Sere I Solomoni

1 2 3 4 5 6 7 8


Chapter 1

1 Na Sere Ni Veisere Sa Nei Solomoni Na Kana Magiti. Na Sulamaiti
2 Me reguci au o koya ena i regu ni gusuna – Ni sa vinaka o iko mai na waini.
3 Baleta ni sa boiboi kaloni na nomu i lumu, na yacamu sa i lumu sareguregu: O koya oqo, era sa domoni iko kina na goneyalewa.
4 Tuberi au yani! Keimami na cici muri iko yani. Na Sulamaiti Na Tui sa kauti au mai ki na nona loqi. Keimami na marau ka rekitaki iko. Keimami na nanuma ga na nomu loloma ni vinaka cake mai na waini. Na Sulamaiti Dina taucoko, era sa vinakati iko.
5 Au sa baloa ka matavinaka, oi kemudou na goneyalewa ni Jerusalemi, Me vaka na vale laca mai Kitari, Me vaka na vale latilati i Solomoni.
6 Kakua ni raici au mai, baleta ni'u sa dabuiloa ni sa kati au na matanisiga. O ira na ganequ, era sa cudruvi au; Era sa cakava me'u vakatawa ni were ni vaini, Au sa sega kina ni vakatawa rawa na noqu were ga vakai au.
7 Tukuna mai, o iko au sa lomana, o sa vakani ira tiko E vei na qelenisipi? Era sa dauvakacegu E vei ena sigalevu? Ena cava, me'u dau ubi au tiko kina, me vaka na kena vo ni qele ni sipi? Na Daulomani
8 Kevaka o sega tiko ni kila, o sa rui totoka mai vei ira kecega na yalewa, o sa muria tikoga nai kalawa ni qele ni sipi Ka vakani ira tiko na luveni me, ena yasa ni nona vale nai Vakatawa.
9 Au sa vakatautauvatani iko, noqu daulomani, me vaka na noqu ose yalewa gone ena kedra maliwa na kareti nei Fero.
10 Na balumu sa dravia ka vakai ukuukutaki, Na domomu sa vakaitaube ena wa koula.
11 Keimami na cakava vei iko nai ukuuku koula tuvani vinaka ena siliva. Na Sulamaiti
12 Ni sa dabe tiko na Tui ena nona teveli Na noqu vunikau dauboi, sa solia mai na kena i boi vinaka.
13 Ai vau mura na noqu daulomani ki vei au, ena bogi taucoko, sa davo koto ena maliwa ni sucuqu.
14 Na noqu daulomani ki vei au, sa vaka nai vutu senikau totoka ena veiwere ni vaini mai Enaketi. Na Daulomani
15 O sa rui totoka na noqu daulomani! O sa rui totoka! Sa tu vei iko na yaloka ni mata ni ruve. Na Sulamaiti
16 O sa rui mata vinaka, na noqu daulomani! Io, sa rui vinaka! Na noqui davodavo sa rui ka vou.
17 Na sitari sa i coka ni vale, Sa i sa ni vale na damanu.


Chapter 2

1 Oi au na rosi ni Saroni, Na viavia ni buca. Na Daulomani
2 Me vaka na viavia ena kedra maliwa na soni Sa vakakina o koya ka'u sa lomana ena kedra maliwa na goneyalewa. Na Sulamaiti
3 Me vaka na vu ni apolo ena kedra maliwa na veikau, sa vakakina na noqu daulomani e na kedra maliwa na cauravou. Au sa dabe sobu ena vanua rurugu ena reki vakaidina. Na vuana sa kamikamica ki na yamequ.
4 Sa kauti au mai o koya ki na vale ni magiti, sa ukutaki ga kina na veilomani.
5 Maroroi au vata na i soso vuata, vakavoui au vata na apolo, ni'u sa tagica na loloma.
6 Sa vakalokoloko na uluqu ena ligana i mawi, na ligana i matau sa mokoti au.
7 Au sa vakarota veikemudou na goneyalewa ni Jerusalemi, Me vaka na me kila ni vanua, dou kua ni yavalata, se vakayadrata, sa na basika ga mai. Na Sulamaiti
8 Na domo i koya ka'u sa lomana! Sa lako mai o koya, sa ladeva mai na veitokaitua, sa ciciva mai na veidelana.
9 Na noqu daulomani sa vaka na me kila, sa vaka na teira gonetagane, sa tu cake tu mai na lalaga ni vale; sa vakararai tiko mai ena katuba leka, ka sa vakairoiro tiko mai.
10 Sa vosa mai na noqu daulomani, ka sa tukuna, "Mo tucake mai na noqu ka lomani, na mata vinaka, lako tani mai.
11 Sa oti na vula i batabata Sa oti na uca, sa cila mai na siga.
12 Era sa basika mai na veisenikau ni vanua, Oqo sa gauna ni lagalaga sere, Na domo ni ruve sa rogo mai ena noda vanua.
13 Na vuni lolo era sa solia mai na kedra drokadroka dina, na veivaini era sa solia mai na veivua ni vaini vinaka, solia mai nai boi vinaka. Mo tucake, na noqu ka lomani, ka mata vinaka, Mo lako tani mai!
14 "Na noqu ruve, ena laqa ni veivatu, Ena vanua vuni ni barivatu, Me'u raica ga na nomu matavinaka, Me'u rogoca ga na domomu, Ni sa rui kamica na domomu ka sa rui ka Domoni na matamu rairai vinaka."
15 Vesuka mai na fokisi, Na fokisi lalai sa vakacacana na were ni vaini, ni sa tekivu vua mai na vaini. Na Sulamaiti
16 Na noqu daulomani sa noqu, Oi au sa nona. Sa vakani ira na nona qele ni sipi ena kedra maliwa na viavia.
17 Me yacova na kida ni mataka Sa dro yani nai yaloyalo vuki mai na noqu ka lomani Mo vaka na me kila kei na teira gonetagane ena veiulunivanua o Peca.


Chapter 3

Sere I Solomoni 3 Na Sulamaiti 1 Ena bogi ena noqu i davodavo, au sa qarai koya ka'u sa lomana; Au sa qarai koya, ia, au sa sega ni kunei koya.
2 Au sa tukuna," au na tucake oqo," "au na lakova na koro; na veisalatu ni veitikotiko me'u vakasaqarai koya kau sa lomana." Au sa qarai koya, au sa sega ga ni kunei koya.
3 Nai vakatawa sa veilakoyaki voli ena koro, sa kunei au; "Au sa tarogi koya, o sa raici koya beka, o koya au sa lomana?"
4 Sa kune vakadredre o koya, ni'u sa raici koya ka'u sa lomana, au na vesuki koya me kua ni yali tale mai vei au, me yacova ni'u sa kauti koya mai ki na vale nei tinaqu, e na nona loqi sara o koya sa kunekunetaki au.
5 Au sa vakaroti kemudou, na goneyalewa ni Jerusalemi, kemudou na me kila, kemudou na luveni me ni vanua, dou kua ni veivakayavalati se veivakayadrati, me yacova ni sa oti na veivakacegui. Na Sulamaiti
6 O cei oqo sa lako tiko mai ena vanua liwa, sa vaka na o kubou, Sa vakaboivinakataki ena mura kei na Asi, Kei na noda ka boi vinaka kece na dauveivoli?
7 Io, oqo nai lakolako nei Solomoni kei ira na onosagavulu na nona tamata qaqa sa vakavolivoliti koya, mai vei ira na qaqa ni Isireli.
8 Era sa tauri i sele kece, ni ra sa tamata qaqa ni valu sa dui kabiti ira tu ga na nodra i sele, baleta na rerevaki ni bogi.
9 Na kau mai Lepanoni, sa cakava kina o Solomoni na nona kareti.
10 Na kena duru e siliva ka tokoni ena koula, nai dabedabe e lokaloka, Na lomana sa boro ga ena veilomani.
11 Dou lako yani na goneyalewa ni Saioni ka raici Solomoni na Tui kei nai sala vakatui, sa vakaisalataki koya kina o tinana ena siga ni nona vakamau, na siga sa marau kina na yalona.

Chapter 4

Sere I Solomoni 4 Na Daulomani 1 O sa matavinaka, na noqu daulomani! Raica, o sa matavinaka dina! Sa tu vei iko na mataniruve, ena ruku ni nomu i ubi, Na ulumu sa vaka na qeleni me, era sa lako sobu tiko mai na Ulunivanua o Kiliati.
2 Na batimu sa vaka na qele ni sipi sa koti oti ena nodra cabe mai na sili, o ira kecega sa vaka na drua, sa sega na vanua e lala.
3 Na tebenigusumu sa ka kulakula kei na gusumu sa domoni vakaidina. Na balumu sa vaka na pomekaraneti musu vakaveimama ena daku ni nomu i ubi.
4 Na domomu sa vaka na vale cecere nei Tevita sa tara tu me ia na veimaroroi, Era sa lili tu kina nai sasabai e vakaudolu.
5 Na sucumu ruarua sa vaka na luve ni me kila e drua ni rau sa kana voli ena vei viavia ni buca.
6 Ni sa kida sara na mataka, ka sa dro yani na butobuto, au na kauti au ki na veiulunivanua ni mura kei na yasi.
7 O sa rui matavinaka noqu ka domoni, sa sega na ka mo vakamelei kina.
8 Lako vata mai kei au mai Lepanoni, na watiqu; lako vata mai kei au mai Lepanoni. Biuta mai na vanua cecere o Amana Mai na vanua cecere o Seneri kei Erimoni, Mai na nodra ulunivanua na Lepati Mai na nodra qara na laioni.
9 O sa vakaleqa na yaloqu, na ganequ, na watiqu! Kei na vatu talei ena domomu.
10 Sa rui kamikamica na nomu loloma, na ganequ na watiqu! Na nomu loloma sa vinaka mai na waini Nai boi ni nomu i lumu sa uasivi sara!
11 Na tebenigumu sai vurevure ni kamikamica na watiqu: Na oni kei na sucu sa tiko ena ruku ni yamemu; Na boi ni nomu i sulu sa vaka nai vakaboi mai Lepanoni.
12 Na were vakarautaki sai iko na ganequ, na watiqu, Na mata ni wai vakatabui, nai vurevure dregati.
13 Nai tei ni nomu were sa veivuata kecega, na vuata digitaki ga, na kamifaia, na narita,
14 Na narita, na safaroni, na drova kei na sinamoni, kei na kau drega boi vinaka kecega; Na mura kei na yasi kei na kau kece e boi vinaka sara.
15 Sai iko na mataniwai ena veiwere, na i keli ni wainibula kei na uciwai mai Lepanoni. Na Sulamaiti
16 Mo yadra mai na cagi ni vualiku Mo lako mai na cagi ni ceva! Mo liwa yani ki na noqu veiwere Me boi vinaka yani na kena i boi Lako mai kina nomu were, noqu daulomani, ka mai kania na vuata vinaka dina.

Chapter 5

Sere I Solomoni 5 Na Daulomani 1 Au sa lako mai ki na noqu were, na ganequ na watiqu, Au sa mai kumuna na noqu mura kei na noqu ka boi vinaka, Au sa kania na oni kei na kena kamikamica, Au sa gunuva na mequ waini kei na mequ sucu. Dou kana na wekaqu, dou gunu: Dou gunu sara vakavinaka Oi kemudou sa lomani! Na Sulamaiti
2 Au sa moce, ia, sa yadra tiko na yaloqu; Au sa rogoca na domo i koya au sa lomana! Sa tukituki mai ka tukuna, "Dolava vei au, noqu daulomani, Na noqu ruve, na noqu ka talei; Sa sinaitu na uluqu ena tegu, Na drauniuluqu sa suasua vakalevu ena tegu."
3 Au sa luvata oti na noqu kote, me'u daramaka tale vakacava? Au sa savata oti na yavaqu, me'u vakaduka tale ena vuku ni cava?
4 Sa tara mai nai dola ni katuba o koya au sa vinakata, Sa malaude mai na yaloqu ena vukuna.
5 Au sa tucake me'u dolavi koya au sa lomana, sa tuturu tani mai ligaqu na mura boi vinaka, sa drodrova sobu na qaqalo ni ligaqu ki nai dola sara ni katuba au taura tiko.
6 Ni'u sa dolava na katuba vei koya au sa lomana, sa yali, ni sa lako tani yani: Sa yali na yaloqu ni a vosa vei au o koya Au a qarai koya, ia, au sa sega ni kunei koya, Au a kacikacivi koya, ia sa sega ni rogo mai.
7 O ira nai vakatawa ni koro, era sa raici au, era sa kuitataki au ka vakamavoataki au; o ira na dauraica na bai ni koro era sa kauta tani na noqu i ubi.
8 Noqu kerekere oqo veikemuni na goneyalewa ni Jerusalemi, kevaka e dua sa raici koya ka'u sa lomana, dou tukuna vua, au sa tauvimate sara ga ena noqu via raici koya!
9 Na cava sa uasivi kina o koya oqo, mai vei ira kece sa daulomani? O sa matavinaka mai vei ira kecega na goneyalewa. Na cava sa uasivi kina o koya oqo mai vei ira kecega sa daulomani, mo vakaroti keitou kina vakaoqo? Na Sulamaiti
10 O koya au sa lomana, sa rarama ka damusa ka sa vinaka duadua mai vei ira na tini na udolu.
11 Na uluna sa vaka na koula talei na drauniuluna sa loaloa taliva me vaka na reveni.
12 Na matana sa vaka na ruve, ena bati ni uciwai, sa vakasilimi oti ena sucu ka sa sega ni vakamelei.
13 Na baluna sa dravia ka boi vinaka, Na tebenigusuna sa viavia ni buca ga sa tuturu tiko mai kina nai boi me vaka nai boi ni mura.
14 Na ligana sa koula ga ka sa tu vata na veivatutalei. Na yagona sa lumilumisa ka buli vakamatau me vaka na safaia.
15 Na yavana sa vaka na duru vatu sa yavutaki ena vatutalei. Na kena i rairai sa vaka na sitari digitaki mai Lepanoni.
16 Na vosa ni gusuna sa rui kamikamica, io, sa Domoni dina o koya, o koya oqo au sa vinakata sara, na noqu lomani, na wekaqu, Oi kemudou na goneyalewa ni Jerusalemi!

Chapter 6

1 E vei o koya o sa lomana? Na goneyalewa matavinaka? Ena yasana ki vei sa gole kina o koya, Me keimami lako mai ka vukei iko ena vakaqaqara? Na Sulamaiti
2 Sa lako sobu o koya au sa lomana ki na nona veiwere, ki na nona vei senikau boi vinaka, Me vakani ira na nona sipi ena were, ka me kauta talega mai e so na viavia.
3 Au sa nona na noqu daulomani, na noqu daulomani sa noqu; Sa vakani ira na sipi ena kedra maliwa na viavia. Na Daulomani
4 Noqu daulomani, o sa rui totoka me vakataki Tisira, ka rairai vinaka me vakataki Jerusalemi. O sa saravi me vaka nai yatu sotia era sa colata tiko na nodra drotini.
5 Au sa mai vesuki tu oqo, ena vuku ni nomu sa wanonovi au tikoga mai, Na ulumu sa vaka na qele ni me, ni ra sa muria sobu mai na veiqakilo mai Kiliati.
6 Na batimu sa tuva vinaka me vaka na qele ni sipi ena nodra cabe mai ni ra sa vakasavasavataki oti; ena nodra lako yarurua mai.
7 Na balumu sa vaka na pomekaraneti sa veimamataki, ena buradelamu ena daku ni nomu i ubi.
8 Era sa lewe ono sagavulu na Ranadi, Era sa lewe walusagavulu na dauveiqaravi, Era sa sega ni wiliki rawa na goneyalewa sega cala;
9 Na noqu ruve, na noqu ka talei, sa duatani duadua vei ira kece oqo, Sai koya duadua ga mai veitinana, Sa ka taleitaki duadua nei tinana; Era sa raici koya na goneyalewa ka kacivi koya me vakacaucautaki, O ira na Ranadi kei ira na dauveiqaravi era sa vakavinavinakataki koya.
10 O cei o koya oqo sa rairai vinaka me vaka na kida ni mataka, Matavinaka me vaka na vula, Mata rarama me vaka na siga Rairai vinaka me vaka sa tuva mai na mataivalu vata na nodra drotini? Na Sulamaiti
11 Au sa lako sobu ki na veiwere, me'u laki raica na vuata, me'u raica na veivaini sa se mai se sega, na veipomekaraneti sa kubu mai se sega.
12 Ni se bera ni'u kila, sa vakauqeti na yaloqu me'u vodo ena kareti, ka dabe ena yasa i koya na noqu turaga.
13 Mo lesu mai, mo lesu mai na Sulamaiti! Mo lesu mai, me keitou sa rai ga vei iko; Na Sulamaiti Na cava mo dou raica vua na Sulamaiti. Na mataivalu sa dua ga, ni a rua tiko?


Chapter 7

Sere I Solomoni 7 Na Daulomani 1 O sa rairai vinaka ni sa vakaivava na yavamu na goneyalewa sa na ranadi! Nai lobi ni sagamu sa vaka nai ukuuku sa tali vakamatai mai vua na kena matai.
2 Na nomu vicovico sa vaka na bilo sa sinai tu ga ena waini: Na ketemu sa vaka na liku sa taqa kina na viavia tali vakavinaka.
3 Na sucumu sa vaka na luve ni me kila e drua.
4 Na domomu sa vaka na tabua dromdromoa qai caliva; na matamu sa vaka na tobu ni sili mai Esiboni. Na ucumu sa vaka na vale cecere mai Lepanoni ni da rai sobu ki Tamasiko.
5 Sa vakaisalataki na ulumu me vaka na Ulunivanua o Kameli, ka sa lokaloka na drauniulumu.
6 O sa rui matavinaka, o sa rui veivakayavalati vakalevu!
7 O sa rui wadrovu me vaka na balabala, Na sucumu me vaka na soso vaini.
8 Sa tukuna, "Au sa lako mada ki na veibalabala, ka'u na taura na tabana," Na sucumu me vaka na soso vaini vei au, Na nomu i cegu me sa ka boi vinaka duadua,
9 Na loma ni gusumu sa vaka nai vurevure ni waini vinaka duadua. Na Sulamaiti Me sa drodro vakamalua yani na waini vei koya au sa lomana, me toso kina vakavinaka na tebenigusui koya sa via moce tiko.
10 Au sa nona na noqu daulomani, Na nona gagadre sa vagolei ga mai vei au.
11 Mo lako mai na noqu ka lomani, Daru lako mada ki na buca.
12 Daru lako vakamataka ki na were ni vaini; Daru raica mada se sa tubu mai na vaini, Se era sa se mai na vaini? Se na pomekaraneti sa lavouvou mai Mai kea au na solia kina vei iko na noqu vinaka taucoko.
13 Sa boi vinaka mai na ka e a sega tu ni dauboici, Ena mata ni katuba sa tu kina na vuata digitaki, Kena mataqali kece, ka vou kei na ka makawa, na ka kece sa biu oti tu me nomu, na noqu daulomani.

Chapter 8

1 O sa vakataka na ganequ sa sucuma tiko na sucu i tinaqu! Kevaka au sa raici iko, au na reguci iko, Au na sega ni maduataka e dua.
2 Au na tuberi iko ka kauti iko mai ki na vale i tinaqu, Sa vakabauti au dina o tinaqu Au na vakagunuvi iko ena waini vinaka sara. Mai na wai ni pomekaraneti.
3 Au sa vakailokoloko tiko ena ligana i mawi, Na ligana i matau sa mokoti au vakaukauwa.
4 Au sa vakaroti kemudou na goneyalewa ni Jerusalemi. Dou kua ni vakayavalata se vakasaga na neirau veilomani Me yacova ni sa vakacegui vinaka. Dua Na Wekana
5 O cei oqo sa lako tiko mai na vanua liwa, ka sa kabita tiko mai na nona daulomani? Au sa vakayadrati iko ena ruku ni vunikau, Mai kea sa susugi iko mai kina o tinamu; Mai kea, o sa kau mai kina mai vei tinamu. Na Sulumaiti Ki Vua Na Nona Daulomani
6 Me vaka nai vakatakilakila ki na ligamu; Na veilomani sa ka kaukauwa me vaka na mate, Na vuvu sa ca me vaka nai bulubulu; Sa vakacaudreva vakalevu na yameyame ni bukawaqa, na bukawaqa i Jiova.
7 Na wai sa sega ni rawa ni sotava na karamaca ni veivinakati, Se na ualuvu me vakaluvuca na veivinakati, Ni sa solia na nona veivinakati e dua na tagane Nai yau kece ni nona vale ena sega ni tarovi koya.
8 Sa dua tiko na ganei keitou, ka se lailai sara na sucuna, Na cava me keitou cakaka vua ena siga sa vosaki kina o koya?
9 Kevaka sa lalaga ni vale o koya, Keitou na sogota ena kau sitari. Na Sulamaiti
10 Oi au na lalaga ni vale, Na sucuqu sa vale cecere; Au sa tiko ena yaloka ni matana me vaka e dua sa kunea na vakacegu.
11 O Solomoni sa dua tiko na nona were ni vaini e Peali Amoni; Sa solia na veivaini oqo vei ira na dauveiqaravi, o ira vakayadua me ra kauta mai na vuana, Kumuni me rauta e yadua na udolu na tiki ni siliva.
12 Na noqu were ni vaini sa tu oqo e mataqu O iko Solomoni, ena tu beka vei iko e udolu, Kei ira na veiqaravi e rua na drau. Na Daulomani
13 O iko sa dau tiko ena vei senikau, sa nodra i tokani na dau vakarorogo kina domomu—me'u rogoca sara mada! Na Sulumaiti
14 Mo vakatotolo na noqu ka lomani, Ka mo vaka e dua na me kila ena ulunivanua ni veika boi vinaka.