei iko.
9 "Oqo mo rogoca na domodra, ia, mo vakasalataki ira rawa ka vakaraitaka vei ira na nodra i vakarau na tui ena lewa vei ira."
10 Sa tukuna kece vei ira na tamata o Samuela na veika sa vakarota o Jiova, me baleti ira na tui.
11 Sa tukuna kina; "Ena vaka oqo na nodra i tovo na tui, o ira ena lewa ena vukumuni; Era na tauri ira na luvemuni tagane ka digitaki ira mera nona qiqi ni valu, ka so me ra nona dauvodo ose, ka so me ra dau cici tiko ena matadra na qiqi ni valu.
12 "Ena digitaki ira nai liuliu ni veiudolu kei nai liuliu ni vei limasagavulu, eso me ra dau siviyara ka dau tatamusuki, eso me ra dau caka yaragi ni vala kei na veiyaya ni qiqi ni valu.
13 "Ena tauri ira na nomuni goneyalewa me ra nona ka boivinaka, dauvakasaqa, ka dauvavavi.
14 "Ena taura na nomuni veikavivinaka mai na were, mai na veivaini kei na veiolive ka solia vei ira na nona tamata.
15 "Ena taura nai katini ni nomuni vuata kei na vaini ka solia vei ira na nona tamata cakacaka kei ira na dauveiqaravi.
16 "Ena tauri ira na tagane kei na nomuni yalewa daucakacaka kei ira na nomuni cauravou momoqaqa, kei na nomuni yasa digitaki, me ra cakacaka ena vukuna.
17 "Ena taura nai katini ni nomuni sipi, ka o ni na nona tamata ni veiqaravi.
18 "O ni na qai tagi ena gauna o ya, me baleta na tui o ni sa digitaka me nomuni, o Jiova ena sega ni via rogoci kemuni ena siga o ya."
19 O ira na tamata era sa sega ga ni via rogoca na domo i Samuela ka tukuna, "Sega, me dua ga na tui vei keimami,
20 "Me keimami vakataki ira ga na veimatanitu me lewa na tui vei keimami ka me liu vei keimami ka valataka na neimami i valu."
21 Ni sa rogoca o Samuela na nodra vosa na tamata, sa la'ki cavuta sara ena daligai Jiova.
22 Sa tukuna mai o Jiova vei Samuela, "Rogoca na domodra ka solia vei ira e dua na tui." Sa tukuna o Samuela vei ira na Isireli, "Me lako na tamata yadua ki na nona koro."


Chapter 9

1 Samuela 9 1 Sa dua na tamata mai vei ira na Penijamini na yacana o Kisi na luvei Epieli; na luvei Seroa, na luvei Pikoraci, na luvei Afia, na Penijamini, na tamata qaqa ka kaukauwa.
2 Sa dua na luvena o Saula, e cauravou totoka ka kilai tani. Sa sega ni dua tale e Isireli me sivia na taucoko ni cauravou oqo. Sa vatukai vinaka ka tudonu.
3 E a yali na asa nei Kisi na tama i Saula ena gauna o ya. O Kisi sa tatau vei luvena, "Kauta e dua na dauveiqaravi, drau tu ka lako me vakasaqarai na asa."
4 Ni sa lako yani ki na veiulunivanua e Ifereimi ena loma ni vanua o Salisa, e rau sa sega ni kunea kina. E rau sa lako yani ki Salimi, e rau sa sega ni kunea kina. E rau sa lako curuma na vanua vaka Penijamini ka sa sega ga ni kune.
5 Ni rau sa lako mai ki na vanua vaka Supi, sa tukuna o Saula vua na nona dauveiqaravi, "Daru lesu tale, o tamaqu sa na guilecava na asa, ka sa na leqataki kedaru tiko."
6 Sa tukuna sara vua na dauveiqaravi, "Raica, ena koro o ya sa tiko kina e dua na tamata ni Kalou ka sa tamata vakaturaga; sa dauyaco kece na veika e dautukuna se vosa kina. Me daru lako vua, de vakaraitaka vei kedaru na sala me daru lako kina."
7 Sa tukuna tale o Saula vua na nona dauveiqaravi, "Kevaka daru sa lako vua na tamata ni Kalou, na cava me daru kauta vua? Sa oti na madrai, sa sega na ka me daru kauta vua na tamata ni Kalou, na cava me daru cakava?"
8 Sa sauma mai na dauveiqaravi vei Saula ka vaka: "Raica sa tiko oqo vei au e dua na dola me'u solia vua na tamata ni Kalou me vakaraitaka kina vei kedaru na sala."
9 (Ena gauna o ya e Isireli, ni sa lako e dua me taroga na Kalou, sa dau tukuna vaka oqo: "Me da mai lako mada vua na daurairai"; ni sa parofita tiko o Samuela ena gauna o ya – sa dau kacivi e liu me daurai.)
10 Sa tukuna o Saula vua na nona dauveiqaravi, "O sa caka vinaka, daru lako sara yani." E rau sa lako sara ki na koro sa tiko kina na tamata ni Kalou.
11 Ni rau sa cabeta na delana ki na koro, e rau sa sota kei na so na yalewa era sa mai taki wai, ka rau sa taro yani, "Sa tiko beka e ke na daurai?"
12 Era sa sauma mai, "Io, sa tiko eke na daurai, sa tiko ga e liu oqori. Drau totolo, ena lako mai o koya ki na koro, ni sa tiko na nodra vakacaboi soro o ira na tamata e na koro ena yasana cecere.
13 "Ni drau sa lako ga mai kina koro, drau na kunei koya ni bera ni lako cake ki na yasana cecere me kana kina. Era na sega ni kana na tamata me yacova ni sa lako mai o koya, baleta me vakalouvinakataka o koya nai soro – ni oti koya era na qai kana o ira sa sureti mai. Drau lako cake, ni gauna sara ga oqo, ena laukune kina o koya."
14 E rau sa lako cake ki na koro, ni rau sa lako tiko mai, sa lako donui rau tiko mai o Samuela, ni lako cake tiko ki na vanua cecere.
15 Sa tukuna oti e daligai Samuela o Jiova na siga ena lako mai kina o Saula ka tukuna,
16 "Ena mataka, na gauna vata ga oqo, Au na vakatala mai vei iko e dua na tamata mai na vanua i Penijamini, mo lumuti koya me nodra i liuliu na Noqu tamata, na Isireli, o koya oqo ena vakabulai ira na Noqu tamata mai na ligadra na Filisitia. Ni'u sa rai tiko vei ira na Noqu tamata, baleta ni sa lako cake tiko mai vei Au na nodra tagi."
17 Ni sa raici Saula o Samuela, sa tukuna vua o Jiova, "Sai koya oqori na tamata Au sa tukuna tiko vei iko. O koya oqo ena liu vei ira na Noqu tamata."
18 Sa torovi Samuela tiko mai o Saula ena matamata ka taroga, "Au kerea, mo ni vakaraitaka vei au na nona vale na daurai?"
19 Sa sauma yani vei Saula o Samuela, "Oi Au ga na daurai – mo liu yani vei au kina yasana cecere, ni o na kana vata kei au e daidai; ni mataka, au na qai laivi iko mo lako ena mataka ni'u sa tukuna oti vei iko na veika sa tu e lomamu.
20 "Me vaka na nomu asa sa yali oti oqo me tolu na siga, mo kua ni leqa taka baleta ni sa kune oti. Sa tiko beka vei cei na ka era gadreva na Isireli? E sega beka ni tiko vei iko kei ira na vale nei tamamu?"
21 Sa sauma o Saula ka vaka: "Au sa sega beka ni dua na Penijamini, mai na yavusa lailai duadua e Isireli, na noqu vuvale na vuvale murimuri duadua vei ira na Penijamini? Ena cava o sa vosa kina vaka oqo vei au?"
22 Sa kauti Saula o Samuela kei na nona dauveiqaravi ka kauti rau mai ki na vale ni soqo, ka vakadaberi rau ena vanua daudokai nodra sa dau sureti mai; era sa lewe tolusagavulu na tamata.
23 Sa tukuna o Samuela vua na dauvakasaqa, "Kauta mai na tikina au sa solia vei iko, na kena au a tukuna, 'Me biu tiko vakatikitiki.'"
24 Na daunivakasaqa sa taura mai na lewe ni manumanu ka vakarautaka e matai Saula. Sa tukuna o Samuela, "Sai koya sara ga oqo, na veika sa maroroi tu, sa qai vakrautaki oqo vei iko. Mo kana baleta ni sa vakarautaki oqo vei iko baleta ni'u sa dau sureti ira mai na tamata." Sa kana vata o Saula kei Samuela ena siga o ya.
25 Ni rau sa lako sobu mai na tikina cecere ki na koro, e rau sa veivosaki tiko o Saula kei Samuela ena tabana e cake ni vale.
26 E rau sa yadra vakamataka lailai ni sa kida mai na mataka, sa kaciva Saula o Samuela ki na dela ni vale ka tukuna, "Mo tucake me'u talai iko yani ki na nomu sala." Sa tucake o Saula e rau sa lako yani ki tuba vata kei Samuela.
27 Ni rau sa lako yani ki na taudaku ni koro sa tukuna sara o Samuela vei Saula, "Mo tukuna vua na nomu dauveiqaravi me liu yani vei kedaru. Sa lako sara yani. "O iko mo tiko mada eke, me'u tukuna kina vei iko na nona vosa na Kalou."


Chapter 10

1 Samuela 10 1 Sa taura o Samuela na tavaya waiwai ka sova yani ki na ului Saula, ka reguci koya ka tukuna "Sa sega li ni o Jiova sa lumuti iko mo nodra i liuliu na Nona i votavota?
2 "Ni o sa lako tani mai vei au e dai, o na raica e rua na tamata ena i bulubulu nei Raijeli ena vanua vaka Penijamini e Selesa ka rau na tukuna vei iko, 'Na asa o a la'ki vakasaqara sa kune. O tamamu sa oti na nona leqataka na asa ka oqo sa leqataki iko vakalevu, ni sa taroga tiko, "Na cava mada me'u cakava me baleti na luvequ?"'
3 "Mo na qai lako yani vakadodonu mai kea ki na vunikau teribinici e Tepori. Mai kea e lewe tolu na tamata e ratou sa lako cake tiko vua na Kalou e Peceli me mai sotavi iko. E dua e kauta tiko mai e tolu na luve ni me, e dua tale sa taura tiko e tolu nai buli madrai kei na dua tale sa taura tiko e dua na saqa waiwai.
4 "E ratou na kidavaki iko ka solia vei iko e rua nai buli madrai, ka o na taura mai na ligadratou.
5 "Ni oti oqori, o na lako mai ki na ulunivanua ni Kalou, na vanua sa tiko kina na nodra yavusa i valu na Filisitia. Ena yaco ni o sa lako mai kea ki na koro, o na sotavi ira e dua nai lawalawa parofita ni ra sa lako sobu tiko mai na vanua cecere vata kei nai yaya ni vakatagi, na tibereli, na sici bitu, na api sa liu tiko e matadra; era na parofisai tiko.
6 "Na yalo ni Kalou ena curumi iko mai, ka o na parofisai vata kei ira, o na vuki me dua tani tale na tamata.
7 "Ni sa yaco na veika oqo vei iko, mo cakava me vaka sa gadrevi vei iko; ni sa tiko vata kei iko na Kalou.
8 "O na liu vei au ki Kilikali; au na lako dina mai vei iko me'u vakacabora nai soro kama kei nai soro ni veivinakati. Mo na wawa me vitu na siga me yacova ni'u sa lako mai vei iko ka vakatakila na ka mo cakava."
9 Sa yaco ni sa lako tani mai vei Samuela, Na Kalou sa solia tale vua e dua na yalo; Na veika kece sa yaco ena siga o ya.
10 Ni rau sa lako mai ki na ulunivanua, era sa tu e kea na Parofita me sotavi koya, sa curumi koya mai na Yalo ni Kalou ka sa vakatekivu sara me parofisai vata kei ira na parofita.
11 Sa yaco, vei ira kece sa kilai koya e liu era sa raica ni sa parofisai tiko vata kei ira na parofita – era sa veitukuni yaka, "Na cava oqo sa yaco tiko vua na Luvei Kisi? Sa parofita talega o Saula?"
12 Sa dua na tamata mai kea sa sauma mai, "Ia, o cei na tamadra?" Sa yaco me sa dua na vakaibalebale, "Sa dua talega vei ira na Parofita o Saula?"
13 Ni sa oti na nona parofisai tiko, sa lako cake ki na vanua cecere.
14 Sa vosa vei Saula kei koya na nona dauveiqaravi o nona momo, "Drau a lako i vei?" Sa sauma sara yani, "Me vakaraica na asa. Ni keirau sa sega ni kunea rawa, keirau sa mani lako sara vei Samuela."
15 "Drau tukuna mada mai vei au se cava sara e tukuna o Samuela, au kerea – sa vosa mai kina o momo nei Saula."
16 Sa sauma yani o Saula ka vaka: "Sa tukuna vakadodonu ga ni sa kune na asa." Ena vuku ni matanitu, sa sega ni via vakaraitaka na veika sa vosa kina o Samuela.
17 Sa kacivi ira kece na tamata ki vei Jiova o Samuela mai Misipa,
18 ka sa vosa vei ira na luvei Isireli, "Sa tukuna o Jiova na nodra Kalou na Isireli, 'Au sa kauti ira mai na luvei Isireli mai Ijipita ka vakabulai kemuni mai na vanua o ya kei na ligadra na veimatanitu kei ira talega sa dau vakabobulataki kemuni.'
19 "Ena siga oqo, o ni sa cati Jiova na nomuni Kalou, o koya sa vakabulai kemuni mai na kemuni meca kecega kei na nomuni vakararawataki kecega, ka o ni sa tukuna vua, 'E sega me sa dua ga na neimami tui.' O koya oqo, mo ni vakaraitaki kemuni ena mata ni Kalou vakayavusa ka vakamataqali."
20 Sa vakavuna o Samuela me ra toso mai vakavoleka na yavusa kece e Isireli, ka sa digitaki na yavusa i Penijamini.
21 Ni sa vakavuna tiko na nodra toso voleka mai na yavusa i Penijamini ena nodra dui veivuvale, sa digitaki na vuvale i Matiri. O Saula na luvei Kisi sa digitaki. Ni ra sa vakasaqarai koya, era sa sega ni kunea.
22 Era sa vakatarogi Jiova, "Se sa lako mai na tamata se sega?" Sa sauma mai o Jiova, "Sa tiko e kea o koya, ni sa vuni tiko ena vanua era sa tu kina na i yaya."
23 Era sa cici yani ka kauti koya mai kea; ni sa tucake tu ena kedra maliwa – sa balavu cake o koya mai vei ira kecega mai na tabadra ka lako cake.
24 Sa tukuna o Samuela vei ira kecega na tamata, "O ni sa raica na tamata sa digitaka o Jiova, ni sa sega ni dua e vakataki koya mai vei ira kece na tamata?" Era sa kaila kece na tamata ka vaka: "Me bula balavu na tui!"
25 Sa vakamacalataka o Samuela na nodra i valavala na tui ka vola sara ena dua nai vola ka biuta yani ena mata i Jiova. Sa vakatalai ira yani o Samuela, na tagane vakayadua ki na nodra veivale.
26 Sa lako talega ki vale o Saula ki Kipea; era sa lako vata kei koya na tamata qaqa, o ira sa tara oti na yalodra na Kalou.
27 O ira sa vukitani era sa tukuna, "Ena vakabulai keda vakacava na tamata oqo?" Era sa cati Saula, ka sega ni via kauta mai vua e dua na ka ni loloma. Ia sa tauri koya tikoga vakamalua o Saula.


Chapter 11

1 Samuela 11 1 O Naesi na Amoni sa lako cake mai ka mai toka vaka i valu me vala kei Selesa Kiliati; o ira kece na tamata ni Sepesa era sa tukuna vei Naesi, "Cakava vei keimami e dua na veidinadinati, keimami na qai qaravi iko."
2 Sa sauma mai o Naesi na Amoni, "Au na cakava na veidinadinati kevaka sa caka oqo, o ya me'u kauta tani na yaloka ni matamu i matau, me ra madua kina na Isireli kecega."
3 O ira na qase ni Sepesa era sa tukuna vua "Wawa mada me vitu na siga, me keimami na tukutuku mada vei ira kece na Isireli. Kevaka sa sega me vakabulai keimami, keimami na qai lako mai vei iko."
4 Sa lako mai na dua nai talai ki vei Saula e Kipea ka tukuna nai tukutuku ni ra sa vakarorogo tu na tamata. Era sa qoqolou na tamata ka tagi.
5 Sa muri mai o Saula ni lesu tiko mai na veiwere ka taroga, "Na cava na leqa, ni ra sa tagi tiko na tamata?" era sa tukuna vua na nodra vosa na tamata ni Sepesa.
6 Sa lako mai vei Saula na Yalo i Jiova ni sa rogoca oqo, ka sa katakata mai na nona cudru.
7 Sa taura nai vua ni bulumakau ka musuka vakalalai ka vakauta yani ki na nodra vanua kece na Isireli ena ligana nai talai ka tukuna, o koya sa sega ni lako vata kei Saula kei Samuela ki na i valu; ena caka vaka oqo ki na nona manumanu. Na rerevaki Jiova sa tarai ira na tamata kecega ka era sa lako mai ena dua ga na veivakadonui.
8 Ni ra sa mai wili e Beseki, era sa lewe tolu na drau na udolu na luvei Isireli ka era sa lewe tinikatolu na udolu na tamata e Juta.
9 Era sa tukuna vua sa dautalai, "Mo tukuna vei ira na tamata ni Sepesa Kiliati: 'Ni mataka ena gauna sa katakata kina na siga, ena yaco yani na veivuke.'" Sa lako yani nai talai ka tukuna vei ira na tamata ni Sepesa, ka era sa marau.
10 Era sa tukuna na tamata i Sepesa, "Ni mataka keimami na lako mai vei kemuni o mo ni cakava vei keimami na veika sa vinaka vei kemuni."
11 Sa qai yaco ena siga ka tarava, sa wasea me tolu nai wasewase o Saula, ka era sa lako mai ena loma donu ni tikotiko ena i matai ni wasewase ni yadra, ka vakamatei ira na Amonaiti me yacova na siga levu katakata. Era sa rere vakalevu o ira sa dro bula ka era sa veiseyaki, ka sa yaco me ra dui lakolako na tamata kecega.
12 Era sa tukuna vei Samuela na tamata "O cei sa tukuna 'Me neimami tui o Saula?' Me ra kau mai na tamata oqo; me ra mai vakamatei."
13 Sa tukuna o Saula, "Me kua ni dua e vakamatei ena siga oqo, ni siga e dai sa vakayacora kina na Kalou na nodra vakabulai na Isireli."
14 Sa tukuna vei ira na tamata o Samuela, "Me da mai lako ki Kilikali ka me la'ki vakavouia na matanitu mai kea."
15 Era sa lako na tamata ki Kilikali, era sa vakatikori Saula mai kea me nodra tui – ena matai Jiova e Kilikali. Era sa vakacabora mai kea nai soro ni veivinakati ena mata i Jiova, o Saula kei ira kecega na luvei Isireli era sa marau vakalevu sara.


Chapter 12

1 Samuela 12 1 Sa tukuna o Samuela vei ira kece na luvei Isireli, "Mo ni kila ni'u sa rogoca na domomuni ena veika o ni sa tukuna vei au, ka sa caka me dua na nomuni tui.
2 "Oqo, sa tu na tui ka sa lako voli e matamuni. Au sa qase mai ka sa sika na uluqu, ka raica – sa tiko vata kei kemuni o iratou na luvequ. Au sa lako tiko e matamuni ni'u a se gone me yacova e dai.
3 "Sai au oqo, sa vakadinadinataki Au ena mata i Jiova, ena matana talega na nona i lumuti; na bulumakau i cei au sa kovea? Se na asa nei cei au sa kovea talega? O cei au sa vakaisina? O cei au sa vakaicolacolataka se mai na liga i cei au sa taura kina e dua na veivakataulotaki me vakamatabokotaki au? Au na vakasuka lesu tale vei iko."
4 Era sa tukuna mai, "O sa sega ni vakaisina se vakabibitaka e dua, se o sa taura e dua na ka mai na ligana e dua."
5 Sa qai tukuna vei ira, "Sa i vakadinadina o Jiova vei kemuni, na nona i lumuti talega sai vakadinadina e dai, ni kemuni sa sega ni kunea e dua na ka e ligaqu." Era sa tukuna kece, "Sai vakadinadina na Kalou."
6 Sa tukuna tale o Samuela vei ira na tamata, "O Jiova ga sa vakatuburi Mosese kei Eroni, o Koya talega sa kauti ira tani mai na tamamuni mai Ijipita.
7 "Mo ni tu vakadua me'u vakamacala mada vei kemuni ena mata i Jiova ena vuku ni cakacaka dodonu sa cakava o Jiova vei kemuni kei ira na nomuni qase:
8 "Ni sa lako o Jekope ki Ijipita, ena sa tagi na tamamuni vei Jiova, sa qai talai Mosese kei Eroni, oi rau sa kauti ira tani mai Ijipita ka vakavuna na nomuni sa mai tiko ena vanua oqo.
9 "Era sa qai guilecavi Jiova na nodra Kalou, o Jiova sa qai volitaki ira ki na ligai Sisaria nai liuliu ni mataivalu na Esa ki na ligadra na Filisitia, ki na ligadra tale na Moapi; ka ra sa veivaluti kina.
10 "Era sa tagi tale vei Jiova ka tukuna, 'Keimami sai valavala ca ni keimami sa biuti Jiova ka qaravi Peali kei Esitaroci, ia, oqo mo ni sereki keimami mai na ligadra na meca, me keimami qaravi kemuni.'
11 "O Jiova sa talai Serupepeli, Bidani, Jevica, kei Samuela me vakabulai ira mai na ligadra na meca ena veiyasana kecega, ka o ni na tiko vinaka.
12 "Ni o ni sa raici Neasi na tui Amoni ni tuva i valu vei kemuni, o ni sa qai tukuna mai vei au, 'E segai, me dua ga na tui me liutaki keimami' – ni sa liutaki kemuni tiko ga o Jiova na nomuni Kalou ka nomuni tui.
13 "Oqo, sa tu oqo na nomuni tui, o koya o ni sa digitaka ka gadreva. Mo ni kila, o Jiova sa vakatikora na tui vei kemuni.
14 "Kevaka o ni sa rerevaki Jiova ka rogoca na domona, ka mo ni kua ni vuki tani mai na Nona i vakaro, oi kemuni kei koya na tui ena liutaki kemuni, o ni na muri Jiova tikoga me nomuni Kalou.
15 "Ia, kevaka o ni sa talaidredre ki na domo i Jiova, ka vuki tani mai na Nona i vakaro, na liga i Jiova ena kemuni meca tale, me vaka ea cakava vei ira na Nomuni qase.
16 "Mo ni tucake ka raica na veika lelevu ena cakava vei kemuni o Jiova ena matamuni sara ga:
17 "Sa sega beka ni siga ni tatamusuki oqo? Au na kacivi Jiova ka ena tala mai na kurukuru kei na uca o Koya mo ni kila ka raica kina ni sa rui levu sara na nomuni valavala ca o ni sa cakava ena mata i Jiova – ni kemuni sa vinakata ga me dua e tui vei kemuni."
18 Sa qai kacivi Jiova o Samuela ka sa tala mai na kurukuru kei na uca o Jiova ena siga o ya. Era sa rerevaki Jiova kei Samuela vakalevu na tamata kecega.
19 Era sa tukuna vei Samuela na tamata kecega, "Mo masulaki ira na nomuni tamata vei Jiova na nomuni Kalou, me kakua ni keimami mate; ni keimami sa vakuria na neimami valavala ca, na ca levu, ni keimami sa vinakata e dua me tui vei keimami."
20 Sa tukuna vei ira na tamata o Samuela, "Mo ni kua ni rere, o ni sa cakava na veikavakasisila oqo, ia, oqo, mo ni kakua ni vuki tani mai na nomuni muri Jiova. Mo ni qaravi Jiova ena yalomuni taucoko.
21 "Mo ni kua ni vuki tani; oqori o ni na ciciva kina na ka wale, na veika e sega ni yaga, sa sega talega ni veisereki ni sa ka wale ga.
22 "O Jiova ena sega ni biuti ira na Nona tamata ena vuku ni yacana baleta ni sa taleitaka o Jiova mo ni wili me Nona tamata.
23 "Ia oi au, me yawa sara vei au me'u i valavala ca vei Jiova – ni'u sa sega tiko ni masulaki kemuni; ia au na vakavulica vei kemuni na sala vinaka ka dodonu.
24 "Mo ni rerevaki Jiova ga ka qaravi Koya vakaidina ena yalomuni taucoko; ni o ni sa raica vakavinaka na veika lelevu sa cakava o Koya vei kemuni.
25 "Ia, kevaka o ni se valavala ca tikoga, o ni na kuitaki yani, oi kemuni kei na nomuni tui talega."


Chapter 13

1 Samuela 13 1 Sa lewa o Saula me dua na yabaki; ni sa lewa tiko me rua na yabaki e Isireli,
2 Sa digitaka o Saula me nona e tolu na udolu na Isireli. E rua na udolu sa tiko vata kei Saula mai Mitimasi kei na veiulunivanua kei Peceli, kei na dua na udolu era sa tiko vata kei Jonacani mai Kipea e Penijamini. Na kena vo ni tamata sa vakatala lesu o Saula ki na nodra dui tikotiko.
3 Sa valuta na nodra i tikotiko na Filisitia o Jonacani e Kipa, ka e ra rogoca na Filisitia. Sa uvuca o Saula na davui ena vanua taucoko e Isireli ka vakarogoya, "Me ra rogoca na Iperiu!"
4 Era sa rogoca kece na Isireli ni o Saula sa valuta na nodra i tikotiko na Filisitia ka sa yaco me ra ca na Isireli vei ira na Filisitia. Era sa kacivi kece na tamata ki vei Saula mai Kilikali.
5 Era sa soqoni vata na Filisitia me vala kei ira na Isireli, e tolusagavulu na udolu na qiqi ni valu, e ono na udolu na vodo ose kei ira na tamata sa vaka na mata ni nuku na kedra i wiliwili. Era sa lako cake mai ki Mitimasi ena tokalau kei Beki- Aveni.
6 Ni ra sa raica na ka oqo o ira na Isireli ka kila ni ra na leqa, (ni ra sa taqaya) era sa vuni na tamata ena vei qara vatu kei na vei lalaqa kecega sa kune ena veivatu.
7 Eso vei ira na Iperiu era sa takosova sara na Joritani ki na vanua nei Kata kei Kiliati. O Saula e se tiko ga e Kilikali kei ira kece sa muri koya era sa sautaninini tikoga.
8 Era sa wawa tiko me vitu na siga me vaka na vosa i Samuela. E se sega tikoga ni yaco mai o Samuela. Sa sega ni lako mai ki Kilikali o Samuela ka era sa veidroyaki na tamata mai vua.
9 Sa tukuna o Saula, "Me kau mai vei au nai soro kama kei nai soro ni veivinakati." Sa vakacabora sara nai soro kama.
10 Sa qai yaco ni sa vakacabora oti nai soro kama, sa qai yaco mai o Samuela ka sa lako sara yani o Saula me sotavi koya ka me kidavaki koya.
11 Sa vosa mai o Samuela, "Na cava o sa cakava?" Sa sauma mai o Saula, "Ni'u sa raici ira na tamata ni ra sa veidroyaki ka ni o sa sega talega ni lako mai ena gauna sa lokuci, era sa soqoni vata talega mai na Filisitia e Mitimasi,
12 "Au sa tukuna kina, 'Ni o ira na Filisitia era na lako sobu mai vei au e Kilikali, ka au se sega talega ni vakamamasu vei Jiova,' oqo sa vesuki au me'u vakacabora nai soro kama."
13 Sa vosa o Samuela vei Saula, "O sa cakacaka vaka na lialia. O sa sega ni maroroya nai vakaro ni Kalou o Jiova, me vaka ni sa solia oti vei iko. Oqo na Kalou sa dodonu me vakadeitaka na nomu matanitu e Isireli me sega ni mudu.
14 "Oqo, na nomu vakatulewa sa na mai cava. O Jiova sa vakasaqara oti e dua me vaka sara ga na yalona, ka sa vakaroti koya o Jiova me sa noda i liuliu na nona tamata, baleta ni o sa sega ni maroroya na veika sa vakarota vei iko o Jiova."
15 Sa tucake o Samuela ka lako cake mai Kilikali ki Kipea e Penijamini. Sa wiliki ira na tamata o Saula, era sa tiko vata kei koya e ono na drau na tamata.
16 O Saula kei Jonacani kei ira sa vo tiko mai Kipea e Penijamini. O ira na Filisitia era sa tiko e Mitimasi.
17 Era sa lako mai na meca ena nodra i tikotiko na Filisitia ena tolu nai lawalawa. Dua nai lawalawa era sa muria na sala ki Ofana ki na vanua nei Sueli,
18 e dua tale nai lawalawa era sa muria na sala ki Beci-Oroni ka dua tale nai lawalawa era sa muri na sala ki nai yalayala ni vanua e raica sobu yani na Buca kei Sebolimi vaka ki na vanua liwa.
19 Sa sega na dau ni kaukamea me kune e Isireli taucoko – ni ra sa tukuna tiko na Filisitia "De ra qai yavala na Iperiu ka bulia nai sele kei na moto."
20 Ia, o ira kece na Isireli, era sa dau lako sobu ki Filisitia me vakagatari na nodra i sele kei na siviyara, nai matau kei na i sele i koti;
21 Sa dau kena i sau ni vagatai ni yaya e onosagavulu na sede nai yaya lelevu ka tolusagavulu na sede nai yaya lailai.
22 Ni sa yaco mai na siga ni valu – sa sega tu nai sele se moto ena ligadra na tamata i Saula kei Jonacani, sa tiko ga vei Saula kei Jonacani na luvena.
23 O ira nai valu nei Filisitia era sa lako yani ki nai tatakoso kei Mitimasi.


Chapter 14

1 Samuela 14 1 Sa qai yaco ena dua na siga o Jonacani na luvei Saula sa tukuna vua na nona cauravou daucola yaragi, "Lako mai, daru lako mada ki na nodra i tikotiko na Filisitia ena yasana ka dua." Ia sa sega ga ni tukuna vei tamana.
2 O Saula sa dabe tiko ena yasa ka dua mai Kipea ena ruku ni dua na vuni ponekaraneti sa tiko mai Mikoroni. Era sa tiko vata kei koya e rauta ni ono na drau na tamata.
3 O Eaia na luvei Aitubu na tuakai Ikapote, na luvei Vanaisi na luvei Ilai na bete i Jiova mai Sailo, sa dara tiko na efoti. Era sa sega ga ni kila ni sa lako o Jonacani.
4 Ena veimama ni tatakoso, na vanua sa vinakata o Jonacani me lako yani kina vei ira na Filisitia, sa tiko kina na vatu momoto ena yasana ruarua, na yacana e dua o Bosese ka yacana ka dua tale o Senei.
5 E dua na vatu sa qara vaka ki na vualiku me veibasai kei Mitimasi kei na dua tale sa qara vaka ki na ceva ka veibasai kei Kipea.
6 Sa tukuna sara o Jonacani vua na nona cauravou sa daucolata na nona yaragi, "Lako mai, me daru mai lako ki na nodra i tikotiko na sega ni cili oqo, de na cakacaka vata kei kedaru o Jiova. Ni sa sega na ka ena tarovi Jiova me veivakabulai, se lewe levu se lewe lailai."
7 Sa tukuna vua o nona daucola yaragi, "Mo cakava kece na veika sa tiko oqori e lomamu. Mo lako yani; au sa tiko oqo vata kei iko, me vaka sa yalomu kina."
8 Sa tukuna o Jonacani, "Vinaka, me daru sa takoso sara yani ki vei ira na tamata oqo, ka me daru vakaraitaki kedaru vei ira.
9 "Kevaka era sa tukuna vakaoqo vei kedaru, 'drau wawa me keimami na lako mai vei kemudrau, 'daru na tu ka sega ni lako vei ira.
10 "Kevaka era sa tukuna mai, 'Drau lako mai.' Daru lako cake ni sa soli ira o Jiova kina ligadaru ni sai koya oqo na kena i vakatakilakila."
11 E rau sa vakatakilai rau ki vei ira na Filisitia, era sa tukuna – "Raica era sa lako mai na Iperiu mai na veiqara era sa vuni tiko kina"
12 Era sa kaci yani na Filisitia ki vei Jonacani kei na nona cauravou, "Lako sobu mai me keimami vakaraitaka e dua na ka." Sa tukuna o Jonacani vua na nona cauravou, "Muri au mai, o Jiova sa soli ira oqo ki na ligadra na Isireli."
13 Sa kaba cake o Jonacani kei na nona daucola yaragi sa muri tiko yani; ka era sa bale e matai Jonacani. Sa vei vakabalei talega na nona cauravou.
14 Nai matai ni veivakamatei e rau sa cakava o Jonacani, sa rauta e ruasagavulu na tamata, ena loma ni dua na vanua lailai ga.
15 Sa dua na sautaninini levu sa yaco ena nodra i tikotiko na Filisitia. Na i tikotiko vakaivalu kei ira na daukaba vakaivalu era sa sautaninini kecega. Sa uneune na vanua, ka sa dua na sautaninini levu.
16 O ira na dauyadra nei Saula mai Kipea e Penijamini, era sa raica e dua nai wiliwili levu ni tamata e ra sa veidroyaki ka veiseseyaki.
17 Sa tukuna o Saula vei ira sa tiko vata kei koya, "Me da kaci yaca mada me kilai se o cei sa sega ni tiko vata kei keda," ni ra sa cakava oqo, era sa qai kila ni rau sa yali tiko o Jonacani kei na nona cauravou daucola yaragi.
18 Sa tukuna o Saula vei Eaitia, "Kauta mai na Kato ni Kalou eke", (ni sa tiko vata kei ira na Isireli na Kato ni Kalou.)
19 Sa yaco tiko ni sa vosa tiko vei ira na bete o Saula, sa yaco me sa rogolevu tiko ga mai na domodra na Filisitia. Sa tukuna o Saula vei ira na bete – "Mo ni vakasuka na ligamuni."
20 Era sa vakasoqoni vata mai vei Saula na tamata kecega ka lako yani ki nai valu – sa dina era sa veivakamatei vaka i ira ga na Filisitia, ka sa tiko e dua na veilecayaki levu vei ira.
21 O ira na Iperiu era a tiko vata kei ira na Filisitia mai liu sara, era sa to vata mai kei Saula kei Jonacani.
22 O ira kece na Isireli era a vuni tu ena vei qara vatu mai Ifereimi – ni ra sa rogoca na nodra sa veidroyaki na Filisitia, era sa cici talega mai ka veitokoni ena nodra valuti na meca.
23 Sa vakabulai Isireli ena siga o ya o Jiova, ka sa toso sara na i valu ki Beci-Aveni.
24 Era sa wawale vakalevu na Isireli ena siga o ya, ka sa vakayavalati ira na tamata o Saula mera bubului, ena nona tukuna, "Me vakaloucataki na tamata sa kana mai na mataka me yacova ni sa karobo mai, ni bera na noqu cudruvi ira na meca." Era sa sega ni tara sara na tamata na kakana.
25 O ira kece na tamata era sa lako mai ki na veikau; era sa lutu tu na oni ena qele.
26 Ni ra sa yaco mai ki veikau na tamata, era sa lutu tu na oni, sa sega ni dua e via kania baleta ni ra sa rerevaka tiko na bubului.
27 Ia, o Jonacani, sa sega ni rogoca na vosa nei tamana me baleta na bubului, sa dodoka yani na nona moto ki na oni ka kauta mai ligana ka kania sara, ka sa laukune me vinaka cake mai na kena i rairai.
28 E dua vei ira na tamata sa tukuna mai, "O tamamuni sa yalayala vei ira na tamata me ra bubului ka tukuna, 'sa kalouca o koya sa kana ena siga oqo.'" Era sa malumalumu sara na tamata.
29 Sa tukuna mai o Jonacani, "O tamaqu sa vakaleqa na vanua. Mo ni raica mai ni sa vinaka mai na kequ i rairai ni'u sa kania na oni oqo.
30 "Sa na vinaka sara kevaka o ni sa kana ga ena nomuni lewa nikua ni sa tu oqo nai toki ni valu! Ni sa sega ni levu na nodra vakamatei na Filisitia?"
31 Era sa cemuri na Filisitia ena siga o ya mai Mitimasi ki Aijaloni. Era sa malumalumu sara ga na tamata.
32 Era sa cici yani na tamata, ka taura nai toki ni valu ka vakamatea ka kania vata na kena dra.
33 Era sa tukuna vei Saula, "Raica era sai valavala ca na tamata vei Jiova ni ra sa kania vata na dra na tamata!" Sa tukuna o Saula, "O ni sa cakacaka vakaca sara; mo ni vakaqiqica mai vei au e dua na vatu levu e nikua sara ga."
34 Sa tukuna yani o Saula, "Mo ni dui lako yani ka tukuna vei ira na tamata, 'me ra kauta mai na bulumakau ni tamata vakayadua ga, na sipi talega, me ra vakamatei ka laukana; mo ni kua ga ni valavala ca vei Jiova ena nomuni kania vata kei na dra.'" Era sa dui kauta mai na veika e gadrevi ka era sa vakamatei.
35 Sa tara o Saula e dua nai cabocabo ni soro ki vei Jiova. Oqo na kena i matai sa tara vei Jiova.
36 Sa tukuna o Saula, "Me da lakovi ira sobu na Filisitia; ka butuki ira ena bogi taucoko me yacova na mataka ka me kakua ni dua e drobula." Era sa tukuna kece, "Me caka na veika o sa nanuma ni vinaka vei iko." Era sa tukuna na bete, "Eke, me da sa toso voleka kina vua na Kalou."
37 O Saula, sa taroga nai vakasala mai vua na Kalou, "Me'u cici muri ira beka na Filisitia? O ni na soli ira beka e ligadra na Isireli?" Ia, na Kalou sa sega ni sauma vua ena siga o ya.
38 Sa tukuna o Saula, "Mo ni lako kece mai ki kea oi kemuni na nodra turaga na veitamata, mo ni kila mada ka raica se cava sa tu kina nai valavala ca oqo e daidai.
39 "Me vaka sa bula o Jiova, o Koya sa vakabulai Isireli, kevaka mada ga ke sai Jonacani na luvequ, ena mate vakaidina." Ia, sa sega na tamata sa sauma vua.
40 Sa qai tukuna vei ira kece na Isireli, "Mo ni tu ena dua na yasana kei Jonacani na luvequ, au na tiko ena dua tale na yasana." Era sa tukuna na tamata, vei Saula, "mo cakava na veika sa vinaka vei iko."
41 Sa qai tukuna o Saula vei Jiova na nodra Kalou na Isireli, "Mo ni solia e dua na wirimadigi e dodonu sara," e rau sa tauri o Saula kei Jonacani – era sa dro na tamata kecega.
42 Sa tukuna o Saula, "Me viritaki na wirimadigi baleti au kei Jonacani na luvequ" – sa qai tauri o Jonacani.
43 Sa tukuna o Saula vei Jonacani, "Tukuna mai, na cava o sa cakava," sa tukuna vua o Jonacani, "Au tovolea ga na oni lailai sa tiko ena mua ni moto sa tiko e ligaqu. Oqo mo vakamatei au!"
44 Sa sauma o Saula, "me cakava na Kalou, me levu vakaidina; ni o na mate vakaidina, Jonacani."
45 Era sa tukuna vei Saula na tamata, "Me mate o Jonacani, o Koya ga sa cakava na veivakabulai levu e Isireli? Me tabu sara! Me vaka sa bula o Jiova, sa tabu ni lutu e dua na drau ni uluna ki na qele, ni sa cakacaka o koya vata kei na Kalou me yacova e daidai." Era sa vakabulai Jonacani na tamata ka sa sega ni vakamatei.
46 Sa lesu mai o Saula ena nona muri ira na Filisitia. Era sa dui lako na Filisitia ki na nodra dui tikotiko.
47 Sa vakadeitaka na nona veiliutaki e Isireli o Saula, ka sa valuti ira na kena meca ena veiyasana kece – o ira na Moapi, na Amoni, na Itomi, o ira na tui mai Sopa kei ira na Filisitia. Na vanua ga sa vuki kina, sa vakararawataki ira.
48 Sa vakasoqoni ira mai na mataivalu ka valuti ira na Amalekaiti, ka vakabulai ira na Isireli mai na ligadra na dauveivakasosataki.
49 O iratou na luvei Saula, o Jonacani, kei Tisui kei Malakisua. Na yacadrau na luvena yalewa o, Merabe na qase kei Maikili na gone.
50 Na yaca i wati Saula o Ainoami na luvei Aimorasi. Na yaca i koya nai liuliu ni nona mataivalu o Apana na luvei Neri na momo nei Saula.
51 Na tama i Saula o Kisi kei Neri na Apana sa luvei Apieli.
52 Sa dau ia nai valu katakata kei ira na Filisitia ena gauna i Saula. Ni sa dau raici ira na tamata kaukauwa ka qaqa o Saula – sa dau kauti ira vei koya.


Chapter 15

1 Samuela 15 1 Sa tukuna vei Saula o Samuela, "Sa talai au mai o Jiova me'u lumuti iko mo tu vei ira na nona tamata, na Isireli. Oqo mo rogoca na domo ni vosa i Jiova.
2 "Sa tukuna o Jiova ni lewevuqa: 'Au na totogitaki Ameleki ena vuku ni ka sa cakava vei Isireli, ena nona toka vakavuni ka waraki koya tiko ena nona lako tani mai Ijipita.
3 'Mo lako ka kabati koya vaka i valu ka vakarusa na ka kece ka kua ni vakavoca e dua na ka. Mo vakamatei ira kece na tagane kei na yalewa, na gone kei ira se qai sucu tiko, na bulumakau, na sipi, na kameli kei na asa.'"
4 Sa soqoni ira na tamata o Saula ka wiliki ira mai Telaimi, e rua na drau na udolu na sotia kei na tini na udolu na tagane qaqa mai Juta.
5 Sa lako mai o Saula ena dua na koro e Ameleki ka waraki ira tiko mai na buca.
6 Sa tukuna o Saula vei ira na Kenani, "Mo ni lako tani mai vei ira na Amelekaiti, de'u na vakarusai iko vata kei ira. Ni o sa vakaraitaka na ka vinaka vei ira na Isireli ena nodra lako tiko mai Ijipita." Era sa lako tani mai na Kenani mai vei ira na Amelekaiti.
7 Sa kabai ira na Amelekaiti o Saula mai Avila me yaco sara ki Suri ena tokalau kei Ijipita.
8 Sa tauri Ekaki bula na nodra tui na Amelekaiti, ka sa vakamatei ira na tamata kecega ena i seleiwau.
9 Ekaki, na sipi vivinaka duadua, sa vakakina na bulumakau kei na lami urouro kei na kena vivinaka kecega – era sa sega ni via vakarusa. Na ka kecega sa ca ka vakasisila ka sega ni yaga era sa vakarusa.
10 Sa lako mai vei Samuela na vosa i Jiova ka vaka,
11 "Au sa veivutunitaka na Noqu vakatikori Saula me tui ni sa vuki tani mai na nona muri Au, ka sa sega ni muria na Noqui vakaro." Sa yalo luluvu o Samuela ka sa tagi tiko vei Jiova ena bogi taucoko.
12 Ni sa tacake yani vakamataka o Samuela me sotavi Saula, sa tukuni sara mai vei Samuela "Sa lako cake ki Kameli o Saula me vakaduria vua e dua na i vakananumi; sa veilakoyaki voli ka lako sobu sara ki Kilikali."
13 Sa lako vei Saula o Samuela, ka sa vosa mai o Saula ka vaka, "Mo ni vakalouvinakataki mai vei Jiova! Au sa vakayacora nai vakaro i Jiova."
14 Sa vosa yani o Samuela, "Na tagi ni sipi cava ga sa rorogo tiko oqo e daligaqu kei na domodra talega na bulumakau au sa rogoca talega?"
15 Sa tukuna mai o Saula, "Era sa kauta mai oqori mai vei ira na Amelekaiti, o ira na tamata era sa maroroya mai na sipi kei na bulumakau vinaka duadua me vakacabori vei Jiova na nomuni Kalou; ka keimami sa vakarusa na kena vo kecega."
16 Sa tukuna o Samuela vei Saula, "Tiko lo! Au na tukuna vei iko na veika sa vosa kina vei au o Jiova ena bogi." Sa vosa mai o Saula – "Tukuna sara mai."
17 Sa tukuna o Saula, "Ni o a se lailai e matamu ga, o a sega beka ni nodra i liuliu na veiyavusa e Isireli? E sega beka ni a lumuti iko o Jiova mo nodra tui na Isireli?
18 "Oqo, o Jiova sa talai iko ki na dua nai naki ka tukuna kina, 'Lako ka vakarusai ira kece nai valavala ca, o ira na Amelekaiti, ka valuti ira me yacova ni ra sa yali yani.'
19 "Ena cava o sa sega ni via rogoca kina na domo i Jiova? Ena cava o sa raica sobu kina nai toki ni valu ka cakava na ka ca ena mata i Jiova?"
20 Sa sauma mai o Saula vei Samuela, "Au sa muria na domo i Jiova ka lakova nai naki sa talai au kina o Jiova ka kauti Ekaki na nodra tui na Amelekaiti lesu mai; au sa vakarusai ira na Amelekaiti.
21 "O ira na tamata era sa taura na ka butakoci, na sipi, na bulumakau, na veika vivinaka duadua o koya e dodonu me vakarusai, me vakacabora vei Jiova na nomu Kalou e Kilikali."
22 Sa qai tukuna o Samuela: "Sa rekitaka vakalevu beka o Jiova na i soro kama kei nai madrali mai na talairawarawa ki na domo i Jiova? Mo kila, na talairawarawa sa vinaka cake mai nai soro kama kei na vakarorogo mai na uro ni lami.
23 Ni sa tautauvata na talaidredre kei na vakadraunikau: na vakalecalecava se vakilakila sa tautauvata na qaravi matakau. Baleta ni o sa besetaka na vosa i Jiova, sa besetaka talega kina o Koya mo dua na tui."
24 Sa tukuna o Saula vei Samuela, "Au sai valavala ca, ni'u sa sega ni muria nai vakaroi Jiova kei na nomu vosa – ni'u sa rerevaki ira na tamata ka muria na nodra vosa.
25 "O koya oqo, au sa kerea me vosoti na noqu i valavala ca, ka lesu vata kei au, me'u la'ki lotu vei Jiova."
26 Sa sauma o Samuela vei Saula, "Au na sega ni lesu vata kei iko, ni o sa besetaka na vosa i Jiova, o Jiova talega sa besetaki iko mo tui vei ira na Isireli."
27 Ni sa vuki me lako yani o Samuela, sa dreta na tutu ni nona i sulu yara o Saula, ka sa kadresu sara.
28 Sa tukuna vua o Samuela, "O Jiova sa dresuka tani mai vei iko na matanitu o Isireli ena siga oqo, ka sa solia vua e dua na wekamu e vinaka cake mai vei iko.
29 "Na Kaukauwa kei Isireli ena sega ni davo se malumalumu mai. Ni sa sega ni tamata o Koya me malumalumu."
30 Sa qai tukuna tale o Saula, "Au sai valavala ca, ia, mo dokai au mada ga, e matadra na qase ni noqu tamata, e matadra na Isireli e na nomu lesu vata kei au, me'u la'ki lotu vei Jiova na nomu Kalou."
31 Sa qai lesu vata kei Saula o Samuela, ka sa lotu vei Jiova o Saula.
32 Sa tukuna mai o Samuela, "Me kau mai o Ekaki na nodra tui na Amelekaiti eke vei au." Sa lako mai o Ekaki ena qaqarauni. Sa tukuna sara mai, "Sa dina na gaga ni mate sa oti."
33 Sa tukuna o Samuela, "Na nomu i seleiwau sa cakava me ra kua ni vakaluveni na yalewa o tinamu ena sega ni vakaluveni vata kei ira na yalewa." O Samuela sa tatalaki Ekaki vakalalai ena matai Jiova e Kilikali.
34 O Samuela sa lako sobu ki Rama kei Saula sa lako cake ki nona vale e Kipea i Saula.
35 Sa oti vakadua na nona raici Saula o Samuela me yacova na nona mate. E dina ga ni a tagicaki Saula, ia, o Jiova sa lomani Koya vakai Koya ena Nona cakava vei Saula me tui e Isireli.


Chapter 16

1 Samuela 16 1 Sa tukuna vei Samuela o Jiova, " Me cava soti na dede ni nomu tagicaki Saula tiko, mo raica Ni'u sa sega ni vinakata me liutaki Isireli? Tawana na nomu tavaya, ena waiwai ka lako; au sa talai iko ki vei Jese na kai Peceliema, Ni'u sa vakarautaka oti e dua na luvena vei Au me tui."
2 Sa tukuna o Samuela, "Me'u na lako rawa vakacava? Kevaka sa na rogoca oqo o Saula, ena vakamatei au." Sa tukuna mai o Jiova, "Kauta e dua na bulumakau yalewa vata kei iko ka tukuna, 'Au sa lako mai me vakacaboi soro vei Jiova.'
3 "Mo sureti Jese ki na vakacaboi soro, Au na qai vakaraitaka vei iko na ka mo cakava, mo lumuta vei Au o koya Au na cavuta na yacana vei iko."
4 Sa cakava o Samuela na veika sa tukuna vua o Jiova ka lako ki Peceliema. Era sa sautaninini na qase ni koro o ya ena nona lako mai ka taroga sara, "O sa lako tiko mai ena veivinakati?"
5 Sa sauma mai, Ena veivinakati, au sa lako tiko mai kina me vakacaboi soro vei Jiova. Mo ni vakasavasavataki kemuni ka lako mai vei au ki na vakacaboi soro." Sa vakasavasavataki Jese kei iratou na luvena ka sureti iratou ki na vakacaboi soro.
6 Sa qai yaco, ni ratou sa lako mai, sa raici Iliapi, sa tukuna sara, "Sa dua, na i lumuti i Jiova sa tu oqo e matana!"
7 Ia, o Jiova sa vosa vei Samuela ka vaka: "Kua ni raica na kena i rairai se na kena balavu, baleta Ni'u sega ni vinakati koya. O Jiova sa sega ni raica me vaka sa raica na tamata; na tamata sa raica na veika e taudaku, o Jiova sa raica na yalona."
8 Sa kacivi Amenatave mai o Jese ka sa lako ena matai Samuela ka sa tukuna kina, "O Jiova talega sa sega ni digitaki koya oqo."
9 O Jese sa kacivi Sama mai, sa tukuna o Samuela, "O Jiova talega sa sega ni digitaki koya oqo."
10 Sa vakavuna o Jese me ratou lako e matai Samuela e vitu na luvena. Sa tukuna mai o Samuela, "O Jiova sa sega ni digitaka e dua vei ira oqo."
11 Sa taroga mai o Samuela vei Jese, "Era sa tiko kece beka oqo na luvemu?" Sa sauma mai, "Sa vo ga o koya e gone duadua, o koya oqori sa vakatawana tiko na sipi." Sa tukuna mai o Samuela vei Jese, "Me kau mai o koya, ni da na sega ni dabe vakavo ni sa basika mai."
12 Sa qai kau mai o koya. Sa rui damusa, ka serau na yaloka ni matana, qai tagane vinaka dina. Sa tukuna mai o Jiova, "Tucake ka lumuti koya, ni sai koya sara ga oqo!"
13 Sa taura na waiwai o Samuela ka lumuti koya ena kedratou maliwa na tacina, sa lako mai na Yalo i Jiova vei Tevita mai na siga o ya ka lako yani. Sa tucake o Samuela ka lako ki Rama.
14 Sa lako tani mai vei Saula na Yalo i Jiova ka sa vakasosataki koya tiko e dua na yalo ca mai vei Jiova.
15 Era sa tukuna vei Saula na nona dauveiqaravi "Sa dina, e dua na yalo ca mai vei Jiova sa vakaleqai iko tiko.
16 "Mo ni vakaroti ira mada na nomuni tamata era sa tiko e matamuni, me vakasaqarai mai e dua na tamata sa matai sara ena api, me dau vakatagi vei kemuni ni sa dau lako mai na yalo ni veivakasosataki mai vei Jiova me tarai kemuni, me rawa ni o ni na vinaka kina."
17 Sa qai tukuna o Saula vei ira na nona tamata, "Me kau mai vei au e dua na dau qiriqiri vinaka, me vakasaqarai mai."
18 E dua vei ira na dauveiqaravi sa sauma mai, "Raica, au sa kunea e dua na luvei Jese na kai Peceliema sa matau sara ena vakatagi, e tamata qaqa, e tamata ni valu, e dauvosa vakaqaseqase, e tamata rairai vinaka ka sa tiko vata kei koya o Jiova."
19 Sa vakau i tukutuku o Saula vei Jese ka tukuna, "Me kau mai o Tevita na luvemu o koya sa dauvakana sipi tiko."
20 O Jese sa taura e dua na asa, ka vakavodoka kina na madrai kei na saqa waini kei na luve ni me ka sa vakauta yani vei Tevita ki vei Saula.
21 Sa lako mai o Tevita vei Saula ka tu e matana. Sa lomani koya sara vakalevu o Tevita ka sa dau cola i yaragi talega vei Saula.
22 Sa vakauitukutuku tale o Saula vei Jese ka tukuna, "Au kerea me tiko ga o Tevita e mataqu, ni'u sa taleitaki koya vakaidina."
23 Sa qai yaco oqori, ni sa tarai Saula tiko na yalo ca mai vei Jiova, sa dau qiria nai vakatagi e ligana o Tevita. Oqo sa dau vakabulabulataki Saula ka sa dau vinaka kina. Sa qai dau yali yani na yalo e dauveivakasosataki e tiko vua.


Chapter 17

1 Samuela 17 1 Era sa soqoni vata mai na mataivalu ni Filisitia me ia nai valu. Era sa soqoni vata mai e Soko na vanua nei Juta. Era sa mai tiko ena kedrau maliwa o Soko kei Aseka e Efese – Demimi.
2 O Saula kei ira na Isireli era sa soqoni vata ka mai tiko ena Buca o Ela, ka sa tu vakarau me vale kei ira na Filisitia.
3 O ira na Filisitia era sa tu ena dua na delana kei ira na Isireli ena dua na delana ka sa qai wasei rau tiko e dua na buca.
4 Sa lako mai e dua na qaqa mai na nodra i tikotiko na Filisitia, na yacana o Koliaci mai Kaca, na kena balavu sa ciwa na fiti.
5 Sa vakaisala varasa na uluna, sa vaka kote ni valu, na kena bibi sa rua na drau na paudi bibi.
6 Sa vakaivava varasa, ka sa cola tiko e dua na moto balavu ena vatuvatu ni tabana.
7 Na ulutoa ni nona moto sa ruasagavulu ka lima na paudi bibi, kei na dua sa colata tiko e liu vua na nona i sasabai.
8 Sa tucake tu ka kaila yani vei ira na Isireli ka tukuna, "Na cava o ni sa mai via vala kina? au sa sega beka ni kai Filisitia, ka o ni sa dauveiqaravi i Saula? Ni digitaka mai e dua vei kemuni ka me lako sobu mai vei au.
9 "Kevaka sa rawata me vala ka vakamatei au, keimami sa na wili me nomuni tamata, kevaka au sa na qaqa ka vakamatei koya, o ni na wili me neimami ka o ni na qaravi keimami."
10 Sa tukuna mai na kai Filisitia oqo, "Au sa bolea nai valu ni Isireli ena siga oqo; solia mai vei au e dua, me keirau vala mada."
11 Ni sa rogoca o Saula kei ira kece na Isireli na nona vosa na kai Filisitia, era sa taqaya ka rere vakalevu.
12 O Tevita sa luvena e dua na Eparaca e Peceliema, e Juta, na yacana o Jese, o koya sa walu na luvena tagane. Sa matua ka qase sara ena nona veiyabaki ni veiliutaki i Saula.
13 E tolu na luvei Jese qase, e ratou sa lako me muri Saula ki nai valu. Na yacadratou o Iliapi na ulumatua, o Epinatave tarava na ulumatua kei Sama.
14 Sa gone duadua o Tevita, o iratou na qase e ratou sa muri Saula.
15 Sa dau vagauna ga na nona muri Saula o Tevita baleta ni sa dauvakani ira tiko na sipi nei tamana mai Peceliema.
16 Sa dau toso voleka mai na kai Filisitia oqo me vakaraitaki koya tiko ena mataka kei na yakavi.
17 Sa tukuna o Jese vei luvena o Tevita, "Mo kauta mada vei iratou na tuakamu eso na kakana tavu oqo, kei na tini na i buli madrai, ka cicivaka vakatotolo vei iratou.
18 "E tini na madrai jisi oqo mo solia vei nodra turaganivalu ka taroga se sa vaka E vei oiratou na tuakamu. Kauta lesu vakatotolo mai vei au na kedratou i tukutuku."
19 O Saula kei ira kece na Isireli era sa vala tiko kei ira na Filisitia ena Buca mai Ela.
20 Sa sou vakamataka o Tevita ka biuta tiko na sipi vua e dua me vakatawana tiko. Sa kauta na veika sa vakaroti koya kina o Jese. Sa yaco ki na nodra i tikotiko vakaivalu – era sa lako yani me kailavaka ka vala ena i valu.
21 O Isireli kei Filisitia era sa tuva tu me ia nai valu.
22 O Tevita sa biuta tu na nona i kaukau vua e dua na dauveiqaravi, ka sa cici yani vei ira na Sotia, sa lako yani ka kidavaki iratou na tuakana.
23 Ni ratou sa veivosaki tiko, sa lako mai na qaqa, na kai Kaca e Filisitia, na yacana o Koliaci, sa lako cake mai vei ira na Filisitia; Sa dau vosa me vaka ga e liu. Sa rogoca o Tevita na ka oqo.
24 O ira kece na tagane ni Isireli ni ra sa raici Koliaci, era sa veidroyaki ka rere vakalevu sara.
25 Era sa tukuna mai na Isireli, "Sa ni raica na tamata oqo? Sa lako mai me bolei ira na Isireli; o koya sa na vakamatei Koliaci, me rogoca oqo, na tui ena vakavutuniyautaki koya, ena solia vua na luvena yalewa me watina, ena sega ni soli vakacavacava na nona vuvale e Isireli."
26 Sa vosa o Tevita vei ira kece sa tiko vata kei koya, "Na cava ena caka vua na tamata sa vakamatea na kai Filisitia oqo, me kautani kina nai rogorogo ca e Isireli? O cei o koya na sega cili ni Filisitia me mai bolea na mataivalu ni "Kalou Bula?" (Isireli –Mataivalu ni Kalou Bula)
27 Era sa sauma vua na Isireli, ka vaka: "Me caka vua oqo, vua sa vakamatei koya."
28 O Iliapi na tuakana sa rogoca mai na nona vosa vei ira na tamata; sa tubu sara na nona cudru ena vuku i Tevita, ka sa tukuna mai, "Na cava o mai cakava eke? Vei cei o sa solia kina na sipi mai na vanua liwa? Au sa kila na nomu dokadoka kei na siosio ni yalomu, baleta ni o sa lako mai oqo mo mai raica ga na i valu."
29 "Na cava au sa cakava?" sa taroga yani o Tevita, "Sa sega beka ni dua na kena i naki?"
30 Sa vuki tani mai vua o Tevita ka tukuna tale vua e dua na ka vata ga o ya; era sa sauma vua me vaka ga na kena i matai.
31 Sa rogovaki yani na veika sa tukuna o Tevita; sa tukuni sara vei Saula – sa kacivi sara vei Saula o Tevita.
32 Sa tukuna o Tevita vei Saula, "Me kua ni dua na yalo e rere me baleti koya; na nomuni tamata ena lako me vala vata kei na kai Filisitia oqo."
33 Sa sauma o Saula vei Tevita, "O sa sega ni rawata na vala kei na kai Filisitia oqo – ni o se cauravou lailai ga, o koya na Filisitia sa dauvala sara baleta ni se cakava mai ni se lailai sara."
34 Sa sauma o Tevita vei Saula, "Na nomuni tamata sa dau qarava na sipi nei tamana, ni sa dau lako mai na laione se bea: me kauta tani na lami mai na bai,
35 "Au sa dau lako yani ka vakamatea ka vakabula na lami mai na gusuna; kevaka sa cicivi au mai, au sa dautaura na kumidra ka samulaka ki na baivatu ka vakamatea.
36 "Na nomuni tamata sa vakamatea oti na laione kei na bea, o koya na kai Filisitia sega ni cili oqo ena vaka ga e dua vei rau, baleta ni sa via bolea na i valu levu ni Kalou bula."
37 Sa tukuna tale o Tevita, "O Jiova sa vakabulai au mai na i taukuku ni laione kei na bea, o koya talega ena vakabulai au mai na ligai koya na kai Filisitia oqo." Sa tukuna mai o Saula vei Tevita "Mo lako ga, sa tiko vata kei iko o Jiova!"
38 Sa vakaisulutaki Tevita o Saula ena nona i sulu vaka i valu ka vakaisalataki koya ena i sala varasa, kei nai sulu vakaivalu tale eso.
39 Sa daramaka o Tevita na nona i seleiwau ka tovolea me lako, sa tukuna yani vei Saula, "Au sa sega ni rawata oqo, baleta ni'u se sega vakadua ni tovolea," sa mani luvata o Tevita.
40 Sa taura na nona i titoko, ka tomika e lima na vatu dravia mai na uciwai ka biuta ena nona bola vakaivakatawa, sa tiko talega na nona i rabo cawiri e ligana. Sa toso sara yani vua na kai Filisitia oqo.
41 Sa toso talega mai na kai Filisitia vei Tevita, sa liu tiko vua o koya sa taura tiko na nona i sasabai.
42 Ni sa rai mai na kai Filisitia ka raici Tevita sa beci koya sara vakalevu ni sa cauravou lailai walega, damusa qai rairai vinaka.
43 Sa tukuna mai na kai Filisitia vei Tevita, "Au koli beka oi au, mo kauta mai kina na kau ni o sa lako mai vei au?" ka sa rukaki Tevita mai kina, e na nona kalou.
44 Sa tukuna yani vei Tevita, "Lako mai me'u solia na lewemu vei ira na manumanu vuka ni macawa, vei ira talega na manumanu kila ni vanua!"
45 Sa sauma yani o Tevita vua na kai Filisitia, "O sa lako mai vei au ena i seleiwau kei na moto kei na moto ni coka botea. Au sa lako mai vei iko oqo ena yaca i Jiova ni lewevuqa, na Kalou ni i valu kei Isireli o koya o sa beca.
46 "Ena siga oqo, sa na soli iko kina o Jiova ki na ligaqu, au na samuti iko ka musuka na domomu mai vei iko. Ena siga oqo, au na solia na vovo ni nodra i tikotiko na Filisitia vei ira na manumanu vuka, vei ira na manumanu kila ni vanua, me kila kina o vuravura ni sa tiko e dua na Kalou e Isireli.
47 "Era na kila nai soqosoqo kecega, ni o Jiova sa sega ni veivakabulai walega ena i seleiwau kei na moto; ni sa nei Jiova nai valu ka ena soli iko ki na ligai keimami."
48 Sa qai yaco ni ra sa toso voleka mai na Filisitia vei Tevita, sa vakatotolo o Tevita ka cici yani vei ira na Filisitia.
49 Sa taura mai o Tevita e dua na vatu mai na nona bola, biuta e nai rabo-vakawiri ka viritaka yani ka coba sara vua na kai Filisitia ena yadrena donu ka lobo sara ga ena nona mona. Sa davo sara ga vakatoboicu ki na qele.
50 Sa qaqa o Tevita vua na kai Filisitia ena i rabo kei na vatu ni coba donu vua na kai Filisitia ka sa mate kina. E sega ni dua nai seleiwau e tiko ena ligai Tevita.
51 Sa cici yani o Tevita ka butuka tu na kai Filisitia oqo. Sa taura na nona i seleiwau ka musuka na domona, ni ra sa raica na ka oqo o ira na Filisitia, ni sa mate talega na nodra qaqa – era sa dro kece.
52 Era sa tucake na Isireli kei ira na Juta ka kaikaila ka cemuri ira na Filisitia me yaco sara ki na buca ena matamata kei Ekironi. Era sa davo ena sala na mavoa vei ira na Filisitia e Saeraimi me yaco sara ki Kaca kei Ekironi.
53 Era sa lesu mai na Isireli ena nodra cemuri ira na Filisitia.
54 Sa kauta mai na ulu ni kai Filisitia o Tevita ki Jerusalemi, na nona yaragi sa tikoga e nona vale laca.
55 Ni sa raica o Saula na nona cicivi ira na Filisitia o Tevita, sa tukuna sara vei Epana na i liuliu ni mataivalu, "Na cauravou oqo e luvei cei?" Sa sauma mai o Epana, "Me vaka sa bula na yalomuni kemuni na tui, au sa sega ni kila."
56 Sa tukuna yani na tui, "Vakataroga mai, se luvei cei o koya oqo."
57 Sa lesu mai o Tevita na valuti ira na Filisitia. Sa kauti koya mai o Epana vei Saula kei na uluni kai Filisitia e ligana.
58 Sa tukuna o Saula vei Tevita, "O iko na luvei cei, cauravou?" Sa sauma yani o Tevita, "Oi au na luvena na nomuni tamata o Jese na kai Peceliema."


Chapter 18

1 Samuela 18 1 Sa qai yaco ni rau sa veivosaki oti tiko kei Saula, na yalo i Jonacani sa kabita na yalo i Tevita, ka sa lomani koya o Jonacani me vaka ga na yalona dina.
2 Sa kauti koya o Saula, ka sa sega tale ni laiva me lesu ki nodratou vei tamana.
3 O Jonacani kei Tevita e rau sa cakava e dua na veiyalayalati – baleta ni sa lomani Tevita vakalevu o Jonacani, me vaka ga na nona lomani koya.
4 Sa taura ga na nona i oro ka vakaiorotaki Tevita kina kei na nona i sulu vaka i valu kei na nona yaragi talega ni valu – nai seleiwau, na dakai kei na kena beleti.
5 Sa dau lako o Tevita ki na vanua cava ga sa talai koya kina o Saula, sa dau vakayalomatuataka na nonai valavala. Sa biuti ira vata na qaqa ni vala, ka sa ciqomi mai vei ira kecega na tamata, vei ira talega na dauveiqaravi i Saula.
6 Sa yaco ni ra sa lako tiko mai ki vale, ni sa lesu tiko mai e nai valu o Tevita, era sa lako mai na marama kecega e Isireli ena nodra sere ka meke tiko mai, me sotavi Saula na tui, vata kei na bitu ni vakatagi kei na reki kei na veiyaya ni qiriqiri tale eso.
7 Era sa meke ka lagata tiko - "Sa vakamatea o Saula na veiudolu ia o Tevita na veitini na udolu."
8 Sa cudru sara vakalevu o Saula, ka sa yaloca ena veika sa rogoca, "Ni ra sa lagataka tiko na veitini na udolu vei Tevita, ia, vei au, na veiudolu ga. Na cava tale, sa rawa ni nona na matanitu?"
9 Mai na siga o ya, sa vakaraici Tevita tiko o Saula.
10 Sa yaco ena siga ka tarava, sa lako mai vei Saula na yalo ni veivakacalai mai vua na Kalou ka sa parofisai e loma ni vale. Sa qiria nai vakatagi e ligana o Tevita me vaka sa dau cakava, ia, sa dua na moto sa taura tiko o Saula e ligana.
11 Sa cokataka yani na moto o Saula ni sa tukuna tiko, "Au na vakoti Tevita vata kei na lalaga ena moto oqo." Ia, o Tevita sa dro me vaka e liu.
12 O Saula sa rerevaki Tevita tiko, baleta ni sa tiko vata kei koya o Jiova, ka sa lako tani mai vei Saula.
13 Sa kauti Tevita tani mai matana o Saula ka sa biuti koya me liutaki ira na mata i valu e veiudolu; sa dau lako yani ka lako mai e matadra na tamata.
14 Sa dauqarauni koya o Tevita ka bula vakayalomatua ena veika kecega, sa tiko vata kei koya o Jiova.
15 Ni sa dau-raica o Saula na nona i valavala vakayalomatua; sa dau rerevaki koya.
16 O ira kece na Isireli kei na Juta era sa taleitaki Tevita baleta ni sa daulako yani ka lako mai e matadra. Rau Sa Veiwatini O Tevita Kei Mikeli
17 Sa tukuna mai o Saula vei Tevita, "Oqo na luvequ yalewa qase yacana o Merape; au na soli koya vei iko me watimu, mo noqu qaqa ka vala ena i valu i Jiova." Ni sa nanuma o Saula, "Me kua ni tarai koya na ligaqu – me ra tarai koya ga na Filisitia.
18 Sa tukuna mai o Tevita vei Saula, o cei mada o Tevita, na cava o au kei na vuvale i tamaqu e Isireli, me'u wili kina me vugona na tui?"
19 Sa yaco na gauna me sa soli kina o Merepa vei Tevita, sa qai soli vei Adreli na kai Meolati me watina.
20 O Mikeli na luvei Saula yalewa sa domoni Tevita, sa tukuni vei Saula ka sa marau kina o koya.
21 Sa tukuna o Saula, "Au na soli Mikeli vei Tevita, me tagavi kina ka me na tarai koya na ligadra na Filisitia. Sa tukuna vei Tevita o Saula ena i karua ni gauna, "O sa na vugoqu ena siga oqo."
22 Sa vakaroti ira na nona dauveiqaravi o Saula, "Veivosaki vata kei Tevita vakavuni ka tukuna, "Raica sa rui marautaki iko na tui kei ira kece na nona dauveiqaravi era sa lomani iko. Oqo mo sa mai veivugoni kei na tui."
23 Sa cavuti na vosa nei Saula ni sa vakarorogo o Tevita. Sa sauma mai o Tevita, "O ni sa nanuma beka ni sa ka rawarawa me dua e rau veivugoni kei na tui, ni'u sa dravudravua ka tamata lolovira sara?"
24 Sa tukuni vei Saula ni sa vosa mai vaka o ya o Tevita.
25 Sa sauma yani o Saula, "Dou tukuna vei Tevita ni sa sega ni vinakata na tui nai sau ni yalewa, me dua ga na drau na kuli ni yagodra vakatagane na kai Filisitia me cudruvaki kina na tui vei ira na nona meca. Sa nanuma tiko ga o Saula me mate o Tevita ena ligadra na kai Filisitia.
26 Ni ra sa mai tukuna vei Tevita na vosa oqo o ira na dauveiqaravi – sa marau kina o Koya me rau veivugoni kei na tui. E se bera tiko ni oti na gauna yalataki;
27 Sa tucake o Tevita ka lako yani, o koya kei ira na nona tamata. Era sa vakamatea e rua na drau na kai Filisitia. Sa kauta mai o Tevita na kuli ni yagodra vakatagane ka soli nai wiliwili taucoko vua na tui me rawa ni wili kina me vugona na tui. Sa qai soli Mikeli o Saula me rau veiwatini.
28 Sa raica ka kila o Saula ni sa tiko vata kei Tevita o Jiova ka sa domoni Tevita talega o Mikeli;
29 e se rerevaki Tevita tiko ga o Saula, sa meca levu tikoga i Saula o Tevita.
30 Era sa lako ki valu na veituraga lalai ni Filisitia. Sa yaco ena veigauna kecega era lako kina, sa kilikili ka vuku tikoga o Tevita mai vei ira kece na tamata i Saula. Sa raici cake duadua tiko ga o Tevita.


Chapter 19

1 Samuela 19 1 Sa vosa o Saula vei Jonacani na luvena kei ira kece na nona dauveiqaravi me ra vakamatei Tevita; o Jonacani na luvei Saula sa taleitaki Tevita vakalevu.
2 O Jonacani sa tukuna vei Tevita ka vaka: "Na tamaqu o Saula sa vinakata me vakamatei iko. Mo qarauni iko tiko me yacova na mataka, mo tiko lo ka vunitaki iko tiko.
3 "Au na la'ki tu e yasai tamaqu mai na buca – na vanua o tiko kina, au na vosa tiko vei tamaqu me baleti iko. Na veika au na kila, au na mai tukuna vei iko."
4 Sa vosa vinaka o Jonacani vei tamana me baleti Tevita ka tukuna vua, "Me kua ni valavala ca na tui ena vuku ni nona tamata, ena vukui Tevita, baleta ni sa sega ni valavala ca vei iko – na nona cakacaka sa rui vinaka vei iko.
5 "Sa solia na nona bula me vakamatei ira na Filisitia, sa qai kauta mai o Jiova e dua na veivakabulai levu vei ira na Isireli. O iko sara ga o sa raica ka taleitaka – na cava o sa via vakamatea kina e dua na dra e sega ni cala, mo via vakamatei Tevita kina?"
6 Sa rogoca na domo i Jonacani o Saula ka yalataka, "Me vaka sa bula o Jiova ena sega ni vakamatei."
7 Sa kacivi Tevita mai o Jonacani ka tukuna vua na veika kece oqo. Sa qai kauti Tevita mai ki vei Saula o Jonacani, ni sa dau tiko ga e matana ena veigauna e liu.
8 Sa dua tale nai valu; sa lako yani o Tevita me vala kei ira na Filisitia, sa samuti ira ena dua na veisamuti levu – ka era sa dro mai matana.
9 Sa lako mai na yalo ni veivakaleqai mai vei Jiova ki vei Saula ni sa dabe tiko e nona vale ka tiko e ligana na nona moto levu. Sa vakatagi tiko o Tevita e ligana.
10 Sa nakita o Saula me cokai Tevita vata kei na lalaga ni vale ena nona moto, ia, sa tasiri yani o Tevita mai na matai Saula. Sa cokataka o Saula na moto ki lalaga. Sa dro o Tevita ena bogi o ya.
11 Sa vakatala o Saula e so na i talaki ki na vale nei Tevita me vakaraici koya ka vakamatei koya ena kena mataka. O Mikeli na wati Tevita sa tukuna vua, "Kevaka o na sega ni qarauni iko ena bogi oqo, o na mate ena mataka."
12 Sa biuti Tevita sobu mai na katubaleka o Mikeli na watina, sa lako yani ka cici ka dro sara.
13 Sa taura e dua na matakau o Mikeli ka tutuvitaka ena i davodavo nei Tevita ena vuti ni me ki uluna, kei na so nai sulu.
14 Ni sa talatala mai o Saula me kau yani o Tevita, sa tukuna mai o Mikeli "Ni sa tauvimate tiko."
15 Sa talai ira tale yani o Saula me ra raici Tevita ka kauti koya mai vata kei nai davodavo, "Me'u mai vakamatei koya."
16 Ni ra sa lako yani nai talaki, sa tu na matakau e nai davodavo, ka sa ubi tu na uluna ena vuti ni me,
17 Sa tukuna mai o Saula vei Mikeli, "Na cava o sa vakaisini au kina vaka oqo, me lako tani kina na kequ meca, me dro tani kina?" Sa sauma yani vei Saula o Mikeli, "Sa tukuna vei au o koya, 'Mo laivi au me'u lako – na cava me'u vakamatei iko kina?'"
18 Sa dro o Tevita ka lako ki Rama vei Samuela, ka tukuna vua na veika kece sa cakava vua o Saula. E rau sa lako kei Samuela ka la'ki tiko e Naioci.
19 Sa mai tukuni vei Saula, "Mo kila ni sa tiko mai Naioci e Rama o Tevita!"
20 Sa veitalai o Saula me la'ki kau mai o Tevita, ni ra sa raica nai lawalawa parofita ni ra sa parofisai tiko, ka sa liutaki ira tiko o Samuela, sa lako mai na Yalo ni Kalou vei ira nai talaki nei Saula ka era sa parofisai talega.
21 Ni sa tukuni oqo vei Saula, sa talai ira tale eso nai talaki ka era sa parofisai talega. Sa veitalai tale o Saula ena i ka tolu ni gauna, era sa parofisai talega.
22 Sa lako mai ki Rama o Saula ki na i keli ni wai levu e Seku, sa taroga sara, "E vei o Samuela kei Tevita?" Sa sauma mai e dua, "E rau sa tiko mai Naioci e Rama."
23 E sa lako sara ki Naioci e Rama, sa lako mai vua na Yalo ni Kalou, sa laki tiko yani o Saula ka parofisai tiko me yaco sara ni sa yacovi Naioci yani e Rama.
24 Sa luvata tani na nona i sulu e cake ka parofisai tiko e matai Samuela, ka sa davo wale tiko ena siga taucoko ka bogi talega. Era sa tukuna kina, "Sa tiko talega vata kei ira na parofita o Saula?"


Chapter 20

1 Samuela 20 1 Sa dro tani mai Naioci e Rama o Tevita, ka lako ka tukuna vei Jonacani, "Na cava au sa cakava? Na cava au sa cala kina? Na cava au sai valavala ca kina vei tamamu, baleta ni vinakata tiko me yali na noqu bula?"
2 Sa tukuna vua o Jonacani, "E sega sara, o na sega ni mate! ena sega ni cakava e dua na ka o Tamaqu, na ka lelevu se lalai, ena tukuna mada e liu vei au. O Tamaqu e sega ni dua na ka e vunitaka vei au e sega sara!"
3 Sa bubului tale o Tevita ka tukuna, "Sa kila o Tamamu ni'u kune loloma mai vei iko ni sa tukuna, 'Me kua ni kila o Jonacani na veika oqo, de qai rarawa kina.' Ia me vaka sa bula o Jiova, ka sa bula talega na yalomu, sa dua ga nai kalawa mai vei au ki na mate."
4 Sa tukuna o Jonacani vei Tevita, "Na veika ga o sa gadreva, au na vakayacora vei iko."
5 Sa sauma mai o Tevita vei Jonacani, "Ni mataka sa na vulavou, au na dabe vata na tui me keirau kanavata. Mo laivi au me'u lako mada ka vuni mai veikau me yacova ni sa karobo nai ka tolu ni siga.
6 "Kevaka sa kawai o tamamu ena noqu yali, 'Mo qai tukuna ni sa kerea oti o Tevita me cici sobu mada ki Peceliema na nona koro ni sa caka mai kea e dua nai soro ni veiyabaki ni vuvale taucoko.'
7 "Kevaka sa mani tukuna, 'sa vinaka oqori, sa na qai bula na nomu tamata.' Ia kevaka sa cudru, mo kila ga ni sa nakita o koya na ka e ca.
8 "Mo qai caka vinaka vua na nomu tamata, ni o sa kauta mai na nomu tamata ki na veiyalayalati vei Jiova vata kei iko. Kevaka sa dua na cala sa tu vei au, mo vakamatei au ga o iko, na cava o sa via kauti au kina vei tamamu?"
9 Sa sauma o Jonacani, "Me yawa sara vei iko, ni kevaka au sa kila ni sa bucina o Tamaqu na ka ca me lako yani vei iko, me'u qai sega ni tukuna vei iko?"
10 Sa vosa o Tevita vei Jonacani, "O cei me na qai tukuna vei au, se vakacava kevaka sa sauma vakaukauwa vei iko o tamamu?"
11 Sa tukuna mai o Jonacani vei Tevita, "Daru lako mada ki na taudaku ni koro." E rau sa lako yani.
12 Sa tukuna tale o Jonacani vei Tevita; "O Jiova na Kalou e Isireli sai vakadinadina e daidai. Kevaka au sa na kila vinaka na loma i tamaqu ni mataka se nai katolu ni siga – ni sa na vinaka o Tevita, au na sega ni tala mai nai talai me tukuna vei iko,
13 "Me cakava vakalevu o Jiova vei Jonacani. Kevaka sa vinakata o tamaqu me cakava na ka ca, au na tukutuku mai vei iko ka mo sa dro yani, mo lako ka bula. Me tiko vata kei iko o Jiova me vaka ni a tiko vata kei tamaqu.
14 "Mo kua ga ni vakaraitaka vei au na yalololoma i Jiova ni'u se bula tiko, me'u kua ni mate kina;
15 "Ia, mo kakua ni musuka laivi na yalololoma mai na noqu vale me sega ni mudu, e segai ena nona musuka laivi o Jiova na veimeca kece i Tevita ena delai vuravura kece."
16 Sa cakava o Jonacani e dua na veiyalayalati kei na vuvale vei Tevita ka tukuna, "Me taura mai o Jiova e na ligadra na meca i Tevita."
17 Sa vakavuna o Jonacani me yalayala tale o Tevita baleta ni sa rui taleitaki koya vakalevu; sa lomani Tevita me vaka sa lomani koya ga vakai koya.
18 Sa tukuna o Jonacani vei Tevita, "Sa Vula Vou na siga ni mataka, ona daudivi vakalevu baleta ni sa na lala tiko na nomu i dabedabe.
19 "Ni o sa tiko me tolu na siga, lako sobu vakatotolo ka lako mai ki na vanua o a vuni tiko kina ena siga ni nodaru veiyalayalati. Mo tiko ga ena vatu o Eseli.
20 "Au na vanataka yani e tolu na dakai titi ki na yasa ni vatu, me vaka ga au vana tiko yani e dua na takete;
21 "Mai kea au na tala yani kina e dua nai talai ni sa tukuni vua, 'Lako ka vakaraica mai na gasau ni dakai' – au sa na tukuna yani vua, 'Kevaka sa tiko na gasau ena yasamu oqo, tomika ka lako mai' – me vaka sa bula o Jiova – o sa na bula ka sega na ka mo leqa kina.
22 "Ia, kevaka au sa tukuna vua nai talai, 'Raica na gasau sa siviti iko' – mo qai lako tani, ni sa vakatalai iko tani o Jiova.
23 "Me vaka na veika o sa tukuna tiko, io, me tiko ena kedaru veimama o Jiova me sega ni mudu."
24 Sa vuni tiko o Tevita, ia, ni sa lako mai na Vula Vou, sa dabe na tui me kana ena kana magiti vakarautaki.
25 Sa dabe tiko na tui ena nona i dabedabe ena yasa ni lalaga, sa tucake o Jonacani ka sa dabe ena yasa ni tui o Epana, ka sa lala tiko nai dabedabe i Tevita.
26 Sa sega ni tukuna o Saula e dua na ka ena siga o ya, "Ni sa kila, sa dua na ka sa yacovi Tevita; sa dukadukali o koya, io sa dukadukali dina."
27 Sa qai yaco ena siga ka tarava, nai karua ni siga ni vula, sa lala tiko nai dabedabe i Tevita. Sa tarogi Jonacani na luvena o Saula, "Na cava e sega ni lako tiko mai kina na luvei Jese me mai kana, e sega e na noa ka sega tale ni kua?"
28 Sa sauma vei Saula o Jonacani, "sa kerei au o Tevita me lako ki Peceliema.
29 "Sa tukuna, laivi au me'u lako, 'Ni ratou sa vakacaboi soro tiko na matavuvale mai na koro, ni ratou sa vakaroti au na tuakaqu me'u tiko kina. Oqo kevaka au sa kune loloma mai vei iko – mo laivi au me'u lako ka raici iratou na taciqu.' Oqori na vuna e sega ni kune kina ena teveli ni tui."
30 Sa tubu na cudru i Saula vei Jonacani, ka tukuna vua, "O iko na luve ni yalewa dauveivakacalai ka dauvukitani!, au sa sega beka ni kila ni o sa digitaka na luvei Jese ki na nomu madua kei na madua ni luvawale nei tinamu?
31 "Na balavu ga ni nona bula na luvei Jese ena delai vuravura, o na sega ni vakadeitaki, se na nomu matanitu. Oqo mo lako ka kauti koya mai vei au, ni sa dodonu me mate."
32 Sa sauma yani o Jonacani vei Saula na tamana ka vaka: "Na cava na vuna me vakamatei kina? Na cava e cakava?"
33 Sa cokai koya yani o Saula ena moto me vakamatei koya – oqo sa kila kina o Jonacani ni sa nakita o Saula me vakamatei Tevita.
34 Sa tucake mai o Jonacani ena cudru levu mai na teveli ni kana, sa sega ni kana ena i karua ni siga ni vula, ni sa luluvu vakalevu ena vuku i Tevita, ena vuku ni cakacaka veivakamaduataki levu sa cakava vua o tamana.
35 Sa qai yaco ena mataka, sa lako yani o Jonacani ki na were ena gauna sa lokuci oti vei Tevita, sa tiko vata kei koya e dua na cauravou lailai.
36 Sa tukuna vua na nona cauravou, "Mo cici ka vakasaqara mai na gasau au na vanataka." Sa cici yani na cauravou ni sa vanataki na dakai titi me siviti koya.
37 Ni sa yaco yani na cauravou, ena vanua sa vanataki kina, sa kaci yani o Jonacani vua na cauravou, "E sega beka ni siviti iko na gasau?"
38 Sa kaci yani vua na cauravou o Jonacani, "Vakatotolo mo kua ni vakaberabera!" Sa tomika mai na gasau na cauravou ka lesu tale mai.
39 Sa sega ni kila e dua na ka na cauravou, ni rau sa kila ga na ka koya o Jonacani kei Tevita.
40 Sa solia o Jonacani na nona yaragi vei koya na cauravou ka tukuna vua, "Lako kauta oqo ki na koro."
41 Ni sa lako ga na cauravou, sa tucake mai o Tevita ena vanua e vuni tiko kina, ka cuva ki na qele vakatolu. E rau sa veikidavaki ka veitagicaki – vakalevu ga o Tevita.
42 Sa tukuna o Jonacani vei Tevita, "Mo lako ena vakacegu ni daru sa veiyalayalati oti ena yaca i Jiova ka vaka: 'Me tiko vata kei iko o Jiova, vaka talega kina vei au, vei ira na nomu kawa ka vakatalega kina vei ira na noqu kawa me sega ni mudu.'" Sa tucake o Tevita ka lako yani, sa lesu tale ki na koro o Jonacani.


Chapter 21

1 Samuela 21 1 Sa lako mai ki Nopi o Tevita vei Apimeleki na bete. Sa rere o Apimeleki ni rau sa sota kei Tevita, ka tarogi koya sara, "Na cava o lako duadua mai kina, ka sega tale kina ni dau me lako vata mai kei iko?"
2 Sa sauma o Tevita vei Apimeleki na bete, "Sa vakaroti au na tui ena so na cakacaka ka tukuna, 'Me kua tale ni dua e kila na cakacaka au sa talai iko kina oqo, se na veika au sa vakarota vei iko.' Au sa dusimaki ira na noqu cauravou me ra lako vaka ka vaka.
3 "Na cava sa tiko vei iko oqori, mo solia vei au e lima na madrai kei na veika ga e rawa ni kune."
4 Sa sauma mai na bete vei Tevita ka vaka: "E dina, keimami sa maroroi mai na yalewa me tolu na siga ena neimami lako mai. Sa savasava na yagodra na cauravou, sa na tara kina na madrai oqori, e dina ga ni sa vakatabui ena siga oqo."
5 Sa tukuna yani vua na bete o Tevita, "E dina, keimami sa maroroi mai na yalewa me sava na yagodra na cauravou, sa na tara kina na madrai oqori, e dina ga ni sa vakatabui ena siga oqo."
6 Sa solia kina na madrai tabu na bete vei Tevita, ni sa sega tale na madrai e tiko, na madrai vakarautaki ga vei Jiova; sa dau kau mai na madrai katakata mei sosomi ni madrai sa tauri.
7 Sa tiko mai kea ena siga o ya e dua nai tokani i Saula, sa tiko ena mata i Jiova. Na yacana o Deoki na kai Itomi nai liuliu ni vakatawa ni manumanu sa taukena o Saula.
8 Sa tukuna o Tevita vei Apimeleki, "Sa sega beka ni tiko eke e dua na moto se i seleiwau? Ni'u sa sega ni kauta mai e dua nai yaragi baleta ni sa vinakata vakatotolo na tui me caka na cakacaka oqo."
9 Sa tukuna mai na bete, "Nai sele ga i Koliaci na kai Filisitia o koya o sa vakamatea mai na Buca o Ela, oqori, sa olo tiko ena i sulu ena daku ni Efoti. Kevaka o sa via taura, mo taura ga. Ni sa sega tale – o koya ga oqo." Sa tukuna o Tevita, "Sa sega e tautauvata, solia mai."
10 Sa tucake o Tevita mai na siga o ya ka dro mai na mata i Saula, sa lako yani vei Akisi na tui Kaca.
11 Sa tukuna vei Tevita o ira na veiqaravi nei Akisi, "Sa sega beka ni o koya oqo o Tevita na tui ni vanua? Era sa sega beka ni dauseretaki koya ena gauna ni meke ka vaka: 'Sa vakamatea o Saula na veiudolu, ia, o Tevita sa vakamatea na vei tini na udolu'?"
12 Sa kauta ki yalona na veivosa oqo o Tevita, ka sa rerevaki Akisi na Tui Kaca vakalevu.
13 Sa veisautaka na nona i valavala e matadra o Tevita, ka sa vuki tiko me vaka na lialia, sa kadrukadru tiko kina duru ni matamata kei na nona laiva tiko na nona weli me drodro tiko ga e kumina.
14 Sa tukuna o Akisi vei ira na nona tamata, "Raica sa lialia na tamata oqo, na cava dou sa kauti koya mai kina vei au?
15 "Au gadreva beka e dua na tamata lialia, mo ni kauta mai kina na lialia oqo me mai tiko e mataqu? Me lako beka mai na tamata oqo ki noqu vale?"


Chapter 22

1 Samuela 22 1 Sa lako tani mai kea o Tevita ka dro yani ki na qara vatu mai Etulama. Ni ratou sa rogoca na tacina kei tamana, e ratou sa lako sobu vua.
2 O ira kece era sa leqa tu, o ira kece sa dinau tu ka dredre ni sauma, kei ira kece era sa sega ni marautaka na veika sa yaco tiko, era sa lako kece mai vua. Sa mai nodra i liuliu o Tevita. Sa va na drau na tagane sa tiko vata kei koya.
3 Sa lako tani mai kea ki Misipa e Moapi o Tevita ka tukuna vua na tui Moapi, "Au kerea me rau tiko e ke o tamaqu kei tinaqu, me yacova ni'u sa kila na lewa ni Kalou vei au."
4 Sa qai kauti rau mai o Tamana kei Tinana vei tui Moapi me rau tiko kina, ni sa tiko o Tevita ena vanua ni vakavakarau.
5 Na parofita o Kata sa tukuna vei Tevita, "Kua ni o tiko ena vanua ni vakavakarau oqori, lako kina vanua o Juta." Sa lako o Tevita ki na veikau mai Ereci.
6 Ni sa rogoca o Saula ni sa kilai o Tevita kei ira sa tiko vata kei koya — o Saula sa tiko mai Kipea ena vunikau tamarisi e Rama, na moto e ligana kei ira na nona tamata ni ra sa vakavoliti koya—
7 Sa tukuna yani o Saula vua sa tu e yasana, "Rogoca oqo, io kemuni na Penijamini! ena solia beka vei kemuni na luvei Jese oqo na veiwere na veivaini, ka vakayacora mo ni liuliu ni vei yaudolu kai i liuliu ni vei yadrau?
8 "O ni sa cakacaka vakavuni kece vei au, ni sa sega e tukuna vei au ni o Jonacani na luvequ sa cakava na veiyalayalati kei koya na luvei Jese; sa sega mada ni dua e nanumi au se to vata kei au, ni o na luvequ sa vakauqeta na noqu tamata me coqai au, me daro vakawawa tiko me vaka na siga oqo."
9 Sa sauma o Deoki na kai Itomi, o koya sa dauraici ira na dauveiqaravi i Saula ka vaka: "Au sa raica na luvei Jese ni sa lako ki Nopi vei Apimeleki na luvei Aitubu.
10 "Sa vakatarogi Jiova ena vukuna, sa solia talega vua nai vaqa ka sa solia talega vua nai seleiwau nei Koliaci na kai Filisitia."
11 Sa talatala na tui me kau mai o Apimeleki na bete na luvei Aitubu, kei ira kece na vale nei tamana – na bete kece sa tiko mai Nopi. Era sa lako kece mai vua na tui.
12 Sa tukuna yani o Saula, "Mo rogoca oqo na luvei Aitubu!" Sa sauma mai, "Sai au oqo noqu turaga."
13 Sa tukuna mai o Saula, "Na cava o ni sa bosei au kina vakaca, o iko kei na luvei Jese, mo solia kina vua na madrai kei nai seleiwau ka vakataroga na Kalou ena vukuna, me veicoqacoqa kei au – me laki toka mai vakavuni me vaka na siga oqo."
14 Sa sauma vua na tui o Apimeleki, "O cei vei ira na nona tamata sa dina me vakataki Tevita na vugona na tui, o koya sa lako ena nomu lewa ka sa vakarokorokotaki ena nomu vale?
15 Au sa tekivuna beka me'u tarogi Jiova ena vukuna? Me kua sara vei au! Me kua ni vaka o ya na nona vakanananu na tui vua na nona tamata se ki na vale nei tamaqu. Ni sa sega ni kila na ka oqo na nomuni tamata, na ka lelevu kei na veika lalai."
16 Sa tukuna mai na tui, "O na mate vakaidina Apimeleki, o iko kei ira kece na vuvale nei tamamu!"
17 Sa tukuna sara vei ira na yadra sa tu e yasana, "Ni vuki yani ka vakamatea na bete i Jiova, baleta na ligadra sa tiko vei Tevita ni ra sa kila talega na dro nei Tevita ka sega ni tukuna vei au." Era sa sega ni rawata na tamata me vakamatea na bete i Jiova.
18 Sa tukuna na tui vei Deoki, "Vuki yani ka vakamatea na bete!" Sa vuki o Deoki na Itomi ka samuti ira na bete." Sa vakamatea ena siga o ya e walusagavulu ka lima na tamata era dara tiko na efoti.
19 E Nopi talega na nodra koro na bete sa vakamatei ira talga e nai selei-wau na tagane, na yalewa, na gone, kei ira na dramidrami, na bulumakau, na asa, na sipi—ena i seleiwau.
20 Sa dua vei ira na luvei Apimeleki na luvei Aitubu na yacana o Abiata sa dro ka cici muri Tevita.
21 Sa tukuna vei Tevita ni o Saula sa vakamatei ira na bete i Jiova.
22 Sa tukuna o Tevita vei Abiata, "Au sa kila sara ga na siga sa tiko kina mai kea o Deoki na Itomi, ni na tukuna vei Saula. Au sa vakavuna na nodra mate na bete ena vale nei tamamu.
23 "Mo tiko eke, kua ni rere; o koya sa vakasaqara na noqu bula sa vakasaqara talega na nomu bula! O na bula ni o tiko vata kei au."


Chapter 23

1 Samuela 23 1 Sa tukuni vei Tevita vaka oqo: "Raica o ira na Filisitia era sa valuti Keila tiko, era sa butakoca tiko nai qaqi ni sila."
2 Sa vakatarogi Jiova o Tevita, "Me'u lako beka ka valuti Filisitia?" Sa tukuna vei Tevita o Jiova, "Mo lako ka valuti ira na Filisitia me bula kina o Keila."
3 Era sa tukuna vei Tevita na nona tamata, "Raica keimami sa rere e Juta, qai vakacava ni keimami sa lako i Keila me vala kei ira na Filisitia?"
4 Sa vakatarogi Jiova tale o Tevita, sa sauma mai vua o Jiova, "Tucake ka lako sobu ki Kela, ni'u na soli ia na Filisitia ki na ligamu."
5 Era sa lako sobu ki Keila o Tevita kei ira na nona tamata ka vala kei ira na Filisitia, era sa valuti ka samuti vakaukauwa, ka kauta na nodra manumanu susu, sa vakabulai ira mai Keila o Tevita.
6 Sa yaco, o Abiata na luvei Apimeleki ni sa dro vei Tevita ki Keila, sa kauta tiko e dua na Efoti e ligana.
7 Sa tukuni vei Saula ni sa lako sobu ki Keila o Tevita. Sa tukuna o Saula, "Na Kalou sa soli koya ki na ligaqu, ni sa curu o koya ki na dua na koro e vakabai ka vakamatamata."
8 E sa kacivi ira kece na tamata o Saula ki nai valu, me ra lako sobu ki Keila ka vesuki Tevita kei ira na nona tamata.
9 Ni sa kila o Tevita sa naki ca tiko o Saula vei koya, sa tukuna vei Abiata na bete, "Kauta mai eke na efoti."
10 Sa tukuna yani o Tevita, "Jiova na Kalou e Isireli, sa rogoca na nomuni tamata ni sa na lako mai o Saula ki Keila me vakarusa, ena vukuqu.
11 "Era na soli au beka na kai Keila ki na ligana? ena lako beka mai o Saula me vaka sa rogoca tiko na nomuni tamata? I Jiova na Kalou ni Isireli, au masuta mo ni tukuna vua na nomuni tamata." Sa tukuna mai o Jiova, "Ena lako mai o koya."
12 Sa taro tale o Tevita, "Era na soli au beka kei ira na noqu tamata o ira na kai Keila ki na ligai Saula?" Sa tukuna mai o Jiova, "Era na soli kemuni."
13 O Tevita kei ira na ono na drau na nona tamata era sa lako tani e Keila ka lako ki na vanua e rawa ni ra lako kina. Sa tukuni tale vei Saula ni sa lako tani e Keila o Tevita, sa mani tu vakadua na nona lako sobu.
14 Sa tiko mai na vanua liwa o Tevita ka sa tiko ga mai na Vanua Liwa o Sipi. Sa sagai koya o Saula ena veisiga kece, o Jiova ga sa sega ni soli Tevita ki na ligana.
15 Sa raica o Tevita ni sa lako mai o Saula me vakasaqarai koya, sa tiko mai na Vanua Liwa o Sipi o Tevita ena veikau.
16 O Jonacani na luvei Saula sa lako vei Tevita ki na veikau me vakaukauwataki koya ena Kalou.
17 Sa tukuna vua, "Mo kua ni rere, ni na sega ni kunei iko na ligai Saula na tamaqu. O na tui e Isireli ka au na tiko e yasamu. O tamaqu mada ga sa kila tiko oqori."
18 E rau sa cakava e dua na veiyalayalati ena mata i Jiova. Sa tiko ga o Tevita ena veikau ka sa lesu tale o Jonacani ki nona vale.
19 Era sa lako mai na kai Sipi vei Saula e Kipea ka mai tukuna, "Sa sega beka ni vuni tiko vata kei keimami mai na veikau e Ajila ena ceva kei Jesimoni o Tevita?
20 "Oqo mo lako sobu mai na tui, me vaka na gagadre sa tu oqori e lomamu, sa na neimami i tavi me soli koya ki na ligamuni, na tui."
21 Sa tukuna o Saula, "Mo ni kalouvinaka mai vei Jiova ni o ni sa loloma vakalevu vei au.
22 "Mo ni lako ka vakaraica vinaka na vanua sa vuni tiko kina, kei koya sa raici koya tiko mai kea. Sa mai tukuni vei au ni sa rui tamata qaseqase o koya.
23 "Mo ni raica ka kila vinaka na veivanua e dauvuni tiko kina; ka lesu tale mai vei au ena tukutuku e dina, au na lako vata kei kemuni. Sa na yaco, kevaka sa tiko ena vanua, au na vakasaqarai koya ena veiyavusa taucoko e Juta."
24 Era sa tucake ka lesu tale ki Sipi ena matai Saula. O Tevita kei ira na nona tamata era sa tiko mai na Vanua Liwa o Maoni, ena ceva kei Jesimoni.
25 Ni ra lako o Saula kei ira na nona tamata me vakasaqarai koya, sa dau tukuni vei Tevita. Sa dau lako sobu ki na veivatu ka tiko mai na Vanua Liwa o Maoni. Ni sa daurogoca o Saula, sa daulako vaka ki Maoni.
26 Sa daulako o Saula ki na yasa ka dua ni ulunivanua o Tevita ki na yasana ka dua. Sa dau vakatotolo o Tevita me lako tani mai vei Saula, era sa dau tuva wavoki na tamata nei Saula me tauri Tevita.
27 Sa qai dau kau mai nai tukutuku vei Saula, "Mo vakatotolo mai, ni ra sa dau kaba vanua tiko mai na Filisitia!"
28 Sa dau suka vakatotolo tale o Saula mai na nona cicivi Tevita tiko me lakovi ira na Filisitia. Era sa vakayacana kina na vanua koya na Vatu ni Dro.
29 Sa lako cake mai kea o Tevita ka mai tiko ena koro ni valu e Ena-Keti.


Chapter 24

1 Samuela 24 1 Sa yaco ni sa lesu tiko mai o Saula ena nona muri ira na Filisitia, sa tukuni vua. "Mo kila! O Tevita sa tiko mai na vanua liwa o Ena-Keti."
2 Sa kauta mai o Saula e tolu na udolu na tamata digitaki mai Isireli taucoko me ra lako ka vakasaqarai Tevita kei ira na nona tamata ena Veivatu ni Me Kila.
3 Sa lako mai ki na nodra i vakaruru na sipi ena sala, sa tiko kina e dua na qara vatu; sa curu ki loma o Saula me vakavalelailai. (era sa tiko oti mai loma sara o Tevita kei ira na nona tamata).
4 Era sa tukuna vei Tevita na nona tamata "Oqo sara ga na siga sa tukuna vei iko o Jiova ka vaka, 'Raica Au na soli ira na kemu meca ki na ligamu, mo cakava me vaka o sa vinakata.'" Sa tucake o Tevita ka kotiva na tutu ni i sulu nei Saula.
5 Sa qai yaco, ni sa leqa tiko vakalevu na yaloi Tevita ena nona kotiva na tutu ni i sulu nei Saula.
6 Sa mani tukuna vei ira na nona tamata, "Sa sega ni vakatara o Jiova me'u cakava na ka oqo vua na noqu turaga, nai lumuti i Jiova, me'u dodoka na ligaqu vua – ni'u sa kila, ni sai koya nai lumuti i Jiova."
7 Sa vakaroti ira na nona tamata ena veivosa vaka oqori, ka sa sega ni vakatara me ra tarai Saula. Sa lako tani o Saula mai na qara vatu ka sa lako sara yani.
8 Sa tucake talega o Tevita ka lako tani mai na qara vatu ka kacivi Saula yani ka vaka: "Noqu turaga na tui!" Ni sa rai vuki mai o Saula, sa vakacuva na uluna o Tevita ka cuva ni sa vakarokoroko.
9 Sa tukuna mai o Tevita vei Saula, "na cava o sa dauvakarogoca kina na nodra vosa na tamata me ra tukuna tiko, 'sa vinakata o Tevita mo vakaleqai?'
10 "Raica, ena siga oqo sa raica na matamu ni sa vakabulai iko o Jiova mai na ligaqu ena loma ni qara vatu – e dua sa vakauqeti au me'u vakamatei iko. Na mataqu ga sa vakatara mo bula, ni'u sa tukuna, 'au na sega ni dodoka na ligaqu vua na noqu turaga, ni sai koya nai lumuti ni Kalou.'
11 "O koya oqo, Tamaqu, raica!, Io, raica na tutu ni nomu i sulu e ligaqu! e loma o ya, au a musuka kina na tutu ni nomu i sulu ka sega ni vakamatei iko, mo raica ka kila ni sa sega na talaidredre e ligaqu ka au sa sega talega ni valavala ca vei iko. Ia o sa vakasaqara ga mo taura na noqu bula.
12 "Na Kalou ga me lewa ena kedaru maliwa ka me sauma vei au na Kalou ena vukumu ia, na ligaqu ena sega ni via tarai iko.
13 "Me vaka nai vakabalebale ni veigauna makawa, 'Nai valavala e ca ena lako ga mai nai valavala e ca.' Ia na ligaqu ena sega ni lako mai vei iko.
14 "O koya sa sasaga tiko kina na tui Isireli me vakasaqara?E koli mate? Na kutu?
15 "Me qai lewa ga o Jiova, ka lewa ga vei iko kei au, me raica ka vakadonuya na noqu vakatutu ka vakabulai au mai na ligamu."
16 Ni sa vosataka oti tiko na veivosa oqo o Tevita vei Saula, sa tukuna mai o Saula, "Sa domomu beka oqo, Tevita na luvequ?" Sa tagi vakadomoi levu o Saula.
17 Sa tukuna tale mai vei Tevita, "O sa yalododonu cake mai vei au; ni o sa sauma vei au ena i valavala vinaka, ia, oi au sa sauma vei iko ena ca.
18 "O sa vakaraitaka vei au ena siga oqo, na nomu caka vinaka vei au – ni sa soli au o Jiova ki na ligamu, o sa sega ni vakamatei au.
19 "Kevaka e dua sa raica na kena meca, ena laiva beka me dro bula yani? O koya oqo, me sauma vakavinaka vei iko o Jiova ena vuku ni ka o sa cakava vei au ena siga oqo.
20 "Oqo, au sa kila vaka i dina kina, ni o sa na tui – ka ena vakadeitaki na matanitu o Isireli e ligamu.
21 "O koya mo yalayala kina vei au ena vuku i Jiova ni o na sega ni musuka ira na noqu kawa – ni'u sa oti oi au, o na sega talega ni vakarusa na yacaqu mai na vale i tamaqu."
22 Sa qai yalayala o Tevita vei Saula. Sa lako ki nodratou o Saula – o Tevita kei ira na nona era sa lako cake ki na nona koronivalu.


Chapter 25

1 Samuela 25 1 Sa qai mate o Samuela; era sa soqoni vata na Isireli me lolositaki koya, ka buluti koya ga mai nodratou e Rama. Sa tucake o Tevita ka lako yani ki na vanua liwa o Parana.
2 Sa dua na tamata mai Maoni, sa cakava tiko na nona veivakatorocaketaki e Kameli, ka tamata vutuniyau sara. Sa tolu na udolu na nona sipi, sa dua na udolu na nona me, ka sa dau kotiva tiko na nona sipi mai Kameli.
3 Na yacana o Nepali, na yacai watina o Avikali. Sa yalewa yalomatua ka totoka na kena i rairai; o Nepali sa rui cudrucudru ka ca na nonai valavala. Sa kawa mai vei Kelevi o koya.
4 Sa rogoca o Tevita mai na vanua liwa ni sa kotivi ira tiko na nona sipi o Nepali,
5 Sa talai ira yani e tini na nona cauravou o Tevita ka tukuna – "Dou lako cake ki Kameli, ka lako vei Nepali, dou vakabula vua ena yacaqu.
6 "Dou tukuna vaka oqo vua, ni sa tiko vinaka o koya: 'Me tiko vei iko na vakacegu, me tiko e nomu vale na vakacegu, me tiko vei ira kecega sa nomu na vakacegu!
7 'Oqo, au sa rogoca ni ra sa tiko na nomu daunikotikoti. O ira na nomu i vakatawa era sa tiko kei keimami, ka keimami sa sega ni vakaleqai ira, se me dua na ka e yali mai vei ira ena nodra tiko e Kameli.
8 'Tarogi ira na nomuni cauravou, ka era na tukuna vei iko. Me ra kune loloma na noqu cauravou e matamu, ni keimami sa lako tiko mai ena kana magiti. Au kerea mo solia na veika ga sa tiko vei iko vei ira na nomuni tamata kei Tevita talega.'"
9 Ni ra sa lako mai na cauravou nei Tevita, era sa tukuna kece me vaka sa tukuna mai o Tevita vei Nepali, ka wawa tiko.
10 Sa sauma o Nepali vei ira na nei Tevita, "O cei o Tevita, o cei na luvei Jese? Sa levu na tamata ena gauna oqo, sa rawarawa na nodra vuki tani mai vei ira na nodra turaga.
11 "E dodonu li me'u taura na madrai, na wai, na lewe ni manumanu au sa vakamatea me kedra na daukotikoti, ka solia vei ira na tamata au sa sega ni kila se era sa lako mai vei?"
12 Era sa vuki lesu mai na cauravou i Tevita, ka era sa mai tukuna kece vua na nona vosa.
13 Sa tukuna o Tevita vei ira na nona cauravou, "Na tamata kece me dara na nona i seleiwau." Era sa dara kece na nodra i sele kei Tevita talega. Era sa lako vata kei Tevita e va na drau na tamata qaqa. E rua na drau na tamata sa vakatawana tiko na nodra i yaya.
14 E dua vei ira na cauravou sa mai tukuna vei Avikali na wati Nepali, "Raica, era sa lako mai nai talaki nei Tevita me vakabula vua na noqu turaga; sa qai cati ira o koya.
15 "O ira na tamata o ya era sa caka vinaka vei keimami, keimami a sega ni vakamavoataki se me dua na ka e yali vei keimami ni keimami sa tiko vata ena buca.
16 "Era sa vaka e dua na lalaga levu me maroroi keimami ena bogi kei na siga ena gauna kecega sa tiko vata kina kei ira ena vakatawa sipi.
17 "Oqo, mo raica ka kila na ka mo cakava, na ca sa goleva tiko mai na noqu turaga kei na nona vuvale. Ni sa tamata lialia o koya – ni sa sega ni dua e vosa rawa vua."
18 Sa lako vakatotolo o Avikali kei na rua na drau nai buli madrai, e rua na saqa waini, e lima na sipi sa vakarautaki oti, e lima na i vakarau sila tavu, e dua na drau nai soso vaini kei na rua na drau nai soso lolo ka vakavodoki ira ki na asa.
19 Sa tukuna vua na nona veiqaravi, "Mo liu tiko yani vei au; raica au sa muri tiko yani." Sa sega ni tukuna oqo vei Nepali o watina.
20 Ni sa lako tiko yani ka vodoka tiko na asa, sa lako vakavuni na asa ki delana; sa tu mai o Tevita kei ira na nona tamata – era sa lako vakadodonu tiko mai vua, ka sa sotavi ira sara.
21 Sa tukuna mai o Tevita, "Sa dina, au sa maroroya na veika kece sa nona na tamata oqo ena vanua liwa, ka sa sega ni yali e dua na ka e taukena. Sa sauma vei au ena ca, na vinaka sa caka vua.
22 "Me cakava na Kalou vua, ka vakalevu vua na meca i Tevita, kevaka au na vakabula e dua na tagane vua ena rarama ni mataka."
23 Ni sa raici Tevita o Avikali, sa lako sobu vakatotolo mai na nona asa, ka cuva e matai Tevita ni sa vakanamata ki na qele.
24 Sa cuva e yavai Tevita ka tukuna, "Me tau vei au noqu turaga, me tau vei au na caka ca oqo, me vosa ma da na nomuni vada e daligamuni, mo ni rogoca kina na nona vosa.
25 "Isa, me kua ni kawaitaka na tamata lialia oqo o Nepali, na noqu turaga. Me vaka ga na yacana sa vakakina o koya, o Nepali na yacana ka sa tiko vei koya na lialia. O au na nomuni vada sa sega ni raici iratou na nomuni cauravou o ni a tala yani.
26 "O koya oqo, noqu turaga, me vaka sa bula o Jiova, sa bula talega na yalomu, me vaka ni sa vukei iko o Jiova mo kua ni vakadavea na dra, se na nomu sauma lesu ena ligamu na veika sa yaco, o ira na kemu meca kei ira sa vinakata me vakamavoataka na noqu turaga, me ra vakataki Nepali.
27 "Nai solisoli loloma oqo, o koya sa kauta tiko mai na nomuni vada vua na nona turaga, me soli vei ira na cauravou era sa muria tiko mai na noqu turaga.
28 "Au kerea mo ni vosota na nona cala na nomuni vada. O Jiova ena cakava e dua na vale e tudei vua na noqu turaga, baleta na noqu turaga e dau vala ena i valu nei Jiova, ka sa sega talega ni kune vei kemuni e dua na cala.
29 "Ia, e dua na tamata sa tucake me vakasaqara na nomuni bula, ia, na nona bula na noqu turaga sa tiko vata kei ira na bula vei Jiova na Kalou. Na nodra bula na meca ena rabotaka tani, me vaka e dua nai rabo vakataga.
30 "Ena yaco, me vaka sa na vakayacora o Jiova vua na noqu turaga, me vaka na vinaka kecega sa vosataka oti o Jiova vei kemuni – ka sa digitaki kemuni mo ni lewai Isireli,
31 "Oqo ena sega ni ca vei kemuni, se me vakaleqa na yalona na noqu turaga, vakavo kevaka sa vakadavea vakailoa na dra, se, na noqu turaga sa via sauma ga na ka sa caka vua. Ia ena gauna sa na caka vinaka kina o Jiova vua na noqu turaga – mo ni qai nanuma na nomuni vada."
32 Sa tukuna o Tevita vei Avikali, "Sa kalouvinaka o Jiova na Kalou ni Isireli, o koya sa talai iko mai mo mai sotavi au!
33 "Sa vinaka talega na nomu i vakasala, mo kalouvinaka talega o iko, baleta ni o sa maroroi au mai na siga oqo ena vakadave dra ena noqu veisausaumi lesu ena ligaqu ga.
34 "Mo kila, me vaka sa bula o Jiova na Kalou e Isireli, o koya sa tarovi au mai na noqu vakararawataki iko, vakavo, ena nomu sa totolo mai mo sotavi au, sa dina sara, ni qai kida na mataka oqo, sa na sega na tagane e vo vei Nepali!"
35 Sa taura o Tevita mai ligana na veika sa kauta tiko mai, ka tukuna vua, "Mo lako cake ena vakacegu ki nomu vale. Raica, au sa rogoca na nomu vosa ka dokai iko."
36 Sa lako yani o Avikali vei Nepali, sa tiko o koya, ka sa vakayaco solevu tiko ni kana e nona vale – sa vaka sara ga na solevu ni kana mai vua na tui. Sa mamarau tiko e Nepali ka sa mateni vakalevu; sa sega ni tukuna vua o Avikali e dua na ka me yacova ni sa mataka tale.
37 Sa qai yaco ena mataka, ni sa yali yani na kaukauwa ni waini mai vei Nepali, ka sa tukuna vua o Avikali na veika sa yaco, sa mate na yalona e lomana ka sa vaka na vatu o koya.
38 Ni sa oti e tini na siga, sa samuti Nepali o Jiova, ka sa mate yani.
39 Ni sa rogoca o Tevita ni sa mate o Nepali, sa tukuna, "Me kalouvinaka o Jiova o koya sa sauma na noqu vakalialiai mai na ligai Nepali, ka sa maroroya na nona tamata mai na ca. Ni sa sauma na caka cala nei Nepali ki na uluna ga." Sa vakauta e dua na vakatutu o Tevita vei Avikali me sa rau veiwatini.
40 Ni sa lako mai vei Avikali na dauveiqaravi nei Tevita e Kameli, era sa vosa vua ka vaka: "Sa veitalai mai o Tevita me tukuni vei iko mo drau veiwatini."
41 Sa tucake o Avikali ka cuva ki na qele ka tukuna, "Oqo na nomuni vada, na vada me savata na yavadra na tamata ni noqu turaga."
42 Sa tucake vakatotolo o Avikali ka vodoka e dua na asa vei ira na veiqaravi ni lima na dauveiqaravi, ka muri ira yani na dauveiqaravi nei Tevita. Sa yaco me rau veiwatini.
43 O Tevita sa tauri Ainoami talega na Jeserili. E rau sa watina ruarua.
44 O Saula sa soli Mikila na luvena yalewa, na wati Tevita vei Paliti na luvei Laisi, mai Qalimi.


Chapter 26

1 Samuela 26 1 O ira na kai Sipi era sa lako mai vei Saula e Kipea ka tukuna, "Sa sega beka ni vuni tiko o Tevita ena veidelana mai Akila veibasai kei Jesimoni?"
2 Sa tucake o Saula ka lako sobu ki na vanua liwa mai Sipi, sa tiko vata kei koya e tolu na udolu na tamata digitaki vei ira na Isireli; me ra vaksaqarai Tevita ena vanua lala mai Sipi.
3 Sa mai tiko o Saula ena delana mai Akila veibasai kei Jesimoni ena sala. Sa tiko o Tevita mai na vanua lala oqo, ka sa raici Saula ni sa lako tiko mai me vakasaqarai koya.
4 Sa vakatala yani o Tevita eso na tamata, ka sa vakadeitaka ni sa lako dina tiko mai o Saula.
5 Sa tucake o Tevita ka lako mai ki na vanua sa tiko kina o Saula – sa raica talega o Tevita na vanua sa davo tiko kina o Saula kei Epana na luvei Neri na liuliu ni mataivalu. Sa davo tiko o Saula e loma ka era sa vakavolivoliti koya o ira na tamata.
6 Sa vosa o Tevita ka tukuna vei Aimeleki na Itaiti kei Apisai na luvei Seruia na taci Joape ka vaka: "O cei me lako vata kei au kivei Saula ki na keba?" Sa sauma mai o Apisai, "Au na lako sobu vata kei iko."
7 E rau sa lako mai o Tevita kei Apisai ena bogi; sa moce tu o Saula ena loma ni tikotiko sa coba tu na nona moto ena qele voleka e uluna. O Epana kei ira kece era sa moce vakavolivoliti koya.
8 Sa tukuna mai o Apisai vei Tevita, "Na Kalou sa soli koya na kemu meca ki na ligamu ena siga oqo, mo solia vei au na galala me'u cokai koya ga vakadua vata kei na qele ena moto, au na sega ni cokai koya vakarua!"
9 Sa tukuna o Tevita vei Apisai, "Kua ni vakarusai koya; o cei e rawa ni dodoka na ligana vua nai lumuti i Jiova me qai sega ni cala?"
10 Sa tukuna tale o Tevita, "Me vaka sa bula o Jiova, o Jiova ga ena vakarusai koya, se ena mate mai na nona veisiga, se ena lako yani nai valu ka na rusa kina.
11 "Sa vakatabuya o Jiova me'u dodoka na ligaqu vua nai lumuti i Jiova. Au kerea mo taura na moto kei na joke ni wai sa toka voleka e uluna, ka me daru lako yani."
12 Sa taura mai o Tevita na moto kei na joke ni wai sa toka voleka e uluna, ka rau sa lako yani; sa sega ni dua e raica se kila se me bau yadra mada ga. Ni sa dua na moce levu mai vei Jiova sa tarai ira.
13 Sa lako yani o Tevita ki na yasana ka dua ka tucake tu ena dua na delana lailai, sa yawa toka mai vei ira.
14 Sa kaci yani o Tevita vei Epana na luvei Neri kei ira talega na tamata ka tukuna, "O sa sega ni sauma mai Epana?" Sa vosa yani o Epana, "O cei o iko mo kaci tiko mai vaka oqori vua na tui?"
15 Sa sauma yani o Tevita vei Epana, "O tagane beka o iko? O cei e vakataki iko e Isireli? Na cava o sa sega kina ni yadrava na nomu turaga na tui? Ni sa lako mai e dua me vakamatea na tui.
16 "Na ka o sa cakava oqo sa sega ni vinaka me vaka sa bula na tui – sa dodonu mo mate baleta ni o sa sega ni yadrava na nomu turaga, nai lumuti ni Kalou. Mo vakaraica mada sa tiko e vei na nona moto na tui kei na joke ni wai sa toka voleka e uluna."
17 Sa kila o Saula ni sa domo i Tevita oqo, sa tukuna mai, "Sai koya beka oqori na domomu, Tevita na luvequ?" Sa sauma yani o Tevita, "Sa domoqu ga oqo, noqu turaga, noqu tui."
18 Sa tukuna tale yani; "E cava na vuna e saga tiko kina na nona bula na nona tamata? Na cava au sa cakava, na cala cava sa tiko e ligaqu?
19 "O koya oqo, au kerea na noqu turaga na tui, me rogoca na domona na nona tamata: kevaka sa yavalati kemuni tiko na Kalou ena vukuqu, me ciqoma mada nai soro. Ia, kevaka ga era sa cakava tiko na luve ni tamata – mera rukaki ena mata i Jiova, ni ra sa cemuri au tiko mai na noqu tiko ena mata i Jiova o koya na noqu i votavota, ni ra sa tukuna tiko, 'Lako ka qaravi ira na Kalou tani.'
20 "O koya oqo, me kua ni turu na noqu dra ki na qele ena mata i Jiova. Ni sa lako tiko mai na tui Isireli me vakasaqara e dua na kutu – me vaka sa vakasaqarai e dua na toa ena loma ni veikau."
21 Sa tukuna mai o Saula, "Au sa i valavala ca, mo lesu mai na luvequ, ni'u na sega tale ni tarai iko baleta ni sa rui ka taleitaki na noqu bula e mataqu. Au sa cakacaka vakalialia ka cala vakalevu sara."
22 Sa sauma mai o Tevita ka vaka: "Oqo na nona moto na tui. Me dua e lako cake mai ka mai kauta yani.
23 "O Jiova me na sauma vua na tamata na nona yalododonu kei na nona yalodina; ni sa soli iko ki na ligaqu o Jiova ena siga oqo – ia, au sa sega ga ni dodoka na ligaqu vua nai lumuti ni Kalou.
24 "Me vaka ni sa rui sau levu na nomu bula e mataqu, me sa rui ka taleitaki vakakina na noqu bula ena mata i Jiova, ka me vakabulai au o koya mai na veivakararawataki levu kece oqo."
25 Sa tukuna mai o Saula vei Tevita, "Mo kalouvinaka na luvequ, Tevita! O na cakava na veika lelevu, ka ona qaqa tikoga." Sa lako yani o Tevita ka sa lesu tale ki nodratou o Saula.


Chapter 27

1 Samuela 27 1 Sa tukuna e lomana o Tevita, "Ena dua na siga au na leqa ena ligai Saula. Sa sega tale ni dua na ka e vinaka cake vei au, me'u sa dro vakatotolo ga yani vei ira na Filisitia; oqori ena bese kina o Saula ni vakasaqarai au, sa na oti kina vakadua na nona vakasaqarai au ena vanua oisireli. Au na dro kina mai ligana."
2 Sa tucake o Tevita ka lako vata kei ira na nona tamata e ono na drau vei Akisi na luvei Maoki na tui Kaca.
3 Sa tiko vata kei Akisi o Tevita mai Kaca, o koya kei ira na nona tamata kei na nodra dui vuvale. O Tevita kei rau na watina, o Ainoami mai Jeserieli kei Avikali na wati Nepali e liu.
4 Sa tukuni vei Saula ni sa dro ki Kaca o Tevita, ka sa sega tale ni via vakasaqarai koya.
5 Sa tukuna o Tevita vei Akisi, "Kevaka au sa kune loloma e matamu, me soli vei au e so na vanua e nomu koro ena vanua, me'u tiko kina. Na cava me'u tiko kina vata kei iko ena koro vakaturaga oqo?"
6 O Akisi sa solia na vanua o Sikilaki ena siga o ya. Sa nei Tui Juta kina na vanua o Sikilaki me yacova na siga oqo.
7 Sa dua na yabaki ka vula va taucoko na dede ni nona tiko vata kei ira na Filisitia o Tevita.
8 Sa lako cake o Tevita kei ira na nona tamata ka valuti ira na Kesuraiti, na Kerusaiti kei ira na Amelakaiti. Sai ira oqo sa tiko ena vanua mai na gauna makawa sara me vaka mai Suri ka yacovi Ijipita sara yani.
9 Ena veigauna kece sa kaba vakaivalu kina o Tevita, era sa vakamatei kecega na tagane kei na yalewa, sa vakabulai ga na sipi, na bulumakau, na asa na kameli ka lesu tale vei Akisi.
10 Sa dau taroga o Akisi, "O sa valuti cei e nikua?" Sa sauma o Tevita, "Na ceva ga kei Juta se ceva kei Jiramieli, se na ceva kei Kenaiti."
11 Sa sega ni vakabula e dua o Tevita, na tagane se yalewa ni sa kau mai nai tukutuku ki Kaca, ka vaka: "De ra qai tukutuku vakacataki keimami me ra tukuna, 'Sa cakava vakaoqo o Tevita.'" Sa vaka tiko o ya na nona i valavala ni tiko e na vanua vaka Filisitia.
12 Sa vakabauti Tevita o Akisi ka tukuna, "O Tevita sa cakava vei ira na nona tamata na Isireli mera cati koya; o koya oqo sa na noqu tamata o koya me sega ni mudu."


Chapter 28

1 Samuela 28 1 Sa yaco ena vei siga o ya ni ra sa vakasoqoni vata na Filisitia me ia nai valu kei ira na Isireli. Sa tukuna kina o Akisi vei Tevita, "O sa kila vakaidina ni o na lako vata kei au ki nai valu, o iko kei ira na nomu tamata."
2 Sa sauma mai o Tevita vei Akisi, "Io, o sa tala vakaidina na veika e rawa ni cakava na nomuni tamata." Sa tukuna mai o Akisi vei Tevita, "Au na cakava mo nodra i liuliu na daumaroroi au, me sega ni mudu."
3 Sa mate O Samuela, era sa vakalolokutaki koya na Isireli ka buluti koya e Rama, na nona koro ga. O Saula sa cemuri ira tani na dauvakacuru kei ira na daurairai e na vanua.
4 Era sa soqoni vata mai na Filisitia ka mai vakaitikotiko e Sunimi. Sa soqoni ira talega na Isireli o Saula ka mai tiko e Kiliboa.
5 Ni sa raica o Saula na nodra mataivalu na Filisitia, sa rere ka sautaninini vakalevu.
6 Ni sa vakatarogi Jiova o Saula, sa sega ni sauma mai vua o Jiova, mai na tadra se na Urimi se mai vua na Parofita.
7 Sa tukuna o Saula vei ira na nona dauveiqaravi, "Vaqara mai na yalewa dauvakacuru, me'u lako vua ka vakatarogi koya." Era sa tukuna vua, "Sa dua na yalewa dauvakacuru sa tiko mai Ena-dori."
8 Sa vakaisulu vakalawaki o Saula ka daramaka eso nai sulu tani ka lako yani vata kei na rua tale na tamata; e ratou sa yaco yani vua na yalewa ena bogi. Sa tukuna sara, "Au kerea mo vakacuru mada ena vukuqu ka kauta cake mai, o koya au na cavuta vei iko."
9 Sa tukuna vua na yalewa, "Raica o sa kila na ka sa cakava o Saula, ena nona sa muduka tani na vakacuru kei na daurairai ena vanua. Na cava dou sa via vakaleqa kina na noqu bula, mo dou vakavuna kina na noqu mate?"
10 Sa bubului vua o Saula ena yaca i Jiova, ka tukuna, "Me vaka sa bula o Jiova, ena sega nai totogi ena lako mai vei iko ena vuku ni ka oqo."
11 Sa taroga mai na yalewa, "O cei me'u kauta cake mai vei iko?" Sa tukuna mai o Saula, "Kauti Samuela cake mai vei au."
12 Ni sa raici Samuela na yalewa, sa kaci yani vakadomoi levu. Sa vosa vei Saula ka vaka: "Na cava o sa vakaisini au kina? Sai iko ga o Saula!"
13 Sa tukuna vua o Saula, "Kua ni rere, na cava o sa raica?" Sa sauma na yalewa vei Saula, "Au sa raica e dua na yalo sa lako cake mai vuravura."
14 Sa tukuna vua na yalewa o Saula, "E vakacava tu na kena i tuvaki?" Sa tukuna mai na yalewa, "Sa lako cake mai oqo e dua na qase ka sa ubi tu e nai sulu," sa nanuma o Saula ni oqo sai Samuela, sa vakacuva na uluna ki na qele, ka sa cuva sobu tu.
15 Sa tukuna mai o Samuela vei Saula, "Na cava na vuna o sa vakayavalati au kina, mo kauti au cake mai?" Sa sauma o Saula, "Au sa yavavala tiko ena vukudra na Filisitia ena nodra sa na mai vala kei au, na Kalou sa lako tani mai vei au ka sa sega ni vosa mai vei au, mai vei ira na parofita se ena tadra. Oqori, au sa kacivi iko kina, mo tukuna vei au na cava me'u cakava."
16 Sa tukuna mai o Samuela: "Na cava o sa tarogi au kina, o Jiova sa lako tani mai vei iko, ka sa kemu meca mai?
17 "O Jiova sa cakava ga vua m e vaka sa vosa kina vei au. O Jiova sa kauta tani na matanitu mai ligamu, ka sa solia vua na wekamu na yacana o Tevita.
18 Baleta ni o sa sega ni rogoca na domo i Jiova se mo vakayacora na Nona cudru katakata vei Ameleki, oqori sa cakava kina vei iko o Jiova na ka oqo e daidai.
19 "O Jiova ena soli ira na Isireli kei iko ki na ligadra na Filisitia. Ena mataka o iko kei iratou na luvemu dou na mai tiko vata kei au. O Jiova talega ena soli ira na Isireli ki na ligadra na Filisitia."
20 Vakasauri, sa dodo vakasasa ki na qele o Saula, ka sa rere vakalevu ena vuku ni vosa i Samuela. Sa sega vua na kaukauwa, ni sa sega tiko ni kana ena siga taucoko vakatalega kina ena bogi taucoko.
21 Sa lako mai na yalewa ka raica ni sa leqa vakalevu o Saula, ka tukuna vua, "Raica na nomuni vada sa cakava ga na veika o ni sa tukuna vua, au sa biuta e ligaqu na noqu bula ka taura ga na veika o ni sa tukuna vei au.
22 "Oqo mo ni rogoca talega na nona vosa na nomuni vada, me'u vakarautaka mada e dua na madrai vei kemuni, moni kana ka kaukauwa ka lako yani ena nomuni sala."
23 Sa bese o Saula ka tukuna, "Au na sega ni kana." O ira na nona tamata kei na yalewa era sa vakauqeti koya me kana; sa qai rogoca na nodra vosa, sa qai tucake mai ka dabe sobu.
24 Na yalewa oqo sa tiko vua e dua na bulumakau levulevu e vale, ka vakamatea vakatotolo, sa vakarautaka talega na madrai sega ni vakaleveni.
25 Sa qai kauta mai vei Saula kei ira na nona tamata, era sa kana sara. Era sa tucake ka lako yani ena bogi o ya.


Chapter 29

1 Samuela 29 1 Era sa vakasoqoni kece mai na sotia ni Filisitia e Apeki, kei ira na Isireli era sa tiko ena mataniwai mai Jeserili.
2 O ira na turaga ni Filisitia era sa tuvatuva i yadrau mai ka ya udolu mai, o Tevita kei ira na nona tamata, era sa tiko ga ena mata i Akisi.
3 Era sa tukuna na turaga ni Filisitia, "Na cava era sa cakava tiko eke na Iperiu oqo?" Sa sauma vei ira o Akisi, "Sa sega beka ni o Tevita oqo na tamata nei Saula na tui Isireli; sa tiko o koya vata kei au ena siga oqo? Au sa sega ni kunea vua e dua na cala mai na gauna sa lako mai kina vei au."
4 Era sa cudru vakalevu ga na Filisitia ena vukuna; era sa tukuna kina vua, "Me lesu tale na tamata oqo ki na vanua o sa lesia me tiko kina, me kua ni lako sobu vata kei keda ki nai valu, de qai keda meca tale ni sa ia tiko nai valu. Me vakavinakataki koya vakacava vua na nona i liuliu, kevaka e sega ni solia yani na uludra na tamata oqo?
5 "E sega beka ni o Tevita oqo – o koya era sa dau-lagataka tiko ka tukuna, 'Sa vakamatea o Saula na veiudolu ia o Tevita na veitininaudolu'?"
6 Sa kacivi Tevita o Akisi ka tukuna vua, "Sa dina, me vaka sa bula o Jiova, o sa cakacaka vakaidina, na nomu lako yani kei na nomu lako mai ena i valu sa vinaka e mataqu. Ena siga oqo, au se sega ni raica na ca mai vei iko, mai na siga o se qai lako mai kina vei au. O ira na veituraga oqo era sega ni tokoni iko.
7 "Mo lesu tale, ka lako ena vakacegu, mo kua ni vakayalocataki ira na veituraga ni Filisitia oqo."
8 Sa tukuna vei Akisi o Tevita, "Na cava keimami sa cakava? me yacova na siga oqo, na cava o sa raica vua na nomu tamata ena gauna kece au sa tiko kina kei iko, me'u kua kina ni vala vata kei ira na meca ni noqu turaga na tui?"
9 Sa sauma o Akisi vei Tevita, "Au sa kila ni o sa rui vinaka e mataqu me vaka na Agilosi ni Kalou; ia, o ira na veituraga lalai ni Filisitia era sa tukuna, 'Me kua ni lako vata kei keda o koya ki nai valu.'
10 "O koya mo yadra vakamataka kei ira na dauveiqaravi ni nomu turaga; o ira sa lako vata mai kei iko. Ni sa kida ga na rarama, mo ni lako sara."
11 O Tevita kei ira na nona era sa sou ena mataka ka lesu yani ki na nodra vanua na Filisitia. Era sa lako cake na Filisitia ki Jeserili.


Chapter 30

1 Samuela 30 1 Sa yaco, ena gauna sa lako mai kina o Tevita ki Sikilaki e nai katolu ni siga, o ira na Amelakaiti era sa curuma yani na ceva kei Sikilaki talega. Era sa kabai Sikilaki ka vakama talega,
2 Era sa kau vakavesu na yalewa kei ira sa tiko vata tukuna, na gone kei na qase; era sa sega ga ni vakamatei; ia, era sa kau bula yani, ni ra sa lako yani.
3 Sa lako mai o Tevita ki na koro, sa kama tu na koro ka era sa kau yani na watidra na luvedra yalewa kei na luvedra tagane; ni ra sa kau yani vakavesu.
4 O Tevita kei ira na nona era sa qoqolou me yacova sara ni sa sega na kena i cegu.
5 Oi rau na wati Tevita, o Ainoami kei Avikali era sa kau vakavesu talega.
6 Sa yavavala vakalevu o Tevita ni ra sa veivosaki na tamata me vakaviriki koya ena vatu, ni sa rarawa vakalevu na yalo ni tamata kecega ena vuku ni luvedra tagane kei na luvedra yalewa. Ia, o Tevita sa vakaukauwataki koya vei Jiova na nona Kalou.
7 Sa tukuna o Tevita vei Agaiata na bete na luvei Aimeleki, "Kauta mai ki ke na Efoti au kerea." Sa kau sara mai na Efoti vei Tevita.
8 Sa vakatarogi Jiova o Tevita ka vaka: "Me'u muri ira? Au na toboki ira beka?" Sa saumi mai vua, "Mo cici muri ira ka o na tobokoira dina, ka o na sega ni vakataratutu, o na kauti ira lesu kece tale mai."
9 Sa lako o Tevita kei ira na ono na drau na tamata era sa tiko vata, ki na mata ni wai e Bisori, na vanua era sa biu wawa tiko kina na kena vo.
10 O Tevita sa cici muri ira tiko ga, sa tiko vua e va na drau na tamata qaqa, era sa tiko wawa mai e rua na drau na tamata. O ira oqo era sa malumalumu ka sega ni takosova rawa na wai na Bisori.
11 Ni oti oqo, era sa kunea e dua na Ijipita ena buca, era sa kauta mai vei Tevita; era sa vakani koya ena madra ka vakagunuvi koya ena wai.
12 Sa soli talega vua nai soso lolo kei nai soso vaini, ni sa kania oti, sa lesu tale vua na yalona kei na nona kaukauwa, ni sa sega tu ni kana me tolu na siga kei na tolu na bogi.
13 Sa tukuna vua o Tevita, "O sa nei cei, ka o lako tiko mai vei?" Sa sauma mai o koya, "Oi au na kai Ijipita ka au nona bobula na kai Amalekaite; sa biuti au tu na noqu turaga ena tolu na siga sa oti ni'u a tauvimate tu.
14 "Keimami a kabavaka ki na Ceva ki Kirisi ena vanua sa nei Juta, na vanua nei Kelepi ki na ceva; keimami sa vakamai Sikilaki."
15 Sa tukuna vua o Tevita, "E rawa ni o kauti au sobu ki na i soqosoqo?" Sa sauma mai o koya, "M o bubului vei au ena Kalou ni o na sega ni vakamatei au se soli au vua na noqu turaga, au na qai kauti iko ki nai soqosoqo oqo."
16 Ni sa kauti Tevita sobu mai, era sa kune ni ra sa tu ena veiyasana kecega ni vanua, era sa kana tiko ka gunu ka veimeketi tiko, ena vuku ni toki ni valu levu era sa kauta mai na vanua o Filisitia kei na vanua e Juta.
17 Sa kabai ira yani vakaivalu o Tevita mai na mataka lailai me yacova ni sa karobo ena siga ka tarava. Sa sega ni dua vei ira e dro bula, vakavo e va na drau na cauravou era vodo kameli yani ka dro.
18 Sa vakasoqona tale mai o Tevita na veika kece era a butakoca mai na Amelekaiti, ka sa vakabulai rau talega mai na watina.
19 Sa sega ni dua na ka e yali, se lalai se lelevu, se gonetagane se goneyalewa se dua tale na ka sa tauri mai vei ira. Sa taura lesu kece o Tevita.
20 Sa taura kece o Tevita na manumanu sa kau mai e liu kei na vei manumanu susu kecega ka tukuna, "Oqo sai toki ni valu kece nei Tevita."
21 Sa qai lako mai o Tevita ki vei ira na rua na udolu na malumalumu ka sega ni muri Tevita rawa, o ira sa tiko ga ena wai mai Bisori. Era sa lako mai me sota kei Tevita kei ira na tamata. Ni sa lako mai o Tevita – sa vakabula sara vei ira.
22 O ira kece na tamata yaloca ka sega ni yaga era a lako vata kei Tevita, era sa tukuna, "Baleta ni ra sa sega ni lako vata kei keda, era na sega ni wasei ena i toki ni valu, eda sa kauta mai, vakavo ga meda solia vei ira na watidra kei na luvedra me ra mai taura ka lako tani yani."
23 Sa vosa yani o Tevita, "Kemuni na taciqu, me kakua ni caka vaka oqori na veika sa solia mai o Jiova vei keda, o Koya ga sa maroroi keda ka vakabulai keda mai na ligadra nai valu oqo me mai valuti keda.
24 "O cei ena rogoci kemuni ena veika oqo? Na nona i votavota o koya sa lako ki na i valu, sa nona i votavota talega o koya sa tiko mai – era na tautauvata kece."
25 Sa qai yaco, mai na siga o ya ka lako yani, sa cakava o Tevita e dua nai lesilesi ka sa lewai e Isireli me yacova oqo.
26 Ni sa lako mai o Tevita ki Sikilaki, sa vakauta eso nai toki ni valu ki vei ira na qase e Juta, ki vei ira na nona i tokani ka tukuna, "Oqo nai solisoli me nomuni, mai nai toki ni valu vei ira na meca i Jiova".
27 Ki vei ira sa tiko e Peceli, vei ira sa tiko e Ramoci ena Ceva, vei ira sa tiko e Jatiri,
28 Vei ira sa tiko e Aroe, vei ira sa tiko e Sipimoci, vei ira talega e Esetimoa,
29 O ira sa tiko mai Rajela, o ira sa tiko ena veikoro e Jeramaili, vei ira talega sa tiko ena nodra veikoro na Kenaiti,
30 O ira sa tiko mai Oma, o ira tiko mai Korasami, o ira mai Otaki,
31 O ira sa tiko mai Epironi kei na veivanua kecega sa dau matau vei Tevita kei ira na nona tamata mera lakova.


Chapter 31

1 Samuela 31 1 Era sa vala vakaukauwa na Filisita kei ira na Isireli; era sa dro na Isireli mai na matadra na Filisitia, era sa davo mate ena ulunivanua o Kiliboa.
2 Era sa cicivi muri Saula kei iratou na luvena o ira na Filisitia, era sa vakamatei Jonacani, Apinatave, Malakisua, o iratou na luvei Saula.
3 Sa tosovi Saula yani vakaukauwa nai valu; o ira na dauvana era sa vanai Saula ka sa mavoa sara vaka ca.
4 Sa tukuna o Saula vua na nona daucola yaragi, "Mo suaki au mai ena nomu i sele, de ra qai lako mai na sega ni cili oqo ka suasualaki au ka vakacacani au vakaca sara." Sa bese o nona daucolayaragi – ni sa rere vakalevu. Sa taura ga na nona i sele o Saula ka davoca yani.
5 Ni sa raica na nona daucola yaragi na ka sa cakava o Saula – sa davoca talega na nona i sele ka mate vata kei Saula.
6 O Saula, oiratou na luvena tolutolu, na nona daunicola yaragi kei ira kece na nona sotia, era sa mate kece ena siga o ya.
7 Ni ra sa rogoca na Isireli ena yasa ka dua ni buca kei ira sa tiko ena yasa kadua ni Joritani ka raica talega ni ra sa dro na Isireli ka sa mate talega o Saula kei iratou na luvena; era sa dui biuta talega na nodra koro ka dro; era sa qai lako mai na Filisitia ka taukena.
8 Sa qai yaco ena siga ka tarava, ni ra sa lako mai na Filisitia me ra kauta nai toki ni valu, era sa raici Saula kei iratou na luvena ni ratou sa mate tu ena Ulunivanua o Kiliboa.
9 Era sa musuka na uluna ka taura na nona i yaragi ni valu ka vakauta nai tukutuku e Filisitia taucoko, me ra tukuna ena nodra valenilotu ni matakau vei ira kece talega na tamata.
10 Era sa biuta tu nai yaragi nei Saula ena valenisoro nei Asitoreci, ka era sa vesuka tu na yagona ena lalaga kei Beci-Sani.
11 Ni ra sa rogoca na tiko e Jabesi-Kiliati na veika era cakava na Filisitia vei Saula,
12 Era sa tucake na tamata qaqa ka lako ena bogi taucoko, ka kauta tani na yago i Saula kei iratou na luvena mai na lalaga e Beci-Sani – ka era sa kauta mai e Jabesa ka vakama e kea.
13 Era sa kauta na suidratou ka buluta ena vuni tamarisi e Jabesi ka lolo tiko me vitu na siga.