Jona

1 2 3 4


Chapter 1

1 Oqo na vosa i Jiova vei Jona na luvei Amitai, ka vaka,
2 "Mo tucake, ka lako ki Ninive, na koro levu o ya, ka vunautaka vei ira, ni sa lako cake mai ki mataqu na nodra ca."
3 Ia o Jona sa qai lako me dro ki Tasisi mai na mata i Jiova. A sa qai lako sobu sara ki Jopa, me kunea kina e dua na waqa me lako ki Tasisi; sa la'ki sauma na nona i vodovodo, ka vodo yani e loma ni waqa, me lako vata kei ira ki Tasisi ena nona dro tiko mai vei Jiova.
4 Ia o Jiova sa vakatubura e dua na cagi kaukauwa ena wasawasa, ka sa liwa sara ga ena kena kaukauwa taucoko, ka sa voleka me vakaseretaka na waqa.
5 O ira na lewe ni waqa era sa rere; ka ra sa dui masuta na nodra dui Kalou, era viritaki kece i wai nai usana ni waqa, me rawa ni bau mamada kina na waqa. Ia o Jona e siro sobu kina boto ni dreke, ka davo sobu, me moce lutu sara yani.
6 A sa lako vua na kavetani ni waqa, ka vosa vua, "A cava o moce tikoga kina, o iko? Tucake, ka masuta na nomu Kalou; de na rawa vua na nomu Kalou me na vukei keda meda kakua ni mate kina."
7 Era sa qai bosea. "Me ra lakovata mai, ka vakawiri madigi, meda rawa ni kila, se o cei vei keda sa vakavuna na leqa oqo." Era sa qai vakawiri madigi, ka sa dusi Jona tu.
8 Era sa tukuna vua, "Yalovinaka mo tukuna mada vei keimami! Cava na vuna e yaco kina na leqa oqo vei keda? A cava nomu cakacaka? E vei na vanua o lako mai kina? Na matanitu cava o vola kawa bula kina? O cei na wekamu?"
9 Sa qai tukuna o koya vei ira, "Oi au na Iperiu; au a rerevaki Jiova, na Kalou ni lomalagi, o koya ka bulia na waitui kei na vanua mamaca."
10 Sa tarai ira na lewe ni waqa na rere, ka ra tukuna vua, "Na cava o cakava kina na ka oqo?" Ni ra sa kila sa dro o koya mai na mata i Jiova, ni sa tukuna vei ira o koya.
11 A ra sa vosa vua, "Na cava me keimami vakayacora vei iko me maravu kina na wasawasa?"ONi sa toso cake tikoga na kaukauwa ni cagi kei na ua lelevu.
12 Sa tukuna vei ira o koya, "Dou tauri au i cake, ka viritaki au i wai; ena qai maravu vei kemudou na wasawasa. Ni'u sa kila sa baleti au ga na leqa kece oqo."
13 Era saga vakaukauwa me ra vocetaka na waqa ki vanua, ia era sa sega ni rawata, ni sa rui voravora vakalevu na wasawasa ena cagi kei na ua.
14 O koya oqo era sa qai tagi kina vei Jiova ka vaka, "Keimami masuti, Kemuni kina Jiova, mo ni yalovinaka me kakua ni keimami mate na vuku ni tamata qo, me kakua ni beitaki vei keitou na dra sega cala; ni o Kemuni ga Jiova sa cakava me vaka na ka o ni vinakata."
15 Era sa qai tauri Jona ki cake ka viritaki koya i wai, ka sa maravu vakasauri na wasawasa.
16 Na lewe ni waqa taucoko era sa rerevaki Jiova vakalevu sara, ka ra sa cabora e dua nai soro vei Jiova ka salavata ena nodra vosa bubului vua.
17 A sa vakarautaka o Jiova e dua na ika levu me mai tilomi Jona. A sa tiko ena kete ni ika o Jona, me tolu na siga ka tolu na bogi.


Chapter 2

1 Ni sa tiko ena loma ni kete ni ika, sa qai masu vei Jiova, na nona Kalou, o Jona.
2 Ka vaka: "Au a tagi vei Jiova ena vuku ni noqu rarawa, a sa rogoci au o Koya. "Mai na loma i Etesi au a tagi, o ni qai rogoca na domoqu.
3 Ni kemuni a biuti au kina boto ni sauloa, ki na loma donu ni wasawasa, sa vakavolivoliti au na ua; na nomuni biau lelevu ni wasawasa era ubitaki au.
4 Au vosavosa i yaloqu, ka vaka, 'au sa vakatalai tani mai Matamuni; au na tovolea tale me'u na raica na Nomuni valetabu.'
5 Sa vakavolivoliti au na wai, ka sa yacova na lomaqu; au sa tu ena boto ni sauloa; era sa vaka viviraka na uluqu na lumilumi.
6 Au lako sobu sara ki ra kina veiulunivanua me'u tu kina; ka sa tasogo kece mai vei au o vuravura; Io, o ni qai vueti au cake mai ena vanua ni mate au a tu kina, oi kemuni Jiova, na noqu Kalou.
7 "Sa yacova mai na gauna, me sa sega vei au na noqu kaukauwa, au sa qai nanumi Jiova; ka'u vagolea cake yani na noqu masu vei kemuni, kina nomuni vale tabu.
8 "O ira era vakaliuca nai vakatakarakara, era vakanadakua tiko na loloma ki vei ira.
9 Ia, au na cabora vei kemuni na domo ni noqu vakavinavinaka; au sa na cakava na ka au sa bubului oti kina, na veivakabulai sa nei Jiova."
10 Sa qai vosa kina ika o Jiova, ka sa luaraki Jona kina vanua mamaca.


Chapter 3

1 Oqo nai karua ni gauna vei Jona me vosa vua o Jiova, ka vaka,
2 "Tucake, ka lako ki Ninive, na koro levu o ya, ka laki vunautaka kina nai tukutuku Au tukuna vei iko."
3 A sa tucake o Jona ka lako ki Ninive, me vaka nona vosa vua o Jiova, o Ninive e dua na koro vakaitamera, ena tolu na siga kevaka me da taubale wavokita.
4 E curuma yani na loma ni koro ena i matai ga ni nona siga. Ka tabalaka yani na domona ka vaka, "Ena siga vagasavulu mai oqo, ena vuaviritaki kina o Ninive!"
5 A ra sa vakabauta na Kalou na kai Ninive, ka sa kacivaki mera lolo, ka vakaisulu taga tekivu sara ga mai vei ira na qase me yacovi ira sara na gone.
6 Ni sa rogo yani vei Tui Ninive na vosa oqori, sa tucake mai o koya ena nonai tikotiko vakatui, ka la'ki vakaisulutaki koya ena i sulu taga, ka la'ki tiko ena dravusa.
7 A sa kacivaki yani, me tukuni raraba e Ninive, ni sa vakarota na Tui kei ira na kena vei turaga bale eso, ka vaka, me kakua ni dua na tamata se manumanu yava i va, bulumakau se sipi, me kania e dua na ka; me kua sara ga ni dua me kana se gunu wai.
8 Ia na tamata kece kei na manumanu mera vakaisulu ena i sulu taga, ka mera tagica na Kalou; ka veisau me biu laivi nai tovo ca, kei na vakayaco vakarau kaukauwa ni ligadra.
9 O cei e kila de veisau lesu na Kalou ka veivutuni, ka kauta tani vua na nona cudru waqawaqa, me da kakua ni mate kina?
10 Ni sa raica na Kalou na ka era sa cakava, nodra veisautaki ira sara ga mai na nodra i tovo ca; na Kalou sa qai vakasuka tale na veika rarawa sa tukuna oti tu me na yacovi ira, ka sega ni vakayacora dina na Kalou.


Chapter 4

1 Ia sa sega ni vinakata sara ga o Jona, ka cudru sara vakalevu.
2 Sa masu kina o koya vei Jiova, ka vaka, sega ni o koya oqo Jiova, na ka au tukuna niu se tiko mai noqu vanua? O koya oqo au dro kina ki Tasisi; ni'u sa kila ni o ni Kalou vinaka ka dauloloma, Ni dau cudru vakamalua ka vutu ni yalololoma, ka dau ciqomi ira na daucaka ca.
3 "O koya oqo, Jiova, Mo ni kauta tani ga na noqu bula, ni sa vinaka cake vei au me'u mate ka ca me'u bula tiko!"
4 Sa vosa vua o Jiova, "sa donu li vei iko mo cudru?"
5 A sa qai lako kina sauka ni koro o Jona, ka laki tiko ena yasa ni koro vaka kina Tokalau. Ka vakaduria kina e dua na nona vale bolabola ka dabe sobu e rukuna me vakaruru kina, ka me raica mada kina na ka ena yacova na koro oqo.
6 Ia na Kalou o Jiova sa qai vakarautaka e dua na kau, ka vakatubura me vakarurugi Jona, me rawa ni vakarurugi koya tu, ka me vakaseavutaka na nona cudru. A sa marautaka na kau oqo o Jona.
7 Ia ni qai kida mai na mataka ni siga ka dua, na Kalou sa vakarautaka e dua na yavato, mena kania na kau me rawa ni malai sobu kina.
8 E a qai vakayacori, ni cadra cake mai na matanisiga, na Kalou e vakarautaka e dua na cagi Tokalau kaukauwa sara; ka tara mai na ulu i Jona na katakata ni matanisiga, ka sa yacovi koya e dua na malumalumu levu, ka sa vinakata sara ga o koya me sa mate, sa tukuna, "sa vinaka cake ga vei au me'u mate, ka ca me'u bula tiko."
9 A sa vosa vei Jona na Kalou, "e dodonu vei iko mo cudruvaka na kau o ya?"Sa sauma o Jona, "sa lomaqu dina me'u cudru, ka me'u mate sara!"
10 Ia sa cavuta vua o Jiova, "o iko o sa lomana vakalevu na kau, ena ka o sega ni bau oca kina, se mo rawa ni vakatubura, sa tubu cake ga mai ena bogi ka mate tale yani ena dua na bogi.
11 "Oi au me'u kua ni lomani Ninive, na koro levu, ka ra tiko kina na lewe dua na drau ka ruasagavulu na udolu na tamata, ka ra sega ni kila rawa tiko na duidui ni ligadra i matau kei na ligadra i mawi – ka levu talega kina era susu manumanu?"