1 Koronica

1 2 3 4 5 6 7 8 9 10 11 12 13 14 15 16


Chapter 1

1 Koronica 1 1 Oi au o Paula, sa kacivi me apositolo i Jisu Karisito, ena lewa ni Kalou kei Sosiceni e dua ga na wekada,
2 Kivei ira nai soqosoqo lewe ni lotu sa nona na Kalou era tiko mai Koronica, o ira sa kacivi me nona digitaki ni sa vakasavasavataki ira o Jisu Karisito, ka vaka talega kina na lewe ni lotu ena veivanua kecega, era masuta na yaca ni noda turaga o Jisu Karisito na noda turaga ka nodra talega:
3 Me tiko vei kemudou na loloma kei na nona vakacegu na Kalou o tamada kei na turaga o Jisu Karisito.
4 Au sa vakavinavinakataka tikoga na Kalou, baleta na nona loloma sa tiko vei kemudou ena vukui Karisito Jisu o koya sa solia,
5 Ni dou sa vakasaututaki sara vakalevu, ena vosa matua mo dou cavuta kei na vuku mo dou kila kina na dina,
6 Dou sa kila oti ka vakadinadinataka vei kemudou na ka sa cakava o Karisito,
7 Au marau ni dou gumatua tikoga ena nomudou waraka na nona rairai mai na noda turaga, o Jisu Karisito kei na kena sega ni yali tani mai vei kemudou e dua nai solisoli vakayalo,
8 Oqori sara ga ena tauri kemudou tiko kina i otioti, ena siga ni nona rairai mai na noda turaga o Jisu Karisito ni dou sa sega cala tu.
9 Na Kalou e dina, o koya ga sa kacivi kemudou mai, mo dou veitokani vata kei na luvena, na noda turaga o Jisu Karisito.
10 Au sa kerei kemudou sara ga oqo na veiwekani, ena yaca ni noda turaga o Jisu Karisito, mo dou veirogoci ka cakacaka vata, me kakua ni tiko ena kemudou maliwa na veitovaki ena yaco kina na tawase, ia mo dou veiyaloni ka lomavata ena dua ga nai naki.
11 Na nomudou bula na veiwekani, era mai tukuna vei au o ira na lewe ni vuvale nei Kiloi, ni sa tiko vei kemudou e dua na duidui ka dou veivala tiko kina.
12 Na ka au via tukuna, ni so vei kemudou e cavuta tiko, "Oi au sa nei Paula," eso "Oi au sa nei Apolosa," eso "Oi au sa nei Kifa," eso "Oi au sa nei Karisito."
13 E tu beka vei Karisito na bula ni veiwasei? E vakoti beka o Paula ena kauveilatai ena vukumudou? Se dou sa papitaisotaki beka ena yaca i Paula?
14 Au vakavinavinaka vua na Kalou ni sega saraga ni dua vei kemudou me'u papitaisotaka, ka vakavo ga o Kirisipo kei Kaio au papitaisotaki rau,
15 Me kakua ni dua e bai nanuma ni'u via tekivuna tiko e dua na vakabauta vou mo dou muri au.
16 O ira talega na matavuvale nei Sitavana au papitaisotaki ira, ka sega tale e dua au nanuma ni'u papitaisotaka.
17 O Karisito e sega ni talai au me'u vei papitaisotaki, ia me'u vunautaka ga nai tukutuku vinaka, ka sega ni'u vunau me'u vakayagataka na kila ka vakatamata, de'u qai vakatawayagataka kina na kaukauwa ni kauveilatai i Karisito.
18 Ni sa ka lialia vei ira sa rusa na kena vunautaki na kauveilatai, ia sa vakaraitaka kina na Kalou na nona kaukauwa vei keda sa vakabulai.
19 Ni sa volai: "Au na vakarusa na nodra vuku na tamata, ka vakatawayagataka na ka vinaka era vulica rawa."
20 Era sa tu mada E vei na tamata vuku? Era tu mada E vei na vunivola lelevu? Era tu mada E vei na vuni lawa ni gauna oqo? Na vuku ni vuravura sa vakamadualaka na Kalou me rairai vakalialia tu?
21 Ena nona vuku na Kalou, e kila tu mai liu ni sega ni rawata na vuku vaka tamata me kila na Kalou, sa qai yaco na veivakabulai ena kena vunautaki na nona vosa, era sa qai tukuna na vuku vakatamata ni ka lialia.
22 O ira na Jiu era via raica sara e dua na cakacaka mana mera qai vakadinata, o ira na kai matanitu tani era rogoca ga era vakabauta, oqo na yalomatua.
23 Ia keitou vunautaka na mate i Karisito ena kauveilatai, e mai tarovi ira tale na Jiu, era qai tukuna na kai matanitu tani ni ka lialia,
24 Ia vei ira sa kacivii, ira na Jiu kei ira na kai Kirisi, na Karisito sa kaukauwa ni Kalou kei na vuku na Kalou.
25 Baleta na lialia ni Kalou e vuku cake mai vei ira na tamata, kei na malumalumu vaKalou e kaukauwa mai vei ira na tamata.
26 Dou dikeva mada na nomudou kacivi na veiwekani, e sega ni levu vei kemudou e tu vua na vuku vakavuravura, se me dua sa bau rogo, se dua vei kemudou e tamata vutuniyau, e sega sara.
27 Ia na Kalou sa dau vakayagataka na ka e nanuma o vuravura ni lialia, me vakamadualaka kina na vuku vakavuravura, kei na nona digitaka na ka e raica o vuravura ni malumalumu, me vakamadualaka kina na kaukauwa e tu e vuravura;
28 Na Kalou e digitaki ira sara ga na tamata beci, kei ira eda nanuma ni sega sara ga ni dua na ka e rawa ni ra rawata, me vakamalumalumutaki kina na ka e cakava o vuravura.
29 Me kakua sara kina ni dua na tamata me dokadokai koya ena mata ni Kalou.
30 Ia na Kalou duadua ga, o koya sa vuni bula sa yaco ena vuku i Jisu Karisito eda sa mai vuku kina vakalou kei na noda vakadonui kei na noda vakasavasavataki kei na noda sa vakabulai -
31 Me vaka na ka sa volai: "Kevaka e dua me dokadoka, me dokadokataka ga na ka sa cakava vua na turaga."


Chapter 2

1 Koronica 2 1 Ena gauna au lako yani kina vei kemudou na veiwekani, au sega ni vosataka na vosa vakavuku, se me rogorogo vinaka na kenai tautau vei kemudou me baleta na cakacaka ni Kalou.
2 Au sa vakadeitaka tu e yaloqu me'u kakua ni kila ena kemudou maliwa e dua na ka tani, o Jisu Karisito duaduaga kei na nona lauvako kina kauveilatai.
3 Au sa duavata tiko kei kemudou ena yalo lailai kei na rere kei na sautanini.
4 Na noqu vosa ni'u vunau sa sega ni'u vosa ena kila ka vakatamata me'u veirawai kina, ia au vunau ena kaukauwa duadua ga ni Yalo Tabu,
5 Mo dou qarauna mo dou kakua ni vakabauta e dua e vosa tiko ena vuku vakatamata, ia o koya ga e tu vua na kaukauwa ni Kalou.
6 Keitou vinakata tiko na yalomatua me tiko vei ira sa matua tiko, ka sega ni yalomatua e solia o vuravura na nona i cavacava e sega ni kila.
7 Ia keitou tukuna tiko e dua na ka vuni ni vuku ni Kalou, ena nona vunitaka tu mai ena dua na gauna balavu na veika eda mai lagilagi kina oqo.
8 Ka sega sara ga ni bau dua na noda i liuliu me kila rawa, kevaka mera kila, ko ira era sega ni vakota na noda turaga kina kauveilatai.
9 Me vaka sa tukuna oti nai Vola Tabu: "Sa sega na mata sa kunea, se na daliga sa rogoca, ka sa sega ni curu kina yalo ni tamata, na veika sa vakarautaka na Kalou me nodra o ira sa lomani koya."
10 Ia na Kalou sa vakatakila mai vei keda ena Yalo Tabu. Na Yalo Tabu e kila ka vakadikeva vakavinaka na ka titobu ni Kalou, qai vakatakila mai vei keda.
11 E sega ni rawa me dua na tamata me rawa ni laki kila na bula ni dua tale na tamata, na tamata ga vakataki koya e kilai koya, e sega ni rawa talega me dua na tamata me kila na vakanananu ni Kalou, vakavo duadua ga na Yalo Tabu ni Kalou.
12 Na noda bula o keda, e sega ni tiko vei keda na yalo ni vuravura, ia na Yalo Tabu ga ni Kalou, o koya sa tukuna tiko ki yaloda ni sa noda nai solisoli loloma ni Kalou.
13 Na vosa keitou dau vosataka tiko, e sega ni ka ni vuku vakatamata, na vosa oqori mai na kaukauwa ni Yalo Tabu, ni keitou wasea tiko na veika vakayalo sa rawata ga na kaukauwa vakayalo.
14 Ia na tamata vakayago e sega ni rawa me kila na cakacaka ni Yalo Tabu, ena rairai ka vakalialia vua ni lecaika tu kina, ena nona bula tu vakayago, ena dredre vua me siqema rawa na ka e cakava tiko na Yalo Tabu.
15 Ia o koya sa vakayalo e matata vinaka tu vua na veika kece e yaco tiko, ka sega kina ni rawa me moici koya o vuravura.
16 O cei "Sa kila rawa na vakanananu ni Kalou, me rawa ni rau veivosaki vata?" Ia oi keda ga, ni sa tiko vei keda na mona i Karisito.


Chapter 3

1 Koronica 3 1 Ia oi au, na veiwekani, au sega ni vosa vei kemudou me vaka vei ira na matua vakayalo, ia vei ira ga sa vakayago, ka vagonegonea tu na nodra bula vei Karisito.
2 Au se vagunuvi kemudou tikoga ena wai ni sucu ka sega ena kakana dina; ni se sega ni rawa tiko vei kemudou mo dou kania na kakana dina, me yacova tiko mai oqo;
3 Ni dou se vakayago tikoga: Ka tiko na veivuvutaki kei na veivala, me yaco tiko kina vei kemudou na tatawasewase, oqori e vakaraitaka ni dou sega ni tamata lotu dina.
4 Ni dua me tukuna tiko, "O au sa nei Paula," ka dua tale me tukuna, oi au sa nei Apolosa," e sega beka ni vakaraitaka oqo, ni dou sega sara ga ni tubu tiko vakayalo?
5 O cei mada o Paula, kei Apolosa, me da mai vakabauta tiko, oi rau e dua ga nai talatala e rau kacivi me vukea cake nomudou veiqaravi?
6 Noqui tavi me'u tea ga, o Apolosa me qai vakasuasuataka, ia na Kalou ga, sa qai vakatubura cake.
7 O koya e tea kei koya sa vakasuasuataka, e sega ni dodonu meda laveti rau ni sega ni rau vakatubura, ia na Kalou ga e dodonu me laveti ni o koya e vakatubura.
8 E rau tautauvata vinaka sara ga o koya e tea kei koya e vakasuasuataka, ia na tamata yadua ena rawata na kena i sau me vaka na nona cakacaka.
9 Ni o keda kece eda sa dau cakacaka vata kei na Kalou; oi kemudou na nona i teitei na Kalou, ka dou sa vale ni Kalou.
10 Me vaka na loloma ni Kalou, sa solia kina vei au na vuku, me'u vakayavutaka vakavinaka na yavu me'u tara cake kina. Me da qarauna ka dikeva vinaka nai valavala ni noda tara cake tiko.
11 Ni sa sega ga ni rawa vua e dua na tamata me tara cake ena dua na yavu cala, o koya ga na kena yavu dina o Jisu Karisito.
12 Kevaka me dua vei keda me tara cake na nona yavu ena koula, na siliva, na veivatu talei, na kau, na co malai se na vu ni sila,
13 Ena siga ni nona lesu mai na turaga, ena qai laurai na cakacaka ni tamata yadua, baleta na ka e yavutaki koya kina na tamata, ena vakamai ena bukawaqa, me laurai kina o koya e ka dina.
14 Kevaka e dua e sega ni kama yavu na nona cakacaka, mai na yavu e tara cake kina, ena taura na nona i cocovi.
15 Ni sa kama yavu na cakacaka, sa na maumau na levu ni yau e vakayagataki, o koya ena bula mai ena kama, ia na yagona ga, ena vakacacana na bukawaqa.
16 Dou sa sega beka ni kila ni dou sa vale ni Kalou, ka sa tiko vei kemudou na Yalo ni Kalou?
17 Kevaka e dua na tamata me vakadukadukali taka na vale ni Kalou, ena vakarusai koya na Kalou. Ni sa ka tabu ka savasava na vale ni Kalou, sai kemudou sara ga na nona vale na Kalou.
18 Me kakua ni dua e vakaisini koya vakataki koya. Kevaka e dua vei kemudou sa bau nanuma tu ni sa dua na ka, na levu ni vuku vakavuravura e tu vua, e vinaka cake vua me lialia me rawa ni vuku kina.
19 Ni vuku vakavuravura sa ka lialia vua na Kalou. Ni sa volai, "sa coriti ira na vuku ena nodra qaseqase."
20 Kei na duatale, "ni sa kila vinaka tu na Kalou na ka e tu ena nona vakasama na vuku, ka raica ni sa sega ni dua na kena yaga."
21 O koya oqo me kakua ni dua me sakitaka na vuku vakatamata. Ni Kalou sa solia taucoko vei kemudou na veika kece oqo.
22 Sa solia taucoko vei kemudou na Kalou na veika kece me nomudou modou lewai ira, o Paula, o Apolosa se o Kifa, se o vuravura, se na bula se na mate, se na ka sa yaco tiko ni kua, se na veika ena yaco mai muri.
23 Ni dou sa tuvata kei Karisito dou sa nei Karisito, sa Kalou o Karisito.


Chapter 4

1 Koronica 4 1 Mo dou raici keitou mai, ni o keitou e dua ga na liga ni cakacaka, ka i talatala ena vuku i Karisito me baleta na ka vuni ni Kalou.
2 Sa ka bibi kina vua e dua sai talatala me dau tukuna na ka dodonu kei na nona bulataka na dina.
3 E sega ni dua na ka vei au nomudou nanuma kei na nodra nanuma tale eso me baleti au, baleta ni o au mada ga vakataki au, au kila ni levu sara na vanua au luluqa kina.
4 E sega sara ga ni dua na cala au kila me rawa ni'u beitaki au kina; baleta na Kalou ga ena lewai au ena ka kece au cakava.
5 O koya oqo, mo dou se kakua mada ni kalasitaka na tamata, dou waraka na lesu mai ni turaga, ena qai vakacilavi na nona rarama me vakavotui cake kina, na veika butobuto ka vunitaki tu ena yalo ni tamata. Eda na qai raica kina nai naki dina ni noda cakacaka vua na turaga, me na qai soli kina na ka e dodonu meda vakavinavinakataki kina.
6 O ya na vuna veiwekani, au vakayagataka kina na yacaqu kei na yaca i Apolosa vei kemudou, ena noqu via vakaraitaka tiko me kua na bula ni veitovaki, me kua ni dua mo dou raica cake, me kua ni dua mo dou raica sobu.
7 O cei e vakayacori iko mo duatani duadua mai vei ira tale eso? E dua na ka e dodonu me tiko vei iko ka sega ni tiko vei iko? Ni ka kece oqori vei iko sa solia taucoko na Kalou, mo kakua ni vakacerecerei iko me vaka ni o iko ga o cakava.
8 Kemudou sa vakasinaiti oti tu! Dou sa vakavutuniyautaki oti tu! Sa tu oqori vei kemudou na kaukauwa vakatui ka sega vei keitou! Au sa nuitaka ni dou na dabeca tikoga nai tutu vakatui, me yacova na siga o ya nidatou na qai laki lewa vata!
9 Au kila ni Kalou e biuti keitou sara ena boto ni tuitui mei Apositolo, me vaka e dua na tamata sa tau vua nai totogi mate, me qai kau wavoki i vuravura mera vakasaravi koya na tamata kei ira na agilosi.
10 Keitou na lialia ena vuku i Karisito, ia oi kemudou dou sa mai vuku ena vuku i Karisito! Keitou sa mai malumalumu, ia oi kemudou sa kaukauwa! Oi kemudou sa mai vakaturagataki, ia Oi keitou sa mai vakaisitaki!
11 Me yacova mai oqo keitou sa walolokai ka karamaca, ka sega nai sulu me keitou veisau kina, keitou mokulaki wavoki tu ga ka sega na vale me keitou bau toka kina.
12 Keitou sa cakacaka sara ga vakaukauwa ena liga i keitou me keitou bau kana kina, keitou vosa vakalouvinakataki ira sa vosa ruru vei keitou, ni keitou sa vakacacani sara vakalevu keitou sa vosoti ira ga;
13 Keitou sauma na veika ca kece e vakayacori vei keitou ena caka vinaka, me yacova mai oqo keitou sa vaka tuga e dua na taga ni butubutu vei ira na tamata.
14 Au sega ni vola yani oqo me'u vakamadualaki kemudou kina, ia au via vakasalataki kemudou ga yani ni o kemudou na noqu ka lomani.
15 E dina ni rawa me ra lewe tini na udolu na tamata mera vakavulici karisito vei kemudou, mo dou nanuma vinaka ga, ena dua ga na tamamudou oqori ga o au, ni o au ga au kauta mai vei kemudou nai tukutuku vinaka.
16 O koya oqo au sa vakamasuti kemudou kina, mo dou vakadadamuri au ena ka au cakava.
17 Oqo sara ga na vuna au talai Timoci yani kina vei kemudou, o koya e dua dau yalodina vua na turaga ka noqu gone ni toko, ena laki vakananumi kemudou o koya ena noqui valavala vei Karisito, me vaka na ka au dau vakatavulica ena veivanua kecega ena veisoqosoqo lotu kecega.
18 Au kila ni so vei kemudou ena viavialevu ni nanuma au sa rere ni'u lako yani vei kemudou me'u walia na leqa oqo.
19 Ia au na lako yani ena dua na gauna lekaleka mai oqo, kevaka sa lewa ni Kalou, me'u na laki raica sara kina na kaukauwa ni gusumudou, se dou vosa tiko ena kaukauwa ni Kalou.
20 Ni sa sega ni kani vosa walega na matanitu ni Kalou, sa ka ga ni kaukauwa.
21 Cava dou vinakata? Me'u lako yani vei kemudou ni'u sa taura na kuita, se me'u lako ena loloma, kei na yalomalua?


Chapter 5

1 Koronica 5 1 E lewe levu sa veitalanoataka tiko na kemudou i rogorogo, ni veibutakoci sa yaco tiko vei kemudou, nai rogorogo vaka oqori e sega mada ga ni da rogoca vei ira na sega ni lotu, e dua na nomudou lewe ni lotu e rau sa tikovata tale kei na wati tamana.
2 Dou sa qai via vakalecalecava ena nomudou via vakayalo tiko, ka sega mada ga ni dou via rarawataka, mo dou biuti koya tani mai vei kemudou.
3 E dina ni'u sega ni tiko kei kemudou, ia na yaloqu sa tiko kei kemudou, ena noqu sa lewai koya e cakava na ka oqo me vaka ga au tiko kei kemudou.
4 Ena yaca ni noda turaga o Jisu Karisito vua na tamata sa cakava nai tovo ca oqo, ni dou sa soqoni vata na yaloqu ena tiko kei kemudou, ena kaukauwa ni noda turaga o Jisu Karisito.
5 Dou biuta tani na tamata oqo mai na nomudou i soqosoqo lotu, me tarai koya na liga i Setani me rusa kina, me rawa ni tu kina na vakanuinui me na vakabulai ena siga ni nona lesu mai na turaga o Jisu.
6 Dou kakua ni dokadokataka nomudou vakayalo. Dou sega beka ni kila, ni sa dauvakalevenitaka me vakatubura nai buli madrai taucoko, na tiki ni leveni lailai?
7 O koya mo dou kauta tani na leveni makawa, mo dou yaco kina me i buli vou, oi kemudou dou sega ni vakatuburi ena leveni. Ni o Karisito na noda i soro sa mai cabori koya oti meda vakadonui kina.
8 O koya me da dei tikoga ena noda siga ni solevu, ia me sa kua na leveni makawa, ni yalo ca kei nai tovo ca, ia na madrai ga sa sega ni vaka leveni, ena yalosavasava kei na dina.
9 Au sa vola oti ena noqu i vola vei kemudou, mo dou kakua ni veitokani vata kei ira na dauyalewa kei na dautagane.
10 Au sega ni tukuni ira tiko na sega ni lotu ena i tovo ca oqo me vaka na daukocokoco, daubutako, dauveibutakoci kei na so tale, ena sega ni rawa ni dou tiko vinaka e vuravura kevaka mo dou tiko vata kei ira oqo.
11 Ia oqo au sa volavola yani kina vei kemudou, mo dou kakua ni veitokani vakavoleka kei na dua na lewe ni lotu, e tu vua na bula vaka oqo, me vaka na dauyalewa, dautagane, daukocokoco, dauqaravi matakau, se dauveivakacacani, se daumateni, se daubutabutako – me kakua mada ga ni dou kana vata na tamata vaka oqo.
12 Cava na betena vei au me'u via lewai ira kina na sega ni lotu? Ka sa dodonu meda lewai na noda lewe ni lotu era vakayacora tiko nai tovo ca oqo?
13 Na Kalou duadua ga ena lewai ira na sega ni lotu. O koya oqo, mo dou vakatala tani mai vei kemudou, na tamata sa cakava tiko nai tovo ca o ya.


Chapter 6

1 A cava ni dua na duidui vei kemudou, mo dou kauta sara na leqa oqori kina mataveilewai vei ira na sega ni lotu, ni tu ga nai soqosoqo lotu na vanua vinaka vei kemudou, mo dou kauta kina nomudou leqa?
2 Dou sega tiko beka ni kila na vuravura oqo eda na lewa na tamata lotu? Kevaka dou na lewa na vuravura oqo, a cava dou qai sega ni vakavinavinakataka rawa kina na leqa lalai vakaoqo?
3 Dou sega beka ni kila eda na lewai ira na agilosi? Ka sa dodonu vei kemudou mo dou sa raica vakayalomatua na nomudou dui leqa dou sotava tiko oqo?
4 A cava sa rui bibi kina vei kemudou na mataveilewai vakavuravura, ka sega ni dou kauta kina matabose ni soqosoqo lotu, me dikeva ka vakatulewa kina?
5 Au vosa vakaoqo mo dou madualaki kemudou, sa sega beka ni dua e tiko vei kemudou, me tu vua na vuku kei na yalomatua, me vakavinakataka na nomudou leqa vakaveiwekani?
6 Ia oqo na tacimu sara ga mo qai kauti koya kina mataveilewai, mera qai laki walia tu nomudrau leqa na sega ni lotu!
7 O koya oqo, sa sega ni qai dua nai vakaraitaki vinaka dou vakaraitaka tiko vei ira na sega ni lotu, ena nomudou kauta tiko nomudou leqa kina mataveilewai, na cava e sega ni dou ciqoma rawa kina mo dou vakacacani? Na cava sega ni dou taura rawa kina mo dou vakaisini?
8 Ia oi kemudou mada ga dou cala tiko, ka dou vakaisina tiko na wekamudou vakayalo!
9 Dou sega tiko beka ni kila o ira kece na sega ni yalododonu, era na sega ni rawata na matanitu ni Kalou? Dou kakua ni vakalialiai kemudou: O ira sa tiko vata ni se bera na vakawati, o ira na dauqaravi matakau, o ira na veibutakoci (dauyalewa, dautagane) o ira na veiwatini vakatagane kei na veiwatini vakayalewa, o ira na veilasami ga vakatagane,
10 O ira na daubutako, o ira na daukocokoco, o ira na daumateni kei ira na dau veivakasewasewani, o ira sa vaka oqo, era na sega ni rawata na matanitu ni Kalou.
11 Na nomudou bula e vaka tu o ya e liu. Ia oqo dou sa vakasavasavataki ka vakavoui mai, ia dou sa qai vakadonui ena vuku ni yaca i Jisu na noda turaga kei na Yalo Tabu ni Kalou.
12 E sega ni dua na ka me tabu vei au, ia e levu na ka e sega ni yaga vei au. E dina mada ga ni'u rawa ni vakayagataka kece, ia au sega ni vinakata ga me dua na ka oqo me mai lewai au.
13 Na kakana me baleta na kete kei na kete me baleta na kakana, sega ni tukuni mo veitaliataki iko kina, ni Kalou ena vakarusai rau ruarua. E sega ni buli na yago mo tiko vata kina ni se bera na vakawati, na yagomu me vakarokorokotaki kina na Kalou, ni yagomu sa vale ni Kalou.
14 Na Kalou ena vakaturi keda cake ena nona kaukauwa me vaka e vakayacora vua na turaga.
15 Dou sega beka ni kila, o koya sa veitikini yago vata kei Karisito? Me'u na taura na veitikiniyagoi Karisito ka laki veisematitaka vata me dua kina na yalewa dautagane? Ena sega ni rawa!
16 Dou sega tiko beka ni kila, o koya sa veitikini yago vata kei na yalewa dautagane e rau sa na dua ga na yago vata? Ni oi rau na lewe rua, sa tukuni, "e rau sa dua ga na yago."
17 Ia o koya sa duavata me veikabiti vata kei na turaga, e rau na yalo e dua bau ga.
18 O ya na vuna au tukuna kina, mo dou dro yawa tani mai, ena tiko vata se bera na vakawati kei na veibutakoci ena loma ni vakawati. Ni o valavala ca ena i valavala ca oqo, o sa vakaleqa tikoga vakai iko na yagomu.
19 E sega beka ni dou sa kila oti, ni yagomudou sa vale ni Yalo Tabu ka sa dau curumi kemudou, ni o koya na kalou sa vakatikora e yalomudou, e sega ni dodonu kina mo dou veitaliataka na yagomudou?
20 Ni Kalou sa mai voli kemudou ena dua nai sau e sau levu sara, o koya mo dou vakarokorokotaka na Kalou ena yagomudou kei na yalomudou, ni oi keda sa nona tu na kalou.


Chapter 7

1 Koronica 7 1 Na taro dou a tarogi au tiko yani kina ena nomudou i vola: Me'u tukuna vei kemudou, na tagane me kua ni tara e dua na yalewa.
2 Ia me vaka nai valavala ca ni veibutakoci, e na daumaka ga me sa vakawati na tagane kei na yalewa me dua talega na watina.
3 Me cakava kina na ka dodonu me vaka nai vakarau dina ni veiwatini na tagane vua na watina, ka vaka talega kina na yalewa vua na watina.
4 Ni sa vakawati na yalewa sa sega ni qai tu vua na kaukauwa me veitalitaka na yagona, na kena lewa sa tu vua na watina tagane. Sa vaka talega kina na tagane sa sega ni qai tu vua na kaukauwa me vakaveitaliataka na yagona, ni sa lewa tu na watina.
5 Kua ni sogoti iko mai vua na watimu, me tikoga nomudrau veidinadinati ena vuku ni lolo kei na masu, mo drau tiko vata tale me tarovi kina nona veitemaki o Setani, ena vuku ni dau tarovi vakadredre na tikovata.
6 Oqo nai vakasala ga ka sega ni vakaro.
7 Au diva moni vakataki au ia eda sega ni tautauvata kece, ni duidui nai solisoli e soli vei keda, eso me vakataki au.
8 Ia vei kemuni na sega tu ni vakawati kei kemuni na yada: ena uasivi vei kemuni mo ni tikoga me vakataki au.
9 Ia kevaka era sa sega ni tarovi ira rawa, sa vinaka cake ga mera vakawati, ni sa vinaka mera vakawati ka sa qai ca sara, na garogaro lo se na wainidiva tu ga.
10 Oqo vei kemuni na vakawati au sa vakaroti kemuni, sega ni o au, ia mai vua na turaga: Na yalewa me kakua ni biuta na watina.
11 Ia kevaka me sa lako me kakua ni laki vakawati, me tatau vinaka me vakavinakataki kina nodrau veiwekani. Na tagane me kakua ni sereka nai vesu ni vakamau vua na watina.
12 Ia vei ira tale eso, sega ni tukuna na turaga, oi au ga, e vaka oqo, kevaka e dua na tuakada e lotu tiko ka sega ni lotu tiko na watina, ka sa lomasoli tu na watina me rau bula vata, me kakua ni biuta o koya na watina.
13 Kevaka e dua na yalewa me sega ni lotu na watina, ka sa lomasoli na watina me rau bula vata, me kakua ni biuti watina o koya.
14 Na yalewa e vakasavasavataka na watina sega ni lotu, kei koya na yalewa sega ni lotu e vakasavasavataki mai vua na watina; ke sega era na sega ni savasava na luvemudou, ia oqo era sa savasava tu.
15 Ia kevaka me sa lako o koya na sega ni lotu, laivi koya me lako; vei keda sa lotu na tagane kei ne yalewa, meda kakua ni vesuki tiko kina bula vaka oqo. Ia sa kacivi keda na Kalou meda loma vakacegu.
16 Ena rawa vakacava mo kila, o iko na yalewa, na watimu mona vakabulai koya tale? Se o iko na tagane, ena rawa vakacava mo kila, na watimu mo vakabulai koya tale?
17 Ia na Kalou sa vota vei ira yadua, me vaka nona kaciva na tamata yadua na turaga, mera bula vaka kina, oqo na lewa au sa vinakata me muria na veisoqosoqo lotu kece.
18 E dua sa kacivi ni sa cilivi? Me kakua tale ni qai sega cili. E dua sa kacivi ni sega cili? Me kakua tale ni qai cilivi.
19 Na cili kei na sega cili e sega sara ga ni dua na kena yaga, ia na kena maroroi ga nai vakaro ni Kalou oqori e ka bibi.
20 Me tikoga na tamata yadua ena ka e kacivi kina me vaka nona kacivi.
21 Dou a sega beka ni kacivi ni dou a bobula tu? Kua ni dou via lomaleqataka; ia ni dou sa mai vagalalataki, dou bulataka na kena bula.
22 Ni o koya sa kacivi mai vua na turaga ni a bobula tu, sa tamata sereki ni turaga, ka tautauvata ni sa kacivi me tamata sereki sa nona bobula na turaga.
23 Ni dou sa voli ena dua nai sau levu, mo dou kakua ni bobula vei ira na tamata.
24 Na veiwekani, me tiko na tamata yadua kei na Kalou, ena i tutu sa tiko kina ni sa kacivi. Vei Ira Na Dawai Kei Na Yada
25 Me baleti ira na sega ni vakawati: E sega ni dua nai vakaro mai vua na turaga e tiko vei au; Ia me vaka na loloma ni turaga vei au kei na nona veivakabauti, au na tukuna kina noqui vakasala.
26 Au nanuma ni rairai daumaka cake na tagane me sa bula tu mada ga vakaoqori, ena vuku ni leqaleqa eda dau sota e veisiga.
27 E dua na yalewa drau sa veiwatini? Kakua ni o via veisere. E sega ni dua na yalewa drau veiwatini tiko? Kakua ni vakasaqara tale e dua na yalewa me watimu.
28 Ia kevaka o sa vakawati, o sa qai sega ni valavala ca; kevaka me sa vakawati e dua na goneyalewa, e sa na sega ni valavala ca. Ni vakawati ena levu na dredre ena sotavi kina, au sega ni vinakata me'u tukuna rawa oqo vei kemudou.
29 Ia oqo au tukuna vei kemudou na veiwekani, sa lekaleka sara na gauna, vei kemudou sa vakawati mo dou kakua ni vakadredretaki kemudou, mo dou vakarawarawataki kemudou tiko.
30 O ira sa tagi mera vakataki ira na sega ni tagi, o ira sa reki mera vakataki ira na sega ni reki, o ira sa volivoli me vaka ga e dua e sega ni dua na ka e tu vua.
31 Kei ira na rui ogaogataka na ka ni vuravura oqo mera rawata taucoko. Na vuravura sara ga oqo ena vakarusai laivi.
32 Ia au vinakati kemudou me kakua soti ni dou lomaocaoca. O koya e sega ni vakawati sa dua na ka nona qarauna na cakacaka ni turaga, ena nona tovolea tiko me cakava na loma ni turaga.
33 Ia na tagane vakawati sa rui kauwaitaka vakalevu na ogaoga vakavuravura – ena qai rawa vakacava vua me vakalomavinakataka na watina yalewa.
34 E tiko e dua na duidui vua na yalewa sa vakawati kei na dua se goneyalewa. O koya e sega ni vakawati e dau kauwaitaka vakalevu na cakacaka ni turaga, me rawa kina ni savasava tu na yagona kei na yalona. Ia o koya sa vakawati e rui kauwai tu ga vakalevu ena vei ogaoga vakavuravura – ena rawa vakacava vua me vakalomavinakataka na watina tagane.
35 Ia au tukuna oqo mo dou vinaka kina, sega ni dou ca kina me'u via tarovi kemudou, ia au via vaqaqacotaka tikoga nomudou qarava na turaga me dei ka kaukauwa ni tu nai tatao eso.
36 Ia kevaka e dua na tagane sa sega ni tarovi koya rawa tiko ni sa via vakawatitaka e dua na goneyalewa, sa ganiti koya vinaka ga mesa vakawati, me sa kua tale ni tarovi sa soli sara ga vua na ka sa gadreva. E sega ni dua na kena valavala ca; me rau sa vakamau ga.
37 Kevaka e dua me sa vakadeitaka ni sa lewa oti tu e lomana ni na sega ni vakawati, ena uasivi nona cakacaka.
38 Ena vaka oqo, o koya sa vakawati ena vinaka nona cakacaka, ia o koya sa sega ni vakawati ena vinaka cake sara na nona cakacaka.
39 Na yalewa vakawati ena vauci koya tu na lawa ena gauna taucoko e bula tiko kina na watina; ia kevaka sa na mate na watina, sa tu vua na galala me vakawatitaka tale e dua sa vinakata o koya, me qarava na turaga.
40 Ia kevaka me'u lewa ena noqu rai, ena vinaka cake me bula tuga vaka o ya, ni levu na gauna ena mamarau tu ga kina – ena vakasama o ya, e solia duadua vei au na yalo ni Kalou.


Chapter 8

1 Koronica 8 1 Oqo me baleta na kakana cabori kina matakau: Eda kila ni sa tu taucoko vei keda na kila ka. Na noda kila ka ena kauta mai na viavialevu, ia na loloma e dau kauta mai na veivakatatataki cake.
2 Kevaka e dua sa nanuma ni tu vua na kila ka kecega, e sega sara ga ni dua na kila ka e tu vua, ena ka e dodonu me kila.
3 Ia kevaka e dua sa lomana na Kalou ena kilai ena nona bula.
4 O koya oqo me baleta na kakana sa cabori kina matakau, meda kila ni matakau e sega ni dua na ka e vuravura, ka sega tale ni dua e Kalou, ia e dua ga.
5 Kevaka mada ga era vakatokai mera Kalou, mai lomalagi se i vuravura (Ni sa levu na veimataqali Kalou kei na vei mataqali Turaga)
6 Io vei keda e dua ga na Kalou, na tamada ka vu mai vua na ka kecega, oi keda eda sa nona, e dua ga na turaga o Jisu Karisito, sa bulia o koya na ka kecega, eda sa bula ena vukuna.
7 E sega ni levu vei keda me kila tiko na dina oqo, eso era nanuma tiko ni ka bula na matakau, kei na kakana e cabori kina e cabori dina kina Kalou, na ka qai yaco ni ra sa kania sa qai leqa nodra lewa e loma, me malumalumu ni sa beitaki.
8 E sega ni da taucoko vua na Kalou ena vuku ni kakana; meda kana sa qai yaco kina na taucoko, se me kua na kana meda sega kina ni taucoko.
9 Ia mo dou qarauna vinaka nomudou galala de qai yaco mei tatao vei ira se malumalumu.
10 Kevaka e dua sa raici kemudou, oi kemudou sa bau kila toka ni dou kana tiko ena bure Kalou ni matakau, ena sega beka ni solia vua sa malumalumu e dua na yalo doudou, ni rawa talega vua me kania na kakana sa cabori kina matakau?
11 Ena vuku ni ka o sa kila, ena la'ki rusa kina na tacimu e malumalumu, ni tacimu oqori e mai mate kina o Karisito?
12 O na valavala ca vei Karisito, ni o vakaleqa na tacimu ena nomu vakamavoataka na nona lewa e loma, ni se malumalumu, ena nomu vakatara e dua na ka e nanuma o koya ni cala.
13 O koya oqo, kevaka au vakaleqa na taciqu ena lewe ni manumanu, au na sega tale vakadua ni kania na lewe ni manumanu, baleta au sega ni vinakata me leqa na taciqu.


Chapter 9

1 Koronica 9 Nai Valavala Ni Noda Guilecavi Keda 1 Au sega beka ni apositolo? Au sega beka ni sa vagalalataki oti? Au sega beka ni raici Jisu na noda turaga? Na nomudou bula a sega beka ni noqu cakacaka vua na turaga?
2 Kevaka au sega ni Apositolo vei ira tale eso, au sa nomudou i Apositolo dina ga, na nomudou mai vakabulai sa rawa duadua ga ni'u Apositolo ni turaga.
3 Oqo nai sau ni taro me'u na sabaya kina na nodra tarogi au eso me baleta na noqu dodonu:
4 E sega beka ni dua na dodonu e tu vei keda meda kana ka gunu kina?
5 E sega beka ni dua na dodonu e tu vei keda meda kauta kina na watida ni da lotu vata, me vakataki ira nai apositolo, kei iratou na tuakana na noda turaga, kei Kifa?
6 Se Oi au kei Panapasa me sa kua ni keirau cakacaka me keirau bula kina?
7 E rawa ni dua na sotia me saumi koya vakaikoya ena nona la'ki valu? O cei me tea e dua na loga ni vaini me qai sega ni kania na vuana? O cei sa vakania na qele ni sipi me qai sega ni gunuva na wai ni sucu ni qele ni sipi?
8 Au vosataka na veika oqo ena kaukauwa vaka tamata, se tukuna ka vakadinadinataka na vunau?
9 Me vaka na ka e cavuti ena vunau i Mosese, "Mo kakua ni vauca na gusu ni bulumakau ni sa buturaka tiko na vei sila." Na Kalou e rui kauwaitaka vakalevu beka na bulumakau ena nona tukuna na veika oqo?
10 Se tukuna na veika oqo o koya me baleti keda? Io ena vukuda sara ga, ni sa volai, o koya sa taura nai siviyara me cukicuki me vakanuinui tiko ni sa cukicuki, kei koya sa buturaki sila me vakanuinui tiko ni na vakaivotavota ena ka e nuitaka.
11 Keitou a kaburaka vei kemudou na veika vakayalo, ena vinaka beka me keitou tamusuka na veika vakavuravura mai vei kemudou?
12 Kevaka eso e via wasea vata kei kemudou me vakaivotavota ena veika oqo, e sega beka ni o keitou e dodonu me levu cake? Io vei keitou se bera ni matau vei keitou na vakayagataki ni dodonu vakaoqo, ia keitou sa vosota na veika kecega, me kakua kina ni vakatawayagataki nai tukutuku vinaka i Karisito.
13 Dou sega beka ni kila o ira era cakacaka ena vale ni Kalou, kei ira era qarava nai cabocabo ni soro, era na vakaivotavota mai na ka e cabori ena cabocabo ni soro?
14 Ni sa dina sara, sa vakarota oti na turaga o ira era vunautaka nai tukutuku vinaka mera bula ena i tukutuku vinaka.
15 Ia au sega ni vola oqo, me dua kina na ka mo dou solia vei au, e vinaka cake vei au me'u mate ni sega ni dua na ka me tu vei au, me kakua kina ni dua me dusi au ni'u dokadoka taki au.
16 Kevaka au sa vunautaka tiko nai tukutuku vinaka, cava me'u dokadokataka, ni oqo na ka au lesi kina; io, ena ca vei au, kevaka me'u sega ni vunautaka nai tukutuku vinaka!
17 Kevaka au cakava tiko na ka oqo ena yalo e taleitaka, au na saumi kina; ia kevaka me sega ni vaka na lomaqu, sa qai soli vei au nai tavi me vakataki ira na vakaitutu.
18 A cava sa qai kenai sau vei au? Ni'u vunautaka tiko nai tukutuku vinaka, e sega ni dua na ka au saumi kina ena noqu vunautaka tiko nai tukutuku i Karisito, me'u kakua ga ni via cakava e dua na ka e sega ni dodonu vei au me'u cakava, ena vuku ni tukutuku vinaka.
19 E dina sara au sa galala vei ira na tamata kecega, na ka au sa qai cakava, me'u sa nodra dauveiqaravi na tamata kecega, me rawa ni'u rawai ira mai kina na lewe vuqa.
20 Ni'u tiko kei ira na Jiu au vaka na Jiu, me rawa ni'u rawai ira kina na Jiu; vei ira na vauci ena vunau, me rawa ni'u rawai ira kina na vauci ena vunau;
21 Vei ira na sega ni vauci ena vunau, au vaka na sega ni vauci ena vunau, (e sega ni'u voroka kina na vunau ni Kalou, ni'u sa vauci tu ena vunau vei Karisito), me rawa ni'u rawai ira kina na sega ni vauci ena vunau;
22 Vei ira sa malumalumu ka'u vakatalega e dua sa malumalumu, me rawa ni'u rawai ira na malumalumu. Au vakatautauvatataki au kei ira na tamata kecega, na duidui ni bula kece o ya, de rawa kina vei au me'u vakabula eso.
23 Au cakava oqo ena vuku ni tukutuku vinaka, me rawa kina ni dua noqui votavota vata kei kemudou.
24 Dou sega beka ni kila o ira kece era veitau cici mera na veicicivi, ia ena dua ga vei ira ena taura nai cocovi? Mo dou cici talega vaka kina mo dou taukena.
25 Vei koya e via veitau cici me vakai cocovi, me lewa vakamatau na nona bula mai na vuqa na ka. O ira oqori era veitaucicitaka ga nai sala e ca rawarawa, ia Oi keda e dua nai sala sa sega ni ca rawa.
26 O koya oqo au cici me vakakina: Au sega ni via lomalomarua taka noqu cici. Ni'u kolotaka noqui vacu; au sega ni vaka e dua me vacu cagi ga.
27 Ia au vakavakarautaki au vakavinaka ena noqu qarauna na yagoqu mai na ka au na vakayacora, ena gauna me'u vunau kina vei ira na tamata, me kua tale ni dua na ka mena vakataotaki au.


Chapter 10

1 Koronica 10 1 Au vinakata mo dou kila na veiwekani, o ira noda qase era lako ena ruku ni o, ka ra lako curuma talega na loma ni wasawasa.
2 Ena nodra lako ena ruku ni o kei na nodra lako curuma na loma ni wasawasa era papitaisotaki kina vei Mosese,
3 A ra sa kania vata kecega na kakana vakayalo,
4 kei na nodra gunuva talega na wai vakayalo. Ni ra sa gunu mai na vatu vakayalo sa muri ira tiko, sai Karisito na vatu o ya.
5 Ia sa lewe vuqa vei ira sa sega ni vinakati ira na Kalou, ka ra sa mai bale koto kina ena vanua dravuisiga.
6 Na veika oqo sai vakaraitaki vei keda, meda kakua ni vakayacora nai valavala butobuto me vaka na ka era dau gadreva.
7 Dou kakua ni qarava na matakau me vakataka eso vei ira. Ni sa volai, "O ira na tamata era dabe sobu mera kana ka gunu, era qai tucake ka veiqitori."
8 Meda kakua ni veibutakoci me vaka eso vei ira e dau cakava, ni ra mate kina e lewe ruasagavulu katolu na udolu na tamata ena dua ga na siga;
9 Me kakua ni da via vakatovolei Karisito, ni so vei ira e vakatovolea, e qai kati ira mate na gata;
10 Me kakua na vosa kudrukudru, me vaka ni so vei ira e dau vosa kudrukudru, era qai vakarusai mai vei koya na dauveivakarusai.
11 Na ka taucoko era vakayacora mei vakaraitaki vei keda, ka sa volai me da vuli mai kina, ni sa roro tiko mai nai vakataotioti.
12 O koya oqo me qarauni koya o koya sa nanuma ni sa kaukauwa tu, de qai yaco me malumalumu ena veika oqo.
13 E sega ni dua na veivakatovolei me yaco vei kemudou me se bera mada ni tarai kemudou; ia sa yalodina na Kalou, ena sega ni rawa ni dou rawata, ia na veivakatovolei kece ena dau vakarautaka o koya na kena sala, me lako curumi kina ena bula e vosota.
14 O koya oqo, kemudou sa lomani, dou dro tani mai ena qaravi matakau.
15 Au vosa vei ira sa vuku; dou vakalewa vakavinaka sara na ka au na cavuta yani.
16 Na bilo ni veivakalouvinakataki eda sa kalouvinaka tiko kina, e sega beka ni da sa duavata ena dra i Karisito? Vaka talega kina na madrai sa dovi, e sega beka ni da sa duavata ena yagoi Karisito?
17 Oi keda, eda lewe levu, sa dua nai buli madrai kei na dua na yago; eda sa vakaivotavota kecega mai dua nai buli madrai.
18 Dou raici Isireli mada: era kania na manumanu cabori, era vakaivotavota talega mai na cabocabo ni soro?
19 Cava au via tukuna tiko? Na matakau e ka walega, se na ka e cabori kina matakau e ka walega?
20 Na ka era cabora na sega ni lotu era sega ni cabora vua na Kalou era cabora vua na tevoro, au sega ni vinakati kemudou mo dou veitokani kei na tevoro.
21 E sega ni rawa mo dou gunuva na bilo ni turaga kei na nodra bilo na tevoro; e sega ni rawa mo dou vakaivotavota mai na teveli ni turaga kei na nodra teveli na tevoro.
22 Eda sega beka ni vakararawataka na turaga me cudru? Se da sa kaukauwa cake beka mai vua?
23 Sa tara vei au na ka kecega, ia e sega ni ka kece e yaga; ka kece e tara tu vei au, ia na ka kece sa sega ni veivakatatataki cake.
24 Me kakua e dua me vakasaqara na ka me nona ga, ia dou veivuke ni colata nomudou leqa.
25 Na kakana sa volitaki tu ena makete dou volia ka kania, kakua ni dou via taroga e tara se sega;
26 Ni "Vuravura oqo e nona na turaga, kei na veika kece sa tu kina."
27 Kevaka e dua na sega ni lotu me sureti kemudou kina vakayakavi, ka dou vinakata mo dou lako, na kakana kece e biu e matamudou dou kania kece, me kakua ni dou via taroga me laukana se sega.
28 Ia kevaka e dua me tukuna vei kemudou, "Na kakana oqo sa cabori tu kina matakau," dou kua ni kania ena vukuna o koya e tukuna vei kemudou kei na vuku ni lewa e loma vei keda; na "vuravura oqo e nona na turaga, kei na veika kece e tu kina."
29 "Lewa e loma," sega ni o iko ga, mo nanumi koya tiko. Na cava na noqu galala o au, me vakatau tiko kina nona vakatulewa e dua tale?
30 Ia kevaka au sa duavata ena vakavinakataka na kakana, a cava me'u qai vosa vakacacataka kina na kakana au sa vakavinavinakataka?
31 O koya oqo, ni dou kana se gunu, se so tale na ka dou cakava, mo dou cakava me vakalagilagi kina na Kalou.
32 Dou kakua ni vakaleqa e dua vei ira na Jiu se dua na kai Kiriki se vei ira nai soqosoqo lotu ni Kalou,
33 Me vaka na ka au dau cakava ena veika kecega, mera taleitaka na tamata, sega ni'u cakava na ka au taleitaka, ia na veika kece e yaga ka taleitaka na tamata kece, me rawa ni ra vakabulai kina.


Chapter 11

1 Koronica 11 1 Dou vakatotomuri au, ni'u sa vakatotomuri Karisito tiko.
2 Au vakavinavinakataki kemudou na veiwekani, ena nomudou nanumi au ena ka kecega, mo dou maroroya tiko nai tovo au laki vakaraitaka yani vei kemudou.
3 Ia au vinakata mo dou kila ni sa ulu ni tamata kece o Karisito, sa ulu ni yalewa na tagane, kei na ulu i Karisito na Kalou.
4 Ni masu se parofisai na tagane kevaka e ubi tiko na uluna, e vakaraitaka ni sega ni doka na uluna.
5 Ia kevaka me dua na yalewa e masu se parofisai qai sega ni ubi tiko na uluna, e vakaraitaka ni sega ni doka na uluna, ena tautauvata kevaka me tasi taucoko na nona qavokavoka.
6 Kevaka e sega ni ubi na uluni yalewa me koti tasi. Ia kevaka e madualaki koya na yalewa ni koti tasi, me sa ubi ga na uluna.
7 Na tagane e sega ni dodonu me ubi na uluna, ni o koya nai yaloyalo kai ukuuku ni kalou; ia na yalewa nai ukuuku ni tagane.
8 Sa sega ni buli mai vua na yalewa na tagane, ia na yalewa ga e buli mai vua na tagane.
9 E sega ni buli na tagane me baleti koya na yalewa, ia na yalewa e buli me baleti koya sara ga na tagane.
10 Oqo na vuna me ubi tiko kina na ulu ni yalewa mei vakatakilakila ni sa lewai tu, ena vukudra na agilosi mera marau kina.
11 Na lewa ni turaga, na tagane kei na yalewa me rau dau veirogorogoci ka veitarai cake.
12 Ni yalewa e buli mai vua na tagane, kei na nona tadu mai e dua na tagane e tadu mai vua na yalewa; ia na veika kece e vu mai vua na Kalou.
13 Dou lewa vakai kemudou mada. Ena rairai rakorako beka ke dua na yalewa, me masu vua na Kalou me qai sega ni ubi tiko na uluna?
14 E sega beka ni da sa vulica mai na noda i vakarau ni bula na tamata, kevaka e mani balavu sivia na drau ni ulu ni tagane e sa na vakamaduataki koya tale?
15 Ia nai ukuuku ni yalewa na drau ni ulu balavu, ni kena tiko na drau ni ulunabalavu me rawa ni nona i ubi.
16 Kevaka e dua me via veiletitaka na ka oqo, sa sega ni neitou i valavala oqo, se na nodra na vei soqosoqo lotu ni Kalou.
17 Au sega ni marautaki kemudou ena noqu solia yani nai vakasala oqo, ena gauna mo dou dau soqoni vata kina, e sega ni dau basika na vinaka vei kemudou, dou sa qai ca ga vakalevu.
18 Nai matai mada ga, ni dou dau soqoni vata vakai soqosoqo lotu, au rogoca ni dou sa dui tatawasewase tu, eso nai tukutuku oqo au sa vakadinata.
19 Ena sega ni yali na veiba me sega ni caka ena kemudou maliwa, me rawa ni ra laurai kina na tamata dina.
20 O koya oqo ni dou soqoni vata ena dua na yasana, dou sa sega ni ia dina nai vakayakavi ni turaga.
21 Ena gauna mo dou kania kina, sa sega tale ni dou qai veiwaraki sa dui nanumi koya ga na tamata, eso e via kana ni ra sa sega ni kana, eso sa laki mateni tale ni sa rui sivia na ka e gunuva.
22 E cava! Sa sega nomudou vale mo dou laki kana kina ka gunu kina? Sa rui dou beca nai soqosoqo lotu ni Kalou, ka vakamadualaki ira na sega ni rawa ka ni sega ni dua na ka era kauta mai? A cava tale me'u tukuna vei kemudou? Me'u dokai kemudou li ena ka oqo? Au sa sega ni dokai kemudou.
23 Ni'u a rogoca mai vua na turaga na ka ka'u a tukuna talega vei kemudou: Ni sa taura nai buli madrai na turaga o Jisu ena bogi sa soli yani kina o koya;
24 Ni sa vakavinavinakataka oti, sa dovia ka tukuna, "Dou taura, ka kania; oqo na yagoqu sa doviraki ena vukumudou; dou kitaka oqo mo dou vakananumi au kina."
25 Sa vakatalega kina na bilo, ni sa kania oti nai vakayakavi o koya, sa tukuna, "Na bilo oqo na veiyalayalati vou ena noqu dra. Dou kitaka oqo mo dou vakananumi au kina, ena gauna kecega dou gunuva kina."
26 Ena gauna kecega dou kania kina na madrai oqo ka gunuva na bilo oqo, dou tukuna tiko na nona mate na turaga me yacova ni lesu tale mai.
27 O koya oqo, o koya vakayadua ga sa kana mai na madrai oqo ka gunu mai na bilo ni turaga oqo, ka sega ni doka ena vakadinadinataki ni sa cala ena vuku ni yago kei na dra i Karisito.
28 Ia me dikevi koya na tamata vakai koya, me qai kania na madrai ka gunuva na bilo.
29 O koya e kania ka gunuva ka sega ni doka, e kania ka gunuva tiko na nona cudruvi vakai koya, nona sega ni kauwaitaka na bibi ni nona mai mate na turaga.
30 O ya na vuna e lewe levu sa malumalumu ka tauvi mate kina vei kemudou, ka lewe levu talega sa mate.
31 Kevaka meda dikevi keda vinaka, eda na sega ni cudruvi.
32 Ia ni da sa cudruvi, eda sa cudruvi mai vua na turaga, meda kakua kina ni lewai me cudruvi vata kei ira na kai vuravura.
33 O koya oqo, kemudou na wekaqu, ni dou sa mai soqoni vata mo dou kana, dou tovolea mo dou dau veiwaraki.
34 Ia kevaka e dua sa via kana, me kana rawa mai nodratou, me kakua ni yaco ena nomudou soqoni vata me cudruvi kina o koya. Na veika tale sa vo tiko, au na qai la'ki vakadodonutaka ni'u sa yaco yani.


Chapter 12

1 Koronica 12 1 Oqo ena vuku ni solisoli vakayalo, oi kemudou na veiwekani; au sega ni vinakata mo dou sega ni kila:
2 Mo dou kila ena gauna se bera kina ni dou mai lotu, dou a vakacalai tu kina veimatakau kara sega ni vosa rawa, ena nomudou veikauyaki voli.
3 O koya oqo, au vakaraitaka vei kemudou ena sega ni rawa me dua e vosa ena yalo ni Kalou, me qai vosa vakacacataki Jisu, ena sega talega ni rawa vua e dua me tukuna ni sa turaga o Jisu, ke sega ni vakavuna vua na Yalo Tabu.
4 Sa duidui nai solisoli, ia e dua ga na Yalo Tabu.
5 Sa duidui talega na tiki ni veiqaravi e vakayacori, ia e dua ga na turaga.
6 E duidui na cakacaka e cakava na turaga vei keda, ia e dua ga na Kalou sa cakava tiko na veika kece oqori, ena noda dui bula kecega.
7 Ia sa vakatakilai na Yalo Tabu vei ira na tamata yadua me baleti ira kece.
8 Na Yalo Tabu sa solia vua e dua na vosa vaka yalomatua, vua tale e dua na vosa ni kila ka, ena cakacaka talega na Yalo Tabu.
9 Vua tale e dua na vakabauta ena cakacaka tikoga ni Yalo Tabu, vua tale e dua nai solisoli ni veivakabulai ena cakacaka tikoga ni Yalo Tabu,
10 Vua tale e dua me cakava na ka e veivakakurabuitaki, vua tale e dua me parofisai, vua tale e dua me dau kila na yalo, vua tale e dua me vosataka na vosa tani, vua tale e dua me vakadewataka na vosa tani,
11 Ia na Yalo Tabu e dua bauga sa cakava na ka kecega oqo, ni sa vota vei ira na tamata yadua me vaka sa vinakata o koya.
12 Me vaka sa dua ga na yago ka sa levu na kena veitikina, ia na veitikina ena dua na yago oqori e levu sara, ka sa dua ga na yago, sa vaka talega kina na Karisito.
13 Na Yalo Tabu e dua bau ga eda sa papitaisotaki kina ena yago e dua bau ga – se Jiu se o ira na kai Kiriki, se bobula se tamata sereki – eda sa vagunuvi kecega ena Yalo Tabu e dua bau ga.
14 Ni yago e sega ni dua walega na tikina, ia e levu na kena vei tikina.
15 Kevaka me tukuna mai na yava, "Baleta ni'u sega ni liga, oi au sa sega ni tiki ni yago," ena sega beka ni vakila tiko o koya e dua na ka ena yago?
16 Kevaka me qai tukuna tale na daliga, "Baleta ni'u sega ni mata, oi au sa sega ni tiki ni yago," ena sega beka ni vakila tiko o koya e dua na ka ena yaco?
17 Kevaka me sa mata taucoko na veitiki ni yago kece, ena qai rawa vakacava me rogoci na ka? Kevaka me sa daliga taucoko na veitikina, sa na qai sega na ucuda meda boi kina?
18 Ia oqo sa cakava na veitikini yago kece oqori na Kalou, ena yago me vaka na nona lewa.
19 Kevaka na veitikina oqori me dua ga na tikina, ena vakacava tu mada na yago?
20 O ya na vuna e cakava kina na Kalou me levu na veitikina e na dua na yago.
21 Na mata ena sega ni rawa me tukuna ena liga, "O iko e sega ni yaga vei au," se na ulu ena yava, "O iko e sega ni yaga vei au."
22 Na veitiki ni yago e sega ni dau kauwaitaki vakalevu ni o koya e sega tu ni dua na ka, o koya e dua nai tavi bibi e vakayacora tiko.
23 Na veitiki ni yagoda eda sega ni dau doka o koya e sega ni raici; veitikida ga e laurai eda doka vakalevu cake,
24 Na veitikida e laurai me kua soti ni vakasakiti. Ia na Kalou sa biuta tu na veitikini yago kece oqori, eso me laurai ka so me sega ni laurai,
25 Me kakua kina ni veisei na yago, ia na veitikina kece me veitaraicake ka cakacaka vata.
26 Kevaka sa sotava tiko na rarawa e dua, na veitikina kecega me vakila na rarawa o ya; se dua na tikina me laveti cake, mera marau vata na veitikina kece.
27 Oqo oi kemudou na yagoi Karisito, ka dou veitikina yadudua vua.
28 Ena i soqosoqo lotu sa vakatikora eso na Kalou, ai matai na Apositolo, ai karua na parofita, ai katolu na qasenivuli ni Volatabu, ni oti o ya na veivakurabuitaki, nai solisoli ni vakabula na tauvimate, o ira na dauveivuke, o ira na dautuvatuva ka, kei ira na dauvosataka na veivosa tani eso.
29 Era sa Apositolo kece li? Era sa parofita kece li? Era sa qasenivuli ni Volatabu kece li? Era sa daucakava kece li na cakacaka e veivakurabuitaki?
30 Sa tiko kece beka vei ira nai solisoli ni vakabula na tauvimate? Era sa vosataka kece tiko li na vosatani eso? Era sa dauvakavakadewa kece tiko li?
31 Ia oqo, mo dou dui gadreva nai solisoli e uasivi sara. Au na vakaraitaka vei kemudou e dua ena vinaka cake na kena sala.


Chapter 13

1 Koronica 13
13 Kevaka au sa vosataka na nodra dui vosavosa na tamata kei na vosa ni agilosi, ia ka sega vei au na loloma, au sa vaka walega na kaukamea sa rorogo, kei na veleti varasa sa tataqiriqiri.
2 Kevaka sa tiko vei au nai solisoli ni parofisai kei na kila na veika kecega, kevaka sa tu vei au na vakabauta kecega me rawa ni'u tosoa kina na ulunivanua, ia ka sega vei au na loloma, au sa ka walega.
3 Kevaka au solia kece na noqui yau me ra kana kina na dravudravua, kevaka au solia na yagoqu me'u vakamai, ia ka sega vei au na loloma, sa sega sara ga ni dua na ka e yaga me'u na rawata mai kina.
4 Na loloma sa dauvosota vakadede ka dau yalovinaka; na loloma e sega ni dau vuvu; na loloma sa sega ni vosa doudou se me viavialevu;
5 Sa sega ni sabalia tu nona i tovo, sa sega ni qara na ka baleti koya, sa sega ni dau vakavuca, sa sega ni dau vakanananu ca;
6 Sa sega ni rekitaka na ka ca, ia sa rekitaka ga na dina;
7 Sa dau ciqoma ena galu na ka kecega, sa vakadinata na ka kecega, sa vakanuinuitaka na ka kecega, sa vosota na ka kecega.
8 Na loloma ena sega ni oti. Na parofisai ena oti mai, na vosatani eso ena oti mai, na kila ka ena seavu yani.
9 Na noda kila ka kei na noda parofisai e sega ni ka e taucoko.
10 Ia ni sa qai yaco mai na ka e taucoko, na vakamumuri esa na yali tani.
11 Ni'u a gone, au vosa me vaka na gone, au kila ka me vaka tu ga na gone, au vakanananu me vaka na gone; ia ni'u sa qase cake mai, au biuta laivi kece na bula vagonegonea.
12 Ena gauna oqo, na noda rai e vaka na noda tirovi keda ena Iloilo buwawa, ia ena qai yaco mai na gauna meda na veisotari mata kina ena matanavotu. Na noqu kila se bera ni taucoko, ia ena yaco mai na gauna me'u na kila kina na ka e dodonu me'u kila deivaki.
13 E tolu na ka oqo, sai koya na vakabauta, nai nuinui, na loloma; ia vei ratou oqo, e uasivi duadua na loloma.


Chapter 14

1 Koronica 14 1 Dou cicimuria na loloma, ka mo dou gadreva nai solisoli vakayalo, ia dou saga vakaukauwa mo dou parofisai.
2 Vei koya e vosataka na vosa tani e sega ni vosa vei ira na tamata, ia vua ga na Kalou, ena sega ni dua me kila na ka e cavuta tiko; ni cavuta na veika vuni me vaka sa solia vua na Yalo Tabu.
3 Ia o koya sa parofisai, e veivakatatakicake e veivakavulici e veivakacegui vei ira na tamata.
4 O koya e vosataka na vosa tani e vakatataki koya ga, ia o koya sa parofisai e vakatataki ira nai soqosoqo lewe ni lotu.
5 Au vinakati kemudou mo dou vosataka na vosa tani, ia ke dua na ka me uasivi sara vei kemudou modou parofisai; ni o koya e parofisai e bibi cake mai vei koya e vosataka tiko na vosa tani eso, na vosa tani me vakadewataki me rawa ni vakatataki kina nai soqosoqo lewe ni lotu.
6 Ia oqo, na veiwekani, kevaka me'u lako mai vei kemudou ena noqu tukuna na vosa tani, ena sega sara ga ni dua na ka dou na taura rawa mai vei au, dou na taura ga kevaka me'u tukuna nona veivakatakilai na Kalou, se na ka au kila, se na noqu parofisai, se na noqu veivakatavulici?
7 Nai yaya mada ga ni vakatagi e ka mate, na api, na bitu ni vakatagi e tu vei ira na veimataqali rorogo mera dau solia, ena rawa vakacava me kilai na duidui ni rorogo ni vakatagi, kevaka me sega ni dua e kila na qiria?
8 Kevaka me sega ni uvuci vinaka me vaka na kenai vakarau na davui ni valu, ena qai rawa vakacava mera vakavakarau kina i valu?
9 Sa vakakina oi kemudou, kevaka mo dou sa sega ni qai tukuna tiko na vosa eda kila rawa, ena qai tauri rawa vakacava na ka dou via tukuna tiko? Na nomudou vosa dou sa na vosa tuga kina cagi.
10 O vuravura era tu kina na veimataqali vosa duidui, e sega ni dua na vosa oqori me sega ni kilai na kena i balebale.
11 O koya oqo, kevaka me'u sega ni kila nai balebale ni vosa e cavuti, oi au e dua na vulagi vei koya e cavuta tiko e vulagi vei au.
12 Ena nomudou rui gadreva vakalevu nai solisoli vakayalo, dou kerea o koya e uasivi sara na kena vakatataki cake nai soqosoqo lotu.
13 O koya oqo, vei koya e vosataka na vosa tani eso me masulaka me rawa ni kila na kena vakadewataki.
14 Kevaka me'u masu ena dua na vosa au sega ni kila ka masu tiko na yaloqu, au na sega ni kila na ka au cavuta tiko ni na veilecayaki noqu vakasama.
15 Na cava me'u na cakava? Au na masu ena yaloqu kei na noqu vakasama, au na lagasere talega ena yaloqu kei na noqu vakasama.
16 Kevaka mada mo vakavinavinaka ena nomu cavuta na vosa e sega ni kilai, ena qai rawa vakacava vei koya e sega ni lotu me vaka emeni ena ka o tukuna tiko, ni sega sara tu ga ni bau kila o koya na ka o tukuna tiko.
17 Na nomu vakavinavinaka o kila tiko na kena talei, ia o koya e toka tikivi iko ka sega ni lotu, e sega ni vakatataki koya cake.
18 Au vakavinavinaka vua na noqu Kalou, ni'u uasivi vei kemudou kecega ena vosa ni veivanua tani;
19 Ena gauna ni lotu ena vinaka me'u cavuta e lima na veimataqali vosa e rawa ni kilai, me'u vakavulici kemudou kina, ka ca ga me'u cavuta e tini na udolu na vosa mai na vosa tani.
20 Oi kemudou na veiwekani, dou kakua ni vagonegonea tiko; dou na lecava kina na cakacaka ni butobuto me vaka na gone lalai, ia me tubu cake nomudou kila ka mo dou matua kina.
21 Ena vunau sa volai tu kina: "Au na vosa vei ira na tamata oqo mai na nodra vosa ni gusudra na tamata mai na veivanua eso; io era na sega ga ni via rogoci au mai," sa tukuna na turaga.
22 O koya oqo na vosa tani eso sai vakatakilakila, vei ira na sega ni lotu ka sega ni vei ira na lotu; ia na parofisai baleti ira na lotu ka sega ni vei ira na sega ni lotu.
23 Vakacava mada kevaka mo dou soqoni ena nomudou lotu, ka dou qai vosataka kece na vosa ni veivanua tani, mera lotu tale tikoga kei kemudou na sega ni lotu kei ira na sega vei ira nai solisoli oqo, era na sega beka ni tukuna ni sa ca na ulumudou?
24 Ia kevaka mo dou parofisai taucoko, qai curu mai e dua na sega ni lotu ka sega ni vakabauta nai solisoli oqo, esa na ciqoma taucoko o koya ni kila na nona cala, na nona lewa e loma ena beitaki koya mai na ka e rogoca.
25 Sa na vakaraitaki ga mai na ka e vuni tu e yalona; mena tekiduru sobu kina ena vakarokoroko vua na Kalou, me tusanaka ni sa tiko vakaidina kei kemudou na Kalou.
26 Sa qai vakaevei, kemudou na veiwekani? Ni dou sa soqoni vata dou sa dui taura yadua na sere, nai vakavuvuli, na veivakatakilai ni Kalou, na vosatani eso, na vakadewataki ni vosa. Me caka na ka kecega oqo modou vakatataki kina.
27 Kevaka e dua sa vosa ena vosa tani, ke levu me tolu se rua ga, me veitaravi yadua, me dua e tiko me vakadewataka.
28 Ia kevaka sa sega ni dua e tiko me vakadewataka, me kakua ni vosaicake me rogoca taucoko na tamata, me vosa toka ga i ra ni o koya ga kei na Kalou.
29 Me lewe rua se tolu na parofita me vosa, na kena vo mera dabe ka vakalewa vinaka.
30 Ia kevaka sa vakatakila vua na Kalou, e dua na ka vei koya e dabe voleka tiko, o koya e tucake tiko me dabe sobu ka galu.
31 Ni sa rawa vei kemudou mo dou parofisai veitaravi yadudua, me yaco kina na veivakatavulici kei na veivakayaloqaqataki.
32 Na yalo ni parofita sa vakarorogo ki vua na parofita.
33 Sa sega ni dau vakavuna na Kalou na veilecayaki, ia na tiko sautu ga, me vaka sa yaco ena i soqosoqo lotu ni tamata sa vakabulai.
34 Ena nomudou vei soqosoqo lotu mera galu tiko na yalewa, ni sa sega ni vakatarai vei ira mera vosa; ia mera dau vakarorogo, ni sa tukuna talega na vunau.
35 Kevaka e dua na ka era vinakata mera kila, mera qai laki taroga ga i vale vua na watidra; ni ka vakamadua me vosa tiko e dua na yalewa ena i soqosoqo lotu.
36 Sa vu li mai vei kemudou na vosa ni Kalou? Se na vukumudou li sa yaco mai kina?
37 Kevaka e dua sa nanuma ni o koya e dua na parofita se tamata vakayalo, me kila sara ni sai vakaro ni turaga na veika au vola tiko yani oqo.
38 Ia kevaka e dua e sega ni via kila oqo, ena sega tu ga vua na kila ka.
39 O koya oqo, mo dou gadreva vakalevu mo dou parofisai, ia na vosa ni veivanua tani eso, mo dou kakua ni tarova.
40 Na ka kecega me caka vaka rairai vinaka ka vakamatau talega.


Chapter 15

1 Koronica 15 1 Oqo me'u vakananumi kemudou na veiwekani, nai tukutuku vinaka au vunautaka vei kemudou, o koya dou sa vakabauta ka dou sa tudei talega kina,
2 Nai tukutuku vinaka oqo dou vakabulai mai kina, kevaka modou taura dei tiko na vosa ni Kalou au vunautaka vei kemudou – kevaka mo dou kua ni vakawaletaka na nomudou sa mai vakabauta.
3 Au wasea taumada vei kemudou na ka e vakaraitaki vei au: Ni sa mate na Karisito ena vuku ni noda i valavala ca me vaka nai Vola Tabu,
4 Ni sa bulu talega, ka ni sa tucake talega ena i katolu ni siga, me vaka nai Vola Tabu,
5 Ni sa rairai talega vei Kifa, vei ira e muri na lewe tinikarua.
6 Ni sa oti o ya sa qai rairai vei ira na mata veiwekani era lewe lima na drau ka vakacaca, e lewe levu vei ira se bula tiko me yacova mai oqo, ia eso vei ira sa moce.
7 Ni oti o ya sa rairai vei Jemesa, ka qai rairai vei ira taucoko na Apositolo.
8 E qai mai rairai talega vei au e muri, ena noqu qai mai sucu berata na veika oqo.
9 Oi au e lailai sobu mai vei ira nai Apositolo, ka sega ni ganiti au me'u vakatokai mei Apositolo, baleta ena noqu dau vakararawataki ira nai soqosoqo lotu ni Kalou.
10 Ia na loloma ga ni Kalou au sa yaco kina ena noqu tiko e daidai, na nona yalololoma vei au e sega ni ka wale; au gumatua ena noqu cakacaka mai vei ira kecega, e sega ni o au, ia na loloma ga ni Kalou o koya sa tiko vei au.
11 O koya oqo, oi au se o ira, e sega ni dua na ka, e bibi ga na neitou i vunau modou vakabauta. Sa Noda I Nuinui, Na Karisito Tucake Tale
12 Kevaka sa vunautaki na Karisito ni sa vakaturi cake tale mai na mate, era sa tukuna vakacava eso vei kemudou ni sa sega na tucake tale mai na mate?
13 Ia kevaka sa sega ni tucake tale o ira na mate, sa qai sega ni tucake tale mai na Karisito.
14 Kevaka sa sega ni tucake tale mai na Karisito, sa sega ni yaga neitou i vunau ka sega ni yaga talega nomudou vakabauta.
15 Io keitou na laurai kina ni keitou mai lasutaka tiko nai tukutuku ni Kalou, ni keitou mai tukuna tiko ni vakaturi Karisito cake na Kalou, e sega ni tucake dina mai o koya – kevaka mera sega ni tucake mai o ira na mate.
16 Kevaka me sega ni tucake tale o ira na mate, ena sega talega ni tucake tale na Karisito.
17 Kevaka sa sega ni vakaturi cake tale na Karisito, e maumau walega nomudou vakabauta; dou se vesuki tu ga ena i valavala ca!
18 Kei ira talega na tamata lotu era sa mate, era na rusa.
19 Kevaka eda sa vakanuinui me yaga vei keda na Karisito ena bula oqo, eda sa qai vakaloloma vakalevu cake vei ira kecega na tamata.
20 Ia oqo na Karisito sa tucake mai na mate, ka sa yaco mei sevu ni tucake tale vei ira sa moce tu.
21 Ni sa qai vuni mate na tamata, sa qai vuni tucake tale mai na mate na tamata talega.
22 Ni sa qai mate kecega ena vuku i Atama, ena vakabulai kece talega ena vuku i Karisito.
23 Ia eda na dui muria ga nai tuvatuva: O Karisito sa kenai sevu, era na muri o ira sa tu vata kei Karisito ena nona na rairai mai.
24 Ni oti o ya sa qai yaco nai vakataotioti, ena solia lesu na matanitu ni Kalou vei tamana, ni sa vakarusai taucoko na vei vuni kaukauwa, na lewa kecega, kei ira sa lewa.
25 Ena qai yaco o koya me vakatulewa, ni ra sa vakamalumalumutaki taucoko na kena meca mera tu ena ruku ni yavana.
26 Na kena meca mena qai vakarusai taudua e muri oqori o mate.
27 "Ni sa vakamalumalumutaka na ka kecega sa tu ena ruku ni yavana," Ia ni sa tukuna, "Na ka kecega sa tu ena ruku ni yavana," sa na uasivi sara o koya e vakamalumalumutaki koya ena ruku ni yavana ena ciqomi.
28 Ni vakamalumalumutaki koya na tamata kecega vei koya, o koya (Jisu) ena qai vakamalumalumutaki koya vei tamana ni solia vua na lewa kecega, me nona tikoga kina na Kalou na lagilagi kei na vakarokoroko kecega.
29 A cava na betena vei ira na papitaiso ena vukudra na mate, kevaka me ra sega ni tucake tale na mate? Cava mera papitaiso tiko kina ena vukudra na mate?
30 Ka cava me keitou bolea talega kina na mate ena vei auwa kecega?
31 Au via tukuna dina, na veiwekani, ni sa dua na ka noqu rekitaki kemudou, ena vuku i Jisu Karisito na noda turaga, ena veisiga au sa mate tikoga.
32 Kevaka sa vakatamata ga na noqu veivala kei ira na manumanu daukata mai Efeso, a cava na kena yaga vei au? Kevaka mera sega ni tucake tale o ira na mate, "Meda sa kana ga, ka gunu yani ni da na mate ni mataka!"
33 Dou kakua ni vakaisini kemudou tiko vakai kemudou: "Na dau veitokani kei ira nai valavala vakabutobuto, ena vakayalia vakadua nai valavala uasivi."
34 Dou yadrava tiko na bula dodonu, dou kakua ni valavala ca tiko; ni so vei kemudou se bera ni se kila vinaka tiko na Kalou. Au vosa vakaoqo modou rawa ni madua kina.
35 Ia ena dua ena baci tukuna, ena vakaturi cake rawa vakaevei na mate? Ena vakacava na yagodra ni ra sa tucake mai?
36 O iko e dua na lialia, na ka o kaburaka kina qele, kevaka me sega ni mate mada ena sega ni rawa me bula.
37 Na ka o kaburaka, ni sa tubu cake mai o sega ni kaburaka na yago o ya, ia ena basika mai na sila - se witi se so tale na sila tani.
38 Ia na Kalou ena tokara vua e dua na yago vou me vaka sa vinakata o koya, na vei sore ni tei taucoko, era na tokara na yago vou ni ra sa bula cake mai.
39 E vaka talega kina na vei lewe ni ka, ia na tamata e tautauvata taucoko na lewedra, na manumanu yava i va e dua tani na lewedra, na ika e duatani tale na lewedra, na manumanu vuka e duatani talega na lewedra.
40 E tiko na yago vakalomalagi ka tiko na yago vakavuravura, nai ukuuku ni yago vakalomalagi e duatani, nai ukuuku ni yago vakavuravura e duatani.
41 Sa duatani nai ukuuku ni matanisiga, ka sa duatani nai ukuuku ni vula, ka sa duatani nai ukuuku ni veikalokalo, ka duatani talega nai serau era solia na veikalokalo yadudua.
42 Sa vaka talega kina na tucake tale mai na mate. Ni sa biu sobu na yago sa vuca ka luca yani, ia ni sa tucake tale mai sa yago e vakaiukuukutaki vakalomalagi.
43 Ni sa tei, sa vakasisilataki, ni sa vakaturi cake sa vakaiukuukutaki, ni sa tei sa malumalumu, ni sa vakaturi cake sa tu vua na kaukauwa.
44 Ni sa tei sa yago dina ga vakatamata, ni sa qai vakaturi cake tale, sa yago vakayalo. E tiko na yago dina vakatamata, ka tiko na yago dina vakayalo.
45 Ni sa volai, "nai matai ni tamata o Atama sa soli vua na yago dina vakatamata." Na Atama qai muri mai sa yaco o koya me yalo sa solia na veivakabulai.
46 Ia sa sega ni liu o koya sa vakayalo, e liu o koya sa vakayago, sa qai tarava mai o koya sa vakayalo.
47 Nai matai ni tamata e buli mai ena kuvu ni qele; nai karua ni tamata sai koya na turaga sa lako sobu mai lomalagi.
48 Me vakataki koya sa buli mai ena kuvu ni qele, era na vaka talega kina o ira era ucui koya; me vakataki koya sa lako sobu mai lomalagi, era na vakatalega kina o ira era ucui koya.
49 Ni da sa tautauvata kei koya sa buli ena kuvu ni qele, meda segata meda tautauvata sara kei koya sa lako mai lomalagi.
50 Me'u tukuna vei kemudou na veiwekani na ka oqo, ena dredre sara me curu kina matanitu vakalomalagi na lewe kei na dra; na yago vucavuca rawarawa oqo ena sega ni rawa me bulabula tikoga me Sega ni mudu.
51 Raica, au na tukuna vei kemudou e dua na ka vuni: eda na sega ni moce kece, ia eda na veisautaki ka vakamataliataki.
52 Ena vakasauri sara, me vaka na sauriva ni mata, ena kena uvuci nai otioti ni davui. Na davui mera na tucake mai kina o ira sa mate tu vata kei Jisu, mera na sega ni mate tale, kei keda sa bula tiko meda veisautaki ka vakamataliataki vata talega.
53 Sa na vakavoui na yago vuca oqo me kakua tale ni vuca rawa, ka sa na vakavoui na yago mate oqo me kakua tale ni mate rawa.
54 Ia ni sa vakavoui oti na yago vuca oqo me kakua tale ni vuca rawa, ka sa na vakavoui oti na yago mate oqo me kakua tale ni mate rawa, ena qai vakayacori kina na vosa sa volai: "Na qaqa ni tucake tale sa vakaoti vakadua kina o mate"
55 "O iko mate, sa E vei na nomu batigaga? O iko bulubulu, sa e vei nomu qaqa?
56 Nona batigaga o mate nai valavala ca, kei na nona kaukauwa nai valavala ca na vunau.
57 Ia me vakavinavinakataki ga na Kalou, o koya sa solia vei keda na qaqa ena vuku ni noda turaga o Jisu Karisito.
58 O koya oqo, oi kemudou na wekaqu lomani, dou tudei tiko, kakua ni dou rawai rawarawa tu, me uasivi cake tikoga nomudou cakacaka vua na turaga, ka modou kila sara, sa sega ni ka wale na nomudou cakava na cakacaka ni turaga.


Chapter 16

1 Koronica 16 1 Me baleta na kumuni ka ni loloma vei ira sa lotu, me vaka au sa vakaroti ira kina na veisoqosoqo lotu mai Kalatia, kei kemudou talega modou cakava.
2 E nai matai ni siga ni veimacawa, modou kumuna ka binia vata nai yau modou na sautu kina, me kakua tale kina ni dua na kumukumuni ni'u sa yaco yani.
3 Ni'u sa lako yani, au na talai iratou sara ki Jerusalemi me ratou kauta nomudou i loloma, oiratou ga na yaca dou sa vakaraitaka tiko yani e nai vola.
4 Ia kevaka ena vinaka me'u lako talega, e ratou na lako vata kei au.
5 Au na mai raici kemudou ni'u sa yaco ki Masitonia (au na lakovi Masitonia).
6 E rairai tiko ni'u na laki tiko vakalailai vata kei kemudou, ke sa donumaka na gauna ni batabata au sa na tikoga vata kei kemudou, me rawa ni dou qai vakauti au ena vei vanua eso au na lakova.
7 Au se sega ni vinakata me'u raici kemudou mada oqo; ia au sa nuitaka tiko ni na dua na gauna vinaka medatou na qai sota vinaka, kevaka sa lewa ni Kalou.
8 Ia au na tiko mada i Efeso me yacova na Siga ni Penitiko.
9 E levu na katuba vinaka ni cakacaka sa tadola vei au, sa levu vata talega kei na kena meca.
10 Kevaka sa lako yani o Timoci, dou vakai taukeitaki koya me kua kina ni rere; ni sa cakava talega o koya na cakacaka ni turaga, me vakataki au.
11 O koya oqo me kua ni dua me beci koya, ia dou vakauti koya mai ena yalo marau vei au; ni'u sa waraki koya tiko kei ira vata na veiwekani.
12 Ena vuku i Apolosa na wekada, au sa kerei koya vakabibi me lako yani vei kemudou vata kei ira na veiwekani, ia sa dredre sara ga vua me lako yani ena gauna oqo; ena qai lako yani ni sa donu vinaka na kena gauna.
13 Dou vakatawa, dou tu dei ena vakabauta, dou yaloqaqa, dou tu vakatagane.
14 Na ka kece dou cakava me caka ena loloma.
15 Kemudou na veiwekani, dou kila vinaka na matavuvale nei Sitavana, ratou nai sevu sara ga ni lotu mai Akaia, nodratou bula taucoko ratou sa musuki ratou sara ga ena nodra qaravi ka vukei na tamata lotu-
16 Dou talairawarawa kina bula sa vakaoqo, ka vaka kina vei ira e mai colata vata kei keda nai vua ni cakacaka oqo.
17 Au sa marau ena nodratou lako mai o Sitavana, Fotunatu kei Akaiko, ni ratou na mai solia na ka e sega ni rawa mo dou solia.
18 E ratou mai solia vei au e dua na yaloqaqa vei kemudou talega. O ira na tamata sa vakaoqo meda kakua ni dau lako siviti ira.
19 Sa loloma yani vei kemudou na veisoqosoqo lotu mai Esia. O Akuila kei Pirisila vata kei ira na soqosoqo lotu e nodratou vale era sa loloma vakabibi sara tu ga yani ena turaga.
20 O ira taucoko na veiwekani era sa loloma yani. Dou veireguci vakai kemudou ena veireguci e savasava sara.
21 Oi au o Paula, oqo na mawe dina ni noqu volavola ni vakamoce vei kemudou.
22 Kevaka e dua me sega ni lomana na turaga o Jisu Karisito ena cudruvi o koya. Ni lako mai Turaga!
23 Na yalololoma ni noda turaga o Jisu Karisito me tiko kei kemudou.
24 Au sa loloma yani vei kemudou kecega ena vuku i Karisito Jisu. Emeni.