Emosi

1 2 3 4 5 6 7 8 9


Chapter 1

1 Na vosa i Emosi e dua vei ira nai vakatawa ni sipi mai Tikoa, na ka sa raica ka sa baleti ira na Isireli, ena gauna i Usaia na Tui Juta, kei na gauna i Jeropoami na luvei Joasi, na Tui Isireli, ni sa vo e rua na yabaki me yaco na uneune.
2 A sa tukuna o koya: "Ena rorogo vadugu mai Saioni o Jiova, ena tabalaka cake na domona mai Jerusalemi, era na tagi nai vakatawa ni sipi mai na nodra i tikotiko, kei na delai Kameli ena malai ka mate." Sa Vakatauci Na Lewa Vei Ira Na Veimatanitu
3 Sa tukuna vaka oqo o Jiova, "Ni sa vakatolu, ka vakava na talaidredre i Tamasiko, au na sega ni na vaka suka na nodra na cudruvi, baleta ni ra mokumokulaki Kiliati ena vei tikitiki ni kaukamea.
4 Ia Au na vakatawa na bukawaqa kina vale i Eseeli, mena vakarusa na veitikina mai Peni-etati.
5 Au na musuraka na bai ni matamata mai Tamasiko, ka vakaoti ira laivi na lewe ni koro ena buca o Aveni. Kei koya sa taura nai titoko vakaturaga mai Peci-Iteni. Era na kau vakabobula na kai Siria ki Kiri," sa tukuna o Jiova.
6 Sa tukuna vakaoqo o Jiova: "Ni sa vakatolu, ka vaka va na talaidredre i Qasa, au na sega ni na vakasuka na nomu na cudruvi, baleta ni ra sa tauri kece na tamata me ra kau vakabobula ki Itomi.
7 Ia au na vakatauca ena bai ni koro e Qasa na bukawaqa, me na vakarusa kece na vanua.
8 Au na musuki ira tani na lewe i Asitoti, kei koya sa taura nai titoko vakaturaga mai Asikiloni; Au na qai dodoka na ligaqu ki Ekironi, ka ra na rusa na kena vo ni kai Filisitia," sa tukuna na Turaga o Jiova.
9 Sa tukuna o Jiova: "Ni sa vakatolu, ka vakava na talaidredre i Taia, au na sega ni na vakasuka na nodra na cudruvi. Ena vuku ni ra solia taucoko na bobula ki Itomi, ka ra sega ni bau vakasamataka na veiyalayalati ni loloma vakaveitacini.
10 Ia Au na vakatauca na bukawaqa ena bai ni koro mai Taia, me na vakarusa na kena vei tikina."
11 Sa tukuna vakaoqo o Jiova: "Ni sa vakatolu ka vakava na talaidredre i Itomi, Au na sega ni na vakasuka na nodra na cudruvi, ena vuku ni via vakamatei tuakana ena i seleiwau, ka sega ni via loloma; ka na dauveibasuraki tiko ena nona cudru ka dau tu ga vua na nona cudru me sega ni mudu.
12 Ia Au na vakatauca ki Temani na bukawaqa, me na vakarusa na veivanua mai Posira."
13 Sa tukuna o Jiova: "Ni sa vakatolu, ka vakava na talaidredre i Amoni, Au na sega ni na vakasuka na nona na cudruvi, ena vuku ni nodra tunaka bulabula na yalewa bukete mai Kiliati, ka ra tosoa tiko nai yalayala ni nodra vanua.
14 Ia Au na vakacaudreva na buka ena bai mai Rapa, mena vakarusa na kena veitikina, era na kaikaila, ena siga ni valu, kei na cagi kaukauwa ena siga ni covulaca.
15 Nodra Tui ena kau vakabobula, kei ira nodra vei Turaga", sa tukuna o Jiova.


Chapter 2

1 Sa tukuna o Jiova: "Ni sa qai vakatolu, ka vakava na talaidredre i Maopi, Au na sega ni na vakasuka na nodra na cudruvi, ka ni sa vakama o koya na sui i Tui Itomi me dravusa.
2 Ia Au na vakatauca ki Maopi na bukawaqa, me na vakarusa na veitikina e Kirioci; o Moapi ena mate ga ena ue, na kaila kei na rorogo ni davui.
3 Au na musuki koya na turaga ni lewa, ka vakamatei ira vata kece kei na nona turaga ni mataqali, sa tukuna o Jiova.
4 Sa tukuna vakaoqo o Jiova: "Ni sa qai vakatolu, vakava na talaidredre i Juta, Au na sega ni na vakasuka na nodra na cudruvi, ni ra sa rui beca na vunau i Jiova, ka sega ni ra maroroa na nonai vakaro. Na lasu era dau kitaka na tamadra sa mai kauti ira vakatani.
5 Ia Au na vakatala e Juta na bukawaqa, me vakarusa na veitikina e Jerusalemi."
6 Sa tukuna vakaoqo o Jiova: "Ni sa qai vakatolu, ka vakava na talaidredre i Isireli, au na sega ni na vakasuka na nodra na cudruvi, ni ra sa volitaka na tamata yalododonu me kenai voli ni siliva, kei na dravudravua me kenai voli e rua nai vava.
7 Sa vakaceguoca taki ira na kuvu ni qele ena uludra na dravudravua, era vakasesea na sala nona na yalomalumalumu, na tamana kei luvena e rau lasama e dua tiko ga na goneyalewa, era sa vakarogocataka na Yacaqu Tabu.
8 Era davoca na veicabocabo ni soro ena i sulu kerei, ka gunuva na mena waini na tamata ca ena vale ni nodra Kalou.
9 "Oi Au ga ka vakamatei ira na Amoraiti e matadra, ka vaka na balavu ni sitari na kena balabalavu, ka sa kaukauwa me vaka na oki; io Au na vakarusa na vanua kece, kei na wakana kece.
10 Oi Au talega ka kauti kemudou mai ena vanua o Ijipita, ka liutaki kemudou me
40 na yabaki ena vanua dravuisiga, mo dou tawana na nodra vanua na Amoraiti.
11 Au vakatubura eso na luvemudou me ra parofita, ka so nomudou cauravou mera tamata tawasei: Dou sa sega ni vaka kina oi kemudou na gone i Isireli?" Sa tukuna o Jiova.
12 " Ia dou solia vua na tamata tawasei na yaqona me gunuva, ka vakarota vua na parofita, 'me kua ni parofisai!'
13 "Raica, dou sa tabaki Au sobu, sa vaka na qiqi ni yaya sa turese sobu ena kena tabikai sobu tiko ena i yaya e usana.
14 O koya oqo ena gauna e tubu cake kina, e lako sobu, ena yali vua na tamata qaqa na kaukauwa, ena sega ni rawa ni veivakabulai na tamata qaqa;
15 Ena sega ni rawa ni drotaka na gasau ni dakai, na yava totolo ena sega ni rawa ni leve, na tamata vodo ose ena sega ni rawa ni dro bula.
16 Na tamata yalo kaukauwa ka dauvala ena dro vaki bula ni luvaiwale tu ena siga o ya" sa tukuna o Jiova.


Chapter 3

1 Dou rogoca na vosa i Jiova, sa vosataka me baleti kemudou na Isireli ka baleta na mataqali kecega, Au a kauta cake mai na vanua o Ijipita, ka vaka:
2 "Oi kemudou duadua Au kila mai na veimataqali tale eso e vuravura; o koya oqo Au na cudruvi kemudou ena nomudou caka cala."
3 E rawa li vei rau e lewe rua me rau lako vata, kevaka e rau sega tu ni yalovata?
4 E rawa li ni tagi na laione mai veikau, ni sa sega ni dua na kena? Ena tagi li na luve ni laione mai na nona qara ni sa sega na kena?
5 E rawa li ni vesuki e dua na manumanu vuka kevaka me sega na kena dai? E rawa li ni cariba na dai kevaka me sega ni dua na manumanu e coko kina?
6 Kevaka me uvuci na davui ena koro, e rawa li ni ra rere kina na tamata? Kevaka me dua na rogorogo ca e yaco, e sega beka ni a vakavuna o Jiova?
7 E dina sara ni sega ni dua na ka me vakayacora na Kalou o Jiova. E dau qai vakatakila tikoga nona ka vuni vei ira nona tamata na parofita.
8 Ni sa tagi mai na laione! O cei me sega ni rere? Ni sa vosa na Kalou o Jiova! O cei e rawa ni ia na parofisai?
9 "Dou kacivaka ena veivanua mai Asitoti, kei na veivanua mai Ijipita, ka vaka, 'Dou vakasoqoni vata mai ena ulunivanua o Samaria; sa toso tiko mai e dua na rorogo kosakosa, ka levu era sa vakasaurarataki tiko kina.
10 Ni ra sa sega ni kila na caka dodonu,' sa tukuna o Jiova, 'Era vakayaco i tovo kaukauwa kei na butako ena nodra vei tikotiko.'"
11 O koya oqo sa tukuna o Jiova: "Ena dua na meca ena vakayacora ena vanua taucoko; ena kauta tani nomu kaukauwa, na nomudou vei vale ena ravubasuki."
12 Sa tukuna o Jiova: "Me vaka nona kaliraka tani mai ena gusu ni laione nai vakatawa, e rua na yava se dua na tiki ni daliga, ena vaka kina na mataqali i Isireli ena nodra kau tani ka vakatikori Samaria O kina tutu ni davodavo kei na bati ni mocemoce balavu!
13 Mo rogoca ka tusanaka na mataqali i Jekope," sa tukuna na Kalou o Jiova, na Kalou Ni lewe vuqa,
14 "Ena siga dina o ya Au na cudruvi Isireli ena vuku ni nona talaidredre, Au na la'ki vakaraica na vakacacani ni cabocabo ni soro mai Peceli; na i leu balavu ena i cabocabo ni soro ena musu laivi me bale sobu kina qele.
15 Au na vakarusa laivi na vale ni draki katakata, kei na vale ni draki batabata; na vale ni qaravi Kalou matakau ena vakarusai, kei na veivale dau dokai ena talaraki sobu," sa tukuna o Jiova.


Chapter 4

1 Dou rogoca na vosa oqo, oi kemudou na bulumakau ni Pasani, ka tiko ena ulunivanua o Samaria, o koya ka vakasaurarataki ira na dravudravua, ka vakalolomataki ira na luveniyali, ka dau tukuna vua na watimu, "Mo kauta mai na yaqona, meda mai gunu!"
2 Sa bubului na Turaga o Jiova ka sa cavuta na nona yalododonu: "Raica, ena yaco na gauna ena kauti kemuni tani kina o Koya ena bati ni siwa, na nomudou kawa era na siwati talega.
3 Dou na curuma na bai sa kasura tu, dou na veituitui veitaravi yani, dou na laki biu sara ki Amoni," sa tukuna o Jiova.
4 "Dou lako mai Peceli ka mai murimuria na lomamudou ki Kilikali dou tosoa cake sara, na talaidredre, dou kauta mai nomudou i soro ena vei mataka, kei na nomudou i katini ena vei katolu ni siga.
5 Dou vakacabora talega nai soro ni vakavinavinaka sa vakatubutaki, mo kacivaka ka vunautaka na soli ni madrali ni vakavinavinaka; mo dou vakaraitaka kina nomudou loloma, oi kemudou na mataqali i Isireli!" sa tukuna na Kalou o Jiova.
6 "Au solia vei kemudou na masi ni bati e nomudou veikoro lelevu. Ni oti koso na kemudou madrai dou sega ni bau via lesu mai vei au." Sa tukuna o Jiova.
7 "Au sa tarova vei kemudou na uca, ni se vo e tolu na vula me ia na tatamusuki. Au vakatauca na uca ena dua na yasa ni koro, Au tarova tu na uca me kua ni tau ena dua na yasa ni koro. Ni dua na yasana e tau kina na uca, e dua na yasana e lauqa ni sega ni tau kina na uca.
8 Ena rua na koro se tolu, era na vakasaqaqara mera gunu wai, ia era na sega ni gunu rawa; dou a sega tikoga ni via lesu mai vei Au," sa tukuna o Jiova.
9 "Au na ceburaka vei kemudou na manumanu ni kau kei na vila kevaka sa levu mai nomudou i teitei. Nomudou were ni vaini, nomudou vei lolo, kei na nomudou vei vuni olive era na kanilaka na vodre; dou se sega tikoga ni via lesu mai vei au," sa tukuna o Jiova.
10 "Au a tala vei kemudou na mate dauveitauvi vaka – Ijipita; au a vakamatei ira nomudou cauravou ena i seleiwau, kei ira vata tukuna nomudou ose ka ra a vesuki tale tu ga ena veivakabobulataki; au vakatubura cake nai boi gaga mai na nomudou keba me curuma na ucumudou; io dou qai sega tikoga ni via lesu mai vei au," sa tukuna o Jiova.
11 "Au a taura vakaukauwa eso mai vei kemudou, me vaka na kena tauri Sotoma kei Komora vakaukauwa na Kalou, dou a vaka tu na kau ni sa kama oti, io dou se sega tikoga ni via lesu mai vei Au," sa tukuna o Jiova.
12 "O koya oqo Au na kitaka kina vaka oqo, Isireli, vei iko Au na vakayacora, mo vakarautaki iko, mo drau na sota kei na nomu Kalou, O iko Isireli!"
13 Mo raica, ni sai Koya ka bulia na veiulunivanua, ka vakatubura na cagi, ka sa tukuna vua na tamata na ka sa dau vakanananu kina, o Koya sa cakava na mataka ni vakarau kida me butobuto mada, ka dau lakova na veiyasana cecere kei vuravura Ona yacana o Jiova, na Kalou ni lewe vuqa.


Chapter 5

1 Dou rogoca na vosa Au tukuna vei kemudou, na tagi vakararawa, na mataqali i Isireli:
2 Era sa bale sobu na goneyalewa savasava ni Isireli; era na sega ni tucake tale, ena sega ni dua me vakatura cake tale, ena vanua e bale koto kina.
3 Ni sa vosa vaka oqo o Jiova: "Na koro dau lewena tu e dua na udolu, ena vo ga kina e dua na drau, mai na dua na drau e vo era na qai kau tani me vo ga e lewe tini."
4 Sa tukuna vakaoqo o Jiova kina mataqali i Isireli: "dou vakasaqarai Au mo dou bula kina;
5 Dou kua ni vakasaqaqara ki Peceli, se curumi Kilikali, se lako ki Pieri-sepa o Kilikali ena kau vakabobula, o Peceli ena vakadravuisigataki.
6 Dou vakasaqarai Jiova mo dou bula, de qai caudre mai vaka na buka nona cudru ena vale i Joseva, ka veivakarusai, ni sega ni rawa me dua e bokoca mai Peceli—
7 Oi kemudou sa vukica na lewa dodonu me ka walega, ka buluta kina qele na i valavala e dodonu!"
8 O koya e buli Peleadi kei Oraioni; e vukica na i yaloyalo ni mate me dua na mataka vinaka, e bulia na siga ni buto me bogi; e kaciva na wai ni wasawasa me drodrova yani na vanua mamaca; o Jiova na yacana.
9 E vakamalumalumutaki ira na tamata qaqa, me vakarusai rawa kina na koro kaukauwa.
10 Era cata na veivunauci e matana votu, ka ra sevaki koya edau vosa vakadodonu.
11 Ni dou sega ni kauwaitaka na dravudravua ka beci koya, ena nomudou kovea mai vua, nai sau ni kena sila me bula kina, e dina ni dou tara vale tiko ena vatu dou taya, dou na sega ni na tudei kina; dou na tea na veiwere ni vaini, ia dou na sega ga ni na gunuva na kena waini.
12 Niu sa kila na nomudou dau talaidredre kei na bibi ni nomudou i valavala ca: Dou vakasesewani ira na lotu dina, ka taura nai lavo ena sala tani; ka vakauti ira cala na vakaloloma me kua ni ra kila na ka dodonu.
13 O koya oqo era na sogota kina na gusudra na yalomatua, ni ra kila ni sega ni Vakalou na veika sa yaco tiko.
14 Dou vakasaqara na vinaka ka sega na ka ca, mo dou bula kina; me rawa ni tiko kina kei kemudou o Jiova na Kalou ni lewe vuqa, me vaka na nona vosa.
15 Dou cata sara na ka ca, ka taleitaka na ka vinaka; dou vakataudeitaki kemudou ena nomudou i tikotiko, de na qai yalololoma mai vei kemudou na mataqali i Joseva na kena e vo tiko, o Jiova na Kalou ni lewe vuqa.
16 O koya oqo, sa tukuna kina o Jiova na Kalou ni lewevuqa: "Ena vakayacori na veitagicaki ena vei tutu ni sala, era na vaka'Oilei! Oilei! ni ra lako tu ena sauka ni sala era dau muria, era na tukuna vei ira na dauteitei mera tagi talega, kei ira na dauveiqaravi vei ira na mate me ra na tagi vakararawa talega.
17 Mai na veiloga vaini me yaco tiko na tagi vakararawa, ni'u na lako yani kina" sa tukuna o Jiova.
18 Ena ca vei kemudou ni dou gadreva na siga i Jiova! Na vinaka cava ni siga i Jiova vei kemuni? Ena yaco na buto rerevaki, ka sega na rarama.
19 Ena vaka nona drotaka na laione e dua na tamata, ka waraki koya tu e dua na Pera! Se me curu kina dua na loma ni vale, ka tatabaki na ligana ki lalaga, qai katia mai na ligana e dua na gata daukata gaga!
20 E sega li ni siga i Jiova e butobuto ka sega na rarawa? E sega li ni butobuto ka sega kina na rarama?
21 "Au cata, Au vakasisilataka nomudou siga ni solevu, Au sega talega ni taleitaka na nomudou dau vakasoqoni vata ena lotu.
22 Dina ni dou cabora vei Au nai soro kama kei na nomudou i sevu ni vuata, Au na sega ni vakadonua, Au na sega talega ni ciqoma nomudou i soro ni veivinakati o koya sa uro.
23 Dou kakua ni laga sere mai vei Au, ni'u sega ni via rogoca nai rorogo ni nomudou yaya ni qiriqiri.
24 Ia dou vakatara mada me drodro yani na lewa dodonu me vaka na wai, kei nai valavala dodonu me vaka na drodro ni wai kui kaukauwa.
25 "Vei kemuni na mataqali i Isireli, dou a dau cabora tiko vei Au, nai Soro Tabu kei nai soro ni vakavinavinaka ena loma ni vasagavulu na yabaki ena vanua dravuisiga?
26 Dou a colati sekutu na nomudou Tui kei kaiuni na nomudou matakau, oi rau nomudou ka domoni vei ira taucoko nomudou Kalou, dou a cakava ga ena ligamudou.
27 O koya qo Au na biuti kemudou mo dou kau vakabobula me sivi mai o Tamasiko." Sa tukuna o Jiova, na yacana na Kalou ni lewe vuqa.


Chapter 6

1 Ena ca vei ira sa tu vinaka e Saioni, ka vakararavi tiko kina ulunivanua e Samaria, era tamata dokai ni matanitu, ka lako mai kina na mataqali i Isireli!
2 Dou lako mada ki Kaline mo dou raica; mai kea dou lako ki Emaci na koro levu; ka lako sobu tale ki Kaca na nodra koro na kai Filisitia. Vakacava dou vinaka cake li mai vei ira na matanitu oqo? Se na nodra i yalayala ni vanua e levu cake li mai vei kemudou?
3 Ena ca o koya e biuta vakatikitiki tani na siga ni veivakamatei, ka vakayavalata nai tikotiko ni valavala vakaukauwa me yavala mai;
4 Ka davo ena i mocemoce sa Ceuti, ka dodoka tu na yavana ni davo tu, dau kania na sipi e kau mai ena kena bai, kei na luve ni bulumakau e kau talega mai ena kena bai;
5 Ka dau laga sere ni ia vata tiko kei nai vakatagi, ka dauvakayagataka nai vakatagi ka tautauvata na nei Tevita;
6 Era gunuva na waini ni vakayagataki na tanoa, ka lumuti tu ena waiwai talei eso, ka sega ni bau kauwai ena nona leqa tu o Joseva.
7 O koya oqo era na kau kina vakabobula, ni se bera ni ra kau na kena vo mera bobula, kei ira na dau vakaogai ira tu ga ena kana magiti, era na kautani.
8 O Jiova na Kalou ni lewe vuqa e tukuna, ena nona bubului ni cavuti koya ga, "Au rarawataka na dokadoka i Jekope, Au sega ni taleitaka nodra veivale totoka; o koya oqo Au na solia na nodra vei koro, kei ira kece era tiko kina me vakacacani."
9 Ena yaco mai na gauna, kevaka me tiko ena dua na loma ni vale era lewe tini, era na vakamatei taucoko.
10 Na wekai koya sa mate, me lako yani ki loma ni vale, me taura mai na yagoi koya sa mate me la'ki vakama, ena tukuna mada vei koya sa tiko e vale, "Se vo tiko eso vei kemudou?" Ena qai tukuna mai e dua, "E sega". Sa qai tukuna o koya "Mo taura vakadua nomu vosa! Me da kua ni dau cavuta vakaveitalia na yaca i Jiova."
11 Ka raica, sa solia nai vakaro o Jiova: Ni na vorolaka na vei vale lelevu me kakavorovoro, kei na veivale lalai me tikitikina vakalalai sara.
12 Na ose e rawa ni ciciva na veivatuvatu? E rawa ni siviyara na bulumakau lelevu me sega nai siviyara? Dou sa vukica na lewa dodonu kina veibeitaki, kei na vua ni valavala dodonu kina ka lasu,
13 Oi kemudou dou a marautaki Lodebara, ka vaka, "Eda sa sega ni tauri Kaneimi me noda ena noda kaukauwa?"
14 "Ia, mo raica, Au na vakatubura e dua na matanitu me valuti iko, na mataqali i Isireli," sa tukuna o Jiova na Kalou ni lewe vuqa; "Era na ravuti kemudou ena mata ni curucuru ki Emati me yacova na buca o Arapa."


Chapter 7

1 Oqo sa vakaraitaka vei au na Kalou o Jiova. Ka raica sa vakarautaka tu o Koya na vodre me ra na curu mai ni se qai tekivu ga na teiteivaki ni kakana; 'o ya na teiteivaki ni kakana ni oti nona sasamaki na tui.
2 Ni oti nodra kania na co ni vanua, au qai tukuna: "Vei kemuni Jiova na Kalou, au masuti kemuni mo ni vosota mada! o Jekope me maroroi, ni sa rui lailai!"
3 Sa qai tukuna o Jiova, "Au na sega ni na vakatara," me na yaco mai na veika oqo.
4 Sa vakaoqo na ka sa vakaraitaki vei au mai vei Jiova, raica, sa kaciva na bukawaqa me yaco kina na tiko vakaca, sa vakama yavu na veiyautalei, ka teteva yani na vei yalayala ni vanua.
5 Au qai tukuna: "I Jiova noqu Kalou, au masuti kemuni mo ni yalololoma mai! Me maroroi o Jekope ni sa rui lailai!"
6 Sa qai tukuna o Jiova, "Au na sega ni na vakatara, me na yaco na vei ka oqo.
7 Sa vakaoqo na ka e vakaraitaka vei au o Koya; ka raica sa tucake tu o Jiova ena dela ni bai; ka sa tu vakadodonu, ka sa dua na vatu i vakarau ena ligana.
8 A sa tukuna vei au o Jiova, "Emosi, a cava o sa raica?" Au a tukuna, "E dua na vatu i vakarau". Sa qai tukuna o Jiova: "Ka raica, au sa biuta tu na vatu i valkarau vei ira na noqu tamata na Isireli; me kua kina ni ra lako siviti au tale vakadua.
9 Na veiyasana cecere nei Aisake ena vakalalai vakadua, ka na talaraki sobu talega na nodra vanua ni so Kalou na Isireli. Au na qai tucake vata yani kei nai seleiwau me'u na vakamatei ira na mataqali i Jerepoami."
10 Sa talai o Amasaia na bete mai Peceli vei Jeropoami na Tui Isireli, ka vaka, "Sa bukia tiko na kemu vere o Emosi vei ira na mataqali i Isireli. Sa sega ni vosota rawa na lewe ni vanua na nona vosa kecega.
11 "Ni sa tukuna vaka oqo o Emosi: 'Ena vakamatei ena i seleiwau o Jeropoami, o ira na Isireli era na kau vakabobula tani mai ena nodra vanua.'"
12 Sa qai tukuna o Amasaia vei Emosi: "Mo lako, o iko na daurairai! Ka dro kina vanua o Jutia. Mo la'ki kana madrai kina, ka la'ki parofisai talega kina.
13 Ia mo kakua tale ni mai parofisai vakadua e Peceli, na vanua ni nona so Kalou na tui, ka nona i tikotiko vakaturaga talega."
14 Sa vosa o Emosi vei Amasaia: "Au sa sega ni parofita, au sega talega ni luve ni prarofita, ia oi au na dau susu sipi kei na dausamaki lolo.
15 Ka sa kauti au o Jiova ni'u vakamuri ira tiko na qele ni sipi, sa tukuna vei au o Jiova, 'Mo lako, ka parofisai vei ira noqu tamata na Isireli.'
16 Oqo, mo rogoca na vosa i Jiova. Ka vaka, 'Mo kua ni parofisaitaki Isireli, ka me kua ni vosacataki na mataqali i Aisake.'
17 "Sa tukuna vaka oqo o Jiova: 'Na watimu ena dautagane wavoki ena loma ni koro levu; na nona cauravou kei na nona goneyalewa era na mate ena i seleiwau; na nona tiki ni qele ena wasewasei me votai ena kaukauwa mai vei ira e taudaku; o na la'ki mate ena dua na vanua sa vakadukadukali taki oti tu; o Isireli ena kau tani mai ena nona vanua me vakabobulataki.'"


Chapter 8

1 Sa vakaoqo na ka e vakaraitaka vei au na Kalou o Jiova: raica e dua na sova vuata ni draki katakata.
2 Sa qai tukuna, "Emosi, cava o sa raica?" Au a qai tukuna, "E dua na sova ni draki katakata". Sa qai tukuna vei au o Jiova; "Sa vakarau mai cava na nodra siga ni noqu tamata na Isireli; au na sega ni lesuvi ira tale.
3 Ena vuki na lagalagasere ena vale ni soro, me domo ni veitagicaki vakararawa," sa tukuna o Jiova – "Era na veidavoci na yago ni tamata mate ena vei yasana kecega, ka sega e dua me kauwaitaka."
4 Dou rogoca oqo, oi kemudou ka beitaki ira na dravudravua, ka vakadatuvu taki ira na vakalololoma tu,
5 Ka vaka: "Ena oti na gauna cava na vula vou, me da na volitaki sila kina? Kei na sigatabu me da na ia kina na veivoli witi? Me vakalailailtaki na efa ka vakalevutaki na sikeli, ka veivakaisini ena i vakarau ni yaya sa leqa tu,
6 Me da voli ira na dravudravua ena siliva, kei ira na luveniyali ena i vava O se volitaki na witi ca?"
7 Na dokadoka i Jekope sa bubului kina o Jiova: "Au na sega ni guilecava vaka kina na nodra cakacaka.
8 Ena sega beka ni ra tagi na lewe ni vanua ni sa yavavala na vanua era na vakatuburi cake me vaka na uciwai, tubu cake ka lutu sobu tale me vaka na uciwai o Ijipita.
9 Ena qai yaco ena siga o ya" sa tukuna o Jiova, "Me yaco na matanisiga me qai tu donu Au na vakadromuya sobu yani, Au na qai vakabutobutotaki vuravura ni siga levu tutu na vanua;
10 Au na veisautaka nomudou siga ni solevu me siga ni tagi, na luvemudou era na veiyasovaki ena tagi; Au na vakasulumi kemudou ena i sulu taga, ena tasi na qavokavoka kece; Au na cakava me vaka na rarawataki ni sa mate e dua bulu na cauravou ena dua na vuvale, nai otioti ni siga oqori, sa na siga dina ni rarawa.
11 "Raica, sa lako tiko mai na siga," sa tukuna, na Kalou o Jiova, "Au na vakayacora e dua na dausiga kina vanua, sega ni dausiga ena kakana, se viagunu ni sega na wai, ia na dausiga ni via rogoca na vosa i Jiova.
12 Era na vakasaqaqara mai na mua ni wasawasa e dua kina mua ni wasawasa e dua, mai na vualiku ki na Tokalau; era na veiciciyaki vaka ka vaka mera vakasaqara na vosa i Jiova, ia era na sega ni kunea.
13 "Era na kolaiciba ena siga o ya na goneyalewa savasava kei ira na cauravou qaqa ena via gunu wai.
14 O ira era bubului ena vuku ni valavala ca i Samaria, ka vaka, 'O iko Tani, me vaka sa bula na nomu Kalou!' 'Kei na kena vakabulai tiko na bula vaka Pieri-Sepa!' Era na mate dina ka sega ni tucake tale."


Chapter 9

1 Au a raici Jiova ni sa tu ena i cabocabo ni soro, ka tukuna mai; "Mo samuta na duru ni katuba me rawa ni yavala na kena i tatarovi, ka mokulaka na vei uludra kecega. Na kena i otioti vei ira Au na vakamatea ena i seleiwau. O ira na dro mai kina era na sega ni bula rawa, kei ira na bula mai kina era na sega ni na dro rawa.
2 "Era via dro sobu i Eli kina botoi vuravura, ena kauti ra cake mai kea na ligaqu; era na via cabeti lomalagi cake Au na kauti ira sobu mai;
3 Era na vunitaki ira ena delana o Kameli, mai kea Au na vakasaqarai ira ka kauti ira; e dina ni ra vunitaki Au mera dro kina boto ni wasawasa, mai kea Au na tala e dua na gata levu, me katilaki ira;
4 Era na kau vakabobula ena ligadra na nodra meca, mai kea Au na vakarota na i seleiwau me na vakamatei ira. Au na wanonovi ira tiko, me kua ni dua na ka vinaka me yacovi ira, me ka ca ga."
5 O Jiova na Kalou ni lewe vuqa, o koya ka qumia na vuravura ka sa waicala, era na rarawa tu ga o ira era tiko kina; era na vaka na uciwai ni luvuci mai ena ca, ka lutu sobu tale yani me vaka tiko na uciwai o Ijipita.
6 O koya ka bulia na veitarataravi ni lati ni lomalagi; ka nona i tutu o vuravura; ka kaciva na wai ni wawasawa, ka sovaraki yani ena dela i vuravura O o Jiova na yacana.
7 "Dou sa sega li ni vakataki ira na kai Iciopea vei Au oi kemudou na Isireli?" Sa tukuna o Jiova, "Au a sega beka ni kauti ira mai na Isireli mai Ijipita, na kai Filisitia mai Kafitori, kei ira na kai Siria mai Kiri?
8 "Raica, na mata i Jiova sa rai tiko kina matanitu i valavala ca, au na vakarusa laivi mai ena dela i vuravura: Au na sega ni na vakarusa na mataqali i Jekope." Sa tukuna o Jiova.
9 "Au na vakarota vaka i dina, me na maroroi tiko o Isireli mai na veimatanitu e vuravura, me vaka na maroroi ni sila ena kena lawalawa; ka sega ni dua na tikina lailai me yali tani.
10 O ira taucoko na noqu tamata era i valavala ca, era na mate taucoko ena i seleiwau, me cavuti, 'Na kaukauwa ni ca ena sega ni rawa ni na mai vakatulewa tiko vei keda.'
11 "Ena siga o ya Au na vakatura cake tale na vale vakacevaceva i Tevita, o koya sa davo sobu tu. Au na vakavinakataka na vanua sa vakacacani; ka vakaduria na veitikina sa duitutu, ka tara vinaka me vaka na kena i rairai e liu;
12 Me ra na mai tawana na biu tu mai Itomi, kei ira na vei mataqali tani era vakatokai ena yacaqu, sa tukuna o Jiova ka cakava na vei ka oqo.
13 "Raica ena yaco mai na siga." Sa tukuna o Jiova, "Ena liutaki koya na daubetibeti o koya na daucukicuki, o koya na dau samaki vaini ena liutaki koya na daukabukaburaki; ena vakasinaiti na veiulunivanua na waini kamicakamica, me na curuma ka drodro yani kina veidelana.
14 Au na vakalesui ira tale mai na noqu tamata era bobula tu; era na mai tea na loga vaini ka ra gunu waini mai kina; era na teitei ka kania na kena vuata.
15 Au na teivaki ira ena nodra vanua dina, ka na sega e dua mena cavuraki ira tani mai ena vanua sa soli vei ira, "sa tukuna na Kalou o Jiova.