Kolosa

1 2 3 4


Chapter 1

1 Oi au o Paula nai apositolo i Jisu Karisito ena lewa ni Kalou, kei Timoci e dua talega na tacida,
2 Kivei ira na veiwekani yalosavasava ka yalodina tu vei Jisu era lotu tiko mai Kolosa: Me nomudou na loloma kei na vakacegu ni Kalou o Tamada kei na Turaga o Jisu Karisito.
3 Keirau vakavinavinaka vua na Kalou o Tamada kei na noda Turaga o Jisu Karisito, keirau sega ni dau cegu ni masulaki kemudou e vei siga.
4 Ni keirau mai rogoca na nomudou vakabauti Karisito Jisu, kei na nomudou loloma vei ira na wekamudou vakayalo.
5 Ena vuku ni ka dou sa vakanuinuitaka ka sa maroroi tiko mai lomalagi mo dou taukena, dou sa rogoca oti mai na dina ni vosa ena i tukutuku vinaka.
6 Sa yaco rawa mai vei kemudou ka sa yaco talega yani kina veiyasai vuravura, ka sa laurai votu na vuana, me vakataki kemudou ena siga dou rogoca kina, dou sa qai kila na dina kei na loloma ni Kalou.
7 Me vaka na nomudou sa vulica oti mai vei Epafira, e dua na neirau i tokani vinaka, o koya e dua nai talatala yalodina i Karisito, ka dau qaravi kemudou vinaka.
8 O koya e mai tukuna vei keirau na nomudou loloma ena Yalo Tabu.
9 Ena vuku ni ka oqo, ka tekivu sara mai na siga keirau sa rogoca kina, ka keirau sa sega ni qai cegu ni masulaki kemudou, na neirau qaqa ni masu mo dou vakasinaiti ena nomudou kila na lomana, e na yalomatua kei na kila ka vakayalo kecega.
10 Na nomudou lotu me lako vata tiko kei na nomudou bula, me marau kina na Turaga, me laurai tiko na vua ni nomudou cakacaka vinaka, ka dou vakatubura cake tiko na nomudou kila na Kalou.
11 Mo dou tu vakatagane ka vakaukauwataki kemudou tiko, ena Nona kaukauwa levu, mo dou dau vosota ena vosota vakadede ka me laurai tiko na nomudou reki.
12 Mo dou vakavinavinaka vua na Tamada, ni sa vakayacori keda meda vakaivotavota vata kei ira na yalosavasava kina matanitu ni rarama.
13 O Koya sa vakabulai keda mai na i vesu kaukauwa ni butobuto, ka qai vakatikori keda kina matanitu nei koya na Luvena sa dau lomana.
14 Na Luvena oqo sa mai noda kina na bula ena vuku ni nona dra, kei na vosoti ni noda i valavala ca.
15 Na Kalou e sega ni laurai rawa, o Koya ga sai vakaraitaki ni Kalou, se bera na ka bula kecega sa bula tu mai o Koya.
16 O Koya ga e bulia na ka kecega mai lomalagi kei na ka e tu e vuravura, na kena e laurai kei na kena e sega ni laurai, na veitikotiko vakaturaga na veimatanitu, o ira na lewa tu na butobuto kei na kaukauwa kecega. E bulia na ka kecega oqori o Koya, ka lewa talega.
17 Sa bula e liu o Koya sa muri na ka kecega, na vakavotukanataki ni ka kecega e yaco ena vukuna.
18 Nai soqosoqo lotu sai koya na yagona, o Koya na ulu ni soqosoqo lotu, o Koya nai vakatekivu, kai matai ni tucake tale mai na mate, ena veika kecega o Koya e cecere ka uasivi mai vei ira kece.
19 Sa vakatara vua o Tamana o koya me sai dewadewa ni ka vinaka kecega,
20 Na vakayacori ni veivosovosoti me ciqomi ena vukuna duadua ga, se vakayacori e vuravura se mai lomalagi, ni nona dra mai na kauvelatai eda sa qai vinakati kina.
21 Oi kemudou, dou a sega sara tu ga ni wili me dua na ka ena vuku ni nomudou i valavala ca, o Koya sa qai cakava na veivosovosoti mo dou ciqomi kina.
22 Ena nona soli Koya me mai mate, me cabori kemudou kina e mata i Tamana ni dou sa savasava tu ka sega ni cala.
23 Kevaka mo dou tomana tikoga nomudou vakabauta ka yavutaki kemudou vinaka mo dou tudei; ka sega ni gole tani mai ena dina ni tukutuku vinaka dou sa rogoca, ni sa vunautaki oti vei ira na tamata kecega e vuravura, oi au o Paula au sa kena i vota mate ni tukutuku vinaka.
24 Au sa marau niu vakararawataki ena vukumudou, ka vakatautauvatataka vei au na veika rarawa e vakayacori vei Karisito, ena vuku ni Yagona sai koya nai soqosoqo lotu.
25 O koya au sa lesi kina mai vua na Kalou ena vukumudou me kenai talatala, ka meu dau vunautaka na vosa ni Kalou,
26 Na ka vuni e vunitaka vakamaqosa mai vei ira nai tabatamata e liu, ia oqo sa qai vakaraitaki mai vei ira nona tamata yalosavasava.
27 Ena nona sa qai dolava vei ira na kai matanitu tani na Kalou, mera raica na kena totoka kei na kena talei ni ka vuni oqo: Oqori na Karisito ena yalomudou, nai nuinui ni bula sega ni mudu.
28 Oqori na vuna keitou vunau tiko kina, veivakasalataki ka vakavulica na tamata taucoko mera yalomatua mai, me rawa ni keitou veivakaleleci tiko vei Jisu Karisito, ni taucoko tu na bula.
29 Au sega ni bau cegu noqu cakava tiko na cakacaka au lesi kina, ena noqu raica na kena bibi ni veika e mai vakayacori vei au.


Chapter 2

1 Au vinakata mo dou kila na levu ni noqu lomaleqataki kemudou kei iratou mai Leotisea, kei ira talega keimami se bera ni bau sota vata,
2 Me bolei na yalodra, me kua na datuvu, mera yalovata ka veilomani, ka mera kila sara ni sa nodra tu na bula kei na talei ni ka vuni, mai vei Tamada kei Karisito.
3 Ni sa tu taucoko Vua nai yau talei ni yalomatua kei na vuku.
4 Na ka oqo au sa tukuna rawa vei kemudou me kakua ni dua e mai rawai kemudou ena vosa ni veicavilaki.
5 E dina ni datou sega ni tiko vata, io na yaloqu ga sa dau tiko kei kemudou, Au mai marau ena nomudou taura dei ka tudei ena vakabauti Karisito.
6 Ni dou sa mai vakabauta na Turaga o Jisu Karisito, dou bulataka sara na kena bula.
7 Dou tauyavutaki ka tara cake Vua, ka vakataudeitaki ena nomudou vakabauta, me vaka dou sa vakatavulici kina, ka mo dou uasivi cake ena vakavinavinaka.
8 Dou qarauna de dua e mai veisautaki kemudou ena nona kila ka vakavuravura ena vosa vakavukuvukuya, ka sega ni yaga, e yavutaka tiko nona vosa ena vakasama vakatamata kei na i vakavuvuli vakavuravura, ka sega ni vaka nai vakavuvuli i Karisito.
9 O Koya sai sosomi ni Kalou e vuravura ena nona mai bula vakatamata, ka sa vakasinaiti tu vua na kaukauwa ni Kalou kecega.
10 Ena sega ni dua na ka me na yali vei kemudou ni dou sa tu Vua, ni lewai ira taucoko tu nai vavakoso yaloca kei ira sa kaukauwa.
11 Dou sa cilivi oti oi kemudou, ena veicilivi ka sega ni caka ena liga, nomudou sa luvata tani nai valavala ca ni yago, mai na veicilivi nei Karisito.
12 Ni dou sa buluta yawa ena nomudou papitaiso, na Kalou sa qai vakaturi kemudou cake ena vuku ni nomudou vakabauta, me vaka nona vakaturi cake mai na mate na Turaga.
13 Oi kemudou ni dou a mate tu ena vuku ni valavala ca, ena vuku talega ni yagomudou sa sega ni cili, sa qai vakabulai kemudou cake o Koya mo dou bula vata, ka vosoti kemudou ena nomudou caka cala kecega.
14 Ka sa bokoca kece na veika ca e volai tu me baleti keda, ni tukuna tiko noda ca. E taura tani mai me laki vakoti vata kei Koya ena kauveilatai.
15 E vakamalumalumutaki ira taucoko na vei vavakoso ena veiyasana vakalomalagi kei ira na kaukauwa ena nona tucake mai ka vakaraitaki Koya vei ira kece, ni sa nona na qaqa.
16 Me kua ni dua e via lewa vei kemudou na kakana, se na memudou wai ni gunu, se nomudou dau soqo vata, se na vula vou, se na Siga Tabu,
17 Ni oqori sai yaloyalo ga ni veika ena yaco mai, ia o Karisito ga na ka dina.
18 Ni sa waraki kemudou tu na kemudou i sau, me kua ni dua e mai vakaleqai kemudou, me kamikamica nona vosa ka olifa ca e loma, ni o koya e masuta tiko na agilosi, ena ka e sega ni rawa me raica, ka vakasinaita tu nona bula nai tovo vakayago.
19 E sega ni rawa mada ga ni vakabauta tiko na ulu, ni yago taucoko era veisemati vakavinaka, na veiualalai kei na viciko era vakarorogo taucoko kina ulu, ni yago taucoko e vakatuburi tiko mai vua na Kalou.
20 O koya oqo, kevaka dou sa mate vata kei Karisito ni dou muria tiko nai dusidusi ni bula vakavuravura; cava dou via vakavuravura tiko kina ka muria tiko na kena lawa -
21 "Kua na vakataratara, dou kua ni tovolea, dou kua ni taura",
22 Na ka taucoko oqori e sega ni ka tudei ena gauna e vakayagataki kina – e tautauvata sara ga nai vakasala kei na vakavuvuli vakatamata?
23 Na veika oqo ena rairai tu me vaka e vakalotu ka rakorako, qai vakaturaga, e sega ni dua na ka meda vakamelea rawa kina, ia e sega sara ga ni dua na ka e yaga kina, e vakabulabulataka ga nai tovo vakayago.


Chapter 3

1 Kevaka dou sa vakaturi cake vata kei Karisito, mo dou vakasaqara na veika mai cake, sa dabe tiko kina na Karisito ena liga imatau ni Kalou.
2 Dou dau nanuma na veika mai cake, kakua ga na veika e vakavuravura.
3 Ni dou sa mate, na nomudou bula sa vuni vata kei Karisito vua na Kalou.
4 Ni na rairai mai na Karisito, na noda vuni bula, dou na qai rairai vata kei Koya ena i ukuuku.
5 O koya oqo, mo dou vakamatea na veitikimudou sa vakavuravura tiko: A dauveibutakoci, nai valavala sega savasava, na garogaro, na garogaro ca, na daukocokoco na ka oqo sa tautauvata kei na qaravi matakau.
6 Ena vuku ni veika oqo, na cudru ni Kalou ena tarai ira era sa cakava tiko,
7 Ni oi kemudou dou a dau cakava tu e liu ena gauna dou se butobuto tu kina.
8 Ia ena gauna oqo, sa dodonu mo dou sa luvata tani na veika kece oqo: Na cudrucudru, na ruru, na dau naki ca, dau vosa veivakasewasewani, kei na vosa vakalialia mai na gusumudou.
9 Me kakua vei kemudou na veilasutaki, ni dou sa luvata tani taucoko nai valavala makawa,
10 Ni dou sa daramaka nai sulu ni tamata vou, ka vakavoui tikoga ena nomudou veiwekani kei Koya, mo dou na vakaraitaka tiko kina na nona cakacaka na dauveibuli.
11 Sa sega tale ni dua me kai Kirisi se Jiu, se cilivi se sega ni cili, se kai matanitu tani sei taukei, bobula se turaga, ia sa o Karisito ga, io, me vakarisito na ka kecega.
12 O koya oqo, ni dou sa tamata digitaki ni Kalou, sa savasava ka daulomani, dou bulataka na loloma ni Kalou, na yalovinaka, na yalomalumalumu, na yalomalua, na vosota vakadede;
13 Dou veivuke ni colata nomudou i colacola, dou veivosoti vakai kemudou, ke dua na ka cala e beitaki kina e dua vei kemudou; ni sa vosoti kemudou oti o Karisito, e dodonu mo dou dau veivosoti.
14 Ia na veika kece oqo, na loloma ga me yavu tiko ni nomudou bula, ni loloma e vakataucokotaka na ka kecega.
15 Na vakacegu ni Kalou me lewa na yalomudou, me rawa ni da vakavinavinaka kina, ni o keda eda sa dua ga na yago.
16 Me vakavale vei kemudou na Vosa i Karisito, mo dou vakasinaiti kina ena vuku kecega, dou veivakatavulici ka veivunauci vakai kemudou ena same kei na sere ena sere vakayalo, ka dou lagasere mai na vuni yalomudou ni dou lomana na Turaga.
17 Ena ka kece dou cakava ena vosa se cakacaka, me caka kece ena yaca ni Turaga o Jisu, dou dau vakavinavinaka vua na Kalou o tamada ena Vukuna.
18 Oi kemudou na yalewa vakawati, dou dau vakarorogo vua na watimudou, ni sa vinakata na Turaga.
19 Oi kemudou na tagane vakawati, dou lomana na watimudou kakua ni dou dau vakatotogana.
20 Oi kemudou na gone, dau muria na vosa ni nomudou i tubutubu ena ka kecega, ni Turaga sa dau vinakata me vaka oqo.
21 Vei kemudou na tama, dou kakua ni vakacudrui ira na luvemudou, de ra qai yalolailai.
22 Vei kemudou na tamata dauveiqaravi, dou talairawarawa vei ira nomudou turaga sa liutaki kemudou, dou kakua ni cakava me ra qoroi kemudou kina na tamata, ia ena yalodina ga kei na rerevaka na Kalou.
23 Ena ka kece dou cakava, mo dou cakava ena yalomudou dina, ni dou cakava tiko vua na Turaga, ka sega ni vei ira na tamata.
24 Ka mo dou kila na Turaga ena solia na kemudou i sau me noda i vota vota; ni dou sa qarava na Turaga o Karisito.
25 Ia o koya ga sa caka ca ena taura na kenai sau ni ka e cakava, ena sega ni dua na veitovaki me caka.


Chapter 4

1 Oi kemudou na turaga, me caka vakadodonu ka vakasavasava na veiqaravi vei ira nomudou tamata, ka mo dou kila ni tiko tale e dua nomudou Turaga e levu cake vei kemudou.
2 Dou masu tikoga vagumatua, ka yadrava tiko ena vakavinavinaka.
3 Ka mo dou dau masulaki keitou tale tikoga, me rawa ni dolava vei keitou na Kalou e dua na katuba me curumaki yani kina na nona vosa, ka wasei yani kina na veika vuni baleti Karisito, me vaka au vesu tu kina oqo.
4 Au sa kena tamata me'u vakaraitaka na ka oqo, ni'u rawa ni tukuna vakadodonu.
5 Na nomudou bula me kilikili vei ira na sega ni lotu, ka mo dou volia na gauna.
6 Na vosa me lako mai gusumudou me vosa ga ni loloma, e vaka na kakana vakamasima vinaka, me rawa kina vei kemudou mo dou dau veirogoci vinaka kina.
7 O Tikiko e dua na taciqu lomani, ka i talatala yalodina e noqui tokani ena vuku ni Turaga, ena laki tukuna taucoko vei kemudou na ka me baleti au.
8 O ya sara ga na vuna au talai koya yani kina vei kemudou, me rawa ni laki raica mai o koya na dredre dou sotava tiko, ka me solia vei kemudou na vosa ni vakacegu.
9 O koya kei Onisimo e dua talega na taciqu yalodina, e rau na lako vata yani. E rau na vakaraitaka vei kemudou na veika sa mai vakayacori tiko eke.
10 Sa loloma tiko yani vei kemudou o Arisitako e dua keirau vesuki vata tiko, kei Marika na tavalei Panapasa (sa vakau oti yani na kenai tukutuku: Kevaka sa lako yani vei kemudou, dou maroroi koya)
11 Kei Jisu na yacana talega o Jasato. O iratou qo na noqui tokani e ratou dau vukei au ena kena vakatetei na matanitu ni Kalou, ena vuku ni sa cilavi tu na yalodratou, edau vakamarautaki au na nodratou bula.
12 O Epafira e dua ga vei kemudou sa loloma tu yani, e sega ni dau cegu nona dau nanumi kemudou ena nona qaqa ni masu, ka masu mo dou tudei ka cakava tiko na loma ni Kalou.
13 E dua na ka au raica vua ena nona lomakatakata tiko ena vukumudou, kei ira mai Leotisea kei Iarapoli talega.
14 O Luke na vuniwai lomani kei Timasa rau sa loloma tu yani vei kemudou.
15 Au sa loloma yani vei ira na veiwekani mai Leotisea, vei Nemisa kei nai soqosoqo lotu era lotu tiko e nona vale.
16 Ni sa wili oti vei kemudou nai vola oqo ni dou sa rogoca oti, au kerea me kau ki Leotisea me laki wiliki talega vei ira.
17 Dou tukuna vei Akipo, "Me nanuma vinaka tiko na cakacaka sa solia vei kemudou na Turaga, ka mo dou cakava sara.
18 Au sa loloma yani ka vola ena ligaqu dina – o Paula. Dou nanumi au ena noqu vesu tiko. Me nomudou na loloma. Emeni.