2 Koronica

1 2 3 4 5 6 7 8 9 10 11 12 13


Chapter 1

1 Oi au o Paula, nai apositolo i Jisu Karisito ena lewa ni Kalou, kei Timoci na wekaqu kivei ira nai soqosoqo lotu ni Kalou sa tiko mai Koronica, kei ira kece sa lotu ena yasana vaka Akaia:
2 Me nomudou na loloma kei na vakacegu mai vua na Kalou o Tamada kei na Turaga o Jisu Karisito.
3 Me vakavinavinakataki na Kalou o koya na Tama Ni Noda Turaga o Jisu Karisito, na Tama ni Loloma ka Kalou ni veivakacegui,
4 O Koya sa vakacegui keitou ena neitou rarawa kecega, me keitou vakacegui ira sa rarawa ena dua na ka, ena veivakacegui keitou sa vakacegui kina mai vua na Kalou.
5 Me vaka ni sa ka levu sara na veika rarawa keitou sotava ena vuku I Karisito, keitou sa sinai vuabale talega ena vakacegu mai vei Karisito.
6 Kevaka keitou sa vakararawataki, oqori mo dou vakacegui ka vakabulai kina, ka sa yaco oqo ni dou sa vosota na veika rarawa sa yaco vei keitou, kevaka keitou sa vakacegui dou sa vakacegui vaka talega kina mo dou vakabulai.
7 Na neitou nuitaki kemudou e dei tu ga, ni keitou kila dou sa vakaivotavota vata kei keitou ena veika rarawa, dou na vakaivotavota vata talega kei keitou ena veivakacegui.
8 Keitou sega ni vinakata mo dou sega ni kila na veiwekani, na veika dredre keitou sotava mai Esia: keitou a vakamavoataki sara vaka ca, ka vakamalumalumutaki na neitou kaukauwa, keitou sa nanuma ni keitou na sega ni bula tale.
9 Io, sa tau oti na keitou i totogi me keitou mate, ia keitou sega ga ni via nuitaki keitou vaka i keitou, keitou sa nuitaka ga na Kalou, o Koya sa vakaturi ira cake na mate.
10 O Koya, sa vakabulai keitou mai nai sole ni mate, ia sa vakabulai keitou; ena tu ga vua na neitou vakanuinui ni o Koya ga ena vakabulai keitou tiko,
11 Oi kemudou talega, mo dou vukei keitou ena veimasulaki, me levu me ra vakavinavinaka ena vukui keitou, ni sa vakavotukanataki tiko na veika vivinaka sa yaco vei keitou, mai na nomuni veitokoni.
12 Oqo na ka keitou sa boletaka tu ga: na veika keitou vakaraitaka yani ki vuravura o ya na neitou lewe e loma e vinaka ka savasava vaKalou, ka keitou sega ni tucake ena vuku vakatamata ia ena loloma duadua ga ni Kalou, ka vakauasivi ki vei kemudou.
13 Keitou sega ni vola yani vei kemudou e dua na ka, dou sega ni wilika rawa se sega ni kila. Au sa nuitaka ni dou na taura dei tiko me yacova nai vakataotioti.
14 (Me vaka ni dou se bera sara ni tauri au vakavinaka), ia au sa vakanuinui tikoga ni da na la'ki marau vata ena siga namaki o ya, na siga ni noda Turaga o Jisu.
15 Au sa vakadeitaka yani oqo, ni'u sa lako yani medatou na la'ki sota. Me rawa ni so na ka vinaka mo dou na taura kina –
16 Ena noqu i lakolako ki Masitonia au na yaco mada vei kemudou, ni'u suka lesu tale mai Masitonia au na yaco tale yani vei kemudou, mo dou na qai vukei au ena noqu i lakolako ki Jutia.
17 Ia oqo, e a mamada wale beka na noqu tuva na ka me caka? Se na noqui tuvatuva vakayago beka? Se'u sa tautauvata beka kei ira eso ni ra tukuna na sega e dodonu me io? Ia, vei au na io ga na io, ka sega ga na sega.
18 Ia me vaka na yalodina ni Kalou, na neitou vosa vei kemudou ena io na io, ka sega na sega.
19 Ena neitou vunautaki Jisu Karisito na Luve Ni Kalou, o Timoci, o Silivenusi kei au, e sega kina na io kei na sega, ia vei Koya sa io tu ga.
20 Na ka kece e yalataka na Kalou ena vukuna sa io tu ga, o ya na vuna e cavuti kina vua na Emeni, me vakacaucautaki na Kalou ena vuku i keitou.
21 Na Kalou sa vakatikori keda vata vei Karisito ka lumuti keda vata.
22 Ka dregati keda kei na Nona vakatikora e yaloda na Yalo Tabu ni sa yalataki tu.
23 Ia au sa kaciva na Kalou me noqu i vakadinadina vei au, kevaka au sega ni dina, na noqu lomani kemudou ena bera kina vakalailai noqu lako ki Koronica.
24 Neitou na lako yani e sega ni baleta nomudou i vakarau ni vakabauta, keitou na la'ki vukea cake ga na nomudou rekitaka na Turaga; e na vuku ni vakabauta dou sa tudei kina.


Chapter 2

1 Ia au sa vakadeitaka tiko ena lomaqu, me sa kakua mada ni'u lako yani mo dou kune rarawa.
2 Kevaka me'u na vakararawataki kemudou tikoga, o cei me dauvakamarautaka na yaloqu ia oi kemudou ga ka'u sa dauvakararawataka?
3 Au vola oqo vei kemudou, de yaco ni'u sa lako yani, me kakua ni rarawa tiko na yaloqu vei ira e dodonu me'u rekitaka tiko, au sa vakataudeitaka ena vukumudou na noqu reki me nomudou reki talega.
4 Sa rui luluvu vakalevu na yaloqu, ka lomabibi, ena noqu vola yani vei kemudou nai vola oqo, e ka levu na noqu tagi, e sega ni ka mo dou rarawa kina, ia mo dou kila ga na levu ni noqu lomani kemudou.
5 Ia kevaka e dua me dau veivakararawataki tiko, e sega ni cakava vei au na veivakararawataki oqori, ia mo dou kakua ni via kauwai kina.
6 Nai totogi era tauca na lewe vuqa sa rauta vinaka na tamata vakai koya,
7 Na kisi vaka oqo ena uasivi mo dou ciqomi koya ka vakacegui koya vinaka, de na qai uasivi cake sara nona ca.
8 O koya oqo, au sa kerei kemudou kina mo dou vakaraitaka vua na nomudou lomani koya.
9 Na ka talega oqo au volavola yani kina, me'u vakatovolei kemudou, dou na rawata se sega, mo dou talairawarawa tikoga ena ka kecega.
10 Kevaka sa rawa vei kemudou mo dou vosota e dua sa caka cala, au sa veivosoti oti tu, Au na vosoti koya dina ena vukumudou ena matai Karisito.
11 Me kakua ni mai rawai keda tiko o Setani; ni da lecaikataka tu na nona i vadi qaseqase.
12 Ena noqu lako ki Tiroa me'u laki vunautaka kina nai tukutuku vinaka i Karisito, e a qai dolava vei au e dua na katuba na Turaga.
13 E sega ni cegu na yaloqu, ni'u sega ni raici Taitusi kina na wekaqu, ia au sa mani biubiu mai kina, ka lako ki Masitonia.
14 Ia oqo me vakavinavinakataki na Kalou ni sa tuberi keda ki na qaqa ena vuku i Karisito, ka sa vakayagataki keitou me kuruseta na loma ni vanua nai tukutuku vinaka me vaka na waiwai vakaisaluwakitaki vinaka.
15 Ena vukui Karisito eda sa boi kamikamica kina vei ira sa lotu kei ira sa rusa tiko, ka vakauasivi sara vua na Kalou.
16 Vei ira na sega ni lotu (mate) eda boiboi ni mate vei ira, ia vei ira sa lotu (bula) eda sa boiboi vinaka ni bula vei ira. O cei e kilikili kaya na veika oqo?
17 Oi keitou e sega, keitou sega ni vakataki ira na dauveivakaisini ni ra vakauta na vosa e vakatanitaki kina na vosa ni Kalou, ia keitou sa vunautaka nai tukutuku vinaka ena loma e vinaka sara, ena mata ni Kalou me baleti Karisito.


Chapter 3

1 Keitou sa baci tekivu tukuni keitou tale? Se me keitou vakataki ira eso, me keitou vola li e dua nai vola mei vakadinadina vei kemudou se me dua li nai vola mai vei kemudou, mei vakadinadina?
2 Oi kemudou ga na neitou i vola sa volai ena yaloi keitou, era sa kila ka wilika o ira na tamata kecega;
3 E matata vinaka tu ni dou sai vola i Karisito, dou rawata mai vei keitou, sa sega ni volai ena wai ni volavola, ia ena yalo ga ni Kalou bula, sa sega ena dela ni vatu ni volavola, ena vatu ga ni yagomudou, oqori, na yalomudou.
4 A sa vakaoqo na neitou vakararavi vua na Kalou ena vuku i Karisito.
5 Keitou sa sega ni rawata vakai keitou me vakasamataka ni keitou rawa ni rawata e dua na ka, ia sa vu ga mai vua na Kalou neitou kaukauwa,
6 O koya ga sa vakayacori keitou me keitou sa i vota mate ni veiyalayalati vou, sa sega ni ka e volai ia ena yalona ga; na vosa volai sa ka mate, ia na Yalo ni Kalou sa solia na bula.
7 Ia kevaka e se yaco sara na cakacaka sa yaco kina na mate o koya sa volai ka ceuti ena vatu me serau, me dredre kina vei ira na luvei i Isireli me ra raica rawa na mata i Mosese, baleta nai serau ni matana, o koya sa takali rawarawa.
8 Ena sega li ni uasivi cake sara nai serau ni cakacaka ni Yalo Tabu?
9 Kevaka sa laurai nai serau ena cakacaka ni veicudruvi, na cakacaka ni veivakadonui oqo sa uasivi sara na kenai serau mai na kena o ya.
10 E sega sara ga ni wili me dua nai serau nai serau o ya, ni serau sa qai tu oqo e uasivi cake sara na kenai serau.
11 Kevaka me uasivi nai serau o koya sa takali yani; o koya e sega ni takali e uasivi sara na kenai serau lagilagi.
12 O koya oqo, ni sa tu vei keitou nai nuinui oqo, keitou sa doudou tiko kina ni vunau –
13 Keitou sega ni vakataki Mosese, me ubia na matana ena i ubi, me ra kakua kina ni raica na luve i Isireli e dua na ka sa takali vakamalua tiko yani.
14 Ni se butobuto na nodra vakasama. Me yacova mai na siga oqo e se sega ga ni kautani nai ubi o ya, ni dau wiliki nai veiyalayalati makawa, baleta o Karisito duadua ga sa qai mai kauta tani.
15 Me yacova mai na siga oqo ni wiliki nai tukutuku kei Mosese, e tu nai ubi e yalodra.
16 Ia kevaka e dua me sa veisau vua na Turaga, ena kautani vua nai ubi o ya.
17 Na Turaga sai koya ga oqo na Yalo Tabu; ni sa tiko na Yalo Tabu ni Turaga, sa na yaco na bula sereki.
18 Ia Oi keda kecega, ni sa sega ni ubi na matada, eda sa raica tiko nai serau ni Turaga me vaka na titiro tiko e nai iloilo, ka sa yaco kina vei keda na veisau mai na lagilagi ki na lagilagi, me vaka sa cakava tiko na Yalo Tabu.


Chapter 4

1 O koya oqo, me tekivu mai na gauna keitou sa cakacaka kina vakaitalatala, me vaka na loloma sa yaco vei keitou, e sega ni bau dua na gauna me keitou guce kina.
2 Na neitou i tukutuku vei ira na tamata e sega ni muria na gaunisala ni veivakaisini, keitou sega ni vakatavuvulitaka e dua na ka e sega ni tukuna na vosa ni Kalou, keitou sega ni via kauta cake talega mai na ka sa oti ka dau veivakamaduataki, ia ni keitou tucake tu ena mata ni Turaga me keitou tukuna tikoga na dina, ni ra rogoca o ira na tamata me laucoka na yalodra.
3 Ia kevaka e buwawa na neitou kosipeli, ena buwawa ga vei ira sa lako tiko ki na rusa,
4 Ni sa vakabutobutotaka na nodra vakasama na veika ni vuravura oqo, me dredre kina ni ra raica na rarama ni kosipeli sa serauni tu i Karisito, ni sai koya nai yaloyalo ni Kalou, me vakararamataka na yalodra.
5 Keitou sega ni vunautaki keitou tiko, o Karisito Jisu Na Turaga, na uto ni neitou i tukutuku, oi keitou na bobula ga i Jisu.
6 Na Kalou e vakarota me cila yani na rarama ki na vanua butobuto, o koya sa mai vakararamataka kina na yaloda, meda kila kina nai serau ni Kalou, sa kunei ena mata i Jisu.
7 Ia nai yau talei oqo e mai ukutaka na yago qele, me vakaraitaka kina na Kalou na cakacaka veivakurabuitaki e vakayacora ena nona kaukauwa, ka sega ni o keitou.
8 Ena vei yasana vava kecega keitou vakacacani mai kina, e sega ga ni mai rawai keitou, e vakatataro vakalevu sara na loma i keitou, ia keitou sega ni via suka i muri.
9 Vakacacani sara vakaca, ia sega ni keitou guilecavi; viritaki sobu, ia sega ni keitou mate kina–
10 Keitou sa colata tikoga e veisiga na veika rarawa me vakataki Koya na Turaga o Jisu, me rawa ni laurai talega ena yagoi keitou na mawe ni mavoa me vakataki Jisu.
11 Ni da se bula tikoga meda soli keda yani ki na mate ena vukui Jisu, ni na veisau na yago oqo me tautauvata kei Jisu.
12 O mate sa cakacaka tiko oqo vei keitou, ia na bula sa tu vei kemudou.
13 Ni sa duavata ga na yalo ni noda vakabauta, me vaka na ka sa volai, "au sa vakabauta kau sa vosa kina," oi keda eda sa vakadinata talega, o koya eda sa vosa kina,
14 Eda sa kilai koya ka vakatura cake na Turaga o Jisu ena vakaturi keda cake vata kei Jisu, meda rairai vata e matana.
15 Na ka kecega e yaco oqo me baleti kemudou, o ira na tamata era na raica mai ka vakacerecerea na Kalou ena Nona i serau, ni sa tubu cake nomudou loloma.
16 O koya oqo me da kua ni yalolailai. E dina ni yagoda e sau sa salulu ka na vuca yani, ia na tamata e loma sa vakavoui tikoga mai ena veisiga kecega.
17 Na noda rarawa e lailai sara ka lekaleka walega, sa vakarautaki keda tikoga ki na dua na bula e uasivi cake ka sa sega ni mudu na kena lagilagi,
18 Ni da sa sega ni raica tiko na ka e laurai; eda raica na ka e sega ni rairai. Ia na ka e laurai e sega ni ka tudei, ia na ka sa sega ni rairai eSega ni mudu.


Chapter 5

1 Ni keitou sa kila kevaka sa mani vuca na neitou vale vakavuravura, o koya sa vakacevaceva walega, sa dua na neitou vale,mai vua na Kalou, sa sega ni tara ena liga, ka sa tu me Sega ni mudu mai lomalagi.
2 Na ka oqo e mositi keitou, keitou sa gadreva sara ga kina vakalevu me keitou daramaka nai sulu vakalomalagi, me sa kua nai sulu vakavuravura e kauta mai na mosi,
3 Kevaka me sa daramaki dina nai sulu oqo, eda na sega ni kune me luvaiwale.
4 Na vale vakacevaceva oqo e kauta mai na vutugu kei na veivakatotogani, ena sega ni rawa ni da luvata tani, ena qai luvati koya tani ga ni sa veisau na yago vuca oqo kina yago e vakamataliataki.
5 Na Kalou ga sa veivakarautaki tiko mai me baleta sara ga na ka oqo, ka solia vata na Yalo Tabu mei vakadinadina.
6 Ena ka oqo keitou sa nuidei tiko kina, ni keitou se curu tiko ena vale vakayago oqo, keitou se sega ni tiko tukuna na Turaga.
7 Keitou lako tiko ena vakabauta, ka sega ena raica.
8 Keitou nuidei, io na marau vakalevu cake me keitou sa lako tani mai na yago oqo, me keitou sa tiko vata ga kei na Turaga.
9 O koya oqo se keitou tiko ena yago oqo, se keitou sa takali mai kina, ena sega ni kauta tani na ka keitou sa navuca tu mai, me keitou caka vinaka tikoga e matana.
10 Ni oi keda kece eda na rairai ena mata ni tikotiko ni veilewai nei Karisito, me da na la'ki tauca kina na vua ni veika eda cakava ena yago oqo, se ka vinaka se ka ca.
11 O koya oqo, meda kila ka rerevaka na Turaga, sa dua na ka noda sasaga meda rawati ira na tamata, ia sa kilai keda tu na Kalou, au nuitaka ni na sega ni beitaki na lomamudou.
12 Keitou sega ni via tukuni keitou tale vei kemudou, keitou solia ga vei kemudou na ka mo dou qoroi keitou mai kina, ena nomudou rawa ni veidutaitaka vata eso na yalo e veivakaisini ka dau lako voli yani vei kemudou.
13 Kevaka me keitou vaka na lialia, oqori me baleta na Kalou; se me keitou rakorako ka matau, oqori me baleti kemudou.
14 Na loloma ga i Karisito sa lewai keitou tiko, me yacova tiko mai oqo: kevaka sa mate e dua ena vukudra na tamata kecega, sa mate na tamata kecega;
15 O koya e mate ena vuku ni tamata kecega, o ira sa bula tiko mera kakua ni bula ena vukudra ga, ia ena vukui koya ga e mai mate ena vukudra ka sa tucake tale.
16 O koya oqo, e na gauna oqo ka lako yani keitou sa sega ni doka e dua na tamata. E dina ni keitou a dokai Karisito ena rai ga vakatamata, ena gauna oqo sa sega ni vaka na rai e liu.
17 O koya oqo, kevaka sa tuvata kei Karisito e dua na tamata, o koya sa buli vou; sa lako tani na veika makawa; raica, sa yaco me vou na ka kecega.
18 Sa taka mai vua na Kalou na ka kecega, o koya sa vakaveivinakatitaki keda vua ena vuku i Jisu Karisito, sa solia mai vei keda na cakacaka ni vakaveivinakatitaki oqo.
19 Oqori, na Kalou sa tu vei Karisito me vakaveivinakatitaki koya kei vuravura. Sa sega ni wilika na nodra caka cala ka sa solia vei keda nai tukutuku ni veivinakati oqo.
20 Oqo e da sa mata i Karisito, me vaka sa vakamamasu na Kalou ena vukuda, keitou sa vakamamasu kina ena vuku i Karisito, mo ni veivinakati kei na Kalou.
21 Ena vukuda sa mai yaco kina me valavala ca o Koya ka e sega ni bau valavala ca, me rawa kina vei keda me da vakadonui vua na Kalou ena vukuna.


Chapter 6

1 Keitou sa dau cakacaka vata kei Koya, ka keitou sa kerekere sara vakabibi, mo dou kakua ni vakawaletaka na loloma ni Kalou.
2 Ni tukuna o Koya: "Au a rogoci iko ena gauna ni vinakati, kei na gauna ni veivakabulai au a vukei iko." Raica, oqo na gauna ni vinakati; raica, oqo na siga ni veivakabulai.
3 Keitou sega ni vinakata me dua e tarabe ena dua na ka, de qai beitaki kina na neitou cakacaka vakai talatala.
4 Ena ka kecega e yaco, keitou na dau vakaraitaka ni oi keitou nai talatala ni Kalou: keitou vosota na veivakararawataki, sega ni vakani, na gauna ni vei butuki sobu,
5 Ena veivakanakuitataki, e na biu ki vale veivesu, vaculaki mai na lewe vuqa, vakasaurarataki me cakacaka, moce vakaca, waloloi;
6 Keitou sauma ena yalo vinaka, ena kila na ka, ena vosota vakadede, ena yalo loloma, ena Yalo Tabu, ena loloma dina,
7 Ena vosa ni dina, ena kaukauwa ni Kalou, e nai yaragi ni yalododonu ena ligai matau kei na ligai mawi,
8 Ni keitou dokai se beci, se talanoataki vakavinaka se talanoataki vaka ca, se keitou vakaisini; keitou na dina tu ga;
9 Keitou sega ni bau kilai, keitou sa kilai ga mai cake; keitou sa vaka na tamata mate, keitou sa bula ga, vakararawataki na yagoi keitou, ia keitou sa sega ni mate.
10 Keitou sa dau kune ka rarawa, keitou sa qai dau reki tikoga; keitou vakadravudravuataki, keitou sa vu ni nodra vutuniyau na lewe vuqa; sega ni keitou liga lala, ia keitou sa qai taukena na veika kecega.
11 Kemudou na kai Koronica! Keitou vosa vakadodonu vei kemudou ena yalo e vinaka.
12 Na nomudou vakaleqai tiko sa baleti kemudou ga, ka sega, ni vuna oi keitou.
13 Au vosa oqo vei kemudou (me vaka vei ira na gone lailai), me tiko vei kemudou na yalo e rawa ni vakatavulici.
14 Dou kakua ni vakaivua vata kei ira na sega ni vakabauta. A cava sara mada na kena yaga vua na tamata yalododonu me veitokani kina kei na sega yalododonu? Ena rawa vakacava vua na rarama me veiwekani kei na butobuto?
15 E rau sa duavata vakaevei o Karisito kei Piliali? Se rau na cakacaka vata vakaevei, o koya sa vakabauta kei koya sa sega vakabauta?
16 E rau sa lomavata vakaevei na Vale ni Kalou kei na veimatakau? Ni sai kemudou na Vale ni Kalou Bula. Me vaka sa tukuna na Kalou: "Au na tiko vei ira ka lako voli ena kedra maliwa. Au na qai nodra Kalou, era na qai noqu tamata."
17 O koya oqo: "Dou lako tani mai vei ira ka tawasei tu, sa tukuna na Turaga. Dou kakua ni tara na ka sa sega ni savasava, Au na qai ciqomi kemudou."
18 "Au na yaco me tamamudou, oi kemudou dou na qai luvequ tagane kei na luvequ yalewa, sa tukuna na Turaga kaukauwa sara."


Chapter 7

1 O koya oqo, na veiwekani, ni sa noda na vosa yalayala oqo, meda vakasavasavataki keda mai na dukadukali ni yago kei na yalo, ka meda torova na Kalou ena rere, ni da sa ka tabu.
2 Dou dolava mada na yalomudou vei keitou. Keitou sega ni cala vua e dua, e sega ni dua me keitou vakacacana, e sega ni dua me keitou vakaisina.
3 E sega ni i naki ni vosa oqo, me'u veivakacacani kina; ni'u sa tukuna oti ni dou sa tu ena yaloi keitou, medatou na mate vata ka bula vata.
4 Sa ka levu na noqu doudou ni'u vosa vei kemudou, sa ka levu talega noqu marautaki kemudou. Sa sobuti au tu e dua na vakacegu. Au sa reki vakalevu ena veivakararawataki sa yaco vei au.
5 Ni keitou sa yaco yani ki Masitonia, e sega mada ga ni dua na vanua me keitou bau cegu kina, keitou sa vakararawataki ga mai ena veiyasana taucoko. Na veicoqacoqa mai taudaku, na rere sa yaco e loma.
6 Sa dina na Kalou sa dauvakacegui ira na dau butuki sobu, sa vakacegui keitou talega ena nona lako mai o Taitusi,
7 A sa sega walega e na nona lako mai, ena veivakacegui talega sa sotava mai vei kemudou o Koya, ni sa mai tukuna vei keitou na nomudou gagadre titobu, na nomudou tagi kei na nomudou loma katakata ena vukuqu, au sa qai reki vakalevu cake ga kina.
8 Kevaka mada ga au vakararawataki kemudou e na noqui vola, au sega ni na veivutunitaka, e dina ni'u qai veivutunitaka, ni'u sa qai raica. Ni'u sa nanuma ni sa vakararawataki kemudou nai vola, ia e na dua walega na loma ni gauna lekaleka.
9 Ia oqo au sa reki, e sega ni baleta nomudou vakararawataki, ena vuku ga ni nomudou rarawa sa yaco kina mo dou veivutuni. Ni kena yaco vei kemudou mo dou rarawa e i tuvatuva va Kalou, me kakua kina ni ka wale na nomudou vosota na neitou veivunauci.
10 Na rarawa e vaKalou ena basika ga kina na veivutuni, me rawati kina na bula, na ka oqo me kakua ni qai veivutunitaki tale; baleta na rarawa e solia o vuravura sa yaco ga kina na mate.
11 Dou raica mada oqo ni dou sa rarawa me vaka na lewa vaKalou: e vakatubura vei kemudou na gugumatua, dou galala kina, dou via biuta tani kina nai valavala ca, dou rere, ka dou gagadre vakalevu, dou lomakatakata, dou via sauma na ca! Ena ka kecega oqori dou sa vakadinadinataka ni dou sa savasava mai kina.
12 O koya oqo, ena noqu volavola yani vei kemudou, e sega ni baleti koya e caka cala, e sega talega ni baleti koya e beitaki ni cala, ia me vakaraitaki ga kina vei kemudou, na nomudou dau nanumi keitou vua na Kalou.
13 O koya oqo keitou sa mai vakacegui ena nomudou veivakacegui. Ka keitou sa reki vakalevu e na reki i Taitusi, baleta ni sa vakauqeti vakalevu na yalona ena vukumudou.
14 Kevaka e dua na ka au vakacerecerei kemudou kina vua, au sega ni maduataka ia ni keitou sa vosataka vei kemudou na ka dina, na neitou vakacerecerei kemudou talega vei Taitusi e ka dina.
15 Sa dua na ka na nona rui lomani kemudou, ena nona nanuma na nomudou talairawarawa oi kemudou kecega, ena nomudou ciqomi koya ena rere kei na sautanini.
16 O koya oqo, au sa reki ni sa tu na noqu vakanuinui vei kemudou ena ka kecega.


Chapter 8

1 Keitou vinakata, mo dou kila na veiwekani, me baleta na loloma ni Kalou, sa vakaraitaki vei ira na veisoqosoqo lewe ni lotu mai Masitonia:
2 Ni ra sa vakatovolei tiko ena ka rarawa sara, sa qai levu ga nodra reki, sa sega ni dua na ka me tu ena levu ni nodra dravudravua, ia sa qai uasivi vakalevu sara na nodra loma soli ena soli ka.
3 Au sa tu oqo me kena i vakadinadina, ni ra sa solia me vaka na ka era sa rawata, io, sa sega ni taqei rawa na ka era sa solia, ni ra solia ena yalo e marautaka,
4 Era cikevi keitou matua me keitou ciqoma na i solisoli kei na veitokani ni veiqaravi vei ira era sa lotu.
5 Sa sega ni vaka walega na ka keitou sa nuitaka, ia era sa cabori ira taumada vua na Turaga, emuri ki vei keitou me vaka na lewa ni Kalou.
6 Ia keitou sa uqeti Taitusi kina, me vaka ni a tekivuna o koya, me vakaotia vinaka talega na cakacaka loloma oqo vei kemudou.
7 Ia me vaka sa levu sara vei kemudou na ka kecega – na vakabauta, sa tu na vosa matua, sa tu na kila ka, na gugumatua kecega kei na nomudou loloma vei keitou – dou raica mo dou uasivi talega ena cakacaka loloma oqo.
8 Au sega ni vosa me vaka na veivakaroti, ia au via raica na kena dina ni nomudou loloma, mai na nodra gugumatua o ira tale eso.
9 Ni dou sa kila na loloma ni noda Turaga o Jisu Karisito, e dina sa vutuniyau o Koya, ka sa mai dravudravua ena vukumudou, me rawa kina vei kemudou, mo dou vutuniyau mai ena nona dravudravua.
10 Ena vuku ni ka oqo au sa vakasalataki kemudou kina: E vinaka vei kemudou ni sega ni dou cakava tikoga na ka dou a tekivuna ka dou a gadreva tiko mo dou cakava ena dua na yabaki sa oti;
11 Ia oqo mo dou qai vakaotia sara, na kena cakacaka; me vaka dou a gumatua ena via cakava, me tini vinaka sara na cakacaka dou sa tekivuna oqo.
12 Kevaka sa tu vei kemudou na loma e vinakata, sa vinakati me vaka na ka sa tu vua, ka sega ni vaka e sega ni tu vua.
13 Au sega ni tukuna me ra vagalalataki eso mai nai tavi ka me vakabibitaki kina na nomudou i colacola;
14 Ia me tautauvata ga, ena gauna oqo na nomudou i yau me sotava na nodra dravudravua, kei na nodra i yau talega mera solia mai me sotava na nomudou dravudravua- me rawa kina ni tautauvata.
15 Me vaka sa volai, "O koya sa kumuna vakalevu sa sega na ka e vo vua, kei koya sa lailai na ka e kumuna sa sega na ka e yali mai vua."
16 Ia me vakavinavinakataki na Kalou, o Koya sa vakatubura ena yaloi Taitusi na daunanumi kemudou vakaoqo.
17 E sega walega ni taura na neitou i vakavuvuli, ia ena nona gumatua ga o koya, sa lako rawa yani kina kivei kemudou ena nona lewa ga.
18 Keitou sa mani talai koya yani kei na dua na wekada, o koya sa rogo vinaka vei ira kecega na vei soqosoqo lewe ni lotu ena vuku ni tukutuku vinaka,
19 Sa sega ni koya walega oqo, ia sa digitaki koya o ira na soqosoqo lewe ni lotu me kauta vata kei keitou na ka ni loloma, o koya keitou sa vakatulewataka me vakarokorokotaki tikoga kina na Turaga, ka me vakaraitaki talega kina vei keitou na nomudou yalo rawarawa.
20 Keitou sa qarauna vinaka; me kua ni dua me beitaki keitou ena vuku ni solisoli loloma levu keitou sa vakatulewataka tiko oqo -
21 Me keitou solia na veika e vakaTuraga, sega walega ena mata ni Kalou, ena matadra talega na tamata.
22 Keitou sa talai iratou me ratou lako vata kei na wekada o koya keitou sa raica ni tamata gugumatua ena ka kecega, ia oqo sa levu cake sara na gugumatua baleta na levu ni neitou vakadinati kemudou.
23 Kevaka e dua e via kila nai tukutuku me baleti Taitusi, o koya na noqu i tokani ka keirau dau cakacaka veivolekati sara ena vukumudou. Kevaka e dua e via kilai rau na rua na wekada, oi rau nai talai mai vei ira nai soqosoqo lotu, nai ukuuku i Karisito.
24 O koya oqo mo dou vakaraitaka vei iratou oqo kei nai soqosoqo lotu, nai vakadinadina ni nomudou loloma kei na neitou dauvakadokadokai kemudou voli ga.


Chapter 9

1 Ena vuku ni nodra qaravi o ira sa lotu, e bibi vei au me'u vola vei kemudou oqo;
2 Ni'u sa kila na nomudou yalorawarawa, na ka oqo au vakadokadokai kemudou kina vei ira mai Masitonia, o ira mai Akaia era se vakarau tu mai ena yabaki sa oti; ia na nomudou loma katakata ena cakacaka e la'ki vei vakauqeti vei ira.
3 Ia au sa talai iratou yani na veiwekani, me kakua ni ka wale na neitou vakadokadokai kemudou, ia me vaka au sa tukuna, mo dou vakarau tu;
4 De mani so vei ira na kai Masitonia ena lako vata yani kei au, ka ra qai laki raica ni dou sega tu ni vakarau, keitou(na sega ni rawa ni vunia lo!) de keitou na qai mata madua ena ka keitou dau vakadokadoka.
5 O koya oqo, au sa nanuma kina me ratou sa liu yani vei au o iratou oqo, me ratou sa na vakarautaka rawa nai solisoli loloma, dou sa kumuna rawa me vaka nomudou yalayala, vakarautaki tu ena yalo dina ni lomasoli ka sega ena vosakudrukudru kei na voraki.
6 Ia au sa tukuna vaka oqo: O koya sa kaburaka vakalailai, ena tamusuka talega vakalailai, kei koya sa kaburaka vakalevu, ena tamusuka talega vakalevu.
7 Me sa nakita rawa mai yalona na tamata yadua na ka me mai solia, me kakua ni vosa kudrukudrutaka se me voraki; ni sa vinakata na Kalou na soli ka ena yalo e mamarau.
8 E sega ni dredre vua na Kalou, me vakasaututaki kemudou ena veiyau talei kecega mo dou vutuniyau tu kina, ka vakauasivi mo dou uasivi ena cakacaka vinaka kecega.
9 Me vaka na ka sa volai: "Sa veiwaseyaka yani o koya, Ka sa solia vei ira na dravudravua; Na nonai valavala dodonu ena tudei tu me Sega ni mudu."
10 Ia oqo, o koya sa vakarautaka na sore ni sila vua na daukabukaburaki, kei na madrai me kakana, me vakarautaka ka vakatubura nai tei dou kaburaka, me vuai yadrau mo dou na sega ni taqea rawa na vua ni nomudou i valavala dodonu,
11 Ni dou sa vakavutuniyautaki vakalevu ena ka kecega ena vuku ni nomudou lomasoli, o koya sa vakavuna me vakacaucautaki vakalevu na Kalou ena vukuda.
12 Ena qaravi ni cakacaka oqo e sega walega ni sotavi kina na nodra gagadre na tamata lotu, ia eda sa vakasinaiti talega ena vakavinavinaka vua na Kalou.
13 Ni sa laurai na vakavotukana ni nomudou cakacaka vua na Turaga, era na vakarokorokotaka na Kalou ena ka dou vakaraitaka mai na nomudou talairawarawa ki nai tukutuku vinaka kei Karisito, vakatalega kina nomudou wasea na nomudou i yau kivei ira kei ira na tamata kecega,
14 Era na dau nanumi kemudou ena masu, ka na dau mositi ira tu na nomudou bula, ena nodra raica ka vakadinadinataka na loloma ni Kalou vei kemudou.
15 Me ia na vakavinavinaka vua na Kalou, ena vuku ni nonai solisoli loloma,e dredre me vakamacalataki rawa!


Chapter 10

1 Oi au oqo, o Paula, au sa vakamamasu vei kemudou ena yalo vaka Turaga kei na yalo e malumalumu sara i Karisito – ni'u tiko kei kemudou au na veidokai ka vakamalumalumutaki au, ia ni'u sa tiko tani au sa doudou ni vosa vei kemudou.
2 Ia au sa kerei kemudou ni na sega ni rogo kaukauwa vaka o ya na noqu vosa ni'u sa tiko vata kei kemudou, ni so vei kemudou, e nanuma tiko ni ka vakayago na neitou cakacaka.
3 E dina ni keitou bula tiko vakatamata e vuravura, ia keitou sega ni vakayagataka nai yaragi e vakayagataka o vuravura ena i valu oqo.
4 Na neitou i yaragi ena i valu vakayalo oqo e sega ni ka vakayago me vakatamata, ia ena kaukauwa ni Kalou Me talaraki kina na bai kaukauwa,
5 Me buturaka sobu na duidui kei na veika cecere kece e vakalevulevui koya me veicoqacoqa kei na vuku ni Kalou, me vesuka mai na vakanananu kecega me talairawarawa vei Karisito,
6 Ka keitou sa vakarau me totogitaka na talaidredre kecega, ni dou sa vakayacora na bula ni talai rawarawa.
7 Na nomudou rai beka dou raica tikoga na ka e taudaku? Kevaka e dua sa vakadeitaka ni sa tu vata kei Karisito, me nanuma oqo o koya, me vaka ga sa nei Karisito o koya, keitou sa tu vaka talega kei Karisito.
8 Kevaka au vakalavelaveta vakalevu tiko na lewa sa soli mai vei keitou o koya sa solia vei keitou na Turaga, mo dou vakatatacaketaki kina ka sega ni dou vakarusai kina, ena sega ni rawa me'u na madua kina.
9 De na rairai beka ni'u, vakarerei kemudou ena noqu i vola.
10 "Ni ra tukuna, me kakua ni kauwaitaki na nona i vola, e sa rui bibi ka kaukauwa, ni sa yaco mai eke eda na raica ni sega ni dua na ka vinaka me tu vua, oqo e dua na dauvunau vakasisila."
11 Me ra kila o ira na vosa tiko oqori, ni rau sa tautauvata ga na neitou i vakarau keitou vola tiko e nai vola, kei na neitou i tovo ni keitou sa tiko vata kei kemudou.
12 Ena dredre vei keitou me keitou vakatautauvatataki keitou kei ira na dau tukutukuni ira, na nodra leqa ni ra vakatautauvatataki ira tikoga vakataki ira oqo e sega ni vakaraitaki ni vuku.
13 Ia oi keitou na ka keitou tukuna ena sega ni rui sivia sara vaka o ya, ia keitou na qarauna me toka ga ena i yalayala e vakatara na Kalou me keitou yacova – o koya dou sa okati talega kina.
14 Keitou sega ni via sivia na neitou i yalayala (me nanumi kina ni sega ni yaco vei kemudou na neitou lewa), keitou a kauta yani vei kemudou nai tukutuku vinaka i Karisito;
15 Keitou sega ni via vakadokadokataka na cakacaka gumatua ni dua na tamata, oqori sa sivia tale, ia keitou nuitaka, ni na tubu me levu na nomudou vakabauta, dou na vakarabailevutaka kina na neitou i yalayala,
16 Me keitou vunautaka kina na Kosipeli ena veivanua yawa siviti kemudou, ia me keitou kakua ni dokadoka e na vuku ni nona rawa ka kei na nona yalayala e dua tale na tamata.
17 Ia, "O koya sa vosa doudou, me vosa doudou ena vuku ni Turaga."
18 Ni sa sega ni vakabau o koya sa tukuni koya, sa vakabau ga o koya sa tukuna na Turaga.


Chapter 11

1 Isa, au kerea mo dou vosoti au mada ga vakalailai – au kerea mo dou vosoti au.
2 Au vuvutaki kemudou ena vuvu e Vakalou. Ni'u a musuki kemudou vua e dua me watimudou, me'u vakaraitaki kemudou kina ena mata i Karisito ni dou sa savasava sara.
3 Ia ka'u sa rere, de dua na ka ena vakacalai kina na lomamudou mai na kena dina kei na kena savasava vei Karisito, me vaka nona vakacalai Ivi e liu na gata ena nona i lawaki ca.
4 De mani lako mai e dua, ka mai vunautaka vei kemudou e dua tani na Jisu, sega ni o koya keitou dau vunautaka, se dou ciqoma e dua tani na Yalo Tabu ka sega ni koya na Yalo Tabu sa yaco mai vei kemudou e liu, se duatani na kosipeli mai na kosipeli dou sa vakabauta – dou tovolea mo dou vosota oqori.
5 Au tukuna oqo vei kemudou, o ira nai apositolo oqori era sega ni uasivi mai vei au.
6 E dina ni'u sega ni vulica vinaka na vosa, ia au kila na ka au tukuna tiko, Ka dou sa raica na kena vakamatatataki vei kemudou na kecega.
7 Au sa caka cala beka li ni'u vakamalumalutaki au mo dou vakalevulevui kina. Baleta ni sega ni'u lavaka vei kemudou me saumi na noqu vunautaka nai tukutuku ni Kalou?
8 Au butakoca beka mai vei ira na veisoqosoqo lotu, nai solisoli, me rawa ni'u veiqaravi kina vei kemudou?
9 Ni'u tiko ekeri, ni dua na ka au vinakata au sega ni vakaraitaka vei kemudou me'u vakaogai kemudou kina, ni'u leqa oiratou ga na lako mai Masitonia era vukei au mai kina. E sega ni dua bulu mada ga na sede me'u lavaka vei kemudou, ena sega ni rawa ga vei au.
10 Me vaka na dina i Karisito ena noqu bula, ena sega ni rawa me dua e tarovi au, ena noqu vosa doudou ena ka oqo ena yasana vaka Akaia.
11 Ena vuku ni cava? Baleta ni'u sega beka ni lomani kemudou? Na Kalou ga sa kila!
12 Ia, na ka au cakava, au na cakava tikoga, me'u musuki ira laivi kina o ira era vakadokadokataka tiko na nodra cakacaka vua na Kalou, ni ra tukuna era tautauvata kei keitou ena cakacaka.
13 O ira oqo nai apositolo vakailasu, na nodra cakacaka e veivakaisini, ka ra qai vukici ira tu me vaka nai apositolo i Karisito.
14 Sega ni da qai kurabui ena ka oqo! O Setani e vukici koya tu me vaka na agilosi ni rarama.
15 O koya oqo, e sega kina ni dua na ka levu sara, me vukici koya na nona i talatala me ra vakataki ira nai talatala ni valavala dodonu, ni nodra i tinitini e vakatau mai na nodra cakacaka.
16 Au na cavuta tale, me kakua ni dua e nanuma ni'u lialia, kevaka sa vaka kina vei kemudou, ia dou ciqomi au ga me vaka na lialia, me rawa ni'u tukuna tale kina eso na ka.
17 Na ka au tukuna tiko, sa sega ni nona lewa na Turaga, ia sa vosa ga ni lialia ni'u sa vakalevulevui au ena doudou.
18 Eda raica ni levu era vakaqoroqoroi ena veika vakavuravura, oi au talega au rawa ni uasivi cake sara kina.
19 Sa dua na ka nomudou dokai ira na lialia, oi kemudou sa vuku tu.
20 Ka dou sega ni bau via kauwai ena nodra vakasaurarataki kemudou kei na nodra butakoci kemudou, se na nodra lawakitaki kemudou, se na nodra vosa vakaviavialevu, se na nodra sabica na balumudou.
21 Na neitou madua au sa tukuna kina ni keitou sa malumalumu vaka levu ena ka oqo! Ia kevaka e dua sa doudou ena dua na ka – oi au talega e rawa ni vosa vakalialia – ni'u rawa me'u vosa doudou.
22 O ira beka era Iperiu? Au sa vakakina. Era sa luvei Isireli beka? Au sa vaka kina. Era sa kawa beka i Eparaama? Au sa vaka kina.
23 Era talatala li i Karisito? – au sa vosa me vaka na lialia – au sa uasivi cake: e levu sara na cakacaka au cakava, au a warolaki ena kuita ka sega ni wili rawa, e levu cake na gauna au tu kina ena vale ni veivesu, ka levu na gauna e dodonu me'u sa mate kina.
24 E vaka lima na gauna me ra kuitalaki au kina na Jiu, ena nodra i kuita vaka tolusagavulu ka ciwa me tau e yagoqu.
25 Au a mokulaki vakatolu ena kau; au a vakaviriki oti ena vatu; ena noqu veisokoyaki au a voca vakatolu; e dua na bogi taucoko ka dua na siga taucoko au veiciriyaki voli ena loma ni wasa liwa;
26 Au taubaletaka e vuqa na sala dredre, au takosova na veiuciwai waluvu, era butakoci au na daubutako, era vakacacani au na kai matanitu tani, au a vaculaki ena loma ni koro, au a vakalolomataki ena vanua dravuisiga, au voleka ni mate ena loma ni wasawasa, au kune ka rarawa mai vei ira na veiwekani vakailasu;
27 Au a dauoca ka daurarawa, ena levu na gauna au sega ni daumoce, au a dauviakana ka dauviagunu, e levu na gauna e sega ni dua na kakana me tu e ketequ, edau curumi au na batabata ni lailai nai sulu e yagoqu –
28 Ni sa yaco tiko na veika oqori, na cava tale e tarai au tu ena veisiga: e mosita tu na yaloqu na veisoqosoqo lotu.
29 O cei sa malumalumu, ia au sa sega ni malumalumu? O cei sa vakacalai, au sega ni via yalokatakata kina?
30 Kevaka me'u vaqoroqoroya e dua na ka, au na vaqoroqoroya na veika sa yaco vei au, me'u vakamalumalumutaki au kina.
31 Na Kalou ka Tama ni noda Turaga o Jisu Karisito, o Koya sa vakarokorokotaki me Sega ni mudu, sa kila ni'u sa sega ni vosa lasu.
32 Mai Tamasiko na Kovana nei Tui o Arita, sa yadrava tiko na koro o Tamasiko, e saga tiko me vesuki au;
33 Ia au a biu ena dua na sova, qai tukuci sobu mai e na katuba leka, ka vakalutulututaki mai ena yasa ni lalaga ni vale, au dro bula rawa mai kina ena ligana.


Chapter 12

1 Sa dina sara, sa sega ni yaga vei au me'u dokadoka taka e dua na ka. Au na kauta mai vei kemudou na raivotu kei nai vakatakila mai vua na Turaga:
2 Au sa kila e dua na tamata sa tuvata kei Karisito ena tini ka va na yabaki sa oti – ena yagona se sega, se vakayalo se sega, au sa sega ni kila, na Kalou duadua ga sa kila – o koya oqo sa kaucake ki nai katolu ni taba lomalagi.
3 Au sa kila na tamata o ya – se vakayago se sega au sa sega ni kila, na Kalou duadua ga sa kila–
4 Sa kaucake ki Parataisi ka sa rogoca na vosa e sega ni vakamacalataki rawa, o koya e sega ni vakadonui vakalawa vua me vosataka.
5 O koya oqo au na tukuna kina; io kivei au, au na sega ni dokadokataka vakavo ke yaco ena noqu lecaika.
6 E dina au na gadreva me'u talanoataka, ia au na sega ni lialia kina; au na tukuna ga na ka dina, ia au na sega ni via tukuna, de dua na tamata sa nanuma ni'u sa cecere mai na ka e raica ka rogoca mai vei au.
7 Ia, de'u na vakadokadokai vakalevu ena levu ni ka sa vakatakilai vei au, sa qai dua na voto ni kau sa mai votoka na yagoqu, e dua nai talai i Setani me vakararawataki au, me'u kakua ni dokadoka kina.
8 Ena vuku ni ka oqo au masu vakatolu vua na Turaga me kau tani vei au.
9 Sa qai tukuna mai vei au o Koya, "Sa rauti iko ga na Noqu loloma ni sa qai taucoko na Noqu Kaukauwa vua e dua e malumalumu." O koya oqo e ka marautaki vei au me'u dokadokataka ga na noqu malumalumu, me tiko kina vei au na kaukauwa i Karisito.
10 O koya oqo sa ka ni marau tale vei au me'u sotava na mosi, na vakasewasewani, na vakadravudravuataki, na vakararawataki, na vakacacani, ena vuku i Karisito. Ni'u sa malumalumu, au sa qai kaukauwa.
11 Na noqu mai vaka tu oqo na lialia, oi kemudou ga dou vakavuna. E dodonu mo dou vosavinakataki au; e dina ni'u ka walega, ia au sega ni lailai sobu mai vei ira nai apositolo, ni veika e tu vei ira e tu talega vei au.
12 E dina na ka e kilai kina e dua nai apositolo sa laurai e na kemudou maliwa, ena bula ni dauvosota, na veivakatakilakila eso e veivakurabuitaki kei na cakacaka mana.
13 E na cava beka dou sa uasivi cake kina vei ira na veisoqosoqo lotu tale eso, au a vakacolacolataki kemudou li? Dou vosoti au ena cala oqo!
14 Sai katolu ni gauna oqo me'u via lako yani vei kemudou. Au sega ni vinakata mo dou vakaicolacola mai kina; au sega ni gadreva na nomudoui yau, na nomudou bula ga. Na gone e se bera ni dodonu me vakarautaka na kakana vua nona i tubutubu, ia nai tubutubu ga me vakarautaka na kakana vua na luvena.
15 E na ka rekitaki vei au me'u solia me vakayagataki na noqu bula se me'u mate ena vukumudou; na kena levu ga ni noqu lomani kemudou na kena lailai sobu tiko na nomudou lomani au.
16 Ia e sa na vaka tu ga o ya, au a sega ni vakaicolacolataki kemudou.Dou tukuna ni'u qaseqase ni'u cakacaka vakailawaki vei kemudou!
17 Au a vakaiyau beka mai vei kemudou mai na ka era vota vei au o ira au a tala vei kemudou?
18 Au masuti Taitusi, me, rau lako vata yani kei na dua ga na wekada. E dua li na ka sa taura mai vei kemudou? E sega sara, e sega beka ni dua ga na Yalo Tabu keirau sala vata voli kina? E sega beka ni dua na mawe ni yava keirau muria tiko?
19 Dou nanuma beka me keitou na la'ki vakavinakataki keitou vei kemudou? Keitou sa vosa ena mata ni Kalou ena vuku i Karisito. Ia ena ka kecega keitou cakava me baleti kemudou na lomani, mo dou vakatataki cake kina.
20 Au rui rere vakalevu, deu qai lako yani ka raica vei kemudou na veibasai ni ka au namaka me kune vei kemudou, kei na nomudou sega ni namaka na ka dou na raica vei au; de sa tiko vei kemudou na veileti, kei na veilomacataki, kei na veicudruvi vakai kemudou, kei na beca na tamata, kei na veikaseti, kei na veivakasolokakanataki, kei na veivakacerecerei vakatamata kei na veitovaki vaka tamata;
21 Deu na lako tale yani vei kemudou, ena qai vakamalumalumutaki au na noqu Kalou e matamudou, me'u na tagicaki ira kina sai valavala ca e liu ka ra sega ni via veivutunitaka nodra cala, na dauyalewa kei na dautagane, kei na daugagano lo me vaka era sa dau cakava.


Chapter 13

1 Oqo e sa na kena i katolu ni noqu na lako yani vei kemudou. "Mai na gusu ni lewe rua se lewe tolu, me ratou vakadinadinataka e dua na ka e ratou raica ni cala ni se bera ni vakatulewataki."
2 Au sa tukuna oti vei kemudou ka ia tiko nai valavala ca e liu kei kemudou kece na kena vo, au sa vakasalataki kemudou rawa yani oqo, me vaka noqu a tiko e keri e nai karua ni noqu veisiko, au sa vola yani oqo, ni'u na lako yani au na sega ni veivosoti tale tiko, sa na yaco na veivakadodonutaki.
3 Me vaka ni dou gadreva mo dou raica nai vakadinadina ni o Karisito e vosa dina tiko vei au, o Koya e sega ni malumalumu vei kemudou, ia sa tu ga vei kemudou na Nona kaukauwa levu.
4 E dina ni a vakoti o Koya ena kauveilatai ena malumalumu, ia sa tu vua na kaukauwa ni Kalou. Oi keitou talega sa malumalumu vaka kina, ia keitou na bula vata kei Koya ena kaukauwa ni Kalou vei kemudou.
5 Dou dikevi kemudou mada ka raica dou se taura dei tikoga na vakabauta. Dou vakatovolei kemudou. Dou sega ni kilai kemudou tiko li, ni sa tiko vei kemudou o Jisu Karisito? – De dou na sega ni vakadonui.
6 Ia sa dei na yaloqu ni dou sa rawa ni kila, ni keitou sa vakatovolei oti ka sega ni lutu tani.
7 Au sa masu oqo vua na Kalou mo dou kakua ni caka cala, sega ni baleta me da vakadonui kina, ia mo dou kitaka na ka e vaka Turaga, e dina ga ni na rairai me vaka eda sega ni vakadonui.
8 Ena sega ni rawa me keitou saqata na dina ena ka keitou cakava, ia keitou na totaka ga na dina.
9 Ia keitou sa marau ga ni keitou sa malumalumu dou sa qai kaukauwa. Ia oqo sa na neitou qaqani masu mo dou na matua sara.
10 Ia au sa vola tiko yani nai vola oqo ni'u tiko yawa mai vei kemudou, au ririkotaka tiko de'u qai yaco yani au qai cebuceburaki kemudou, me vaka na lewa sa vakatauca oti tu vei au na Turaga ena vukumudou, mo dou na vakatataki cake kina ka sega ni basuraki kemudou sobu.
11 Au sa na mai tinia na noqu i vola na veiwekani ena vica na mala ni vosa oqo: Mo dou marau tiko, Dou tubu cake vei Karisito, Dou rogoca vinaka na ka au sa cavuta vei kemudou, Dou lomavata ka cakacaka vata, Ena dau tiko vata kei kemudou na Kalou ni loloma kei na vakacegu.
12 Dou veireguci vakai kemudou ena yalo e savasava.
13 Era sa loloma tu yani, o ira kece sa lotu tiko eke.
14 Me tiko vei kemudou kecega na yalololoma ni Turaga o Jisu Karisito, kei na loloma ni Kalou kei na veitokani ni Yalo Tabu. Emeni.