1 Timoci

1 2 3 4 5 6


Chapter 1

1 Timoci 1 1 Oi au o Paula, na apositolo i Jisu Karisito, ena lewa ni Kalou na noda i vakabula kei na Turaga o Jisu Karisito, na noda i nuinui,
2 Vei Timoci na luvequ dina ena vakabauta: Me nomu na loloma, na yalololoma, kei na vakacegu mai vua na Kalou o Tamada kei Jisu Karisito na noda Turaga.
3 Me vaka ni'u na lako ki Masitonia, au sa kerei iko kina mo tikoga e Efeso, me rawa ni o vakaroti ira eso me ra kakua ni vakatavuvulitaka tiko nai vakavuvuli tani.
4 Mo qarauna vinaka eso nai tukutuku lasutaki kei nai vola ni kawa sa volai; ni sa yaco ga kina na duidui kei na veibasuraki, ka sega ni tara cake na vakabauta kei na bula e vakalou.
5 Nai naki ni vakaro oqo na loloma mai na yalo e savasava, kei na lewa e loma vinaka, kei na vakabauta dina,
6 Ni so era vakacalai walega tu ga ena vosa kamikamica ni veirawai,
7 Era vinakata mera qasenivuli ni vunau, ka sega tu mada ga ni kilai na ka era vakatavuvulitaka se na ka era vakadeitaka.
8 Ia eda kila nai vunau e vinaka, kevaka me muri me vaka na kena i vakaro,
9 Ni'u sa kila: ni vunau e sega ni buli me baleta na tamata yalododonu, ia vei ira sara ga na dau basu lawa kei na talaidredre, vei ira na sega ni lotu kei na i valavala ca, vei ira na dukadukali kei na dauvakacaca, vei ira na labati tamadra, kei ira na labati tinadra, kei ira na dauvakavuvala,
10 Vei ira na dauveibutakoci, kei ira na dauveimoceri vakatagane, vei ira na dauvesuka vakavuni na tamata, kei ira na dau lasulasu, vei ira na dau bubului vakailasu, kei na so tale na bula e vakayacori ka sega ni lako vata kei na i vakavuvuli dina,
11 Me vaka na lagilagi ni tukutuku vinaka mai vua na Kalou ka vu ni sautu, sa lesi au kina me'u kena i talatala.
12 Au vakavinavinaka vei Jisu Karisito na noda Turaga, ena nona digitaki au me'u Nona i talatala ena vuku ni sa wiliki au me yalodina.
13 E dina ni oi au e dua na dauvosacataka na lotu i Jisu, ka dau vakararawataki ira na soqosoqo lotu, oi au e dua na tamata dau coqa na lotu; ia au sa lomani ga, ni'u vakayacora tu oqori, ena sega ni vakabauta kei na lecaika.
14 Na loloma ni noda Turaga sa sega ni yalani rawa, na vakabauta kei na yalololoma sa tu vei Jisu Karisito duadua ga.
15 Oqo na vosa dina ka dodonu me vakabauti, Ni sa lako mai ki vuravura o Jisu Karisito, Me vakabulai o ira nai valavala ca, me vaka taki au.
16 Sa dina, oqo na vuna, au sa rawata kina na loloma, me liu vei au na nona vakatakila o Jisu Karisito nai valavala ni dauvosota, me rawa ni dusidusi vei ira era na vakabauti koya ena kena rawati na bula sega ni mudu.
17 O koya na Tui sa sega ni mudu, ka sega ni rawai koya o mate, na Kalou oqo sa sega ni kune, e vuku ka rai yawa, me nona na lagilagi kei na vakarokoroko me sega ni mudu. Emeni.
18 Oqo nai vakaro au sa vakaroti iko kina na luvequ Timoci, me vaka na parofisai sa vakayacori oti vei iko, mo vakarau tu ki na i valu vinaka,
19 Me tudei na nomu vakabauta, kei na nomu lewa e loma me totoka tu, ni so, era sa biuta ka sega ni dei kina, sa yaco kina me voca ka kasere vakadua na nodra bula.
20 Me vakataki Emenio kei Alikisada, au sa soli rau vei Setani, me rawa ni rau vulica me rau kakua ni dauvosavakacaca.


Chapter 2

1 Timoci 2 1 O koya oqo au sa kerea vakabibi me caka mada e liu na masumasu, na veinanumi ena masu, na masu e sega ni cavuka, kei na vakavinavinaka me ia ena vukudra na tamata kecega.
2 Ena vukudra talega na Tui kei ira na veiliutaki tiko, me rawa ni da vakavotuya cake tikoga kina na bula dina vaKalou sai koya na bula dina me bulataki.
3 Ni ka oqo sa vinaka ka dodonu ena mata ni Kalou na noda i vakabula.
4 Ni sa gadreva o Koya me vakabulai na tamata kece ka kila sara na dina.
5 Ni sa dua ga na Kalou ka dua na dauveisorovaki ena maliwa ni tamata kei na Kalou, sa i Koya oqori o Jisu Karisito.
6 Sa soli Koya me kedra i voli na tamata kecega, ena vakaraitaki koya ena gauna sa lokuci tu.
7 Na ka oqo au sa lesi kina me'u kena dauvunau ka i apositolo talega – Au sega ni tukuna tiko e dua nai tukutuku lasutaki, au tukuna tiko nai tukutuku dina baleti Karisito – oi au na qasenivuli vei ira na kai matanitu tani ena vakabauta kei na dina.
8 Au vinakata vei ira na tagane me ra daumasu ena vanua kecega, me ra laveta cake na ligadra savasava, me kua ni ra yalo ca tiko se ra vakatitiqa.
9 Me vaka talega kina o ira na yalewa, mera dau daramaka nai sulu e rakorako, kei na bula e kilikili kei na yalo e malumalumu, me kua soti ni vakaivukivukitaki na ulu se va koula se na veimataniciva eso, se na veiveisau ni daramaki nai sulu sau lelevu,
10 Ia vei ira na yalewa lotu e vinaka na bula e kilikili era sa vakaraitaka tiko, io me vakadinadinataki ena nodra cakacaka.
11 Me dau vulica na yalewa me dau vakamalumalumutaki koya, ka me dau sogota tiko na gusuna ena levu na gauna.
12 Au sega ni vakatara e dua na yalewa me veivakavulici se me liutaka na tagane, ia me dabe ka galu tiko.
13 Ni o Atama e buli e liu, qai buli e muri o Ivi.
14 O Atama e sega ni rawai, na yalewa ga e a rawai ka vakavuna me rau talaidredre.
15 Ena vueti cake tale kevaka me na vakaluveni ka bula taka tiko na vakabauta, na loloma, na yalosavasava kei na yalomatua.


Chapter 3

1 Timoci 3 1 Na vosa oqo e dina: kevaka e dua sa gadreva me cakacaka vakaitalatala, esa gadreva tiko e dua na cakacaka vinaka.
2 O koya me i talatala e dodonu me kua ni dua na ka ca me beitaki kina, me dua ga na watina, me mamakutu, me yalomatua, me i valavala vinaka, me dauyalovinaka, me dauveivakavulici vakayalomatua;
3 Me kakua ni dau gunuva na waini kaukauwa, me kakua ni dau vakavuna na veisei, me kakua ni dau kocova nai lavo, ia me yalomatua, me kakua ni dau cudrucudru, me kakua talega ni dau kocokoco;
4 Me vakavulici ira vinaka na nona vuvale, me rawa ni ra gone talairawarawa ka dau vakarorogo.
5 (Kevaka me sega ni vakatulewataki ira rawa na nona matavuvale, ena qai rawa vakacava me la'ki qaravi ira vinaka nai soqosoqo lotu ni Kalou?);
6 Me kakua ni dua e se qai lotu ga mai, de qai yaco kina vua na dokadoka, ena tautauvata kina kei setani ena nona biu sobu ki na rusa.
7 E dua talega na ka me tiko vua o ya na kena i rogorogo vei ira na sega ni lotu me vinaka, de qai bale sobu ena kena i rogorogo kei na nona i lawaki na tevoro.
8 O ira na tuirara mera dau vakarokoroko, mera kakua ni dau veivosayaki, mera kakua ni dau gunuva na waini kaukauwa, mera kakua ni dau kocova vakalevu nai lavo,
9 Ena lewa e loma e savasava me ra taura dei na ka vuni ena vakabauta.
10 Ia o ira oqo mera vakatovolei mada e liu; oti mera qai mai tuirara, ni sa vakadinadinataki ni sega ni dua na ka era beitaki kina.
11 O ira na watidra mera dauyaloyalo vinaka, Me ra kakua ni dau vakauvosa, me ra yalomatua ka yalodina e na ka kecega.
12 O ira na tuirara me ra yadua ga na watidra, me ra lewai ira vinaka na luvedra kei na nodra matavuvale.
13 O ira sa qarava vinaka na cakacaka vaka tuirara era na tubu cake ka tamata qaqa e na vakabauta i Jisu Karisito.
14 Au sa vola mada ga yani vei iko eso na veika oqo, au sa vakanuinui tiko ni na dua na gauna lekaleka ga mai oqo daru na sota kina.
15 Ia kevaka au na berabera tiko yani, au sa vola tiko yani oqo nai valavala ni nomu tiko ena vale ni Kalou, oqori nai soqosoqo lotu ni Kalou Bula, na duru kei na yavu ni dina.
16 Sa sega ni tabonaki rawa na ka vuni levu ni Kalou, ka tabu oqo: Sa yaco me tamata na Kalou, Sa vakadonui Vakayalo, Sa raica o ira na Agilosi, Sa vunautaki vei ira na matanitu tani Sa vakabauti e vuravura, Sa ciqomi lesu tale ki nai ukuuku ni Kalou.


Chapter 4

1 Timoci 4 1 Esa tukuna oti tiko mai na Yalo Tabu ni so ena vuki tani mai na vakabauta ena gauna e muri, ena nodra sa tamoi ni ra via rogoci ira na yalo ni dauveivakacalai, kei na nona i vakavuvuli na tevoro,
2 Era vosa vakamikamica ni veitemaki ka yaco kina na nodra lewa e loma me kama vaka na kaukamea katakata.
3 Era sega ni taleitaka me yaco na vakawati, era tarova ka sega ni duavata ena kakana sa solia mai na Kalou, me laukana vei ira sa vakabauta me ra vakavinavinakataka kina na dina ni Kalou.
4 Nai bulibuli taucoko ni Kalou e vinaka, me da ciqoma taucoko nai solisoli ni Kalou ena vakavinavinaka ka me kakua ni da biliga tani;
5 Ni ka oqori sa vakasavasavataka oti tu na vosa ni Kalou kei na masu.
6 Kevaka mo dau vakamatatataka vei ira na veiwekani na ka oqo, o na qai dua na i talatala vinaka i Jisu Karisito, mo tuberi ira vakamalua ena vosa ni vakabauta kei na vakavuvuli dina, me vaka na nomu a tuberi mai kina.
7 Ia mo kakua ni galeleta na vosa ni veivakasewasewani kei na nodra vosa ni veiwali ca na yalewa sa vakawati, ka mo maroroi iko tikoga mo savasava tiko.
8 Ni sa yaga vakalailai ga na ogaoga vakavuravura, ia na ogaoga e na ka ni bula vakayalo sa yaga ena ka kecega, e yalataki kina na ka me baleta na bula oqo, ka qai vakauasivi na bula se bera mai.
9 Oqo na vosa sa cecere ka vinaka vakaoti ka sa dodonu me ciqomi.
10 Ena ka oqo eda na vosota kina na veika rarawa, ka vakabauta tikoga na Kalou bula, o Koya nai vakabula ni tamata kecega, ka vakauasivi vei ira na vakabauta.
11 Mo dau vakatavuvuli taka ka vakarota tiko na veika oqo.
12 Me kakua ni dua e beci iko ni o se cauravou tikoga, ia na nomu i vosavosa, nomu i tovo, ena nomu loloma, nomu yalodina, nomu vakabauta, kei na nomu maroroya na savasava.
13 Me yacova na noqu lako yani, mo dau vakaogai iko vakalevu ena wilika nai vola, ka mo dau veivakasalataki tiko, ka tukuna tiko nai vakavuvuli dina.
14 Mo kakua ni vakamocera nai solisoli e tiko vei iko, ni sa yaco vei iko ena parofisai kei na veitabaki ni liga mai vei ira nai talatala qase.
15 Dau vakanananu ki na veika oqo; ka soli iko taucoko kina, me rawa ni levu na ka o kila mai vei ira kece.
16 Vakaraici iko vinaka kei nai vakavuvuli. Mo bulataka sara, ni o sa cakava oqo o sa vakadewa tiko kina vei ira era rogoci iko na bula, ka vakauasivi sara ga vei iko.


Chapter 5

1 Timoci 5 1 Mo kakua ni vunauca vakaukauwa e dua sa qase sara, ia mo tuberi koya vakamalua me vaka sa tamamu, vei koya talega sa cauravou me vaka sa tuakamu,
2 Vei ira na yalewa qase, me vaka sa tinamu, ira na goneyalewa me vaka sa ganemu, ena yalosavasava dina sara.
3 Mo doka na yada sa yada dina.
4 Ia kevaka e dua na yada e vakaluveni se vakamakubuni, Me ra tuberi me ra maroroya na nodra vuvale, ka me ra vulica na dauloloma ni ra sa vukea na nodra i tubutubu, me ra sauma lesu kina na nodra susugi mai; ni sa vinakata ka vakadonuya na Kalou me vaka oqo.
5 Na yada dina, o Koya sa tiko duadua ga ka sega e dua me raici koya, ia sa nuitaka tikoga na Kalou ena nona dau masumasu, ka dau veinanumi ena masu e na siga kei na bogi.
6 Ia o koya na yada sa dau marautaka na veilasa kei vuravura, sa mate ga ni se bula tiko.
7 Mo vakarota vakaukauwa vei ira, me ra kakua ni beitaki ena dua na ka e ca.
8 Ia kevaka e dua me sega ni qarauni koya, ka vakauasivi sara na nona matavuvale me sega ni qarava, e dusia tiko na nona cakitaka na vakabauta, ka vinaka cake o ira na sega ni lotu mai vei koya.
9 Me kua ni dua na yada e lailai mai na onosagavulu na nona yabaki me kau cake mai na yacana, ka vaka vo ga o koya sa vakawati tiko kei na dua ga na tagane.
10 Na kena i rogorogo me vinaka: kevaka edau ni veisusu vinaka vei ira na gone, kevaka edau kauwaitaki ira na vulagi, kevaka me sa vuya oti na yavadra na yalosavasava, kevaka me sa vadretitaki ira na mavoa, kevaka sa dau yalodina ni dau cakava na cakacaka vinaka kecega.
11 Ia mo kakua ni vakatara mai e dua na yada gone; era na sega ni yalodina e na cakacaka i Karisito, baleta ni tiko vei ira na via vakawati.
12 Era sa na ca ga e na vuku ni ra sa biuta nai matai ni nodra vakabauta.
13 Kenai kuri era na wele ka vucesa ka sa nodra cakacaka tu ga na gade ki na veivalevale, era sega ni vucesa ga era dau kakase ka daulelewa, me ra vakalewa kece na veika e vakayacori tiko.
14 O koya oqo au sa gadreva kina vei ira na yada gone mera vakawati, ka vakaluveni, mera qarava sara nodra matavuvale, me kakua kina ni dua na vanua me cicila, me rawa ni ra dusia mai na dauveivakasesewani.
15 Ni sa so era sa lesu tale me ra muri setani.
16 Ni dua na vuvale me lewena tiko na yada, sa kerei vei rau nai liuliu ni vuvale me rau vukea nona leqa, me rawa ni galala mai kina nai soqosoqo lotu ka me vakarautaki koya ki na nodra vukei na yada era leqa dina tu.
17 Mera dau rokovi vakalevu na qase ni dau tu vei ira na lewa e matau, ka vakauasivi sara vei ira na dau vakavulica nai vakavuvuli dina kei na vosa bula ni Kalou.
18 Ni sa tukuna nai Vola Tabu, "Mo kakua ni vesuka na gusu ni bulumakau ni sa tu ena loma ni vei sila," ni sa dodonu me soli vua na daucakacaka na kena i sau."
19 Mo kakua ni ciqoma e dua na ka e beitaki kina e dua na qase, ka vakavo ga me lewe rua se lewe tolu me vakadinadinataka.
20 O ira sai valavala ca mo cudruva ena matana votu ni ra rai tu na tamata kecega, me rawa ni ra rere kina na tamata.
21 Au sa vakaroti iko ena mata ni Kalou kei na noda Turaga o Jisu Karisito kei ira na agilosi digitaki, mo qarauna me vakayacori vakatautauvata na veika oqo, mo kakua ni totaka e dua.
22 Mo qarauna na veitabaki ni liga vua e dua, qarauni iko mai na i valavala ca ni tamata, mo maroroi iko tiko mo savasava.
23 Sa rauta mada na nomu gunuva tikoga na waidroka, ia mo tovolea talega vakalailai na waini, ena vuku ni leqa ni ketemu kei na malumalumu edau yacovi iko tiko.
24 Nai valavala ca ni so na tamata sa laurai levu tu, era na lewai dina kina, e so talega era se bera ni vakavotui mai.
25 E sega ni dua na ka eda cakava meda na vunitaka rawa, na veika kece eda kitaka, se vinaka se ca, ena qai vakatakilai ga mai.


Chapter 6

1 Timoci 6 1 O ira kecega na tamata era sa tiko bobula, me ra kilai ira nodra turaga ka vakarokorokotaki ira vakalevu, me kakua kina ni vosavakacacataki na Kalou kei na Nona i vakavuvuli.
2 O ira era sa mai vakabauta na nodra turaga, me ra kakua ni beci ira baleta ni ra sa veitacini kei keda, ia me ra qaravi ira ga baleta ni na tamusuka na kena vinaka nai soqosoqo lotu. Mo vakavulica ka dau tukuna tiko vei ira na ka oqo.
3 Kevaka e dua e vakatavuvuli tiko ka veicalati kei na nona bula, ka sega ni lako vata kei na vosa ni noda Turaga o Jisu Karisito, se nai vakavuvuli sa vakalou,
4 Sa dokadoka ka vakaraitaka ni sega na ka e kila, ia sa dau vinakata me vaka vu veileti ka veibataka vakaukauwa na vosa me vakavuna na lomaca, na veivala, na vosavakacaca kei na dau vakanananu ca,
5 Na nodra veileti sega ni yaga na tamata lomaca e vakayalia nai vakavuvuli dina, era nanuma ni lotu me ra mai rawa ka kina. Na bula vaka oqori mo dro tani mai kina.
6 Na bula savasava kei na lomavinaka sa rui yaga vakalevu vei keda.
7 Ni sega sara ga ni dua na ka eda a kauta mai ki vuravura, e da na sega ni kauta lesu talega e dua na ka.
8 Mo vakacegu tiko ena i sulu kei na kakana sa tiko oqori.
9 Ia o ira sa gadreva me ra vutuniyau, era na sikalutu ki na i cori ni veitemaki, ka lewe levu sa mai tamusuki koso kina na nodra bula ka sega ni qai lamata cake tale.
10 Ni sa waka tu ni veika ca kecega na lomana nai lavo, e so ena lomakocokoco ni lomadra era sa mai yali tani kina ena vakabauta, ka sa qai bikai ira tu na veilecayaki kei na nuiqawaqawa.
11 Ia o iko na tamata ni Kalou, mo dro tani mai na veika oqo, ka segata na yalododonu, na savasava vakalou, na vakabauta, na loloma, na vosota, na yalomalua.
12 Mo vala ena i valu vinaka ni vakabauta, taura dei na bula Sega ni mudu, o koya o sa kacivi kina ka vakatutusa kina ena vakatutusa vinaka ena matadra nai i soqosoqo lotu.
13 Au sa vakamasuti iko ena mata ni Kalou sa Vu ni bula, kei na mata i Jisu Karisito o Koya sa tucake ena matai Ponitio Pailato, ka tusanaki Koya ena vakatutusa vinaka,
14 Mo taura matua nai vakaro oqo ka mo kakua ni tauvi duka, ka sega ni beitaki ena cala me yacova na Nona lesu tale mai na noda Turaga o Jisu Karisito,
15 Ni na qai vakaraitaki koya ga mai ena gauna sa lokuci tu, sai Koya na vu ni sautu ka vuni qaqa, na nodra Tui na Tui ka nodra Turaga na Turaga,
16 Sai Koya na Vu ni bula sega ni mudu, sa sega ni tabonaki rawa na nona rarama, sa sega ni dua na tamata me raica rawa, me Nona na vakarokoroko kei na kaukauwa me sega ni mudu. Emeni.
17 Vakarota vei ira era sa vutuniyau tiko me ra kakua ni dokadoka, se vakararavi ena nodra i yau ni sa ca rawarawa, ia Vua ga na Kalou bula ni sa solia tu vei keda me da vutuniyau e nai solisoli vinaka kecega, sa kauta mai vei keda na yalo e tavarekireki.
18 Tukuna vei ira mera cakava na cakacaka vinaka me rawa ni ra vakavutuniyautaki kina, me ra lomarawarawa ni dau soli ka, ka dauveivuke vei ira na gadreva na veivuke.
19 Era sa vakayacora tiko kina na kena conaki na yavu ni nodra bula ena veisiga sa tu mai liu, ka vakauasivi sara o ya na bula sega ni mudu.
20 I Timoci! Mo maroroya na ka o sa nuitaki kina, vakayawaki iko mai ena veitalanoa ca sa sega na betena, kei nai vakavuvuli tani sa yaco tiko kina na veivakacalai, sa tukuni tiko ni vakavuvuli ni kila ka –
21 Era sa muria e so ni ra sa vakadinata, ia, era sa lako sese kina mai na vakabauta. Me tiko vei iko na yalololoma. Emeni.