2 Pita

1 2 3


Chapter 1

1 Oi au o Saimoni Pita, na i talatala kei na apositolo i Jisu Karisito, ki vei ira sa tu vei ira na vakabauta dina me vaka sa tu talega vei keitou, ena yalododonu ni Kalou kei Jisu Karisito Na i Vakabula.
2 Me vakalevutaki vei kemudou na loloma kei na vakacegu, ena nomudou sa kila na Kalou kei Jisu na Noda Turaga.
3 Ni sa solia mai vei keda o Koya ena nona kaukauwa vaKalou na ka kecega sa yaga ena noda bula vakayago kei na noda bula vakayalo talega, ni da kilai Koya sa kacivi keda kina vanua vakaiukuuku kei nai valavala vinaka kecega.
4 Ka sa yalataki talega vei keda na veika e levu ka talei sara, ena noda na taukena na vei yau talei vakayalo mai lomalagi, ena vuku ni noda sa tawasei keda tani mai na vei gagadre ca vaka vuravura.
5 Ia ena vuku ni ka oqo, mo dou vakaikuritaka na vakabauta e nai valavala vinaka, nai valavala vinaka e na kilaka,
6 Na kilaka e na yalomalua, na yalomalua ena vosota, na vosota ena bula vaKalou.
7 Na bula e vakalou ena veilomani vakaveitacini, na veilomani vakaveitacini ena loloma.
8 Kevaka sa tu vei kemudou na veika oqo, ena nomudou kila na noda Turaga o Jisu Karisito, ena dei ka vuavuai vinaka kina na nomudou bula.
9 Vei koya sa sega vua na bula oqo, sa sega ni rai yawa ka mataboko,sa guilecava talega ni sa vakasavasavataki oti na nona i valavala ca.
10 O koya oqo, oi kemudou na veiwekani, dou vakataudeitaki kemudou vinaka, ena vuku ni nomudou kacivi kei na nomudou digitaki, kevaka mo dou bulataka tiko na bula e vakalou, dou na sega sara ni malumalumu se bale.
11 Dou na curu doudou talega kina matamata ni koro Sega ni mudu, ena vuku ni noda Turaga kai Vakabula o Jisu Karisito.
12 E na vuku ni ka oqo au na sega ni na cegu kina me'u na vakananumi kemudou ena vei ka oqo, e dina mada ga ni dou sa kila ka dei tu ena i vakavuvuli dina.
13 Io, au vakasamataka ni sa dodonu vinaka, ni'u bula tiko ena noqu vale vakacevaceva oqo, me'u vei vakananumi tiko yani ena vuku ni ka oqo.
14 Ni'u sa kila sa voleka noqu biuta tani na noqu vale vakacevaceva oqo, me vaka na nona vakaraitaka oti vei au o Jisu Karisito na noda Turaga.
15 Au sa saga tiko ena noqu i gu, me'u vakota rawa e yalomudou na veika oqo, ni bera na noqu toki yani.
16 Keitou a sega ni vakadamudamuria e dua na vosa vaqaseqase ni veivakacalai mai vei ira na tamata eso, ena gauna keitou tukuna kina vei kemudou mo dou kila na kaukauwa kei na nona lako mai na noda Turaga o Jisu Karisito, ia keitou a bula vata sara ga, ka vakadinadinataka ena mata i keitou na Nona i ukuuku vaka Turaga.
17 Keitou a tu ka vakadinadinataka na kena rogo mai lomalagi na domo vakaTuraga ka dokai, mai vua na Kalou o Tamada vua na Luvena, ena i ukuuku dina vakaTuraga, ka vaka; "O koya oqo na Noqu gone ni toko au sa dau marautaka vakalevu."
18 Keitou a rogoca dina na domo oqo ni rogo mai lomalagi, ena gauna keitou tiko vata kina kei Koya, mai na ulunivanua tabu.
19 Vei keda sa vakadinadinataki koya oti tu na vei vosa ni parofisai oqo, kua tale ni dou cakitaka mo dou rarama yani ena vanua butobuto, ka dou waraka tiko kina na kena kida mai na mataka, me na cadra mai kina e yalomudou na kalokalo i volasiga;
20 Ka mo dou kila oqo, ni sega ni dua na parofisai ena i Vola Tabu me tukuna e dua na ka e sega ni vakadinadinataki,
21 Ni sa sega ni vu ni parofisai ena gauna e liu ena lewa ni tamata, sa vosa ga na tamata yalosavasava ni Kalou me vaka sa liutaki ira kina na Yalo Tabu.


Chapter 2

1 Sa dau tu talega na parofita vakailasu vei ira na noda qase, me vaka ni kua e tu nai vakavuvuli ni veivakacalai vei kemudou, era na vakacuruma tiko mai vakamalua nai vakavuvuli me yaco kina na veitawasei, era na cakitaka mada ga na veivakabulai levu mai vua na Kalou, io era sa nakita tikoga mera na rusa vakaidina kina.
2 Ena lewe levu era na muria na nodra bula vakasisila, ni ra biliga ka vosavakacacataka na i vakavuvuli dina.
3 Ena kocokoco ni nodra bula era na cavuta vakaukauwa vei kemudou na vosa ni veicavilaki; na nodra cakacaka ena veika era vakayacora, se bera ni bau vakavotukana me ra rawata e dua na ka ena vei gauna sa oti, na nodra vakarusai ena vakayacori ga.
4 Kevaka me sa rawa vua na Kalou me tauri ira na agilosi era i valavala ca, ka vesuki ira ena sinucodo ka kolotaki ira yani kina butobuto mai eli, mera waraka tiko kina na nodra veilewai;
5 Ka sega talega ni lomani ira na lewe i vuravura, ia ka qai vakabulai Noa ga kei iratou nona vuvale, o koya na dauvunau yalododonu, ka vunautaka tiko na waluvu me na vakarusai kece kina o ira na i valavala ca e vuravura.
6 A sa vukica talega na koro levu o Sotoma kei Komora me dravusa, me kakua tale ni qai kilai, me rawa kina ni vakaraitaka tiko e dua nai dusidusi, vei ira kece na tamata i tovo ca.
7 Sa vakabulai o Loti na yalododonu, ena nona sega ni taleitaka na nodra i vakarau vakasisila na tamata i valavala ca.
8 E laki tiko sara ga o koya vata kei ira na tamata i valavala ca, ka sotava tiko kina ena nona yalododonu, na bula ca me rogoca, ka raica tiko e veisiga.
9 Na Kalou sa dau kila na sala mera na vakabulai kina o ira na tamata ni Kalou, mai na veivakacacani ni vuravura, ka tauri ira tale tu ga vakamalua nai valavala ca, me ra waraka tiko kina na siga ni nodra cudruvi.
10 Ka vakauasivi vei ira na bula lako ena gagadre ca ni yagodra, ka ra kitaka tu ga na ka sa dodonu vei ira. Era sega ni bau via rerevaka mera vosa vakacacataki ira na veiliutaki;
11 O ira mada ga na agilosi, e tu vei ira na kaukauwa vakaitamera mera cakava na ka era via cakava, io e sega, ni ra via dusia e dua ena mata ni Turaga ena nodra cala.
12 Ia o ira oqo, sa vaka na manumanu kila ni vakarau vakamatei, e ra vosataka tiko na ka ca ka sega tu ni kila na kenai balebale, io, era na mate ena nodra i tovo ca.
13 Era na taura nai sau ni sega yalododonu, ena nodra vakamarautaki ira ena veimarau ca. Era sa tauvi duka ka qeleqelewa mai na nodra vakacalai, era qai mai via veitokani vata kei kemudou.
14 Na matadra sa mata ga ni dauyalewa ka sega ni oti rawa nai valavala ca, era vakacalai ira na tamata sega ni kila ka. Na yalodra sa matau tu mai ena veivakaisini, e ra luve ni dauveivakarusai.
15 Era sa butusevata na sala dina ka lako cala, era sa muria nai valavala i Pelami na luvei Posori, ena nona domona me taura nai sau, mai vua e dua na tamata sega ni yalododonu.
16 Ia sa qai vunauci vakaukauwa ena nona cala: mai vua e dua na asa galu me vosa mai ena domo vakatamata, me dusimaka vua na parofita yalowai oqo na nona leqa.
17 Sai ira oqo na tobu wai sa maca tu, na o ka veivukayaki ena cagi kaukauwa, ni sa waraki ira tu na butobuto loaloa ka Sega ni mudu.
18 Era dau cavuta eso na vosa kamikamica ka tu e loma na gaga, ka ra dauveirawai ena gagadre ni ka vakayago, vei ira era sa drovaka mai na i tovo ca, ka ra sa vinakata na bula.
19 Era sa qai yalataka tiko na sautu kei na galala, o ira mada ga era bobula tu ni veidabui ni sa vakatotogana na tamata na ka e vesuki kina.
20 Kevaka era sa drovaka na veivagagai ni vuravura oqo, ena nodra sa kila nai vakabula na Turaga o Jisu Karisito, sa qai tu tale e dua na vatu ni tarabe mera na ulabaleta, ni vinaka cake sara mai nai tekitekivu ka ca vakalevu sara na i otioti oqo.
21 Ni sa vinaka cake vei ira me ra kakua ni kila nai valavala dodonu, ka ca mera kila mada, ka qai vuki tani tale mai, ena i vunau tabu era sa kila oti.
22 Ia sa yaco ga vei ira me vaka na dina ni vosa vakaibalebale, "sa lesuva tale na koli na nona lua," kei, "na vuaka, ni sa sili oti, sa lako tale me la'ki qiliraki koya ena soso."


Chapter 3

1 Oi kemudou na wekaqu, oqo sai karua ni noqu i vola yani vei kemudou, (nai vola ruarua oqo na noqu i vola ni veivakayadrati mo dou dau nanuma tiko).
2 Ka mo dou vakananuma na vosa era sa vosataka e liu na parofita yalosavasava, kei na neitou veivakaroti tiko, nai apositolo ni noda Turaga ka noda i Vakabula,
3 Mo dou kila tiko: ni ra na lako mai na dauveiveretaki ca ena i otioti ni gauna oqo, era na vakaivalavalataki ira ena nodra gagadre ca,
4 Era dau tukuna, " e vei na vosa yalayala ni na lako mai? E ra sa mate yani na qase, e sega ni dua na veisau e yaco ka tekivu mai nai vakatekivu."
5 Era sega ni vakasamataka: ni vosa ni Kalou e tekivu kina na lomalagi mai nai vakatekivu, ka tawasea talega na vanua mamaca mai na wai, ka sega ni yali na wai mai vuravura,
6 E a vakarusai vuravura, ena kena luvuci ena waluvu mai na kaukauwa ni wai.
7 Ia o lomalagi kei na vuravura sa tu e daidai sa maroroi tu ga ena vosa vata o ya, sa maroroi ki na bukawaqa me yacova na siga ni lewa, kei na nodra vakarusai laivi na tamata i valavala ca.
8 Ia, oi kemudou na wekaqu lomani, mo dou kua sara ni guilecava e dua naka oqo, vua na Kalou, e dua na siga e tautauvata vua ni dua na udolu na yabaki, kei na yabaki e dua na udolu, e tautauvata ga vua ni dua na siga
9 E sega ni rawa ni daro na nona vosa yalayala na Turaga, me vaka era nanuma tiko eso, ia sa vosoti keda tikoga vakamalua ni sa sega ni vinakata tiko meda rusa, me da veivutuni taucoko ga na kai vuravura.
10 Ia na siga ni Turaga ena lako mai me vaka na daubutako ena bogi, ena vakarusai na maliwa lala kei na veika e tevuki tu ena vei lomalagi, ena domo levu ni rorogo ni kurukuru ena waicala talega na veika ka tauri vuravura tu me bula kina; ena kama yavu o vuravura kei na ka kecega sa tu kina.
11 O koya oqo, ni dou sa raica na kena vaqeavutaki o vuravura ena dua ga na loma ni gauna lekaleka, nai valavala cava dou na bula kina mo dou maroroya kina na savasava vakalou.
12 Ni dou sa dauwaraka ka daugadreva sara na kena yaco mai na siga ni Turaga, ena yali kina o lomalagi ni sa kama, ena waicala talega na veika e tauri vuravura tu ni sa vakamai?
13 Ia kivei keda; me vaka nona vosa ni yalayala, eda sa waraka na lomalagi vou kei na vuravura vou, ni ra na tiko kina nai valavala dodonu.
14 O koya, oqo, oi kemudou na wekaqu, ni dou sa vakanuinuitaka tiko na veika oqo, dou gumatua Me raici kemudou o koya, ni dou maroroi kemudou tiko mai na dukadukali kei na ka vakasisila ni vuravura.
15 Ka mo dou kila na vosota vakadede ni noda Turaga eda sa vakabulai kina – me vaka na nona vosota talega na wekada o Paula, ena nona volavola mai ka tukuna tiko kina na veika e sotava, e vosota ena vuku vaKalou e soli vua.
16 Me vaka talega ena nonai vola kecega, ni sa tukuna na veika oqo a sa tu kina na ka eso e dredre me kilai, ia o ira era sa sega so ni vuku ka sega ni lomadei, era sa kauta vakatani me vaka talega kina nai Vola Tabu kece, me ra na mate kina.
17 O koya oqo, oi kemudou na wekaqu, ni dou sa kila vinaka mai liu, dou qarauni kemudou vinaka ena nomudou tudei, ni rawa mo dou rawai ena nodra veitemaki nai valavala ca;
18 Ia dou tubu cake ena loloma kei na kila sara na noda Turaga o Jisu Karisito nai vakabula. Me soli vua na rokovi ena gauna oqo ka me sega ni mudu. Emeni.