Neumi

1 2 3


Chapter 1

1 Na vosa ni parofisai bibi ka baleti Ninive, oqo nai vola ni raivotu i Neumi na kai Elikosi.
2 Sa Kalou vuvu, ka dau veisausaumi o Jiova; ka e vakadomobula o Jiova ni veisausaumi vei ira edau via saqati Koya, ka sa daucudrucudru vakamalua vei ira na kena meca;
3 O Jiova sa dau cudru vakamalua, ka sa ka levu vakaidina na nona kaukauwa, ena sega ni ciqomi ira na tamata ca. Ka sa dau tiko na sala i Jiova ena gauna ni covulaca kei na cava kaukauwa, kei na o na kuvu ni yavana.
4 Ka e dau cudruva na wasawasa ka rawa ni vakamacara, ka rawa ni vakadiva na veiuciwai, ena raqosa o Pasani kei Kameli, kei na senikau ni Lepanoni ena malai.
5 Na veiulunivanua e yavavala ni sa butuka, kei na veidelana era waicala, ka tavuki sobu o vuravura kei ira talega era tiko kina.
6 O cei me yatedei me tu ena gauna ni Nona cudru? O cei me vorata rawa na vakarerevaki ni Nona cudru? Ka e waqa na nona cudru me vaka na bukawaqa, ka dau vaqera sobu na veivatu loa lelevu.
7 Sa yalovinaka o Jiova, ka sai vakaruru kaukauwa ena gauna ni leqa; ka sa kilai ira era sa vakararavi vua.
8 Ia ena gauna ni waluvu levu e cakava kina o Koya e dua na ka vei ira na kena meca me rawa ni ra mate kina.
9 A cava dou sa nanuma vaka ca kina vei Jiova? Sa oti na ka e via cakava. Ena sega ni vakarua taki tale na ka rarawa.
10 Se mani votovotoa sara vaka na soni, se yatayata vaka na daumateni, era na vakaoti ga vaka na sila sa matua.
11 Ena lako mai vei iko o koya sa bukia tiko na vere vei Jiova, e dua na dau ni lewa ca sara.
12 Sa tukuna vaka oqo o Jiova: " E dina ni ra sa mai maroroi vakataki ira eso tale, ena sega ga ni na kauta tani na mate me na muri ira tiko. E dina ni'u a vakararawataki kemudou, ka'u na sega ni na cakava tale vei kemudou;
13 Ia oqo Au na musuka tani na nonai vua mai vei kemudou, ka tawasea tani na kemudou i sema."
14 O Jiova sa solia e dua nai vakaro me baleti kemudou: "Na yacamudou me na kua tale ni qai nanumi ena dua na gauna. Ena vei vale ni nomudou Kalou, Au na vorovorolaka na nomudou matakau ceuceu. Ka Au na kelia na kemudou i bulubulu ni dou sa vakasisila vei au."
15 Raica, ena ulunivanua na yava i koya sa kauta lako mai na rogorogo vinaka, ka vunautaka na tiko sautu! Dou ia tikoga na solevu tabu na Juta, kei na nomudou soqo ni bubului. Era na sega ni lako tale mai vei kemudou na tamata ca; ni ra sa vakaoti taucoko sara.


Chapter 2

1 Sa lako mai vei iko o koya, na dauveivakarusai: Dou tu vakarau! Yadrava na sala! Vauca vinaka na tolumudou! Dou vakaukauwataka na nomudou matai valu.
2 Ena vakasuka tale o Jiova na nona lagilagi o Jekope kei na nodra dau lagilagi na Isireli, ena nodra a vakacacani ira na dauvakacaca, era qai tamusuka laivi na nodra kaukauwa ni rawa ka.
3 Na nona i sasabai na tamata qaqa ena vuki me damudamu, o ira na tamata i valu era na tokara nai sulu damudamu butobuto. Era na tatibi mai na qiqi ni valu me vaka na cina ramasese, ena siga ni nona lako mai; kei na moto ena taliva vinaka tu.
4 Na qiqi ni valu era na osota na veigaunisala, era na veituitui ena vei sala lalai, kei na sala lelevu; ena cavuisaravi na kedra totolo ni ra sa toso.
5 E nanumi ira nona turaga; ni ra sa tarabe kece ena nodra lako tu; ka ra tatabaki kina bai me ra vakarautaki ira kina.
6 Era dolava nai lati ni veiuciwai; me kuitaka na vale vakamareqeti.
7 Sa vakatauci na lewa: Ni na kau vakabobula o koya, me yacova ni suka lesu tale mai; era na liutaki ira nodra marama dauveiqaravi, ena voqa tu na domodra vaka na ruve, kei na nodra tavia tiko na lomaseredra.
8 Ka mai liu o Ninive e vaka e dua na tobu sinai tu ena wai, oqo era sa dro yawa tiko. Era kacivaka tiko yani, "Ni tu vakadua!""ni tu vakadua!" Ia ka sega ni bau dua me rai vuki mai.
9 Dou taura nodra siliva!, kei na nodra koula! Na noda i yau talei e sega ni oti rawa, kei na vei yaya sau lelevu.
10 Sa vakalalai, ka vakacacani; ka ravuti vakadua! Sa waicala na yalo, ka sautanini na duru; ka sa rogoci ga na domo ni tagi mai na vei saqata, ka laurai e matadra na yaluma kei na veilecayaki.
11 E dau tiko E vei na nona i tikotiko na laione, kei na vanua e dau kana kina na luve ni laione, na vanua edau lakova na laione, na laione yalewa kei na luve ni laione, ka sega ni dua me dau vakarere?
12 Na laione sa dresudresulaka na kedra na luvena, ka vakamatea eso me kena na laione yalewa, ka biuta ki na nona qara na ka esa vakamatea.
13 "Raica, Au na ravuti iko" sa tukuna o Jiova na Kalou ni lewe vuqa, "Au na vakarusa na nomu qiqi ni valu me kama yavu kei na nomu luve ni laione ena vakamatei ena i selewau; Au na vakaotia kece mai vuravura na ka o rawata, kei ira o dau talai ira tiko ena sega tale ni rogoci na domodra."


Chapter 3

1 Ena ca na koro dauvakadavedra! Ka sinai ena dau lasu kei na butako. Ka sa sega ni rawa ni oti na leqa e tiko kina.
2 A sa rorogo ni veivakanakuitataki kei na rorogo vavadugudugu ni qiqi ni valu, na rorogo ni yava ni ose ena nona dreta tiko na qiqi ni valu!
3 Era sa ukutu na mataivalu ose ni tatalivaliva nai seleiwau kei na moto, ka sega ni wili rawa na tamata era mate—ka vakasinaita na vanua na yago ni tamata—
4 Ena vuku ni kena sa levu na dautagane kei koya e tiko vinaka me dautagane talega. Kei na so talega vei ira na marama era vakayaco ka mana ena sala butobuto. Ka era volitaka kina na vanua vei ira na vulagi ena sala ni dautagane kei na vuvale mera vakacalai tu ena daucaka mana lasu.
5 "Raica, Au na vakacacani iko,"sa tukuna o Jiova na Kalou ni lewe vuqa, "Au na luvata taucoko na nomu i sulu mai yagomu, me'u vakaraitaka ki vuravura kece na nomu luvaiwale, mo vakamaduataki kina ki na veimatanitu.
6 Au na vakatauva vei iko na mate ni yago rairaica mo rairai tu kina vakaduatani.
7 Me na yacova na gauna, o ira era raici iko me ra dro ena domobula, ka tukuna, sa vakacacani vakalevu sara o Ninive! 'O cei me rawa ni mai wasea vata na nona rarawa?' Ka me'u la'ki raica li mai vei e dua me vakacegui iko?"
8 O uasivi cake beka mai vei Noamoni ka dabe toka ena bati ni uciwai, ni wavolivolitu koya tu na wai, ka nona i drodro kei na nona bai na wasawasa?
9 O Iciopea kei Ijipita e rau dau vakararavi kina, ka ni vutucoqa tu na nodrau i yau ka sega ni yalani rawa; o ira na kai Puti kei ira na kai Lupiu era dau tokoni iko.
10 Io sa kau tani ga yani o koya ka me vakabobulataki; o ira na nona gone lalai era basubasuraki vakalalai, era vakawiri madigi ena vei tutu ni sala ena vukudra nona tamata turaga, o ira nodra tamata kaukauwa era na vesuki ena senidodo.
11 O iko ena yacovi iko na mateni," o na qai vunitaki iko ena vei qara mai vei ira na kemu meca.
12 A nomu koro ni valu sa vaka na vu ni lolo sa matua tu na vuana: kevaka me dua e yavalata, era na lutu kina gusu sa tadola tu me kania.
13 O ira na tamata vei iko era sa yalewa kece ga! Na matamata ni nomu koro sa dolavi tu ga me ra curuma na meca; ka ena kama yavu na duru kaukauwa ni nomu matamata.
14 Takiva rawa na wai mai na tobu! Ni sa tuvaivalutaki na nomu koro kaukauwa! Taura na kuro sa buli oti ka vakayagoyagotaka vinaka! Ka vakaukauwataka ena vatu sa tavu!
15 Ka ena vakaleqai iko na kama, kei nai seleiwau; era na kanikani laki iko vaka na vodre. Ka mo vakalewelevu taki iko—me vaka nai wiliwili ni vodre! Ka mo vakalewelevu taki iko— me vaka na vodre dau veivukayaki!
16 O sa vakalewevuqataka na nomu dau veivoli me vaka na kalokalo ni lomalagi. Era na vuka mai vaka na vodre ka lesu tale yani.
17 O ira na nomu turaga ni valu era sa vaka nai wiliwili ni vodre vei vukayaki, kei ira na nomu turaga lelevu cake ni valu era sa vaka nai wiliwili ni yavusa vodre, ka ra mai vakavale vaka voleka ena gauna ni batabata, ni cadra na siga era na dro yawa, ka sega ni kilai nodra i tikotiko.
18 Tui Asiria, o ira nomu i vakatawa era sa moce; nomu qaqa era sa bale sobu kina qele, o ira nomu tamata era sa dui veiseyaki kina veiulunivanua, ka sega e dua me kauti ira mai.
19 Ena sega ni o na vakabulai rawa mai na nomu mate, ka o sa mavoa sara vaka ca. O ira kece era na rogoca na kemu i rogorogo, era na vakasausau, ka ni sega ni dua me tarai koya na ka e yacovi iko?