2 Timoci

1 2 3 4


Chapter 1

1 Oi au o Paula nai apositoloi Jisu Karisito ena lewa ni Kalou, ena vuku ni bula ka yalataki sa tu vei Karisito Jisu.
2 Vei Timoci, na noqu gone ni toko: Me yaco na loloma, na yalololoma, kei na vakacegu mai vua na Kalou o Tamada kei Karisito Jisu na noda Turaga.
3 Au vakavinavinaka vua na Kalou, o koya au sa qarava ena loma e savasava, me vaka era a dau cakava na noqu qase, sa sega talega ni'u dau cegu me'u dau nanumi iko tiko ena noqu masu ena veisiga kei na veibogi,
4 Au rui gadreva dina vakalevu, me'u raici iko, ni'u dau vakasamataka na tuturu ni wai ni matamu ena vuku ni dredre o sotava tiko, me rawa ni solia tale vei au e dua na reki kei na marau,
5 Na gauna au vakananumi iko kina ena vuku ni vakabauta dina sa tu vei iko, au sa qai taura rawa ni a tu e liu vei Loi na bumu kei Unaisi na tinamú, ka sega ni qai vakataratutu tale vei au ni sa tu talega vei iko.
6 O koya oqo au sa vakananumi iko tiko kina mo vakayadrata nai solisoli ni Kalou sa tiko vei iko, mai na veitabaki ni ligaqu.
7 Ni sa sega ni solia vei keda na Kalou na yalo meda rere, ia na yalo ga ni qaqa, na loloma kei na taucoko ni yalo matua.
8 O koya mo kua kina ni madualaka nai tukutuku ni noda Turaga, o iko o sega ni vesu vakataki au, ia mo wasea vata ga kei au na veika rarawa, ena vuku ni tukutuku vinaka ena kaukauwa ni Kalou.
9 Ni o koya sa vakabulai keda ka kacivi keda ena kaci e savasava, a sa sega ena vuku ni noda cakacaka, ia ena nona lewa ga kei na loloma, ka sa qai mai vakavotuya vei keda o Jisu Karisito, sa nakiti sara tu mai ni se bera ni tekivu o vuravura.
10 Ia ka sa sega ni rawa me tabonaki, sa yaco ga mai na noda i vakabula o Jisu Karisito, sa mai vakaoti mate vakadua ka solia na bula kei na sega ni mate rawa ena rarama ni tukutuku vinaka,
11 Ena ka oqo au sa tawasei kina me'u dau vunautaka, ka i apositolo, ka dauvakatavuvuli vei ira na kai matanitu tani.
12 Oqo sara ga na vuna au sa vosota kina na veika rarawa; ka sega ni'u madua kina, ni'u sa kilai koya o koya au sa qarava, au sa kila talega ni na dina o koya vei au, ena ka au sa yalataki au kina vua, me yacova na siga sa lokuci.
13 Nai valavala ni noqu dau vosa o a dau rogoca vei au, oqori mo taura dei, ni lako tiko mai ena taucoko ni vakabauta kei na loloma sa tu vei Karisito Jisu.
14 Na ka vinaka o sa lesi kina oqori, mo maroroya ni na vukei iko kina na Yalo Tabu sa tiko kei keda.
15 Ni o sa kila vinaka, ni o ira kece mai Esia era biuti au, ka sega ni dua me taleitaki au, ka dua vei ira o Pijila kei Erimojini.
16 Me nodratou na loloma mai vua na Turaga na matavuvale nei Onisivoro, ni ratou dau sotava noqu leqa, ka ratou sega ni dau madualaka noqu vesu tu.
17 Ena nona a yaco yani i Roma, e la'ki vakasaqarai au me kunei au, keirau a qai sota.
18 Sa yalataka vua na Turaga ni na kune loloma mai matana ena siga dina o ya – o kila vinaka na nona dau veivuke vei au ena noqu a tiko mai Efeso.


Chapter 2

1 O koya oqo, o iko na luvequ mo tamata qaqa ena loloma sa tu vei Karisito Jisu.
2 Kei na veika o a dau rogoca mai vei au ena kedra maliwa na lewe vuqa, mo solia ga vei ira na tamata yalodina o ira e rawa ni vakavulici ira tale eso.
3 Mo tamata vosota na veika dredre me vaka na sotia vinaka i Jisu Karisito.
4 E sega ni rawa ni dua me sa vakaisulu tu ni valu me la'ki vala, me qai vakaogai koya tale tiko ena so na cakacaka, e sega ni sotia vinaka na tamata vakaoqo.
5 Ena sega talega ni dua me nona na koula ena veitaucici, kevaka me sega ni vakamuria vaka vinaka na kena lawa.
6 O ira na dauteitei era teitei vagumatua mera na kania na vuana.
7 Mo nanuma vinaka na ka au tukuna tiko vei iko, me na solia vei iko na Turaga na kila ka, mo kila kina na veika kecega oqo.
8 Mo kila ni o Jisu Karisito, mai na kawa i Tevita, e a vakaturi cake mai na mate, me vaka na dina ni tukutuku vinaka au dau vunautaka.
9 Ena vuku ni ka oqo au sa dau vakararawataki tu kina me vaka e dua na tamata dau basu lawa, au qai vesuki tale tu ena senicodo, ia na vosa ga ni Kalou e sega ni rawa ni ra vesuka.
10 O koya oqo au na vosota kina na ca kecega ena vukudra na digitaki, me rawa kina ni ra vakabulai ka rawata na bula Sega ni mudu ena vuku i Karisito Jisu.
11 Oqo na vosa dina: Kevaka eda mate vata kei koya, E da na bula vata talega kei koya.
12 Kevaka meda dau vosota, Eda na lewa vata kei koya. Kevaka meda na cakitaki koya, Ena cakitaki keda o Koya.
13 Kevaka meda sega ni yalodina, O Koya ena dau yalodina tu ga; E sega ni dau tu vua na veidabui.
14 Mo dauvakananumi ira ena veika oqo, ena vuku ni Turaga mo vakaroti ira tiko, me ra kua ni dau veiletitaka na vosa, ni sega ni dua na ka vinaka e kauta mai vei ira, era na vakaleqai ira ga na vakarorogo tiko.
15 Gumatua sara mo vakaraitaki iko mo vinaka ena mata ni Kalou, na tamata daucakacaka ena sega ni dua na ka me madua kina, mo wasea vakadodonu nai vakavuvuli dina.
16 Ia na dautalanoa vakasisila ka sega ni yaga, mo drotaka, ni sa vakatubura ga nai valavala e sega ni kilikili.
17 Ia na nodra vosa ena kakana tiko me vaka na mate ca sa sega na kena i wali, e dua na kena i vakaraitaki o Imeneo kei Filito.
18 E rau sa lako sese tani mai ena i vakavuvuli dina, era dau tukuna ni tucake tale mai na mate sa oti na kena kaukauwa; ka so vei ira na vakabauta sa rawai kina.
19 Ia na yavu dei ni Kalou sa tudei ga, ka sa vakaoqo: "na Turaga sa kilai ira ga na nona tamata," kei, "ira kece sa lotu va-Karisito mera lako tani mai nai valavala ca."
20 Ia ena dua na vale levu e sega ni tu ga kina na veibilo koula kei na veibilo siliva, ia eso talega era bilo kau e so era bilo qele, e so era cecere eso era lolovira.
21 Kevaka e dua na tamata sa vakasavasavataki koya mai ena veika oqo, ena yaco me bilo talei, ni sa savasava ka yaga vua na Turaga, ka na vakarau yani kina cakacaka vinaka kecega.
22 Mo dro tani mai ena vei gagadre ca vakacauravou; segata na bula dodonu, na vakabauta na loloma, kei na veivinakati kei ira sa masuta na yaca ni Turaga ena yalosavasava.
23 Ia mo qarauna tiko eso na veivosaki vakayalowai edau yaco kina na duidui, mo kila tiko eso era dau nakita me tubu kina na veivala.
24 Nai talatala ni Turaga e sega ni dodonu me dau vakavu veisei, ia me tamata yalo vinaka vei ira taucoko na tamata, me dau vakavuvuli vakavuku ka yalomalua.
25 Me ra vakavulici o ira na dauveisaqasaqa ena yalo e malumalumu, me rawa ni na tara kina na Kalou na nodra loma kaukauwa ka veivutuni sara, ka kila na dina.
26 Sa na qai ra kilai yalodra ka raica ni ra coriti tu ena nona tudai qaseqase na tevoro, ena nodra a vakabobulataki tu vua mera talairawarawa tiko ena nona lewa.


Chapter 3

1 Ia mo kila oqo, ena i vakataotioti ni gauna ena dua na gauna vakarerevaki sara:
2 Ni o ira na tamata era na dau lomani ira ga vakalevu, era na lomana vakalevu na i lavo, era na tukutukuni ira, era na dokadoka, era na dauvosavakacaca, era na talaidredre vei ira nodra i tubutubu, era sega ni dau via vakavinavinaka, era na tamata dukadukali,
3 Esa na yali na veilomani dina, sa na sega na veivosovosoti, ena levu na veikaseti, sa yali na veirokorokovi, tamata esa vaqara tu ga na veivala, era na cata na ka me yaco kina na vinaka,
4 Ena levu na dau buki vere, ena levu na viavia turaga, ena levu na viavialevu, ena levu e taleitaka na vakayago ka vakalailai na vakayalo (Kalou).
5 Era na rairai tu vaka mera tamata lotu dina, ia na kena bula dina sa yali. O ira na tamata vaka oqo mo kua ni vakailala vata kei ira.
6 O ira qo ena tu vei ira na doudou, mera curuma na nodra veivale na yalewa i valavala ca, ka veilasami vata kei ira.
7 O ira oqori era na sega ni guce ena vuli, io ena sega ga ni dua na dina mera na kila rawa.
8 O Jani kei Jabiri e rau a veisaqasaqa kei Mosese, o ira talega oqo era na saqata na dina: ka tamata lomaca, nodra vakabauta ena leqa tu ga;
9 Ena sega ni dua na tubu vakayalo me na laurai vei ira, era na vakadinadinataka na tamata ni ra raica tiko, me vakataki rau sara ga na lewe rua oqori.
10 Ia o iko o sa muria vinaka tiko mai na noqu i vakavuvuli, noqu i valavala ni bula, na noqu i naki, noqu vakabauta, noqu vosota vakadede, noqu loloma, noqu dau gumatua,
11 Na veivakacacani, na veivakararawataki, e a yaco vei au mai Anitioki, mai Ikoniona, mai Lisitira – mo raica ni veika kece oqori, au qai vosota ga. Na ka au via tukuna oqo, na Turaga qai vakabulai au.
12 Io, o ira kece era na via muri Karisito Jisu era na sotava na veivakacacani.
13 Ia o ira na tamata caka ca kei ira na veitokoni kina, era na qai ca ga vakalevu, kei na nodra dauveivakaisini era na qai vakaisini tale kina.
14 Ia o iko mo veituberi tikoga ena ka o sa kila tiko, kei na ka o sa vakadinadinataka tiko, me vaka sara ga na ka o vulica mai vei koya e vakavulici iko kina.
15 Na digidigi vakayalomatua o a vakayacora mo vakabulai kina ena nomu vakabauti Karisito Jisu, e a tekivu sara mai ena nomu se gone voli, ena nomu susugi ka tuberi ena vosa ni Kalou.
16 Sa vakavuna ka ceguva Na Kalou na vei vosa ni Vola Tabu kecega, sa yaga me i vakavuvuli, me vunauca na ca, me ia kina na veivakadodonutaki, me ia kina na veivakarautaki kina bula e dodonu.
17 Me rawa kina vua na tamata ni Kalou, me conaki vakamaqosa ena vuku ni cakacaka vinaka sa kacivi kina.


Chapter 4

1 Au sa vakaroti iko ena mata ni Kalou kei na turaga o Jisu Karisito, o koya ena lewai ira na bula kei na mate, ena nona na rairai mai vakaiukuuku.
2 Mo vunautaka na vosa! Mo vakarau tu, ena gauna ni vinaka se gauna e ca kina na ka kece, tukuna na ka e ca, vunauci ira sa cala, dauveivakaroti tiko ena veivakavulici, ka mo vosota tiko vakadede.
3 Ena yaco na gauna era na sega ni vosota rawa na taucoko ni vakavuvuli dodonu, ia era na murimuri lomadra, ni sa sega ni tiko vei ira na daliga e rogo kei na nodra sa bulia ga eso me nodra qasenivuli.
4 Era na vagolea tani na daligadra mai na ka dina, ka qai rogoca ga na i tukutuku buli.
5 Ia mo yadrava tiko na veika kece oqo, vosota tiko na veivakararawataki, gumatua tikoga ni vunautaka na vosa kei nai tavi o sa lesi kina.
6 Au sa vakarau oti tu, me'u sa liviraki, ka sa voleka mai na siga me'u sa gole yani.
7 Au sa vala oti ena valu vinaka, sa oti na noqu a ciciva tiko mai na cere, au sa taura dei tu ga na vakabauta.
8 Au sa kila tu, ni sa maroroi me noqu na i sala vakaturaga ni valavala dodonu, o koya ena solia vei au na Turaga ni lewa dodonu ena siga o ya, ka sega ni o au duadua ga, vei ira kece talega era nuitaka tiko na nona rairai mai.
9 Mo sasaga vakaukauwa mo lako vakatotolo mai vei au;
10 Ni o Timasa sa biuti au, ni sa rui lomana tale vakalevu na vuravura oqo, ka sa lako sara ki Cesalonaika – Kirisiki ki Kalatia sara, o Taitusi ki Talimetia.
11 O Luke duaduaga sa qai tiko vei au, mo raici Marika ka kauti koya mai vei au, ni na mai vukei au vakalevu ena cakacaka qo.
12 O Tikiko au sa talai koya ki Efeso.
13 Mo kauta mai nai tutuvi au solia tiko vei Karipo mai Tiroa – nanuma na i vola ka vakabibi nai vola kuli ni sipi.
14 E vakararawataki au vakalevu o Alekisada na matai ni varasa. Me na qai sauma ga vua na Turaga me vaka na ka e cakava,
15 Mo qarauni iko tiko mai vua, ni o koya e dua sa bau coqa vakalevu na ka keitou tukuna.
16 Ena noqu matai ni veilewai e sega sara ga ni dua me tokoni au, era a biuti au kece me kakua ni dua na ka mera beitaki kina.
17 Ia sa tu vata kei au na Turaga me vakayaloqaqataki au, me'u rawa ni tukuna tikoga na dina ni tukutuku vinaka, me ra rogoca na kai matanitu tani, sa vakabulai au talega mai na gusu ni laione.
18 Na Turaga sa vakabulai au mai na ligadra na dau naki ca, me vakacurumi au kina nona matanitu vakalomalagi. Me nona tikoga na vakarokoroko me sega ni mudu. Emeni!
19 Au sa loloma yani vakalevu vei Varasiko kei Akuila, vaka talega kina na matavuvale nei Onisivoro.
20 O Erasito sa tiko e Korinica, ia o Tirofimo au sa biuti koya tiko mai Milito ena vuku ni tauvimate.
21 Mo sasaga ena nomu i gu taucoko mo lako mai ni se bera tiko na draki batabata. Sa loloma tiko yani o Apolosi, vaka talega kina o Putena, o Lino, kei Kelotia, vata kei ira kece na veiwekani.
22 Me sa tikoga ena yalomudou na Turaga o Jisu Karisito. Me nomudou na loloma. Emeni.