Akeai

1 2


Chapter 1

1 E nai karua ni yabaki nei Taraiasi na Tui, e na i ka ono ni vula, ena matai ni siga ni vula, sa yaco mai na vosa i Jiova vei Akeai na parofita me baleti Serupepeli na luvei Sialitieli na kovana kei Juta, kei Josua na luvei Josateki na bete levu ka tukuna mai,
2 "Sa vosa o Jiova, ka vaka, 'era sa tukuna na tamata oqo, "se sega ni kena gauna oqo me tara kina na vale i Jiova."'"
3 A sa yaco mai na vosa i Jiova vei Akeai na parofita ka vaka,
4 "Sa kena gauna beka mo dou tiko ena veivale vivinaka, ia na Noqu vale me sa rusa laivi ga?"
5 O koya oqo sa tukuna o Jiova ni lewe vuqa: "Dou raica mada na nomudou i valavala!
6 "Dou sa kaburaka vakalevu, ia dou sa kumuna vakalailai ga; dou sa kana ia sa sega ni levu na kakana; dou sa gunu, sa lailai ga na ka me gunuvi; dou sa vakaisulu, sa sega ga na katakata; vei kemudou sa vaka i lavo tiko, dou sa biuta tikoga ki na taga sa kabasu tu."
7 Sa tukuna vaka oqo o Jiova ni lewe vuqa, "Dou raica mada na nomudou i valavala!
8 "Dou lako cake ki na ulunivanua ka kauta sobu mai na kau ka tara na noqu vale, me'u marau kina ka vakacerecerei kina," sa tukuna o Jiova.
9 "Dou sa vakasaqara me levu, ia e lailai ga sa kune, ni dou sa kauta mai vale na ka sa kune, ka au sa uvuca tani, baleta li na cava." Sa tukuna o Jiova ni lewe vuqa, "Ni sa rusa tiko na noqu vale, ka dou sa dui cici ga ki na nona dui veivale.
10 "O koya oqo sa tasogo kina o lomalagi ena kena tegu, kei vuravura sa tasogo tu ena kena vuata.
11 "Ka au sa kaciva na lauqa me lako mai, ka me tara na qele, na veiulunivanua, na sila, na waini vou, na waiwai, kei na veika kecega sa kauta mai na qele, na tamata, na manumanu kecega kei na veika kecega sa oca kina na ligamu."
12 O Serupepeli na luvei Sialitieli kei Josua na luvei Josateki na bete levu kei ira kece na tamata sa vo, e ra sa talairawarawa ki na domo i Jiova na nodra Kalou, kei na vosa i Akeai na parofita, me vaka sa talai koya mai kina na Kalou o Jiova. Era sa rere na tamata ena i Serau i Jiova.
13 O Akeai nai talai ni Kalou, sa tukuna ga na veika e a talai kina, ka vaka, "Au sa tiko vata kei kemuni, sa tukuna oqo o Jiova na Kalou."
14 Ka sa yavalata na yaloi Serupepeli na luvei Sialitieli na kovana kei Juta kei na yaloi Josua na luvei Josateki na bete levu kei na yalodra kece sa vo vei ira na tamata; ka era sa qai lako mai ka cakacaka ena kena tara na vale i Jiova ni lewe vuqa na nodra Kalou,
15 E nai ka ruasagavulu ka va ni siga e nai ka ono ni vula, ka i ka rua ni yabaki nei Taraiasi na Tui.


Chapter 2

1 Ena i ka vitu ni vula, nai ka ruasagavulu ka dua ni siga ni vula, sa yaco mai na vosa i Jiova vei Akeai na parofita ka vaka:
2 Mo vosa vei Serupepeli na luvei Sielitieli na kovana e Juta kei Josua na luvei Josateki na bete levu, ki vei ira talega na kena vo vei ira na tamata, ka vaka:
3 'O cei sa vo veikemuni, e a raica na totoka ni vale oqo ena gauna e liu? Kei na kena duidui ena gauna oqo? Ni o ni sa raica, sa sega beka ni dua na ka veikemuni oqo?
4 'Ia, oqo mo kaukauwa Serupepeli,' sa tukuna o Jiova; 'Mo kaukauwa Josua na luvei Josateki na bete levu; mo ni kaukauwa na tamata kecega ena vanua', sa tukuna o Jiova, 'mo ni cakacaka ka tara na vale, Ni'u sa tiko vata kei kemuni', sa tukuna o Jiova ni lewe vuqa.
5 'Me vaka na vosa ka'u a veiyalayalati kina kei kemudou ena gauna dou a lako tani mai kina i Ijipita, sa vaka kina, Na Yaloqu sa tiko vata ga kei kemudou, sa tukuna o Jiova ni lewe ni vuqa!'
6 "Sa tukuna o Jiova ni lewe vuqa, 'Vakadua tale (ena dua na gauna lekaleka mai oqo) Au na vakayavalati lomalagi kei vuravura, na wasawasa kei na vanua mamaca;
7 'Au na vakayavalata na ka sa dau vinakati ena veimatanitu kecega, Au na vakasinaita kina na vale oqo ena i ukuuku ni Kalou,' sa tukuna oqo o Jiova ni lewe vuqa.
8 'Sa noqu na siliva, na koula sa noqu talega,' sa tukuna o Jiova ni lewe vuqa.
9 'Nai ukuuku ni vale oqo e muri ena uasivi sara mai ena kena e liu sa tukuna o Jiova ni lewe vuqa,' 'ka ena vanua oqo Au na ia kina na veivakasaututaki,' sa tukuna o Jiova ni lewe vuqa."
10 Ena i ka ruasagavulu ka va ni siga nai ka ciwa ni vula, ena i ka rua ni yabaki ni lewa i Taraiasi na Tui, sa yaco mai vei Akeai na parofita na vosa i Jiova ka vaka,
11 "Sa tukuna o Jiova ni lewe vuqa: 'mo tarogi ira na bete me baleta na i vunau sa tukuni kina,
12 "Kevaka e dua sa kauta vuni na i soro tabu lewe ni manumanu ena i lobi ni nona i sulu, ka sa tara na madrai se, na vakarakara, se na waini, se na waiwai, se dua tale na kakana, e na savasava beka me ka tabu tikoga?"'" Sa sauma mai na bete ka vaka "sa sega".
13 Sa taro o Akeai ka vaka, "Kevaka sa tauvi duka e dua ka ni sa tara na yago mate na veika oqori, e na sega ni savasava li?" Sa sauma na parofita ka vaka, "ena sega ni savasava."
14 Sa qai sauma tale o Akeai ka vaka, "'Sa vaka kina na matanitu kei ira na lewena e mataqu,' 'na cakacaka kece ni ligadra kei na ka kece era vakacabora se sega ni savasava.
15 'Oqo mo dou qarauna vaka vinaka, dou vakananuma mai na gauna oqo ka lako yani: ni se bera na kena veitaqataqari na vatu ena vatu ni vale i Jiova –
16 'Mai na siga o ya, dou veidutaitaka mada, ni dua sa lakova mai e ruasagavulu nai vakarau sila sa sega ga e tini, sa vaka kina na waini, me limasagavulu nai vakarau sa ruasagavulu ga.
17 'Au a samuti kemudou ena cagi todra kei na bokata kei na cavulaca ena cakacaka kecega ni ligamudou, ia dou a sega ga ni lesu mai vei Au, 'sa tukuna o Jiova.
18 'Dou vakananuma mada mai na gauna oqo ka lako yani. Nai ka ruasagavulu ka va ni siga ni ka ciwa ni vula, mai na siga sa tekivu kina na yavu ni vale i Jiova – vakananuma tiko o ya:
19 'Se tiko beka nai tei ena lololo? Na vaini, na lolo, na pomekaraneti kei na olive era sa sega ni vua. Ia, mai na siga oqo ka lako yani, Au na vakalouvinakataki kemudou.'"
20 Sa qai yaco tale mai na vosa i Jiova vei Akeai, ena i ka ruasagavulu ka va ni siga ni vula, ka vaka,
21 "Vosa vei Serupepeli na kovana e Juta ka tukuna.
22 'Au na yavalati lomalagi kei vuravura Au na vuaviritaka na veiliutaki ni matanitu, Au na vakarusa na nodra kaukauwa na matanitu tani Au na vuaviritaka na qiqi ni valu kei ira sa vodo tiko kina, na ose kei ira sa vodoka, kei ira kecega ena i seleiwau i tacina.
23 'Ena siga o ya sa tukuna o Jiova ni lewe vuqa,' 'Au na kauti iko Serupepeli, Na noqu tamata, na luvei Sialitieli', sa tukuna o Jiova, 'Au na buli iko mo vaka nai vakatakilakila e veivakatakilakilataki, ka Ni'u sa digitaki iko,' sa lewa oqo o Jiova ni lewe vuqa."