Iperiu

1 2 3 4 5 6 7 8 9 10 11 12 13


Chapter 1

1 Na Kalou, ena veitaba gauna kei na kena i valavala e duidui, sa vosa kina vei ira na qase mai vei ira na parofita,
2 Sa vosa talega vei keda ena gauna e muri oqo mai Vua na Luvena, o Koya sa lesia o Koya mei taukei dodonu ni veika kecega, o Koya talega na Luvena oqo sa caka kina o vuravura;
3 O Koya na rarama serau ni Nona i ukuuku, kei na kena veiucui dina kei na Kalou kei na kena maroroi kei na kena laveti cake tiko na ka kece, ena kaukauwa ni Nona vosa, o Koya ga vakai Koya sa kauta tani na noda i valavala ca, ka sa qai dabe tiko oqo ena yasana i matau i Koya sa cecere sara.
4 Sa qai yaco me uasivi sara mai vei ira na agilosi, ni sai Koya me vaka na vanua sa vu mai kina, sa rawata na yaca sa uasivita na yaca kecega.
5 O cei vei ira na agilosi sa cavuta kina o Koya: (Kalou) "O iko na Luvequ, ena siga oqo Au sa vakatabui iko"? Sa tukuna tale: "Oi Au na tamana ki vua, ka na Luvequ o Koya ki vei Au?"
6 Ni sa kauti Koya mai na ulumatua o Koya ki vuravura ka sa tukuna kina: Oi kemuni kece na agilosi mo ni lotu vei Koya.
7 Ki vei ira na agilosi sa tukuna kina o Koya: O cei sa cakava me ra yalo o ira na agilosi kei ira na Nona dauveiqaravi me yameyame ni bukawaqa?
8 Ia, ki vua na Luvena sa tukuna kina o Koya: "Na Nomuni tikotiko na Kalou sa sega ni mudu;" "nai tutu ni dodonu sai tutu ni Nomuni matanitu."
9 "O ni sa lomana na dodonu ka cata na vakaveitalia; o koya oqo na Kalou, na Nomuni Kalou sa lumuti Kemuni ena waiwai ni mamarau me siviti ira na Nomuni tokani."
10 "Oi Kemuni na Kalou, mai nai vakatekivu, o ni sa vakayavutaki vuravura, o lomalagi sa cakacaka ni ligamuni;
11 Era na rusa kece, ia oi Kemuni ena tudei tu ga; era na madra mai me vaka nai sulu;
12 Me vaka nai sulu e tuba, era na lobi ka veisau mai, ia oi Kemuni sai koya koya tikoga kei na Nomuni veiyabaki ena sega ni mudu."
13 O cei vei ira na agilosi e sa bau tukuna kina o Koya: "mai dabe ena Ligaqu i matau me yacova ni sa vakayacori ira na Kemuni meca mei tutu ni Yavamuni?"
14 Era sa sega li ni yalo e dauveiqaravi, era sa talai me qaravi ira sai taukei ni bula sa mai vua na Kalou?


Chapter 2

1 O koya oqo, meda qai gu ka soli keda vakalevu sara, ki na veika eda sa rogoca, de da qai lako tani mai kina.
2 Kevaka sa tudei na veika era sa dau tukuna na agilosi, kei na caka cala kece kei na talaidredre kece sa saumi vakadodonu,
3 Eda na qai dro vakaevei, Kevaka eda sa na vakaweleweletaka na veivakabulai levu oqo, o koya sa vakatekivuna me vosa kina na Kalou ka sa vakadeitaka vei keda o ira sa rogoci Koya,
4 Na Kalou talega sa vakadinadinataka ena i vakatakilakila kei na veika lelevu kei nai solisoli ni Yalo Tabu, me vaka ga sa vinakata o Koya?
5 O Koya sa sega ni biuta rawa mai na vuravura ena lako tiko mai, o koya e da sa tukuna tiko, me vakarurugi vei ira na agilosi.
6 E dua ga sa vakatusa ena dua na vanua ka vaka: "na cava na tamata, Mo Ni dau nanumi koya kina, se na luveni tamata Mo Ni dau kawaitaki koya kina?
7 O ni sa buli koya me lailai sobu mai vei ira na agilosi o ni sa vakaisalataki koya ena i ukuuku kei na vakarokoroko, ka vakarautaka vua na cakacaka ni Ligamuni.
8 O ni sa biuta na ka kecega ena ruku ni yavana." Ena ka kece o ya, na Kalou sa laiva me vakarorogo vua na ka kecega, sa sega na ka e vo me sega ni vakarorogo vua. Ia, oqo eda se sega ni raica kece na veika e dodonu me vakarorogo vua.
9 Eda sa raici Jisu ga, o koya sa caka me lailai sobu ga mai vei ira na agilosi, na rarawa ni mate sa vakaisalataki ena i ukuuku kei na vakarokoroko, me rawa kina Vua ena loloma ni Kalou me tovolea kina na mate ena vukudra kece na tamata.
10 Sa tokari donu Vua ni sai Koya na ka kecega, ni sa mai vei Koya na ka kecega, sa kauti ira mai e levu na luvena ki na vanua vakaiukuuku, me yaco kina me vu ni vakabulai e vakataucokotaki ena vakararawataki.
11 Ni o ira sa vakabulai ira o Koya kei koya sa veivakabulai, sa dua ga ena vuku ni ka oqo, sa sega kina ni madua o Koya me kacivi ira me ra tacina,
12 Ka vaka: "Au na vakaraitaka na Yacamuni ki vei ira na taciqu; ena kedra maliwa nai soqosoqo levu Au na sere vei Kemuni."
13 "Au na solia na Noqu vakararavi vua." "Sai Au oqo kei ira na gone sa solia mai vei Au na Kalou."
14 Ena veigauna ni ra sa vakaitavi na gone ena lewe kei na dra, sa vakaitavi talega kina o Koya, ena mate, sa vakarusai kina o koya sa tu vua na kaukauwa ni mate, o ya na tevoro,
15 Ka sereki ira kina o ira sa vesuki tu ena kaukauwa ni rerevaka na mate ena nodra bula taucoko.
16 Sa dina, sa sega ni solia na veivuke vei ira na agilosi, sa dausolia ga na veivuke ki vei ira na luvei Eparama.
17 O koya oqo, ena ka kecega, sa yaco o Koya me vakataki ira na tacina, na yalololoma na yalodina, na bete levu ena veika kecega ni Kalou, me cakava na veisorovaki ena vuku ni nodra i valavala ca na tamata.
18 Ni sai Koya vakataki Koya sa vakararawataki ni sa vakatovolei. Sa yaco kina o Koya me vukei ira sa vakatovolei.


Chapter 3

1 O koya oqo oi kemuni na veiwekani dina, kei kemuni sai taukei ni veikacivi vakalomalagi, mo ni raica mada na Apositolo, na Bete levu ni noda vakatutusa, o Jisu Karisito,
2 Sa rui dina o Koya vei Koya sa kacivi Koya, me vaka sa dina o Mosese ena Nona vuvale taucoko.
3 O Koya oqo, sa wiliki Vua me kilikili, me uasivi na Nona i ukuuku, mai vei Mosese, ni sai Koya sa tara na vale sa uasivi mai na vale.
4 Na veivale kece sa tara e dua na tamata, ia, na Kalou sa tara na veika kecega.
5 O Mosese sa dina ena nona vakabauti, ena Nona vuvale taucoko na Kalou, me vaka e dua na dauveiqaravi, mei vakadinadina ena veika ena qai dau tukuni e muri.
6 O Karisito, na Gone e dua ga ena Nona lomanivale, sai keda na vale o ya, kevaka, eda sa taura matua na kena vakadeitaki kei na kena rekitaki nai nuinui dei ki nai vakataotioti.
7 Me vaka sa tukuna na Yalo Tabu: Ena siga oqo, kevaka o sa rogoca na domona,
8 Kua ni vakaukauwataka na yalomudou, me vakataki ira na dauvukitani, ena gauna ni veivakatovolei ena vanua liwa,
9 Na vanua era sa vakatovolea kina na Kalou o ira na tamamuni, ka ra sa vakadinadinataka na cakacaka ni Kalou ena vasagavulu na yabaki.
10 O koya oqo, Au a cudruvi ira kina nai taba tamata o ya ka tukuna kina, "O ira oqo, sa dau lako sese na yalodra, ka ra sa sega ni kila na Noqu sala."
11 Au sa bubului kina ena Noqu cudru, "Era na sega ni curu ki na Noqu i vakavakacegu."
12 Mo ni qarauni kemuni vinaka, de dua vei kemuni sa tiko vua na yaloca, na sega vakabauta, me lako tani mai kina vua na Kalou bula;
13 Mo ni dui veivakatakatai kemuni vakai kemuni ena veisiga, me vaka na ka sa tukuni, "Ena siga oqo, de dua veikemuni sa vakaukauwataka na yalona ena veivakaisini ni valavala ca."
14 Ni keimami sai taukei vata kei Karisito, kevaka Keimami sa taura matua nai vakatekivu ni bula vakadeitaki me yacova nai otioti,
15 Ni a sa tukuni: ena siga oqo kevaka o ni sa via rogoca na domona, "mo ni kua ni vakaukauwataka na yalomuni me vakataki ira na dauvukitani."
16 O cei sa rogoca, qai vuki tani? Sa sega beka ni o ira kece sa lako mai Ijipita, ni ra liutaki mai vei Mosese?
17 Sa cudruvi cei beka o Koya me vasagavulu na yabaki? Sa sega beka vei ira sai valavala ca? na yagodra mate sa tu mai na vanua liwa?
18 Ki vei cei sa yalayala kina o Koya ni ra na sega ni curu ki na nona i vakavakacegu, o ira beka sa sega ni rogoca ka talairawarawa ki na nona vosa?
19 Keimami sa kila ni ra na sega ni curu ena vuku ni sega vakabauta.


Chapter 4

1 O koya oqo, ni sa soli tu na vosa ni yalayala me da curu ki na Nona i vakavakacegu, me da qai rere, de qai dua e sega ni yaco dina kina.
2 Ni sa vunautaki ki vei keda na kosipeli, sa vaka talega kina ki vei ira; ia na vosa era rogoca sa sega ni yaga vei ira, ni ra sa sega ni rogoca na vakabauta.
3 Vei keimami sa vakabauta, sa curu ki nai vakavakacegu oqo, me vaka na ka sa tukuni: "Au sa bubului ena Noqu cudru katakata, era na sega ni curu ki na Noqu i vakavakacegu," e dina ga ni sa vakaoti na cakacaka mai na kena yavutaki o vuravura.
4 Ni a sa cavuta o Koya ena dua na vanua ena i kavitu ni siga, me vaka oqo: "Sa vakacegu na Kalou ena i kavitu ni siga mai na Nona cakacaka kecega,"
5 Vakarua tale ena vanua oqo: "era na sega ni curu ki na Noqui vakavakacegu."
6 Ia, oqo sa vo tiko e so me curu, ia, ki vei ira sa vunautaki e liu vei ira nai tukutuku oqo, era na sega ni curu baleta na nodra talaidredre,
7 Sa qai lewa tale o Koya e dua tale na siga, sa tukuna kina vei Tevita,"Ena siga oqo" ni sa oti e dua na gauna balavu, me vaka sa tukuni kina: "Ena siga oqo, kevaka dou sa via rogoca na Domoqu, dou kua ni vakaukauwataka na yalomudou me vaka taki ira na dauvuki tani.
8 Kevaka sa solia vei ira o Josua na vakacegu, ena sega ni tukuna tale o Koya e dua tale na kena siga.
9 Sa qai vo tiko oqo e dua nai vakavakacegu me nodra na tamata ni Kalou.
10 Ni o koya sa curu ki na Nona i vakavakacegu sa cegu talega mai na nona cakacaka me vaka sa cegu na Kalou mai na Nona cakacaka.
11 O Koya oqo me da qai doudou sara me curu ki na nona i vakavakacegu, de qai dua e bale ni sa talaidredre vakakina.
12 Sa bula tiko na Vosa ni Kalou, sa kaukauwa, sa gata cake mai nai selebati-rua, me suaka na i lati ni lomada kei na yaloda, nai lati ni sui kei na uto ni sui, ka sa vakalewa vinaka sara na vakanananu kei na i naki ni lomada.
13 Sa sega na ka e vunitaki rawa mai Matana, sa luvaiwale na veika kecega ka tadola tu e Matana, o Koya e da na soli tukutuku vua
14 Ni sa dua na noda Bete levu sara, o Koya sa lako siviti lomalagi, o Jisu na Luve ni Kalou, o Koya oqo me da taura matua kina na noda vakatutusa.
15 Ni sa sega ni dua na noda Bete Levu sa sega ni rawa ni lomana na noda malumalu, ena veigauna kecega sa temaki me vakataki keda, ia sa sega ga ni valavala ca.
16 Me da toro doudou mai kina i tikotiko ni loloma, me da taura kina na loloma ka kunea na veivuke ena gauna eda vinakata kina.


Chapter 5

1 O ira kece na bete levu sa tauri mai vei ira na tamata, sa lesi vei ira na tamata na ka ni Kalou, me dau vakacabora kina nai solisoli kei na i soro ni valavala ca.
2 Sa rawa ni yalololoma vei ira sa lecaika se dau lako sese, ni o Koya talega sa dau tarai koya na malumalumu.
3 Ena vuku ni ka oqo, sa gadrevi kina vua, me vaka vei ira na tamata, vei Koya talega, me vakacabori ena vuku ni valavala ca.
4 Me kua kina ni dua na tamata me taura na kena qoroi se dokai me Nona ga, o koya ga sa kacivi koya na Kalou, me vakataki Eroni.
5 O Karisito talega sa sega ni vakacerecerei Koya me yaco kina me Bete Levu, ia, o Koya ga sa tukuni Koya: "O iko na Luvequ, ena siga oqo Au sa vakatuburi iko."
6 Me vaka sa dau tukuna talega o Koya: "O iko sa Bete ka sega ni mudu me vaka nai tuvatuva mai vei Melikesateki,"
7 O ya ena gauna ni Nona tiko vakayago, ni sa dau vakacabora na Nona masu kei na vakamamasu ena tagi sa sega ni dula rawa kei na drodro ni wainimatana vei Koya, sa rawa vua me vakabulai Koya mai na mate, sa rogoci ga me vaka na rere vakalou sa tiko vua.
8 E dina ga ni sa Luvena o Koya, ia, sa vulica ga na talairawarawa mai na veika sa vakararawataki kina.
9 Sa vakataucokotaki, sa yaco kina me vu ni vakabulai e sega ni mudu ki vei ira kece sa talairawarawa Vua,
10 Sa kacivi Koya na Kalou me Bete Levu me vaka nai tuvatuva i Melikesateki,
11 Vei Koya, sa levu kina na ka me keimami tukuna, ia sa dredre me vakamacalataki, ni sa bibi na daligamuni me rogoca.
12 E dina ga, ni gauna oqo e dodonu mo ni sa dauveivakavulici kece, oqo, sa dodonu mo ni vakavulici tale e nai vakatekivu ni vakavuvuli ni Kalou; e gadrevi vei kemuni na sucu ka sega na kakana dina.
13 O ira kecega sa gunuva tiko na sucu, era se sega ni matua ena vosa kei nai vakavuvuli ni yalododonu, ni se gone lailai dina o koya.
14 Na kakana dina sa kedra ga na tamata sa matua, oqori o ira sa dau vakayagataka na nodra mona me cakacakataki ena nodra kila deivaki na veika vinaka kei na veika ca.


Chapter 6

1 Me da biuta nai vakatekivu ni vakavuvuli ni bula va Karisito, me da toso ka tubu cake me matua ka taucoko sara, me da kakua ni tiko ga ena yavu ni veivutuni ena cakacaka sa yaco kina na mate kei na vakabauta na Kalou,
2 Nai vakavuvuli ni papitaiso, na veitabaki ena liga, na tucake tale mai na mate kei na veilewai levu.
3 Oqo, ena vakayacori ga kevaka sa vakatara na Kalou.
4 Sa na sega sara ni rawa vei ira sa vakararamataki oti, o ira sa tovolea oti nai solisoli vakalomalagi, o ira sa vakaitavi vata kei na Yalo Tabu.
5 O ira sa tovolea oti na vosa vinaka ni Kalou, kei na kaukauwa ni veiyabaki sa roro tiko mai,
6 Ka ra sa qai lutu tani; mera vakavoui tale ena veivutuni, ni ra sa vakota tiko vakataki ira na Luve ni Kalou ka vakamaduataki Koya ena matana votu.
7 Na qele sa gunuva tiko na uca sa lako wasoma tiko kina, sa qai dau vakatubura na kau kakana sa yaga vei ira sa vakarautaki vei ira, era sa vakalouvinakataki mai vua na Kalou;
8 Kevaka sa vakatubura mai na votona kei na veika ca, ena cati ka rulaki ka sa tuga me kama.
9 Kemuni sa lomani, keimami sa nuidei ena vuku ni veika vinaka me baleti kemuni, ia na veika e lakovata na vakabulai e dina ga ni keimami vosa tiko vakaoqo.
10 Ni sa sega ni dau lasu na Kalou me guilecava na nomuni cakacaka, kei na nomuni dauoca ena loloma o ni sa dauvakaraitaka ki na Yacana, o ni sa dauveiqaravi yani vakakina ki vei ira na tamata ni Kalou, ka o ni sa daucakava tiko ga.
11 Keitou sa gadreva vei kemuni yadudua mo ni vakaraitaka tikoga na gugumatua ki na taucoko ni vakanuinui me yacova nai vakataotioti,
12 Mo ni kua ni malumalumu kina, ia mo ni vakamurimuri ira ga o ira sa nodra na veika sa yalataki ena vakabauta kei na dauvosota.
13 Ni sa cakava na Kalou na Nona yalayala vei Eparaama, baleta ni sa sega ni bubului vua e dua tale e levu cake mai vua, sa bubului ga vei Koya,
14 Sa tukuna kina, "Au na vakalouvinakataki iko ena kalouvinaka ka vakalewevuqataki iko ena lewe vuqa."
15 Ni sa vosota tiko vakalevu sara, sa qai rawata na vosa ni yalayala.
16 Na tamata sa bubului vei Koya sa levu cake vua, na bubului sai vakadei ni sa mai cava na veika era duidui kina.
17 Na Kalou sa nakita me vakaraitaka vakalevu sara ki vei ira na luve ni yalayala na dina ni Nona vosa ni sa vakadeitaka ena dua na bubului,
18 Ni rua na veika ena sega ni cala rawa, na Kalou e sega ni daulasu rawa, me dua kina na vanua kaukauwa me ravi kina, o ira sa dro ki nai vakaruru, me ra taura matua nai nuinui sa tu e matadra.
19 Nai nuinui oqo sa noda i kelekele, sa dina ka tudei, sa curu yani kina Nona i serau ena i lati e loma. Kelea kina na yalomu,
20 Sa curu oti kina o Jisu ena vukuda, sa liu oti vei keda, sa yaco kina me Bete Levu ka Sega ni mudu, me vaka nai tuvatuva nei Melikesateki.


Chapter 7

1 O Melikesateki oqo, na tui Salemi, na bete i Koya na Kalou Cecere Sara, sa sotavi Eparaama ni sa lesu tiko mai ena nona valuti ira na tui, ka sa qai vakalouvinakataki Eparaama.
2 O Eparama talega sa solia vei Melikesateki nai katini ni ka kecega, ni sai balebale ni yacana na "Tui ni yalododonu," ka sa tui Salemi talega, se "Tui ni veivakacegui!"
3 Sa sega na tamana se tinana, sa sega talega na Nona kawa, sa sega ni tekivu na Nona bula sa sega talega ni cava na Nona bula, sa bula ga me vakataki Jisu na Luve ni Kalou ka sa tiko ga me bete ka sega ni mudu.
4 Mo ni raica mada na cecere ni tamata oqo, ni sa solia vua o Eparama nai takini ni veika kecega.
5 Sa dina sara, vei ira na luvei Livai, ni sa nodra na cakacaka vakabete, sa nodra talega nai vakaro me ra taura nai katini mai vei ira na tamata me vaka nai vunau, oqori mai vei ira na tacina, e dina ni ra lako kece mai na toloi Eparama;
6 Ia, o koya na nona kawa sa sega ni lako mai vei ira sa taura nai katini mai vei Eparama, me vakalouvinakataki o ya sa nona na vosa ni yalayala oqo.
7 Na veika oqo sa sega ni rawa ni veibataki, se vakatitiqataki, ni o koya sa lailai me vakalouvinakataki mai vei koya sa levu.
8 Eke na tamata vakalewe sa taura nai katini, mai kea sa taura o koya, o koya sa vakadinadinataki ni sa bula.
9 O Livai sa taura na i katini, sa sauma nai katini me vakayagataki kina o Eparaama me vaka sa tukuni,
10 Ni se tiko ga o koya ena toloi tamana ena gauna rau sa sota kina kei Melikesateki.
11 O koya oqo, kevaka sa yaco na bula vakataucokotaki ena vukudra na Livai ena cakacaka vakabete (mai vei ira, sa taura kina na tamata nai vunau), na veika sa gadrevi eke, o ya me dua na bete me vaka nai tuvatuva mai vei Melikesateki ka sega ni kacivi me vaka nai tuvatuva mai vei Eroni.
12 Sa veisau na cakacaka vakabete, ni sa yaga oqo, sa veisau talega nai vunau.
13 O koya sa tukuni tiko kina na veika oqo sa basika tale mai ena dua tale na yavusa, sa sega ni dua na tamata mai kea sa soli kina vua na cakacaka vaka bete me qarava nai cabocabo ni soro.
14 Sa i vakadinadina ni sa basika na Turaga, mai vei Juta, na yavusa sa sega ni tukuna kina o Mosese e dua na ka me baleta na cakacaka vakabete.
15 Oqo sa valadeitaka sara, me vakataki Melikesateki sa tubu cake mai kina e dua tale na bete,
16 Sa lako mai, sa sega ni vaka nai vunau ena i vakaro vakayago, sa vaka ga na kaukauwa ni dua na bula e sega ni cava rawa.
17 Sa tukuna kina o koya: "O iko na bete Sega ni mudu, me vaka nai tuvatuva nei Melikesateki."
18 Ena dua na yasana, sa yali kina nai vakaro makawa, baleta ni sa malumalumu ka sega ni tudei na kena tiko,
19 Ni vunau sa sega ni cakava rawa e dua na ka me taucoko; ena dua tale na yasana na kena kau mai nai nuinui e vinaka cake, o koya oqo e da sa toso voleka kina vua na Kalou.
20 Sa vakalevu sara ni sa sega ni bete o koya, kevaka sa sega ni vakatikori,
21 O ira kece sa bete oti era sa sega ni vakatikori, ia o koya sa vakatikori, ia o koya sa vakatikori mai vei Koya sa tukuna yani vei Koya: "Sa bubului o Jiova, ka ena sega ni vakasuka, o iko na bete me sega ni mudu me vaka nai tuvatuva nei Melikesateki."
22 Sa qai vakalevu sara, ni sai Jisu ga nai vakadei ni dua na veiyalayalati e vinaka cake.
23 Era a lewe levu na bete, baleta ni sa tarova na nodra cakacaka tikoga vakabete na mate.
24 Ia, o koya, baleta ni sa cakacaka vakabete tikoga ka sega ni mudu, sa sega ni veisau kina na Nona i tutu.
25 O koya oqo sa rawa kina Vua me vakabulai ira kecega sa lako mai vua na Kalou mai vei Koya, baleta ni sa bula tiko o koya ka sega ni mudu me cakava tiko kina na cakacaka ni veisorovaki.
26 Sa vinaka sara vei keda na Bete Levu oqo, ni sa ka tabu, sa sega ni dau veivakamavoataki, sa sega ni cala, sa wasei tani mai vei ira nai valavala ca, sa yaco me cecere cake mai na lomalagi;
27 Sa sega na ka e vinakata e veisiga, me vakataki ira na vei bete lelevu, me vakacabora nai soro ni nona i valavala ca mada e liu, qai muri me nodra na tamata, oqo sa cakava kece vakadua ga o koya ni sa vakacabori Koya ga vakai Koya.
28 Nai vunau sa digitaki ira na bete levu, na tamata sa malumalumu, ia na vosa ni veivakatikori sa lako mai nai vunau,sa digitaki na Luvena, o Koya sa taucoko sara me Sega ni mudu.


Chapter 8

1 Oqo na usutu ni veika keitou sa tukuna tiko. Sa dua na noda Bete Levu, o koya sa dabe tiko ena liga i matau i Koya sa Cecere Sara ena yasana vakalomalagi, ena Nona i tikotiko vakaturaga,
2 Na Dauveiqaravi ena i tikotiko tabu ni vale ni soro dina, sa tara na Kalou ka sega ni tamata.
3 O ira na bete levu kece era sa digitaki me ra vakacabora na ka ni loloma kei nai soro talega. Sa dodonu kina me vakacabora o Koya oqo e dua na ka.
4 Kevaka sa tiko e vuravura o Koya, sa sega ni bete o Koya, ni ra sa tiko na bete mera vakacabora nai soro me vaka nai vunau;
5 O koya sa qarava nai yaloyalo ni veika vakalomalagi, me vaka sa vakasalataki kina vakalou o Mosese ni sa vakarau tara na vale vakacevaceva. Ni sa tukuna, "Mo raica me caka na veika kecega me vaka na i tuvatuva sa vakaraitaki vei iko mai na ulunivanua."
6 Oqo, sa rawata o Koya e dua na veiqaravi vinaka sara, ni sai Koya talega e lewa na veiqaravi ni veiyalayalati e vinaka cake, o koya sa vakatekivutaki ena yalayala e vinaka cake.
7 Kevaka sa sega ni cala nai matai ni veiyalayalati, ena sega ni yaga na kenai ka rua.
8 Ni sa kune tiko na cala vei ira, sa tukuna kina o Koya,"Sa lako tiko mai na siga sa tukuna na Turaga, Ni'u na cakava kina e dua na ka vou vei ira na Isireli, na Juta talega,
9 Sa sega ni vaka na veiyalayalati Au a caka vata kei ira na nodra qase, ena Noqu a taura mai na ligadra ka kauti ira tani mai na vanua oijipita; baleta ni ra sa sega tiko ni muria na Noqu veiyalayalati. Au sa besetaki ira kina, sa tukuna o Jiova.
10 Oqo na veiyalayalati Au na cakava vei ira na vale ni Isireli, ni sa oti na veisiga oqo, sa tukuna o Jiova. Au na biuta na Noqu i vunau ki na nodra mona ka vola ki yalodra; ena yaco Me'u nodra Kalou ka mera Noqu tamata.
11 Ena sega e dua me vakavulica na wekana se na tacina me tukuna vaka oqo, "mo kila na Kalou,"ni ra na kilai Au kecega, o koya sa lailai sara kei koya sa cecere sara.
12 "Au na yalololoma ki na nodra tawadodonu kei na nodra i valavala ca kei na nodra caka ca kecega, Au na sega ni via nanuma tale."
13 Ena veika oqo, sa tukuna kina o Koya, "Ena veiyalayalati vou" sa cakava kina o Koya na i matai ni veiyalayalati, me sa mai cava. Oqo, na veika sa mai cava ka sa qase mai sa vakarau me yali yani vakadua.


Chapter 9

1 Sa tiko nai matai ni veiyalayalati kei nai lesilesi ni veiqaravi vakayalo kei na valenisoro.
2 Sa vakarautaki e dua na vale vakacevaceva nai matai ni yasana, sa tiko kina na i tutu ni cina, na teveli kei na madrai vakarautaki, sai koya oqo na tikina tabu;
3 Nai karua ni yasana, ena daku ni i lati sa yacana oqo, na "Tikina Tabu sara,"
4 Sa tiko eke nai cabocabo ni ka boi vinaka, na kato ni veiyalayalati e tiko kina na mana, na i titoko nei Eroni sa tubu mai, kei na vatu ni veiyalayalati;
5 Sa toka e delana na Jarupi vakaiukuuku sa vakaruruga yani nai dabedabe ni loloma ni Kalou. Na veika oqo keitou sa sega ni rawa ni vosa kina vakamatailalai sara.
6 Ni sa vakarautaki na veika oqo, na bete sa dau lako ki na i matai ni wasewase me vakayacora na veiqaravi.
7 Ena i karua ni wasewase, sa dau lako duadua ga kina na Bete Levu vakayadua ena veiyabaki, kei na dra, sa vakacabora o koya ena vukuna kei ira talega na tamata ena vuku ni nodra i valavala ca, era sa vakayacora ena lecai ka;
8 Sa tukuna na Yalo Tabu ena ka oqo, ni sa gaunisala ki na Tikina Tabu Sara, e se bera ni vakaraitaki mai, kevaka e se tiko ga na vale vakacevaceva.
9 Sa qai i yaloyalo ena gauna oqo, ena vuku ni solisoli loloma kei nai soro sa vakacabori sa sega ni rawa me vakataucokotaki koya sa vakacabora kevaka e raica na nona lewa e loma.
10 Ni oqo sa ka ga ni kakana, sa ka ga ni gunu, na veivakasavasavataki ena rai ga e vakayago, sa soli kina na kena i lesilesi me yacova na gauna ni veivakavoui.
11 Na Karisito sa lako mai me vaka e dua na Bete Levu ni veika vivinaka ena lako tiko mai, kei na vale vakacevaceva e levu ka cecere cake sa sega ni tara ena liga, oqori sa sega ni ka ni vuravura oqo.
12 Sa sega ni dra ni me se dra ni luve ni bulumakau, ia, ena Nona dra ga sa curu kina ki na Tikina Tabu Sara, sa vakadua ena vukuda kecega ni sa rawata na veivakabulai e sega ni mudu.
13 Kevaka sa veivakasavasavataki me savasava kina na yago, na dra ni bulumakau, na dra ni me kei na dravusa ni bulumakau tagane oqori na kaburaki ni veika dukadukali,
14 Sa qai vakacava sara na kena kaburaki na dra i Jisu Karisito, o Koya ena vuku ni yalo e sega ni mudu, sa soli Koya kina vua na Kalou ni sa sega na tikina e ca, dou vakasavasavataka na nomudou lewa e loma mai na cakacaka sa mate ka qarava na Kalou bula?
15 Ena vuku ni ka oqo, sa yaco kina me i Taukei ni veiyalayalati vou, ena vuku ni Nona mate me ra vakabulai kina na caka cala mai na i matai ni veiyalayalati, me yaco kina o ira sa kacivi, me rawata na yalayala ni vakaivotavotataki ena vei ka e sega ni mudu.
16 Na vanua sa tiko kina na veiyalayalati, sa tiko talega kina na nona mate o koya sa yalayala.
17 Sa qai dina na veiyalayalati ni sa mate na tamata, ni sa sega na kena kaukauwa kevaka era sa bula tikoga na yalayala.
18 O koya oqo sa sega ni vakadeitaki nai matai ni veiyalayalati kevaka e sega na dra.
19 Ni o Mosese sa vakadewataka nai lesilesi kece vei ira na tamata me vaka nai vunau, sa taura kina na dra ni luve ni bulumakau kei na me, kei na wai, na vuti ni sipi lokaloka kei na Isopi, ka kaburaka ki nai vola ki vei ira talega na tamata.
20 Sa tukuna kina oqo na dra ni veiyalayalati, o koya sa vakarota vei kemuni na Kalou."
21 Sa vaka kina ni sa kaburaka na dra ena vale kei na kena yaya ni cakacaka kecega.
22 Me vaka nai vunau, sa voleka ni ka kecega sa boroi ena dra, ni sa sega ni vosoti nai valavala ca kevaka sa sega ni vakadavei yani na dra.
23 Ni sa yaga nai yaloyalo ni veika vakalomalagi me vakasavasavataka oqo, ia na veika ga vakalomalagi vakataki koya kei nai soro e vinaka cake mai na kena oqo.
24 Ni sai Karisito sa sega ni curu ki na tikina tabu sara sa caka ena liga, o koya sa i vakatakarakara ga ni ka dina, ia, ki lomalagi sara ga, na gauna oqo me vakaraitaki o ya vua na Kalou ena vukuda;
25 E sega ena Nona soli Koya tikoga me vaka na bete levu sa dau curu ki na Tikina Tabu Sara ena veiyabaki ena nona dra tale e dua –
26 Me oca ka rarawa kina vakavuqa me vaka mai nai vakatekivu kei vuravura,ia, oqo, ena i cavacava ni gauna sa basika o Koya me kauta tani nai valavala ca, ni sa vakacabori Koya mei soro.
27 Ni sa lesi na tamata me mate, ni sa oti oqo na veilewai,
28 O Karisito sa soli me colata nai valavala ca ni lewe vuqa. Ki vei ira na gumatua ka nanamaki tiko ga Vua, ena basika mai vei ira ena i karua, ni gauna, sega ena vuku ni valavala ca, me vakabulai ira ga.


Chapter 10

1 Sa tiko ena i vunau nai yaloyalo ni veika vivinaka ena lako tiko mai, sa sega ni o koya dina na ka o ya, sa sega ni rawa ena i soro vata tiko ga, o koya sa dau vakacabori tikoga ena veiyabaki me vakataucokotaki ira sa vakacabora.
2 Me sa dau vakacabori tikoga nai soro? O ira sa vakasavasavataki sa sega ni dodonu me ra nanuma tiko ga nai valavala ca.
3 O ira sa vakacabora nai soro, sa tiko ga na vakananumi ni valavala ca ena veiyabaki.
4 Ni sa sega sara ni rawata na dra ni bulumakau kei na dra ni me, me kauta tani nai valavala ca.
5 Ni sa lako mai o Koya ki vuravura, sa tukuna o Koya: "nai soro kei nai madrali o ni sa sega ni vinakata, e dua na yago o ni sa vakaraitaka vei Au.
6 Nai soro kama kei nai madrali ni valavala ca o ni sa sega ni marauataka."
7 Au sa qai tukuna, "Raica Au sa lako mai, nai vola kece oqo sa volai me baleti Au, me'u cakava na ka o ni sa lewa na Kalou."
8 Sa tukuni e liu, "Nai soro kei na madrali na i soro kama kei nai madrali ni valavala ca o ni sa sega ni gadreva ka sega ni marautaka," ni ra sa vakacabori me vaka nai vunau,
9 Sa qai tukuna o Koya, "Raica, Au sa lako mai me'u vakayacora na Lomamuni na Kalou." Sa kauta laivi o Koya nai matai ka vakadeitaka nai karua.
10 Ena lewa o ya e da sa vakasavasavataki ena kena vakacabori vakadua na yagoi Jisu Karisito.
11 Na bete kece, sa tucake tiko ena veisiga me vakacabora tiko nai soro, sa sega ni rawa ni kauta tani nai valavala ca.
12 Ia, o Koya oqo, ni sa vakacabora oti e dua nai soro ni valavala ca me vakaotia vakadua, sa qai dabe na liga i matau ni Kalou.
13 Mai na gauna o ya, e se wawa tikoga, me yacova ni sai butubutu ni Yavana o ira na meca.
14 Ni sa dua ga nai soro, sa vakataucokotaki ira kina me sega ni mudu o ira kece sa vakasavasavataki tiko.
15 Sa vakadinadina talega kina vei keda na Yalo Tabu, ni sa dau tukuna,
16 Oqo na veiyalayalati Au na vakayacora vei ira ni sa oti na veisiga oqo, sa tukuna na Turaga: Au na vakatikora na Noqu Vunau kina yalodra, Au na vola ki na nodra mona,"
17 Sa vakuria tale o Koya,"na nodra i valavala ca kei na nodra caka cala kecega, Au na sega ni nanuma tale:
18 O koya oqo, ena vanua sa tiko kina nai sosomi ni veika oqo, sa sega ni gadrevi nai soro ni valavala ca.
19 O koya oqo na veiwekani, me da doudou ni curu kina Tikina Tabu sara ena vuku ni dra i Jisu,
20 Ena sala, sa vou ka bula, sa vakatara vei keda o Koya, ena i lati. Oqori na yagona,
21 Sa dua talega kina na kena Bete Levu ena Vale ni Kalou,
22 Me da qai toro voleka yani ena yalodina, ena veivakadeitaki ni vakabauta, ni sa kaburaki tani mai na yaloda na veika ca kei na yagoda sa savati ena wai savasava sara.
23 Me da taura matua sara na vakatusa ni veika eda sa nuitaka ka me kua talega ni yavala, baleta, ni o Koya sa yalataka sa dau dina tikotikoga.
24 Me da dau veinanumi vakaikeda ka vakatubura na nodra veilomani kei na cakacaka vinaka,
25 Me da kakua ni biuta na vakasoqoni vata, me vaka na nodra i valavala e so, me da veivakatataki cake ga, ka vakalevu ni da sa raica, ni sa toro voleka tiko mai na siga.
26 Kevaka eda sa i valavala ca tale ni da sa kila oti nai vakavuvuli ni ka dina, sa qai sega tale nai soro ni valavala ca oqori.
27 Sa qai vo ga, na noda waraka ena rere levu, na veilewai kei cudru waqawaqa sa dau kani ira na talaidredre.
28 O koya sa cata nai vunau i Mosese, sa vakamatei ka sega tale ni lomani, ena i vakadinadina e rua se tolu.
29 Ena qai vakacava sara na ca ni totogi ena soli vei ira sa butuka sobu na Luve ni Kalou ena yavadra, ka vakatawayagataka na dra ni veiyalayalati sa vakasavasavataki ira oti ka beca ena matana votu na Yalo ni loloma?
30 Ni, Oi keda, eda sa kilai Koya sa dau tukuna tiko," sa noqu na veisausaumi vakadodonu, Au na sauma Oi Au, sa tukuna na Turaga, Vakarua tale, Na Turaga ena lewai ira na Nona tamata."
31 Sa ka rerevaki sara me da lutu ki na liga ni Kalou bula.
32 Dou vakananuma mada na nomudou veisiga e liu, dou a vakararamataki kina, dou sa vosota ga na dredre e veivakararawataki,
33 dou sa vakavotoki, dou sa vakalialiai ka vakararawataki, dou sa vosota tiko ga ni dou sa tiko vata kei ira talega sa caka tiko vei ira oqori.
34 Dou sa lomani au ena noqu vesuki tu, ena reki dou sa ciqoma na vakacacani ni nomudou i yaya, ni dou sa kila sa tiko e so na veika vivinaka sara, na veika sa tudei, sa tiko mai lomalagi me nomudou.
35 Dou kua ni viritaka laivi na nomudou tudei, sa levu dina na kena i sau.
36 Sa yaga veikemudou na vosota vakadede ni dou sa cakava oti na lewa ni Kalou, dou na rawata na ka sa yalataki.
37 Io, vakalailai mada, o Koya sa lako tiko mai, ena lako dina mai ka na sega ni berabera.
38 Oqo, o ira sa vakadonui era na bula ena vakabauta;
39 Ia, oi keda sa sega ni vakataki ira sa lesu tale yani, meda sa vakataki ira ga sa vakabauta tiko me vakabulai na yalo.


Chapter 11

1 Na vakabauta sa vakarairaitaki kina na veika eda sa nuitaka tiko, sa vakadinadinataka na veika sa sega ni kunei.
2 Na vakabauta era sa rawata kina na rogorogo vinaka o ira na qase.
3 Ena vakabauta eda sa kila kina ni sa buli na vuravura ena Vosa ni Kalou, na veika sa kune tu oqo, sa sega ni buli mai na veika sa tu oti.
4 Ena vakabauta sa vakacabora kina o Epeli nai soro e vinaka vakalevu sara mai nai soro nei Keni, oqo sa rawata kina o Epeli nai vakadinadina ni sa yalododonu, sa dau tukuna tiko na Kalou na nona i solisoli; e dina ga sa mate o Epeli, ia e se vosa tikoga na veika e cakava.
5 Ena vakabauta "sa kau bulabula yani kina oinoke ka sa sega ni raica na mate, sa sega ni laukune o koya baleta ni sa kauti koya na Kalou," ni se bera ni kau yani, sa tu ga vua nai vakadinadina ni sa vinakati koya na Kalou.
6 Kevaka sa sega na vakabauta, sa sega ni rawa vua e dua me vakaloma-vinakataka na Kalou. O koya sa via lako mai vua na Kalou, e dodonu me vakabauta ni sai Koya ga, sa dau saumi ira talega sa dau vakasaqara vakagumatua na Kalou.
7 Ena vakabauta o Noa, ni sa vakasalataki koya oti na Kalou, ena veika sa sega tiko ni yaco, sa toso ena rerevaka na Kalou,sa vakarautaka na waqa me ra bula kina na nona vuvale, sa qai vunauca kina na vuravura, sa qai yaco mei taukei ni yalododonu me vaka ga na vakabauta.
8 Ena vakabauta, o Eparama, sa talairawarawa, ni sa kacivi me lako ki na vanua e a qai nona i votavota e muri. Sa lako ga o Koya, e dina ga ni sa sega ni kila na vanua ko ya.
9 Ena vakabauta, sa lako ki na vanua sa yalataki, na vanua sa vulagi vua, sa tiko ga ena valelaca vata kei Aisale kei Jekope, oi rau na kena kawa ni vosa ni yalayala;
10 Ni sa waraka tiko o koya e dua na koro levu sa vakayavu, sa tara ka cakava na Kalou.
11 Ena vakabauta, o Sera vakataki koya sa rawata na kaukauwa me kunekunetaki na kawa, sa vakasucuma na gone ni sa sivia na gauna me kunekunetaki kina e dua baleta o Sera sa vakadinati Koya sa yalataka oti.
12 O koya oqo, mai vua ga e dua na tagane, sa vinaka ga me vaka e dua sa mate, era sa qai sucu mai vua na lewe vuqa me vaka na kalokalo ni lomalagi, sa sega ni wili rawa, e vaka na veinuku ni matasawa.
13 Era sa mate kece oqo ena vakabauta ni se bera ni ra taura na vosa ni yalayala, ia era sa raica vakayawa tiko ga yani ka sa vakadeitaki vei ira, ka ra sa taura matua, era sa vakatusa voli ena vuravura oqo.
14 O ira sa cavuta tiko na veika oqo, era sa tukuna tiko ga vakamatata ni ra sa vakasaqara tiko e dua tale na vanua.
15 Sa dina sara, kevaka era sa vakananuma tiko ga na vanua era sa lako tani mai kina, sa na tiko vei ira e so na galala me ra lesu take kina.
16 Oqo, era sa gadreva e dua na vanua e vinaka cake, na vanua vakalomalagi. Sa sega ni madua kina na Kalou, me kacivi me nodra Kalou, ni sa vakarautaka tiko o Koya e dua na koro levu me nodra.
17 Ena vakabauta, o Eparama ni sa vakatovolei, sa soli Aisake, o koya ni sa rawata na yalayala, sa vakacabora na luvena tagane e duabau ga,
18 O koya sa tukuni kina, mai vei Aisake ena tubu mai kina na nomu kawa;
19 sa kilai kina ni na vakatubura cake na Kalou, io, kevaka mada ga sa mate, sa tauri koya talega ena vakasama ni dua nai vakaraitaki.
20 Ena vakabauta, o Aisake sa vosa vakalouvinakataki Jekope kei Iso ena vuku ni veika sa lako tiko mai.
21 Ena vakabauta, o Jekope ni sa mate tiko, sa vakalouvinakataki iratou na luvei Joseva, ka lotu ni sa taura matua tiko ena nona i titoko.
22 Ena vakabauta o Joseva, ni sa mate tiko, sa tukuna rawa na nodra sa na lako tiko na Isireli ka sa solia rawa tiko na i vakasala me baleta na nona sui.
23 Ena vakabauta ni sa sucu o Mosese sa vunitaki me tolu na vula vei na nona i tubutubu, baleta ni rau sa raica ni gone rairai totoka; ni rau sa sega ni rerevaka nai vakaro ni tui.
24 Ena vakabauta, o Mosese ni sa matua mai, sa besetaka ni cavuti vua me luvena na luvei Fero yalewa,
25 sa digitaki me vosota na rarawa vata kei ira na tamata ni Kalou, mai na nona via marautaka na veika ni valavala ca ni vuravura,
26 sa kila na veivakacacani ena vuku i Karisito sai yau levu ka lailai nai yau kece mai Ijipita, oqori na kena i sau sa raica tiko o koya.
27 Ena vakabauta, sa biuti Ijipita kina o koya, sa sega ni rerevaka na nona cudru waqawaqa na tui; ni sa dei tikoga na nona raici Koya sa sega ni laurai.
28 Ena vakabauta, sa maroroya na lako sivia kei na kureitaki ni dra, de qai tarai ira o Koya sa dau vakamatei ira na ulumatua.
29 Ena vakabauta, era sa lako curuma kina na wasawasa damudamu me vaka na vanua mamaca, ia ni ra sa lakova yani na kai Ijipita, era sa luvu ga.
30 Ena vakabauta sa kabasu kina na bai kei Jeriko ni sa oti e vitu na siga na kena lako wavokiti.
31 Ena vakabauta, o Reapi na yalewa dautagane sa sega ni rusa vata kei ira sa sega ni vakabauta, ni sa ciqomi rau na yamata ena marau.
32 Na cava tale me'u tukuna? Ena sega na gauna kevaka au sa tukuni Kitione kei Beraki kei Samisoni, kei Jevica, o Tevita talega kei Samuela ke ira na parofita:
33 O ira oqo, ena vakabauta era sa vakamalumalumutaka na veimatanitu, era sa cakacaka vakadodonu, era sa rawata na veika sa yalataki, era sa sogota na gusu ni laioni,
34 era sa bokoca na katakata ni bukawaqa, era sa qaqa mai na yame ni seleiwau, era sa qaqa mai na malumalumu, era sa yatedei ena i valu, era sa vukici ira na meca me ra veidrovaki.
35 O ira na yalewa era sa taura lesu mai na mate ni ra sa vakabulai tale, eso era sa vakararawataki, era sa sega ni vinakata me ra sereki me ra rawata kina na veika e vinaka cake, o ya na tucake tale mai na mate.
36 O ira tale e so era sa vakacacani, era sa vakalolomataki, io, era sa vesuki ena senicodo.
37 Era sa vakaviriki, ena vatu, era sa varoti rua ena i varo, era sa temaki vakalevu, era sa vakamatei vakadua ena i sele. Era sa veilakoyaki voli ena kuli ni sipi kei na kuli ni me, era sa biu ka guilecavi tu ka vakalolomataki vakaca sara –
38 sa sega ni yaga vei ira o vuravura, Era sa dauveilakoyaki voli ena veivanua dravuisiga ena veiulunivanua ena veiqara vatu walega.
39 Ena veika kecega oqo, ni ra sa rawata na veitukuniyalo vinaka ena vuku ni vakabauta, era se bera ga ni rawata na vosa ni yalayala.
40 Na Kalou sa vakarautaka e dua na ka e vinaka cake vei keda, me da vakataucokotaki vata, me kua ni o ira duadua ga.


Chapter 12

1 O koya oqo, oi keda talega, ni ra sa vakavolivoliti keda o ira na lewe vuqa, sai vakadinadina, me da sa biuta sara na veika e dauveivakataotaki kei nai valavala ca e dauveicoriti, me da ciciva sara na cere sa tu e matada ka me da ciciva na cere oqo ena vosota,
2 me da vakaraici Jisu tikoga, o koya sa tekivuna ka na tinia talega na noda vakabauta, o Jisu ena vuku ni reki sa tu e matana, sa vosota na kauveilatai, na veivakamaduataki, ka sa la'ki dabe tiko oqo ena liga i matau ni Kalou ena Nona i tikotiko vakaturaga.
3 Me da vakaraici Jisu mada, ni sa vosota na nodra veivakacacani nai valavala ca vei Koya, de na qai tubu na yalolailai ena lomamuni.
4 Ni kemuni se bera tiko ni vakatovolei me yacova na vakadavei ni dra ena nomuni veivala tiko kei nai valavala ca.
5 O ni sa guilecava talega na veivosa ni veibolei me vaka ki vei ira na gone: "Na Luvequ mo kua ni beca ni sa vunauci iko o Jiova, se mo ni yalolailai ni o ni sa vakavulici mai Vua;
6 Ni sa lomana e dua o Jiova ena vakavulica ka sa dau vakadodonutaki ira na gone me ra vinaka kina.
7 Kevaka o sa vosota na Nona veivakavulici, sa cakacaka vei iko na Kalou me vaka vei ira na luvena; sa gone vakacava oqori kevaka o sa sega ni vakadodonutaki mai vua na tamamuni?
8 Kevaka o ni sa sega ni vakadodonutaki, ni dodonu me vaka kece vei kemuni kecega, o ni sa gone ni sala ka sega ni loma ni vale.
9 Eda sa vakatamani kece, ka da sa dau vakadodonutaki, eda sa dokai ira kina vakalevu. Sa sega beka ni dodonu me da sa dau tu vakarau ena noda vakarorogo vua na Tama ni yaloda me da bula kina?
10 Eda sa dauvakavulici me vinaka kina vei ira sa vakavulici keda, ia o Jisu, me vinaka kina vei keda, me rawa ni da i taukei ni Nona yalosavasava.
11 Sa sega na veivakadodonutaki e ka ni reki ni sa dau caka, sa ka mosi sara, ia, ni sa oti oqori sa vakabasikata na vua ni veivakacegui ni yalododonu vei ira sa dau vakavulici kina.
12 Mo ni qai vakaukauwataka na ligamuni kei na yavamuni sa wadamele,
13 Ka vakadodonutaka na sala ki na yavamuni, me yaco kina na veika sa damele me kua ni lutu sara, me vakabulai ga.
14 Vakasaqara na veivakacegui vei ira na tamata kecega kei na yalosavasava, kevaka sa sega na veika oqo, ena sega ni dua e raica rawa na Kalou;
15 Me rai tiko vakadodonu na tamata, de dua e bale mai na loloma ni Kalou, de dua talega e kabiti koya na waka tu ni yaloca sa vakasucuma mai na leqa ka sa veivakacalai dina;
16 de dua talega na dauveirawai kei koya sa rawai me vakataki Iso, sa volitaka na nona i tutu ena dua na tiki ni madrai ga.
17 O ni sa kila vinaka, ni sa oti oqo sa qai, vinakata me vakalouvinakataki, sa qai sega ni rawata, ni sa sega ni rawa me veivutunitaka, e dina ga ni vakasaqara matua sara, ni sa drodro vakalevu na wai ni matana.
18 Ni kemuni sa sega ni lako mai ki na ulunivanua sa tarai ka vakamai ena bukawaqa, ena loaloa ca sara kei na butobuto
19 kei na rorogo ni davui kei na rorogo ni vosa, ni o ira sa rogoca, era sa kerea me ra kua tale ni rogoca na kena tukuni tale vei ira na veivosa oqori.
20 Ni ra sa sega ni vosota rawa na veika sa vakaroti, "Kevaka mada ga sa vakalevu me vaka e dua na manumanu ni veikau sa tara na ulunivanua, ena lauviri ena vatu se me laucoka ena moto."
21 Sa rui rerevaki na kenai rairai sa tukuna kina o Mosese "Au sa rui rerevakalevu ka au sa sautaninini sara."
22 Oqo o ni sa lako mai ki na ulunivanua o Saioni ki na Nona koro na Kalou bula, na Jerusalemi vakalomalagi, ki na nodra i soqosoqo na agilosi e sega ni wili rawa,
23 ki nai soqosoqo levu ni soqosoqo lotu ni ulumatua, o ira sa volai na yacadra mai lomalagi, ki vua na Kalou na Turaga ni lewa levu, ki na yalodra na tamata sa vakadonui era sa vakataucokotaki.
24 ki vei Jisu na dauveisorovaki ni veiyalayalati vou, kei na dra sa dau kureitaki, sa tukuna na veikavivinaka mai na kena vei Epeli.
25 Mo ni raica, mo ni kua ni bese vei Koya sa vosa, kevaka sa sega ni dua sa dro rawa vei Koya ni sa vosa ni se tiko e vuravura, eda na qai dro vakacava kevaka ena sa vuki tani mai Vua sa vosa tiko mai lomalagi,
26 na domona sa yavalati na vuravura; oqo sa yalayala kina Koya ka tukuna, vakadua tale, au na sega ni vakayavalati vuravura ga, o lomalagi talega.
27 Sa vakaoqo, "Vaka dua tale," sa tukuna na kau tani ni veika sa yavalati oti, me vaka na veika sa oti, me tudei kina na veika sa sega ni yavalati rawa.
28 O koya oqo, ni da sa rawata na matanitu sa sega ni yavalati rawa, me tiko vei keda na yalololoma, me da qarava kina na Kalou vakavinaka ena vakarokoroko kei na rerevaka na Kalou.
29 Na noda Kalou sa bukawaqa caucaudre.


Chapter 13

1 Me ia tikoga na veilomani vakaveitacini
2 Kakua ni guilecava na vakamarautaki ira na vulagi, ni cakava oqo, e so era sa dau vakacegui ira na agilosi, ni ra sega tu ni kila.
3 Dau nanumi ira na kaivesu me vaka sara ga dou sa vesuki vata tu; kei ira sa vakamavoataki, ni Oi kemudou kei ira o ni sa yago e duabau.
4 Sa ka vakarokorokotaki na bula vakawati vei keda kecega, kei nai davodavo e sega ni vakadukadukalitaki; na Kalou, ena lewai ira vakadodonu na dauyalewa kei na dauveibutakoci.
5 Me kua ni kocokoco na nomudou i valavala, mo dou yalovinaka ga ena veika sa tu vei kemudou. Ni sa tukuna oti o Koya, "Au na sega ni biuti kemudou se weletaki kemudou."
6 Sa rawa kina vei keda meda tukuna; "sa noqu i vukevuke na Kalou, Au na sega ni rerevaka na cava ena rawa ni cakava vei au na tamata?
7 Mo ni nanumi ira sa liutaki kemuni, era sa vakavulici kemuni ka vunautaka vei kemuni na vosa ni Kalou, vakamuria na nodra vakabauta ni kemuni sa raica matua na nodra i valavala.
8 O Jisu sa sega ni veisau rawa, mai na veisiga sa oti, e daidai kei na veisiga ni mataka.
9 Mo ni qarauna, mo ni kakua ni kau vakatani, ena vuku ni vakavuvuli vou e vuqa. Sa vinaka mo ni vakadeitaki tikoga ena loloma ka sega ena kakana, ni sa sega ni yaga vei ira sa dau cakava tiko.
10 Sa dua tiko na noda i cabocabo ni soro, o ira mada ga sa veiqaravi ena vale ni soro sa sega ni dodonu mera kana kina.
11 Na yago ni manumanu sa kau mai na kena dra ki na vale ni soro mai vua na bete levu, sa vakamai mai na taudaku ni bai. 12Sa vakatalega kina o Jisu, me rawa ni vakasavasavataki ira kina na tamata ena Nona dra, ni sa vakararawataki ena taudaku ni bai.
13 O koya oqo me da lako sara yani Vua ki na taudaku ni tikotiko, ni da sa colata tiko na Nona cudruvi.
14 Ni sa sega ni dua na noda koro ni vakai tikotiko eke, eda sa vakasaqara tikoga e dua sa lako tiko mai.
15 O koya oqo, ena Vukuna, me da sa vakacabora tikotiko ga ena vukuna nai soro ni vakacerecerea na Kalou. Oqori na vua ni tebenigusuda sa vakavinavinaka tikoga Vua.
16 Me kua ni guilecavi na caka vinaka kei na veiwasei ena ka sa tu vei keda, ni soro sa vakaoqo sa rui loma vinaka kina na Kalou.
17 Mo ni talairawarawa vei ira sa liutaki kemuni, mo ni vakarorogo vei ira ni ra sa dau yadrava tiko na yalomuni, me vaka, ni ra na soli tukutuku kina vua na Kalou. Me ra cakava sara ena reki ka me kua ena rarawa, ni sa sega ni yaga vei kemuni oqo.
18 Mo ni masulaki keitou vakalevu, ni keitou sa doudou, ka sa galala na neitou lewa e loma, ena veika kecega keitou sa via bula ga vakavinaka.
19 Au sa kerei kemuni vakabibi sara mo ni vakayacora oqo, me keitou vakatikori lesu kina veikemuni ena kena gauna totolo sara.
20 Na Kalou ni veivakacegui, o Koya sa vakaturi Jisu cake tale mai na mate, nai Vakatawa levu ni sipi, ena dra ni veiyalayalati ka sega ni mudu,
21 Me vakataucokotaki kemuni ena cakacaka vinaka kecega na veika sa vinaka e matana, ena vuku i Jisu Karisito, o Koya sa Nona na lagilagi kei nai ukuuku, me sega ni mudu, Emeni.
22 Au sa vakamasuti kemuni, na veiwekani me noda vata na vosa ni veivakatataki cake, au sa vola vei kemuni ena vosa e vica ga.
23 Mo ni kila, ni o Timoci na tacida sa sereki, keirau na lako yani veikemuni kevaka sa lako mai vakatotolo.
24 Mo ni kauwaitaki ira sa liutaki kemuni, kei ira kece sa vakabauta. Era sa vakabula tiko yani o ira mai Itali.
25 Na loloma rairai vinaka ni Kalou, me sa tiko vakayadua kei kemuni. Emeni.