Efeso

1 2 3 4 5 6


Chapter 1

1 Oi au o Paula, nai apositolo i Jisu Karisito, ena lewa ni Kalou, vei ira na lewe ni lotu mai Efeso, ka sa yalo dina vei Jisu Karisito:
2 Me nomudou na loloma kei na vakacegu, mai vua na Kalou o Tamada kei na Turaga o Jisu Karisito.
3 Me vakarokorokotaki na Kalou, na Tamai Jisu Karisito na noda Turaga, o koya sa vakalouvinakataki keda ena ka ni veivakalouvinakataki vakayalo kecega, e na vei yasana vakalomalagi ena vuku i Karisito.
4 Ena Nona digitaki keda e liu ena Vukuna, sa qai tauyavutaki e muri o vuravura, me da yalosavasava ka sega ni cala e matana e na loloma.
5 Ni sa nona i tuvatuva makawa tu mai, me da wili me luvena ena vuku i Jisu Karisito, ena Nona lewa savasava,
6 Ka me vakavinavinakataki na cecere ni Nona loloma, ena Nona ciqomi keda meda ka lomani.
7 Sa mai vakabulai keda o Koya ena Nona dra, ka sa vosoti kina na noda i valavala ca, me vaka na Nona loloma levu.
8 O koya sa vakalevutaka vei keda na yalomatua kei na yaloqaseqase,
9 Ni sa vakatakila vei keda na Nona lewa ka vuni tu, me vaka na ka sa vinakata, ni sa nakita oti tu mai e lomana,
10 Na kena yaco na siga dina sa lokuci tu, me na vakasoqoni vata kina vei Karisito, na veika kece mai lomalagi kei vuravura.
11 Sa mai vakayacori keda o koya meda vakaivotavota vata, ni da sa nakiti oti tu mai liu, ena Nonai tuvatuva me vaka Nona lewa,
12 Ka sa dodonu vei keitou sa liu ena vakabauti Karisito, me keitou vakacaucautaki Koya sa lagilagi.
13 Oi kemudou talega, dou sa mai cabo bula vua, e na nomudou a rogoca na vosa ni vakavuvuli dina, nai tukutuku vinaka ni nomudou vakabulai; sa yaco kina mo dou vakabauta, ka dou sa dregati kina ena Yalo Tabu sa yalataki,
14 Na Yalo Tabu ena mai vakadeitaka tiko vei keda ni da sa luve ni Kalou, me yacova na siga ni noda vakabulai, me dokai na Nona vinaka.
15 Ena vuku ni ka oqo, oi au talega, ni'u sa rogoca oti na nomudou vakabauta na Turaga o Jisu, kei na nomudou loloma talega, vei ira kecega era sa lotu,
16 Au sa sega ni qai cegu me'u dau vakavinavinakataki kemudou, ena noqu dau cavuti kemudou yadudua ena noqu masu:
17 Vua na Kalou ni noda Turaga o Jisu Karisito, na Tamada vakaiukuuku, me solia vei kemudou na yalo ni yalomatua kei na veivakatakilai vakayalo, mo dou kilai koya vinaka kina,
18 Ni sa qai tadola na matamudou vakayalo; mo dou kila kina nai nuinui sa kacivi kemudou kina o koya, kei na kena talei nai ukuuku sa tu vua, me baleti ira na nona yalosavasava,
19 Kei na Nona dau vakaraitaka na Nona kaukauwa levu vei keda sa vakabauta, me vakaraitaka kina na Nona kaukauwa vakaidina,
20 Me vaka na Nona vakaturi Karisito cake tale mai na mate, ka vakatikori koya ena ligana i matau, e na veiyasana vakalomalagi,
21 Me uasivi cake kina vei ira kecega sa liu, kei ira sa lewa, kei ira sa kaukauwa, kei ira sa turaga, kei na yaca kecega sa cavuti ena gauna oqo, kei na gauna mai muri.
22 A sa vakamalumalumutaka na ka kecega me tu ena ruku ni Yavana, ka solia vua na kaukauwa me lewai ira kecega, sai koya nai soqosoqo lotu,
23 O koya na yagona, na kena i vakataucokotaki, sa vakasinaiti ena ka kecega, sa vakasinaita na ka kecega ena ka kecega.


Chapter 2

1 O koya sa vakabulai kemudou, ni dou a mate tu ena caka cala kei nai valavala ca.
2 Dou a dau bula tu ena i valavala vakavuravura e liu, ena nona kaukauwa na turaga ni maliwa lala, na yalona sa cakacaka tiko ena loma ni tamata me talaidredre kina,
3 Oi keda talega eda sa bulataka tu nai tovo vakayago e liu, ena noda vakayacora, ka talairawarawa tu ga, ena gagadre ca ni noda i tovo vakayago, ka sa yaco kina vei keda na cudruvi, kei ira talega na lewe i vuravura.
4 Ia na Kalou, sa sinai ena yalololoma, ena vuku ni Nona loloma levu sa lomani keda kina,
5 e dina mada ga ni da a mate tu ena caka cala, o koya sa vakabulai keda vata kei Karisito, (na loloma ga dou sa vakabulai kina),
6 A sa vakaturi keda cake vata, ka vakatikori keda vata kei Karisito Jisu, ena veiyasana vakalomalagi,
7 Me rawa ni vakaraitaka tiko, ena vei gauna mai muri, na Nona loloma levu kei na Nona yalovinaka vei keda, ena vuku i Karisito Jisu.
8 Ni sa yalo loloma walega dou sa vakabulai kina, ena vuku ni vakabauta, sega ni baleta ni dodonu me nomudou; oqori nai solisoli loloma ga ni Kalou,
9 E sega ni baleta na nomudou cakacaka vinaka, me kakua kina ni dua me vakadokadokai koya ena ka e cakava.
10 Oi keda eda sa cakacaka ni Ligana, eda sa buli vou vei Karisito me baleta na cakacaka vinaka, o koya sa vakarautaka oti tu mai e liu na Kalou meda na muria.
11 O koya oqo mo dou nanuma vinaka, ni oi kemudou na kai matanitu tani, dou a vakatokai na sega cili, ka sega ni dou cilivi ena veicilivi dau vakayacori ena liga -
12 Ka sega talega ni tu vei kemudou o Karisito, dou sega ni matanitu vata kei Isireli, a sa sega ni nomudou na ka sa yalataki ena veiyalayalati, a sa sega vei kemudou nai nuinui, ka sa sega ni nomudou na Kalou e vuravura.
13 Ia oqo, ni dou sa tu vata kei Karisito Jisu, oi kemudou ka yawa e liu, dou sa qai voleka mai ena vuku ni dra i Karisito,
14 Ni sai Koya na vuni noda veivinakati tale, sa vakaduavatataki rau na rua me sa dua ga, a sa basuraka sobu na bai sa ia kina na veivakaduiduitaki,
15 Ni sa vakaotia ena Yagona na ka eda a veitawasei kina, oqori na vunau sa vakarota na valavala ni lotu, ia sa veisautaka vou o Koya na tamata, me ia nai valavala vou ni noda veiqaravi, ni sa qai veivinakati tu,
16 E vakaduavatataka na tamata kei na Kalou ena kauveilatai, ena Nona vakoti ka vakamatei me bokoci kina na caka cala.
17 A lako mai, o Koya me vunautaka na veivinakati vei kemudou sa yawa kei ira talega sa voleka.
18 Ena vukuna, eda rawa ni torova doudou nai tikotiko ni Kalou na Tamada, ena yalo e dua bauga.
19 O koya, oqo, dou sa sega tale ni qai vulagi se kai tani, ia dou sa korovata kei ira na yalosavasava, ka dou sa lewe ni matavuvale vata kei na Kalou,
20 Ka dou sa taracake ena nodra yavu nai apositolo kei ira na profita, o Jisu Karisito sara ga na kena i vakadei dina,
21 Kivei Koya, sa sema vata kina na vale taucoko, sa vakatuburi me uasivi, ka me laurai kina ni dua na vale savasava ni Turaga,
22 Kivei Koya talega, dou sa tara vata kece kina, mo dou Nonai tikotiko tudei na Kalou ena Nona Yalo Tabu.


Chapter 3

1 Ena vuku ni ka oqo, oi au o Paula, na bobula i Karisito Jisu vei kemudou na kai matanitu tani -
2 Dou sa rogoca oti beka, ni oqo na gauna ni Nona yalololoma na Kalou vei kemudou, me vaka sa solia vei au,
3 Ni sa vakaraitaki vei au ena veivakatakilai vakayalo, na ka vuni oqo (me vaka na noqu a vola mada yani e liu,
4 Na gauna dou na wilika kina nai vola o ya, dou sa na rawa ni kila kina, na veika au kila, me baleta na ka vuni i Karisito)
5 Na ka vuni oqori, a sega ni vakatakilai vei ira na tamata lotu ena gauna e liu, ia oqo, sa qai vakatakila na Yalo Tabu, vei ira nona apositolo yalosavasava kei na parofita;
6 O ira na kai matanitu tani era sa taukena vata, ni da sa dua ga na yago, era na taukena talega na vanua yalataki e na vuku i Karisito, mai nai tukutuku vinaka,
7 O koya au sa lesi kina me kena i talatala, me vaka nai solisoli loloma ni Kalou, sa solia vei au, ena Nona cakacaka veivakurabuitaki.
8 Oi au e dua e lailai sara, mai vei ira na tamata rogo ni Kalou, au qai digitaki ena Nona loloma, me i talatala vei ira na kai matanitu tani, me'u vunautaka kina na i yau vuni talei e tu vei Karisito,
9 Me'u tukuna, me ra raica na kena totoka ni ka vuni oqo, ena Nona a vunitaka tu mai na Kalou, ka tekivu sara mai nai vakatekivu, ia sa qai vakatakila mai oqo, ena vuku i Jisu Karisito.
10 Ni sa nakita oti tu mai na Kalou, ena Nona rai yawa vakayalomatua, nai soqosoqo lotu me na tucake, ka vakaraitaka na Nona kaukauwa, vei ira sa turaga kei ira sa kaukauwa ena veimaliwa lala,
11 Oqo na Nona i naki sara na Kalou mai na i tekitekivu, ni na qai mai vakavotukanataka na ka kece, na Noda Turaga o Jisu Karisito.
12 Ena noda vakabauti Koya, sa solia kina vei keda, na yalo e qaqa kei na doudou, me da torova kina nai tikotiko tabu ni Kalou.
13 O koya oqo, au sa kerei kemudou kina, mo dou kakua ni guce, ena noqu vakararawataki ena vukumudou, ni oqo dou na lagilagi kina.
14 Ena vuku ni ka oqo, au cuva sobu kina me'u tekiduru, vua na Tama ni noda Turaga o Jisu Karisito,
15 Ni o Koya sa vakayacani kece kina na mata vuvale mai lomalagi kei vuravura,
16 Me solia vei kemudou o Koya, me vaka na noda i yau levu e tu vua, me vakaukauwataki kemudou ena yalona, ka mo dou kaukauwa e loma,
17 Me tikoga ena yalomudou na Karisito ena vakabauta; mo dou vakaukauwa ka tauyavutaki ena loloma,
18 ka rawata kina, mo dou kila vata kei ira kecega era sa lotu, se cava na kena rabailevu, kei na kena balavu, kei na kena titobu, kei na kena cecere -
19 ka mo dou kila na loloma i Karisito, o koya sa uasivia na kila ka vakatamata, ka mo dou sinai ena ka kecega sa sinai kina na Kalou.
20 O koya e rawa ni cakava ga na ka e via cakava, ka sega ni da vakasamataka rawa, me vaka na kaukauwa e tu vua, ni rawa me cakava vei keda,
21 Me vakarokorokotaki o Koya e nai soqosoqo lotu, ena vuku i Karisito Jisu, ena vei tabatamata kecega me sega ni mudu. Emeni.


Chapter 4

1 O koya oqo, oi au, sa vesu tu ena vuku ni Turaga, au sa vakamamasu vei kemudou, mo dou ia tiko nai valavala sa kilikili, e nai tutu dou sa kacivi kina,
2 Mo dou yalomalumalumu sara ka yalomalua, mo dou vosota tiko vakadede ka veivosoti vakai kemudou ena loloma,
3 Dou tovolea me maroroi tikoga na lomavata ni Yalo Tabu, ni dou sa vauci vata ena veivinakati.
4 Ni dua ga na yago ka dua na yalo, sa dua ga nai nuinui dou sa kacivi kina;
5 Sa dua ga na Turaga, sa dua na vakabauta, sa dua na veipapitaisotaki;
6 Sa dua ga na Kalou ka tamada kecega, o Koya sa lewa na ka kecega, sa vakavuna na ka kecega, ka sa tiko kei kemudou kecega.
7 Ia vei keda yadudua, na Nona loloma sa solia vei keda, me vaka nai vakarau ni Nona solisoli o Karisito.
8 O koya oqo sa tukuna kina o koya: "Ni'u sa lako cake, ena levu ena vakabobulataki me ra bobula, ena solia nai solisoli vei ira na tamata."
9 (Ia, "Sa lako cake o Koya"- ia na cava na kena i balebale na Nona lako sobu mada o koya e liu ki na ruku i vuravura era?
10 O Koya ga sa lako sobu mai, sai Koya talega sa lako cake me yawa sivita na lomalagi, me vakasinaita kina na ka kecega).
11 Ni o Koya sa solia e so me apositolo (Daukatolu), ka so me parofita (Domo ni Kalou), ka so me dauvunau (veivakalotutaki), ka so mei vakatawa (Tubera nai soqosoqo lotu), ka so me qasenivuli (Vakatavulica nai Vola Tabu)
12 Mera vakayaragitaki kina o ira nai soqosoqo lotu ki na cakacaka ni Kalou, me ra vakayalomatuataki nai soqosoqo lotu,
13 Me rawa ni da duavata kina ena vakabauta, kei na noda kila na luve ni Kalou, meda matua vakayalo sara ka vakataucokotaki ena vuku i Karisito;
14 Me oti kina na vagonegonea kei na veitosoyaki ena vuku ni vakavuvuli vou e dau veivakacalai ena vuku ni veivakaisini;
15 Ia me ra dau vosataka na dina ena loloma, meda tubu cake kina ena ka kecega, vei Koya na ulu ni soqosoqo lotu na Karisito -
16 O Koya na ulu sa sema mai kina na yago taucoko, sa veisemasemati kina na i sema taucoko, ni ra sa dui cakacaka vakavinaka na veitikina, sa tubu kina na yago ka veitarai cake ena veilomani.
17 O koya oqo au sa kerei kemudou kina ena vuku ni Turaga, mo dou kakua ni vakamurimuri ira na sega ni lotu, ena nodra i valavala vakalialia,
18 Ni sa butobuto na nodra vakasama, ka sa sega ni dua nai vakaraitaki ni bula mai vua na Kalou me laurai vei ira, ena vuku ni nodra lecaika kei na lomaqa ni yalodra;
19 Na ka era cakava, era sa qai veitaliataki ira ena veika vakasisila kei na nodra domona, mera bulataka nai valavala vakabutobuto.
20 E sega ni dua na bula vaka o ya, dou a vulica mai vei Karisito,
21 Ni dou a vakavulici ka tuberi sara ga mai, ena veika dina me baleta na bula i Jisu:
22 Mo dou luvata tani, nai valavala ni tamata makawa kei na kena gagadre ca taucoko, e kauta mai vei kemudou na lutu sobu,
23 Ia mo dou vakavouia tiko na nomudou vakasama,
24 ka mo dou qai vakaisulu tiko me vaka na tamata vou ni Kalou, ena yalododonu kei na savasava.
25 O koya oqo, mo dou biuta tani na lasulasu, "Me dina na nomudou vosa vei ira na wekamudou," ni da sa dua ga na vuvale Oi keda.
26 "Kevaka dou sa cudru katakata, tauri kemudou vakamalua, de dou qai valavala ca kina." Me kakua ni sa laki dromu na matanisiga, mo dou se cudru tikoga,
27 Dou kakua ni vakarawarawataki kemudou vua na tevoro.
28 O koya sa daubutako me sa rauta na butako, ia me dua na nona cakacaka, me rawa mai kina eso na ka vinaka, ka me vukea kina eso era vakaloloma tu.
29 Na vosa ni veirukaki vakasisila me kakua ni lako mai ena gusumudou, me lako ga mai na vosa ni veivakatataki cake kei na vosa ni loloma, me rawa ni ra kila kina o ira era rogoca, na yalo ni loloma vei kemudou.
30 Dou kakua ni vakararawataka na Yalo Tabu, o koya dou sa dregati vata, me yacova na siga ni bula.
31 Dou biuta tani kece vei kemudou, na yaloca, na cudru katakata, na cudru, na veiba kei na veivosa vakalialia mai na gusumudou,
32 Mo dou dau veilomani vakaiemudou, ena yalo e savasava, ka dou veivosoti vakaikemudou, ni sa vosoti kemudou oti na Kalou ena vuku i Karisito.


Chapter 5

1 O koya oqo mo dou qai vakadamurimuria na Kalou me vakataki ira na gone ni toko.
2 Ka dou bulataka tikoga na loloma, me vakataki Karisito, ena nona solia nona bula me mai mate e na vukuda, ni lomani keda, mei madrali kai soro vua na Kalou, me ka boi vinaka.
3 Ia na dauyalewa kei na dautagane kei na ka kecega sa sega ni vakalou kei na kocokoco, me kakua ni cavuti ena kemudou maliwa, ni sa sega ni kilikili me vaka kina vei kemudou na tamata lotu;
4 Me kakua na bula ni wakia vata, se veivosaki lialia se na veiwali ca, ni sega ni salavata kei na noda i tutu, ia me laurai tiko vei keda na bula ni dauvakavinavinaka.
5 Ka mo dou kila, e sega ni rawa vua e dua na tamata dauyalewa kei na dautagane, se dua na dauwakia vata se dua na daukocokoco, se dua na dau veibutakoci, me vakai votavota ena matanitu i Karisito kei na Kalou.
6 Me kakua ni dua me mai rawai kemudou ena vosa kamikamica, baleta ni dau yaco kina na cudru ni Kalou ena veika oqo, ni talaidredre na tamata.
7 O koya oqo, mo dou kakua ni veitokani vata kei ira.
8 Oi kemudou dou a butobuto tu e liu, ia oqo dou sa qai rarama ena vuku ni Turaga, mo dou vakaitovotaki kemudou me vaka na gone ni rarama,
9 (Ni sa vua ni Yalo Tabu nai valavala vinaka kecega, nai valavala dodonu kei na dina).
10 Mo dou vakasaqara ka kila na veika e vinakata na Turaga.
11 Dou kakua ni veitokani vata kei ira na gone ni butobuto, ia mo dou tukuna vakadodonu vei ira na nodra leqa.
12 Ena vakamadua kevaka mo dou veitokoni ena ka era cakava vuni tiko.
13 Baleta na ka kece eda na tukuna, ena vakaraitaki me vakavotui ena rarama, na veika kece e vakayacori vuni ena vakaraitaki mai ena rarama.
14 O koya oqo sa tukuna kina o koya: "Dou yadra oi kemudou sa moce, Ka tucake mai ena mate, O Karisito ena vakararamataki kemudou."
15 Dou tu mada ka dikevi kemudou, mo dou kakua ni vakataki ira na lialia, ia mo dou vakataki ira na vuku,
16 Mo dou volia na gauna, baleta na ca e tiko ena veisiga oqo.
17 O koya oqo mo dou kua ni bula tu vaka lecaika, ia mo dou kila tiko se cava na loma ni Turaga.
18 Dou kakua ni mateni ena waini, dou na cakava kina eso nai tovo vakasisila; ia mo dou vakasinaiti ga ena Yalo Tabu,
19 ka dou veivosaki vakai kemudou ena same kei na sere, na sere e vakayalo, ka dou lagata na sere e rogorogo vinaka e lomamudou vua na Turaga,
20 Dou dau vakavinavinaka tikoga vua na Kalou o Tamada, ena yaca ni noda Turaga o Jisu Karisito,
21 Dou veirokorokovi ka dau veirogoci vakai kemudou, ena rere vua na Kalou.
22 Oi kemudou na yalewa vakawati, dou soli kemudou taucoko vua na watimudou, me vaka vua na Turaga.
23 Ni tagane sa ulu ni watina yalewa, me vakataki Karisito sa ulu ni soqosoqo lotu; o Koya talega sa bula kina na yago taucoko.
24 Me vaka na nona soli koya taucoko nai soqosoqo lotu vei Karisito, me vaka talega kina o ira na yalewa vakawati, vei ira na watidra ena ka kecega.
25 Oi kemudou na tagane vakawati, dou lomani ira na watimudou, me vakataki Karisito ena nona lomana nai soqosoqo lotu, a sa soli Koya taucoko ena vukuna,
26 Me vakatabui koya, ka vakasilimi koya, ena veivakasavasavataki ni wai mai na vosa ni Kalou,
27 Me rawa kina vei koya, me vakaraitaka nai soqosoqo lotu kivei Koya ga ni sai soqosoqo lotu e uasivi, sa sega vua na duka, se na veika sa vakakina, ia sai soqosoqo lotu tabu ka sega ni cala.
28 Oi kemudou na tagane vakawati, dou lomana na watimudou ni sa yagomudou dina; o koya sa lomana na watina yalewa sa lomani koya vakataki koya.
29 E sega ni rawa me dua e cata na yagona dina, ena vakamareqeta ka qarauna vinaka, me vakataki Karisito ki nai soqosoqo lotu.
30 Oi keda eda sa tiki ni yagona ena lewe kei na sui.
31 "Ena vuku ni ka oqo, na tagane ena biuta kina na tamana kei na tinana, ka kabita na watina, e rau sa na yaco me duabau ga."
32 Oqo e dua na ka vuni levu, au cavuta tiko oqori na veika, me baleti Karisito kei na i soqosoqo lotu.
33 Io vei kemudou na tagane, dou lomani ira na watimudou, me vaka ga na nomu lomana na yagomu, vei kemudou na yalewa vakawati, dou dau vakarokorokotaka tiko na watimudou.


Chapter 6

1 Oi kemudou na gone, dou talairawarawa vei ira na nomudou i tubutubu, me vaka vua na Turaga, ni sa ka dina oqo.
2 "Mo vakarokorokotaki rau na tamamu kei na tinamu," ni oqo nai matai ni vunau levu, sa tiko kina na vosa ni yalayala.
3 "Ena totoka kina na nomu bula, o na bula balavu talega kina."
4 Oi kemudou na tama, dou kakua ni vakacudrui ira na luvemudou me ra rarawa kina, ia dou tuberi ira cake e nai vakavuvuli e vaKalou.
5 Oi kemudou na dauveiqaravi, dou talairawarawa vei ira na nomudou Turaga vakayago, ena rere kei na sautaninini kei na yalo e savasava, me vaka vei Karisisto,
6 Dou kakua ni cakacaka vakarairai me ra qoroi kemudou kina, ia dou cakacaka me vaka na dauveiqaravi dina i Karisito, sa cakava na loma ni Kalou mai na vuni yalona,
7 E vakayacora vakavinaka na nona cakacaka, me vaka e cakava tiko vua na Kalou, ka sega ni vei ira na tamata,
8 Ni kila tiko na cakacaka vinaka taucoko e vakayacori, ena solia na kenai sau na Turaga, se da bobula se da galala.
9 Oi kemudou na Turaga, dou caka vinaka vei ira, me sa kakua na veivakasaurarataki tiko, ka mo dou kila ni tiko mai lomalagi na nomudou Turaga e levu cake, e sega vua na veivakaduiduitaki.
10 Me'u tinia, oi kemudou na wekaqu, mo dou kaukauwa tiko ena Turaga, kei na kena levu ni Nona kaukauwa vakaidina.
11 Dou tokara ka daramaka tiko nai yaragi ni Kalou, me rawa ni dou tucake qaqa tiko kina, ka vorata nai lawaki makawa ni tevoro.
12 Ni da sa sega ni veivala walega kei ira na tamata, ia eda veivala sara tikoga kei na dua nai tuvatuva ni bula vakatamata, kei na kaukauwa, kei koya sa lewa na kaukauwa ni butobuto, kei nai vavakoso yaloca ena veiyasana vakalomalagi.
13 O koya oqo mo dou sa vakayagataka sara ga nai yaragi kecega ni Kalou, me rawa ni dou tudei tiko ni yaco mai na veisiga ca, ni dou sa kitaka oqo, dou na qai tudei.
14 O koya oqo mo dou tucake, dou vauca ena tolomudou na dina, ka vakaisasabai na lomaseremudou ena i valavala dodonu,
15 ka vakaivava ena yavamudou ena cakacaka ni tukutuku vinaka ni veivinakati;
16 Vakauasivi sara, mo dou kauta voli e veisiga nai sasabai ni vakabauta, o koya, mo dou sabaya kina na nona gasau vanataki na tevoro.
17 Dou tokara e ulumudou nai sala ni bula, ka taura matua nai seleiwau ni Yalo Tabu, oqori na Vosa ni Kalou;
18 Dou masu tikoga ena masumasu kecega kei na daukerekere ena Yalo Tabu, dou yadrava tiko ka gumatua nomudou veinanumi ena masu, ena vukudra na tamata lotu -
19 Kivei au talega, me soli vei au na galala me'u vosa, me rawa kina ni'u tukuna vakadoudou me kilai na ka vuni ni tukutuku vinaka,
20 Ena ka oqo au sa vesuki tu kina; me rawa ni'u vosa doudou, me vaka ni sa dodonu me'u vosa.
21 Ia mo dou na kila, nai tuvaki ni noqu bula, kei na cakacaka au sa cakava, ena la'ki tukuna taucoko vei kemudou o Tikiko na taciqu lomani, a i talatala yalodina ni Turaga;
22 O koya au na talai koya yani vei kemudou, ena vuku ni veika au sotava, me rawa ni dou kila kina nai tuvaki ni bula eke, ka me vakaceguya talega na yalomudou.
23 Me nodra na vakacegu kei na loloma ena vakabauta na veiwekani, mai vua na Kalou o Tamada kei na Turaga o Jisu Karisito.
24 Vei ira kece sa lomana na noda Turaga o Jisu Karisito, ena yalodra taucoko, me nodra na yalololoma ni Kalou. Emeni.