1 Joni

1 2 3 4 5


Chapter 1

1 Na ka e se tu sara mai ena i vakatekivu, o koya keitou a rogoca, ka keitou a raica ena matai keitou, o koya keitou a vakaraica matua, ka tara sara na ligai keitou, sa i koya na vosa ni bula –
2 Na bula e vakaraitaki koya mai, ka keitou sa raica, ka kena i vakadinadina, ka tukuna vei kemudou na bula e sega ni mudu, ka dau tiko vata kei tamana sa mai vakatakilai Koya vei keda.
3 O koya keitou a raica, ka rogoca ka tukuna vei kemudou, ni dodonu mo dou mai veitokani kei keitou; na neitou veitokani, keitou veitokani dina kei tamada kei na luvena o Jisu Karisito.
4 Na ka oqo keitou sa volavola yani kina me rawa ni vakalevutaka na nomudou reki.
5 Oqo nai tukutuku keitou rogoca mai vei koya ka tukuna vei kemudou, ni sa rarama na Kalou ka sa sega sara vua na butobuto.
6 Kevaka eda tukuna tiko ni da veitokani kei koya, ka bula vakabutobuto tiko, eda sa lasu ga ka sega ni bulataka tiko na dina.
7 Ia kevaka eda bula tiko ena bula ni rarama, ni sa rarama o Koya, ka da veitokani kei ira na wekada, na dra i Jisu Karisito na luvena sa vakasavasavataki keda oti mai na noda i valavala ca.
8 Kevaka eda tukuna ni sega na noda i valavala ca, eda vakaisini keda tikoga, a sa sega ni tu vei keda na dina.
9 Kevaka eda sa vakatusa na noda i valavala ca, sa yalodina ka yalododonu o Koya me vosota ka bokoca na noda i valavala ca, ka vakasavasavataki keda mai na ka kecega sa sega ni dodonu.
10 Kevaka eda tukuna tiko ni da sega ni valavala ca, eda sa lasu tiko vua, ka sa sega ni tu vei keda na Nona vosa.


Chapter 2

1 Vei kemudou na luvequ lomani, au sa vola vei kemudou na veika oqo, me kua kina ni dou i valavala ca. Kevaka sa valavala ca e dua, sa dua na noda dau – tataro vei tamada, o Jisu Karisito na yalododonu.
2 O Koya vakataki Koya sa mai buluta na noda i valavala ca, ka sega ni noda ga, ia o ira kece talega na lewe i vuravura.
3 Ena ka oqo eda sa kila kina ni da sa kilai Koya, kevaka eda muria nona i vunau.
4 Ke dua e tukuna, "Au kilai Koya," ka sega ni muria na nona i vunau, e tamata lasulasu, ka sega ni tu vua na dina.
5 Ia o koya sa muria na nona vosa, sa tu vakaidina vua na loloma vakalou. Ena ka oqo eda sa kila kina ni da sa tuvata kei Koya.
6 O koya e tukuna ni rau sa tuvata kei Koya, e dodonu me vakaivalavalataki koya me vaka na Nona i valavala.
7 Oi kemudou na wekaqu, au sega ni vola vei kemudou e dua na vunau vou, ia nai vunau makawa ga mai liu dou a dau rogoca. Na i vunau makawa oqo na vosa dou a rogoca mai nai vakatekivu.
8 Me'u tukuna tale, e dua nai vunau vou au vola vei kemudou, na ka oqo sa dina vua, vei kemudou talega, baleta na butobuto sa yali yani, ka sa cilavi keda tu oqo, o koya na rarama dina.
9 O koya e tukuna ni sa tu vua na rarama, ka qai cata tiko na wekana, o koya e se tu vinaka sara tuga ena butobuto me yacova mai oqo.
10 O koya sa lomana na wekana sa tuvata kei na rarama, ena sega ni rawa ni dua na ka ni veivakaleqai mena vakamalumalumutaki koya.
11 Ia o koya e cata na wekana e tu sara ga e na butobuto, ka bula lako ena butobuto, ena sega ni kila na vanua e lakova tiko, baleta na butobuto sa vaka matabokotaka na matana.
12 Au vola yani oqo vei kemudou, na luvequ, baleta na nomudou i valavala ca sa bokoci ena vuku ni yacana.
13 Au vola yani oqo vei kemudou, na qase, baleta ni dou sa kilai Koya ka bula mai nai vakatekivu. Au vola yani oqo vei kemudou na cauravou, ni dou sa vakamalumalumutaka na vuni ca. Au sa vola yani oqo vei kemudou, na gone lalai, ni dou sa kilai tamada.
14 Au vola yani oqo, vei kemudou na qase, ni dou sa kila o koya ka bula mai nai vakatekivu. Au vola yani oqo vei kemudou na cauravou, ni dou sa kaukauwa, ka tu vei kemudou na vosa ni Kalou, ka dou rawa ni vakamalumalutaka na kaukauwa ni vuni ca.
15 Dou kakua ni lomani vuravura, se na veika sa vaka vuravura, kevaka e dua e lomani vuravura, na loloma i tamada sa sega ni tiko vua.
16 Na veika kece etu e vuravura – na gagadre ca ni yago, na gagadre ca ni mata, kei na bula dokadoka – na ka oqo e sega ni mai vei tamada, ia sa mai vuravura ga.
17 O vuravura sa tekivu me yali tiko yani, kei na kena gagadre ca taucoko; ia o koya ga sa cakava na loma ni Kalou ena tudei me sega ni mudu.
18 Oi kemudou na luvequ, sai otioti ni gauna oqo; me vaka dou sa rogoca ni sa lako tiko mai na meca i Karisito, me vaka ni sa levu sara tuga oqo na meca i Karisito, ka me rawa ni da kila kina, ni sai vakataotioti ni gauna oqo.
19 Era lako tani yani mai vei keda, ia era sega ga ni wili vei keda, kevaka mera a wili vei keda kera a tikoga kei keda, ia nira sa lako tani era na vakaraitaki ira ga mai, ni sega sara ga ni dua vei keda me tuvata kei ira.
20 Ia dou sa lumuti oti tu, mai vua na yalosavasava, mo dou kila kina na ka kecega.
21 Au sega ni vola yani oqo vei kemudou baleta ni dou sega ni kila na dina, ia baleta ga ni dou sa kila tiko ka sega ni dua e rawa ni lasu ni sa tiko na dina.
22 O cei na lasulasu ia, o koya ga sa cakitaka ni o Jisu e Karisito? O koya na meca i Karisito, e cakitaka na tamada kei na luvena.
23 O koya e cakitaka na luvena, sa sega ni tu vua o Tamada; o koya e vakatusa na luvena, sa tu vua o Tamana.
24 O koya oqo me tudei ena yalomudou, na ka dou a rogoca mai na vakatekivu kevaka me sa tiko vei kemudou na ka dou a rogoca mai nai vakatekivu, na luvena kei tamana e rau na tu vakaidina vei kemudou.
25 Kei na ka sa yalayala oti tu kina o koya me solia vei keda – na bula sega ni mudu.
26 Na veika oqo au sa volavola kina vei kemudou, ena vukudra na dauveivakaisini vei kemudou.
27 Ia nai lumu dou sa lumuti tu kina mai vei koya, sa tu qori vei kemudou, e sega tale ni qai yaga me dua e vakavulici kemudou; ia na veilumuti vata ga ka vakavulici kemudou mo dou kila kina na veika kecega, e dina taucoko, ka sega ni ka lasu, me vaka ga nonai vakavuvuli vei kemudou, mo dou tu ga vua.
28 Oqo, vei kemudou na luvequ, mo dou tu dei vua, ena gauna ena rairai mai kina, meda sa na vakarau tu ka me kakua na madua vei Koya ena nona lako mai.
29 Kevaka dou kila ni sa yalododonu o koya, mo dou kila ni o ira kece era bulataka na yalododonu era vakasucumi vou mai vua.


Chapter 3

1 Raica na kena levu ni loloma sa vakayacori vei keda mai vei tamada, meda vakatokai kina meda luve ni Kalou! O koya oqo era sega ni kilai keda kina o vuravura, ni ra sega ni kilai Koya.
2 Kemudou na luvequ, eda sa luve ni Kalou; e se bera ni vakatakilai mai eda na vakaevei ena siga mai muri, ia eda sa kila tikoga ena gauna sa vakaraitaki Koya mai kina, eda na qai tautauvata kei Koya, ka ni da sa qai raici Koya ena matada dina.
3 O koya sa tu vua nai nuinui oqo ena vakasavasavataki koya, me vaka ni sa savasava sara tu ga o koya.
4 O koya yadua sa i valavala ca sa talaidredre kina i vakavuvuli dina, ni sa valavala ca na talaidredre ki na i vakavuvuli dina.
5 Ni dou sa kila ni sa vakatakilai Koya o Koya, ena nona mai bokoca na noda i valavala ca, ka e sega tu vua na i valavala ca.
6 O koya e tu vata kei Koya ena sega ni valavala ca. O koya e valavala ca e se bera ni rogoci Koya se kilai Koya.
7 Oi kemudou na luvequ, me kua ni dua me dabui kemudou. O koya sa i valavala dodonu, sa dodonu ga, me vaka ga na nona valavala dodonu.
8 O koya sai valavala ca, sa luve ni tevoro, ni sai valavala ca na tevoro mai nai vakatekivu. Oqo na vuna e lako mai kina na luve ni Kalou, me mai vakarusa na cakacaka ni tevoro.
9 O koya yadua e sucu vou mai vua na Kalou e sega vei koya nai valavala ca, baleta ni sa sucu vou mai vua na Kalou.
10 Na ka oqo ena vakatakilai Koya ga na luve ni Kalou kei na luve ni tevoro; ka sa sega ni luve ni Kalou o koya e sega ni valavala dodonu, kei koya talega e sega ni lomana na wekana.
11 Oqo nai tukutuku dou a rogoca mai nai vakatekivu me da veilomani vakaveiwekani.
12 Ka me kua ni vakataki Keni, o koya sa yaloca vua na tacina ka oti qai vakamatei koya. A cava e labati koya kina? Baleta ni valavala vakatani, o tuakana e valavala dodonu.
13 Dou kakua ni kurabui, na wekaqu, kevaka e cati kemudou o vuravura.
14 Ka me da kila ni da sa vakaleleci tani mai na mate kina bula, me da lomani ira na veiwekani ka o koya e sega ni lomana na wekana sa tiko ga ena mate.
15 O koya e cata na wekana sa daulaba, ka mo dou kila, o ira na daulaba e sega ni nodra na bula e sega ni mudu.
16 Ena ka oqo eda kila dina kina na loloma, ka ni solia na Nona bula ena vukuda. Ka sa dodonu vaka kina meda solia na noda bula ena vukudra na wekada.
17 Ia o koya sa tu vua nai yau ni vuravura oqo, ka raica na wekana ni vakaloloma tu, ka sega mada ga ni bau kauwaitaki koya, e rawa vaka cava me tukuna ni tiko vua na loloma ni Kalou?
18 Oi kemudou na luvequ, meda kua ni vakaraitaka na loloma ena vosa walega se na yameda, ia ena cakacaka kei na dina.
19 Ena ka oqo eda sa kila kina ni sa tu vei keda na dina, ka vakadinadinataka na yaloda.
20 Kevaka e beitaki na yaloda, na Kalou e levu cake, mai na yaloda, ka kila na ka kecega.
21 Kemudou na luvequ, kevaka e sega ni beitaki na yaloda, eda sa tu vakarau vua na Kalou.
22 Na ka eda kerea vua ena solia vei keda baleta ni da maroroya na Nona i vakaro, ka cakava na ka sa vinakata o Koya.
23 Oqo na nona i vakaro: meda vakabauta na yaca ni luvena o Jisu Karisito ka veilomani, vakalevu sara, me vaka na Nona i vakaro vei keda.
24 O koya sa muria na Nonai vakaro sa tudei vei Koya, o koya talega ena tu vua. Ena ka oqo eda sa kila kina ni sa tu vei keda o Koya, ni sa tiko vata kei keda na Nona Yalo Tabu.


Chapter 4

1 Vei kemudou na luvequ, dou kakua ni vakabauta na yalo kecega, ia dou vakatovolei ira na yalo oqori, se ra yalo mai vua na Kalou se sega; baleta ni levu na parofita vakailasu era sa cowiri tu oqo e vuravura.
2 Ena ka oqo, dou na kila kina na yalo sa mai vua na Kalou; na yalo kece e vakatusa ni o Jisu Karisito sa yaco me mai tamata, na yalo oqo sa mai vua na Kalou.
3 Kei na yalo kece e sega ni vakatusa, ni o Jisu Karisito e sega ni bulataka na bula vakatamata na yalo oqo, e sega ni mai vua na Kalou. Oqo sara ga na yalo ni meca i Karisito, o koya dou sa rogoca ni na lako mai, a sa tu sara ga oqo vei keda e daidai.
4 Oi kemudou sa nona na Kalou, na luvequ, dou sa vakamalumalumutaki ira, baleta ni sa levu o Koya sa tiko vei kemudou, ka lailai o koya sa tiko e vuravura.
5 O ira era sa tamata vakavuravura. Ka ra na vosataka tikoga na veika vakavuravura, o vuravura ena vakarogoci ira,
6 Oi kemudou na luvequ sa nona na Kalou. O koya e kila na Kalou ena rogoci keda; o koya e sega ni nona na Kalou ena sega ni rogoci keda. Ena ka oqo eda na kila kina na yalo ni dina, kei na yalo ni veivakacalai.
7 Kemudou na luvequ, me da veilomani vakalevu, ni loloma sa mai vua na Kalou; o koya sa dauloloma sa vakasucumi vou mai vua na Kalou, ka sa kila na Kalou.
8 O koya e sega ni loloma e sega ni kila na Kalou, ka ni sa loloma na Kalou.
9 Ena ka oqo sa vakaraitaka mai kina vei keda na loloma ni Kalou, ni sa solia mai ki vuravura na luvena e dua bau ga, ka meda rawa ni bula ena vukuna.
10 Sai koya oqo na loloma, e sega ni noda lomana na Kalou, ia ena nona lomani keda, ka tala mai kina na luvena me mai buluta na noda i valavala ca.
11 Kemudou na luvequ, kevaka sa lomani keda tu vaka oqo na Kalou, sa dodonu vakalevu cake sara meda veilomani vaka i keda.
12 E sega ni se bau dua me raica na Kalou ena dua na gauna. Kevaka eda veilomani vaka i keda, na Kalou ena tiko kei keda, kei na nona loloma ena tudei vei keda.
13 Ena ka oqo eda sa kila kina ni da sa tuvata kei Koya, ka sa tu vei keda o Koya, baleta ni sa sovaraka o koya ki yaloda na yalona.
14 Ka eda sa raica ka tusanaka ni sa tala mai o tamada na luvena mei vakabula kei vuravura.
15 O koya yadua e vakatusa ni o Jisu e luve ni Kalou, ka e vakaraitaka ni Kalou e tiko vua, o koya talega e tu vata kei na Kalou.
16 Ka eda rawa ni kila ka vakabauta na nona lomani keda na Kalou. Na Kalou sai koya na loloma, o koya e tu vua na loloma, e tu vua na Kalou, ka rau sa dua vata kei na Kalou.
17 Na loloma sa vakayacora vei keda meda yaloqaqa ena siga ni veilewai; ni sa vakakina o Koya, kei na noda bula qaqa e vuravura
18 Na loloma e sega ni kila na rere; ia na loloma e taucoko e vakayalia na rere, baleta na rere edau veivakatotogani. Ia o koya e se rere tikoga e sega ni tu vua na loloma.
19 Eda lomani Koya baleta ni a lomani keda e liu o koya.
20 Kevaka e dua e tukuna, "Au lomana na Kalou," ka cata na wekana, o koya na tamata lasulasu; baleta na wekana e rau veirai tikoga e veisiga, qai rawa vakacava vua me lomana na Kalou ni sega ni rawa ni raica e matana.
21 Oqo nai vakaro sa tau mai vua, me baleti keda; o koya e lomana na Kalou e dodonu me lomana talega na wekana.


Chapter 5

1 O koya yadua e vakabauta ni o Jisu na Karisito e sucu vou mai vua na Kalou, o koya yadua sa lomana o koya sa vakatubura, sa lomani koya talega o koya sa vakatuburi.
2 Ena ka oqo eda sa kila ni da sa lomani ira na luve ni Kalou, ni sa lomana na Kalou ka muria na nona i vakaro.
3 Oqo na loloma vua na Kalou, me maroroi nona i vakaro. Na nona i vakaro e sega ni dua na kena i colacola.
4 Ni sa rawai vuravura o koya yadua sa vakasucumi vou mai vua na Kalou. Sa yaco oti na qaqa ka sa vakamalumalumutaki oti kina o vuravura – e na noda vakabauta.
5 O cei sa vakamalumalutaki vuravura, o ira duadua ga era vakabauta ni sa luve ni Kalou o Jisu?
6 O koya sa lako mai ena wai kei na dra; ka sega ni wai walega, ia na wai kei na dra. Sai koya na Yalo Tabu sai vakadinadina kina, baleta na Yalo Tabu na vuni dina.
7 Ni ratou sa lewe tolu sa tukutuku tiko mai lomalagi: O Tamada, na vosa kei na Yalo Tabu; ratou sa duavata na tolu oqo.
8 Ka ratou lewe tolu talega sa tukutuku tiko e vuravura: na Yalo, na wai kei na dra; ratou sa dua ga na tolu oqo.
9 Kevaka eda ciqoma na i tukutuku ni tamata, nai tukutuku ni Kalou e cecere sara, oqo nai tukutuku ni Kalou na nona vakaraitaki Koya na luvena ena veika e vakayacora.
10 O koya e vakabauta na luve ni Kalou sa i vakadinadina bula o koya; ka o koya e sega ni vakabauta na Kalou e sega ni dua na dina e tu vua, baleta ni sega ni vakabauta nai tukutuku sa solia vua na luvena, na Kalou.
11 Oqo nai tukutuku: sa solia vei keda na Kalou, o ya na bula e sega ni mudu, ia na bula oqo sa tu vua na luvena.
12 O koya ga sa tu vua na Luvena, sa tu vei koya na bula; o koya e sega ni tu vua na luveni Kalou, ena sega ni dua na bula me tu vua.
13 Au sa vola yani na veika oqo, vei kemudou sa vakabauta na luve ni Kalou, mo dou kila ni sa nomudou na bula e sega ni mudu, ka mo dou gumatua tikoga ni dinata na luve ni Kalou.
14 Na ka ga oqo eda sa dei kina vua, ni dua na ka eda kerea me vaka na lomana, sa rogoci keda o Koya.
15 Kevaka eda kila ni sa rogoci keda o Koya, e na ka eda kerea, eda na rawata dina na ka eda kerea.
16 Kevaka e dua sa raica tiko na wekana ni sa cakava tiko nai valavala ca ka sega ni na yaco kina vua na mate, me na masu o koya, ena qai solia mai na bula vei koya e valavala ca tiko ka sega ni na mate kina, e tiko nai valavala ca e yaco kina na mate. Au sega ni tukuna qo mo dou masulaka na veika o ya.
17 Na ka kece e sega ni dodonu e i valavala ca, ka e tiko nai valavala ca e sega ni yaco kina na mate.
18 Eda sa kila, ni sa sega ni valavala ca o koya e vakasucumi mai vua na Kalou; ia o koya sa sucu vou vua na Kalou mena maroroi koya, ka ni sega ni rawa ni tarai koya na vuni ca.
19 Eda kila ni da sa nona na Kalou, ia o ira na kai vuravura era tu ena ligana na tevoro.
20 Eda sa kila ni sa lako mai na luve ni Kalou ka solia vei keda na vuku, me rawa ni da kilai Koya kina na vuni dina; nida sa tuvata kei na vuni dina, o Jisu Karisito na luvena. Sai Koya oqo na Kalou dina, kei na vuni bula e sega ni mudu.
21 Oi kemudou na luvequ, dou maroroi kemudou mai na veimatakau. Emeni.