Kalatia

1 2 3 4 5 6


Chapter 1

1 Oi au o Paula, nai apositolo (e sega ni mai vei ira na tamata, se ena i lesilesi vakatamata, ia ena i lesilesi ga i Jisu Karisito kei na Kalou na Tamana, o Koya ka vakaturi Jisu cake tale mai na mate),
2 kei ira taucoko na mata veiwekani era tiko vata oqo kei au, ki na soqosoqo lotu mai Kalatia
3 Me nomudou na nona loloma kei na vakacegu ni Kalou o Tamada kei na noda Turaga o Jisu Karisito,
4 O koya ka mai soli Koya ena vuku ni noda i valavala ca, me vakabulai keda kina mai na vuravura ca oqo, me vaka na Nona lewa na Kalou o Tamada,
5 Me Nona tikoga na vakarokoroko me sega ni mudu. Emeni.
6 Au rui kurabui vei kemudou, ena nomudou biuti Koya ka kacivi kemudou, ena loloma vaKarisito, ka dou qai goleva e dua tani tale nai tukutuku,
7 E sega ni duatani tale, ia sa so ga era vinakata mera vakaleqai kemudou, ena nodra kauta vakatani nai tukutuku vinaka kei Karisito.
8 Ia kevaka mada ga e dua vei keitou, se dua na agilosi mai lomalagi, me la'ki vunautaka yani e dua tani nai tukutuku vinaka, ka sega ni vaka keitou dau vunautaka, dou taura ka vakarusa.
9 Me vaka na ka keitou sa dau tukuna oti vei kemudou, au na baci tukuna tale, kevaka e dua me laki vunautaka vei kemudou e dua tani nai tukutuku vinaka, ka sega ni vaka keitou a vunautaka vei kemudou, dou taura ka vakarusa.
10 O cei au via vakalomavinakataka na tamata se na Kalou? Se mera taleitaki au ga na tamata? Kevaka me'u vakalomavinakataka na tamata, au sa qai sega ni talatala i Karisito.
11 Ia ka mo dou kila na veiwekani, nai tukutuku vinaka au vunautaka e sega ni ka vakatamata.
12 E sega ni solia vei au e dua na tamata, se me dua e vakatavulica vei au, ia e yaco ga mai, ena nona vakatakila vei au o Jisu Karisito.
13 Dou sa rogoca ka kila vinaka, nai valavala ni noqu lotu vaka Jiu e liu, ena noqu dau saga vakaukauwa, mera vakararawataki vakaca ka vakarusai vakadua, nai soqosoqo lotu ni Kalou.
14 E sega ni dua vei ira na kai noqu me siviti au rawa, ena muria nai vakarau ni lotu vaka Jiu, sa dua na ka na noqu taura vakabibi nai tovo ni nodra lotu na noqu qase.
15 Ia ni sa vinaka vua na Kalou, o koya sa tawasei au mai na kete i tinaqu, ka qai kacivi au ena nona loloma,
16 Sa qai vakaraitaka na Luvena vei au me'u raica, me'u na vunautaki Koya vei ira na kai matanitu tani, e sega ni'u lako tale kina matabose, mera solia mai na veivakadeitaki ena ka au raica,
17 E sega ni'u lako cake ki Jerusalemi, vei ira sai apositolo e liu vei au; ia au lako ga ki Arapea, ka lesu tale ki Tamasiko.
18 Ni oti vinaka e tolu na yabaki, au sa qai lesu cake tale ki Jerusalemi, me'u laki raici Pita, kau mani tiko vata kei koya e kea me tinikalima na yabaki.
19 Ia e sega ni bau dua mada ga nai apositolo me'u raica, ka vakavo ga o Jemesa, na tuakana na noda Turaga.
20 (Oqo me baleta na veika au vola yani vei kemudou, ena mata ni Kalou, me'u tukuna vei kemudou, ni'u sega ni lasu).
21 Ni oti o ya, au sa qai lako kina vei yasana vaka Siria kei Silisia.
22 Vei ira nai soqosoqo lotu mai Jutia era tu vata kei Karisito, era se bera ni taura vakavinaka tiko na kequi rairai.
23 Ia era sa rogoca tikoga, "Ni o koya e a dau vakararawataki keda vakaca, sa vunautaka tale tiko na vakabauta ka a dau via vaqeavutaka."
24 Ara sa vakarokorokotaka na Kalou ena vukuqu.


Chapter 2

1 Ni oti e tinikava na yabaki, au sa qai lesu cake tale ki Jerusalemi vata kei Panapasa, au sa kauti Taitusi talega.
2 Au a lako ena veika sa vakatakilai vei au, me'u la'ki tukuna vei ira, nai tukutuku vinaka au vunautaka vei ira na kai matanitu tani, ia sa vuni ga vei ira sa rogo, de sega ni yaga noqu cici tiko oqo kei na noqu cici tiko mai liu.
3 O Taitusi na kai Kirisi e tiko vata kei au, e sega ni vakasaurarataki me cilivi.
4 E yaco tiko oqo, baleta ni so vei kemudou na veiwekani e i to tiko ni veisaqa, (era lako vakavuni mai ka vakalecaleca, mera mai via vakadikeva na neitou galala ena vuku I Karisito Jisu, me rawa ni ra beitaki keitou kina me keitou vesuki),
5 Keitou na sega ni via solia vei ira e dua mada ga na auwa mera vosa kina, me rawa ni keitou tukuna kece na dina ni tukutuku vinaka vei kemudou.
6 Ia o ira era dau via vakalevulevui ira – se vakacava na ka e tu vei ira, era sega ni dua na ka vei au, ni Kalou e sega ni dau veitotaki – o ya na vuna e sega ni dua tu kina na ka vei au, kevaka e dua me via vakalavelaveti koya cake.
7 Ia na duidui ga ni nodra rai, ena nodra raica ni'u sa lesi me'u vunautaka nai tukutuku vinaka vei ira sa sega ni cili, ia na i tukutuku vinaka i Pita vei ira sa cili.
8 (O Koya e kacivi Pita mei apositolo vei ira na cili, e kacivi au talega me i apositolo vei ira na sega ni cili),
9 O Jemesa, o Kifa kei Joni, oiratou ka dau kilai tu ni ratou duru, e ratou kila na loloma e soli vei au, ka ratou sa duavata kina kei na nodratou vakanuinui vinaka, me keirau lako kina kei Panapasa vei ira na kai matanitu tani, oiratou vei ira na cili.
10 Na nodratou gagadre mera nanumi na vakaloloma tu, oqori sara ga na ka au sa bucina oti tu, me'u na raica e liu.
11 Ia ni sa yaco mai Anitioki o Pita, au sa vosataki koya vakadodonu e matana, baleta ni o koya e dodonu me beitaki;
12 Ni ra se bera ni lako mai eso na tamata vei Jemesa, e sa dau kana vata o koya kei ira na kai matanitu tani; ia ni ratou sa lako mai, sa qai via tawasei koya me vakatatabu ni rerevaki ira na cili.
13 Ka lewe levu vei ira na Jiu, era bulataka tiko na bula ni veivakaisini vakaoqo, sa mai yacovi Panapasa talega na kedra mate na dauveivakaisini.
14 Ia ni'u sa mai raica na nodra sega ni bulataka vakadodonu na dina ni tukutuku vinaka, au sa tukuna vei Pita ena matadra kecega, "a cava, ni dou sa Jiu, dou qai bulataka tiko nai valavala ni kai matanitu tani, oi kemudou na Jiu, ka dou qai vakasaurarataki ira tiko na kai matanitu tani, mera bulataka na bula vaka Jiu?
15 Oi keda, na kawa dina vaka Jiu, ka sega ni tamata i valavala ca, mai vei ira na matanitu tani,
16 ka meda kila ni na sega sara ga ni vakadonui e dua na tamata ena vuku ni cakacaka ni vunau, ia ena vuku ga ni vakabauti Jisu Karisito, e dina ni da sa vakabauti Karisito Jisu, meda sa vakadonui kina ena vuku ni noda vakabauti Karisito, ka sega ga ena vuku ni cakacaka ni vunau;
17 Ia kevaka meda vakasaqara na veivakadonui vei Karisito, eda na valavala ca tikoga, o Karisito beka nai talatala baleta nai valavala ca? E sega sara!
18 Kevaka au tara cake tale na ka au sa vakarusa, au sa buli au tikoga me'u tamata ca.
19 Ni sai koya na vunau, au sa mate kina ki na vunau, me'u bula kina vua na Kalou.
20 Keirau sa vakoti vata kei Karisito; sa sega ni oi au sa bula, ia o Karisito ga sa bula vei au; na noqu bula tiko me yacova mai oqo, sa rawa duadua ga ena vuku ni vakabauta na Luve ni Kalou, o Koya sa lomani au, ka solia talega Nona bula ena vukuqu.
21 "Au sa sega ni qai via vakawaletaka na loloma ni Kalou; kevaka sa rawa na veivakadonui ena vuku ni vunau, sa sega ni qai yaga na mate i Karisito."


Chapter 3

1 Kemudou na kai Kalatia lialia! O cei e mai veisautaki kemudou mai na nomudou muria tiko na dina, dou sa vakadinadinataka ka kila, ni o Jisu Karisito e mai vakoti ena kauveilatai?
2 E dua ga na ka oqo au vinakata me'u kila mai vei kemudou; dou a rawata beka na Yalo Tabu ena cakacaka ni vunau, se mai na nomudou rogoca ka vakabauta?
3 Na cava dou sa rui lialia kina vaka oqo? Ni dou a tekivu ena Yalo Tabu, oqo dou sa mai bula tale tu ena ka vakayago?
4 E levu na ka dredre dou sa sotava mai – na cava sa sega ni rawa kina oqo?
5 Ena vuku ni ka oqo, o Koya e solia vei kemudou, na veivakakaukauwataki ni Yalo Tabu kei na vei cakacaka mana ena kemudou maliwa, e rawati ena cakacaka ni vunau, se ena rogoci ni vakabauta?
6 "Me vaka nona vakabauta na Kalou o Eparaama, sa okati vua mei valavala dodonu."
7 O koya mo dou kila, ni o ira ga era sa vakabauta era luvei Eparaama.
8 Ni sa tukuna makawa nai Vola Tabu, ni na yaco na gauna, ena vakadonui ira na kai matanitu tani na Kalou ena vuku ni vakabauta, e a vunautaki talega vei Eparaama nai tukutuku vinaka ka vaka, "ena vakalouvinakataki na veimatanitu ena vukumu."
9 O koya oqo, o ira ga sa vakabauta, era na vakalouvinakataki vata kei Eparaama.
10 O ira kece era se bula tiko ena i vunau, era sa cudruvi oti, ni sa volai; "ena cudruvi vakayadua o ira sa sega ni muria tiko na veika sa volai e nai vunau – me ra cakava."
11 Ia ena mata ni Kalou, e sega ni rawa me dua e vakadonui ena i vunau, ni sa volai, "ena bula na tamata yalododonu ena vuku ni vakabauta."
12 Nai vunau e sega kina na vakabauta, "ia o koya e muria me bulataka tiko."
13 O Karisito e vakabulai keda mai na cudru ena vuku ni vunau, e mai mate ena vukuda (ni sa volai, "ena cudruvi o ira kece sa vakaliligi ena kau")
14 Me nodra kina na kai matanitu tani na veivakalouvinakataki mai vei Eparaama ena vuku i Karisito Jisu, meda rawata talega na Yalo Tabu sa yalataki ena vuku ni vakabauta.
15 Kemudou na veiwekani, au vosa tiko oqo vei kemudou ena noda bula vakatamata, e dina ni veiyalayalati oqo e vakaitavi kina na tamata, kevaka sa yaco na kena veivakadeitaki, ena sega ni rawa me kau tani se vakaikuritaki.
16 Na yalayala e vakayacori vei Eparaama kei ira na nona kawa, e sega ni tukuni, "na veikawa tale eso," oqori na veikawa taucoko, ia e dua ga na kawa, "Na nomu kawa ga," sai koya na Karisito.
17 Au tukuna vei kemudou, nai vunau e qai soli mai ni sa oti e va na drau ka tolusagavulu na yabaki, ka sega kina ni rawa me mai kauta tani na veiyalayalati sa vakayacora tu mai na Kalou ena vuku i Karisito, e sega kina ni rawa me mai vakamalumalumutaki kina, na yalayala sa vosa tu mai kina na Kalou.
18 Kevaka sa noda nai votavota ena vuku ni vunau, sa qai sega yaga na yalayala; ia na Kalou sa solia vei Eparaama, ni sa vosa yalayala vua.
19 Na cava mada nai naki ni vunau? E soli mai baleta na talaidredre ni tamata, me yacova na gauna sa lokuci tu, me basika mai kina na kawa ka yalataki; a ra sa tusanaka o ira na agilosi ena ligana na dauveisorovaki.
20 Na dauveisorovaki e sega ni sorovaka ga e dua, ia na Kalou sa dua ga.
21 E veicoqacoqa beka na vunau kei na vosa yalayala ni Kalou? E sega sara! Kevaka sa rawa ena vunau na bula, e dina sara na yalododonu sa rawa ena vunau.
22 Ia nai Vola Tabu e tukuna ni da sa tamata i valavala ca kece, na ka sa yalataki me soli ga vei ira era vakabauti Jisu Karisito, ena nodra vakabauta.
23 Ia ni se bera mai na vakabauta, na vunau e taqomaki keda tu, me yacova na gauna ni vakabauta sa lokuci tu.
24 O koya oqo, na vunau e noda dauniveivakavulici tiko mai, me da mai sota kina kei Karisito, me rawa kina ni da vakadonui ena vuku ni vakabauta.
25 Ia ni da sa mai vakabauta, sa sega ni qai yaga tale vei keda na vunau me noda qasenivuli tiko.
26 Oi kemudou sa luve ni Kalou kece ena vuku ni vakabauti Karisito Jisu.
27 Vei kemudou kece ni dou sa papitaisotaki vei Karisito, ka dou sa tokara na bula va Karisito.
28 Sa sega ni qai dua me Jiu se kai Kirisi, sa sega ni dua me bobula, se nai taukei, sa sega na tagane se yalewa; ni dou sa dua ga ena vuku i Jisu Karisito.
29 Kevaka sa tu vei kemudou o Karisito dou sa kawa dina i Eparaama, ka sa nomudou dina na vanua yalataki me vaka na vosa ni yalayala.


Chapter 4

1 Me'u tukuna, sa kawa ni Kalou, me vaka nodra gauna ni gone, e sega ni duidui mai o koya vua e bobula, dina ni sa lewa tu na veika kece,
2 Ia e liutaki ka tuberi tiko ena dua nai vakavuvuli, me yacova na gauna sa lokuca o tamana.
3 Oi keda eda a vaka kina, ni da se gone eda liutaki ka vakatotogani ena kaukauwa ni butobuto kei vuravura.
4 Ia ni sa yaco dina sara na kena gauna, na Kalou sa qai tala na Luvena, me sucu mai vua e dua na yalewa, ka sucu me vaka na vunau,
5 Me rawa ni ra sereki kina o ira era vesuki tu ena vunau, ka solia talega vei keda na dodonu meda wili me luve ni Kalou.
6 Ena vuku ni dou sa luve ni Kalou, sa tala mai kina na Kalou na Yalo ni Luvena kina yalomudou, o koya eda sa kaci kina "Apa, Tamada!"
7 O koya oqo dou sa sega tale ni qai bobula, ia dou sa luve ni Kalou, dou sa kawa ni Kalou ena vuku i Karisito.
8 Mai na gauna dou se bera ni kila kina na Kalou, dou a dau qarava tu e dua e sega ni Kalou.
9 Ia oqo ni dou sa kila na Kalou, ka sa kilai kemudou na Kalou, ka dou sa qai vuki lesu tale mo dou qarava e dua e sega ni tu vua e dua na bula, mo dou lesu tale kina bula vesuki?
10 Dou sa laki vakatatabu taka tale na siga kei na veivula eso kei na veigauna eso kei na veiyabaki eso.
11 Au sa rui ririkotaki kemudou sara vakalevu, ni'u raica na noqu cakacaka vei kemudou e maumau walega.
12 Oi kemudou na veiwekani, au vakamasuti kemudou mo dou tautauvata mai kei au, ni'u sa tautauvata tiko kei kemudou. Oi kemudou dou sega ni bau vakamavoataki au vakadua.
13 Nai matai ni gauna au vunautaka kina vei kemudou nai tukutuku vinaka, dou kila vinaka na malumalumu ni yagoqu e tarai au tu.
14 Ka dou sega ni vakatalai au se vakasisilataki au, ena vuku ni we ni mavoa e tu ena yagoqu, ia dou qai ciqomi au me vaka e dua na agilosi ni Kalou, ka vakataki Jisu Karisito na noqu bula vei kemudou.
15 Sa qai tu E vei na nomudou marau e liu? Ni'u sa vakadinadina vei kemudou, kevaka sa rawarawa mo dou leuta tani na yaloka ni matamudou, ka dou solia mai vei au.
16 Me'u sa nomudou meca kina ni'u vosataka na ka dina vei kemudou?
17 O ira oqori era vakalomavinakataki kemudou mo dou gole tikoga kina vei ira, era vinakata me ra tarovi au mai vei kemudou, mo dou taleitaki ira tikoga.
18 Ia e vinaka meda vosota ka gumatua tikoga ena ka vinaka, ka sega ena gauna au tiko kina vei kemudou.
19 Oi kemudou na luvequ au na vosota me'u taratara tale baleti kemudou, me yacova ni sa buli na Karisito e lomamudou.
20 Au sa vinakata me'u na veisautaka nai vakarau ni noqu vosa; ni'u sa sega ni vakabauti kemudou tiko.
21 Dou tukuna mada vei au, na cava dou via vesuki tale tiko kina ena vunau, dou se bera ni rogoca beka na vunau?
22 Ni sa volai o Eparaama e rua na luvena tagane, e dua mai na yalewa bobula ka dua mai na yalewa e galala.
23 Ia o koya sa sucu mai vua na yalewa bobula, e sucu me vaka na lewa ni tamata, kei koya sa sucu mai vua na yalewa e galala, e sucu ena vuku ni vosa ni yalayala,
24 Na veika sa vakatakilakilataki kina, ni oqo na rua na veiyalayalati: O koya mai na ulunivanua o Saineai e sucu mai kina na veivakabobulataki, oqori o Eka -
25 O Eka oqo na ulunivanua, Saineai mai Arapea, e tautauvata kei Jerusalemi ena siga ni kua, ena nona bobula tu kei ira na luvena -
26 Ia o Jerusalemi ka tiko mai cake sa vakagalalataki tu, na tinada kecega.
27 Ni sa volai: "Mo reki o iko na yava, Sa sega ni vakaluveni! Ka kailavaka mai vakadomoilevu, O iko sa sega ni taratara! Ni sa levu na luvena o koya e galala Mai vei koya e vakawati."
28 Oi keda na veiwekani eda vakataki Aisake, eda gone ni yalayala.
29 Mai na gauna o ya e tautauvata talega ena siga ni kua na ka e caka, ni o koya e sucu vakayago ena dau vakararawataki koya e sucu vakayalo.
30 Me da raica mada na cava e tukuna nai Vola Tabu? "Me rau vakatalai tani na yalewa bobula kei na luvena, ni rau sega ni kawa vata na luve ni yalewa bobula kei na luvena na yalewa vakagalalataki."
31 Ka mo dou kila na veiwekani, oi keda eda sega ni luvena na yalewa bobula, ia eda luvena na yalewa vakagalalataki.


Chapter 5

1 O koya mo dou sa tudei ena galala sa mai sereki kemudou kina o Karisito, ka mo dou kakua ni baci vesuki tale e nai vua ni veivakabobulataki.
2 Oi au o Paula, au sa tukuna vei kemudou, kevaka dou na lesu tale kina veicilivi, ena sega ni dua na ka vinaka dou na rawata mai vei Karisito.
3 Au tu me'u vakadinadinataka vei ira taucoko sa cilivi, ni dodonu me ra talairawarawa tiko kina vunau taucoko.
4 Ena sega ni yaga vei kemudou o Karisito, kevaka dou nanuma mo dou vakadonui ena vunau, sa na yali tani kina vei kemudou na loloma.
5 Oi keda ena veivuke ni Yalo Tabu, eda sa waraka na nuitaki ni yalododonu ena vakabauta.
6 Sa sega ni qai yaga na cili kei koya e sega ni cili, ni da sa tu vata kei Karisito Jisu, ia na noda vakabauta ga sa cakacakataki ena loloma.
7 Dou sa cici vinaka tiko mai, o cei e mai tarovi kemudou me kakua kina ni dou muria na dina?
8 E sega ni kitaka o Koya sa kacivi kemudou nai vakarau oqo.
9 Ena dua ga na tiki ni leveni lailai, ena vakacacana nai buli madrai taucoko.
10 Sa tu na noqu vakabauti kemudou ena vuku ni Turaga, sa sega ni rawa mo dou qai lomalomarua tale; ia o koya ga e via vakaleqai kemudou tiko, ena taura na kena i sau.
11 Oi au, na veiwekani, kevaka me'u vunautaka tiko na veicilivi, a cava me'u qai sotava tiko kina na veivakararawataki? Me sa oti na veivakacacani ena vuku ni kauveilatai.
12 Au vinakata o ira era via vakaleqai kemudou tiko, mera sa vakatalai tani mai vei kemudou!
13 Ni dou sa kacivi na veiwekani mo dou galala; dou kakua ni vakayagataka na nomudou galala me vakayacori kina nai tovo vakayago, ia mo dou bulataka ga na loloma, ka dou veivukei tiko.
14 Nai vunau taucoko sa vakataucokotaki ga ena dua walega na yatu vosa, me vaka oqo, "Mo lomana na kai nomu me vakataki iko."
15 Ia kevaka dou sa veikati ka veivakacacani tiko vaka i kemudou, dou qarauna de dou na veivakarusai tikoga vakai kemudou!
16 Me'u tukuna vei kemudou: Mo dou lako voli ena Yalo Tabu, dou na sega ni cakava kina na gagadre ca ni tovo vakayago.
17 Nai tovo vakayago e sega ni veiriti kei na Yalo Tabu, kei na Yalo Tabu talega e sega ni veiriti kei na tovo vakayago; Oi rau oqo, e rau sega ni rawa me rau bula vata, ka sega kina ni rawa mo dou cakava na ka ga dou vinakata.
18 Ia kevaka sa tuberi kemudou tiko na Yalo Tabu, ena sega ni lewai kemudou na vunau.
19 Nai valavala ni tovo vakayago ena basika ga mai, me vaka na: Dauveibutakoci, dautagane kei na dauyalewa, nai valavala vakasisila, na daudara,
20 Na dauqaravi matakau, na dauvakadraunikau, na dauveicati, na dauveileti, na daulomaca, na daucudru katakata, na dau nanumi koya ga, na dauveivakalewai, na dauveitovaki,
21 Na dauvuvu, na daulaba, na daumateni, na daumarau vakalialia, kei na veika sa vaka kina; na veika oqo au sa tukuna oti vei kemudou, ni o ira kece era cakava tiko na veika oqo, era na sega ni rawata na matanitu ni Kalou.
22 Ia na vua ni Yalo Tabu na loloma, na reki, na vakacegu, na dauvosota vakadede, na dauyalololoma, na dauyalovinaka, na vakabauta,
23 Na dauyalomalua, na dauyalomalumalumu. Na veika oqori sa sega ni ia kina na cudruvi ena vunau.
24 O ira kece era sa nei Karisito era sa vakota tiko kina kauveilatai, na nodra gagadre ca ni tovo vakayago kei na kena veilasa ca kece sara.
25 Kevaka eda sa bula ena Yalo Tabu, meda lako voli talega ena Yalo Tabu.
26 Meda kakua ni vakasaqara na dokai kei nai rogorogo, eda na veicacati ga kina ka veilomacataki.


Chapter 6

1 Oi kemudou na wekaqu, kevaka e dua sa beitaki ni cala, dou lako voleka vua oi kemudou sa matua vakayalo, mo dou raici koya ka tuberi koya kina sala dina me muria, ka mo dou nanuma tiko, de dou na yaco talega me vaka kina.
2 Dou dauveivukei ni colata nomudou leqa, dou sa vakayacora sara tikoga na vunau i Karisito.
3 Kevaka e dua e nanuma ni o koya sa bau dua na ka, ni o koya e sega tu ni dua na ka, na tamata oqori e vakacalai koya tikoga vakai koya.
4 Ia, mo dou dui vakatovolea vakavinaka mada na nomudou dui cakacaka, ena solia kina vei kemudou e dua na yalo e reki ena vuku ni nomudou cakacaka, ka sega ena vukuna tale e dua.
5 Ni na dui colata na tamata yadua na nona i colacola.
6 Vei kemudou sa vakavulici ena vosa, mo dou caka vinaka ena soli ka vua na nomudou qasenivuli.
7 Mo dou kakua ni vakaisini kemudou, na Kalou ena sega ni vakalialiai; na ka kece e kaburaka e dua na tamata, ena tamusuka talega o koya.
8 Ke dua e kaburaka tiko na nona i tovo vakayago, ena tamusuka na mate mai nai tovo vakayago, ia o koya sa kaburaka na veika vinaka mai na Yalo Tabu, e na tamusuka na bula sega ni mudu mai na Yalo Tabu.
9 Meda kakua ni guce ena caka vinaka, ni da na tamusuka dina ga ena kena gauna, kevaka eda sega ni guce.
10 O koya oqo, ni se tiko nai cegu ni bula, meda sa sasaga sara ga meda caka vinaka vei ira na tamata kecega, ka vakauasivi vei ira eda sa vakabauta vata.
11 Dou raica, ena mawe ni ligaqu dina, au sa volavola tiko yani vei kemudou ena mata ni vola lelevu!
12 O ira era vakaraitaki ira tiko oqori ni ra sa bau totoka, o ira sara ga oqori era saga tiko vakaukauwa mo dou cilivi, me rawa kina me kakua ni tarai ira mai, na veivakararawataki ena vuku ni kauveilatai i Karisito.
13 O ira mada ga sa cilivi oti tu, era sega sara ga ni bau bula tiko ena vunau, ia era vinakata tiko mo dou cilivi, mera vakaraitaka kina vei ira na tamata, ni sa bau dua na ka levu era cakava, ni sa dou cilivi.
14 Ia sa kila ga na Kalou, ni sega tale ni dua na ka tani me lagilagi vei au, me vaka na kauveilatai ni noda Turaga o Jisu Karisito, o koya au sa vakota taucoko ena kauveilatai na veika vakavuravura e bula tu vei au, kei na veika e tu e vuravura au dau gagadre kina.
15 E sega ni bibi vei Jisu Karisito, na cili se me sega ni cili, ia o koya ga sa sucu vou.
16 Me yaco na vakacegu kei na loloma, vei ira kecega era vakaitovotaki ira e nai tuvatuva ni bula oqo, vei ira talega na Isireli ni Kalou.
17 Me tekivu oqo ka lako yani, au kerea me kua ni dua e via mai vakararawataki au ena vuku ni ka oqo, ni sa tu ga e yagoqu na mawe ni noqu mavoa, ena vuku ni Turaga o Jisu.
18 Vei kemudou na veiwekani. Na yalololoma ni noda Turaga o Jisu Karisito me tiko ena yalomudou. Emeni.