Osea

1 2 3 4 5 6 7 8 9 10 11 12 13 14


Chapter 1

1 A vosa i Jiova sa yaco vei Osea na luvei Pieri, Ena gauna i Usaia, kei Jocame kei Easi, kei Esekaia, o iratou na Tui Juta, kei na gauna i Jeropoami na luvei Joasi na Tui Isireli.
2 Oqo nai vakatekivu ni vosa i Jiova vei Osea, sa tukuna o Jiova vei Osea: "Mo laki kauta e dua na yalewa dautagane me watimu, kei iratou na luve ni dautagane me luvemu, ni sa dautagane vakalevu na lewe ni vanua ka ni ra sa vuki tani vei Jiova."
3 Sa qai lako o koya ka kauti Komera na luvei Tipiliemi, a sa kunekune o koya ka vakasucuma e dua na luvena tagane.
4 A sa vosa vua o Jiova, "Mo vakatoka me yacana o Jesirieli, ni na dua na gauna lekaleka ga oqo, Au na qai cudruvaka na dra i Jesirieli kina mataqali i Jeu ka vakaotia na matanitu ni mataqali i Isireli.
5 Ena yaco ena siga o ya, au na musuka na dakai i Isireli ena buca o Jesirieli."
6 Ena kunekune tale o koya, ka na vakasucuma e dua na luvena yalewa. Sa tukuna tale vua o Jiova: "Mo vakatoka me yacana o Loruama, ni'u na sega ni lomani ira tale na mataqali i Isireli, ia au na kauti ira laivi sara ga.
7 Au na lomani ira ga na mataqalii Juta, ena vakabulai ira na liga i Jiova na nodra Kalou, au na sega ni vakabulai ira ena dakai, se nai seleiwau, se nai valu, se na ose, se vei ira era dauvodo ose."
8 Ni sa yaco na gauna me sa kali kina o Loruama, sa tekivu kunekune tale o koya ka vakasucuma e dua na luvena tagane.
9 Sa vosa vua o Jiova, "Mo vakatoka na yacana o Lo-ami, ni o kemudou sa sega ni noqu tamata, oi au talega sa sega ni Nomudou Kalou.
10 "Io na kedra i wiliwili na Isireli ena vaka na mata ni nuku ni waitui, ena sega ni vakarautaki, se wiliki rawa. Ena qai yaco dina mai, na vanua era a rogoca kina, 'Ni o kemudou dou sa sega ni noqu tamata,' na vanua vata o ya, era na rogoca kina, 'Ni o kemudou sa luve ni Kalou bula.'
11 Era na qai soqoni vata mai na Juta kei na Isireli, mera na lesia e dua me na liutaki ira, era na qai lako cake tani mai kina, ni na ka levu sara na siga i Jesirieli!


Chapter 2

1 Dou tukuna vei ira na tuakamudou, 'Noqu Tamata,' kei ira na ganemudou, 'Sa basika na loloma.' Ira Na Tamata Ni Kalou Sega Na Yalodina
2 "Dou vakaroti koya na tinamudou, dou vakaroti koya; ni o koya e sega ni watiqu, me biuta laivi mada o koya na nona dautagane, kei na nona vei butakoci ena maliwa ni sucuna;
3 Me'u vakailuvawaletaki koya, ka vakaraitaki koya tu, me vaka na siga ka sucu kina, ka solia vua na bula ni dravuisiga, ka tuli koya ena bula ni gogo ka matemate, ka me dau tarai koya tu na karamaca ni sega na wai.
4 "Au na sega ni lomani ira na luvena, ni ra sa luve ni dautagane.
5 Ni sa dau ia na dautagane o tinadra; sa ia nai valavala e veivakamaduataki o koya ka kunekunetaki, ni sa tukuna o koya, 'Au na lakovi ira tale na noqu veilasa makawa, o ira ka dau solia vei au na kequ madrai kei na mequ wai, na noqui tutuvi vuti ni sipi kei na noqu lineni, na noqu waiwai kei na mequ gunu.'
6 "O koya oqo, raica au na latia kina na nomu sala ena soni, ka sogolati koya kina, me sega ni kunea rawa na nona gaunisala.
7 Ena cici muri ira na nona veilasa makawa, ia ka na sega ni toboki ira rawa, io, ena vakasaqarai ira, ka sega ni kunei ira. Ena qai tukuna o koya, 'Au na ia ka lesu tale vua na watiqu e liu, ni vinaka cake sara na noqu tiko kei koya e liu, mai na noqu bula oqo.'
8 E sega ni kila o koya, ni sai au ka solia vua na sila, na waini vou, kei na waiwai, ka vakalevutaka vua na siliva, kei na koula O ka ra la'ki vakayagataka vei Peali.
9 "O koya oqo au na lesu mai ka taura tani na noqu sila ena kena gauna, kei na noqu waini vou ena kena gauna, ka kauta tani na noqui tutuvi vuti ni sipi, kei na noqu lineni, o koya ka ubi tiko kina na nona luvaiwale.
10 Oqo au na vakaraitaka na nona seseraurau e matadra na nona veilasa makawa, ena sega tale ni dua mena kaliraki koya tani mai ena ligaqu.
11 Au na vakaotia kecega na noda marau, kei na noda Solevu, nona vula vou, nona Siga ni VakaceceguOkei na noda Solevu tabu kecega.
12 "Au na vakarusa na nona veivaini, kei na nona veilolo, ni sa dau tukuna o koya, 'Oqo na kequi sau era a solia vei au noqu veilasa e liu, au na vakatubura kina na kau me veikau, era na lako mai na manumanu kila ka kania.
13 Au na cudruvaka talega vua na nona dau vakama tiko na ka boi vinaka vei Peali. Ka dau vakaiukuukutaki koya ena mama ni ucuna, kei na nona ka ni ukuuku, ka muri ira na nona veilasa; Ia sa guilecavi au," sa tukuna o Jiova.
14 "O koya oqo, raica, au na rawai koya, ka kauti koya kina vanua dravuisiga, ka vosa vakayalovinaka vua.
15 Au na solia lesu vua na nona veiloga ni vaini mai kea, kei na buca taucoko o Akori, me dolavi kina vua na katuba me raica, ni sa tu na ka me nuinui kina; ena laga sere mai kea o koya, me vaka nona gauna ni se goneyalewa kina, ka vaka ena gauna ka lako cake mai kina o koya mai na vanua o Ijipita.
16 "Ni sa qai yaco mai, na siga dina o ya," sa tukuna o Jiova, "O na kacivi au kina, 'I na watiqu,' ka sega ni o na kacivi tale, 'Noqu Turaga,'
17 Au na kauta tani mai na gusuna na veiyaca kece i Peali, ena sega tale ni nanumi tu na yacadra.
18 Ena siga o ya au na ia na veiyalayalati kei ira vata kei na manumanu kila ni vanua, kei na manumanu vuka, kei na ka sa qasi voli ena qele. Au na vakavurumemeataka vaka lalai mai na vanua, na dakai kei nai seleiwau ni valu, me rawa ni ra davo tu ena vakacegu.
19 "Au na tauri iko mo watiqu ka sega ni mudu; Io, au na tauri iko mo noqu ena yalododonu, kei na lewa dodonu, kei na yalovinaka, kei na yalololoma;
20 Au na tauri iko mo noqu ena lomadina, o na qai kilai Jiova.
21 "Ena yaco ena siga o ya ni'u na rogo yani:" sa tukuna o Jiova, "Au na rogo yani vaka ki na lomalagi, o ira era na rogo vaka ki vuravura.
22 O vuravura ena rogo vata mai kei na sila, kei na waitui vou, kei na waiwai; o Jesirieli ena rogoca talega.
23 Au na kaburaka e vuravura na ka me nona, au na lomani koya ni sa sega ni lomani; Au na qai tukuna vei ira na sega ni noqu tamata, 'Oi kemudou na noqu tamata!' Era na qai tukuna, 'Oi kemuni na noqu Kalou!'"


Chapter 3

1 Sa qai tukuna tale vei au o Jiova, "Mo lako tale, mo la'ki lomana na yalewa sa lomani vua e dua nona lasa makawa ka sa vakayacora sara ga me dautagane, me vaka na loloma i Jiova vei ira na Isireli; era vinakata na Kalou tani ka vinakata na medra bilo waini." 2 Au a qai voli koya me noqu ena tinikalima na dola kei na tinikalima nai vakarau parile. 3 Au a qai tukuna vua, "Mo tiko vata kei au me dua mada na gauna balavu; mo kakua ni o dautagane tale, se me dua vei iko na taganeOoi au sa dei tuga vei iko." 4 Ena vica vata na siga mo kila ni na sega ni tiko vata kei ira na Isireli na nodra tui, se dua nodra ravouvou, se nai soro, se na matakau, se na Efoti, se na Terafimi. 5 Ni oti o ya era na qai lesu mai ka vakasaqarai Jiova na nodra Kalou kei Tevita na Tui. Era na rerevaki Jiova kei na nona yalovinaka ena veisiga mai muri.


Chapter 4

1 Dou rogoca na vosa i Jiova, oi kemudou na Isireli, ni sa kauta mai o Jiova e dua nai vakaro me baleti ira na lewe ni vanua: "Ni sa sega na dina kei na loloma se na kila na Kalou ena vanua.
2 Sa vakayacori na veivosacataki kei na vosa lasu, na veivakamatei, na butako, na veibutakoci, era sa sega ni tarovi rawa, ni sa caka tikoga na vakadavedra.
3 O koya oqo ena tagi kina na vanua; o ira kece era tiko kina, kei ira na manumanu kila, kei na manumanu vuka era na vakacemuri tani, na ika talega ni wasawasa ena biu tani.
4 "Me kua ni dua vei kemudou me veileti se me ia na vei vunauci; o ira na kai nomudou era sa vaka taki ira o ira era dau veileti kei na bete.
5 O koya oqo o na tacaqe kina ena siga; o ira talega na parofita era na tacaqe vata kei iko ena bogi; au na vakarusai tinamú talega.
6 Era sa rusa na noqu tamata ni sega na kila ka, baleta ni ra biliga tani na kila ka, au na biligi iko tani talega mo kakua ni bete tiko vei au. Ni o sa guilecava nai vunau ni nomu Kalou, Au na guilecavi ira talega na Luvemuni.
7 "Ni ra sa tubu me lewe levu, sa tubu talega na nodra i valavala ca vei au; au na vukica na nodra lagilagi me ra na madua kina.
8 Era sa kania nai soro ni nodra i valavala ca na noqu tamata ka ra sa gadreva ena vu ni yalodra na nodra caka cala.
9 Ena qai vaka: ucuya na tamata, ucuya na bete. Au na cudruvi ira ena nodra i valavala, ka saumi ira me vaka na nodra cakacaka.
10 Era na kana, ia era na sega ni mamau; era na ia na dautagane, ka sa sega ni toso cake me vaka e liu; baleta ni sa mai oti nodra talairawarawa vei Jiova.
11 "Na dauyalewa, na waini, kei na waini vou sa vakatotogana na yalo ni tamata.
12 Era sa kerei vakasala na noqu tamata vua na nodra matakau Ceuti, sa qai vakadewataki mai vei ira nodra matai lawalawa vata, o ya na yalo ni dautagane sa vakavuna tiko nodra lako sese, ka ra sa veisaqasaqa tiko kei na nodra Kalou ena bula ni dautagane.
13 Era vakacaboisoro ena dela ni ulunivanua, ka cabora na ka boi vinaka ena delana, kei na ruku ni oki, kei na ivi, kei na paini ni sa vinaka na kena rugurugua. O koya oqo era na kitaka na dautagane o ira na luvemu dou yalewa, kei ira na vugomudou era na ia na veibutakoci.
14 "Au na sega ni cudruvi ira na luvemudou yalewa ni ra dautagane, se o ira na vugomudou ni ra veibutakoci; ni o kemudou na tagane o dou lako vata tiko kei ira na dautagane, ka caka i soro vata kei ira, o koya oqo era na rusa o ira na tamata sa sega ni yalomatua.
15 "E dina o iko, Isireli, o sa dautarabe, me kakua ni oka kina e dua na Juta. Dou kakua ni cabe ki Kilikali, se lako cake ki Peci-aveni, se mo dou bubului, ka tukuna, 'Me vaka sa bula o Jiova'O
16 "Me vaka na kila ni bulumakau sa vaka kina o Isireli nona sa rui kila vakalevu, ena vakani ira o Jiova. Me vaka na lami bula ena loma ni bai rabailevu.
17 "O Iferemi sa soli koya vua na matakau, mo laivi koya ga.
18 Na medra wai e solia na yalo ni vuki tani, ka ra kitaka tikoga na dautagane, kei ira na nodra turaga era sa vinakata na ka e veivakamaduataki.
19 Sa vauci ira na cagi ena tabana, ka ra na madua ena vuku ni nodra i soro.


Chapter 5

1 "Dou rogoca oqo, na bete! Ka vakarorogo na mataqali i Isireli! Dou vakatudaliga mai, na mataqali ni Tui! Ni sa nomudou na lewa sa tau, ni dou sa i cori mai Misipa kei na lawa sa tevuki mai Tepori.
2 Ni ra sa veitokoni taka vata na dauvakacaca mera ia tiko na veivakamatei; oi au sa vunauci ira vata taucoko.
3 Au kilai Ifereimi, o Isireli e sega ni rawa ni vuni vei au; oqo o Ifereimi, o sa dautagane tiko, oisireli sa vakadukadukali taki.
4 "Era sega ni lewa rawa nodra i tovo, ka sega kina ni rawa mera lesu vua na Kalou, ni sa tiko na yalo ni dautagane kei na dauyalewa vei ira, sa yali kina vei ira na kilai Jiova.
5 Na dokadoka i Isireli sa laurai votu tu e matadra; o koya oqo sa nei Isireli kei Ifereimi nai samu ni dawa ni nodra caka cala; ena tarai Juta talega na leqa vata oqo.
6 "Era na lako vata kei na nodra sipi, kei na nodra manumanu tale eso, me ra laki qaravi Jiova. Ia era na sega ni kunei Jiova, ni sa vakasuka tani mai vei ira o koya.
7 Era sa vakacudrui Jiova vakalevu, ni ra sa mai vakatubura eso na gone i valavala vakatani. Ena dua na Vula Vou ena vakaoti ira vata kei na nodra i votavota.
8 "Dou uvuca na koneti mai Kipea kei na davui mai Rama, ka kaila vakadomoilevu mai Peci- Aveni, 'O iko Penijamini mo rai vuki e dakumu!'
9 O Ifereimi ena vakalalai ena siga ni veicudruvi; vei ira na mataqali i Isireli au na vakatakila na ka dina vei ira.
10 "Ena vakilai sara vakalevu kevaka mera kautani na vei ravouvou ni Juta; Au na sovaraka vei ira me vaka na wai na noqu cudru.
11 Sa vakasaurarataki ka tagi ni sa lewai o Ifereimi, baleta ni vinakata me vakamuria na vakasama vakatamata.
12 O koya oqo, au na vaka na di sa dauvuka voli ena bogi vei ira na Ifereimi, kei ira na mataqali i Juta, au na vakatubura me yaco na ka boica.
13 "Ni sa raica o Ifereimi na nona tauvimate, kei Juta na nona mavoa, sa qai lako oifereimi ki Asiria vei Tui Jerepi me kere bula, ia, ena sega ni rawa ni na vakabulai se mavo nona mavoa.
14 Au na vaka e dua na laione vei ira na Ifereimi, ka vaka e dua na luve ni laione ena mataqali i Juta. oi au, io oi au, au na basubasuraki ira ka lako tani yani, au na kauti ira tani, ka sega e dua me na kaliraka tani mai vei au.
15 Au na lesuva tale mai na noqui tikotiko ni ra sa kilai yalodra tale. Ena veika rarawa e yacovi ira, sa qai rawa kina mera golevi au mai; ka vakasaqarai au vakagumatua sara."


Chapter 6

1 Dou lako mai, meda mai lesu vei Jiova; ni o koya ga e ia na veibasuraki, ia o koya duadua talega ena ia na veivakabulai, o koya e vei vakamavoataki, o koya duadua talega ena ia na vei vadretitaki.
2 Ni oti e rua na siga ena tekivu me vakabulai keda; ena i katolu ni siga ena vakaturi keda cake, me rawa ni da bula ki vua.
3 Meda kilai koya, ka sasaga yani meda kilai Jiova sara. Na nona lako mai sa vakataudeitaki oti tu, me vaka e dua na kida ni mataka; na nona lako mai sa vaka na uca taumada kei na uca taumuri, sa dau vakatubu bula e vuravura.
4 "A cava me'u cakava vei kemudou na Ifereimi? A cava me'u cakava vei kemudou na Juta? Ni nomudou yalodina sa vaka ga na o kei na tegu ni mataka ena kena dau seavu totolo ka sega ni tudei.
5 O koya oqo ka'u sa musuki ira kina vei ira na parofita, ka vakamatei ira ena vosa ni gusuqu; kei na nomu veilewai ena vakayacori vaka rarama.
6 Au vinakata na loloma, ka sega na vakacaboisoro, kei na veikilai kei na Kalou ka sega nai soro kama.
7 "Ia me vaka na bula ni tamata era sa dau beca na veiyalayalati; o ya sara ga era sa dau vakacudrui au kina vakalevu.
8 O Kiliati na korolevu sa dau ia kina na veika ca, ka sa vakadukadukali taki ena dra.
9 Me vaka nodra i naki vuni na daubutako me ra la'ki butako, ena sala vaka ki Sikemi era sa veilabalabati talega kina nai lawalawa ni bete; era sa vakayacora na ka sa ca sara.
10 Au sa qai raica e dua na ka vakadomobula ena mataqali i Isireli: Na nodra lasa ni veibutakoci na Ifereimi; oisireli sa qai dukadukali sara.
11 Vei kemuni na Juta, sa vakarautaki tu vei kemudou na tatamusuki, ni'u na vakasukai ira tale mai na noqu tamata era bobula.


Chapter 7

1 "Ni'u sa via vakabulai ira na Isireli, sa qai sega ni tabonaki rawa tu na caka cala i Ifereimi, kei na valavala ca i Samaria. Ni ra sa vakayacora tiko na veilasutaki; kei na nodra curu mai eso nai lawalawa dau butako ka kauta na ka era sa rawata ki tautuba.
2 Era sega ni bau taroga mada e yalodra ni'u nanuma kece tiko nodra caka cala; na noda caka cala sa vakavolivoliti ira; ka sa yaco mai mataqu.
3 Era cakava me marau na Tui ena nodra i valavala ca, kei na ravouvou ena nodra lasulasu.
4 "Era sa dauveibutakoci kece, sa vaka na vakatakatai ni lovo vei koya na dauvavavi O sa cegu ni utura tiko na buka me yacova ni sa buta na lewe ni lovo.
5 Sa tauvi mate na noda tui ena nona gauna, ni sa vakavuna na luvena Ravouvou ni mateni tu ga ena waini, ka dauvakailala vata kei ira na dauveivakaisini.
6 Ena noda dau davo meda dau wawa, sa lako vata tiko kei na katakata ni yalodra; e dau moce ena bogi, nodra dau ni vavavi; ni yadra mai ena mataka, e yadra vata mai ena nona rarawa katakata.
7 Era dau katakata totolo me vaka na lovo na nodra dau ni lewa era vakamatea taucoko; sa sega na nodra tui, ka sega ni bau dua vei ira me golevi au mai.
8 "Sa vakailalavata kei ira na tamata eso o Ifereimi. O koya sa vaka na keke sa dredre ni vukici.
9 Era sega tiko ni kila ni o ira Na tamata tani o ya; era sa vakamalumalutaki ira tiko ka sa yali tiko mai nodra kaukauwa. Io, sa vulavula tiko mai na uluna kece, se sega tikoga ni kila ka rawa.
10 Na dokadoka i Isireli sa laurai tu e matana, Ia era sega ni via golevi Jiova na nodra Kalou se masuti koya ena veika kece oqo.
11 "O Ifereimi sa vaka e dua na ruve lialia ka sega ni vakayalo O Era rai ga ki Ijipita, ka lako tikoga ki Asiria.
12 Ena vanua era lako kina, au na tagavi ira ena noqu lawa; Au na kauti ira sobu mai me vaka na manumanu vuka; Au na qai kanakuitaki ira ena vuku ni nodra vakarorogo cala.
13 "Ena ca vei ira, ni ra sa dro tani vei au! Na veivakarusai vei ira, baleta ni ra talaidredre vei au! E dina au a vakabulai ira, io era se vosa lasutaki au tikoga.
14 Era sega ni masuti au dina mai na vuni yalodra, ni ra dau tagi ena nodra i davodavo. "Era dau soqoni vata ga ena vuku ni sila kei na gunu yaqona, era vuki tani sara ga vei au;
15 Au vakavulici ira me kaukauwa mai na ligadra, io era se bucina tikoga na ka ca me baleti au;
16 Era lesu mai, ia ka sega ki vua sa cecere sara, era sa vaka na dakai rerevaki. Ena vuku ni vosa ca ni yamedra. Na ka oqo era na i vakalasa kina ena vanua o Ijipita.


Chapter 8

1 "Mo uvuca na davui e gusumu! Ena lako mai o koya me vaka na ikeli ena vale i Jiova, ni ra sa vakacacana na noqu veiyalatalati ka talaidredre kina noqu i vunau.
2 Era na qai tagi vei au na Isireli, 'Noqu Kalou keimami kilai Kemuni!'
3 O Isireli e cata na ka vinaka, ena gumatua kina vei koya na liga ni meca.
4 "Era bulia ga nodra Tui, ia ka sega kina noqu veivakadonui mai na nodra siliva kei na koulaOera bulia kina na nodra matakau mera musuki ira tani mai kina.
5 E sega ni vakadonui nomu luve ni bulumakau, Samaria! Sa tubu cake ga na noqu rarawataki ira O ena vakacava mada na kena dede mera qai savasava mai?
6 E tekivu mai Isireli na ka oqo. Era cakava na nona tamata ka sega ni Kalou; ia na luve ni bulumakau nei Samaria ena vakavurumemeataki.
7 "Ni ra sa kaburaka na cagi, era na tamusuka na covulaca. Na tabana ena sega ni vua rawa me rawa kina na kana. Kevaka ena vua rawa, era na kania na kai tani.
8 Sa vakaoti vakadua o Isireli; ka ra sa la'ki bula vata kei ira na kai matanitu tani ka ra sa vaka tu ga nai tutu ni senikau, ni sa yali na senikau.
9 Era lako cake ki Asiria vaka na asa ni sega ni dua me tubera; sa volitaki koya kina dodomo ca o Ifereimi.
10 Io, e dina ni ra veivoli kei ira na vei matanitu eso, au na vakasoqoni ira tale; ka ra na rarawa vakalailai mada ena vuku ni colacola bibi vua na nodra Tui na turaga.
11 "Baleta ni levu nonai cabocabo ni soro ni ka ca o Ifereimi, ka sa cabocabo ni soro ni valavala ca nodra i cabocabo ni soro.
12 Au a vola vei ira na ka bibi duadua ena noqu i vunau, ia era sa qai rokataka tale e dua tani na bula.
13 Ena nodra vakacaboisoro era kania tale na lewe ni manumanu, ia ka sa sega ni vakadonua o Jiova. Sa qai nanuma na nodra caka cala ka cudruvaka nodra i valavala ca. Era na lesu tale ki Ijipita.
14 "O Isireli sa guilecavi koya ka buli ira, era tara vale ni soro; o Juta sa vakalevutaka tiko nona veikoro ni valu; ia au na tala na bukawaqa ki na nona koro lelevu me kama yavu kina na nona vei vale vakatui."


Chapter 9

1 Dou kakua ni marau, na Isireli, se reki me vakataki ira na veimatanitu eso, ni dou sa vakararawataka na nomudou Kalou ena bula ni dautagane. Dou sa soli kemudou mo dou volitaki ena veisaqata ena nomudou dodomo.
2 Na veisaqata oqori kei na vale ni yaqona ena sega ni solia na mamau vei kemudou, ena vakalialiai kemudou ga na yaqona.
3 Ena sega ni nodra na qele i Jiova, ia o Ifereimi ena lesu ki Ijipita, era na kania na ka e sega ni savasava mai Asiria.
4 Era na sega ni rawa ni cabora na waini vei Jiova, ena sega ni marautaka nodra i madrali. Ena vaka na madrai ni rarawa vei ira, era na dukadukali kece o ira ena kania. Na nodra ca sa baleti ira ga; ena sega ni rawa ni vakayagataki ena vale i Jiova.
5 Cava o na cakava ena siga sa lokuci, na siga ni solevu tabu vei Jiova?
6 Era sa lako ena vuku ni veivakarusai. Ena maroroi ira o Ijipita; o Memifesi ena buluti ira na nodra i yau siliva ena taukena na cogadrogadro; ena curuma nodra vei laca na soni.
7 Sa yaco mai na siga ni veicudruvi; sa yaco mai na siga ni vei sausaumi, era na kila kina na Isireli ni sa lialia na parofita; na tamata vakayalo e vosa kudrukudru, ena vuku ni nomudou caka cala kei na veicati levu.
8 Nai vakatawa i Ifereimi sa dua vata kei na noqu Kalou. O koya na parofita sa nonai i cori na daubiri dai ena nona i valavala kecegaO na vu ni veicati ena vale ni nona Kalou.
9 Era sa ca vakalevu sara, me vaka na siga i Kipea. Ena nanumi na nodra i valavala ca, ena sauma o koya.
10 "Au kunei Isireli, sa vaka na vaini ena vanua dravuisiga; au raici ira na tamamudou sa vaka nai sevu ni lolo ena kena vula. Ni ra yaco ki Pealipiori, era wiliki ira kina ka e veivakamaduataki; ka ra yaco mera vakasisila me vaka na ka era sa domona.
11 Na nodra lagilagi na Ifereimi ena vukici tani me vaka na manumanu vuka O ena sega na kunekune, sega na bukete, sega na vakasucu!
12 Ni ra susuga cake na gone au na tamusuki ira me yacova yani nai otioti ni tamata, io. Ena ca vei ira ni'u sa biuti ira!
13 O Ifereimi e vakataki Taia, ena nona dabe toka ena dua na vanua totoka, ena gauna au raici koya kina. O Ifereimi ena tuberi ira tikoga na luvena ki na ligana na dau veimakamatei."
14 Mo ni solia vei ira, Jiova O cava mo ni na solia? Solia vua na bola ni gone sa dauvakalutu kei na sucu sega ni to!
15 "Era vakasinaiti Kilikali ena bula i valavala ca, ka'u sa cudruvi ira sara ga kina, ena vuku ni nodra i tovo vakatevoro au na vakatalai ira tani kina mai na noqu vale; au na sega ni na lomani ira tale.
16 Sa vuca na wakana o Ifereimi ni sa vakacacani; ena sega tale ni na vua, io, kevaka ena tiko na gone. Au na vakamatea na nona ka talei mai na ketena."
17 Ena cemuri ira tani na noqu Kalou, ni ra sa sega ni talai rawarawa vua; era na qai dui veiseyaki ki na veivanua.


Chapter 10

1 Sa tauca kece na nona vua ni vaini o Isireli; ka vakayagataka ga me vaka na levu ni ka e rawata mai na nona vuata. E tara cake kina o koya nonai cabocabo ni soro; me vaka na ka e rawata nodra qele e conaka vinaka kina nona i vakatakarakara ni vatu buli.
2 Sa duidui na yalodra; ka sa beitaki tu na yalodra. Ena vorolaka nodra i cabocabo ni soro; ka vakacacana vakadua nodra i vakatakarakara ni vatu buli.
3 Era na qai tukuna, "Sa sega na neimami Tui, ena vuku ni keimami sa sega ni rerevaki Jiova. Ke sa dua na Tui, na cava ena cakava me yaga vei keimami?"
4 Era vosataka na vosa lasulasu, ena nodra bubului tiko kina nodra veiyalayalati. Ena qai vakatubura ga na nodra na lewai, me vaka na co gaga e tubu cake ena qele sa cuki oti.
5 Ena rere na kai Samaria ena vuku ni luve ni bulumakau ni Peci-aveni. Era na tagicaka kina, kei ira na bete era na kailavaka yani O Ni sa biuti ira na nodra lagilagi.
6 Ena colati ki Asiria na matakau me i loloma vei Tui Jerupi. Ena tarai Ifereimi mai na madua, kei na nodra vakatulewa na Isireli era na mata madua tale kina.
7 Ena musu laivi na Tui kei Samaria ka ciri yani me vaka na malamala ni kau e dela ni wai.
8 Ena vakarusai talega na veiyasana cecere kei Eveni, ka vu ni nodra i valavala ca tiko na Isireli; a kau votovotoa kei na soni ena tubu ena nodra i cabocabo ni soro; ka ra na tukuna ki na ulunivanua, "Ubi keimami mai"! kei na veidelana, "Lutuki keimami mai!"
9 "Oi kemudou na Isireli, dou sa i valavala ca mai na siga i Kipea, dou a bula tiko mai nai valu mai Kipea baleti ira na daucakacala ka sega ni tarai kemudou.
10 Ni'u sa gadreva, me ra na kuitalaki era na tuvaivalu vei ira na tamata, era na vesuki mai ena vuku ni nodra caka cala tiko vakarua.
11 O Ifereimi sa bulumakau vakavulici ka dau vinakata me dau buturaka na sila; ia au na biuta nai qaso ki domona, me dreta nai sivi yara o Ifereimi. O Juta me cukicuki; o Jekope mena vorolaka na qele lelevu."
12 Dou kaburaka yani nai valavala dodonu; ka dou na tamusuka na loloma; dou yanaraka vinaka na qele sa cuki oti, ni sa gauna oqo mo dou vakasaqarai Jiova kina, me yaco ni sa lako mai me vakatauca vei kemudou nai valavala dodonu.
13 Dou a dau cukicukita tiko na bula ni valavala ca; dou na tamusuka kina na caka cala. Dou dau kania tiko na vua ni kau na lasulasu, baleta ni dou sa nuitaki kemudou tikoga, ni ra sa lewe levu na nomudou tamata i valu qaqa.
14 O koya oqo ena tubu na ue vei ira na nomudou mataqali, na nomudou koro kaukauwa kecega ena vakacacani me vaka sa vakacacani Peci - Aripeli o Salamani ena siga ni valu O na tina ni gone ena basubasuraki na luvena e matana.
15 Ena vakayacori oqo vei iko, i Peceli, ena vuku ni nomui valavala ca levu. Ni qai kida mai na mataka me sa na musuki laivi kina na Tui Isireli.


Chapter 11

1 "Ni se gone o Isireli, Au a dau lomani koya, Au a vakatokai koya me luvequ ena noqu kacivi koya tani mai Ijipita.
2 Ni ra sa tamata kacivi tani, era sa qai lako tani mai ena nodra kacivi; era vakacaboi soro vei Peali, ka cabora nai soro kama vei ira na matakau buli.
3 "Au vakavulica vei Ifereimi me lako, ka tubera tiko na ligana; ia era sega tikoga ni kila ni'u a vakabulai ira.
4 Au viritaka vei ira na dali e malumu, mera vesuki ena loloma, ka'u kauta tani mai domodra nai vua, kei na noqu dau sotava nodra via kana.
5 "Ena sega ni ra lesuvi Ijipita tale; ia o Asiria ga ena nona Tui, ni ra sega ni via veivutuni.
6 Ena vakayaco ka nai seleiwau ena nona veikoro lelevu, vakacacana na nona veiyasana, ka vakamai ira ena vuku ni nodra lewa.
7 Na noqu tamata era sa guta tikoga mera vuki tani vei Au. E dina ni ra masuti koya tiko sa cecere sara, ka sega ni bau dua me vakacerecerei koya.
8 "Au na laivi iko vakaevei, Ifereimi? Me'u na soli iko vakaevei Isireli? Me'u na soli iko vakaevei mo tautauvata kei Atima? Me'u vakatautauvatataki iko vakaevei kei Sepoimi? Na yaloqu sa luvuci au; ni sa yavalati au noqu yalololoma.
9 Au na sega ni cakava noqu cudru katakata; Au na sega ni na vakarusai Ifereimi tale. Ni'u sa Kalou, ka sega ni tamata, au na sega ni lako mai vei kemudou vakarerevaki; ni sa tiko kei kemudou na le dua yalosavasava.
10 "Era na qai muria lako na yavai Jiova, ena qai tagi mai me vaka na laione o koya. Ni sa tagi, era na lako mai ena sautanini na luvena mai na ra;
11 Era na lako mai me vaka na manumanu vuka ni Ijipita au na qai solia na nodra veivale mera tawana tale", sa tukuna o Jiova.
12 "O Ifereimi sa vakavolivoliti au ena lasu, kei na mataqali i Isireli ena veivakaisini; ia o Juta e se lako vata tikoga kei na Kalou ena yalodina, vei koya na le dua yalosavasava.


Chapter 12

1 "Sa kana cagi, ka toso tiko kina Tokalau o Ifereimi; sa toso cake tikoga nodra dau lasu kei na nodra veivakacacani. Era sa ia na veiyalatalati kei Asiria ka ra kauta nai lumu ki Ijipita.
2 "O Jiova sa kauta mai nai vakaro baleti Juta, ena vakararawataki Jekope ena vuku ni nona i valavala; ena saumi lesu vua me vaka na i vakarau e cakava.
3 Mai na kete i tinana sa taura o koya na bukubuku ni yava i tuakana, ka nona i gu kece e saga me veivorati kei na Kalou.
4 Io, sa veivorati kei na agilosi ka sa gumatua vua; e tagi ka kere veivosoti vua. E rau sota mai Peceli, mai kea sa vosa mai kina o koyaO
5 O ya, o Jiova na Kalou ni lewe vuqa, o Jiova na yaca e dau kilai kina.
6 O iko, ena loloma ni Kalou mo lesu mai, ka taura na loloma kei na lewa dodonu, ka dau waraki Jiova tikotikoga.
7 "A kai Kenani qaseqase! Nai vakarau ni veivakaisini sa tu e ligana: E taleitaka me dau veivakasaurarataki.
8 Sa tukuna o Ifereimi, 'Au sa vutuniyau mai, au sa qai vakaiyau ena noqu cakacaka, era na sega ni kunea vei au e dua na caka cala me i valavala ca.'
9 "Ia oi au o Jiova na nomudou Kalou mai na gauna sara ni nomudou tiko mai Ijipita; au na biuti kemuni tale ena vei vale laca, me vaka na siga ni nomudou solevu tabu.
10 O ira na parofita era dau cavuti au kei na vei raivotu lelevu; ena ligadra na parofita au dau vakaraitaka e levu na i vakaraitaki."
11 E tiko mai Kiliati na matakau – sa ka walega – era cabora na bulumakau mai Kilikali, na nodra vanua ni vakacaboisoro sa vaka nai binibini duka ni qele ena vei loga ni teitei.
12 Sa dro o Jekope ki Siria, sa cakava oisireli me dua kina na watina, sa vakatawa sipi o koya me rawa kina na watina.
13 Ena liga ni dua na parofita, o Jiova sa kauti ira tani kina na Isireli mai Ijipita. Era maroroi ena vuku ni parofita.
14 Sa vakacudrui koya me cudru vakalevu o Ifereimi; o koya oqo o Jiova ena beitaki ira tikoga ena vuku ni nodra vakadave dra, ka na tukuna tikoga vei ira nodra caka cala.


Chapter 13

1 Ni sa vosa tiko o Ifereimi, ka sautanini, ka vakalevulevui koya e Isireli, ia ena nona qaravi Peali e mate kina.
2 Oqo era sa qai valavala ca tikoga vakalevu, ka ra bulia vei ira na matakau buli, ena cakacaka ni ligadra mai na nodra siliva; era tukuna oqo na cakacaka taucoko ni neimami matai. "Ka me reguci na bulumakau ena gauna ni vakacaboisoro!"
3 O koya oqo era na vaka kina na o vuka ni mataka kei na tegu sa yali rawarawa, kei na qa ni sila sa cagina tani ka vaka talega na kubou mai na kena i kuvukuvu.
4 "Oi Au o Jiova na nomudou Kalou. Tekivu mai na vanua o Ijipita, me kakua tale ni dua na Kalou tani mo dou kila oi Au duadua ga; ni sega tale ni dua nai Vakabula.
5 Au kilai kemudou mai na vanua dausiga, ena vanua ni oca kei na tagi.
6 Ni o ni viakana o ni vakani; ni o ni mamau sa yaco na marau; o koya oqo o ni dau guilecavi au tiko kina.
7 "Au na vaka kina na laione vei ira; Au na vaka na lepate me'u waraki ira e gaunisala;
8 Au na tarai ira me vaka na pera nona vakasaqara na kakana kei na luvena; Au na basuraka nodra sarisari, ka kanalaki ira me vaka na laione, kei ira na manumanu kila era na veiwaseyaka.
9 "Isa Isireli, o sa vakarusai, ia na nomu vukei tale sa tikoga vei Au.
10 Oi Au na nomu Tui; ka sega tale e dua, Au na vakabulai kemudou ena vei koro kecega? Kei ira nomudou dau ni lewa era tukuna 'Me soli mai e dua na kei na Tui kena ravouvou'?
11 Au na solia vei kemudou e dua na tui ena noqu rarawa, ka kauti koya tani mai ena noqu cudru.
12 "Nona caka cala o Ifereimi sa veitubutuburi cake mai ka sega ni tabonaki rawa.
13 Ena tarai koya na rarawa ni mosi me vaka na yalewa taratara. Ni sa rui sesewa o koya ni sega ni rawa ni tiko dei ena vanua ni sucu ni gone.
14 "Au na vakabulai ira mai na kaukauwa ni bulubulu; ka vakabulai ira na mate. O iko mate, ena nomu dauveivakararawataki! O iko bulubulu E vei nomu dauveivakarusai! Ena yali na loloma mai mataqu."
15 Ena valuti o koya vei ira na wekana, ena lako mai na cagi Tokalau; ena lako mai na cagi i Jiova mai na vanua dravuisiga, ena mamaca kina nonai keli wai, ena vakamacara vakadua na i vurevure ni wai. Ena vakacacana o koya na vale ni yaya kecega sa daudomoni.
16 O Samaria ena vakacacani, ni sa dau talaidredre vua na nona Kalou. Era na mate ena i seleiwau, nodra gone se qai sucu ena viritaki me dasila ena vatu, kei na nodra yalewa sa bukete ena tunaki me biutani mai tuba na gone.


Chapter 14

1 O iko Isireli, mo lesu tale vei Jiova na nomu Kalou, ni o sa mai bale sobu ena nomu caka cala; 2 Vakarautaka vinaka nomu vosa, ka lesu vei Jiova. Tukuna vua "Mo ni kauta tani noqu caka cala kece; mo ni ciqomi keimami ena loloma, ni keimami na cabora na vua ni tebe ni gusui keimami. 3 Ena sega ni vakabulai keimami o Asiria, keimami na sega ni vodoka na ose, keimami na sega ni na tukuna tale kina cakacaka ni ligai keimami, 'Ni kemuni sa neimami Kalou.' Ni o Kemuni ga ena kune loloma tiko kina na luveni yali." 4 "Au na vakabulai ira mai na nodra dau vuki tani, Au na lomani ira tikoga, na noqu cudruvi ira Au sa vakasuka tani. 5 Au na vaka na tegu vei Isireli, ena tubu o koya me vaka na viavia, ka ti na wakana me vakataki Lepanoni; 6 Ena duitete na tabana; me vaka na vuni olive na kena totoka, kei na kenai boi kamica ena vakataki Lepanoni. 7 Era na lesu mai ka tiko sobu mera vakaruru ena yaloyalona; era na bula cake mai me vaka na sila, ka tubu cake me vaka na vaini. Na kenai boi yawa ena vaka na waini ni Lepanoni. 8 "Ena tukuna o Ifereimi, 'Cava tale na kena yaga vei au na matakau?' Au sa rogoca ka'u sa vakadikeva tiko na noqu bula sa vaka mai na vuni damanu drokadroka vinaka; ka sa basika tu na vuana vei au." 9 O cei sa vuku? Me macala vua na ka oqo. O cei sa qaseqase? Me kila sara. Ni sa dodonu vinaka na sala i Jiova; ka ra muria tiko na yalododonu, ia o ira na talaidredre era na bale kina.