Jemesa

1 2 3 4 5


Chapter 1

1 Oi au o Jemesa, na i Talatala ni Kalou kei na Turaga o Jisu Karisito. Ki na yavusa e tinikarua e ra sa dui veiseyaki tu: Ni sa bula vinaka.
2 Oi kemudou na wekaqu, dou nanuma me ka ni reki sara ni dou sa lutu ki na ka e vuqa sa dauveivakatovolei,
3 Mo dou kila kina, ni sa dauvakatubura na dauvosota na vakatovolei ni nomudou vakabauta.
4 Ia me tini vinaka na cakacaka ni dauvosota, mo dou vinaka taucoko sara, me kakua ni dua na ka me vakayali vei kemudou.
5 Kevaka sa lailai na vuku vua e dua vei kemudou, me kerea Vua na Kalou, o Koya sa solia vakalevu kivei ira kecega na tamata, a sa sega ni dauveivakadirideini, e na solia ga vua o Koya.
6 Ia me kerekere e na vakabauta, ka me kakua ni vakatitiqa, o koya e vakatitiqa sa vaka na ua ni waitui sa veicaginayaki e na cagi kecega.
7 Me kakua sara ni nanuma na tamata o ya ni na rawata e dua na ka mai Vua na Turaga;
8 O koya na tamata lomalomarua, sa yamekemeke na nona i valavala kecega.
9 Me reki na tamata dravudravua e na nona laveti cake:
10 Ia o koya e vutuniyau e na nona vakamaduataki, e na takali ga o Koya me vaka na se ni co.
11 Ni sa cabe cake na siga kei na cagi katakata sa vakaraqosataka sara na co, a sa mira na sena, a sa takali na kena rairai vinaka. E na takali yani vaka kina na tamata vutuniyau e na nona i valavala.
12 Sa kalouvinaka na tamata sa vosota ni sa vakatovolei; e na gauna sa vakatovolei oti kina, e na rawata na i sala ni bula o koya sa yalataka na Turaga kivei ira sa lomani koya.
13 Ni sa vakatovolei tiko e dua, me kakua ni tukuna, sa "Dauveretaki au na Kalou" e sega ni veretaka na Kalou na vuni ca, a sa sega ni dauveretaka e dua na tamata na Kalou.
14 Sa dauveretaki na tamata yadua, ni sa vakaleqai koya ga na nona garogaro ca ka vu ni nona leqa.
15 Na garogaro ni sa kunekunetaki, sa vakasucuma nai valavala ca, ni sa tubu me taucoko nai valavala ca, sa kauta mai na mate.
16 Dou kakua ni vakacalai, oi kemudou na wekaqu lomani.
17 Sa lako mai cake na i solisoli vinaka kecega kei na i solisoli e yaga sara vei keda, a sa lako sobu mai vei Koya na Tama ni rarama, ka sa sega Vua na veivukiyaki, se i yaloyalo ni veigoleyaki.
18 E na Nona lewa sa vakatuburi keda kina o Koya ena vosa ni dina, me da vaka na i sevu ni veika sa bulia o Koya.
19 O koya oqo, oi kemudou na wekaqu lomani, mo dou totolo ni vakarorogo mo dou berabera ga ni vosa, mo dou berabera talega ni cudru:
20 Baleta na cudru ni tamata ena sega ni vakatubura na yalododonu ni Kalou.
21 O koya oqo mo dou qai biuta na ka ca kei na veika vakasisila, ka vakabauta e na yalomalumalumu na vosa sa tei e na lomamudou, o koya sa vakabula talega na yalomudou.
22 Ia dou muria na vosa, ka kakua ni rogoca walega ka vakaisini kemudou kina vakai kemudou.
23 Ia kevaka e dua sa rogoca walega na vosa ka sega ni muria, sa tautauvata kei na tamata sa la'ki ilovi koya e na iloilo;
24 Ni sa la'ki ilovi koya ka sa qai lako tani, a sa guilecava tale vakasauri se sa vakaevei na i rairai dina ni matana.
25 Ia o koya e raica na i vunau dina ni veisereki ka bula kina, sa sega ni daurogoca ka qai guilecava, sa vakayacora talega na cakacaka e na vakalouvinakataki koya kina.
26 Kevaka e dua vei kemudou sa nanuma sa lotu dina, ka sega ni tarova rawa na yamena, sa dauvakaisina na yalona, sa ka walega na nona lotu na tamata oqo.
27 Na lotu savasava ka sega ni cala e na mata ni Kalou o Tamada sa vaka oqo, me sa dauraici ira na luveniyali kei ira na yada, ni ra sa rarawa. Me sa qarauni koya talega me kakua ni tauvi koya e dua na duka vakavuravura.


Chapter 2

1 Oi kemudou na wekaqu, dou kakua ni taura vata na digitaki ira na tamata, kei na vakabauti Jisu Karisito, na noda Turaga sa vakaiukuukutaki.
2 Kevaka sa curuma mai na nomudou valenilotu e dua na tamata sa vakamama koula, ka vakaisulu e na i sulu vakaiukuuku, a sa curu talega mai e dua na tamata dravudravua e na i sulu ca,
3 Dou qai vakarokorokotaki koya sa vakaisulu e na i sulu vakaiukuuku, "ka tukuna vua mo laki tiko e na yasana dokai oqo," dou qai tukuna vua na tamata dravudravua, "mo laki tu sara ki kea", "Se mai dabe tiko e ruku ni tutu ni yavaqu."
4 Do sa sega beka ni kaburaka tiko na veivakaduiduitaki ena kemudou maliwa, ka sa daulewa ena vakanananu ca?
5 Dou rogoca, oi kemudou na wekaqu lomani, sa sega beka ni digitaki ira na Kalou e ra sa dravudravua e na ka vakavuravura, me ra vutuniyau e na vakabauta, me ra taukena talega na matanitu sa yalataka o Koya vei ira sa lomani Koya?
6 Ia dou sa beca na tamata dravudravua, e ra sa sega beka ni vakasaurarataki kemudou o ira na vutuniyau, ka yarataki kemudou kina vale ni veilewai?
7 E ra na sega beka ni vosavakacacataka na yaca dokai dou sa vakatokai kina?
8 Kevaka dou sa muria sara na i Vunau vakaturaga me vaka na i Vola Tabu, mo lomana na kai nomu me vakataki iko, dou na qai cakavinaka;
9 Kevaka dou sa digitaki ira na tamata, dou sa qai valavala ca, ka dou sa beitaka ena i vunau ni dou sa tamata i valavala ca.
10 O koya sa muria na i Vunau taucoko, ka sa cala ga e na dua na tikina, sa beitaki me vaka sa talaidredre ki nai Vunau taucoko.
11 Ni sa tukuna vaka oqo, kakua ni dauyalewa, sa tukuna talega, kakua ni laba. Kevaka o sa sega ni dauyalewa, ia o sa laba tikoga o sa qai talaidredre ki nai Vunau.
12 Dou vosa vakakina ka bula vakakina, me vakataki ira e ra na lewai me vaka na i vakaro e na i Vunau ni veisereki.
13 Na veilewai e sega kina na loloma vua e sega ni bulataka na loloma. Na loloma e qaqa e na veilewai.
14 E na yaga vakacava, oi kemudou na wekaqu kevaka sa tukuna e dua ni tu vua na vakabauta qai sega vua na cakacaka? E na vakabulai koya beka na vakabauta?
15 Kevaka sa dua na wekada yalewa se tagane sa sega na nona i sulu, ka sega tale na kena e na veisiga,
16 Ka dua vei kemudou me tukuna vei ira, dou lako e na vakacegu dou la'ki vakaisulu ka kana me mamau; ka dou sega ni solia e dua na ka me yaga kina nodra bula, a cava na betena vei kemudou?
17 Sa vakatalega kina na vakabauta kevaka sa sega ni tu vata kei na cakacaka, sa mate ga, ni sa tu duadua ga.
18 E na tukuna beka e dua, "Sa tu ga vei iko na vakabauta, sa tu ga vei au na cakacaka." Mo vakatakila mai vei au na nomu vakabauta e sega kina na nomu cakacaka, au na vakatakila vei iko na noqu vakabauta e na noqu cakacaka.
19 O sa vakabauta ni dua tiko na Kalou. O sa caka vinaka. O ira talega na tevoro era vakabauta – ka sautanini!
20 O sa via kila beka o iko na tamata lialia, ni sa mate ga na vakabauta ke sa sega na cakacaka?
21 E sega beka ni vakadonui o Eparama na tamada e na vuku ni cakacaka, ni sa vakacabora na luvena o Aisake e dela ni cabocabo ni soro?
22 O sa raica ni sa veivuke na vakabauta kei na cakacaka, a sa taucoko sara mai na vakabauta e na vuku ni cakacaka?
23 A sa vakayacori kina na i Vola Tabu ka vaka, sa vakabauta na Kalou o Eparama a sa wili vua me i valavala dodonu, a sa vakatokai me i tokani ni Kalou.
24 Dou sa qai raica ni sa vakadonui na tamata e na vuku ni cakacaka, a sa sega ga e na vuku ni vakabauta duadua ga.
25 Sa vakatalega kina o Reapi na yalewa ka dautagane, sa sega li ni vakadonui e na vuku ni cakacaka ni sa vakacegui rau na i talaki, ka qai vakatalai rau yani e na dua tani tale na sala?
26 Me vaka ni sa mate na yago ke sa takali na yalo, sa mate vakakina na vakabauta ni sa sega na cakacaka.


Chapter 3

1 Oi kemudou na wekaqu, me kakua ni lewe levu vei kemudou me dau vakavuvuli, ni da sa kila sa bibi cake kina na keda i totogi.
2 Ni da sa cala kecega e na ka e vuqa. Kevaka sa sega ni cala e dua e na vosa, sa tamata uasivi sara o koya, a sa rawarawa vua me tarova na yagona taucoko.
3 Raica kevaka e da sa vakacuruma na kedra i tarovi na ose ki na gusudra, me ra talairawarawa kina vei keda, e da sa qai saumaka na yagodra taucoko.
4 Raica talega na waqa, ni sa ka levu vakaidina, a sa savu yani e na cagi kaukauwa, ia sa saumaki ga e na i uli lailai sara, ki na yasana sa vinakata o koya sa taura tiko na i uli.
5 Sa vakatalega kina na yameda ni sa tikida lailai ga, a sa vosa vakaviavialevu. Raica sa vakacaudreva na buka waqa levu e dua ga na tiki ni buka lailai!
6 Sa bukawaqa na yameda, sa vuravura ni ca. Na yameda sa tiki ni yagoda, sa rawa ni vakacacana na yagoda taucoko, sa rawa ni vakama na noda i tosotoso; sa veivakamai vaka oqori o Eli.
7 Na veimanumanu yava i va kecega kei na manumanu vuka, manumanu sa qasi voli kei na ika ni wasa liwa, a sa vakamanoataki ira tu ga o ira na tamata.
8 Ia e sega ni dua na tamata sa vakamanoataka rawa na yamena. Ni sa sinai e na ca ka sinai talega e na ka e dauveivakamatei.
9 E da vakavinavinakataka kina na noda Turaga ka Tamada, ka da rukaki ira talega kina na tamata, e ra sa buli me tautauvata kei na Kalou.
10 E dua ga na gusu sa lako tiko mai kina na vosa vinaka kei na vosa ca. Oi kemudou na wekaqu sa sega ni vinaka na veika vaka oqo.
11 E dua beka na mata ni wai me drodro mai kina na wai vinaka kei na wai ca?
12 Oi kemudou na wekaqu, e dua beka na vuni lolo sa vuataka rawa na olive? Se dua li na vaini, na lolo? Sa vaka kina e dua na mata ni wai e tovure mai kina na waitui kei na wai dranu talega, e na sega ni rawa ni vaka kina.
13 O cei vei kemudou sa vuku ka yalomatua? Me vakatakila e na i valavala vinaka na nona cakacaka e na vuku sa yalomalua.
14 Ia kevaka sa tu e na lomamudou na dauvuvu kei na dauveiba, dou kakua ni vakalevulevui kemudou, se cakitaka na i vakavuvuli dina.
15 A vuku vaka o ya sa sega ni lako mai cake, sa vakavuravura ga, sa vakayalomakawa ka vakatevoro.
16 Kevaka sa tu na vuvu kei na veiba, sa tu kina na veisei kei na cakacaka kecega e ca.
17 Ia na vuku mai cake sa savasava sara, e muri sa dau ia na veivakacegui ka yalomalua, sa vakamasuti rawarawa, sa sinai e na loloma kei na vua vinaka, sa sega ni digitaki ira vakatani na tamata, se dauveivakaisini.
18 Na vua ni valavala dodonu sa kaburaki e na vakacegu vei ira na dauveivakacegui.


Chapter 4

1 Sa vu mai vei na veiba kei na veivala vei kemudou? Sa sega li ni vuna na nomudou gagadre ca, sa veivala e na veitiki ni yagomudou?
2 Dou sa daugagano ka sega ni rawata. Dou sa daulaba ka daukocokoco ka sega ni rawa ni dou taura. Dou veivala ka veiraravui. Sa sega ni dua na ka mo dou rawata ni sega ni dou duavata kina.
3 Dou kerekere ka sega ni soli vei kemudou ni dou sa kerea na ka ca, mo dou la'ki vakamarautaka kina na nomudou gagadre ca.
4 Oi kemudou na dauyalewa kei na dautagane, dou sa sega beka ni kila ni sa cata na Kalou na veivinakati kei vuravura? Sa veimecaki kei na Kalou o koya sa via veiwekani kei vuravura.
5 Dou sa vakasama beka ni sa tukuna na i Vola Tabu, sa gadreva vakalevu sara na yalo sa tiko e lomada?
6 Ia sa solia vakalevu o Koya na loloma. "O Koya sa tukuna kina, o ira sa viavialevu sa vorati ira na Kalou, sa solia na loloma vei ira era sa yalomalumalumu."
7 O koya oqo mo dou qai vakamalumalumutaki kemudou vua na Kalou. Vorata na tevoro, e na dro tani kina vei kemudou o koya.
8 Toro voleka yani Vua na Kalou e na qai toro voleka mai vei kemudou o koya. Vakasavasavataka na ligamudou, oi kemudou na i valavala ca; ka vakasavasavataka na yalomudou oi kemudou sa daulomalomarua.
9 Dou tagi qoqolou e na rarawa! Me vuki na nomudou dredre me rarawa, kei na nomudou marau me mata veveku.
10 Dou vakamalumalumutaki kemudou e na mata ni Turaga, ka na laveti kemudou cake o Koya.
11 Kakua ni dou veikaseti na veiwekani. O koya sa kaseta na wekana, ka via vakalewai koya, sa kaseta talega na i Vunau ka vakalewa talega na i Vunau: ia kevaka o sa via lewa na i Vunau o sa qai sega ni muria na i Vunau o sa via lewa ga.
12 E dua ga e lewa na i Vunau, o Koya sa rawata me veivakabulai, kei na veivakarusai: O cei o iko mo lewa na tani?
13 Dou lako mai oi kemudou sa dautukuna, e daidai se ni mataka e da na lako ki na koro o ya, ka tiko kina ka yabaki dua, ka veivoli kina ka rawata na i yau.
14 Dou sa sega ni kila na ka e na yaco ni mataka. Na cava na nomudou bula? Na kabukabu walega Oi kemudou? Sa rairai ka dede vakalailai ga, sa qai seavu yani.
15 O koya oqo mo dou tukuna kina, kevaka sa vinaka Vua na Turaga, e da na bula, ka kitaka na ka oqo se na ka o ya.
16 Ia dou sa qai marau ka dokadokai kemudou. E ca na marau kecega sa vaka o ya.
17 O koya sa ca kina vua sa kila me caka vinaka, ka sega ni kitaka.


Chapter 5

1 Dou lako mai, oi kemudou na vutuniyau, dou tagi ka qoqolou e na vuku ni nomudou veika rarawa e na tarai kemudou mai.
2 Na nomudou i yau sa ca, kei na nomudou i sulu talega sa kania na sarasara.
3 Na nomudou koula kei na siliva sa veveka; e na tukuni kemudou na kena veveka, ka na kania na lewemudou me vaka na bukawaqa. Dou sa kumuna vata na i yau ena gauna e muri sara.
4 E ra na tagica na kedra i voli na tamata daucakacaka, e ra sa tamusuka na nomudou veiwere, o koya dou sa bureitaka, ka sa rogoca na Turaga ni lewe vuqa na nodra tagi ni ra sa tamusuka.
5 Dou marau tikoga e vuravura, dou daukana tiko; dou dauvakania na lomamudou, e na siga sa vakayacori kina na veivakamatei.
6 Dou lewai Koya na yalododonu, dou a vakamatea ia sa sega ni vorati kemudou o Koya.
7 O koya oqo, na veiwekani, mo dou qai vosota me yaco mada na Nona lako mai na Turaga. Raica na i vakatawa ni teitei sa waraka na vua ni qele e talei, a sa wawa vakabalavu, me rawata mada na uca sa liu, kei na uca sa muri.
8 Dou wawa talega oi kemudou. Vakataudeitaka na yalomudou, ni sa voleka mai na siga ni Turaga.
9 Dou kakua ni dou veikudruvi, na veiwekani, de dou cudruvi. Raica sa tu e na mata ni katuba na Turaga ni Lewa!
10 Oi kemudou na wekaqu, vakadamurimuri ira na parofita, e na nodra vosota na ka rarawa, kei na nodra dauvosota e ra a vosa e na yaca ni Turaga.
11 Raica e da a dauvakatokai ira era sa dauvosota me ra kalouvinaka. Dou sa rogoca na dauvosota nei Jope, ka raica talega ni sa tinia vakaevei na Turaga; ni sa yalovinaka sara na Turaga ka dauloloma.
12 Ia na ka levu sara oqo, oi kemudou na wekaqu, mo dou kakua sara ni bubului, kakua ki lomalagi, se ki vuravura, se kina dua tale na ka. Ia me "Io" ga na "Io", Ka me "Sega" ga na "Sega" de dou cudruvi kina.
13 E dua li vei kemudou sa vakararawataki? Me masu tiko. E dua li sa marau me sere?
14 E dua li vei kemudou sa tauvimate? Me kacivi mai o ira na qase ni Soqosoqo Lotu me ra qai masulaki koya, ka me ra lumuti koya e na waiwai e na yaca ni Turaga.
15 Na masu ni vakabauta e na vakabulai koya sa tauvimate, e na vakaturi koya cake na Turaga. Kevaka e i valavala ca, e na vosoti o koya.
16 Dou dui vakatusa na nomudou i valavala ca, ka veimasulaki, mo dou vakabulai kina. Sa yaga vakalevu na nona masu vagumatua na tamata yalododonu.
17 A tamata sa vakataki keda ga o Ilaijia, a sa masu vagumatua sara me kakua ni tau na uca; A sa sega kina ni tau mai na uca e na vanua, me oti mada e yabaki tolu ka vulaono.
18 Sa qai masu tale, ka sa tadola mai na lomalagi me tau na uca, ka sa tubu mai na vua vinaka e na qele.
19 Oi kemudou na veiwekani, kevaka e dua vei kemudou sa butusevata na i vakavuvuli dina, dou vakalesui koya tale mai.
20 Me kila o koya oqo, o koya sa vakalesui koya tale na tamata caka cala mai na nona i valavala e cala kina sa vakabula na yalona mai na mate, ka ubia talega na levu ni valavala ca.