Joni

1 2 3 4 5 6 7 8 9 10 11 12 13 14 15 16 17 18 19 20 21


Chapter 1

1 Sa bula tiko na Vosa, qai yaco na i tekitekivu, na Vosa sa tiko vata kei na Kalou, na Vosa ga, o ya na Kalou.
2 Sa tiko vata kei na Kalou mai na i tekitekivu.
3 Sa buli na ka kecega mai vei Koya, ke sega o Koya sa sega na ka e buli me buli rawa.
4 Sa tu Vua na bula, na bula oqo sa rarama kina na tamata.
5 Sa cila yani na rarama ki na butobuto, ia, na butobuto sa lecaikataka ga.
6 Sa tala mai e dua na tamata na Kalou, na yacana o Joni.
7 Sa lako mai na tamata oqo mei vakadinadina, me vakadinadinataka na Rarama, me rawa kina ni ra vakabauta na Rarama ena vukuna.
8 Sa sega ni Rarama o koya, sa talai ga mai, me mai vakadinadinataka na Rarama.
9 Na Rarama dina ga oqo, ni sai Koya sa vakararamataki ira na tamata, o ira kece sa lako mai ki vuravura oqo.
10 Sa tiko e vuravura na Rarama, sa caka o vuravura mai vua na Rarama, ia na vuravura sa sega ni kila na Rarama.
11 Na Rarama sa lako mai vei ira na Nona, o ira na Nona era sa sega ni via ciqomi Koya na Rarama.
12 Vei ira vakayadua sa ciqomi Koya na Rarama, sa soli vei ira na dodonu me ra luve ni Kalou, vei ira yadua sa vakabauta na yacana:
13 O ira sa sucu, sega ena dra se ena lewa vakayago, se ena lewa ni tamata, ena lewa ga ni Kalou.
14 Sa yaco me tamata na Vosa, ka sa mai tiko vata kei keda, ka keitou sa raica na Nona i ukuuku ni luvena e dua bauga mai vei Tamana, sa sinai sara ena yalololoma kei na dina.
15 Sa vakadinadina o Joni ena vukuna ka sa kaci yani ka vaka: "Sai Koya oqo au sa dau tukuna, o Koya sa muri au mai, sai Koya dina e dodonu me gadrevi, ni sai Koya sa liu ka Levu vei au."
16 Eda sa ciqoma na Nona taucoko, mai na loloma ki na yalololoma.
17 Ni sa soli mai na i Vunau ena vukui Mosese, ia na yalololoma kei na dina ena vukui Jisu Karisito.
18 Sa sega sara e dua sa raica na Kalou, ena dua na gauna. Na Luvena e duabau ga, o Koya sa tiko ena lomaserei Tamana, me vaka sa vosa kina o Tamana ena Vukuna.
19 Oqo na tukuniyalo nei Joni, ni ra sa vakatalai yani na bete kei ira na Livai mai Jerusalemi me tarogi koya ka vaka: "O cei sara mada o iko?
20 Sa vakatusa, ia, sa sega ga ni vakacala, sa vakaraitaka ga "Ni sa sega ni'u Karisito."
21 Era sa tarogi koya tale? "O iko beka o Ilaijia?" "Sa tukuna ni sa sega." "Sai iko beka na parofita?" Sa sauma tale ni "Sega."
22 Era sa qai tukuna vua, "O iko ga o cei?, me dua kina na ka me keitou tukuna vei ira sa talai keitou mai? Na cava o na tukuna me baleti iko?"
23 Sa qai sauma: "Oi au e dua na domo sa kacikaci tiko ena loma ni vanua, mo ni vakadodonutaka na sala i Jiova."
24 O iratou sa vakatalai mai vei ira na Farisi.
25 E ratou sa vakatataro ka vaka: "Na cava ga o sa veipapitaisotaki tiko kina, kevaka o sa sega ni Karisito, se o Ilaijia, se na parofita?"
26 Sa sauma o Joni ka vaka: "Au sa veipapitaisotaki ena wai, e dua sa tucake tu ena kemudou maliwa, dou sa sega ni kila.
27 O Koya ga sa muri au tiko mai oqo e dodonu mo ni gadreva ka sega ni oi au, sa rui levu o Koya, na wa mada ga ni nona i vava e sega ni dodonu me'u sereka, ni'u sa rui torosobu sara.
28 Na veika oqo sa caka tiko mai Becibara ena tai kadua ni Joritani, na vanua sa veipapitaisotaki tiko kina o Joni.
29 Ena siga ka tarava sa raici Jisu o Joni ni sa lako tiko mai vua, ka tukuna, "Raica na Lami ni Kalou, sa kauta tani na nodra i valavala ca na kai vuravura!
30 "Sa i Koya ga oqo au sa dau tukuna tiko, ni sa dua sa muri tiko mai, sa gadrevi vakalevu cake vei keirau, ni sa liu ka Levu vei keirau o Koya.
31 "Au sa sega ni kilai koya; ia, sa dodonu me vakaraitaki o Koya vei ira na Isireli, au sa lako mai kina oqo me veipapitaisotaki ena wai."
32 Sa tukuna kina o Joni, "Au sa raica na Yalo Tabu sa lako sobu mai lomalagi me vaka na ruve ka sa mai toka ga Vua.
33 "Au sa sega ni kilai Koya, o Koya ga sa talai au mai me'u veipapitaisotaki ena wai sa tukuna vei au, "O Koya ga o sa raica ni sa lako sobu mai vua na Yalo Tabu ka sa mai toka Vua, sai Koya oqo sa dauveipapitaisotaki ena Yalo Tabu."
34 "Au sa raica ka vakatusa ni sai Koya oqo na Luve ni Kalou.
35 Ena siga tale ka tarava, sa tucake tu o Joni kei na rua na nona tisaipeli.
36 Sa vakaraici Jisu ni sa lako voli, sa tukuna mai, sa dina, na "Lami ni Kalou."
37 E rau sa rogoci koya na nona tisaipeli ni sa vosa tiko, e rau sa muri Jisu sara.
38 Sa vuki mai o Jisu ka raici rau ni rau sa muri koya tiko, sa tarogi rau, "Na cava drau sa vakasaqara" e rau sa sauma, "Rapai, (qasenivuli) o ni sa tiko mai vei?"
39 Sa sauma vei rau o Jisu, "Drau lako mai mo drau mai raica." E rau sa lako mai me rau mai raica na vanua e sa tiko kina, rau sa tiko vata kei koya ena siga o ya (oqo sai ka tini ni auwa).
40 E dua vei rau sa rogoci Joni ni vosa tiko o Adriu, na taci Saimone Pita, sa muri Jisu sara.
41 Sa raici tacina o Saimone ka tukuna vua, "Keirau sa raica na Mesaia" (na Karisito).
42 Sa kauti koya sara mai vei Jisu, ni sa raici koya o Jisu, sa tukuna, "O iko o Saimone na luvei Jona. O sa vakatokai me "Kifa", na kena i balebale na "Vatu".
43 O Jisu, ena siga ka tarava sa via lako ki Kaleli, sa raici Filipe sara ka tukuna vua, "Muri Au mai."
44 O Filipe oqo sa lako mai Pecisaita na koro nei Adriu kei Saimone Pita.
45 O Filipe sa kunei Nacanieli ka sa tukuna sara vua, "Keirau sa kunei Koya sa vosa kina o Mosese ena i vunau, ka era sa volai Koya talega na parofita – Jisu na kai Nasereci na luvei Joseva."
46 Sa tukuna o Nacanieli, "E rawa beka ni dua na ka vinaka me lako mai Nasareci?" Sa sauma o Filipe, "lako mada ga mai mo mai raica."
47 Sa raici Nacanieli o Jisu ni sa lako tiko mai ka sa tukuna sara yani vua, "Raica, sa dua na Isireli dina oqo, ni sa sega vua na veivakaisini."
48 Sa taro yani o Nacanieli, "O ni sa kilai au vakacava?" Sa sauma o Jisu ka vaka: "ni se bera ni kacivi iko o Filipe, Au sa raici iko oti ni o tiko ena ruku ni vu ni lolo."
49 Sa vosa o Nacanieli ka vaka, "Rapai, o ni sa Luve ni Kalou! O ni sa Tui, ka nodra Tui na Isireli!"
50 Sa sauma o Jisu ka tukuna vua, "Baleta ga Ni'u a tukuna vei iko, Ni'u a raici iko ena ruku ni Vu ni lolo, o sa qai vakabauta kina? O na raica na veika lelevu mai na kena oqo."
51 Sa qai tukuna tale, "Sa dina taucoko oqo, Au sa tukuna vei iko, ni sa na oti oqo, o na raici lomalagi ni sa tadola mai, o na raici ira na Agilosi ni Kalou ni ra sa lako cake ka lako sobu mai vua na Luve ni Tamata."


Chapter 2

1 Ena i katolu ni siga, sa dua kina na vakamau mai Kena e Kaleli, sa tiko talega e kea na tinai Jisu.
2 O Jisu kei iratou talega na Nona Tisaipeli era sa sureti ki na vakamau oqo.
3 Ni sa oti na waini, sa tukuna mai na tinai Jisu, "sa oti na waini vakarautaki."
4 Sa tukuna vua o Jisu, "yalewa, na cava oqo o sa leqataka, me mai dua kina na ka vei au? E se bera tiko ni yaco mai na Noqu gauna.
5 Sa tukuna o tinana vei ira na dauveiqaravi, "Na veika ga sa tukuna vei kemudou o Koya dou cakava.
6 Sa vakarautaki tu e kea e ono na saqa ni wai, me vaka na nodra i vakarau na Jiu, na veisoqo vaka o ya sa dau rawa ni sega kina e ruasagavulu se tolusagavulu na qaloni na wai.
7 Sa tukuna vei ira o Jisu, "Me vakatawani na saqa oqori ena wai." Era sa vakatawana ga me sinai vutuvutu.
8 Sa tukuna tale vei ira, dou takiva mai eso, ka kauta vua sa lewa tiko na soqo. Era sa cakava sara.
9 Ni sa tovolea na wai o koya sa liutaka tiko na soqo, sa waini mai, sa sega ni kila se sa caka vakacava, o ira ga sa kauta mai, era sa kila. Sa kaciva mai na tagane sa qai vakawati, na dauveiqaravi sa lewa na soqo.
10 Sa tukuna vua, "E na i vakatekivu ni soqo sa vakarautaki na waini vinaka, ni ra sa mamarau ena nodra gunu na vulagi, ia, o sa qai maroroya na waini vinaka sara e muri oqo."
11 Oqo nai vakatekivu ni veika lelevu sa cakava o Jisu mai Kena e Kaleli, ka sa vakaraitaka na Nona i ukuuku; era sa vakabauti Koya na Nona tisaipeli.
12 Ni sa oti oqo, sa lako sobu ki Kapenaumi o Jisu. O Koya, na Tinana, ratou na Tacina kei ira Nona tisaipeli; era sa sega ni tiko me dede sara.
13 Sa yaco mai na siga ni nodra Lakosivia na Jiu, ka sa lako cake ki Jerusalemi o Jisu.
14 Sa raica o Koya ena valenisoro, ni ra sa volitaka tiko na bulumakau, na sipi, na ruve, na veisau i lavo kei na vaqara i lavo.
15 Sa cakava e dua na wa tali me kuita, ka qai cemuri ira kece tani mai na vale ni soro, vata kei na sipi kei na bulumakau ka qai ceburaka na i lavo kece ni veisau ka vakatoboicutaka talega na kena teveli.
16 Sa tukuna vei ira sa volitaka tiko na ruve, "Dou kauta tani na veika oqo! Dou kua ni cakava na Vale nei Tamaqu, me vale ni veivoli!"
17 E ratou sa qai nanuma na tisaipeli ni sa volai tu "Na loma katakata ni Nomuni Vale sa kani Au."
18 Era sa sauma na Jiu ka tukuna vua, "Na i vakatakilakila cava o ni sa vakaraitaka vei keimami, ena gauna o ni sa cakava kina oqo?"
19 Sa sauma o Jisu ka tukuna vei ira, "Vakarusa na valenisoro oqo, ena tolu tale na siga Au na vakaduria cake tale."
20 Era sa tukuna na Jiu, "E vasagavulu ka ono na yabaki e tara kina na vale oqo, ia, o sa tukuna ni ra vakaduri cake me tolu ga na siga?"
21 Ia, sa tukuna tiko ga o Koya, ni, yagona sa valenisoro o ya.
22 O koya oqo, ni sa tucake tale mai na mate o koya, era sa qai nanuma na Nona tisaipeli ni sa tukuna vei ira o Koya na veika oqo; era sa vakabauta kina na i Vola Tabu kei na vosa sa tukuna o Jisu.
23 Ni sa tiko o Koya mai Jerusalemi ena "Lakosivia," sa levu sara sa vakabauta na Yacana ena vuku ni veika sa cakava.
24 Sa sega sara ni via vakadeitaki Koya o Jisu vei ira, baleta ni sa kilai ira vinaka,
25 ka sa sega talega ni gadreva me dua e tukuni koya vei ira na tamata, ni sa kila na cava sa tu vei ira na tamata.


Chapter 3

1 Sa dua vei ira na Farisi, sa daulewa vei ira na Jiu, na yacana o Nikotimo.
2 Na tamata oqo sa lako mai vei Jisu ena bogi ka tukuna Vua, "Rapai, keimami sa kila ni Kemuni sa dua na qasenivuli sa lako mai vua na Kalou; ni sa sega ni dua e cakava rawa na veika o ni sa cakava, vaka vo, kevaka sa tiko vata kei koya na Kalou."
3 Sa sauma o Jisu, "Sa dina sara, Au sa tukuna vei iko, vakavo me sucu tale na tamata, ena sega ni raica na matanitu ni Kalou."
4 Sa taro o Nikotimo, "Me sucu tale vakacava na tamata ni sa qase mai? E rawa beka ni curu tale vakarua ki na kete i tinana me qai sucu tale mai?
5 Sa sauma o Jisu, "Sa dina sara, Au sa tukuna oqo vei iko, vakavo kevaka sa sucu e dua ena wai kei na Yalo Tabu, ena sega ni rawa ni curu ki na Matanitu ni Kalou.
6 "O koya sa sucu ena yago sa vakayago, o koya sa sucu ena Yalo sa vakayalo.
7 "Kakua ni kidacala Ni'u sa tukuna vei iko, mo sucu tale.
8 "Sa liwa na cagi ena vanua sa via liwa kina, o sa rogoca na kena rorogo, o sa sega ni kila se sa lako mai vei. Sa vakakina o ira sa sucu ena Yalo."
9 Sa sauma yani o Nikotimo ka vaka: "Sa rawa vakacava oqo?"
10 Sa sauma vua o Jisu ka tukuna, o sa dua vei ira na qasenivuli e Isireli, ia, o sa sega ni kila na veika vakaoqo?
11 "Sa dina sara, Au sa tukuna vei iko, eda sa vosataka na veika eda kila, ka tukuniyalotaka na veika eda raica, ia, o iko, sa sega ni via ciqoma na neitou i vakadinadina.
12 "Kevaka Au sa tukuna vei kemudou na veika vaka vuravura ia, dou sa sega ni via vakabauta, dou na qai vakabauta vakacava kevaka Au sa na tukuna vei kemudou na veika vakayalo?
13 "Sa sega e dua sa lako cake ki lomalagi, o Koya ga sa lako sobu mai lomalagi, oqori na luve ni tamata o Koya sa tiko mai lomalagi.
14 Io, me vaka sa laveta cake na gata mai veikau o Mosese, sa dodonu me laveti cake vakakina na luve ni tamata,
15 ni o ira vakayadua ga sa vakabauti Koya era na sega ni rusa, era sa rawata ga na bula e sega ni mudu.
16 "Ni sa lomani vuravura na Kalou, sa solia kina na Luvena e dua ga, ni o koya vakayadua ga sa vakabauti Koya, ena sega ni rusa, sa na rawata ga na bula e sega ni mudu.
17 "Sa sega ni tala mai na Luvena ki vuravura na Kalou me vakarusa, me vakabula ga na vuravura ena vuku ni Yacana.
18 'O koya sa vakabauta na Luvena, sa sega ni vakarusai, ia o koya ga sa sega ni vakabauta ena rusa vakaidina baleta ni sa sega ni vakabauta na yaca ni Luve ni Kalou.
19 'Oqo na nodra vakarusai, ni sa lako mai ki vuravura na rarama, na tamata era se vinakata ga na butobuto ka sega ni rarama, baleta ga ni sa ca tikoga na nodra i valavala.
20 'O ira vakayadua sa cakava tiko na ka ca, sa cata na rarama, ka sa bese ni lako mai ena rarama, de qai kilai na veika era cakava tiko.
21 "Ia o koya sa cakava tiko na veika e dina, sa lako mai ena rarama, sa laurai vinaka na nona bula, ni sa cakava tiko ena mata ni Kalou."
22 Sa oti oqo, sa lako mai o Jisu kei ira na Nona tisaipeli ki Jutia, ka sa mai veipapitaisotaki tiko e kea.
23 O Joni a veipapitaisotaki tale tiko ga mai Aenoni voleka e Salimi baleta ni sa levu kina na wai. Era sa lako mai ka papitaisotaki.
24 E se bera tiko ni biu ki vale ni veivesu o Joni.
25 Sa qai yaco e dua na veileti vei ira na tisaipeli i Joni kei ira na Jiu me baleta na veivakasavasavataki.
26 Era sa lako mai vei Joni ka tukuna vua, "Qasenivuli, o Koya sa tiko vata kei iko mai na tai kadua ni Joritani, o Koya o sa dau tukuna tiko, raica sa veipapitaisotaki tiko o koya, ka ra sa lako tiko ga mai Vua na tamata kecega!"
27 Sa sauma o Joni, ka vaka: "Raica na tamata sa sega ni rawata e dua na ka, vakavo, ke sa soli vua mai lomalagi,
28 O ni sa vakadinadinataka vei au, ni'u sa tukuna, ni sa sega ni oi au na Karisito, ia, au sa talai ga me'u liu mai Vua.
29 "O koya sa vakawati, sa tiko na watina, nai tokani nei koya sa vakawati sa tucake tu ka me rogoci koya, sa reki vakalevu ni sa rogoca na domo i koya sa vakawati. O koya sa qai vakayacori kina na noqu reki vakalevu.
30 "Me levu tikoga o Koya ka me'u lailai sobu tikoga oi au.
31 "O Koya sa lako mai cake, sa cecere vei ira kecega; o koya sa lako mai vuravura sa vakavuravura ka sa vosataka na veika vakavuravura. O Koya sa lako mai lomalagi, sa cecere vei ira kecega.
32 "Na veika sa raica, ka rogoca sa vakatusa, ia, sa sega ni dua e via ciqoma na Nona i tukutuku.
33 "O koya sa rogoca ka ciqoma na Nona i tukutuku, sa vakadinata ni sa dina na Kalou.
34 "O koya sa tala mai na Kalou, sa tukuna na vosa ni Kalou, ni sa sega ni solia na Kalou na Yalo evakaiyalayala.
35 "Na Kalou sa lomana na Luvena, ka sa solia na ka kecega kina qeteqete ni ligana.
36 "O koya sa vakabauta na Luvena sa rawata na bula Sega ni mudu; o koya sa sega ni vakabauta na luvena ena sega ni raica na bula, ka sa tu ga vua na cudru katakata ni Kalou."


Chapter 4

1 Ni sa kila o Jisu na nodra sa rogoca na Farisi ni sa levu sa papitaisotaka o Jisu mai vei Joni.
2 (E dina mada ga ni sega ni veipapitaisotaki o Jisu, o iratou ga na Nona tisaipeli)
3 Sa biuti Jutia ka lako ki Kaleli.
4 Ia, sa lako curumi Samaria yani.
5 Sa yaco yani ki na dua na koro mai Samaria o Saika, voleka ki na dua na vanua sa solia o Jekope vei Joseva na luvena.
6 Sa tiko e kea na toevu ni wai nei Jekope. Sa oca sara o Jisu ena Nona lako voli mai, ka sa mai cegu sara ena toevu oqo, ni sa i ka ono tiko ni auwa.
7 Sa lako mai e dua na yalewa ni Samaria me mai taki wai, sa vosa vua o Jisu, "Solia mada vei Au e dua na wai, Me'u gunu."
8 E ratou se lako ki na koro oiratou na Nona tisaipeli me voli kakana.
9 Sa sauma mai na yalewa ni Samaria vei Koya, "E rawa vakacava vei iko na Jiu mo kere wai mai vei au na Samaria?," ni rau sa sega ni veiwekani vinaka na Jiu kei na Samaria.
10 Sa vosa yani o Jisu ka vaka: "Kevaka walega o sa kila na i solisoli ni Kalou, kei Koya sa vosa tiko yani oqo vei iko, 'Solia mai me'u gunu,' o na kerekere Vua, ka na solia vei iko o Koya na wai sa tiko kina na bula."
11 Sa vosa vei Jisu na yalewa, "Kemuni, sa sega na ka Mo ni taki kina, ni sa rui titobu na toevu. o ni sa kauta mai vei na wai sa tiko kina na bula?
12 "O ni sa levu cake beka vei koya na tamai keimami o Jekope, o koya sa solia vei keimami na toevu oqo, ka sa gunu talega mai kina "O Koya kei iratou na luvena kei na nona manumanu kecega?"
13 Sa sauma vua o Jisu ka vaka: "Yalewa o koya sa gunu mai na wai oqo, ena via gunu tale,
14 "ia, o koya vakayadua sa gunuva na wai Au na solia vua, ena sega ni karamaca tale. Na wai Au na solia vua, ena vuki me mataniwai vure ka tovure cake tiko ga ki na bula sega ni mudu."
15 Sa vosa vei Jisu na yalewa, "Kemuni, ni solia mai na wai oqori, me'u kua ni karamaca tale, se me'u lako tale mai e ke me'u taki.
16 Sa tukuna vua o Jisu, "Lako kaciva mai na watimu ka drau lako mai."
17 Sa sauma mai na yalewa, "Sa sega na watiqu." Sa tukuna yani o Jisu, 'o sa vosa dina mai ni sa sega na watimu,
18 sa lima oti e liu na watimu, kei koya drau sa tiko vata oqo sa sega ni watimu; o sa vosa dina sara mai."
19 Sa vosa vei Jisu na yalewa, au sa qai kila, ni Kemuni sa dua na parofita.
20 Era sa lotu ena ulunivanua oqo o ira na neimami qase, oi kemuni na Jiu, o ni sa tukuna ni kemuni sa daulotu mai Jerusalemi.
21 Sa tukuna vua o Jisu, "Yalewa, vakabauti Au, sa lako tiko mai na gauna ni kemuni na sega ni lotu ena ulunivanua oqo se mai Jerusalemi vei koya na Tamada.
22 "O ni sa lotu vua o ni sa sega ni kila; keimami sa kila se o cei keimami sa lotu vua, na vakabulai sa neimami na Jiu.
23 "Na gauna sa lako tiko mai, sai koya sara ga oqo, ni o ira na lotu dina, era na lotu vei Tamada vakayalo ena dina talega; o Tamada sa vakasaqarai ira tiko sa vaka oqori.
24 "E Yalo na Kalou, o ira na lotu Vua e dodonu me ra lotu vakayalo, ena dina talega."
25 Sa vosa vei Jisu na yalewa, "Au sa kila ni sa lako mai na Mesaia" (na Karisito). "Ni sa lako mai o Koya, ena tukuna vei keda na ka kecega."
26 Sa tukuna vua na yalewa o Jisu, "Sai Au sara ga sa vosa tiko oqo vei iko, o Koya o sa nanuma tiko.
27 E ratou sa basika mai na Nona tisaipeli, ka ratou sa qoroya ni rau veivosaki tiko o Jisu kei na dua na yalewa; sa sega ga ni dua e vosa rawa, me taroga, "Na cava o ni sa vakasaqara, se, ena cava o ni sa veivosaki tiko kina kei na yalewa oqori?"
28 Sa biuta tu na nona i takitaki na yalewa, ka sa lako yani ki na koro ka tukuna vei ira na tamata,
29 "Ni lako mai ka mai raica na Tamata sa tukuna vei au na veika kecega au sa cakava. O Koya beka li oqo na Karisito?"
30 Era sa lako tani mai na koro ka lako mai Vua.
31 Era sa vakauqeti koya na Nona tisaipeli ka tukuna, "Rapai ni mai kana."
32 Sa tukuna vei ira o Jisu, "Sa tu na kakana Me'u kania, ia, dou sa sega ni kila."
33 Era sa veivosaki na tisaipeli ka vaka: "E dua beka sa kauta mai na kakana me kana kina o Koya?"
34 Sa tukuna vei iratou o Jisu, "Na Kequ kakana Me'u cakava na loma i Koya sa talai Au mai, ka Me'u vakaotia na Nona cakacaka.
35 "Dou sa sega beka ni tukuna, ni se vo tiko e va na vula me qai ia na tatamusuki? Raica, Au sa tukuna vei kemudou, dou veiraiyaki mada ka raica na were, era sa matua tu me ra tamusuki!
36 'O koya sa tatamusuki sa rawata na kena i sau, ka kumuna vata na vuata ki na bula sega ni mudu. Me rawa kina vei koya sa tea kei koya sa musuka me rau reki vata.
37 "Sa dina kina na veika sa dau tukuni tiko 'sa dua sa kakaburaki ka sa dua tale sa tamusuka.'
38 "Au sa talai kemudou mo dou la'ki tamusuka na ka dou sa sega ni oca kina; e so era sa cakacaka, ia, dou sa curu kina ena nodratou cakacaka"
39 Sa levu sara vei ira na kai Samaria ena koro Levu o ya, era sa vakabauti Jisu ena vuku ni veika sa tukuna na yalewa. "Ni sa tukuna o Koya na veika kece au sa cakava."
40 Ni ra sa lako mai vei Jisu na kai Samaria, era sa kerei Koya me ra tiko vata mada; sa tiko vata kei ira o Jisu me rua na siga.
41 Sa levu tale era sa vakabauta ena vuku ni Nona vosa.
42 Era sa qai tukuna vua na yalewa, "Keimami sa vakabauta oqo e sega tale ena vuku ni nomu vosa, ni keimami sa rogoca dina oqo ka kila ni sai koya dina oqo na Karisito nai vakabula kei vuravura.
43 Ni sa oti e rua na siga ena Nona tiko mai kea, sa lako sara ki Kaleli.
44 Sa vakatusa vakai Koya o Jisu ni sa sega ni dokai na parofita ena nona vanua.
45 Ni sa lako mai o Koya ki Kaleli, era sa ciqomi Koya, ni ra sa raica na veika kece sa cakava o Koya mai Jerusalemi ena Solevu; ni ra a tiko mai kea.
46 Sa lako tale mai o Jisu e Kena, mai Kaleli, na vanua sa vukica kina na wai me waini. Sa dua na turaga sa tauvi mate vakalevu na luvena mai Kapenaumi.
47 Ni sa rogoca o Koya, ni sa lako mai o Jisu mai Jutia ki Kaleli, sa lako Vua ka kerei Koya me lako mada mai me vakabulai na luvena, ni sa voleka sara tu ga ni mate.
48 Sa tukuna vua o Jisu, "Kevaka o ni sa raica sara na i vakatakilakila kei na veivakurabuitaki, o ni na sega ga ni vakabauta?"
49 Sa tukuna vei Jisu na turaga ni vanua oqo, "Io saka, Mo ni lako mai de qai mate na luvequ!"
50 Sa tukuna vua o Jisu, "Mo lako ga, sa bula na luvemu." Sa vakabauta na vosa sa tukuna o Jisu na turaga oqo, ka lako yani.
51 Ni sa lako tiko yani o koya, sa sotavi koya na nona dauveiqaravi ka tukuna, "Sa bula na luvemu!"
52 Sa qai vakataroga na gauna sa bula kina o koya, era sa tukuna vua, "Ena siga e nanoa ni rauta tiko nai ka vitu ni auwa, sa biuti koya na katakata."
53 Sa kila o tamana na gauna vata ga o ya sa vosa kina o Jisu ka tukuna vua "Sa bula na luvemu." Sa vakabauta o Koya kei na nona vuvale.
54 Oqo tale na i karua ni veika sa cakava o Jisu ni sa lako tani mai o Koya e Jutia ki Kaleli.


Chapter 5

1 Ni sa oti oqo, sa dua na nodra Solevu na kai Jutia, sa lako cake kina o Jisu ki Jerusalemi.
2 Mai Jerusalemi ena Matamata ni Sipi, sa tiko kina na tobu o "Pecisaita", ena vosa vaka Iperiu ka sa lima na kena varada.
3 Era sa dau davo tu kina na tauvimate, na mataboko, na paralase, na malumalumu, ni ra sa dau waraka tu na vakayavalati ni wai.
4 Sa dau lako sobu mai na agilosi ena so na gauna me vakayavalata na wai; o koya ga sa liu ki na wai ni sa vakayavalati oti, sa dau vakabulai mai na kena mate.
5 Sa dua na tamata sa tiko e kea, sa tolusagavulu ka walu na yabaki ni nona tauvi mate.
6 Ni sa raici koya o Jisu ni sa davo tiko e kea ka kila ni sa tauvi mate vaka dede tiko, sa tukuna sara vua, "O sa vinakata mo vakabulai?"
7 Sa sauma vei Jisu na tamata tauvi mate, "Kemuni, sa sega ni dua me biuti au ki na tobu ni sa vakayavalati; ni'u sa sasaga tiko yani, sa dua sara sa liu vei au."
8 Sa tukuna vua o Jisu, "Raica, tucake, taura na nomu i yaya ni moce ka lako."
9 Vakasauri sa bula vinaka na tamata, sa taura cake na nona i yaya ni moce, ka sa lako. Sa siga ni vakacecegu na siga o ya.
10 Era sa vosa vua o ira na Jiu ka vaka; "Sa siga ni vakacecegu oqo; sa sega ni tara vei iko mo colata tiko na nomu i mocemoce."
11 Sa sauma vei ira, o Koya sa vakabulai au sa tukuna, "Taura cake na nomu i mocemoce ka lako."
12 O cei oqo sa tukuna vei iko, "Mo taura cake na nomui mocemoce ka lako?"
13 O koya sa vakabulai, sa sega ni kila se o cei oqo sa veivakabulai sa yali yani o Jisu ni ra sa veidrigidrigi mai na tamata ena vanua o ya.
14 Ni sa oti oqo, sa raici koya sara o Jisu ena vale ni soro ka tukuna vua, "Raica o sa bula vinaka, kua ni valavala ca tale, de qai yaco mo ca vakalevu sara.
15 Sa lako yani na tamata oqo ka tukuna vei ira na Jiu ni sai Jisu ga sa vakabulai koya.
16 Ena vuku ni ka oqo, era sa vakacacani Jisu kina ka via vakamatei Koya, baleta ni sa caka na veika oqo ena siga ni vakacecegu.
17 Sa sauma vei ira o Jisu ka vaka, "Sa cakacaka tiko o Tamaqu me yacova mai oqo, Au sa cakacaka tale tiko ga oqo."
18 Era sa qai sasaga vakaukauwa tikoga na Jiu me ra vakamatei Koya, sega ni Nona voroka nai vunau ni siga ni vakacecegu, baleta talega ni sa tukuna o Koya ni sa Tamana na Kalou, ka cakava me rau tautauvata kei na Kalou.
19 Sa sauma o Jisu ka tukuna vei ira, "Sa dina sara, Au sa tukuna vei kemuni, na luvena sa sega ni rawa ni cakava e dua na ka vakataki Koya ga, na veika ga sa raica mai vei Tamana ni cakava tiko; na veika ga sa cakava o Tamana sa cakava talega o Koya.
20 "Sa lomana na Luvena o Tamana, sa vakatakila talega Vua na veika sa dau cakava o Koya. O Tamana ena vakaraitaka vua na Luvena na veika lelevu mo ni kurabui kina.
21 "Me vaka sa vakatura cake tale na mate o Tamana o solia vei ira na bula, ena solia vaka kina na bula na Luvena vua sa vinakata ga o Koya.
22 "Sa sega ni lewa e dua o Tamana, sa solia kecega na vakatulewa vua na Luvena.
23 "Me ra doka kina na Luvena, me vaka era sa doka na Tomana. O Koya sa sega ni doka na Luvena, sa sega talega ni doka na Tamana ni o koya ga sa tala mai na Luvena.
24 "Sa dina sara, Ni'u sa tukuna vei kemuni, o koya sa rogoca na vosa ka vakabauti Koya sa talai Au mai, sa tu vua na bula sega ni mudu, ka na sega ni lewai, ena lako mai na mate ki na bula.
25 "Sa dina sara, Au sa tukuna vei kemuni, sa yaco mai na gauna ka sa tu sara ga oqo, era na rogoca na domo i koya na Luve ni Kalou na mate; o ira sa rogoca, era na bula.
26 "Me vaka ga ni sa tu vua na Tamana na bula, sa solia kina o Tamana na bula vua na Luvena, me tu na bula vua ga na luvena,
27 "sa solia talega Vua na kaukauwa ni lewa me vakatulewa kina, baleta ni sa Luve ni Tamata talega o Koya.
28 "Mo ni kua ni kidroa ena veika oqo, sa lako tiko mai na gauna ni o ira kece sa tu ena i bulubulu, era na rogoca na Domona,
29 "era na lako mai, vei ira sa caka vinaka ki na vakaturi cake tale ni bula, kei ira sa caka ca, ki na nodra vakaturi cake tale na vakararawataki.
30 "Au na sega ni cakava rawa e dua na ka. Au na rogoca, Au na vakatulewa vakadodonu baleta Ni'u sa sega ni lewa ena lomaqu ga, ena lomai Tamaqu ga, o Koya sa talai Au mai.
31 "Kevaka Au sa vakadinadinataki Au ga, na Noqu i vakadinadina sa sega ni dina.
32 "Sa dua tale sa vakadinadina vei Au, Au sa kila, ni Nonai vakadinadina sa dina.
33 "O ni sa talai Joni mai, sa solia o koya na i vakadinadina e dina.
34 "Au sa sega ni ciqoma nai vakadinadina vakatamata, Au sa tukuna yani oqo mo ni vakabulai kina.
35 "Sai Koya na cina sa waqa caucaudre tiko, ni kemuni sa vinakata ena dua na gauna lekaleka me reki tiko ena Nona rarama.
36 "Ia, sa dua tale nai vakadinadina e uasivita na nei Joni; ena vuku ni cakacaka sa solia vei Au o Tamaqu Me'u vakaotia – na cakacaka sara ga Au sa cakava tiko – sa vakadinadinataki Au, ni sa talai Au mai o Tamaqu.
37 "Na Tamaqu vakataki Koya, sa vakatalai Au mai, sa dautukuni Au, o ni sa sega ni rogoca na Domona ena dua na gauna, se raici Koya:
38 "Ia, sa sega ni tu vei kemuni na Nona vosa, baleti Koya sa talai mai, o Koya kemuni sa sega ni vakabauta.
39 "O ni sa vakasaqara nai Vola Tabu, ena nanuma ni kemuni na rawata kina na bula Sega ni mudu; na i Vola Tabu sa tukuni Au (Jisu) ga.
40 "O ni sa sega ni vinakata me lako mai vei Au mo ni mai rawata kina na bula,
41 "Au sa sega ni ciqoma na veidokai vakatamata
42 "Au sa kilai kemuni, ni sa sega ni tu vei kemuni na lomana na Kalou,
43 "Au sa lako mai ena Yaca i Tamaqu, ia, o ni sa sega ni ciqomi Au; kevaka e dua sa lako mai ena yacana ga, o ni na ciqomi koya.
44 Mo ni vakabauta vakacava, na tamata era sa veidokadokai wale tu ga, ka ni kemuni sa sega ni vinakata na dokai, e lako ga mai vua na Kalou?
45 "Mo ni kua ni nanuma Ni'u sa beitaki kemuni tiko vua na Kalou na Tamada; e dua sa beitaki kemuni tiko – o Mosese ga o ni sa kila tiko.
46 "Kevaka, kemuni sa vakabauti Mosese – e dodonu mo ni vakabauti Au talega, ni sa vola o Mosese na veika me baleti Au.
47 "Kevaka, o ni sa sega ni vakabauta na veika sa vola, mo ni na qai vakabauta vakacava na Noqu vosa?"


Chapter 6

1 Ni sa oti na veika oqo, sa lako ki na wasawasa mai Kaleli o Jisu, na wasawasa mai Taiperia.
2 Era sa muri Jisu e dua nai wiliwili levu ni tamata, ni ra sa raica na veika lelevu sa cakava o Koya vei ira sa tauvimate.
3 Sa lako cake o Jisu kina ulunivanua, ka sa tiko vata kei ira na Nona tisaipeli.
4 Na Lakosivia, na nodra Solevu na Jiu, sa voleka mai,
5 Sa rai yani o Jisu, ka raici ira na lewe vuqa ni ra sa lako tiko mai Vua, sa tukuna sara vei Filipe, "Me voli mai vei na madrai me ra kana kina oqo?"
6 Sa tukuna o Jisu na veika oqo me vakatovolei Filipe kina, ni sa kila oti tu ga o Jisu na veika me na cakava.
7 Sa sauma vua o Filipe, "Me limasagavulu na dola na madrai ena sega ni veiraurau kei ira oqo, me rawa mada ga ni ra vakalalai?"
8 E dua vei ira na Nona tisaipeli o Adriu na taci Saimone Pita sa tukuna mai Vua,
9 E dua na gone e tiko oqo, sa tiko vua e lima na madrai kei na rua na ika lalai, na cava oqo vei ira na lewe vuqa sa wawa tu.
10 Sa qai vosa mai o Jisu ka vaka: "Cakava me ra dabe kece." Sa levu na vanua sa tu me ra dabe kina. Era sa dabe sobu, na tagane mada ga, e lima na udolu.
11 Sa taura na madrai o Jisu, ni sa vakavinavinaka oti, sa wasea sara vei ira na Nona tisaipeli, o ira na tisaipeli era sa wasewase sara vei ira sa dabe tiko; sa vakakina na ika me vaka na kena levu era sa vinakata.
12 Ni ra sa mamau na tamata, o Jisu sa tukuna sara vei ira na Nona tisaipeli, "Mo ni kumuna mai na veika sa vo, me kumuni kece sara."
13 Sa soqoni kece mai na kena vo ka vakatawani ena tinikarua na sova na vovo ni lima na madrai kei na rua na ika sa laukana vakavo tu.
14 O ira na tamata oqo, ni ra sa raica na veika sa cakava o Jisu, era sa tukuna: "Sa i koya dina oqo na parofita e dodonu me na lako mai ki vuravura."
15 Ni sa kila o Jisu ena nodra sa via tauri Koya vakaukauwa ka mera buli Koya me nodra tui, sa lako yani ki na dua na ulunivanua me tiko duadua kina.
16 Ni sa yakavi mai, era sa lako na Nona tisaipeli ki wai,
17 era sa vodoka e dua na waqa ka me muri wai yani vaka ki Kapenaumi. Sa buto tiko mai, ka e se bera ga ni yaco mai o Jisu.
18 Sa tubu cake na ua lelevu baleta ni sa liwa vakaukauwa tiko na cagi.
19 Ni ratou sa voce tiko me tolu se va na maile, e ratou sa raici Jisu ni sa lako tiko mai e dela ni wai ka sa volekata mai na waqa; e ratou sa rere vakalevu sara.
20 Sa vosa mai vei iratou o Jisu ka tukuna, "Sai Au ga oqo, dou kua ni rere.
21 E ratou sa kacivi Jisu mai ki na waqa, vakasauri sa yaco ki vanua na waqa.
22 Ena siga ka tarava, ni ra sa raica o ira na tamata sa tiko mai na tai kadua ni wai ni sa sega tale na waqa sa vo, na waqa ga e ratou sa vodo tiko kina na Nona tisaipeli, ka ra sa sega ni vodo vata kei Jisu, o iratou duaduaga -
23 Sa so tale na waqa era sa lako mai Taiperia, volekata na vanua era sa kania kina na madrai kei na ika ni sa vakavinavinakataka oti o Jisu -
24 ni ra sa sega ni raici Jisu na tamata, se ira na Nona tisaipeli, era sa lako mai ki Kapenaumi me vakasaqarai Jisu.
25 Era sa raici Koya mai na tai kadua ni wai, ka ra tarogi Koya, "Rapai o ni sa lako mai vakacava e ke?"
26 Sa sauma o Jisu ka vaka: "Sa dina sara, Au sa tukuna vei kemuni, o ni sa vakasaqarai Au sega ni baleta nai vakatakilakila, sa baleta ga ni o ni sa kana ka mamau.
27 Mo ni kakua ni oca ena vuku ni kakana ena oti yani, mo ni oca ga ena kakana sa tudei ka sega ni mudu, sa solia ga na Luve ni Tamata, baleta ni sa solia o Tamana na kena i vakadei Vua na Luvena.
28 Era sa tukuna vua na tamata, "Na cava me keimami cakava, me keimami cakava kina na cakacaka ni Kalou?"
29 Sa sauma vei ira o Jisu ka tukuna, "Oqo na cakacaka ni Kalou, mo ni vakabauti Koya sa talai mai vua na Kalou."
30 Era sa tukuna vua, "Na vakatakilakila cava o ni na cakava, me keimami raica ka vakabauti kemuni kina? Na cakacaka cava o ni sa cakava?
31 "O ira na tamai keimami era sa kania na Mana mai na vanua liwa; me vaka sa volai, "sa solia vei ira na madrai mai lomalagi me ra kania!"
32 Sa qai tukuna vei ira o Jisu, "Sa dina sara, Au sa tukuna vei kemuni, o Mosese sa sega ni solia vei kemuni na madrai mai lomalagi, o Tamaqu ga sa solia na madrai mai lomalagi."
33 "Ni sa madrai mai Vua na Kalou, o Koya sa lako sobu mai lomalagi, ka sa solia na bula ki vuravura."
34 Era sa tukuna Vua, "Turaga ni solia tikoga vei keimami na madrai oqori."
35 Sa tukuna vei ira o Jisu, o Au ga na madrai ni bula. O koya sa lako mai vei Au, ena sega tale ni via kana, kei koya sa vakabauti Au ena sega ni via gunu tale.
36 "Au sa tukuna oqo vei kemuni, ni kemuni sa raici Au, ia, o ni sa sega ga ni vakabauti Au.
37 "Na veika kece sa solia o Tamaqu vei Au, ena lako kece mai vei Au, ena sega sara ni dua me biu laivi.
38 "Ni'u sa lako sobu mai lomalagi, sega Ni'u mai cakava na lomaqu ga. Na lomai Koya ga sa talai Au mai.
39 "Sai koya oqo na loma i Tamaqu sa talai Au mai, o ira kece sa solia mai vei Au o Koya, me kua ni dua e yali, Me'u vakaturi ira cake ga ena siga mai muri.
40 "Oqo na loma i Koya sa talai Au mai, o ira vakayadua sa raica na Luvena, ka vakabauti Koya ena rawata na bula sega ni mudu, Au na vakaturi koya cake ena siga mai muri.
41 Era sa vosa kudrukudru ena vukuna o ira na Jiu, ni sa tukuna, "Oi Au na madrai sa lako sobu mai lomalagi."
42 Era sa tukuna mai, e sega beka ni o Jisu ga oqo na luvei Joseva kei Meri, na tamana kei na tinana eda sa kila vinaka. Me tukuna rawa vakacava o koya, "Sai Au sa lako sobu mai lomalagi?"
43 Sa sauma yani o Jisu ka vaka – "Mo ni kua ni vosa kudrukudru vakai kemuni."
44 "Sa sega ni rawa ni dua na tamata me lako mai vei Au, vaka vo kevaka sa vakayarayarataki koya mai o Tamaqu o Koya sa talai Au mai, Au na vakaturi koya cake talega e na siga mai muri.
45 "Era sa vola na parofita, era na vakavulici kecega mai vua na Kalou. O ira kece sa rogoca ka vuli mai vei Tamaqu era na lako mai vei Au.
46 "Sa sega ni baleti koya ga sa raica na Tamana, o Koya ga sa mai vua na Kalou; sai koya ga sa raica na Tamana.
47 "Sa dina sara, Au sa tukuna vei kemuni, o koya sa vakabauti Au, sa rawata na bula sega ni mudu.
48 "Sai Au ga na madrai ni bula.
49 "Era sa kania na mana na nomuni qase mai na vanua liwa, ka mate.
50 "Oqo na madrai sa lako sobu mai lomalagi, o koya sa kania na madrai oqo, ena sega ni mate.
51 "Oi Au na madrai sa bula tiko sa lako sobu mai lomalagi. O koya sa kania na madrai oqo, ena bula me Sega ni mudu; na madrai Au na solia – na yagoqu ga – o koya Au na solia me bula kina o vuravura.
52 Era sa veiba vakataki ira na Jiu ka tukuna "Ena rawa beka vakacava vua na Tamata oqo me solia vei keda na yagona me da kania?"
53 Sa tukuna vei ira o Jisu, "Sa dina sara, Au sa tukuna vei kemuni, vakavo sara ni kemuni sa kania na yagona na Luve ni Tamata ka gunuva na Nona dra, sa sega vei kemuni na bula.
54 "O koya sa kania na Yagoqu ka gunuva na Noqu dra sa tu vua na bula sega ni mudu, Au na vakatucaketaki koya ena siga mai muri.
55 "Na yagoqu sa kakana dina, ka wainigunu dina na Noqu dra.
56 "O koya sa kania na Yagoqu ka gunuva na Noqu dra sa tu vei Au, oi Au talega vua.
57 "Me vaka sa bula tiko o Tamaqu, o koya sa talai Au mai, Au sa bula tiko ena vuku i Tamaqu, sa vakakina o koya sa sucu mai vei Au, ena bula ena vukuqu.
58 "Sai koya oqo na madrai sa lako sobu mai lomalagi – sa sega ni vaka na mana era sa kania na nomuni qase ka ra sa mate kina. O koya sa kana mai na madrai oqo, sa bula ka Sega ni mudu."
59 Sa tukuna na veika oqori o Jisu ena vale ni lotu sa vakavuvuli kina o Koya mai Kapenaumi.
60 E vuqa na Nona tisaipeli ni ra sa rogoca mai vua na veika oqo, era sa tukuna mai – "Sa dua na ka dredre oqo, o cei ena kila rawa?"
61 Ni sa kila o Jisu na nodra veivosayaki na Nona tisaipeli ena vuku ni ka oqori, sa tukuna yani vei ira, "O ni sa leqa beka ena vuku ni veika oqo?
62 "Vakacava kevaka o ni sa raica na Luve ni tamata ni sa lako cake ki na vanua ea tiko ga kina e liu?
63 "Sai koya na Yalo sa solia na bula, sa sega ni yaga na yago. Na vosa Au sa vosataka vei kemudou sa Yalo, ka vaka vu bula.
64 "Sa so vei kemuni sa sega ni vakabauta," Ni sa kila o Jisu mai na i vakatekivu o cei sa sega ni vakabauta kei koya ena cakitaki Koya.
65 Sa tukuna o Jisu, "Au sa tukuna oti vei kemuni ni sega ni dua e lako rawa mai vei Au, vakavo, kevaka sa vakatara vua o Tamaqu.
66 Mai na gauna sara ga o ya, sa levu vei ira na Nona tisaipeli sa lesu tani mai vua, ka era sa sega tale ni lako vata.
67 Sa qai tukuna vei ira na lewe tinikarua o Jisu, "Dou sa via lako tani talega oi kemudou?"
68 Sa sauma yani o Pita, "Turaga me keitou lako tale vei cei? Sa tu ga vei Kemuni na vosa ni bula sega ni mudu."
69 "Keitou sa yaco talega me vakabauta ka kila, ni sai Kemuni na Karisito na Luve ni Kalou bula."
70 Sa sauma vei iratou o Jisu, "Sa sega beka Ni'u digitaki kemudou na lewe tinikarua, ka sa dua vei kemudou na tevoro?"
71 Sa vosa ena vuku i Jiutasa Isikarioti na luvei Saimone, ni sai koya ena volitaki Jisu, ka dua vei ira na lewe tinikarua.


Chapter 7

1 Sa oti oqo, sa veilakoyaki voli o Jisu mai Kaleli; ni sa sega ni via veilakoyaki voli e Jutia, baleta ni ra sa vakasaqarai Koya na Jiu me ra vakamatea.
2 Sa qai yaco mai na nodra solevu ni vale vakacevaceva na Jiu.
3 Era sa tukuna vei Jisu na tacina, "Biuta na vanua oqo, ka lako ki Jutia, me ra raica talega na Nomu tisaipeli na veika o sa dau cakava.
4 "Ni sa sega e dua sa dau cakava vuni na ka, kevaka sa vinakata me ra kila na tamata na ka o ni sa daucakava. Kevaka o sa cakava oqo, vakaraitaki Iko yani ki vuravura."
5 O iratou mada ga na tacina e ratou sa sega ni vakabauti Koya.
6 Sa qai tukuna vei iratou o Jisu, "E se bera ni yaco mai na Noqu gauna, na nomuni gauna na tamata sa tu oqo.
7 "O vuravura ena sega ni rawa ni cudruvi kemuni, sa cati Au ga o vuravura baleta, ni'u sa tukuna tikoga na ca ni veika sa cakava tiko o koya.
8 "Dou lako cake ki na Solevu, Au na sega, baleta ni se sega ni yaco taucoko mai na Noqu gauna."
9 Ni sa tukuna oti na veika oqo vei iratou na tacina, sa tiko ga e Kaleli o Koya.
10 Ena gauna e ratou sa lako cake kina na tacina, sa lako cake vakavuni talega o Jisu ki na Solevu, sa sega ni vakaraitaki Koya.
11 Era sa vakasaqarai Jisu ena solevu o ya o ira na Jiu, ka vakataroga tiko, "E vei o Koya?"
12 Sa levu sara na veivosaki era sa cakava na tamata ena Vukuna. Era sa tukuna e so "Sa tamata vinaka o Koya," So tale era sa tukuna, e sega, e ca o Koya, sa dau vakaisini ira na tamata."
13 Sa sega ga ni dua e vosa ena matana votu me baleti Jisu, ni ra sa rerevaki ira na Jiu.
14 Ni sa vakacagau tiko na soqo, sa lako cake ki na valenisoro o Jisu ka vakatavuvuli.
15 Era sa qoroqoro ka tukuna mai, "Sa kila vakacava o Koya na i Vola Tabu, ni sa sega ni vulica?"
16 Sa sauma vei ira o Jisu ka vaka, "Na i vakavuvuli sa sega ni Noqu, sa nei Koya sa talai Au mai.
17 "Kevaka e dua sa via muria na Lomai Tamaqu, ena kila na vei ka baleta nai vakavuvuli, se sa mai vua na Kalou, se mai na Noqu kaukauwa ga.
18 "O koya sa vosa ena vukuna ga, sa vakasaqara ga na nona dokai, ia o koya e vakasaqara na dokai i Koya sa veitalai mai sa qai dina, sa sega sara vua na veivukiyaki!
19 "Sa sega beka ni solia vei kemuni nai vunau o Mosese, ia, sa sega sara vei kemuni sa maroroya nai vunau? Na cava o ni sa via vakamatei Au kina?"
20 Era sa vosa mai na tamata ka vaka: "Sa tiko vei iko na tevoro, "O cei sa vinakata me vakamatei iko?
21 Sa sauma vei ira o Jisu, "Au cakava e dua ga na ka, o ni sa qoroqoro kina.
22 "Sa cakava vei kemuni o Mosese na veicilivi, (na veicilivi oqo sa mai vei ira na qase) ia, o iko sa cakava na veicilivi ena siga ni vakacecegu.
23 "Kevaka e dua sa cakava na veicilivi ena siga ni vakacecegu me kua ni voroki kina na i vunau i Mosese, o ni sa cudruvi Au baleta Ni'u sa vakataucokotaka e dua na tamata ena siga ni vakacecegu.
24 "Mo ni kua ni via vakalewa me vaka ga na kenai rairai, mo ni lewa ena vakalelewa e dodonu."
25 Eso vei ira e Jerusalemi era sa taroga, "Sa sega beka ni o Koya ga oqo, era sa vakasaqara tiko me ra vakamatea?"
26 "Ni raica mada, sa vosa dina tiko vakadoudou ka ra sa sega ni rawa ni tukuna e dua na ka vua. Era sa kila tiko beka na veiliutaki ni sai Koya dina oqo na Karisito?
27 "Eda sa kila se sa lako mai vei o Koya oqo, ni sa lako mai na Karisito, ena sega ni dua e kila se sa lako mai vei."
28 Sa kaci vakadomoi levu o Jisu ni sa veivakavulici tiko ena valenisoro ka vaka: "O ni sa kilai Au, ka sa kila talega na vanua Au sa lako mai kina; Au sa sega talega ni lako mai vakai Au ga, o Koya sa talai Au mai sa Dina, o Koya dou sa sega ni kila?
29 "Au sa kilai koya, Ni'u sa lako mai Vua, ka sa talai Au mai o Koya."
30 Era sa vinakata me vesuki Koya, ia, sa sega ga e via tarai Koya, ni se bera ni yaco mai na Nona gauna.
31 Sa levu talega na tamata era sa vakabauti Koya, ka tukuna, "Ni sa lako mai na Karisito, ena cakava na veika lelevu mai na veika sa cakava na Tamata oqo.
32 Era sa rogoca na Farisi ni ra sa vosa kudrukudru tiko na lewe ni vanua ena vuku i Jisu, era sa vakatala sara yani eso na tamata me ra vesuki Koya.
33 Sa tukuna vei ira o Jisu, "Au na tiko vata kei kemudou vakalailai ga, Au na qai lako tale vei koya sa talai Au mai.
34 "O ni na vakasaqarai Au, o ni na sega ni kunei Au, na vanua Au na lako kina, o ni na sega ni lako rawa yani kina.
35 Era sa veivosaki vakai ira na Jiu ka vaka: "Sa via lako tiko ki vei o Koya – meda sega kina ni lako rawa vua? Sa via lako beka vei ira na veiseyaki ki Kirisi, me la'ki vakavulici ira na kai Kirisi?
36 "Na cava oqo, ni sa tukuna tikoga, o ni na vakasaqarai Au, ia, o ni na sega ni lako rawa mai ena vanua Au sa tiko kina?"
37 Ena i otioti ni siga ni solevu, sa tucake o Jisu ka kacivaka yani, "Kevaka e dua sa via gunu me lako mai ka gunu.
38 "O koya sa vakabauti Au, me vaka sa tukuna na i Vola Tabu, ena tovure mai yalona na vei uciwai ni bula."
39 Sa tukuna tiko oqo o Jisu na veika me baleta na Yalo Tabu vei ira era sa vakabauti Koya, ni se bera tiko ni yaco mai na Yalo Tabu, ni se tiko oqo o Jisu ka e se bera ni kau cake.
40 Era sa lewevuqa, ni ra sa rogoca na vosa i Jisu, era sa tukuna, "sa dina, sa Parofita o Koya oqo."
41 Era sa tukuna talega eso, "O Koya oqo na Karisito," era sa tukuna talega eso, "Me lako li mai Kaleli na Karisito?"
42 "Sa sega li ni tukuna na i Vola Tabu, ni na lako mai na Karisito mai vei Tevita, mai Peceliema na vanua sa tiko kina o Tevita?"
43 Sa kune na duidui vei ira na tamata me baleti Jisu.
44 Sa so vei ira na Jiu, era sa via vesuki Jisu, ia, sa sega e via tarai koya.
45 Era sa lako mai na dauveiqaravi, "Kivei ira na bete levu kei ira na Farisi, "Ena cava o ni sa sega ni kauti Koya mai kina?" Sa tarogi yani vei ira.
46 Era sa sauma mai na dauniveiqaravi, "Sa sega ni dua e vosa me vakataki Koya oqo!"
47 "O ni sa vakacalai talega ena vukuna?" Era sa taroga mai na Farisi.
48 "Sa dua beka na veiliutaki se na Farisi sa vakabauti koya?
49 Sa sega ni dua vei ira na lewevuqa sa kila ni sa cudruvi nai vunau.
50 O Nikotimo, e dua sa lako mai vei Jisu ena bogi, sa dua talega vei ira na Farisi, sa tukuna yani,
51 "Sa lewai beka e dua ena i vunau, ni bera ni rogoci o koya, me kilai kina na ka e cakava?"
52 Era sa sauma ka tukuna vua, "O iko talega mai Kaleli? Vakasaqara mada mo raica, ni sa sega na parofita e basika mai Kaleli."
53 Era sa dui lesu tale ki na nodra veivale na tamata.


Chapter 8

1 O Jisu sa lako cake kina ulunivanua ni vei Olive.
2 Ena mataka caca sa lako tale mai ki na valenisoro, era sa lako kece mai na tamata ki Vua, sa dabe sobu o Koya ka vakavulici ira.
3 O ira na Vunivola kei ira na Farisi era sa kauta mai vua e dua na yalewa sa tobo ni sa veibutakoci tiko.
4 Era sa tukuna vei Jisu, "Vakavuvuli na yalewa oqo e tobo ni tiko vata sara tikoga kei na tagane.
5 "Ena i vunau sa vakarota kina o Mosese ni o ira vaka oqo e dodonu me ra vakaviriki ena vatu. Na cava o ni sa tukuna?"
6 Era sa tukuna oqo me ra vakatovolei Koya kina ka me ra beitaki Koya talega kina. Sa cuva sobu o Jisu ka volavola ena dela ni qele me vaka ga e sega ni rogoci ira.
7 Ni ra cikecike tikoga ena vakatataro sa tucake o Jisu ka vosa vei ira, "O koya vei kemuni sa sega ni valavala ca, me viriki koya e liu ena vatu."
8 Sa cuva sobu tale ka volavola ena qele.
9 O ira sa rogoca ka laucoka na yalodra, era sa lako tani vakayadudua, sa liu o koya e qase duadua ki vei koya sara na kenai otioti. Sa qai vo ga o Jisu kei na yalewa ni sa tucake tu.
10 Ni sa tucake tu o Jisu ka sa sega ni raica tale e dua, na yalewa ga, sa qai tukuna vua, "Yalewa e vei o ira sa mai beitaki iko tiko oqo? Sa dua beka e totogitaki iko?"
11 Sa sega e dua na noqu Turaga," Sa sauma mai na yalewa, "Oi au talega sa sega ni beitaki iko; lako, kua ga ni valavala ca tale."
12 Sa vosa tale vei ira o Jisu ka vaka:" Oi au na rarama kei vuravura, o koya sa muri Au, ena sega ni lako ena butobuto, ia, sa tiko ga vua na rarama ni bula.
13 Era sa tukuna vei Jisu na Farisi, "O iko sa vakadinadinataki iko ga vakai iko, na Nomui vakadinadina e sega ni dina."
14 Sa sauma vei ira o Jisu ka vaka: "Kevaka mada ga Au sa vakadinadinataki Au ga vakai Au, sa dina na Noqui vakadinadina Ni'u sa kila na vanua Au sa lako mai kina kei na vanua Au lako tiko kina; ia, oi kemudou sa sega ni kila na vanua Au lako mai kina kei na vanua Au lako tiko kina.
15 "Dou sa lewa me vaka sa vakayago, Au sa sega ni beitaka e dua.
16 "Kevaka mada ga, Me'u sa lewa, sa dina na Noqu lelewa, Ni'u sa sega ni tiko duadua Au sa tiko vata kei Tamaqu, o Koya sa talai Au mai.
17 "Sa volai talega ena nomudou i vunau ni rua na i vakadinadina sa dina.
18 "Oi Au sa vakadinadinataki Au ga, o Tamaqu sa talai Au mai, sa vakadinadinataki Au."
19 Era sa tukuna vua, e vei o Tamamu? " Sa sauma o Jisu, "Dou sa sega ni kilai Au se o Tamaqu. "Kevaka dou sa kilai Au, dou na kilai Tamaqu talega."
20 Sa tukuna tiko o Jisu na veika oqo, ni sa vakavuvuli tiko ena valenisoro; sa sega ni dua e via tarai Koya, ni se sega ni yaco mai na Nona gauna.
21 Sa tukuna tale vei ira o Jisu, "Au na lako tani yani, ia, dou na vakasa qarai Au, dou na mate ga ena nomudou i valavala ca. Na vanua Au na lako yani kina, dou na sega ni lakova rawa.
22 Era sa tukuna na Jiu, "Na vakamatei Koya beka, baleta ni sa tukuna, Na vanua Au sa lako kina, dou na sega ni lako rawa yani kina?"
23 Sa tukuna tale vei ira, "Oi kemudou mai ra, oi Au mai cake, oi kemudou na vuravura eke, Au sa sega ni kai vuravura oqo.
24 "Oqori, Au sa tukuna kina vei kemudou ni dou na mate ena nomudou i valavala ca; kevaka dou sa sega ni vakabauta ni sa i Au ga, dou na mate ena nomudou i valavala ca."
25 Era sa qai tukuna Vua, "O cei o iko?" Sa sauma vei ira o Jisu, "Me vaka sara ga Au sa dau tukuna tiko vei kemuni mai na i vakatekivu.
26 "Sa levu na ka Me'u tukuna ka lewa me baleti kemuni, o Koya sa talai Au mai sa dina; Au sa tukuna ki vuravura na veika ga Au sa rogoca mai vua."
27 Era sa sega ni kila ni sa vosa tiko o Koya vei ira me baleti Tamana.
28 Sa qai tukuna vei ira o Jisu, "Ni dou sa laveta cake na Luve ni Tamata, dou na qai kila ni sai Au o Koya, Au sa sega ni cakava e dua na ka ena Vukuqu; ia, me vaka ga sa vakavulici Au kina o Tamaqu, Au sa tukuna na veika oqo.
29 O Koya sa talai Au mai, sa tiko vata kei Au. O Tamaqu sa sega ni laivi Au duadua, Ni'u sa dau cakava na veika sa vinaka ga Vua.
30 Era sa lewe vuqa era sa vakabauti Koya ni sa tukuna tiko na veika oqori.
31 Sa tukuna o Jisu vei ira na Jiu sa vakabauti koya, "Kevaka o ni sa tu vata kei na Noqu vosa, o ni sa qai Noqu tisaipeli dina.
32 "O ni na kila na dina, na dina oqori ena qai sereki kemuni."
33 Era sa sauma vua ka vaka: "Keimami sa kawa i Eparama, ka keimami se sega ni vesuki mai vua e dua tale, o sa tukuna vakacava, "O ni na sereki vakaidina?"
34 Sa sauma vei ira o Jisu, "Au sa tukuna vakaidina, o koya sai valavala ca sa vesuki e na i valavala ca.
35 Na bobula sa sega ni tiko vakadua e vale, o koya ga na gone ni vale sai taukei ni vale me sega ni mudu.
36 "O koya oqo, kevaka sa sereki kemudou na Luvena, o ni sa sereki vakaidina.
37 "Au sa kila ni kemuni sa kawa i Eparama, ia, o ni sa vinakata mo ni vakamatei Au, baleta ni sa sega na tikina ni Noqu vosa vei kemuni.
38 "Au sa tukuna Ni'u sa laukune vata kei Tamaqu, o ni sa cakava na veika o ni sa raica vei tamamuni."
39 Era sa sauma ka tukuna Vua, "Sa tamai keimami o Eparama." Sa tukuna vei ira o Jisu, "Kevaka o ni sa luvei Eparama, o ni na muria na veika sa cakava o Eparama."
40 "Oqo, o ni sa vinakata mo ni vakamatei Au, na Tamata sa tukuna vei kemuni na ka dina Au a rogoca mai vua na Kalou. Sa sega ni cakava oqo o Eparama."
41 "O ni sa cakava na veika sa cakava o tamamuni." Era sa qai tukuna Vua, "Keimami sa sega ni luve ni veibutakoci, sa dua na Tamai keimami – Na Kalou."
42 Sa tukuna vei ira o Jisu, "Kevaka sa tamamuni na Kalou, o ni na lomani Au, Ni'u sa tekivu ka lako mai vua na Kalou; Au sa sega ni basika ga mai vakataki Au, o Koya ga sa talai Au mai.
43 "Ena cava o ni sa sega ni kila kina na Noqu vosa? Baleta ni kemuni sa sega ni rogoca na ka Au sa tukuna.
44 "O ni sa nei tamamuni na tevoro, ka o ni sa cakava ga na veika sa gadreva o koya. Sa daulaba o koya mai na i vakatekivu ka sa sega ni tu ena dina baleta ni sa sega vua na dina. Ni sa tukuna o koya na lasu, sa vosa tiko o koya mai na nona i vurevure, ni sai koya na lasulasu ka sa tama ni lasulasu.
45 "Au sa tukuna na ka dina, ia, o ni sa sega ni via vakabauti Au?
46 "O cei vei kemuni sa beitaki Au ena i valavala ca? Ni'u sa tukuna tiko na ka dina, ena cava o ni sa sega ni vakabauti Au kina?
47 "O koya sa VaKalou, ena rogoca na Vosa ni Kalou; o ni sa sega ni rogoca baleta ni kemuni sa sega ni mai vua na Kalou."
48 Era sa sauma Vua na Jiu ka vaka: "Sa sega beka ni keimami tukuna vakadodonu, ni o sa kai Samaria ka sa tiko vei iko na tevoro?"
49 Sa sauma o Jisu, "Sa sega vei Au na tevoro; Au sa dokai Tamaqu Ia, o ni sa beci Au.
50 "Au sa sega ni qara na Noqu vinaka; sa Dua ga sa kila ka sa lewa talega.
51 "Au sa tukuna vakadodonu sara, kevaka e dua sa maroroya ka bula ena Noqu Vosa, ena sega ni raica na mate"
52 Era sa tukuna Vua na Jiu, "Oqo keimami sa qai kila ni sa tiko vei iko na tevoro! Sa mate oti o Eparama kei ira na parofita, ia, o sa tukuna, "Kevaka e dua sa maroroya ka bula ena Noqu vosa ena sega ni tovolea na mate.
53 "O sa levu beka vei Eparama na tamai keimami, o koya sa mate oti? O ira talega na parofita era sa mate oti; o sa buli iko me o cei?
54 Sa sauma mai o Jisu, "Kevaka Au sa dokai Au ga, Au na qai sega ni dua na ka, o Tamaqu ga sa dokai Au, o koya ga o ni sa tukuna tiko qori ni sa nomuni Kalou.
55 "O ni sa sega tiko mada ga ni kilai Koya, Au sa kilai Koya, kevaka Au sa sega ni kilai Koya, Au sa lasulasu ga me vakataki kemuni; Me'u tukuna tale, Au sa kilai Koya ka dau maroroya talega na Nona vosa.
56 "Na tamamuni o Eparama sa rekitaka ni raica na Noqu veisiga; a sa raica dina ka sa marau sara."
57 Era sa sauma Vua na Jiu, o se sega mada ga ni yabaki limasagavulu, o sa raici Eparama mai vei?
58 Sa tukuna vei ira o Jisu, "Na dina levu Au sa tukuna yani oqo, ni se bera o Eparama, OI AU GA."
59 Era sa tomi vatu me vakaviriki Koya, sa vunitaki Koya ga yani o Koya ka lako tani mai na Vale ni Soro, ka curu yani ena kedra maliwa ka lako sara.


Chapter 9

1 Ni sa lako tiko mai o Jisu, sa raica e dua na mataboko mai na nona sucu.
2 Era sa tarogi Jisu na Nona tisaipeli ka vaka: "Rapai, o cei sai valavala ca o koya oqo, se oi rau na i tubutubu, me sucu mataboko kina o koya oqo?"
3 Sa sauma o Jisu, "Sa sega ni o Koya oqo se oi rau na i tubutubu sai valavala ca, eke me vakaraitaki ga kina vei koya oqo na cakacaka ni Kalou.
4 "E dodonu Me'u cakava na cakacaka i Koya sa talai Au mai ni se siga tiko; sa lako tiko mai na bogi sa sega kina ni dua e rawa ni cakacaka.
5 "Ni'u se tiko oqo e vuravura, sai Au ga na rarama kei vuravura"
6 Ni sa cavuta oti na veika oqo, sa qai kasivita na qele ka walia vata na qele kei na Nona kasivi; ka lumuta na matai koya sa mataboko ena soso.
7 Sa tukuna vua, "Lako ka tavoi ena tobu mai Sailoama"(kena i balebale sa talai). Sa lako ka tavoi ka lesu mai ni sa rai na matana.
8 O ira na veiwekani kei ira sa kila ka raica ni a mataboko tu, era sa tukuna, "Sa sega beka ni o koya ga oqo sa dau dabe ka kerekere voli?"
9 Eso era sa tukuna, "Io sa dina, o koya sara ga oqo, " e so tale era sa tukuna, "Io sa vakataki koya sara ga." Sa qai vosa mai o koya a sa mataboko e liu, "Io, sai au ga oqo."
10 Era sa qai tarogi koya, "O sa qai rai vakacava?"
11 Sa sauma mai ka vaka: "E dua na tamata na yacana o Jisu, sa cakava na soso ka lumuta kina na mataqu ka tukuna, "Lako ki na tobu e Sailoama ka tavoya na matamu, Au sa rai tu kina oqo.
12 Era sa tarogi koya, "Sa e vei o Koya?" sa tukuna mai na mataboko, "Au sa sega ni kila." Sa Vakatatabui Na Veivosaki Kei Na Tamata Sa
13 Sa kau mai o koya sa mataboko tu e liu vei ira na Farisi
14 Sa siga ni vakacecegu oqo, sa vakabula kina na mataboko o Jisu.
15 Era sa taroga talega na mataboko se cava sa caka me rai kina na matana. Sa tukuna mai o koya, "Sa biuta na soso e mataqu, au sa laki tavoi sara, oqo au sa rai tu"
16 Era sa tukuna e so na Farisi, ni Tamata oqo sa sega ni mai vua na Kalou, baleta ni sa sega ni maroroya na siga ni Vakacecegu. Era sa tukuna tale eso, "Kila rawa vakacava me dua na i valavala ca e cakava rawa na vei ka oqo?" Era sa dui toto ena veika oqo.
17 Era sa tukuna tale vei koya na mataboko, "Na cava o sa tukuna me baleta na tamata oqo sa vakabulai iko?" Sa tukuna, sa parofita o Koya oqo.
18 Era sa sega ga ni vakabauti koya na Jiu ni a mataboko tu ka sa qai rai, me yacova ni sa kacivi mai oi rau na i tubutubu nei koya ea mataboko tu e liu.
19 Era sa tarogi rau ka vaka: "Oqo beka na luvemudrau, drau sa tukuna ni a sucu mataboko?
20 E rau sa sauma mai na i tubutubu, "Keirau sa kila ni luvei keirau oqo, ka a sucu mataboko mai;
21 Na nona rai rawa, keirau sa sega ni kila, sa yalomatua o koya, ni tarogi koya ga, me vosa ga ena vukuna."
22 E rau sa tukuna na veika oqo na nona i tubutubu ni rau sa rerevaki ira na Jiu, o ira na Jiu era sa vakadonuya oti ni kevaka e dua sa vakatusa ni sa Karisito o Koya oqo, me qai biu tani mai na nodra vale ni veitavaki.
23 E rau sa tukuna kina na nona i tubutubu, me tarogi ga o koya."
24 Era sa kaciva tale na tamata sa qai rai rawa ka tukuna vua, "Solia vua na Kalou na vakarokoroko! Keimami sa kila ni sa tamata i valavala ca o koya oqo."
25 Sa sauma mai na tamata sa vakabulai ka vaka: "Se sai valavala ca o Koya se sega, au sa sega ni kila. E dua ga na ka Au sa kila, au a mataboko tu, oqo au sa rai rawa."
26 Era sa tarogi koya tale, "na cava sara mada e cakava vei iko? E dolava vakacava o Koya na matamu?"
27 Sa sauma vei ira ka vaka, "Au sa tukuna oti vei kemuni, o ni sa sega ga ni via rogoca."
28 Era sa cudruvi koya ka tukuna, "O sa Nona tisaipeli, keimami sa tisaipeli nei Mosese.
29 "Keimami sa kila ni sa vosa vei Mosese na Kalou; ia, na Tamata oqo keimami sa sega ni kila se sa lako mai vei."
30 Sa qai sauma vei ira ka vaka: "Na cava, sa dua na ka vinaka oqo, ni kemuni sa sega ni kila se sa mai vei o Koya, ia, sa vakavuna ga na rai ni mataqu!
31 "Oqo eda sa kila, na noda Kalou sa sega ni rogoci ira na i valavala ca; kevaka e dua sa qarava na Kalou ka muria na Lomana, na Kalou ena rogoci koya.
32 "Ni se qai tauyavu o vuravura ka yacova oqo, e se sega ni rogoci ni dua e vakavuna na rai ni mataboko ea sucu vata mai.
33 "Kevaka sa sega ni mai vua na Kalou na tamata oqo, ena sega ni cakava rawa e dua na ka."
34 Era sa sauma vua ka vaka: "O iko a sucu mai ena i valavala ca, ka o sa via vakavulici keimami?" Era sa tawasei Koya tani yani.
35 Sa rogoca o Jisu ni ra sa wasei koya tani na Jiu; ia, ni rau sa qai mai sota, sa tarogi koya o Jisu, "O sa vakabauta na Luve ni Kalou?"
36 Sa sauma mai o koya, "Turaga o cei o Koya, me'u vakabauti Koya.
37 Sa tukuna vua o Jisu, "O sa raici Koya sara tu ga oqo, o Koya ga sa vosa tiko oqo vei iko."
38 Sa qai tukuna, "Au sa vakabauta turaga!" A sa lotu Vua.
39 Sa tukuna vua o Jisu, "Au sa lako mai ki vuravura me'u mai lewa, o ira sa sega ni rai, mera rai kei ira sa rai me ra mataboko.
40 Eso na Farisi era sa rogoca na vosa ka taroga, "Keimami sa mataboko talega Oi keimami?"
41 Sa tukuna vei ira o Jisu, "Kevaka o ni sa mataboko, sa sega veikemuni na i valavala ca, ia, oqo ni o ni sa tukuna ni "Kemuni sa rai" sa tu ga kina vei kemuni na i valavala.


Chapter 10

1 "Sa dina sara, Au sa tukuna vei kemuni, "O koya sa curu yani ki vei ira na sipi ka sega mai na katuba, ka sa kaba yani mai na dua tale na sala, sa butako ka daubutako e na i valavala kaukauwa.
2 "O koya sa curu mai ena katuba, sai vakatawa ni sipi o koya.
3 "Sa dolava vua na i vakatawa ni katuba, era sa rogoca na domona na sipi; sa kacivi ira na sipi ena yacadra ka tuberi ira yani ki tuba.
4 "Ni sa kauti ira mai na nona sipi ki tuba, sa liu tiko ka ra sa muri yani na nona sipi, ni ra sa kila na domona.
5 "Era sa sega ni muria rawa e dua na vulagi, era na dro mai vua, ni ra sa sega ni kila na domo ni vulagi."
6 Sa vakayagataka o Jisu na i vakaraitaki oqo, ia, era sa sega ga ni kila na kena i balebale, ena veika sa vosa oti kina koKoya.
7 Sa qai tukuna tale vei ira o Jisu, "Sa dina sara, Au sa tukuna vei kemuni, oi Au na katuba ni sipi.
8 "O ira sa liu mai vei Au era sa butako ka daubutako, o ira na sipi sa sega ni via rogoci ira.
9 Oi Au na katuba, o koya sa curu mai vei Au, ena vakabulai, ena lako yani ka lako mai ni sa kune kakana tiko.
10 Sa lako mai na daubutako me butako, me vakamatea, ka me vakarusa sara, Au sa lako mai me ra rawata na bula, me rawati vakalevu sara.
11 Sai Au na i vakatawa ni sipi vinaka sa solia na nona bula ena vukudra na nona sipi.
12 "O koya sa voli ena nona cakacaka, sa sega ni vakatawa, sa sega ni nona na sipi, ni sa raica na olifa ni sa lako tiko mai, sa biuti ira na sipi ka sa dro yani; sa toboki ira na sipi na olifa ka vakatolosevi ira.
13 "O koya sa voli na nona cakacaka sa dro baleta ni sa sega ni kauwaitaka na sipi.
14 "Oi Au na i vakatawa ni sipi vinaka; Au sa kilai ira na noqu sipi, o ira na Noqu era sa kilai Au.
15 "Me vaka sa kilai Au o Tamaqu, Au sa kilai Tamaqu talega, Au sa solia na Noqu bula ena vukudra na sipi.
16 "Sa so tale na noqu sipi era sa sega ni tiko vata kei ira oqo; o ira talega oqori mera kau mai, era na rogoca na domoqu. Era na duabau ga na sipi, ni sa dua ga na i vakatawa.
17 "Oqo sa lomani Au kina o tamaqu, baleta Ni'u sa solia na Noqu bula, ka Me'u na taura tale.
18 "Sa sega ni dua e rawa ni taura mai vei Au, Au sa solia ga vakataki Au. Sa tu vei Au na kaukauwa me'u solia sa tu talega vei Au na kaukauwa Me'u taura tale. Na i vakaro oqo Au sa taura mai vei Tamaqu."
19 Sa basika tale e dua na duidui vei ira na Jiu ni ra sa rogoca oqo.
20 E levu vei ira sa tukuna, "Sa tiko vua na tevoro ka sa lialia talega. Ena cava o ni sa via vakarorogo kina ki Vua?"
21 Era sa tukuna tale eso, "Oqo sa sega ni nona vosa e dua sa tiko vua na tevoro. E rawa beka vua na tevoro me dolava na mataboko?"
22 Sa caka tiko na Solevu ni Veivakacabori e Jerusalemi ka vulai liliwa talega.
23 Sa lako yani o Jisu ki na valenisoro ena varada nei Solomone.
24 Era sa voliti Koya na Jiu ka tarogi Koya, "Me vakaevei soti na dede ni vakatataro sa tiko oqo? Kevaka o sa Karisito, tukuna ga mai."
25 Sa sauma vei ira o Jisu, "Au sa tukuna oti vei kemuni, ia, o ni sa sega ni vakabauta. Na veika kece Au cakava ena yaca i Tamaqu, e vakadinadinataki Au.
26 "Ia, o ni sa sega ni vakabauta baleta ni kemuni sa sega ni Noqu sipi, me vaka Au sa tukuna vei kemuni.
27 "O ira na Noqu sipi era rogoca na domoqu, Au sa kilai ira, ni ra sa muri Au.
28 "Au sa solia vei ira na bula e Sega ni mudu, me ra kakua ni rusa, se me dua e kauti ira tani mai na ligaqu.
29 "O Tamaqu, o Koya ga sa soli ira oqo mai vei Au, sa cecere duadua; sa sega ni dua e rawa ni kauti ira tani mai na liga i Tamaqu.
30 "Oi Au kei Tamaqu sa dua ga."
31 Era sa tomi vatu na Jiu me vakaviriki Jisu.
32 Sa vosa tale vei ira o Jisu, "Sa levu na cakacaka vinaka Au sa vakaraitaka vei kemuni mai vei Tamaqu. Na cakacaka cava vei ira oqori o ni sa via vakaviriki Au kina ena vatu?"
33 Era sa sauma Vua na Jiu ka vaka: "Keimami sa sega ni via vakaviriki Iko ena vuku ni cakacaka vinaka, ena vuku ni vosa vakacataka na Kalou, baleta ni o iko na Tamata ka o sa tukuna ni o Kalou."
34 Sa sauma vei ira o Jisu, "Sa sega beka ni volai ena i Vunau, Au sa tukuna, o ni sa Kalou?"
35 "Kevaka sa kacivi ira na Kalou, sa lako mai vei na vosa ni Kalou, sa sega ni rawa ni basuki na vosa ni Kalou,
36 "O ni sa vosa tiko beka ena vuku i Koya sa vakasavasavataki ka talai mai vua na Kalou ki vuravura. O ni sa vosa vakacacataka na Kalou baleta Ni'u sa tukuna Ni'u sa luve ni Kalou?
37 "Kevaka Au sa sega ni cakava na cakacaka nei Tamaqu, ni kua ni vakabauti Au;
38 "Ia, kevaka Au sa cakava, e dina ni kemuni sa sega ni vakabauti Au, mo ni vakabauta mada ga na cakacaka, mo ni kila kina ka vakabauta ni sa tiko vei Au o Tamaqu Au sa tiko vua."
39 Era sa vakasaqara tale na sala me vesuki Koya kina, sa lako tani yani o Koya mai na ligadra.
40 Sa lako yani ki na Joritani, ki na vanua sa veipapitaisotaki tiko kina o Joni, ka tiko kina.
41 Era sa lako mai vua na lewe vuqa ka tukuna, "Sa sega ni cakava o Joni e dua nai vakatakilakila, ia, na ka kecega e tukuna me baleta na Tamata oqo, sa dina taucoko.
42 Era lewe levu sa vakabauti Koya, mai kea.


Chapter 11

1 E dua na tamata mai Pecani, o Lasarusa a sa tauvimate. O Pecani na koro nei Meri kei Maca.
2 O Meri oqo, sa lumuti Jisu ena waiwai boi vinaka ka qusia na yavai Jisu ena drau ni uluna, ka gane i Lasarusa o koya sa tauvimate.
3 E rau sa lako cake na veitacini yalewa oqo vei Jisu ka tukuna, "Turaga, mo ni rogoca, o koya o ni sa daulomana, sa tauvimate."
4 Ni sa rogoca oqori o Jisu, sa tukuna sara, "Na tauvimate oqori e na sega ni vakamatei koya, ena vakalagilagi ga kina na Kalou ka na laveti cake kina na Luve ni Kalou.
5 O Jisu sa dau lomani iratou na veiganeni, o Maca kei Meri kei Lasarusa.
6 Ni sa rogoca o Jisu ni sa tauvimate o Lasarusa, sa tiko tale me rua na siga e kea.
7 Sa oti oqo, sa tukuna vei ira na tisaipeli, "Me da lako tale ki Jutia."
8 Era sa tukuna vua o ira na tisaipeli, "Rapai, sa qai oti ga oqo vakalailai ena nodra via vakaviriki iko ena vatu na Jiu, o sa baci via lako tale ki kea?"
9 Sa sauma o Jisu, "Sa sega beka ni tinikarua na auwa ena dua na siga? Kevaka e dua sa lako ena siga, ena sega ni tacaqe, baleta ni sa raica na rarama ni vuravura oqo.
10 "Kevaka e dua sa lako ena bogi, sa tacaqe, baleta na rarama sa sega ni tiko vua."
11 Sa tukuna vei ira na veika oqo, ni oti sa qai tukuna tale vei ira, "Sa moce ga na wekada o Lasarusa, au sa lako mada Me'u vakayadrati koya."
12 Era sa tukuna na Nona tisaipeli, Turaga ena vinaka o koya kevaka sa moce ga."
13 Ia, sa tukuna sara o Jisu ni sa mate, era nanuma ga ni sa vosa tiko o Koya ena vuku ni sa vakacegu tikoga ka moce tiko.
14 Sa qai tukuna vakadodonu sara vei ira, "Sa mate o Lasarusa."
15 "Au sa marau ena vukumuni, Ni'u a sega ni tiko mai kea, mo ni vakabauti Koya kina."
16 O Tomasi, o Titimo talega sa tukuna vei ira na vo ni Tisaipeli, "Me da sa lako yani, me da mate talega vata kei koya."
17 Sa lako mai o Jisu, ka kila, ni sa bogi va oti mai nai bulubulu.
18 O Pecani sa voleka e Jerusalemi, ka sa rua ga na maile na kena voleka.
19 Sa levu vei ira na Jiu sa soqoni yani vei Maca kei Meri me vakacegui rau, ena vuku ni ganedrau.
20 O Maca, ni sa rogoca na lako mai nei Jisu, sa lako yani me sotavi Koya, o Meri sa dabe tiko ga mai vale.
21 Sa vosa o Maca vei Jisu, Turaga kevaka o ni a tiko eke, kea sega ni mate na ganequ.
22 Oqo mada ga au sa kila, na ka o ni na kerea vua na Kalou, na Kalou ena solia.
23 Sa tukuna vei Maca o Jisu, "Na ganemu ena tucake tale."
24 Sa sauma o Maca, "Au sa kila ni na tucake tale ena siga mai muri."
25 Sa tukuna o Jisu, "Oi Au na tucake tale kei na bula, o koya sa vakabauti au, e dina ni na mate ia ena bula ga.
26 "Kei koya sa vakabauti Au ni se bula tiko, ena sega sara ni mate. O sa vakabauta oqo?"
27 Sa tukuna vei Jisu, "Io Turaga, au sa vakabauta ni sai kemuni na Karisito, na Luve ni Kalou, o koya e dodonu me lako mai ki vuravura."
28 Ni sa cavuta oti na veika oqori, sa lako yani ka kacivi Meri Lo mai ka tukuna vua, "Sa lako mai nai Vakavuvuli ka sa kacivi iko tiko."
29 Ni sa rogoca oti o koya na ka oqo, sa tucake sara ka lako mai vei Jisu.
30 E se bera tiko ni yaco mai nakoro o Jisu, ni se tiko ga ena vanua rau a sota kina kei Maca.
31 O ira na Jiu sa tiko vata kei Meri e vale ka vakacegui koya tiko, ni ra sa raica ni sa tucake o Meri ka lako yani ki tuba – era sa muri koya yani ena vakanananu ni sa lako ki na i bulubulu me tagi kina.
32 Ni sa lako mai o Meri vei Jisu, sa raici Koya ka cuva ki Yavana ka tukuna, "Turaga kevaka o ni a tiko eke, ke a sega ni mate na ganequ."
33 Ni sa raica o Jisu ni sa tagi tiko o Meri kei ira na Jiu era sa tiko vata tukuna, sa vutugu sara ena yalona ka rarawa vakalevu.
34 Sa tukuna sara mai, "O ni sa buluti koya e vei?" Era sa tukuna sara vua, "Turaga ni lako mai mo ni mai raica."
35 Sa tagi o Jisu.
36 Era sa tukuna na Jiu, "mo ni raica mada na levu ni Nona sa rui lomani Lasarusa."
37 Era sa tukuna sara mai eso, "Na Tamata mada ga oqo e vakavuna na nona rai na mataboko, ena rawa tale beka ga me vakavuna me kua ni mate na tamata oqo?"
38 O Jisu sa vutugu tikoga e Lomana, sa lako mai ki na i bulubulu. Sa dua na qara vatu ka sa vakaisogo ena dua tale na vatu.
39 Sa tukuna mai o Jisu, "Me kau tani na vatu." O Maca na ganei Lasarusa sa vosa mai vei Jisu ka vaka: "Turaga, oqo e dodonu me sa bona tu na yago, ni sa oti e va na siga na nona mate."
40 Sa tukuna vua o Jisu, "E sega beka Ni'u a tukuna vei iko, kevaka o sa vakabauta o na raica na lagilagi ni Kalou?"
41 Era sa qai vakaqiqica tani na vatu mai na vanua sa tiko kina na mate. Sa rai cake o Jisu ka tukuna, "Tamaqu, Au sa vakavinavinaka ni o ni sa rogoci Au.
42 Au sa kila ni Kemuni sa dau rogoca tikoga, ia, me baleti ira na tamata sa tu oqo, Au sa vosa kina vakaoqo, me ra kila dina ga ni o ni sa talai Au mai."
43 Ni sa tukuna tiko na veika oqo, sa kaci yani vakarogolevu,"Lasarusa lako mai!"
44 O koya sa mate oti – sa lako mai ni se vesuki tu ga na ligana kei na yavana ena i sulu ni veibulu, na uluna e se ubi tu ga ena i sulu, sa vosa yani o Jisu, mo ni sereki koya ka laiva me lako.
45 E levu vei ira na Jiu sa lako mai vei Meri, era sa raica na veika oqo – era sa vakabauti Jisu.
46 E so vei ira, era sa lako vei ira na Farisi ka tukuna vei ira na veika sa cakava o Jisu.
47 O ira na Bete levu kei ira na Farisi, era sa soqona e dua na matabose ka tukuna, "Na cava me keimami cakava? Ni sa cakava na Tamata oqo na ka lelevu.
48 "Kevaka eda na biuti Koya tiko vaka oqo, na tamata era na vakabauti Koya, ka ra na lako mai na kai Roma era na qai mai taura na noda i tikotiko kei na noda vanua.
49 E dua vei ira na bete Levu na yacana o Kaiava na bete levu ni yabaki o ya, sa tukuna vei ira – o ni sa sega ni kila e dua na ka,
50 "Se o ni sa kila beka, ni sa dodonu me mate e dua ena vukudra na tamata, me ra kakua ni rusa kina na veivanua kecega."
51 Sa sega ni kacivaka oqo ena nona kaukauwa ga; ni sa bete levu ni yabaki koya, sa parofisaitaka ni na mate o Jisu ena vuku ni veimatanitu.
52 E sega ena vuku ni vanua walega, ena vakasoqoni ira me vaka e dua ga na luveni Kalou era sa veiseyaki yani ki vuravura.
53 Mai na siga o ya ka lako yani era sa bosebose vata me vakamatei Koya.
54 Sa muduka o Jisu na Nona bula veicurumaki kei ira na Jiu ka sa lako sara yani ki na dua na vanua voleka ki na vanua liwa, ki na koro o Ifereimi. Sa tiko mai kea kei ira na Nona tisaipeli.
55 Na nodra "Lakosivia" Na Jiu sa toro voleka tiko mai, ka ra sa lewe levu sa lako cake ki Jerusalemi me tiko kina ni bera na Lakosivia, me ra vakasavasavataki ira.
56 Era sa vakasaqarai Jisu, era sa veivosaki vakaira ni ra sa tiko ena valenisoro, "Na cava o ni sa nanuma – ena sega ni lako mai ena kana magiti?"
57 O ira na bete levu kei ira na Farisi era sa solia e dua na i vakaro, o ya, kevaka e dua sa kila na vanua sa tiko kina o Koya – me qai tukuna mai – me rawa ni ra vesuki Koya.


Chapter 12

1 Ni vo e ono na siga me vakayacori na Lakosivia, sa lako mai o Jisu ki Pecani, na koro nei Lasarusa o koya sa bula tale mai na mate.
2 Sa caka vei Koya e dua na vakayakavi, sa qaravi Koya kina o Maca, sa dua talega vei ira sa dabe vata kei Jisu o Lasarusa.
3 Sa taura o Meri e dua na waiwai i sau levu ka boi vinaka sara ka lumuta na yavai Jisu, ka qai qua na yavai Jisu ena drau ni uluna. Sa botea na loma ni vale taucoko na i boi sa reguregu ni waiwai.
4 Sa dua vei ira na Nona tisaipeli o Jutasa Isikarioti na luvei Saimoni, o koya ga ena volitaki Koya, sa tukuna mai,
5 'Ena cava sa sega ni volitaki kina na waiwai boi sa reguregu oqo me vitusagavulu ka lima na dola, me qai soli vei ira na dravudravua?"
6 Sa cavuta o koya na veika oqo, e sega ni baleta ni a kauwaitaki ira na dravudravua, baleta ga ni sa daubutako, ka sa tiko vua e dua na kato ni i lavo: Sa dauvakayagataka na i lavo sa dau biu tiko e loma.
7 Sa tukuna kina o Jisu, "Laivi koya mada ga ni sa maroroya tiko oqori o koya me baleta na siga ni Noqu bulu.
8 Sa tu vata kei kemuni oqo na dravudravua, ia, oi Au e sega.
9 Era sa kila e lewe levu na Jiu ni sa tiko mai kea o Jisu, era sa sega ni lako mai ena vukui Jisu ga – me ra mai raici Lasarusa talega na tamata sa vakaturi cake mai na mate.
10 Era sa veivosaki talega na bete levu me rawa ni ra vakamatei Lasarusa talega.
11 Ena vuku ni rogorogo oqo, sa lewe vuqa kina na Jiu, era sa lako yani ka vakabauti Jisu.
12 Ena siga ka tarava, era sa lewe vuqa sa lako mai ki na Solevu, ni ra sa rogoca ni sa lako mai o Jisu ki Jerusalemi,
13 era sa taura na drau ni niu ka lako yani me sotavi Koya ka kailavaka: "Osana, sa kalouvinaka o Koya sa lako mai ena yaca ni Turaga! Na Tui Isireli."
14 O Jisu ni sa raica na luve ni asa, sa vodoka sara, me vaka sa volai.
15 "Kua ni rere goneyalewa ni Saioni, Raica sa lako mai na Nomu Tui ka sa vodo mai ena dua na luve ni asa."
16 O ira na Nona tisaipeli era sa sega ni kila taumada tiko na ka oqo, ia, ni sa kau cake o Jisu era sa qai nanuma ka kila, ni veika oqo sa volai oti tu, me baleti Koya.
17 O ira na tamata sa tiko vata kei Koya ni sa kacivi Lasarusa mai nai bulubulu ka sa tucake mai na mate, sa vakadinadinataka na veika oqo,
18 Era sa mai sotavi Koya talega na tamata, baleta ni ra sa rogoca na veika sa cakava o Koya.
19 Era sa veivosaki vakai ira na Farisi, ka vaka: Kemuni sa sega ni rawata e dua na ka, mo ni raica oqo, o vuravura taucoko era sa lako vua.
20 Eso na kai Kirisi era sa lako mai ena solevu ni kana magiti.
21 Era sa lako mai vei Filipe na kai Pecisaita e Kaleli ka taroga, "Ia saka, keimami sa via raici Jisu"
22 O Filipe sa tukuna sara vei Adriu, o Adriu kei Filipe e rau sa tukuna sara vei Jisu.
23 Sa sauma vei rau o Jisu, "Sa lako mai oqo na auwa me vakalagilagi kina na Luve ni Tamata."
24 "Sa dina sara, Au sa tukuna vei kemuni, kevaka sa sega ni lutu ki na qele na sila ka mate, sa tu ga vakai koya, kevaka sa mate ena vuataka na vuana e levu.
25 O koya sa lomana na nona bula ena vakayalia, o koya sa sega ni lomana na nona bula ena vuravura oqo, a sa maroroya ki na bula sega ni mudu.
26 O koya sa qaravi Au, me muri Au, na vanua Au sa tiko kina – ena tiko talega kina o koya sa qaravi Au. Ni o sa qaravi Au – o Tamaqu ena dokai iko.
27 "Sa rarawa vakalevu na yaloqu, na cava Me'u na tukuna rawa? Tamaqu maroroi Au mai na auwa oqo, ia, na i naki ga Au lako mai kina ena auwa oqo.
28 "Tamaqu, mo ni vakacerecerea na Yacamuni" Sa rorogo mai e dua na domo mai lomalagi, "Au sa vakacerecerea oti Au na vakacerecerea tale."
29 O ira na tamata sa tu voleka ka rogoca era sa tukuna, "Sa vosa Vua e dua na agilosi.
30 Sa sauma mai o Jisu, sa sega ni lako mai na rorogo oqo me baleti Au, me baleti kemuni ga.
31 "Sa lewai oqo o vuravura, o koya sa lewa na vuravura ena biu tani.
32 "Oi Au, Kevaka, Au sa laveti cake mai vuravura, Au na dreti ira mai na tamata ki vei Au."
33 Sa tukuna oqo o Koya, na mate ena mate kina.
34 Era sa sauma vua na tamata, "Keimami sa rogoca mai na i vunau ni Koya na Karisito ena tiko me Sega ni mudu; mo tukuna rawa vakacava, "Na Luve ni Tamata ena laveti cake? O cei o Koya oqo na luve ni Tamata?"
35 Sa tukuna sara vei ira o Jisu, "Vakalailai walega na nona tiko vata kei kemudou na rarama. Mo ni toso ni se tiko na rarama de qai toboki kemuni na butobuto ka siviti kemuni. O koya sa lako ena butobuto sa sega ni kila na vanua e lakova.
36 "Ni se tiko vei kemuni na rarama, ni vakabauta na rarama, mo ni yaco kina me luve ni rarama." Sa tukuna o Jisu na veika oqo ka sa lako yani, ka sa vuni mai vei ira.
37 E dina sa cakava o Koya e levu na i vakatakilakila vei ira, era sega ga ni vakabauti koya,
38 me vakayacori ga kina na vosa nei Aisea na Parofita, e a tukuna kina: "Turaga o cei ena vakabauta na neitou i tukutuku? Ki vei cei ena vakarautaki kina na liga ni Turaga?"
39 Era sa sega kina ni vakabauta tale ni sa tukuna o Aisea:
40 "Sa vakamatabokotaki ira ka vakaukauwataka na yalodra, de na qai rai na matadra ka kila mai ena yalodra ka lesu mai vei Au Ka Me'u na vakabulai ira kina."
41 Sa tukuna na veika oqo o Aisea ni sa raica na Nona i ukuuku ka vosa kina ena Vukuna.
42 Vei ira na veiliutaki, e levu sa vakabauti Koya ia, baleti ira ga na Farisi, era sa sega ga ni vakatusa ena matana votu – de ra qai wasei tani mai na vale ni veitavaki;
43 ni ra sa vinakata vakalevu na veidokai vakatamata mai na kena e dokai kina na Kalou.
44 Sa kaci yani vakadomoilevu o Jisu ka vaka: "O koya sa vakabauti Au, sa sega ni vakabauti Au ga, sa vakabauti koya talega sa talai Au mai.
45 "O koya sa raici Au, sa raici Koya talega sa talai Au mai.
46 "Au sa lako mai me vaka na rarama ki vuravura, o koya sa vakabauti Au sa sega ni tiko ena butobuto.
47 "Kevaka e dua sa rogoca na Noqu vosa ka sega ni vakabauti Au, Au sa sega ni lewai koya; Ni'u sa sega ni lako mai me lewai vuravura – Me'u vakabulai vuravura ga.
48 "O koya sa cati Au, ka sega ni via rogoca na Noqu vosa, sa tu vua na veika me lewai koya kina – Na vosa Au sa cavuta e na lewai Koya ena veisiga mai muri.
49 Ni'u sa sega ni vosa ena Noqu lewa ga; o Tamaqu ga sa talai Au mai ka solia mai vei Au na i vakaro ni veika meu tukuna kei na veika Me'u vosa kina.
50 Au sa kila na Nona i vakaro sa bula sega ni mudu o koya oqo, na veika Au na tukuna – me vaka ga na veika sa tukuna mai vei Au o Tamaqu, Au na tukuna.


Chapter 13

1 Ni se bera na Kana ni Lakosivia, ni sa kila o Jisu ni sa lako mai na Nona gauna me lako tani yani mai na vuravura oqo ka lako ki vei Tamana, sa lomani ira na wekana ena vuravura oqo, sa lomani ira tiko o Koya me yacova na i otioti.
2 Sa oti na vakayakavi, na tevoro sa biuta oti e lomai Jutasa Isikarioti na luvei Saimoni me veretaki Jisu.
3 Sa kila o Jisu ni sa solia na ka kecega ki ligana o Tamana, ni sa lako talega mai vua na Kalou o Koya, ka sa lako tale tiko yani vua na Kalou,
4 sa tucake mai na vakayakavi, sa biuta vakatikitiki na nona kote – taura na i oro ka vauci Koya.
5 Ni sa oti oqo, sa sova na wai ki na dua na dave ka tekivu me savata na yavadratou na tisaipeli ka vakamamacataka ena i oro sa vauci oti tiko e tolona.
6 Sa qai lako mai vei Saimoni Pita, ka sa tarogi Koya o Pita, "Turaga Koni sa savata talega na yavaqu?"
7 Sa sauma o Jisu ka vaka: "Na ka Au sa cakava tiko oqo, dou sa sega ni kila oqo, o ni na qai kila ni sa oti vakalailai e dua tale na gauna."
8 Sa tukuna vua o Pita, "Sa sega ni dodonu Mo ni cakava oqo vei au," sa sauma o Jisu, "Kevaka Au sa sega ni cakava oqo vei iko, sa sega na nomu tikina vei Au."
9 Sa tukuna vua o Pita, "Turaga me kua ni yavaqu walega, na ligaqu kei na uluqu talega."
10 Sa tukuna vua o Jisu, "O koya sa sili, e dodonu me savata ga na yavana, sa savasava taucoko oqori, o sa savasava taucoko o iko, ia, sa sega ga ni kemuni taucoko."
11 Ni sa kila o Koya se o cei ena veretaki Koya; sa tukuna "dou sa sega ni savasava kece."
12 Ni sa savata oti na yavadratou ka taura tale na Nona kote ka dabe sobu, sa qai tukuna vei iratou; "Dou sa kila na veika Au sa cakava oqo vei kemudou?
13 "Dou sa kacivi Au Me'u nomudou Qasenivuli ka nomudou Turaga, Sai Au dina, me vaka dou sa tukuna.
14 "Kevaka Au sa nomudou Turaga ka nomudou Qasenivuli ka sa savata talega na yavamudou, e dodonu talega mo dou dau veivuiyava vakataki kemudou.
15 "Au sa vakaraitaka e dua nai vakarau, mo dou dau cakava me vaka Au sa cakava vei kemudou.
16 "Sa dina sara Au sa tukuna vei kemudou, na dauveiqaravi sa sega ni levu mai vua na nona turaga; se o koya sa talai me levu mai vei koya sa veitalai.
17 "Kevaka dou sa kila na veika oqo, dou na marau vakalevu kevaka dou sa dau cakava oqo.
18 "Au sa sega ni vosa ena vukumudou kece, Au sa kila o cei Au sa digitaka; ia, me vakayacori ga na i Vola Tabu, "O koya sa kana madrai vata kei Au sa leqeti Au.
19 "Au sa tukuna oqo ni se bera ni yaco, ni sa na qai yaco oqo, dou na qai vakabauta ni sai Au ga
20 "Sa dina sara, Au sa tukuna vei kemudou, o koya sa ciqomi koya Au sa tala mai, sa ciqomi Au. O koya sa ciqomi Au, sa ciqomi Koya sa talai Au mai."
21 Ni sa tukuna oti na veika oqo o Jisu, sa leqa vakalevu na yalona ka tukuna, "Sa dina sara, Au sa tukuna vei kemudou, e dua ga vei kemudou ena veretaki Au."
22 E ratou sa veiraici na tisaipeli ni ratou via kila se o cei sa vosa kina o Koya.
23 E dua sa kabi voleka sara ki vei Jisu, na tisaipeli ga sa daulomana vakalevu o Jisu.
24 Sa tarogi Jisu o Pita se o cei sa vosa tiko kina o Koya.
25 Sa kabiti Jisu matua sara, ka tarogi Koya, "Turaga o cei sara mada oqo?"
26 Sa sauma o Jisu, "O koya ga Au na solia vua na madrai Ni'u sa tonia oti." Ni sa tonia oti na Madrai, sa solia sara vei Jutasa Isikarioti na luvei Simioni.
27 Ni sa oti o ya, sa curumi koya o Setani. Sa vosa vua o Jisu, "Na ka o na cakava, cakava sara vakatotolo."
28 Sa sega ni dua ena teveli ni kana o ya sa kila na i balebale ni nona vosa vua.
29 E so era nanuma, baleta ni tiko vei Jutasa na kato ni i lavo, sa tukuna kina vua o Jisu, "Volia mai na vei ka e gadrevi ena solevu" se na veika e dodonu me soli vei ira na dravudravua.
30 Ni sa taura oti na madrai, sa lako yani vakatotolo ki tuba. Sa bogi sara mai.
31 Ni sa lako ki tuba, sa tukuna o Jisu, "Sa qai vakarokorokotaki na Luve ni Tamata, ia na Kalou sa vakarokorokotaki vata kei Koya.
32 Kevaka sa vakalavelaveti na Kalou mai Vua, na Kalou talega ena laveti Koya cake vakai Koya vakatotolo sara.
33 "Kemudou na gone, Au na tiko vata kei kemudou vakalailai ga. Dou na vakasaqarai Au, me vaka Au sa tukuna vei ira na Jiu, "Na vanua Au sa na lako kina, dou na sega ni lako rawa yani kina," Au sa tukuna vei kemudou oqo."
34 Nai Vakaro Vou Au sa solia vei kemudou, "Mo dou veilomani vakai kemudou; me vaka Au sa lomani kemudou, dou veilomani vakakina.
35 Ena ka oqori, era na kila kecega ni dou sa Noqu tisaipeli, kevaka sa tu vei kemudou na veilomani vaka i kemudou. O Jisu Sa Yalataka Na Veicakitaki Nei Pita
36 Sa taro o Pita, "Turaga o ni sa lako ki vei? "Sa sauma o Jisu, " Na vanua Au na lako kina sa sega ni rawa mo lako yani kina ni oti oqo."
37 Sa vosa mai o Pita, "Turaga na cava au sega ni rawa ni muri kemuni kina oqo? Au na solia na noqu bula ena Vukumuni."
38 Sa sauma vua o Jisu, "O na solia dina na nomu bula ena vukuqu? Sa dina sara, Au sa tukuna vei iko, ena sega mada ni tagi na toa, o na cakitaki Au vakatolu.


Chapter 14

1 "Dou kua ni vakatara me leqa na yalomudou; dou vakabauta na Kalou, dou vakabauti Au talega.
2 "Sa levu na tikina ena vale nei Tamaqu; kevaka e sega, Au sa tukuna oti vei kemudou, Au na lako Me'u vakarautaka na tikina me nomudou.
3 "Kevaka Au sa lako Me'u vakarautaka na tikina me nomudou, Au na lesu tale mai me'u ciqomi kemudou ki vei Au; na vanua Au sa na tiko kina, dou na tiko talega kina.
4 "Na vanua Au na lako kina dou sa kila, na kena sala talega dou sa kila."
5 Sa tukuna vua o Tomasi, "Turaga keitou sa sega ni kila na vanua kemuni sa lako kina, keitou na kila vaka E vei na kena sala?"
6 Sa sauma vua o Jisu, "Oi Au ga na sala, na dina, na bula. Sa sega ni rawa na lako vua na Kalou, (Tamaqu) vakavo ke lako mai vei Au.
7 "Kevaka dou sa kilai Au, dou sa kilai Tamaqu talega; mai na gauna sara ga oqo dou sa kilai Koya ka raici Koya."
8 Sa tukuna sara Vua o Filipe, "Turaga Mo ni vakaraitaka vei keitou na Tamamuni (dina), sa na qai rauti keitou."
9 Sa sauma vua o Jisu, "Au sa tiko vakadede kei kemudou, ia, dou se sega ga ni kilai Au, Filipe? O koya sa raici Au, sa raica na Tamaqu; dou tukuna rawa vakacava vei Au, Me'u vakaraitaka na Tamaqu?"
10 Dou sa sega ni vakabauta Ni'u sa tu vei Tamaqu, o Tamaqu sa tu vei Au? Na vosa Au sa vosa kina vei kemudou, Au sa sega ni vosa vakai Au ga, o Tamaqu sa tiko vei Au sa cakava na cakacaka oqo.
11 "Dou vakabauti Au baleta Ni'u sa tu vei Tamaqu kei Tamaqu sa tu vei Au, se, dou vakabauti Au ena vuku ni veika sa caka oti."
12 "Sa dina sara. Au sa tukuna vei kemudou, o koya sa vakabauti Au, na veika Au sa cakava ena cakava talega o koya; na cakacaka lelevu mai na kena oqo ena cakava o koya, baleta Ni'u sa lako vei Tamaqu.
13 "Na ka kecega dou na kerea ena yacaqu, Au na cakava, me laveti cake kina na Tamana mai vei Luvena.
14 "Na cava ga dou na kerea ena yacaqu, Au na cakava. Sa Yalataka O Jisu E Dua Tale Na Dauniveivuke
15 "Kevaka dou sa lomani Au, dou maroroya na Noqu i vakaro.
16 "Au na qai masuti Tamaqu ena solia vei kemudou o Koya e dua na Dauniveivukei, me tiko vata kei kemudou ka sega ni mudu,
17 "Sai Koya na Yalo ni Dina, o vuravura ena sega ni rawa ni ciqoma baleta ni sa sega ni raici Koya se kilai Koya; ia dou sa kilai Koya ni sa tiko vei kemudou o Koya ka dau curumi kemudou.
18 "Au na sega ni biuti kemudou mo dou luveniyali Au na lako mai vei kemudou.
19 "Vakalailai mada, ena sega ni raici Au tale o vuravura, ia, dou na raici Au Oi kemudou, baleta Ni'u sa bula, dou na bula vakatalega kina.
20 "Ena siga o ya dou na kila kina Ni'u sa tu vei Tamaqu, oi kemudou vei Au, oi Au talega vei kemudou.
21 "O koya sa tiko vua na Noqui vakaro ka maroroya tiko, sai koya ga oqo sa lomani Au. O koya sa lomani Au, sa na lomani koya talega o Tamaqu. Au na lomani koya ka Au na vakatakilai Au vua."
22 O Jiutasa (sega ni o Isikarioti) sa tukuna vua, "Turaga, ena rawa vaka cava oqo ena Nomuni vakatakilai Kemuni vei keimami ka sega ki vuravura?"
23 Sa sauma vua o Jisu, "kevaka e dua sa lomani Au, ena maroroya na Noqu vosa; o Tamaqu talega ena lomani koya, keirau na lako mai vua, ka keirau na vakavale vua.
24 O koya sa sega ni lomani Au sa sega ni maroroya na Noqu vosa; na vosa dou sa rogoca sa sega ni Noqu vosa, sa nei Tamaqu o Koya ga sa talai Au mai.
25 "Na veika oqo Au sa tukuna vei kemudou Ni'u sa dau tiko vata kei kemudou.
26 "Ia, na Dauveivuke na Yalo Tabu, o Koya ena tala mai o Tamaqu ena Yacaqu, ena vakavulici kemudou ena veika kecega, ka na kauta lesu mai vei kemudou na vakananumi ni veika kece Au sa dau tukuna vei kemudou.
27 Au sa biuta tiko vei kemudou na veivakacegui. Na noqu veivakacegui Au sa solia vei kemudou; sa sega ni vaka sa solia o vuravura na veika Au sa solia vei kemudou. Me kua ni vakaleqai na yalomudou se mo dou rere.
28 Dou sa rogoci Au, ni'u sa tukuna vei kemudou, Au sa na lako, ka Au na lesu tale mai vei kemudou. Kevaka dou sa lomani Au, dou na marau baleta Ni'u sa tukuna, Au sa lako vei Tamaqu; ni sa levu o Tamaqu mai vei Au.
29 "Oqo Au sa tukuna rawa vei kemudou ni se bera ni yaco mai, ni sa qai yaco oqo, dou na qai vakabauti Au.
30 "Au na sega ni veivosaki vakalevu kei kemudou, ni sa lako mai na daunilewa ni vuravura oqo, sa sega na ka e nona me tu vei Au.
31 "Ia o vuravura ena kila Ni'u sa lomani Tamaqu, me vaka sa solia mai vei Au o Tamaqu nai vakaro, Au sa vakakina. Dou tucake me da lako tani eke.


Chapter 15

1 "Oi Au na vaini dina, o Tamaqu sa dau raica na tubu vinaka ni vaini.
2 "Na veitaba ni Vaini kece sa sega ni vuataka na vuana, sa kauta laivi o Tamaqu; ia na veitabana sa vuataka na vuana, sa kotiva vakavinaka o Koya, me rawa ni vua vakalevu sara.
3 "Dou sa vakasavasavataki oti mai na vosa Au sa vosataka oti vei kemudou.
4 "Dou sema mai vei Au, Au na sema ga yani vei kemudou, Na tabana ena sega ni rawa ni vua vakataki koya, vakavo ke sa sema yani ki na Vaini, sa vaka kina oi kemudou kevaka dou sa sema vei Au.
5 "Oi Au na vaini, oi kemudou na veitabana. O koya sa sema tiko mai vei Au, io Au talega vei koya, sa vua vakalevu; kevaka Me'u sega, dou na sega ni cakava rawa e dua na ka.
6 "Kevaka sa sega ni sema mai vei Au e dua, sa biu laivi me vaka na tabanikau sa na madu yani; era na tomika yani ka viritaka yani ki na bukawaqa ka sa kama yani.
7 "Kevaka dou sa sema mai vei Au, kei na noqu vosa sa curu me sema yani vei kemudou, dou na kerea na cava ga dou gadreva, ena caka vei kemudou.
8 "Na veika oqo ena vakaqoroqoroi kina o Tamaqu ni dou sa vuataka mai e levu na vuata; dou na qai Noqu tisaipeli.
9 "Me vaka sa lomani Au o Tamaqu, Au sa lomani kemudou vakakina; dou sema tikoga mai ena Noqu loloma.
10 "Kevaka dou sa maroroya na Noqu i Vakaro, dou na sema tikoga ena Noqu loloma, me vaka ga na Noqu maroroya tiko na i vakaroi Tamaqu ka sema tikoga ena Nona loloma.
11 "Au sa tukuna tiko na veika oqo vei kemudou, me tikoga kina na Noqu reki vei kemudou, me sinai tikoga kina na nomudou reki.
12 "Oqo na Noqui vakaro, mo dou veilomani me vaka Au sa lomani kemudou.
13 "Sa sega na loloma e levu cake mai na kena oqo, me dua e solia na nona bula ena vukudra na wekana.
14 "Dou sa noqui tokani voleka kevaka dou sa cakava na veika Au sa vakarota vei kemudou.
15 "Au sa sega ni kacivi kemudou me tamata cakacaka, ni sa sega ni kila na tamata cakacaka na veika sa cakava tiko na kena i taukei; Au sa kacivi kemudou mo dou Noqui tokani, ni veika kecega Au sa rogoca mai vei Tamaqu Au sa vakatakila vei kemudou.
16 "Dou sa sega ni digitaki Au, Au sa digitaki kemudou ka lesi kemudou, me rawa ni dou lako ka vua mai, me dei na vuamudou, ni veika kecega dou na kerea vei Tamada ena Yacaqu me na solia vei kemudou.
17 "Na veika oqo Au sa vakarota vei kemudou, mo dou veilomani vakai kemudou.
18 "Kevaka sa besetaki kemudou o vuravura, mo dou kila ga, ni ra a cati Au e liu ka qai muri oi kemudou.
19 Kevaka dou sa nei vuravura, o vuravura ena lomani ira ga na Nona, baleta ni dou sa sega ni nei vuravura ka Au sa digitaki kemudou tani mai vuravura, oqo na vuna sa cati kemudou ka besetaki kemudou kina o vuravura.
20 "Me nanumi na vosa Au sa tukuna vei kemudou, sa sega ni levu na dauveiqaravi vua na kena i taukei, kevaka era sa vakararawataki Au, era na cakava vaka kina vei kemudou. Kevaka era sa maroroya na Noqu vosa, era na maroroya talega na nomudou vosa.
21 "Na veika kecega oqo era na cakava vei kemudou ena vuku tikoga ni Yacaqu, baleta ni ra sa sega ni kilai Koya sa talai Au mai.
22 "Kevaka Au sa sega ni lako mai ka vosa vei ira, ke a sega na nodra i valavala ca, oqo sa sega kina na i ulubale ni nodra i valavala ca.
23 "O koya sa cati Au, sa cati Tamaqu talega.
24 "Kevaka me'u a sega ni cakava vei ira na cakacaka sa sega tale ni dua e rawa ni cakava, ena sega vei ira na i valavala ca; oqo, era sa raica ka cati Au kei Tamaqu talega.
25 "Sa yaco ga oqo me rawa ni vakayacori kina na vosa sa volai ena i vunau, "Era sa cati Au ni sa sega na ka e vakavuna."
26 "Ni sa lako mai na "Dauniveivukei" oqo, o Koya Au na tala vei kemudou mai vei Tamaqu, na Yalo ni Dina sa lako mai vei Tamaqu, ena vakadinadinataki Au.
27 "Dou na dau vakadinadina talega, baleta ni dou sa tiko vata kei Au mai nai vakatekivu.


Chapter 16

1 "Na veika oqo Au sa tukuna vei kemudou, mo dou kua ni tarabe kina.
2 "Era na biuti kemudou tani mai na vale ni lotu; io, sa lako tiko mai na gauna o koya sa vakamatei kemudou sa nanuma ni sa cakava tiko vua na Kalou e dua na veiqaravi.
3 "Era na cakava na veika oqo vei kemudou baleta ni ra sa sega ni kila na Tamana se oi Au.
4 "Ia, na veika oqo Au sa tukuna vei kemudou, ni na lako mai na gauna, dou na kila Ni'u a sa tukuna oti vei kemudou na veika oqo. Au a sega ni tukuna oqo mai nai vakatekivu, baleta Ni'u a tiko vata kei kemudou.
5 "Oqo, Au sa na lako vei Koya ga e talai Au mai, qai sega ni dua vei kemudou e taroga, o sa lako ki vei?
6 "Baleta ga Ni'u sa tukuna oqo vei kemudou, sa rarawa kina na yalomudou.
7 "Au sa tukuna vei kemudou na veika e dina. Oqo ga na nomudou vinaka, o ya na noqu lako yani; kevaka Au na sega ni lako yani, na Dauniveivuke ena sega ni lako mai vei kemudou; ia, kevaka Au sa lako, Au na talai Koya mai vei kemudou.
8 "Ni sa lako mai o Koya, ena mai dusimaka ki vuravura na i valavala ca, na i valavala dodonu kei na lewa dodonu,
9 "na i valavala ca baleta ni ra sega ni vakabauti Au;
10 "nai valavala dodonu baleta Ni'u sa lako vei Tamaqu ka dou na sega ni raici Au tale;
11 "na lewa dodonu baleta ni sa na lewai o koya sa dau vakaveitaliataka na vuravura oqo.
12 "E se levu tu na veika Me'u tukuna vei kemudou, sa sega ni rawa vei Au oqo.
13 "Ia, ni sa na lako mai o Koya na Yalo ni Dina oqo, ena tuberi kemudou ki na veika kecega e dina. Ena sega ni vosa ena Nona kaukauwa, na veika ga ena rogoca ena tukuna, ena tukuna talega na veika ena yaco mai muri.
14 "Ena vakacerecerei Au, ni na kauta na ka e Noqu ka tukuna vei kemudou.
15 "Na veika kece sa tu vei Tamaqu sa Noqu. Oqori, Au sa tukuna kina, ni na taura na ka kece e Noqu ka tukuna vei kemudou.
16 "Vakalailai dou na sega ni raici Au, ka vakalailai tale dou na qai raici Au, baleta Ni'u sa lako vei Tamaqu."
17 Sa so vei ira na Nona tisaipeli era sa vakataroga, "Na cava oqo ni sa tukuna vei keda, vakalailai dou na sega ni raici Au, ka vakalailai dou na raici Au tale; io, baleta Ni'u sa lako vei Tamaqu?"
18 Na cava oqo ni sa tukuna, "Vakalailai ga" "keitou sa sega ni kila na ka e tukuna tiko."
19 Sa kila o Jisu na ka oqo ka sa tukuna vei iratou, "Dou sa vakataroga tiko na veika Au sa tukuna, ni dou na sega ni raici Au, ka vakalailai dou na raici Au tale?
20 "Sa dina sara, Au sa tukuna vei kemudou, ni dou na tagi ka veitagici vakalevu, o vuravura ena marau tiko, dou na rarawa vakalevu, ia, na nomudou rarawa ena vuki me ka ni reki vakalevu.
21 "Na yalewa ni sa taratara, sa rarawa tiko baleta ni sa lako mai na nona auwa; ni sa oti ga na nona vakasucuma na gone, sa sega tale ni nanuma na mosi ea tarai koya, sa reki vakalevu ga ni sa vakasucuma mai e dua ki vuravura.
22 "Oqo dou se rarawa tiko, ia, Au na raici kemudou tale ka na reki vakalevu sara na yalomudou kei na nomudou reki ena sega ni kau tani rawa mai vei kemudou.
23 "Ena siga o ya dou na sega ni kerea vei Au e dua na ka. Sa dina sara, Au sa tukuna vei kemudou, na veika dou na kerea vei Tamaqu ena yacaqu, ena solia vei kemudou.
24 "Me yacova oqo e se sega ni dua na ka, mo dou kerea ena Yacaqu. Dou kerekere ka dou na rawata me levu kina na nomudou reki.
25 "Na veika oqo Au sa vosataka e na vosa vakatautauvata vei kemudou; sa lako tiko mai na gauna Au na sega tale ni vosa ena vosa vakatautauvata, vei kemudou, Au na tukuna vakarawarawa sara vei kemudou na vei ka baleti Tamaqu.
26 'Ena siga o ya dou na kerekere ena Yacaqu, Au sa sega talega ni tukuna vei kemudou, Ni'u na kerei Tamaqu ena vukumudou;
27 'Ni o Tamaqu vakataki Koya sa lomani kemudou, baleta ni dou sa lomani Au ka vakabauta Ni'u sa lako mai vua na Kalou.
28 "Au sa lako mai vua na Tamada, ka lako mai ki vuravura. Oqo, Au sa na biuti vuravura ka lako tale vei Tamada."
29 Era sa tukuna Vua o ira na Nona tisaipeli, "Raica, o sa vosa vakarawarawa sara tiko mai oqori, ka sa sega ni vosa e na vosa vakatautauvata.
30 "Oqo keitou sa kila ni o sa kila na ka kecega, ka sa sega ni yaga me dua e taroga yani e dua na ka. Oqo keitou sa kila kina, ni o sa lako mai vua na Kalou."
31 Sa sauma yani o Jisu, "Vakacava dou sa qai vakabauta oqo?
32 "Io, sa lako mai na auwa, io, sa lako sara tikoga mai oqo, dou na vakatolosevi, io kemudou vakayadua ga, ka Au na tiko duadua. Sega ni baleta Ni'u na tiko duadua ga, Keirau na tiko vata kei Tamaqu.
33 "Au sa tukuna na veika oqo, baleta vei Au dou na kunea kina na vakacegu.E vuravura dou na kunea kina na rarawa, dou marau ga, Au sa vakamalumalumutaki vuravura oti.


Chapter 17

1 Sa masu tiko o Jisu ni sa rai cake tiko ki Lomalagi ka vaka: "Tamaqu sa lako mai na auwa, Mo ni vakacerecerea na Luvemuni, me vakacerecerei Kemuni talega na Luvemuni.
2 "Ni Kemuni sa solia Vua na lewa kecega ena vuku ni ka vakayago kecega, me solia kina o Koya na bula Sega ni mudu vei ira kecega o ni sa solia vei Koya.
3 "Oqo, na bula sega ni mudu, mera kilai Kemuni na Kalou Dina Duadua ga, kei Jisu Karisito o Koya o ni a tala mai.
4 "Au sa vakacerecerei kemuni mai vuravura, Au sa vakaotia na cakacaka o ni a talai Au mai kina Me'u cakava.
5 "Ia, oqoi Tamaqu, Mo ni vakacerecerei Au vata kei Kemuni, ena veivakacerecerei e a tiko vei Kedaru ni se bera o vuravura.
6 "Au sa vakaraitaka na Yacamuni ki vei ira na tamata, o ni sa solia mai vei Au mai vuravura. Era sa Nomuni, o ni sa soli ira mai vei Au, era sa maroroya na Nomuni vosa.
7 "Oqo era sa kila, ni veika kecega o ni a solia mai vei Au, sa mai vei Kemuni.
8 "Ni'u sa solia vei ira na vosa o ni a solia mai vei Au; era sa taura na vosa ka kila talega Ni'u a lako mai vei Kemuni; era sa vakabauta ni Kemuni sa talai Au mai.
9 "Au sa masulaki ira, Au sa sega ni masulaki vuravura, o ira ga Koni sa solia mai vei Au, ni ra sa Nomuni.
10 'Na ka kece sa Noqu sa Nomuni, kei na ka sa Nomuni sa Noqu, Au sa vakacerecerei ena vukudra.
11 "Oqo, Tamaqu Au sa sega ni tiko e vuravura, o ira ga oqo sa tiko e vuravura, Au sa lako mai oqo vei Kemuni na Tama ni Yalosavasava, Mo ni maroroi ira oqo o ni sa solia mai vei Au ena Yacamuni, me ra dua bau me vaka Daru sa duabau.
12 "Ni'u a tiko vata kei ira mai vuravura, Au sa maroroi ira ena Yacamuni. O ira o ni sa solia mai vei Au, Au sa maroroi ira. Sa sega ni dua vei ira sa yali, vakavo ga na luve-ni-vuni ca, me vakayacori ga kina na i Vola Tabu.
13 "Oqo, Au sa lako mai vei kemuni, na veika oqo Au sa tukuna tiko e vuravura, me tiko kina vei ira na Noqu reki ka me vakataucokotaki vei ira.
14 "Au sa solia vei ira na Nomuni vosa, era sa cati mai vei ira e vuravura baleta ni ra sa sega ni vakavuravura me vaka Au sa sega ni vakavuravura.
15 "Au sa sega ni masu Mo ni kauti ira tani e vuravura, Ia, mo ni maroroi ira ga mai vei koya na vu ni ca.
16 "Era sa sega ni kai vuravura, me vaka ga Au sa sega ni kai vuravura.
17 "Mo ni tawasei ira ena Nomuni dina. Na Nomuni Vosa na dina.
18 "Ni Kemuni sa talai Au ki vuravura, Au sa talai ira kina ki vuravura.
19 "Ena vukudra Au sa tawasei Au, me rawa ni ra tawasei talega kina ena dina.
20 "Au sa sega ni masulaki ira walega na tisaipeli – o ira talega era na vakabauti Au mai ena vuku ni nodra vosa;
21 "Me yaco me ra duavata, me vakataki Kemuni Tamaqu sa tu vei Au, kei Au vei kemuni; me ra duavata kina vei Kedaru, me vakabauta kina o vuravura ni Kemuni sa talai Au mai,
22 "kei na lagilagi o ni sa solia mai vei Au, Au sa solia vei ira, me ra dua bau kina me vaka Daru sa duabau.
23 "Oi Au vei ira oi Kemuni vei Au; mera vakataucokotaki kina me dua, me kila kina o vuravura ni o ni sa talai Au mai, ka o ni sa lomani ira me vaka o ni sa lomani Au.
24 "Tamaqu, sa Noqu gagadre me ra tiko vata kei Au o ira vakayadua o ni sa solia mai vei Au; ni Kemuni sa lomani Au ni se bera ni tauyavutaki o vuravura.
25 "Na Tamaqu Yalododonu! E se sega ni kilai Kemuni o vuravura, oi au sa kilai Kemuni; oqo era sa kila ni Kemuni a talai Au mai.
26 'Au sa vakaraitaka vei ira na Yacamuni, Ka'u na vakaraitaka tiko ga, ni loloma o ni lomani Au kina, me tiko vei ira, kei Au vei ira."


Chapter 18

1 Ni sa vosataka na veivosa oqo o Jisu, sa lako yani vata kei ira na Nona tisaipeli ki na wai mai Kitironi, sa tiko kina e dua na were ka ra sa lakova yani vata kei ira na tisaipeli:-
2 O Jutasa, (o koya e veretaki Jisu) sa kila talega na vanua o ya; ni o Jisu sa dausota vakalevu kei ira na Nona tisaipeli e kea.
3 Ni sa tiko vata o Jutasa kei na so nai lawalawa sotia; kei na so mai vei ira na bete levu kei na Farisi, era sa lako vata mai na cina kei na yaragi.
4 Sa kila oti o Jisu na veika kece ena lako mai Vua – sa lako yani ka tarogi ira, "O ni sa vakasaqarai cei?"
5 Era sa sauma vua, "O Jisu mai Nasareci," Sa tukuna yani o Jisu, "Sai Au oqo." o Jutasa talega sa tiko kei ira.
6 Ni sa tukuna vei ira, "Sai Au oqo" – era sa suka ki muri ka vakabalei ki ra.
7 Sa tarogi ira tale, "O cei o ni sa vakasaqara? Era sa tukuna mai,"O Jisu na kai Nasareci."
8 Sa sauma mai o Jisu, "Au sa tukuna oti, sai Au oqo," kevaka o ni sa vakasaqarai Au, me ra lako o ira oqo."
9 "me vakayacori kina na veika sa dau tukuni, o ira o ni sa solia mai, Au sa sega ni vakayalia e dua vei ira."
10 O Saimoni Pita sa ucuna cake na nona i Seleiwau ka cebeta na daligana i matau na nona dauveiqaravi na bete levu. Na yaca ni tamata oqori o Maliko.
11 Sa tukuna o Jisu vei Pita, "Biuta lesu tale na nomui sele ki na kena taga. Me'u kua beka Ni'u gunu talega mai na bilo sa solia mai vei Au o Tamaqu?"
12 O ira na sotia kei na nodra i liuliu na Jiu era sa vesuki Jisu ka vauci Koya.
13 Era sa kauti Koya yani ki vei Anasa, ni sai koya na Momo nei Kaiava na bete levu ni yabaki o ya.
14 O Kaiava sa solia nai vakasala vei ira na Jiu ni sa ka levu oqo, me dua na tamata me mate ena vukudra na tamata.
15 Sa muri Jisu o Saimoni Pita kei na dua tale na tisaipeli. Na tisaipeli oqo sa kilai mai vei ira na bete Levu, sa lako yani vata kei Jisu ki na lomanibai ni bete levu.
16 Sa tucake tu mai o Pita mai na katuba e tuba. O koya na tisaipeli sa kilai tiko mai vei ira na bete levu, sa lako yani vei koya sa raica tiko na katuba, ka sa kauti Pita ki loma.
17 Na goneyalewa sa dauvakatawana na katuba sa tukuna mai vei Pita, "Sa sega beka ni o Nona tisaipeli talega na Tamata oqo?" sa sauma o Pita, "E sega."
18 O ira na dauveiqaravi kei ira na tamata cakacaka era sa tatalai tiko ena bukawaqa ni sa rui batabata me ra vakatakata kina. Sa tiko talega vata kei ira o Pita me tatalai tiko.
19 Na bete levu sa tarogi Jisu me baleti ira na Nona tisaipeli kei na Nona i vakavuvuli.
20 Sa sauma vua o Jisu, "Au sa vosa vakadoudou ki vei vuravura, Au dau vakatavuvuli ena vale ni vakasoqoni vata kei na valenisoro na vanua era sa dau sota kina na Jiu. Au sega ni dau tukuna vuni na ka.
21 "Na cava o ni sa tarogi Au kina? Me ra tarogi ga o ira sa rogoca na veika Au sa tukuna. Era sa kila na ka Au sa dau tukuna."
22 Ni sa tukuna tiko na veika oqo, sa dua vei ira na tamata cakacaka sa robaki Jisu ena ligana ka tukuna, "E dodonu li mo vosa vaka oqori vua na bete Levu?"
23 Sa sauma o Jisu, "Kevaka Au sa tukuna na ka ca, me dua na kena i vakadinadina; kevaka Au sa cakava na ka vinaka, na cava dou sa via mokuti Au kina?"
24 Ia o Anasa sa vakatalai Koya yani vei Kaiava na bete levu.
25 Sa tucake o Pita ni sa tatalai tiko. Era sa tukuna vua, "Sa sega beka ni o a dua talega vei ira na Nona tisaipeli?" Sa cakitaka o Pita ni sa tukuna ni sega.
26 Sa dua vei ira na dauveiqaravi vua na bete levu, sa wekana voleka talega na tamata sa musuki laivi na daligana mai vei Pita, sa tukuna mai, "Sa sega beka ni'u raici iko mai na were vata kei Koya?"
27 Sa qai caki tale o Pita; ka vakasauri sa tagi sara na toa.
28 Era sa qai kauti Jisu mai vei Kaiava kina buturara levu e vakatokai na Paraetoriumi, ni se mataka lailai tikoga. Ia era sega ni mani yaco rawa sara o ira kina Paraetoriumi de ra qai rogorogo ca, me rawa kina vei ira mera vakaitavi talega ena Lako Sivia.
29 Sa lako yani ki vei ira o Pailato ka tukuna, "Na veibeitaki cava o ni sa kauta mai kina na Tamata oqo?"
30 Era sa sauma mai ka tukuna vei Pailato, "Kevaka sa sega ni Tamata caka ca oqo, keimami na sega ni kauti Koya cake mai vei iko."
31 Sa vosa mai o Pailato, "Mo ni kauti Koya ga ka lewai Koya me vaka na i Vunau" Era sa tukuna mai na Jiu vua, "Na i vunau sa sega ni vakatarai keimami me keimami vakamatea e dua,"
32 me vakayacori ga kina na veika sa tukuna oti o Jisu, me vakaraitaka kina na mate ena mate kina o Koya.
33 Sa lako tale yani o Pailato ka kacivi Jisu, ka tarogi koya, "O sa nodra Tui beka na Jiu?"
34 Sa sauma yani vua o Jisu, "O sa vosa tiko beka ga ena vukumu ena ka oqo, se ra sa tukuna eso tale vei iko na ka oqo me baleti Au?"
35 Sa vosa mai o Pailato ka vaka: "Oi au beka na Jiu? O ira na kai Nomu, kei ira na bete levu era sa kauti Iko mai vei au. Na cava o sa cakava?"
36 Sa sauma mai o Jisu, "Na noqu matanitu sa sega ni ka ni vuravura oqo. Kevaka sa ka ni vuravura oqo, era na vala na Noqu tamata, Me'u kua ni soli yani kina vei ira na Jiu; sa sega ni ka ni vanua oqo na Noqu matanitu."
37 Sa tukuna kina o Pailato vei Jisu, "O sa Tui dina li?" Sa sauma o Jisu. "O sa tukuna dina mai Ni'u sa Tui. Oqo ga Au sa sucu mai kina, oqo ga Au sa lako mai kina ki vuravura, Me'u mai I vakadinadina ni Dina. O ira vakayadua sa tiko vua na dina, sa rogoca na Domoqu."
38 Sa taro tale yani o Pailato, "Na cava na dina?" Ni sa tukuna tiko oqo – sa lako yani ki vei ira na Jiu, ka tukuna vei ira, "Au sa sega ni raica Vua e dua na cala."
39 "Sa dua na nomuni i tovo – o ya me dau sereki e dua ena gauna ni Lakosivia." "O ni sa vinakata beka me'u sereka vei kemuni na Nodra Tui na Jiu?"
40 Era sa kaci kece yani vakadomoilevu ka tukuna, "Sega ni o Koya na Tamata oqo, o Parapa ga! Sa daubutako o Parapa.


Chapter 19

1 O Pailato sa tauri Jisu ka vakararawataki Koya.
2 Era sa vakaisalataki Koya na sotia ena wa vakavotona ka biuta vakaukauwa e Uluna, ka vakaiorotaki Koya ena i oro lokaloka.
3 Era sa tukuna, "Io, na nodra Tui na Jiu!" Era sa vakavacuki Koya.
4 Sa lako tale yani o Pailato ka tukuna vei ira. "Mo ni raica, au sa kauti Koya mai oqo vei kemuni, Mo ni kila kina ni'u sa sega ni kunea Vua e dua na cala."
5 Sa lako mai o Jisu ni sa vivigi tu na uluna ena wa vakavotona kei nai ubi lokaloka, sa tukuna yani vei ira o Pailato, "Mo ni raica na Tamata!
6 Ni ra sa raici Koya na bete Levu kei ira na tamata cakacaka, era sa kacivaka yani – "Dou vakota, dou vakota! Sa tukuna vei ira o Pailato – dou kauti Koya ka vakota ki na kauveilatai ni'u sa sega ni raica Vua e dua na cala."
7 Era sa tukuna vua na Jiu, "Ni sa dua tiko na i neimami vunau oqori ni, sa dodonu kina me mate baleta ni sa tukuni Koya tiko me luve ni Kalou."
8 Ni sa rogoca o Pailato na veika oqori, sa rere sara vakalevu.
9 Sa lako tale yani ki na buturara levu na Paraetoriumi ka tukuna vei Jisu, "O sa lako mai vei," sa sega ni sauma vua o Jisu.
10 Sa tukuna vua o Pailato, "O sa sega tiko ni vosa mai vei au? O sa sega beka ni kila ni sa tu vei au na kaukauwa me'u vakamatei iko, kei na kaukauwa me'u sereki iko?
11 Sa sauma yani o Jisu, "Sa sega vei iko na kaukauwa vakavo ke soli mai vei iko mai cake. O koya sa soli Au vei iko, sa levu sara na nona i valavala ca."
12 Mai na gauna o ya, sa vakasaqara o Pailato na ka me sereki Koya kina. Era sa qoqolou ga na Jiu ena nodra tukuna tiko, "Kevaka o sa laiva na Tamata oqo me lako, o sa qai sega ni tokani nei Sisa. O koya sa tukuna ni sa tui, sa meca kei Sisa."
13 Ni sa rogoca o Pailato na veika o ya, sa qai kauti Jisu mai, sa qai dabeca na nona i dabedabe ni vakatulewa, ena vanua sa vakayacani vaka Iperiu o "Kapaca."
14 Oqo sa siga ni vakavakarau ni Lakosivia ka sa i ka ono ni auwa. Sa tukuna yani vei ira na Jiu, "Ni raica na nomuni Tui!"
15 Era sa vosa yani vakadomoilevu, "Kauti Koya tani, kauti Koya tani, vakota ki na kauveilatai." Sa tukuna o Pailato, "Me'u vakamatea na nomuni Tui?" Era sa sauma mai na bete levu, "Sa sega na neimami Tui o Sisa ga."
16 Sa soli Koya yani me vakamatei. Era sa tauri Jisu ka kauti Koya yani.
17 O Koya ni sa colata tiko na Nona kauveilatai, sa lako yani ki na vanua sa vakatokai na vanua ni qavokavoka ka yacana vaka Iperiu o "Kolikoca".
18 Era sa vakamatei Koya mai kea kei na rua tale vata kei Koya. Rau sa yadua na yasana kei Jisu e loma.
19 Sa vola o Pailato e dua na Ulutaga ka vakota ena ulu ni kauveilatai. Sa volai kina oqo: "JISU MAI NASERECI – NODRA TUI NA JIU.
20 Sa levu vei ira na Jiu, sa wilika na i ulutaga baleta na vanua oqo sa voleka ki na koro. Sa volai oqo vaka Iperiu, vaka Kirisi, ka vaka Latina talega.
21 O ira na bete levu kei ira na Jiu, era sa tukuna vei Pailato, "Kua ni vola – NODRA TUI NA JIU, ia, sa tukuna ga "Oi AU NA Nodra tui na Jiu."
22 Sa sauma tale o Pailato, "Na veika au sa vola, au sa vola."
23 O ira na sotia, ni ra sa vakoti Jisu, era sa wasea va talega na Nona i sulu, me ra yadua na sotia. Sa sega ni wasei rawa na Nona i oro, ni sa dua ga na tikina mai cake ki ra.
24 Era sa veitalanoataka ga me sa kua ni basu nai oro ka me sa caka ga na vaka wiri madigi – me sa nona ga o koya sa donui koya. Oqo me vakayacori ga kina nai Vola Tabu ni sa tukuna, "ERA SA WASEA NA NOQUI SULU – ERA SA VAKA WIRI MADIGI ENA VUKU NI NOQUI ORO," era sa cakava na sotia oqo.
25 Sa tucake tu ena yasa ni kauveilatai i Jisu o tinana, na taci tinana, o Meri na wati Kilopa kei Meri Makitalena.
26 Ni sa raici tinana o Jisu kei ira na Nona tisaipeli sa dau lomana vakalevu ni ra sa tu voleka, sa tukuna yani vei tinana "Yalewa raica na luvemu!"
27 Sa qai tukuna vua na Nona tisaipeli "O raica na tinamu!" Mai na auwa o ya na tisaipeli oqo sa kauti tinana ki nona vale.
28 Ni sa oti oqo, sa kila o Jisu ni sa vakayacori kece na ka oqo me vakadinadinataki kina na i Vola Tabu, sa qai tukuna, "Au sa karamaca!"
29 Sa dua na bilo sa sinai ena waini wiwi, sa tiko e kea, era sa tonia na i sulu ena waini wiwi oqo ka biuta yani ki gusuna.
30 Ni sa gunuva o Jisu na waini wiwi oqo sa qai tukuna mai, "Sa oti". Sa bale na uluna ka solia yani na yalona.
31 Baleta ni sa Siga ni Vakavakarau, sa tabu ni tiko tale na yago ena kauveilatai ni sa roro tiko mai na Siga ni Vakacecegu. Era sa kerei Pailato na Jiu ke rawa ni musuki na yavadratou, me ratou kau tani yani kina.
32 Era sa lako mai na sotia ka musuka na yavadrau na lauvako ena yasai Jisu.
33 Ni ra sa yaco mai vei Jisu, era sa raica ni sa mate oti tu, era sa sega ni musuka na yavana.
34 E dua ga vei ira na sotia sa suaka yani na sarisarina, vakasauri sa lako mai na dra kei na wai.
35 O koya sa raica sa vakatusa, ka sa dina na nona vakatutusa; sa kila o koya ni sa tukuna tiko na ka dina, me rawa kina ni o ni vakabauta.
36 Sa vakayacori na veika oqo me dina kina na i Vola Tabu, "Sa sega ni musuki na suina."
37 Sa tukuna talega nai Vola Tabu, "Era na rai vei Koya sa laucoka na sarisarina."
38 O Joseva mai Arimacea, sa dua talega na tisaipeli i Jisu, baleta ni sa rerevaki ira na Jiu, sa lako vakavuni mai me kerei Pailato me ratou kauta na yagoi Jisu ka la'ki buluta. O Pailato sa solia na veivakadonui. Sa lako mai o Joseva ka kauta na yagoi Jisu.
39 O Nikotimo, o koya a lako mai vei Jisu ena bogi, sa lako talega mai kei na mura sa veiwaki kei na Aloe sa dua na drau beka na paodi bibi.
40 E ratou sa kauta na yagoi Jisu ka solega ena i sulu ka lumuta ena ka boi vinaka me vaka na kena i vakarau ni veibulu vei ira na Jiu.
41 Ena vanua sa lauvako kina o Jisu, sa tiko kina e dua na were ni bulubulu vou, e sega ni vakayagataki.
42 Era sa biuti Jisu kina baleta tiko na nodra Siga ni Vakavakarau na Jiu. Ni sa tiko voleka ga na i bulubulu.


Chapter 20

1 Ena i matai ni siga ni macawa, sa lako mai ki na i bulubulu vakamataka lailai o Meri Makitalena, ka sa raica na i sogo vatu ni bulubulu sa vakaqiqici tani tu.
2 Sa cici sara mai vei Saimoni Pita kei iratou tale na vo ni tisaipeli sa dau lomana vakalevu o Jisu ka tukuna vei iratou, "Era sa kauta na yago ni Turaga mai na i bulubulu, sa sega ga ni kilai se ra sa biuta ki vei."
3 E ratou sa lako mai ki tuba o Pita kei ira na vo ni tisaipeli ka ra sa lako ki nai bulubulu.
4 E ratou sa veitau cici yani ki na i bulubulu ka sa bera tale o Pita ni ra sa liu na kena vo.
5 E dua sa vakalakala sobu ka iro yani, sa raica ga na i sulu sa sole kina o Jisu, e dina ga ni sega ni curu yani ki loma sara.
6 Sa muri Koya sara yani o Pita ka yaco ki na i bulubulu, sa raica talega na i sulu ni sa lutu tu.
7 Nai tavoi sa vesu tiko kina na uluna, sa lobi tani tiko ga mai na i sulu ka solegi kina.
8 O koya na tisaipeli ka dua, o koya a liu yani, sa curu sara ki loma ka raica ka vakabauta.
9 E se bera tiko ni kila nai Vola Tabu o ira oqo, ni sa mate o Jisu ka sa na tucake tale mai na mate.
10 Era sa dui lako tale ki nona vale na tisaipeli.
11 Sa tucake tu ga ena taudaku ni bulubulu o Meri ka tagi tiko. Ni sa tagi tiko, sa iro yani ki loma ni bulubulu.
12 Sa raica e rua na Agilosi vakaisulu vulavula, ni rau sa dabe tiko, e dua ena uluna ka dua e yavana ena vanua sa vakadavori tiko kina o Koya.
13 E rau sa tukuna yani vua na yalewa, "Na cava o sa tagi kina?" Sa tukuna sara vei rau, "Era sa kauta tani na Noqu Turaga ka'u sa sega ni kila se ra sa laki biuta ki vei?"
14 Ni sa tukuna tiko na veika oqo, sa vuki sara ka raici Jisu ni sa wavutu, ka sa sega ni kila ni sai Jisu o ya.
15 Sa tukuna vua o Jisu, "Yalewa na cava o sa tagi tiko kina, o cei o sa vakasaqara?" Sa nanuma tiko ga o Koya ni sa dua beka ga na tamata sa dau raica na were – sa tukuna sara yani, "Kemuni, kevaka o ni sa kauti Koya tani yani, mo ni tukuna mai se o ni sa biuti Koya e vei, me'u lako ka kauti Koya tani mai.
16 Sa vosa mai o Jisu, "Meri," sa vuki mai o koya ka tukuna, "Raponai" (kenai balebale "qasenivuli")
17 Sa tukuna vua o Jisu, "Kua ni tarai Au mai baleta Ni'u se bera ni lako cake vei Tamaqu, lako ki vei ira na taciqu ka tukuna vei ira. Ni Au sa lako cake vei Tamaqu, na Tamamudou talega, Na Noqu Kalou na nomudou Kalou talega.
18 Sa lako mai o Meri Makitalena ka tukuna vei ira na tisaipeli ni sa raica na Turaga, ka sa tukuna talega na veika oqo vei koya.
19 Ena siga tikoga o ya, ni sa karobo mai, ni sai matai ni siga ni macawa ni sa sogo tu na katuba ena vanua era sa soqoni kina na tisaipeli – ni ra sa rerevaki ira tiko na Jiu, sa basika mai o Jisu ka tu ena kedra maliwa ka tukuna vei ira, "Me tiko vata kei kemudou na vakacegu."
20 Ni sa tukuna oti na veika oqo, sa qai vakaraitaka vei ira na Ligana kei na Nona sarisari. Era sa marau ni ra sa raica na nodra turaga.
21 Sa tukuna tale vei ira o Jisu, "Me tiko kei kemudou na vakacegu, me vaka sa talai Au mai o Tamaqu, Au sa talai kemudou vakakina."
22 Ni sa tukuna oti na veika oqo, sa ceguvi iratou ka tukuna vei iratou, "Dou ciqoma na Yalo Tabu."
23 "Kevaka dou sa vosota na nodra i valavala ca na tamata, era na vosoti; kevaka dou sa sega ni vosota, era na sega ni vosoti."
24 O Tomasi na yacana talega o Titimo e dua vei iratou na tinikarua sa sega ni tiko vata kei ira ni lako mai o Jisu.
25 Era sa tukuna vua na vo tale ni tisaipeli "Keitou sa raica na Turaga." Sa tukuna mai o Tomasi, "Vakavo kevaka au na raica sara na ligana kei na mawe ni i vako ka tara sara na kena mawe kei na sarisarina talega, au na qai vakabauta."
26 Ni sa oti e walu na siga, era sa tiko vata tale na tisaipeli, sa tiko talega vata kei ira o Tomasi. Sa basika e loma ni vale o Jisu ni sogo tu na katuba, ka tucake tu ena kedra maliwa ka tukuna yani, "Me tiko vei kemudou na vakacegu."
27 Sa qai tukuna vei Tomasi, "Tara mai oqo ka raica na ligaqu; ka tara tale mai oqo, ka biuta sara mai e yasaqu. Mo kua ni tamata sega vakabauta, mo vakabauta ga."
28 Sa sauma o Tomasi, "Noqu turaga na noqu Kalou."
29 Sa qai tukuna vua o Jisu, "Tomasi baleta ni o sa raici Au, o sa vakabauti Au kina. Sa kalouvinaka o ira sa sega ni raica ka vakabauta ga."
30 Sa cakava vakaidina o Jisu e levu na veika mana ka veivakurabuitaki ena matadratou na Nona tisaipeli sa sega ni volai eke.
31 Sa volai ga oqo mo ni vakabauti Jisu Karisito na Luve ni Kalou. Ni vakabauta o ni sa na bula kina ena Yacana.


Chapter 21

1 Sa oti oqo, sa vakaraitaki Koya tale o Jisu vei ira na Nona tisaipeli ena wasawasa mai Taiperia, sa vakaraitaki Koya vakaoqo;
2 O Saimoni Pita, o Tomasi (Titimo), o Nacanieli mai Kena e Kaleli na luvei Sepete kei na rua tale na tisaipeli e ratou sa tiko vata.
3 Sa tukuna vei iratou o Saimoni Pita, "Au sa lako mada ki siwa." E ratou sa tukuna talega mai, "keitou na lako talega vata kei iko." E ratou sa lako yani ena waqa ka sega ni rawata e dua na ka ena bogi o ya.
4 Ni sa kida mai na mataka, sa tucake tu mai baravi o Jisu; e ratou sa sega ni kila na tisaipeli ni sai Jisu o ya.
5 Sa tukuna yani vei iratou o Jisu, "Ragone sa tiko beka e dua na kakana?" E ratou sa sauma Vua, "E sega sara ga."
6 Sa tukuna vei iratou, "Dou viritaka na lawa ena yasai matau ni waqa, dou na kunea kina e so." E ratou sa cakava vakakina ka ratou sa sega ni dreta rawa na lawa ni sa levu sara na ika.
7 Na tisaipeli sa daulomana vakalevu o Jisu sa tukuna vei Pita, "Sai Koya na Turaga oqo!" Ni sa rogoca o Pita ni sa Turaga o ya, sa vakaisulu ka rika yani ki wai.
8 Era sa lako mai na vo ni tisaipeli ena waqa (ni ra sa sega ni yawa sara mai vanua) rauta ni ruanadrau na i yate – era sa yarataka mai na lawa ni sa rui levu na ika.
9 Ni ratou sa lako sara mai ki vanua, e ratou sa raica ni ra sa waqa tu na qilaiso, sa tavu tale tu ga na ika kei na madrai.
10 Sa tukuna sara yani o Jisu, "Me kau mai e so na ika dou se qai rawata ga."
11 Sa lako yani o Pita ka dreta sara na lawa ki vanua, sa sinai sara ena ika, sa duanadrau limasagavulu katolu na malea, e dina ga sa levu sara na malea, ia, sa sega ga ni bote na lawa.
12 Sa tukuna vei iratou o Jisu, "Dou lako mai ka mai kana." Sa sega ni dua vei ira na tisaipeli e via tarogi Koya me vaka: "O cei sara mada o iko" – ni ratou sa kila ni sai Jisu ga oqo.
13 Sa taura na madrai o Jisu ka solia vei iratou, sa vakatalega kina na ika.
14 Oqo, sai katolu ni gauna sa vakaraitaki Koya kina o Jisu vei iratou na Nona tisaipeli ni sa tucake tale mai na mate.
15 Ni ratou sa katalau tiko, sa tukuna o Jisu vei Pita, "Saimoni na luvei Jona o sa lomani Au vakalevu mai na ka kece oqo?" Sa sauma mai, "Io Turaga, o ni sa kila ni'u sa lomani Kemuni." Sa dina Pita, -"vakani ira na Noqu Lami."
16 Sa tukuna tale vua ena i katolu ni gauna, "Saimoni na luvei Jona, o sa lomani Au se sega?" sa tukuna o koya, io Turaga, o ni sa kila ni'u sa lomani Kemuni. Sa sauma mai o Jisu – "Vakaraica na Noqu sipi."
17 Sa tukuna tale vua ena i katolu ni gauna, "Saimoni na luvei Jona, o sa lomani Au?" Sa sauma mai o koya ka vaka: "Turaga, o ni sa kila na ka kecega. O ni sa kila ni'u sa lomani Kemuni." Sa tukuna vua o Jisu, "vakani ira na Noqu Sipi."
18 "Sa dina sara, Au sa tukuna vei iko, ni o a gone, o dau vakarautaki iko ka veilakoyaki ena vanua o sa vinakata ga, ni o sa qase mai – ona dodoka na ligamu ka na dua tale ena vesuki iko ka kauti iko ki na vanua o sa sega ni vinakata."
19 Sa tukuna oqo o Koya na mate ena laveti kina na Kalou. Ni sa vosa oti sa tukuna vua, "Muri Au mai."
20 Sa vuki yani o Pita ka raica na tisaipeli sa daulomana o Jisu ni sa muri tiko. O koya talega oqo sa dau ravi tiko ena serei Jisu ena vakayakavi ka dau taroga tiko, "Turaga o cei ena veretaki Kemuni?"
21 O Pita, ni sa raici koya tiko, sa tukuna vei Jisu, "Turaga sa na vakacava na tamata oqo?"
22 Sa tukuna vua o Jisu – kevaka Au sa lewa me bula tiko me yacova na Noqu lesu mai, a cava oqo vei iko? O iko ga mo muri Au mai."
23 Sa lako yani na vosa oqo vei ira kece na veitacini – ni na sega ni mate na tisaipeli oqo, ia o Jisu ea sega ni tukuna vua ni na sega ni mate – ia, "Kevaka Au sa lewa me bula tiko me yacova na Noqu lesu mai, A cava oqo vei kemudou?"
24 Sai koya oqo na tisaipeli sa vakadinadinataka na veika oqo, ka vola talega na veika oqo ka keimami sa kila ni sa Dina na nona i Vakadinadina.
25 Sa levu tale na veika sa cakava o Jisu – kevaka era sa volai vakayadudua, Au sa kila ni o vuravura oqo ena sega ni rawata – ni na osota na vuravura na kena i vola ena volai kina. Emeni.