Esera

1 2 3 4 5 6 7 8 9 10


Chapter 1

1 Oqo ena matai ni yabaki i Sairusi na Tui Perisia, na vosa ni Kalou sa lako mai na gusu i Jeremaia, sa na vakayacori, sa vakayavalata na yaloi Sairusi na Tui - Jiova, me vakarogotaka ena nona matanitu taucoko, sa vola talega ka vaka,
2 Sa tukuna vakaoqo o Sairusi na Tui Perisia: Sa solia vei au o Jiova na matanitu kecega e vuravura, sa vakaroti au me'u tara vua e dua na nona vale mai Jerusalemi e Jutia.
3 O cei sa tiko oqori kei kemuni, sa tiko vata kei koya na Kalou? Me lako cake ki Jerusalemi e Juta ka tara na vale i Jiova na nodra Kalou na Isireli: (Sa Kalou o koya), ka sa tiko o koya mai Jerusalemi.
4 O koya sa tiko ena vanua, me ra vukei koya na tamata, me ra solia vei koya na siliva, kei na koula, na ka vinaka kecega, kei na manumanu kecega ni vale kei na i solisoli ni loloma kecega me baleta na vale ni Kalou mai Jerusalemi.
5 O ira nai liuliu ni vale nei Juta kei Penijamini kei ira na bete kei na Livai kei ira kecega sa yavalati ira na Yalo i Jiova ni lewe vuqa, era sa tucake ka lako cake me tara na vale ni Kalou mai Jerusalemi.
6 O ira kece era sa tiko vata, era sa veivakauqeti ena ka era solia, na siliva na koula, na ka vinaka kecega, na manumanu ni vale, na ka taleitaki kecega era sa solia vaka yalovinaka.
7 O Sairusi na Tui, sa kauta talega mai ka solia na veika talei sa taura vakaukauwa mai o Nepukanesa mai na Vale ni Soro, mai Jerusalemi;
8 O Sairusi na Tui Perisia sa kauta kece mai, na i yaya oqo mai na ligana sa dau maroroya nai yau ni Tui, ka sa solia yani vei Sesipasa e dua na turaga ni Juta.
9 Oqo na kena i wiliwili, tolusagavulu na tere koula dua na udolu na tere siliva ruasagavulu ka ciwa nai sele ni kuro,
10 E tolusagavulu na kuro koula dina va na drau ka tini na kuro siliva duimataqali dua na udolu na veika taleitaki.
11 Na koula kei na siliva taucoko e lima na udolu va na drau na kena levu. Oqo kece na veika sa tiko e liga i Sesipasa kei ira sa sereki mai Papiloni, me lesu tale ki Jerusalemi.


Chapter 2

1 O ira oqo na tamata mai vei ira na Iperiu, era sa lesu mai na bobula, o ira sa kauti ira ki Papiloni o Nepukanesa na tui, o ira oqo era sa lesu tale ki Jerusalemi kei Jutia, o ira yadua ki na nodra vanua.
2 Era sa lako vata mai kei Serupepeli, kei Josua kei Niumaia kei Seraia kei Rilaia, kei Motekai kei Bilasani, kei Misipa kei Pikavai kei Reumi kei Bana. Na kedra i wiliwili na tagane na tamata ni Isireli:
3 O ira mai Parosi e rua na udolu dua na drau vitusagavulu ka rua na tamata;
4 O ira mai Sefatia e tolu na drau vitusagavulu ka rua na tamata;
5 O ira mai Ara e vitu na drau vitusagavulu ka lima na tamata;
6 O ira mai Paaci Moape, na tamata i Josua kei Moapi e rua na udolu walu na drau tinikarua na tamata;
7 O ira mai Ilama e dua na udolu rua na drau limasagavulu ka va na tamata;
8 O ira mai Satu e ciwa na drau vasagavulu ka lima na tamata;
9 O ira mai Sakai e vitu na drau onosagavulu na tamata;
10 O ira mai Bani e ono na drau vasagavulu ka rua na tamata;
11 O ira mai Bebai e ono na drau ruasagavulu ka tolu na tamata;
12 O ira mai Asakati e dua na udolu rua na drau ruasagavulu ka rua na tamata;
13 O ira mai Adonikama e ono na drau onosagavulu ka ono na tamata;
14 O ira mai Bikivai e rua na udolu ka mani limasagavulu ka ono na tamata;
15 O ira mai Adini e va na drau limasagavulu ka va na tamata;
16 O ira mai Ata mai vei Esekaia e ciwasagavulu ka walu na tamata;
17 O ira mai Besai e tolu na drau ruasagavulu ka tolu na tamata;
18 O ira mai Jora e dua na drau tinikarua na tamata;
19 O ira mai Asumu e rua na drau ruasagavulu ka tolu na tamata;
20 O ira mai Qipa e ciwasagavulu ka lima na tamata;
21 O ira mai Peceliema e dua na drau ruasagavulu ka tolu na tamata;
22 O ira mai Netofa e limasagavulu ka ono na tamata;
23 O ira mai Enacoci e dua na drau ruasagavulu ka walu na tagane;
24 O ira mai Asimaveci e vasagavulu ka rua na tamata;
25 O ira mai Kojaci, na Arimi, Sepira, na Biroci e vitu na drau vasagavulu ka tolu na tamata;
26 O ira mai Rama kei ira na Kipa e ono na drau ruasagavulu ka dua na tamata;
27 O ira mai Mitimasi e dua na drau ruasagavulu ka rua na tagane;
28 O ira mai Peceli kei Ai e rua na drau ruasagavulu ka tolu na tagane;
29 O ira mai Nipo e limasagavulu ka rua na tamata;
30 O ira mai Makibisi e dua na drau limasagavulu ka ono na tamata;
31 O ira mai Ilama ka dua tale e dua na udolu rua na drau limasagavulu ka va na tamata;
32 O ira mai Arimi e tolu na drau ruasagavulu na tamata;
33 O ira mai Loti, Etiti kei Ono e vitu na drau ruasagavulu ka lima na tamata;
34 O ira mai Jeriko e tolu na drau vasagavulu ka lima na tamata;
35 O ira mai Sina e tolu na udolu ono na drau tolusagavulu na tamata.
36 O ira na bete: na luvei Jitaia ena vale nei Josua e ciwa na drau vitusagavulu ka tolu na tamata;
37 O ira na luvei Ima e dua na udolu ka mani limasagavulu ka rua na tamata;
38 O ira na luvei Pasuri e dua na udolu rua na drau vasagavulu ka vitu na tamata;
39 O ira na luvei Arimi e dua na udolu ka mani tinikavitu na tamata.
40 O ira na Livai: na luvei Josua kei Kadimeli, na luvei Odiva e vitusagavulu ka va na tamata.
41 O ira na daunisere: na luvei Esava e dua na drau ruasagavulu ka walu na tamata.
42 O ira na luve ni vakatawa ni matamata: O ira na luvei Salumi, na luvei Ata, na luvei Talimeci; na luvei Akubu, na luvei Atita, na luvei Sobai e dua na drau tolusagavulu ka ciwa na kedra lewe levu.
43 O ira na Nacinini: na luvei Asupa, na luvei Tabaoca,
44 Na luvei Kerosi, na luve Siyaya, na luvei Padoni;
45 Na luvei Lebana, na luvei Haqoba, na luvei Akubu,
46 Na luvei Aqabe, na luvei Saimai na luvei Anana,
47 Na luvei Qidele, na luvei Rama na luvei Reaia,
48 Na luvei Resini, na luvei Nekoda, na luvei Qasama,
49 Na luvei Usa, na luvei Pasea, na luvei Besai,
50 Na luvei Asena, na luvei Meunima, na luvei Nefusimi,
51 Na luvei Bakebuke, na luvei Akupe, na luvei Abu,
52 Na luvei Baseiluce, na luvei Meida, na luvei Asasa,
53 Na luvei Bakoso, na luvei Sisera, na luvei Tamari,
54 Na luvei Nasia, na luvei Hatifa.
55 Na luvena na dauveiqaravi i Solomoni, na luvei Sotai, na luvei Soperece, na luvei Peruda,
56 Na luvei Jala, na luvei Dakoni, na luvei Kideli,
57 Na luvei Sefatia, na luvei Atili, na luvei Posereci mai Sebami, kei ira na luvei Ami.
58 O ira kece na Necinimi kei ira na luveni dauveiqaravi i Solomoni e tolu na drau ciwasagavulu ka rua na tamata.
59 Sai ira oqo na lako cake mai Tele Mala, Tele Asa, Jerupi, Adani, kei Ima, ia, era sa sega ni rawa ni vakatakilakilataka na vale nei tamadra se na nodra kawa e Isireli:
60 O ira na luvei Delai, na luvei Tobia, na luvei Nekoda, e ra lewe ono na drau limasagavulu ka rua na tamata;
61 O ira na luveni Bete: na luvei Abaia, na luvei Koso, na luvei Parisilai, o koya e taura e dua vei ira na goneyalewa i Parisilai na kai Kiliati ka sa kacivi ena yacadra.
62 O ira oqo era sa vakasaqara na yacadra mai vei ira sa volai tu ena i vola ni kawa, era sa sega ga ni kunea; o koya oqo era sa biutani kina mai nai tutu vakabete me vaka e dua sa vakacalai.
63 Sa tukuna vei ira na Kovana, me ra kua ni kana mai na madrai tabu me yacova ni sa vakasalataki oti ena Urimi kei na Cumimi na Bete Levu.
64 Na kedra lewe levu kece nai soqosoqo taucoko sa vasagavulu ka rua na udolu tolu na drau onosagavulu na tamata,
65 O ira na dauveiqaravi tagane kei na yalewa sa vitu na udolu tolu na drau tolusagavulu ka vitu ka era sa lewe rua na drau na tagane kei na yalewa daulagasere.
66 Na nodra ose sa vitu na drau tolusagavulu ka ono, na nodra meule sa rua na drau vasagavulu ka lima na kena levu,
67 Na nodra kameli sa va na drau tolusagavulu ka lima, kei na nodra asa ono na udolu vitu na drau ruasagavulu na kena levu.
68 Eso vei ira nai liuliu ni yavusa, ni ra sa lako mai ki na vale i Jiova e Jerusalemi, era sa soli ka vakalevu me tarai cake na vale ni Kalou:
69 Me vaka na ka era sa dui rawata, era sa solia ki na lololo ni yau e onosagavulu ka dua na udolu nai lavo koula, (tolu na milioni na dola), e lima na udolu na paudi siliva (dua na drau vitusagavulu na udolu na dola), kei na dua na drau na nodra i sulu na bete.
70 O ira na bete, na livai, e so na tamata, na daunisere, na vakatawa, na Necinimi era sa tiko e veikoro lelevu, kei ira na Isireli ena nodra veikoro.


Chapter 3

1 Ni sa qai yaco sara mai nai ka vitu ni vula, ka era sa tiko kece ena veikoro na luvei Isireli, Era sa soqoni vata me vaka e dua ga na tamata e Jerusalemi.
2 O Josua na luvei Josateki kei ira na tacina na bete kei Serupepeli na luvei Sialitieli kei ira na tacina, era sa tucake ka tara nai cabocabo ni soro vua na Kalou ni Isireli, ka me caka kina na vakacaboi soro, me vaka na ka sa volai ena i vunau i Mosese na tamata ni Kalou.
3 E dina ga ni sa tarai ira tiko na rere me baleti ira na tamata ni vanua o ya, era sa vakarautaka ga nai cabocabo ni soro, na kena yavu; era sa vakacabora nai soro vei Jiova, ena mataka kei na yakavi talega nai soro kama.
4 Era sa vakarautaka talega nai soro ni Kana vata ni Vale Vakacevaceva, me vaka na ka sa volai, ka vakacabora nai soro kama ni veisiga ena i wiliwili sa gadrevi me vaka sa volai e na dua na siga.
5 Sa oti o ya era sa dau vakacabora nai soro kama dina ga kei na kena ena Vulavou, kei na vei kana magiti kece ga i Jiova o koya sa dau vakayacori, kei ira vakayadua ga sa lomasoli me vakacabora nai solisoli vakaloma vinaka vei Jiova.
6 Mai nai matai ni siga ni ka vitu ni vula, era sa vakatekivu me vakacabora nai soro kama vei Jiova,ia na yavu ni vale vakacevaceva e se bera ni tauyavutaki.
7 Era sa solia talega nai lavo ki na kena tara na vale vei ira talega na tara na vale, na kakana na wai ni gunu na waiwai ki vei ira na kai Saitoni kei Taia mera kauta mai na Sitari mai Lepanoni me muri wai taki mai ki Jopa, me vaka na veivakadonui sa solia mai o Sairusi na Tui Perisia.
8 Ena i ka rua ni vula ni karua ni yabaki ena nodra lako mai ki na vale ni Kalou e Jerusalemi, o Serupepeli na luvei Sialitieli, o Josua na luvei Josateki kei na kena vo vei ira na tamata, na bete, na Livai kei ira kece sa lako mai ena veivakabobulataki ki Jerusalemi, sa vakatekivuna na cakacaka ka lesi ira na Livai mai na yabaki ruasagavulu ka lako cake, me ra liutaka ka raica na kena tara na vale i Jiova.
9 O Josua kei ira na luvena kei na tacina, o Kadimeli kei ira na luvena kei ira na luvei Juta, era sa tucake me vaka ga e dua me ra vakaraici ira vinaka sa cakacaka tiko e na vale i Jiova: O ira na luvei Enatati kei ira na dui luvedra kei ira na dui tacidra na Livai.
10 Ena gauna era sa vakadavora kina na yavu ni valenisoro na matai, era sa tucake tu o ira na bete ena nodra i sulu kei na nodra biukila, o ira na Livai na luvei Esafa kei na nodra sibali, me ra vakacerecerei Jiova me vaka na ka sa volai ena i vakaro i Tevita na Tui Isireli.
11 Era sa lagata vakavinaka na veivakacerecerei kei na vakavinavinaka vei Jiova: " ni sa rui vinaka o koya kei na nona yalololoma sa tudei ka sega ni mudu e Isireli." Era sa kaila na tamata kecega ka kaila vakarogolevu ni ra sa vakadavora oti na yavu ni valenisoro i Jiova.
12 Sa levu vei ira na Bete, na Livai, ira nai liuliu ni veivuvale era sa matua sara, o ira era a raica nai matai ni valenisoro, era sa tagi vakadomoilevu, ni sa vakadavori na yavu ni valenisoro e matadra, e levu era kaikaila ga ena marau.
13 O ira na tamata era sa sega ni kila se oqo na domo ni marau se domo ni tagi, ni ra sa tabalaka kecega e cake na domodra o ira na tamata, kei na rorogo sa rogo vakayawa sara.


Chapter 4

1 O ira na kedra meca na Juta kei na Penijamini, era sa rogoca ni o ira na nodra kawa na kau vakabobula era sa tara tiko na valenisoro ni Kalou, o Jiova ni Isireli,
2 Era sa lako mai vei Serupepeli vei ira talega na qase ni veivuvale ka tukuna vei ira, "Me da mai tara vata kei kemuni na valenisoro, ni keimami sa vakasaqara na nomuni Kalou me vaka o ni sa dau cakava; keimami sa dau vakacabo i soro vua ena veigauna i Esaradoni na Tui Asiria, o koya sa kauti keimami mai ki ke."
3 Ia, o Serupepeli kei Josua kei ira na vo ni liuliu ni veivuvale e Isireli, era sa tukuna vei ira, "Dou na sega ni mai tara vata kei kemami na vale ni Soro ni neimami Kalou: Oi keimami ga, ni na tara cake na vale oqo me vaka sa vakarota na Kalou vei Sairusi na Tui Perisia me vakaroti keimami kina."
4 O ira na tamata ena vanua era sa vakatekivu me ra veivakayalolailaitaki vei ira na Juta. Era sa vakaleqai ena tara vale,
5 Era sa saumi na daunivakasala me ra vakaleqa nai naki ni tara vale ena gauna kece nei Sairusi na Tui ka yacova na gauna i Taraiasi na Tui Perisia.
6 Ena gauna i Asivorosi, ena i vakatekivu ni nona veiliutaki, sa volai nai vola ni veibeitaki me baleti ira sa tiko e Juta kei Jerusalemi.
7 Ena veisiga talega nei Atekisekise, o Bisilami, Miciredaci kei Tabeci kei ira kecega na kena vo, era sa volavola vei Atekisekise na Tui Perisia, nai vola sa volai ena vosa vaka "Aremiki" mai na Aremiki dina.
8 O Reumi nai liuliu levu kei Simisai na vunivola e rau sa vola nai vola ni veivakacacani me baleti Jerusalemi vei Atekisekise me vaka oqo:
9 Mai vei Reumi nai liuliu levu, Simisai talega na vunivola kei ira na kena vo O na nodra mata na Dinaiti, na Afarasatiate, na Tepilaite, na tamata mai Perisia kei Ereki kei Papiloni, kei Susani, na Deavaite, na Elemaiti,
10 Kei ira na kena vo ni veimatanitu o koya sa taura o Osinapa ka vakabobulataki ira ka tiko e na veikoro mai Samaria kei ira na veivanua sivia na UciwaiOka lako yani.
11 (Oqo sara ga nai vola era sa vakauta vua), kivei Atekisekise na Tui, mai vei ira na nomuni dauveiqaravi na tamata mai na veivanua sivia na uciwai ka lako yani:
12 Me kila na tui ni o ira na Iperiu era sa lako cake mai vei kemuni ka lako mai ki Jerusalemi, era sa tara cake tiko na koro ca ka talaidredre oqo, era sa vakaotia tiko na kena lalaga, ka vakavinakataka tiko na kena yavu.
13 Me kila oqo na tui, kevaka sa tara oti na koro ka sa vakaoti talega na kena lalaga, era na sega ni saumi vakacavacava, era na sega ni cakava na ka vakavanua, e sa na lailai na veika e dau kumuni ki na nona i lololo na tui.
14 Me vaka ni keimami sa dau vakaivotavota tiko mai vua na tui, keimami sa sega sara ga ni rawata me raica ni beci nai tikotiko vakaturaga, oqo na vuna e volai kina nai vola oqo vei kemuni,
15 Me caka mada e dua na vakadidike ena i vola era sa volai tu mai vei ira na tamamuni. O ni na kunea kina nai tukutuku ni koro oqo e sa dua dina na koro talaidredre, e veivakaleqai vakalevu vei ira na tui kei na veiyasana, era sa dau vakavuna na vakaduduile ena vanua ena veigauna e liu, sa mai vakavuna na kena rusa koto na koro oqo.
16 Keimami sa dau vakananuma na tui kevaka sa tarai cake tale na koro ka sa vakaoti na lalaga, ena yaco me na sega ni dua na nomuni lewa ena vanua kece me sivia sara yani na Uciwai.
17 Sa qai sauma mai na tui ka vaka, kivei Reumi nai liuliu levu, vei Simisai na vunivola, vei ira na vo ni veiwekani sa tiko mai Samaria kei ira na kena vo sa tiko ena vanua vakayawa sara mai na Uciwai: Na vakacegu kei na veika tale eso.
18 Nai vola e a vakau mai, sa mai wiliki sara vakavinaka e mataqu.
19 Au sa solia nai vakaro, sa vakayacori talega na vakadidike, sa qai kilai ni koro oqo ena gauna e liu, era sa dautalaidredre vua na tui, na talaidredre kei na vakaduduile sa dau vakaukauwataki me caka.
20 Sa tu talega e so na tui kaukauwa e liu, era sa lewai Jeusalemi, na vei yasana ulubaleta na Uciwai; na vakacavacava, nai solisoli kei na kamunaga vakavanua sa dau saumi vei ira.
21 Oqo me soli nai vakaro vei ira oqo me muduka na toso ni cakacaka, me tu vakadua na cakacaka kece me yacova ni'u sa vakarota me qai toso tale.
22 Mo ni vakarorogo ka cakava oqo, na cava me levu kina na nona vakamavoataki na tui?
23 Ena gauna sa wiliki kina nai vola nei Atekisekise na Tui vei Reumi, Samisai na vunivola kei ira na kena vo, e ra sa lako vakatotolo ki Jerusalemi, vei ira na Iperiu, ka sa caka vakaukauwa na nodra tarovi me kua ni tara na vale.
24 Sa qai tu vakadua na cakacaka ni vale ni Kalou e Jerusalemi, sa qai tu vakadua na cakacaka me yacova na gauna i Taraiasi na Tui Perisia, nai karua ni yabaki ni nona veiliutaki.


Chapter 5

1 Oi rau na parofita o Akeai kei Sakaraia na luvei Ito, e rau sa parofisai vei ira na Iperiu era sa tiko mai Juta kei Jerusalemi ena yaca ni Kalou sa tiko mai Jerusalemi, kei ira talega na parofita sa tiko vata kei ira me vukei ira.
2 O Serupepeli na luvei Sialitieli kei Josua na luvei Josateki e rau sa tucake ka tekivuna na tara tale ni vale ni Kalou sa tiko mai Jerusalemi; o ira na parofita ni Kalou sa tiko vata kei ira ka vukei ira.
3 E na gauna vata o ya o Tatinai na Kovana ena vanua vaka ki na Uciwai levu kei Seca-Bosanai kei ira na nonai tokani sa lako cake mai vei ira ka tukuna vaka oqo, "O cei sa tukuna vei kemuni mo ni tara na vale ni soro oqo ka vakaotia na kena lalaga?"
4 Keimami sa tukuna vei ira na yacadra sa tara tiko na vale.
5 Ia na mata i Jiova sa vakaraici ira tikoga na nodra qase na Iperiu, me ra kua ni tarovi kina, e dina ga ni sa lako vei Taraiasi nai tukutuku. Sa kau lesu mai e dua na kena i sau.
6 Oqo na lewe ni vola sa vola lesu mai o Tatinai na Kovana: Na kovana mai na veivanua me sivia yani na Uciwai levu o Seca-Bosanai kei ira na nonai tokani, o Perisia era sa tiko ena vanua sivia na Uciwai levu, kivei Taraiasi na tui.
7 (Era sa vakauta vua nai vola ka sa volai vaka oqo:) Kivei Taraiasi na Tui; Mo ni vakacegu tiko.
8 Mo ni kila tiko na tui ni keimami a lako ki na yasana vaka Jutia, ki na vale ni soro ni Kalou levu, o koya sa tara tiko ena vatu lelevu, sa vakadavori talega na kau me kena lalaga; sa caka vakavinaka sara tikoga ka sa uasivi cake tiko ga na ligadra.
9 Keimami sa tarogi ira na qase ka vosa vaka oqo vei ira, "O cei sa vakaroti kemuni mo ni tara na vale oqo kei na kena lalaga talega?"
10 Keimami sa taroga talega na yacadra me rawa ni o ni kila, keimami sa vola talega na yacadra nai liuliu.
11 Era sa vakauta lesu mai e dua na kenai sau ni vola ka vaka: "Keimami sa nona tamata na Kalou levu kei lomalagi kei vuravura, keimami sa tara tale tiko oqo na vale ni soro e a tara ena dua na gauna sa oti, me vaka ni a tara ka vakaotia na tui kei Isireli.
12 "Baleta ga ni ra sa vakacudruya na Kalou kei lomalagi na neimami qase, na Kalou sa qai soli ira kina ligai Nepukanesa na tui Papiloni na Kalitia, o koya sa vakarusa na valenisoro oqo ka qai kauti ira na tamata ki Papiloni.
13 "Io, ena matai ni yabaki i Sairusi na tui Papiloni, sa solia o Sairusi na tui e dua na lewa, o ya me tarai tale na vale ni Kalou oqo.
14 "Na siliva, na Koula, kei nai yaya kece ni vale ni Kalou, e a kauta tani o Nepukanesa mai na valenisoro mai Jerusalemi ka kauta ki na vale ni soro mai Papiloni, sa qai soli vei Sesibasari na kovana.
15 "Sa qai tukuna vua, 'Kauta na veika kece oqo, lako, kauta na veika oqo ki na valenisoro mai Jerusalemi ka tara na vale ni Kalou me tara tale ena kenai tutu makawa.'
16 "O Sesibasari sa lako mai ka vakadavora na yavu ni vale ni Kalou mai Jerusalemi, mai na siga o ya me yacova na siga oqo, sa tara tikoga ka e se bera ni oti."
17 O koya oqo, kevaka sa vinaka vei kemuni na tui, me caka e dua na vakasaqaqara ena vale ni yau ni tui Papiloni se sa dua nai vakaro vakaoqo sa solia o Sairusi na tui me baleta na kena tara tale na vale ni Kalou e Jerusalemi, ka me qai vakauta mai na tui na lewa ena vuku ni ka oqo.


Chapter 6

1 Na tui o Taraiasi sa vakarautaka e dua nai vakaro kei na vakasaqaqara ena vale ni tukutuku makawa na vanua sa maroroi kina nai yau kei Papiloni.
2 Sa kune e dua nai vola vivigi mai Alameca ena vale ni tui ena vanua o Mitia, ka volai kina oqo:
3 Ena i matai ni yabaki nei Sairusi na tui, sa solia kina e dua nai vakaro me baleta na vale ni Kalou mai Jerusalemi, "Me tarai tale na vale sa dau vakacabori kina nai soro; na kena yavu me vakadavori vakavinaka, na kena cecere me onosagavulu na kiupiti ka me onosagavulu talega na kiupiti na kena raba,
4 Me tolu nai yatu vatu bibi, me dua nai yatu kau vovou, na kena i sau me lako mai na nonai yau na tui.
5 Na siliva, na koula kei na ka kecega ni vale ni Kalou sa kauta tani o Nepukanesa mai na vale ni Kalou mai Jerusalemi, me qai vakasukai lesu kece mai Papiloni, me ra qai biu ki na kenai tutu mai Jerusalemi, ki na kedra i tutu dina ena vale ni Kalou".
6 O koya oqo, Tatinai na kovana ni veivanua e na taudaku ni Uciwai, Sica-Bocanai, kei ira kece na nona i lawalawa na kai Peresia ena taudaku ni Uciwai, mo dou tu tani vakayawa mai kea.
7 Dou laivi ira ga me ra tara na vale ni Kalou me ra cakava ga na cakacaka ena kena vanua o ira na kovana kei ira na qase ni Isireli.
8 Au sa vakarota talega na veika mo dou cakava vei ira me baleta na kena tara cake na vale ni Kalou: Na kenai sau ni veika kece me lako mai na nona i votavota na tui mai na veivanua me sivia yani na Uciwai levu. Oqo me soli yani vakatotolo vei ira sa cakava tiko na cakacaka me kua kina ni dua na ka e vakataotaki.
9 Na veika kecega era vinakata na luve ni bulumakau, na luve ni sipi, na lami mei soro kama ki vua na Kalou ni lomalagi, na witi, na masima, na waini kei na waiwai me vaka na nodra kerekere na bete mai Jerusalemi, me sa soli vei ira e na veisiga, ka me kua sara ni vakataotaki,
10 Me rawa ni ra vakacabora nai soro sa boi vinaka sara vua na Kalou ni lomalagi, me ra masulaka kina na tui kei ira na luvena tagane.
11 Au sa vola talega nai vakaro, o koya vakayadua sa via veisautaka nai vakaro oqo, na kau ga e via basuka mai na vale oqo, me qai vakaduri ka vakukunataki kina kei na nona vale me sa caka mei benubenu e na vuku ni sa beca nai vakaro oqo.
12 Na Kalou o koya sa vakavuna me tiko na yacana mai kea, me vakarusa o cei ga na tui se tamata sa via vakagolea tani ena lewa sa biu yani se sa via basuka tani na lewa sa biu yani oqo. Oi au o Sairusi, sa solia tiko yani na lewa oqo – me vakatotolotaki na cakacaka oqo.
13 O koya oqo, Tatinai na kovana ni veivanua e na taudaku ni Uciwai, Sica-Bocanai, kei ira kece na nona i lawalawa era sa cakava vakaidina me vaka sa lewa mai o Taraiasi na tui.
14 Era sa cakacaka na nodra qase na Iperiu ka era sa vakavotukana e na cakacaka me vaka na nodrau parofisai o Akeai kei Sakaraia na parofita na luvei Ito. Era sa tara ka vakaotia, me vaka nai vakaro i Jiova na Kalou kei Isireli me vaka talega nai vakaroi Sairusi, Taraiasi kei Atekisekise na tui Perisia.
15 Sa vakacavari na valenisoro e nai ka tolu ni siga ni vula o Eta nai ka ono ni yabaki ni veiliutaki nei Sairusi na tui.
16 O ira na luvei Isireli kei ira na bete kei ira na livai kei ira na kena vo ni kawa mai na veivakabobulataki, era solevutaka na kena vakacabori na vale ni Kalou ena reki.
17 Era sa vakacabora nai soro ena kena soli tiko na vale ni Kalou, e dua na drau na bulumakau, rua na drau na sipi, va na drau na lami kei nai soro ni valavala ca vei ira kece na Isireli e tinikarua na me tagane, me vaka ga nai wiliwili ni yavusa e Isireli.
18 Era sa wasei ira na bete ena nodra i tokatoka, o ira na Livai ena nodra i tokatoka, me baleta na veiqaravi vua na Kalou e Jerusalemi, me vaka sa volai ena i Vola i Mosese.
19 O ira na kawa mai na veivakabobulataki era sa maroroya na Lako Sivia ena i ka tinikarua ni siga ni matai ni vula.
20 Ni ra sa vakasavasavataki ira o ira na bete kei na Livai, o ira kece era sa vakatabui ni ra sa vakasavasavataki, era sa vakamatea na lami ni Lako Sivia me baleti ira kece na kawa sa vo mai na veivakabobulataki, me baleti ira na dui tacidra o ira na bete, kei ira talega.
21 O ira na luvei Isireli era sa lesu mai na veivakabobulataki era sa kana vata kei ira vakayadua ga sa wasei koya mai na dukadukali kecega ni vanua ni veimatanitu me rawa ni ra sa vakasaqara kina na Kalou kei Isireli.
22 Era sa maroroya na Kanavata ni Madrai Sega ni Vakaleveni me vitu na siga ena reki, ni sa vakayacora tiko vei ira na Kalou na reki levu, ka vagolea na yalona na tui Asiria me golevi ira mai, me vakaukauwataka na ligadra ena cakava na cakacaka ni vale i Jiova na Kalou nei Isireli.


Chapter 7

1 Ni sa oti na veika oqo ena gauna nei Atekisekise na tui Perisia, o Esera na luvei Seraia, na luvei Asaraia na luvei Ilikaia,
2 Na luvei Salumi, na luvei Setoki, na luvei Aitubu,
3 Na luvei Amaraia, na luvei Asaraia, na luvei Meraioci,
4 Na luvei Seraia, na luvei Usi, na luvei Buki,
5 Na luvei Abisua, na luvei Finaisi, na luvei Iliesa, na luvei Eroni na bete levu—
6 O Esera oqo sa lako cake mai Papiloni, sa dua na vu ni vunau ni I vola I Mosese vuku ka matau, me vaka sa solia o Jiova, na Kalou kei Isireli. Na tui sa solia vua na ka kecega sa kerea, me vaka na ligai Jiova sa tiko ga vua.
7 Eso vei ira na luvei Isireli, na bete, na livai, o ira na daulaga sere, na dau vakatawa ni matamata kei ira na Necenimi era sa lako cake mai Jerusalemi e nai ka vitu ni yabaki nei tui Atekisekise.
8 Sa lako mai o Esera ki Jerusalemi e nai ka lima ni vula e nai ka vitu ni yabaki nei Atekisekise na tui.
9 E nai matai ni siga ni matai ni vula sa tekivu nai lakolako mai Papiloni, ena matai ni siga ni kalima ni vula sa lako mai ki Jerusalemi, me vaka na liga vinaka ni Kalou sa tiko vua.
10 Ni sa vakarautaka oti na lomana o Esera me dauvakasaqaqara e nai vunau ni Kalou, me cakava talega ka me dau vakatavuvulitaka na vosa ni Kalou vei ira na Isireli.
11 Oqo nai vola nei Atekisekise vei Esera na bete, na vu ni vunau, ka sa kena dau ena vosa sa vakarota o Jiova kei na nona lewa e Isireli:
12 Oi au o Atekisekise na nodra tui na tui, kivei Esera na bete, na vu ni vunau, na kena dau ni vosa ni Kalou ni lomalagi: Na taucoko ni vakacegu ka lako yani.
13 Au sa solia e dua nai vakaro vei ira kece na Isireli, na bete, na livai kei ira era sa tiko ena vanua au sa lewa, o ira kece era sa soli ira me ra lako cake ki Jerusalemi, me ra sa lako vata kei iko.
14 Ena vanua o sa talai kina mai vua na tui kei iratou na nona lewe vitu na daunivakasala me vakataroga me baleti Juta kei Jerusalemi ena vuku ni Kalou kei nai vunau ni Kalou sa tiko oqori e ligamu;
15 Ena vuku ni siliva kecega kei na koula o koya sa soli wale tu ga mai vua na tui kei iratou na nona daunivakasala, ki vua na Kalou ni Isireli o koya sa tiko mai Jerusalemi;
16 Ena vuku ni siliva kei na koula o rawa ni kunea mai na yasana taucoko o Papiloni vata kei na solisoli loloma kecega mai vei ira na tamata kei ira na bete, me ra solia wale yani ki na vale ni nodra Kalou mai Jerusalemi—
17 O koya oqo, mo qarauna, mo volia e nai lavo oqo na bulumakau yadru kei na sipi tagane, na lami, nai soro sila, nai soro laugunu me ra vakacabora oqori, e nai cabocabo ni soro ena vale ni nomu Kalou mai Jerusalemi.
18 Na veika ga sa vinaka vei iko kei ira na tacimu mo dou cakava ena siliva kei na koula, dou cakava me vaka ga na lewa ni nomudou Kalou.
19 Na veika kecega sa soli vei kemudou ena vuku ni veiqaravi ni nomudou Kalou ena vale ni Kalou, dou cakava taucoko ena mata ni Kalou kei Jerusalemi.
20 Na veika kece dou gadreva sa vo me baleta na vale ni nomudou Kalou, o koya dou sa rawa ni sauma ga, dou sauma oqori mai na nona i votavota na tui.
21 Oi au mada ga o Atekisekise na tui, au sa solia nai vakaro vei ira kece na dauniyau sa tiko ena vanua ka sivia yani na uciwai, me kila, na veika kece sa vinakata o Esera na bete, na vu ni vunau, ena vosa ni Kalou ni lomalagi me vinakata mai vei kemudou, me sa caka vakavinaka vua,
22 Me rua na drau na udolu na dola na siliva, me dua na udolu rua na drau ruasagavulu ka lima nai vakarau witi, me ciwa na drau ciwasagavulu na qaloni na waini, me levu sara na masima, me drau talega na qaloni waiwai.
23 Na veika sa lewa mai na Kalou ni lomalagi, me sa caka vakavinaka yani ki na vale ni Kalou ni lomalagi. Ena cava me na cudruvi kina na tui kei ira na luvena?
24 O ni sa vakananumi yani ni sa tabu me ra saumi vakacavacava se ka vakavanua se soli cava ga o ira na bete, livai, na daunisere, vakatawa, na Necinimi se o ira na dauniveiqaravi e na vale ni Kalou.
25 Vei iko Esera, me vaka na nomu Kalou sa dau solia na vuku kei na yalomatua, mo tuvana na mataveilewai kei na kena turaganilewa, me ra lewa vei ira kecega na tamata sa tiko ena vanua kei na vanua vakayawa mai na uciwai levu, o ira kece sa kila na lewa ni Kalou, ka me ra vakavulici talega o ira sa lecaika.
26 O ira vakayadua sa sega ni via rogoca na lewa ni Kalou kei na nona lewa talega na tui, me lewai vakatotolo o koya oqo, me vakamatei, se biu ki valeniveivesu, se tauri vakaukauwa na nona veika sa volia oti se vakautani.
27 Me vakacaucautaki o Jiova na Kalou ni neimami qase o koya sa biuta na veika vaka oqo ki na yalona na tui me vakaukuukutaka kina na vale ni Kalou sa tiko mai Jerusalemi,
28 Ka sa vakatetea na nona yalololoma ki vei au ena matana na tui kei ira na nona daunivakasala kei ira kece na nona bati na tui. Au sa vakayaloqaqataki kina, me vaka na ligai Jiova na noqu Kalou sa tiko ga vei au; kei na nodra vakasoqoni vata mai na turaga e Isireli me ra lako cake vata mai kei au.


Chapter 8

1 O ira oqo nai liuliu ni vuvale nei tamadra, ka sai ira oqo na kawa tamata era sa lako cake vata mai kei au mai Papiloni ena gauna nei Atekisekise na Tui:
2 O ira na luvei Finaisi, o Kerisomi mai vei ira na luvei Itamari, o Taniela mai vei ira na luvei Tevita, Hatusi;
3 Mai vei ira na luvei Sekanaia mai vei ira na luvei Parosi, Sakarai; ka era sa volai vata kei koya e dua na drau limasagavulu na tagane;
4 Mai vei ira na luvei Paaci- Moapi, Elionai na luvei Seraia kei ira vata tukuna e rua na drau na tagane;
5 Mai vei ira na luvei Sekanaia, Peni – Jaasieli kei ira vata tukuna e tolu na drau na tagane;
6 Mai vei ira na luvei Adini, Epeti na luvei Jonacani kei ira vata e limasagavulu na tagane.
7 Mai vei ira na luvei Ilama, Jesaia na luvei Atalaia kei ira vata kei koya e vitusagavulu na tagane;
8 Mai vei ira na luvei Sefatia, Sebatia na luvei Maikeli vata kei koya e walusagavulu na tagane;
9 Mai vei ira na luvei Joape, Opetaia na luvei Jieli vata kei koya e rua na drau tinikawalu na tagane;
10 Mai vei ira na luvei Selomici, Peni – Josifia vata kei koya e dua na drau onosagavulu na tagane;
11 Mai vei ira na luvei Bebai, Sakaraia na luvei Bebai vata kei koya e ruasagavulu ka walu na tagane;
12 Mai vei ira na luvei Asikari, Joenani na luvei Akatani vata kei koya e dua na drau ka tini na tagane;
13 Mai vei na luvei Atonikami, sai koya oqo na yacadra o Iliveleti, Jieli, SemaiaOkei ira tale e onosagavulu na tagane;
14 Kei iratou talega na luvei Bikivai, Utai kei Sabudu vata kei ira tale e vitusagavulu na tagane.
15 Oqo, au sa qai vakasoqoni ira vata mai na uciwai sa drodro vaka ki Aera, ka keimami sa tiko e kea me bogi tolu. Au sa vakaraici ira na tamata kei ira na bete, au sa sega ni raica e dua vei ira na luvei Livai.
16 Au sa qai kacivi ira mai, oiliesa, Areli, Semaia, Elenacani, Jaribi, Nacani, Sakaraia kei Mesulame, o ira talega nai liuliu kei Joaribi, Elenacani, o ira na vuku ka kila ka.
17 Au sa solia vei ira nai vakaro me baleti Ito na turaga ni vale ni Kasifia, au sa tukuna vei ira na ka me tukuni vei Ito kei ira na tacina na Necinimi e na vanua o Kasifia – me ra kauti ira mai na dauveiqaravi ni vale ni Kalou.
18 Me vaka na liga vinaka ni Kalou sa tiko vei keimami, era sa kauta mai e dua na tamata sa vuku sara mai vei ira na luvei Mali na luvei Livai na luvei Isireli o Serebia, kei ira na luvena kei na tacina e tinikawalu na tagane;
19 Kei Asabia, o Jesaia talega na luvei Merari kei ira na tacina kei na luvena e ruasagavulu na tagane;
20 Mai vei ira na Necinimi, o koya sa digitaki mai vei Tevita kei ira na veiliutaki ena vuku ni veiqaravi vei ira na Livai e rua na drau ruasagavulu na Necinimi. o ira kece oqo era sa digitaki me vaka na yacadra.
21 Au a vakarota na lolo mai kea ena uciwai o Aera me keimami vakamalumalumutaki keimami kina ena mata I Jiova, me keimami kunea mai vua na sala dina me baleti keimami o ira na neimami lalai kei na ka keimami taukena.
22 Ni, ka'u sa madua me kerea tale vua na tui na veivuke ena nodra veitokoni na sotia kei na mataivalu ose ena nodra veivuke ena vukudra na meca ena gaunisala, ni keimami sa vosa oti vua na tui ka vaka, "Na liga ni Kalou sa tiko vei ira kecega sa vinaka ka vakasaqarai koya kei na nona kaukauwa ni cudru vei ira kecega sa biuti koya."
23 Keimami sa lolo ka masuta na Kalou ena tikina oqo, ka sa sauma na neimami masu. Nai Solisoli Ena Vuku Ni Valenisoro
24 Au sa wasei ira tani e tinikarua nai liuliu vei ira na bete – Serebia kei Asabia kei na tini tale na veitacini vata kei ira.
25 Sa vakarautaki vei ira na siliva, na koula, na veika kecega, na soli me baleta na vale ni noda Kalou o koya era sa solia na tui kei ira na nona daunivakasala, o ira na nona turaga lalai kei ira kece na Isireli.
26 Au sa vakarautaka mada ga e ligadra e ono na drau limasagavulu na taledi siliva, na veiyaya siliva me dua na drau na taledi, me dua na drau talega na taledi koula,
27 E ruasagavulu na beseni koula ka kenai sau vakailavo e lima na udolu na dola, e rua na beseni na varasa ka rairai vinaka vaka sara ga na koula.
28 Au sa qai vosa vei ira, "O ni sa ka Tabu vei Jiova, na veika kece oqo sa ka tabu talega, na siliva, na koula sai solisoli ka ni loloma mai vei ira na nomuni qase.
29 "Mo ni raica ka maroroya me ra vakarautaki e matadra nai liuliu ni bete kei na livai kei ira nai liuliu ni veivuvale e Isireli e Jerusalemi ena tikina e loma ni vale ni Kalou."
30 Era sa taura na bete kei ira na livai na siliva kei na koula kei na ka kece sa vakarautaki oti, me ra kauta mai ki Jerusalemi ki na vale ni Kalou.
31 Keimami sa lako tani mai na uciwai o Aera ena i ka tinikarua ni siga ni matai ni vula, me lako ki Jerusalemi. Sa tiko vata kei keimami na liga ni Kalou, ka sa vakabulai keimami mai na ligadra na meca kei na vei sikabotei kece ena gaunisala.
32 Keimami sa lako mai ki Jerusalemi, ka tiko kina me tolu na siga.
33 Ena i ka va ni siga era sa vakarautaki kina na siliva, na koula kei na ka kece ena vale ni Kalou ena ligai Meremoci na luvei Uraia na bete, sa tiko vata kei koya o Iliesa na luvei Finaisi, kei ira na Livai, o Josapati na luvei Josua kei Noadia na luvei Binui,
34 Nai wiliwili kei nai vakarau ni ka kece, ni sa volai nai vakarau ni ka kece ena gauna o ya.
35 Na luvedra o ira sa kau vakabobula kei ira sa lesu mai na veivakabobulataki era sa vakacabora nai soro kama vua na Kalou nei Isireli e ciwasagavulu ka ono na sipi tagane, vitusagavulu ka vitu na lami, e tinikarua na me tagane mei soro ni valavala ca. Oqo sai soro kama kece vei Jiova.
36 Era sa vakauta nai vakaro ni tui ki vei ira na nona turaga lalai na tui, vei ira talega na kovana ena vanua kei na vanua vakayawa mai na Uciwai. Era sa solia na veitokoni ki vei ira na tamata, ki na vale talega ni Kalou.


Chapter 9

1 Ni sa vakayacori oti na veika oqo, era sa lako mai vei au na veiliutaka ka vaka, "O ira na Isireli, o ira na bete na Livai, era sa sega ni tawasei ira tani mai vei ira na tamata ni vanua, era sa dokai ira na kai Kenani, na Itaiti, na Perisaiti, na Jepusaiti, na Amonaiti, na Moapi, o ira na Ijipita kei na Amoraiti.
2 "Ni ra sa taura eso vei ira na nodra goneyalewa me watidra vei ira talega na luvedra, oqo sa veiwaki kina na ka tabu kei ira na kai tani. O ira sara ga na veiliutaki era sa vesuki ena cala oqo."
3 Ni'u sa rogoca na veika oqo, au sa dresuka na noqui sulu kei na noqui oro ka'u cavuraka na drau ni uluqu kei na kumiqu, ka'u sa dabe ga ka vakatataro tiko.
4 O ira kece sa dau rerevaka na vosa ni Kalou kei Isireli era sa soqoni kece mai vei au me baleta na nodra talaidredre na kena vo ni kau vakabobula, au sa vakatataro tikoga me yacova na vakacaboi soro ena yakavi.
5 Ena vakacaboisoro oqo, au a tucake mai na noqu lolo, ni oti na noqu dresulaka na noqu i sulu kei na noqu i ubi, au sa tekiduru ka dodoka cake na ligaqu vei Jiova na noqu Kalou.
6 Ka tukuna vua, na noqu Kalou, "Au sa rui madua vakalevu ka rui yalolailai me'u rai yani vei kemuni na noqu Kalou, ni sa tubu cake na ului keimami kei na neimami vakadinadinataka sa tubu yani ki lomalagi.
7 "Mai na nodra veisiga na tamai keimami ka yacova mai na siga oqo, keimami sa rui malumalumu sara ni keimami sa kila na neimami cala, oi keimami, o ira na tui, o ira na bete ka keimami sa soli ki na ligadra na tui ni veivanua, ki nai seleiwau ni veivakabobulataki me veivakamavoataki ka veivakalolomataki keimami me vaka sa yaco tiko oqo.
8 "Ia, oqo, na Kalou o Jiova sa vakaraitaka mai na loloma, me vakatara vei keimami na kena vo ni dro bula, ka solia vei keimami nai vesu ni nona Vanua Tabu, me rawa kina vua na Kalou me vakararamataka na matai keimami ka solia e dua na toso ni veivakabulabulataki mai na bula vesuki.
9 "Keimami a bobula tu, ia na Kalou sa sega ni guilecavi keimami ena neimami vesuki; sa vakatetea mai na nona loloma ki vei keimami ena matai koya na Tui Perisia, me vakananumi keimami ena kena vakavoui na vale ni Kalou, me tarai cake na kena sa rusa koto, me solia vei keimami na galala e Juta kei Jerusalemi.
10 "Oqo na Kalou, na cava tale me keimami tukuna ena ka oqo? Keimami sa biuta na nomuni vakaro,
11 "Nai vakaro o ni a vakarota mai vua na nomuni tamata na parofita, me tukuna, na vanua o ni sa curuma yani mo ni taukena sa vanua duka ka era sa dukalevu talega na kena tamata kei na nodra caka ca sa vakasinaita na yasana ka dua kei na nodra sega savasava.
12 'Oqo mo ni kua ni solia na luvemuni yalewa me watidra na luvedra tagane se na luvedra yalewa me watidra na luvemuni tagane; mo ni kua ni vakasaqara na nodra vinaka kei na nodra sautu, mo ni kaukauwa ga ka kana mai na vinaka sa tu ena qele, ka mo ni biuta tu vei ira na luvemuni me sega ni mudu me nodra i votavota.'
13 "Na veika kece sa lako mai vei keda ena vuku ni nodra caka cala, kei na nodra vakaiotaka na nodra malumalumu, ni kemuni sa totogitaki keimami vakalailai ga mai na levu ni neimami caka cala ka o ni sa vakagalalataki keimami me vaka oqo,
14 "Me keimami coqa tale na nomuni vakaro, ka duavata tale ena vakawati vata kei ira na tamata caka ca oqo? O ni na sega beka ni cudruvi keimami me yacova ni o ni sa vakaoti keimami me kua tale ni dua e vo?
15 "I Jiova na Kalou ni Isireli, o ni sa rui dodonu, sai keimami na vovo ni dro bula ena siga oqo. Keimami sa tu oqo e matamuni. Sa dina na ka keimami beitaki kina, sa sega e dua e rawa ni tu e matamuni ena vuku ni cala vakaoqo!"


Chapter 10

1 Oqo, ni se masu tiko o Esera, ka vakatutusa tiko, tagi ka cuva vakatobuicu tiko ena mata ni vale ni Kalou, e dua nai soqosoqo levu mai vei ira na tagane, yalewa kei ira na gone ni Isireli taucoko, era sa lako mai vua ka tagi vakadomoilevu sara.
2 O Sakaraia na luvei Jieli e dua vei ira na luvei Ilama sa vosa cake mai ka tukuna vei Esera, "Keimami sa cala vua na neimami Kalou, keimami sa veiwatini kei ira sa sega vei ira na Kalou ena vanua, ia, oqo, keimami sa qai kila ni se tiko na vakanuinui ni bula e Isireli.
3 "Oqo me keimami sa cakava mada e dua na veiyalayalati kei na noda Kalou, me ra biu tani kece na yalewa oqo kei ira kece sa sucu mai vei ira, me vaka nai vakasala mai vei Esera kei ira sa rerevaka nai vakaro ni noda Kalou, ka me caka me vaka sa tukuna nai vunau.
4 "Mo tucake Esera, ni sai koya oqo na nomu i tavi, keimami sa na tokoni iko, mo qaqa ka vakayacora mada oqo."
5 Sa qai tucake o Esera ka cakava me ra yalayala na nodra i liuliu na bete, na livai kei na nodra i liuliu na tamata. Era sa yalayala ka bubului me caka na ka sa volai.
6 Sa tucake o Esera mai na vale ni Kalou ka lako kina tikina nei Joanani na luvei Eliasibi. Ni sa lako mai ki kea, sa sega ni kania e dua na madrai se gunuva e dua na wai, ni sa vakalolokutaki.
7 Era sa vakaduria e dua nai tukutuku kacivaki e Juta kei Jerusalemi taucoko vei ira na kawa taucoko ni dro bula me ra soqoni mai e Jerualemi,
8 O koya yadua sa sega ni basika mai ena loma ni tolu na siga oqo, me vaka na nodra i vakasala nai liuliu kei ira na qase, ena mai vesu kece na nodra ka taukeni kei ira yadua era sa kau tani mai nai soqosoqo levu, mai vei ira sa dro bula mai.
9 Oi ira kece na Juta kei na Penijamini, era sa soqoni mai ki Jerusalemi ena loma ni tolu na siga. Oqo nai ka tinikarua ni siga ni ka ciwa ni vula era sa soqoni vata mai na tamata ena vanua sa lokuci ena vale ni Kalou, era sa sautaninini vakalevu baleta na veika oqo kei na kena tau bi talega na uca.
10 Sa qai tucake o Esera na bete ka qai tukuna vei ira, "O ni sa veibeci vakalevu, o ni sa vakawati vata kei ira sa sega vei ira na Kalou, me kuria na nomuni beitaki vakaidina na Isireli.
11 "Oqo mo ni vakatutusa vei Jiova na Kalou ni nomuni qase, ka muria na lomana, dou tawasei kemudou mai vei ira na tamata ni vanua, mai vei ira talega na yalewa vakawati sega ni kila na Kalou."
12 Era sa sauma kece mai nai soqosoqo ka vaka, "io! me vaka o ni sa tukuna, keimami na cakava, era sa sauma mai vakadomoilevu.
13 "Era sa lewe levu na tamata; sa gauna tiko mai ni uca tau bi, sa sega ni rawa kina na tucake tu e tautuba, se me caka na cakacaka oqo me dua serua na siga ni sa levu vei keda sa cala ena ka oqo.
14 "Mo ni tucake mada ga nai liuliu ni soqosoqo ka me ra lako o ira vakayadua sa taura na yalewa sega ni kila na Kalou me ra lako mai ena gauna sa lokuci, vata kei ira na nodra qase kei na turaganilewa ni vei koro, me yacova ni sa yali yani na nona cudru katakata na Kalou ena ka oqo."
15 O Jonacani ga na luvei Asaeli kei Jaesia na luvei Tikava e rau sa coqa na ka oqo, o Mesulame kei Sabetai na Livai e rau sa solia na nodrau veitokoni vei rau oqo.
16 O ira na kawa mai na veivakabobulataki era sa muria talega. o Esera na bete kei ira eso nai liuliu ni veivuvale, o ira yadua ena yacadra; ena sa dabe sobu ena i matai ni siga e nai ka tini ni vula me ra vakaraica matua na veika oqo.
17 Ni yacova na matai ni siga ni matai ni vula, e ratou sa vakaotia na nodra tarogi kece na tamata era sa vakawati kei ira na yalewa sega ni kila na Kalou.
18 Vei ira na luve ni bete sa kune me vakawati kei ira sa sega ni kila na Kalou, sai ira oqo, o ira na luvei Josua na luvei Josateki kei ira na tacina, o Masaia, o Iliesa, o Jarubi kei Ketalia.
19 Era sa solia na nodra yalayala ni ra na biuta na watidra, ni ra sa kila na nodra cala, era sa vakacabora e dua na sipi tagane mai na qele ni sipi me nodra i soro ni caka cala.
20 O ira talega na luvei Ima: Anani kei Sebadia;
21 Mai vei ira na luvei Arima: Maoseia, Ilaijia, Semana, Jieli kei Usaia.
22 Mai vei ira na luvei Pasuri: Elionai, Maoseia, Isimeli, Nacanieli, Josabeti kei Elasa.
23 Mai vei ira talega na Livai: O Josabeti, o Simeli, o Kelaia (Kelita), o Pecaia, o Juta kei Iliesa.
24 Mai vei ira talega na daunisere: o Eliasibi mai vei ira nai vakatawa ni matamata: o Salami o Telemi kei Uri,
25 O ira na kena vo e Isireli: mai vei ira na luvei Parosi: o Ramaia, o Jeseia, o Malakaia, o Mijamini, o Iliesa, o Malajija kei Veraia;
26 Mai vei ira na luvei Ilama: O Matania, o Sakaraia, o Jieli, o Abidi, o Jeremoci, o ilaia;
27 Mai vei ira na luvei Satu: O Elionai, o Eliasibi, o Matania, o Jeremoci o Sabedi kei Asisa;
28 Mai vei ira na luvei Bebai: O Jeonana, o Anania, o Sabai kei Atalai;
29 Mai vei ira na luvei Bani: O Mesulame, o Maluka, o Adaia, o Jesubi, o Sili kei Ramoci,
30 Mai vei ira na luvei Paaci-Moapi: O Adana, o Selala, o Benaia, o Maoseia, o Matania o Besalele, o Binui kei Manasa;
31 Mai vei ira na luvei Arima: O Iliesa, o Isita, o Malikija, o Semana, o Simione,
32 O Penijamini, o Malakai kei Samaria;
33 Mai vei ira na luvei Asumi, Metenai, Matata, o Sabedi, o Iliveleti, o Jeremaia, o Manasa kei Simei;
34 Mai vei ira na luvei Bani; o Madai, o Amirama, o Uele,
35 O Benaia, o Bedala, o Jelua,
36 O Vania, o Meremoci, o Eliasibi,
37 O Matania, o Matenai, Jesai
38 O Bani, o Biniu, o Simei,
39 O Selemia, o Nacani, o Adaia,
40 O Makanadebai, o Sasai, o Sarai,
41 O Asareli, o Selemia, o Semaria,
42 O Salami, o Amaria kei Joseva;
43 Mai vei ira na luvei Nibo: O Jieli, o Malicia, o Sabedi, o Sabina, o Jadai, o Joeli kei Benaia.
44 O ira kece oqo sa taura na yalewa sega ni kila na Kalou o Jiova me watidra, ka so vei ira era vakaluveni sara kina.