1 Pita

1 2 3 4 5


Chapter 1

1 Pita 1 1 Oi au o Pita nai apositoloi Jisu Karisito, kivei ira sa nona na Kalou ka ra dui veilakoyaki tu ki Ponito, ki Kalatia, ki Kapatosia, ki Esia kei Picinia.
2 Ka era sa digitaki tu me vaka nona lewa na Kalou o Tamada, ka mera vakasavasavataki ena Yalo Tabu, ka vakamiraki tiko vei ira na dra i Jisu Karisito ena nodra talairawarawa. Ka me vakalevutaki vei kemudou na loloma kei na vakacegu.
3 Me rokovi na Kalou na Tama i Jisu Karisito, ka noda Turaga ena nona vakayacori keda me noda nai nuinui bulabula, ena kaukauwa ni tucake tale mai na mate i Jisu Karisito, me vaka na levu ni Nona lomani keda.
4 Me noda kina nai votavota sa sega ni bau ca vakadua se me vakacacani tu, ka sega ni rawa ni kautani na kena totoka, sa vakarautaki oti tu mai lomalagi me nomudou.
5 Oi kemudou sa taqomaki tu ena kaukauwa ni Kalou ena nomudou vakabauta, mo dou vakabulai kina ka waraka nai vakataotioti ni gauna.
6 Ena ka oqo mo dou reki tiko kina vakalevu sara, e dina ni vakalailai tikoga na nomudou na sotava tiko na veivakatovolei ni veika rarawa.
7 Ka me rawa ni laurai kina na vakabauta dina sara me tu vei keda, na vakabauta vaka oqo e talei mai na koula sa vakatovolei oti ena buka, ka ena vakacaucautaki, ka ena dokai, ka ena lagilagi ena Nona na rairai mai o Jisu Karisito.
8 O koya ka sega ni rawa ni laurai, ia dou sa lomana ga. E dina ni dou sega ni raici koya, ia dou sa vakabauta ga, ka dou sa reki tiko ena reki e sega ni cavuti rawa, ka dou vakasinaiti tu ena i serau ni Turaga.
9 Ka mo dou rawata kina nai tinitini ni nomudou vakabauta, sai koya na vakabulai ni yalomudou.
10 A bula oqo era vaqaqa ka via kila o ira na parofita, ena kena parofisaitaki tiko mai na loloma ena nomudou.
11 Ni ra sa vakadikeva tiko mai se gauna cava, se vakaevei na gauna sa vakatakila vei ira na yaloi Karisito ka tiko e yalodra, ni sa tukuni mada e liu na rarawa i Karisito kei na ka vinaka sara ena qai muri mai.
12 A sa vakatakila vei ira ni sega ena vukudra, ia vei keda ga, o ira era a vakaitavi ga mai ena kena vakaleleci mai nai tukutuku vinaka; ena kena vunautaki ena kaukauwa ni Yalo Tabu ka talai mai lomalagi – na ka oqo era via kila talega na agilosi mera raica.
13 O koya oqo mo dou qai vauca vakaukauwa na vei sema ni lomamudou, dou yadra tiko, ka vakanuinui tiko me yaco mada nai vakataotioti, mo dou rawata na loloma ena kau mai vei kemudou ena nona rairai mai o Jisu Karisito.
14 Me vaka na gone e talairawarawa, ka mo dou kakua ni lesu tale kina vei gagadre ca, dou a dau vakayacora e liu ni dou a se butobuto tu;
15 Ia sa yalosavasava o Koya sa kacivi kemudou, dou yalosavasava talega oi kemudou ena nomudou i valavala kecega.
16 Ni sa volai tu, "Dou yalosavasava, Ni'u sa yalosavasava."
17 Kevaka dou sa masu vua me vaka ni sa tamamudou, o koya sa lewai ira yadua me vaka na nodra cakacaka, na nomudou i valavala me vinaka tiko, ka me salavata na nomudou rere tiko vua ena gauna lekaleka dou bula tiko kina oqo.
18 Ka mo dou kila ni dou a sega ni voli ena veika e caka wale, ena siliva, se koula, mai nai tovo vakasisila ka sa i vakarau tu ni nomudou bula, ka tekivu sara ga mai vei ira nomudou qase.
19 Ia, ena dra talei ga i Karisito, me vaka na lami sa sega ni ca e dua na tikina.
20 O koya a sa tu mai, ni se bera ni tauyavutaki o vuravura, ia sa qai vakaraitaki Koya mai ena gauna e muri oqo ena vukumudou.
21 Ena Vukuna sa vakabauti kina na Kalou, ni sa vakaturi Koya mai na mate ka vakaiukuukutaki Koya, me rawa ni dou vakabauta ka nuitaka kina na Kalou.
22 Dou sa vakasavasavataki ena yalomudou, ni dou vakabauta na vosa ni Kalou ena veituberi ni Yalo Tabu, ka mo dou veilomani vakaweiwekani, ena loloma e vinaka sara, kei na veilomani ena yalo e savasava.
23 Ka ni dou sa sucu vou tale, ka sega ena sore ni kau mate, ka ena sore ni kau bula, oqori ena vosa bula ni Kalou ka sa tudei ka Sega ni mudu,
24 Baleta "na tamata kece sa vaka ga na co, kei na ka e dokai vua na tamata sa vaka na se ni co. Sa dau madu na co, ka mira yani na sena.
25 Ia na vosa ni Kalou sa tudei ka sega ni mudu." Oqo sara ga na vosa ni tukutuku vinaka ka sa vunautaki tiko vei kemudou.


Chapter 2

1 Pita 2 1 O koya oqo, mo dou biuta tani na lomaca kecega na veivakaisini, na daulawaki, na yalovuvu kei na vosa dukadukali mai na gusumudou.
2 Ka mo dou vaka na gone se qai sucu, ena nomudou gadreva na vosa bula, me vaka na wai ni sucu dina, mo dou tubu cake kina,
3 Dou na qai kila dina kina na kena talei na loloma ni Kalou.
4 Dou lako mai vei Koya na Vatu bula, ka era a cati koya na tamata, ia sa digitaki Koya na Kalou me talei dina sara,
5 Oi kemudou talega, na vei vatu bula, dou a tara cake mo dou vale vakayalo, ka me mata bete yalosavasava, ka mo dou dau cabora nai soro vakayalo sa vinakata na Kalou ena vuku i Jisu Karisito.
6 O koya ka sa tu talega ena i volatabu, raica, Au sa vakadabera mai Saioni na vatu ni yavu ena tutu ni vale, sa digitaki, ka talei, o koya ena vakabauti Koya ena sega vakadua ni na vakamaduataki."
7 O koya oqo, vei kemudou sa vakabauta, ena talei sara o koya; ia vei ira sa sega ni vakabauta, "na vatu era a biuta o ira na matai ni vale sa yaco me kenai vakadei ena tutu ni vale,"
8 Kei "Na vatu era sa tarabe kina Kei na vatu qiwa era sa bale kina." Era tarabe, ni ra talaidredre kina vosa ni Kalou, Ni ra sa nakita vaka kina.
9 Ia, oi kemudou nai tabatamata digitaki, a mata bete vakaturaga, a matanitu yalosavasava, oi kemudou na nona ka vakamareqeti na Kalou, ka mo dou vakaraitaka na nomudou vakavinavinakataki Koya, ena Nona a kauti kemudou tani mai ena butobuto ka vakatikori kemudou ena raramasese ka i qoroqoro.
10 Oi kemudou dou a sega tu ni nona na Kalou, ia oqo dou sa luve ni Kalou, dou a sega ni vakila tu na loloma ia oqo dou sa kila sara ga na titobu ni loloma.
11 Oi kemudou sa lomani, au sa vakamamasu vei kemudou oi kemudou sa nona na Kalou, mo dou maroroi kemudou mai na gagadre ca ni yago sa veimecaki kei na yalo,
12 Ka me uasivi na nomudou i valavala ena kedra maliwa na sega ni lotu, ni ra via vosataka e dua na ka ca baleti kemudou, ena sega ni rawa, ka ni ra raica sara tu ga na uasivi ni bula dou bulataka, ena ka oqori era na vakarokorokotaka kina na Kalou.
13 Dou talairawarawa kina i lesilesi kecega ni tamata ena vuku ni Turaga, se vua na tui o koya sa cecere sara nona lewa,
14 Se vei ira na liuliu ni matanitu, se vei ira mada ga era talai mai mera mai veivesuki ena vuku ni cala, me ra vakavinavinakataki ni ra cakava tiko na cakacaka vinaka.
15 Sai koya oqo na loma ni Kalou, meda dau caka vinaka tikoga, ka me rawa ni sogota kina na nona vosa vakalialia na tamata lialia –
16 Ni dou sa galala, dou kakua ni vunitaki kemudou ena nomudou galala, ia dou bula me vaka na tamata ni Kalou.
17 Dou rokova na tamata kecega. Lomani ira na veiwekani. Dou rerevaka na Kalou ka doka na Tui.
18 Oi kemudou na tamata lotu, dou talairawarawa vei ira na nomudou turaga ena rere, ka sega vei ira ga na turaga vinaka, se turaga yalo malumalumu, vei ira talega na turaga e voravora nona veiliutaki.
19 Ni sa uasivi sara na bula me vaka oqo, ka sa vosota na rarawa ni sa vakararawataki vaka sega dodonu, ka ni vinakata me toso vua na Kalou.
20 A ka vinaka cava dou na rawata, kevaka mo dou mokulaki ena nomudou cala, ka dou qai vosota? Ia ni dou cakava na ka vinaka, dou qai vakararawataki, ni dou vosota, ena saumi kemudou kina na Kalou.
21 Ena ka sara ga oqori dou kacivi kina, baleti Karisito sa mai vosota na rarawa ena vukuda, ka laiva mai vei keda e dua nai vakarau ni bula me rawa ni da muria na mawe ni yavana.
22 Ni sa sega ni kitaka e dua nai valavala ca, ka sa sega ni vosa veicavilaki na gusuna.
23 Ni sa vakalialiai, e sega ni via sauma lesu; Ni sa kune ka rarawa, e sega ni vosa kudrukudru, Ia sa soli Koya taucoko ga vei koya sa ia na lewa dodonu;
24 O koya sara ga e colata na noda i valavala ca me tau ena yagona kina kauveilatai; Me rawa kina vei keda ni da a mate tu ena vuku ni valavala ca, meda bula vua na Kalou, ia na we ni kena kuita eda sa mai vakabulai kina.
25 Ni dou sa vakataki ira na sipi sa lako sese, ia oqo dou sa lesu tale vei Koya nai vakatawa o Koya ka dau tiko ena yalomudou.


Chapter 3

1 Pita 3 1 Oi kemudou na yalewa dou vakamalumalumutaki kemudou vua na watimudou, ka ni so era sega ni lotu, na nodra na lotu e sega ni vinakati kina na nomu vosa, ia na nomu i valavala ga.
2 Era na raica tiko nomudou i valavala kei na nomudou yalo lokomi.
3 Dou kua ni ukutaki kemudou vakalevu e taudaku – talitali na drau ni ulu, nai ukuuku koula, se daramaka nai sulu ni veitemaki –
4 Me bibi ga na yalomudou, dina ni sega ni laurai, na kemudou totoka ni dou vakaiyautaki kemudou ena yalo malua, na yalomalumalumu, na bula oqo sa dau taleitaka na Turaga.
5 Era sa dau vaka talega kina o ira na yalewa yalosavasava ena gauna e liu, era sauni ira tu vakavinaka, ka salavata na nodra vakamalumalumutaki ira vei ira na watidra; kei na nodra rerevaka tiko na Kalou.
6 Me vakataki Sera ena nona dokai Eparama, ka dau kacivi koya noqu turaga, sai kemudou na nodrau kawa, mo dou dau caka vinaka, ka sega ni rerevaka e dua na ka e dauveivakarerei.
7 Oi kemudou talega na tagane vakawati, dou tiko vata kei na watimudou ena bula ni veirogorogoci, dou dau doka na watimudou, ni sa ka malumalumu sara o koya, ni dou sa tautauvata kecega ena mata ni Turaga, me kua ni drau dau tarova na nomudrau masu vata. Kacivi Ki Na Veivakalouvinakataki
8 Na kenai otioti, vei kemudou kece me tautauvata na nomudou vakasama, ka dou veilomani vakai kemudou; ka dou veilomani sara ga me vaka na veitacini, ka dou dau yalovinaka, ka dau veiciqomi;
9 Dou kakua ni dau sauma na ca kina ca, se mo dou veivakasesewani ena vuku ni veivakasesewani, ia mo dou dau vakadrodroya tikoga na veivakalouvinakataki ni dou sa kacivi me vaka kina, mo dou na taukena kina nai votavota ni veivakalouvinakataki.
10 O koya, "Sa vinakata na bula Ka me raica na veisiga vinaka, Me tarova na yamena mai na ca, Kei na gusuna, me kua ni vosataka na veivakaisini.
11 Me lesu tani mai o koya ena ca ka kitaka na ka vinaka; Me vakasaqara vagumatua na vakacegu ka muria sara.
12 Ni matana na Turaga sa rai matua tikoga vei ira na yalododonu, Ka sa dautadola tu ga na daligana me rogoca na nodra masu; Ia o ira nai valavala ca sa cata sara ga na Turaga me dau raici ira."
13 O cei me na vakacacani kemudou ni dou sa bulataka tiko na ka vinaka?
14 Ia kevaka dou sa vakararawataki ena vuku ni bula dodonu, dou kua ni leqa, dou na kalouvinaka kina. "Dou kua ni taqaya ena nodra vei vaka rerei, se mo dou druka kina."
15 Ia dou qarauna na yalomudou ni sa i tikotiko ni Kalou o Jiova, ka mo dou tu vakarau me sauma na vei taro ena tarogi yani vei kemudou, baleta nai nuinui dou sa vakanuinui tiko kina, ena rere kei na yalomalumalumu.
16 Me vinaka na nomudou lewa e loma, ni ra na dusi kemudou ni dou tamata ca, ka me qai yaco ga mera na madua mai.
17 E vinaka cake, mo dou vakacacani ena lewa ni Kalou, ka e ca sara ke dou cakava na veika ca.
18 Sa vakararawataki oti o Karisito ena vuku ni valavala ca, o koya na yalododonu ena vuku ni sega ni yalododonu; me tuberi keda lesu vua na Kalou, ni sa vakamatei na yagona, ia sa bula na yalona.
19 O koya talega sa lako ka laki vunau vei ira na yalo era vesuki tu ena vale ni veivesu –
20 Ena gauna e liu e levu na talaidredre, ka ni sa waraki ira tiko na Kalou mera veivutuni, ni taya tiko na waqa o Noa; a qai lewe vica sara e vakabulai, oiratou ga na vuvale nei Noa, mai na veivakamatei ni wai.
21 E dua talega na vakatautauvata ni veivakabulai na papitaiso (na papitaiso e sega ni kena kau tani na i valavala ca mai na yagoda, ia ena noda vakaraitaka ga i vuravura na veivakasavasavataki e vakayacora na Kalou ena noda bula e loma), e na kaukauwa ni tucake tale i Jisu Karisito.
22 A sa lako cake ki lomalagi ka la'ki tiko ena liga i matau ni Kalou, ka sa lewa tu o Koya na kaukauwa ni agilosi, kei na nodra kaukauwa o ira era lewa tu na veiyasana vakalomalagi.


Chapter 4

1 Pita 4 1 O koya oqo, ni sa vakararawataki o Karisito ena vuku ni noda i valavala ca, vei keda me dei tiko ena noda vakasama, o koya e vakararawataki ena yagona, ka e sega vua nai valavala ca.
2 E sega ni mai bula tiko o koya e vuravura ena nona bula taucoko, me baleta na gagadre ca ka tu vei keda na tamata, ia ena vuku ga ni lewa ni Kalou.
3 Vei keda, eda a bula tu mai ena dua na gauna ena bula vakasisila ka tekivu sara mai vei ira noda qase – eda a dauvakacaca, dau gagadre ca, dau mateni, dau veivala, dau marau vakalialia, dau qarava na ka buli.
4 Na ka oqo, era vosavakacacataki kemudou kina, ni ra sega ni raica mo dou bulataka na bula era vakayacora tiko.
5 Ka era na tu taucoko, ena matai Koya ena lewai ira na bula kei ira na mate, ka mera na vakatusai ira vua.
6 Ena vuku ni ka oqo, ea laki vunautaki kina nai tukutuku vinaka vei ira na mate, ni ra na lewai talega ena vuku ni nodra i valavala; ka tautauvata kei ira na bula tiko, ia mera bula vua na Kalou ena yalodra.
7 Ia sa voleka sara nai vakataotioti; o koya mo dou gumatua sara ka dau yadrava na masumasu.
8 Na ka kece, me kua ni guilecavi mo dou dau veilomani vakaikemudou, "ni sa ubia na levu ni valavala ca na loloma."
9 Dou dau loma vinaka, ka me kakua ni dou dau veikaseti vakai kemudou.
10 Me vaka dou sa dui ciqoma nai solisoli, dou vakayagataka sara vei kemudou, me vaka na dauveiqaravi vinaka ni kila tiko na loloma ni Kalou.
11 Kevaka e dua me vosa, me vosa mai ena vosa ni Kalou. Kevaka e dua sa via cakava na cakacaka, me kitaka sara ena kaukauwa ni Kalou sa sovaraki mai, na veika kece me rokovi na Kalou, ena vuku i Jisu Karisito, o koya sa dodonu me nona na vakarokoroko kei na lewa ena gauna kecega ka sega ni mudu. Emeni.
12 Vei kemudou sa lomani, dou kakua ni leqa taka na kaukauwa ni veivakacacani vei kemudou, me vaka dou sa vakadinadinataka tiko oqori;
13 Ia ka mo dou reki ga, ni dou sa vakaitavi vata kei Karisito ena vakacacani, ni na vakaraitaki mai na nona i ukuuku vei kemudou, dou na qai reki vakalevu sara kina.
14 Kevaka dou sa vakacacani ena vuku i Karisito, dou sa kalouvinaka kina, ni sa tiko vei kemudou na yalo e uasivi, ka yalo ni Kalou. Na ka era cakava era vosavakacacataki Koya, io vei kemudou me vakarokorokotaki tikoga o Koya.
15 Me kakua ni dua vei kemudou, me laba, se butako, se vakarau kaukauwa, se me la'ki lewa tale e dua na bula ni dua na tamata.
16 Kevaka e dua sa yaco vua na ka rarawa e vinaka mo vakararawataki ena vuku i Karisito, kakua ni madua kina; mo vosota ga, me rawa ni vakarokorokotaki kina na Kalou.
17 Ni na yaco mai na gauna, me tekivu kina na veilewai ena vale ni Kalou; kevaka me sa vakayacori vei keda, cava na nodra i tinitini o ira era sega ni via rogoca na vosa ni Kalou?
18 Vakacava mada "Kevaka sa rui savasava sivia na tamata lotu, Me ra na qai bula vakaevei na sega ni lotu, kei ira nai valavala ca?"
19 O koya oqo, o ira kece era vakacacani ni ra caka vinaka tiko, me vaka na lewa ni Kalou, me ra solia taucoko na yalodra vua na dauveibuli, ena nona yalodina vei ira kecega.


Chapter 5

1 Pita 5 1 Au sa kerea vakabibi vei ira na qase ni lotu era tiko vei kemudou, ni'u qase ni lotu talega oi au, kau sa tu kina oqo, me'u vakadinadina bula ena vuku ni nona vakacacani o Karisito, ni'u na vakaivotavota talega ena nona i ukuuku ena siga ena vakatakilai mai kina.
2 Dou vakania na qele ni sipi ni Kalou era sa tiko kei kemudou, ka dou maroroi ira ni dou qaravi ira tiko, ka sega ena vuturi, ia ena yalo e taleitaka, ka sega ni sega ga kina nomudou taga, ia me lala talega kina nomudou taga.
3 Dou kakua ni via boso ni cakacaka vei ira dou liutaka tiko, ia dou i vakarau vei ira na qele ni sipi;
4 Ni na rairai mai nai vakatawa levu, ena qai mai soli kina vei kemudou na i sala vakaiukuuku ka sega ni takali rawa na kena serau.
5 Vei kemudou na cauravou, dou vakarorogo vei ira nomudou qase, io, mo dou veirogorogoci vakai kemudou, ka dou vakasulumi kemudou ena yalo malumalumu, ni sa "Dau vorati ira na viavialevu na Kalou, Ia sa dau lomani ira na yalomalua."
6 O koya oqo mo dou qai vakamalumalumutaki kemudou ena ruku ni liga kaukauwa ni Kalou, ena qai laveti kemudou cake o Koya ena nona gauna ga.
7 Dou vakataqara vua nomudou leqa kecega, ni sa daunanumi kemudou o Koya.
8 Dou tu vakarau, ka yadra tiko; ni sa veilakoyaki voli na kemudou meca na tevoro, me vaka na laione sa tagi vakadomoilevu, ni vakasaqara tiko na kena.
9 Dou vorati koya, ka me tudei nomudou vakabauta, ka mo dou kila ni sega ni o kemudou ga, dou sotava tiko na veivakacacani, o ira talega na wekamudou era tu ena veiyasai vuravura eso.
10 Ia me nomudou na loloma ni Kalou, o koya sa kacivi keda ena nona bula vakai serau, ena vuku i Jisu Karisito, ena nomudou vosota vakalekaleka wale sara, me rawa ni dou vakataucokotaki, vakadeitaki, vakaukauwataki ka vakavinakataki.
11 Me Nona tikoga na lagilagi, kei na lewa ena veigauna kecega me sega ni mudu. Emeni.
12 O Silivenuse, o koya na wekada yalodina me vaka noqu kilai koya, au sa vola ka vakamacalataka yani me kauta yani vei kemudou, mo dou vakayacora ka vakaraitaka, na dina ni Kalou, kei na Nona loloma dou bula tiko kina.
13 Sa loloma yani vei kemudou nai soqosoqo lotu mai Papiloni, o koya dou sa veiwekani vata; ka vaka
14 talega kina o Marika na luvequ. Dou dui veireguci vakai kemudou ena i regu ni loloma, ka me nomudou kece na vakacegu vei kemudou sa tu vata kei Jisu Karisito. Emeni.