2 Samuela

1 2 3 4 5 6 7 8 9 10 11 12 13 14 15 16 17 18 19 20 21 22 23 24


Chapter 1

1 Oqo sa qai yaco ni sa mate oti o Saula, ni sa lesu mai o Tevita ena nona valuti ira na Amalekaite, sa tiko mai Sikiladi o Tevita me rua na siga,
2 Ena i katolu ni siga, sa lako mai e dua na tamata nai to nei Saula. Sa kakabasubasu tu mai na nona i sulu ka sa kuvu levu talega na uluna. Ni sa yaco mai vei Tevita sa lutu kina qele ka vakalolomataki koya.
3 Sa tarogi koya o Tevita, "O lako tiko mai vei?" sa sauma mai, "Au sa dro mai na nodra i valu na Isireli."
4 Sa tarogi koya tale o Tevita, "Sa vakacava tiko nai valu, tukuna mai vei au." Sa sauma mai, "Era sa dro na tamata mai nai valu ka e levu era sa davo ka mate sara, o Saula kei Jonacani na luvena e rau sa mate talega."
5 Sa vosa o Tevita vua na tamata ka taroga, "O kila vakacava ni rau sa mate o Saula kei Jonacani?"
6 Sa tukuna mai na cauravou oqo, "Sa yaco mai na ulunivanua o Kiliboa ni sa tautauri tiko o Saula ena nona moto, era sa muri koya tiko na ose kei na qiqi ni valu.
7 "Ni sa rai lesu mai sa raici au, ka kacivi au sara. Au sa sauma yani, 'Sai au oqo.'
8 "Sa tukuna mai vei au o Saula, 'Ocei o iko?' Au sa sauma vua, 'Oi au e dua na Amalekaite.'
9 "Sa tukuna tale mai vei au, 'Tu mai ka vakamatei au. Sa tarai au na veilecayaki – ia, au se bula tikoga.'
10 "Au sa qai butuki koya ka vakamatea, ni'u sa kila ni na sega ni bula tale mai na nona bale sobu. Au sa taura nai sala mai na uluna, na qato mai ligana ka kauta mai oqo vua na noqu turaga."
11 Sa basuraka na nona i sulu o Tevita kei ira kece sa tiko vata kei koya.
12 Era sa vakaloloku ka lolo ka tagi me yacova na yakavi ena vuku i Saula kei Jonacani na luvena, ena vukudra talega na tamata ni Kalou kei na vuvale na Isireli, baleta ni ra sa bale e nai seleiwau.
13 Sa vosa o Tevita vua na cauravou, "O lako mai vei?" Sa sauma mai, "Oi au na vulagi mai vei ira na Amalekaite."
14 Sa tukuna vua o Tevita, "O sa sega ni rere vakacava ena nomu dodoka na ligamu mo vakamatea nai lumuti ni Kalou?"
15 Sa kacivi mai e dua na tagane ka tukuna vua, "Lako volekati koya ka vakamatea!" sa samuti koya ka sa mate talega.
16 Sa tukuna vua o Tevita, "Sa tara na ulumu na nomu dra, ni sa vakatusa na gusumu ena vukumu, 'Ni'u sa vakamatea na lumuti ni Kalou.'"
17 Sa tagi lagalaga o Tevita ka sametaka na tagi ena vukui Saula kei Jonacani na luvena,
18 ka tukuna me vakavulici e Juta na Sere ni Dakaititi ka sa volai ena i vola nei Jasa:
19 "Sa labati na totoka kei Isireli ena nomuni tikina cecere! Era bale vakacava na qaqa!
20 Kua ni tukuna e Kaca Me kua ni cavuti ena veisalatu e Esikiloni De ra qai rekireki na goneyalewa ni Filisitia De ra qai qaqa na goneyalewa mai vei ira na sega ni cili.
21 "O iko na ulunivanua o Kiliboa, Me kua vei iko na tegu, Me kua na uca vei iko, Me kua ni solia e dua na ka na buca Ni sa viritaki mai kea nai sasabai ni qaqa! Nai sasabai nei Saula sa sega ni lumuti ena waiwai!
22 Mai na nodra dra na vakamatei, Mai na nodra uro na qaqa, Na dakai nei Jonacani sa sega ni lesu tale, Na i seleiwau nei Saula sa sega ni lesu lala.
23 "O Saula kei Jonacani sa lomani ka taleitaki ena nodra bula, Ena nodrau mate, e rau sa sega ni tawase; E rau sa tasiri me vaka na ikeli, E rau sa kaukauwa cake mai na laioni.
24 "Kemuni na goneyalewa ni Isireli, Mo ni tagicaki Saula o koya sa vakaisulutaki kemuni ena lokaloka kei na ka vivinaka; Sa biuta o koya na koula ena nomuni kote.
25 "Era sa bale vakacava na qaqa ena loma ni i valu! O Jonacani sa samuti ena tikina cecere.
26 Au sa rarawa ena vukumu, na taciqu Jonacani; O sa rui vinaka vei au, Na nomu loloma vei au sa rui vinaka Sa sivia sara na loloma ni yalewa.
27 "Era sa bale vakacava na tamata qaqa Kei na yaragi ni valu me rusa!"


Chapter 2

1 Sa yaco me vakatataro vei Jiova o Tevita ka vaka, "Me'u lako cake beka ki na dua na koro e Juta?" Sa tukuna vua o Jiova, "Lako cake." Sa taroga o Tevita, "Me'u lako cake i vei?" Sa saumi mai, "I Epironi."
2 Sa lako cake ki kea o Tevita kei rau talega na watina o Ainoami na Jeserieli kei Avikali na wati Nepali mai Kameli.
3 O Tevita sa kauti ira cake na tamata era sa tiko vata kei koya, na tamata vakayadua kei na nodra vuvale. Era sa tiko ena veikoro mai Epironi.
4 Era sa qai lako mai na tamata mai Juta, era sa lumuti Tevita me tui ena yavusa o Juta. Era sa tukuna vei Tevita ka vaka, "O ira na tamata oqo mai Jabesi-Kiliati, era sa buluti Saula."
5 Sa vakauta o Tevita nai tukutuku ki Jabesi Kiliati ka vaka, "Sa vakalouvinakataki kemuni o Jiova ni kemuni sa vakaraitaka na ka vinaka oqo ki na nomuni turaga o Saula, ni kemuni sa buluti koya.
6 "Oqo me vakaraitaka vei kemuni o Jiova na yalovinaka kei na yalodina. Au na sauma talega vei kemuni na yalovinaka oqo ena vuku ni ka o ni sa cakava.
7 "Me vakaukauwataki na ligamuni, mo ni tamata qaqa; ni sa mate o Saula, ka era sa lumuti Tevita talega na yavusa o Juta me nodra tui."
8 O Epana na luvei Neri, nai liuliu ni mataivalu nei Saula sa tauri Isiposeci na luvei Saula ka kauti koya mai ki Maanaimi;
9 Ka buli koya me tui e Kiliati vei ira na Asuraiti, vei ira na Jeserieli, vei ira na Ifereimi, vei ira na Penijamini, vei ira na Isireli taucoko.
10 Sa yabaki vasagavulu o Isiposeci na luvei Saula ni tekivu na nona tui e Isireli. Sa veiliutaki me rua ga na yabaki. Na vale ga i Juta sa muri Tevita.
11 Ena gauna sa tui tiko kina e Epironi o Tevita ena nodra yavusa na Juta, sa vitu na yabaki ka ono na vula.
12 O Epana na luvei Neri na tamata i Isiposeci na luvei Saula sa lako mai Maanaimi ki Kipioni.
13 O Joape na luvei Seruia kei na dauveiqaravi i Tevita – sa lako yani me sotavi Epana ena mata ni wai mai Kipioni. Era sa yadua na tai ni wai e Kipioni.
14 Sa tukuna mai o Epana vei Joape, "Me ra tucake na cauravou ka veisisivi ena matadaru." Sa sauma mai o Joape, "Me ra sa tucake."
15 Era sa tucake ka lako yani yatinikarua mai vei Penijamini nai to nei Isiposeci kei na tinikarua nai to nei Tevita.
16 Era sa veitauri ka veisua ena i seleiwau. Era sa lutu vata kece ga. Sa vakatokai na yaca ni vanua o ya me "Vanua ni Seleiwau Gata, ena rawa o Kipioni.
17 Sa dua nai valu kaukauwa ena siga o ya, era sa vakadrukai nai to nei Epana kei Isireli mai vei ira na Juta na tamata i Tevita.
18 O iratou na luvei Seruia tolutolu e ratou sa tiko e kea, o Joape kei Apisai kei Aseli. O Aseli sa tamata totolo sara me vaka na me kila.
19 Sa cicivi Epana o Aseli, sa sega tale ni gole ki nai matau se ki nai mawi ena nona cicivi Epana.
20 Sa vuki mai o Epana ka taroga, "O iko beka o Aseli?" sa sauma yani, "Sai au oqo."
21 Sa tukuna mai o Epana, "Vuki ki na yasamu i matau se ki nai mawi e dua na nomu cauravou ka taura na nona i yaragi me nomu." Sa sega ni via kauwaitaka o ya o Aseli.
22 Sa tukuna tale yani o Epana, "Mo gole tani mai na nomu muri au tiko, na cava me'u samuti iko kina ki na qele? Me'u na sotavi Joape na tacimu vakacava?"
23 Sa sega tikoga ni via gole tani o Aseli. Sa suaki koya o Epana ena nona moto ka sa basika ki dakuna; sa lutu ki ra ka sa mate sara. Sa yaco, vei ira kece sa lako mai ki na vanua sa mate kina o Aseli, sa tu vakadua mada.
24 O Joape kei Apisai e rau sa cicivi muri Epana talega. Sa dromu tiko na matanisiga ni rau sa yaco yani ki na delana o Ama, sa tiko e liu vei Kia ena sala ki na Vanua Liwa kei Kipioni.
25 O ira na luvei Penijami era sa tu kece e dakui Epana. Era sa dua nai to ka tucake tu ena delana.
26 Sa kacivi Joape yani o Epana, "Me sa kana tikoga nai seleiwau me sega ni mudu? O sa kila ni na gaga ni sa oti na siga? Me cava soti na kena dede mo na qai tukuna kina me sa rauta na nomuni cici muri ira tiko na tacimuni?"
27 Sa tukuna o Joape, "Me vaka sa bula na Kalou, o sa vosa dina, ena mataka era na tuvakadua kece na tamata mai na nodra cici muri ira na tacidra."
28 Sa uvuca na davui o Joape, ka era sa tuvakadua na tamata mai na nodra cici muri ira tiko na Isireli, ka sa oti vakadua nai valu.
29 O Epana kei ira na nona, era sa lako ena bogi taucoko ena buca ka takosova na Joritani ka lako curumi Bitiro ka yaco yani ki Maanaimi.
30 Sa lesu yani o Joape mai na nona cici muri Epana. Ni sa soqoni ira kece mai na tamata, era sa yali yani e tinikaciwa na tamata i Tevita kei Aseli.
31 O ira na tamata nei Tevita era sa samuta mate e tolu na drau onosagavulu na Penijamini, na tamata nei Epana.
32 Era sa tauri Aseli ka buluti koya e nai bulubulu nei tamana e Peceliema. O Joape kei ira na nona tamata era sa lako ena bogi taucoko, ka era sa yaco yani ki Epironi ni sa kida na mataka.


Chapter 3

1 Oqo, sa qai dua nai valu balavu ena kedrau maliwa na vale nei Saula kei na vale nei Tevita. Sa kaukauwa cake tikoga o Tevita, ka sa malumalumu tiko ga mai o Saula.
2 Sa sucu vei Tevita na gonetagane mai Epironi. Na ulumatua o Amoni, mai vei Ainoami na Jeserieli;
3 Nai karua o Kiliape mai vei Apikali na yada mai vei Nepali na kai Kameli; nai ka tolu o Apisalome na luvei Maika na luvei Talimai yalewa na tui Kesure;
4 Nai kava o Atonaija na luvei Aqici; nai kalima o Sefatia na luvei Abitali;
5 Nai kaono oicerimi na luvei Ekila na wati Tevita. Oqo era sa sucu vei Tevita mai Epironi.
6 Sa qai yaco, ni rau se vala tiko na vale nei Saula kei na vale nei Tevita, sa kukube kaukauwa tikoga o Epana vei Saula.
7 Sa dua tiko na wati Saula lailai, na yacana o Risipa na luvei Aia. Sa tukuna o Isiposeci vei Epana, "Na cava o sa laki mocera kina na watina lailai na tamaqu?"
8 Sa cudru sara ga vakalevu o Epana ena vuku ni vosa nei Isiposeci ka qai tukuna, "O au beka e dua na ulu ni koli e taukena o Juta? Ena siga oqo au sa solia tiko na noqu veitokoni ki na vale i Saula na tamamu, vei ira na tacina kei ira na nona i tokani, ka sega ni soli kemuni ki na liga i Tevita; o sa dusi au ena siga oqo ena dua na cala me baleta na yalewa oqo?
9 "Me cakava talega na Kalou vei Epana, ka vakalevu, kevaka au na sega ni cakava ena vuku i Tevita, me vaka sa yalayala vua na Kalou o Jiova—
10 "Me solia na matanitu mai na vale i Saula ki na vale i Tevita, ka tara cake na nona i tikotiko vakaturaga e Isireli kei Juta talega, mai Tani ki Perisepa."
11 Sa sega ni sauma rawa tale e dua na vosa vei Epana, baleta ni rerevaki koya.
12 Sa vakauta na i tukutuku o Epana ena vukuna vei tevita ka tukuna, "E nei cei na vanua?" Sa tukuna talega, "Mo cakava vakatotolo e dua na veidinadinati vata kei au, ena qai tiko vakaidina kei iko na ligaqu me ra kau kece mai na Isireli vei iko."
13 Sa qai tukuna o Tevita, "Vinaka, au na cakava e dua na veidinadinati kei iko, ia e dua na ka au gadreva vei iko: O na sega ni raica na mataqu me yacova ni o sa kauti Mikeli mada mai e liu, na luvei Saula, ni o sa lako mai me raica na mataqu."
14 Sa vakauta nai tukutuku o Tevita vei Isiposeci, na luvei Saula ka tukuna, "Mo soli Mikeli na watiqu mai, o koya au a musuka me watiqu ena duanadrau na vusodra na kai Filisitia."
15 O Isiposeci, sa talatala ka tauri mai o Mikeli mai vua na tagane e rau sa tiko vata, mai vei Palatieli na luvei Laisi.
16 Sa lako vata kei koya na tagane oqo ki Baurimi, ka tagi muri koya tiko. Sa tukuna vua o Epana, "Mo lesu tale!" A sa lesu tale.
17 O Epana sa veivosaki kei ira na qase e Isireli ka tukuna, "Ena veigauna sa oti, o ni sa dauvakasaqarai Tevita me tui vei kemuni.
18 "Oqo mo ni cakava sara, ni sa vosa o Jiova vei Tevita ka vaka: 'Ena ligana na noqu tamata o Tevita, au na vakabulai ira kina na noqu tamata na Isireli mai na ligadra na Filisitia kei na ligadra kecega na meca.'"
19 Sa vosa tiko o Epana ena nodra vakarorogo na Penijamini. Sa vosa talega o Epana ni vakarorogo tiko o Tevita mai Epironi, na veika kece me vinaka kina o Isireli kei Penijamini.
20 O Epana kei na ruasagavulu na nona tamata era sa lako mai vei Tevita e Epironi. Sa cakava e dua na solevu o Tevita vei Epana kei ira sa tiko vata kei koya.
21 Sa tukuna o Epana vei Tevita, "Au na tucake ka lako me'u soqoni ira kece mai na Isireli vua na noqu turaga na tui, me ra mai cakava e dua na veidinadinati kei kemuni, mo ni na lewa kina vei ira kecega o ni sa vinakata e yalomuni." Sa vakatalai Epana yani o Tevita, ka sa lako ena vakacegu.
22 Ena gauna o ya, o ira na tamata nei Tevita kei Joape era sa lesu mai ena dua na kaba vakaivalu ka era sa kauta mai e levu sara nai toki ni valu. Sa sega ni tiko vata kei Tevita e Epironi o Epana, ni sa vakatalai yani, ka lako ena vakacegu.
23 Ni sa lako mai o Joape kei ira kece na nona i valu, sa tukuni sara vua ka vaka, "O Epana sa lako mai vua na tui, ka sa vakatalai yani, ka sa lako talega ena vakacegu."
24 Sa lako mai vua na tui o Joape ka tukuna, "Na cava o sa cakava? Raica sa lako mai vei iko o Epana, na cava o sa vakatalai koya yani kina, ka sa mani lako?
25 "O sa kila vakaidina ni sa lako mai o Epana na luvei Neri me vakaisini iko – me kila na nomu lako yani kei na nomu curu mai, ka me kila kecega na veika o sa cakava tiko."
26 Sa lako tani mai na matai Tevita o Joape, ka sa vakatala nai talai me muri Epana, ka sa laki kau lesu mai ena wai mai Sira. Sa sega ni kila o Tevita.
27 Ni sa lesu mai ki Epironi o Epana, sa kauti koya vakatikitiki mai na matamata o Joape ka vosa duadua vua. Sa suaka na ketena, ka sa mate ena vuku ni dra nei Aseli na taci Joape.
28 Ni sa oti oqo, sa qai rogoca o Tevita, sa tukuna sara, "Na noqu matanitu kei au sa sega ni beitaki ena mata i Jiova me sega ni mudu ena vuku ni dra nei Epana na luvei Neri.
29 "Me toka ga ena ului Joape kei na vuvale nei tamana; me kakua ni yali mai na nona vale, na vale nei Joape na turi dra, na vukavuka, na kukuna kei na via kana."
30 O Joape kei Apisai na tacina, e rau sa vakamatei Epana, baleta ni sa vakamatea na tacidrau o Aseli mai Kipioni ena i valu.
31 Sa tukuna o Tevita vei Joape kei ira kecega na tamata sa tiko vata kei koya, "Mo ni basuraka na nomuni i sulu ka daramaka nai sulu taga, ka tagicaki Epana." Sa muria na kato ni mate o Tevita.
32 Era sa buluti Epana mai Epironi, sa tagi vakadomo i levu o Tevita ena i bulubulu i Epana, ka era sa tagi kecega na tamata.
33 Sa dua na tagi i Tevita na tui sa vaka: "Me mate o Epana me vaka e dua na lialia?
34 Sa sega ni vesu na ligamu, se me vesuki na yavamu; me vaka sa vakamatei e dua mai vei ira na daucaka ca, o sa mata vakakina." Era sa tagicaki koya na tamata kecega.
35 Ni ra sa lako mai na tamata me vakauqeti Tevita me kana ni se siga tiko. Sa bubului o tevita ka tukuna, "Me vakayacora na Kalou vei Tevita ka vakalevu kevaka au sa tovolea na madrai se dua tale na ka, me yacova na lako sobu ni matanisiga!"
36 Era sa kila na tamata kecega ka era sa yalovinaka kina, ni veika ga e cakava na tui sa rui vinaka vei ira na tamata.
37 Ni ra sa kila na tamata kecega kei ira kecega na Isireli ni sa sega ni i naki ni tui me vakamatei Epana na luvei Neri.
38 Sa tukuna na tui vei ira na nona tamata, "O ni sa sega beka ni kila ni dua?
39 "Au sa malumalumu sara e daidai, e dina ni'u tui lumuti; kei na tamata oqo na luvei Seruia, sa rui kaukauwa vei au. O Jiova ena sauma vua na daucaka ca me vaka na nona ca."


Chapter 4

1 Ni sa rogoca na luvei Saula ni sa mate o Epana mai Epironi, sa yalolailai ka sa leqa vakalevu o Isireli.
2 Na luvei Saula, sa rua tiko na nona tamata, e rau sai liuliu tiko ni mataivalu. Na yaca i koya e dua vei rau o Bana kei na yaca ka dua tale o Rekapi, e rau luvei Rimoni na kai Biroci vei ira na luvei Penijamini. (O Biroci sa dua talega na kawa ni Penijamini,
3 Baleta ni ra a dro na kai Biroci ki Kitaimi, era sa tiko kina mai kea me yacova na siga oqo.)
4 O Jonacani na luvei Saula, sa dua tiko na luvena tagane, sa malai ruarua tiko na yavana. E se qai yabaki lima tiko na gone ni sa yaco yani ki Jesirili nai tukutuku me baleti Saula kei Jonacani; sa kauti koya na nona dauveiqaravi ka rau dro yani, sa lutu na gone ka yaco me malai kina na yavana. Sa vakayacani kina me o Mefiposeci.
5 Oi rau na luvei Rimoni na kai Biroci, o Rekapi kei Bana, e rau sa lako yani ena siga levu tutu ni sa todra tu na siga, ki na vale nei Isiposeci. Sa davo tu o koya ena nona i davodavo ena sigalevu.
6 E rau sa lako mai ki na loma sara ni vale, me vaka ga ni rau mai kau witi, ka e rau sa suaki koya sara e ketena. O Rekapi kei Bana, e rau sa dro sara yani.
7 Ni rau sa curu yani ki vale, sa davo tu o koya ena nona i davodavo; e rau sa suaki koya ka vakamatea – e rau sa musuka na domona ka kauta na uluna, ena bogi taucoko e rau sa dro tiko yani ena buca.
8 E rau sa kauta mai na ulu i Isiposeci kivei Tevita e Epironi, ka tukuna vua na tui, "Oqo na ului Isiposeci na luvei Saula na kemu meca, o koya sa vakasaqara tiko na nomu bula; ia, o Jiova sa sauma vua na noqu turaga na tui ena siga oqo vei Saula kei ira na nona kawa."
9 Sa sauma o Tevita vei Rekapi kei Bana na tacina, o irau na luvei Rimoni na Biroci ka tukuna vei rau, "Me vaka sa bula o Jiova, o koya sa vakabulai au mai vei ira na meca kece,
10 "Ni dua sa tukuna vei au, 'raica sa mate o Saula,' sa nanuma ni sa kauta mai vei au na i tukutuku vinaka, au sa vesuki koya ka vakamatei koya mai Sikilaki O vua na tamata sa nanuma ni kauta mai vei au nai tukutuku vinaka.
11 "Sa qai vakacava vua na tamata ca ni sa vakamatea na tamata dodonu, ena loma ni nona vale, ena nona i davodavo sara ga? Me sega li ni'u gadreva na nomudrau dra mai na ligamudrau, ka mo drau yali tani mai vuravura?"
12 Sa vakaroti ira na nona tamata o Tevita me rau vakamatei, me musu laivi na ligadrau kei na yavadrau ka me rau vakaliligi ena wai mai Epironi. Era sa kauta na ulu i Isiposeci ka buluta e nai bulubulu i Epana e Epironi.


Chapter 5

1 Na yavusa taucoko e Isireli era sa lako mai vei Tevita e Epironi ka tukuna, "Keimami sa nomu sui ka lewemu talega.
2 "Ena veigauna sa oti ni sa tui tiko vei keimami o Saula, o iko ga sa liutaki Isireli yani ka kauti keimami lesu tale mai; sa tukuna vei iko o Jiova, 'O na vakatawani Isireli na Noqu tamata ka mo na lewa e Isireli.'"
3 Era sa lako kece mai na qase e Isireli vua na tui e Epironi, sa cakava o Tevita na Tui e dua na veiyalayalati vata kei ira e Epironi ena mata i Jiova. Era sa lumuti Tevita me tui Isireli.
4 Sa yabaki tolusagavulu o Tevita ni vakatekivu na nona lewa, ka sa lewa tiko e Isireli me vasagavulu na yabaki.
5 Mai Epironi sa lewa tiko e Juta me vitu na yabaki ono na vula, mai Jerusalemi sa lewa kina me tolusagavulu ka tolu na yabaki e Isireli kei Juta.
6 Na tui kei ira na nona tamata era sa lako ki Jerusalemi me ra valuti na Jepusaiti, o ira sa tiko ena vanua – o ira sa vosa oti vei Tevita ka vaka: "Mo kua ni lako mai ki ke; o ira na mataboko kei na wamalai era na vakasavi iko." Ni sa nanuma, "Ni o Tevita ena sega ni lako yani ki kea."
7 Ia, o Tevita sa taura na bai kaukauwa kei Saioni. (oqori na Koro i Tevita).
8 Sa tukuna o Tevita ena siga o ya, "O koya sa kaba cake mai na yasana ni wai ka vakadrukai ira na Jepusaiti (na mataboko kei na wamalai – o ira sa cati vakalevu mai vei Tevita) erna digitaki me i liuliu ka kavetani talega." Era sa tukuna kina, "O ira na mataboko kei ira na wamalai era na sega ni lako mai ki vale."
9 Sa tiko o Tevita ena vanua qaqa ka vakatoka me "na Koro i Tevita." Sa qai taratara cake wavoki o Tevita mai kea ka kauta yani ki loma.
10 Sa toso tiko o Tevita ka sa yaco me levu sara. Sa tiko vata kei koya o Jiova sa cecere sara.
11 O Irami na tui Taia, sa vakau daunitukutuku vei Tevita, kei na veivuni-Sitari, kei ira na dautaravale kei na dautavatu. Era sa tara e dua na vale vei Tevita.
12 Sa kila o Tevita ni sa vakadeitaki koya o Jiova me tui e Isireli, ka sa vakacerecerea talega na Nona matanitu ena vukudra na Nona tamata na Isireli.
13 Sa tauri ira na watina lalai kei na watina lelevu e Jerusalemi, ena nona lako mai Epironi. Era sa vakasucuma vei Tevita e levu na luvena tagane kei na yalewa.
14 Oqo na yacadra sa vakasucumi vua mai Jerusalemi: O Samua, o Sobaba, o Nacani, o Solomoni,
15 O Ibari, o Ilisua, o Nefeki, o Javia,
16 O Ilisama, o Iliada kei Iliveleti. Era Sa Vakadrukai Na Filisitia
17 Era sa rogoca na Filisitia ni ra sa lumuti Tevita me tui Isireli. Era sa lako cake kece na Filisitia me vakasaqarai Tevita. Sa rogoca o Tevita, ka sa lako sobu ki na bai ni koro kaukauwa.
18 Era sa lako talega na Filisitia me toka wawa ena Buca mai Refaimi.
19 Sa vakatarogi Jiova o Tevita ka vaka: "O ni na soli ira beka ki ligaqu?" Sa sauma mai o Jiova, "Mo lako cake, Ni'u na soli ira vakaidina ki na ligamu."
20 Sa lako o Tevita ki Peali-Perasimi, ka sa vakadrukai ira mai kea, ka tukuna, "O Jiova sa musuka rua na meca e mataqu, me vaka sa curumi yani na wai." Sa vakayacani kina na vanua o ya me Peali-Perasimi.
21 Era sa biuta tu e kea na nodra matakau, o Tevita kei ira na nona tamata era sa kauta tani yani.
22 Era sa lako cake na Filisitia ka tovolea me tuvani ira tale ena Buca mai Refaimi.
23 Ni sa vakatarogi Jiova tale o Tevita, sa sauma mai o Jiova, "Mo kua ni lako cake; mo lako wavokiti ira ga ka lako cake yani mai na veivuniberi.
24 "Ni o sa rogoca na rorogo ni tuva vakaivalu mai na veivunikau (beri), mo ni basuka sara yani vakatotolo. O Jiova ena lako yani ena vukumuni e matamuni me samuti ira na mataivalu ni Filisitia."
25 Sa cakava vakakina o Tevita, me vaka sa vakaroti koya kina o Jiova; sa vakasavi ira na Filisitia mai Kipa ka yaco sara ki Qasa.


Chapter 6

1 O Tevita sa soqoni ira vata tale na tamata digitaki ni Isireli e tolusagavulu na udolu.
2 Sa tucake o Tevita ka lako vata kei ira na tamata mai Baele e Juta me kauta cake mai na Kato ni Kalou na yacana sa kacivi ena yaca na Kalou sa Cecere o koya sa tiko ena maliwa ni Jerupi.
3 Era sa biuta na Kato ni Kalou ena dua na qiqi vou ka kauta tani mai na vale nei Epinatavi o koya sa toka ena delana. O Usa kei Aio na luvei Epinatave, e rau sa vakauta yani na qiqi.
4 E rau sa kauta tani mai na vale nei Epinatavi – sa toka e delana, ka lako vata mai na Kato; sa liu tiko o Ai.
5 O Tevita kei ira kece na Isireli era sa qiria tiko nai vakatagi ena mata i Jiova, ena i yaya ni vakatagi dui veimataqali caka ena kau, na api, na kena mataqali vakawa, na tibereli, na dramu kei na sibali.
6 Ni ra sa lako mai ki na vanua ni butu sila nei Nakoni, sa tara yani na Kato ni Kalou o Usa ni sa taloki na bulumakau sa tuya tiko na qiqi.
7 Na cudru i Jiova sa tarai Usa, ka sa samuti koya na Kalou ena vuku ni nona cala; sa mate e kea ena yasa ni Kato ni Kalou.
8 Sa cudru vakalevu o Tevita ena vuku ni veika sa cakava o Jiova vei Usa, sa vakatoka kina na yaca ni vanua o ya me Veresi-Usa me yacova na siga oqo.
9 Sa rerevaki Jiova ena siga o ya o Tevita; ka tukuna, "Me na lako vakacava mai vei au na Kato ni Kalou?"
10 Sa sega ni kauta na Kato i Jiova o Tevita vata kei koya ki na koro i Tevita; sa kauta o Tevita vakatikitiki ki na vale nei Opeti-Etomi na Kitaiti.
11 Sa tiko ga na 'Kato i Jiova' ena vale nei Opeti- Etomi nai Kitaiti me tolu na vula. Sa vakalouvinakataki iratou o Jiova kei na nodratou veika kece.
12 Sa tukuni vua na Tui o Tevita ka vaka: "Na Kalou sa vakalouvinakataka na vale nei Opet- Itomi kei na ka kecega sa nona, baleta na Kato ni Kalou." Sa lako o Tevita me kauta mai na Kato ni Kalou mai na vale nei Opeti-Itomi ki na Koro i Tevita ena mamarau.
13 Ni ra sa tekivu tiko nai tosotoso ni Kato ni Kalou, era sa tekivu me vakacabora na bulumakau kei sipi.
14 Sa tekivu me meke tiko o Tevita ena mata i Jiova, ena nona vinaka taucoko; sa daramaka tiko e dua na Efoti lineni.
15 O Tevita, kei ira kece na Isireli, era sa kauta cake mai na Kato i Jiova ena kaikaila kei na domo ni davui.
16 Ni sa kau cake tiko mai na Kato i Jiova ki na Koro i Tevita, o Mikeli na luvei Saula sa rai tiko yani ena katuba leka, ka sa raici Tevita ni sa ladelade tiko ena mamarau ena mata i Jiova; na yalona sa beci Tevita sara ga vakalevu.
17 Era sa kauta mai na Kato i Jiova, ka biuta ena loma ni vale ni veitavaki sa vakarautaka o Tevita. Sa vakacabora o Tevita nai soro kama kei nai soro ni veivinakati vei Jiova.
18 Ni sa oti na nona vakacabora nai soro kama kei nai soro ni veivinakati; sa vosa vakalouvinakataki ira na tamata ena yaca i Jiova ni lewevuqa.
19 Sa qai wasea vei ira na tamata kecega, vei ira na Isireli taucoko, na yalewa, na tagane, e dua nai buli madrai kei na lewe ni manumanu kei na vua ni vaini. Era sa lako kece na tamata ki na nodra dui veivale.
20 Sa lesu mai o Tevita me vakalouvinakataka na nona vuvale. O Mikeli na luvei Saula sa lako mai me sotavi Tevita ka tukuna sara, "Sa rui totoka na tui Isireli ena siga oqo ni sa sega ni ubi koya e dai ena matadra na nona goneyalewa, me vaka e dua na tamata wale sa sega ni madua ni luva sote tu!"
21 Sa tukuna o Tevita vei Mikeli. "Au sa cakava oqo vei Jiova, o koya sa digitaki au ka sega ni o tamamu kei na nona vuvale, ka sa digitaki au me'u lewa vei ira na Nona tamata e Isireli. O koya oqo, au na qiria kina nai vakatagi e mata i Jiova.
22 "Au na vinaka cake sara mai na kena oqo, au na vakamalumalumutaki e mataqu, vei ira na noqu goneyalewa o koya o sa vosa kina, mai vei ira ga, era na vakarokorokotaki au tikoga."
23 Sa sega ni vakaluveni o Mikeli na luvei Saula me yacova na nona mate.


Chapter 7

1 Sa qai yaco, ni sa tiko na tui ena nona vale, ni sa solia vua o Jiova na vakacegu mai vei ira kecega na meca sa tiko volivoliti koya,
2 Sa tukuna na tui vei Nacani na Parofita, "Raica, au sa tiko ena vale tara ena sitari ia, na Kato ni Kalou sa tiko ena vale laca."
3 Sa tukuna mai o Nacani vua na tui, "Lako ka cakava kece na ka sa tu e lomamu, ni sa tiko vata kei iko o Jiova."
4 Sa qai yaco ena bogi o ya, ni sa lako mai na vosa i Jiova vei Nacani ka vaka,
5 "Lako ka tukuna vua na Noqu tamata o Tevita, 'Sa tukuna vaka oqo o Jiova: "O iko mo tara e dua na vale me'u tiko kina?
6 "Au sa sega ni tiko ena vale, mai na gauna au sa kauti ira mai kina na luvei Isireli mai Ijipita, me yacova mai na siga oqo, ia, au sa veilakoyaki tiko ga ena vale laca kei na valevakacevaceva.
7 "Ena vanua kecega au sa lako vata tiko kina kei ira na luvei Isireli, au sa vosa beka vua e dua ena yavusa e Isireli, vei koya au sa vakarota me nodra i vakatawa na Noqu tamata me'u tukuna kina, 'Na cava o sa sega ni tara kina e dua na Noqu vale sitari?'"'
8 "Mo tukuna kina vua na noqu tamata o Tevita, 'Sa tukuna o Jiova ni lewevuqa. "Au sa kauti iko mai ena loma ni bai ni sipi, mai na nomu muri ira tiko na sipi, mo mai daunilewa sara vei ira na Noqu tamata, na Isireli.
9 "Au sa tiko vata kei iko ena veivanua kecega o lako kina, ka musuki ira tani na kemu meca kece mai matamu, sa rogo kina na yacamu, me vaka na yacadra na tamata rogo era sa tiko e vuravura.
10 "Mo kila, Au na digitaka na vanua vei ira na Noqu tamata na Isireli; me nodra, Me'u vakadeitaka vei ira, me ra tiko kina, ka sega ni veitosoyaki tale – se me ra vakasosataki tale tiko mai vua na luve ni ca me vaka e liu,
11 "Mai na veigauna Au sa dau vakaroti ira kina na turaganilewa vei ira na Noqu tamata na Isireli, ka vakavuna mo ni cegu mai vei ira kece na nomuni meca. O Jiova talega sa tukuna vei iko ni na tara o Koya e dua na nomu vale.
12 "Ni sa oti na nomu veisiga, ka o sa la'ki vakacegu vata kei ira na qase, Au na vakatubura e dua na vuamu me kemu i sosomi, o koya na vua dina ni yagomu, au na vakadeitaka talega na nona matanitu.
13 "O koya ena tara na vale ena yacaqu, ka Au na vakadeitaka na i tutu ni nona Matanitu me sega ni mudu.
14 "Au na yaco me'u tamana, o koya ena Luvequ. Kevaka sa cakava na ka ca, Au na kuitataki koya ena i kuita vakatamata kei nai bili ni luve ni tamata.
15 "Na Noqu loloma ena sega ni lako tani mai vua, me vaka na noqu kauta tani mai vei Saula – o koya Au sa kauta tani mai Mataqu.
16 "Na nomu vale kei na nomu matanitu ena vakadeitaki me sega ni mudu e matamu. Ena vakadeitaki na nomu i tikotiko vakaturaga me sega ni mudu."'"
17 Me vaka na veivosa kece kei na raivotu kece, sa vosa kina o Nacani vei Tevita.
18 Sa lako yani o Tevita na Tui ka dabe ena mata i Jiova, ka tukuna: "O cei oi au, Jiova na Kalou? Na cava na noqu vuvale, o ni sa kauti au mai kina me yacova oqo?
19 "Oqo sa ka lailai sara e matamuni, kemuni Jiova na Kalou; o ni sa vosa talega ena vuku ni nona vale na nomuni tamata ena dua na gauna sa tiko e liu oqo. Sa vaka beka oqo nai valavala ni tamata, Jiova na Kalou?
20 "Na cava tale e rawa ni tukuna o Tevita vei Kemuni? Ni sai Kemuni Jiova na Kalou sa kila na Nomuni tamata.
21 "Ena vuku ni Nomuni vosa, me vaka na Yalomuni, o ni sa cakava na ka kece oqo, me kilai kina vei ira na Nomuni tamata oqo.
22 "O koya oqo, o ni sa cecere kina Jiova na Kalou, ni sa sega e tautauvata kei Kemuni, sa sega tale na Kalou, sai Kemuni ga, me vaka na ka kecega sa rogoca na daligai keimami.
23 "Ocei sa vakataki ira na Nomuni tamata, me vakataki Isireli, na matanitu duadua ga e vuravura sa vakabula ka volia na Kalou me ra Nona, me kilai kina na Yacana – ka me cakava talega kina na veika lelevu, ena vuku ni vanua e matadra na Nomuni tamata, o koya o ni sa vakabulai ira, me Nomuni mai Ijipita, mai na veimatanitu kei na nodra Kalou?
24 "O ni sa cakava, me, o ira na Nomuni tamata, na Isireli, o ira na Nomuni tamata me sega ni mudu; kei Kemuni, Jiova, mo ni sa nodra Kalou.
25 "Ia oqo, Jiova na Kalou, na vosa o ni sa vosataka ena vuku ni Nomuni tamata kei na nona vale, mo ni vakadeitaka ka cakava me vaka o ni sa tukuna.
26 "Mo ni laiva na Yacamuni me vakacerecerei me sega ni mudu, ka tukuna, 'O Jiova ni lewevuqa sa Kalou e Isireli,' ka mo ni laiva na vale ni Nomuni tamata o Tevita me vakadeitaki e matamuni.
27 "Ni sai Kemuni, Jiova ni Lewevuqa, na Kalou ni Isireli, sa vakaraitaka oqo vua na Nomuni tamata, ka tukuna, 'Au na tara vei iko e dua na vale.' Oqo na vuna sa kila kina e yalona na Nomuni tamata, me masulaka kina na ka oqo vei kemuni.
28 "Oqo, Jiova, o ni sa Kalou, sa dina na Nomuni vosa ka o ni sa yalataka na ka vinaka oqo vua na Nomuni tamata.
29 "Oqo, Mo ni yalovinaka ka vakalouvinakataka na nona vale na Nomuni tamata, me tiko ga ka sega ni mudu e matamuni; Ni sai Kemuni Jiova na Kalou sa tukuna oti, kei na Nomuni veivakalouvinakataki me vakalouvinakataki kina na nona vale na Nomuni tamata me sega ni mudu."


Chapter 8

1 Ni sa oti oqo, sa valuti ira na Filisitia o Tevita ka vakamalumalumutaki ira. Sa tauri Meceki-Ama o Tevita mai na ligadra na Filisitia.
2 Sa vakadrukai Moaqi, ni sa valuti ira ki na qele, ka sa vakarautaki ira ena i vakarau wa. Ena rua na wa sa vakarautaki kina o ira me ra vakamatei, kei na dua na wa balavu o ira mera vakabulai tiko. Era sa bobula vei Tevita na Moapi ka dau kau i vakacavacava mai.
3 O Tevita sa vakamalumalumutaki Adedisa na luvei Reopi na tui Soba, ni sa lako tiko me taura lesu na Nona vanua mai na Uciwai na Uferetisi.
4 Sa taura mai vei koya o Tevita e dua na udolu na qiqi ni valu, vitu na drau na tamata vodo ose kei na ruasagavulu na udolu na sotia. Sa sereki ira na ose ni qiqi ni valu ka sa vakavoca ga e vica me rauta na dua na drau na qiqi ni valu.
5 Ni ra sa lako mai na kai Siria me mai vukei Adedisa na tui Soba. Sa vakamatea o Tevita e ruasagavulu ka rua na udolu na kai Siria.
6 Sa lesia o Tevita e so nai valu vakatawa e Tamasiko-Siria. Era sa yaco me tamata i Tevita na kai Siria ka kau i vakacavacava vua sa maroroi Tevita na Kalou ena veivanua kecega sa lako kina.
7 Sa taura o Tevita na Tui na veleti koula nei koya na tamata i Adedisa ka kauta mai ki Jerusalemi.
8 Mai Bita kei Biroci, na koro nei Adedisa, sa taura mai kina o Tevita e dua nai wiliwili varasa levu.
9 Ni sa rogoca o Tou na tui Amaci ni sa vakadruka kece nai valu nei Adedisa o Tevita,
10 Sa vakatalai Jorami na luvena o Tou, na tui Amaci vei Tevita na Tui, me kidavaki koya ka yalovinaka vua, baleta ni sa vala vata kei Adedisa ka vakadrukai koya; (ni rau a vala e liu o Adedisa kei Tou). Sa kauta mai vei Tevita na Tui eso na koula, eso na siliva kei na varasa o Jorami.
11 Sa vakacabora kece na vei ka oqo o Tevita na Tui vei Jiova – me wili kina na siliva, na koula sa kau mai na veivanua kecega sa vakamalumalumutaka oti o koya.
12 Mai Siria, Moapi, ira na tamata mai Amoni, na Filisitia, na Amelekaite kei nai toki mai vei Adedisa na luvei Reopi na tui Soba.
13 Sa vakarogorogoya na yacana o Tevita ena nona lesu mai na valuti ira mate e tinikawalu na udolu na kai Siria ena Buca ni Masima.
14 Sa biuta talega nai valu vakatawa e Itomi; sa tu oqo e Itomi taucoko, ka era sa yaco me bobula nei Tevita. Sa maroroi Tevita o Jiova ena veivanua kecega sa lako kina.
15 Sa lewa e Isireli taucoko o Tevita; sa lewa vakadodonu vei ira na nona tamata.
16 O Joapi na luvei Seruia sa lewa na mataivalu; o Josefati na luvei Aliudi sa dauvola na ka kecega;
17 O Setoki na luvei Aitubi kei Aimeleki na luvei Abiata e rau sa bete. O Sereia na vunivola ni vunau;
18 O Venaia na luvei Jeoiada sa lewa e Serekaite kei Pelekaite; io na luvei Tevita e rau sa i liuliu vakaiwasewase.


Chapter 9

1 Sa tukuna o Tevita, "Sa vo tiko beka e dua mai na vuvale nei Saula, me'u vakaraitaka vua na noqu vinaka ena vuku i Jonacani?"
2 Sa dua na dauveiqaravi mai na vale nei Saula na yacana o Siba. Ni sa kacivi mai vei Tevita, sa tarogi koya na tui, "O iko beka o Siba?" Sa sauma mai, "Au sa tu vakarau!"
3 Sa tukuna yani na tui, "Sa sega beka ni vo e dua mai na vuvale i Saula, me rawa ni vakaraitaki vua na vinaka ni Kalou?" Sa sauma mai o Siba vua na tui, "Sa dua tiko na luvei Jonacani sa wamalai na yavana ruarua."
4 Sa tukuna vua na tui, "E vei o koya?" Sa sauma mai o Siba, "Sa tiko o koya ena vale nei Makiri na luvei Amieli mai Lo-Debari."
5 Sa veitalai na tui me kau mai o koya mai na vale nei Makiri na luvei Amieli mai Lo-Debari.
6 Ni sa kau mai o Mefisopeci na luvei Jonacani, na luvei Saula vei Tevita, sa cuva sobu ka vakamalumalumutaki koya. Sa tukuna yani o Tevita, "Mefiposeci?" sa sauma mai, "Oi au saka na nomuni tamata!"
7 Sa tukuna vua o Tevita, "kua ni rere, ni'u na vakaraitaka vakaidina vei iko na yalovinaka ena vuku i Jonacani na tamamu, au na vakalesuya vei iko na qele taucoko nei Saula na tukamu; ka o na kana madrai tikotiko ga mai na noqu teveli."
8 Sa cuva o Mefisopeci ka tukuna, "Na cava sara mada na nomuni tamata, ni dodonu mo ni raici au, me vaka e dua na koli mate?"
9 Sa kacivi Siba na tamata i Saula, na tui, ka tukuna vua, "Au sa solia vua na luve ni kemu i taukei, na veika kece sa nei Saula kei na nona vuvale kece.
10 "O iko kei iratou na luvemu tagane kei ira kece na nomu dauveiqaravi, mo ni cakacakataka na qele ena vukuna, mo ni kauta mai na kena tatamusuki, me dua na ka e kana kina na luvei koya na kemu i taukei. O Mefiposeci na luvei kemu i taukei, me kana madrai tikoga mai na noqu teveli." O Sipa sa tinikalima na luvena tagane ka ruasagavulu na nona tamata dauveiqaravi.
11 Sa tukuna o Siba vua na tui, "Me vaka na veika kecega sa vakarota na noqu turaga na tui vua na nona tamata, ena cakava ga o koya na nona tamata." "Vei Mefiposeci" sa tukuna na tui, "Ena kana mai na noqu teveli me vaka e dua na luvena."
12 O Mefiposeci sa dua tiko na luvena tagane na yacana o Maika, o ira kece sa tiko ena vale nei Sipa era sa tamata i Mefiposeci.
13 Sa tiko e Jerusalemi o Mefiposeci, sa kana tikotiko ga ena nona teveli ni kana na tui. Sa wamalai tikoga na yavana ruarua.


Chapter 10

1 Sa yaco ni sa qai mate na nodra tui na kai Amoni ka sa veiliutaki o Anuni na luvena.
2 Sa qai vosa mai o Tevita ka vaka: "Au na vakaraitaka na vinaka vei Anuni na luvei Naesi, me vaka ni a vakaraitaka na vinaka vei au o tamana." Sa vakadewataka vei ira na nona tamata o Tevita na nona vakaloloku ena vuku i Naesi. Era sa lako mai na tamata i Tevita ki na nodra vanua na Amoni.
3 O ira na turaga ni tamata e Amoni era sa tukuna vei Anuni na nodra turaga, "O sa kila dina ni sa dokai tamamu o Tevita, ena nona vakauti ira mai na dauveivakacegui vei iko? Sa sega beka ni vakauti ira mai oqo, me ra mai vaqaqara ka vakadidike ka vuaviritaka na vanua?"
4 Sa qai tauri ira na tamata i Tevita o Anuni, ka toroya vakaveimama na kumidra, ka kotiva na tolo ni nodra i sulu e lomadonu e muri, ka vakatalai ira yani.
5 Ni ra sa tukuna vei Tevita oqo, sa talatala o Tevita me ra mai sota mada baleta ni ra sa rui madua vakalevu na i talai. "Mo ni wawa mai Jeriko, me yacova ni sa tubu vinaka na kumimuni ka mo ni qai lesu mai."
6 Ni ra sa kila na Amoni ni ra sa cati ka veivakacudrui vei Tevita, era sa talatala na Amoni me so na veivuke mai vei ira na Siria e Beci-Reapi kei ira na Siria e Soba, e ruasagavulu na udolu na sotia e yavadra; mai vei tui Maeka e dua na udolu na tamata, ka tinikarua na udolu na tamata mai vei Isi-Tobi.
7 Ni sa rogoca oqo o Tevita, sa kacivi Joape kei ira na tamata i valu qaqa.
8 Era sa lako vakavakarau mai na Amoni e nai curucuru ni matamata ka era sa tikoga mai na buca o ira na Siria mai Soba, mai Reapi, mai Isi- Tobi kei Maeka.
9 Ni sa raica o Joape nai valu sa kaukauwa mai vua e liu ka muri talega, sa digitaka e so na tamata qaqa mai vei ira na Isireli me qaravi ira ga na kai Siria.
10 Na kena vo ni tamata sa biuti ira ena ligai Apisai na taci Joape me ra vala ga kei ira na Amoni.
11 Sa tukuna yani, "Kevaka era sa kaukauwa mai na Siria, mo qai vukei au mai, kevaka era sa kaukauwa mai na Amoni vei iko, au na lako mai ka vukei iko.
12 "Mo ni tamata qaqa, ka me da tamata qaqa ni tamata ka na veikoro i Jiova. Me cakava ga o Jiova na veika ga e vinaka vua."
13 O Joape kei ira na tamata era sa tikovata kei koya, era sa toso voleka yani vei ira na Siria. Era sa dro na kai Siria e matana.
14 Ni ra sa raica na Amoni, ni ra sa veidroyaki na kai Siria, era sa dro talega ena matai Apisai, sa lako tani mai o Joape mai vei ira na Amoni, ka lako yani ki Jerusalemi.
15 Ni ra sa raica na kai Siria ni ra sa vakadrukai e matadra na Isireli; era sa vakasoqoni vata.
16 O Adedisa sa talatala yani vei ira na Siria era sa tiko mai na tai kadua ni Uciwai, era sa lako mai e Elami. O Sobaki na i liuliu ni mataivalu nei Adedisa sa lako e matadra.
17 Ni sa tukuni oqo vei Tevita, sa vakasoqoni ira kece na Isireli, era sa takosova na Joritani ka lako mai ki Elami. Era sa tu mai na Siria ka vala kei Tevita.
18 Era sa dro na Siria e matai Isireli; sa vakamatea o Tevita e vitu na drau ena qiqi ni valu, vasagavulu na udolu na vodo ose vei ira na Siria, ka vakamatei Sobaki na nodra i liuliu ni mataivalu e kea.
19 O ira kece na tui era sa vakarorogo tiko vei Adedisa, ni ra sa raica na nona vakadrukai mai vei Isireli. Era sa cakava na vakaveisaututaki vata kei Isireli ka veiqaravi vei Isireli. Era sa rere na Siria na veivuke vei ira na Amoni – ka sa mai oti talega kina vakadua.


Chapter 11

1 Ni sa yaco mai na vula i tubutubu, na gauna talega era sa daulako kina na tui ki nai valu, o Tevita sa vakatalai Joape kei ira na nona dauveiqaravi, vata kei koya, kei ira kece na Isireli; Era sa vakadrukai na Amoni ka vesuki Raba. O Tevita sa tiko ga e Jerusalemi.
2 Sa qai yaco ena dua na yakavi karobo, sa tucake mai o Tevita mai na nona i davodavo ka veilakoyaki voli ena dela ni vale ni tui. Mai na dela ni vale o ya, sa raica kina e dua na yalewa ni sa sisili tiko, ka sa rui totoka na yalewa oqo ni vakasaravi.
3 Sa talatala o Tevita me tarogi mada se o cei na yalewa o ya. Sa tukuna mai e dua, "Sa sega beka ni oqo o Vaciseva na luvei Eliame na wati Uraia na Itaiti?"
4 Sa talatala o Tevita me kau mada mai; sa lako sara mai vua na yalewa. E rau sa veimoceri sara, ni se qai sisili oti mai ena gauna sa se oti kina na nona rosi; ka sa lesu tale ki nona vale.
5 Sa kunekune sara na yalewa; sa talatala sara na yalewa me tukuni vei Tevita ka vaka: "Sa tiko vei au na gone."
6 Sa talatala o Tevita vei Joape, "Me lako mada mai o Uraia na Itaiti." Sa talai Uraia sara yani o Joape vei Tevita.
7 Ni sa yaco yani vei Tevita o Uraia, sa tarogi sara se sa vakacava tiko o Joape, kei ira na tamata kei nai valu sa vakacava tiko.
8 Sa tukuna o Tevita vei Uraia, "Lako mada i nomu vale ka savata na yavamu." Sa lako tani o Uraia mai na vale ni tui, sa kau muri yani vua e dua nai lalakai kakana mai vua na tui.
9 O Uraia sa moce tiko ga ena matamata ni vale ni tui kei ira kece na nona tamata, ka sega ni lakoi nodratou.
10 Sa tukuni vua na tui, "O Uraia sa sega ni lako ki nona vale:" Sa tukuna o Tevita vei Uraia, "Raica o sa lako mai vakabalavu, na cava o sega ni via laki moce kina e nomu vale?"
11 Sa tukuna o Uraia vei Tevita, "Na Kato kei ira na Isireli kei ira na Juta era sa tiko e vale laca, o Joape kei ira na nona tamata era sa tiko ena vanua tadola, me'u qai lako o au ki vale me'u kana, me'u gunu ka moce vata na watiqu? Me vaka o ni sa bula me vaka sa bula na yalomuni, au na sega ni cakava oqo."
12 Sa tukuna sara o Tevita vei Uraia, "Mo wawa tiko eke nikua, ka au na talai iko yani ena siga ni mataka." Sa tiko ga e Jerusalemi o Uraia ena siga o ya kei na siga ka tarava.
13 Sa kacivi koya tale o Tevita, ka kana ka gunu vata kei Tevita – sa oti oqo, sa lako tale ka moce vata kei ira na tamata i Tevita mai na matamata. Sa sega ni lakoi nodratou.
14 Ena mataka, sa vola o Tevita e dua nai vola vei Joape, ka solia e ligai Uraia.
15 Sa volai ena i vola oqo, "Mo biuti Uraia ena vanua sara ga e katakata tiko kina nai valu ka lako tani mai vua – me samuti kina ka vakamatei."
16 Sa qai yaco ni se kabati tikoga na koro, sa biuti Uraia ena vanua sa kila ni ra tiko kina na dauvala.
17 Era sa lako mai na tamata mai na koro ka vala vata kei Joape. Era sa mate eso na tamata i Tevita kei Uraia talega na Itaiti.
18 Sa tukutuku o Joape vei Tevita ena veika kece me baleta nai valu,
19 ka sa vakarota na dautukutuku ka vaka: "Ni sa oti na nomu tukuna vua na tui na veika me baleta nai valu,
20 "Kevaka sa yaco me tubu na nona cudru na tui ka tarogi iko: 'Na cava o ni sa toso voleka kina ki na koro ni sa ia tiko nai valu? O ni sa kila ni rawa ni ra vanavana mai na lalaga?
21 'O cei sa vanai Apimeleki na luvei Jerubeseci? Sa sega beka ni dua na yalewa sa viritaka mai na vatu mai na lalaga, ka sa mate kina mai Tebesi? Na cava o ni sa lako voleka kina ki na lalaga, mo ni qai tukuna vua, na Nomuni tamata o Uraia na Itaiti sa mate talega.'"
22 Sa lako yani na dautukutuku, ka lako mai me tukuna vei Tevita na veika kece sa talai koya mai kina o Joape.
23 Sa tukuna vei Tevita na dautukutuku, "Era sa lako mai na meca ka yaco sara mai ena buca, keimami sa qai kaukauwa lesu ka cicivi ira me yacova sara na nodra matamata.
24 "Era sa vanavana mai na dauvana mai na lalaga vei ira na nomuni tamata. Sa mate kina eso na tamata ni tui, sa mate talega kina o Uraia na Itaiti."
25 Sa tukuna o Tevita vua na dautukutuku, "Mo tukuna vei Joape, ka vaka: 'Me kua ni vakayalocataki iko oqo, Nai sele sa vakamatea e dua kei na duatale, mo vakaukauwataka na nomu valuta na koro, ka taura sara,' mo vakauqeti koya."
26 Ni sa rogoca na wati Uraia ni sa mate o na watina, o Uraia – sa vakalolokutaki watina.
27 Ni sa oti na nona vakaloloku, sa talatala o Tevita me kau mai ki nona vale, ka sa yaco me watina ka vakasucuma vua e dua na luvena tagane. Na ka sa cakava oti o Tevita sa sega ni vakamarautaki kina o Jiova.


Chapter 12

1 O Jiova sa talai Nacani vei Tevita – sa lako mai ka tukuna vua: "E rua na tamata sa tiko ena dua na koro, dua vei rau sa vutuniyau ka dua sa dravudravua.
2 "Sa levu sara na ka sa tu vua na vutuniyau, na manumanu kei na vuata.
3 "Na dravudravua sa sega na ka vua, e dua na lami lailai ga, ea voli mai, ka me mai susugi, sa vakatuburi vata kei na nona vuvale. Sa kania ga na kena ka gunuva ga na mena, ka sa dau davo e serena; sa vaka sara ga e dua na luvena yalewa vei koya.
4 "Sa lako mai e dua vua na tamata vutuniyau, sa bese ni taura mai na nona bai e dua na manumanu me vakarautaka vua sa lako tiko mai; ia, sa taura na nona lami na tamata dravudravua ka vakarautaka vua na nona vulagi."
5 Sa cudru vakalevu sara o Tevita vua na tamata sa cakava na ka oqo – ka sa qai tukuna talega vei Nacani, "Me vaka sa bula o Jiova, na tamata sa cakava na ka oqo sa dodonu me mate!
6 "Me vakasuka tale me vaka-vataki na lami baleta ni sa cakava na ka oqo. Sa sega tale ga vua na yalololoma."
7 Sa qai vosa mai o Nacani vei Tevita, "Sai iko sara ga na tamata o ya! 'Sa tukuna vaka oqo o Jiova na Kalou e Isireli, Au sa lumuti iko mo tui e Isireli, ka vakabulai iko mai na ligai Saula.
8 'Au sa solia vei iko na vale nei nomu turaga kei na watidra na nomu turaga me ra maroroi ka solia vei iko na vuvale i Isireli kei Juta. Kevaka e lailai o ya; Au na solia vakalevu tale vei iko!
9 'Na cava o sa beca kina nai vakaro i Jiova, mo cakava kina na veika ca oqo e matana? O sa vakamatei Uraia na Itaiti ena i seleiwau, ka taura na watina me watimu, ka vakamatei Uraia ena nodra i seleiwau na Amoni.
10 'Mo kila, ni na sega ni yali nai seleiwau mai na nomu vale, baleta ni o sa beci Au, ka taura na wati Uraia na Itaiti me watimu.'
11 "Sa tukuna vakaoqo o Jiova, 'Raica au na vakatubura na kemu meca mai na nomu vale ga; Au na tauri ira na watimu mai matamu, ka soli ira ki vei ira na wekamu, ka era na veimoceri ni sa siga rarama levu tu.
12 'O iko sa cakava vuni na ka oqo, Ia, Au na cakava na ka oqo ena matadra kece na Isireli; ena matanisiga.'"
13 Sa tukuna o Tevita vei Nacani, "Au sai valavala ca vei Jiova." Sa tukuna o Nacani vei Tevita, "O Jiova sa biuta tani na nomu i valavala ca, o na sega talega ni mate.
14 "Ia, baleta na ka o sa cakava, o sa solia kina vei ira na meca i Jiova me ra vosa vakacacataki koya kina, na gone talega sa sucu vei iko ena mate."
15 Sa lako o Nacani ki nona vale. O Jiova sa samuta na luvei wati Uraia vei Tevita; sa tauvi mate vakaca sara.
16 Sa masuti Jiova o Tevita ena vuku ni gone. Sa lolo o Tevita ka sa davo tiko ena qele ena bogi taucoko.
17 Era sa lako mai na qase ni vale vei Tevita; me ra vakaduri koya cake mai na qele, ia, sa bese ga o koya me tucake se kana vata kei ira.
18 Sa oti e vitu na siga, sa qai mate na gone. Era sa rere na dauveiqaravi me tukuna vei Tevita ni sa mate na gone. Era sa tukuna, "Ni se bula tiko na gone, eda se vosa tiko vua, ia e sega ni dau via rogoci keda. Me da tukuna rawa vakacava vua ni sa mate na gone? De qai cakava e dua na ka!"
19 Ni sa raica o Tevita ni ra sa vosa minimini tiko na nona dauveiqaravi, sa kila o Tevita ni sa mate na gone. Sa tukuna mai o Tevita vei ira na nona tamata, "Sa mate beka na gone?" Era sa sauma mai, "Sa mate o koya."
20 Sa tucake mai na buturara o Tevita, sa sili ka lumuti koya, veisautaka na nona i sulu, sa lako ki na vale i Jiova me lotu. Sa qai lako ki nona vale ga, era sa vakarautaka vua na kakana. Sa kana o Tevita me vaka ni sa gadreva.
21 Era sa tukuna vua na nona dauveiqaravi, "Na cava o sa cakava? O sa lolo ka tagi ni se bula tiko na gone, ia oqo ni sa mate, o sa qai tucake ka kana."
22 Sa vosa mai o Tevita ka vaka: "Ni se bula tiko na gone, au sa lolo ka tagi, ni'u sa tukuna 'O cei e kila se ena loloma beka o Jiova vei au – me bula kina na gone?'
23 "Oqo ni sa mate, na cava me'u lolo tale kina? E rawa beka ni'u kauti koya lesu tale mai? Au na lako vua, ia, ena sega ni lesu tale mai vei au o koya."
24 Sa vakacegui Vaciseva o Tevita, ka lako vua, a rau sa veimoceri. Sa vakasucuma e dua na tagane ka vakayacani koya o Solomoni sa taleitaki Solomoni o Jiova.
25 Sa vakauta o Jiova e dua nai tukutuku ena ligai Nacani na parofita: sa vakayacani kina na gone o Jetitia na kenai balebale na ka taleitaki i Jiova.
26 Sa valuti Raba o Joape, o ira na kai Amoni, ka sa tauri o Raba na koro turaga.
27 Sa vakauta nai tukutuku o Joape vei Tevita ka vaka: "Au sa valuti Raba ka au sa vesuka na wai e gunu tiko mai kina na koro.
28 "Oqo mo vakasoqoni ira kece na tamata sa vo, me kabai na koro ka tauri dei, au qai taura na koro, ka qai vakayacani ga vei au."
29 Sa qai vakasoqoni ira na tamata o Tevita ka lako sobu ki Raba, sa valuta ka taura.
30 Sa taura nai sala ni tui mai na uluna, na kena bibi sa dua na taledi na koula ka sa tu talega kina na veiveivatu talei kecega. Sa vakatokari vei Tevita (uluna). Sa kauta talega mai nai toki ni valu ni koro, ka sa rui levu dina.
31 Era sa kau talega mai na tamata era sa tiko kina me ra mai cakacaka ena buli vatu ena nodra vakayagataka na i varo, na piki kaukamea, nai matau kaukamea. Sa caka na veika oqo vei ira na veikoro nodra na tamata na Amoni. O Tevita kei ira na tamata kecega, era sa lesu tale ki Jerusalemi.


Chapter 13

1 O Apisalome na luvei Tevita sa dua tiko na ganena rairai vinaka, na yacana o Tema; o Aminoni na luvei Tevita sa dau domoni koya.
2 Na levu ni nona dodomo sa vakavuna kina me tauvimate, ni se goneyalewa savasava o Tema. Oqo na vuna e sega ni cakava rawa kina vua e dua na ka o Aminoni.
3 Sa dua tiko nai tokani vinaka nei Aminoni na yacana o Jonatave na luvei Simea, na taci Tevita. Sa tamata lawaki levu sara o Jonatave.
4 Sa tukuna sara vei Aminoni, "Na cava na vuna o sa lila tikoga kina e veisiga?" O iko na luve ni tui, e sega beka ni o na tukuna mai vei au? Sa qai tukuna vua o Aminoni, "Raica au sa rui domoni Tema vakalevu na ganei Apisalome na taciqu."
5 Sa tukuna vua o Jonatave, "Davo tiko ena nomui davodavo me vaka e dua sa tauvimate levu. Ni sa lako mai o tamamu ka raici iko, tukuna vua, 'Au kerea, me lako mada mai o Tema na ganequ, me solia na kequ, me vakarautaka na kequ e mataqu, me'u raica ka kania mai ligana.'"
6 Sa davo tiko o Aminoni ka vakamatematei koya sara tu, ni sa lako mai na tui ka raici koya – sa tukuna sara vua na tui, "Au kerea me lako mada mai o Tema me cakava mada e so na keke e mataqu, me'u qai kania mai ligana."
7 Sa talatala o Tevita vei Tema ka vaka: "Lako ki na vale nei ganemu o Aminoni ka vakarautaka na kakana vua."
8 Sa lako ki na vale nei Aminoni o Tema, sa davo tiko o Aminoni. Sa taura na falawa ka vakarautaka na keke e matana ka vavia.
9 Sa kauta mai na kakana ka biuta e matana me kana – ia, sa bese ga ni kana o Aminoni. Sa vosa yani o Aminoni, "Me lako tani kece na tamata mai mataqu." Era sa lako tani kece yani.
10 Sa tukuna o Aminoni vei Tema, "Kauta mai na kakana ki noqu rumu ni moce me'u kana kina mai ligamu." Sa kauta mai na keke o Tema vei Aminoni na ganena ki nona rumu ni moce.
11 Ni sa kauta mai na madrai ki vua me kana, sa vesuki koya o Aminoni ka tukuna vua, "Lako mai na ganequ, daru mai davo mada."
12 Sa sauma vua o Tema, "Sega na ganequ, kua ni tauri au vakaukauwa, sa sega ni dodonu me caka na ka oqo e Isireli, kua ni cakava na ka veivakatorosobutaki oqo!
13 "O au, me'u kauta ki vei na noqu vakamaduataki oqo? Kei iko, o na vaka e dua na lialia e Isireli. Au kerea, mo vosa vua na tui, ni na sega ni bureitaki au vei iko o koya."
14 Sa sega ga ni via rogoca na domona; baleta ni sa kaukauwa cake, sa qai tauri Tema vakaukauwa ka kucuvi koya.
15 Sa ca vakalevu na yalo i Aminoni vei Tema, sa levu cake na kena ca, mai na nona a domoni koya e liu. Sa tukuna vua o Aminoni, "Mo tucake, ka lako tani!"
16 Sa tukuna o Tema vua, "Me kua sara, na ca ni nomu vakatalai au, ena levu cake mai na ca ni nomu kucuvi au." Sa sega ga ni via rogoci koya o Aminoni.
17 Sa kacivi ira mai na dauveiqaravi ka tukuna, "Raica, me kautani na yalewa oqo mai vei au ka vakota na katuba ni sa lako yani."
18 Sa daramaka tiko o Tema e dua nai sulu duirokaroka mei vakatakilakila ni goneyalewa savasava ka luve ni tui. Era sa biuti koya e tuba ka vakota na katuba.
19 Sa boroya na dravusa e uluna o Tema ka basubasuka nai sulu duirokaroka e tokara tiko ka biuta na ligana e uluna ka lako yani ni sa tagi vakararawa tiko.
20 Sa tarogi koya o Apisalome na ganena, "Sa moceri iko o Aminoni na ganemu? Mo tauri iko vakamalua na ganequ – o koya e ganemu, mo kua ni kauta sara e lomamu na ka oqo." Sa tiko ga e vale nei Apisalome o Tema.
21 Sa cudru vakalevu na Tui o Tevita ni sa rogoca na veika oqo.
22 O Apisalome sa sega ni tukuna e dua na ka vinaka se ka ca vei Aminoni na tacina, ni sa cati Aminoni o Apisalome baleta ni a kucuva na ganena o Tema.
23 Sa oti e rua vinaka na yabaki, o Apisalome sa kotivi ira tiko na sipi mai Peali-Asori, oqo sa voleka i Ifereimi; sa sureti ira kece na luve ni tui o Apisalome.
24 Sa lako mai o Apisalome vua na tui ka tukuna, "Mo raica ni ra sa kotiva tiko na sipi na dauveiqaravi, au kerea me lako na tui kei ira na nona tamata vata kei na nona dauveiqaravi."
25 Sa tukuna na tui vei Apisalome, "Sega na luvequ, me kua ni da lako kece, de keimami vakaocaoca vei iko." Sa cikevi tamana tiko – ia, sa sega ga, sa qai vakalouvinakataka ga.
26 Sa qai kerea o Apisalome, "Kevaka o sa sega ni lako, ia, me lako mai o Aminoni na taciqu." Sa tukuna mai na tui, "Na cava me lako kina o Aminoni vata kei kemuni?"
27 Sa cikecike ga o Apisalome, sa qai vakatarai Aminoni, na tui, me lako, kei ira kece na luve ni tui me lako vata kei koya.
28 Sa vakaroti ira oti na nona tamata o Apisalome ka vaka: "Mo ni raica tiko ni sa mamarau tiko vakalevu o Aminoni ena waini, ka sa yaco me'u tukuna yani, 'Mo ni mokuta, mo ni vakamatei koya sara!' Mo ni kua ni rere, sa sega beka ni'u vakaroti kemuni? Mo ni yalovakatagane ka yatedei."
29 O ira na tamata nei Apisalome era sa cakava vei Aminoni me vaka sa vakarota o Apisalome. Era sa tucake kece na luve ni tui – o ira vakayadua sa ciciva na nodra Meule ka dro yani.
30 Sa qai yaco, ni ra se dro tiko yani, sa yaco vei Tevita nai tukutuku ka vaka: "O Apisalome sa vakamatei ira kece na luve ni tui, ka sa sega ni dua e vo!"
31 Sa tucake na tui ka dresulaka na nona i sulu ka davo ki na qele, era sa tu kece e yasana na nona tamata ka sa dresulaki talega na nodra i sulu.
32 O Jonatave na luvei Simea na taci Tevita sa vosa mai ka vaka: "Me kua ni nanuma na noqu turaga ni ra sa mate kece oqo, na luve ni tui, ni o Aminoni duadua ga sa mate. Ni oqo nai vakaro nei Apisalome, mai na siga e a kucuvi Tema kina na ganena.
33 "O koya oqo, me kua ni kauta sara kina ki yalona na tui, me nanuma ni ra sa mate kece na luve ni tui."
34 Sa dro o Apisalome. Na cauravou sa vakatawa tiko, sa rai yani – sa raici ira na lewevuqa era sa lako tiko mai ena sala mai delana e na nodra muri tiko yani.
35 Sa tukuna o Jonatave vua na tui, "Raica, era sa lako tiko mai na luve ni tui; me vaka sa tukuna na nomuni tamata, sa vaka kina."
36 Sa yaco vaka kina, ni sa oti tikoga na nona vosa vua na tui, era sa yaco dina mai na luve ni tui. Era sa tabalaka na domodra ka qoqolou. Era sa tagi talega na tui kei ira na nona tamata.
37 O Apisalome sa dro ka lako sara ki Talemai na luvei Ameuti na tui Kesuri. Sa tagicaki na luvena tiko o Tevita ena veisiga.
38 Sa dro o Apisalome ka yaco ki Kesuri, sa tiko mai kea me tolu na yabaki.
39 Sa vinakata o Tevitana Tui me lako vei Apisalome. Sa vakacegu oti o koya ena vuku i Aminoni baleta ni sa mate oti.


Chapter 14

1 O Joape na luvei Seruia sa nanuma ni sa rui kauwai vakalevu na yalo i Tevita na tui vei Apisalome.
2 Sa talatala vei Tekoa, ka sa kau mai vua e dua na yalewa vuku ka tukuna vua, "Mo vuki me vaka e dua sa vakaloloku tiko, daramaka na kena i sulu, kua ni lumuta e dua nai lumu, na nomu i vukivuki me vaka e dua sa vakalolokutaka tiko e dua na mate sa dede sara.
3 "Lako vua na tui ka vosa vaka oqo vua,"sa bulia sara vua o Joape na vosa me vosataka.
4 Ni sa vosa na yalewa vua na tui, sa lutu sobu ki na qele ka vakamatematei koya ka kaci yani, "Veivuke kemuni na tui!"
5 Sa tukuna mai na tui vei koya, "Na cava o leqa kina?" mo ni kila "Oi au na yada sa mate oti o na watiqu.
6 "Oqo na nomuni vada sa rua tiko na luvena, e rau sa veivala mai na were, ka sa sega e dua me tarovi rau, e dua sa samuta e dua, ka vakamatei koya.
7 "Oqo na vuvale kece sa to me veivala kei na nomuni vada ni ra sa tukuna, 'Soli koya mai sa vakamatea na tacina me keimami vakamatea talega, ena vuku i tacina sa mate; me keimami vakamatei koya sa na nona nai tutu me vakawabokotaki kina na kawa sa vo.' Me kua ni rogo tale kina na yacana ena delai vuravura."
8 Sa tukuna na tui vua na yalewa, "Mo lako ki nomu vale ka au na solia nai vakaro ena vukumu."
9 Na yalewa mai Tekoa oqo, sa tukuna vua na tui, "Na noqu turaga na tui, laiva na caka cala oqo me noqu ga kei na vale nei tamaqu, na tui kei na nona i tikotiko vakaturaga me galala kina."
10 Sa tukuna vei koya na tui, "O koya ga sa tukuna vei iko e dua na ka, kauti koya mai vei au, me kua tale ni tarai iko vakadua."
11 Sa qai tukuna tale mai na yalewa, "Au kerea na tui me nanumi Jiova na Kalou, ka me kua ni vakatara na veisausaumitaki ni dra me veivakarusai tale, de ra qai vakarusa na luvequ tagane." Sa tukuna mai na tui, "Me vaka sa bula o Jiova, ena sega ni lutu ki na qele e dua na drau ni uludratou na luvemu."
12 Sa vosa mai na yalewa ka vaka: "Au kerea, me vosa tale mada vakadua na nomuni vada vua na noqu turaga na tui." Sauma mai na tui ka vaka: "Vosa ga mai."
13 Sa qai vosa tale na yalewa: "Na cava o ni sa bucina kina vakaoqo vei ira na tamata ni Kalou? Ni sa vosa vaka oqo na tui vua sa beitaki ena yalona, ena ka oqo sa sega ni kauti koya mai kina ki vale o koya sa beitaki.
14 "Ni na mate vaka i dina, me vaka na wai sa turu ki na qele, ka sega ni rawa ni kumuni tale mai. Ia, na Kalou sa sega ni kauta tani na bula; sa tiko ga na Nona sala ni o ira sa biu tani, era sa sega ni kautani vakadua.
15 "Oqo, au sa lako mai kina me tukuna vua na tui na ka oqo, ni ra sa cakava na tamata me'u rere, ka sa tukuna kina na Nomuni vada 'Ni na sega ni vosa vua na tui. Oqo beka ena vakayacora kina na tui na veika sa gadreva na nomuni vadadauveiqaravi.
16 'Na tui ena rogoca ka sereka na nona vada mai na ligadra na tamata ena via vakarusai au kei ira na luvequ mai na veivakarautaki ni Kalou.'
17 "Sa tukuna na nomuni vada, 'Na nona vosa na noqu turaga na tui sa veivakacegui; me vaka na agilosi ni Kalou, sa vaka kina na noqu turaga na tui ena nona kila vinaka na vinaka kei na ca. Me tiko vata kei kemuni na Kalou o Jiova.'"
18 Sa sauma mai na tui ka tukuna vua na yalewa. "Au kerea, mo kua ni vunitaka vei au e dua na ka au na taroga vei iko." Sa tukuna mai na yalewa, "Me vosa ga mai na noqu turaga na tui."
19 Sa tukuna yani na tui, "Sa tiko beka kei iko na ligai Joape ena ka kece oqo?" Sa sauma yani na yalewa, "Me vaka o ni sa bula na noqu turaga na tui, sa sega tale ni dua e rawa ni vuki ki nai matau se ki nai mawi mai na vei ka sa tukuna na noqu turaga na tui. Ni sai Joape sa vakaroti au, ka sa biuta kece na vosa oqo ki na gusuna na nomuni vada.
20 "Me kauti tiko mai na veisau oqo, na nomuni tamata o Joape sa cakava tiko na ka oqo. Ia na noqu turaga sa vuku cake me vaka na vuku ni agilosi ni Kalou, me kila kina na ka sa caka tiko e vuravura."
21 Sa tukuna na tui vei Joape, "Sa vinaka, au sa vakatara na ka oqo. Lako ka kauta lesu mai na cauravou o Apisalome."
22 Sa lutu ki na qele o Joape ka sa cuva vakatoboicu tu, ka vakavinavinakataka na tui, ka tukuna, "Ena siga oqo, au sa kila ni'u sa kune loloma e matamuni na noqu turaga na tui, ni sa vakadonuya na tui na kerekere ni nona tamata."
23 Sa tucake o Joape ka lako ki Kesuri ka kauti Apisalome mai ki Jerusalemi.
24 Sa tukuna na tui, "Me lesutale o koya ki na nona vale, me kua ni vakatarai me raica na mataqu." Sa lesu tale o Apisalome ki nona vale – sa sega ni raica na matana na tui.
25 Sa sega ni dua e Isireli sa raici cake me vakataki Apisalome ni sa rui tamata rairai vinaka. Mai na qeteqete ni yavana ki na boto ni uluna, sa sega na ka me vakamelei kina.
26 Ni sa dau koti na uluna O ena veiyabaki, sa dau koti ga ni sa rui dauvakabibitaki koya na uluna. Na bibi ni ulunaO e sa dau kotivi e tolu na paudi bibi me vaka nai vakatagedegede ni vakaraubibi ni tui.
27 Sa sucu vei Apisalome e tolu na gone tagane kei na dua na yalewa, sa vakayacani me o Tema. Sa goneyalewa rairai vinaka sara.
28 Sa tiko e Jerusalemi o Apisalome me rua na yabaki ka sega ni raica na tui.
29 Sa talatala o Apisalome vei Joape me lako vua na tui, sa sega ni via lako mai o Joape.
30 Sa tukuna vei ira na nona tamata, "Raica sa tiko na teitei nei Joape volekata na noqu, ka sa tiko kina sila kamikamica. Dou lako ka vakama." A ra sa lako na tamata i Apisalome ka vakama.
31 Sa tucake o Joape ka lako mai ki vei Apisalome ka taroga, "Na cava era sa vakama kina na noqu veisila kamikamica na nomu tamata?"
32 Sa sauma o Apisalome vei Joape ka vaka: "Au sa talatala yani, 'Mo lako mai, me'u talai iko vua na tui mo taroga, "Na cava au sa lako tani kina mai Kesuri? E vinaka cake me'u tiko ga mai kea."' O koya oqo me'u raica kina na tui; kevaka sa dua na cala vei au, me vakamatei au."
33 Sa lako o Joape vua na tui ka tukuna vua. Ni sa kacivi o Apisalome vua na tui, sa lako mai ka cuva e matana na tui. Sa reguci Apisalome na tui.


Chapter 15

1 Sa oti oqo, sa vakarautaka vei koya o Apisalome eso na qiqi ni valu kei na ose, kei na limasagavulu na tamata me cici tiko e matana.
2 Sa dau yadra vakamataka o Apisalome me tu volekata na matamata. O koya vakayadua ga sa lewai tiko, sa dau lako mai vua na tui me tau na lewa. Sa dau kacivi ira o Apisalome ka taroga, "Se era sa lako mai vei?" Sa qai dau saumi vua, "Na nomuni tamata sa lako mai na yavusa o ya kei na yavusa o ya e Isireli."
3 Sa qai dau tukuna o Apisalome, "Raica na nomu beitaki – o sa sega ni cala kina, o sa vinaka. Sa sega ni dua na nona i vukevuke na tui me rogoci iko."
4 Sa dau tukuna talega o Apisalome, "Io, me'u sa turaga mada ga ni lewa ena vanua, o ira kece ga sa veibeitaki kei ira sa beitaki me ra lako mai vei au, au na solia vei ira na lewa dodonu."
5 Sa qai yaco, ni sa lako mai e dua vua, e dau dodoka yani na ligana ka tauri koya ka reguca.
6 Sa dau cakava vaka oqo o Apisalome vei ira kece na Isireli sa dau lako mai vua na tui me lewai. Sa qai dau vesuka na yalodra na tamata e Isireli.
7 Ni sa oti e vasagavulu na yabaki, sa tukuna o Apisalome vua na tui, "Au kerea me'u lako mada i Epironi me'u cakava mada na yalayala au a yalayala kina vei Jiova.
8 "Au sa cakava e dua na yalayala ni'u a tiko mai Kesuri e Siria ka tukuna ka vaka: 'Kevaka sa kauti Au lesu ki Jerusalemi, au na qaravi Jiova ga.'"
9 Sa tukuna vua na tui, "Lako ena vakacegu" sa tucake ka lako ki Epironi.
10 Sa vakauta na yamata vuni e Isireli taucoko ka tukuna, "Ena gauna ga o ni sa rogoca kina na davui, 'Mo ni qai tukuna, sa veiliutaki o Apisalome e Epironi!'"
11 Sa lako vata kei Apisalome e rua na drau na tamata mai Jerusalemi, era sa lako yani ena lecaika, ni ra sa sega ni kila na veika sa nakiti oti tu.
12 Sa talatala o Apisalome vei Eitofeli na kai KilaOna daunivakasala nei Tevita mai nona koro e KiloO ni se vakacaboi soro tiko. Sa tubu kaukauwa sara na i naki ca oqo, ni sa tubu me levu tikoga era sa muri Apisalome.
13 Sa lako mai vei Tevita e dua na dautukutuku ka vaka: "Na yalodra na tamata e Isireli sa tiko vei Apisalome."
14 Sa tukuna o Tevita vei ira kece na nona tamata era sa tiko vata mai Jerusalemi, "Mo ni tucake, ka me da dro yani, de, eda na qai sega ni dro rawa mai vei Apisalome. Mo ni vakatotolo, me da lako yani, de qai toboki keda vakasauri ka kauta mai na leqa vei keda, ka samuta na koro ena i seleiwau."
15 Era sa tukuna na tamata ni tui vua na tui, "Keimami sa nomuni tamata, ka sa tu vakarau tu me cakava na veika sa vakarota na neimami turaga na tui."
16 Sa lako yani na tui kei ira kece na nona vuvale. Na tui sa biuti iratou tiko ga e tini na yalewa (na watina lalai) me ratou vakatawana tiko na vale.
17 Sa lako yani na tui kei ira kecega na tamata vata kei koya, ka tu vakadua ena taudaku ni koro.
18 Era sa lako kece e matana na nona tamata, o ira na Kireci, ira kece na Peleci kei ira kece na Kiti, e ono na drau era sa muri koya mai Kaca, era sa lako ena matana na tui.
19 Na tui sa tukuna vei Itai na kai Kiti, "Na cava o sa via lako talega kina vata kei keimami? Mo lesu tale ka tiko vata na tui. O sa kaitani ka tamata vesuki mai na nomu vanua.
20 "O se qai lako mada ga mai e nanoa. Me'u cakava beka mo veiciciyaki vaka ka vaka vata kei keimami e na siga oqo, na noqu lako oqo, au sega ni kila se kivei? Mo lesu ka kauti ira tale na tacimu. Na loloma kei na dina me tiko vata kei iko."
21 O Itai sa sauma vua na tui ka vaka: "Me vaka sa bula o Jiova, ka sa bula talega na noqu turaga na tui, na veivanua kecega sa tiko kina na noqu turaga na tui, ena bula se ena mate, era na tiko talega kina na nomuni tamata."
22 Sa tukuna o Tevita vei Itai, "Lako ka takoso." O Itai na kai Kiti kei ira kecega na tamata kei ira na lalai sa tiko vata kei koya, era sa takoso.
23 Era sa tagi na veivanua kecega vakadomoi levu, ka era sa takoso kecega na tamata. Na tui talega sa takoso ena wai mai Kitironi, era sa takoso na tamata kecega me donuya na sala ki na vanua liwa.
24 O Setoki kei ira kece na livai sa tiko vata kei koya, era sa laveta tiko na "Kato ni veiyalayalati ni Kalou, ka biuta sobu na Kato ni Kalou, o Avaiata sa lako cake tikoga me yacova ni ra sa takoso kece na tamata mai na koro.
25 Sa tukuna na tui vei Setoki, "Colata lesu tale na Kato ni Kalou ki na koro. "Kevaka au sa kune loloma ena mata i Jiova, ena kauti au lesu tale mai ka vakaraitaka vei au na Kato kei na Nona i tikotiko.
26 "Kevaka sa tukuna vaka oqo, 'Au sa sega ni taleitaki iko,' sai au oqo, me cakava o koya vei au me vaka sa vinaka vua."
27 Na tui sa vosa talega vei Setoki na beta ka vaka: "O sa sega beka ni dua na dau raica na veika? Mo lesu tale ki na koro ena vakacegu kei rau na luvemu tagane ruarua, o Aimasi na luvemu kei Jonacani na luvei Avaiata.
28 "Raica, au na wawa tiko ga mai na buca ena vanua liwa, me yacova ni sa lako mai na vosa mai vei iko, me'u vakananumi kina."
29 O Setoki kei Avaiata e rau sa kauta lesu tale na Kato ni Kalou ki Jerusalemi. Sa tiko ga mai kea.
30 O Tevita sa lako ena yasana i cake ni ulunivanua ni veiolive, sa tagi vakalevu ni sa lako cake tiko, sa ubia tiko na uluna ka sa lako tiko vata kei koya, era sa ubia talega na uludra ni ra sa lako cake tiko ka era sa tagi talega.
31 Sa dua e tukuna mai vei Tevita, "O Eitofeli sa dua e bukivere tiko vata kei Apisalome." Sa masu o Tevita ka vaka: "I Jiova, au sa kerea mo ni vukica nai vakasala nei Eitofeli me ka lialia!"
32 Ni sa yaco ki na ulunivanua o Tevita, na vanua sa daulotu kina vei JiovaOsa basika talega mai o Usai na Akiti, me mai sota kei na tui, sa kabasu tu na nona i ubi ka kuvukuvu tu na uluna.
33 Sa tukuna vua o Tevita, "Kevaka o na muri au mai oqo, o sa na vakaicolacola ka vakabibitaki au.
34 "Kevaka mo sa lesu tale ki na koro ka tukuna vei Apisalome, 'Au sa na nomuni tamata na tui, me vaka au sa nona tamata na tamamuni e liu, au sa na nomuni tamata oqo.' O na vakadruka kina nai vakasala nei Eitofeli ena vukuqu.
35 "Sa sega ni tiko vei iko o Setoki kei Avaiata na bete? Na veika o na rogoca mai na vale ni tui, mo tukuna vei Setoki kei Avaiata na bete.
36 "E rau sa tiko talega mai kea oi rau na luvedrau na bete, o Aimasi, na luvei Setoki kei Jonacani na luvei Avaiata – mo vakauta mai vei rau nai tukutuku kece o na rogoca."
37 O Usai na i tokani nei Tevita sa lako yani ki Jerusalemi. Sa lako talega mai ki Jerusalemi o Apisalome.


Chapter 16

1 Ni sa lako sivia yani na dela ni ulunivanua o Tevita, sa rau sota kei Sipa na dauveiqaravi nei Mefiposeci, sa mai sotavi Tevita kei na vica na asa. Sa vakavodoki tu ena asa oqo e rua na drau nai buli madrai, dua na drau nai soso vaini, dua na drau na vuata ni vula i katakata kei na dua na saqa waini.
2 Sa tukuna na tui vei Sipa, "Na cava o sa nanuma mo cakava ena ka oqo?" "Na vuvale vakatui me ra vodo kina, na madrai kei na vuata me kedra na cauravou, kei na waini me ra gunuva o ira sa malumalumu ena vanua liwa."
3 Sa tukuna na tui, "Sa evei ga na luvena na nomu turaga?" Sa sauma o Sipa vua na nona turaga, "Sa tiko vakaidina mai Jerusalemi o koya, ni sa tukuna, 'Ena siga oqo na vuvale e Isireli ena vakatikora lesu na matanitu nei Tamaqu vei au.'"
4 Sa tukuna na tui vei Sipa, "Na veika kece sa nei Mefiposeci, sa nomu." "Ena yalomalumalumu au sa cuva vei kemuni, me'u kune loloma kina e matamuni, na noqu turaga na noqu tui!" Sa sauma yani o Sipa.
5 Ni sa lako mai ki Baurimi na tui o Tevita, sa dua na tamata mai na vuvale i Saula, na yacana o Simei na luve i Kira. Sa ruru ka veirukaki tikoga ni sa lako tiko mai.
6 Sa vakaviriki Tevita ena vatu kei ira kece talega na nona tamata. O ira kece na tamata era sa tu vata kei Tevita kei ira na tamata qaqa e nai matau kei nai mawi.
7 Ni sa ruru tiko o Simei sa tukuna tiko, "Lako mai, lako mai – tamata daugunu dra, tamata siosio, viavialevu!
8 "O Jiova sa kauta mai vei iko na dra kece ni vale i Saula, o sa mai veiliutaki tiko kina; ka sa solia kina na matanitu o Jiova vei Apisalome na luvemu. Oqo o sa vesuki ena nomu ca, baleta ni o sa tamata dau via gunu dra!"
9 O Apisai na luvei Seruia sa tukuna vua na tui, "Na cava e rukaka kina na tui na koli dukalevu oqo? Laivi au me'u lako yani ka musulaka laivi na domona!"
10 "Na cava me'u cakava vei iko na luvei Seruia? Laiva me ruru me vaka sa solia vei koya o Jiova, 'Rukaki Tevita' – O cei tale me tukuna, 'Na cava o sa cakava kina oqo?'"
11 Sa tukuna o Tevita vei Apisai kei ira kece na nona tamata, "Raica na luvequ sa lako mai na yagoqu dina sa vakasaqara na noqu bula. Qai vakacava li na kai Penijamini oqo? Laivi koya – laiva me ruru tiko; ni sa vakaroti koya tiko na Kalou.
12 "Sa rawa ni o Jiova sa vinakata me raica na noqu vakararawataki – o Jiova ga ena sauma vei au ena vinaka ena vuku ni nona ruru ca ena siga oqo."
13 Ni ra sa lako yani ena sala o Tevita kei ira na nona tamata. O Simei sa lako ena yasana ka dua, ka ruru ca tiko mai, ka viriviri tiko mai ena vatu, ka caqeta tiko mai na kuvu ni soso.
14 Na tui kei ira kece sa tiko vata kei koya era sa wawale. Era sa vakabulabulataki ira tale e keya.
15 O Apisalome kei ira kece na Isireli era sa lako mai ki Jerusalemi. Sa tiko vata kei ira o Eitofeli.
16 Sa yaco o Usaia na Akiti nai tokani nei Tevita sa lako mai vei Apisalome ka tukuna, "Me bula balavu na tui! Me bula balavu na tui!"
17 Sa tukuna mai o Apisalome vei Usaia, "O koya beka oqo na nomu veitokoni vua na wekamu voleka? Na cava o sega ni lako kina vata kei koya?"
18 Sa sauma o Usai vei Apisalome, "E sega, ocei era digitaka na Isireli au na tiko kina, au na tiko ga kina.
19 "Me kena i kuri, o cei me'u na qarava? Me'u kua ni qarava ena mata ni luvena? Me vaka ni'u sa veiqaravi ena matai tamana, ena vaka kina e matamu."
20 Sa tukuna o Apisalome vei Eitofeli, "Solia nai vakasala ena veika meda cakava."
21 Sa tukuna o Eitofeli vei Apisalome, "Lako vei iratou na watina lalai na tamamu, era sa biu tu mai me raica na vale – era na rogoca kece na Isireli ni o sa cati mai vei tamamu. Na ligadra kece sa tiko vata kei iko sa na qai kaukauwa mai."
22 Era sa qai vakaduria e dua na vale laca ena dela ni vale vei Apisalome. Sa qai dau tiko vata kina kei ira na wati tamana lalai ena matadra kece na Isireli.
23 Nai vakasala nei Eitofeli sa solia ena gauna o ya – sa vaka ga e dua sa taura mai nai vakasala mai vua na Kalou. Sa vakakina nai vakasala nei Eitofeli vei Tevita kei Apisalome.


Chapter 17

1 Sa tukuna o Eitofeli vei Apisalome, "Me'u digitaka mada e tinikarua na udolu na tagane, me'u lako ka vakasaqarai Tevita ena bogi oqo.
2 "Au na lako yani vua ni sa malumalumu ka veilecayaki ka au na cakava vua me rere. O ira kece sa tiko vua, era na veidroyaki, ka au na vakamatea ga na tui.
3 "Au na kauti ira lesu mai na tamata kece vei iko. Ni ra sa lesu kece mai na tamata oqo, vaka vo ga na tamata o sa vakasaqara, era na qai tiko vinaka kece na tamata."
4 Na vosa vaka oqo sa vinaka vei Apisalome kei ira kece na qase e Isireli.
5 Sa tukuna o Apisalome, "Me kacivi mai o Usai na Akiti, me da rogoca talega na veika me na tukuna."
6 Ni sa lako mai o Usai vei Apisalome, sa tukuna vua o Apisalome ka vaka: "Sa tukuna vaka oqo o Eitofeli, me da cakava me vaka sa tukuna o koya? Ke sega, tukuna mai me cava tale."
7 Sa tukuna o Usai vei Apisalome, "Nai vakasala e solia o Eitofeli, e sega ni veiraurau ena gauna oqo.
8 Sa tukuna tale o Usai, "Iko sa kilai tamamu kei ira na nona tamata, ni ra sa tamata qaqa ka sa dei tu ena lomadra, me vaka e dua na pera sa butakoci na luvena mai na buca; o tamamu sa tamata ni valu, ena tiko vakatikitiki ga ka sega ni via tiko vata na tamata.
9 "Sa dina ena gauna sara ga oqo, ena tiko o koya ena dua na qara vatu, se ena dua tale na vanua. Ni sa kabai mai na dua na yasana, o ira era na rogoca era na tukuna, 'Sa dua na veivakamatei levu vei ira sa muri Apisalome.'
10 "Kevaka mada ga e dua na tamata qaqa ka yalo vakalaione, ena waicala ga o koya. Ni o ira kece na Isireli era sa kila ni o Tamamu sa tamata qaqa kei ira sa tiko vata kei koya era sa tamata qaqa.
11 "Sa noqu i vakasala oqo, me ra vakasoqoni kece mai na Isireli vei iko, mai Tani ki Perisepa, me vaka na nuku ni matasawa na kedra lewelevu – ka mo lako sara ga o iko ki nai valu.
12 "Eda na lakovi koya yani ena vanua cava ga e tiko kina, eda na tosovi koya yani me vaka sa lutu na tegu ena vanua. Me vaka vei koya kei ira sa tiko vata kei koya, ena sega ni vo e dua me vaka ga e dua.
13 "Kevaka sa dro ki na dua na koro, me na qai kauta mai na dali na Isireli ki na koro o ya, ka me qai lau dre ki na uciwai na lalaga ni koro, me yacova ni sa sega ni tucake tu e dua na vatu."
14 O Apisalome kei ira kece na Isireli era sa tukuna, "Nai vakasala nei Usai sa vinaka cake mai nai vakasala nei Eitofeli." Ni sa lewa na Kalou me vakadrukai nai vakasala nei Eitofeli, ka sa vinakata talega na Kalou me sotava na leqa o Apisalome. O Usaia Sa Vakasalataki Tevita Me Dro
15 Sa tukuna o Usai vei Setoki kei Avaiata na bete, "Sa vakasalataki Apisalome vaka oqo o Eitofeli kei ira na qase e Isireli, sa vaka talega oqo na noqu i vakasala.
16 "Me tukuni vakatotolo oqo vei Tevita, 'Me kua ni moce ena bogi oqo mai na buca de ra qai tilomi kece na tui kei ira kece sa tiko vata kei koya.'"
17 O Jonacani kei Aimasi e rau sa tiko mai Eni- Rokeli, ni rau sa sega ni vinakata me rau laurai ni rau sa lako mai kina koro; e dua na vada sa dau lako mai ka tukuna vei rau nai tukutuku me tukuni vei Tevita na tui.
18 Ia, sa dua na tamata sa raici rau ka tukuna vei Apisalome, Ia, e rau sa lako yani vakatotolo. Ka lako mai ki na nona vale e dua na tamata e Baurimi, sa tiko talega na nona toevu ni wai ena buturara ka rau sa lako sobu kina.
19 Sa dua na yalewa sa ubia na gusu ni toevu oqo ka kaburaka tu e cake na sore ni sila ka sa sega ni kilai.
20 Ni ra sa lako mai na tamata i Apisalome ki na vale ni yalewa oqo ka taroga, "E vei o Aimasi kei Jonacani?" Sa tukuna na yalewa, "E rau sa lako sobu ki nai vurevure ni wai." Ni ra sa vakasaqaqara ka sega ni kunei rau, era sa lesu tale ki Jerusalemi.
21 Ni ra sa lesu yani, e rau sa lako cake mai na toevu ka lako ka tukuna vei Tevita, "Mo tucake ka takosova na wai vakatotolo, ni sa solia tiko nai vakasala o Eitofeli me baleti iko."
22 O Tevita kei ira kece na tamata sa tiko vua era sa takosova na Joritani. Ni sa rarama mai na mataka era sa takosova kece na Joritani.
23 Ni sa raica o Eitofeli ni sa sega ni vakamuri na nona i vakasala, sa vakarautaka na nona asa, sa vodoka ka lako ki nona vale ki na nona koro. Sa tuvana vinaka na nona vale, ka kunati koya vakai koya ka mate; sa la'ki buluti sara vata kei ira na qase.
24 O Tevita sa lako ki Maenaimi. O Apisalome sa lako ki na Joritani ka takoso, o koya kei ira kece na Isireli.
25 O Apisalome, sa vakaduri Amasa me liuliu ni mataivalu ka sega ni o Joape. O Amasa oqo, sa luvena e dua na tamata na yacana o Jicara e dua na Isireli o koya oqo sa moceri Avikali oti na luvei Nasa na taci Seruwaia na tinai Joape.
26 O Isireli kei Apisalome era sa mai tiko ena vanua o Kiliati.
27 Ni sa lako mai Maenaimi o Tevita, o Sobi na luve i Nasa mai Rapa (era kai Amoni), o Makiri na luvei Amieli mai Lo-Debara kei Basilai na kai Kiliati mai Rogelemi,
28 Era sa kau davodavo mai, na beseni na veleti, na witi na sila na vuata kei na bini, kei na veika eso e dau laukana,
29 "Na oni, na lewe ni manumanu, na Jisi vei Tevita kei ira na tamata sa tiko vata kei koya me ra kania. Ni ra sa tukuna, era sa malumalumu ka via kana ka via gunu ena vanua liwa."


Chapter 18

1 O Tevita sa wiliki ira na tamata sa tiko vua, ka sa lesi ira nai liuliu ni vei yaudolu kei nai liuliu ni vei yadrau.
2 Sa vakatala yani o Tevita e dua nai katolu ni tamata ena ligai Joape, e dua tale nai katolu ena ligai Apisai na luvei Seruwaia na taci Joape, kei na dua tale nai katolu ena ligai Itai na kai Kiti. Sa tukuna na tui vei ira na tamata, "au na lako vata talega kei kemuni, oi au."
3 Era sa tukuna mai na tamata, "O na sega ni lako, kevaka keimami sa na dro, era na sega ni kawaitaki keimami; se me mate e veimama vei kemuni, era na sega ni via kawaitaka. O iko ga sa tautauvata kei na tini na udolu vei keimami. O iko ga sa na vukei keimami vakalevu ena koro."
4 Sa sauma vei ira na tui, "Na veika ga sa vinaka vei kemuni, au na cakava." Sa tucake tu ena yasa ni matamata na tui, ka era sa lako e matana na yayadrau kei na ya yaudolu.
5 Na tui sa vakaroti Joape, Apisai kei Itai ka vaka: "Ena vukuqu, mo dou cakacaka vakavinaka vua na cauravou o Apisalome." Era sa rogoca na tamata kecega nai vakaro sa solia na tui ena vuku i Apisalome.
6 Era sa lako yani na tamata kecega ki nai valu ena buca vei ira na Isireli. Sa caka tiko na vala ena veikau mai Ifereimi.
7 Era sa vakadrukai na Isireli e matadra na tamata i Tevita. Sa dua na veivakamatei levu sa caka ena siga o ya ni rauta tiko e ruasagavulu na udolu era sa mate ena siga o ya.
8 Sa toso yani ki na yasa ni vanua kecega nai valu. Na veikau sa vakamatei ira vakalevu na tamata mai nai seleiwau.
9 Sa sotavi ira na tamata i Tevita o Apisalome. Sa vodo tiko ena dua na meule o Apisalome. Sa cici na meule ena vukuna ka curuma yani na vei oki vakavotona, ka sa tavesu na uluna ena dua na vunikau oqo. Sa qai lili tu e na veimama ni lomalagi kei vuravura. Sa cici tiko ga yani na meule oqo.
10 Sa raica e dua na tamata ka tukuna vei Joape ka vaka: "Au se qai raici Apisalome ni se qai lili ga ena vu ni oki vakavotona!"
11 Sa tarogi koya o Joape. "Ni o sa raici koya! Na cava ga o sega ni vakamatei koya sara kina? E dodonu sara ga me'u solia vei iko e tini na tikini siliva kei na dua na beleti."
12 Sa tukuna vei Joape na tamata, "Kevaka mada e dua na udolu na tiki ni siliva, au na sega ga ni laveta na ligaqu vua na luve ni tui, ni keimami sa rogoca tu – ni sa vakaroti kemudou na tui (Joape, Apisai, Itai) ka vaka, 'Mo dou qarauna de dua na tamata e tara na cauravou o Apisalome!'
13 "Au na qarauna, me'u kua ni cakacaka vakailasu ena vuku ni noqu bula. Ni sa sega na ka e vunitaki vua na tui, kei iko talega o na tu me veisaqasaqa kei au."
14 Sa tukuna o Joape, "Au na sega ni cakacaka vakailawaki vei iko." Sa taura e tolu na moto e ligana ka cokataka ena utoi Apisalome ni se lili tu ga e macawa ka se bula tiko, ena vu ni oki vakavotona.
15 E tini na cauravou sa dau colata nai yaragi nei Joape, e ratou sa tu wavokiti Apisalome ka vakamatea sara.
16 Sa uvuca na davui o Joape ka era sa na lesu mai na tamata ena nodra muri ira na Isireli. Ni sa tarovi ira na tamata o Joape.
17 Era sa tauri Apisalome ka viritaka na yagona ena dua na qara mai na loma ni veikau ka vakayagataka na vatu me buluti kina na yagona. Era sa dui dro na Isireli, ki na nona vale na tamata yadua.
18 O Apisalome ena nona bula taucoko, sa vakaduria talega e dua na duru i vakananumi me nona, sa tiko ena buca ni tui. Ni sa tukuna "Sa sega na luvequ tagane me maroroya na yacaqu ni vakananumi." Sa vakayacani ga vei koya na duru i vakananumi. Ena siga oqo e se vakayacani tiko ga vua nai vakananumi kei Apisalome.
19 O Aimasi na luvei Setoki sa tukuna, "Me'u cici mada ka tukuna nai tukutuku vua na tui, na nona cakava o Jiova na veisausaumi vei ira na meca."
20 Sa tukuna vua o Joape, "Mo kua ni kauta nai tukutuku e daidai, me qai kau ena dua tale na siga. Mo kua ni kauta e dua nai tukutuku baleta ni sa mate tiko na luve ni tui."
21 Sa tukuna o Joape vua na Kusaite (tamata loaloa) "Lako, tukuna vua na tui na veika o raica." Sa vakacuva na uluna vei Joape na kai Kusi oqo ka cici yani.
22 O Aimasi na luvei Setoki sa mai tukuna tale vei Joape, "Veitalia ga na veika ena yaco me'u lako vata na kai Kusi oqo." Sa tukuna o Joape, "Na cava mo cici kina na luvequ, sa sega vei iko nai tukutuku?"
23 "Veitalia ga na ka ena yaco, me'u cici ga." Sa qai tukuni vua, "Cici ga." Sa qai cici yani o Aimasi vaka ki na buca ka cici siviti koya na Kusaite.
24 Sa dabe tiko o Tevita ena veimama ni matamata e rua. Sa lako ki dela ni vale na dauyadra ka rai yani – sa raica sara ni dua na tamata sa cici duadua tiko mai.
25 Sa kaci yani na dauyadra ka tukuna vua na tui. Sa tukuna na tui, "Kevaka sa lako duadua tiko mai, sa tiko vua nai tukutuku ena gusuna." Sa totolo sara mai, ka voleka sara.
26 Sa raica tale e dua o nai vakatawa ni sa cici duadua tiko mai, ka tukuna yani vua nai vakatawa ni matamata, "Sa cici duadua tiko yani e dua tale na tamata!" Sa tukuna mai na tui, "Sa tiko talega vua nai tukutuku."
27 Sa vosa mai na i vakatawa, "Nai cicici ni matai ni tamata sa vaka ga nai cicici nei Amasi na luvei Setoki." Sa tukuna mai na tui, "Sa tamata vinaka oqori, ka sa lako vata mai nai tukutuku vinaka."
28 Sa kaci yani o Amasai vua na tui ka tukuna, "Sa vinaka kece!" sa vakacuvara na uluna ki na qele e matana na tui ka tukuna tale, "Me vakalouvinakataki o Jiova na Kalou, o Koya sa soli ira mai na tamata era sa laveta cake na ligadra me valuta na tui!"
29 Sa taro yani tui, "Sa vinaka tiko beka na cauravou o Apisalome? Sa sauma mai o Aimasi, "Ena gauna sa tala mai kina nai talai ni tui o Joape kei au na nomuni tamata, au sa raica e dua na ue levu – au sa sega ga ni kila se cava o ya."
30 Sa tukuna na tui, "Toso ka tucake tu e keri," sa vuki ka tu vakatikitiki.
31 Sa curu mai ena gauna vata o ya na Kusaite, ka sa tukuna mai na kai Kusi oqo, "Sa dua nai tukutuku vinaka, kemuni na turaga na tui! O Jiova sa sauma vei ira na via valuta na tui ena siga oqo."
32 Sa tukuna na tui vua na kai Kusi, "Sa bula tiko beka na cauravou o Apisalome?" Sa sauma mai na Kusaite oqo, "O ira kece na meca ni noqu turaga na tui, kei ira kece sa via vakamavoataki kemuni – me ra vakataki koya na cauravou oqo!"
33 Sa rarawa sara vakalevu na tui, ka sa lako cake ki na tikina tabu ena matamata, ka tagi, ka sa tukuna vakaoqo: "Na luvequ Apisalome—me'u a mate ga me kemu i sosomi! I Apisalome na luvequ, na luvequ!"


Chapter 19

1 Sa tukuni vei Joape, "Raica sa tagi ka vakaloloku tiko na tui ena vuku i Apisalome."
2 Na qaqa ena siga o ya sa vuki me siga ni vakaloloku vei ira na tamata. Ni ra sa rogoca na tamata ni sa tukuni ena siga o ya, "Sa rarawa na tui ena vuku i na luvena."
3 Era sa curu lo yani na tamata ki na koro, ni ra sa madua talega ena nodra drotaka nai valu.
4 Sa ubia na matana na tui ka tagi vakadomoi levu, "Na luvequ Apisalome! i Apisalome, na luvequ, na luvequ!"
5 Sa lako mai ki vale vua na tui o Joape ka tukuna, "E na siga oqo o sa vakayalolailaitaki ira kina na tamata, o ira sa vakabulai iko, vakabulai ira na luvemu tagane, luvemu yalewa, na nodra bula na watimu lelevu kei na watimu lalai,
6 "O ya, o sa lomana kina na kemu meca ka cati ira kina na nomu i tokani. Ena siga oqo, o sa vakaraitaka kina, ni o sa sega ni doka na turaga se na bobula; ni siga oqo au sa kila, kevaka ea bula o Apisalome, keimami sa mate kece oqo e daidai, o ya ena qai vinaka vei iko.
7 "Mo tucake ka lako yani ka vosataka na veivakacegui vei ira na tamata. Au sa cavuta oqo ena yaca i Jiova, kevaka o na sega ni lako yani, ena sega ni dua e tiko vata kei iko ena bogi oqo. O ya ena ca sara vei iko mai na veika caca kece sa tarai iko oti mai na nomu cauravou me yacova mai oqo."
8 Sa tucake na tui ka la'ki dabe tiko ena matamata. Sa tukuni yani vei ira na tamata, "Na tui sa dabe tiko mai na matamata." Era sa lako mai na tamata kecega ena mata ni tui. Ni ra sa dui dro kecega na Isireli.
9 O ira na tamata kecega mai na veiyavusa kecega e Isireli era sa tukuna, "Na tui sa vakabulai keda mai na ligadra na meca, sa vakabulai keda mai na ligadra na Filisitia. Oqo, e sa dro mai na vanua ena vuku i Apisalome.
10 "O Apisalome, o koya eda lumuta vei keda, sa mate ena i valu. Oqo, na cava o ni sega ni via tukuna tiko kina na kena kau lesu mai na tui?"
11 Sa talatala na Tui o Tevita vei Setoki kei Avaiata na bete ka vaka: "Drau vosa vei ira na qase e Juata ka tukuna, 'Na cava e bera kina na nomuni kauta lesu mai na tui ki nona vale, sa lako mai na nodra vosa kece na Isireli ki vua na tui, ki na nona vale sara ga?
12 'O ni sa taciqu, e da sa sui vata ka lewe vata, Na cava o ni sai otioti kina ni tamata mo ni kauta lesu mai kina na tui?'
13 "Tukuna vei Amasa, 'Daru sa sega beka ni sui vata ka lewe vata? Me cakava vei au na Kalou ka vakalevu kevaka o sa sega ni liuliu ni mataivalu e mataqu tikotikoga mei sosomi kei Joape.'"
14 Sa vesuka na yalodra kecega e Juta, me vaka na yalona e dua ga na tamata, ka era sa vakauta kina nai tukutuku oqo vua na tui: "Mo lesu mai, o iko kei ira kece na nomu tamata!"
15 Sa lesu mai na tui ka lako mai ki na Joritani. Era sa lako mai na Juta e Kilikali me ra lako yani ka sotava na tui, ka kauti koya takoso mai na Joritani.
16 O Simei na luvei Qera na Penijamini mai Baurimi sa lako vakatotolo mai kei ir a na Juta me mai sotavi Tevita na Tui.
17 Sa tiko vata kei koya e dua na udolu na Penijamini kei Sipa na dauveiqaravi ena vale nei Saula kei ira na lewe tinikalima na luvena tagane kei ira na ruasagavulu na dauveiqaravi. Era sa takosova yani na Joritani e matana na tui.
18 Sa lako ki tai kadua na waqa me la'ki vakavodoka mai na tui kei na nona vuvale, ka me cakava kina na veika e vinakata. Sa cuva ena mata ni tui o Simei na luvei Qera ni sa takosova na Joritani.
19 Sa tukuna vua na tui, "Me kua ni cakava vei au na noqu turaga e dua na ka ca, se me nanuma tale na cala ni nomuni tamata ena siga sa biuti Jerusalemi kina na tui na noqu turaga, ka me kua tale ni kauta ki yalona.
20 "Oi au na nomuni tamata, au sa kila ni'u sa i valavala ca. Sai au oqo nai matai mai na vuvale kece i Joseva ena siga oqo – me lako mai ka sota kei na tui na noqu turaga."
21 O Apisai na luvei Seruia sa tukuna, "E sega beka ni dodonu me vakamatei o Simei ena vuku ni ka oqo, baleta ni rukaka na i lumuti i Jiova."
22 Sa tukuna mai o Tevita, "Na cava me'u cakava vei iko na luvei Seruia, mo yaco kina mo meca vei au ena siga oqo? me vakamatei e dua e Isireli ena siga oqo? Ni'u sa sega ni kila ni'u sa tui e Isireli e daidai?"
23 Oqo sa tukuna kina na tui vei Simei, "O na sega ni mate." Sa yalayala vua, na tui.
24 Sa lako sobu mai o Mefiposeci me rau mai sota kei na tui. Sa sega ni kauwaitaka na duka ni yavana, se me kotiva na nona sominiwai, se me savata na nona i sulu, mai na siga sa lako kina na tui ka yacova na nona lesu tale mai ena vakacegu.
25 Sa qai yaco, ni sa lako mai ki Jerusalemi me sota kei na tui – sa tukuna vua, na tui, "Na cava o sega ni via lako kina vata kei au, Mefiposeci?"
26 Sa sauma mai, "Noqu turaga na tui, era sa vakaisini au na noqu tamata. Ni ra sa tukuna na nomuni tamata, 'Au na vakarautaka e dua na asa vei au ga, me'u vodo kina ka lako vua na tui.' Ni sa malumalumu na nomuni tamata.
27 "Sa lasutaka ka vakacacana na nomuni tamata vua na tui, ia na noqu turaga na tui sa vaka na Agilosi ni Kalou. O koya oqo mo ni cakava ga na ka sa vinaka e matamuni.
28 "Ni o ira kece na tamata ena vale nei tamaqu era sa mate kece tu ena mata ni noqu turaga na tui. Io, o sa vakatara vei ira na nomu tamata me ra kana mai na nomu teveli. Na dodonu cava ese tu vei au me'u tagica tale kina na tui?"
29 Sa tukuna vua na tui, "Na cava o se tukuna tikoga kina na ka oqori? Au sa tukuna, 'O iko kei Siba drau sa wasea na vanua.'"
30 Sa qai sauma o Mefiposeci vua na tui, "Raica, laivi koya me taura kece, me vaka ni sa lesu tale mai na noqu turaga na tui ki na nona vale."
31 O Basilai na kai Kiliati sa lako sobu mai Roqelimi ka takosova na Joritani vata kei na tui, me yadravi yani vaka ki na Joritani.
32 Sa tamata matua sara o Basilai ka sa yabaki walusagavulu. Sa vakarautaka vei Tevita na tui na veika kece e gadrevi ena nona tiko mai Maenaimi, ni sa tamata vutuniyau.
33 Sa tukuna na tui vei Basilai, "Mo lako vata mai kei au, ni'u na vakarautaka vei iko na veika kece, ena nomu tiko e Jerusalemi."
34 Sa sauma o Basilai vua na tui, "Sa vo tiko e vica na noqu gauna ni bula me'u lako cake vata kina kei na tui ki Jerusalemi?
35 "Au sa yabaki walusagavulu e daidai, e rawa beka ni'u se kila tiko na vinaka kei na ca? E rawa beka vua na nomuni tamata me tovolea ka kila na ka au kania kei na ka au gunuva? E rawa beka ni'u rogoca tale na domo ni nodra lagalaga sere na tagane kei na yalewa? Na cava beka me veivakabibitaki tale kina na nomuni tamata vua na noqu turaga na tui?
36 "Na nomuni tamata e na lakova vakalailai ga na Joritani vata kei na tui. Na cava me saumi au kina vaka oqo na tui?
37 "Au kerea, mo ni vakasuka lesu na nomuni tamata, me'u la'ki mate ga e noqu koro, ka buluti ena i bulubulu nei tamaqu kei tinaqu. Ia, oqo na noqu tamata o Jimaema; me takoso o koya vata kei na noqu turaga na tui, mo ni cakava vua na ka ga e vinaka vei kemuni."
38 Sa sauma na tui, "Jimaema sa na takoso vata kei au, au na cakava ga vua na ka e vinaka vei iko. Na veika o na vinakata mai vei au, ena caka yani vei iko."
39 Era sa qai takoso kece na tamata. Ni sa takoso oti na tui, sa qai reguci Basilai na tui ka vakalouvinakataki koya, ka sa lesu tale ki na nona vanua.
40 Sa lako yani ki Kilikali na tui ka sa lako vata kei koya o Jimaema. Era sa muria yani na tui na Juta kecega, kei na veimama ni Isireli.
41 Era sa qai lako mai vua na tui o ira kece na tagane e Isireli ka tukuna vua na tui, "Na cava era sa butakoci iko kina na taci keimami na Juta, ka kauta mai na tui kei na nona vuvale kei ira kece na tamata i Tevita ka takosova na Joritani?"
42 O ira kece na Juta era sa sauma vei ira na Isireli, "Baleta ni sa wekai keimami voleka na tui, Na cava o ni sa cudru kina ena tikina oqo? Keimami sa kania beka na nona i votavota na tui? Se e sa solia beka vei keimami e dua nai solisoli?"
43 Era sa sauma yani na Isireli vei ira na Juta ka vaka: "Sa neimami e tini nai votavota vua na tui; sa levu kina na neimami dodonu vei Tevita mai vei kemuni. Na cava o ni sa sega kina ni nanumi keimami O e sega beka ni keimami a tukuna nai matai ni vakasala me kau lesu mai na tui?" Ia, sa gata cake na nodra vosa na Juta, mai na nodra vosa na Isireli.


Chapter 20

1 Sa qai yaco e dua na vukitani, na yacana o Sipa na luvei Bikiri na Penijamini. Sa uvuca o koya na davui ka tukuna, "Sa sega na neimami tikina vei Tevita, se, me dua na neimami votavota mai vua na luvei Jese; Na tamata kece ki na nodra dui vale, kemuni na Isireli!"
2 Era sa biuti Tevita kece na Isireli, era sa muri Sipa na luvei Bikiri. O ira kece na luvei Juta mai na Joritani ki Jerusalemi era sa tiko dei vua na nodra tui.
3 Sa lako mai ki nona vale e Jerusalemi o Tevita. Sa tauri tale na tini na yalewa, na watina lalai era a vakatawana tiko na vale, sa biuti ira tiko vakatikitiki ka dau tokoni ira, ia, sa sega ga ni moceri ira. Era sa biu tiko ga vakatikitiki me yacova na siga ni nodra mate, ka sa yada tiko.
4 Sa tukuna sara na tui vei Amasa, "Vakasoqoni ira mai na tamata e Juta vei au ena tolu na siga, mo tiko talega o iko."
5 Sa lako o Amasa me vakasoqoni ira mai na Juta. Sa bera vakalevu mai na gauna sa yalataka o Tevita.
6 Sa tukuna o Tevita vei Apisai, "Raica ena caka ca vakalevu sara o Sipa na luvei Bikiri vei keda mai vei Apisalome. Tauri ira na tamata ni nomu turaga ka cici muri koya - de na la'ki kunea e dua na nona koronivalu ka dro rawa mai vei keda."
7 O ira na tamata nei Joape kei Jerica na Pelice kei ira kece na tamata qaqa era sa muri koya. Era sa lako tani e Jerusalemi ka cici muri Sipa na luvei Bikiri.
8 Ni ra sa yaco ki na vatu levu e Kipioni, sa lako mai o Amasa e matadra. O Joape sa vakaisulu tu vakaivalu, ka sa vesu vinaka tu e tolona na nona i seleiwau. Ni sa lako yani sa lutu na nona i sele.
9 Sa tukuna yani o Joape vei Amasa, "Taciqu o bulabula vinaka tiko?" Sa tarai Amasa yani o Joape ena ligana i matau ka reguci koya.
10 Sa sega ni raica o Amasa nai sele ena liga i Joape. Sa suaki Amasa e ketena ka sa kasabura mai na nona wawa ki na qele; sa sega ni lauta tale. Sa qai mate. O Joape kei Apisai na tacina, e rau sa cici muri Sipa na luvei Bikiri.
11 E dua vei ira na tamata nei Joape sa tu volekati Amasa, sa tukuna mai, "O cei ga sa via muri Joape kei koya sa via muri Tevita me muri Joape!"
12 Sa davo dradra tu o Amasa ena salatu, ni sa raica na tamata ni ra sa tu vakadua kece, sa qai dreti Amasa vakatikitiki mai na salatu ka ubi koya ena dua nai sulu ni sa raica ni ra sa tu vakadua kece na tamata.
13 Ni sa kau vakatikitiki mai na salatu – era sa muri Joape kece ena nodra cici muri Sipa na luvei Bikiri.
14 Sa lako curumi Isireli kece yani ki Epeli kei Beci Maeka, kei ira na Beraite. Era sa soqoni vata mai ka cici muri Sipa.
15 Era sa mai tuva vinaka e Epeli, e Beci Maeka ena vukui Sipa. Era sa tuva me basuka na bai ni koro. o ira kece na tamata vata kei Joape era sa tu, me basuka sobu na lalaga ni koro.
16 E dua na yalewa yalomatua sa kau mai, "Rogoca, rogoca, tukuna vei Joape 'Mo lako voleka mai me'u vosa vua.'"
17 Ni sa lako voleka vua na yalewa, sa tukuna vua na yalewa, "O iko o Joape?" sa sauma yani, "Sai au oqo." Sa tukuna sara yani na yalewa, "Mo rogoca na vosa ni nomu vada." Sa sauma yani o Joape, "Au sa vakarorogo."
18 "Era sa dau tukuna e liu, na gauna makawa, 'Me ra dau taro i vakasala e Epeli,' me dau oti kina na veileti.
19 "O au e dua na dauveivakacegui ka tamata dina e Isireli. O sa vakasaqara mo vakarusa e dua na koro kei na dua na tina e Isireli. Na cava o sa via tiloma kina e dua nai votavota i Jiova?"
20 Sa sauma yani o Joape ka vaka: "Me kua sara vei au, me kua sara, ni'u tiloma se vakarusa!
21 "Sa sega ni koya oqori, e dua na tamata mai na veiulunivanua e Ifereimi, o Sipa na luvei Bikiri na yacana, sa laveta na ligana vua na tui, o Tevita. Me soli ga mai o koya, au na qai lako tani e na koro." Sa tukuna mai na yalewa vei Joape, "Vakaraica, na uluna ena viritaki sobu mai vei iko ena bai ni koro."
22 Na yalewa, ena nona yalomatua taucoko, sa lako vei ira kece na tamata. Era sa musuka na ului Sipa na luvei Bikiri, ka viritaka yani vei Joape. Sa uvuca na davui o Joape ka era sa lesu yani, na tamata yadua ki na nodra i tikotiko. Sa lesu tale o Joape vua na tui, ki Jerusalemi.
23 O Joape sai liuliu ni mataivalu kece e Isireli; o Benaia, sai liuliu e Jereci kei Peleci;
24 O Adorami sa dauniyau levu e Isireli; o Josefati na luvei Ailudi sa vunivola levu e Isireli;
25 O Seva sa vunilawa levu, o Setoki kei Avaiata e rau sa bete;
26 Kei Ira na Jeraite sa liuliu levu ena ruku i Tevita na tui.


Chapter 21

1 Sa dua na lauqa levu ena gauna nei Tevita me tolu na yabaki veitarataravi, ka sa vakatataro o Tevita vei Jiova. Ka sa sauma mai o Jiova, "Oqo sa baleti Saula kei na nona vale daugunu dra, kei na nodra vakamatei na kai Kipioni."
2 Na tui sa kacivi ira mai na kai Kipioni ka vosa vei ira. O ira na kai Kipioni era sa sega ni luvei Isireli; era sa lako mai vei ira na Amoraiti; era sa yalayala oti na Isireli ena nodra maroroi, ia, o Saula sa vinaka me vakamatei ira, ena nona lomakatakata me baleti ira na luvei Isireli kei Juta.
3 Sa tukuna kina o Tevita vei ira na kai Kipioni, "Na cava me'u cakava vei kemuni? Na cava me'u vakayagataka ena veisorovaki, me rawa kina ni o ni vakalouvinakataka kina nai votavota i Jiova?"
4 Era sa tukuna vua na kai Kipioni, "Me kua ni dua na neimami siliva se koula mai vei Saula se mai na nona vale, se me vakamatei e dua na Isireli ena vukui keimami." Sa tukuna yani na tui, "Na veika ga o ni sa tukuna, au na cakava vei kemuni."
5 Era sa sauma tale mai na kai Kipioni vua na tui, "Me vaka vua na tamata sa via tilomi keimami me vakayali keimami mai na nodra vanua na Isireli,
6 "Me vitu na tagane mai na nona kawa me soli mai vei keimami; me keimami vakaliligi ira (kunati) ena mata ni Kalou o Jiova e Kipea vei Saula, o koya sa digitaka na Kalou." Sa tukuna na tui, "Au na soli ira."
7 Na tui sa vakavoci Mefiposeci na luvei Jonacani na luvei Saula, baleta na bubului i Jiova sa baleti rau, baleti Tevita kei Jonacani na luvei Saula.
8 Na tui sa kauti Amoni kei Mefiposeci oi rau na luvei Risipa na luvena yalewa o Aia, o koya sa vakasucuma vei Saula kei na lima na luvei Mikeli na luvei Saula yalewa sa vakatubura vei Adreli na luvei Basilai na kai Meolati;
9 Ka sa solia yani ena ligadra na kai Kipioni, ka era sa vakaliligi ka kunati ena mata i Jiova. Era sa mate kece na lewe vitu oqo ena siga ni tatamusuki, ena i matai ni siga ni tekivu na tamusuki sila.
10 O Risipa na luvei Aia yalewa sa taura nai sulu taga ka tevuka ena dela ni vatu vei koya, mai nai tekitekivu ni tatamusuki me yacova ni sa tau mai lomalagi na uca. Sa sega ni vakatara o koya me ro kina na manumanu vuka ena siga, se, me butuka na manumanu ni vanua ena bogi.
11 Sa tukuni vei Tevita na ka sa cakava o Risipa na luvei Aia na wati Saula lailai.
12 Sa lako o Tevita ka taura na sui nei Saula kei na sui nei Jonacani na luvena, mai vei ira na kai Jabesi e Kiliati o ira a butakoca yani mai na sala e Beci Sani, na vanua era sa vakaliligi rau kina na kai Filisitia, ni oti na nodra vakamatei Saula mai Kiliboa.
13 Sa qai kauta cake mai na suidrau o Saula kei Jonacani na luvena mai kea; era sa soqona mai na suidra kece na sa kukunataki oti mai kea.
14 Era sa buluta na sui nei Saula kei Jonacani na luvena mai kea ena vanua o Penijamini e Sela, ena i bulubulu nei Kisi na tamana. Era sa vakayacora kecega nai vakaro ni tui. Ni sa oti oqo, sa rogoca na Kalou na masu ena vuku ni vanua. Era Sa Vakarusai Na Tuwawa Ni Filisitia
15 Ni ra sa tekivu me vala tale na Filisitia kei ira na Isireli, o Tevita kei ira na nona tamata era sa lako sobu ka vala kei ira na Filisitia; sa malumalumu tiko ga mai o Tevita.
16 O Bisibi-Benobo, e dua vei ira na luve ni tuwawa, na bibi ni nona ulutoa ni moto varasa e tinikarua na paodi (bibi). Sa tiko talega vua e dua nai seleiwau vou, luvei Seruia, sa mai vukei Tevita, ka vakamatea na kai Filisitia. Era sa mai yalayala vei Tevita na nona tamata ka tukuna, "O na sega tale ni lako vata kei keimami ki nai valu, de o na bokoca na cina e Isireli."
17 Sa qai yaco me dua tale nai valu vata kei ira na Filisitia e Kobi. O Sibekai na kai Usacati sa vakamatei Safe, e dua vei ira na luve ni tuwawa.
18 Sa dua tale nai valu e Kobi vata kei ira na Filisitia; o Elianani na luvei Jaeve-Orekimi na kai Peceliema sa vakamatea na taci Koliaci na kai Kaca, na tolo ni nona moto sa vaka na kau ni talitali.
19 Sa dua tale nai valu mai Kaca, sa tiko kina e dua na tamata levu sara, sa ono na nona i qaqalo ni ligana ruarua, ka ono talega nai qaqalo ni yavana ruarua, e ruasagavulu ka va kece, sa sucu mai vei ira na tuwawa.
20 Ni sa via veicoqacoqa kei ira na Isireli, o Jonacani na luvei Simea na taci Tevita, sa vakamatei koya.
21 O iratou na tuwawa lewe va oqo, era sa sucu mai vei ira na tuwawa mai Kaca, ia, era sa vakabalei ga ena liga i Tevita kei na ligadra na tamata i Tevita.


Chapter 22

1 Sa tukuna o Tevita vei Jiova na veivosa ni nona sere – ena siga sa vei sereki kina o Jiova mai na ligadra na meca, kei na ligai Saula.
2 Ka sa tukuna: "O Jiova na noqu Uluvatu, na noqu i Drodro kei na noqu dauniveisereki;
3 Na Kalou ni noqu qaqa – O Koya ga au sa nuidei tiko kina, na noqu i sasabai kei na Davui ni noqu vakabulai, Na noqu koro kaukauwa Na noqu i drodro; Na noqu i vakabula, O ni sa vakabulai au mai na ca.
4 Au na kacivi Jiova –
5 "Ni sa lako sivi au na ua ni mate, Na ualuvu ni vakavuravura sa vakarerei au;
6 Na rarawa kei eli sa vakavolivoliti au Nai cori kei mate sa bolei au.
7 Ena noqu veilecayaki, Au a kacivi Jiova, Au tagi vua na noqu Kalou, Sa rogoca na domoqu mai na vale ni soro Ka sa curu ki daligana na noqu tagi.
8 "Sa yavavala na vuravura ka uneune; Na yavu kei Lomalagi sa toso ka yavavala Baleta ni sa cudru na Kalou.
9 Na kubou sa lako cake mai ucuna, Kei na bukawaqa kana voli sa lako mai Gusuna; Era sa kama kina na qilaiso.
10 Sa vakacuva na lomalagi, ka lako sobu mai, Sa tiko e ruku ni yavana na butobuto.
11 Sa vodoka na Jerupi ka vuka; Sa laurai ena taba ni cagi.
12 Sa cakava na butobuto me tu vakavolivoliti Koya Na wai loaloa ki na o butobuto ni lomalagi.
13 Mai nai serau sa tu e matana sa vakacaudrevi na qilaiso waqa.
14 "O Jiova sa kurukuru mai lomalagi Kei Koya sa Cecere sara sa vakarogoya mai na domona.
15 Sa tala yani na gasau ni dakai titi ka vakatolosevi ira Sa kasere mai na yaseyase ka sa vakayali ira.
16 Sa qai laukune mai na tui ni wasawasa Na yavu kei vuravura sa laukune ena veivunauci i Jiova, ka na kaukauwa ni i cegu ni ucuna.
17 "Sa veitalai mai cake ka sa tauri au, Sa kauti au tani mai na wai e levu tu.
18 Sa vakabulai au mai na kequ meca kaukauwa, mai vei ira sa cati au; Ni ra sa rui kaukauwa vei au.
19 Era sa veicoqacoqa mai vei au ena siga ni noqu rarawa. Ia, o Jiova sa noqu i sasabai.
20 O Koya talega sa kauti au mai ki na vanua rabailevu; sa vakagalalataki au, baleta ni sa rui taleitaki au.
21 Sa saumi au o Jiova, me vaka na noqu yalododonu; me vaka ga na savasava ni ligaqu Sa saumi au kina o Koya.
22 Ni'u sa maroroya na sala i Jiova, ka, au sa sega ni lako tani vakaca mai vua na noqu Kalou.
23 Ni sa tu ga e mataqu na Nona lewa kecega; me vaka na Nona i lesilesi, au sa sega ni lako tani mai kina.
24 Au sa sega talega ni cala e Matana; Au sa maroroi au kina mai noqu cala.
25 Oqo, sa saumi au kina o Jiova me vaka na noqu yalododonu, me vaka na noqu savasava e Matana.
26 "Ena yalololoma, o ni na vakatakilai Kemuni ena yalololoma, vua na tamata sega ni cala, O ni na vakatakilai Kemuni ena sega ni cala;
27 Ena yalosavasava – o ni na vakatakilai Kemuni ena yalosavasava, vei ira sa cala, o ni na vakaraitaka ni o ni na veivorati.
28 O ni na vakabula na yalomalumalumu; Ia, na matamuni sa tiko ga vei ira na dokadoka, Mo ni dreti ira sobu.
29 "O ni sa noqu cina Jiova, o Jiova ga ena vakararamataka na noqu butobuto.
30 Mai vei kemuni ga, sa rawa ni'u ciciva yani e dua na mataivalu; mai vua ga na noqu Kalou, au rawa ni ladeva kina na bai lalaga levu.
31 Na Kalou, sa taucoko na Nona i valavala; Sa vakadinadinataki na Nona vosa; Sai sasabai o Koya vei ira sa vakararavi vua.
32 "O cei na Kalou? O Jiova duadua ga O cei na Uluvatu?, O Jiova duadua ga
33 Na Kalou, sa noqu kaukauwa kei na noqu qaqa, sa cakava me taucoko na noqu i valavala.
34 Sa cakava na yavaqu me vaka na yava ni dia, Ka sa vakatikori au ena veitikina cecere.
35 Sa vakavulica na ligaqu me vala, sa rawa kina vua na ligaqu me loveca na veqa ni dakai varasa.
36 "O ni sa solia talega vei au na i ubi ni nomuni veivakabulai, kei na nomuni yalovinaka sa cakava me'u cecere.
37 O ni sa vakalevutaka na noqu sala e yavaqu – me kua ni tidara kina na yavaqu.
38 "Au a cicivi ira na kequ meca ka vakarusai ira; Au sa sega ni lesu tale me yacova ni ra sa vakarusai oti kece.
39 Au sa vakarusai ira ka vakamavoataki ira, Era sa sega ni tucake tale; era sa bale kece ena ruku ni yavaqu.
40 Ni o ni sa vakaiyaragitaki au ena kaukauwa ni vala; O ni sa vakamalumalumutaki ira na kequ meca ena vukuqu.
41 O ni sa solia talega vei au na domodra na kequ meca, Au sa vakarusai ira kina sa cati au.
42 Era sa rai yani, sa sega e dua me vakabulai; vei Jiova mada ga, Sa sega ni sauma mai vei ira ena dua na ka.
43 Au sa qai natuki ira me vaka na kuvu ni soso, Au sa butubutuki ira me vaka na soso ni gaunisala, ka au qai ceburaki ira yani.
44 "O ni sa sereki au mai na nodra gugu ca na noqu tamata. O ni sa maroroi au me vaka nai liuliu ni dua na vanua. O ira na tamata au sega ni kila era na mai qaravi au.
45 Era sa vakarorogo vei au na kai tani; Ni ra sa rogoca ga, era sa talairawarawa vei au.
46 Era sa yali yani na kai tani, Era sa lako mai ena rere levu mai na nodra i vunivuni.
47 "Sa bula o Jiova me vakalouvinakataki na noqu Uluvatu! me vakacerecerei o Jiova Na Uluvatu ni noqu vakabulai!
48 Na Kalou ga sa sauma oqo vei au, o Koya ga sa vakamalumalumutaka na tamata ena rukuqu;
49 Sa vakabulai au mai vei ira Na kequ meca o ni sa laveti au cake mai vei ira na kequ meca. O ni sa vakabulai au mai vei ira na tamata vakarau kaukauwa.
50 Oqo, au na vakavinavinaka kina vei kemuni, I Jiova ena kedra maliwa na matanitu tani. Au na vakacerecerea na yacamuni.
51 "O Koya sa vale cecere ni veivakabulai vei koya na Nona tui, ka sa vakaraitaka na Nona yalololoma vua na Nona lumuti. Vei Tevita kei na nona kawa me sega ni mudu."


Chapter 23


2 Samuela 23 1 Oqo nai otioti ni vosa nei Tevita, ka sa vaka: sa tukuna o Tevita na luvei Jese, na tamata sa vakatuburi cake, nai lumuti ni Kalou i Jekope, na daunisame kamikamica e Isireli:
2 "Na yalo ni Kalou sa vosa vei au, ka sa tiko e yamequ na nona vosa.
3 Na Kalou ni Isireli sa tukuna mai, sa vosa vei au na Uluvatu ni Isireli: 'O Koya sa vakatulewa vei ira na tamata, me dodonu, ka veiliutaki ena rerevaka na Kalou.
4 E dodonu me vaka na rarama ni mataka ni se qai cadra mai na matanisiga, na mataka e sega na kena o, me vaka na buroro mai ni veico era cacalivaliva mai ni se qai tauca oti na uca.'
5 "E dina ni sega ni vakakina na noqu vale vei Jiova, sa cakava vei au e dua na veiyalayalati e sega ni mudu, sa vakarautaki ena veika kecega me tudei, ni oqo na noqu vakabulai kei na noqu gagadre; ena sega beka ni na vakatubura o Koya?
6 O ira kece na gone ni talaidredre, era na vaka na voto ni kau sa musuki tani, baleta ni ra sa na sega ni tuberi rawa ena liga.
7 Ia, na tamata ena tarai ira, e dodonu me tiko e ligana na kaukamea, na kaukamea ni tolo ni moto, me ra vakamai kece sara ena bukawaqa ena vanua era dui tu kina."
8 Oqo na yacadra na tamata qaqa era sa tiko kei Tevita: O Josebi-Basebeci na Takamoni, na nodra i liuliu nai liuliu – sa yacana talega o Adina na Eseni, baleta ni sa vakamatea e walu na drau na tamata ena dua ga na gauna.
9 Ai karua o Iliesa na luvei Dodo na Aoite, e dua vei iratou na lewe tolu vata kei Tevita, e ratou sa bolei ira na Filisitia ni ra sa lako tiko mai me vala – Ni ra sa via dro tiko na Isireli.
10 Sa tucake ka valuti ira na Filisitia me yacova ni sa malumalumu mai na ligana, ia sa taura matua tikoga nai seleiwau. Sa vakavuna e dua na qaqa levu ena siga o ya – era sa lesu mai na tamata ka taura ga vakaveitalia na ka era via taura.
11 Sa tarava yani o Sama na luvei Aki na Araraite. Era sa tuva mai na Filisitia ena dua na vanua sa sinai kina na bini. Era sa dro na Isireli mai vei ira na Filisitia.
12 Ia, o Sama sa tuvakadua ena loma ni veiwere (bini), ka tataqomaki, ka vakamatei ira na Filisitia. Sa kauta mai kina o Jiova e dua na qaqa levu.
13 E tolu vei ira na tolusagavulu na i liuliu sa lako sobu ki na tatamusuki ka lako mai vei Tevita ena qara vatu mai Etulama. Era sa wawa tiko na Filisitia ena Buca mai Refaimi.
14 Sa tiko o Tevita ena vanua cecere, kei ira na Filisitia e Peceliema.
15 Sa tukuna o Tevita, "Me dua mada ga e solia vei au na wai mai Peceliema me'u gunu kina, mai na matamata ni koro!"
16 E ratou sa lako na tolu na tamata qaqa oqo ka basuka yani na nodra i tikotiko na Filisitia – takiva na wai mai Peceliema, mai na matamata ka kauta mai vei Tevita. Sa sega ni gunuva, ia, sa sova yani vua na Kalou o Jiova.
17 Sa tukuna kina, "Me kua sara vei au Jiova, me'u cakava na ka oqo! sa sega beka ni oqo, na nodratou dra na tamata e ratou sa sega ni kauwaitaka na nodratou bula?" Sa sega ni via gunuva o Tevita. Oqo na ka e ratou sa cakava na tamata qaqa oqo.
18 O Apisai na taci Joape na luvei Seruia sa nodratou i liuliu e tolu tale. Sa laveta na ligana vei ira e tolu na drau na tamata ka vakamatei ira, ka sa liu kina na yacana mai vei iratou na lewe tolu oqo.
19 Sa sega beka ni dokai cake vei iratou na lewe tolu oqo? Oqo sa nodratou i liuliu kina o koya. Ia, sa sega ga ni yacovi iratou nai matai ni tolu.
20 O Penaia na luvei Joata, na luve ni qaqa mai Kabasili – o koya sa cakava e levu na veika lelevu. Sa vakamatei rau e rua na tamata qaqa me vaka na laione mai Moape. Sa lako sobu ka vakamatea e dua dina na laione ena loma ni dua na qara, ena dua na siga batabata sara.
21 Sa vakamatea talega e dua na kai Ijipita, e tamata qaqa. Sa tiko e ligana na kai Ijipita e dua na moto – sa lako yani o Penaia vata kei na dua na i titoko. E rau sa vei mulomulo kei na kai Ijipita, ka sa taura na moto mai ligana, ka vakamatea na kai Ijipita oqo ena nona moto ga.
22 Na ka oqo sa cakava o Penaia na luvei Joata ka sa liu kina vei ira na tamata qaqa oqo.
23 Sa tamata dokai sara vei ira na tolusagavulu na tamata qaqa oqo. Sa sega ga ni yacova yani na i matai ni tolu. Sa digitaki koya o Tevita mei liuliu ni nona mata yadra.
24 O Aseli na taci Joape, sa dua vei ira na tolusagavulu. O Ecanani na luvei Dodo mai Peceliema,
25 O Sama na Arotaite, O Elika na Arotaite,
26 O Elesi na Palataite, O ira na luvei Ikesi na Tekoite,
27 O Apiesa na Anacoci, O Mebunai na Asuaite,
28 O Salimoni na Aoaite, O Maerai na Nefofate,
29 O Elepi na luvei Baena na Nefofate, O Itai na luvei Ribai mai Kipea vei ira na luvei Penijamini,
30 O Penaia na Piratonaite, O Idai mai na veimataniwai mai Qaesi,
31 O Abi-Aliboni na Abataite, O Asimaveci na Baumaite,
32 O Eliaba na Saelibone (mai vei ira na luvei Jaseni) Jonacani,
33 O Sama na Araraite, O Aiame na luvei Sarari na Araraite,
34 O Alifalate na luvei Asabai na luvei Maekataite, O Eliame na luvei Aitofeli na Kilioni.
35 O Esarai na kai Kameli, O Paerai na kai Abi,
36 O Ikali na luvei Nacani mai Soba, O Bani na Kata,
37 O Seleki na Amoni, O Naerai na Biroce (na daucola yaragi nei Joape na luvei Seruia),
38 O ira na Iceraite, O Karebi na Iceraite,
39 Kei Uraia na Itaiti – Era lewe tolusagavulu ka vitu kece.

Chapter 24

1 Sa tubu na cudru i Jiova vei Isireli ka sa vakayavalati Tevita me tukuna vei ira ka vaka: "Ni lako ka wiliki Isireli kei Juta."
2 Sa tukuna na tui vei Joape nai liuliu ni mataivalu sa tiko vua, "Mo lako yani ki na yavusa taucoko e Isireli mai Tani ki Perisepa ka wiliki ira na tamata me'u kila kina na kedra i wiliwili."
3 Sa tukuna o Joape vua na tui, "Me vakalevutaka o Jiova na Kalou me yayadrau na tamata mai na kena e liu, ka me raica talega na tui e matana. Na cava beka e vinakata kina na tui na ka oqo?"
4 Ia, sa vakayacori ga na nona vosa na tui. O Joape kei ira na kavetani ni mataivalu era sa lako yani mai na matana na tui me wiliki ira na Isireli.
5 Era sa takosova na Joritani ka tiko e Eroari ena yasana i matau ni koro ena loma ni vanua e Kata vaka ki Jasa.
6 Era sa lako yani ki Kiliati ki Tatimi Odisi; era sa lako yani ki Tani-Jani ka gole sara ki Saitoni,
7 Era sa gole sara yani kina koro ni valu mai Taia, ki na nodra koro kece na Iraiti kei ira na kai Kenani. Era sa lako sobu sara ki na ceva i Juta ki Perisepa sara.
8 Era sa lakova yani na vanua taucoko ka lako mai ki Jerusalemi, ni sa oti e ciwa na vula ka ruasagavulu na siga.
9 Sa solia o Joape nai wiliwili ni tamata vua na tui. O Isireli e walu na drau na udolu na tamata qaqa ka tauri i seleiwau, kei Juta e lima na drau na udolu na tagane.
10 Sa beitaki Tevita na yalona ni sa wiliki ira oti na tamata. Sa tukuna o Tevita vei Jiova, "Au sai valavala ca vakalevu sara ena vuku ni ka au sa cakava, oqo, au sa kerea, Jiova mo ni kauta tani na nona caka cala na Nomuni tamata, ni'u sa cakacaka vakalialia sara ga."
11 Ni sa duri cake o Tevita ena mataka, sa lako mai na vosa i Jiova vei Kata na parofita, na daunirai nei Tevita ka vaka,
12 "Lako ka tukuna vei Tevita, 'Sa tukuna vakaoqo o Jiova: "Au na solia vei iko e tolu na ka; digitaka e dua vei iratou me'u cakava vei iko."'"
13 Sa lako mai o Kata ka tukuna vei Tevita ka vaka: "Me vitu na yabaki na viakana ni sega na kakana, me lakovi iko mai kei na vanua? se, mo dro tiko me tolu na vula ena nodra cemuri iko tiko na meca? Se, me tolu na siga ni mate ca ena vanua."
14 Sa sauma o Tevita vei Kata, "Au sa leqa vakalevu sara. Au kerea me'u lutu ga ki na liga i Jiova, ni sa levu sara na Nona yalololoma; me'u kua ga ni lutu ena ligadra na tamata."
15 Sa qai vakalutuka mai o Jiova na mate ca e Isireli mai na mataka lailai me yacova na gauna sa lokuci. Mai Tani ki Perisepa era sa mate kina e vitusagavulu na udolu na tamata.
16 Ni sa dodoka yani na ligana na agilosi me tarai Jerusalemi, sa veisautaka na yalona o Jiova ka sa tukuna yani vua na agilosi sa veivakamatei tiko, "Sa rauta, me tu vakadua na ligamu." Na agilosi i Jiova sa tiko mai na vanua ni butu sila nei Arauna na kai Jepusaiti."
17 Sa tukuna o Tevita vei Jiova ni sa raica na agilosi sa samuti ira tiko na tamata ka vaka: "Sa dina, au sai valavala ca, o ira na sipi oqo – na cava era sa cakava? na ligamuni, me tarai au ga kei na vale nei tamaqu." Nai Cabocabo Ni Soro Ena Vanua Ni Butu Sila
18 Sa lako mai o Kata vei Tevita ena siga o ya ka tukuna, "Mo lako cake ka cakava e dua nai cabocabo ni soro ena i butubutu ni sila nei Arauna na Jepusaiti."
19 Sa lako cake o Tevita me vaka na vosa i Kata, me vaka sa vakarota o Jiova.
20 Sa rai yani o Arauna, ka raici Tevita kei ira na nona dauveiqaravi ni ra sa lako tiko yani vua. Sa cici yani o Arauna ka cuva sobu ena matana na tui, na matana ki na qele.
21 Sa taroga mai o Arauna, "Na cava sa lako mai kina na tui vua na nona tamata?" Sa sauma o Tevita, "Me'u volia na vanua ni butu sila mai vei iko, ka tara nai cabocabo ni soro vei Jiova – me vakalesui kina na mate ca sa tarai ira tiko na tamata."
22 Sa tukuna o Arauna vei Tevita, "Me cakava ga na noqu turaga na tui na veika me vakacabora kei na veika e vinaka vua. Oqo talega na bulumakau mei soro kama kei na kau kece oqo kei nai vua ni bulumakau me buka ni soro kama.
23 "Na veika kece oqo, na tui, sa solia o Arauna vua na tui." Sa tukuna kina o Arauna vua na tui, "O Jiova na nomu Kalou me ciqomi iko."
24 Sa tukuna na tui vei Arauna, "E sega, au na volia vakaidina mai vei iko ena kena i voli; se me'u vakacabora beka vei Jiova na veika au na sega ni sauma?" Sa volia o Tevita na vanua ni butu sila kei na bulumakau me limasagavulu na dola siliva.
25 Sa tara e kea o Tevita e dua nai cabocabo ni soro vei Jiova, ka vakacabora nai soro kama kei nai soro ni veivinakati. Sa rogoca o Jiova na masu ena vuku ni vanua, ka sa vakasuka tani na mate ca mai Isireli.