1 Cesalonaika

1 2 3 4 5


Chapter 1

1 Cesalonaika 1 1 Oi au o Paula, o Silivenusi, kei Timoci, ki na nodra i soqosoqo lotu na kai Cesolonaika, o ira sa tu vua na Kalou o Tamada kei na Turaga o Jisu Karisito. Me nomudou na loloma kei na vakacegu ni Kalou na tamada kei na noda Turaga o Jisu Karisito.
2 Keitou sa dau vakavinavinakataki kemudou tikoga vua na Kalou, ena neitou dau masulaki kemudou.
3 Ena neitou dau vakananuma na nomudou dau cakacaka ena vakabauta, kei na nomudou dau oca ena loloma, kei na nomudou vosota nai nuinui, vua na noda Turaga o Jisu Karisito ena mata ni Kalou o Tamada.
4 Kei na nomudou kila na veiwekani lomani ni Kalou e digitaki kemudou.
5 Nai tukutuku dou a rogoca mai vei keitou a sega ni tarai kemudou ena vosa ga, ia ena kaukauwa kei na Yalo Tabu me vaka sa vakadinadinataki, ni dou sa kila na neitou i valavala ena vukumudou ni keitou a tiko kei kemudou.
6 Ka dou sa yaco kina mo dou muri keitou kei na Turaga, ni dou muria tikoga na vosa ni Kalou ena dela ni vakararawataki, dou sa qai reki tikoga ena Yalo Tabu.
7 Dou sa nodra i vakarau vei ira na lotu mai Masitonia kei Akaia.
8 E toso vakatotolo na vosa ni Turaga ena vukumudou, sega walega mai Masitonia kei Akaia, ia ena veiyasana kecega. Na nomudou vakabauta na Kalou sa rogo ka teteva na veivanua, sa sega tale ni dua na kena yaga vei keitou me keitou vosa ena dua na ka.
9 Ni ra sa tukuna ga o ira ena vuku i keitou nai valavala ni neitou la'ki tiko vei kemudou, ni dou sa vuki tani mai na veimatakau, ka qarava na Kalou dina.
10 Dou waraka na Luvena sa tiko mai lomalagi o Koya sa vakaturi cake mai na mate, sai Jisu ga, ni o Koya ena vakabulai keda mai na veicudruvi sa roro tiko mai.


Chapter 2

1 Cesalonaika 2 1 Dou sa kila vinaka na mata veiwekani ni sega ni ka wale na neitou a lako yani.
2 Dou sa kila vinaka talega na levu ni veika rarawa keitou a sotava mai Filipai, ia e solia tiko vei keitou na Kalou na yalo e qaqa, me keitou vunautaka vei kemudou nai tukutuku vinaka, e dina ni tu na veisaqasaqa.
3 E sega ni vuni neitou la'ki vunau yani baleta na leqa e yaco tiko, se nai valavala ca, se na veilawakitaki.
4 Ia ena vuku ga ni sa digitaki keitou na Kalou me keitou tawasei ena vuku ni tukutuku vinaka, dou raica ga ena neitou vunau ni keitou sega ni via vakalomavinakataka e dua na tamata, na Kalou duadua ga ni kila tiko na yaloi keitou.
5 E sega vakadua ni keitou vunau me veimari se vunau me tawa kina neitou taga – na kena vakadinadina na Kalou.
6 Keitou sega ni cakava oqori mera qoroi keitou kina na tamata, se mo dou dokai keitou se o ira tale na so, keitou sa kitaka tikoga ni keitou sa i apositolo i Karisito.
7 Ia keitou sa rui kawaitaki kemudou vakalevu, me vaka nona rui kawaitaka na luvena e dua na tina ni gone.
8 Keitou sa moce tatadrataki kemudou tu ga, keitou sega walega ni solia vei kemudou na vosa ni tukutuku vinaka, keitou gadreva me keitou sa solia taucoko na neitou bula vei kemudou, ena vuku ni nomudou caka vinaka vei keitou.
9 Me kakua ni kani oca vei kemudou na neitou vakasosataki kemudou tiko, ena siga kei na bogi ena neitou cakacaka, keitou na cakava tikoga na kena vunautaki nai tukutuku vinaka.
10 Na Kalou, kei kemudou sa kenai vakadinadina, ni keitou cakava sara tu ga vei kemudou sa lotu, ena yalo e vaKalou, e dodonu ka savasava.
11 Dou kila tiko neitou i tatau vei kemudou, neitou vakamamasu kei na neitou i vakaro, me vaka e dua na tama ni gone vei ira na luvena.
12 Sai koya mo dou bulataka nai valavala sa kilikili me vaka na luve ni Kalou, ni dou sa digitaki mo dou taukena na Nona matanitu vakaiukuuku.
13 Ena vuku ni ka oqo keitou sega ni dau cegu kina ena neitou vakavinavinakataki kemudou vua na Kalou, ena nomudou maroroya na vosa ni Kalou dou a rogoca vei keitou, ka sega ni dou vakaweleweletaka ni sa vosa dina, ka sa vakayaco bula tiko vei kemudou ni dou sa vakabauta.
14 Vei kemudou na veiwekani, dou tautauvata sara ga kei na soqosoqo lotu ni Kalou mai Jutia era tu vata kei Karisito Jisu. Ena nodra a vakararawataki mai vei ira ga na wekadra, me vaka sara ga e yaco tiko vei kemudou.
15 Era vakamatea na Turaga o Jisu kei ira nodra parofita, era mai vakararawataki keitou; na Kalou e sega ni taleitaki ira vata kei ira kecega na tamata.
16 Era mai tarova na neitou vunau vei ira na kai matanitu tani de ra qai vakabulai, era sa vakaikuritaka tikoga nodra i valavala ca; na veicudruvi ena yaco vei ira ena kena i vakatagedegede sara e cake.
17 Ia e dina ni datou sega ni veiraici tiko ena dua na gauna lekaleka oqo, io na yalo sa veivolekati, sa dua na ka na neitou gadreva tiko me datou veisotari mada.
18 Keitou via lako tiko yani – oi au mada ga o Paula sa vakalevu na noqu sasaga yani – ia o Setani sa qai vakataotaka tiko noqu lako yani.
19 Cava keitou nuitaka, ka rekitaka, se cibitaka tiko? Sa sega li ni oi kemudou ena mata ni Turaga ena nona rairai mai?
20 Ni o kemudou sa vuni neitou lagilagi kei na reki.


Chapter 3

1 Cesalonaika 3 1 O koya oqo, ni keitou sa sega ni qai vosota rawa, keitou sa mani nanuma me keitou sa tiko mada ga mai Aceni.
2 Ka talai Timoci yani o koya e dua na tacida, ka i talatala ni Kalou noqu i tokani ena vuku ni tukutuku vinaka i Karisito, me la'ki vakayavutaki kemudou vinaka ka vakataudeitaki kemudou, e na vuku ni nomudou vakabauta.
3 Me rawa kina vei kemudou mo dou kua ni yalalailai ena veika rarawa; ka mo dou kila talega ni oqo sara ga na veika e dodonu meda na sotava tiko.
4 Keitou sa vakaraitaka oti tiko vei kemudou ni keitou se tiko mai keri, ni da na vakacacani ena vuku i Jisu.
5 Oqo na vuna au veitalai tiko yani kina, niu sega ni kila na nomudou vakabauta, de dou sa rawai beka mai vei ira nai to i Setani, sa qai sega ni yaga na neitou veiqaravi ena vukumudou.
6 Ni sa lesu mai o Timoci ena nona tiko mai vei kemudou, e dua nai tukutuku vinaka e kauta mai ena vuku ni nomudou vakabauta kei na loloma, kei na vuku ni nomudou gadreva mo dou raici keitou, me vaka ga na neitou via raici kemudou
7 Sa dua na ka na levu ni neitou marau ena vuku ni nomudou vakabauta e dina mada ga ni keitou vakacacani ka kune ka rarawa.
8 Kevaka mo dou na tudei tiko vua na Turaga, keitou sa marau ka bula vinaka.
9 Sa kila vinaka na Kalou na neitou marau ena vukumudou, ni sega tale e dua me na yavalata nai tikotiko ni Kalou ena vakavinavinaka oi keitou ga ena vukumudou.
10 Keitou sega ni cegu ni masulaki kemudou ena siga kei na bogi me keitou raici kemudou, me rawa ni keitou la'ki vakavinakataka yani na vanua dou malumalumu tiko kina.
11 Ia na noda Kalou ka Tamada talega, kei na noda Turaga o Jisu Karisito me liutaki keitou me keitou lako yani vei kemudou.
12 Me vakalevutaka vei kemudou na Turaga na loloma, mo dou veilomani kina vakai kemudou ka lomani ira kecega na tamata, me vaka dou sa raica mai vei keitou.
13 Ka me rawa kina ni maroroi na yalomudou me kua ni tawani tu kina na veika ca, mo dou savasava sara ena mata ni Kalou o Tamada, ka waraka tiko kina na nona rairai mai na Turaga o Jisu Karisito, kei ira vata na Nona yalosavasava.


Chapter 4

1 Cesalonaika 4 1 Ena vuku ni Turaga o Jisu, keitou sa kerekere ka vakaroti kemudou na veiwekani, mo dou sasaga ki na bula e uasivi cake, ia dou a ciqoma na neitou i vakavuvuli e na sala mo dou lakova ka vinakata na Kalou;
2 Ni dou sa kila vinaka nai vakaro keitou a solia vei kemudou ena vuku ni Turaga o Jisu.
3 Ni sai koya oqo na loma ni Kalou, mo dou savasava sara, ka kakua ni ia na gagadre ca ni tovo vakayago;
4 Sa dodonu mo dou kila vakayadua na noda maroroya na yagoda me savasava tiko ka me dokai,
5 Me kakua ni vakataki ira na matanitu tani era sega ni kila na Kalou, ena nodra veitaliataki ira ena gagadre ni yagodra;
6 Me kua ni dua me vakatautaukeni koya ena veika oqo ka la'ki vakaleqa kina na tacina, baleta na Turaga ena sauma vua, na veika oqo keitou sa tukuna oti vei kemudou.
7 Ni sa sega ni kacivi keda na Kalou meda dukadukali, ia meda sa savasava ga.
8 O koya sa besetaka oqo e sega ni besetaka na tamata, e besetaka sara ga na Kalou, o Koya sa solia tu vei keda na Nona Yalo Tabu.
9 Sa sega tale ni qai yaga vei kemudou me'u vola yani na veilomani vakaveitacini, ni sa vakavulici kemudou oti na Kalou mo dou veilomani vakataki kemudou;
10 Ka ni dou sa vakayacora tiko vei ira na tacimudou era tu ena vanua vaka Masitonia. Ia keitou sa kerei kemudou mo dou tomana tikoga vakalevu na bula vaka oqo;
11 Sa vinaka nomudou sasaga ki na bula sautu, ka dou sa cakava, ka vakayagataka na ligamudou ki na qele, me vaka neitou i vakaro vei kemudou,
12 Mo dou lako vakadodonu e matadra na sega ni lotu, me kua ni dua na gauna mera dusi kemudou ni dou dravudravua.
13 Ia au sa sega ni vinakata mo dou sega tu ni kila na veiwekani, baleti ira sa moce, ka mo dou kakua soti ni rarawataki ira me vakataki ira sa sega tu na noda i nuinui.
14 Kevaka eda sa vakabauta ni a mate o Jisu ka sa tucake tale, io na Kalou e na kauti ira vata mai kei Koya o ira sa moce ni ra tu vata kei Jisu.
15 Keitou tukuna na vosa oqo vei kemudou mai na vosa dina ni Turaga, ni da na sega ni liu vei ira sa moce tu oi keda eda bula tiko,
16 Ni na lako sobu mai lomalagi o koya na Turaga ena kaila, kei na domo ni agilosi Turaga, kei na rorogo ni davui ni Kalou. Era na tucake e liu o ira na mate era tu vata kei Karisito.
17 Eda sa qai muri ira cake yani oi keda na bula tiko, meda na lako cake vata ena vei o ka sota vata kei na Turaga ena loma ni maliwa lala. Ni oti eda sa na qai tiko vata kei na Turaga.
18 O koya oqo, mo dou ia tiko na veivakacegui vaka i kemudou ena vosa oqo.


Chapter 5

1 Cesalonaika 5 1 Ia me baleta nai vakataotioti ni gauna kei na ka ena yaco kina, sa sega tale ni qai yaga vei kemudou na veiwekani me'u vola yani, ni dou sa kila vinaka tu.
2 Sa matata vinaka tu vei kemudou ni siga ni Turaga, ena lako mai me vaka na daubutako ena bogi.
3 Ni ra na tukuna na tamata, "Me da vakacegu ga ni da sa tiko vinaka!" Ena qai yaco vakasauri mai na ka dauveivakarusai, ena yacovi ira kina na mosi vaka na yalewa sa taratara. Era na sega ni dro bula rawa.
4 Ia oi kemudou na wekaqu, dou sa sega ni tiko ena butobuto, me rawati kemudou kina na siga oqo me vaka na dau butako.
5 Oi kemudou kecega na gone ni rarama, kei na gone ni siga. Eda sa sega ni nona na bogi, se nona na butobuto.
6 O koya oqo meda sa kua ni moce, me vaka era cakava tu eso, ia meda sa yadrava ka yalomatua tiko.
7 O ira era moce tiko, era moce ena bogi, kei ira sa mateni era mateni ena bogi.
8 Ia oi keda, sa cilavi keda tu na rarama me da sa yalomatua mada, meda sa tokara nai sasabai ni lomasereda na vakabauta kei na loloma, me daramaki talega na i tataqomaki ni ulu sai koya noda vakanuinuitaka tiko na bula.
9 Ni sa sega ni digitaki keda na Kalou me da na mate, ia me da rawata na bula ena vuku ni noda Turaga o Jisu Karisito,
10 Ka mai mate ena vukuda, se da yadra se moce eda na bula vata ga kei Koya.
11 O koya oqo mo dou dau veivakacegui vaka i kemudou, ka dou veitarai cake tiko, me vaka ga dou sa dau cakava tiko.
12 Keitou sa kerei kemudou na veiwekani mo dou dau nanumi ira na veiqaravi tu ena vukumudou, ni ra dau masulaki kemudou tiko vua na Turaga ka vakavulici kemudou.
13 Me ra dau raici ena mata loloma ena vuku ni cakacaka dredre era vakayacora tiko. Dou veivinakati vakai kemudou.
14 Keitou sa kerei kemudou, na veiwekani, me ra vosataki tiko vakadodonu na talaidredre, o ira na yalolailai me ra dau vakayaloqaqataki, maroroi ira na malumalumu, dou vosoti ira kece na tamata.
15 Dou raica me kua ni dua e sauma na ca ena ca vua e dua, ia dou sasaga mo dou veivinakati kei ira na tamata kecega.
16 Mo dou dau reki tikoga,
17 Nomudou masu me kua ni dua na gauna me cegu kina,
18 Dou vakavinavinaka ena vuku ni ka kecega; Ni sa loma ni Kalou oqo vei kemudou ena vuku i Karisito Jisu.
19 Dou kakua ni tabonaka se vakalailaitaka na cakacaka ni Yalo Tabu.
20 Dou kua ni vakawaletaka na parofisai.
21 Vakatovolea na ka kecega; o koya ga e vinaka qai taura dei.
22 Dou kua ni la'ki tiko ena vanua ni lasa vakavuravura. Vakalouvinakataki Kei Na Veivakasalataki
23 Oqo me vakasavasavataki kemudou sara na Kalou ni veivakacegui; ka me sa maroroi me kua ni tauvi duka na yalomudou na lomamudou kei na yagomudou me yacova na gauna e lesu mai kina na noda Turaga o Jisu Karisito.
24 O Koya sa kacivi kemudou ena kitaka ni sa yalodina o Koya.
25 Na veiwekani, dou masulaki keitou tiko mai.
26 Keitou sa loloma yani vei kemudou ka salavata neitou vakanuinui vinaka ena i regu savasava.
27 Au sa vakarota yani ena vuku ni Turaga me wiliki nai vola oqo me rawa ni ra rogoca taucoko na veiwekani yalosavasava.
28 Me nomudou na nona yalololoma na noda Turaga o Jisu Karisito. Emeni.