2 Veigauna

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36


Chapter 1

1 O Solomoni na luvei Tevita sa vakaukauwataki ena nona matanitu, ka sa tiko vata kei koya o Jiova na nona Kalou ka sa vakacerecerei koya sara vakalevu
2 Sa vosa vei ira na Isireli o Solomoni, vei ira na turaganivalu ni yaya udolu, na turaganivalu ni yaya drau, vei ira na turaga-ni-lewa, vei ira kece nai liuliu nodra na Isireli
3 O Solomoni kei ira kece na Isireli era sa lako cake ena tikina cecere mai Kipioni ena valevakacevaceva na vanua ni sota kei na Kalou, oqo sa cakava oti o Mosese na tamata ni Kalou mai na vanua liwa.
4 Ia, o Tevita sa kauta cake mai na Kato ni Kalou mai Kirijaci Jerimi, ki na vanua sa vakarautaka oti tu vakatabakidua ena vuku ni kato. Ni sa vakarautaka oti tu o koya e dua na vale laca ena vuku ni ka oqo mai Jerusalemi.
5 Nai cabocabo ni soro varasa sa cakava o Baseleli na luvei Uri na luvei Ori, sa biuta ena mata ni valevakacevaceva i Jiova; o Solomoni kei ira kece nai soqosoqo ni Isireli, era sa vakasaqarai koya mai kea.
6 Sa lako cake o Solomoni mai kea ki nai cabocabo ni soro varasa oqo, ki na mata i Jiova - sa tiko ena vanua ni veitavaki, ka vakacabora e udolu nai soro kama.
7 Na Kalou sa rairai vei Solomoni ena bogi o ya ka tukuna vua, "Mo kerea mai, se cava me'u solia vei iko?"
8 Sa sauma o Solomoni vua na Kalou: "O ni sa vakaraitaka vei Tevita na tamaqu na Nomuni loloma levu, ka o ni sa vakaturi au me tui, me kena i sosomi."
9 "Oqo, Kemuni Jiova na Kalou, mo ni vakayacora na Nomuni vosa ni yalayala vei Tevita na tamaqu, ni Kemuni sa cakava me'u tui vei ira na tamata oqo, sa vaka na kuvunisoso na kedra lewe levu.
10 "Oqo, Mo ni solia vei Au na yalomatua kei na vuku, me rawa ni'u lako yani ka lako mai e matadra na tamata oqo; o cei sa rawata me lewai ira na Nomuni lewe vuqa oqo?"
11 Sa vosa tale na Kalou vei Solomoni ka vaka: "Baleta ni sa tiko oqori e lomamu ka o sa sega ni kerea na i yau kei na vutuniyau, se na dokai, se na nodra bula na kemu meca, se mo kerea na bula balavu — ia, o sa vinakata ga na yalomatua kei na vuku me nomu, me rawa ni o lewa vinaka vei ira na tamata era sa noqu, o ira ga au sa buli iko kina mo tui—
12 "Sa soli vei iko na yalomatua kei na vuku, vutuniyau, na dokai, na kena mataqali e se sega ni kune vei ira na tui sa liu se vei ira na tui era na muri mai."
13 Sa lako mai na veitikina cecere mai Kipioni o Solomoni ki Jerusalemi mai na matanivale ni veitavaki ka sa mai lewa e Isireli.
14 Sa vakasoqona mai o Solomoni na qiqi vakavale kei ira na dau vodoka na ose; sa taukena o koya e dua na drau va na udolu na qiqi vakavale kei na tinikarua na udolu na dau vodo ose. O ira oqo era sa tiko ga ena koro ni qiqi vakavale, kei na tui sa tiko e Jerusalemi.
15 Sa cakava na tui me ra sa kabuwacara tu ga e Jerusalemi, na siliva kei na koula, me vaka ga na vatu lalai, sa vakatalega kina na sitari me vaka ga na vunilolo era sa sinai tu mai na buca.
16 Sa tu talega vei Solomoni na ose era sa voli mai Ijipita, kei Kera. O ira na dauveivoli ni tui era sa volivoli mai kea e nai sau dodonu ni veivoli.
17 Sa rawati ka voli mai Ijipita, e dua na qiqi vakavale me va na drau na dola kei na dua na ose me dua na drau na dola, era sa volitaki kece oqo vei ira na tui ni Itaiti kei na tui Siria.


Chapter 2

1 Sa nakita o Solomoni me tara na vale-ni-soro ki na yaca i Jiova kei na dua na vale me nona ga.
2 Sa digitaki ira e vitusagavulu na udolu na tamata me ra lomaocaocataka na veika oqo, me walusagavulu na udolu na dau ta vatu ena veiulunivanua kei ira me tolu na drau onosagavulu me ra veiliutaki vakaiwasewase.
3 Sa talatala vei Irami na tui Taia ka vaka: Me vaka ni drau a cakacaka vata kei Tevita na tamaqu, ka vakauta mai vua na sitari mo cakacaka vaka kina vei au.
4 Mo kila, au sa tara tiko oqo e dua na valenisoro kina yacai Jiova na Kalou ka me vakacabori vua. Me vakamai e matana nai soro boi vinaka ka kamikamica, me tiko talega kina na madrai vakaraitaki, nai soro kama ena mataka kei na yakavi, ena veiSiga ni Vakacecegu kei na Vula Vou kei na veisolevu lavaki vei Jiova na noda Kalou. Oqo nai lesilesi vei Isireli me sega ni mudu.
5 Na valenisoro au sa na tara oqo ena dua na ka e cecere - ni sa cecere o Koya na noda Kalou mai na kalou kecega.
6 O cei sa rawata me tara vei Koya e dua na valenisoro, o lomalagi kei na lomalagi kei na lomalagi e sega ni tawani koya rawa mada ga? O cei oi au, me'u tara vua e dua na valenisoro - ni'u sa tamata ga ni vakacaboisoro vua!
7 O koya oqo mo ni tala mai e dua sa matai ena cakacaka ni koula kei na siliva kei na kaukamea, ena varasa, ena kaukamea, ena varasa, ena ka lokaloka, ena ka damudamu buto kei na ka karakarawa, o ira sa dau ceuceu ka liga matau vei ira sa tiko e Juta kei Jerusalemi, o ira sa vakarautaki oti mai vei Tevita na tamaqu.
8 Me vakau talega mai vei au na sitari, na damanu kei na kau talei mai Lepanoni. Ni'u sa kila, ni sa tu vei ira na nomuni tamata na kila vinaka ni kena ta na kau ni Lepanoni io, era na tiko vata na noqu tamata kei na nomu tamata,
9 ena kena vakarautaki vakalevu na kau me noqu, me ka talega ni valenisoro sa vakarau tara tiko, ni na levu ka rairai vinaka.
10 Io, au na solia vei ira na nomu tamata, o ira sa dau vakarautaka na kau e: ruasagavulu na udolu na taga falawa ruasagavulu na udolu na taga sila ruasagavulu na udolu na saqa waini ruasagavulu na udolu na saqa waiwai.
11 O Irami na tui Taia sa sauma mai ena i vola nei Solomoni ka vaka:Baleta ni sa lomani ira na nona tamata o Jiova, sa vakaturi ira cake kina mo tui vei ira.
12 Sa tukuna talega o Irami, me vakalouvinakataki o Jiova na nodra Kalou na Isireli, o koya sa bulia na lomalagi kei vuravura, ni sa solia vei Tevita na Tui e dua na luvena yalomatua ka sa vakasinaiti ena yaloqaseqase kei na kila deivaki, o koya ena tara e dua na valenisoro vei Jiova kei na vale vakatui me nona!
13 Oqo, au sa vakatala yani e dua na kena dau ka sa tu vua na kila kecega, o Urami na noqu daunituvatuva matau
14 (O koya na luve ni dua na yalewa mai Tani ka sa tamana mai Taia). Sa kena dau ni koula, siliva, varasa, kaukamea, vatu kei na kau talega na dau ni roka lokaloka, karakarawa, na lineni matai lalai, kei na damudamu kata buto – sa dau ceuceu talega ka dauvakayacora na veika kecega, sa tataunaka vata kei ira na matai ni noqu turaga o Tevita na tamamuni –
15 O koya oqo, na falawa, na sila, na waiwai kei na waini e sa tukuna tiko o noqu turaga me vakauta vei ira na nona tamata.
16 Keimami na taya na kau mai Lepanoni, me vaka na kena levu o ni vinakata. Keimami na kauta mai vei kemuni ena vatavata mai wai ki Jopa – mo ni na qai kauta vaka ki Jerusalemi.
17 Sa wiliki ira kece na tamata o Solomoni ena vanua oisireli ni oti na nodra a wiliki mai vei Tevita na tamana, ka era sa lewe dua na drau limasagavulu ka tolu na udolu ka mani ono na drau na tamata.
18 Sa vitusagavulu na udolu me dau colata nai colacola, walusagavulu na udolu me dau ni vatu ni veiulunivanua, tolu na udolu ono na drau na veiliutaki ena veiwasewase lelevu kei na veiwasewase lalai.


Chapter 3

1 Sa vakatekivu me tara o Solomoni na vale i Jiova mai Jerusalemi ena ulunivanua o Moraia, na vanua sa basika kina o Jiova vei Tevita na tamana, na vanua sa vakarautaka o Tevita ena vanua ni butu sila e Onani e Jepusaite.
2 Sa tekivu tara na vale ena i karua ni siga ni karua ni vula ni kava ni yabaki ni nona veiliutaki.
3 Oqo na yavu sa vakadavora o Solomoni me tara kina na vale i Jiova. Na kena balavu e onosagavulu na kiupiti (kiupiti ena kenai vakarau e liu) ka ruasagavulu na liupiti na kena raba.
4 Na varada e tolusagavulu na fiti na kena balavu ka tolusagavulu na fiti talega na kena raba, na kena cere e dua na drau walusagavulu na fiti – ka sa ubi ena koula na lomana.
5 Na loma ni vale levu sa taqavi rua taki ena damanu ka ubi ena koula dina. Sa ceuti kina na vuni niusawa kei na wa semasema.
6 Sa ukutaki na vale ena veivatu talei me vakarairaivinakataka, na koula sa koula mai Parivaimi.
7 Sa taqaviruataki na vale taucoko e loma – na kau vakababa, na duru ni katuba, na lalaga kei na katubaOe koula, ka sa ceuti na Jerupi ena lalaga.
8 Sa caka talega na Tikina Tabu Sara. Sa tautauvata na kena balavu kei na kena raba ni ruasagavuluna kiupiti. Sa taqaviruataki na tikina tabu sara oqo ena koula dina e ono na drau na taledi.
9 Na bibi ni kena i vako koula e limasagavulu na sikele ka sa qai ubi tale yani ena koula.
10 Ena Tikina Tabu Sara oqo, sa caka kina e rua na Jerupi sa ceuti vakamatau sara ka boroi ena koula.
11 Na tabadrau na Jerupi oqo sa sema vata me tolusagavulu na fiti, sa tara na yasa ni rumu ka dua kei na yasa ni rumu tale kadua. Na balavu ni dua na taba ni Jerupi sa vitu veimama na fiti;
12 Ni sa semasema na tabadrau na Jerupi oqo, sa tolusagavulu na fiti, ka sa tara na lalaga e dua ki na lalaga ka dua.
13 E rau sa tucake tu na Jerupi oqo ka rau sa veiraici tu – ni rau sa matana vata ki loma.
14 Na latilati sa caka ena i sulu karakarawa, nai sulu lineni lokaloka, kei na kena roka damudamu buto, sa ubi kina na Jerupi.
15 Sa caka talega na mata ni valenisoro e rua na duru me limasagavulu karua veimama na fiti na kena cecere – kei nai ukuuku me toka e delana me vitu veimama na fiti.
16 Sa caka talega na i ukuuku vaka na salusalu ena loma ni valenisoro ka biu talega ena ulu ni duru. E dua na drau na pomekaraneti sa semasema vata ka sa vivi vata vakasalusalu i sulu sa ukutaki kina na loma ni vale.
17 Sa vakaduri na duru ena mata ni valenisoro, e dua e nai matau ka dua e nai mawi. Na yaca ni duru e nai matau o Jakini kei na kena e nai mawi o Poasa.


Chapter 4

1 Sa cakava e dua nai cabocabo ni soro varasa: me tolusagavulu na fiti na kena balavu, tolusagavulu na fiti na kena balavu, tolusagavulu na fiti na kena raba ka tinikalima na fiti na kena cere.
2 Sa cakava e dua na Taqi ni Wai, sa mokimokiti me tinikalima na fiti mai na dua na yasana ki na dua tale na yasana. Ka sa vitu veimama na fiti ni duri tu, ka qai vasagavulu ka lima na fiti vakacowiri kece.
3 Na Taqi ni Wai oqo sa dabe tiko ena dakudra e rua nai yatu bulumakau buli ena kaukamea, ka sema vata kece.
4 E tinikarua taucoko na bulumakau buli oqo ka sa mudra vata kece e loma – e tolu e vuki vaka ki na vualiku, tolu vaka ki na ra, tolu vaka ki na ceva ka tolu vaka ki na tokalau.
5 Sa caga dua na vavaku ni Taqi, ka sa vaka e dua na viavia ni sa se tiko. Sa sega rawa ena taqi oqo e tolu na udolu na saqa wai.
6 Sa caka talega e tini na beseni lelevu ni vuluvulu – e lima sa tiko ena yasana mai ra ka lima ena yasana mai cake. Oqo me ra dau sava kina na veika ni soro kama e na Taqi, me ra dau vuluvulu kina na bete.
7 Sa caka e tini nai tutu ni cina koula me vaka na kenai tuvatuva, ka sa biu yani ena loma ni valenisoro, e lima ena yasana i matau ka lima ena yasana i mawi.
8 Sa caka talega e tini na teveli ka biu ki na lomani valenisoro, lima e nai matau ka lima e nai mawi. Sa caka talega e dua na drau na beseni lalai ena koula.
9 Sa caka talega na nodra tikina na bete, na rumu levu kei na veikatuba ni wasewase kece ni vale. Sa varasa kece nai butubutu ni katuba.
10 Sa tiko na Taqi ni Wai levu duadua ena yasana e muri ni valenisoro.
11 O Urami sa cakava na kuro, nai takitaki kei na beseni lalai. Sa vakaotia o Urami na cakacaka sa cakava vua na tui o Solomoni me baleta na vale ni Kalou:
12 E rua na duru vakauluna, sa ukutaki vakamatau na uluna;
13 Sa ukutaki e na va na drau na pomekaraneti (yatu yarua me ubi kina na ulu ni duru e rua oqo);
14 Sa vaka i dabedabe vinaka talega na beseni lelevu kei na taqi levu;
15 Dua na Taqi sa dabe toka e na dela ni tini karua na bulumakau buli;
16 Na kuro, na beseni lalai, nai cula kei na veika kece sa bulia o Urami, sa caka vakamaqosa ka sa caka ena varasa sa rairai caudre tu me nei Solomoni na tui kei na veika ni vale ni Kalou.
17 E na buca ni Joritani, sa biuta kina na tui na qele buli ena kedrau maliwa o Sakoca kei Sereta.
18 Sa tu vei Solomoni na veika oqo, ka sa rui levu sara, nai vakarau bibi ni yaya varasa kece oqo, sa sega ni kilai.
19 Sa tu vei Solomoni na veiyaya kece oqo me baleta na vale ni Kalou, nai cabocabo koula kei na teveli ni madrai;
20 Nai tutu ni cina e koula dina sara, me dau waqa me vaka na kenai valavala, e na tikina e loma ni vale ni soro;
21 vata kei na senikau, na cina kei na kena i vakawaqa e koula dina sara;
22 nai vakawaqa, na beseni lalai, na veika me dabe kina na cina e koula dina. Ena tikina e loma ni vale ni soro, nai curucuru ki na Loqi Tabu Sara, kei na katuba ena rumu levu sa koula kece.


Chapter 5

1 Na cakacaka kecega sa cakava o Solomoni e na vuku ni vale ni Kalou sa qai oti; sa qai kauta mai o Solomoni na veika kece e a biuta tu o tamana me vakacabori ki na vale ni Kalou: na siliva, na koula kei vei yaya kece ni vale ni Kalou. Sa biu kece oqo ki na lololo ni yau ni vale ni Kalou.
2 Sa vakasoqoni ira na qase e Isireli, o ira kece nai liuliu ni veiyavusa, o ira nai liuliu ni veivuvale ni luvedra na Isireli e Jerusalemi, o Solomoni, me ra kauta mai na kato ni veiyalayalati i Jiova ki na Koro i Tevita, o Saioni.
3 Era sa soqoni kece mai vei Solomoni ena kana vata, sai koya e nai ka vitu ni vula.
4 Era sa lako kece nai na qase ni isireli, ka ra sa colata mai na kato ni Kalou o ira na Livai.
5 Era sa kauta cake mai na kato ni Kalou ki na vale ni veitavaki, era sa tu kina nai yaya tabu e na vale ni soro. O ira na bete kei na Livai era sa kauta cake mai.
6 O Solomoni na Tui kei ira kece na Isireli era sa soqoni kece mai ena mata ni kato ni Kalou, ka ra sa vakacabora na sipi kei na bulumakau e sega ni wili rawa na kena levu.
7 Era sa kauta mai na bete na kato ni veiyalayalati i Jiova ki na kenai tutu, ki na vanua tabu e loma, na Tikina Tabu Sara, ena ruku ni tabadrau na Jerupi.
8 E rau sa tevuka tu na tabadrau oirau na Jerupi ki na dela ni vanua sa tu kina na kato ni Kalou, ka rau sa vakaruguta na kato ni Kalou kei na kena i lavelave.
9 E balavu sara na kenai lavelave ka rawa ni laurai na muana mai na loqi tabu.
10 E sega tale na ka e tiko e na loma ni kato ni Kalou, na vatu ga e rua ka biuta kina o Mosese mai Orepi, e na gauna e a cakava kina o Jiova na veiyalayalati kei ira na luve i Isireli, ni ra sa biuti Ijipita oti mai.
11 Ia sa yaco ni ra sa lako tani mai na Tikina Tabu Sara o ira na bete (o ira kece na bete era tu e kea era sa vakasavasavataki ira oti, ni sega ni ra tiko ga ena nodra dui yasana),
12 kei ira na Livai era daunisere, o ira kece na nei Esafa kei Emani kei Jeducani,kei ira na dui luvedra, kei ira kece na veiwekani, era sa tu e na tokalau ni cabocabo ni soro, ka vakaisulu vulavula tu, sa tu vei ira na sibali, na bitu ni vakatagi vakawa, na api, sa tu talega vata kei ira e dua na drau ruasagavulu na bete dau uvu davui—
13 Sa qai yaco ni ra sa duavata na dau uvu davui kei ira na lagasere, me duavata na domo e rogo ni ra vei vakacerecerei kei na vakavinavinaka vei Jiova, ia ni ra sa laveta cake na domodra vata kei na davui kei na sibali kei na veiyaya kece ni vakatagi, ka vakavinavinaka vei Jiova, ka vaka: "Sa vinaka o Koya, ka sa sega ni mudu na Nona Yalololoma,"a yaco na vale, na vale i Jiova, me vakasinaiti e na o,
14 Era sa sega ni tomana rawa tale o ira na bete na nodra veiqaravi baleta na o; ni sa vakasinaita tu na vale ni Kalou nai serau i Jiova.


Chapter 6

1 Sa qai tukuna o Solomoni: "Sa tukuna o Jiova ni tiko ena vei o butobuto.
2 Au a tara vakaidina vei Kemuni e dua na vale e vakacerecerei, kei na vanua Moni tiko kina ka sega ni mudu."
3 Sa vuki yani na tui ka vosa vakalouvinakataki ira na Isireli, ni ra tucake kece tu na Isireli.
4 Ka tukuna: "Me vakacerecerei o Jiova na Kalou ni Isireli, o Koya sa vakayacora e Ligana na ka e a cavuta e Gusuna vei Tevita na tamaqu, ka vaka,
5 "Mai na siga Au a kauti ira tani kina Noqu tamata mai Ijipita, Au a sega ni digitaka e dua na koro e Isireli Me'u tara kina e dua na vale, me tiko kina na Yacaqu, se Me'u digitaka e dua na tamata me lewa vei ira na Noqu tamata na Isireli.
6 'Ia, Au sa digitaki Jerusalemi ga me tiko kina na yacaqu; Au sa digitaki Tevita talega me lewa vei ira na Noqu tamata.'
7 "Oqo, sa tiko e lomai tamaqu o Tevita me tara e dua na vale ni soro ki na Yaca i Jiova na Kalou ni Isireli.
8 "Ia o Jiova e a tukuna vei Tevita na tamaqu, 'Me vaka ni sa tiko e lomamu mo tara e dua na vale ki na Yacaqu, o sa caka vinaka ni sa tiko oqori e lomamu.
9 'Mo kila deivaki ni o na sega ni tara na vale, ia na luvemu ga o koya e na lako mai vuremu, o koya oqori e na tara na vale ki na Yacaqu.'
10 "Sa vakayacora o Jiova na Nona vosa e a tukuna, au sa mani taura nai tutu nei Tevita na tamaqu, ka dabeca nai dabedabe vakatui e Isireli me vaka e a yalataka o Jiova; ka'u a tara na vale ni soro ki na Yaca i Jiova na Kalou ni Isireli.
11 "O koya au sa biuta kina na kato, e tiko kina na veiyalayalati i Jiova e a cakava vei ira na luve i Isireli."
12 Sa qai tucake o Solomoni e na mata ni cabocabo ni soro i Jiova ena matadra kece nai soqosoqo ni Isireli, ka dodoka yani na ligana
13 (Ni sa cakava o Solomoni e dua na vatavata varasa e vitu veimama na fiti na kena balavu, vitu veimama na fiti na kena raba, kei na va veimama na fiti na kena cecere, ka sa biu e na loma donu ni vale; sa tucake kina o koya, sa tekiduru e matadra kecega nai soqosoqoi Isireli, ka dulaka cake na ligana vaka ki lomalagi);
14 ka tukuna o koya: "I Jiova na Kalou ni Isireli, e sega tale ni dua na Kalou mai lomalagi, se e vuravura me vakataki Kemuni, oi Kemuni o ni sa maroroya na Nomuni veiyalayalati kei na Nomuni yalololoma vei ira na nomuni tamata era lako e Matamuni e na yalodra taucoko.
15 "O ni sa maroroya na veika o Ni sa yalataka vua na Nomuni tamata o Tevita na tamaqu; o ni sa tukuna ena Gusumuni, ka vakayacora ena Ligamuni, me vaka ena siga oqo.
16 "O koya oqo, i Jiova na Kalou ni Isireli, Mo ni maroroya na veika o ni sa yalataka vua na Nomuni tamata o Tevita na tamaqu ena Nomuni tukuna, 'Ena sega ni yali vei kemuni e dua na tamata me dabeca tiko nai dabedabe vakatui e Mataqu, kevaka walega era na qarauna na nodra i valavala, me ra muria na Noqui vunau ni ra lako voli e Mataqu.'
17 "Ia oqo, Kemuni Jiova na Kalou ni Isireli, laiva na Nomuni vosa me yaco mai vakaidina, o koya o ni sa vosa kina vei Tevita na Nomuni tamata.
18 "Ia ena tiko vakaidina beka na Kalou kei ira na tamata e vuravura? Mo ni raica, o lomalagi kei na lomalagi ni lomalagi e sega ni rauti Kemuni. Sa qai wacava na lailai ni vale oqo au sa tara!
19 "Ia Mo ni nanuma na masu ni Nomuni tamata kei na nona vakatakekere, I Jiova na noqu Kalou, ka rogoca na tagi kei na masu ni Nomuni tamata sa caka tiko yani oqo vei Kemuni:
20 "Me na rai tiko na Matamuni ki na vale oqo ena siga kei na bogi, ki na vanua o ni a tukuna ni o ni na biuta kina na Yacamuni, Mo ni na rogoca kina na masu sa vakacabora na Nomuni tamata e na vuku ni vanua oqo.
21 "Mo ni rogoca talega na nona vakatakekere na Nomuni tamata kei na Nomuni tamata na Isireli, ni ra sa masu e na vanua oqo. Mo ni rogoca mai lomalagi na Nomuni tikotiko, ia ni o ni sa rogoca, Mo ni vosota.
22 "Kevaka e dua sa i valavala ca vua na wekana, ka sa vakasaurarataki me cakava e dua na bubului, ka sa lako mai ka cakava na nona bubului ena mata ni Nomuni cabocabo e na vale oqo,
23 "Mo ni qai rogoca mai lomalagi, ka cakacaka, ka lewa vei ira na Nomuni tamata, me saumi vakadodonu na daucaka ca me vaka na nonai valavala ena uluna, ka vakadonui nai valavala dodonu ka soli vei koya me vaka na nonai valavala dodonu.
24 "Se kevaka era sa vakadrukai na Nomuni tamata e na matadra na meca baleta ni ra sai valavala ca e na Matamuni, ka lesu mai ka vakatusa na Yacamuni, ka masu ka cakava na vakatakekere e Matamuni ena vale ni soro oqo,
25 "Mo ni qai rogoca mai lomalagi ka vosota na nodra i valavala ca na Nomuni tamata na Isireli, ka kauti ira lesu mai ki na vanua o ni sa solia vei ira kei na nodra qase.
26 "Ni sa tasogo na lomalagi me kua ni vakatauca mai na uca baleta ni ra sai valavala ca vei Kemuni, ni ra sa vagolea na nodra masu ki na vanua oqo, ka vakatusa na Yacamuni, ka saumaki mai na nodra i valavala ca baleta ni o ni sa vakararawataki ira,
27 "Mo ni qai rogoca mai lomalagi, ka vosota na nodra i valavala ca na Nomuni tamata, na Nomuni tamata na Isireli,Mo ni na vakavulica vei ira na sala vinaka me ra na lako kina; ka vakatauca mai na uca ki na Nomuni vanua, o koya o ni sa solia vei ira na Nomuni tamata me nodra i votavota.
28 "Ni sa yaco na lauqa ena vanua, sa yaco mai na mate ca se ca mai na i tei se malai na veikau, na vodre kei na yavato; ni ra sa vakacibi i valu mai na meca ki na nodra vanua ena nodra veikoro; se mataqali ca vakacava se tauvi-mate cava ga;
29 "na masu cava ga, se na vakatakekere cava ga sa cakava yani e dua se o ira kecega na Nomuni tamata na Isireli, ni ra sa dui kila yadua na nona i colacola kei na nona rarawa, ka sa dodoka cake yani na ligana ki na vale oqo:
30 "Mo ni qai rogoca mai lomalagi na Nomuni i tikotiko, ka vosoti ira, ka solia vei ira yadua me vaka nonai valavala, me vaka na yalodra o ni sa kila (ni sai Kemuni duadua ga o ni kila na yalodra na luve ni tamata),
31 "Me ra na rerevaki Kemuni kina ka muria na Nomuni sala ena gauna kecega era sa bula kina ena vanua o ni sa solia vei ira na neimami qase.
32 "E vakakina, ena vukuna e dua na vulagi, o koya e sega ni dua vei ira na Nomuni tamata na Isireli, ia e lako sara mai na dua na vanua yawa e na vuku ni Yacamuni cecere kei na Ligamuni qaqa kei na Ligamuni e dodo tikoga, ni ra lako mai ka masu ena vale ni soro oqo;
33 "Mo ni qai rogoca mai lomalagi na Nomuni i tikotiko, ka cavaka me vaka era sa kerei Kemuni kina na vulagi oqo, me ra kilai Kemuni kina kei na Yacamuni, ka rerevaki Kemuni, me vakataki ira na Isireli, me ra na kila kina ni vale ni soro oqo au a tara sa vakayacani ki na Yacamuni.
34 "Ni ra sa lako yani na Nomuni tamata me vala kei ira na meca, ena vanua kecega o ni sa talai ira kina, ia ni ra sa masu vei Kemuni ena vanua oqo, o ni sa digitaka kei na vale ni soro au sa tara kina na Yacamuni,
35 "Mo ni qai rogoca mai lomalagi na nodra masu kei na nodra vakatakekere ka maroroya na nodra i lakolako.
36 "Kevaka era sai valavala ca vei Kemuni (ni sa sega ni dua e sega ni valavala ca), ka o ni sa cudruvi ira ka soli ira kivei ira na meca, ka ra sa kauti ira vakavesu kina vanua vakayawa se vakavoleka;
37 "Ia ni ra sa kilai yalodra e na vanua era sa kau vakavesu kina, ka veivutuni, ka vakatakekere vei Kemuni mai na vanua era sa tu vakavesu kina ka tukuna, 'Keimami sai valavala ca vei kemuni, keimami sa caka cala, ka cakava na ka ca sara';
38 "Ia ni ra sa lesu tale vei Kemuni ena yalodra taucoko kei na lomadra kecega e na vanua era sa tu vakavesu kina, ka ra a kau kina vakavesu, ka masu vaka ki na nodra vanua o Ni a solia vei ira na nodra qase, ki na koro o ni sa digitaka, kei na vale au sa tara kina na Yacamuni:
39 "Mo ni qai rogoca mai lomalagi na Nomuni i tikotiko na nodra masu kei na nodra vakatakekere, ka maroroya na nodra i lakolako, ka vosoti ira na Nomuni tamata era sa i valavala ca vei Kemuni.
40 "Oqo, na noqu Kalou, au sa masu, me rai tiko na Matamuni ka me tadola tikoga na daligamuni ki na masu e vakacabori ena vanua oqo.
41 "Ia oqo, Mo ni tucake, Jiova na Kalou, ki na Nomuni vanua ni vakacegu, oi Kemuni kei na Kato ni Nomuni kaukauwa. O ira na Nomuni bete, I Jiova na Kalou, me ra vakaisulu ena bula, Kei ira na Nomuni tamata me ra rekitaka na Nomuni vinaka.
42 "I Jiova na Kalou, Mo ni kakua ni vuki tani mai vua na Nomuni lumuti; Mo ni nanuma na yalololoma ni Nomuni tamata o Tevita."


Chapter 7

1 Ni sa masu oti o Solomoni, sa lako sobu mai na bukawaqa caucaudre mai lomalagi ka kania nai soro e vakamai kei nai soro; ka sa vakasinaita na vale ni soro nai serau i Jiova.
2 Era sa sega ni curu rawa na bete ki na loma ni vale i Jiova, baleta nai serau i Jiova sa vakasinaita tu na vale i Jiova.
3 Ni ra sa raica na luve i Isireli na kena sa lako sobu mai na bukawaqa caucaudre, kei nai serau i Jiova ki na vale ni soro, era sa cuva vakatobuicu ki na qele, ka lotu ka vakacerecerei Jiova, ka vaka: "Ni sa vinaka o Koya, Ni sa sega ni mudu na Nona yalololoma."
4 Sa qai vakacabora na tui kei ira kecega na tamata nai soro e na mata i Jiova.
5 Na tui o Solomoni sa vakacabora mei soro e ruasagavulu ka rua na udolu na bulumakau kei na dua na drau ruasagavulu na udolu na sipi. Sa mani vakatabuya na tui kei ira kecega na tamata na vale ni Kalou.
6 Era sa qarava na bete na nodra i tavi; o ira talega na Livai nai vakatagi ni sere vei Jiova, o koya sa cakava o Tevita me vakacerecerei kina o Jiova, ka tukuna, "Ni sa sega ni mudu na Nona yalololoma," Ena veigauna kecega sa dau vakacabora kina o Tevita na vakavinavinaka. Era sa uvuca na davui na bete era veibasai, ni ra sa tucake na tamata kecega.
7 Sa vakatabuya talega o Solomoni nai karua ni wasewase ni vale ni soro sa tiko yani e liu. Sa vakacabora nai soro kama kei na uro ni soro ni veivinakati. Baleta nai cabocabo ni soro varasa sa cakava o Solomoni sa sega ni rawa ni ciqoma kece nai soro kama, nai soro sila kei na uro.
8 Sa maroroya na solevu o ya o Solomoni me vitu na siga, o ira na Isireli vata kei koya, sa dua na soqoni vinaka mai nai curucuru kei Amaci ki na Bati ni Uciwai mai Ijipita.
9 E nai kawalu ni siga sa dua na soqoni tabu me ra vakananuma kina na vakatabui ni cabocabo ni soro ena vitu na siga kei na kana vata ni vitu na siga.
10 E nai ka ruasagavulu ka tolu ni siga ni ka vitu ni vula, sa vakatalai ira na tamata ki na nodra dui vale laca, ni ra sa marau ka reki e na vuku ni ka vinaka sa cakava o Jiova vei Tevita, vei Solomoni, vei ira talega na Isireli.
11 Sa vakaotia na vale i Jiova o Solomoni kei na vale ni tui; ka sa vakaotia vakavinaka o Solomoni na veika e tubu e lomana me cakava ena vale i Jiova kei na nona loma ni vale talega.
12 Sa qai basika mai o Jiova vei Solomoni e na bogi ka tukuna vua: "Au sa digitaka talega na vanua oqo me Noqu me vale ni soro.
13 "Ni'u sa sogoti lomalagi me kakua ni tau na uca, se vakarota na vodre me vakarusa na vanua, se vakatala yani na vei mataqali mate ca vei ira na Noqu tamata,
14 "O ira na Noqu tamata era sa vakayacani e na Yacaqu kevaka era sa vakamalumalumutaki ira, ka masu ka vakasaqara na Mataqu, ka vuki tani mai na nodra i valavala vakasisila, Au na qai rogoca mai lomalagi, ka vosota na nodra i valavala ca ka vakabula na nodra vanua.
15 "Ia oqo na Mataqu e na rai tiko kei na Daligaqu ena vakatu daliga tiko ki na masu kecega e na vakacabori e na vanua oqo.
16 "Ni'u sa digitaka ka vakatabuya e daidai na vale oqo, me tiko kina na Yacaqu me sega ni mudu; na Mataqu, na Yaloqu e na tiko kina ka me sega ni oti rawa.
17 "Ia o iko, kevaka o na lako voli e Mataqu me vakataki Tevita na tamamu, ka cakava na veika kecega Au sa vakarota oti vei iko, kevaka o na maroroya na Noqui lesilesi kei na Noqu lewa,
18 Au na qai vakataudeitaka na nomu i tikotiko vakaturaga me vaka Au a yalataka vei Tevita na tamamu ka vaka: 'Ena sega ni mudu na tamata me lewa e Isireli.'
19 "Ia kevaka o na vuki tani ka biuta na Noqu i lesilesi kei na Noqu i vakaro o koya Au sa biuta e matamu, ka lako mo qaravi ira na kalou tani ka lotu vei ira,
20 "Au na qai cavuti ira laivi mai na vanua Au a solia vei ira; kei na vale oqo Au sa vakatabuya ki na Yacaqu Au na kauta tani e Mataqu, ka vakayacora me ka ga ni veitalanoa wale vei ira na tamata.
21 "Ia na vale oqo, ka dau vakacerecerei, o ira kecega era lako sivita era na kidroa ka tukuna, 'Na cava e cakava kina o Jiova na ka vakaoqo ki na vanua oqo kei na vale oqo?'
22 "Era na qai sauma, 'Baleta ni ra biuti Jiova na Kalou ni nodra qase, o Koya ka kauti ira tani mai na vanua o Ijipita, ka kabiti ira na kalou tani, ka lotu vei ira ka qaravi ira; o koya oqo sa kauta mai kina o Jiova vei ira na veika ca lelevu oqo.'"


Chapter 8

1 Ia sa yaco ni sa oti e ruasagavulu na yabaki, ni a tara o Solomoni na vale i Jiova kei na nona vale talega,
2 na veikoro e a solia o Irami vei Solomoni, sa tara cake o Solomoni ka vakatikori ira kina na luve i Isireli.
3 Ka sa lako o Solomoni ki Amaci-Soba ka taura vakaukauwa.
4 Sa tarai Tadimori talega e na vanua liwa, kei ira kece na veikoro ni maroroi yaya e Emaci.
5 E tara na veikoro e Beci-Oroni E Cake kei na veikoro e Beci-Oroni E Ra, na vei koro ni drodro e vakalalaga, vaka matamata ka vakabai,
6 O Baleci talega kei na veikoro ni mamaroroi e nei Solomoni, na veikoro ni qiqi vakavale kei na vei koro ni maroroi ose, kei na veika kecega sa vinakata o Solomoni me tara cake e Jerusalemi, e Lepanoni, kei na veivanua kecega e vakarurugi ki na nona lewa.
7 O ira kece na tamata sa vo vei ira na Itaiti, na Amoraiti, na Perisaiti, na Ivaiti kei ira na Jepusaiti – o ira sa sega ni Isireli—
8 Oqo o ira na kawa tamata era a valuti vakavo tu ena vanua – o ira era a sega ni vakarusai mai vei ira na Isireli. o Solomoni sa vakatubura mai vei ira oqo me ra tamata daucakacaka tu ga me yacova na siga oqo.
9 Na tui o Solomoni sa sega ni vakatara me ra nona tamata daucakacaka na luvei Isireli. Era sa tamata i valu ga, era i liuliu ni vei liuliu, era i liuliu ni veiqiqi ni valu, na i liuliu ni mataivalu ose.
10 O ira na kena vo, era sai liuliu ni mata cakacaka nei Solomoni na tui: era lewe rua na drau limasagavulu era sa lewa vei ira na tamata.
11 O Somone sa kauta cake mai na luvei Fero goneyalewa ki na Koro i Tevita, ki na vale sa tara oti me nona ga, ni sa tukuna, "Na watiqu ena sega ni tiko ena vale i Tevita na tui Isireli, baleta na vanua sa mai tiko kina na Kato ni Kalou sa vakatabui kece."
12 Sa vakacabora o Solomoni nai soro kama vei Jiova ena i cabocabo nei Jiova, e a tara ga o koya ena mata ni varada,
13 Me vaka na kena i vakarau ena veisiga, nai soro me vaka sa vakarota o Mosese, me ka ni Siga ni Vakacecegu, na Vula Vou, kei na tolu na Solevu ni kanavata ni veiyabaki—na Solevu ni Kana Madrai Sega ni Vakaleveni, na Solevu ni Veimacawa, kei na Solevu ni Vale Vakacevaceva.
14 Me vaka nai tuvatuva nei Tevita na tamana, sa digitaka nai wasewase vakabete ena nodra dui veiqaravi, o ira na Livai kei na nodra i tavi – (me ra dau vakacerecerea na Kalou ka lotu vua ena matadra na bete), me vaka sa gadrevi ena veisiga yadua, kei ira talega na dau vakatawa na matamata kei na nodra i tavi – me vaka sa vakarota o Tevita na tamata ni Kalou.
15 Era sa sega ni lako tani mai nai vakaroi Tevita vei ira na bete kei ira na Livai me baleta e dua tale na ka, se, me baleta na i yau.
16 Na cakacaka kece i Solomoni sa tuvai vakavinaka mai na siga sa yavutaki kina na vale ni Kalou me yacova ni sa oti. Sa qai vakaoti na vale i Jiova.
17 Sa qai lako ki Esioni – Keberi o Solomoni, e Elaci talega ena baravi ena vanua nei Itomi.
18 O Irami sa vakauta vua eso na waqa ena ligadra na nona tamata, kei ira na nona tamata era sa kila na wasawasa. Era sa lako vata kei ira na tamata i Solomoni ki Ofira, ka kauta mai e tinikatolu na milioni na koula mai kea, ka kauta mai vei Solomoni na tui.


Chapter 9

1 Ia oqo ni sa rogoca na ranadi mai Sipa nai rogorogo kei Solomoni, a sa lako mai ki Jerusalemi o koya me vakatovolei Solomoni ena veitaro dredre, era lewe levu era sala vata kei koya, na kameli era usana tu na ka boi vinaka, na koula e levu sara, kei na vatu talei; ni sa lako mai vei Solomoni, sa tukuna vua na veika kece e tu e lomana.
2 Sa mani sauma kece o Solomoni na nona taro; e sega na ka e dredre vei Solomoni me sega kina ni rawa ni vakamacalataka vua.
3 Ia ni sa raica na ranadi mai Sipa na vuku i Solomoni, na vale e a tara o koya,
4 na kakana e na nona teveli, na nodra i dabedabe na nona tamata, na nodra veiqaravi na nona tamata dauveiqaravi kei na nodra i sulu, o ira na dautu mena kei na nodra i sulu, na katuba ni sala me lako cake kina ki na vale i Jiova, sa yali vakadua sara ga na yalona.
5 Sa qai tukuna vua na tui o koya: "Sai tukutuku dina au a rogoca mai na noqu vanua me baleta na nomu vosa kei na nomu vuku.
6 "Ia au a sega ni vakabauta na nodra vosa me yacova ni'u sa lako mai ka raica ena mataqu dina; e dina sara ni a sega ni tukuni vei au na veimama ni kena cecere na nomu vuku. O sa uasivia cake sara nai rogorogo au a rogoca.
7 "Me ra sautu na nomuni tamata ka me ra sautu talega o ira oqo na nomuni dauveiqaravi, o ira era sa tu ga e matamuni e na veigauna ka rogoca na nomuni vuku!
8 "Me vakacaucautaki o Jiova na nomuni Kalou, o Koya sa ka levu na Nona taleitaki iko, e vakadaberi iko ena Nonai tikotiko vakaturaga mo Tui e na vuku i Jiova na nomu Kalou! Baleta na nomu Kalou e a lomani Isireli, me vakataudeitaki ira kina ka sega ni mudu, sa vakatikori iko kina mo tui vei ira, me tau kina na lewa dina kei na yalododonu talega."
9 Sa mani solia o koya vua na tui e sivia na dua na milioni na dola e na koula, na ka boi vinaka e levu sara, kei na vatu talei; e sega ni dua tale na ka boi vinaka me tautauvata kei na kena e solia oqo na ranadi mai Sipa vei Solomoni na tui.
10 O ira talega, na tamata nei Irami kei na tamata nei Solomoni, o ira era kauta mai na koula mai Ofira, era sa kauta talega mai na kau boi vinaka kei na veivatu talei.
11 Ia na tui sa cakava nai curucuru ki na vale i Jiova kei na vale ni tui ena kau boi vinaka, na api kei nai vakatagi vakawa talega me nodra na dauni sere; e a sega mada ni bau kune na ka vakaoqo e na gauna e liu e na vanua o Juta.
12 Sa qai solia na tui o Solomoni vua na ranadi mai Sipa na veika kece e gadreva, na veika e kerea, me uasivia na veika e a kauta mai o koya vua na tui. Sa mani vuki o koya ka lesu tale ki na nona vanua, o koya kei ira na nona tamata dauveiqaravi.
13 Nai vakarau bibi ni koula e dau kau mai vei Solomoni e na veiyabaki e tinikaciwa na milioni ciwa na drau walusagavulu na udolu na dola vakailavo,
14 e sega ni wili kina na veika era kauta mai na dauveivoli. O ira kece talega na tui mai Arapea kei ira na kovana ni veivanua era kauta mai na koula kei na siliva vei Solomoni.
15 Ia na tui o Solomoni sa cakava e rua na drau nai sasabai lelevu mai na koula sa tuki, na kenai sau vakailavo e rua na drau walusagavulu na udolu na dola dua nai sasabai levu.
16 Sa cakava talega o koya e tolu na drau nai sasabai lalai e na koula sa tuki; e tinikava na udolu na dola na kenai sau ni dua nai sasabai lailai. Na tui sa biuta nai sasabai kece oqo e na Vale ni Veikau mai Lepanoni.
17 Sa cakava talega na tui e dua nai tikotiko vakaturaga ena lase, ka boro na delana e na koula dina.
18 Nai cewacewa vakaturaga e ono na kenai kabakaba, ka koula na kenai butubutu, sa dregati ki nai cewacewa vakaturaga; nai dabedabe ni liga e tiko e na yasa ruarua ni dabedabe vakaturaga, ka rau tucake tu e na yasa ni dabedabe e rua na laione.
19 E tini karua na laione era tucake tu e kea, era sa yadua tu na yasa ni kabakaba e ono oqo; E sega ni dua na ka vakaoqo me bau caka e na dua tale na matanitu.
20 Na nona bilo ni gunu kece o tui Solomoni e koula, kei na veiyaya kece ni Vale ni Veikau e Lepanoni e caka e na koula dina. E sega ni dua na siliva, baleta ni sega tu ni wiliki me dua na ka na siliva e na gauna i Solomoni.
21 Era sa lako na waqa ni tui ki Tasisi kei ira na tamata nei Irami. Vakadua ena vei – yatolu na yabaki era sa dau lako mai na waqa ni veivoli, era kauta mai na koula, siliva, lase, na maqe qase kei na maqe gone.
22 Sa uasiviti ira kece na tui e vuravura na tui o Solomoni e nai yau kei na vuku.
23 Era sa vakasaqara mai kina na vei tui ni vuravura oqo me ra sota kei Solomoni ka rogoca na nona vuku, o koya sa biuta oti tu na Kalou e yalona.
24 Era sa dui kauta mai na nodra ka ni loloma na tamata: na siliva kei na koula, nai sulu tali, nai yaragi ni valu, na veika boi vinaka, na ose, na meule (luve ni ose), e na kenai vakarau ga e na veiyabaki.
25 Sa tu vei Solomoni e va na udolu na vale ni ose kei na kena qiqi vakavale, e tinikarua na udolu na dauvodo ose sa vakatikori ira o koya e na veikoro ni qiqi vakavale vata kei na tui talega e Jerusalemi.
26 Ia sa lewa o koya vei ira kecega na tui mai na Uciwai (Uferetisi) ki na vanua vaka – Filisita, me yacova sara nai yalayala kei Ijipita.
27 Sa cakava na tui na siliva me rawarawa e Jerusalemi me vaka ga na qereqere, ka sa cakava na vuni sitari me levu me vaka na vuni lolo ka ra sinai tu e na buca.
28 Era sa kauta talega mai vei Solomoni na ose mai Ijipita kei na veivanua kecega.
29 Na vo ni veika kecega sa cakava o Solomoni, nai matai kei na kenai otioti, era sa sega beka ni volai e nai vola i Nacani na parofita, e na parofisai nei Eaija na kai Siloni, kei na raivotu nei Ito na daurai me baleti Jeropoame na luve i Nabati?
30 Sa lewa mai Jerusalemi vei ira kecega na Isireli me vasagavulu na yabaki.
31 Sa qai vakacegu o Solomoni vata kei ira na tamana, ka sa bulu e na Koro i Tevita na tamana. Ka sa tui o Reopoame na luvena me kenai sosomi.


Chapter 10

1 Sa lako ki Sikemi o Reopoame, ni ra sa lako kece kina na Isireli me ra buli koya me tui.
2 Sa yaco, ni sa rogoca o Jeropoame na luve i Nabati (e a tiko mai Ijipita, ni a dro mai vei Solomoni na Tui), sa biuti Ijipita ka lesu tale mai o Jeropoame.
3 Era sa qai talatala vei koya ka kacivi koya. O Jeropoame kei ira kecega na Isireli era sa lako mai ka vosa vei Reopoame, ka vaka,
4 "O tamamu e a vakabibitaka na neimami i colacola; ia oqo, mo vaka-mamadataka na veiqaravi oca kei nai colacola bibi e tauca tu vei keimami o tamamu, ka keimami na qaravi iko."
5 Sa tukuna vei ira o koya, "Mo ni lesu tale mai vei au ni oti e tolu na siga." Era sa lako yani na tamata.
6 Sa qai veivosaki na tui o Reopoame kei ira na qase era a tu e na matai Solomoni na tamana ni se bula tiko, ka tukuna, "O ni na vakasalataki au vakacava me'u sauma kina na veika era a tukuna vei au na tamata oqo?"
7 Era sa vosa vua, ka vaka, "Kevaka o sa yalovinaka vei ira na tamata oqo, ka vakalomavinakataki, ka tukuna na vosa vinaka vei ira, era na nomu tamata me sega ni mudu."
8 Ia e sega ni via ciqoma nai vakasala era sa solia vua na qase, ka la'ki veivosaki kei ira na cauravou era a tubu vata cake mai, era tu e matana.
9 Ka sa tukuna vei ira, "Nai vakasala cava o ni na solia vei au? Me da na sauma vakacava vei ira oqo era sa tukuna vei au, ka vaka, 'Mo vakamamadataka nai colacola ka biuta tu vei keimami o tamamu'?"
10 Era sa qai tukuna vua o ira na cauravou ka tubu vata mai kei koya, ka vaka, "Mo vosa vakaoqo vei ira na tamata era a vosa vei iko, ka vaka, 'O tamamu e vakabibitaka na neimami i colacola, mo vakamamadataka o iko' – mo qai tukuna vei ira: 'Nai qaqalo ni ligaqu lailai e vavaku cake mai na toloi tamaqu!
11 'Ia oqo, ni sa bibi na veika e biuta vei kemuni o tamaqu, au na vakaikuritaka na nomuni i colacola; o tamaqu e a vakanakuitataki kemuni e na dali, ia au na vakanakuitataki kemuni e na wa qaliqali!'"
12 Ia o Jeropoame kei ira kecega na Isireli era sa lako mai vei Reopoame e nai katolu ni siga, me vaka e a vakarota na tui, ka vaka, "Mo ni lesu tale mai e nai katolu ni siga."
13 Sa qai sauma vakaukauwa vei ira o koya na tui. Na Tui o Reopoame e a sega ni via rogoca na nodra i vakasala na qase,
14 K a vosa vei ira me vaka na nodra i vakasala na cauravou, ka vaka, " O tamaqu e a vakabibitaka na nomuni i colacola, ia au na vakaikuritaka; o tamaqu e a vakanakuitataki kemuni e na dali, ia au na vakanakuitataki kemuni e na wa qaliqali!"
15 Ia na tui sa sega ni via rogoci ira na tamata; ni sa vu mai vua na Kalou na veisau ni veika e yaco oqo, me vakayacori kina na vosa i Jiova, o koya sa cavuta o Koya e na ligai Eaija na kai Siloni vei Jeropoame na luve i Nabati.
16 Ni ra sa kila kecega na Isireli ni sega ni via rogoci ira o koya na tui, era sa sauma vua na tui, ka vaka: "Na cava sa neimami mai vei Tevita? Sa sega na neimami i votavota mai vua na luve i Jese. Na tamata kecega ki na nona vale laca, Kemuni na Isireli! Ia oqo mo qai raica na nomu vuvale, o iko Tevita!" Ia era sa dui lako na Isireli ki na nodra dui vale laca.
17 Ia o Reopoame sa lewa vei ira na luve i Isireli era tiko e na veikoro vaka – Juta.
18 O Reopoame na tui sa qai talai Etorami yani, o koya e qarava tiko nai yau; ia era sa vakaviriki koya e na vatu o ira na luve i Isireli, ka sa mate. Sa mani vodoka vakatotolo na nona qiqi o Reopoame na tui me dro yani ki Jerusalemi.
19 Sa yaco me ra vuki tani tiko na Isireli mai na vale i Tevita me yacova na siga oqo.


Chapter 11

1 Ni sa lako mai ki Jerusalemi o Reopoame, sa vakasoqoni ira vata na Juta kei ira na Penijamini e lewe dua na drau walusagavulu na udolu na tamata digitaki era tamata i valu, me ra veivala kei ira na Isireli, de rawa ni vakadeitaki tale na matanitu vei Reopoame.
2 Ia na vosa i Jiova sa yaco mai vei Semaia na tamata ni Kalou, ka vaka,
3 "Mo vosa vei Reopoame na luve i Solomoni na tui Juta, kei ira kece talega na Isireli e Juta kei Penijamini, ka vaka,
4 'Sa tukuna vakaoqo o Jiova: "Mo ni kakua ni lako cake ka veivala kei ira na tacimuni! Me ra dui lesu na tamata yadua ki na nona vale, ni lewa oqo sa vu mai vei Au."' " Era sa mani talairawarawa ki na vosa i Jiova, ka vuki tani mai na nodra via valuti Jeropoame.
5 Sa tiko e Jerusalemi o Reopoame, ka sa tara cake na veikoro ni tataqomaki e Juta.
6 Ka sa tarai Peceliema, Itama, Tekoa,
7 Beci – Suri, Soko, Etulama,
8 Kaca, Maresa, Sipi,
9 Etoraimi, Lakisi, Aseka,
10 Sora, Aijaloni, kei Epironi, era sa tiko e Juta kei Penijamini, era koro vakabai.
11 Sa vakaukauwataka o koya na bai cecere, ka biuti ira kina na kavetani, kei na lololo ni kakana, waiwai, kei na waini.
12 E na veikoro kece talega oqo sa biuta kina nai sasabai kei na moto, ka cakava me ra kaukauwa vakalevu sara, ni tokoni koya tu o Juta kei Penijamini.
13 O ira na bete kei na Livai mai na veiyasana kecega ka ra tiko e na veivanua e Isireli era sa mai vakadeitaki ira ki vua.
14 Ni ra sa biuta na Livai na nona vei – vanua kei na ka era taukena ka lako mai ki Juta kei Jerusalemi, ni sega ni ciqomi ira o Jeropoame kei ira na luvena me ra veiqaravi tiko vakabete vei Jiova.
15 Sa qai digitaki ira ga na nona bete me baleta na veivanua cecere, me baleti ira na tevoro, kei na matakau bulumakau sa bulia oti o koya.
16 Ni ra sa lako oti yani na Livai, o ira mai na vuvale kece i Isireli, era sa nakita oti tu me ra vakasaqarai Jiova na Kalou nei Isireli, era sa lako ki Jerusalemi me ra vakacaboi soro vei Jiova na Kalou ni nodra qase.
17 Era sa qai vakaukauwataka na matanitu e Juta, ka cakava me tamata kaukauwa o Reopoame na luve i Solomoni me tolu na yabaki, baleta ni lako e na sala i Tevita kei Solomoni me tolu na yabaki.
18 Sa qai taura o Reopoame me watina o Maelaci na luve i Jeremoci na luve i Tevita, kei Avieli na luve i Elia na luve i Jese.
19 Sa vakasucuma o koya vua na luvena: Jeusi, Samaria, kei Saemi.
20 Ni sa oti o koya sa qai tauri Maeka na makubui Apisalome yalewa; ka sa vakasucumi Apaitia, Atai, Sisa, kei Selomeci.
21 Ia o Reopoame sa domoni Maeka na makubui Apisalome yalewa vakalevu cake vei ira kece sara na watina kei na watina lalai; ni sa tinikawalu na watina ka onosagavulu na watina lalai, e ruasagavulu kawalu na luvena tagane ka onosagavulu na luvena yalewa.
22 Ka sa digitaki Apaitia na luve i Maeka o Reopoame me turaga, me i liuliu vei ira na tacina; ni sa nakita o koya me na lesia me tui.
23 Sa cakacaka sara vakavuku, ka veibiuyaki ira na luvena tagane eso ki na veivanua e Juta kei Penijamini, ki na veikoro vakabai kecega; ka wasea vei ira nai votavota e levu sara. Sa vakaraica talega me levu sara na dui watidra.


Chapter 12

1 Ia ni sa oti o ya, ni sa vakadeitaka o Reopoame na matanitu ka vakaukauwataki koya vakai koya, sa vuki tani mai na i vunau i Jiova, kei ira vata kece talega na Isireli.
2 Ka sa yaco e nai kalima ni yabaki i tui Reopoame ni sa lako mai o Sisake na tui Ijipita ka valuti Jerusalemi, baleta ni ra sa caka cala vei Jiova,
3 E dua na udolu rua na drau na qiqi ni valu, onosagavulu na udolu era vodo ose, kei na tamata e sega ni wiliki rawa era lako vata mai kei koya mai Ijipita O na Lubumi kei na Sukimi kei ira na kai Iciopea.
4 Sa taura o koya na veikoro vakabai e Juta ka sa lako mai ki Jerusalemi.
5 Sa qai lako mai o Semaia na parofita kivei Reopoama kei ira nai liuliu e Juta, era sa soqoni vata mai Jerusalemi baleti Sisake, ka tukuna vei ira, "Sa tukuna vakaoqo o Jiova: 'O ni sa biuti Au, ia oqo Au sa soli kemuni talega ki na ligai Sisake.'"
6 O ira nai liuliu e Juta kei na tui era sa qai vakamalumalumutaki ira ka tukuna, "Sa yalododonu o Jiova."
7 Ia ni sa raica o Jiova ni ra sa vakamalumalumutaki ira, sa lako tale mai na vosa i Jiova vei Semaia na parofita, ka vaka, "Era sa vakamalumalumutaki ira; o koya oqo Au na sega ni vakarusai ira, ia Au na vakayacora vei ira na veisereki. Na Noqu cudru ena sega ni sovaraki yani ki Jerusalemi e na ligai Sisake.
8 "Ia era na nona bobula ga, me ra na kila kina na duidui ni Noqu veiqaravi kei na veiqaravi ni veimatanitu ni vevanua kecega."
9 Sa mani mai valuti Jerusalemi o Sisake na tui Ijipita, ka kauta tani nai yau mai na vale i Jiova kei nai yau mai na vale ni tui; e kauta na ka kecega. E kauta talega nai sasabai koula e a cakava o Solomoni.
10 Sa qai cakava o Repeoame na Tui nai sasabai varasa me kenai sosomi, ka solia vei ira na kavetani ni valu ni mata yadra, era sa yadrava na matamata ki na vale ni tui.
11 Ia ni sa dau curu yani na tui ki na vale i Jiova, na yadra sa dau lako me kauti ira ki tuba; sa oti era sa qai dau kau tale ki loma ni vale ni yadra.
12 Ni sa vakamalumalumutaki koya o koya, sa lako tani mai vua na cudru ni Kalou, me kakua ni vakacacani koya vakadua sara; ka sa vinaka talega na ka kecega e Juta.
13 Na Tui o Reopoame sa vakaukauwataki koya vakai koya e Jerusalemi ka vakatulewa kina. Ia oqo sa yabaki vasagavulu kadua o Reopoame ni sa yaco me tui; ka sa vakatulewa tiko e Jerusalemi me tinikavitu na yabaki, na koro sa digitaka o Jiova mai vei ira na vei yavusa kecega e Isireli me biuta kina na Yacana. Na yaca i tinana o Neama, na yalewa ni Amoni.
14 Sa cakava na ka ca, baleta ni a sega ni vakarautaka na yalona me vakasaqarai Jiova.
15 Na cakacaka i Reopoame, kenai tekivu kei na kenai otioti, era sa sega beka ni volai e nai vola i Semaia na parofita kei na nei Ito na daurai me baleta nai tukutuku ni kawa? E rau sa dau vala voli ga o Reopoame kei Jeropoame e na nodrau veisiga.
16 Ia sa vakacegu o Reopoame vata kei ira na tamana, ka sa bulu e na Koro i Tevita. Sa qai tui o Apaitia na luvena tagane me kenai sosomi.


Chapter 13

1 Ena i ka tinikawalu ni yabaki ni lewa nei tui Jeropoame, sa tui kina e Juta o Apaitia.
2 Sa lewa me tolu na yabaki e Jerusalemi. Na yaca i tinana o Mikaia na luvei Urieli mai Kipea. E rau sa dauvala o Apaitia kei Jeropoame.
3 Sa dau tuvana vinaka na nona i valu o Apaitia, ka era sa tamata qaqa na nona tamata i valu, era sa lewe va na drau na udolu na nona tamata digitaki. Sa kauta talega mai o Jeropoame na nona tamata digitaki ni valu, ka era tamata qaqa talega e walu na drau na udolu na tamata.
4 Sa tucake tu ena ulunivanua o Semaraimi ena veiulunivanua e Ifereimi o Apaitia ka kacivaka yani, "mo ni rogoca na Isireli kei Jeropoame:
5 "E sega ni dodonu mo ni lecava ni o Jiova na nodra Kalou na Isireli, ni sa solia na lewa e Isireli taucoko vei Tevita me sega ni mudu, vei Tevita kei ira na luvena, na veiyalayalati sa vakamasimataki.
6 "Ia o Jeropoame na luvei Nabati, na dauveiqaravi i Solomoni na luvei Tevita, sa tucake me vuki tani mai vua na nona turaga.
7 "Era tokoni koya na tamata sega ni yaga, me ra vakaukauwataki ira vei Reopoame na luvei Solomoni, baleta ni se gone ga o Reopoame ka lecaika,sa sega ni gumatua rawa kina vei ira.
8 "Oqo o ni sa vinakata mo ni kauta tani na matanitu ni Kalou, o koya sa tiko ena ligadra na luvei Tevita, o ni sa lewe levu, sa tiko vata kei kemuni na bulumakau koula sa bulia o Jeropoame vei kemuni me nomuni Kalou.
9 "O ni sa sega beka ni kauti ira tani na bete i Jiova, o ira na luvei Eroni kei ira na Livai, ka bulia ga vakai kemuni na bete me vakataki ira na veimatanitu tani, ni sa lako mai e dua me vakacabora vei koya e dua na bulumakau gone kei na luve ni me e vitu me bete kina o koya ena ka e sega ni vakalou?
10 "Ia, vei keimami, o Jiova sa neimami Kalou, keimami sa sega ni biuti koya: O ira na bete me veiqaravi vei Jiova era luvei Eroni kei ira na Livai era sa dui qarava na nodra i tavi.
11 "Era sa dau vakama vei Jiova nai soro kama ena veimataka kei na veiyakavi kei na vakamai ni veika boivinaka; sa dau tu talega na madrai vakarautaki ena teveli koula, ka sa dau waqa tiko ga na cina ena i tutu ni cina koula mai na veiyakavi: ni keimami se maroroya tikoga nai vakaroi Jiova na neimami Kalou, ia, oi kemuni sa biuti koya vakatikitiki.
12 "Oqo mo ni raica, na Kalou vakataki koya sa tiko vata kei keimami ka sa neimami liuliu, kei ira na nona bete era sa vakadavui tiko me ra uvuca yani veikemuni nai vakaro. Kemuni na luvei Isireli – mo ni kua ni vala vata kei Jiova na Kalou ni nomuni qase, ni kemuni na sega ni rawata!"
13 Sa cakava o Jeropoame e dua na buki vere me ra lako mai e dakudra na Juta. Era sa tu e liu vei ira na Juta, ka lako talega mai muri.
14 Ni ra sa veiraiyaki na Juta, era sa raica nai valu sa tiko ruarua ena yasana e liu kei na yasana e muri. Era sa tagi vei Jiova, ka ra sa uvuca na davui na bete.
15 Era sa qai kaila na Juta; ia ni ra sa kaila tiko na Juta, sa yaco ni sa ravuti Jeropoame kei ira kecega na Isireli na Kalou e na mata i Apaitia kei Juta.
16 Era sa dro na Isireli e na mata i Juta, ka sa soli ira na Kalou ki na ligadra na Juta.
17 O Apaitia kei ira na nona tamata era sa qai cakava e dua na veivakamatei levu; e lima na drau na udolu na tamata digitaki nei Isireli era vakamatei.
18 Sa yaco me ra vakamalumalumutaki na luve i Isireli e na gauna o ya; ka ra sa qaqa na luve i Juta, baleta ni ra vakararavi vei Jiova na Kalou ni nodra qase.
19 Ka sa vakacemuri Jeropoame o Apaitia ka taura mai vua na veikoro eso: O Peceli kei na kena veikoro lalai, o Jesana kei na kena veikoro lalai kei Ifereimi kei na kena veikoro lalai.
20 Sa sega ni kaukauwa tale o Jeropoame ena gauna nei Apaitia, sa vakamatei Jeropoame o Jiova.
21 Sa tubu na kaukauwa nei Apaitia, ka sa vakawatitaka e tinikava na yalewa, ka sa vakasucumi vua e ruasagavulu na luvena tagane kei na tinikaono na luvena yalewa.
22 Na vo ni tukutuku kei Apaitia kei na veika sa cakava, sa volai ena i vola nei Ito na parofita.


Chapter 14

1 Sa vakacegu vata kei ira na tamana o Apaitia ka era sa buluti koya ena Koro i Tevita. o Esa na luvena sa veiliutaki ena vukuna. Sa cegu na vanua me tini na yabaki ena nona gauna.
2 Sa cakava na ka e vinaka ka dodonu ena mata i Jiova na nona Kalou o Esa,
3 Sa talaraka na i cabocabo ni soro ni kalou tani kei na veitikina cecere, sa cavuraka na vei-duru vakatabui ka taya sobu na vei-matakau kau.
4 Sa vakaroti Juta o Esa me ra vakasaqarai Jiova na Kalou ni nodra qase ka vakamuria nai vunau kei na lewa.
5 Sa vakagalalataka o koya na veitikina cecere kei nai cabocabo ni ka boivinaka mai na veikoro kece e Juta, ka sa sautu tiko na vanua ena ruku ni nona lewa.
6 Sa tara na bai ni koro ni valu e Juta, ni sa cegu tiko na vanua; sa sega nai valu ena nona gauna baleta ni sa solia vei ira o Jiova na sautu.
7 Sa tukuna kina o koya vei Juta, "Me da tara na veikoro oqo kei na kena bai vakavolivolita, na nodra tikina nai vakatawa na matamata kei na kenai tatarovi ni se tiko e matada na vanua. Eda sa tarogi Jiova na noda Kalou, ka sa solia vei keda na vakacegu mai na veiyasana kecega." Era sa vakacokotaki ka tamata yaco tiko.
8 O Esa sa tolu na drau na udolu na nona sotia mai Juta era sa dau taura na moto kei nai sasabai, ka rua na drau walusagavulu na udolu na sotia mai Penijamini era sa taura nai sasabai kei na dakai titi. O ira kece oqo era sa tamata qaqa ni vala.
9 O Sera, na kai Iciopea sa mai valuti ira na Juta, sa lako vata mai e dua na milioni na sotia kei na tolu na drau na qiqi ni valu, ka sa lako mai i Mavesa.
10 Sa lako yani o Esa me vala vata kei Sera, sa caka na vakarau vakaivalu ena buca mai Sevaca e Maresa.
11 Sa tagi vei Jiova na nona Kalou o Esa ka vaka: "I Jiova sa sega ni dua na ka vei Kemuni na veivuke, vei ira na lewe levu se vei ira sa sega kina na kaukauwa; Mo ni vukei keimami. I Jiova na neimami Kalou, keimami sa mai cegu vei Kemuni, ena Yacamuni keimami na lakovi ira kina na lewe vuqa oqo, sai Kemuni na Kalou – me kua ni vakayaco lomana vei Kemuni na tamata!"
12 Sa ravuti ira na Iciopea ena matai Esa kei ira na Juta o Jiova, ka era sa veidroyaki na Iciopea.
13 O Esa vata kei ira na nona, era sa cici muri ira na Iciopea me yaco sara i Kerari, era sa vuaviritaki na Iciopea ka era sa sega ni rawa ni ra kumukumuni tale ni ra sa musuki vakadua mai vei Jiova kei na Nona mataivalu. Era sa kauta mai nai toki ni valu levu.
14 Era sa vakadruka kece na veikoro vakavolivoliti Kerari; ka sa tarai ira na rerevaka na Kalou, era sa curuma kece yani na koro kecega ka soqona mai e dua nai toki ni valu levu.
15 Era sa taura talega na manumanu susu na sipi, na kameli e levu sara, ka lesu ki Jerusalemi.


Chapter 15

1 Na yalo ni Kalou sa lako mai vei Asaraia na luvei Oteti.
2 Sa lako yani me sotavi Esa na tui, ka tukuna vua, "Mo rogoci Esa kei Juta kei Penijamini, sa tiko vata kei kemuni o Jiova, ni kemuni sa tiko vata kei Koya. Kevaka o ni na vakasaqarai Koya ena kune vei kemuni o Koya – kevaka o ni na biuti Koya, ena biuti kemuni o Koya.
3 "Ena dua na gauna balavu sa sega kina na Kalou dina e Isireli, sa sega na bete me veivakavulici ka sa sega na i vunau;
4 "Ia, ni sa yaco ga na leqa era sa vuki vei Jiova na Kalou ni Isireli, era sa vakasaqarai Koya, ka sa kune vei ira o Koya.
5 "Ena gauna talega o ya sa sega na vakacegu vei koya sa lako yani – vei koya talega sa lako mai, sa tiko ga na yavavala levu vei ira kece sa tiko ena vanua.
6 "E dua na matanitu sa vakarusa e dua tale na matanitu, na koro ki na dua tale na koro, ni sa vakaleqai ira tiko na Kalou ena veidredre kecega.
7 "Ia, o iko, mo kaukauwa tikoga ka me kua ni malumalumu na ligamu, baleta ni na saumi na cakacaka vinaka ni ligamu!"
8 Ni sa rogoca o Esa na veivosa oqo kei na parofisai nei luvei Oteti na parofita, sa vakaukauwataki koya ka kauta tani na matakau mai na vanua kece o Juta kei Penijamini kei na veikoro kece ena veiulunivanua e Ifereimi, ka sa vakavinakataka tale nai cabocabo ni soroi Jiova ka tu ena mata i Jiova.
9 Sa vakasoqoni ira kece mai na Juta kei na Penijamini kei ira sa tiko ena vanua vaka Ifereimi, Manasa kei Simione ni ra sa lako vakalewe levu mai vua o ira na Isireli – ni ra sa raica ni sa tiko vata kei koya na Kalou o Jiova.
10 Era sa soqoni vata mai e Jerusalemi ena i katolu ni vula, nai ka tinikalima ni yabaki ni lewa nei Esa.
11 Era sa vakacabora vei Jiova ena siga o ya e vitu na drau na bulumakau, e vitu na udolu na sipi mai na i toki ni valu era sa kauta mai.
12 Era sa vakadonuya me dua na veiyalayalati me ra vakasaqarai Jiova na Kalou ni nodra qase ena yalodra taucoko kei na lomadra taucoko;
13 O koya vakayadua ena sega ni vakasaqarai Jiova na Kalou ni Isireli, ena vakamatei, se gone se qase, se yalewa se tagane.
14 Era sa cakava na bubului ena mata i Jiova ena domo rogo levu, ena kaikaila kei na uvu davui, kei na davui caka ena i leu ni me.
15 Era sa marau kece na Juta ena bubului oqo, ni ra sa yalayala ena yalodra taucoko ka vakasaqarai Jiova ena lomadra taucoko; ka sa kune vei ira na Kalou, ka sa solia talega vei ira o Jiova na vakacegu ena veiyasana kecega.
16 Sa vakagalalataki Maeka, na tinai Esa na tui, mai na nona i tutu vaka tinani tui baleta ni sa cakava e dua na matakau luvawale kei Asera; sa taya sobu na matakau oqo o Esa ka vakama mai na mata ni wai e Kitironi.
17 Ia, na veitikina cecere sa sega ni kau tani mai Isireli. Sa dei tikoga na yaloi Esa vei Jiova ena nona bula taucoko.
18 Sa kauta talega mai ki na vale ni Kalou na veika kece sa vakacabora oti o tamana kei na veika talega sa vakacabora ga o koya, na siliva, na koula, kei na i yaya tale eso.
19 Sa sega nai valu me yacova na i ka tolusagavulu ka ciwa ni yabaki ni lewa nei Esa.


Chapter 16

1 Ena i ka tolusagavulu ka ono ni yabaki nei Esa, o Baesa na tui Isireli sa lako cake mai me valuti Juta, sa tarai Rama me kua ni dua e curu mai se me dua e curu yani vei Esa na tui Juta.
2 Sa kauta mai o Esa nai yau mai na vale i Jiova (na siliva kei na koula) mai na vale ni tui talega ka vakauta vei Penitati na tui Siria, o koya sa tiko mai Tamasiko ka vaka,
3 "Me dua na veidinadinati vei iko kei au, me vaka vei tamamu kei tamaqu. Raica, au sa vakauta yani vei iko na siliva kei na koula; lako mai ka tamusuka na nomu veiyalayalati kei Baesa na tui Isireli, me vakasuka tani kina mai vei au."
4 Sa vakarogoci tui Esa o Peniatati ka talai ira na nona liuliu ni mataivalu ki Isireli. Era sa valuti Ijoni, Tani, Epeli, Maimi, kei na veikoro kece ni maroroi yaya e Navitalai
5 Ni sa rogoca oqo o Baesa, sa tarova na tarai Rama cake, ka sa tuvakadua na cakacaka.
6 Sa kauti ira kece na Juta o Esa na Tui ka kauta tani na vatu kei na kau e a sa tarai cake kina o Rama, ka sa la'ki tarai Keba kei Misipa kina.
7 Ena gauna o ya sa lako mai kina o Enani na daurai vei Esa na tui Juta ka tukuna vua: "Baleta ni o sa vakararavi vei tui Siria ka sega ni vakararavi vei Jiova na Kalou – oqo era sa na dro kina na mataivalu nei tui Siria mai na ligamu.
8 "Era sa sega beka ni mataivalu levu na Iciopea, na Lubimi, ka sa tu vei ira e levu na qiqi ni valu kei na mataivalu ose? Io, baleta ni o sa vakararavi vei Jiova sa soli ira o Koya ki na ligamu.
9 "Ni sa veiciciyaki tiko na mata i Jiova e vuravura taucoko, me vakaraitaki Koya ena kaukauwa vei ira sa dina tiko na yalodra vei Koya. Ena ka oqo, o sa cakacaka kina vakaca sara vei au; o koya oqo sa na tekivu sara ga oqo, nai valu vei iko."
10 Sa cudru sara o Esa vei koya na daurai ka biuti koya sara ki vale ni veivesu ena vuku ni nona cudru katakata. O Esa sa vakatekivu veivakaocari vei ira eso ena gauna o ya.
11 Na i tukutuku kei Esa mai na kena tekivu ka yacova na kena oti, sa volai ena kedra i vola na tui e Juta kei Isireli.
12 Ena i ka tolusagavulu ka ciwa ni nona lewa, sa tauvimate kina o Esa ena yavana, ka sa vuvu ca sara, ia, ena nona tauvimate sa sega kina ni vakasaqara na Kalou, ia, sa lako ga vei ira na vuniwai.
13 Sa vakacegu vata kei ira na tamana o Esa, sa mate e nai ka vasagavulu ka dua ni yabaki ni nona lewa.
14 Era sa buluti koya ena nona i bulubulu ga, sa cakava ga o koya ena Koro i Tevita, era sa vakadavori koya ena i davodavo sa sinai kina na veika boivinaka sa vakarautaki vakavinaka. Sa dua na veivakamai vinaka sa caka vua.


Chapter 17

1 O Josevata na luvena sa lewa ena vukuna, ka sa vakaukauwataki koya ena vukudra na Isireli.
2 Sa biuti ira na mata sotia ena veikoro kece e Juta kei na i vakaruru ni valu ena vanua e Juta kei na veikoro vaka Ifereimi e a kovea mai o Esa na tamana.
3 Sa tiko vata kei Josevata o Jiova, baleta ni sa muria na sala i Tevita na tamana, sa sega ni via muri Peali,
4 ia, sa vakasaqara na Kalou i tamana ka muria na nonai vakaro ka sega ni vaka na nodra i valavala na Isireli.
5 Oqo na vuna, sa vakadeitaki kina na matanitu ena ligana; o ira kece na Juta, era sa soli ka ni loloma vei Josevata, ka sa rui levu sara tu vua na i yau kei na dokai.
6 Na yalona sa rekitaka na sala i Jiova; ni sa talaraka na veitikina cecere kei na veimatakau e Juta.
7 Ena i katolu talega ni yabaki ni nona veiliutaki, sa vakatalai ira na dauveivuke vua, o Penieli, o Opetaia, o Sakaraia, o Nacanieli kei Maikaia, me ra veivakavulici ena veikoro e Juta.
8 Sa vakatalai ira vata kei na Livai o Semaia, o Necanaia, o Sebadaia, o Aseli,. o Semiramoci, o Jeonacani, o Atonaija, kei Tobadonaija — o ira oqo na Livai, kei na rua na bete o Elisama kei Jorame.
9 Era sa veivakavulici e Juta, ni sa tiko vei ira nai Vola ni Vunau i Jiova; era sa lako yani ki na veikoro kece e Juta ka vakavulici ira na tamata.
10 Sa lutuka na matanitu kei na vanua taucoko na rerevaki Jiova – oqo na veivanua vakavolivoliti Juta, ka sa vakavuna na nodra sega ni via valuti Josevata.
11 Eso vei ira na Filisitia era sa kauta mai na i loloma vei Josevata, na siliva kei ira na kai Arapea era sa kauta mai e vitu na udolu vitu na drau na me tagane.
12 Sa tubu cake tiko ga na kaukauwa i Josevata ka sa tara na koro ni valu kei na koro ni maroroi yaya e Juta.
13 Sa levu na veika e taukena ena veikoro e Juta, kei na tamata qaqa, na tamata i valu era sa tiko e Jerusalemi.
14 Oqo na kedra i wiliwili – me vaka nai wiliwili ni vuvale i tamadra e Juta, na turaganivalu ni veiyaudolu: O Adena na turaganivalu, sa tiko vei koya e tolu na drau na udolu na tamata qaqa ni vala;
15 taravi koya, o Joanani na turaganivalu, sa tiko vata kei koya e rua na drau walusagavulu na udolu na tamata qaqa ni vala;
16 O Amasai na luvei Sikiri – o koya sa soli koya vei Jiova, sa tiko vua e rua na udolu na tamata qaqa ni valu.
17 Vei Penijamini; o Eliada na tamata qaqa ni vala, sa tiko vua e rua na udolu na tamata vaka dakai ka vaka i sasabai talega;
18 sa taravi Eliada o Jeosapate ni sa tiko vua e dua na drau walusagavulu na udolu sa vakarautaki oti tu me vala.
19 O ira oqo sa vakarau tu vua na tui, sa sega ni wili kina o ira sa biu tu ki na veikoro ni qaqa e Juta taucoko.


Chapter 18

1 Sa levu sara na nona dokai kei na nona i yau o Josevata, ena vuku ni vakawati talega, sa veiwekani kina kei Eapi.
2 Ena so na yabaki sa dau lako sobu kina vei Eapi i Samaria, sa dau vakamatea na sipi kei na bulumakau e levu sara o Eapi vei Josevata kei ira sa tiko vata kei koya, ka sa dau vakauqeti koya o Eapi me rau dau lako vata ki Ramoci Kiliati.
3 Sa tukuna o Eapi na tui Isireli vei Josevata na tui Juta, "E rawa beka ni o lako vata kei au, me valuti kina o Ramoci Kiliati." Sa sauma o koya ka vaka, "O kedaru, e daru duavata ga, na noqu tamata kei na nomu tamata erau na tovata enai valu."
4 Sa tukuna o Josevata vua na tui Isireli, "Mo vakataroga mada na vosa ni Kalou ena vuku ni siga oqo."
5 Sa vakasoqoni ira mai na parofita o tui Isireli, e vanadrau na tamata ka tukuna vei ira, "E dodonu beka me da lako cake ki Ramoci Kiliati ka vala kei ira, se me kua?" Era sa tukuna vua, "Mo lako cake, na Kalou ena solia ki na ligana na tui."
6 O Josevata sa taroga, "E se vo tale tiko beka e dua na parofita nei Jiova eke, me da tarogi Jiova mada?"
7 Sa tukuna na tui Isireli vei Josevata, "E se vo tiko e dua me vakatarogi ena vuku i Jiova: au sa dau cati koya vakalevu, baleta ni sa dau sega ni tukuna na veika vinaka me baleti au, sa veika ca kecega. O koya o Maikaia na luvei Imila". Sa tukuna yani o Josevata, "Me kua ni tukuna na tui e dua na ka vakaoqori!"
8 Sa qai kaciva mai e dua na nona dauveiqaravi o Tui Isireli, ka tukuna, "Me kau mai vakatotolo eke o Maikaia na luve i Imila!"
9 Na tui Isireli kei Josevata na tui Juta e rau sa qai daramaka na nodrau i ubi ka dabe ena nodrau i dabedabe vakatui, oqo e nai butubutu ni sila, ena matamata ni koro e Samaria; era sa parofisai kece na parofita ena matadrau.
10 O Setekaia na luvei Jenaena sa cakava na davui kaukamea me nona ga: ka sa tukuna, "Sa tukuna vaka oqo o Jiova, 'O na suasuaraki ira na kai Siria ena ka oqo, me yacova ni ra sa vakarusai.'"
11 Era sa parofisai kece na parofita ka vaka, "Mo ni lako cake ki Ramoci Kiliati, ni o Jiova ena solia ki na ligana na tui."
12 O koya nai talai sa talaki vei Maikaia sa vosa vua ka vaka, "Mo rogoca, na nodra vosa na parofita sa duavata ena kena vakauqeti na tui. O koya oqo na nomu vosa me vaka na nodra, mo tukuna na veivakayaloqaqataki."
13 Sa tukuna o Maikaia, "Me vaka sa bula o Jiova, na veika ga sa tukuna na noqu Kalou, au na tukuna."
14 Sa qai lako mai o koya ki vua na tui; ka sa tukuna vua o koya na tui, "Maikaia, me da lako cake beka meda vala kei Ramoci Kiliati, se me kakua?" E sauma o koya, "Mo ni lako cake ka qaqa, ni ra na soli ki na ligamuni!"
15 Sa mani tukuna vua na tui, "Me vakavica beka na noqu cakava mo bubuluitaka vei au ni o na sega ni tukuna tale vei au e dua na ka tani ia na ka dina ga e na yaca i Jiova?"
16 Sa qai tukuna o koya, "Au a raici ira na Isireli ni ra sa veiseyaki e na veiulunivanua, me vaka na sipi sa sega na kenai vakatawa." Ka sa tukuna o Jiova, 'O ira oqo sa sega na nodra i vakatawa. Me ra dui lesu tale ki na nodra vale e na vakacegu.'"
17 Sa qai tukuna na tui Isireli vei Josevata, "Au a sega beka ni tukuna vei iko, ni na sega ni parofisaitaka o koya e dua na ka vinaka me baleti au, na ka ca ga?"
18 Sa qai tukuna o Maikaia, "O koya oqo mo rogoca na vosa i Jiova: Au a raici Jiova ni tiko e na Nona i cewacewa vakaTuraga, kei ira kecega na lewe i lomalagi era tu e na Yasana i matau kei na Yasana i mawi.
19 "Ka sa tukuna mai o Jiova, 'O cei e na vakauqeti Eapi na tui Isireli me lako cake, ka me na bale e Ramoci Kiliati?' Sa mani dua e tukuna mai vakaoqo.
20 "Sa qai lako mai e dua na yalo ka mai tu e na mata i Jiova, ka tukuna, 'Au na vakauqeti koya.' Sa tukuna vua o Jiova, 'E na sala cava?'
21 "Sa tukuna o koya, 'Au na lako cake ka yaco me dua na yalo daulasu ki na gusudra na nona parofita.' Sa tukuna o Jiova, 'O na vakauqeti koya ka na gumatua talega; mo lako yani ka cakava sara.'
22 "O koya oqo mo raica! O Jiova sa biuta na yalo daulasu oqo e na gusudra na nomu parofita, ka sa vakaraitaka o Jiova na ka ca levu e na yacovi iko."
23 Sa qai lako voleka vei Maikaia o Setekaia na luve i Kenaena ka sabica na baluna, ka tukuna, "Na sala cava e muria na Yalo mai vei Jiova me lako tani mai vei au me vosa vei iko?"
24 Sa tukuna o Maikaia, "E dina o na raica e na siga o ya ni o na lako kina dua na loqi e loma sara mo vuni!"
25 Sa qai tukuna na tui Isireli, "Kauti Maikaia, ka vakasukai koya vei Amoni na Kovana ni koro kei Joasi na luve ni tui;
26 "Ka tukuna, 'Sa tukuna vakaoqo na tui: "Me biu na tamata oqo ki na vale ni veivesu, ka vakani koya e na madrai ni veivakararawataki kei na wai ni veivakararawataki, me yacova ni'u sa lesu mai e na vakacegu."'"
27 Ia sa tukuna o Maikaia, "Kevaka o na lesu mai e na vakacegu, ka e sega ni bau tukuna vei au o Jiova." Ka sa tukuna o koya, "Mo ni rogoca, oi kemuni kecega na tamata!"
28 E rau sa mani lako cake o tui Isireli kei Josevata na tui Juta ki Ramoci Kiliati.
29 Sa tukuna o tui Isireli vei Josevata, "Au na vakalecalecavi au ka lako cake ki nai valu; ia o iko mo daramaka tikoga na nomui ubi." Sa mani vakalecalecavi koya o tui Isireli, ka rau lako cake ki nai valu.
30 Ia oqo o tui Siria sa vakaroti ira na kavetani ni qiqi ni valu era a tiko kei koya ka vaka, "Dou kakua ni vala kei na dua e lailai se levu, ia o tui Isireli duadua ga."
31 Sa qai yaco, ni ra sa raici Josevata na kavetani ni qiqi ni valu, era sa tukuna, "Oqo o tui Isireli!" Era sa vakavoliti koya me ra valuta; ia o Josevata sa kaci yani, ka sa vukei koya o Jiova, ka sa vagolei ira tani mai vua na Kalou.
32 Sa vakakina, ni ra sa raica na kavetani ni qiqi ni valu ni sega ni o koya na tui Isireli, era sa gole tani mai na nodra cemuri koya.
33 Ia e dua na tamata e vanataka tu ga vakaveitalia na nona dakai titi, ka lauti tui Isireli e na maliwa ni sema ni nona i yaragi. Sa mani tukuna vua na draiva ni nona qiqi ni valu, "Saumaki lesu ka kauti au tani mai nai valu, ni'u sa lau gasau ka mavoa."
34 Sa tubu cake tiko nai valu e na siga o ya, ka sa vakaukauwataki koya o tui Isireli me tauri koya cake voli e na nona qiqi ka rai vaka ki Siria me yacova na yakavi; ia ena gauna sa dromu sobu kina na siga sa mate o koya.


Chapter 19

1 Sa qai lesu vakavinaka o Josevata na tui Juta ki na nona vale i Jerusalemi.
2 O Jeu na luve i Anani na daurai sa lako yani me sotavi koya, ka tukuna vei tui Josevata, "E dodonu beka mo vukei ira na dau caka ca ka lomani ira era cati Jiova? O koya oqo sa tiko kina kei iko na cudru i Jiova.
3 "Sa dina sara ni sa kune vei iko na veika vinaka, o ya ni o sa talaraka kecega na matakau mai na vanua, ka vakarautaka na yalomu mo vakasaqara na Kalou."
4 Sa tiko ga e Jerusalemi o Josevata; ka sa lako tale vei ira na tamata mai Perisepa ki na veiulunivanua vaka Ifereimi, ka kauti ira lesu mai vei Jiova na Kalou ni nodra qase.
5 Sa qai vakatikori ira na turaganilewa ena vanua taucoko e na loma ni vei koro kecega e Juta, mai na dua na koro ki na dua tale,
6 Ka tukuna vei ira na turaganilewa, "Mo ni qarauna na veika o ni sa cakava, ni o ni sega ni na lewa e na vuku ni tamata ia e na vuku i Jiova ga, o Koya sa tiko vata kei kemuni e na nomuni lewa.
7 "O koya oqo, me tiko vei kemuni na rerevaki Jiova; mo ni qarauna ka cakava sara, ni sa sega na caka ca vei Jiova na noda Kalou, se na veivakaduiduitaki, se taura nai lavo ni veivaqumi."
8 Ia e Jerusalemi, e na vuku ni vakatulewa i Jiova kei na vei duidui eso, sa lesia eso mai vei ira na Livai kei na bete o Josevata, kei na so vei ira era veiliutaki e Isireli, ni ra sa lesu i Jerusalemi.
9 Ka sa vakaroti ira, ka vaka, "Mo qai cakacaka e na rerevaki Jiova, e na yalodina kei na yalo e vakarorogo:
10 "Na mataqali leqa cava ga era kauta na tacimuni era tiko e na nodra veikoro, na vakadave dra se dua na ka e veicoqacoqa kei nai vunau se nai vakaro, nai lesilesi se na lewa, mo ni qai vakasalataki ira, de ra na qai cala vei Jiova ka lakovi kemuni kina kei ira na tacimuni na cudru ni Kalou. Mo ni cakava oqo, o ni na qai sega ni beitaki kina.
11 "Mo ni kila oqo: O Amaraia na bete levu na nomuni liuliu e na veika kecega ni Kalou; kei Sadaia na luve i Isimeli, nai liuliu ena vuvale i Juta, e na vuku ni veika kecega me baleta na tui; era na nomu daniveiqaravi o ira na Livai. Mo yalo qaqa, ena qai tiko vata kei ira kece na vinaka."


Chapter 20

1 Ni oti oqori era sa lako mai ka vakacibi i valu o ira na Moape kei ira na Amoni, kei ira tale eso ka ra to vata kei ira na Amoni, me ra mai valuti Josevata.
2 Era sa qai lako mai eso ka tukuna vei Josevata, ka vaka, "E dua nai wiliwili levu era sa lako tiko mai oqo vei iko mai na tai kadua ni wasawasa, mai Siria, ka ra sa tiko mai Esasoni Tamari" (oqori o Eniketi).
3 Sa rere o Josevata, ka sa vakarautaki koya me vakasaqarai Jiova, ka kacivaka me ra lolo taucoko na tamata e Juta.
4 Era sa mani soqoni taucoko na Juta me ra kerea na veivuke mai vei Jiova; era sa lako kece talega mai na veikoro kece e Juta me ra mai vakasaqarai Jiova.
5 Sa qai tucake tu o Josevata e na kedra maliwa na Juta kei Jerusalemi, e na loma ni vale i Jiova, e na mata ni butu rara vou,
6 ka tukuna: "Isa i Jiova na nodra Kalou na neimami qase, o ni sega li ni Kalou ni lomalagi, o ni sega li ni lewa na veimatanitu kei na veivanua, ka sega li ni tu e Ligamuni na kaukauwa kei na qaqa, me sega kina ni rawa ni duri e dua e Matamuni?
7 "O ni sega li ni neimami Kalou, o Koya ka vakacemuri ira tani nai taukei ni vanua oqo e matadra na Nomuni tamata na Isireli, ka solia vei ira na kawa i Eparaama na Nomuni i tokani me sega ni mudu?
8 "Ka ra sa vakaitikotiko kina, ka tara kina vei Kemuni e dua na vale e na Yacamuni, ka tukuna,
9 'Kevaka e na yacovi keimami na ca – nai seleiwau, na veicudruvi, mate ca, se dausiga – keimami na mai tu e na mata ni vale ni soro oqo kei na Matamuni talega ( ni sa tiko na Yacamuni e na vale ni soro oqo), ka tagi yani vei Kemuni e na neimami rarawa, ka o ni na rogoca ka veivakabulai.'
10 "Ia oqo, era sa tu oqo na Amoni, Moape, kei na ulunivanua o Sia, o ira o ni sega ni vinakata me valuti ira o Isireli e na gauna era lako tani kina mai na vanua o Ijipita, ia era a vuki tani mai vei ira ka sega ni vakarusai ira –
11 "Era sa tu oqo, me ra sauma vei keimami nira lako mai me vakasavi keimami tani mai na Nomuni vanua o ni a solia vei keimami me keimami taukena.
12 "Isa na neimami Kalou, o ni na sega li ni lewai ira? Ni sega vei keimami na kaukauwa me keimami vorata rawa kina nai soqosoqo levu oqo era sa lako mai vei keimami; se me keimami kila na ka me keimami na cakava, ia na matai keimami sa rai matua vei Kemuni."
13 Ia oqo o ira kecega na Juta, o ira talega na nodra lalai, na watidra, kei ira na luvedra, era sa mai tucake tu e na Mata i Jiova.
14 Na Yalo i Jiova sa qai curumi Jeasieli na luve i Sakaraia, na luve i Venaia, na luve i Jieli, na luve i Matanaia, e dua na Livai na luve i Esava, ni tucake tu e na kedra maliwa nai vavakoso.
15 Sa tukuna o koya, "Mo ni rogoca, oi kemuni kecega na Juta kei kemuni kecega na kai Jerusalemi, kei kemuni Josevata na tui! Sa vakaoqo na vosa i Jiova vei kemuni: 'Mo ni kakua ni rere se taqaya e na vukudra nai soqosoqo levu oqo, ni sa sega ni nomuni nai valu, ia sa Nona ga na Kalou.
16 'Ni mataka mo ni na lako sobu ka veivala kei ira. Era na lako cake vakaidina mai ki na Delana o Sisi, ka o ni na kunei ira e na bati ni mataniwai vaka ki na Vanua Liwa e Jerueli.
17 'O ni na sega ni gadrevi mo ni vala e nai valu oqo. Mo ni tuvai kemuni vinaka ga, tu vakadua ka raica na veivakabulai i Jiova, o Koya sa tiko vata kei kemudou, i Juta kei Jerusalemi!' Mo ni kakua ni rere se taqaya; ni mataka mo ni lako yani ka vorati ira, ni sa tiko vata kei kemuni o Jiova."
18 Sa vakacuva sobu na uluna o Josevata ka matana sobu ki na qele, kei ira kecega na Juta kei na kai Jerusalemi era sa cuva sobu e na matai Jiova, ka lotu vei Jiova.
19 O ira na Livai mai vei ira na luve i Koaca kei ira na luve i Kora era sa tucake ka vakavinavinaka vei Jiova na Kalou ni Isireli e na domo e rogo levu ka kaukauwa.
20 Era sa mani yadra vakamataka lailai ka lako yani ki na Vanua Liwa e Tekoa; ia ni ra sa lako yani, sa tucake o Josevata ka tukuna, "Mo ni rogoci au, i Juta kei kemuni na kai Jerusalemi: Mo ni vakabauti Jiova na nomuni Kalou, o ni na vakataudeitaki kina; mo ni vakabauti ira na Nona parofita, o ni na vakasaututaki kina."
21 Ni sa veivosaki oti kei ira na tamata o koya, sa lesi ira me ra na lagasere vei Jiova, kei ira me ra na vakavinavinakataka na totoka ni yalosavasava, ni ra sa lako e matadra na mataivalu ka tukuna: "Me vakavinavinakataki o Jiova, Ni sa sega ni mudu na Nona yalololoma."
22 Ia oqo ni ra sa tekivu me ra lagasere ka vakavinavinaka, sa cakava o Jiova nai lawaki ni valu vei ira na Amoni, na Moape kei na ulu-nivanua o Sia, o ira sa tuvai valu vei Juta; ka ra sa vakadrukai.
23 Baleta ni o ira na Amoni kei na Moape era sa veivorati kei ira nai taukei ni ulu-ni-vanua o Sia me ra vakamatei ira ka vakarusai ira vakadua sara. Ni rau sa vakaoti ira nai taukei ni ulu-nivanua o Sia, e rau sa qai veivakamatematei ga vakairau.
24 Ni ra sa yaco mai na Juta ki na dua na vanua cecere ka irova sobu na veikau, era sa rai yani vaka vei ira nai soqosoqo levu; era sa raica walega na yago ni tamata mate ni ra sa veidavoci tu. E sega ni dua e dro bula.
25 Ni sa lako yani o Josevata kei ira na nona tamata me ra kauta mai nai toki ni valu, era sa kunea ni sa ka levu sara nai yau e yaga ka tu vei ira na mate, kei nai ukuuku sau levu, era sa dui luvata tani me nodra, e sivia na ka era rawa ni kauta yani; era sa soqona vata tiko me tolu na siga baleta ni sa rui levu.
26 E nai kava ni siga era soqoni vata mai ki na Buca e Beraka, maikea era sa cavuta kina na vosa ni veivakacaucautaki vei Jiova; o koya oqo sa vakatokai kina na vanua o ya me Buca e Beraka me yacova mai na siga oqo.
27 Era sa qai lesu tale, o ira kecega na Juta kei na kai Jerusalemi, e liutaki ira o Josevata, ni ra lesu tale i Jerusalemi e na reki, ni sa vakavuna o Jiova na nodra reki e na vuku ni ka e yacovi ira na kedra meca.
28 Era sa mani lako mai ki Jerusalemi, kei nai vakatagi vakawa, na api kei na bitu ni vakatagi, ki na vale i Jiova.
29 Ia na rerevaka na Kalou sa kani ira kecega na veimatanitu ni veivanua oqori ni ra sa rogoca ni sa vala o Jiova kei ira na meca i Isireli.
30 Sa qai malumu na veiliutaki i Josevata, ni sa solia vua o Jiova na vakacegu e na veika kecega.
31 O Josevata e a tui e na vanua o Juta. E sa yabaki tolusagavulu ka lima o koya ni sa tekivu me tui,ka sa lewa mai Jerusalemi me ruasagavulu ka lima na yabaki. Na yaca i tinana o Asuva na luve i Sili.
32 Sa muria o koya nai valavala i Esa na tamana, ka sega ni lako tani mai kina, ka cakava na ka e dodonu e na mata i Jiova.
33 Ia e a sega ga ni kauta tani na veivanua cecere, ni se vo tiko ga vei ira na tamata me ra vakadodonutaka na yalodra vua na Kalou ni nodra qase.
34 Ia oqo na vo tale ni veika e cakava o Josevata, na kenai tekivu ki na kenai otioti, era sa volai vakaidina e nai vola i Jeu na luve i Anani, ka sa cavuti e na kedra i vola na tui e Isireli.
35 Ni sa oti oqori sa vakaveiwekanitaki koya o Josevata kei Esaia na tui Isireli, o koya e dua na tui i valavala ca.
36 Ka rau sa duavata me rau taya eso na waqa me ra soko ki Tasisi, ka rau sa taya na waqa kecega oqori mai Esioni Keveri.
37 Ia o Iliesa na luve i Totava mai Maresa sa parofisai e na vuku i Josevata, ka vaka, "Baleta ni o soli iko mo drau cakacaka vata kei Esaia, sa vakarusa kecega o Jiova na nomu cakacaka." Era sa voca kecega na waqa ka vakacacani me ra kakua ni soko rawa ki Tasisi.


Chapter 21

1 Sa vakacegu vata kei ira na tamana o Josevata, ka sa bulu vata kei ira na tamana e na koroi Tevita. Sa qai veiliutaki o Jeorame na luvena me kenai sosomi.
2 Eso na tacina, era luve i Josevata: O Asaraia, Jeieli, Sakaraia, Asariau, Mikaele, kei Sevataia; oiratou oqori na luve i Josevata na tui Isireli.
3 E solia vei ira o tamadra na siliva kei na koula kei na veika talei e ka levu me i loloma, kei na veikoro vakabai e Juta; ia e solia ga na matanitu vei Jeorame, baleta ni ulumatua vei ira.
4 Ia oqo ni sa vakadeitaka o Jeorame na matanitu nei tamana, sa vakaukauwataki koya ka vakamatei ira kecega na tacina e nai seleiwau kei ira talega na vei turaga eso e Isireli.
5 O Jeorame e sa yabaki tolusagavulu karua ni sa tekivu me tui, ka sa lewa me walu na yabaki e Jerusalemi.
6 Sa muria na nodra i valavala na tui Isireli, me vaka ga sa cakava na vale i Eapi, ni sa watina e dua na luve i Eapi; ka sa cakava na ka ca e na mata i Jiova.
7 Ia o Jiova e sega ga ni via vakarusa na vale i Tevita, baleta na veiyalayalati sa cakava vata kei Tevita, ka ni a yalataka me solia e dua na cina vua kei ira na luvena me sega ni mudu.
8 Ena nona gauna sa talaidredre o Itomi ki na lewa i Juta, ka bulia e dua me tui vei ira.
9 Sa mani lako o Jeorame kei ira na nona turaganivalu, kei na qiqi kecega ni valu. Sa tucake e na bogi ka valuti ira na Itomi o ira sa vakavolivoliti koya kei ira na kavetani ni qiqi ni valu.
10 Era sa talaidredre tikoga na Itomi ki na lewa i Juta me yacova mai na siga oqo. Ena gauna o ya sa talaidredre o Livina ki na lewa i Jeorame, baleta ni o koya e sa biuti Jiova na nodra Kalou na nona qase.
11 Sa cakava tale na veitikina cecere e na vei ulu nivanua e Juta, ka sa vakavuna o koya me ra volitaki ira me dautagane na kai Jerusalemi, ka liutaki ira vakatani na Juta.
12 Ka sa yaco mai vua e dua nai vola mai vei Ilaijia na parofita ka vaka, Sa tukuna vakaoqo o Jiova na Kalou i Tevita na tamamu: "Baleta ni o sega ni muria na sala i Josevata na tamamu, se na sala i Esa na tui Juta,
13 Ia o sa muria ga na nodra sala na tui Isireli ka vakavuna e Juta kei ira sa tiko e Jerusalemi me ra dauvolitaki ira me vaka na vale i Eapi, o sa vakamatei ira talega na tacimu, o ira mai na vale i tamamu, era sa vinaka cake vei iko,
14 Raica, o Jiova e na samuti iko kei ira na nomu tamata e na veivakararawataki levu – o ira na luvemu, o ira na watimu, kei na veika kecega o taukena;
15 Ena yaco mo tauvimate vakaca sara e na dua na mate ni nomu wawa, me yacova sara ni sa lutu mai na nomu wawa e na vuku ni kemu mate, e na veisiga veitarataravi."
16 O Jiova sa vakauqeta na yalodra na kai Filisitia kei ira na Arapea era tiko volekati Iciopea me ra valuti Jeorame.
17 Era sa mani lako cake mai ka kabai Juta vakaivalu, ka kauta yani na veika vinaka kecega e kune e na vale ni tui, kei ira na luvena tagane kei ira na watina, me sega tale ni dua na luvena e vo vei koya o Jeoeasi ga, na luvena tagane e gone duadua.
18 Ni sa oti kece oqo sa vakatauva o Jiova e na nona wawa e dua na mate e sega ni dua na kenai wali.
19 Sa qai yaco e na kena gauna, ni sa oti e rua na yabaki, sa qai lutu mai tuba na nona wawa e na vuku ni tauvimate; sa mani mate o koya e na dua na mosi levu. Ka ra mani sega ni vakamai koya na nona tamata, me vaka na nodra dau vakamai na tamana.
20 E a sa yabaki tolusagavulu karua o koya e na gauna sa tui kina. Sa lewa e Jerusalemi me walu na yabaki, ka sega e rarawataka na nona mate. Ia era sa mani buluti koya ga e na Koro i Tevita, ia e sega e na nodra i bulubulu na tui.


Chapter 22

1 Era sa qai vakatikori Esaia na luvena gone duadua me tui me kenai sosomi o ira nai taukei e Jerusalemi, ni ra sa vakamatei taucoko na vo ni luvena e na ligadra na nodra i to na Arapea.
2 Sa yabaki vasagavulu ka rua o Esaia e na gauna sa tui kina. Sa veiliutaki me dua na yabaki e Jerusalemi. Na yaca i tinana o Atalaia na makubui Omeri.
3 Sa muria talega o koya na sala e lakova na vuvale i Eapi, ni sa vakasalataki koya talega o tinana me cakava na veika vakasisila.
4 O koya oqo, sa cakava kina o koya na ka ca e na mata i Jiova, me vaka na vuvale i Eapi; ni ra sa nona daunivakasala talega ni sa mate oti o tamana, me yacova na nona vakarusai.
5 Sa muria talega o koya na nodra i vakasala, ka lako vata kei Jeorame na luve i Eapi na tui Isireli me veivala kei Asaeli na tui Siria e Ramoci; Kiliati; Era sa vakamavoataki Jorame na kai Siria.
6 Sa qai lesu tale ki Jeserieli me la'ki vakaceguya mada na nona mavoa e a yaco vua mai Rama, ni a vala vata kei Asaeli na tui Siria. O Asaraia na luve i Jeorame na tui Juta, sa lako sobu me sikovi Jeorame na luve i Eapi e Jeserieli, baleta ni sa tauvimate tiko.
7 Na nona lako vei Jorame sai tuvatuva ni Kalou vei Esaia e na nona vakabalei sobu; ni sa yaco yani, e rau sa lako vata sara kei Jeorame me rau valuti Jeu na luve i Nimisai, o koya sa lumuta o Jiova me muduka tani na vuvale i Eapi.
8 Ia sa yaco, ni sa vakatauca tiko o Jeu na lewa e na vuvale i Eapi, sa raici ira na turaga ni Juta kei na luvedra na taci Esaia ka ra a veiqaravi vei Esaia, ka vakamatei ira.
9 Sa qai vakasaqarai Esaia; ka ra toboki koya (e vuni tiko o koya mai Samaria), ka kauti koya mai vei Jeu. Ni ra sa vakamatei koya, era sa buluti koya, "baleta," era tukuna, "E luve i Josevata o koya, o koya e a vakasaqarai Jiova e na yalona taucoko." Sa yaco me sega ni dua e na vuvale i Esaia e tiko me taura nai tutu ni veiliutaki ena matanitu.
10 Ia oqo o Atalaia na tinai Esaia ni sa raica sa mate na luvena, sa tucake ka vakamatei ira kecega era kawa vakatui e na yavusa i Juta.
11 Ia o Jeosabeci, na luvena yalewa na tui, sa tauri Joasa na luve i Esaia tagane ka butakoci tani mai vei ira na luve ni tui era sa vakamatei, ka biuta kei na nona meimei e na dua na rumu ni moce. O Jeosabeci, na luve i Jeorame yalewa, na wati Jeoiada na bete (ni sa gane i Esaia na tui o koya), sa vunitaki koya mai vei Atalaia me kakua kina ni vakamatei koya.
12 Sa vunitaki o koya vata kei ira e na vale ni Kalou me ono na yabaki, ni lewa tiko o Atalaia na vanua.


Chapter 23

1 E nai kavitu ni yabaki sa vakaukauwataki koya o Jeoiada, ka cakava e dua na veiyalayalati kei ira na kavetani ni yadrau: O Asaraia na luve i Jeroame, oisimeli na luve i Jeonani, o Asaraia na luve i Opeti, o Measeia na luve i Adaia, kei Ilisavate na luve i Sikiri.
2 Era sa lako yani e Juta taucoko ka vakasoqoni ira kece mai na Livai mai na veikoro kecega e Juta, kei ira nai liuliu kecega e Isireli, ka ra lako mai ki Jerusalemi.
3 Era sa qai cakava e dua na veiyalayalati nai soqosoqo levu kei na tui e na vale ni Kalou. Ka sa tukuna vei ira o koya, "Raica, na luve ni tui e sa na veiliutaki, me vaka sa tukuna o Jiova e na vukudra na luve i Tevita.
4 "Oqo na veika mo ni na cakava: Me dua nai katolu vei kemuni me na curu yani e na Siga ni Vakacecegu, mai vei ira na bete kei na Livai, me ra yadrava na katuba;
5 "Dua nai katolu me na tiko ena vale ni tui; kei na dua nai katolu e na Matamata ni Yavu. Na tamata kecega me ra tiko e na loma ni bai ni vale i Jiova.
6 "Ia me kakua ni dua e lako mai ki na vale ni kalou ka vakavo ga o ira na bete kei ira na Livai era mai veiqaravi. Edodonu me ra curu i loma ni ra sa savasava; ia na tamata kecega me yadravi Jiova tikoga.
7 "O ira na Livai me ra vakavolivolita na tui e na yasana kecega, na tamata yadua me tiko e ligana na nonai yaragi; o koya vakayadua e na curu mai e vale, me na vakamatei. Mo ni na tiko vata kei na tui e na nona curu mai kei na nona curu yani."
8 O ira na Livai kei ira keceg na Juta, era sa cakava me vaka sa vakarota o Jeoiada na bete. O ira nai liuliu era sa dui tauri ira na nona tamata me ra na veiqaravi e na Siga ni Vakacecegu, vata kei ira era na sega ni veiqaravi e na Siga ni Vakacecegu; ni a sega ni vakasukai ira na veiwasewase o Jeoiada.
9 O Jeoiada sa solia vei ira na kavetani ni yadrau na moto kei nai sasabai lelevu kei nai sasabai lalai e a nei Tevita na Tui, era a tu e na vale ni Kalou.
10 Sa qai tuvai ira na tamata kecega, na tamata yadua e taura tu na nonai yaragi e ligadra, mai na yasa i matau ni vale ni soro ki na yasa i mawi ni vale ni soro, era tuva e na yasa ni cabocabo ni soro kei na vale ni soro, vakavolivolita na tui.
11 Era sa qai kauta mai na luve ni tui, ka vakaisalataki koya e nai sala vakatui, ka solia vua nai Vakadinadina, ka buli koya me tui. Sa qai lumuti koya o Jeoiada kei ira na luvena, ka tukuna, "Me bula balavu na tui!"
12 Ia oqo ni sa rogoca o Atalaia na domodra na tamata ni ra cici ka vakacerecereya tiko na tui, sa lako mai vei ira na tamata ki na vale i Jiova.
13 Ni rai yani, sa raica na tui ni sa tucake tu e na duru ni nona duru ni matamata; kei ira nai liuliu kei ira na dauuvu davui ni ra sa tu e yasa ni tui. O ira na tamata kecega e na vanua era sa reki vakalevu ka uvu davui, kei ira talega na dau lagasere kei na nodra i vakatagi, kei ira na veiliutaki e na vakavinavinaka. Sa mani bsuka na nonai sulu o Atalaia ka tukuna, "Na Vuaviri! Na Vuaviri!"
14 Ia o Jeoiada na bete sa kauti ira mai na kavetani ni yadrau era sa lesi me liutaka na mataivalu, ka tukuna vei ira, "Kauti koya yani ka yadravi koya, ka vakamatei ira kecega e nai seleiwau na tamata era muri koya." Ni sa tukuna o koya na bete, "Kakua ni vakamatei koya e na vale i Jiova."
15 Era sa qai vesuki koya; ka sa lako yani o koya e na sala vaka ki na Matamata ni Ose me basika ki na vale ni tui, ka ra vakamatei koya mai kea.
16 Sa qai cakava o Jeoiada e dua na veiyalayalati e na kedra maliwa, o koya, o ira na tamata, kei na tui, me ra sa na tamata ga i Jiova.
17 Era sa lako na tamata kecega ki na vale ni soroi Peali ka basuka sobu. Era sa basuraka vakalalai na kenai cabocabo ni soro kei na kena matakau ka vakamatei Maatani na bete i Peali e na mata ni cabocabo ni soro.
18 Sa lesia talega o Jeoiada na kena yadravi na vale i Jiova ki na ligadra na bete, na Livai, o ira ka lesia o Tevita ki na vale i Jiova, me ra vakacabora nai soro kama vei Jiova me vaka sa volai e nai Vunau i Mosese, ena yalo mamarau kei na lagalagasere, me vaka e a tauyavutaka o Tevita.
19 Ka sa lesi ira nai vakatawa ni matamata me ra yadrava na matamata ni vale i Jiova, me kakua ni dua e dukadukali me na curu kina.
20 Sa qai tauri ira na kavetani ni yadrau, o ira na tamata turaga, o ira na kovana ni tamata, kei ira kecega na tamata e na vanua, ka kauta sobu mai na tui mai na vale i Jiova; era sa lakova yani na Matamata e Cake ki na vale ni tui, ka vakatikora na tui e nai dabedabe vakatui.
21 Era sa reki vakalevu na tamata kecega e na vanua; sa vakanomodi na koro, ni ra sa vakamatei Atalaia e nai seleiwau.


Chapter 24

1 E se qai yabaki vitu o Joasa e na gauna sa tui kina, ka sa lewa e Jerusalemi me vasagavulu na yabaki. Na yaca i tinana o Sibia mai Perisepa.
2 Sa cakava o Jeoiada na veika sa dodonu e na mata i Jiova e na veisiga kece i Jeoiada na bete.
3 Sa kauta vua o Jeoiada na bete e rua na yalewa me watina, ka sa so kina na luvena tagane kei na luvena yalewa.
4 Sa yaco ni sa oti oqo sa vagolea na yalona o Joasa me vakavinakataka na vale i Jiova.
5 Sa vakasoqoni ira mai na bete kei na Livai ka tukuna vei ira, "Mo ni lako ki na veikoro kecega e Juta ka kumuna mai vei ira na Isireli kecega nai lavo me vakavinakataki kina na vale ni nomuni Kalou, mai na yabaki oqo ka lako yani, ka mo ni raica me caka vakatotolo." Ia era mani sega ni cakava vakatotolo na nodra i tavi na Livai.
6 Sa mani kacivi Jeoiada na bete levu na tui, ka tukuna vua, "Na cava o a sega ni vakaroti ira kina na Livai me ra kauta mai vei ira na Juta kei Jerusalemi na veika sa kumuni rawa, me vaka nai vakaro i Mosese nai talatala i Jiova kei na nai soqosoqo ni Isireli, me baleta na vale ni veidinadinati?"
7 Ni o ira na luvei Atalaia, na yalewa i valavala ca o ya, era sa basuka na vale i Jiova ka sa vakacabora na veika tabu ni vale i Jiova vei Peali.
8 E nai vakaro ni tui era sa qai cakava e dua na kato, ka biuta tiko e na matamata ni vale i Jiova.
9 Era sa vakauta e Juta kei Jerusalemi taucoko nai tukutuku me ra kauta mai vei Jiova nai lavo sa kumuni me vaka e a vakarota o Mosese nai talatala ni Kalou vei ira na Isireli mai na vanua liwa.
10 Era sa qai reki vakalevu nai liuliu kei ira kecega na tamata, era sa kauta mai na nodra i solisoli, ka mai biuta e na loma ni kato vakarautaki me yacova ni ra sa soli na tamata kecega.
11 Sa mani yaco, e na gauna o ya, ni sa kau mai na kato ki vei ira na dauveiqaravi ni tui e na ligadra na Livai, ka ra raica ni sa rui levu nai lavo, e rau sa qai lako mai na vunivola ni tui kei na dauveiqaravi ni bete levu ka sova nai lavo mai na kato, ka kauta lesu tale ki na kenai tokatoka. Oqo era cakava tiko e na veisiga veitaravi, ka kauta mai vakalevu nai lavo me sivia.
12 E rau sa solia na tui kei Jeoiada ki vei ira era cakava na cakacaka ni veiqaravi e na vale i Jiova; e rau sa saumi ira na matai ni vale kei na dauta i yaya me ra vakavinakataka na vale i Jiova, kei ira talega na matai ni kaukamea kei na varasa me ra vakavinakataka tale na vale i Jiova.
13 ra sa mani cakacaka na matai, ka ra sa vakaotia na cakacaka; era sa vakalesuya tale na vale ni Kalou kina kenai tutu e liu ka vakataucokotaka.
14 Ni ra sa vakaotia na cakacaka, era sa vakalesuya tale na vo ni lavo ena mata ni tui kei Jeoiada; e rau sa cakava kina nai yaya eso ni vale i Jiova, nai yaya ni veiqaravi kei na vakacaboi soro, nai taki kei na bilo koula kei na siliva. Ka ra sa vakacabora nai soro kama e na vale i Jiova e na veisiga kecega sa bula tiko kina o Jeoiada.
15 Ia sa qase sara o Jeoiada ka sa levu na nona veisiga, ka sa mate; sa yabaki dua na drau tolusagavulu o koya e na gauna sa mate kina.
16 Era sa buluti koya e na Koro i Tevita e na kedra maliwa na tui, baleta ni sa cakava na ka vinaka e Isireli, ruarua ki vua na Kalou kei na Nona Vuvale talega.
17 Ia oqo ni sa mate oti Jeoiada era sa lako mai nai liuliu e Juta ka cuva vua na tui. Sa vakarorogo vei ira o koya na tui.
18 O koya oqo era sa biuta na vale i Jiova na nodra Kalou na tamadra, ka qarava na matakau kei nai vakatakarakara; ka sa yacovi Juta kei Jerusalemi na cudru katakata ni Kalou baleta na nodra talaidredre.
19 Ia o Koya sa talai ira na parofita kivei ira, me kauti ira lesu tale mai vei Jiova; ka ra sa beitaki ira e na nodra i valavala, ia era sa sega ga ni via vakarorogo.
20 Sa qai lako mai na Yalo ni Kalou vei Sakaraia na luve i Jeoiada na bete, o koya sa tu e matadra na tamata, ka tukuna vei ira, "Sa tukuna vakaoqo na Kalou: 'Na cava dou sa talaidredre kina ki nai vakaro i Jiova, mo dou sega kina ni rawata na vinaka? Baleta ni dou sa biuti Jiova, sa biuti kemudou vaka talega kina o Koya.'"
21 Era sa mani bukiveretaki Sakaraia, ia e nai vakaro ni tui era sa vakaviriki koya e na vatu e na loma ni vale i Jiova.
22 Ia na tui o Joasa sa sega tale ni nanuma na veika vinaka sa cakava vua o Jeoiada na tamana, ia sa vakamatea ga na luvena; ia ni sa voleka ni mate o koya, sa tukuna, "Sa raica o Jiova, ka na sauma!"
23 Sa qai yaco e na vulai tubutubu e na yabaki o ya sa lako mai na mataivalu ni Siria me veivala kei koya; ka ra lako mai ki Juta kei Jerusalemi, ka vakamatei ira kecega nai liuliu ni tamata e na kedra maliwa na tamata, ka vakauta kecega nai toki ni valu vua na tui e Tamasiko.
24 Ni sa lako mai na mataivalu ni Siria kei na dua nai wase lailai ga ni tamata; ia o Jiova sa soli ira e dua na mataivalu levu ki na ligadra, baleta ni ra sa biuti Jiova na Kalou ni nodra qase. Era sa mani tauca na lewa me baleti Joasa.
25 Ni ra sa vakasuka mai vua (era sa biuti koya ni sa mavoa vakaca sara), era sa bukiveretaki koya lo na nona tamata e na vuku ni nodra dra na luve i Jeoiada na bete, ka vakamatei koya e na nonai davodavo. Sa mani mate o koya. Era sa buluti koya e na Koro i Tevita, ia era sega ni buluti koya e na nodra i bulubulu na tui.
26 O ira oqo era a bukiveretaki Joasa, o Sabati na luve i Simeci na yalewa ni Amoni, kei Jeosavati na luve i Simirici na yalewa ni Moape.
27 Oqo me baleti ira na luvena kei na veika me baleti koya vakai koya, kei na vakavinakataki ni vale ni Kalou, e dina era sa volai e na kedra i tukutuku na tui. Sa qai tui o Amasaia na luvena me kenai sosomi.


Chapter 25

1 Sa yabaki ruasagavulu ka lima o Amasaia e na gauna sa tui kina, ka sa lewa me ruasagavulu kaciwa na yabaki e Jerusalemi. Na yaca i tinana o Joadani na yalewa ni Jerusalemi.
2 Sa cakava o koya na veika e dodonu e na mata i Jiova, ia e sega ena yalo e dina.
3 Ia sa yaco, ni sa vakadetaki na matanitu kivua, sa vakamatei ira na nona dauveiqaravi era a vakamatei tamana na tui.
4 Ia e sega ga ni vakamatei ira na luvedra, ia sa cakava me vaka Vunau sa volai e nai Vola i Mosese, e na vanua sa vakarota kina o Jiova, ka vaka, "O ira na tama era na sega ni mate e na vuku ni luvedra, se o ira na luvedra era na sega ni mate e na vuku ni tamadra; ia na tamata yadua ena mate ga e na vuku ni nonai valavala ca."
5 Sa vakasoqoni ira vata na Juta o Amasaia ka lesia vei ira na kavetani ni veiudolu kei na kavetani vei yadrau, me vaka na veivuvale ni dui tamadra, e na vanua taucoko o Juta kei Penijamini; sa taura o koya na kedra i wiliwili mai na yabaki ruasagavulu ka lako cake, ka sa kunea ni ra lewe tolu na drau na udolu na tamata digitaki, era vakarau tu ki nai valu, era rawa ni tauri moto kei nai sasabai.
6 Sa saumi ira talega e dua na drau na udolu na tamata qaqa ni valu mai vei Isireli e nai lavo e rua na drau tinikawalu na udolu na dola.
7 Ia sa lako mai vua e dua na tamata ni Kalou ka tukuna, "Kemuni na tui, me ra kakua ni lako vata kei kemuni na Isireli, ni sa sega ni tiko vata kei Isireli o Jiova – e sega ni tiko vata kei na dua vei ira na luve i Ifereimi.
8 "Kevaka o na lako ga, mo lako ga! Mo qaqa e nai valu! E dina ga, Ni Kalou ena cakava mo ni druka e na matadra na meca; ni sa tu vua na Kalou na kaukauwa me vukea se me vakadruka."
9 Sa qai tukuna o Amasaia vua na tamata ni Kalou, "Ia na cava me keimami cakava e na vuku ni lavo au sa solia oti vei ira na mataivalu nei Isireli?" Sa sauma mai na tamata ni Kalou, "Na Kalou e rawa ni solia vei iko me levu cake mai na ka oqo."
10 Sa mani vakasukai ira na mataivalu era a lako mai kivua mai Ifereimi, ka tukuna me ra dui lesu ki na nona vale. O koya oqo era sa cudru sara kina vakalevu vei Juta, ka ra sa lesu i vale e na cudru levu.
11 Sa vakaukauwataki koya o Amasaia, ka liutaki ira na nona tamata, ki na Buca ni Masima ka vakamatei ira e tini na udolu na tamata mai Sia.
12 O ira na luvei Juta era sa kauta lesu tale vakavesu e tini na udolu ki na ulu-ni-vanua veivatu, ka viritaki ira sobu mai na ulunivanua veivatu oqo, me ra dasila vakamatailalai.
13 Ia o ira na sotia ka vakatala o Amasaia, me ra kua ni lako vata kei koya ki nai valu, era sa valuta na veikoro e Juta mai Samaria ki Beci Oroni, ka ra vakamatea e tolu na udolu na tamata, ka kauta vakalevu nai toki ni valu.
14 Ia sa vakaoqo, ni sa lesu mai o Amasaia e na nona valuti ira na Itomi, sa mani kauta mai o koya na nodra kalou na kai Sia, e vakaturi ira cake me ra nona kalou, ka cuva sobu vei ira ka vakama na ka boi vinaka vei ira.
15 O koya oqo sa tubu vakalevu sara kina na cudru i Jiova vei Amasaia, ka vakatala o Koya e dua na parofita ki vua me tukuna, "Na cava o sa vakasaqara kina na nodra kalou na tamata oqo, ni ra sega mada ga ni rawa ni vakabulai ira na nona tamata mai na ligamu?"
16 Ia sa yaco, ni se vosa tikoga o koya, sa tukuna vua o koya na tui, "Keimami a sa lesia beka mo nona daunivakasala na tui? Sa Rauta! Na cava mo na vakamatei kina?" Sa qai cegu na parofita, ka tukuna, "Au sa kila ni sa nakita na Kalou me vakarusai iko baleta ni o sa cakava oqo ka sega ni via rogoca na noqu i vakasala."
17 Ia oqo sa kerea nai vakasala o Amasaia na tui Juta ka talatala vei Joasa na luvei Joasi, na luve i Jeu, na tui Isireli, ka vaka, "Mo lako mai me daru mai veiqaravi mada e nai valu."
18 O Joasa na tui Isireli sa talatala vei Amasaia na tui Juta, ka tukuna, "Na soni ka tu mai Lepanoni sa kau kina sitari mai Lepanoni, ka tukuna, 'Mo solia na luvemu yalewa me watina na luvequ tagane'; ka sa lako mai e dua na manumanu kila mai Lepanoni ka butuka na veisoni.
19 "E dina ga o sa tukuna ni o sa vakadruaki Itomi, o sa dokadoka sara kina. Tiko vakadua e nomu vale nikua; na cava o via vakayavalata kina na leqa, mo lutu ga kina o iko – o iko kei Juta taucoko vata kei iko?"
20 Ia e sega ni via rogoca o Amasaia, ni sa lako mai vua na Kalou, me soli ira kina ki na ligadra na meca, baleta ni ra sa vakarogoci ira na kalou ni Itomi.
21 Sa lako yani o Joasa na tui Isireli ka rau sa sota kei Amasaia na tui Juta e Beci Semesi, na vanua nei Juta.
22 Sa vakadrukai Juta o Isireli, ka ra sa dui dro na tamata kecega ki na nodra vale laca.
23 O Joasa na tui Isireli sa qai vesuki Amasaia na tui Juta, na luve i Joasa, na luve i Jeoasa, e Beci Semesi; ka kauti koya mai ki Jerusalemi, ka basuka sobu na bai kei Jerusalemi mai na Matamata nei Ifereimi ki na Matamata e Tutu – e rua na drau nai yate.
24 Sa taura kece o koya na koula kei na siliva, nai yaya kece sara e na vale ni Kalou vata kei Opeti – Itomi, nai yau kecega ena vale ni tui, kei ira na kaivesu, ka lesu i Samaria.
25 O Amasaia na luve i Joasa, na tui Juta, e bula tiko me tinikalima na yabaki ni sa mate oti o Joasa na tui Isireli.
26 Na vo ni veika kece sa cakava o Amasaia, mai na kenai tekivu ki na kenai otioti, e dina era sa sega beka ni volai e na kedra i vola na tui e Juta kei Jerusalemi?
27 Ni sa oti na gauna e a vuki tani kina o Amasaia mai vei Jiova, era sa bukia na kena vere mai Jerusalemi, ka sa dro o koya ki Lakisi ka vakamatei koya mai kea.
28 Era sa vakavodoki koya mai ena ose ka mai buluti koya vata kei ira na nona qase e na Koro i Juta.


Chapter 26

1 Ia oqo na tamata kecega e Juta era sa tauri Usaia ni se qai yabaki tinikaono ga ka buli me tui mei sosomi kei Amasaia na tamana.
2 Sa tarai Elaci cake ka vakalesuya tale vei Juta, ni sa vakacegu oti na tui vata kei ira na tamana.
3 O Usaia e se qai yabaki tinikaono ni sa yaco me tui, ka sa lewa me limasagavulu ka rua na yabaki e Jerusalemi. Na yaca i tinana o Jekolai na yalewa ni Jerusalemi.
4 Sa cakava na ka e dodonu e na mata i Jiova o Usaia, me vaka na ka kecega sa cakava o Amasaia na tamana.
5 Sa vakasaqara na Kalou e na gauna kecega i Sakaraia, o koya e kila vinaka na raivotu e baleta na Kalou; ka me vaka ga na balavu ni nona vakasaqara na Kalou, sa vakasaututaki koya na Kalou.
6 Ia oqo sa lako yani na tui me vala kei ira na Filisitia, ka basuraka sobu na bai ni koro o Kaca, na bai kei Javena, kei na bai kei Asidodo; ka tara na veikoro era vakavolivoliti Asidodo e na kedra maliwa na Filisitia.
7 Sa vukei koya na Kalou mai vei ira na kai Filisitia, vei ira na kai Arapea era tiko mai Quru Peali, kei ira na Maoni.
8 Era sa kau ka ni loloma talega mai vei Usaia o ira na Amoni. Sa tubu na kenai rogorogo me yaco sara ki Ijipita, ka ni sa yaco o koya me kaukauwa sara vakalevu.
9 Ka sa tara o Usaia na veivale cecere e Jerusalemi e na Matamata mai na Tutu kei na Matamata mai na Buca, kei nai gole ni bai ni koro; ka vakaukauwataka.
10 Sa tara talega o koya na veivale cecere mai na vanua liwa. Sa kelia e levu na tobu ni wai, ni sa rui levu na nona manumanu e na buca kei na vanua lolovira; sa levu talega na nona dauteitei kei ira na dau qarava na vaini e na veiulunivanua, mai Kameli talega, ni sa dau taleitaka vakalevu na vakayagataki qele.
11 Sa levu talega na sotia nei Usaia ka ra sa lako yani vakalewe levu ki nai valu, me vaka na kedra i wiliwili sa vakarautaka o Jeieli na dau ni vosa ni Kalou kei Measeia na vunivola, e na ruku ni ligai Ananaia, e dua vei ira na nona kavetani na tui.
12 Na kedra i wiliwili na turaganivalu ni mata sotia qaqa oqo e rua na udolu ono na drau taucoko.
13 Ena ruku ni nodra veiliutaki e tiko kina e tolu na udolu ka vitu ka mani lima na drau na sotia qaqa, era sa dau vala ka gumatua, me ra vukea na tui e na nodra valuti na meca.
14 Sa qai vakarautaka vei ira o Usaia na tui, vei ira kece na mataivalu, nai sasabai, na moto, nai sala kaukamea, na kote ni vala, na dakai titi, kei nai rabo me rabotaki kina na vatu.
15 Ka sa cakava o koya eso na vanua ni vanavana e Jerusalemi, era cakava na kena dau, me tiko e na veivale cecere kei na tutu, me ra na dau vanataki mai kina na gasau ni dakai kei na vatu lelevu. Sa kuruseta na veivanua taucoko na kenai rogorogo, ni sa vukei vakalevu me yacova ni sa yaco me tamata kaukauwa.
16 Ia ni sa kaukauwa mai, sa tubu talega na nona dokadoka, me yacova na nona vakarusai, ni sa talaidredre vei Jiova na Kalou, e na nona curu ki na vale ni soro i Jiova ka vakama na veika boi vinaka e na kenai cabocabo.
17 Sa muri koya yani o Asaraia na bete, kei ira e lewe walusagavulu tale na bete i Jiova — era tamata qaqa.
18 Era mai tu e na mata i Usaia na tui, ka tukuna vua, "E sega ni nomui tavi, Usaia, mo vakama na ka boi vinaka vei Jiova, e nodra i tavi na bete, na luve i Eroni, o ira sa vakatabui me ra vakama na ka boi vinaka. Mo lako tani mai na vale ni soro, ni o sa lako sivia mai na nomui yalayala! O na sega ni dokai mai vei Jiova na Kalou."
19 Sa qai cudru vakalevu o Usaia; ka sa taura tu e ligana e dua na bilo ni vakama ka boi vinaka. Ia ni se cudruvi ira tikoga na bete, sa basika mai na vukavuka mai na buradelana ka lako sobu, e matadra na bete e na loma ni vale i Jiova, e na yasa ni cabocabo ni ka boi vinaka.
20 O Asaraia na bete levu kei ira kecega na bete era sa vakaraici koya, ka raica, ena buradelana, sa vukavuka o koya; era sa mani biliraki koya tani mai ki tautuba. E dina ni sa lako vakatotolo ga yani o koya ki tautuba, baleta ni sa totogitaki koya o Jiova.
21 Sa vukavuka o Usaia me yacova sara na nona mate. Sa la'ki tiko vakatikitiki e na dua vale, baleta ni sa vukavuka; ni sa vakatabui mai na vale i Jiova o koya. Sa qai lewa na vale ni tui o Jocame na luvena, me vakatulewa tiko vei ira na tamata e na vanua.
22 Na kena vo ni veika sa cakava o Usaia, mai na kenai matai me yacova na kenai otioti, sa vola o Aisea na parofita na luve i Emosi.
23 Sa vakacegu vata kei ira na tamana o Usaia, ka sa bulu vata kei ira na tamana e na kedra i bulubulu na tui, ni ra sa tukuna, "Sa vukavuka o koya." Sa qai lewa o Jocame na luvena me kenai sosomi.


Chapter 27

1 Sa yabaki ruasagavulu kalima o Jocame e na gauna sa tui kina. Sa lewa me tinikaono na yabaki e Jerusalemi. Na yaca i tinana o Jerusa na luve i Setoki. 2 Ka sa cakava na veika e dodonu e na mata i Jiova me vaka na veika kece sa cakava o Usaia na tamana (E dina ga ni sega ni curuma na vale ni soroi Jiova). Ia na tamata era se cakacaka ga vakailawaki. 3 Sa tara cake na Matamata e Cake ni vale i Jiova, ka sa tara vakavinaka sara na bai kei Ofeli. 4 Sa tara talega na veikoro e na veiulunivanua e Juta, ka sa tara talega nai drodro ni valu kei na vale cecere mai veikau. 5 Sa valuti koya talega na tui Amoni ka vakadrukai ira. o ira na Amoni era sa solia vua e na yabaki o ya e rua na drau na udolu na dola e na siliva, e tini na udolu na taga valawa, kei na tini na udolu na taga sila. 6 Sa yaco me tamata qaqa o Jocame, baleta ni sa vakarautaka na nonai lakolako e na mata i Jiova na nona Kalou. 7 Na kena vo ni veika sa cakava o Jocame, kei na nonai valu kei na nona sala kecega, e dina era sa volai e na kedra i vola na tui e Isireli kei Juta. 8 Sa yabaki ruasagavulu kalima e na gauna sa tekivu tui kina, ka sa lewa me tinikaono na yabaki e Jerusalemi. 9 O Jocame sa vakacegu vata kei ira na tamana, ka ra sa buluti koya e na Koro i Tevita. Sa qai lewa o Easi na luvena me kenai sosomi.


Chapter 28

1 Sa yabaki ruasagavulu o Easi e na gauna sa tui kina, ka sa lewa e Jerusalemi me tinikaono na yabaki; ka sa sega ni cakava na ka sa vinaka e na mata i Jiova, me vaka e a cakava o Tevita na tamana.
2 Ni sa muria ga na nodra sala na tui Isireli, ka sa bulia na matakau ceuti vei ira na Peali.
3 Sa vakama na ka boi vinaka e na buca e nodra na luve i Inomi, ka vakamai ira na luvena e na bukawaqa, me vaka na nodra vakasisila na veimatanitu ka sa vakasava tani o Jiova e matadra na luve i Isireli.
4 Sa vakacabora ka vakama na ka boi vinaka e na veitikina cecere, e na veidelana kei na vei ruku ni vunikau kecega.
5 O koya oqo sa soli koya kina o Jiova na nona Kalou ki na ligai tui Siria. Era sa vakadrukai koya, ka ra sa kauta vakavesu e dua nai wiliwili levu vei ira, ka kauti ira mai ki Tamasiko. Sa soli talega ki na ligai tui Isireli, ni sa vakadrukai e na dua na veivakamatei levu.
6 Ni o Peka na luve i Ramalia sa vakamatea e dua na drau ruasagavulu na udolu e Juta e na dua ga na siga, era tamata qaqa kecega, balet ni ra sa biuti Jiova na Kalou ni nodra qase.
7 O Sikiri, na tamata qaqa ni Ifereimi sa vakamatei Measaia na luve ni tui, o Asirikama nai liuliu ni vale, kei Elikana o koya sai karua vua na tui.
8 O ira na luve i Isireli era sa kauti ira vakabobula na tacidra e lewe rua na drau na udolu, o ira na yalewa, na luvedra tagane, na luvedra yalewa, era sa kauta talega e levu sara nai toki ni valu me nodra, era sa kauta kece mai oqo ki Samaria.
9 Ia sa tiko mai Samaria e dua na parofita i Jiova, na yacana o Oteti; ka sa lako e na matadra na mataivalu era sa lako mai ki Samaria, ka tukuna vei ira: "Raica, baleta ni sa cudru vei Juta o Jiova na nodra Kalou na nomuni qase, sa soli ira kina ki na ligamuni; ia o ni sa vakamatei ira sara vakaca e na cudru levu ka sa tarai lomalagi.
10 "Ia oqo o ni sa vakasaurarataki ira na luve i Juta kei Jerusalemi me ra nomuni bobula tagane kei na bobula yalewa; ia o ni a sega li ni beitaki talega e na mata i Jiova na nomuni Kalou?
11 "Oqo mo ni rogoci au, mo ni vakalesui ira kece sara na vesuki, o ira o ni a kauta mai vakabobula mai vei ira na tacimuni, ni sa tau vei kemuni na cudru waqawaqa i Jiova."
12 Eso vei ira nai liuliu ni yavusa i Ifereimi, o Asaraia na luve i Joanani, o Berekaia na luve i Mesiemoce, o Jeisikaia na luve i Salumi, kei Amasa na luve i Adalai, era sega ni duavata kei ira na lesu mai nai valu,
13 ka tukuna vei ira, "Mo ni kakua ni kauti ira mai ki ke na vesuki, ni da sa caka cala oti tu vei Jiova. O ni sa vinakata mo ni vakaikuritaka na noda beitaki kei na noda ii valavala ca, ni sa levu tu mada ga na noda beitaki, ka sa levu talega na cudru katakata e na vuku i Isireli."
14 O ira na sotia era sa mani biuti ira na kaivesu kei nai toki ni valu e matadra nai liuliu kei nai soqosoqo taucoko.
15 O ira kecega sa kacivi na yacadra era sa qai tucake ka tauri ira na vesuki, ka kauta mai nai toki ni valu eso nai sulu ka vakasulumi ira kina era luvawale e na kedra maliwa, ka vakaivavataki ira, ka solia vei ira na kakana kei na gunu, ka lumuti ira e na waiwai; ka vakavodoki ira sa malumalumu e na asa. Era sa kauti ira mai ki vei ira na tacidra e Jeroko, na koro ni vei niusawa. Era sa qai lesu tale ki Samaria.
16 E na gauna vata ga o ya, o Easi na tui sa talatala vei ira na tui ni veivanua e Asiria me ra vukei koya.
17 Ni ra sa lako tale mai na Itomi, era valuti Juta, ka kauti ira tani na bobula.
18 O ira talega na Filisitia era sa curuma na veikoro e na vanua lolovira kei na ceva kei Juta, ka tauri Beci Semesi, Aijaloni, Kederoci, Soko kei na kena veikoro lalai, o Kimiso kei na kena veikoro lalai, ka ra sa mai tiko kina.
19 O Jiova sa kauti Juta sobu ki ra baleti Easi na tui e Isireli, ni sa vakauqeta o koya na bula toro sobu e Juta, ka sa vakuria tikoga na nona sega ni yalo dina vei Jiova.
20 O Tikilaci-Pilesa na tui Asiria sa lako mai vei Easi ka vakayalocataki koya, ka sega ni via vukei koya.
21 Ni sa taura o Easi eso nai yau mai na vale i Jiova, mai na vale talega ni tui, mai vei ira na veiliutaki, ka solia yani vei tui Asiria; ia e a sega ga ni vukei koya.
22 E na gauna sa tarai Easi kina na lomaleqa sa tubu vakalevu cake na nona sega ni yalodina vei Jiova. Oqo o koya na tui o Easi.
23 Ni sa vakacaboi soro tiko ki vei ira na kalou ni Tamasiko, o ira ka vakadrukai koya, ka tukuna, "Baleta na nodra kalou na tui mai Siria sa vukei ira, au na vakacaboi soro ki vei ira, me rawa ni ra vukei au." Ia era sa vu ga ni vakaloloma vei koya kei ira na Isireli.
24 O Easi sa vakasoqona na veiyaya kece ni vale ni Kalou, ka vorovorolaka vakalalai na veiyaya kece ni vale ni Kalou, ka sogota kece na katuba ni vale ni Kalou, ka cakava nai cabocabo ni soro e na yasana kece e Jerusalemi.
25 Ena veikoro kece e Juta sa cakava na veitikina cecere me vakama kina na ka boi vinaka vei ira na kalou tani ka vakavuna me cudru kina o Jiova na nodra Kalou na nodra qase.
26 Na vo ni veika sa cakava o koya kei na nonai valavala, mai na kenai matai ki na kenai otioti, e dina era sa volai e na kedra i vola tukutuku na tui e Juta kei Isireli.
27 Sa vakacegu vata kei ira na tamana o Easi, ka ra sa buluti koya e na koro, e Jerusalemi; ia era sa sega ni kauti koya mai ki na nodra i bulubulu na tui e Juta kei Isireli. Sa qai tui o Esekaia me kenai sosomi.


Chapter 29

1 Sa tui o Esekaia ni se qai yabaki ruasagavulu kalima, ka lewa e Jerusalemi me ruasagavulu kaciwa na yabaki. Na yaca i tinana o Avaija na luve i Sakaraia.
2 Sa cakava na veika e dodonu e na mata i Jiova, me vaka na veika kecega sa cakava o Tevita na tamana. Sa Vakasavasavataka Na Vale Ni Soro O Esekaia
3 E nai matai ni yabaki ni nona lewa, e nai matai ni vula, sa dolava na katuba ni vale i Jiova ka vakavinakataka.
4 Sa kauti ira mai na bete kei na Livai ka vakasoqoni ira vata e na tikina e tuba,
5 Ka tukuna vei ira, "Mo ni rogoci au, na Livai! Moi vakasavasavataki kemuni, mo ni vakasavasavataka na vale i Jiova na nodra Kalou na nomuni qase, ka kauta tani na benu mai na tikina tabu.
6 "Ni ra sa caka cala na noda qase ka cakava na ka ca e na mata i Jiova na noda Kalou; era sa biuti Koya, ka vagolea tani na matadra mai na vanua sa tiko kina o Jiova, ka vuki tani mai vua.
7 "Era sa sogota na katuba e nai curucuru ki loma, ka bokoca na cina, sa sega ni vakamai tiko na ka boi vinaka se me ra vakacabora tiko nai soro kama e na tikina tabu, vua na Kalou ni Isireli.
8 "Oqo sa tarai Juta kei Jerusalemi tiko kina na cudru i Jiova, ka sa soli ira yani ki na veileqa, me ra vakararawataki ka vakidacalataki, me vaka o ni sa raica e matamuni.
9 "Ena vuku ni veika oqo, era sa bale kina e nai seleiwau na tamada; o ira na luveda tagane kei na luveda yalewa kei ira na watida era sa vakabobulataki.
10 "Oqo sa yaloqu kina me'u cakava na veiyalayalati kei Jiova na Kalou ni Isireli, me lako tani kina vei keda na Nona cudru waqawaqa.
11 "Kemuni na luvequ, me da kakua ni vakawelewele, ni sa digitaki kemuni o Jiova mo ni tu e Matana, mo ni qaravi Koya, ka mo ni lotu Vua ka vakama na ka boi vinaka."
12 Era sa qai tucake na Livai: Maeca na luve i Amasai kei Joeli na luve i Asaraia, mai vei ira na luve i Koaca; mai vei ira na luve i Merari, o Kisi na luve i Abidi kei Asaraia na luve i Jealelieli; mai vei ira na luve i Keresoni, o Joa na luve i Sima kei Iteni na luve i Joa;
13 Mai vei ira na luve i Elisavani, o Simiri kei Jeieli; mai vei ira na luve i Esava, o Sakaraia kei Matanaia;
14 O ira na luve i Emani, o Jeieli kei Simei; kei ira na luve i Seducani, o Semaia kei Usieli.
15 Era sa soqoni ira mai na tacidra, ka vakasavasavataki ira vakai ira, ka caka me vaka na nonai vakaro na tui, mai na vosa i Jiova, me vakasavasavataki na vale i Jiova.
16 O ira na bete era sa lako e na tikina ni vale sara e loma ni vale i Jiova ka vakasavasavataka. Era sa kauta tani mai tuba na duka kecega era sa kunea mai na vale ni soro i Jiova ki na bai e taudaku ni vale i Jiova. O ira na Livai era sa kauta tani sara ki na Mata ni Wai mai Kitironi.
17 Sa vakatekivu me ra vakasavasavataka e nai matai ni siga ni matai ni vula. E nai kawalu ni siga ni vula, era sa lako mai e nai curucuru ni tikina e loma ni vale i Jiova. Era sa mani vakasavasavataka na vale i Jiova e na walu na siga, ia e nai ka tinikaono ni siga e nai matai ni vula era sa vakaotia.
18 Era sa qai lako vei Esekaia na Tui ka tukuna, "Keimami sa vakasavasavataka oti na vale i Jiova, nai cabocabo ni soro kei na kenai yaya kecega, na teveli ni madrai e dauraici kei na kena yaya kecega.
19 "Nai yaya kece talega sa vakacacana o Easi na Tui e na gauna ni nona lewa keimami sa vakarautaka ka vakasavasavataka; ka ra sa tu mai kea, e na mata ni cabocabo ni soro i Jiova."
20 Sa sou e na mataka o Esekaia na Tui, ka vakasoqoni ira vata mai na veiliutaki e na koro, ka sa lako cake ki na vale i Jiova.
21 Era sa kauta mai e vitu na bulumakau yadru, e vitu na sipi yadru, kei na vitu na sipi gone, kei na vitu na me yadru me i soro ni valavala ca ni matanitu, me i soro talega ni vale ni soro, me i soro talega i Juta. Sa qai vakaroti ira na bete na luve i Eroni me ra vakacabora e nai cabocabo ni soro i Jiova.
22 Era sa vakamatea na bulumakau yadru, o ira na bete era sa taura na kena dra ka kureitaka e nai cabocabo ni soro, sa vaka kina ki na dra ni sipi yadru kei na dra ni sipi gone, era sa kureitaki kece ki nai cabocabo ni soro.
23 Sa qai kau mai na me yadru e na mata ni tui mei soro ni valavala ca, e na matadra talega nai soqosoqo levu, e na ligadra era sa tabaka kina na me e vitu oqori.
24 O ira na bete era sa vakamatea, era sa vakacabora na kena dra e nai cabocabo ni soro me i soro ni valavala ca, na ka me ra sorovaki kina na Isireli kecega, ni sa vakarota na tui, ni soro kama kei nai soro ni valavala ca me caka e na vuku i Isireli taucoko.
25 Sa vakatikori ira na Livai e na vale i Jiova vata kei na nodra sibali, na qita, na api, me vaka nai vakaro i Tevita na tui, e na vuku i Kaata na daurai ni tui, kei Nacani na parofita, ni oqo sai vakaro ni Kalou mai vei koya na Nona parofita.
26 O ira na Livai era sa tu vata kei nai yaya ni vakatagi nei Tevita, o ira na bete era sa taura tiko na davui.
27 O Esekaia sa vakarota me ra vakacabora nai soro kama e nai cabocabo ni soro. Ni sa tekivu na kena vakamai nai soro, sa tekivu talega na sere vei Jiova, sala vata kei na davui kei nai yaya ni vakatagi nei Tevita na tui Isireli.
28 Era sa lotu vei Jiova nai soqosoqo kecega, era sa lagasere na daunisere, sa rorogo mai na davui, sa caka tiko vakaoqo me yacova ni sa kama kece nai soro kama.
29 Ni sa oti na veika e vakacabori, era sa qai cuva sobu ka lotu vei Jiova na tui kei ira kece sa tu vata kei koya.
30 O Esekaia na tui kei ira na veiliutaki era sa vakaroti ira na Livai me ra lagata na veivakacerecerei vei Jiova e na reki, era sa vakacuva sobu na uludra ka lotu vei Jiova.
31 Sa qai sauma yani o Esekaia ka tukuna, "Oqo ni kemuni sa vakatabui kemuni tale vei Jiova, ni toro voleka mai, ka kauta mai nai soro kei nai madrali ni vakavinavinaka ki na loma ni vale i Jiova." Era sa kauta mai nai soro kei nai madrali ni vakavinavinaka o ira nai soqosoqo, me vaka na lewe levu ni tamata era vinakata e yalodra era sa kauta mai nai soro kama.
32 Na levu ni soro kama era sa kauta mai nai soqosoqo e vitusagavulu na bulumakau yadru, dua na drau na sipi yadru, rua na drau na sipi gone; oqori me vakacabori kece me i soro kama vei Jiova.
33 Na ka sa vakatabui e ono na drau na bulumakau yadru kei na tolu na udolu na sipi.
34 Ia era sa lewe lailai ga na bete, era sa sega ni rawata na drudruga kece nai soro kama; era sa mani mai vukei ira O ira na tacidra na Livai me yacova sara ni sa oti na cakacaka ka ra sa vakasavasavataki ira oti talega na vo ni bete, ni ra sa yalo dina na Livai e na nodra vakasavasavataki ira mai vei ira na bete.
35 Sa levu sara nai soro kama kei na kena uro mei soro ni veivinakati, kei nai soro laugunu e nai soro kama kecega oqori. Na veiqaravi ni vale i Jiova sa tuvai vakamatau kece.
36 O Esekaia na Tui kei ira na tamata kecega, era sa reki vakalevu cake baleta ni sa vakarautaki ira na tamata na Kalou, e dina mada ga ni sa rui yaco vaka-totolo na veika oqo.


Chapter 30

1 O Esekaia sa tukutuku vei ira kece na Isireli kei ira na Juta, ka vola talega nai vola vei rau oifereimi kei Manasa, me ra lako kece mai ki na vale i Jiova e Jerusalemi, me ra maroroya na "Lako sivia i Jiova na Kalou ni Isireli."
2 Ni o koya na tui kei ira kecega na nona veiliutaki kei ira kecega sa tiko e Jerusalemi era sa duavata me ra maroroya na Lako Sivia e nai karua ni vula.
3 Ni ra sa sega ni maroroya rawa e na kena gauna dodonu, baleta ni dua nai wase levu ni bete era se bera ni vakasavasavataki ira, ka se bera talega ni ra soqoni mai ki Jerusalemi na tamata kecega.
4 Na veika oqo sa vakalomavinakataka na tui kei ira nai soqosoqo kece.
5 Era sa duavata me dua na vakatutu e Isireli taucoko mai Perisepa ki Tani, me ra lako mai ki Jerusalemi me ra maroroya na "Lako Sivia" ki vei Jiova na nodra Kalou, baleta ni ra sa sega tu ni cakava na kenai valavala dina mai na dua na gauna balavu.
6 Era sa qai cici yani vakatotolo na dau kau i tukutuku ki na veivanua taucoko e Isireli kei Juta ni ra kauta nai vola mai vua na tui kei ira na veiliutaki, ka vosa me vaka nai vakaro ni tui: "Kemuni na luve i Isireli, mo ni lesu vei Jiova na Kalou i Eparama, Aisake, kei Isireli; ena qai lesu mai vei kemuni nai vovo vei ira sa dro bula mai na ligadra na tui Asiria.
7 "Mo ni kakua ni vakataki ira na tamamuni kei ira na tacimuni, o ira oqo sa talaidredre vei Jiova na Kalou ni nodra qase, ka sa soli ira o Koya me ra vakaloloma me vaka o ni sa raica.
8 "Mo ni kakua ni vakalomaqatataki kemuni, me vakataki ira na nomuni qase, ia mo ni soli kemuni ga vei Jiova ka curu yani ki na Nona Vale Tabu, sa vakatabuya o Koya me sega ni mudu, ka qaravi Jiova na nomuni Kalou, me na lako tani kina vei kemuni na Nona cudru waqawaqa.
9 "Kevaka o ni sa lesu tale vei Jiova, o ira na luvemuni kei ira na makubumuni era sa kune loloma mai vei ira sa kauti ira vakavesu, me rawa ni ra na lesu tale mai ki na vanua oqo, ni sa rui yalololoma ka dauloloma o Jiova na nomuni Kalou, ka na sega ni vagolea tani na Matana mai vei kemuni kevaka o ni sa lesu tale vua."
10 Era sa lako yani na dau tukutuku ki na veikoro kece e Ifereimi kei Manasa me yaco sara i Sevuloni; ia era sa dredrevaki ira ka vakalialiai ira.
11 Ia eso mai Esa, Manasa, kei Sevuloni era vakamalumalumutaki ira ka ra lako mai ki Jerusalemi.
12 Na Ligai Jiova talega sa tiko e Juta me solia vei ira na yalovata me ra muria nai vakaro ni tui kei ira na veiliutaki, me vaka na vosa ni kalou.
13 Ia oqo sa lewe levu sara na tamata, sa dua nai soqosoqo levu, era sa soqoni mai Jerusalemi me ra maroroya na kana vata ni Madrai sega ni vakai vakatubu (sega ni vakaleveni) e nai karua ni vula.
14 Era sa tucake ka basuraka nai cabocabo ni soro kecega sa tu e Jerusalemi, ka kauta tani kecega nai cabocabo ni ka boi vinaka ka viritaka yani kina wai mai Kitironi.
15 Era sa vakamatea na lami ni Lako Sivia e nai ka tinikava ni siga ni karua ni vula. o ira na bete kei ira na Livai era sa madua, ka a ra sa vakasavasavataki ira, ka ra sa kauta mai nai soro kama ki na vale i Jiova.
16 Era sa tu ena nodra i tutu me vaka na kenai vakarau, me vaka na Lewa i Mosese na tamata ni Kalou; era sa kureitaka na dra o ira na bete e na nodra taura mai na ligadra na Livai.
17 Ni levu vei ira e nai soqosoqo era se bera ni vakasavasavataki ira; oqo era sa liutaka kina na kena vakamatei na Lami ni Lako Sivia o ira na Livai ena vukudra kecega na sega ni savasava, me ra vakasavasavataki kina vei Jiova.
18 E dua nai wase levu ni tamata mai vei ira na Ifereimi, Manasa, Isakari, kei Sevuloni era se bera ni vakasavasavataki ira, ia era sa kania ga na Lako Sivia ka sega ni vaka na ka e volai. Ia sa masulaki ira o Esekaia, ka vaka, "Me vakarautaka na Turaga vinaka o Jiova na veisorosorovi vei ira vakayadua oqo.
19 "O koya sa vakarautaka na yalona me vakasaqara na Kalou, o Jiova na Kalou ni nodra qase, e dina ga ni se sega ni savasava me vaka na veivakasavasavataki ni vale tabu."
20 Sa rogoci Esekaia o Jiova, ka vakabulai ira na tamata.
21 O ira kece na luve i Isireli era sa tiko e Jerusalemi, era sa vakaitavi e na magiti ni Kanavata ni Madrai Sega ni Vakaleveni me vitu na siga, e na marau levu; o ira na Livai kei ira na bete, era sa vakacerecerei Jiova e na veisiga ka ra sa lagasere vei Jiova e na kena vakayagataki nai yaya ni vakatagi rogo levu.
22 Sa solia na veivakauqeti o Esekaia vei ira na Livai ka era sa dau vakavulica na veikilai vinaka i Jiova; era sa kana e na solevu taucoko me vitu na siga, ka vakacabora nai soro ni veivinakati ka vakatutusa tiko vei Jiova na Kalou ni nodra qase.
23 Era sa duavata nai soqosoqo kece me toso na solevu oqo me vitu tale na siga, ka era sa tosoya me vitu tale na siga ena marau levu.
24 O Esekaia na tui Juta sa solia vei ira nai soqosoqo levu e dua na udolu na bulumakau yadru, vitu na udolu na sipi, ka ra sa solia nai liuliu e dua na udolu na bulumakau yadru, kei na tini na udolu na sipi; e dua nai wase levu ni bete era sa vakasavasavataki ira.
25 Era sa mamarau nai soqosoqo taucoko e Juta, o ira talega na bete kei na Livai, o ira kece nai soqosoqo era sa lako mai Isireli, o ira na vulagi era tiko e Isireli kei ira kece era tiko e Juta.
26 Sa qai yaco e dua na reki levu e Jerusalemi, mai na gauna i Solomoni na luve i Tevita, na tui Isireli, e sega ni yaco tale e dua na ka me vakaoqo e Jerusalemi.
27 O ira na bete, na Livai, era sa qai tucake ka vosa vakalouvinakataki ira na tamata, ka sa rogoci na domodra; kei na nodra masu sa lako cake mai ki na Nonai tikotiko lagilagi, ki lomalagi.


Chapter 31

1 Ni sa oti kece na veika oqo, era sa lako kecega na Isireli era a tiko e kea ki na veikoro kecega e Juta ka vorovorolaka nai cabocabo ni soro, era taya sobu na vei matakau kau, ka vakarusa na veitikina cecere kei na kenai cabocabo ni soro O e Juta taucoko, Penijamini, Ifereimi, Manasa O me yacova ni ra sa vakarusai kece sara. Era sa qai dui suka lesu tale na luve i Isireli kecega ki na nodra veikoro, na tamata yadua ki na nonai votavota.
2 O Esekaia sa digitaki ira na dui mata bete kei na Livai me vaka na nodra dui wasewase na tamata yadua ki na nonai tavi, na bete kei na Livai e na vuku ni soro kama, kei nai soro ni veivinakati, me ra veiqaravi, me ra vakavinavinaka, ka vakacerecerei Jiova e na matamata ni tikotiko i Jiova.
3 Sa vakarautaka talega na tui e dua nai wasewase ni nonai yau me ka ni soro kama; me baleta nai soro kama ni mataka kei nai soro kama ni yakavi, nai soro kama ni Siga ni Vakacecegu kei na vula vou kei na vei solevu tale sa volai e nai vola ni Vunau i Jiova.
4 Sa vakaroti ira talega na tamata era tiko e Jerusalemi me ra kauta mai nai katini me ra tokoni kina na bete kei na Livai, me ra na vakadetaki ira tikoga ki nai Vunau i Jiova.
5 Ena gauna ga sa tarai ira yani kina na luve i Isireli kei Juta nai vakaro oqo, era sa kauta mai vakalevu nai sevu ni vuata kecega, nai sevu ni waini, waiwai, nai sevu ni de-ni-o ni kei na veika kecega sa solia mai na vanua, ka ra sa kauta mai vakalevu nai katini ni veika kecega.
6 O ira na luve i Isireli kei Juta, o ira sa tiko e na veikoro e Juta, era sa kauta mai nai katini ni bulumakau kei na sipi, nai katini ni veika tabu sa vakatabui me nei Jiova na nodra Kalou ka sa cere tu na kenai binibini.
7 E nai katolu ni vula, era sa tekivu binia vata, ka taura e va na vula na kena caka tiko na cakacaka oqo.
8 Ni sa lako mai o Esekaia kei ira na veiliutaki ka raica na veika sa bini tu oqo, era sa vakacerecerei Jiova ka vakalouvinakataki ira na Nona tamata na Isireli.
9 Sa qai tarogi ira na bete kei na Livai o Esekaia na tui me baleta na veika sa bini tu oqo.
10 Ia o Asaraia na bete, mai na vale i Setoki, sa sauma mai ka vaka, "Me tekivu mai na gauna era sa kauta mai kina na tamata nai soro (solisoli) ki na vale i Jiova, sa qai levu na keimami kakana ka levu talega e vo, ni sa vakalouvinakataki ira na Nona tamata o Jiova; ka sa ka levu na ka sa vo tu oqo."
11 Sa vakaroti ira na tamata o Esekaia me vakarautaki na veitikina e na vale i Jiova, ka ra sa vakarautaka.
12 Era sa kauta mai e na yalodina na nodra i soro, nai katini, kei na veika kece sa vakacabori; o Kononaia na Livai sa nodra i liuliu, kei Simei na tacina sa taravi koya.
13 O Jeieli, Amasaia, Neaci, Asaeli, Jerimoce, Josevate, Ilieli, Isimakaia, Meaci, kei Venaia era sa vakaraica na veika oqo e na ligai Kononaia kei Simei na tacina, e nai vakaroi Esekaia na tui kei Asaraia nai liuliu e na vale ni Kalou.
14 O Koa na luve i Imina na Livai, nai vakatawa ni Matamata e na Tokalau, sa vakaraica na soli ka ni loloma vei Jiova, na kena wasei nai solisoli vei Jiova kei na veika e tabu sara.
15 Sa tiko e rukuna o Iteni, o Miniamini, Josua, Semaia, Amaraia, kei Sekanaia, o iratou na nonai vukevuke yalodina e na veikoro ni bete, me ra dau wasea nai votavota vei ira na tacidra e na nodra dui wasewase, vei ira na lelevu kei ira na lalai.
16 E yasadra na tagane mai na yabaki tolu me yacovi ira sara sa volai na yacadra e nai vola ni kawabula, era sa wasea vei ira yadua era curuma yani na vale i Jiova na kedra i votavota ni veisiga e na vuku ni nodra veiqaravi, e na nodra dui wasewase,
17 kei ira talega na bete era sa volai e na nodra dui vola ni kawa me vaka na vuvale i tamadra, kei ira na Livai era sa yabaki ruasagavulu ka lako cake ka me vaka na nodra cakacaka, e na nodra dui wasewase,
18 kei ira kece sa volai e nai vola ni kawa O na nodra lalai kei na dui watidra, na luvedra tagane kei na luvedra yalewa, na nodra i wasewase taucoko O e na nodra yalodina, era sa tawasei ira me ra ka tabu sara.
19 Vei ira talega na luve i Eroni na bete, era sa tiko e na vanua mai na nodra veikoro, e na veikoro yadua, sa tu kina o ira sa digitaki na yacadra ka lesi me ra dau wasea nai votavota, vei ira na tagane kece era bete kei ira kecega na Livai sa tu na yacadra e nai vola ni kawa.
20 Sa cakava oqo o Esekaia e Juta taucoko, ka sa cakava na veika e vinaka, e dodonu ka dina e na mata i Jiova na nona Kalou.
21 E na cakacaka kecega sa tekivuna e na kena qaravi na vale ni Kalou, e nai vunau kei nai vakaro, me vakasaqara na Nona Kalou, e cakava e na yalona taucoko. Sa tamata yaco kina o koya.


Chapter 32

1 Ni sa oti na cakacaka ni yalodina, o Senarivi na tui Asiria, sa lako mai ka curumi Juta; sa mai tuvai valu vei ira na veikoro vakabai ni valu kaukauwa, e na vakanananu ni na rawai ira me ra nona.
2 Ni sa raica o Esekaia ni sa lako mai o Senikarivi, ka sa nakita talega me mai valuti Jerusalemi,
3 Sa qai veivosaki kei ira na nona veiliutaki kei ira talega na nona kavetani ni valu me ra tarova na wai mai na kenai drodrodro e na taudaku ni koro; ka ra sa vukei koya.
4 Era sa soqoni mai na tamata era a tarova na drodro ni wai e na vanua taucoko, ka tukuna, "Na cava me ra na lako mai kina na tui Asiria ka raica ni sa levu tu na wai?"
5 Sa vakaukauwataki koya o Esekaia, sa tara cake na bai kecega sa basuki sobu, vakaduria cake ki na veivale cecere, ka tara tale e dua na bai ni koro e taudaku; sa vakavinakataki Milo talega e na Koro i Tevita, ka bulia e levu sara nai yaragi kei nai sasabai.
6 Sa wasewasei ira na kavetani ni valu vei ira na tamata ka kauti ira mai ki na rara ni koro ka vakayaloqaqataki ira, ka vaka,
7 "Mo ni kaukauwa ka qaqa, mo ni kakua ni rere se yalolailai e na matana na tui Asiria kei ira na nonai lawalawa, ni sa levu e tiko kei keda mai vei ira sa tiko kei koya.
8 "E tu vata kei koya na mataivalu yago walega; ia vei keda o Jiova na noda Kalou, me vukei keda ka me vala ena vukuda." Era sa qai vakaukauwataki na tamata e na vosa i Esekaia na tui Juta.
9 Ni sa oti oqo, o Senikarivi na tui Asiria sa tala yani eso na nona tamata ki Jerusalemi (ia o koya kei na nona mataivalu kece era sa tuvai valu vei Lakisi), vei Esekaia na tui Juta, vei ira kece talega na Juta era sa tiko mai Jerusalemi, ka tukuna,
10 "Sa tukuna vakaoqo o Senikarivi na tui Asiria: 'O vakararavi beka ki na cava mo tiko voli kina vakaivalu e Jerusalemi?
11 'Sa vakauqeti kemuni beka o Esekaia mo ni mate e na viakana kei na viagunu, ni tukuna, "O Jiova na noda Kalou e na vakabulai keda mai na ligana na tui Asiria"?
12 'E sega beka ni o Esekaia vata ga oqo sa basuraka na Nona veitikina cecere kei na Nonai cabocabo ni soro, ka vakaroti Juta kei Jerusalemi, ka vaka, "Mo ni veiqaravi e na dua ga nai cabocabo ni soro ka vakama kina na ka boi vinaka"?
13 'O ni sega beka ni kila na veika au a cakava kei ira na tamaqu ki na veivanua kecega oqo? Era sa bau rawata li na kalou ni veivanua oqori me ra sereka na nodra veivanua mai na ligaqu?
14 'O cei na kalou ni veivanua kecega oqori ka sa vakadruka vakaca oti o ira na tamaqu me rawa ni vakabulai ira na nona tamata mai na ligaqu?
15 'O koya oqo me kakua ni vakaisini kemuni se vakauqeti kemuni vakaoqo o Esekaia, ni kakua ni vakabauti koya; ni sega ni dua na kalou ni veivanua se matanitu me rawa ni sereki ira na nona tamata mai na ligaqu se ligadra na tamaqu. E vakacava na lailai ni Nona rawa ni vakabulai kemuni na nomuni Kalou mai na ligaqu?'"
16 O ira na tamata era sa vosavakacacataka vakalevu na Kalou o Jiova kei na Nona tamata o Esekaia.
17 Sa vola talega o koya nai vola me veicoqacoqa kei Jiova na Kalou ni Isireli, ka vosavakacacataki Koya, ka vaka, "Me vaka ni ra sega ni rawata na kalou ni veimatanitu ni veivanua tale eso me sereki ira na nodra tamata mai na ligaqu, sa vakakina na Kalou nei Esekaia, ni na sega ni rawa ni vakabulai ira na Nona tamata mai na ligaqu."
18 Era sa qai kaci yani vakadomoilevu e na vosa vaka-Iperiu vei ira na tamata e Jerusalemi ka ra tu e na bai ni koro, me vakarerei ira ka vakaleqai ira, me rawa ni ra taura kina na koro.
19 Era sa vosavakacacataka na Kalou i Jerusalemi, me vaka vei ira na veikalou ni tamata e vuravura — na cakacaka ni liga ni tamata.
20 Ena vuku ni ka oqo o Esekaia na tui kei Aisea na parofita, na luvei Emosi, e rau sa masu ka tagi cake kina ki lomalagi.
21 O Jiova sa qai tala mai na Nona agilosi o koya sa vakamatei ira yadua na tamata qaqa, nai liuliu, kei ira na kavetani e na veivale laca nei tui Asiria. Sa mani lesu o koya e na madua levu ki na nona vanua. Ni sa lako o koya ki na vale ni nona kalou, eso vei ira na nona kawa era sa vakamatei koya mai kea e nai seleiwau.
22 O Jiova sa vakabulai Esekaia kei ira mai Jerusalemi mai na ligai Senikarivi na tui Asiria, kei na ligadra tale eso, ka sa liutaki ira e na veiyasana kecega.
23 Era lewe levu era sa kauta nai solisoli loloma vei Jiova ki Jerusalemi, ka solia vei Esekaia na tui Juta, me laveti cake kina o koya e na matadra kecega na veimatanitu e na gauna o ya.
24 Ena dua na siga o ya sa tauvimate o Esekaia ka voleka sara ni mate, ka sa masu vei Jiova; ka sa vosa vua o Koya ka vakaraitaka vua e dua nai vakatakilakila.
25 Ia o Esekaia e a sega ni sauma me vaka na veitotaki e a caka vua, ena vuku ni sa vakalevulevui koya e yalona; o koya oqo sa toso vakavoleka mai kina vei koya kei Jerusalemi na veicudruvi.
26 Sa qai vakamalumalumutaki koya o Esekaia mai na dokadoka ni yalona, o koya kei ira kecega era tiko e Jerusalemi, me kakua kina ni yacovi ira na cudru i Jiova e na veisiga i Esekaia.
27 Sa levu sara na dokai kei nai yau nei Esekaia. Sa cakava vei koya na lololo ni siliva, ni koula, na lololo ni veivatu talei, na veikaboivinaka, nai sasabai kei na veika kecega e taleitaki.
28 Sa cakava talega na lololo ni vuata sa tamusuki mai, na lololo ni waini kei na waiwai, na bai ni manumanu susu kecega kei na vanua me ra susugi kina na manumanu.
29 Sa vakarautaka talega na veico vei koya sa tu talega vua na veimanumanu sa levu sara; ni sa solia vua o Jiova na veika me taukena sa levu sara.
30 O Esekaia vata ga oqo, sa tarova na drodro ni wai mai Kioni ka vagolea kece na wai ena dua na qara me curu yani kina loma ni Koro i Tevita ena yasana kina. Sa tamata yaco sara o Esekaia ena nona cakacaka.
31 Ia, me baleta na mata, nodra na turaga ni Papiloni, o koya sa talai mai me vakataroga na veika lelevu sa cakava o koya ena vanua, Na Kalou sa yali mai vua me vakatovolei koya – me kila kina na veika kece sa tu e lomana.
32 Na vo ni veika kece sa cakava o Esekaia kei na nona vinaka kece, era sa volai ena raivotu nei Aisea na parofita, na luvei Emosi kei na kedra i vola na tui e Juta kei Isireli.
33 Sa vakacegu o Esekaia vata kei ira na tamana ka era sa buluti koya ena tikina e cake ni nodra i bulubulu na luvei Tevita. O ira kece na Juta kei ira mai Jerusalemi era sa doka ka vakarokorokotaka na nona mate. Sa tui o Manasa na luvena me kena i sosomi.


Chapter 33

1 E se qai yabaki tinikarua ga o Manasa ena gauna sa tui kina. Sa lewa tiko me yabaki limasagavulukalima e Jerusalemi.
2 Sa cakava na ka ca ena mata i Jiova, me vaka na nodra i valavala na veimatanitu sa vakasavi ira o Jiova mai na matadra na luvei Isireli.
3 Sa tara cake tale na veitikina cecere e se qai basuka sobu ga o Esekaia na tamana; sa tara cake na i cabocabo ni soro vei Peali, ka vakaduria tale na Kalou matakau, sa lotu talega kina kalokalo ni lomalagi ka qaravi ira.
4 Sa tara talega o koya, na i cabocabo ni soro ena vale i Jiova, o koya e a tukuna kina o Jiova, "Me tiko e Jerusalemi na yacaqu me sega ni mudu."
5 Sa tara na i cabocabo ni soro vei ira na veika buli ni lomalagi, ena rua nai wasewase ena vale i Jiova.
6 Sa vakavuna talega vua na luvena me lako curuma na buka waqa ena Buca nei Luvei Inomi, sa daurairai, sa dauvakatevoro, dauvakacuru, sa taroga nai vakasala vakatevoro ka vakataroga na veiyalo. Sa cakava na veika ca lelevu me vakacudrui Jiova kina.
7 Sa yaco sara ena nona vakaduria e dua na kalou bulumakau matakau, sa cakava oqo ena vale ni Kalou, ena vanua sa vosa kina na Kalou vei Tevita kei Solomoni na luvena ka vaka: "Ena vale oqo kei Jerusalemi o koya Au sa digitaka mai e Isireli taucoko, me'u biuta kina na yacaqu me sega ni mudu;
8 "Au na sega ni kauta tani na yacai Isireli mai na vanua au sa digitaka vei tamadra O kevaka walega era sa qarauna na nodra maroroya na veika Au sa vakarota vei ira, me vaka nai vunau, nai lesilesi kei nai vakaro ena ligai Mosese."
9 O Manasa sa bacani ira na Juta kei ira sa tiko e Jerusalemi me ra cakava vaka levu na veika e ca sara, mai vei ira na veimatanitu – o ira sa vakarusai ira o Jiova ena matadra na luvei Isireli.
10 O Jiova sa vosa vei Manasa kei ira na nona tamata, ia, era sa sega ni via vakarorogo.
11 Oqo sa kauta mai kina vei ira o Jiova nai valu nei tui Asiria, o koya sa tauri Manasa, ka vesuki koya ka kauti koya sara i Papiloni.
12 Ni sa vakararawataki tiko sa nanumi Jiova na Kalou, sa vakamalumalumutaki koya vakalevu sara ena matai Jiova na Kalou ni nodra qase,
13 ka masu vei koya; sa rogoci koya o Jiova ka sauma na nona masu, ka kauti koya lesu tale mai i Jerusalemi ki na nona matanitu. Sa qai kila o Manasa ni sa Kalou o Jiova.
14 Sa tara o Manasa na bai ni koro mai na yasana vakara ni koroi Tevita e Kioni mai na buca ena i curucuru, na Matamata ni Ika; ka voleka e Ofeli, ka sa vakaceceretaka sara. Sa biuti ira na turaganivalu ena veikoro ni vale kece e Juta.
15 Sa kauta laivi na vei Kalou tani kei na matakau mai na vale i Jiova kei na veicabocabo ni soro kece mai na ulunivanua ni vale i Jiova kei Jerusalemi talega; ka sa kauta tani sara mai na koro.
16 Sa vakavinakataka na i cabocabo ni soro i Jiova, sa vakacabora nai soro i Jiova, sa vakacabora nai soro ni veivinakati kei na i soro ni vakavinavinaka. ka sa vakaroti Juta me ra qaravi Jiova na Kalou ni Isireli.
17 Ia na tamata era se vakacaboi soro tikoga ena veitikina cecere, ia ki vei Jiova ga na Kalou ni Isireli.
18 Na vo ni veika sa cakava o Manasa, na nona masu vei Jiova kei na nodra vosa na daurai era sa dau vosa vua e na yaca i Jiova na Kalou ni Isireli, era sa volai ena kedra i vola na tui Isireli.
19 Na nona masu talega kei na Nona ciqoma na Kalou na nona kerekere, kei na nonai valavala ca kei na caka cala kecega, kei na veivanua sa tara kina o koya na veitikina cecere ka biuta kina nai vakatakarakara kau kei na matakau ceuceu, ni se bera ni vakamaluimalumutaki, e dina era sa volai vata kei na veivosa i Osai.
20 Sa vakacegu o Manasa vata kei ira na nona qase, ka ra sa buluti koya e na nona vale. Sa qai tui o Amoni na luvena me kenai sosomi.
21 Sa yabaki ruasagavulu ka rua o Amoni e na gauna sa tui kina, ka sa lewa me rua na yabaki e Jerusalemi.
22 Sa cakava na veika ca e na mata i Jiova, me vaka sa cakava o Manasa na tamana; ni sa vakacabora nai soro ki na matakau ceuceu kecega e a cakava o tamana, ka qaravi ira.
23 Sa sega ni via vakamalumalumutaki koya vei Jiova, me vakataki Manasa na tamana e na nona a vakamalumalumutaki koya; ia o Amoni sa cakava na caka cala vakaveitarataravi e na veisiga.
24 Era sa buki veretaki koya na nona tamata, ka vakamatei koya e na nona vale dina ga.
25 O ira na tamata e na vanua, era sa vakamatei ira kecega era sa buki veretaki Amoni na tui. Era sa qai buli Josaia na luvena me tui, me kenai sosomi.


Chapter 34

1 E se qai yabaki walu o Josaia, sa buli me tui, ka sa lewa me tolusagavulukadua na yabaki e Jerusalemi.
2 Sa cakava na veika e dodonu ena mata i Jiova ka sa muria na sala i Tevita na tamana, ka sa sega ni lako tani mai kina, se ki nai matau se ki nai mawi.
3 Ena i kawalu ni yabaki ni nona lewa, ni se gone tiko ga o Josaia, sa vakatekivu me vakasaqara na Kalou i Tevita na tamana; e nai ka tinikarua ni yabaki ni nona lewa, sa kauta tani na veitikina cecere e Juta kei Jerusalemi, na matakau kau, na matakau ceuti kei na veimatakau tale eso.
4 Era sa basuraka talega nai cabocabo ni soro nei Peali e matana, kei na veicabocabo ni veika boivinaka era toka e cake, sa talaraki sobu talega; na matakau kau sa basuraki vakalalai sara ka qai kaburaki yani ena nodra i bulubulu o ira sa dau cuva vei ira me vaka na kuvu ni varovaro ni kau.
5 Sa vakamai talega na suidra na kena bete ena nodra i cabocabo ni soro, ka sa vakasavasavataki Juta kei Jerusalemi.
6 Sa cakava talega vakakina ena veikoro nei Manasa, Ifereimi, Simione, me yaco sara i Navitalai kei na vanua vakavolivolita e nai matau ni ta kau.
7 Ni sa taya sobu na vei cabocabo ni soro kei na kena matakau kau ka vorovorolaka me kuvu sara, nai cabocabo talega ni ka boivinaka ena vanua taucoko e Isireli, sa qai lesu tale ki Jerusalemi.
8 Ena i katinikawalu ni yabaki ni nona lewa, ena gauna sa vakasavasavataka oti kina na vanua kei na vale ni soro, sa talai Sefani na luvei Asalaia, Maesaia na kovana ni koro, kei Joa na luvei Joasi ka daumaroroya na i tukutuku (vunivola) me ratou vakavinakataka na vale i Jiova na Kalou.
9 Ni ratou sa lako mai vei Ilikaia na bete levu, e ratou sa solia nai lavo sa dau kau mai ki na vale ni Kalou, sa dau soqona mai o ira na Livai mai na ligadra na Manasa kei Ifereimi, kei ira kece na vo ni Isireli mai Juta kei Penijamini ka era sa kauta lesu mai ki Jerusalemi.
10 Ni ra sa biuta oqo kina ligadra na daucakacaka era sa dauvakaraica na vale i Jiova; o ira oqo, era sa solia yani vei ira na cakacaka, o ira sa cakava na cakacaka ni vakavinakataki ni vale i Jiova ena kena vakavoutaki.
11 Era sa solia vei ira na kena matai me ra volia na vatu kei na kau me taura vata na vale kei na kena buturara – era a vakacacana na vei tui e liu kei Juta.
12 Era sa cakava ena yalodina na cakacaka o ira na tamata. O ira na dauraicakacaka oqo, o Jaeci, o Opetaia na livai na luvai Merari o Sakaraia kei Mesulame na luvei Koata, me rau daunivakaraica na cakacaka. Na kena vo vei ira na Livai, era sa kena dau ni vakayagataka na i yaya ni qiriqiri,
13 era sa tu me veivuke ena kena colati nai colacola ka dauvakaraica na veicakacaka kecega sa caka tiko, ka so talega vei ira na Livai era sa daunivolatabu, era dauveiqaravi vakaiwasewase, ka dauvakatawa ni matamata.
14 Ni ra sa kauta mai nai lavo, ena kena kau tani mai na vale i Jiova, o Ilikaia na bete levu sa kunea nai Vola ni Vunau nei Jiova, e a solia mai o Mosese.
15 O Ilikaia sa sauma ka tukuna vei Sefani na daunivolatabu, "Au sa kunea nai Vola ni Vunau ena vale i Jiova." Sa solia nai vola o Ilikaia vei Sefani na daunivunau (vola tabu).
16 Sa kauta o Sefani nai vola vua na tui, ka kauta talega mai na nona vosa na tui ka vaka: "Na veika kecega sa tukuni vei ira na nomuni tamata, era sa cakava ga.
17 "Era sa soqona mai nai lavo sa kune ena vale i Jiova, ka soli yani vei ira na dauraica na cakacaka kei ira sa cakacaka."
18 O Sefani na daunivolatabu sa tukuna vua na tui ka vaka: "O Ilikaia na bete sa solia vei au e dua nai vola." Sa qai wilika nai vola o Sefani vua na tui.
19 Ena gauna sa rogoca kina na vosa ni vunau na tui – sa basuraka na nona i sulu.
20 Sa vakaroti Ilikaia, Aikami na luvei Sefani, Abigoni na luvei Maika, o Sefani na daunivolatabu kei Esaia na dauveiqaravi, na tui ka vaka,
21 "Dou lako ka vakatarogi Jiova ena vukuqu, kei ira sa vo mai Isireli kei Juta me baleta na vosa ni vola sa qai kune; ni sa levu na cudru katakata i Jiova sa sovaraki vei keda – baleta ni o ira na tamada era sa sega ni maroroya na vosa i Jiova, me ra cakava me vaka sa volai ena i vola."
22 O Ilikaia kei ira sa digitaki ira oti na tui era sa lako vei Aluda na parofita yalewa, na wati Salumi na luvei Toka, o koya sa dau raica na i sulu. (E tiko mai Jerusalemi ena Karua ni Tikina). Era sa vosa vua ena vuku ni veika oqo.
23 Sa sauma mai vei ira na parofita yalewa ka vaka: "Sa tukuna vaka oqo o Jiova na Kalou e Isireli, 'Tukuna vua na tamata sa talai kemudou mai vei au,
24 "Sa tukuna vakaoqo o Jiova: 'Raica au na kauta mai na dredre ni bula ki na vanua oqo kei ira sa tiko kina, na veirukaki kece sa volai ena i vola oqo, o koya o sa wilika ena mata ni tui Juta,
25 'Baleta ni ra sa biuti au ka vakama na veika boivinaka ki vei ira na kalou tani, me ra vakacudrui au kina me'u cudru ena vuku ni cakacaka kece ni ligadra. O koya oqo au na sovaraka na noqu cudru kece ena vanua oqo ka sega ni vakavotaka.'"'
26 "Vua na tui Juta, o koya sa talai kemudou mai vei au, me vakatarogi Jiova, mo dou vosa vaka oqo vua, 'Sa tukuna vakaoqo o Jiova na Kalou ni Isireli: "Me vaka na vosa o sa rogoca —
27 "Baleta ni sa rui malumu na yalomu ka o sa vakamalumalumutaki iko vei Jiova na Kalou ena gauna o sa rogoca kina na vosa me baleta na vanua oqo kei ira na lewena, o sa vakamalumalumutaki iko kina ka basuraka na nomu i sulu ka tagi e mataqu, Au sa rogoci iko vakatalega kina," sa tukuna o Jiova.
28 "Io, au na kauti iko vei ira na tamamu, ka o na lako ki nai bulubulu ena vakacegu, na matamu ena sega ni raica na veika ca kece oqo, o koya au na kauta mai kina na vanua oqo kei ira kece na lewena." Era sa kauta lesu mai na vosa vua na tui. O Josaia Sa Vakatikora Lesu Na Lotu Dina
29 Sa talatala na tui me ra vakasoqoni kece mai na qase e Juta i Jerusalemi.
30 Sa lako cake na tui ki na vale i Jiova kei ira kece na tagane e Juta kei ira sa tiko e Jerusalemi— O ira na bete kei na Livai, o ira na lelevu kei ira na lalai; ka sa wilika ena nodra vakarorogo tu na tamata na vosa ni Vola ni Veiyalayalati e a kune ena loma ni vale i Jiova.
31 Sa tucake tu na tui ena nona i tutu ka cakava na yalayala ena mata i Jiova, o ya, me muri Jiova ka maroroya na Nona i vakaro kei na Nona i tukutuku kei na Nona i lesilesi ena yalona taucoko kei na lomana taucoko me cakava na vosa ni vola ni veiyalayalati sa volai ena i vola.
32 Sa cakava vei ira kecega sa tiko e Jerusalemi kei Penijamini me ra tu ena veika o ya. O ira sa tiko e Jerusalemi era sa cakava me vaka na veiyalayalati ni Kalou, na Kalou ni nodra qase.
33 O Josaia na tui, sa kauta tani na veika caca kece ena vanua sa nodra na luvei Isireli, ka cakava vei ira kecega sa tiko e Isireli me ra qaravi Jiova vakavinaka na nodra Kalou, ena gauna taucoko sa sega ni lako tani mai na nona muri Jiova na Kalou ni nona qase.


Chapter 35

1 Sa cakava na kanavata ni Lako Sivia i Jiova o Josaia na tui e Jerusalemi, era sa vakamatea kina na lami ni lako sivia ena i katinikava ni siga ni matai ni vula.
2 Sa vakatikori ira na bete ena nodra i tavi ka vakauqeti ira ena vuku ni veiqaravi ena vale i Jiova.
3 Sa tukuna talega vei ira na Livai na dauniveivakavulici vei ira na Isireli, "O ira sa tawasei vei Jiova, ni biuta na kato tabu ena vale sa tara o Solomoni na luvei Tevita na tui Isireli. Me kakua ni ka ni oca tale ki na domomuni. Mo ni qaravi Jiova na nomuni Kalou kei ira na Nona tamata na Isireli.
4 "Mo ni vakavakarautaki kemuni me vaka na dui vuvale nei tamamuni, me vakatalega na nomuni dui wasewase, me vakamuria nai dusidusi volai nei Tevita na tui Isireli kei nai dusidusi volai nei Solomoni na luvena.
5 "Ka tucake ena tikina tabu me vaka nai wasewase ni vale nei tamadra o ira na dauveivuke na tacimuni, me vaka talega nai wasewase ni vale nei tamadra na Livai.
6 "Ni vakamatea nai soro ni lako sivia ka vakasavasavataki kemuni ka vakarautaka vei ira na tacimuni, me ra cakava kina me vaka na vosa i Jiova ena ligai Mosese."
7 O Josaia na tui, sa solia vei ira na dauveivuke na lami kei na me gone mai na qeleni manumanu, me ka ni lako sivia kece, me nodra i soro o ira kece era tiko. E tolusagavulu kece na udolu kei na tolu na udolu na bulumakau, oqo kece mai na veika e taukena na tui.
8 O ira na nona veiliutaki era sa solia vakayalovinaka vei ira na tamata, vei ira na bete, vei ira talega na Livai. O Ilikaia o Sakaraia kei Jeieli na veiliutaki ena vale i Jiova, era sa solia vei ira na bete nai soro ni lako sivia e rua na udolu ono na drau na manumanu kei na tolu na drau na bulumakau;
9 O Konanaia kei ira talega na tacina, o Semaia, o Necanili, o Asabaia, o Jeieli kei Josafati, na nodra i liuliu na Livai, era sa solia vei ira na Livai mei soro ni lako sivia e lima na udolu na manumanu kei na lima na drau na bulumakau.
10 Sa vakarautaki na veiqaravi, era sa tu na bete ena nodra i tutu kei ira na Livai ena nodra i wasewase, me vaka na nona i vakaro na tui.
11 Era sa vakamatea nai soro ni lako sivia era sa kureitaka na dra o ira na bete ena ligadra, ni ra sa drudruga tiko na manumanu o ira na Livai
12 Era sa kauta tani nai soro kama, me rawa ni ra solia ki na dui wasewase ni vuvale nei tamadra na dauveivuke me ra vakacabora vei Jiova me vaka sa volai ena i vola i Mosese. Era sa cakava vakakina ena bulumakau.
13 Era sa tavuna na i soro ni lako sivia ena buka me vaka na i lesilesi; na vo ni soro tabu sa vakasaqari ena kuro ka wasei vakatotolo sara vei ira na dauveivuke.
14 Ni sa oti oqo, era sa vakarautaka ga na i votavota me kedra ga, kei ira talega na bete, baleta ni o ira na bete na luvei Eroni era sa dau osooso ena kena vakacabori nai soro kama kei na kena uro me yacova na bogi. Oqo era sa vakarautaka kina na Livai nai votavota vei ira kei ira talega na bete na luvei Eroni.
15 O ira na daulagasere na luvei Esava era sa tu ga ena nodra tikina me vaka na i vakaroi Tevita, nei Esava, nei Emani kei Jeducani na daurai ni tui. o ira talega nai vakatawa ni matamata era sa dui tiko ena nona matamata; era sa sega ni lako tani mai na nodra i tavi, baleta ni o ira na tacidra na Livai era sa vakarautaka nai votavota vei ira.
16 Na veiqaravi kece ena vuku i Jiova sa qaravi ena siga o ya, me vakayacori kina na lako sivia kei na i soro kama ena i cabocabo ni soroi Jiova, me vaka nai vakaro nei Josaia na tui.
17 O ira na luvei Isireli era basika mai, era sa vakaitavi ena lako sivia ena gauna o ya, ena Kanavata talega ni Madrai Sega ni Vakaleveni me vitu na siga.
18 Ea se vakayacori ga na kanavata ni lako sivia vaka oqo e Isireli, ena gauna sara i Samuela na parofita; e se sega ni dua na tui e Isireli me vakaitavi mada ena kanavata ni lako sivia me vaka sa qai cakava oqo o Josaia, vata kei ira na bete kei na Livai. Era sa tiko kece kina na Isireli kei na Juta kei ira kece sa tiko e Jerusalemi.
19 Sa vakayacori na kanavata ni Lako sivia oqo ena i katinikawalu ni yabaki ni nona lewa o Josaia na tui.
20 Ni sa oti kece oqo, ni sa vakarautaka na vale ni soro o Josaia, o Niko na tui Ijipita sa lako cake mai me vala kei Kakemisi ena Uferetisi; sa lako yani o Josaia me vala.
21 Sa vakau i tukutuku mai o Niko ka vaka: "Na cava o au vei iko na tui Juta? Au sa sega ni lako mai vei iko ena siga oqo, ki na vale ga au sa veivala vata; ni sa vakaroti au na Kalou me'u vakatotolotaka kua ni o via vakatatao vua na Kalou, ni sa tiko vata kei au o Koya, de qai vakamatei iko."
22 Sa sega ga ni via gole tani o Josaia, sa vakalecalecai koya ga ka lako yani me vala, sa sega ni via rogoca na vosa nei Niko mai na gusu ni Kalou. Sa lako ga mai me vala ena Buca e Mekito.
23 E dua na dauvanataka na dakai titi sa vanai tui Josaia; sa qai tukuna na tui vua e dua na nona tamata, "Kauti au tani, ni'u sa rui mavoa vakalevu."
24 Sa kauti koya mai na nona duaveiqaravi mai na qiqi ni valu ki na dua tale na qiqi, era sa kauti koya mai ki Jerusalemi. Sa mate o Josaia na tui, ka sa bulu ena dua nai bulubulu nei tamana. Era sa vakaloloku kece na Juta kei Jerusalemi ena vuku i Josaia.
25 O Jeremaia talega sa tagi vakalevu ena vuku i Josaia. Me yacova na siga oqo, o ira kece na daulagasere, ira na tagane kei na yalewa, era sa daucavuti Josaia ena nodra tagi. Oqo sa dau kena i vakarau e Isireli, ka sa volai talega ena i vola ni Tagi.
26 Na kena vo ni veika sa cakava o Josaia kei na nona vinaka me vaka sa volai ena i Vunau ni Kalou,
27 kei na nona i valavala talega mai na i vakatekivu ka yacova nai otioti, era sa volai ena kedra i vola na tui Isireli kei Juta.


Chapter 36

1 O ira na tamata ena vanua era sa tauri Jeoasi na luvei Josaia ka bulia me tui, me sosomitaki tamana e Jerusalemi.
2 Sa yabaki ruasagavulu katolu o Jeoasi ena gauna sa tui kina, ka sa lewa ga e Jerusalemi me vula tolu.
3 Sa vuaviritaki koya e Jerusalemi o tui Ijipita, ka sa lewa me dau soli nai vakacavacava ni vanua e rua na drau limasagavulu na udolu na dola ki Ijipita.
4 Na tui Ijipita sa vakatikori tacina oiliakimi me tui e Juta kei Isireli, ka sa veisautaka na yacana me o Joakimi. O Niko sa tauri Jeoasi ka kauti koya tani ki Ijipita. Na Veiliutaki Kei Na Kau Vakavesu Nei Joakimi
5 Sa yabaki ruasagavulu kalima o Joakimi ena gauna sa tui kina, ka sa veiliutaki me tinikadua na yabaki e Jerusalemi. Sa cakava na ka e ca ena mata i Jiova na nona Kalou.
6 O Nebukanasa na tui Papiloni sa lako mai me valuti Joakimi ka vesuki koya, ka kauti koya yani i Papiloni.
7 O Nebukanasa talega sa kauta yani, eso nai yaya mai na vale i Jiova ki Papiloni, ka la'ki biuta sara ena nona vale ni lotu e Papiloni.
8 Na vo ni veika sa cakava o Joakimi, na veika ca sa cakava o koya, kei na veika ca sa daubeitaki kina o koya, io, era sa volai ena kedra i vola na tui e Isireli kei Juta. O Jeoiakini na luvena sa veiliutaki ena vukuna, me kena i sosomi.
9 E se qai yabaki walu o Joakini ena gauna sa tui kina, ka sa lewa e Jerusalemi me tolu na vula ka tini na siga. Sa cakava o koya na ka e ca ena mata i Jiova.
10 Ena mua ni yabaki, sa lewa mai o Nebukanasa na Tui vei Joakini me lako yani ki Papiloni vata kei na veiyaya sau levu era tu ena vale i Jiova, ka sa lewa talega me tui o Setekaia na taci Joakimi e Juta kei Isireli.
11 E sa yabaki ruasagavulukadua o Setekaia ena gauna sa tui kina, ka sa veiliutaki e Jerusalemi me tinikadua na yabaki.
12 Sa cakava talega na ka e ca ena matai Jiova na nona Kalou, ka sa sega ni vakamalumalumutaki koya ena mata i Jeremaia na parofita, o koya sa vosa mai na gusu ni Kalou.
13 E sa vuki tani talega mai vei Tui Nebukanasa, o koya e a cakava vua me bubului ena mata ni Kalou. Ia sa vakaukauwataka ga na domona kei na yalona me kua ni lesu vei Jiova na nodra Kalou na Isireli.
14 O ira kece na nodra i liuliu na bete kei ira na tamata era sa qai talaidredre vakalevu cake ga me vaka na nodra i valavala na veimatanitu kecega, ka era sa vakaduka na vale ni Kalou, o koya sa vakatabui oti mai Jerusalemi.
15 O Jiova na Kalou ni Isireli sa vakauta nai vakaro mai vua na nona tamata nai talai vei ira na Isireli, sa tucake vakamataka ka vakatala yani vei ira baleta ni sa rui lomani ira na nona tamata kei na nona i tikotiko.
16 Era sa mokuta nai talai ni Kalou, ka beca sara na nona vosa ka vakalialia na nona parofita, me yacova ga ni tarai ira na tamata na cudru katakata i Jiova, me yacova ni sa sega ni wali rawa.
17 O Jiova sa kauta mai na tui Kalitia me vakamatei ira na nodra cauravou se goneyalewa, o ira na qase se malumalumu; o Jiova sa soli ira kece vei tui Kalitia.
18 Na i yaya kece mai na vale i Jiova, lelevu kei na ka lalai nai yau talei ni tui kei na nodra na veiliutaki, sa kauta kece ki Papiloni.
19 E ra sa vakama na vale ni Kalou, era sa basuka na bai kei Jerusalemi, ka sa vakamai kece na nona veivale na tui kei na veiyau taleitaki kecega.
20 O ira sa dro bula mai nai seleiwau, era sa kau vakabobula ki Papiloni, me ra la'ki dauveiqaravi vei koya na tui kei ira na luvena me yacova ni sa veiliutaki o Perisia,
21 Me vakayacori kina na vosa ni Kalou ena gusui Jeremaia, me yacova ni sa marautaka na vanua na Siga ni Vakacecegu. Ena veigauna kecega era vakaloloma tiko kina, era sa maroroya na Siga ni Vakacecegu me vakayacori kina na vitusagavulu na yabaki.
22 Ena i matai ni yabaki nei Sairusi na tui Perisia me vakayacori kina na vosa i Jiova mai na gusu i Jeremaia na parofita, o Jiova sa vakayavalata na yaloi Sairusi na tui Perisia, me vakauta kina nai tukutuku ena nona matanitu taucoko ka sa vakaivola talega ka vaka,
23 Sa tukuna o Sairusi na tui Perisia: "Na matanitu kece e vuravura sa solia vei au o Jiova na Kalou, ka sa vakaroti au o Koya me'u tara Vua e dua na vale mai Jerusalemi e Juta. O cei sa tiko oqori kei kemuni na nona tamata? Me tiko vata kei koya o Jiova na nona Kalou, me lako cake o koya!