Apakuki

1 2 3


Chapter 1

1 Na veika e veivakaocai sa raica o Apakuki na parofita.
2 I Jiova, a cava na kena dede me'u tagi tiko kina, ka mo ni qai sega ni rogoca tiko? Au a vakaraitaka yani vei kemuni na levu ni "valavala kaukauwa!" Ka o ni sega ni bau via veivuke mai.
3 A cava mo ni vakaraitaka kina vei au na levu ni caka cala, ka mai vakavuna vei au me'u raica kina na leqa? Ka sa tu ga e mataqu na veika rarawa kei na vakayacoi tovo kaukauwa; ka sa levu tikoga mai na veileti kei na veitawasei.
4 O koya oqo sa malumalumu kina nai vunau, ka sa sega ni vakayacori vakadodonu na lewa dodonu ka ni lewe lailai na tamata dodonu, ka e lewe levu na tamata i valavala ca; ka e sa na vakamuri na lewa ca ni ra lewe levu na kena i to.
5 "Mo raici ira vakavinaka sara na veimatanitu —ka o na kidacala kina! Au na cakava e dua na cakacaka ena nomudou gauna, ka o na sega ni vakabauta, dina ni o sa rogoca oti ni tukuni vei iko.
6 Oqo dina Au na vakauqeti ira na kai Kalitia, na matanitu dau veivakararawataki ka sega ni dau soro, ka era lakova na veiyasa ni vanua e vuravura ka taura vakaukauwa na veivanua e sega ni nodra.
7 Era vakarerevaki ka kaukauwa; na nodra lewa kei na nodra kaukauwa era rawata ga mai vei ira.
8 Na nodra ose e totolo ka bera na lepate, ka era kata gaga ka rerevaki mai na wolifa. Ni ra sa cici mai e sega tale ni dua na ka me dro bula; era sega ni via kila na yawa ni vanua; ka e sega ni rawa ni vakadaroi na nodra i naki ni ra sa lako mai; ka vaka nai keli ni via kana me vakasaqaqara kakana me kania.
9 "Ni ra sa lako mai era vinakata na vala; ka e sa vakarau tu kina na yagodra taucoko me vaka na cagi Tokalau. Era taura na tamata me vaka na sokumuni ni nuku.
10 Ka era vakalialiai ira na veitui eso, ka vakasesewani na kena vei mata turaga. Na veikoro ni valu kaukauwa e ka walega vei ira – ka era cavuta ka kumuna vata ka vakarusa sara.
11 Sa qai veisau na lomana me viavialevu ka caka cala kina, ka vakalevulevui kina na nona Kalou ni sa vuni nona qaqa."
12 Kemuni Jiova na Noqu Kalou na Noqu le dua yalosavasava, o Ni a sega beka ni bula tiko mai ni se bera nai vakatekivu? Keimami na sega ni mate Kemuni Jiova o ni a lesi ira me ia na veicudruvi; oi kemuni na uluvatu, o ni a vakauqeti ira mera kitaka na veivunauci.
13 Sa savasava na matamuni; ka sa dredre kina mo ni vakaraica na ca, na cava o ni vakayacora kina na rarawa vei ira na tamata ca. O ni qai galu ena gauna era kune ka rarawa tiko kina na tamata, ka bau vinaka cake kina nodra na bula mai vei koya e veivakamatei tiko?
14 A cava koni vakatara kina na tamata me vaka na ika ni wasawasa, ka vaka na manumanu sa sega ni lewai koya rawa?
15 Era vesuki taucoko mai vaka na siwati ni ika, ka tobo me vaka na ka e rawati ni coko ena lawa, ka era qai yarataki vata i loma vaka na ika ena lawa, ka era marau vakalevu sara ena vuku ni ka oqo.
16 O koya oqo era sa qarava ga kina na nodra lawa ena veika era vakayacora, ka vakacabora nai soro kama kina nodra lawa ni taga. Baleta ni a vakaiyautaki ira ka vakani ira.
17 Era na ceburaka ka vakasavasavataka na nodra lawa, ka tomana tikoga na veivakamatei kina veimatanitu eso ka sega ni bau via loloma?


Chapter 2

1 Ena noqu i tutu vaka i vakatawa au na tu ga, ka au na tikoga ena dela ni bai kaukauwa; ka au na vakatawa tiko me'u raica na ka ena tukuna mai vei au o koya, kei na ka me'u tukuna yani niu sa vakadodonutaki.
2 A sa tukuna mai vei au o Jiova: "Mo vola na raivotu me macala ena vava ni volavola, ka me matata vinaka vei koya e wilika.
3 Ka ni sega ni vakataudeitaki vinaka na siga sa lokuci ena vuku ni raivotu; ia na kena i cavacava ena qai tukuni koya ga mai ka sega ni na lasu. E dina ni na bera vakalailai, ia mo waraka ga; ena vakayacori dina ga.
4 "Raica o koya sa viavialevu sa sega ni dodonu na yalona e lomana; ia o koya ga sa yalododonu ena bula ena nona vakabauta.
5 "Sa basika na dokadoka vei koya na tamata ca, ka ni sa vakacalai koya tu na waini, ka sega kina ni rawa vua me dabe dei e vale. A sa guta vakalevu na yalona na veika vakasisila, ka sa tautauvata kei mate ni sega ni vakacegu rawa, sa vakasoqona na veimatanitu kei ira kece na veimata tamata.
6 "Era na sega beka ni cavuta mai e dua na vosa vaka i balebale, ka me dua na kena vosa ni veitabaki sobu, me tukuna vaka oqo, 'ena ca o koya sa vakalevutaka na ka sa sega ni nona - a cava sara na kena dede? Kei koya ka dau yalayala lasu'?
7 Ena sega beka ni tucake mai vakasauri o koya sa dau solia nai yau? Kei koya talega na dauveivakasaurarataki me tauri kemudou? Dou na qai yaco me nodra bobula ka tauri kemudou? Ka dou na qai yaco me nodra bobula.
8 Ena vuku ni nomu vakasaurarataki ira na veimatanitu, era na mai yanaraki iko o ira era vo mai na vei mataqali, ena vuku ni vakadavedra kei na vakayaco tovo kaukauwa ena vanua, kei na veikoro, kei ira era tiko kina.
9 "Ena ca o koya sa kocova nai yau me rawa kina na nona tiko vinaka, ka me laveti cake kina na nona i tikotiko, ka me rawa ni taqomaki koya ena siga ni veika rarawa!
10 O sa vakatura tiko e dua na ka mera na madua kina na nomu vuvale, o sa vakaleqai ira tiko kina, o sai valavala ca mo vakaivalavala ca taka kina na yalomu.
11 Na vatu ena kaci mai ena lalaga e tu kina, kei na kau ka taura tu nai vakadei ni vale ena rogoci koya yani.
12 "Ena ca o koya e tara cake na i tokatoka ena vakadavedra kei na koro ena caka ca!
13 Raica, e sega ni dau vaka kina o Jiova ni lewe vuqa me dau vakaocai ira vakararawa na tamata, kei na nodra vakaocai na veimatanitu ena ka e sega ni dua na kena yaga?
14 Ena vakasinaiti o vuravura ena nodra kila nai ukuuku i Jiova, me vaka na kena vakasinaita na wasawasa na wai.
15 "Ena ca o koya e solia na waini vua na kai nona, ka vakasaurarataki koya me taura na tavaya ka gunuva maca sara, ka me rawa ni raica kina na nona luvaiwale!
16 O sa luvuci tu ena madua ka dodonu mo vakasinaiti tu ena lagilagi ni Kalou. E rairai o a - gunu! O vakaraitaka kina na nomu sega cili! Na bilo ena ligai matau i Jiova ena sovaraki vei iko, na nomu lagilagi ena vuni nomu madua.
17 Ena tarai iko mai nai vakarau kaukauwa ka a yaco mai Lepanoni; ena nodra vakarerei ira na manumanu kila ena vuku ni dra ni tamata ni ra sa boica, kei na i tovo kaukauwa ka yacovi ira, mai vei ira na dauvakasaurara.
18 "A cava mada e kauta mai na matakau ka me ceuti kina vei koya na dauceuceu? Na matakau kai vakatakarakara e ka lasulasu, me dau vakabauti tiko ena kena dau qaravi, ka o koya mada ga e sega ni rawa ni vosa mai?
19 Ena ca o koya e dau vosa tiko kina ka mate o ya, 'mo yadra mai!' Ka dau vosa tale tikoga kina vatu, 'mo tucake! Ka vunau!' E vutucoqa na domo kei na liga ni matakau ena i ukuuku talei sara, ia ka e sega mada ga ni cegu rawa.
20 "Ia o Jiova sa dau tiko ena nona vale tabu. Ka me cuva ena vakarokoroko vua o vuravura kecega."


Chapter 3

1 Na masu i Apakuki na parofita, me baleti Sikinoce.
2 I Jiova, au a rogoca na domomuni au a qai rere; I Jiova, mo ni vakabulabulataka mada na nomuni cakacaka ena veimama ni gauna oqo! Ena veimama ni gauna oqo mo ni vakatakila me kilai; ka ni kemuni sa na cudru mo ni kua ni guilecava ga mo ni yalololoma tiko.
3 Sa lako mai Temani na Kalou, o koya na yalosavasava mai na ulunivanua o Perana-Sela. Sa ubia na lomalagi na nona i ukuuku, kei na vuravura sa sinai ena vakavinavinaka.
4 Na nona i serau sa ka e rarama sara; ka vakatakilai mai na i serau ena ligana, ka ni vuni tu kina na nona kaukauwa.
5 E liu tiko vua na mate dauveidewavi ka muri koya tale tikoga mai.
6 E tu o koya ka vakarautaki vuravura; me raica me vakayavalata. Era na qeqera sobu kina na veiulunivanua lelevu, era na vakalolovirataki sobu na veidelana na nona cakacaka e sega ni rawa e dua me tarova.
7 Au raica na vale laca mai Kusani ni sa basuraki sobu; nai rairai totoka kei Mitiani sa vakacacani.
8 I Jiova kemuni sa sega ni taleitaka na veiuciwai, o ni sa cudruva na uciwai kei na wasawasa, mo ni vodoka lako kina na ose kei na qiqi ni valu dau veivakabulai?
9 O ni sa vakarautaka oti tu na nomuni dakai titi; ka o ni sa bubului oti tu kina nomuni gasau. Kemuni a wasea na vuravura mera veiucuwai. Sela
10 Ni ra raici kemuni na veiulunivanua era sa sautanini ga; kei na kena kui kaukauwa na wai. E voqa yawa sara na kena rorogo ka vakayacora me laveti cake ga kina na liga.
11 Na matanisiga kei na vula e rau sega ni toso rawa ena vanua e rau cila tiko mai kina; ka rau qai toso ga ni sa cilavi rau yani na kaukauwa ni rarama e tiko ena nomu gasau; kei na nomu moto ni rau sa vukayani.
12 O ni lakova yani na vuravura ena yalokatakata; ka yavalata na veimatanitu ena nomuni rarawa.
13 O ni a lako talega yani ena vukudra na nomuni tamata mera vakabulai, kei ira o ni a lumuta. O ni a vakamatei ira na nodra i liuliu na mataqali dauvuki vaka tani, ka ena nomuni vakamalumalumutaka na vanua edau kaukauwa kina. Sela.
14 O ni vukica lesu tale na gasau me vuka lesu tale vei ira na nodra i liuliu ni mataqali. Ka era qai lako mai vaka na covulaca mera vakarerei au; na nodra marau mai sa qai vuki me vakaloloku.
15 O ni a lako ena loma ni wasawasa kei na nomuni ose, ena maliwa ni ua lelevu.
16 Au a rogoca, ka rise na bati ni ketequ; ka sega ni matata na gusuqu ena kena rorogo; ka sa vaka na sui vuca na noqu sui ni sa sega ni taura rawa na levu ni sautaninini, io au na vakacegu ga ena siga ni veika rarawa, ena nona na lako mai vei ira na lewe ni vanua, ena vakayagataka o koya na nona mataivalu.
17 E dina ni ra na sega ni seraki na lolo, ka sega ni vua mai na vaini, ka sega ni solia mai na vuni olive na kena i lumu talei; kei na qele sa sega ni vakalewe vinaka kina na kakana; ka sa yali eso na sipi vei ira na qele ni sipi, kei na bulumakau e ra sa yali taucoko ena kena bai.
18 Io, au na rekitaki Jiova tikoga, au na marautaki koya ni o koya ga na noqu Kalou ka noqu i vakabula.
19 Na Kalou o Jiova sa vuni noqu kaukauwa; ka ena vakayacora na yavaqu me vaka na yava ni dia, ka ena keveti au o koya me'u lakova na noqu veidelana cecere. Kivei koya na dauniserelevu ka'u na kauta kina na noqu i yaya ni vakatagi.